ਵੇਦਨਾਨੁਪਸ੍ਸਨਾਵਣ੍ਣਨਾ

੩੮੦. ਸੁਖਂ ਵੇਦਨਨ੍ਤਿ ਏਤ੍ਥ ਸੁਖਯਤੀਤਿ ਸੁਖਾ. ਸਮ੍ਪਯੁਤ੍ਤਧਮ੍ਮੇ, ਕਾਯਞ੍ਚ ਲਦ੍ਧਸ੍ਸਾਦੇ ਕਰੋਤੀਤਿ ਅਤ੍ਥੋ. ਸੁਟ੍ਠੁ ਵਾ ਖਾਦਤਿ, ਖਨਤਿ ਵਾ ਕਾਯਿਕਂ, ਚੇਤਸਿਕਞ੍ਚਾਬਾਧਨ੍ਤਿ ਸੁਖਾ. ‘‘ਸੁਕਰਂ ਓਕਾਸਦਾਨਂ ਏਤਿਸ੍ਸਾਤਿ ਸੁਖਾ’’ਤਿ ਅਪਰੇ. ਵੇਦਯਤਿ ਆਰਮ੍ਮਣਰਸਂ ਅਨੁਭਵਤੀਤਿ ਵੇਦਨਾ. ਵੇਦਯਮਾਨੋਤਿ ਅਨੁਭਵਮਾਨੋ. ‘‘ਕਾਮ’’ਨ੍ਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਇਰਿਯਾਪਥਪਬ੍ਬੇ ਵੁਤ੍ਤਨਯਮੇਵ. ਸਮ੍ਪਜਾਨਸ੍ਸ ਵੇਦਿਯਨਂ ਸਮ੍ਪਜਾਨਵੇਦਿਯਨਂ.

ਵਤ੍ਥੁਆਰਮ੍ਮਣਾਤਿ ਰੂਪਾਦਿਆਰਮ੍ਮਣਾ. ਰੂਪਾਦਿਆਰਮ੍ਮਣਞ੍ਹੇਤ੍ਥ ਵੇਦਨਾਯ ਪਵਤ੍ਤਿਟ੍ਠਾਨਤਾਯ ‘‘ਵਤ੍ਥੂ’’ਤਿ ਅਧਿਪ੍ਪੇਤਂ. ਅਸ੍ਸਾਤਿ ਭਵੇਯ੍ਯ. ਧਮ੍ਮਵਿਨਿਮੁਤ੍ਤਸ੍ਸ ਕਤ੍ਤੁ ਅਭਾਵਤੋ ਧਮ੍ਮਸ੍ਸੇਵ ਕਤ੍ਤੁਭਾਵਂ ਦਸ੍ਸੇਨ੍ਤੋ ‘‘ਵੇਦਨਾਵ ਵੇਦਯਤੀ’’ਤਿ ਆਹ. ‘‘ਵੋਹਾਰਮਤ੍ਤਂ ਹੋਤੀ’’ਤਿ ਏਤੇਨ ‘‘ਸੁਖਂ ਵੇਦਨਂ ਵੇਦਯਮਾਨੋ ਸੁਖਂ ਵੇਦਨਂ ਵੇਦਯਾਮੀ’’ਤਿ ਇਦਂ ਵੋਹਾਰਮਤ੍ਤਨ੍ਤਿ ਦਸ੍ਸੇਤਿ.

ਨਿਤ੍ਥੁਨਨ੍ਤੋਤਿ ਬਲਵਤੋ ਵੇਦਨਾਵੇਗਸ੍ਸ ਨਿਰੋਧਨੇ ਆਦੀਨਵਂ ਦਿਸ੍ਵਾ ਤਸ੍ਸ ਅਵਸਰਦਾਨਵਸੇਨ ਨਿਤ੍ਥੁਨਨ੍ਤੋ. ਵੇਗਸਨ੍ਧਾਰਣੇ ਹਿ ਅਤਿਮਹਨ੍ਤਂ ਦੁਕ੍ਖਂ ਉਪ੍ਪਜ੍ਜਤੀਤਿ ਅਞ੍ਞਮ੍ਪਿ ਵਿਕਾਰਂ ਉਪ੍ਪਾਦੇਯ੍ਯ, ਤੇਨ ਥੇਰੋ ਅਪਰਾਪਰਂ ਪਰਿਵਤ੍ਤਤਿ. ਵੀਰਿਯਸਮਥਂ ਯੋਜੇਤ੍ਵਾਤਿ ਅਧਿਵਾਸਨਵੀਰਿਯਸ੍ਸ ਅਧਿਮਤ੍ਤਤ੍ਤਾ ਤਸ੍ਸ ਹਾਪਨਵਸੇਨ ਸਮਾਧਿਨਾ ਸਮਰਸਤਾਪਾਦਨੇਨ ਵੀਰਿਯਸਮਥਂ ਯੋਜੇਤ੍ਵਾ. ਸਹ ਪਟਿਸਮ੍ਭਿਦਾਹੀਤਿ ਲੋਕੁਤ੍ਤਰਪਟਿਸਮ੍ਭਿਦਾਹਿ ਸਹ. ਅਰਿਯਮਗ੍ਗਕ੍ਖਣੇ ਹਿ ਪਟਿਸਮ੍ਭਿਦਾਨਂ ਅਸਮ੍ਮੋਹਵਸੇਨ ਅਧਿਗਮੋ, ਅਤ੍ਥਪਟਿਸਮ੍ਭਿਦਾਯ ਪਨ ਆਰਮ੍ਮਣਕਰਣਵਸੇਨਪਿ. ਲੋਕਿਯਾਨਮ੍ਪਿ ਵਾ ਸਤਿ ਉਪ੍ਪਤ੍ਤਿਕਾਲੇ ਤਤ੍ਥ ਸਮਤ੍ਥਤਂ ਸਨ੍ਧਾਯਾਹ ‘‘ਸਹ ਪਟਿਸਮ੍ਭਿਦਾਹੀ’’ਤਿ. ਸਮਸੀਸੀਤਿ ਵਾਰਸਮਸੀਸੀ ਹੁਤ੍ਵਾ, ਪਚ੍ਚਵੇਕ੍ਖਣਵਾਰਸ੍ਸ ਅਨਨ੍ਤਰਵਾਰੇ ਪਰਿਨਿਬ੍ਬਾਯੀਤਿ ਅਤ੍ਥੋ.

ਯਥਾ ਚ ਸੁਖਂ, ਏਵਂ ਦੁਕ੍ਖਨ੍ਤਿ ਯਥਾ ‘‘ਸੁਖਂ ਕੋ ਵੇਦਯਤੀ’’ਤਿਆਦਿਨਾ ਸਮ੍ਪਜਾਨਵੇਦਿਯਨਂ ਸਨ੍ਧਾਯ ਵੁਤ੍ਤਂ, ਏਵਂ ਦੁਕ੍ਖਮ੍ਪਿ. ਤਤ੍ਥ ਦੁਕ੍ਖਯਤੀਤਿ ਦੁਕ੍ਖਾ, ਸਮ੍ਪਯੁਤ੍ਤਧਮ੍ਮੇ, ਕਾਯਞ੍ਚ ਪੀਲ਼ੇਤਿ ਵਿਬਾਧਤੀਤਿ ਅਤ੍ਥੋ. ਦੁਟ੍ਠੁਂ ਵਾ ਖਾਦਤਿ, ਖਨਤਿ ਕਾਯਿਕਂ, ਚੇਤਸਿਕਞ੍ਚ ਸਾਤਨ੍ਤਿ ਦੁਕ੍ਖਾ. ‘‘ਦੁਕ੍ਕਰਂ ਓਕਾਸਦਾਨਂ ਏਤਿਸ੍ਸਾਤਿ ਦੁਕ੍ਖਾ’’ਤਿ ਅਪਰੇ. ਅਰੂਪਕਮ੍ਮਟ੍ਠਾਨਨ੍ਤਿ ਅਰੂਪਪਰਿਗ੍ਗਹਂ, ਅਰੂਪਧਮ੍ਮਮੁਖੇਨ ਵਿਪਸ੍ਸਨਾਭਿਨਿਵੇਸਨਨ੍ਤਿ ਅਤ੍ਥੋ. ਨ ਪਾਕਟਂ ਹੋਤਿ ਫਸ੍ਸਸ੍ਸ, ਚਿਤ੍ਤਸ੍ਸ ਚ ਅਵਿਭੂਤਾਕਾਰਤ੍ਤਾ. ਤੇਨਾਹ ‘‘ਅਨ੍ਧਕਾਰਂ ਵਿਯ ਖਾਯਤੀ’’ਤਿ. ‘‘ਨ ਪਾਕਟਂ ਹੋਤੀ’’ਤਿ ਚ ਇਦਂ ਤਾਦਿਸੇ ਪੁਗ੍ਗਲੇ ਸਨ੍ਧਾਯ ਵੁਤ੍ਤਂ, ਤੇਸਂ ਆਦਿਤੋ ਵੇਦਨਾਵ ਵਿਭੂਤਤਰਾ ਹੁਤ੍ਵਾ ਉਪਟ੍ਠਾਤਿ. ਏਵਞ੍ਹਿ ਯਂ ਵੁਤ੍ਤਂ ਸਕ੍ਕਪਞ੍ਹਵਣ੍ਣਨਾ ਦੀਸੁ ‘‘ਫਸ੍ਸੋ ਪਾਕਟੋ ਹੋਤਿ, ਵਿਞ੍ਞਾਣਂ ਪਾਕਟਂ ਹੋਤੀ’’ਤਿ, (ਦੀ. ਨਿ. ਅਟ੍ਠ. ੨.੩੫੯) ਤਂ ਅਵਿਰੋਧਿਤਂ ਹੋਤਿ. ਵੇਦਨਾਵਸੇਨ ਕਥਿਯਮਾਨਂ ਕਮ੍ਮਟ੍ਠਾਨਂ ਪਾਕਟਂ ਹੋਤੀਤਿ ਯੋਜਨਾ. ‘‘ਵੇਦਨਾਨਂ ਉਪ੍ਪਤ੍ਤਿਪਾਕਟਤਾਯਾ’’ਤਿ ਚ ਇਦਂ ਸੁਖਦੁਕ੍ਖਵੇਦਨਾਨਂ ਵਸੇਨ ਵੁਤ੍ਤਂ. ਤਾਸਞ੍ਹਿ ਪਵਤ੍ਤਿ ਓਲ਼ਾਰਿਕਾ, ਨ ਇਤਰਾਯ. ਤਦੁਭਯਗ੍ਗਹਣਮੁਖੇਨ ਵਾ ਗਹੇਤਬ੍ਬਤ੍ਤਾ ਇਤਰਾਯਪਿ ਪਵਤ੍ਤਿ ਵਿਞ੍ਞੂਨਂ ਪਾਕਟਾ ਏਵਾਤਿ ‘‘ਵੇਦਨਾਨ’’ਨ੍ਤਿ ਅਵਿਸੇਸਗ੍ਗਹਣਂ ਦਟ੍ਠਬ੍ਬਂ. ਸਕ੍ਕਪਞ੍ਹੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ, ਤਸ੍ਮਾ ਤਤ੍ਥ ਵਤ੍ਤਬ੍ਬੋ ਅਤ੍ਥਵਿਸੇਸੋ ਤਤ੍ਥ ਲੀਨਤ੍ਥਪ੍ਪਕਾਸਨਿਯਂ ਵੁਤ੍ਤਨਯੇਨੇਵ ਗਹੇਤਬ੍ਬੋ.

ਪੁਬ੍ਬੇ ‘‘ਵਤ੍ਥੁਂ ਆਰਮ੍ਮਣਂ ਕਤ੍ਵਾ ਵੇਦਨਾਵ ਵੇਦਯਤੀ’’ਤਿ ਵੇਦਨਾਯ ਆਰਮ੍ਮਣਾਧੀਨਵੁਤ੍ਤਿਤਾਯ ਚ ਅਨਤ੍ਤਤਾਯ ਚ ਪਜਾਨਨਂ ਵੁਤ੍ਤਂ, ਇਦਾਨਿ ਤਸ੍ਸਾ ਅਨਿਚ੍ਚਤਾਦਿਪਜਾਨਨਂ ਦਸ੍ਸੇਨ੍ਤੋ ‘‘ਅਯਂ ਅਪਰੋਪਿ ਪਜਾਨਨਪਰਿਯਾਯੋ’’ਤਿ ਆਹ. ਯਥਾ ਏਕਸ੍ਮਿਂ ਖਣੇ ਚਿਤ੍ਤਦ੍ਵਯਸ੍ਸ ਅਸਮ੍ਭਵੋ ਏਕਜ੍ਝਂ ਅਨੇਕਨ੍ਤਪਚ੍ਚਯਾਭਾਵਤੋ, ਏਵਂ ਵੇਦਨਾਦ੍ਵਯਸ੍ਸ ਵਿਸਿਟ੍ਠਾਰਮ੍ਮਣਵੁਤ੍ਤਿਤੋ ਚਾਤਿ ਆਹ ‘‘ਸੁਖਵੇਦਨਾਕ੍ਖਣੇ ਦੁਕ੍ਖਾਯ ਵੇਦਨਾਯ ਅਭਾਵਤੋ’’ਤਿ. ਨਿਦਸ੍ਸਨਮਤ੍ਤਞ੍ਚੇਤਂ ਤਦਾ ਉਪੇਕ੍ਖਾਵੇਦਨਾਯਪਿ ਅਭਾਵਤੋ, ਤੇਨ ਸੁਖਵੇਦਨਾਕ੍ਖਣੇ ਭੂਤਪੁਬ੍ਬਾਨਂ ਇਤਰਵੇਦਨਾਨਂ ਹੁਤ੍ਵਾਅਭਾਵਪਜਾਨਨੇਨ ਸੁਖਵੇਦਨਾਯਪਿ ਹੁਤ੍ਵਾ ਅਭਾਵੋ ਞਾਤੋ ਏਵ ਹੋਤੀਤਿ ਤਸ੍ਸਾ ਪਾਕਟਭਾਵਮੇਵ ਦਸ੍ਸੇਨ੍ਤੋ ‘‘ਇਮਿਸ੍ਸਾ ਚ ਸੁਖਾਯ ਵੇਦਨਾਯ ਇਤੋ ਪਠਮਂਅਭਾਵਤੋ’’ਤਿ ਆਹ, ਏਤੇਨੇਵ ਚ ਤਾਸਮ੍ਪਿ ਵੇਦਨਾਨਂ ਪਾਕਟਭਾਵੋ ਦਸ੍ਸਿਤੋਤਿ ਦਟ੍ਠਬ੍ਬਂ. ਤੇਨਾਹ ‘‘ਵੇਦਨਾ ਨਾਮ ਅਨਿਚ੍ਚਾ ਅਧੁਵਾ ਵਿਪਰਿਣਾਮਧਮ੍ਮਾ’’ਤਿ. ਅਨਿਚ੍ਚਗ੍ਗਹਣੇਨ ਹਿ ਵੇਦਨਾਨਂ ਵਿਦ੍ਧਂਸਨਭਾਵੋ ਦਸ੍ਸਿਤੋ ਵਿਦ੍ਧਸ੍ਤੇ ਅਨਿਚ੍ਚਤਾਯ ਸੁਵਿਞ੍ਞੇਯ੍ਯਤ੍ਤਾ. ਅਧੁਵਗ੍ਗਹਣੇਨ ਪਾਕਟਭਾਵੋ ਤਸ੍ਸ ਅਸਦਾਭਾਵਿਤਾਦਿਭਾਵਨਤੋ. ਵਿਪਰਿਣਾਮਗ੍ਗਹਣੇਨ ਦੁਕ੍ਖਭਾਵੋ ਤਸ੍ਸ ਅਞ੍ਞਥਤ੍ਤਦੀਪਨਤੋ, ਤੇਨ ਸੁਖਾਪਿ ਵੇਦਨਾ ਦੁਕ੍ਖਾ, ਪਗੇਵ ਇਤਰਾਤਿ ਤਿਸ੍ਸਨ੍ਨਮ੍ਪਿ ਵੇਦਨਾਨਂ ਦੁਕ੍ਖਤਾ ਦਸ੍ਸਿਤਾ ਹੋਤਿ. ਇਤਿ ‘‘ਯਦਨਿਚ੍ਚਂ ਦੁਕ੍ਖਂ, ਤਂ ਏਕਨ੍ਤਤੋ ਅਨਤ੍ਤਾ’’ਤਿ ਤੀਸੁਪਿ ਵੇਦਨਾਸੁ ਲਕ੍ਖਣਤ੍ਤਯਪਜਾਨਨਾ ਜੋਤਿਤਾਤਿ ਦਟ੍ਠਬ੍ਬਂ. ਤੇਨਾਹ ‘‘ਇਤਿਹ ਤਤ੍ਥ ਸਮ੍ਪਜਾਨੋ ਹੋਤੀ’’ਤਿ.

ਇਦਾਨਿ ਤਮਤ੍ਥਂ ਸੁਤ੍ਤੇਨ (ਮ. ਨਿ. ੨.੨੦੫) ਸਾਧੇਤੁਂ ‘‘ਵੁਤ੍ਤਮ੍ਪਿ ਚੇਤ’’ਨ੍ਤਿਆਦਿਮਾਹ. ਤਤ੍ਥ ਨੇਵ ਤਸ੍ਮਿਂ ਸਮਯੇ ਦੁਕ੍ਖਂ ਵੇਦਨਂ ਵੇਦੇਤੀਤਿ ਤਸ੍ਮਿਂ ਸੁਖਵੇਦਨਾਸਮਙ੍ਗਿਸਮਯੇ ਨੇਵ ਦੁਕ੍ਖਂ ਵੇਦਨਂ ਵੇਦੇਤਿ ਨਿਰੁਦ੍ਧਤ੍ਤਾ, ਅਨੁਪ੍ਪਨ੍ਨਤ੍ਤਾ ਚ ਯਥਾਕ੍ਕਮਂ ਅਤੀਤਾਨਾਗਤਾਨਂ. ਪਚ੍ਚੁਪ੍ਪਨ੍ਨਾਯ ਪਨ ਅਸਮ੍ਭਵੋ ਵੁਤ੍ਤੋ ਏਵ. ਸਕਿਚ੍ਚਕ੍ਖਣਮਤ੍ਤਾਵਟ੍ਠਾਨਤੋ ਅਨਿਚ੍ਚਾ. ਸਮੇਚ੍ਚ ਸਮ੍ਭੁਯ੍ਯ ਪਚ੍ਚਯੇਹਿ ਕਤਤ੍ਤਾ ਸਙ੍ਖਤਾ. ਵਤ੍ਥਾਰਮ੍ਮਣਾਦਿਪਚ੍ਚਯਂ ਪਟਿਚ੍ਚ ਉਪ੍ਪਨ੍ਨਤ੍ਤਾ ਪਟਿਚ੍ਚਸਮੁਪ੍ਪਨ੍ਨਾ. ਖਯਵਯਪਲੁਜ੍ਜਨਨਿਰੁਜ੍ਝਨਪਕਤਿਤਾਯ ਖਯਧਮ੍ਮਾ ਵਯਧਮ੍ਮਾ ਵਿਰਾਗਧਮ੍ਮਾ ਨਿਰੋਧਧਮ੍ਮਾਤਿ ਦਟ੍ਠਬ੍ਬਾ.

ਕਿਲੇਸੇਹਿ ਆਮਸਿਤਬ੍ਬਤੋ ਆਮਿਸਂ ਨਾਮ, ਪਞ੍ਚ ਕਾਮਗੁਣਾ, ਆਰਮ੍ਮਣਕਰਣਵਸੇਨ ਸਹ ਆਮਿਸੇਹੀਤਿ ਸਾਮਿਸਂ. ਤੇਨਾਹ ‘‘ਪਞ੍ਚਕਾਮਗੁਣਾਮਿਸਨਿਸ੍ਸਿਤਾ’’ਤਿ.

ਇਤੋ ਪਰਨ੍ਤਿ ‘‘ਅਤ੍ਥਿ ਵੇਦਨਾ’’ਤਿ ਏਵਮਾਦਿ ਪਾਲ਼ਿਂ ਸਨ੍ਧਾਯਾਹ ‘‘ਕਾਯਾਨੁਪਸ੍ਸਨਾਯਂ ਵੁਤ੍ਤਨਯਮੇਵਾ’’ਤਿ.

ਵੇਦਨਾਨੁਪਸ੍ਸਨਾਵਣ੍ਣਨਾ ਨਿਟ੍ਠਿਤਾ.

ਚਿਤ੍ਤਾਨੁਪਸ੍ਸਨਾਵਣ੍ਣਨਾ

੩੮੧. ਸਮ੍ਪਯੋਗਵਸੇਨ ਪਵਤ੍ਤਮਾਨੇਨ ਸਹ ਰਾਗੇਨਾਤਿ ਸਰਾਗਂ. ਤੇਨਾਹ ‘‘ਲੋਭਸਹਗਤ’’ਨ੍ਤਿ. ਵੀਤਰਾਗਨ੍ਤਿ ਏਤ੍ਥ ਕਾਮਂ ਸਰਾਗਪਦਪਟਿਯੋਗਿਨਾ ਵੀਤਰਾਗਪਦੇਨ ਭਵਿਤਬ੍ਬਂ, ਸਮ੍ਮਸਨਚਾਰਸ੍ਸ ਪਨ ਅਧਿਪ੍ਪੇਤਤ੍ਤਾ ਤੇਭੂਮਕਸ੍ਸੇਵ ਗਹਣਨ੍ਤਿ ‘‘ਲੋਕਿਯਕੁਸਲਾਬ੍ਯਾਕਤ’’ਨ੍ਤਿ ਵਤ੍ਵਾ ‘‘ਇਦਂ ਪਨਾ’’ਤਿਆਦਿਨਾ ਤਮੇਵ ਅਧਿਪ੍ਪਾਯਂ ਵਿਵਰਤਿ. ਸੇਸਾਨਿ ਦ੍ਵੇ ਦੋਸਮੂਲਾਨਿ, ਦ੍ਵੇ ਮੋਹਮੂਲਾਨੀਤਿ ਚਤ੍ਤਾਰਿ ਅਕੁਸਲਚਿਤ੍ਤਾਨਿ. ਤੇਸਞ੍ਹਿ ਰਾਗੇਨ ਸਮ੍ਪਯੋਗਾਭਾਵਤੋ ਨਤ੍ਥੇਵ ਸਰਾਗਤਾ, ਤਂਨਿਮਿਤ੍ਤਕਤਾਯ ਪਨ ਸਿਯਾ ਤਂਸਹਿਤਕਾਲੇ ਸੋਤਿ ਨਤ੍ਥੇਵ ਵੀਤਰਾਗਤਾਪੀਤਿ ਦੁਕ੍ਖਵਿਨਿਮੁਤ੍ਤਤਾ ਏਵੇਤ੍ਥ ਲਬ੍ਭਤੀਤਿ ਆਹ ‘‘ਨੇਵ ਪੁਰਿਮਪਦਂ ਨ ਪਚ੍ਛਿਮਪਦਂ ਭਜਨ੍ਤੀ’’ਤਿ. ਯਦਿ ਏਵਂ ਪਦੇਸਿਕਂ ਪਜਾਨਨਂ ਆਪਜ੍ਜਤੀਤਿ? ਨਾਪਜ੍ਜਤਿ, ਦੁਕਨ੍ਤਰਪਰਿਯਾਪਨ੍ਨਤ੍ਤਾ ਤੇਸਂ. ਯੇ ਪਨ ‘‘ਪਟਿਪਕ੍ਖਭਾਵੇ ਅਗਯ੍ਹਮਾਨੇ ਸਮ੍ਪਯੋਗਾਭਾਵੋ ਏਵੇਤ੍ਥ ਪਮਾਣਂ ਏਕਚ੍ਚਅਬ੍ਯਾਕਤਾਨਂ ਵਿਯਾ’’ਤਿ ਇਚ੍ਛਨ੍ਤਿ, ਤੇਸਂ ਮਤੇਨ ਸੇਸਾਕੁਸਲਚਿਤ੍ਤਾਨਮ੍ਪਿ ਦੁਤਿਯਪਦਸਙ੍ਗਹੋ ਵੇਦਿਤਬ੍ਬੋ. ਦੁਤਿਯਦੁਕੇਪਿ ਵੁਤ੍ਤਨਯੇਨ ਅਤ੍ਥੋ ਵੇਦਿਤਬ੍ਬੋ. ਅਕੁਸਲਮੂਲੇਸੁ ਸਹ ਮੋਹੇਨੇਵ ਵਤ੍ਤਤੀਤਿ ਸਮੋਹਨ੍ਤਿ ਆਹ ‘‘ਵਿਚਿਕਿਚ੍ਛਾਸਹਗਤਞ੍ਚੇਵ ਉਦ੍ਧਚ੍ਚਸਹਗਤਞ੍ਚਾ’’ਤਿ. ਯਸ੍ਮਾ ਚੇਤ੍ਥ ‘‘ਸਹੇਵ ਮੋਹੇਨਾਤਿ ਸਮੋਹ’’ਨ੍ਤਿ ਪੁਰਿਮਪਦਾਵਧਾਰਣਮ੍ਪਿ ਲਬ੍ਭਤਿਯੇਵ, ਤਸ੍ਮਾ ਵੁਤ੍ਤਂ ‘‘ਯਸ੍ਮਾ ਪਨਾ’’ਤਿਆਦਿ. ਯਥਾ ਪਨ ਅਤਿਮੂਲ਼੍ਹਤਾਯ ਪਾਟਿਪੁਗ੍ਗਲਿਕਨਯੇਨ ਸਵਿਸੇਸਮੋਹਵਨ੍ਤਤਾਯ ‘‘ਮੋਮੂਹਚਿਤ੍ਤ’’ਨ੍ਤਿ ਵਤ੍ਤਬ੍ਬਤੋ ਵਿਚਿਕਿਚ੍ਛਾਉਦ੍ਧਚ੍ਚਸਹਗਤਦ੍ਵਯਂ ਵਿਸੇਸਤੋ ‘‘ਸਮੋਹ’’ਨ੍ਤਿ ਵੁਚ੍ਚਤਿ, ਨ ਤਥਾ ਸੇਸਾਕੁਸਲਚਿਤ੍ਤਾਨੀਤਿ ‘‘ਵਟ੍ਟਨ੍ਤਿਯੇਵਾ’’ਤਿ ਸਾਸਙ੍ਕਂ ਵਦਤਿ. ਸਮ੍ਪਯੋਗਵਸੇਨ ਥਿਨਮਿਦ੍ਧੇਨ ਅਨੁਪਤਿਤਂ ਅਨੁਗਤਨ੍ਤਿ ਥਿਨਮਿਦ੍ਧਾਨੁਪਤਿਤਂ, ਪਞ੍ਚਵਿਧਂਸਸਙ੍ਖਾਰਿਕਾਕੁਸਲਚਿਤ੍ਤਂ ਸਙ੍ਕੁਚਿਤਚਿਤ੍ਤਂ, ਸਙ੍ਕੁਚਿਤਚਿਤ੍ਤਂ ਨਾਮ ਆਰਮ੍ਮਣੇ ਸਙ੍ਕੋਚਨਵਸੇਨ ਪਵਤ੍ਤਨਤੋ. ਪਚ੍ਚਯਵਿਸੇਸਵਸੇਨ ਥਾਮਜਾਤੇਨ ਉਦ੍ਧਚ੍ਚੇਨ ਸਹਗਤਂ ਸਂਸਟ੍ਠਨ੍ਤਿ ਉਦ੍ਧਚ੍ਚਸਹਗਤਂ, ਅਞ੍ਞਥਾ ਸਬ੍ਬਮ੍ਪਿ ਅਕੁਸਲਚਿਤ੍ਤਂ ਉਦ੍ਧਚ੍ਚਸਹਗਤਮੇਵਾਤਿ. ਪਸਟਚਿਤ੍ਤਂ ਨਾਮ ਆਰਮ੍ਮਣੇ ਸਵਿਸੇਸਂ ਵਿਕ੍ਖੇਪਵਸੇਨ ਵਿਸਟਭਾਵੇਨ ਪਵਤ੍ਤਨਤੋ.

ਕਿਲੇਸਵਿਕ੍ਖਮ੍ਭਨਸਮਤ੍ਥਤਾਯ ਵਿਪੁਲਫਲਤਾਯ ਚ ਦੀਘਸਨ੍ਤਾਨਤਾਯ ਚ ਮਹਨ੍ਤਭਾਵਂ ਗਤਂ, ਮਹਨ੍ਤੇਹਿ ਵਾ ਉਲ਼ਾਰਚ੍ਛਨ੍ਦਾਦੀਹਿ ਗਤਂ ਪਟਿਪਨ੍ਨਨ੍ਤਿ ਮਹਗ੍ਗਤਂ, ਤਂ ਪਨ ਰੂਪਾਰੂਪਭੂਮਿਗਤਂ ਤਤੋ ਮਹਨ੍ਤਸ੍ਸ ਲੋਕੇ ਅਭਾਵਤੋ. ਤੇਨਾਹ ‘‘ਰੂਪਾਰੂਪਾਵਚਰ’’ਨ੍ਤਿ. ਤਸ੍ਸ ਚੇਤ੍ਥ ਪਟਿਯੋਗੀ ਪਰਿਤ੍ਤਂ ਏਵਾਤਿ ਆਹ ‘‘ਅਮਹਗ੍ਗਤਨ੍ਤਿ ਕਾਮਾਵਚਰ’’ਨ੍ਤਿ. ਅਤ੍ਤਾਨਂ ਉਤ੍ਤਰਿਤੁਂ ਸਮਤ੍ਥੇਹਿ ਸਹ ਉਤ੍ਤਰੇਹੀਤਿ ਸਉਤ੍ਤਰਂ. ਤਪ੍ਪਟਿਪਕ੍ਖੇਨ ਅਨੁਤ੍ਤਰਂ. ਤਦੁਭਯਂ ਉਪਾਦਾਯੁਪਾਦਾਯ ਵੇਦਿਤਬ੍ਬਨ੍ਤਿ ਆਹ ‘‘ਸਉਤ੍ਤਰਨ੍ਤਿ ਕਾਮਾਵਚਰਨ੍ਤਿਆਦਿ. ਪਟਿਪਕ੍ਖਵਿਕ੍ਖਮ੍ਭਨਸਮਤ੍ਥੇਨ ਸਮਾਧਿਨਾ ਸਮ੍ਮਦੇਵ ਆਹਿਤਂ ਸਮਾਹਿਤਂ. ਤੇਨਾਹ ‘‘ਯਸ੍ਸਾ’’ਤਿਆਦਿ. ਯਸ੍ਸਾਤਿ ਯਸ੍ਸ ਚਿਤ੍ਤਸ੍ਸ. ਯਥਾਵੁਤ੍ਤੇਨ ਸਮਾਧਿਨਾ ਨ ਸਮਾਹਿਤਨ੍ਤਿ ਅਸਮਾਹਿਤਂ. ਤੇਨਾਹ ‘‘ਉਭਯਸਮਾਧਿਰਹਿਤ’’ਨ੍ਤਿ. ਤਦਙ੍ਗਵਿਮੁਤ੍ਤਿਯਾ ਵਿਮੁਤ੍ਤਂ, ਕਾਮਾਵਚਰਕੁਸਲਚਿਤ੍ਤਂ, ਵਿਕ੍ਖਮ੍ਭਨਵਿਮੁਤ੍ਤਿਯਾ ਵਿਮੁਤ੍ਤਂ, ਮਹਗ੍ਗਤਚਿਤ੍ਤਨ੍ਤਿ ਤਦੁਭਯਂ ਸਨ੍ਧਾਯਾਹ ‘‘ਤਦਙ੍ਗਵਿਕ੍ਖਮ੍ਭਨਵਿਮੁਤ੍ਤੀਹਿ ਵਿਮੁਤ੍ਤ’’ਨ੍ਤਿ. ਯਤ੍ਥ ਤਦੁਭਯਵਿਮੁਤ੍ਤਿ ਨਤ੍ਥਿ, ਤਂ ਉਭਯਵਿਮੁਤ੍ਤਿਰਹਿਤਨ੍ਤਿ ਗਯ੍ਹਮਾਨੇ ਲੋਕੁਤ੍ਤਰਚਿਤ੍ਤੇਪਿ ਸਿਯਾਸਙ੍ਕਾਤਿ ਤਂ ਨਿਵਤ੍ਤਨਤ੍ਥਂ ‘‘ਸਮੁਚ੍ਛੇਦ…ਪੇ… ਓਕਾਸੋਵ ਨਤ੍ਥੀ’’ਤਿ ਆਹ. ਓਕਾਸਭਾਵੋ ਚ ਸਮ੍ਮਸਨਚਾਰਸ੍ਸ ਅਧਿਪ੍ਪੇਤਤ੍ਤਾ ਵੇਦਿਤਬ੍ਬੋ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.

ਚਿਤ੍ਤਾਨੁਪਸ੍ਸਨਾਵਣ੍ਣਨਾ ਨਿਟ੍ਠਿਤਾ.