ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਦੀਘਨਿਕਾਯੇ

ਮਹਾਵਗ੍ਗਟੀਕਾ

੧. ਮਹਾਪਦਾਨਸੁਤ੍ਤਵਣ੍ਣਨਾ

ਪੁਬ੍ਬੇਨਿਵਾਸਪਟਿਸਂਯੁਤ੍ਤਕਥਾਵਣ੍ਣਨਾ

੧. ਯਥਾਜਾਤਾਨਂ ਕਰੇਰਿਰੁਕ੍ਖਾਨਂ ਘਨਪਤ੍ਤਸਾਖਾਵਿਟਪੇਹਿ ਮਣ੍ਡਪਸਙ੍ਖੇਪੇਹਿ ਸਞ੍ਛਨ੍ਨੋ ਪਦੇਸੋ ‘‘ਕਰੇਰਿਮਣ੍ਡਪੋ’’ਤਿ ਅਧਿਪ੍ਪੇਤੋ. ਦ੍ਵਾਰੇਤਿ ਦ੍ਵਾਰਸਮੀਪੇ. ਦ੍ਵਾਰੇ ਠਿਤਰੁਕ੍ਖਵਸੇਨ ਅਞ੍ਞਤ੍ਥਾਪਿ ਸਮਞ੍ਞਾ ਅਤ੍ਥੀਤਿ ਦਸ੍ਸੇਤੁਂ ‘‘ਯਥਾ’’ਤਿਆਦਿ ਵੁਤ੍ਤਂ. ਕਥਂ ਪਨ ਭਗਵਾ ਮਹਾਗਨ੍ਧਕੁਟਿਯਂ ਅਵਸਿਤ੍ਵਾ ਤਦਾ ਕਰੇਰਿਕੁਟਿਕਾਯਂ ਵਿਹਾਸੀਤਿ? ਸਾਪਿ ਬੁਦ੍ਧਸ੍ਸ ਭਗਵਤੋ ਵਸਨਗਨ੍ਧਕੁਟਿ ਏਵਾਤਿ ਦਸ੍ਸੇਨ੍ਤੋ ‘‘ਅਨ੍ਤੋਜੇਤਵਨੇ’’ਤਿਆਦਿਮਾਹ. ਸਲਲ਼ਾਗਾਰਨ੍ਤਿ ਦੇਵਦਾਰੁਰੁਕ੍ਖੇਹਿ ਕਤਗੇਹਂ. ਪਕਤਿਭਤ੍ਤਸ੍ਸ ਪਚ੍ਛਤੋਤਿ ਭਿਕ੍ਖੂਨਂ ਪਾਕਤਿਕਭਤ੍ਤਕਾਲਤੋ ਪਚ੍ਛਾ, ਠਿਤਮਜ੍ਝਨ੍ਹਿਕਤੋ ਉਪਰੀਤਿ ਅਤ੍ਥੋ. ਪਿਣ੍ਡਪਾਤਤੋ ਪਟਿਕ੍ਕਨ੍ਤਾਨਨ੍ਤਿ ਪਿਣ੍ਡਪਾਤਭੋਜਨਤੋ ਅਪੇਤਾਨਂ. ਤੇਨਾਹ ‘‘ਭਤ੍ਤਕਿਚ੍ਚ’’ਨ੍ਤਿਆਦਿ.

ਮਣ੍ਡਲਸਣ੍ਠਾਨਾ ਮਾਲ਼ਸਙ੍ਖੇਪੇਨ ਕਤਾ ਨਿਸੀਦਨਸਾਲਾ ‘‘ਮਣ੍ਡਲਮਾਲ਼’’ਨ੍ਤਿ ਅਧਿਪ੍ਪੇਤਾਤਿ ਆਹ ‘‘ਨਿਸੀਦਨਸਾਲਾਯਾ’’ਤਿ. ਪੁਬ੍ਬੇਨਿਵਾਸਪਟਿਸਂਯੁਤ੍ਤਾਤਿ ਏਤ੍ਥ ਪੁਬ੍ਬ-ਸਦ੍ਦੋ ਅਤੀਤਵਿਸਯੋ, ਨਿਵਾਸ-ਸਦ੍ਦੋ ਕਮ੍ਮਸਾਧਨੋ, ਖਨ੍ਧਵਿਨਿਮੁਤ੍ਤੋ ਚ ਨਿਵਸਿਤਧਮ੍ਮੋ ਨਤ੍ਥਿ, ਖਨ੍ਧਾ ਚ ਸਨ੍ਤਾਨਵਸੇਨੇਵ ਪਵਤ੍ਤਨ੍ਤੀਤਿ ਆਹ ‘‘ਪੁਬ੍ਬੇਨਿਵੁਤ੍ਥਕ੍ਖਨ੍ਧਸਨ੍ਤਾਨਸਙ੍ਖਾਤੇਨ ਪੁਬ੍ਬੇਨਿਵਾਸੇਨਾ’’ਤਿ. ਯੋਜੇਤ੍ਵਾਤਿ ਵਿਸਯਭਾਵੇਨ ਯੋਜੇਤ੍ਵਾ. ਪਵਤ੍ਤਿਤਾਤਿ ਕਥਿਤਾ. ਧਮ੍ਮੂਪਸਂਹਿਤਤ੍ਤਾ ਧਮ੍ਮਤੋ ਅਨਪੇਤਾਤਿ ਧਮ੍ਮੀ. ਤੇਨਾਹ ‘‘ਧਮ੍ਮਸਂਯੁਤ੍ਤਾ’’ਤਿ.

ਉਦਪਾਦੀਤਿ ਪਦੁਦ੍ਧਾਰੋ, ਤਸ੍ਸ ਉਪ੍ਪਨ੍ਨਾ ਜਾਤਾਤਿ ਇਮਿਨਾ ਸਮ੍ਬਨ੍ਧੋ. ਤਂ ਪਨਸ੍ਸਾ ਉਪ੍ਪਨ੍ਨਾਕਾਰਂ ਪਾਲ਼ਿਯਂ ਸਙ੍ਖੇਪਤੋਵ ਦਸ੍ਸਿਤਂ, ਵਿਤ੍ਥਾਰਤੋ ਦਸ੍ਸੇਤੁਂ ‘‘ਅਹੋ ਅਚ੍ਛਰਿਯ’’ਨ੍ਤਿਆਦਿ ਆਰਦ੍ਧਂ. ਤਤ੍ਥ ਕੇ ਅਨੁਸ੍ਸਰਨ੍ਤਿ, ਕੇ ਨਾਨੁਸ੍ਸਰਨ੍ਤੀਤਿ ਪਦਦ੍ਵਯੇ ਪਠਮਂਯੇਵ ਸਪ੍ਪਪਞ੍ਚਨਂ, ਨ ਇਤਰਨ੍ਤਿ ਤਦੇਵ ਪੁਗ੍ਗਲਭੇਦਤੋ, ਕਾਲਵਿਭਾਗਤੋ, ਅਨੁਸ੍ਸਰਣਾਕਾਰਤੋ, ਓਪਮ੍ਮਤੋ ਨਿਦ੍ਦਿਸਨ੍ਤੇਨ ‘‘ਤਿਤ੍ਥਿਯਾ ਅਨੁਸ੍ਸਰਨ੍ਤੀ’’ਤਿਆਦਿ ਵੁਤ੍ਤਂ. ਅਗ੍ਗਪ੍ਪਤ੍ਤਕਮ੍ਮਵਾਦਿਨੋਤਿ ਸਿਖਾਪ੍ਪਤ੍ਤਕਮ੍ਮਵਾਦਿਨੋ ‘‘ਅਤ੍ਥਿ ਕਮ੍ਮਂ ਅਤ੍ਥਿ ਕਮ੍ਮਵਿਪਾਕੋ’’ਤਿ (ਪਟਿ. ਮ. ੧.੨੩੪) ਏਵਂ ਕਮ੍ਮਸ੍ਸਕਤਾਞਾਣੇ ਠਿਤਾ ਤਾਪਸਪਰਿਬ੍ਬਾਜਕਾ. ਚਤ੍ਤਾਲੀਸਂਯੇਵ ਕਪ੍ਪੇ ਅਨੁਸ੍ਸਰਨ੍ਤੀਤਿ ਬ੍ਰਹ੍ਮਜਾਲਾਦੀਸੁ (ਦੀ. ਨਿ. ੧.੩੩) ਭਗਵਤਾ ਤਥਾ ਪਰਿਚ੍ਛਿਜ੍ਜ ਵੁਤ੍ਤਤ੍ਤਾ. ਤਤੋ ਪਰਂ ਨ ਅਨੁਸ੍ਸਰਨ੍ਤੀਤਿ ਤਥਾਵਚਨਞ੍ਚ ਦਿਟ੍ਠਿਗਤੋਪਟ੍ਠਕਸ੍ਸ ਤੇਸਂ ਞਾਣਸ੍ਸ ਪਰਿਦੁਬ੍ਬਲਭਾਵਤੋ.

ਸਾਵਕਾਤਿ ਮਹਾਸਾਵਕਾ ਤੇਸਞ੍ਹਿ ਕਪ੍ਪਸਤਸਹਸ੍ਸਂ ਪੁਬ੍ਬਾਭਿਨੀਹਾਰੋ. ਪਕਤਿਸਾਵਕਾ ਪਨ ਤਤੋ ਊਨਕਮੇਵ ਅਨੁਸ੍ਸਰਨ੍ਤਿ. ਯਸ੍ਮਾ ‘‘ਕਪ੍ਪਾਨਂ ਲਕ੍ਖਾਧਿਕਂ ਏਕਂ, ਦ੍ਵੇ ਚ ਅਸਙ੍ਖ੍ਯੇਯ੍ਯਾਨੀ’’ਤਿ ਕਾਲਵਸੇਨ ਏਵਂ ਪਰਿਮਾਣੋ ਯਥਾਕ੍ਕਮਂ ਅਗ੍ਗਸਾਵਕਪਚ੍ਚੇਕਬੁਦ੍ਧਾਨਂ ਪੁਞ੍ਞਞਾਣਾਭਿਨੀਹਾਰੋ, ਸਾਵਕਬੋਧਿਪਚ੍ਚੇਕਬੋਧਿਪਾਰਮਿਤਾਸਮ੍ਭਰਣਞ੍ਚ, ਤਸ੍ਮਾ ਵੁਤ੍ਤਂ ‘‘ਦ੍ਵੇ ਅਗ੍ਗਸਾਵਕਾ…ਪੇ… ਕਪ੍ਪਸਤਸਹਸ੍ਸਞ੍ਚਾ’’ਤਿ. ਯਦਿ ਬੋਧਿਸਮ੍ਭਾਰਸਮ੍ਭਰਣਕਾਲਪਰਿਚ੍ਛਿਨ੍ਨੋ ਤੇਸਂ ਤੇਸਂ ਅਰਿਯਾਨਂ ਅਭਿਞ੍ਞਾਞਾਣਵਿਭਵੋ, ਏਵਂ ਸਨ੍ਤੇ ਬੁਦ੍ਧਾਨਮ੍ਪਿਸ੍ਸ ਸਪਰਿਚ੍ਛੇਦਤਾ ਆਪਨ੍ਨਾਤਿ ਚੋਦਨਂ ਸਨ੍ਧਾਯਾਹ ‘‘ਬੁਦ੍ਧਾਨਂ ਪਨ ਏਤ੍ਤਕਨ੍ਤਿ ਪਰਿਚ੍ਛੇਦੋ ਨਤ੍ਥਿ, ਯਾਵਤਕਂ ਆਕਙ੍ਖਨ੍ਤਿ, ਤਾਵਤਕਂ ਅਨੁਸ੍ਸਰਨ੍ਤੀ’’ਤਿ ‘‘ਯਾਵਤਕਂ ਨੇਯ੍ਯਂ, ਤਾਵਤਕਂ ਞਾਣ’’ਨ੍ਤਿ (ਮਹਾਨਿ. ੧੫੬; ਚੂਲ਼ਨਿ. ੮੫; ਪਟਿ. ਮ. ੩, ੫) ਵਚਨਤੋ. ਸਬ੍ਬਞ੍ਞੁਤਞ੍ਞਾਣਸ੍ਸ ਵਿਯ ਹਿ ਬੁਦ੍ਧਾਨਂ ਅਭਿਞ੍ਞਾਞਾਣਾਨਮ੍ਪਿ ਸਵਿਸਯੇ ਪਰਿਚ੍ਛੇਦੋ ਨਾਮ ਨਤ੍ਥਿ, ਤਸ੍ਮਾ ਯਂ ਯਂ ਞਾਤੁਂ ਇਚ੍ਛਨ੍ਤਿ, ਤੇ ਤਂ ਤਂ ਜਾਨਨ੍ਤਿ ਏਵ. ਅਥ ਵਾ ਸਤਿਪਿ ਕਾਲਪਰਿਚ੍ਛੇਦੇ ਕਰੁਣੂਪਾਯਕੋਸਲ੍ਲਪਰਿਗ੍ਗਹਾਦਿਨਾ ਸਾਤਿਸਯਤ੍ਤਾ ਮਹਾਬੋਧਿਸਮ੍ਭਾਰਾਨਂ ਪਞ੍ਞਾਪਾਰਮਿਤਾਯ ਪਵਤ੍ਤਿਆਨੁਭਾਵਸ੍ਸ ਪਰਿਚ੍ਛੇਦੋ ਨਾਮ ਨਤ੍ਥਿ, ਕੁਤੋ ਤਨ੍ਨਿਮਿਤ੍ਤਕਾਨਂ ਅਭਿਞ੍ਞਾਞਾਣਾਨਨ੍ਤਿ ਵੁਤ੍ਤਂ ‘‘ਬੁਦ੍ਧਾਨਂ…ਪੇ… ਨਤ੍ਥੀ’’ਤਿ.

ਖਨ੍ਧਪਟਿਪਾਟਿਯਾਤਿ ਯਥਾਪਚ੍ਚਯਂ ਅਨੁਪੁਬ੍ਬਪਵਤ੍ਤਮਾਨਾਨਂ ਖਨ੍ਧਾਨਂ ਅਨੁਪੁਬ੍ਬਿਯਾ. ਖਨ੍ਧਪ੍ਪਵਤ੍ਤਿਨ੍ਤਿ ਵੇਦਨਾਦਿਕ੍ਖਨ੍ਧਪ੍ਪਵਤ੍ਤਿਂ. ਤੇਸਞ੍ਹਿ ਅਨੁਭਵਨਾਦਿਆਕਾਰਗ੍ਗਹਣਮਸ੍ਸ ਸਾਤਿਸਯਂ, ਤਂ ਸਞ੍ਞਾਭਵੇ ਤਤ੍ਥ ਤਤ੍ਥ ਅਨੁਸ੍ਸਰਣਵਸੇਨ ਗਹੇਤ੍ਵਾ ਗਚ੍ਛਨ੍ਤਾ ਏਕਵੋਕਾਰਭਵੇ ਅਲਭਨ੍ਤਾ ‘‘ਨ ਪਸ੍ਸਨ੍ਤੀ’’ਤਿ ਵੁਤ੍ਤਾ, ਜਾਲੇ ਪਤਿਤਾ ਵਿਯ ਸਕੁਣਾ, ਮਚ੍ਛਾ ਵਿਯ ਚਾਤਿ ਅਧਿਪ੍ਪਾਯੋ. ਕੁਣ੍ਠਾ ਵਿਯਾਤਿ ਦਨ੍ਧਾ ਵਿਯ. ਪਙ੍ਗੁਲ਼ਾ ਵਿਯਾਤਿ ਪੀਠਸਪ੍ਪਿਨੋ ਵਿਯ. ਦਿਟ੍ਠਿਂ ਗਣ੍ਹਨ੍ਤੀਤਿ ਅਧਿਚ੍ਚਸਮੁਪ੍ਪਨ੍ਨਿਕਦਿਟ੍ਠਿਂ ਗਣ੍ਹਨ੍ਤਿ. ਯਟ੍ਠਿਕੋਟਿਹੇਤੁਕਂ ਗਮਨਂ ਯਟ੍ਠਿਕੋਟਿਗਮਨਂ ਖਨ੍ਧਪਟਿਪਾਟਿਯਾ ਅਮੁਞ੍ਚਨਤੋ.

ਏਵਂ ਸਨ੍ਤੇਪੀਤਿ ਕਾਮਂ ਬੁਦ੍ਧਸਾਵਕਾਪਿ ਅਸਞ੍ਞਭਵੇ ਖਨ੍ਧਪ੍ਪਵਤ੍ਤਿਂ ਨ ਪਸ੍ਸਨ੍ਤਿ, ਏਵਂ ਸਨ੍ਤੇਪਿ ਤੇ ਬੁਦ੍ਧਸਾਵਕਾ ਅਸਞ੍ਞਭਵਂ ਲਙ੍ਘਿਤ੍ਵਾ ਪਰਤੋ ਅਨੁਸ੍ਸਰਨ੍ਤਿ. ‘‘ਵਟ੍ਟੇ’’ਤਿਆਦਿ ਤਥਾ ਤੇਸਂ ਅਨੁਸ੍ਸਰਣਾਕਾਰਦਸ੍ਸਨਂ. ਬੁਦ੍ਧੇਹਿ ਦਿਨ੍ਨਨਯੇ ਠਤ੍ਵਾਤਿ ‘‘ਯਤ੍ਥ ਪਞ੍ਚਕਪ੍ਪਸਤਾਨਿ ਰੂਪਪ੍ਪਵਤ੍ਤਿਯੇਵ, ਨ ਅਰੂਪਪ੍ਪਵਤ੍ਤਿ, ਸੋ ਅਸਞ੍ਞਭਵੋ’’ਤਿ ਏਵਂ ਸਮ੍ਮਾਸਮ੍ਬੁਦ੍ਧੇਹਿ ਦੇਸਿਤਾਯਂ ਧਮ੍ਮਨੇਤ੍ਤਿਯਂ ਠਤ੍ਵਾ. ਏਵਞ੍ਹਿ ਅਨ੍ਤਰਾ ਚੁਤਿਪਟਿਸਨ੍ਧਿਯੋ ਅਪਸ੍ਸਨ੍ਤਾ ਪਰਤੋ ਅਨੁਸ੍ਸਰਨ੍ਤਿ ਸੇਯ੍ਯਥਾਪਿ ਆਯਸ੍ਮਾ ਸੋਭਿਤੋਤਿ (ਥੇਰਗਾ. ਅਟ੍ਠ. ੧.੨.੧੬੪ ਸੋਭਿਤਤ੍ਥੇਰਗਾਥਾਵਣ੍ਣਨਾ). ਸੋ ਕਿਰ ਪੁਬ੍ਬੇਨਿਵਾਸੇ ਚਿਣ੍ਣਵਸੀ ਹੁਤ੍ਵਾ ਅਨੁਪਟਿਪਾਟਿਯਾ ਅਤ੍ਤਨੋ ਨਿਬ੍ਬਤ੍ਤਟ੍ਠਾਨਂ ਅਨੁਸ੍ਸਰਨ੍ਤੋ ਯਾਵ ਅਸਞ੍ਞਭਵੇ ਅਤ੍ਤਨੋ ਅਚਿਤ੍ਤਕਪਟਿਸਨ੍ਧਿ ਤਾਵ ਅਦ੍ਦਸ, ਤਤੋ ਪਰਂ ਪਞ੍ਚਕਪ੍ਪਸਤਪਰਿਮਾਣੇ ਕਾਲੇ ਚੁਤਿਪਟਿਸਨ੍ਧਿਯੋ ਅਦਿਸ੍ਵਾ ਅਵਸਾਨੇ ਚੁਤਿਂ ਦਿਸ੍ਵਾ ‘‘ਕਿਂ ਨਾਮੇਤ’’ਨ੍ਤਿ ਆਵਜ੍ਜਯਮਾਨੋ ਨਯਵਸੇਨ ‘‘ਅਸਞ੍ਞਭਵੋ ਭਵਿਸ੍ਸਤੀ’’ਤਿ ਨਿਟ੍ਠਂ ਅਗਮਾਸਿ. ਅਥ ਨਂ ਭਗਵਾ ਤਂ ਕਾਰਣਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤਾਨਂ ਅਗ੍ਗਟ੍ਠਾਨੇ ਠਪੇਸਿ. ‘‘ਚੁਤਿਪਟਿਸਨ੍ਧਿਂ ਓਲੋਕੇਤ੍ਵਾ’’ਤਿ ਇਦਂ ਚੁਤਿਪਟਿਸਨ੍ਧਿਵਸੇਨ ਤੇਸਂ ਞਾਣਸ੍ਸ ਸਙ੍ਕਮਨਦਸ੍ਸਨਂ, ਤੇਨ ਸਬ੍ਬਸੋ ਭਵੇ ਅਨਾਮਸਿਤ੍ਵਾ ਗਨ੍ਤੁਂ ਨ ਸਕ੍ਕੋਨ੍ਤੀਤਿ ਦਸ੍ਸੇਤਿ.

ਤਂ ਤਦੇਵ ਪਸ੍ਸਨ੍ਤੀਤਿ ਯਥਾ ਨਾਮ ਸਰਦਸਮਯੇ ਠਿਤਮਜ੍ਝਨ੍ਹਿਕਵੇਲਾਯ ਚਤੁਰਤਨਿਕੇ ਗੇਹੇ ਚਕ੍ਖੁਮਤੋ ਪੁਰਿਸਸ੍ਸ ਰੂਪਗਤਂ ਸੁਪਾਕਟਮੇਵ ਹੋਤੀਤਿ ਲੋਕਸਿਦ੍ਧਮੇਤਂ, ਸਿਯਾ ਪਨ ਤਸ੍ਸ ਸੁਖੁਮਤਰਤਿਰੋਹਿਤਾਦਿਭੇਦਸ੍ਸ ਰੂਪਗਤਸ੍ਸ ਅਗੋਚਰਤਾ. ਨ ਤ੍ਵੇਵ ਬੁਦ੍ਧਾਨਂ ਞਾਤੁਂ ਇਚ੍ਛਿਤਸ੍ਸ ਞੇਯ੍ਯਸ੍ਸ ਅਗੋਚਰਤਾ, ਅਥ ਖੋ ਤਂ ਞਾਣਾਲੋਕੇਨ ਓਭਾਸਿਤਂ ਹਤ੍ਥਤਲੇ ਆਮਲਕਂ ਵਿਯ ਸੁਪਾਕਟਂ ਸੁਵਿਭੂਤਮੇਵ ਹੋਤਿ ਤਥਾ ਞੇਯ੍ਯਾਵਰਣਸ੍ਸ ਸੁਪ੍ਪਹੀਨਤ੍ਤਾ. ਤੇਨਾਹ ‘‘ਬੁਦ੍ਧਾ ਪਨ ਅਤ੍ਤਨਾ ਵਾ ਪਰੇਹਿ ਵਾ ਦਿਟ੍ਠਕਤਸੁਤਂ, ਸੂਰਿਯਮਣ੍ਡਲੋਭਾਸਸਦਿਸ’’ਨ੍ਤਿ ਚ ਆਦਿ.

ਤਥਾ ਸਾਵਕਾ ਚ ਪਚ੍ਚੇਕਬੁਦ੍ਧਾ ਚਾਤਿ. ਏਤ੍ਥ ਤਥਾ-ਸਦ੍ਦੇਨ ‘‘ਅਤ੍ਤਨਾ ਦਿਟ੍ਠਕਤਸੁਤਮੇਵ ਅਨੁਸ੍ਸਰਨ੍ਤੀ’’ਤਿ ਇਦਂ ਉਪਸਂਹਰਤਿ, ਤੇਨ ਸਪ੍ਪਦੇਸਮੇਵ ਨੇਸਂ ਅਨੁਸ੍ਸਰਣਂ, ਨ ਨਿਪ੍ਪਦੇਸਨ੍ਤਿ ਨਿਦਸ੍ਸੇਤਿ.

ਖਜ੍ਜੋਪਨਕਓਭਾਸਸਦਿਸਂ ਞਾਣਸ੍ਸ ਅਤਿਵਿਯ ਅਪ੍ਪਾਨੁਭਾਵਤਾਯ. ਸਾਵਕਾਨਨ੍ਤਿ ਏਤ੍ਥ ਪਕਤਿਸਾਵਕਾਨਂ ਪਾਕਤਿਕਪਦੀਪੋਭਾਸਸਦਿਸਂ. ਮਹਾਸਾਵਕਾਨਂ (ਥੇਰਗਾ. ਅਟ੍ਠ. ੨.੨੧ ਵਙ੍ਗੀਸੇਤ੍ਥਰਗਾਥਾਵਣ੍ਣਨਾਯ ਵਿਤ੍ਥਾਰੋ) ਮਹਾਪਦੀਪੋਭਾਸਸਦਿਸਂ. ਤੇਨਾਹ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੪੦੨) ‘‘ਉਕ੍ਕਾਪਭਾਸਦਿਸ’’ਨ੍ਤਿ. ਓਸਧਿਤਾਰਕੋਭਾਸਸਦਿਸਨ੍ਤਿ ਉਸ੍ਸਨ੍ਨਾ ਪਭਾ ਏਤਾਯ ਧੀਯਤਿ, ਓਸਧੀਨਂ ਵਾ ਅਨੁਬਲਪ੍ਪਦਾਯਕਤ੍ਤਾ ‘‘ਓਸਧੀ’’ਤਿ ਏਵਂ ਲਦ੍ਧਨਾਮਾਯ ਤਾਰਕਾਯ ਪਭਾਸਦਿਸਂ. ਸਰਦਸੂਰਿਯਮਣ੍ਡਲੋਭਾਸਸਦਿਸਂ ਸਬ੍ਬਸੋ ਅਨ੍ਧਕਾਰਵਿਧਮਨਤੋ. ਅਪਟੁਭਾਵਹੇਤੁਕੋ ਵਿਸਯਗ੍ਗਹਣੇ ਚਞ੍ਚਲਭਾਵੋ ਖਲਿਤਂ, ਕੁਣ੍ਠਿਭਾਵਹੇਤੁਕੋ ਵਿਸਯਸ੍ਸ ਅਨਭਿਸਮਯੋ ਪਟਿਘਾਤੋ.ਆਵਜ੍ਜਨਪਟਿਬਦ੍ਧਮੇਵਾਤਿ ਆਵਜ੍ਜਨਮਤ੍ਤਾਧੀਨਂ, ਆਵਜ੍ਜਿਤਮਤ੍ਤੇ ਏਵ ਯਥਿਚ੍ਛਿਤਸ੍ਸ ਪਟਿਵਿਜ੍ਝਨਕਨ੍ਤਿ ਅਤ੍ਥੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ.

ਅਸਙ੍ਗਅਪ੍ਪਟਿਹਤਂ ਪਵਤ੍ਤਮਾਨਂ ਭਗਵਤੋ ਞਾਣਂ ਲਹੁਤਰੇਪਿ ਵਿਸਯੇ, ਗਰੁਤਰੇ ਚ ਏਕਸਦਿਸਮੇਵਾਤਿ ਦਸ੍ਸੇਤੁਂ ‘‘ਦੁਬ੍ਬਲਪਤ੍ਤਪੁਟੇ’’ਤਿਆਦਿਨਾ ਉਪਮਾਦ੍ਵਯਂ ਵੁਤ੍ਤਂ. ਧਮ੍ਮਕਾਯਤ੍ਤਾ ਭਗਵਤੋ ਗੁਣਂ ਆਰਬ੍ਭ ਪਵਤ੍ਤਾ ‘‘ਭਗਵਨ੍ਤਂਯੇਵ ਆਰਬ੍ਭ ਉਪ੍ਪਨ੍ਨਾ’’ਤਿ ਵੁਤ੍ਤਂ. ਤਂ ਸਬ੍ਬਮ੍ਪੀਤਿ ਤਂ ਯਥਾਵੁਤ੍ਤਂ ਸਬ੍ਬਮ੍ਪਿ ਪੁਬ੍ਬੇਨਿਵਾਸਪਟਿਸਂਯੁਤ੍ਤਂ ਕਥਂ. ਤਿਤ੍ਥਿਯਾਨਂ, ਸਾਵਕਾਨਞ੍ਚ ਪੁਬ੍ਬੇਨਿਵਾਸਾਨੁਸ੍ਸਰਣਂ ਭਗਵਤੋ ਪੁਬ੍ਬੇਨਿਵਾਸਾਨੁਸ੍ਸਰਣਸ੍ਸ ਹੀਨੁਦਾਹਰਣਦਸ੍ਸਨਵਸੇਨੇਤ੍ਥ ਕਥਿਤਂ. ਏਵਞ੍ਹਿ ਭਗਵਤੋ ਮਹਨ੍ਤਭਾਵੋ ਵਿਸੇਸਤੋ ਪਕਾਸਿਤੋ ਹੋਤੀਤਿ. ਸਙ੍ਖੇਪਤੋਤਿ ਸਮਾਸਤੋ. ਯਤ੍ਤਕੋਪਿ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ ਪਵਤ੍ਤਿਭੇਦੋ ਅਤ੍ਤਨੋ ਞਾਣਸ੍ਸ ਵਿਸਯਭੂਤੋ, ਤਂ ਸਬ੍ਬਂ ਤਦਾ ਯਥਾਕਥਿਤਂ ਤੇ ਭਿਕ੍ਖੂ ਸਙ੍ਖਿਪਿਤ੍ਵਾ ‘‘ਇਤਿਪੀ’’ਤਿ ਆਹਂਸੁ. ਤਸ੍ਸ ਚ ਅਨੇਕਾਕਾਰਤਾਯ ਆਮੇਡਿਤਵਚਨਂ, ਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ, ‘‘ਇਤਿ ਖੋ ਭਿਕ੍ਖਵੇ ਸਪ੍ਪਟਿਭਯੋ ਬਾਲੋ’’ਤਿਆਦੀਸੁ (ਮ. ਨਿ. ੩.੧੨੪; ਅ. ਨਿ. ੩.੧) ਵਿਯ ਆਕਾਰਤ੍ਥੋ ਇਤਿ-ਸਦ੍ਦੋਤਿ ਦਸ੍ਸੇਨ੍ਤੋ ‘‘ਏਵਮ੍ਪੀ’’ਤਿ ਤਦਤ੍ਥਮਾਹ.

੨-੩. ਵੁਤ੍ਤਮੇਵਾਤਿ ਏਤ੍ਥ ਚ ਇਧ ਪਾਠੇ ਯਂ ਵਤ੍ਤਬ੍ਬਂ ਤੇਨ ਪਾਠੇਨ ਸਾਧਾਰਣਂ, ਤਂ ਵੁਤ੍ਤਮੇਵਾਤਿ ਅਧਿਪ੍ਪੇਤਂ, ਨ ਅਸਾਧਾਰਣਂ ਅਪੁਬ੍ਬਪਦਵਣ੍ਣਨਾਯ ਅਧਿਕਤਤ੍ਤਾਤਿ ਤਂ ਦਸ੍ਸੇਨ੍ਤੋ ‘‘ਅਯਮੇਵ ਹਿ ਵਿਸੇਸੋ’’ਤਿਆਦਿਮਾਹ. ‘‘ਅਸ੍ਸੋਸੀ’’ਤਿ ਇਦਂ ਸਵਨਕਿਚ੍ਚਨਿਪ੍ਫਤ੍ਤਿਯਾ ਵੁਤ੍ਤਂ ਸਦ੍ਦਗ੍ਗਹਣਮੁਖੇਨ ਤਦਤ੍ਥਾਵਬੋਧਸ੍ਸ ਸਿਦ੍ਧਤ੍ਤਾ. ਤਤ੍ਥ ਪਨ ਪਾਲ਼ਿਯਂ ‘‘ਇਮਂ ਸਂਖਿਯਧਮ੍ਮਂ ਵਿਦਿਤ੍ਵਾ’’ ਇਚ੍ਚੇਵ (ਦੀ. ਨਿ. ੧.੨) ਵੁਤ੍ਤਂ. ਇਮੇ ਭਿਕ੍ਖੂ ਮਮ ਗੁਣੇ ਥੋਮੇਨ੍ਤਿ, ਕਥਂ? ਮਮ ਪੁਬ੍ਬੇਨਿਵਾਸਞਾਣਂ ਆਰਬ੍ਭਾਤਿ ਯੋਜਨਾ. ਨਿਪ੍ਫਤ੍ਤਿਨ੍ਤਿ ਕਿਚ੍ਚਨਿਪ੍ਫਤ੍ਤਿਂ, ਤੇਨ ਕਾਤਬ੍ਬਕਿਚ੍ਚਸਿਦ੍ਧਨ੍ਤਿ ਅਤ੍ਥੋ. ਨੋਤਿ ਪੁਚ੍ਛਾਵਾਚੀ ਨੁ-ਇਤਿ ਇਮਿਨਾ ਸਮਾਨਤ੍ਥੋ ਨਿਪਾਤੋਤਿ ਵੁਤ੍ਤਂ ‘‘ਇਚ੍ਛੇਯ੍ਯਾਥ ਨੂ’’ਤਿ. ਨਨ੍ਤਿ ਭਗਵਨ੍ਤਂ. ‘‘ਯਂ ਭਗਵਾ’’ਤਿ ਏਤ੍ਥ ਯਂ-ਸਦ੍ਦੇਨ ਕਿਰਿਯਾਪਰਾਮਸਨਭੂਤੇਨ ‘‘ਧਮ੍ਮਿਂ ਕਥਂ ਕਥੇਯ੍ਯਾ’’ਤਿ ਏਵਂ ਵੁਤ੍ਤਂ. ਧਮ੍ਮਿਕਥਾਕਰਣਂ ਪਰਾਮਟ੍ਠਂ ‘‘ਏਤਸ੍ਸਾ’’ਤਿ ਪਦਸ੍ਸ ਅਤ੍ਥੋਤਿ ਆਹ ‘‘ਏਤਸ੍ਸ ਧਮ੍ਮਿਕਥਾਕਰਣਸ੍ਸਾ’’ਤਿ, ਆਦਰਵਸੇਨ ਪਨ ਤਂ ਦ੍ਵਿਕ੍ਖਤ੍ਤੁਂ ਵੁਤ੍ਤਂ.

੪. ਸੁਣਾਥਾਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਪਕਾਰਤ੍ਥੋ ਵਾ, ਏਤੇਨ ‘‘ਮਨਸਿ ਕਰੋਥਾ’’ਤਿ ਪਦਂ ਸਙ੍ਗਣ੍ਹਾਤਿ. ਸੋਤਾਵਧਾਨਂ ਸੋਤਸ੍ਸ ਓਦਹਨਂ, ਸੁਸ੍ਸੂਸਾਤਿ ਅਤ੍ਥੋ. ਛਿਨ੍ਨਂ ਉਪਚ੍ਛਿਨ੍ਨਂ ਵਟੁਮਂ ਸਂਸਾਰਵਟ੍ਟਂ ਏਤੇਸਨ੍ਤਿ ਛਿਨ੍ਨਵਟੁਮਕਾ, ਸਮ੍ਮਾਸਮ੍ਬੁਦ੍ਧਾ, ਅਞ੍ਞੇ ਚ ਖੀਣਾਸਵਾ, ਇਧ ਪਨ ਸਮ੍ਮਾਸਮ੍ਬੁਦ੍ਧਾ ਅਧਿਪ੍ਪੇਤਾ. ਤੇਸਞ੍ਹਿ ਸਬ੍ਬਸੋ ਅਨੁਸ੍ਸਰਣਂ ਇਤਰੇਸਂ ਅਵਿਸਯੋ. ਤੇਨਾਹ ‘‘ਅਞ੍ਞੇਸਂ ਅਸਾਧਾਰਣ’’ਨ੍ਤਿ. ਪਚ੍ਚਤ੍ਤਵਚਨੇ ਦਿਸ੍ਸਤਿ ਯਂ-ਸਦ੍ਦੋ ਕਮ੍ਮਤ੍ਥਦੀਪਨਤੋ. ਉਪਯੋਗਵਚਨੇ ਦਿਸ੍ਸਤਿ ਯਂ-ਸਦ੍ਦੋ ਪੁਚ੍ਛਨਕਿਰਿਯਾਯ ਕਮ੍ਮਤ੍ਥਦੀਪਨਤੋ. ਤਨ੍ਤਿ ਚ ਉਪਯੋਗਵਚਨਮੇਵ ਪੁਚ੍ਛਤਿ-ਸਦ੍ਦਸ੍ਸ ਦ੍ਵਿਕਮ੍ਮਕਭਾਵਤੋ. ਯਨ੍ਤਿ ਯੇਨ ਕਾਰਣੇਨਾਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਕਰਣਵਚਨੇ ਦਿਸ੍ਸਤੀ’’ਤਿ. ਭੁਮ੍ਮੇਤਿ ਦਟ੍ਠਬ੍ਬੋਤਿ ਯਥਾ ਯਂ-ਸਦ੍ਦੋ ਨ ਕੇਵਲਂ ਪਚ੍ਚਤ੍ਤਉਪਯੋਗੇਸੁ ਏਵ, ਅਥ ਖੋ ਕਰਣੇਪਿ ਦਿਸ੍ਸਤਿ, ਏਵਂ ਇਧ ਭੁਮ੍ਮੇਤਿ ਦਟ੍ਠਬ੍ਬੋ. ਦਸਸਹਸ੍ਸਿਲੋਕਧਾਤੁਨ੍ਤਿ ਜਾਤਿਕ੍ਖੇਤ੍ਤਭੂਤਂ ਦਸਸਹਸ੍ਸਚਕ੍ਕਵਾਲ਼ਂ. ਉਨ੍ਨਾਦੇਨ੍ਤੋ ਉਪ੍ਪਜ੍ਜਿ ਅਨੇਕਚ੍ਛਰਿਯਪਾਤੁਭਾਵਪਟਿਮਣ੍ਡਿਤਤ੍ਤਾ ਬੁਦ੍ਧੁਪ੍ਪਾਦਸ੍ਸ.

ਕਾਲਸ੍ਸ ਭਦ੍ਦਤਾ ਨਾਮ ਤਤ੍ਥ ਸਤ੍ਤਾਨਂ ਗੁਣਵਿਭੂਤਿਯਾ, ਬੁਦ੍ਧੁਪ੍ਪਾਦਪਰਮਾ ਚ ਗੁਣਵਿਭੂਤੀਤਿ ਤਬ੍ਬਹੁਲਤਾ ਯਸ੍ਸ ਕਪ੍ਪਸ੍ਸ ਭਦ੍ਦਤਾਤਿ ਆਹ ‘‘ਪਞ੍ਚਬੁਦ੍ਧੁਪ੍ਪਾਦਪਟਿਮਣ੍ਡਿਤਤ੍ਤਾ ਸੁਨ੍ਦਰਕਪ੍ਪੇ’’ਤਿ, ਤਥਾ ਸਾਰਭੂਤਗੁਣਵਸੇਨ ‘‘ਸਾਰਕਪ੍ਪੇ’’ਤਿ. ‘‘ਇਮਂ ਕਪ੍ਪਂ ਥੋਮੇਨ੍ਤੋ ਏਵਮਾਹਾ’’ਤਿ ਵਤ੍ਵਾ ਇਮਸ੍ਸ ਕਪ੍ਪਸ੍ਸ ਤਥਾ ਥੋਮੇਤਬ੍ਬਤਾ ਅਨਞ੍ਞਸਾਧਾਰਣਾਤਿ ਦਸ੍ਸੇਤੁਂ ‘‘ਯਤੋ ਪਟ੍ਠਾਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਤੋ ਪਟ੍ਠਾਯਾਤਿ ਯਤੋ ਪਭੁਤਿ ਅਭਿਨੀਹਾਰੋ ਕਤੋਤਿ ਮਨੁਸ੍ਸਤ੍ਤਾਦਿਅਟ੍ਠਙ੍ਗਸਮਨ੍ਨਾਗਤੋ ਅਭਿਨੀਹਾਰੋ ਪਵਤ੍ਤਿਤੋ. ਸਂਸਾਰਸ੍ਸ ਅਨਾਦਿਭਾਵਤੋ ਇਮਸ੍ਸ ਭਗਵਤੋ ਅਭਿਨੀਹਾਰਤੋ ਪੁਰੇਤਰਂ ਉਪ੍ਪਨ੍ਨਾ ਸਮ੍ਮਾਸਮ੍ਬੁਦ੍ਧਾ ਅਨਨ੍ਤਾ ਅਪਰਿਮੇਯ੍ਯਾਤਿ ਤੇਹਿ ਉਪ੍ਪਨ੍ਨਕਪ੍ਪੇ ਨਿਵਤ੍ਤੇਨ੍ਤੋ ‘‘ਏਤਸ੍ਮਿਂ ਅਨ੍ਤਰੇ’’ਤਿ ਆਹ. ਕਾਮਂ ਦੀਪਙ੍ਕਰਬੁਦ੍ਧੁਪ੍ਪਾਦੇ ਅਯਂ ਭਗਵਾ ਅਭਿਨੀਹਾਰਮਕਾਸਿ, ਤਸ੍ਸ ਪਨ ਭਗਵਤੋ ਨਿਬ੍ਬਤ੍ਤਿ ਇਮਸ੍ਸ ਅਭਿਨੀਹਾਰਤੋ ਪੁਰਿਮਤਰਾਤਿ ਵੁਤ੍ਤਂ ‘‘ਅਮ੍ਹਾਕਂ…ਪੇ… ਨਿਬ੍ਬਤ੍ਤਿਂਸੂ’’ਤਿ.

ਅਸਙ੍ਖ੍ਯੇਯ੍ਯਕਪ੍ਪਪਰਿਯੋਸਾਨੇਤਿ ਮਹਾਕਪ੍ਪਾਨਂ ਅਸਙ੍ਖ੍ਯੇਯ੍ਯਪਰਿਯੋਸਾਨੇ. ਏਸ ਨਯੋ ਇਤੋ ਪਰੇਸੁਪਿ. ‘‘ਇਤੋ ਤਿਂਸਕਪ੍ਪਸਹਸ੍ਸਾਨਂ ਉਪਰੀ’’ਤਿ ਏਤੇਨ ਪਦੁਮੁਤ੍ਤਰਸ੍ਸ ਭਗਵਤੋ, ਸੁਮੇਧਸ੍ਸ ਚ ਭਗਵਤੋ ਅਨ੍ਤਰੇ ਏਕੂਨਸਤ੍ਤਤਿਕਪ੍ਪਸਹਸ੍ਸਾਨਿ ਬੁਦ੍ਧਸੁਞ੍ਞਾਨਿ ਅਹੇਸੁਨ੍ਤਿ ਦਸ੍ਸੇਤਿ. ‘‘ਇਤੋ ਅਟ੍ਠਾਰਸਨ੍ਨਂ ਕਪ੍ਪਸਹਸ੍ਸਾਨਂ ਉਪਰੀ’’ਤਿ ਇਮਿਨਾ ਸੁਜਾਤਸ੍ਸ ਭਗਵਤੋ, ਅਤ੍ਥਦਸ੍ਸਿਸ੍ਸ ਚ ਭਗਵਤੋ ਅਨ੍ਤਰੇ ਏਕੇਨੂਨਾਨਿ ਦ੍ਵਾਦਸਕਪ੍ਪਸਹਸ੍ਸਾਨਿ ਬੁਦ੍ਧਸੁਞ੍ਞਾਨਿ ਅਹੇਸੁਨ੍ਤਿ ਦਸ੍ਸੇਤਿ. ‘‘ਇਤੋ ਚਤੁਨਵੁਤੇ ਕਪ੍ਪੇ’’ਤਿ ਇਮਿਨਾ ਧਮ੍ਮਦਸ੍ਸਿਸ੍ਸ ਭਗਵਤੋ, ਸਿਦ੍ਧਤ੍ਥਸ੍ਸ ਚ ਭਗਵਤੋ ਅਨ੍ਤਰੇ ਛਾਧਿਕਨਵਸਤੁਤ੍ਤਰਾਨਿ ਸਤ੍ਤਰਸਕਪ੍ਪਸਹਸ੍ਸਾਨਿ ਬੁਦ੍ਧਸੁਞ੍ਞਾਨਿ ਅਹੇਸੁਨ੍ਤਿ ਦਸ੍ਸੇਤਿ. ‘‘ਏਕਤਿਂਸੇ ਕਪ੍ਪੇ’’ਤਿ ਇਮਿਨਾ ਵਿਪਸ੍ਸਿਸ੍ਸ ਭਗਵਤੋ, ਸਿਖਿਸ੍ਸ ਚ ਭਗਵਤੋ ਅਨ੍ਤਰੇ ਸਟ੍ਠਿ ਕਪ੍ਪਾਨਿ ਬੁਦ੍ਧਸੁਞ੍ਞਾਨਿ ਅਹੇਸੁਨ੍ਤਿ ਦਸ੍ਸੇਤਿ. ਤੇ ਸਬ੍ਬੇਪਿ ਪਦੁਮੁਤ੍ਤਰਸ੍ਸ ਭਗਵਤੋ ਓਰਂ ਸੁਮੇਧਾਦੀਹਿ ਉਪ੍ਪਨ੍ਨਕਪ੍ਪੇਹਿ ਸਦ੍ਧਿਂ ਸਮੋਧਾਨਿਯਮਾਨਾ ਸਤਸਹਸ੍ਸਾ ਕਪ੍ਪਾ ਹੋਨ੍ਤਿ, ਯਤ੍ਥ ਮਹਾਸਾਵਕਾਦਯੋ (ਥੇਰਗਾ. ਅਟ੍ਠ. ੨.੨੧ ਵਙ੍ਗੀਸਤ੍ਥੇਰਗਾਥਾਵਣ੍ਣਨਾ) ਵਿਵਟ੍ਟੂ ਪਨਿਸ੍ਸਯਾਨਿ ਕੁਸਲਾਨਿ ਸਮ੍ਭਰਿਂਸੁ. ਬੁਦ੍ਧਸੁਞ੍ਞੇਪਿ ਲੋਕੇ ਪਚ੍ਚੇਕਬੁਦ੍ਧਾ ਉਪ੍ਪਜ੍ਜਿਤ੍ਵਾ ਤੇਸਂ ਪੁਰਿਸਵਿਸੇਸਾਨਂ ਪੁਞ੍ਞਾਭਿਸਨ੍ਦਾਭਿਬੁਦ੍ਧਿਯਾ ਪਚ੍ਚਯਾ ਹੋਨ੍ਤਿ. ‘‘ਏਵਮਯ’’ਨ੍ਤਿਆਦਿ ਵੁਤ੍ਤਮੇਵਤ੍ਥਂ ਨਿਗਮਨਵਸੇਨ ਵਦਤਿ.

‘‘ਕਿਂ ਪਨੇਤ’’ਨ੍ਤਿਆਦਿ ਪੁਬ੍ਬਨਿਮਿਤ੍ਤਵਿਭਾਵਨਤ੍ਥਾਯ ਆਰਦ੍ਧਂ. ਤਤ੍ਥ ਏਤਨ੍ਤਿ ਬੁਦ੍ਧਾਨਂ ਉਪ੍ਪਜ੍ਜਨਂ. ਕਪ੍ਪਸਣ੍ਠਾਨਕਾਲਸ੍ਮਿਨ੍ਤਿ ਵਿਵਟ੍ਟਕਪ੍ਪਸ੍ਸ ਸਣ੍ਠਹਨਕਾਲੇ. ਏਕਮਸਙ੍ਖ੍ਯੇਯ੍ਯਨ੍ਤਿ ਸਂਵਟ੍ਟਟ੍ਠਾਯਿਂ ਸਨ੍ਧਾਯਾਹ. ਏਕਙ੍ਗਣਂ ਹੁਤ੍ਵਾ ਠਿਤੇਤਿ ਪਬ੍ਬਤਰੁਕ੍ਖਗਚ੍ਛਾਦੀਨਂ, ਮੇਘਾਦੀਨਞ੍ਚ ਅਭਾਵੇਨ ਵਿਵਟਂਅਙ੍ਗਣਂ ਹੁਤ੍ਵਾ ਠਿਤੇ. ਲੋਕਸਨ੍ਨਿਵਾਸੇਤਿ ਭਾਜਨਲੋਕੇਨ ਸਨ੍ਨਿਵਿਸਿਤਬ੍ਬਟ੍ਠਾਨੇ. ਵੀਸਤਿ ਯਟ੍ਠਿਯੋ ਉਸਭਂ. ‘‘ਉਸਭਮਤ੍ਤਾ, ਦ੍ਵੇ ਉਸਭਮਤ੍ਤਾ’’ਤਿਆਦਿਨਾ ਪਚ੍ਚੇਕਂ ਮਤ੍ਤਾ-ਸਦ੍ਦੋ ਯੋਜੇਤਬ੍ਬੋ. ਯੋਜਨਸਹਸ੍ਸਮਤ੍ਤਾ ਹੁਤ੍ਵਾਤਿ ਪਤਮਾਨਾਵ ਉਦਕਧਾਰਾ ਯੋਜਨਸਹਸ੍ਸਮਤ੍ਤਂ ਆਕਾਸਟ੍ਠਾਨਂ ਫਰਿਤ੍ਵਾ ਪਵਤ੍ਤਿਯਾ ਯੋਜਨਸਹਸ੍ਸਮਤ੍ਤਾ ਹੁਤ੍ਵਾ. ਯਾਵ ਅਵਿਨਟ੍ਠਬ੍ਰਹ੍ਮਲੋਕਾਤਿ ਯਾਵ ਆਭਸ੍ਸਰਬ੍ਰਹ੍ਮਲੋਕਾ, ਯਾਵ ਸੁਭਕਿਣ੍ਹਬ੍ਰਹ੍ਮਲੋਕਾ, ਯਾਵ ਵੇਹਪ੍ਫਲਬ੍ਰਹ੍ਮਲੋਕਾਤਿ ਅਤ੍ਥੋ.

ਵਾਤਵਸੇਨਾਤਿ ਸਟ੍ਠਿਸਹਸ੍ਸਾਧਿਕਨਵਯੋਜਨਸਤਸਹਸ੍ਸੁਬ੍ਬੇਧਸ੍ਸ ਸਨ੍ਧਾਰਕਵਾਤਮਣ੍ਡਲਸ੍ਸ ਵਸੇਨ. ਮਹਾਬੋਧਿਪਲ੍ਲਙ੍ਕੋਤਿ ਮਹਾਬੋਧਿਪਲ੍ਲਙ੍ਕਪ੍ਪਦੇਸਮਾਹ. ਤਸ੍ਸ ਪਚ੍ਛਾ ਵਿਨਾਸੋ, ਪਠਮਂ ਸਣ੍ਠਹਨਞ੍ਚ ਧਮ੍ਮਤਾਵਸੇਨ ਵੇਦਿਤਬ੍ਬਂ. ਤਤ੍ਥਾਤਿ ਤਸ੍ਮਿਂ ਪਦੇਸੇ. ਪੁਬ੍ਬਨਿਮਿਤ੍ਤਂ ਹੁਤ੍ਵਾਤਿ ਬੁਦ੍ਧਪ੍ਪਾਦਸ੍ਸ ਪੁਬ੍ਬਨਿਮਿਤ੍ਤਂ ਹੁਤ੍ਵਾ. ਪੁਬ੍ਬਨਿਮਿਤ੍ਤਸਨ੍ਨਿਸ੍ਸਯੋ ਹਿ ਗਚ੍ਛੋ ਨਿਸ੍ਸਿਤਵੋਹਾਰੇਨ ਤਥਾ ਵੁਤ੍ਤੋ. ਤੇਨਾਹ ‘‘ਤਸ੍ਸਾ’’ਤਿਆਦਿ. ਕਣ੍ਣਿਕਾਬਦ੍ਧਾਨਿ ਹੁਤ੍ਵਾਤਿ ਆਬਦ੍ਧਕਣ੍ਣਿਕਾ ਵਿਯ ਹੁਤ੍ਵਾ. ਸੁਦ੍ਧਾਵਾਸਬ੍ਰਹ੍ਮਾਨੋ ਅਤ੍ਤਮਨਾ…ਪੇ… ਗਚ੍ਛਨ੍ਤੀਤਿ ਯੋਜਨਾ. ਵੇਹਪ੍ਫਲੇਪਿ ਸੁਭਕਿਣ੍ਹੇ ਸਙ੍ਗਹੇਤ੍ਵਾ ‘‘ਨਵ ਬ੍ਰਹ੍ਮਲੋਕਾ’’ਤਿ ਵੁਤ੍ਤਂ. ਤਥਾ ਹਿ ਤੇ ਚਤੁਤ੍ਥਿਂਯੇਵ ਵਿਞ੍ਞਾਣਟ੍ਠਿਤਿਂ ਭਜਨ੍ਤਿ. ਨਿਕ੍ਖਮਨ੍ਤੇਸੂਤਿ ਮਹਾਭਿਨਿਕ੍ਖਮਨਂ ਅਭਿਨਿਕ੍ਖਮਨ੍ਤੇਸੁ. ਅਭਿਜਾਤਿ ਪਨੇਤ੍ਥ ਜਾਤਿਭਾਵਸਾਮਞ੍ਞੇਨ ਗਬ੍ਭੋਕ੍ਕਨ੍ਤਿਯਾਵ ਸਙ੍ਗਹਿਤਾ. ਨਿਮੀਯਤਿ ਅਨੁਮੀਯਤਿ ਫਲਂ ਏਤੇਨਾਤਿ ਨਿਮਿਤ੍ਤਂ, ਕਾਰਣਂ. ਞਾਪਕਮ੍ਪਿ ਹਿ ਕਾਰਣਂ ਦਿਸ੍ਵਾ ਤਸ੍ਸ ਅਬ੍ਯਭਿਚਾਰੀਭਾਵੇਨ ਫਲਂ ਸਿਦ੍ਧਮੇਵ ਕਤ੍ਵਾ ਗਣ੍ਹਿ, ਯਥਾ ਤਂ ਅਸਿਤੋ ਇਸਿ ਅਭਿਜਾਤਿਯਂ ਮਹਾਪੁਰਿਸਸ੍ਸ ਲਕ੍ਖਣਾਨਿ ਦਿਸ੍ਵਾ ਤੇਸਂ ਅਬ੍ਯਭਿਚਾਰੀਭਾਵੇਨ ਬੁਦ੍ਧਗੁਣੇ ਸਿਦ੍ਧੇ ਏਵ ਕਤ੍ਵਾ ਗਣ੍ਹਿ, ਏਵਂ ਪਨ ਗਯ੍ਹਮਾਨਂ ਤਨ੍ਨਿਮਿਤ੍ਤਕਂ ਫਲਂ ਤਦਾਨੁਭਾਵੇਨ ਸਿਦ੍ਧਂ ਵਿਯ ਵੋਹਰੀਯਤਿ ਤਬ੍ਭਾਵੇ ਭਾਵਤੋ. ਤੇਨਾਹ ‘‘ਤੇਸਂ ਨਿਮਿਤ੍ਤਾਨਂ ਆਨੁਭਾਵੇਨਾ’’ਤਿਆਦਿ. ਤਥਾ ਚਾਹ ਭਗਵਾ ‘‘ਸੋ ਤੇਨ ਲਕ੍ਖਣੇਨ ਸਮਨ੍ਨਾਗਤੋ…ਪੇ… ਰਾਜਾ ਸਮਾਨੋ ਕਿਂ ਲਭਤਿ, ਬੁਦ੍ਧੋ ਸਮਾਨੋ ਕਿਂ ਲਭਤੀ’’ਤਿ (ਦੀ. ਨਿ. ੩.੨੦੨, ੨੦੪) ਚ ਏਵਮਾਦਿ. ਇਮਮਤ੍ਥਨ੍ਤਿ ਪਞ੍ਚ ਬੁਦ੍ਧਾ ਇਮਸ੍ਮਿਂ ਕਪ੍ਪੇ ਉਪ੍ਪਜ੍ਜਿਸ੍ਸਨ੍ਤੀਤਿ ਇਮਮਤ੍ਥਂ ਯਾਥਾਵਤੋ ਜਾਨਿਂਸੁ.

ਜਾਤਿਪਰਿਚ੍ਛੇਦਾਦਿਵਣ੍ਣਨਾ

੫-੭. ਕਪ੍ਪਪਰਿਚ੍ਛੇਦਵਸੇਨਾਤਿ ‘‘ਇਤੋ ਸੋ ਏਕਨਵੁਤੇ ਕਪ੍ਪੇ’’ਤਿਆਦਿਨਾ ਯਤ੍ਥ ਯਤ੍ਥ ਕਪ੍ਪੇ ਤੇ ਤੇ ਬੁਦ੍ਧਾ ਉਪ੍ਪਨ੍ਨਾ, ਤਸ੍ਸ ਤਸ੍ਸ ਕਪ੍ਪਸ੍ਸ ਪਰਿਚ੍ਛਿਨ੍ਦਨਵਸੇਨ ਪਰਿਜਾਨਨਵਸੇਨ. ‘‘ਇਦਂ ਤ’’ਨ੍ਤਿ ਹਿ ਨਿਯਮੇਤ੍ਵਾ ਪਰਿਚ੍ਛਿਜ੍ਜ ਜਾਨਨਂ ਪਰਿਚ੍ਛਿਨ੍ਦਨਂ ਪਰਿਚ੍ਛੇਦੋ. ਪਰਿਤ੍ਤਨ੍ਤਿ ਇਤ੍ਤਰਂ. ਲਹੁਕਨ੍ਤਿ ਸਲ੍ਲਹੁਕਂ, ਆਯੁਨੋ ਅਧਿਪ੍ਪੇਤਤ੍ਤਾ ਰਸ੍ਸਨ੍ਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਉਭਯਮੇਤਂ ਅਪ੍ਪਕਸ੍ਸੇਵ ਵੇਵਚਨ’’ਨ੍ਤਿ.

‘‘ਅਪ੍ਪਂ ਵਾ ਭਿਯ੍ਯੋ’’ਤਿ ਅਵਿਸੇਸਜੋਤਨਂ ‘‘ਵੀਸਂ ਵਾ ਤਿਂਸਂ ਵਾ’’ਤਿਆਦਿਨਾ ਅਨਿਯਮਿਤਵਸੇਨੇਵ ਯਥਾਲਾਭਤੋ ਵਵਤ੍ਥਪੇਤ੍ਵਾ ਅਯਞ੍ਚ ਨਯੋ ਅਪਚੁਰੋਤਿ ਦਸ੍ਸੇਨ੍ਤੋ ‘‘ਏਵਂ ਦੀਘਾਯੁਕੋ ਪਨ ਅਤਿਦੁਲ੍ਲਭੋ’’ਤਿ ਆਹ. ਇਦਂ ਤਂ ਵਿਸੇਸਵਵਤ੍ਥਾਪਨਂ ਪੁਗ੍ਗਲੇਸੁ ਪਕ੍ਖਿਪਿਤ੍ਵਾ ਦਸ੍ਸੇਨ੍ਤੋ ‘‘ਤਤ੍ਥ ਵਿਸਾਖਾ’’ਤਿਆਦਿਮਾਹ.

ਯਦਿ ਏਵਂ ਕਸ੍ਮਾ ਅਮ੍ਹਾਕਂ ਭਗਵਾ ਤਤ੍ਤਕਮ੍ਪਿ ਕਾਲਂ ਨ ਜੀਵਿ, ਨਨੁ ਮਹਾਬੋਧਿਸਤ੍ਤਾ ਚਰਿਮਭਵੇ ਅਤਿਵਿਯਉਲ਼ਾਰਤਮੇਨ ਪੁਞ੍ਞਾਭਿਸਙ੍ਖਾਰੇਨ ਪਟਿਸਨ੍ਧਿਂ ਗਣ੍ਹਨ੍ਤੀਤਿ? ਸਚ੍ਚਮੇਤਨ੍ਤਿ. ਤਤ੍ਥ ਕਾਰਣਂ ਦਸ੍ਸੇਤੁਂ ‘‘ਵਿਪਸ੍ਸੀਆਦਯੋ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਭਿਜਾਤਿਯਾ ਮੇਤ੍ਤਾਠਾਨਤਾਯ ਅਭਿਸਙ੍ਖਾਰਵਿਞ੍ਞਾਣਸ੍ਸ ਮੇਤ੍ਤਾਪੁਬ੍ਬਭਾਗਤਾ. ਤਦਨੁਗੁਣਞ੍ਹਿ ਤੇਸਂ ਵਿਸੇਸਤੋ ਪਟਿਸਨ੍ਧਿਵਿਞ੍ਞਾਣਂ. ਤਸ੍ਸ ਵਿਸੇਸਤੋ ਬਹੁਲਂ ਖੇਮਵਿਤਕ੍ਕੂਪਨਿਸ੍ਸਯਤਾਯ ਸੋਮਨਸ੍ਸਸਹਗਤਤਾ, ਅਨਞ੍ਞਸਾਧਾਰਣਪਰੋਪਦੇਸਰਹਿਤਞਾਣਵਿਸੇਸੂਪਨਿਸ੍ਸਯਤਾਯ ਞਾਣਸਮ੍ਪਯੁਤ੍ਤਤਾ, ਅਸਙ੍ਖਾਰਿਕਤਾ ਚ ਵੇਦਿਤਬ੍ਬਾ, ਅਸਙ੍ਖ੍ਯੇਯ੍ਯਂ ਆਯੁ ਆਧਾਰਵਿਸੇਸਤੋ, ਨਿਸ੍ਸਯਵਿਸੇਸਤੋ, ਪਟਿਪਕ੍ਖਦੂਰੀਭਾਵਤੋ, ਪਵਤ੍ਤਿਆਕਾਰਵਿਸੇਸਤੋ ਚ ਅਪਰਿਮੇਯ੍ਯਾਨੁਭਾਵਤਾਯ ਕਾਰਣਸ੍ਸ. ਤਤ੍ਥ ਚਿਰਤਰਂ ਕਾਲਂ ਸਨ੍ਤਾਨਸ੍ਸ ਪਾਰਮਿਤਾਪਰਿਭਾਵਿਤਤਾ ਆਧਾਰਵਿਸੇਸਤਾ. ਅਲੋਭਜ੍ਝਾਸਯਾਦਿਆਸਯਸਮ੍ਪਦਾ ਨਿਸ੍ਸਯਵਿਸੇਸਤਾ. ਲਾਭਮਚ੍ਛਰਿਯਾਦਿਪਾਪਧਮ੍ਮਵਿਕ੍ਖਮ੍ਭਨਂ ਪਟਿਪਕ੍ਖਦੂਰੀਭਾਵੋ. ਸਬ੍ਬਸਤ੍ਤਾਨਂ ਸਕਲਵਟ੍ਟਦੁਕ੍ਖਨਿਸ੍ਸਰਣਤ੍ਥਾਯ ਆਯੂਹਨਾ ਪਵਤ੍ਤਿਆਕਾਰਵਿਸੇਸੋ ਵੇਦਿਤਬ੍ਬੋ.

ਅਯਞ੍ਚ ਨਯੋ ਸਬ੍ਬੇਸਂ ਮਹਾਬੋਧਿਸਤ੍ਤਾਨਂ ਚਰਿਮਭਵਾਭਿਨਿਬ੍ਬਤ੍ਤਕਕਮ੍ਮਾਯੂਹਨੇ ਸਾਧਾਰਣੋਤਿ ਤਸ੍ਸ ਫਲੇਨਾਪਿ ਏਕਸਦਿਸੇਨੇਵ ਭਵਿਤਬ੍ਬਨ੍ਤਿ ਆਹ ‘‘ਇਤਿ ਸਬ੍ਬੇ ਬੁਦ੍ਧਾ ਅਸਙ੍ਖ੍ਯੇਯ੍ਯਾਯੁਕਾ’’ਤਿ, ਅਸਙ੍ਖ੍ਯੇਯ੍ਯਕਾਲਾਵਤ੍ਥਾਨਾਯੁਕਾਤਿ ਅਤ੍ਥੋ. ਅਸਙ੍ਖ੍ਯੇਯ੍ਯਾਯੁਕਸਂਵਤ੍ਤਨਸਮਤ੍ਥਂ ਪਰਿਚਿਤਂ ਕਮ੍ਮਂ ਹੋਤਿ, ਬੁਦ੍ਧਾ ਪਨ ਤਦਾ ਮਨੁਸ੍ਸਾਨਂ ਪਰਮਾਯੁਪ੍ਪਮਾਣਾਨੁਰੂਪਮੇਵ ਕਾਲਂ ਠਤ੍ਵਾ ਪਰਿਨਿਬ੍ਬਾਯਨ੍ਤਿ ਤਤੋ ਪਰਂ ਠਤ੍ਵਾ ਸਾਧੇਤਬ੍ਬਪਯੋਜਨਾਭਾਵਤੋ, ਧਮ੍ਮਤਾਵੇਸਾਤਿ ਵਾ ਵੇਦਿਤਬ੍ਬਾ. ਅਟ੍ਠਕਥਾਯਂ ਪਨ ਤਤੋ ਪਰਂ ਪਨ ਅਟ੍ਠਾਨਸ੍ਸ ‘‘ਉਤੁਭੋਜਨਵਿਪਤ੍ਤਿਯਾ’’ਤਿ (ਦੀ. ਨਿ. ਅਟ੍ਠ. ੨.੫) ਕਾਰਣਂ ਵੁਤ੍ਤਂ, ‘‘ਤਂ ਲੋਕਸਾਧਾਰਣਂ ਲੋਕੇ ਜਾਤਸਂਵੁਦ੍ਧਾਨਂ ਤਥਾਗਤਾਨਂ ਨ ਹੋਤੀ’’ਤਿ ਨ ਸਕ੍ਕਾ ਵਤ੍ਤੁਂ. ਤਥਾ ਹਿ ਨੇਸਂ ਰੋਗਕਿਲਮਥਾਦਯੋ ਹੋਨ੍ਤਿਯੇਵ. ਉਤੁਭੋਜਨਵਸੇਨਾਤਿ ਅਸਮ੍ਪਨ੍ਨਸ੍ਸ, ਸਮ੍ਪਨ੍ਨਸ੍ਸ ਚ ਉਤੁਨੋ, ਭੋਜਨਸ੍ਸ ਚ ਵਸੇਨ ਯਥਾਕ੍ਕਮਂ ਆਯੁ ਹਾਯਤਿਪਿ ਵਡ੍ਢਤਿਪਿ. ਆਯੂਤਿ ਚ ਪਰਮਾਯੁ ਅਧਿਪ੍ਪੇਤਂ. ਤਤ੍ਥ ਯਂ ਵਤ੍ਤਬ੍ਬਂ, ਤਂ ਬ੍ਰਹ੍ਮਜਾਲਾਦਿਟੀਕਾਯਂ (ਦੀ. ਨਿ. ਟੀ. ੧.੪੦) ਵੁਤ੍ਤਮੇਵ.

ਇਦਾਨਿ ਤਮਤ੍ਥਂ ਸਮੁਦਾਗਮਤੋ ਪਟ੍ਠਾਯ ਦਸ੍ਸੇਤੁਂ ‘‘ਤਤ੍ਥ ਯਦਾ’’ਤਿਆਦਿ ਵੁਤ੍ਤਂ. ਧਮ੍ਮੇ ਨਿਯੁਤ੍ਤਾ ਧਮ੍ਮਿਕਾ, ਨ ਧਮ੍ਮਿਕਾ ਅਧਮ੍ਮਿਕਾ, ਹਿਂਸਾਦਿਅਧਮ੍ਮਪਸੁਤਾ. ਅਧਮ੍ਮਿਕਮੇਵ ਹੋਤਿ ਇਸ੍ਸਰਜਨਾਨਂ ਅਨੁਵਤ੍ਤਨੇਨ, ਪਰੇਸਂ ਦਿਟ੍ਠਾਨੁਗਤਿਆਪਜ੍ਜਨੇਨ ਚ. ਉਣ੍ਹਵਲਾਹਕਾ ਦੇਵਤਾਤਿ ਉਣ੍ਹਉਤੁਨੋ ਪਚ੍ਚਯਭੂਤਮੇਘਮਾਲਾਸਮੁਟ੍ਠਾਪਕਾ ਦੇਵਪੁਤ੍ਤਾ. ਤੇਸਂ ਕਿਰ ਤਥਾ ਚਿਤ੍ਤੁਪ੍ਪਾਦਸਮਕਾਲਮੇਵ ਯਥਿਚ੍ਛਿਤਟ੍ਠਾਨਂ ਉਣ੍ਹਂ ਫਰਮਾਨਾ ਵਲਾਹਕਮਾਲਾ ਨਾਤਿਬਹਲਾ ਇਤੋ ਚਿਤੋ ਨਭਂ ਛਾਦੇਨ੍ਤੀ ਵਿਤਨੋਤਿ. ਏਸ ਨਯੋ ਸੀਤਵਲਾਹਕਵਸ੍ਸਵਲਾਹਕਾਸੁ. ਅਬ੍ਭਵਲਾਹਕਾ ਪਨ ਦੇਵਤਾ ਸੀਤੁਣ੍ਹਵਸ੍ਸੇਹਿ ਵਿਨਾ ਕੇਵਲਂ ਅਬ੍ਭਪਟਲਸ੍ਸੇਵ ਸਮੁਟ੍ਠਾਪਕਾ ਵੇਦਿਤਬ੍ਬਾ. ਤਾਸਨ੍ਤਿ ਏਤ੍ਥ ‘‘ਮਿਤ੍ਤਾ’’ਤਿ ਪਦਂ ਆਨੇਤ੍ਵਾ ਯੋਜਨਾ. ਕਾਮਂ ਹੇਟ੍ਠਾ ਵੁਤ੍ਤਾ ਸਤ੍ਤਵਿਧਾਪਿ ਦੇਵਤਾ ਚਾਤੁਮਹਾਰਾਜਿਕਾਵ ਤਾ ਪਨ ਤੇਨ ਤੇਨ ਵਿਸੇਸੇਨ ਵਤ੍ਵਾ ਇਦਾਨਿ ਤਦਞ੍ਞੇ ਪਠਮਭੂਮਿਕੇ ਕਾਮਾਵਚਰਦੇਵੇ ਸਾਮਞ੍ਞਤੋ ਗਣ੍ਹਨ੍ਤੋ ‘‘ਚਾਤੁਮਹਾਰਾਜਿਕਾ’’ਤਿ ਆਹ. ਤਾਸਂ ਅਧਮ੍ਮਿਕਤਾਯਾਤਿ ਰਾਜੂਨਂ ਅਧਮ੍ਮਿਕਭਾਵਮੂਲਕੇਨ ਉਪਰਾਜਾਦਿਅਧਮ੍ਮਿਕਭਾਵਪਰਮ੍ਪਰਾਭਤੇਨ ਤਾਸਂ ਦੇਵਤਾਨਂ ਅਧਮ੍ਮਿਕਭਾਵੇਨ. ਵਿਸਮਂ ਚਨ੍ਦਿਮਸੂਰਿਯਾ ਪਰਿਹਰਨ੍ਤੀਤਿ ਬਹ੍ਵਾਬਾਧਤਾਦਿ ਅਨਿਟ੍ਠਫਲੂਪਨਿਸ੍ਸਯਭੂਤਸ੍ਸ ਯਥਾਵੁਤ੍ਤਅਧਮ੍ਮਿਕਤਾਸਞ੍ਞਿਤਸ੍ਸ ਸਾਧਾਰਣਸ੍ਸ ਪਾਪਕਮ੍ਮਸ੍ਸ ਬਲੇਨ ਵਿਸਮਂ ਵਾਯਨ੍ਤੇਨ ਵਾਯੁਨਾ ਪੀਲ਼ਿਯਮਾਨਾ ਚਨ੍ਦਿਮਸੂਰਿਯਾ ਸਿਨੇਰੁਂ ਪਰਿਕ੍ਖਿਪਨ੍ਤਾ ਵਿਸਮਂ ਪਰਿਵਤ੍ਤਨ੍ਤਿ ਯਥਾਮਗ੍ਗੇਨ ਨਪ੍ਪਵਤ੍ਤਨ੍ਤੀਤਿ. ਅਸ੍ਸਿਦਂ ਯਥਾ ਚਨ੍ਦਿਮਸੂਰਿਯਾਨਂ ਵਿਸਮਪਰਿਵਤ੍ਤਨਂ ਵਿਸਮਵਾਤਸਙ੍ਖੋਭਹੇਤੁਕਂ, ਏਵਂ ਉਤੁਵਸ੍ਸਾਦਿਵਿਸਮਪ੍ਪਵਤ੍ਤੀਤਿ ਦਸ੍ਸੇਤੁਂ ‘‘ਵਾਤੋ ਯਥਾਮਗ੍ਗੇਨ ਨ ਵਾਯਤੀ’’ਤਿਆਦਿ ਵੁਤ੍ਤਂ. ਦੇਵਤਾਨਨ੍ਤਿ ਸੀਤਵਲਾਹਕਦੇਵਤਾਦਿਦੇਵਤਾਨਂ. ਤੇਨਾਹ ‘‘ਸੀਤੁਣ੍ਹਭੇਦੋ ਉਤੂ’’ਤਿਆਦਿ. ਤਸ੍ਮਿਂ ਅਸਮ੍ਪਜ੍ਜਨ੍ਤੇਤਿ ਤਸ੍ਮਿਂ ਯਥਾਵੁਤ੍ਤੇ ਵਸ੍ਸਬੀਜਭੂਤੇ ਉਤੁਮ੍ਹਿ ਯਥਾਕਾਲਂ ਸਮ੍ਪਤ੍ਤਿਂ ਅਨੁਪਗਚ੍ਛਨ੍ਤੇ.

‘‘ਨ ਸਮ੍ਮਾ ਦੇਵੋ ਵਸ੍ਸਤੀ’’ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਵਰਨ੍ਤੋ ‘‘ਕਦਾਚੀ’’ਤਿਆਦਿਮਾਹ. ਤਤ੍ਥ ਕਦਾਚਿ ਵਸ੍ਸਤੀਤਿ ਕਦਾਚਿ ਅਵਸ੍ਸਨਕਾਲੇ ਵਸ੍ਸਤਿ. ਕਦਾਚਿ ਨ ਵਸ੍ਸਤੀਤਿ ਕਦਾਚਿ ਵਸ੍ਸਿਤਬ੍ਬਕਾਲੇ ਨ ਵਸ੍ਸਤਿ. ਕਤ੍ਥਚਿ ਵਸ੍ਸਤਿ, ਕਤ੍ਥਚਿ ਨ ਵਸ੍ਸਤੀਤਿ ਪਦੇਸਮਾਹ. ‘‘ਵਸ੍ਸਨ੍ਤੋਪੀ’’ਤਿਆਦਿ ‘‘ਕਦਾਚਿ ਵਸ੍ਸਤਿ, ਕਦਾਚਿ ਨ ਵਸ੍ਸਤੀ’’ਤਿ ਪਦਦ੍ਵਯਸ੍ਸੇਵ ਅਤ੍ਥਵਿਵਰਣਂ. ਵਿਗਤਗਨ੍ਧਵਣ੍ਣਰਸਾਦੀਤਿ ਆਦਿ-ਸਦ੍ਦੇਨ ਨਿਰੋਜਤਂ ਸਙ੍ਗਣ੍ਹਾਤਿ. ਏਕਸ੍ਮਿਂ ਪਦੇਸੇਤਿ ਭਤ੍ਤਪਚਨਭਾਜਨਸ੍ਸ ਏਕਪਸ੍ਸੇ. ਉਤ੍ਤਣ੍ਡੁਲਨ੍ਤਿ ਪਾਕਤੋ ਉਕ੍ਕਨ੍ਤਤਣ੍ਡੁਲਂ. ਤੀਹਾਕਾਰੇਹੀਤਿ ਸਬ੍ਬਸੋ ਅਪਰਿਣਤਂ, ਏਕਦੇਸੇਨ ਪਰਿਣਤਂ, ਦੁਪਰਿਣਤਞ੍ਚਾਤਿ ਏਵਂ ਤੀਹਾਕਾਰੇਹਿ. ਪਚ੍ਚਤਿ ਪਕ੍ਕਾਸਯਂ ਉਪਗਚ੍ਛਤਿ. ਅਪ੍ਪਾਯੁਕਾਤਿ ਏਤ੍ਥ ‘‘ਦੁਬ੍ਬਣ੍ਣਾ ਚਾ’’ਤਿਪਿ ਵਤ੍ਤਬ੍ਬਂ. ਏਵਂ ਉਤੁਭੋਜਨਵਸੇਨ ਆਯੁ ਹਾਯਤਿ ਹੇਤੁਮ੍ਹਿ ਅਪਰਿਕ੍ਖੀਣੇਪਿ ਪਚ੍ਚਯਸ੍ਸ ਪਰਿਦੁਬ੍ਬਲਤ੍ਤਾ.

‘‘ਯਦਾ ਪਨਾ’’ਤਿਆਦਿ ਸੁਕ੍ਕਪਕ੍ਖਸ੍ਸ ਅਤ੍ਥੋ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬੋ.

ਵਡ੍ਢਿਤ੍ਵਾ ਵਡ੍ਢਿਤ੍ਵਾ ਪਰਿਹੀਨਨ੍ਤਿ ਵੇਦਿਤਬ੍ਬਂ. ਕਸ੍ਮਾ? ਨ ਹਿ ਏਕਸ੍ਮਿਂ ਅਨ੍ਤਰਕਪ੍ਪੇ ਅਨੇਕੇ ਬੁਦ੍ਧਾ ਉਪ੍ਪਜ੍ਜਨ੍ਤਿ, ਏਕੋ ਏਵ ਪਨ ਉਪ੍ਪਜ੍ਜਤੀਤਿ. ਇਦਾਨਿ ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਕਥ’’ਨ੍ਤਿਆਦਿ ਵੁਤ੍ਤਂ. ਚਤ੍ਤਾਰਿ ਠਤ੍ਵਾਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਯਂਯਂਆਯੁਪਰਿਮਾਣੇਸੂਤਿ ਯਤ੍ਤਕਯਤ੍ਤਕਪਰਮਾਯੁਪ੍ਪਮਾਣੇਸੁ. ਤੇਸਮ੍ਪੀਤਿ ਬੁਦ੍ਧਾਨਂ. ਤਂ ਤਦੇਵ ਆਯੁਪਰਿਮਾਣਂ ਹੋਤਿ, ਤਤ੍ਥ ਕਾਰਣਂ ਹੇਟ੍ਠਾ ਵੁਤ੍ਤਮੇਵ.

ਜਾਤਿਪਰਿਚ੍ਛੇਦਾਦਿਵਣ੍ਣਨਾ ਨਿਟ੍ਠਿਤਾ

ਬੋਧਿਪਰਿਚ੍ਛੇਦਵਣ੍ਣਨਾ

੮. ਮੂਲੇਤਿ ਮੂਲਾਵਯਵਸ੍ਸ ਸਮੀਪੇ. ਤਂ ਪਨ ਤਸ੍ਸਾ ਹੇਟ੍ਠਾਪਦੇਸੋ ਹੋਤੀਤਿ ਆਹ ‘‘ਪਾਟਲਿਰੁਕ੍ਖਸ੍ਸ ਹੇਟ੍ਠਾ’’ਤਿ. ਤਂਦਿਵਸਨ੍ਤਿ ਅਤ੍ਤਨਾ ਜਾਤਦਿਵਸੇ, ਤਂਦਿਵਸਨ੍ਤਿ ਵਾ ਤਂ ਭਗਵਤੋ ਅਭਿਸਮ੍ਬੋਧਿਦਿਵਸੇ. ਸੋ ਕਿਰ ਬੋਧਿਰੁਕ੍ਖੋ ਸਾਲਕਲ੍ਯਾਣੀ ਵਿਯ ਪਥਵਿਯਾ ਅਬ੍ਭਨ੍ਤਰੇ ਏਵ ਪੁਰੇਤਰਂ ਵਡ੍ਢੇਨ੍ਤੋ ਅਭਿਸਮ੍ਬੋਧਿਦਿਵਸੇ ਪਥਵਿਂ ਉਬ੍ਭਿਜ੍ਜਿਤ੍ਵਾ ਉਟ੍ਠਿਤੋ ਰਤਨਸਤਂ ਉਚ੍ਚੋ, ਤਾਵਦੇਵ ਚ ਵਿਤ੍ਥਤੋ ਹੁਤ੍ਵਾ ਨਭਂ ਪੂਰੇਨ੍ਤੋ ਅਟ੍ਠਾਸਿ. ਅਯਮ੍ਪਿ ਕਿਰੇਤਸ੍ਸ ਰੁਕ੍ਖਭਾਵੇਨ ਵਿਯ ਅਞ੍ਞੇਹਿ ਵੇਮਤ੍ਤਤਾ. ਘਨਸਂਹਤਨਾਲ਼ਵਣ੍ਟਤਾਯ ਕਣ੍ਣਿਕਬਦ੍ਧੇਹਿ ਵਿਯ ਪੁਪ੍ਫੇਹਿ. ਏਕਸਞ੍ਛਨ੍ਨਾਤਿ ਪੁਪ੍ਫਾਨਂ ਨਿਰਨ੍ਤਰਤਾਯ ਏਕਜ੍ਝਂ ਸਞ੍ਛਨ੍ਨਾ, ਤਤ੍ਥ ਤਤ੍ਥ ਨਿਬਦ੍ਧ…ਪੇ… ਸਮੁਜ੍ਜਲਨ੍ਤਿ ਤਹਂ ਤਹਂ ਓਲਮ੍ਬਿਤਕੁਸੁਮਦਾਮੇਹਿ ਚੇਵ ਤਹਂ ਤਹਂ ਖਿਤ੍ਤਮਾਲਾਪਿਣ੍ਡੀਹਿ ਚ ਇਤੋ ਚਿਤੋ ਵਿਪ੍ਪਕਿਣ੍ਣਵਿਵਿਧਵਣ੍ਟਮੁਤ੍ਤਪੁਪ੍ਫੇਹਿ ਚ ਸਮ੍ਮਦੇਵ ਉਜ੍ਜਲਂ. ਅਞ੍ਞਮਞ੍ਞਂ ਸਿਰੀਸਮ੍ਪਤ੍ਤਾਨੀਤਿ ਅਞ੍ਞਮਞ੍ਞਸ੍ਸ ਸਿਰਿਯਾ ਸੋਭਾਯ ਸਮ੍ਪਨ੍ਨਾਨਿ. ਬੁਦ੍ਧਗੁਣਵਿਭਵਸਿਰਿਨ੍ਤਿ ਸਮ੍ਮਾਸਮ੍ਬੁਦ੍ਧੇਹਿ ਅਭਿਗਨ੍ਤਬ੍ਬਗੁਣਵਿਭੂਤਿਸੋਭਂ. ਪਟਿਵਿਜ੍ਝਮਾਨੋਤਿ ਅਧਿਗਚ੍ਛਨ੍ਤੋ.

ਸੇਤਮ੍ਬਰੁਕ੍ਖੋਤਿ ਸੇਤਵਣ੍ਣਫਲੋ ਅਮ੍ਬਰੁਕ੍ਖੋ. ਤਦੇਵਾਤਿ ਪਾਟਲਿਯਾ ਵੁਤ੍ਤਪ੍ਪਮਾਣਮੇਵ. ਏਕਤੋਤਿ ਏਕਪਸ੍ਸੇ. ਸੁਰਸਾਨੀਤਿ ਸੁਮਧੁਰਰਸਾਨਿ.

ਏਕੋਵ ਪਲ੍ਲਙ੍ਕੋਤਿ ਏਕੋਵ ਪਲ੍ਲਙ੍ਕਪ੍ਪਦੇਸੋ. ਸੋ ਸੋ ਰੁਕ੍ਖੋ ‘‘ਬੋਧੀ’’ਤਿ ਵੁਚ੍ਚਤਿ ਬੁਜ੍ਝਨ੍ਤਿ ਏਤ੍ਥਾਤਿ ਕਤ੍ਵਾ.

ਸਾਵਕਯੁਗਪਰਿਚ੍ਛੇਦਵਣ੍ਣਨਾ

੯. ਸਾਵਕਪਰਿਚ੍ਛੇਦੇਤਿ ਸਾਵਕਯੁਗਪਰਿਚ੍ਛੇਦੇ. ‘‘ਖਣ੍ਡਤਿਸ੍ਸ’’ਨ੍ਤਿ ਦ੍ਵੇਪਿ ਏਕਜ੍ਝਂ ਗਹੇਤ੍ਵਾ ਏਕਤ੍ਤਵਸੇਨ ਵੁਤ੍ਤਨ੍ਤਿ ਆਹ ‘‘ਖਣ੍ਡੋ ਚ ਤਿਸ੍ਸੋ ਚਾ’’ਤਿ, ਬੁਦ੍ਧਾਨਂ ਸਹੋਦਰੋ, ਵੇਮਾਤਿਕੋਪਿ ਵਾ ਜੇਟ੍ਠਭਾਤਾ ਨ ਹੋਤੀਤਿ ‘‘ਏਕਪਿਤਿਕੋ ਕਨਿਟ੍ਠਭਾਤਾ’’ਤਿ ਵੁਤ੍ਤਂ. ਅਵਸੇਸੇਹਿ ਪੁਤ੍ਤੇਹਿ. ‘‘ਪਞ੍ਞਾਪਾਰਮਿਯਾ ਮਤ੍ਥਕਂ ਪਤ੍ਤੋ’’ਤਿ ਵਤ੍ਵਾ ਤਸ੍ਸ ਮਤ੍ਥਕਪ੍ਪਤ੍ਤਂ ਗੁਣਵਿਸੇਸਂ ਦਸ੍ਸੇਤੁਂ ‘‘ਸਿਖਿਨਾ ਭਗਵਤਾ’’ਤਿਆਦਿ ਵੁਤ੍ਤਂ.

ਉਤ੍ਤਰੋਤਿ ਉਤ੍ਤਮੋ. ਪੁਨ ਉਤ੍ਤਰੋਤਿ ਥੇਰਂ ਨਾਮੇਨ ਵਦਤਿ. ਪਾਰਨ੍ਤਿ ਪਰਕੋਟਿਮਤ੍ਥਕਂ. ਪਞ੍ਞਾਵਿਸਯੇਤਿ ਪਞ੍ਞਾਧਿਕਾਰੇ. ਪਵਤ੍ਤਿਟ੍ਠਾਨਵਸੇਨ ਹਿ ਪਵਤ੍ਤਿਂ ਵਦਤਿ.

ਸਾਵਕਸਨ੍ਨਿਪਾਤਪਰਿਚ੍ਛੇਦਵਣ੍ਣਨਾ

੧੦. ਉਪੋਸਥਨ੍ਤਿ ਆਣਾਪਾਤਿਮੋਕ੍ਖਂ. ਦੁਤਿਯਤਤਿਯੇਸੂਤਿ ਦੁਤਿਯੇ, ਤਤਿਯੇ ਚ ਸਾਵਕਸਨ੍ਨਿਪਾਤੇ. ਏਸੇਵ ਨਯੋਤਿ ਚਤੁਰਙ੍ਗਿਕਤਂ ਅਤਿਦਿਸਤਿ. ਅਭਿਨੀਹਾਰਤੋ ਪਟ੍ਠਾਯ ਵਤ੍ਥੁਂ ਕਥੇਤ੍ਵਾ ਪਬ੍ਬਜ੍ਜਾ ਦੀਪੇਤਬ੍ਬਾ, ਸਾ ਪਨ ਯਸ੍ਮਾ ਮਨੋਰਥਪੂਰਣਿਯਂ ਅਙ੍ਗੁਤ੍ਤਰਟ੍ਠਕਥਾਯਂ (ਅ. ਨਿ. ਅਟ੍ਠ. ੧.੧.੨੧੧) ਵਿਤ੍ਥਾਰਤੋ ਆਗਤਾ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਾਤਿ.

ਉਪਟ੍ਠਾਕਪਰਿਚ੍ਛੇਦਵਣ੍ਣਨਾ

੧੧. ਨਿਬਦ੍ਧੁਪਟ੍ਠਾਕਭਾਵਨ੍ਤਿ ਆਰਮ੍ਭਤੋ ਪਟ੍ਠਾਯ ਯਾਵ ਪਰਿਨਿਬ੍ਬਾਨਾ ਨਿਯਤਉਪਟ੍ਠਾਕਭਾਵਂ. ਅਨਿਯਤੁਉਪਟ੍ਠਾਕਾ ਪਨ ਭਗਵਤੋ ਪਠਮਬੋਧਿਯਂ ਬਹੂ ਅਹੇਸੁਂ. ਤੇਨਾਹ ‘‘ਭਗਵਤੋ ਹੀ’’ਤਿਆਦਿ. ਇਦਾਨਿ ਆਨਨ੍ਦਤ੍ਥੇਰੋ ਯੇਨ ਕਾਰਣੇਨ ਸਤ੍ਥੁ ਨਿਬਦ੍ਧੁਪਟ੍ਠਾਕਭਾਵਂ ਉਪਗਤੋ, ਯਥਾ ਚ ਉਪਗਤੋ, ਤਂ ਦਸ੍ਸੇਤੁਂ ‘‘ਤਤ੍ਥ ਏਕਦਾ’’ਤਿਆਦਿ ਵੁਤ੍ਤਂ. ‘‘ਅਹਂ ਇਮਿਨਾ ਮਗ੍ਗੇਨ ਗਚ੍ਛਾਮੀ’’ਤਿ ਆਹ ਅਨਯਬ੍ਯਸਨਾਪਾਦਕੇਨ ਕਮ੍ਮੁਨਾ ਚੋਦਿਯਮਾਨੋ. ਅਥ ਨਂ ਭਗਵਾ ਤਮਤ੍ਥਂ ਅਨਾਰੋਚੇਤ੍ਵਾਵ ਖੇਮਂ ਮਗ੍ਗਂ ਸਨ੍ਧਾਯ ‘‘ਏਹਿ ਭਿਕ੍ਖੁ ਇਮਿਨਾ ਗਚ੍ਛਾਮਾ’’ਤਿ ਆਹ. ਕਸ੍ਮਾ ਪਨਸ੍ਸ ਭਗਵਾ ਤਮਤ੍ਥਂ ਨਾਰੋਚੇਸੀਤਿ? ਆਰੋਚਿਤੇਪਿ ਅਸਦ੍ਦਹਨ੍ਤੋ ਨਾਦਿਯਿਸ੍ਸਤਿ. ਤਞ੍ਹਿ ਤਸ੍ਸ ਹੋਤਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾਤਿਤਿ. ਤੇਤਿ ਤੇ ਗਮਨਂ, ‘‘ਤ’’ਨ੍ਤਿ ਵਾ ਪਾਠੋ.

ਅਨ੍ਵਾਸਤ੍ਤੋਤਿ ਅਨੁਬਦ੍ਧੋ, ਉਪਦ੍ਦੁਤੋ ਵਾ. ਧਮ੍ਮਗਾਰਵਨਿਸ੍ਸਿਤੋ ਸਂਵੇਗੋ ਧਮ੍ਮਸਂਵੇਗੋ ‘‘ਅਮ੍ਹੇਸੁ ਨਾਮ ਤਿਟ੍ਠਨ੍ਤੇਸੁ ਭਗਵਤੋਪਿ ਈਦਿਸਂ ਜਾਤ’’ਨ੍ਤਿ. ‘‘ਅਹਂ ਉਪਟ੍ਠਹਿਸ੍ਸਾਮੀ’’ਤਿ ਵਦਨ੍ਤੋ ਧਮ੍ਮਸੇਨਾਪਤਿ ਅਤ੍ਥਤੋ ਏਵਂ ਵਦਨ੍ਤੋ ਨਾਮ ਹੋਤੀਤਿ ‘‘ਅਹਂ ਭਨ੍ਤੇ ਤੁਮ੍ਹੇ’’ਤਿਆਦਿ ਵੁਤ੍ਤਂ. ਅਸੁਞ੍ਞਾਯੇਵ ਮੇ ਸਾ ਦਿਸਾਤਿ ਅਸੁਞ੍ਞਾਯੇਵ ਮਮ ਸਾ ਦਿਸਾ. ਤਤ੍ਥ ਕਾਰਣਮਾਹ ‘‘ਤਵ ਓਵਾਦੋ ਬੁਦ੍ਧਾਨਂ ਓਵਾਦਸਦਿਸੋ’’ਤਿ.

ਵਸਿਤੁਂ ਨ ਦਸ੍ਸਤੀਤਿ ਏਕਗਨ੍ਧਕੁਟਿਯਂ ਵਾਸਂ ਨ ਲਭਿਸ੍ਸਤੀਤਿ ਅਧਿਪ੍ਪਾਯੋ. ਪਰਮ੍ਮੁਖਾ ਦੇਸਿਤਸ੍ਸਾਪਿ ਧਮ੍ਮਸ੍ਸਾਤਿ ਸੁਤ੍ਤਨ੍ਤਦੇਸਨਂ ਸਨ੍ਧਾਯ ਵੁਤ੍ਤਂ. ਅਭਿਧਮ੍ਮਦੇਸਨਾ ਪਨਸ੍ਸ ਪਰਮ੍ਮੁਖਾਵ ਪਵਤ੍ਤਾ ਪਗੇਵ ਯਾਚਨਾਯ. ਤਸ੍ਸਾ ਵਾਚਨਾਮਗ੍ਗੋਪਿ ਸਾਰਿਪੁਤ੍ਤਤ੍ਥੇਰਪ੍ਪਭਵੋ. ਕਸ੍ਮਾ? ਸੋ ਨਿਦ੍ਦੇਸਪਟਿਸਮ੍ਭਿਦਾ ਵਿਯ ਥੇਰਸ੍ਸ ਭਿਕ੍ਖੁਤੋ ਗਹਿਤਧਮ੍ਮਕ੍ਖਨ੍ਧਪਕ੍ਖਿਯੋ. ਅਪਰੇ ਪਨ ‘‘ਧਮ੍ਮਭਣ੍ਡਾਗਾਰਿਕੋ ਪਟਿਪਾਟਿਯਾ ਤਿਕਦੁਕੇਸੁ ਦੇਵਸਿਕਂ ਕਤੋਕਾਸੋ ਭਗਵਨ੍ਤਂ ਪਞ੍ਹਂ ਪੁਚ੍ਛਿ, ਭਗਵਾਪਿਸ੍ਸ ਪੁਚ੍ਛਿਤਪੁਚ੍ਛਿਤਂ ਨਯਦਾਨਵਸੇਨ ਵਿਸ੍ਸਜ੍ਜੇਸਿ. ਏਵਂ ਅਭਿਧਮ੍ਮੋਪਿ ਸਤ੍ਥਾਰਾ ਪਰਮ੍ਮੁਖਾ ਦੇਸਿਤੋਪਿ ਥੇਰੇਨ ਸਮ੍ਮੁਖਾ ਪਟਿਗ੍ਗਹਿਤੋਵ ਅਹੋਸੀ’’ਤਿ ਵਦਨ੍ਤਿ. ਸਬ੍ਬਂ ਵੀਮਂਸਿਤ੍ਵਾ ਗਹੇਤਬ੍ਬਂ.

ਅਗ੍ਗੁਪਟ੍ਠਾਕੋਤਿ ਉਪਟ੍ਠਾਨੇ ਸਕ੍ਕਚ੍ਚਕਾਰਿਤਾਯ ਅਗ੍ਗਭੂਤੋ ਉਪਟ੍ਠਾਕੋ. ਥੇਰੋ ਹਿ ਉਪਟ੍ਠਾਕਟ੍ਠਾਨਂ ਲਦ੍ਧਕਾਲਤੋ ਪਟ੍ਠਾਯ ਭਗਵਨ੍ਤਂ ਦੁਵਿਧੇਨ ਉਦਕੇਨ, ਤਿਵਿਧੇਨ ਦਨ੍ਤਕਟ੍ਠੇਨ, ਪਾਦਪਰਿਕਮ੍ਮੇਨ, ਗਨ੍ਧਕੁਟਿਪਰਿਵੇਣਸਮ੍ਮਜ੍ਜਨੇਨਾਤਿ ਏਵਮਾਦੀਹਿ ਕਿਚ੍ਚੇਹਿ ਉਪਟ੍ਠਹਨ੍ਤੋ ‘‘ਇਮਾਯ ਨਾਮ ਵੇਲਾਯ ਸਤ੍ਥੁ ਇਦਂ ਨਾਮ ਲਦ੍ਧੁਂ ਵਟ੍ਟਤਿ, ਇਦਂ ਨਾਮ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਤਂ ਤਂ ਨਿਪ੍ਫਾਦੇਨ੍ਤੋ ਮਹਤਿਂ ਦਣ੍ਡਦੀਪਿਕਂ ਗਹੇਤ੍ਵਾ ਏਕਰਤ੍ਤਿਂ ਗਨ੍ਧਕੁਟਿਪਰਿਵੇਣਂ ਨਵ ਵਾਰੇ ਅਨੁਪਰਿਯਾਯਤਿ. ਏਵਂ ਹਿਸ੍ਸ ਅਹੋਸਿ ‘‘ਸਚੇ ਮੇ ਥਿਨਮਿਦ੍ਧਂ ਓਕ੍ਕਮੇਯ੍ਯ, ਭਗਵਤਿ ਪਕ੍ਕੋਸਨ੍ਤੇ ਪਟਿਵਚਨਂ ਦਾਤੁਂ ਨਾਹਂ ਸਕ੍ਕੁਣੇਯ੍ਯ’’ਨ੍ਤਿ, ਤਸ੍ਮਾ ਸਬ੍ਬਰਤ੍ਤਿਂ ਦਣ੍ਡਦੀਪਿਕਂ ਹਤ੍ਥੇਨ ਨ ਮੁਞ੍ਚਤਿ. ਤੇਨ ਵੁਤ੍ਤਂ ‘‘ਅਗ੍ਗੁਪਟ੍ਠਾਕੋ’’ਤਿ.

੧੨. ਪਿਤੁਮਾਤੁਜਾਤਨਗਰਪਰਿਚ੍ਛੇਦੋ ਪਿਤੁਮੁਖੇਨ ਆਗਤਤ੍ਤਾ ‘‘ਪਿਤਿਪਰਿਚ੍ਛੇਦੋ’’ਤਿ ਵੁਤ੍ਤੋ.

ਵਿਹਾਰਂ ਪਾਵਿਸੀਤਿ ਗਨ੍ਧਕੁਟਿਂ ਪਾਵਿਸਿ. ਏਤ੍ਤਕਂ ਕਥੇਤ੍ਵਾਤਿ ਕਪ੍ਪਪਰਿਚ੍ਛੇਦਾਦਿਨਵਵਾਰਪਟਿਮਣ੍ਡਿਤਂ ਵਿਪਸ੍ਸੀਆਦੀਨਂ ਸਤ੍ਤਨ੍ਨਂ ਬੁਦ੍ਧਾਨਂ ਪੁਬ੍ਬੇਨਿਵਾਸਪਟਿਸਂਯੁਤ੍ਤਂ ਏਤ੍ਤਾਵਤਾ ਦੇਸਨਂ ਦੇਸੇਤ੍ਵਾ. ਕਸ੍ਮਾ ਪਨੇਤ੍ਥ ਭਗਵਾ ਵਿਪਸ੍ਸੀਆਦੀਨਂ ਸਤ੍ਤਨ੍ਨਂਯੇਵ ਬੁਦ੍ਧਾਨਂ ਪੁਬ੍ਬੇਨਿਵਾਸਂ ਕਥੇਸਿ, ਨ ਬੁਦ੍ਧਵਂਸਦੇਸਨਾਯਂ (ਬੁ. ਵਂ. ੬੪ ਗਾਥਾਦਯੋ) ਵਿਯ ਪਞ੍ਚਵੀਸਤਿਯਾ ਬੁਦ੍ਧਾਨਂ, ਤਤੋ ਵਾ ਪਨ ਭਿਯ੍ਯੋਤਿ? ਅਨਧਿਕਾਰਤੋ, ਪਯੋਜਨਾਭਾਵਤੋ ਚ. ਬੁਦ੍ਧਵਂਸਦੇਸਨਾਯਞ੍ਹਿ (ਬੁ. ਵਂ. ੭੫) –

‘‘ਕੀਦਿਸੋ ਤੇ ਮਹਾਵੀਰ, ਅਭਿਨੀਹਾਰੋ ਨਰੁਤ੍ਤਮ;

ਕਮ੍ਹਿ ਕਾਲੇ ਤਯਾ ਵੀਰ, ਪਤ੍ਥਿਤਾ ਬੋਧਿਮੁਤ੍ਤਮਾ’’ਤਿ. ਆਦਿਨਾ –

ਪਵਤ੍ਤਂ ਤਂ ਪੁਚ੍ਛਂ ਅਧਿਕਾਰਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਯਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਪਾਦਮੂਲੇ ਅਤ੍ਤਨਾ ਮਹਾਭਿਨੀਹਾਰੋ ਕਤੋ, ਤਂ ਦੀਪਙ੍ਕਰਂ ਭਗਵਨ੍ਤਂ ਆਦਿਂ ਕਤ੍ਵਾ ਯੇਸਂ ਚਤੁਵੀਸਤਿਯਾ ਬੁਦ੍ਧਾਨਂ ਸਨ੍ਤਿਕਾ ਬੋਧਿਯਾ ਲਦ੍ਧਬ੍ਯਾਕਰਣੋ ਹੁਤ੍ਵਾ ਤਤ੍ਥ ਤਤ੍ਥ ਪਾਰਮਿਯੋ ਪੂਰੇਸਿ, ਤੇਸਂ ਪਟਿਪਤ੍ਤਿਸਙ੍ਖਾਤੋ ਪੁਬ੍ਬੇਨਿਵਾਸੋ, ਅਤ੍ਤਨੋ ਚ ਪਟਿਪਤ੍ਤਿ ਕਥਿਤਾ, ਇਧ ਪਨ ਤਾਦਿਸੋ ਅਧਿਕਾਰੋ ਨਤ੍ਥਿ, ਯੇਨ ਦੀਪਙ੍ਕਰਤੋ ਪਟ੍ਠਾਯ, ਤਤੋ ਵਾ ਪਨ ਪੁਰਤੋ ਬੁਦ੍ਧੇ ਆਰਬ੍ਭ ਪੁਬ੍ਬੇਨਿਵਾਸਂ ਕਥੇਯ੍ਯ. ਤਸ੍ਮਾ ਨ ਏਤ੍ਥ ਬੁਦ੍ਧਵਂਸਦੇਸਨਾਯਂ ਵਿਯ ਪੁਬ੍ਬੇਨਿਵਾਸੋ ਵਿਤ੍ਥਾਰਿਤੋ. ਯਸ੍ਮਾ ਚ ਬੁਦ੍ਧਾਨਂ ਦੇਸਨਾ ਨਾਮ ਦੇਸਨਾਯ ਭਾਜਨਭੂਤਾਨਂ ਪੁਗ੍ਗਲਾਨਂ ਞਾਣਬਲਾਨੁਰੂਪਾ, ਨ ਅਤ੍ਤਨੋ ਞਾਣਬਲਾਨੁਰੂਪਾ, ਤਸ੍ਮਾ ਤਤ੍ਥ ਅਗ੍ਗਸਾਵਕਾਨਂ, ਮਹਾਸਾਵਕਾਨਂ, (ਥੇਰਗਾ. ਅਟ੍ਠ. ੨.੨੧ ਵਙ੍ਗੀਸਤ੍ਥੇਰਗਾਥਾਵਣ੍ਣਨਾ) ਤਾਦਿਸਾਨਞ੍ਚ ਦੇਵਬ੍ਰਹ੍ਮਾਨਂ ਵਸੇਨ ਦੇਸਨਾ ਵਿਤ੍ਥਾਰਿਤਾ. ਇਧ ਪਨ ਪਕਤਿਸਾਵਕਾਨਂ, ਤਾਦਿਸਾਨਞ੍ਚ ਦੇਵਤਾਨਂ ਵਸੇਨ ਪੁਬ੍ਬੇਨਿਵਾਸਂ ਕਥੇਨ੍ਤੋ ਸਤ੍ਤਨ੍ਨਮੇਵ ਬੁਦ੍ਧਾਨਂ ਪੁਬ੍ਬੇਨਿਵਾਸਂ ਕਥੇਸਿ. ਤਥਾ ਹਿ ਨੇ ਭਗਵਾ ਪਲੋਭਨਵਸੇਨ ਸਮੁਤ੍ਤੇਜੇਤੁਂ ਸਪ੍ਪਪਞ੍ਚਤਾਯ ਕਥਾਯ ਦੇਸਨਂ ਮਤ੍ਥਕਂ ਅਪਾਪੇਤ੍ਵਾਵ ਗਨ੍ਧਕੁਟਿਂ ਪਾਵਿਸਿ. ਤਥਾ ਚ ਇਮਿਸ੍ਸਾ ਏਵ ਦੇਸਨਾਯ ਅਨੁਸਾਰਤੋ ਆਟਾਨਾਟਿਯਪਰਿਤ੍ਤ- (ਦੀ. ਨਿ. ੩.੨੭੫) ਦੇਸਨਾਦਯੋ ਪਵਤ੍ਤਾ.

ਅਪਿਚੇਤ੍ਥ ਭਗਵਾ ਅਤ੍ਤਨੋ ਸੁਦ੍ਧਾਵਾਸਚਾਰਿਕਾਵਿਭਾਵਿਨਿਯਾ ਉਪਰਿਦੇਸਨਾਯ ਸਙ੍ਗਹਤ੍ਥਂ ਵਿਪਸ੍ਸੀਆਦੀਨਂ ਏਵ ਸਤ੍ਤਨ੍ਨਂ ਸਮ੍ਮਾਸਮ੍ਬੁਦ੍ਧਾਨਂ ਪੁਬ੍ਬੇਨਿਵਾਸਂ ਕਥੇਸਿ. ਤੇਸਂਯੇਵ ਹਿ ਸਾਵਕਾ ਤਦਾ ਚੇਵ ਏਤਰਹਿ ਚ ਸੁਦ੍ਧਾਵਾਸਭੂਮਿਯਂ ਠਿਤਾ, ਨ ਅਞ੍ਞੇਸਂ ਪਰਿਨਿਬ੍ਬੁਤਤ੍ਤਾ. ‘‘ਸਿਦ੍ਧਤ੍ਥਤਿਸ੍ਸਫੁਸ੍ਸਾਨਂ ਕਿਰ ਬੁਦ੍ਧਾਨਂ ਸਾਵਕਾ ਸੁਦ੍ਧਾਵਾਸੇਸੁ ਉਪਪਨ੍ਨਾ ਉਪਪਤ੍ਤਿਸਮਨਨ੍ਤਰਮੇਵ ਇਮਸ੍ਮਿਂ ਸਾਸਨੇ ਉਪਕਾਦਯੋ ਵਿਯ ਅਰਹਤ੍ਤਂ ਅਧਿਗਨ੍ਤ੍ਵਾ ਨਚਿਰਸ੍ਸੇਵ ਪਰਿਨਿਬ੍ਬਾਯਿਂਸੁ, ਨ ਤਤ੍ਥ ਤਤ੍ਥ ਯਾਵਤਾਯੁਕਂ ਅਟ੍ਠਂਸੂ’’ਤਿ ਵਦਨ੍ਤਿ. ਤਥਾ ਯੇਸਂ ਸਮ੍ਮਾਸਮ੍ਬੁਦ੍ਧਾਨਂ ਪਟਿਵੇਧਸਾਸਨਂ ਏਕਂਸਤੋ ਨਿਚ੍ਛਯੇ ਨ ਅਜ੍ਜਾਪਿ ਧਰਤਿ, ਨ ਅਨ੍ਤਰਹਿਤਂ, ਤੇ ਏਵ ਕਿਤ੍ਤੇਨ੍ਤੋ ਵਿਪਸ੍ਸੀਆਦੀਨਂਯੇਵ ਭਗਵਨ੍ਤਾਨਂ ਪੁਬ੍ਬੇਨਿਵਾਸਂ ਇਮਸ੍ਮਿਂ ਸੁਤ੍ਤੇ ਕਥੇਸਿ ਵੇਨੇਯ੍ਯਜ੍ਝਾਸਯਵਸੇਨ. ਅਪੁਬ੍ਬਾਚਰਿਮਨਿਯਮੋ ਪਨ ਅਪਰਾਪਰਂ ਸਂਸਰਣਕਸਤ੍ਤਵਾਸਵਸੇਨ ਏਕਿਸ੍ਸਾ ਲੋਕਧਾਤੁਯਾ ਇਚ੍ਛਿਤੋਤਿ ਨ ਤੇਨੇਤਂ ਵਿਰੁਜ੍ਝਤੀਤਿ ਦਟ੍ਠਬ੍ਬਂ. ਨਿਰਨ੍ਤਰਂ ਮਤ੍ਥਕਂ ਪਾਪੇਤ੍ਵਾਤਿ ਅਭਿਜਾਤਿਤੋ ਪਟ੍ਠਾਯ ਯਾਵ ਪਾਤਿਮੋਕ੍ਖੁਦ੍ਦੇਸੋ ਯਾਵ ਤਾ ਬੁਦ੍ਧਕਿਚ੍ਚਸਿਦ੍ਧਿ, ਤਾਵ ਮਤ੍ਥਕਂ ਸਿਖਂ ਪਾਪੇਤ੍ਵਾ. ਨ ਤਾਵ ਕਥਿਤੋਤਿ ਯੋਜਨਾ.

ਤਨ੍ਤਿਨ੍ਤਿ ਧਮ੍ਮਤਨ੍ਤਿਂ, ਪਰਿਯਤ੍ਤਿਨ੍ਤਿ ਅਤ੍ਥੋ. ਪੁਤ੍ਤਪੁਤ੍ਤਮਾਤੁਯਾਨਵਿਹਾਰਧਨਵਿਹਾਰਦਾਯਕਾਦੀਨਂ ਸਮ੍ਬਹੁਲਾਨਂ ਅਤ੍ਥਾਨਂ ਵਿਭਾਵਨਵਸੇਨ ਪਵਤ੍ਤਵਾਰੋ ਸਮ੍ਬਹੁਲਵਾਰੋ.

ਸਮ੍ਬਹੁਲਵਾਰਵਣ੍ਣਨਾ

ਕਾਮਞ੍ਚਾਯਂ ਪਾਲ਼ਿਯਂ ਅਨਾਗਤੋ, ਅਟ੍ਠਕਥਾਸੁ ਆਗਤਤ੍ਤਾ ਪਨ ਆਨੇਤ੍ਵਾ ਦੀਪੇਤਬ੍ਬੋਤਿ ਤਂ ਦੀਪੇਨ੍ਤੋ ‘‘ਸਬ੍ਬਬੋਧਿਸਤ੍ਤਾਨਞ੍ਹੀ’’ਤਿਆਦਿਮਾਹ. ਕੁਲਵਂਸੋ ਕੁਲਾਨੁਕ੍ਕਮੋ. ਪਵੇਣੀਤਿ ਪਰਮ੍ਪਰਾ. ‘‘ਕਸ੍ਮਾ’’ਤਿ ਪੁਤ੍ਤੁਪ੍ਪਤ੍ਤਿਯਾ ਕਾਰਣਂ ਪੁਚ੍ਛਿਤ੍ਵਾ ਤਂ ਵਿਸ੍ਸਜ੍ਜੇਨ੍ਤੋ ‘‘ਸਬ੍ਬਞ੍ਞੁਬੋਧਿਸਤ੍ਤਾਨਞ੍ਹੀ’’ਤਿਆਦਿਮਾਹ, ਤੇਨ ਤੇਸਂ ਜਾਤਨਗਰਾਦਿ ਪਞ੍ਞਾਯਮਾਨਂ ਏਕਂਸਤੋ ਮਨੁਸ੍ਸਭਾਵਸਞ੍ਜਾਨਨਤ੍ਥਂ ਇਚ੍ਛਿਤਬ੍ਬਂ, ਅਞ੍ਞਥਾ ਯਥਾਧਿਪ੍ਪੇਤਬੁਦ੍ਧਕਿਚ੍ਚਸਿਦ੍ਧਿ ਏਵ ਨ ਸਿਯਾਤਿ ਦਸ੍ਸੇਤਿ, ਯਤੋ ਮਹਾਸਤ੍ਤਾਨਂ ਚਰਿਮਭਵੇ ਮਨੁਸ੍ਸਲੋਕੇ ਏਵ ਪਾਤੁਭਾਵੋ, ਨ ਅਞ੍ਞਤ੍ਥ.

ਸਮ੍ਬਹੁਲਪਰਿਚ੍ਛੇਦਵਣ੍ਣਨਾ

ਚਨ੍ਦਾਦੀਨਂ ਸੋਭਾਵਿਸੇਸਂ ਰਹੇਤਿ ਚਜਾਪੇਤੀਤਿ ਰਾਹੁ, ਰਾਹੁਗ੍ਗਹੋ, ਇਧ ਪਨ ਰਾਹੁ ਵਿਯਾਤਿ ਰਾਹੁ. ਬਨ੍ਧਨਨ੍ਤਿ ਚ ਅਨਤ੍ਥੁਪ੍ਪਤ੍ਤਿਟ੍ਠਾਨਤਂ ਸਨ੍ਧਾਯ ਵੁਤ੍ਤਂ. ਤਥਾ ਮਹਾਸਤ੍ਤੇਨ ਵੁਤ੍ਤਵਚਨਮੇਵ ਗਹੇਤ੍ਵਾ ਕੁਮਾਰਸ੍ਸ ‘‘ਰਾਹੁਲੋ’’ਤਿ ਨਾਮਂ ਅਕਂਸੁ. ਅਥਾਤਿ ਨਿਪਾਤਮਤ੍ਤਂ. ਰੋਚਿਨੀਤਿ ਰੋਚਨਸੀਲਾ, ਉਜ੍ਜਲਰੂਪਾਤਿ ਅਤ੍ਥੋ. ਰੁਚਗ੍ਗਤੀਤਿ ਰੁਚਂ ਪਭਾਤਂ ਆਗਤਿਭੂਤਾ, ਗ-ਕਾਰਾਗਮਂ ਕਤ੍ਵਾ ਵੁਤ੍ਤਂ. ਇਤ੍ਥਿਰਤਨਭਾਵਤੋ ਮਨੁਸ੍ਸਲੋਕੇ ਸਬ੍ਬਾਸਂ ਇਤ੍ਥੀਨਂ ਬਿਮ੍ਬਪਟਿਚ੍ਛਨ੍ਨਭੂਤਾਤਿ ਬਿਮ੍ਬਾ.

ਝਾਨਾ ਵੁਟ੍ਠਾਯਾਤਿ ਪਾਦਕਜ੍ਝਾਨਤੋ ਉਟ੍ਠਾਯ.

ਅਟ੍ਠਙ੍ਗੁਲੁਬ੍ਬੇਧਾਤਿ ਅਟ੍ਠਙ੍ਗੁਲਪ੍ਪਮਾਣਬਹਲਭਾਵਾ. ਚੂਲ਼ਂਸੇਨ ਛਾਦੇਤ੍ਵਾਤਿ ਤਿਰਿਯਭਾਗੇਨ ਠਪਨਵਸੇਨ ਸਬ੍ਬਂ ਵਿਹਾਰਟ੍ਠਾਨਂ ਛਾਦੇਤ੍ਵਾ. ਸੁਵਣ੍ਣਯਟ੍ਠਿਫਾਲੇਹੀਤਿ ਫਾਲਪ੍ਪਮਾਣਾਹਿ ਸੁਵਣ੍ਣਯਟ੍ਠੀਹਿ. ਸੁਵਣ੍ਣਹਤ੍ਥਿਪਾਦਾਨੀਤਿ ਪਕਤਿਹਤ੍ਥਿਪਾਦਪਰਿਮਾਣਾਨਿ ਸੁਵਣ੍ਣਖਣ੍ਡਾਨਿ. ਵੁਤ੍ਤਨਯੇਨੇਵਾਤਿ ਚੂਲ਼ਂਸੇਨੇਵ. ਸੁਵਣ੍ਣਕਟ੍ਟੀਹੀਤਿ ਸੁਵਣ੍ਣਖਣ੍ਡੇਹਿ. ਸਲਕ੍ਖਣਾਨਨ੍ਤਿ ਲਕ੍ਖਣਸਮ੍ਪਨ੍ਨਾਨਂ ਸਹਸ੍ਸਾਰਾਨਂ.

ਬੋਧਿਪਲ੍ਲਙ੍ਕੋਤਿ ਅਭਿਸਮ੍ਬੁਜ੍ਝਨਕਾਲੇ ਨਿਸਜ੍ਜਟ੍ਠਾਨਂ. ਅਵਿਜਹਿਤੋਤਿ ਬੁਦ੍ਧਾਨਂ ਤਥਾਨਿਸਜ੍ਜਾਯ ਅਨਞ੍ਞਤ੍ਥਭਾਵੀਭਾਵਤੋ ਅਪਰਿਚ੍ਚਤ੍ਤੋ. ਤੇਨਾਹ ‘‘ਏਕਸ੍ਮਿਂਯੇਵ ਠਾਨੇ ਹੋਤੀ’’ਤਿ. ਪਠਮਪਦਗਣ੍ਠਿਕਾਤਿ ਪਚ੍ਛਿਮੇ ਸੋਪਾਨਫਲਕੇ ਠਤ੍ਵਾ ਠਪਿਯਮਾਨਸ੍ਸ ਦਕ੍ਖਿਣਪਾਦਸ੍ਸ ਪਤਿਟ੍ਠਹਨਟ੍ਠਾਨਂ. ਤਂ ਪਨ ਯਸ੍ਮਾ ਦਲ਼੍ਹਂ ਥਿਰਂ ਕੇਨਚਿ ਅਭੇਜ੍ਜਂ ਹੋਤਿ, ਤਸ੍ਮਾ ‘‘ਪਦਗਣ੍ਠੀ’’ਤਿ ਵੁਤ੍ਤਂ. ਯਸ੍ਮਿਂ ਭੂਮਿਭਾਗੇ ਇਦਾਨਿ ਜੇਤਵਨਮਹਾਵਿਹਾਰੋ, ਤਤ੍ਥ ਯਸ੍ਮਿਂ ਠਾਨੇ ਪੁਰਿਮਾਨਂ ਸਬ੍ਬਬੁਦ੍ਧਾਨਂ ਮਞ੍ਚਾ ਪਞ੍ਞਤ੍ਤਾ, ਤਸ੍ਮਿਂਯੇਵ ਪਦੇਸੇ ਅਮ੍ਹਾਕਮ੍ਪਿ ਭਗਵਤੋ ਮਞ੍ਚੋ ਪਞ੍ਞਤ੍ਤੋਤਿ ਕਤ੍ਵਾ ‘‘ਚਤ੍ਤਾਰਿ ਮਞ੍ਚਪਾਦਟ੍ਠਾਨਾਨਿ ਅਵਿਜਹਿਤਾਨੇਵ ਹੋਨ੍ਤੀ’’ਤਿ ਵੁਤ੍ਤਂ. ਮਞ੍ਚਾਨਂ ਪਨ ਮਹਨ੍ਤਖੁਦ੍ਦਕਭਾਵੇਨ ਮਞ੍ਚਪਞ੍ਞਾਪਨਪਦੇਸਸ੍ਸ ਮਹਨ੍ਤਾਮਹਨ੍ਤਤਾ ਅਪ੍ਪਮਾਣਂ, ਬੁਦ੍ਧਾਨੁਭਾਵੇਨ ਪਨ ਸੋ ਪਦੇਸੋ ਸਬ੍ਬਦਾ ਏਕਪ੍ਪਮਾਣੋਯੇਵ ਹੋਤੀਤਿ ‘‘ਚਤ੍ਤਾਰਿ ਮਞ੍ਚਪਾਦਟ੍ਠਾਨਾਨਿ ਅਵਿਜਹਿਤਾਨੇਵ ਹੋਨ੍ਤੀ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਵਿਹਾਰੋਪਿ ਨ ਵਿਜਹਿਤੋ ਯੇਵਾਤਿ ਏਤ੍ਥਾਪਿ ਏਸੇਵ ਨਯੋ. ਪੁਰਿਮਂ ਵਿਹਾਰਟ੍ਠਾਨਂ ਨ ਪਰਿਚ੍ਚਜਤੀਤਿ ਹਿ ਅਤ੍ਥੋ.

ਵਿਸਿਟ੍ਠਾ ਮਤ੍ਤਾ ਵਿਮਤ੍ਤਾ, ਵਿਮਤ੍ਤਾਵ ਵੇਮਤ੍ਤਂ, ਵਿਸਦਿਸਤਾਤਿ ਅਤ੍ਥੋ. ਪਮਾਣਂ ਆਰੋਹੋ. ਪਧਾਨਂ ਦੁਕ੍ਕਰਕਿਰਿਯਾ. ਰਸ੍ਮੀਤਿ ਸਰੀਰਪ੍ਪਭਾ.

‘‘ਸਤ੍ਤਾਨਂ ਪਾਕਤਿਕਹਤ੍ਥੇਨ ਛਹਤ੍ਥੋ ਮਜ੍ਝਿਮਪੁਰਿਸੋ, ਤਤੋ ਤਿਗੁਣਂ ਭਗਵਤੋ ਸਰੀਰਪ੍ਪਮਾਣਨ੍ਤਿ ਭਗਵਾ ਅਟ੍ਠਾਰਸਹਤ੍ਥੋ’’ਤਿ ਵਦਨ੍ਤਿ. ਅਪਰੇ ਪਨ ਭਣਨ੍ਤਿ ‘‘ਮਨੁਸ੍ਸਾਨਂ ਪਾਕਤਿਕਹਤ੍ਥੇਨ ਚਤੁਹਤ੍ਥੋ ਮਜ੍ਝਿਮਪੁਰਿਸੋ, ਤਤੋ ਤਿਗੁਣਂ ਭਗਵਤੋ ਸਰੀਰਪ੍ਪਮਾਣਨ੍ਤਿ ਭਗਵਾ ਦ੍ਵਾਦਸਹਤ੍ਥੋ ਉਪਾਦਿਨ੍ਨਕਰੂਪਧਮ੍ਮਵਸੇਨ, ਸਮਨ੍ਤਤੋ ਪਨ ਬ੍ਯਾਮਮਤ੍ਤਂ ਬ੍ਯਾਮਪ੍ਪਭਾ ਫਰਤੀਤਿ ਉਪਰਿ ਛਹਤ੍ਥਂ ਅਬ੍ਭੁਗ੍ਗਤੋ, ਬਹਲਤਰਪ੍ਪਭਾ ਰੂਪੇਨ ਸਦ੍ਧਿਂ ਅਟ੍ਠਾਰਸਹਤ੍ਥੋ ਹੋਤੀ’’ਤਿ.

ਅਦ੍ਧਨਿਯਨ੍ਤਿ ਦੀਘਕਾਲਂ.

ਅਜ੍ਝਾਸਯਪਟਿਬਦ੍ਧਨ੍ਤਿ ਬੋਧਿਸਮ੍ਭਾਰਸਮ੍ਭਰਣਕਾਲੇ ਤਥਾਪਵਤ੍ਤਜ੍ਝਾਸਯਾਧੀਨਂ, ਤਥਾਪਵਤ੍ਤਪਤ੍ਥਨਾਨੁਰੂਪਂ ਵਿਪੁਲਂ, ਵਿਪੁਲਤਰਞ੍ਚ ਹੋਤੀਤਿ ਅਤ੍ਥੋ. ਸ੍ਵਾਯਮਤ੍ਥੋ ਚਰਿਯਾਪਿਟਕਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਏਤ੍ਥ ਚ ਯਸ੍ਮਾ ਸਰੀਰਪ੍ਪਮਾਣਂ, ਪਧਾਨਂ, ਸਰੀਰਪ੍ਪਭਾ ਚ ਬੁਦ੍ਧਾਨਂ ਵਿਸਦਿਸਾਤਿ ਇਧ ਪਾਲ਼ਿਯਂ ਅਨਾਗਤਾ, ਤਸ੍ਮਾ ਤੇਹਿ ਸਦ੍ਧਿਂ ਵੇਮਤ੍ਤਤਾਸਾਮਞ੍ਞੇਨ ਆਯੁਕੁਲਾਨਿਪਿ ਇਧ ਆਹਰਿਤ੍ਵਾ ਦੀਪਿਤਾਨਿ. ਪਟਿਵਿਦ੍ਧਗੁਣੇਸੂਤਿ ਅਧਿਗਤਸਬ੍ਬਞ੍ਞੁਗੁਣੇਸੁ. ਨਨੁ ਚ ਬੋਧਿਸਮ੍ਭਾਰੇਸੁ, ਵੇਨੇਯ੍ਯਪੁਗ੍ਗਲਪਰਿਮਾਣੇ ਚ ਵੇਮਤ੍ਤਂ ਨਤ੍ਥੀਤਿ? ਸਚ੍ਚਂ ਨਤ੍ਥਿ, ਤਦੁਭਯਂ ਪਨ ਬੁਦ੍ਧਗੁਣਗ੍ਗਹਣੇਨ ਗਹਿਤਮੇਵ ਹੋਤੀਤਿ ਨ ਉਦ੍ਧਟਂ. ਯਦਗ੍ਗੇਨ ਹਿ ਸਬ੍ਬਬੁਦ੍ਧਾਨਂ ਬੁਦ੍ਧਗੁਣੇਸੁ ਵੇਮਤ੍ਤਂ ਨਤ੍ਥਿ, ਤਦਗ੍ਗੇਨ ਨੇਸਂ ਸਮ੍ਬੋਧਿਸਮ੍ਭਾਰੇਸੁਪਿ ਵੇਮਤ੍ਤਂ ਨਤ੍ਥੀਤਿ. ਕਸ੍ਮਾ? ਹੇਤੁਅਨੁਰੂਪਤਾਯ ਫਲਸ੍ਸ, ਏਕਨ੍ਤੇਨੇਵ ਵੇਨੇਯ੍ਯਪੁਗ੍ਗਲਪਰਿਮਾਣੇ ਵੇਮਤ੍ਤਭਾਵੋ ਵਿਭਾਵਿਤੋ. ਮਹਾਬੋਧਿਸਤ੍ਤਾਨਞ੍ਹਿ ਹੇਤੁਅਵਤ੍ਥਾਯਂ ਸਮ੍ਭਤੂਪਨਿਸ੍ਸਯਿਨ੍ਦ੍ਰਿਯਪਰਿਪਾਕਾ ਵੇਨੇਯ੍ਯਪੁਗ੍ਗਲਾ ਚਰਿਮਭਵੇ ਅਰਹਤ੍ਤਸਮ੍ਪਤ੍ਤਿਯਾ ਪਰਿਪੋਸਿਤਾਨਿ ਕਮਲਵਨਾਨਿ ਸੂਰਿਯਰਸ੍ਮਿਸਮ੍ਫਸ੍ਸੇਨ ਵਿਯ ਤਥਾਗਤਗੁਣਾਨੁਭਾਵਸਮ੍ਫਸ੍ਸੇਨ ਵਿਬੋਧਂ ਉਪਗਚ੍ਛਨ੍ਤੀਤਿ ਦੀਪੇਸੁਂ ਅਟ੍ਠਕਥਾਚਰਿਯਾ.

ਨਿਧਿਕੁਮ੍ਭੋਤਿ ਚਤ੍ਤਾਰੋ ਮਹਾਨਿਧਯੋ ਸਨ੍ਧਾਯ ਵਦਤਿ. ਜਾਤੋ ਚਾਤਿ. ਚ-ਸਦ੍ਦੇਨ ਕਤਮਹਾਭਿਨੀਹਾਰੋ ਚਾਤਿ ਅਯਮ੍ਪਿ ਅਤ੍ਥੋ ਸਙ੍ਗਹਿਤੋਤਿ ਦਟ੍ਠਬ੍ਬੋ. ਵੁਤ੍ਤਂ ਹੇਤਂ ਬੁਦ੍ਧਵਂਸੇ –

‘‘ਤਾਰਾਗਣਾ ਵਿਰੋਚਨ੍ਤਿ, ਨਕ੍ਖਤ੍ਤਾ ਗਗਨਮਣ੍ਡਲੇ;

ਵਿਸਾਖਾ ਚਨ੍ਦਿਮਾਯੁਤ੍ਤਾ, ਧੁਵਂ ਬੁਦ੍ਧੋ ਭਵਿਸ੍ਸਤੀ’’ਤਿ. (ਬੁ. ਵਂ. ੬੫);

‘‘ਏਤੇਨੇਵ ਚ ਸਬ੍ਬਬੁਦ੍ਧਾਨਂ ਵਿਸਾਖਾਨਕ੍ਖਤ੍ਤੇਨੇਵ ਮਹਾਭਿਨੀਹਾਰੋ ਹੋਤੀ’’ਤਿ ਚ ਵਦਨ੍ਤਿ.

੧੩. ਅਯਂ ਗਤੀਤਿ ਅਯਂ ਪਵਤ੍ਤਿ ਪਵਤ੍ਤਨਾਕਾਰੋ, ਅਞ੍ਞੇ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤਾ ਇਮਿਨਾ ਆਕਾਰੇਨ ਅਨੁਸ੍ਸਰਨ੍ਤੀਤਿ ਅਤ੍ਥੋ, ਯਸ੍ਮਾ ਚੁਤਿਤੋ ਪਟ੍ਠਾਯ ਯਾਵ ਪਟਿਸਨ੍ਧਿ, ਤਾਵ ਅਨੁਸ੍ਸਰਣਂ ਆਰੋਹਨਂ ਅਤੀਤਅਤੀਤਤਰਅਤੀਤਤਮਾਦਿਜਾਤਿਸਙ੍ਖਾਤੇ ਪੁਬ੍ਬੇਨਿਵਾਸੇ ਞਾਣਸ੍ਸ ਅਭਿਮੁਖਭਾਵੇਨ ਪਵਤ੍ਤੀਤਿ ਕਤ੍ਵਾ. ਤਸ੍ਮਾ ਪਟਿਸਨ੍ਧਿਤੋ ਪਟ੍ਠਾਯ ਯਾਵ ਚੁਤਿ, ਤਾਵ ਅਨੁਸ੍ਸਰਣਂ ਓਰੋਹਨਂ ਪੁਬ੍ਬੇਨਿਵਾਸੇ ਪਟਿਮੁਖਭਾਵੇਨ ਞਾਣਸ੍ਸ ਪਵਤ੍ਤੀਤਿ ਆਹ ‘‘ਪਚ੍ਛਾਮੁਖਂ ਞਾਣਂ ਪੇਸੇਤ੍ਵਾ’’ਤਿ. ਚੁਤਿਗਨ੍ਤਬ੍ਬਨ੍ਤਿ ਯਂ ਪਨਿਦਂ ਚੁਤਿਯਾ ਞਾਣਗਤਿਯਾ ਗਨ੍ਤਬ੍ਬਂ, ਤਂ ਗਮਨਂ ਬੁਜ੍ਝਨਨ੍ਤਿ ਅਤ੍ਥੋ. ਗਰੁਕਨ੍ਤਿ ਭਾਰਿਯਂ ਦੁਕ੍ਕਰਂ. ਤੇਨਾਹ ‘‘ਆਕਾਸੇ ਪਦਂ ਦਸ੍ਸੇਨ੍ਤੋ ਵਿਯਾ’’ਤਿ. ਅਪਰਮ੍ਪਿ ਕਾਰਣਨ੍ਤਿ ਛਿਨ੍ਨਵਟੁਮਾਨੁਸ੍ਸਰਣਂ ਪਚ੍ਛਾਮੁਖਂ ਞਾਣਂ ਪੇਸਨਤੋ ਅਪਰਂ ਅਚ੍ਛਰਿਯਬ੍ਭੁਤਕਾਰਣਂ. ਯਤ੍ਰਾਤਿ ਪਚ੍ਚਤ੍ਤਤ੍ਥੇ, ਨਾਮਾਤਿ ਅਚ੍ਛਰਿਯਤ੍ਥੇ ਨਿਪਾਤੋ, ਹਿ-ਸਦ੍ਦੋ ਅਨਤ੍ਥਕੋ. ਤੇਨਾਹ ‘‘ਯੋ ਨਾਮ ਤਥਾਗਤੋ’’ਤਿ. ਏਵਞ੍ਚ ਕਤ੍ਵਾ ‘‘ਯਤ੍ਰਾ’’ਤਿ ਨਿਪਾਤਵਸੇਨ ਵਿਸੁਂ ਯਤ੍ਰ-ਸਦ੍ਦਗ੍ਗਹਣਂ ਸਮਤ੍ਥਿਤਂ ਹੋਤਿ. ਪਪਞ੍ਚੇਨ੍ਤਿ ਸਤ੍ਤਸਨ੍ਤਾਨਂ ਸਂਸਾਰੇ ਵਿਤ੍ਥਾਰੇਨ੍ਤੀਤਿ ਪਪਞ੍ਚਂ. ਕਮ੍ਮਵਟ੍ਟਂ ਵੁਚ੍ਚਤੀਤਿ ਕਿਲੇਸਵਟ੍ਟਸ੍ਸ ਪਪਞ੍ਚਗ੍ਗਹਣੇਨ, ਵਿਪਾਕਵਟ੍ਟਸ੍ਸ ਦੁਕ੍ਖਗ੍ਗਹਣੇਨ ਗਹਿਤਤ੍ਤਾ. ਪਰਿਯਾਦਿਨ੍ਨਵਟ੍ਟੇਤਿ ਸਬ੍ਬਸੋ ਖੇਪਿਤਵਟ੍ਟੇ. ‘‘ਮਗ੍ਗਸੀਲੇਨ ਫਲਸੀਲੇਨਾ’’ਤਿ ਵਤ੍ਵਾ ਤਯਿਦਂ ਮਗ੍ਗਫਲਸੀਲਂ ਲੋਕਿਯਸੀਲਪੁਬ੍ਬਕਂ, ਬੁਦ੍ਧਾਨਞ੍ਚ ਲੋਕਿਯਸੀਲਮ੍ਪਿ ਲੋਕੁਤ੍ਤਰਸੀਲਂ ਵਿਯ ਅਨਞ੍ਞਸਾਧਾਰਣਂ ਏਵਾਤਿ ਦਸ੍ਸੇਤੁਂ ‘‘ਲੋਕਿਯਲੋਕੁਤ੍ਤਰਸੀਲੇਨਾ’’ਤਿ ਵੁਤ੍ਤਂ. ਸਮਾਧਿਪਞ੍ਞਾਸੁਪਿ ਏਸੇਵ ਨਯੋ. ਸਮਾਧਿਪਕ੍ਖਾਤਿ ਸਮਾਧਿ ਚ ਸਮਾਧਿਪਕ੍ਖਾ ਚ ਸਮਾਧਿਪਕ੍ਖਾ, ਏਕਦੇਸਸਰੂਪੇਕਸੇਸੋ ਦਟ੍ਠਬ੍ਬੋ. ਤੇਨਾਹ ‘‘ਮਗ੍ਗਸਮਾਧਿਨਾ’’ਤਿਆਦਿ, ‘‘ਵਿਹਾਰੋ ਗਹਿਤੋ ਵਾ’’ਤਿ ਚ. ਸਮਾਧਿਪਕ੍ਖਾ ਨਾਮ ਵੀਰਿਯਸਤਿਆਦਯੋ.

ਸਯਨ੍ਤਿ ਅਤ੍ਤਨਾ. ਨੀਵਰਣਾਦੀਹੀਤਿ ਨੀਵਰਣੇਹਿ ਚੇਵ ਤਦੇਕਟ੍ਠੇਹਿ ਚ ਪਾਪਧਮ੍ਮੇਹਿ, ਵਿਤਕ੍ਕਵਿਚਾਰਾਦੀਹਿ ਚ. ‘‘ਵਿਮੁਤ੍ਤਤ੍ਤਾ ਵਿਮੁਤ੍ਤੀਤਿ ਸਙ੍ਖ੍ਯਂ ਗਚ੍ਛਨ੍ਤੀ’’ਤਿ ਇਮਿਨਾ ਵਿਮੁਤ੍ਤਿ-ਸਦ੍ਦਸ੍ਸ ਕਮ੍ਮਸਾਧਨਤਂ ਆਹ ਅਟ੍ਠਸਮਾਪਤ੍ਤਿਆਦਿਵਿਸਯਤ੍ਤਾ ਤਸ੍ਸ. ਵਿਮੁਤ੍ਤਤ੍ਤਾਤਿ ਚ ‘‘ਵਿਕ੍ਖਮ੍ਭਨਵਸੇਨ ਵਿਮੁਤ੍ਤਤ੍ਤਾ’’ਤਿਆਦਿਨਾ ਯੋਜੇਤਬ੍ਬਂ. ਤਸ੍ਸ ਤਸ੍ਸਾਤਿ ਅਨਿਚ੍ਚਾਨੁਪਸ੍ਸਨਾਦਿਕਸ੍ਸ. ਪਚ੍ਚਨੀਕਙ੍ਗਵਸੇਨਾਤਿ ਪਹਾਤਬ੍ਬਪਟਿਪਕ੍ਖਅਙ੍ਗਵਸੇਨ. ਪਟਿਪ੍ਪਸ੍ਸਦ੍ਧਨ੍ਤੇ ਉਪ੍ਪਨ੍ਨਤ੍ਤਾਤਿ ਕਿਲੇਸਾਨਂ ਪਟਿਪ੍ਪਸ੍ਸਮ੍ਭਨਂ ਪਟਿਪ੍ਪਸ੍ਸਦ੍ਧਂ, ਸੋ ਏਵ ਅਨ੍ਤੋ ਪਰਿਯੋਸਾਨਭਾਵਤੋ, ਤਸ੍ਮਿਂ ਸਾਧੇਤਬ੍ਬੇ ਨਿਬ੍ਬਤ੍ਤਤ੍ਤਾ, ਤਂਤਂਮਗ੍ਗਵਜ੍ਝਕਿਲੇਸਾਨਂ ਪਟਿਪ੍ਪਸ੍ਸਮ੍ਭਨਵਸੇਨ ਪਵਤ੍ਤਤ੍ਤਾਤਿ ਅਤ੍ਥੋ. ਕਿਲੇਸੇਹਿ ਨਿਸ੍ਸਟਤਾ, ਅਪਗਮੋ ਚ ਨਿਬ੍ਬਾਨਸ੍ਸ ਤੇਹਿ ਵਿਵਿਤ੍ਤਤ੍ਤਾ ਏਵਾਤਿ ਆਹ ‘‘ਦੂਰੇ ਠਿਤਤ੍ਤਾ’’ਤਿ.

੧੬. ਧਮ੍ਮਧਾਤੂਤਿ ਧਮ੍ਮਾਨਂ ਸਭਾਵੋ, ਅਤ੍ਥਤੋ ਚਤ੍ਤਾਰਿ ਅਰਿਯਸਚ੍ਚਾਨਿ. ਸੁਪ੍ਪਟਿਵਿਦ੍ਧਾਤਿ ਸੁਟ੍ਠੁ ਪਟਿਵਿਦ੍ਧਾ ਸਵਾਸਨਾਨਂ ਸਬ੍ਬੇਸਂ ਕਿਲੇਸਾਨਂ ਪਜਹਨਤੋ. ਏਵਞ੍ਹਿ ਸਬ੍ਬਞ੍ਞੁਤਾ, ਦਸਬਲਞਾਣਾਦਯੋ ਚਾਤਿ ਸਬ੍ਬੇ ਬੁਦ੍ਧਗੁਣਾ ਭਗਵਤਾ ਅਧਿਗਤਾ ਅਹੇਸੁਂ. ਅਰਹਤ੍ਤਂ ਧਮ੍ਮਧਾਤੂਤਿ ਕੇਚਿ. ਸਬ੍ਬਞ੍ਞੁਤਞਾਣਨ੍ਤਿ ਅਪਰੇ. ਦ੍ਵੀਹਿ ਪਦੇਹੀਤਿ ਦ੍ਵੀਹਿ ਵਾਕ੍ਯੇਹਿ. ਆਬਦ੍ਧਨ੍ਤਿ ਪਟਿਬਦ੍ਧਂ ਤਂਮੂਲਕਤ੍ਤਾ ਉਪਰਿਦੇਸਨਾਯ. ਦੇਵਚਾਰਿਕਕੋਲਾਹਲਨ੍ਤਿ ਅਤ੍ਤਨੋ ਦੇਵਲੋਕੇ ਚਾਰਿਕਾਯਂ ਸੁਦ੍ਧਾਵਾਸਦੇਵਾਨਂ ਕੁਤੂਹਲਪ੍ਪਵਤ੍ਤਿਂ ਦਸ੍ਸੇਨ੍ਤੋ ਸੁਤ੍ਤਨ੍ਤਪਰਿਯੋਸਾਨੇ (ਦੀ. ਨਿ. ਅਟ੍ਠ. ੨.੯੧) ਵਿਚਾਰੇਸ੍ਸਤਿ, ਅਤ੍ਥਤੋ ਵਿਭਾਵੇਸ੍ਸਤੀਤਿ ਯੋਜਨਾ. ਅਯਂ ਦੇਸਨਾਤਿ ‘‘ਇਤੋ ਸੋ ਭਿਕ੍ਖਵੇ’’ਤਿਆਦਿਨਾ (ਦੀ. ਨਿ. ੨.੪) ਵਿਤ੍ਥਾਰਤੋ ਪਵਤ੍ਤਿਤਦੇਸਨਮਾਹ. ਨਿਦਾਨਕਣ੍ਡੇਤਿਆਦਿਤੋ ਦੇਸਿਤਂ ਉਦ੍ਦੇਸਦੇਸਨਮਾਹ. ਸਾ ਹਿ ਇਮਿਸ੍ਸਾ ਦੇਸਨਾਯ ਨਿਦਾਨਟ੍ਠਾਨਿਯਤ੍ਤਾ ਤਥਾ ਵੁਤ੍ਤਾ.

ਬੋਧਿਸਤ੍ਤਧਮ੍ਮਤਾਵਣ੍ਣਨਾ

੧੭. ‘‘ਵਿਪਸ੍ਸੀਤਿ ਤਸ੍ਸ ਨਾਮ’’ਨ੍ਤਿ ਵਤ੍ਵਾ ਤਸ੍ਸ ਅਨ੍ਵਤ੍ਥਤਂ ਦਸ੍ਸੇਤੁਂ ‘‘ਤਞ੍ਚ ਖੋ’’ਤਿਆਦਿ ਵੁਤ੍ਤਂ. ਵਿਵਿਧੇ ਅਤ੍ਥੇਤਿ ਤਿਰੋਹਿਤਵਿਦੂਰਦੇਸਗਤਾਦਿਕੇ ਨੀਲਾਦਿਵਸੇਨ ਨਾਨਾਵਿਧੇ, ਤਦਞ੍ਞੇ ਚ ਇਨ੍ਦ੍ਰਿਯਗੋਚਰਭੂਤੇ ਤੇ ਚ ਯਥੂਪਗਤੇ, ਵੋਹਾਰਵਿਨਿਚ੍ਛਯੇ ਚਾਤਿ ਨਾਨਾਵਿਧੇ ਅਤ੍ਥੇ. ਪਸ੍ਸਨਕੁਸਲਤਾਯਾਤਿ ਦਸ੍ਸਨੇ ਨਿਪੁਣਭਾਵੇਨ. ਯਾਥਾਵਤੋ ਞੇਯ੍ਯਂ ਬੁਜ੍ਝਤੀਤਿ ਬੋਧਿ, ਸੋ ਏਵ ਸਤ੍ਤਯੋਗਤੋ ਬੋਧਿਸਤ੍ਤੋਤਿ ਆਹ ‘‘ਪਣ੍ਡਿਤਸਤ੍ਤੋ ਬੁਜ੍ਝਨਕਸਤ੍ਤੋ’’ਤਿ. ਸੁਚਿਨ੍ਤਿਤਚਿਨ੍ਤਿਤਾਦਿਨਾ ਪਨ ਪਣ੍ਡਿਤਭਾਵੇ ਵਤ੍ਤਬ੍ਬਮੇਵ ਨਤ੍ਥਿ. ਯਦਾ ਚ ਪਨਾਨੇਨ ਮਹਾਭਿਨੀਹਾਰੋ ਕਤੋ, ਤਤੋ ਪਟ੍ਠਾਯ ਮਹਾਬੋਧਿਯਂ ਏਕਨ੍ਤਨਿਨ੍ਨਤ੍ਤਾ ਬੋਧਿਮ੍ਹਿ ਸਤ੍ਤੋ ਬੋਧਿਸਤ੍ਤੋਤਿ ਆਹ ‘‘ਬੋਧਿਸਙ੍ਖਾਤੇਸੂ’’ਤਿਆਦਿ. ਮਗ੍ਗਞਾਣਪਦਟ੍ਠਾਨਞ੍ਹਿ ਸਬ੍ਬਞ੍ਞੁਤਞਾਣਂ, ਸਬ੍ਬਞ੍ਞੁਤਞਾਣਪਦਟ੍ਠਾਨਞ੍ਚ ਮਗ੍ਗਞਾਣਂ ‘‘ਬੋਧੀ’’ਤਿ ਵੁਚ੍ਚਤਿ. ‘‘ਸਤੋ ਸਮ੍ਪਜਾਨੋ’’ਤਿ ਇਮਿਨਾ ਚਤੁਤ੍ਥਾਯ ਗਬ੍ਭਾਵਕ੍ਕਨ੍ਤਿਯਾ ਓਕ੍ਕਮੀਤਿ ਦਸ੍ਸੇਤਿ. ਚਤਸ੍ਸੋ ਹਿ ਗਬ੍ਭਾਵਕ੍ਕਨ੍ਤਿਯੋ ਇਧੇਕਚ੍ਚੋ ਗਬ੍ਭੋ ਮਾਤੁਕੁਚ੍ਛਿਯਂ ਓਕ੍ਕਮਨੇ, ਠਾਨੇ, ਨਿਕ੍ਖਮਨੇਤਿ ਤੀਸੁ ਠਾਨੇਸੁ ਅਸਮ੍ਪਜਾਨੋ ਹੋਤਿ, ਏਕਚ੍ਚੋ ਪਠਮੇ ਠਾਨੇ ਸਮ੍ਪਜਾਨੋ, ਨ ਇਤਰੇਸੁ, ਏਕਚ੍ਚੋ ਪਠਮੇ, ਦੁਤਿਯੇ ਚ ਠਾਨੇ ਸਮ੍ਪਜਾਨੋ, ਨ ਤਤਿਯੇ, ਏਕਚ੍ਚੋ ਤੀਸੁਪਿ ਠਾਨੇਸੁ ਸਮ੍ਪਜਾਨੋ ਹੋਤਿ. ਤਤ੍ਥ ਪਠਮਾ ਗਬ੍ਭਾਵਕ੍ਕਨ੍ਤਿ ਲੋਕਿਯਮਹਾਜਨਸ੍ਸ ਵਸੇਨ ਵੁਤ੍ਤਾ, ਦੁਤਿਯਾ ਅਸੀਤਿਮਹਾਸਾਵਕਾਨਂ (ਥੇਰਗਾ. ਅਟ੍ਠ. ੨.੨੧ ਵਙ੍ਗੀਸਤ੍ਥੇਰਗਾਥਾਵਣ੍ਣਨਾਯ ਵਿਤ੍ਥਾਰੋ) ਵਸੇਨ, ਤਤਿਯਾ ਦ੍ਵਿਨ੍ਨਂ ਅਗ੍ਗਸਾਵਕਾਨਂ, ਪਚ੍ਚੇਕਬੁਦ੍ਧਾਨਞ੍ਚ ਵਸੇਨ. ਤੇ ਕਿਰ ਕਮ੍ਮਜਵਾਤੇਹਿ ਉਦ੍ਧਂਪਾਦਾ ਅਧੋਸਿਰਾ ਅਨੇਕਸਤਪੋਰਿਸੇ ਪਪਾਤੇ ਵਿਯ ਯੋਨਿਮੁਖੇ ਖਿਤ੍ਤਾ ਤਾਲ਼ਚ੍ਛਿਗ੍ਗਲ਼ੇਨ ਹਤ੍ਥੀ ਵਿਯ ਸਮ੍ਬਾਧੇਨ ਯੋਨਿਮੁਖੇਨ ਨਿਕ੍ਖਮਨ੍ਤਾ ਮਹਨ੍ਤਂ ਦੁਕ੍ਖਂ ਪਾਪੁਣਨ੍ਤਿ, ਤੇਨ ਨੇਸਂ ‘‘ਮਯਂ ਨਿਕ੍ਖਮਾਮਾ’’ਤਿ ਸਮ੍ਪਜਞ੍ਞਂ ਨ ਹੋਤਿ. ਚਤੁਤ੍ਥਾ ਸਬ੍ਬਞ੍ਞੁਬੋਧਿਸਤ੍ਤਾਨਂ ਵਸੇਨ. ਤੇ ਹਿ ਮਾਤੁਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਨ੍ਤਾਪਿ ਪਜਾਨਨ੍ਤਿ, ਤਤ੍ਥ ਵਸਨ੍ਤਾਪਿ ਪਜਾਨਨ੍ਤਿ, ਨਿਕ੍ਖਮਨਕਾਲੇਪਿ ਪਜਾਨਨ੍ਤਿ. ਨ ਹਿ ਤੇ ਕਮ੍ਮਜਵਾਤਾ ਉਦ੍ਧਂਪਾਦੇ ਅਧੋਸਿਰੇ ਕਤ੍ਵਾ ਖਿਪਿਤੁਂ ਸਕ੍ਕੋਨ੍ਤਿ, ਦ੍ਵੇ ਹਤ੍ਥੇ ਪਸਾਰਿਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਠਿਤਕਾਵ ਨਿਕ੍ਖਮਨ੍ਤੀਤਿ. ਞਾਣੇਨ ਪਰਿਚ੍ਛਿਨ੍ਦਿਤ੍ਵਾਤਿ ਪੁਬ੍ਬਭਾਗੇ ਪਞ੍ਚਮਹਾਵਿਲੋਕਨਞਾਣੇਹਿ ਚੇਵ ‘‘ਇਦਾਨਿ ਚਵਾਮੀ’’ਤਿ ਚੁਤਿਪਰਿਚ੍ਛਿਨ੍ਦਨਞਾਣੇਨ ਚ ਅਪਰਭਾਗੇ ‘‘ਇਧ ਮਯਾ ਪਟਿਸਨ੍ਧਿ ਗਹਿਤਾ’’ਤਿ ਪਟਿਸਨ੍ਧਿਪਰਿਚ੍ਛਿਨ੍ਦਨਞਾਣੇਨ ਚ ਪਰਿਚ੍ਛਿਜ੍ਜ ਜਾਨਿਤ੍ਵਾ.

ਪਞ੍ਚਨ੍ਨਂ ਮਹਾਪਰਿਚ੍ਚਾਗਾਨਂ, ਞਾਤਤ੍ਥਚਰਿਯਾਦੀਨਞ੍ਚ ਸਤਿਪਿ ਪਾਰਮਿਯਾ ਪਰਿਯਾਪਨ੍ਨਭਾਵੇ ਸਮ੍ਭਾਰਵਿਸੇਸਭਾਵਦਸ੍ਸਨਤ੍ਥਂ ਵਿਸੁਂ ਗਹਣਂ. ਤਤ੍ਥ ਅਙ੍ਗਪਰਿਚ੍ਚਾਗੋ, ਨਯਨਪਰਿਚ੍ਚਾਗੋ, ਅਤ੍ਤਪਰਿਚ੍ਚਾਗੋ, ਰਜ੍ਜਪਰਿਚ੍ਚਾਗੋ, ਪੁਤ੍ਤਦਾਰਪਰਿਚ੍ਚਾਗੋਤਿ ਇਮੇ ਪਞ੍ਚ ਮਹਾਪਰਿਚ੍ਚਾਗਾ. ਤਤ੍ਥਾਪਿ ਕਾਮਂ ਅਙ੍ਗਪਰਿਚ੍ਚਾਗਾਦਯੋਪਿ ਦਾਨਪਾਰਮੀਯੇਵ, ਤਥਾਪਿ ਪਰਿਚ੍ਚਾਗਵਿਸੇਸਭਾਵਦਸ੍ਸਨਤ੍ਥਞ੍ਚੇਵ ਸੁਦੁਕ੍ਕਰਭਾਵਦਸ੍ਸਨਤ੍ਥਞ੍ਚ ਮਹਾਪਰਿਚ੍ਚਾਗਾਨਂ ਵਿਸੁਂ ਗਹਣਂ. ਤਤੋ ਏਵ ਚ ਅਙ੍ਗਪਰਿਚ੍ਚਾਗਤੋਪਿ ਵਿਸੁਂ ਨਯਨਪਰਿਚ੍ਚਾਗਗ੍ਗਹਣਂ, ਪਰਿਚ੍ਚਾਗਭਾਵਸਾਮਞ੍ਞੇਪਿ ਰਜ੍ਜਪਰਿਚ੍ਚਾਗਪੁਤ੍ਤਦਾਰਪਰਿਚ੍ਚਾਗਗ੍ਗਹਣਞ੍ਚ ਕਤਂ. ਞਾਤੀਨਂ ਅਤ੍ਥਚਰਿਯਾ ਞਾਤਤ੍ਥਚਰਿਯਾ, ਸਾ ਚ ਖੋ ਕਰੁਣਾਯਨਵਸੇਨ. ਤਥਾ ਸਤ੍ਤਲੋਕਸ੍ਸ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਾਨਂ ਵਸੇਨ ਹਿਤਚਰਿਯਾ ਲੋਕਤ੍ਥਚਰਿਯਾ. ਕਮ੍ਮਸ੍ਸਕਤਾਞਾਣਵਸੇਨ, ਅਨਵਜ੍ਜਕਮ੍ਮਾਯਤਨਸਿਪ੍ਪਾਯਤਨਵਿਜ੍ਜਾਠਾਨਵਸੇਨ, ਖਨ੍ਧਾਯਤਨਾਦਿਵਸੇਨ, ਲਕ੍ਖਣਤ੍ਤਯਾਦਿਤੀਰਣਵਸੇਨ ਚ ਅਤ੍ਤਨੋ, ਪਰੇਸਞ੍ਚ ਤਤ੍ਥ ਸਤਿਪਟ੍ਠਾਨੇਨ ਞਾਣਚਾਰੋ ਬੁਦ੍ਧਚਰਿਯਾ, ਸਾ ਪਨਤ੍ਥਤੋ ਪਞ੍ਞਾਪਾਰਮੀਯੇਵ, ਞਾਣਸਮ੍ਭਾਰਵਿਸੇਸਤਾਦਸ੍ਸਨਤ੍ਥਂ ਪਨ ਵਿਸੁਂ ਗਹਣਂ. ਬੁਦ੍ਧਚਰਿਯਾਨਨ੍ਤਿ ਬਹੁਵਚਨਨਿਦ੍ਦੇਸੇਨ ਪੁਬ੍ਬਯੋਗਪੁਬ੍ਬਚਰਿਯਾਧਮ੍ਮਕ੍ਖਾਨਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਤਤ੍ਥ ਗਤਪਚ੍ਚਾਗਤਵਤ੍ਤਸਙ੍ਖਾਤਾਯ ਪੁਬ੍ਬਭਾਗਪਟਿਪਦਾਯ ਸਦ੍ਧਿਂ ਅਭਿਞ੍ਞਾਸਮਾਪਤ੍ਤਿਨਿਪ੍ਫਾਦਨਂ ਪੁਬ੍ਬਯੋਗੋ. ਦਾਨਾਦੀਸੁਯੇਵ ਸਾਤਿਸਯਪਟਿਪਤ੍ਤਿ ਪੁਬ੍ਬਚਰਿਯਾ. ‘‘ਯਾਵ ਚਰਿਯਾਪਿਟਕੇ ਸਙ੍ਗਹਿਤਾ ਅਭਿਨੀਹਾਰੋ ਪੁਬ੍ਬਯੋਗੋ, ਕਾਯਾਦਿਵਿਵੇਕਵਸੇਨ ਏਕਚਰਿਯਾ ਪੁਬ੍ਬਚਰਿਯਾ’’ਤਿ ਕੇਚਿ. ਦਾਨਾਦੀਨਞ੍ਚੇਵ ਅਪ੍ਪਿਚ੍ਛਤਾਦੀਨਞ੍ਚ ਸਂਸਾਰਨਿਬ੍ਬਾਨੇਸੁ ਆਦੀਨਵਾਨਿਸਂਸਾਨਞ੍ਚ ਵਿਭਾਵਨਵਸੇਨ, ਸਤ੍ਤਾਨਂ ਬੋਧਿਤ੍ਤਯੇ ਪਤਿਟ੍ਠਾਪਨਪਰਿਪਾਚਨਵਸੇਨ ਚ ਪਵਤ੍ਤਕਥਾ ਧਮ੍ਮਕ੍ਖਾਨਂ. ਕੋਟਿਂ ਪਤ੍ਵਾਤਿ ਪਰਂ ਪਰਿਯਨ੍ਤਂ ਪਰਮੁਕ੍ਕਂਸਂ ਪਾਪੁਣਿਤ੍ਵਾ. ਸਤ੍ਤਮਹਾਦਾਨਾਨੀਤਿ ਅਟ੍ਠਵਸ੍ਸਿਕਕਾਲੇ ‘‘ਹਦਯਮਂਸਾਦੀਨਿਪਿ ਯਾਚਕਾਨਂ ਦਦੇਯ੍ਯ’’ਨ੍ਤਿ ਅਜ੍ਝਾਸਯਂ ਉਪ੍ਪਾਦੇਤ੍ਵਾ ਦਿਨ੍ਨਦਾਨਂ, ਮਙ੍ਗਲਹਤ੍ਥਿਦਾਨਂ, ਗਮਨਕਾਲੇ ਦਿਨ੍ਨਂ ਸਤ੍ਤਸਤ੍ਤਕਮਹਾਦਾਨਂ, ਮਗ੍ਗਂ ਗਚ੍ਛਨ੍ਤੇਨ ਦਿਨ੍ਨਂ ਅਸ੍ਸਦਾਨਂ, ਰਥਦਾਨਂ, ਪੁਤ੍ਤਦਾਨਂ, ਭਰਿਯਾਦਾਨਨ੍ਤਿ ਇਮਾਨਿ ਸਤ੍ਤ ਮਹਾਦਾਨਾਨਿ (ਚਰਿਯਾ. ੭੯) ਦਤ੍ਵਾ.

‘‘ਇਦਾਨੇਵ ਮੇ ਮਰਣਂ ਹੋਤੂ’’ਤਿ ਅਧਿਮੁਚ੍ਚਿਤ੍ਵਾ ਕਾਲਕਰਣਂ ਅਧਿਮੁਤ੍ਤਿਕਾਲਕਿਰਿਯਾ, ਤਂ ਬੋਧਿਸਤ੍ਤਾਨਂਯੇਵ, ਨ ਅਞ੍ਞੇਸਂ. ਬੋਧਿਸਤ੍ਤਾ ਕਿਰ ਦੀਘਾਯੁਕਦੇਵਲੋਕੇ ਠਿਤਾ ‘‘ਇਧ ਠਿਤਸ੍ਸ ਮੇ ਬੋਧਿਸਮ੍ਭਾਰਸਮ੍ਭਰਣਂ ਨ ਸਮ੍ਭਵਤੀ’’ਤਿ ਕਤ੍ਵਾ ਤਤ੍ਥ ਵਾਸਤੋ ਨਿਬ੍ਬਿਨ੍ਦਮਾਨਸਾ ਹੋਨ੍ਤਿ, ਤਦਾ ਵਿਮਾਨਂ ਪਵਿਸਿਤ੍ਵਾ ਅਕ੍ਖੀਨਿ ਨਿਮੀਲੇਤ੍ਵਾ ‘‘ਇਤੋ ਉਦ੍ਧਂ ਮੇ ਜੀਵਿਤਂ ਨਪ੍ਪਵਤ੍ਤਤੂ’’ਤਿ ਚਿਤ੍ਤਂ ਅਧਿਟ੍ਠਾਯ ਨਿਸੀਦਨ੍ਤਿ, ਚਿਤ੍ਤਾਧਿਟ੍ਠਾਨਸਮਨਨ੍ਤਰਮੇਵ ਮਰਣਂ ਹੋਤਿ. ਪਾਰਮੀਧਮ੍ਮਾਨਞ੍ਹਿ ਉਕ੍ਕਂਸਪ੍ਪਵਤ੍ਤਿਯਾ ਤਸ੍ਮਿਂ ਤਸ੍ਮਿਂ ਅਤ੍ਤਭਾਵੇ ਅਭਿਞ੍ਞਾਸਮਾਪਤ੍ਤੀਹਿ ਸਨ੍ਤਾਨਸ੍ਸ ਵਿਸੇਸਿਤਤ੍ਤਾ ਅਤ੍ਤਸਿਨੇਹਸ੍ਸ ਤਨੁਭਾਵੇਨ, ਸਤ੍ਤੇਸੁ ਚ ਮਹਾਕਰੁਣਾਯ ਉਲ਼ਾਰਭਾਵੇਨ ਅਧਿਟ੍ਠਾਨਸ੍ਸ ਤਿਕ੍ਖਵਿਸਦਭਾਵਾਪਤ੍ਤਿਯਾ ਬੋਧਿਸਤ੍ਤਾਨਂ ਅਧਿਪ੍ਪਾਯਾ ਸਮਿਜ੍ਝਨ੍ਤਿ. ਚਿਤ੍ਤੇ, ਵਿਯ ਕਮ੍ਮੇਸੁ ਚ ਨੇਸਂ ਵਸੀਭਾਵੋ, ਤਸ੍ਮਾ ਯਤ੍ਥ ਉਪਪਨ੍ਨਾਨਂ ਪਾਰਮਿਯੋ ਸਮ੍ਮਦੇਵ ਪਰਿਬ੍ਰੂਹਨ੍ਤਿ. ਵੁਤ੍ਤਨਯੇਨ ਕਾਲਂ ਕਤ੍ਵਾ ਤਤ੍ਥ ਉਪਪਜ੍ਜਨ੍ਤਿ. ਤਥਾ ਹਿ ਅਮ੍ਹਾਕਂ ਮਹਾਸਤ੍ਤੋ ਇਮਸ੍ਮਿਂਯੇਵ ਕਪ੍ਪੇ ਨਾਨਾਜਾਤੀਸੁ ਅਪਰਿਹੀਨਜ੍ਝਾਨੋ ਕਾਲਂ ਕਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ, ਅਪ੍ਪਕਮੇਵ ਕਾਲਂ ਤਤ੍ਥ ਠਤ੍ਵਾ ਤਤੋ ਚਵਿਤ੍ਵਾ ਮਨੁਸ੍ਸਲੋਕੇ ਨਿਬ੍ਬਤ੍ਤੋ, ਪਾਰਮੀਸਮ੍ਭਰਣਪਸੁਤੋ ਅਹੋਸਿ. ਤੇਨ ਵੁਤ੍ਤਂ ‘‘ਬੋਧਿਸਤ੍ਤਾਨਂਯੇਵ, ਨ ਅਞ੍ਞੇਸ’’ਨ੍ਤਿ. ‘‘ਏਕੇਨਅਤ੍ਤਭਾਵੇਨ ਅਨ੍ਤਰੇਨ ਪਾਰਮੀਨਂ ਸਬ੍ਬਸੋ ਪੂਰਿਤਤ੍ਤਾ’’ਤਿ ਇਮਿਨਾ ਪਯੋਜਨਾਭਾਵਤੋ ਤਤ੍ਥ ਠਤ੍ਵਾ ਅਧਿਮੁਤ੍ਤਿਕਾਲਕਿਰਿਯਾ ਨਾਮ ਨਾਹੋਸੀਤਿ ਦਸ੍ਸੇਤਿ. ਅਪਿ ਚ ਤਤ੍ਥ ਯਾਵਤਾਯੁਕਟ੍ਠਾਨਂ ਚਰਿਮਭਵੇ ਅਨੇਕਮਹਾਨਿਧਿਸਮੁਟ੍ਠਾਨਪੁਬ੍ਬਿਕਾਯ ਦਿਬ੍ਬਸਮ੍ਪਤ੍ਤਿਸਦਿਸਾਯ ਮਹਾਸਮ੍ਪਤ੍ਤਿਯਾ ਨਿਬ੍ਬਤ੍ਤਿ ਵਿਯ, ਬੁਦ੍ਧਭੂਤਸ੍ਸ ਅਸਦਿਸਦਾਨਾਦਿਵਸੇਨ ਅਨਞ੍ਞਸਾਧਾਰਣਲਾਭੁਪ੍ਪਤ੍ਤਿ ਵਿਯ ਚ ‘‘ਇਤੋ ਪਰਂ ਮਹਾਪੁਰਿਸਸ੍ਸ ਦਿਬ੍ਬਸਮ੍ਪਤ੍ਤਿਅਨੁਭਵਨਂ ਨਾਮ ਨਤ੍ਥੀ’’ਤਿ ਉਸ੍ਸਾਹਜਾਤਸ੍ਸ ਪੁਞ੍ਞਸਮ੍ਭਾਰਸ੍ਸ ਵਸੇਨਾਤਿ ਦਟ੍ਠਬ੍ਬਂ. ਅਯਞ੍ਹੇਤ੍ਥ ਧਮ੍ਮਤਾ.

ਮਨੁਸ੍ਸਗਣਨਾਵਸੇਨ, ਨ ਦੇਵਗਣਨਾਵਸੇਨ. ਪੁਬ੍ਬਨਿਮਿਤ੍ਤਾਨੀਤਿ ਚੁਤਿਯਾ ਪੁਬ੍ਬਨਿਮਿਤ੍ਤਾਨਿ. ਅਮਿਲਾਯਿਤ੍ਵਾਤਿ ਏਤ੍ਥ ਅਮਿਲਾਤਗ੍ਗਹਣੇਨੇਵ ਤਾਸਂ ਮਾਲਾਨਂ ਵਣ੍ਣਸਮ੍ਪਦਾਯਪਿ ਗਨ੍ਧਸਮ੍ਪਦਾਯਪਿ ਸੋਭਾਸਮ੍ਪਦਾਯਪਿ ਅਵਿਨਾਸੋ ਦਸ੍ਸਿਤੋਤਿ ਦਟ੍ਠਬ੍ਬਂ. ਬਾਹਿਰਬ੍ਭਨ੍ਤਰਾਨਂ ਰਜੋਜਲ੍ਲਾਨਂ ਲੇਪਸ੍ਸਪਿ ਅਭਾਵਤੋ ਦੇਵਾਨਂ ਸਰੀਰਗਤਾਨਿ ਵਤ੍ਥਾਨਿ ਸਬ੍ਬਕਾਲਂ ਪਰਿਸੁਦ੍ਧਪ੍ਪਭਸ੍ਸਰਾਨੇਵ ਹੁਤ੍ਵਾ ਤਿਟ੍ਠਨ੍ਤੀਤਿ ਆਹ ‘‘ਵਤ੍ਥੇਸੁਪਿ ਏਸੇਵ ਨਯੋ’’ਤਿ. ਨੇਵ ਸੀਤਂ ਨ ਉਣ੍ਹਨ੍ਤਿ ਯਸ੍ਸ ਸੀਤਸ੍ਸ ਪਟਿਕਾਰਵਸੇਨ ਅਧਿਕਂ ਸੇਵਿਯਮਾਨਂ ਉਣ੍ਹਂ, ਸਯਮੇਵ ਵਾ ਖਰਤਰਂ ਹੁਤ੍ਵਾ ਅਭਿਭਵਨ੍ਤਂ ਸਰੀਰੇ ਸੇਦਂ ਉਪ੍ਪਾਦੇਯ੍ਯ, ਤਾਦਿਸਂ ਨੇਵ ਸੀਤਂ, ਨ ਉਣ੍ਹਂ ਹੋਤਿ. ਤਸ੍ਮਿਂ ਕਾਲੇਤਿ ਯਥਾਵੁਤ੍ਤਮਰਣਾਸਨ੍ਨਕਾਲੇ. ਬਿਨ੍ਦੁਬਿਨ੍ਦੁਵਸੇਨਾਤਿ ਛਿਨ੍ਨਸੁਤ੍ਤਾਯ ਆਮੁਤ੍ਤਮੁਤ੍ਤਾਵਲਿਯਾ ਨਿਪਤਨ੍ਤਾ ਮੁਤ੍ਤਗੁਲ਼ਿਕਾ ਵਿਯ ਬਿਨ੍ਦੁ ਬਿਨ੍ਦੁ ਹੁਤ੍ਵਾ. ਸੇਦਾਤਿ ਸੇਦਧਾਰਾ ਮੁਚ੍ਚਨ੍ਤਿ. ਦਨ੍ਤਾਨਂ ਖਣ੍ਡਿਤਭਾਵੋ ਖਣ੍ਡਿਚ੍ਚਂ. ਕੇਸਾਨਂ ਪਲਿਤਭਾਵੋ ਪਾਲਿਚ੍ਚਂ.ਆਦਿ-ਸਦ੍ਦੇਨ ਵਲਿਤ੍ਤਚਤਂ ਸਙ੍ਗਣ੍ਹਾਤਿ. ਕਿਲਨ੍ਤਰੂਪੋ ਅਤ੍ਤਭਾਵੋ ਹੋਤਿ, ਨ ਪਨ ਖਣ੍ਡਿਚ੍ਚਪਾਲਿਚ੍ਚਾਦੀਤਿ ਅਧਿਪ੍ਪਾਯੋ. ਉਕ੍ਕਣ੍ਠਿਤਾਤਿ ਅਨਭਿਰਤਿ. ਸਾ ਨਤ੍ਥਿ ਉਪਰੂਪਰਿ ਉਲ਼ਾਰਉਲ਼ਾਰਾਨਮੇਵ ਭੋਗਾਨਂ ਵਿਸੇਸਤੋ ਦੁਵਿਜਾਨਨਾਨਂ ਉਪਤਿਟ੍ਠਹਨਤੋ. ਨਿਸ੍ਸਸਨ੍ਤੀਤਿ ਉਣ੍ਹਂ ਨਿਸ੍ਸਸਨ੍ਤਿ. ਵਿਜਮ੍ਭਨ੍ਤੀਤਿ ਅਨਭਿਰਤਿਵਸੇਨ ਵਿਜਮ੍ਭਨਂ ਕਰੋਨ੍ਤਿ.

ਪਣ੍ਡਿਤਾ ਏਵਾਤਿ ਬੁਦ੍ਧਿਸਮ੍ਪਨ੍ਨਾ ਏਵ ਦੇਵਤਾ. ਯਥਾ ਦੇਵਤਾ ਸਮ੍ਪਤਿਜਾਤਾ ‘‘ਕੀਦਿਸੇਨ ਪੁਞ੍ਞਕਮ੍ਮੇਨ ਇਧ ਨਿਬ੍ਬਤ੍ਤਾ’’ਤਿ ਚਿਨ੍ਤੇਤ੍ਵਾ ‘‘ਇਮਿਨਾ ਨਾਮ ਪੁਞ੍ਞਕਮ੍ਮੇਨ ਇਧ ਨਿਬ੍ਬਤ੍ਤਾ’’ਤਿ ਜਾਨਨ੍ਤਿ, ਏਵਂ ਅਤੀਤਭਵੇ ਅਤ੍ਤਨਾ ਕਤਂ, ਅਞ੍ਞਦਾਪਿ ਵਾ ਏਕਚ੍ਚਂ ਪੁਞ੍ਞਕਮ੍ਮਂ ਜਾਨਨ੍ਤਿਯੇਵ ਮਹਾਪੁਞ੍ਞਾਤਿ ਆਹ ‘‘ਯੇ ਮਹਾਪੁਞ੍ਞਾ’’ਤਿਆਦਿ.

ਨ ਪਞ੍ਞਾਯਨ੍ਤਿ ਚਿਰਤਰਕਾਲਤ੍ਤਾ ਪਰਮਾਯੁਨੋ. ਅਨਿਯ੍ਯਾਨਿਕਨ੍ਤਿ ਨ ਨਿਯ੍ਯਾਨਾਵਹਂ ਸਤ੍ਤਾਨਂ ਅਭਾਜਨਭਾਵਤੋ. ਸਤ੍ਤਾ ਨ ਪਰਮਾਯੁਨੋ ਹੋਨ੍ਤਿ ਨਾਮ ਪਾਪੁਸ੍ਸਨ੍ਨਤਾਯਾਤਿ ਆਹ ‘‘ਤਦਾ ਹਿ ਸਤ੍ਤਾ ਉਸ੍ਸਨ੍ਨਕਿਲੇਸਾ ਹੋਨ੍ਤੀ’’ਤਿ. ਏਤ੍ਥਾਹ – ਕਸ੍ਮਾ ਸਮ੍ਮਾਸਮ੍ਬੁਦ੍ਧਾ ਮਨੁਸ੍ਸਲੋਕੇ ਏਵ ਉਪ੍ਪਜ੍ਜਨ੍ਤਿ, ਨ ਦੇਵਬ੍ਰਹ੍ਮਲੋਕੇਸੂਤਿ? ਦੇਵਲੋਕੇ ਤਾਵ ਨੁਪ੍ਪਜ੍ਜਨ੍ਤਿ ਬ੍ਰਹ੍ਮਚਰਿਯਵਾਸਸ੍ਸ ਅਨੋਕਾਸਭਾਵਤੋ, ਤਥਾ ਅਨਚ੍ਛਰਿਯਭਾਵਤੋ. ਅਚ੍ਛਰਿਯਧਮ੍ਮਾ ਹਿ ਬੁਦ੍ਧਾ ਭਗਵਨ੍ਤੋ, ਤੇਸਂ ਸਾ ਅਚ੍ਛਰਿਯਧਮ੍ਮਤਾ ਦੇਵਤ੍ਤਭਾਵੇ ਠਿਤਾਨਂ ਨ ਪਾਕਟਾ ਹੋਤਿ ਯਥਾ ਮਨੁਸ੍ਸਭੂਤਾਨਂ, ਦੇਵਭੂਤੇ ਹਿ ਸਮ੍ਮਾਸਮ੍ਬੁਦ੍ਧੇ ਦਿਸ੍ਸਮਾਨਂ ਬੁਦ੍ਧਾਨੁਭਾਵਂ ਦੇਵਾਨੁਭਾਵਤੋ ਲੋਕੋ ਦਹਤਿ, ਨ ਬੁਦ੍ਧਾਨੁਭਾਵਤੋ, ਤਥਾ ਸਤਿ ‘‘ਸਮ੍ਮਾਸਮ੍ਬੁਦ੍ਧੋ’’ਤਿ ਨਾਧਿਮੁਚ੍ਚਤਿ ਨ ਸਮ੍ਪਸੀਦਤਿ, ਇਸ੍ਸਰਗੁਤ੍ਤਗ੍ਗਾਹਂ ਨ ਵਿਸ੍ਸਜ੍ਜੇਤਿ, ਦੇਵਤ੍ਤਭਾਵਸ੍ਸ ਚ ਚਿਰਕਾਲਾਧਿਟ੍ਠਾਨਤੋ ਏਕਚ੍ਚਸਸ੍ਸਤਵਾਦਤੋ ਨ ਪਰਿਮੁਚ੍ਚਤਿ. ਬ੍ਰਹ੍ਮਲੋਕੇ ਨੁਪ੍ਪਜ੍ਜਨ੍ਤੀਤਿ ਏਤ੍ਥਾਪਿ ਏਸੇਵ ਨਯੋ. ਸਤ੍ਤਾਨਂ ਤਾਦਿਸਗ੍ਗਾਹਵਿਨਿਮੋਚਨਤ੍ਥਞ੍ਹਿ ਬੁਦ੍ਧਾ ਭਗਵਨ੍ਤੋ ਮਨੁਸ੍ਸਸੁਗਤਿਯਂਯੇਵ ਉਪ੍ਪਜ੍ਜਨ੍ਤਿ, ਨ ਦੇਵਸੁਗਤਿਯਂ. ਮਨੁਸ੍ਸਸੁਗਤਿਯਂ ਉਪ੍ਪਜ੍ਜਨ੍ਤਾਪਿ ਓਪਪਾਤਿਕਾ ਨ ਹੋਨ੍ਤਿ, ਸਤਿ ਚ ਓਪਪਾਤਿਕੂਪਪਤ੍ਤਿਯਂ ਵੁਤ੍ਤਦੋਸਾਨਤਿਵਤ੍ਤਨਤੋ, ਧਮ੍ਮਵੇਨੇਯ੍ਯਾਨਂ ਧਮ੍ਮਤਨ੍ਤਿਯਾ ਠਪਨਸ੍ਸ ਵਿਯ ਧਾਤੁਵੇਨੇਯ੍ਯਾਨਂ ਧਾਤੂਨਂ ਠਪਨਸ੍ਸ ਇਚ੍ਛਿਤਬ੍ਬਤ੍ਤਾ ਚ. ਨ ਹਿ ਓਪਪਾਤਿਕਾਨਂ ਪਰਿਨਿਬ੍ਬਾਨਤੋ ਉਦ੍ਧਂ ਸਰੀਰਧਾਤੁਯੋ ਤਿਟ੍ਠਨ੍ਤਿ. ਮਨੁਸ੍ਸਲੋਕੇ ਉਪ੍ਪਜ੍ਜਨ੍ਤਾਪਿ ਮਹਾਬੋਧਿਸਤ੍ਤਾ ਚਰਿਮਭਵੇ ਮਨੁਸ੍ਸਭਾਵਸ੍ਸ ਪਾਕਟਭਾਵਕਰਣਾਯ ਪਨ ਦਾਰਪਰਿਗ੍ਗਹਮ੍ਪਿ ਕਰੋਨ੍ਤਾ ਯਾਵ ਪੁਤ੍ਤਮੁਖਦਸ੍ਸਨਾ ਅਗਾਰਮਜ੍ਝੇ ਤਿਟ੍ਠਨ੍ਤਿ, ਪਰਿਪਾਕਗਤਸੀਲਨੇਕ੍ਖਮ੍ਮਪਞ੍ਞਾਦਿਪਾਰਮਿਕਾਪਿ ਨ ਅਭਿਨਿਕ੍ਖਮਨ੍ਤੀਤਿ. ਕਿਂ ਵਾ ਏਤਾਯ ਕਾਰਣਚਿਨ੍ਤਾਯ ‘‘ਸਬ੍ਬਬੁਦ੍ਧੇਹਿ ਆਚਿਣ੍ਣਸਮਾਚਿਣ੍ਣਾ, ਯਦਿਦਂ ਮਨੁਸ੍ਸਭੂਤਾਨਂਯੇਵ ਅਭਿਸਮ੍ਬੁਜ੍ਝਨਾ, ਨ ਦੇਵਭੂਤਾਨ’’ਨ੍ਤਿ. ਅਯਮੇਤ੍ਥ ਧਮ੍ਮਤਾ. ਤਥਾ ਹਿ ਤਦਤ੍ਥੋ ਮਹਾਭਿਨੀਹਾਰੋਪਿ ਮਨੁਸ੍ਸਭੂਤਾਨਂਯੇਵ ਇਜ੍ਝਤਿ, ਨ ਦੇਵਭੂਤਾਨਂ.

ਕਸ੍ਮਾ ਪਨ ਸਮ੍ਮਾਸਮ੍ਬੁਦ੍ਧਾ ਜਮ੍ਬੁਦੀਪੇ ਏਵ ਉਪ੍ਪਜ੍ਜਨ੍ਤਿ, ਨ ਸੇਸਦੀਪੇਸੁ? ਕੇਚਿ ਤਾਵ ਆਹੁ ‘‘ਯਸ੍ਮਾ ਪਥਵਿਯਾ ਨਾਭਿਭੂਤਾ, ਬੁਦ੍ਧਾਨੁਭਾਵਸਹਿਤਾ ਅਚਲਟ੍ਠਾਨਭੂਤਾ ਬੋਧਿਮਣ੍ਡਭੂਮਿ ਜਮ੍ਬੁਦੀਪੇ ਏਵ, ਤਸ੍ਮਾ ਜਮ੍ਬੁਦੀਪੇ ਏਵ ਉਪ੍ਪਜ੍ਜਨ੍ਤੀ’’ਤਿ, ਤਥਾ ‘‘ਇਤਰੇਸਮ੍ਪਿ ਅਵਿਜਹਿਤਟ੍ਠਾਨਾਨਂ ਤਤ੍ਥੇਵ ਲਬ੍ਭਨਤੋ’’ਤਿ. ਅਯਂ ਪਨੇਤ੍ਥ ਅਮ੍ਹਾਕਂ ਖਨ੍ਤਿ – ਯਸ੍ਮਾ ਪੁਰਿਮਬੁਦ੍ਧਾਨਂ, ਮਹਾਬੋਧਿਸਤ੍ਤਾਨਂ, ਪਚ੍ਚੇਕਬੁਦ੍ਧਾਨਞ੍ਚ ਨਿਬ੍ਬਤ੍ਤਿਯਾ ਸਾਵਕਬੋਧਿਸਤ੍ਤਾਨਂ ਸਾਵਕਬੋਧਿਯਾ ਅਭਿਨੀਹਾਰੋ, ਸਾਵਕਪਾਰਮਿਯਾ ਸਮ੍ਭਰਣਂ, ਪਰਿਪਾਚਨਞ੍ਚ ਬੁਦ੍ਧਖੇਤ੍ਤਭੂਤੇ ਇਮਸ੍ਮਿਂ ਚਕ੍ਕਵਾਲ਼ੇ ਜਮ੍ਬੁਦੀਪੇ ਏਵ ਇਜ੍ਝਤਿ, ਨ ਅਞ੍ਞਤ੍ਥ. ਵੇਨੇਯ੍ਯਾਨਂ ਵਿਨਯਨਤ੍ਥੋ ਚ ਬੁਦ੍ਧੁਪ੍ਪਾਦੋਤਿ ਅਗ੍ਗਸਾਵਕਮਹਾਸਾਵਕਾਦਿ ਵੇਨੇਯ੍ਯਵਿਸੇਸਾਪੇਕ੍ਖਾਯ ਏਤਸ੍ਮਿਂ ਜਮ੍ਬੁਦੀਪੇ ਏਵ ਬੁਦ੍ਧਾ ਨਿਬ੍ਬਤ੍ਤਨ੍ਤਿ, ਨ ਸੇਸਦੀਪੇਸੁ. ਅਯਞ੍ਚ ਨਯੋ ਸਬ੍ਬਬੁਦ੍ਧਾਨਂ ਆਚਿਣ੍ਣਸਮਾਚਿਣ੍ਣੋਤਿ. ਤੇਸਂ ਉਤ੍ਤਮਪੁਰਿਸਾਨਂ ਤਤ੍ਥੇਵ ਉਪ੍ਪਤ੍ਤਿ ਸਮ੍ਪਤ੍ਤਿਚਕ੍ਕਾਨਂ ਵਿਯ ਅਞ੍ਞਮਞ੍ਞੂਪਨਿਸ੍ਸਯਤੋ ਅਪਰਾਪਰਂ ਵਤ੍ਤਤੀਤਿ ਦਟ੍ਠਬ੍ਬਂ, ਏਤੇਨੇਵ ਇਮਂ ਚਕ੍ਕਵਾਲ਼ਂ ਮਜ੍ਝੇ ਕਤ੍ਵਾ ਇਮਿਨਾ ਸਦ੍ਧਿਂ ਚਕ੍ਕਵਾਲ਼ਾਨਂ ਦਸਸਹਸ੍ਸਸ੍ਸੇਵ ਖੇਤ੍ਤਭਾਵੋ ਦੀਪਿਤੋ ਇਤੋ ਅਞ੍ਞਸ੍ਸ ਬੁਦ੍ਧਾਨਂ ਉਪ੍ਪਤ੍ਤਿਟ੍ਠਾਨਸ੍ਸ ਤੇਪਿਟਕੇ ਬੁਦ੍ਧਵਚਨੇ ਅਨੁਪਲਬ੍ਭਨਤੋ. ਤੇਨਾਹ ‘‘ਤੀਸੁ ਦੀਪੇਸੁ ਬੁਦ੍ਧਾ ਨ ਨਿਬ੍ਬਤ੍ਤਨ੍ਤਿ, ਜਮ੍ਬੁਦੀਪੇਯੇਵ ਨਿਬ੍ਬਤ੍ਤਨ੍ਤੀਤਿ ਦੀਪਂ ਪਸ੍ਸੀ’’ਤਿ. ਇਮਿਨਾ ਨਯੇਨ ਦੇਸਨਿਯਾਮੇਪਿ ਕਾਰਣਂ ਨੀਹਰਿਤ੍ਵਾ ਵਤ੍ਤਬ੍ਬਂ.

ਇਦਾਨਿ ਚ ਖਤ੍ਤਿਯਕੁਲਂ ਲੋਕਸਮ੍ਮਤਂ ਬ੍ਰਾਹ੍ਮਣਾਨਮ੍ਪਿ ਪੂਜਨੀਯਭਾਵਤੋ. ‘‘ਰਾਜਾ ਪਿਤਾ ਭਵਿਸ੍ਸਤੀ’’ਤਿ ਕੁਲਂ ਪਸ੍ਸਿ ਪਿਤੁਵਸੇਨ ਕੁਲਸ੍ਸ ਨਿਦ੍ਦਿਸਿਤਬ੍ਬਤੋ.

‘‘ਦਸਨ੍ਨਂ ਮਾਸਾਨਂ ਉਪਰਿ ਸਤ੍ਤ ਦਿਵਸਾਨੀ’’ਤਿ ਪਸ੍ਸਿ, ਤੇਨ ਅਤ੍ਤਨੋ ਅਨ੍ਤਰਾਯਾਭਾਵਂ ਅਞ੍ਞਾਸਿ, ਤਸ੍ਸਾ ਚ ਤੁਸਿਤਭਵੇ ਦਿਬ੍ਬਸਮ੍ਪਤ੍ਤਿਪਚ੍ਚਨੁਭਵਨਂ.

ਤਾ ਦੇਵਤਾਤਿ ਦਸਸਹਸ੍ਸਿਚਕ੍ਕਵਾਲ਼ਦੇਵਤਾ. ਕਥਂ ਪਨ ਤਾ ਦੇਵਤਾ ਤਦਾ ਬੋਧਿਸਤ੍ਤਸ੍ਸ ਪੂਰਿਤਪਾਰਮਿਭਾਵਂ, ਕਥਂ ਚਸ੍ਸ ਬੁਦ੍ਧਭਾਵਂ ਜਾਨਨ੍ਤੀਤਿ? ਮਹੇਸਕ੍ਖਾਨਂ ਦੇਵਤਾਨਂ ਵਸੇਨ, ਯੇਭੁਯ੍ਯੇਨ ਚ ਤਾ ਦੇਵਤਾ ਅਭਿਸਮਯਭਾਗਿਨੋ. ਤਥਾ ਹਿ ਭਗਵਤੋ ਧਮ੍ਮਦਾਨਸਂਵਿਭਾਗੇ ਅਨੇਕਵਾਰਂ ਦਸਸਹਸ੍ਸਚਕ੍ਕਵਾਲ਼ਦੇਵਤਾਸਨ੍ਨਿਪਾਤੋ ਅਹੋਸਿ.

‘‘ਚਵਾਮੀ’’ਤਿ ਜਾਨਾਤਿ ਚੁਤਿਆਸਨ੍ਨਜਵਨੇਹਿ ਞਾਣਸਹਿਤੇਹਿ ਚੁਤਿਯਾ ਉਪਟ੍ਠਿਤਭਾਵਸ੍ਸ ਪਟਿਸਂਵਿਦਿਤਤ੍ਤਾ. ਚੁਤਿਚਿਤ੍ਤਂ ਨ ਜਾਨਾਤਿ ਚੁਤਿਚਿਤ੍ਤਕ੍ਖਣਸ੍ਸ ਇਤ੍ਤਰਭਾਵਤੋ. ਤਥਾ ਹਿ ਤਂ ਚੁਤੂਪਪਾਤਞਾਣਸ੍ਸਪਿ ਅਵਿਸਯੋਵ. ਪਟਿਸਨ੍ਧਿਚਿਤ੍ਤੇਪਿ ਏਸੇਵ ਨਯੋ. ਆਵਜ੍ਜਨਪਰਿਯਾਯੋਤਿ ਆਵਜ੍ਜਨਕ੍ਕਮੋ. ਯਸ੍ਮਾ ਏਕਵਾਰਂ ਆਵਜ੍ਜਿਤਮਤ੍ਤੇਨ ਆਰਮ੍ਮਣਂ ਨਿਚ੍ਛਿਨਿਤੁਂ ਨ ਸਕ੍ਕਾ, ਤਸ੍ਮਾ ਤਂ ਏਵਾਰਮ੍ਮਣਂ ਦੁਤਿਯਂ, ਤਤਿਯਞ੍ਚ ਆਵਜ੍ਜਿਤ੍ਵਾ ਨਿਚ੍ਛਯਤਿ. ਆਵਜ੍ਜਨਸੀਸੇਨ ਚੇਤ੍ਥ ਜਵਨਵਾਰੋ ਗਹਿਤੋ. ਤੇਨਾਹ ‘‘ਦੁਤਿਯਤਤਿਯਚਿਤ੍ਤਵਾਰੇ ਏਵ ਜਾਨਿਸ੍ਸਤੀ’’ਤਿ. ਚੁਤਿਯਾ ਪੁਰੇਤਰਂ ਕਤਿਪਯਚਿਤ੍ਤਵਾਰਤੋ ਪਟ੍ਠਾਯ ‘‘ਮਰਣਂ ਮੇ ਆਸਨ੍ਨ’’ਨ੍ਤਿ ਜਾਨਨਤੋ ‘‘ਚੁਤਿਕ੍ਖਣੇਪਿ ਚਵਾਮੀਤਿ ਜਾਨਾਤੀ’’ਤਿ ਵੁਤ੍ਤਂ. ਪਟਿਸਨ੍ਧਿਯਾ ਪਨ ਅਪੁਬ੍ਬਭਾਵਤੋ ਪਟਿਸਨ੍ਧਿਚਿਤ੍ਤਂ ਨ ਜਾਨਾਤਿ. ਨਿਕਨ੍ਤਿਯਾ ਉਪ੍ਪਤ੍ਤਿਤੋ ਪਰਤੋ ‘‘ਅਸੁਕਸ੍ਮਿਂ ਮੇ ਠਾਨੇ ਪਟਿਸਨ੍ਧਿ ਗਹਿਤਾ’’ਤਿ ਜਾਨਾਤਿ. ਤਸ੍ਮਿਂ ਕਾਲੇਤਿ ਪਟਿਸਨ੍ਧਿਗ੍ਗਹਣਕਾਲੇ. ਦਸਸਹਸ੍ਸਿਲੋਕਧਾਤੁ ਕਮ੍ਪਤੀਤਿ ਏਤ੍ਥ ਕਮ੍ਪਨਕਾਰਣਂ ਹੇਟ੍ਠਾ ਬ੍ਰਹ੍ਮਜਾਲਵਣ੍ਣਨਾਯਂ (ਦੀ. ਨਿ. ਟੀ. ੧.੧੪੯) ਵੁਤ੍ਤਮੇਵ. ਅਤ੍ਥਤੋ ਪਨੇਤ੍ਥ ਯਂ ਵਤ੍ਤਬ੍ਬਂ, ਤਂ ਪਰਤੋ ਮਹਾਪਰਿਨਿਬ੍ਬਾਨਵਣ੍ਣਨਾਯਂ (ਦੀ. ਨਿ. ਅਟ੍ਠ. ੨.੧੭੧) ਆਗਮਿਸ੍ਸਤਿ. ਮਹਾਕਾਰੁਣਿਕਾ ਬੁਦ੍ਧਾ ਭਗਵਨ੍ਤੋ ਸਤ੍ਤਾਨਂ ਹਿਤਸੁਖਵਿਧਾਨਤਪ੍ਪਰਤਾਯ ਬਹੁਲਂ ਸੋਮਨਸ੍ਸਿਕਾਵ ਹੋਨ੍ਤੀਤਿ ਤੇਸਂ ਪਠਮਮਹਾਵਿਪਾਕਚਿਤ੍ਤੇਨ ਪਟਿਸਨ੍ਧਿਗ੍ਗਹਣਂ ਅਟ੍ਠਕਥਾਯਂ (ਦੀ. ਨਿ. ਅਟ੍ਠ. ੨.੧੭; ਧ. ਸ. ਅਟ੍ਠ. ੪੯੮; ਮ. ਨਿ. ਅਟ੍ਠ. ੪.੨੦੦) ਵੁਤ੍ਤਂ. ਮਹਾਸਿਵਤ੍ਥੇਰੋਪਨ ਯਦਿਪਿ ਮਹਾਕਾਰੁਣਿਕਾ ਬੁਦ੍ਧਾ ਭਗਵਨ੍ਤੋ ਸਤ੍ਤਾਨਂ ਹਿਤਸੁਖਵਿਧਾਨਤਪ੍ਪਰਾਵ, ਵਿਵੇਕਜ੍ਝਾਸਯਾ ਪਨ ਵਿਸਙ੍ਖਾਰਨਿਨ੍ਨਾ ਸਬ੍ਬਸਙ੍ਖਾਰੇਸੁ ਅਜ੍ਝੁਪੇਕ੍ਖਨਬਹੁਲਾਤਿ ਪਞ੍ਚਮਮਹਾਵਿਪਾਕਚਿਤ੍ਤੇਨ ਪਟਿਸਨ੍ਧਿਗ੍ਗਹਣਮਾਹ.

ਪੁਰੇ ਪੁਣ੍ਣਮਾਯ ਸਤ੍ਤਮਦਿਵਸਤੋ ਪਟ੍ਠਾਯਾਤਿ ਪੁਣ੍ਣਮਾਯ ਪੁਰੇ ਸਤ੍ਤਮਦਿਵਸਤੋ ਪਟ੍ਠਾਯ, ਸੁਕ੍ਕਪਕ੍ਖੇ ਨਵਮਿਤੋ ਪਟ੍ਠਾਯਾਤਿ ਅਤ੍ਥੋ. ਸਤ੍ਤਮੇ ਦਿਵਸੇਤਿ ਨਵਮਿਤੋ ਸਤ੍ਤਮੇ ਦਿਵਸੇ ਆਸਲ਼੍ਹਿਪੁਣ੍ਣਮਾਯਂ. ਇਦਂ ਸੁਪਿਨਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰਂ. ਮਜ੍ਝਿਮਟ੍ਠਕਥਾਯਂ ਪਨ ‘‘ਅਨੋਤਤ੍ਤਦਹਂ ਨੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਅਥ ਨੇਸਂ ਦੇਵਿਯੋ ਆਗਨ੍ਤ੍ਵਾ ਮਨੁਸ੍ਸਮਲਹਰਣਤ੍ਥਂ ਨ੍ਹਾਪੇਤ੍ਵਾ’’ਤਿ (ਮ. ਨਿ. ਅਟ੍ਠ. ੪.੨੦੦) ਵੁਤ੍ਤਂ. ਤਤ੍ਥ ਨੇਸਂ ਦੇਵਿਯੋਤਿ ਮਹਾਰਾਜੂਨਂ ਦੇਵਿਯੋ. ਚਰਿਤ੍ਵਾਤਿ ਗੋਚਰਂ ਚਰਿਤ੍ਵਾ.

ਹਰਿਤੂਪਲਿਤ੍ਤਾਯਾਤਿ ਹਰਿਤੇਨ ਗੋਮਯੇਨ ਕਤਪਰਿਭਣ੍ਡਾਯ. ‘‘ਸੋ ਚ ਖੋ ਪੁਰਿਸਗਬ੍ਭੋ, ਨ ਇਤ੍ਥਿਗਬ੍ਭੋ, ਪੁਤ੍ਤੋ ਤੇ ਭਵਿਸ੍ਸਤੀ’’ਤਿ ਏਤ੍ਤਕਮੇਵ ਤੇ ਬ੍ਰਾਹ੍ਮਣਾ ਅਤ੍ਤਨੋ ਸੁਪਿਨਸਤ੍ਥਨਯੇਨ ਕਥੇਸੁਂ. ‘‘ਸਚੇ ਅਗਾਰਂ ਅਜ੍ਝਾਵਸਿਸ੍ਸਤੀ’’ਤਿਆਦਿ ਪਨ ਦੇਵਤਾਵਿਗ੍ਗਹੇਨ ਤਮਤ੍ਥਂ ਯਾਥਾਵਤੋ ਪਵੇਦੇਸੁਂ.

ਧਮ੍ਮਤਾਤਿ ਏਤ੍ਥ ਧਮ੍ਮ-ਸਦ੍ਦੋ ‘‘ਜਾਤਿਧਮ੍ਮਾਨਂ ਭਿਕ੍ਖਵੇ ਸਤ੍ਤਾਨ’’ਨ੍ਤਿਆਦੀਸੁ (ਮ. ਨਿ. ੧.੧੩੧; ੩.੩੭੩; ਪਟਿ. ਮ. ੧.੩੩) ਵਿਯ ਪਕਤਿਪਰਿਯਾਯੋ, ਧਮ੍ਮੋ ਏਵ ਧਮ੍ਮਤਾ ਯਥਾ ਦੇਵੋ ਏਵ ਦੇਵਤਾਤਿ ਆਹ ‘‘ਅਯਂ ਸਭਾਵੋ’’ਤਿ, ਅਯਂ ਪਕਤੀਤਿ ਅਤ੍ਥੋ. ਸ੍ਵਾਯਂ ਸਭਾਵੋ ਅਤ੍ਥਤੋ ਤਥਾ ਨਿਯਤਭਾਵੋਤਿ ਆਹ ‘‘ਅਯਂ ਨਿਯਾਮੋਤਿ ਵੁਤ੍ਤਂ ਹੋਤੀ’’ਤਿ. ਨਿਯਾਮੋ ਪਨ ਬਹੁਵਿਧੋਤਿ ਤੇ ਸਬ੍ਬੇ ਅਤ੍ਥੁਦ੍ਧਾਰਨਯੇਨ ਉਦ੍ਧਰਿਤ੍ਵਾ ਇਧਾਧਿਪ੍ਪੇਤਨਿਯਾਮਮੇਵ ਦਸ੍ਸੇਤੁਂ ‘‘ਨਿਯਾਮੋ ਚ ਨਾਮਾ’’ਤਿਆਦਿ ਵੁਤ੍ਤਂ. ਤਤ੍ਥ ਕਮ੍ਮਾਨਂ ਨਿਯਾਮੋ ਕਮ੍ਮਨਿਯਾਮੋ. ਏਸ ਨਯੋ ਉਤੁਨਿਯਾਮਾਦੀਸੁ ਤੀਸੁ. ਇਤਰੋ ਪਨ ਧਮ੍ਮੋ ਏਵ ਨਿਯਾਮੋ ਧਮ੍ਮਨਿਯਾਮੋ, ਧਮ੍ਮਤਾ.

ਕੁਸਲਸ੍ਸ ਕਮ੍ਮਸ੍ਸ. ਨਿਸੇਨ੍ਤੋ ਤਿਖਿਣਂ ਕਰੋਨ੍ਤੋ.

ਅਰੂਪਾਦਿਭੂਮਿਭਾਗਵਿਸੇਸਵਸੇਨ ਉਤੁਵਿਸੇਸਦਸ੍ਸਨਤੋ ਉਤੁਵਿਸੇਸੇਨ ਸਿਜ੍ਝਮਾਨਾਨਂ ਰੁਕ੍ਖਾਦੀਨਂ ਪੁਪ੍ਫਫਲਾਦਿਗ੍ਗਹਣਂ ‘‘ਤੇਸੁ ਤੇਸੁ ਜਨਪਦੇਸੂ’’ਤਿ ਵਿਸੇਸੇਤ੍ਵਾ ਵੁਤ੍ਤਂ. ਤਸ੍ਮਿਂ ਤਸ੍ਮਿਂ ਕਾਲੇਤਿ ਤਸ੍ਮਿਂ ਤਸ੍ਮਿਂ ਵਸਨ੍ਤਾਦਿਕਾਲੇ.

ਮਧੁਰਤੋ ਬੀਜਤੋ ਤਿਤ੍ਤਤੋ ਬੀਜਤੋਤਿ ਯੋਜਨਾ.

੧੮. ਵਤ੍ਤਮਾਨਸਮੀਪੇ ਵਤ੍ਤਮਾਨੇ ਵਿਯ ਵੋਹਰਿਤਬ੍ਬਨ੍ਤਿ ‘‘ਓਕ੍ਕਮਤੀ’’ਤਿ ਵੁਤ੍ਤਨ੍ਤਿ ਆਹ ‘‘ਓਕ੍ਕਨ੍ਤੋ ਹੋਤੀਤਿ ਅਯਮੇਵਤ੍ਥੋ’’ਤਿ. ਏਵਂ ਹੋਤੀਤਿ ਏਵਂ ਵੁਤ੍ਤਪ੍ਪਕਾਰੇਨਸ੍ਸ ਸਮ੍ਪਜਾਨਨਾ ਹੋਤਿ. ਨ ਓਕ੍ਕਮਮਾਨੇ ਪਟਿਸਨ੍ਧਿਕ੍ਖਣਸ੍ਸ ਦੁਵਿਞ੍ਞੇਯ੍ਯਤਾਯ. ਯਥਾ ਚ ਵੁਤ੍ਤਂ ‘‘ਪਟਿਸਨ੍ਧਿਚਿਤ੍ਤਂ ਨ ਜਾਨਾਤੀ’’ਤਿ. ਦਸਸਹਸ੍ਸਚਕ੍ਕਵਾਲ਼ਪਤ੍ਥਰਣੇਨ ਵਾ ਅਪ੍ਪਮਾਣੋ. ਅਤਿਵਿਯ ਸਮੁਜ੍ਜਲਨਭਾਵੇਨ ਉਲ਼ਾਰੋ. ਦੇਵਾਨੁਭਾਵਨ੍ਤਿ ਦੇਵਾਨਂ ਪਭਾਨੁਭਾਵਂ. ਦੇਵਾਨਞ੍ਹਿ ਪਭਂ ਸੋ ਓਭਾਸੋ ਅਭਿਭਵਤਿ, ਨ ਤੇਸਂ ਆਧਿਪਚ੍ਚਂ. ਤੇਨਾਹ ‘‘ਨਿਵਤ੍ਥਵਤ੍ਥਸ੍ਸਾ’’ਤਿਆਦਿ.

ਲੋਕਾਨਂ ਲੋਕਧਾਤੂਨਂ ਅਨ੍ਤਰੋ ਵਿਵਰੋ ਲੋਕਨ੍ਤਰੋ, ਸੋ ਏਵ ਇਤ੍ਥਿਲਿਙ੍ਗਵਸੇਨ ‘‘ਲੋਕਨ੍ਤਰਿਕਾ’’ਤਿ ਵੁਤ੍ਤੋ. ਰੁਕ੍ਖਗਚ੍ਛਾਦਿਨਾ ਕੇਨਚਿ ਨ ਹਞ੍ਞਨ੍ਤੀਤਿ ਅਘਾ, ਅਸਮ੍ਬਾਧਾ. ਤੇਨਾਹ ‘‘ਨਿਚ੍ਚਵਿਵਟਾ’’ਤਿ. ਅਸਂਵੁਤਾਤਿ ਹੇਟ੍ਠਾ, ਉਪਰਿ ਚ ਕੇਨਚਿ ਨ ਪਿਹਿਤਾ. ਤੇਨ ਵੁਤ੍ਤਂ ‘‘ਹੇਟ੍ਠਾਪਿ ਅਪ੍ਪਤਿਟ੍ਠਾ’’ਤਿ. ਤਤ੍ਥ ਪਿ-ਸਦ੍ਦੇਨ ਯਥਾ ਹੇਟ੍ਠਾ ਉਦਕਸ੍ਸ ਪਿਧਾਯਿਕਾ ਪਥਵੀ ਨਤ੍ਥੀਤਿ ਅਸਂਵੁਤਾ ਲੋਕਨ੍ਤਰਿਕਾ, ਏਵਂ ਉਪਰਿਪਿ ਚਕ੍ਕਵਾਲ਼ੇਸੁ ਵਿਯ ਦੇਵਵਿਮਾਨਾਨਂ ਅਭਾਵਤੋ ਅਸਂਵੁਤਾ ਅਪ੍ਪਤਿਟ੍ਠਾਤਿ ਦਸ੍ਸੇਤਿ. ਅਨ੍ਧਕਾਰੋ ਏਤ੍ਥ ਅਤ੍ਥੀਤਿ ਅਨ੍ਧਕਾਰਾ. ਚਕ੍ਖੁਵਿਞ੍ਞਾਣਂ ਨ ਜਾਯਤਿ ਆਲੋਕਸ੍ਸ ਅਭਾਵਤੋ, ਨ ਚਕ੍ਖੁਨੋ. ਤਥਾ ਹਿ ‘‘ਤੇਨ ਓਭਾਸੇਨ ਅਞ੍ਞਮਞ੍ਞਂ ਸਞ੍ਜਾਨਨ੍ਤੀ’’ਤਿ ਵੁਤ੍ਤਂ. ਜਮ੍ਬੁਦੀਪੇ ਠਿਤਮਜ੍ਝਨ੍ਹਿਕਵੇਲਾਯਂ ਪੁਬ੍ਬਵਿਦੇਹਵਾਸੀਨਂ ਅਤ੍ਥਙ੍ਗਮਨਵਸੇਨ ਉਪਡ੍ਢਂ ਸੂਰਿਯਮਣ੍ਡਲਂ ਪਞ੍ਞਾਯਤਿ, ਅਪਰਗੋਯਾਨਵਾਸੀਨਂ ਉਗ੍ਗਮਨਵਸੇਨ, ਏਵਂ ਸੇਸਦੀਪੇਸੁ ਪੀਤਿ ਆਹ ‘‘ਏਕਪ੍ਪਹਾਰੇਨੇਵ ਤੀਸੁ ਦੀਪੇਸੁ ਪਞ੍ਞਾਯਨ੍ਤੀ’’ਤਿ. ਇਤੋ ਅਞ੍ਞਥਾ ਪਨ ਦ੍ਵੀਸੁ ਏਵ ਦੀਪੇਸੁ ਏਕਪ੍ਪਹਾਰੇਨ ਪਞ੍ਞਾਯਨ੍ਤੀਤਿ. ਏਕੇਕਾਯ ਦਿਸਾਯ ਨਵ ਨਵ ਯੋਜਨਸਤਸਹਸ੍ਸਾਨਿ ਅਨ੍ਧਕਾਰਵਿਧਮਨਮ੍ਪਿ ਇਮਿਨਾਵ ਨਯੇਨ ਦਟ੍ਠਬ੍ਬਂ. ਪਭਾਯ ਨਪ੍ਪਹੋਨ੍ਤੀਤਿ ਅਤ੍ਤਨੋ ਪਭਾਯ ਓਭਾਸਿਤੁਂ ਅਨਭਿਸਮ੍ਭੁਨਨ੍ਤਿ. ਯੁਗਨ੍ਧਰਪਬ੍ਬਤਪ੍ਪਮਾਣੇ ਆਕਾਸੇ ਵਿਚਰਣਤੋ ‘‘ਚਕ੍ਕਵਾਲ਼ਪਬ੍ਬਤਸ੍ਸ ਵੇਮਜ੍ਝੇਨ ਵਿਚਰਨ੍ਤੀ’’ਤਿ ਵੁਤ੍ਤਂ.

ਵਾਵਟਾਤਿ ਖਾਦਨਤ੍ਥਂ ਗਣ੍ਹਿਤੁਂ ਉਪਕ੍ਕਮਨ੍ਤਾ. ਵਿਪਰਿਵਤ੍ਤਿਤ੍ਵਾਤਿ ਵਿਵਤ੍ਤਿਤ੍ਵਾ. ਛਿਜ੍ਜਿਤ੍ਵਾਤਿ ਮੁਚ੍ਛਾਪਤ੍ਤਿਯਾ ਠਿਤਟ੍ਠਾਨਤੋ ਮੁਚ੍ਚਿਤ੍ਵਾ, ਅਙ੍ਗਪਚ੍ਚਙ੍ਗਛੇਦਨੇਨ ਵਾ ਛਿਜ੍ਜਿਤ੍ਵਾ. ਅਚ੍ਚਨ੍ਤਖਾਰੇਤਿ ਆਤਪਸਨ੍ਤਾਪਾਭਾਵੇਨ ਅਤਿਸੀਤਭਾਵਮੇਵ ਸਨ੍ਧਾਯ ਅਚ੍ਚਨ੍ਤਖਾਰਤਾ ਵੁਤ੍ਤਾ ਸਿਯਾ. ਨ ਹਿ ਤਂ ਕਪ੍ਪਸਣ੍ਠਹਨਉਦਕਂ ਸਮ੍ਪਤ੍ਤਿਕਰਮਹਾਮੇਘਵੁਟ੍ਠਂ ਪਥਵਿਸਨ੍ਧਾਰਕਂ ਕਪ੍ਪਵਿਨਾਸਕਂ ਉਦਕਂ ਵਿਯ ਖਾਰਂ ਭਵਿਤੁਂ ਅਰਹਤਿ. ਤਥਾ ਹਿ ਸਤਿ ਪਥਵੀਪਿ ਵਿਲੀਯੇਯ੍ਯ, ਤੇਸਂ ਵਾ ਪਾਪਕਮ੍ਮਬਲੇਨ ਪੇਤਾਨਂ ਉਦਕਸ੍ਸ ਪੁਬ੍ਬਖੇਲ਼ਭਾਵਾਪਤ੍ਤਿ ਵਿਯ ਤਸ੍ਸ ਉਦਕਸ੍ਸ ਤਦਾ ਖਾਰਭਾਵਾਪਤ੍ਤਿ ਹੋਤੀਤਿ ਵੁਤ੍ਤਂ ‘‘ਅਚ੍ਚਨ੍ਤਖਾਰੇ ਉਦਕੇ’’ਤਿ.

ਏਕਯਾਗੁਪਾਨਮਤ੍ਤਮ੍ਪੀਤਿ ਪਤ੍ਤਾਦਿਭਾਜਨਗਤਂ ਯਾਗੁਂ ਗਲ਼ੋਚਿਆਦਿਉਦ੍ਧਰਣਿਯਾ ਗਹੇਤ੍ਵਾ ਪਿਵਨਮਤ੍ਤਮ੍ਪਿ ਕਾਲਂ. ਸਮਨ੍ਤਤੋਤਿ ਸਬ੍ਬਭਾਗਤੋ ਛਪ੍ਪਕਾਰਮ੍ਪਿ.

੧੯. ਚਤੁਨ੍ਨਂ ਮਹਾਰਾਜਾਨਂ ਵਸੇਨਾਤਿ ਵੇਸ੍ਸਵਣਾਦਿਚਤੁਮਹਾਰਾਜਭਾਵਸਾਮਞ੍ਞੇਨ.

ਯਥਾਵਿਹਾਰਨ੍ਤਿ ਯਥਾਸਕਂ ਵਿਹਾਰਂ.

੨੦. ਪਕਤਿਯਾਤਿ ਅਤ੍ਤਨੋ ਪਕਤਿਯਾ ਏਵ. ਤੇਨਾਹ ‘‘ਸਭਾਵੇਨੇਵਾ’’ਤਿ. ਪਰਸ੍ਸ ਸਨ੍ਤਿਕੇ ਗਹਣੇਨ ਵਿਨਾ ਅਤ੍ਤਨੋ ਸਭਾਵੇਨੇਵ ਸਯਮੇਵ ਅਧਿਟ੍ਠਹਿਤ੍ਵਾ ਸੀਲਸਮ੍ਪਨ੍ਨਾ. ਬੋਧਿਸਤ੍ਤਮਾਤਾਪੀਤਿ ਅਮ੍ਹਾਕਂ ਬੋਧਿਸਤ੍ਤਮਾਤਾਪਿ. ਕਾਲਦੇਵਿਲਸ੍ਸਾਤਿ ਯਥਾ ਕਾਲਦੇਵਿਲਸ੍ਸ ਸਨ੍ਤਿਕੇ ਅਞ੍ਞਦਾ ਗਣ੍ਹਾਤਿ, ਬੋਧਿਸਤ੍ਤੇ ਪਨ…ਪੇ… ਸਯਮੇਵ ਸੀਲਂ ਅਗ੍ਗਹੇਸਿ, ਤਥਾ ਵਿਪਸ੍ਸੀਬੋਧਿਸਤ੍ਤਮਾਤਾਪੀਤਿ ਅਧਿਪ੍ਪਾਯੋ.

੨੧. ‘‘ਮਨੁਸ੍ਸੇਸੂ’’ਤਿ ਇਦਂ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ, ‘‘ਮਨੁਸ੍ਸਿਤ੍ਥਿਯਾ ਨਾਮ ਮਨੁਸ੍ਸਪੁਰਿਸੇਸੁ ਪੁਰਿਸਾਧਿਪ੍ਪਾਯਚਿਤ੍ਤਂ ਉਪ੍ਪਜ੍ਜੇਯ੍ਯਾ’’ਤਿ. ਬੋਧਿਸਤ੍ਤਸ੍ਸ ਮਾਤੁਯਾ ਪਨ ਦੇਵੇਸੁਪਿ ਤਾਦਿਸਂ ਚਿਤ੍ਤਂ ਨੁਪ੍ਪਜ੍ਜਤੇਵ. ਯਥਾ ਬੋਧਿਸਤ੍ਤਸ੍ਸ ਆਨੁਭਾਵੇਨ ਬੋਧਿਸਤ੍ਤਮਾਤੁ ਪੁਰਿਸਾਧਿਪ੍ਪਾਯਚਿਤ੍ਤਂ ਨੁਪ੍ਪਜ੍ਜਤਿ, ਏਵਂ ਤਸ੍ਸ ਆਨੁਭਾਵੇਨੇਵ ਸਾ ਕੇਨਚਿ ਪੁਰਿਸੇਨ ਅਨਭਿਭਵਨੀਯਾਤਿ ਆਹ ‘‘ਪਾਦਾ ਨ ਵਹਨ੍ਤਿ ਦਿਬ੍ਬਸਙ੍ਖਲਿਕਾ ਵਿਯ ਬਜ੍ਝਨ੍ਤੀ’’ਤਿ.

੨੨. ਪੁਬ੍ਬੇ ‘‘ਕਾਮਗੁਣੂਪਸਂਹਿਤਂ ਚਿਤ੍ਤਂ ਨੁਪ੍ਪਜ੍ਜਤੀ’’ਤਿ ਵੁਤ੍ਤਂ, ਪੁਨ ‘‘ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਾ ਸਮਙ੍ਗੀਭੂਤਾ ਪਰਿਚਾਰੇਤੀ’’ਤਿ ਚ ਵੁਤ੍ਤਂ. ਕਥਮਿਦਂ ਅਞ੍ਞਮਞ੍ਞਂ ਨ ਵਿਰੁਜ੍ਝਤੀਤਿ ਆਹ ‘‘ਪੁਬ੍ਬੇ’’ਤਿਆਦਿ. ਵਤ੍ਥੁਪਟਿਕ੍ਖੇਪੋਤਿ ਅਬ੍ਰਹ੍ਮਚਰਿਯਵਤ੍ਥੁਪਟਿਸੇਧੋ. ਤੇਨਾਹ ‘‘ਪੁਰਿਸਾਧਿਪ੍ਪਾਯਵਸੇਨਾ’’ਤਿ. ਆਰਮ੍ਮਣਪਟਿਲਾਭੋਤਿ ਰੂਪਾਦਿਪਞ੍ਚਕਾਮਗੁਣਾਰਮ੍ਮਣਸ੍ਸੇਵ ਪਟਿਲਾਭੋ.

੨੩. ਕਿਲਮਥੋਤਿ ਖੇਦੋ, ਕਾਯਸ੍ਸ ਗਰੁਭਾਵਕਥਿਨਭਾਵਾਦਯੋਪਿ ਤਸ੍ਸਾ ਤਦਾ ਨ ਹੋਨ੍ਤਿ ਏਵ. ‘‘ਤਿਰੋਕੁਚ੍ਛਿਗਤਂ ਪਸ੍ਸਤੀ’’ਤਿ ਵੁਤ੍ਤਂ. ਕਦਾ ਪਟ੍ਠਾਯ ਪਸ੍ਸਤੀਤਿ ਆਹ ‘‘ਕਲਲਾਦਿਕਾਲਂ ਅਤਿਕ੍ਕਮਿਤ੍ਵਾ’’ਤਿਆਦਿ. ਦਸ੍ਸਨੇ ਪਯੋਜਨਂ ਸਯਮੇਵ ਵਦਤਿ. ਤਸ੍ਸ ਅਭਾਵਤੋ ਕਲਲਾਦਿਕਾਲੇ ਨ ਪਸ੍ਸਤਿ. ਪੁਤ੍ਤੇਨ ਦਹਰੇਨ ਮਨ੍ਦੇਨ ਉਤ੍ਤਾਨਸੇਯ੍ਯਕੇਨ ਸਦ੍ਧਿਂ. ‘‘ਯਂ ਤਂ ਮਾਤੂ’’ਤਿਆਦਿ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ. ਚਕ੍ਕਵਤ੍ਤਿਗਬ੍ਭਤੋਪਿ ਹਿ ਸਵਿਸੇਸਂ ਬੋਧਿਸਤ੍ਤਗਬ੍ਭੋ ਪਰਿਹਾਰਂ ਲਭਤਿ ਪੁਞ੍ਞਸਮ੍ਭਾਰਸ੍ਸ ਸਾਤਿਸਯਤ੍ਤਾ, ਤਸ੍ਮਾ ਬੋਧਿਸਤ੍ਤਮਾਤਾ ਅਤਿਵਿਯ ਸਪ੍ਪਾਯਾਹਾਰਾਚਾਰਾ ਚ ਹੁਤ੍ਵਾ ਸਕ੍ਕਚ੍ਚਂ ਪਰਿਹਰਤਿ. ਸੁਖਵਾਸਤ੍ਥਨ੍ਤਿ ਬੋਧਿਸਤ੍ਤਸ੍ਸ ਸੁਖਵਾਸਤ੍ਥਂ. ਪੁਰਤ੍ਥਾਭਿਮੁਖੋਤਿ ਮਾਤੁ ਪੁਰਿਮਭਾਗਾਭਿਮੁਖੋ. ਇਦਾਨਿ ਤਿਰੋਕੁਚ੍ਛਿਗਤਸ੍ਸ ਦਿਸ੍ਸਮਾਨਤਾਯ ਅਬ੍ਭਨ੍ਤਰਂ, ਬਾਹਿਰਞ੍ਚ ਕਾਰਣਂ ਦਸ੍ਸੇਤੁਂ ‘‘ਪੁਬ੍ਬੇ ਕਤਕਮ੍ਮ’’ਨ੍ਤਿਆਦਿ ਵੁਤ੍ਤਂ. ਅਸ੍ਸਾਤਿ ਦੇਵਿਯਾ. ਵਤ੍ਥੁਨ੍ਤਿ ਕੁਚ੍ਛਿਂ. ਫਲਿਕਅਬ੍ਭਪਟਲਾਦਿਨੋ ਵਿਯ ਬੋਧਿਸਤ੍ਤਮਾਤੁਕੁਚ੍ਛਿਤਚਸ੍ਸ ਪਤਨੁਭਾਵੇਨ ਆਲੋਕਸ੍ਸ ਵਿਬਨ੍ਧਾਭਾਵਤੋ ਯਥਾ ਬੋਧਿਸਤ੍ਤਮਾਤਾ ਕੁਚ੍ਛਿਗਤਂ ਬੋਧਿਸਤ੍ਤਂ ਪਸ੍ਸਤਿ, ਕਿਂ ਏਵਂ ਬੋਧਿਸਤ੍ਤੋਪਿ ਮਾਤਰਂ, ਅਞ੍ਞਞ੍ਚ ਪੁਰਤੋ ਠਿਤਂ ਰੂਪਗਤਂ ਪਸ੍ਸਤਿ, ਨੋਤਿ ਆਹ ‘‘ਬੋਧਿਸਤ੍ਤੋ ਪਨਾ’’ਤਿਆਦਿ. ਕਸ੍ਮਾ ਪਨ ਸਤਿ ਚਕ੍ਖੁਮ੍ਹਿ, ਆਲੋਕੇ ਚ ਨ ਪਸ੍ਸਤੀਤਿ ਆਹ ‘‘ਨ ਹਿ ਅਨ੍ਤੋਕੁਚ੍ਛਿਯਂ ਚਕ੍ਖੁਵਿਞ੍ਞਾਣਂ ਉਪ੍ਪਜ੍ਜਤੀ’’ਤਿ. ਅਸ੍ਸਾਸਪਸ੍ਸਾਸਾ ਵਿਯ ਹਿ ਤਤ੍ਥ ਚਕ੍ਖੁਵਿਞ੍ਞਾਣਮ੍ਪਿ ਨ ਉਪ੍ਪਜ੍ਜਤਿ ਤਜ੍ਜਸ੍ਸ ਸਮਨ੍ਨਾਹਾਰਸ੍ਸ ਅਭਾਵਤੋ.

੨੪. ਯਥਾ ਅਞ੍ਞਾ ਇਤ੍ਥਿਯੋ ਵਿਜਾਤਪ੍ਪਚ੍ਚਯਾ ਤਾਦਿਸੇਨ ਰੋਗੇਨ ਅਭਿਭੂਤਾਪਿ ਹੁਤ੍ਵਾ ਮਰਨ੍ਤਿ, ਬੋਧਿਸਤ੍ਤਮਾਤੁ ਪਨ ਬੋਧਿਸਤ੍ਤੇ ਕੁਚ੍ਛਿਗਤੇ ਤਸ੍ਸ ਵਿਜਾਯਨਨਿਮਿਤ੍ਤਂ, ਨ ਕੋਚਿ ਰੋਗੋ ਉਪ੍ਪਜ੍ਜਤਿ, ਕੇਵਲਂ ਆਯੁਪਰਿਕ੍ਖਯੇਨੇਵ ਕਾਲਂ ਕਰੋਤਿ, ਸ੍ਵਾਯਮਤ੍ਥੋ ਹੇਟ੍ਠਾ ਵੁਤ੍ਤੋ ਏਵ. ‘‘ਬੋਧਿਸਤ੍ਤੇਨ ਵਸਿਤਟ੍ਠਾਨਞ੍ਹੀ’’ਤਿਆਦਿ ਤਸ੍ਸ ਕਾਰਣਵਚਨਂ. ਅਞ੍ਞੇਸਂ ਅਪਰਿਭੋਗਨ੍ਤਿ ਅਞ੍ਞੇਹਿ ਨ ਪਰਿਭੁਞ੍ਜਿਤਬ੍ਬਂ, ਨ ਪਰਿਭੋਗਯੋਗ੍ਯਨ੍ਤਿ ਅਤ੍ਥੋ. ਤਥਾ ਸਤਿ ਬੋਧਿਸਤ੍ਤਪਿਤੁ ਅਞ੍ਞਾਯ ਅਗ੍ਗਮਹੇਸਿਯਾ ਭਵਿਤਬ੍ਬਂ, ਤਥਾਪਿ ਬੋਧਿਸਤ੍ਤਮਾਤਰਿ ਧਰਨ੍ਤਿਯਾ ਅਯੁਜ੍ਜਮਾਨਕਨ੍ਤਿ ਆਹ ‘‘ਨ ਚ ਸਕ੍ਕਾ’’ਤਿਆਦਿ. ਅਪਨੇਤ੍ਵਾਤਿ ਅਗ੍ਗਮਹੇਸਿਠਾਨਤੋ ਨੀਹਰਿਤ੍ਵਾ. ਅਤ੍ਤਨਿ ਛਨ੍ਦਰਾਗਵਸੇਨੇਵ ਬਹਿਦ੍ਧਾ ਆਰਮ੍ਮਣਪਰਿਯੇਸਨਾਤਿ ਵਿਸਯਿਨਿਸਾਰਾਗੋ ਸਤ੍ਤਾਨਂ ਵਿਸਯੇਸੁ ਸਾਰਾਗਸ੍ਸ ਬਲਵਕਾਰਣਨ੍ਤਿ ਦਸ੍ਸੇਨ੍ਤੋ ਆਹ ‘‘ਸਤ੍ਤਾਨਂ ਅਤ੍ਤਭਾਵੇ ਛਨ੍ਦਰਾਗੋ ਬਲਵਾ ਹੋਤੀ’’ਤਿ. ਅਨੁਰਕ੍ਖਿਤੁਂ ਨ ਸਕ੍ਕੋਤੀਤਿ ਸਮ੍ਮਾ ਗਬ੍ਭਪਰਿਹਾਰਂ ਨਾਨੁਯੁਞ੍ਜਤਿ. ਤੇਨ ਗਬ੍ਭੋ ਬਹ੍ਵਾਬਾਧੋ ਹੋਤਿ. ਵਤ੍ਥੁ ਵਿਸਦਂ ਹੋਤੀਤਿ ਗਬ੍ਭਾਸਯੋ ਵਿਸੁਦ੍ਧੋ ਹੋਤਿ. ਮਾਤੁ ਮਜ੍ਝਿਮਵਯਸ੍ਸ ਤਤਿਯਕੋਟ੍ਠਾਸੇ ਬੋਧਿਸਤ੍ਤਗਬ੍ਭੋਕ੍ਕਮਨਮ੍ਪਿ ਤਸ੍ਸਾ ਆਯੁਪਰਿਮਾਣਵਿਲੋਕਨੇਨੇਵ ਸਙ੍ਗਹਿਤਂ ਵਯੋਵਸੇਨ ਉਪ੍ਪਜ੍ਜਨਕਵਿਕਾਰਸ੍ਸ ਪਰਿਵਜ੍ਜਨਤੋ. ਇਤ੍ਥਿਸਭਾਵੇਨ ਉਪ੍ਪਜ੍ਜਨਕਵਿਕਾਰੋ ਪਨ ਬੋਧਿਸਤ੍ਤਸ੍ਸ ਆਨੁਭਾਵੇਨੇਵ ਵੂਪਸਮਤਿ.

੨੫. ਸਤ੍ਤਮਾਸਜਾਤੋਤਿ ਪਟਿਸਨ੍ਧਿਗ੍ਗਹਣਤੋ ਸਤ੍ਤਮੇ ਮਾਸੇ ਜਾਤੋ. ਸੋ ਸੀਤੁਣ੍ਹਕ੍ਖਮੋ ਨ ਹੋਤਿ ਅਤਿਵਿਯ ਸੁਖੁਮਾਲਤਾਯ. ਅਟ੍ਠਮਾਸਜਾਤੋ ਕਾਮਂ ਸਤ੍ਤਮਾਸਜਾਤਤੋ ਬੁਦ੍ਧਿਵਯਵਾ, ਏਕਚ੍ਚੇ ਪਨ ਚਮ੍ਮਪਦੇਸਾ ਵੁਦ੍ਧਿਂ ਪਾਪੁਣਨ੍ਤਾ ਘਟ੍ਟਨਂ ਨ ਸਹਨ੍ਤਿ, ਤੇਨ ਸੋ ਨ ਜੀਵਤਿ. ‘‘ਸਤ੍ਤਮਾਸਜਾਤਸ੍ਸ ਪਨ ਨ ਤਾਵ ਤੇ ਜਾਤਾ’’ਤਿ ਵਦਨ੍ਤਿ.

੨੭. ਦੇਵਾ ਪਠਮਂ ਪਟਿਗ੍ਗਣ੍ਹਨ੍ਤੀਤਿ ‘‘ਲੋਕਨਾਥਂ ਮਹਾਪੁਰਿਸਂ ਸਯਮੇਵ ਪਠਮਂ ਪਟਿਗ੍ਗਣ੍ਹਾਮਾ’’ਤਿ ਸਞ੍ਜਾਤਗਾਰਵਬਹੁਮਾਨਾ ਅਤ੍ਤਨੋ ਪੀਤਿਂ ਪਵੇਦੇਨ੍ਤਾ ਖੀਣਾਸਵਾ ਸੁਦ੍ਧਾਵਾਸਬ੍ਰਹ੍ਮਾਨੋ ਆਦਿਤੋ ਪਟਿਗ੍ਗਣ੍ਹਨ੍ਤਿ. ਸੂਤਿਵੇਸਨ੍ਤਿ ਸੂਤਿਜਗ੍ਗਨਧਾਤਿਵੇਸਂ. ਏਕੇਤਿ ਅਭਯਗਿਰਿਵਾਸਿਨੋ. ਮਚ੍ਛਕ੍ਖਿਸਦਿਸਂ ਛਵਿਵਸੇਨ. ਅਟ੍ਠਾਸਿ ਨ ਨਿਸੀਦਿ, ਨ ਨਿਪਜ੍ਜਿ ਵਾ. ਤੇਨ ਵੁਤ੍ਤਂ ‘‘ਠਿਤਾਵ ਬੋਧਿਸਤ੍ਤਂ ਬੋਧਿਸਤ੍ਤਮਾਤਾ ਵਿਜਾਯਤੀ’’ਤਿ. ਨਿਦ੍ਦੁਕ੍ਖਤਾਯ ਠਿਤਾ ਏਵ ਹੁਤ੍ਵਾ ਵਿਜਾਯਤਿ. ਦੁਕ੍ਖਸ੍ਸ ਹਿ ਬਲਵਭਾਵਤੋ ਤਂ ਦੁਕ੍ਖਂ ਅਸਹਮਾਨਾ ਅਞ੍ਞਾ ਇਤ੍ਥਿਯੋ ਨਿਸਿਨ੍ਨਾ ਵਾ ਨਿਪਨ੍ਨਾ ਵਾ ਵਿਜਾਯਨ੍ਤਿ.

੨੮. ਅਜਿਨਪ੍ਪਵੇਣਿਯਾਤਿ ਅਜਿਨਚਮ੍ਮੇਹਿ ਸਿਬ੍ਬਿਤ੍ਵਾ ਕਤਪਵੇਣਿਯਾ. ਮਹਾਤੇਜੋਤਿ ਮਹਾਨੁਭਾਵੋ. ਮਹਾਯਸੋਤਿ ਮਹਾਪਰਿਵਾਰੋ, ਵਿਪੁਲਕਿਤ੍ਤਿਘੋਸੋ ਚ.

੨੯. ਭਗ੍ਗਵਿਭਗ੍ਗਾਤਿ ਸਮ੍ਬਾਧਟ੍ਠਾਨਤੋ ਨਿਕ੍ਖਮਨੇਨ ਵਿਭਾਵਿਤਤ੍ਤਾ ਭਗ੍ਗਾ, ਵਿਭਗ੍ਗਾ ਵਿਯ ਚ ਹੁਤ੍ਵਾ, ਤੇਨ ਨੇਸਂ ਅਵਿਸਦਭਾਵਮੇਵ ਦਸ੍ਸੇਤਿ. ਅਲਗ੍ਗੋ ਹੁਤ੍ਵਾਤਿ ਗਬ੍ਭਾਸਯੇ, ਯੋਨਿਪਦੇਸੇ ਚ ਕਤ੍ਥਚਿ ਅਲਗ੍ਗੋ ਅਸਤ੍ਤੋ ਹੁਤ੍ਵਾ, ਯਤੋ ‘‘ਧਮਕਰਣਤੋ ਉਦਕਨਿਕ੍ਖਮਨਸਦਿਸ’’ਨ੍ਤਿ ਵੁਤ੍ਤਂ. ਉਦਕੇਨਾਤਿ ਗਬ੍ਭਾਸਯਗਤੇਨ ਉਦਕੇਨ. ਅਮਕ੍ਖਿਤੋਵ ਨਿਕ੍ਖਮਤਿ ਸਮ੍ਮਕ੍ਖਿਤਸ੍ਸ ਤਾਦਿਸਸ੍ਸ ਉਦਕਸੇਮ੍ਹਾਦਿਕਸ੍ਸੇਵ ਤਤ੍ਥ ਅਭਾਵਤੋ. ਬੋਧਿਸਤ੍ਤਸ੍ਸ ਹਿ ਪੁਞ੍ਞਾਨੁਭਾਵਤੋ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਤਂ ਠਾਨਂ ਪੁਬ੍ਬੇਪਿ ਵਿਸੁਦ੍ਧਂ ਵਿਸੇਸਤੋ ਪਰਮਸੁਗਨ੍ਧਗਨ੍ਧਕੁਟਿ ਵਿਯ ਚਨ੍ਦਨਗਨ੍ਧਂ ਵਾਯਨ੍ਤਂ ਤਿਟ੍ਠਤਿ.

ਉਦਕਵਟ੍ਟਿਯੋਤਿ ਉਦਕਕ੍ਖਨ੍ਧਾ.

੩੧. ਮੁਹੁਤ੍ਤਜਾਤੋਤਿ ਮੁਹੁਤ੍ਤੇਨ ਜਾਤੋ ਹੁਤ੍ਵਾ ਮੁਹੁਤ੍ਤਮਤ੍ਤੋਵ. ਅਨੁਧਾਰਿਯਮਾਨੇਤਿ ਅਨੁਕੂਲਵਸੇਨ ਨੀਯਮਾਨੇ. ਆਗਤਾਨੇਵਾਤਿ ਤਂ ਠਾਨਂ ਉਪਗਤਾਨਿ ਏਵ. ਅਨੇਕਸਾਖਨ੍ਤਿ ਰਤਨਮਯਾਨੇਕਸਤਪਤਿਟ੍ਠਾਨਹੀਰਕਂ. ਸਹਸ੍ਸਮਣ੍ਡਲਨ੍ਤਿ ਤੇਸਂ ਉਪਰਿਟ੍ਠਿਤਂ ਅਨੇਕਸਹਸ੍ਸਮਣ੍ਡਲਹੀਰਕਂ. ਮਰੂਤਿ ਦੇਵਾ. ਨ ਖੋ ਪਨਏਵਂ ਦਟ੍ਠਬ੍ਬਂ ਪਦਵੀਤਿਹਾਰਤੋ ਪਗੇਵ ਦਿਸਾਵਿਲੋਕਨਸ੍ਸ ਕਤਤ੍ਤਾ. ਤੇਨਾਹ ‘‘ਮਹਾਸਤ੍ਤੋ ਹੀ’’ਤਿਆਦਿ. ਏਕਙ੍ਗਣਾਨੀਤਿ ਵਿਵਟਭਾਵੇਨ ਵਿਹਾਰਙ੍ਗਣਪਰਿਵੇਣਙ੍ਗਣਾਨਿ ਵਿਯ ਏਕਙ੍ਗਣਸਦਿਸਾਨਿ ਅਹੇਸੁਂ. ਸਦਿਸੋਪਿ ਨਤ੍ਥੀਤਿ ਤੁਮ੍ਹਾਕਂ ਇਦਂ ਵਿਲੋਕਨਂ ਵਿਸਿਟ੍ਠੇ ਪਸ੍ਸਿਤੁਂ ‘‘ਇਧ ਤੁਮ੍ਹੇਹਿ ਸਦਿਸੋਪਿ ਨਤ੍ਥਿ, ਕੁਤੋ ਉਤ੍ਤਰਿਤਰੋ’’ਤਿ ਆਹਂਸੁ. ਅਗ੍ਗੋਤਿ ਪਧਾਨੋ, ਕੇਨ ਪਨਸ੍ਸ ਪਧਾਨਤਾਤਿ ਆਹ ‘‘ਗੁਣੇਹੀ’’ਤਿ. ਪਠਮ-ਸਦ੍ਦੋ ਚੇਤ੍ਥ ਪਧਾਨਪਰਿਯਾਯੋ. ਬੋਧਿਸਤ੍ਤਸ੍ਸ ਪਨ ਪਧਾਨਤਾ ਅਨਞ੍ਞਸਾਧਾਰਣਾਤਿ ਆਹ ‘‘ਸਬ੍ਬਪਠਮੋ’’ਤਿ, ਸਬ੍ਬਪਧਾਨੋਤਿ ਅਤ੍ਥੋ. ਏਤਸ੍ਸੇਵਾਤਿ ਅਗ੍ਗਸਦ੍ਦਸ੍ਸੇਵ. ਏਤ੍ਥ ਚ ਮਹੇਸਕ੍ਖਾ ਤਾਵ ਦੇਵਾ ਤਥਾ ਚ ਵਦਨ੍ਤਿ, ਇਤਰੇ ਪਨ ਕਥਨ੍ਤਿ? ਮਹਾਸਤ੍ਤਸ੍ਸ ਆਨੁਭਾਵਦਸ੍ਸਨਾਦਿਨਾ. ਮਹੇਸਕ੍ਖਾਨਞ੍ਹਿ ਦੇਵਾਨਂ ਮਹਾਸਤ੍ਤਸ੍ਸ ਆਨੁਭਾਵੋ ਵਿਯ ਤੇਨ ਸਦਿਸਾਨਮ੍ਪਿ ਆਨੁਭਾਵੋ ਪਚ੍ਚਕ੍ਖੋ ਅਹੋਸੀਤਿ, ਇਤਰੇ ਪਨ ਤੇਸਂ ਵਚਨਂ ਸੁਤ੍ਵਾ ਸਦ੍ਦਹਨ੍ਤਾ ਅਨੁਮਿਨਨ੍ਤਾ ਤਥਾ ਆਹਂਸੁ. ਪਰਿਪਾਕਗਤਪੁਬ੍ਬਹੇਤੁਸਂਸਿਦ੍ਧਾਯ ਧਮ੍ਮਤਾਯ ਚੋਦਿਯਮਾਨੋ ਇਮਸ੍ਮਿਂ…ਪੇ… ਬ੍ਯਾਕਾਸਿ.

ਜਾਤਮਤ੍ਤਸ੍ਸੇਵ ਬੋਧਿਸਤ੍ਤਸ੍ਸ ਠਾਨਾਦੀਨਿ ਯੇਸਂ ਵਿਸੇਸਾਧਿਗਮਾਨਂ ਪੁਬ੍ਬਨਿਮਿਤ੍ਤਭੂਤਾਨੀਤਿ ਤੇ ਨਿਦ੍ਧਾਰੇਤ੍ਵਾ ਦਸ੍ਸੇਨ੍ਤੋ ‘‘ਏਤ੍ਥ ਚਾ’’ਤਿਆਦਿਮਾਹ. ਤਤ੍ਥ ਪਤਿਟ੍ਠਾਨਂ ਚਤੁਰਿਦ੍ਧਿਪਾਦਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ ਇਦ੍ਧਿਪਾਦਵਸੇਨ ਲੋਕੁਤ੍ਤਰਧਮ੍ਮੇਸੁ ਸੁਪ੍ਪਤਿਟ੍ਠਿਤਭਾਵਸਮਿਜ੍ਝਨਤੋ. ਉਤ੍ਤਰਾਭਿਮੁਖਭਾਵੋ ਲੋਕਸ੍ਸ ਉਤ੍ਤਰਣਵਸੇਨ ਗਮਨਸ੍ਸ ਪੁਬ੍ਬਨਿਮਿਤ੍ਤਂ. ਤੇਨ ਹਿ ਭਗਵਾ ਸਦੇਵਕਸ੍ਸ ਲੋਕਸ੍ਸ ਅਭਿਭੂਤੋ, ਕੇਨਚਿ ਅਨਭਿਭੂਤੋ ਅਹੋਸਿ. ਤੇਨਾਹ ‘‘ਮਹਾਜਨਂ ਅਜ੍ਝੋਤ੍ਥਰਿਤ੍ਵਾ ਅਭਿਭਵਿਤ੍ਵਾ ਗਮਨਸ੍ਸ ਪੁਬ੍ਬਨਿਮਿਤ੍ਤ’’ਨ੍ਤਿ. ਤਥਾ ਸਤ੍ਤਪਦਗਮਨਂ ਸਤ੍ਤਪਦਬੋਜ੍ਝਙ੍ਗਸਮ੍ਪਨ੍ਨਅਰਿਯਮਗ੍ਗਗਮਨਸ੍ਸ. ਸੁਵਿਸੁਦ੍ਧਸੇਤਚ੍ਛਤ੍ਤਧਾਰਣਂ ਸੁਵਿਸੁਦ੍ਧਵਿਮੁਤ੍ਤਿਛਤ੍ਤਧਾਰਣਸ੍ਸ. ਪਞ੍ਚਰਾਜਕਕੁਧਭਣ੍ਡਸਮਾਯੋਗੋ ਪਞ੍ਚਵਿਧਵਿਮੁਤ੍ਤਿਗੁਣਸਮਾਯੋਗਸ੍ਸ. ਅਨਾਵਟਦਿਸਾਨੁਵਿਲੋਕਨਂ ਅਨਾਵਟਞਾਣਤਾਯ. ‘‘ਅਗ੍ਗੋਹਮਸ੍ਮੀ’’ਤਿਆਦਿਨਾ ਅਛਮ੍ਭਿਤਵਾਚਾਭਾਸਨਂ ਕੇਨਚਿ ਅਵਿਬਨ੍ਧਨੀਯਤਾਯ ਅਪ੍ਪਵਤ੍ਤਿਯਸ੍ਸ ਸਦ੍ਧਮ੍ਮਚਕ੍ਕਪ੍ਪਵਤ੍ਤਨਸ੍ਸ. ‘‘ਅਯਮਨ੍ਤਿਮਾ ਜਾਤੀ’’ਤਿ ਆਯਤਿਂ ਜਾਤਿਯਾ ਅਭਾਵਕਿਤ੍ਤਨਾ ਅਨੁਪਾਦਿ…ਪੇ… ਪੁਬ੍ਬਨਿਮਿਤ੍ਤਨ੍ਤਿ ਵੇਦਿਤਬ੍ਬਂ ਤਸ੍ਸ ਤਸ੍ਸ ਅਨਾਗਤੇ ਲਦ੍ਧਬ੍ਬਵਿਸੇਸਸ੍ਸ ਤਂ ਤਂ ਨਿਮਿਤ੍ਤਂ ਅਬ੍ਯਭਿਚਾਰੀਤਿ ਕਤ੍ਵਾ. ਨ ਆਗਤੋਤਿ ਇਮਸ੍ਮਿਂ ਸੁਤ੍ਤੇ, ਅਞ੍ਞਤ੍ਥ ਚ ਵਕ੍ਖਮਾਨਾਯ ਅਨੁਪੁਬ੍ਬਿਯਾ ਨ ਆਗਤੋ. ਆਹਰਿਤ੍ਵਾਤਿ ਤਸ੍ਮਿਂ ਤਸ੍ਮਿਂ ਸੁਤ੍ਤੇ, ਅਟ੍ਠਕਥਾਸੁ ਚ ਆਗਤਨਯੇਨ ਆਹਰਿਤ੍ਵਾ ਦੀਪੇਤਬ੍ਬੋ.

‘‘ਦਸਸਹਸ੍ਸਿਲੋਕਧਾਤੁ ਕਮ੍ਪੀ’’ਤਿ ਇਦਂ ਸਤਿਪਿ ਇਧ ਪਾਲ਼ਿਯਂ ਆਗਤਤ੍ਤੇ ਵਕ੍ਖਮਾਨਾਨਂ ਅਚ੍ਛਰਿਯਾਨਂ ਮੂਲਭੂਤਂ ਦਸ੍ਸੇਤੁਂ ਵੁਤ੍ਤਂ, ਏਵਂ ਅਞ੍ਞਮ੍ਪਿ ਏਵਰੂਪਂ ਦਟ੍ਠਬ੍ਬਂ. ਤਨ੍ਤਿਬਦ੍ਧਾ ਵੀਣਾ ਚਮ੍ਮਬਦ੍ਧਾ ਭੇਰਿਯੋਤਿ ਪਞ੍ਚਙ੍ਗਿਕਤੂਰਿਯਸ੍ਸ ਨਿਦਸ੍ਸਨਮਤ੍ਤਂ, ਚ-ਸਦ੍ਦੇਨ ਵਾ ਇਤਰੇਸਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ‘‘ਅਨ੍ਦੁਬਨ੍ਧਨਾਦੀਨਿ ਤਙ੍ਖਣੇ ਏਵ ਛਜ੍ਜਿਤ੍ਵਾ ਪੁਨ ਪਾਕਤਿਕਾਨੇਵ ਹੋਨ੍ਤਿ, ਤਥਾ ਜਚ੍ਚਨ੍ਧਾਦੀਨਂ ਚਕ੍ਖੁਸੋਤਾਦੀਨਿ ਤਥਾਰੂਪਕਮ੍ਮਪਚ੍ਚਯਾ ਤਸ੍ਮਿਂਯੇਵ ਖਣੇ ਉਪ੍ਪਜ੍ਜਿਤ੍ਵਾ ਤਾਵਦੇਵ ਵਿਗਚ੍ਛਨ੍ਤੀ’’ਤਿ ਵਦਨ੍ਤਿ. ਛਿਜ੍ਜਿਂਸੂਤਿ ਚ ਪਾਦੇਸੁ ਬਨ੍ਧਟ੍ਠਾਨੇਸੁ ਛਿਜ੍ਜਿਂਸੁ. ਵਿਗਚ੍ਛਿਂਸੂਤਿ ਵੂਪਸਮਿਂਸੁ. ਆਕਾਸਟ੍ਠਕਰਤਨਾਨਿ ਨਾਮ ਤਂਤਂਵਿਮਾਨਗਤਮਣਿਰਤਨਾਦੀਨਿ. ਸਕਤੇਜੋਭਾਸਿਤਾਨੀਤਿ ਅਤਿਵਿਯ ਸਮੁਜ੍ਜਲਾਯ ਅਤ੍ਤਨੋ ਪਭਾਯ ਓਭਾਸਿਤਾਨਿ ਅਹੇਸੁਂ. ਨਪ੍ਪਵਤ੍ਤੀਤਿ ਨ ਸਨ੍ਨਿਪਾਤੋ. ਨ ਵਾਯੀਤਿ ਖਰੋ ਵਾਤੋ ਨ ਵਾਯਿ. ਮੁਦੁਸੁਖੋ ਪਨ ਸਤ੍ਤਾਨਂ ਸੁਖਾਵਹੋ ਵਾਯਿ. ਪਥਵਿਗਤਾ ਅਹੇਸੁਂ ਉਚ੍ਚਟ੍ਠਾਨੇ ਠਾਤੁਂ ਅਵਿਸਹਨ੍ਤਾ. ਉਤੁਸਮ੍ਪਨ੍ਨੋਤਿ ਅਨੁਣ੍ਹਾਸੀਤਤਾਸਙ੍ਖਾਤੇਨ ਉਤੁਨਾ ਸਮ੍ਪਨ੍ਨੋ. ਅਪ੍ਫੋਟਨਂ ਵੁਚ੍ਚਤਿ ਭੁਜਹਤ੍ਥਸਙ੍ਘਟ੍ਟਨਸਦ੍ਦੋ, ਅਤ੍ਥਤੋ ਪਨ ਵਾਮਹਤ੍ਥਂ ਉਰੇ ਠਪੇਤ੍ਵਾ ਦਕ੍ਖਿਣੇਨ ਪੁਥੁਪਾਣਿਨਾ ਹਤ੍ਥਤਾਲ਼ਨੇਨ ਸਦ੍ਦਕਰਣਂ. ਮੁਖੇਨ ਉਸ੍ਸੇਲ਼ਨਂ ਸਦ੍ਦਸ੍ਸ ਮੁਞ੍ਚਨਂ ਸੇਲ਼ਨਂ. ਏਕਦ੍ਧਜਮਾਲਾ ਅਹੋਸਿ ਨਿਰਨ੍ਤਰਂ ਧਜਮਾਲਾਸਮੋਧਾਨਗਤਾਯ. ਨ ਕੇਵਲਞ੍ਚ ਏਤਾਨਿ ਏਵ, ਅਥ ਖੋ ਅਞ੍ਞਾਨਿਪਿ ‘‘ਵਿਚਿਤ੍ਤਪੁਪ੍ਫਸੁਗਨ੍ਧਪੁਪ੍ਫਵਸ੍ਸਦੇਵੋਪਵਸ੍ਸਿ ਸੂਰਿਯੇ ਦਿਸ੍ਸਮਾਨੇ ਏਵ ਤਾਰਕਾ ਓਭਾਸਿਂਸੁ, ਅਚ੍ਛਂ ਵਿਪ੍ਪਸਨ੍ਨਂ ਉਦਕਂ ਪਥਵਿਤੋ ਉਬ੍ਭਿਜ੍ਜਿ, ਬਿਲਾਸਯਾ ਚ ਤਿਰਚ੍ਛਾਨਾ ਆਸਯਤੋ ਨਿਕ੍ਖਮਿਂਸੁ, ਰਾਗਦੋਸਮੋਹਾਪਿ ਤਨੁ ਭਵਿਂਸੁ, ਪਥਵਿਯਂ ਰਜੋ ਵੂਪਸਮਿ, ਅਨਿਟ੍ਠਗਨ੍ਧੋ ਵਿਗਚ੍ਛਿ, ਦਿਬ੍ਬਗਨ੍ਧੋ ਵਾਯਿ, ਰੂਪਿਨੋ ਦੇਵਾ ਸਰੂਪੇਨੇਵ ਮਨੁਸ੍ਸਾਨਂ ਆਪਾਥਂ ਅਗਮਂਸੁ, ਸਤ੍ਤਾਨਂ ਚੁਤੂਪਪਾਤਾ ਨਾਹੇਸੁ’’ਨ੍ਤਿ ਏਵਮਾਦੀਨਿ ਯਾਨਿ ਮਹਾਭਿਨੀਹਾਰਸਮਯੇ ਉਪ੍ਪਨ੍ਨਾਨਿ ਦ੍ਵਤ੍ਤਿਂਸਪੁਬ੍ਬਨਿਮਿਤ੍ਤਾਨਿ, ਤਾਨਿ ਅਨਵਸੇਸਤੋ ਤਦਾ ਅਹੇਸੁਨ੍ਤਿ.

ਤਤ੍ਰਾਪੀਤਿ ਤੇਸੁਪਿ ਪਥਵਿਕਮ੍ਪਾਦੀਸੁ ਏਵਂ ਪੁਬ੍ਬਨਿਮਿਤ੍ਤਭਾਵੋ ਵੇਦਿਤਬ੍ਬੋ. ਨ ਕੇਵਲਂ ਸਮ੍ਪਤਿਜਾਤਸ੍ਸ ਠਾਨਾਦੀਸੁ ਏਵਾਤਿ ਅਧਿਪ੍ਪਾਯੋ. ਸਬ੍ਬਞ੍ਞੁਤਞ੍ਞਾਣਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ ਸਬ੍ਬਸ੍ਸ ਞੇਯ੍ਯਸ੍ਸ, ਤਿਤ੍ਥਕਰਮਤਸ੍ਸ ਚ ਚਾਲਨਤੋ. ਕੇਨਚਿ ਅਨੁਸ੍ਸਾਹਿਤਾਨਂਯੇਵ ਇਮਸ੍ਮਿਂਯੇਵ ਏਕਚਕ੍ਕਵਾਲ਼ੇ ਸਨ੍ਨਿਪਾਤੋ ਕੇਨਚਿ ਅਨੁਸ੍ਸਾਹਿਤਾਨਂਯੇਵ ਏਕਪ੍ਪਹਾਰੇਨੇਵ ਸਨ੍ਨਿਪਤਿਤ੍ਵਾ ਧਮ੍ਮਪਟਿਗ੍ਗਣ੍ਹਨਸ੍ਸ ਪੁਬ੍ਬਨਿਮਿਤ੍ਤਂ. ਪਠਮਂ ਦੇਵਤਾਨਂ ਪਟਿਗ੍ਗਹਣਂ ਦਿਬ੍ਬਵਿਹਾਰਪਟਿਲਾਭਸ੍ਸ, ਪਚ੍ਛਾ ਮਨੁਸ੍ਸਾਨਂ ਪਟਿਗ੍ਗਹਣਂ ਤਤ੍ਥੇਵ ਠਾਨਸ੍ਸ ਨਿਚ੍ਚਲਸਭਾਵਤੋ ਆਨੇਞ੍ਜਵਿਹਾਰਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ. ਵੀਣਾਨਂ ਸਯਂ ਵਜ੍ਜਨਂ ਪਰੂਪਦੇਸੇਨ ਵਿਨਾ ਸਯਮੇਵ ਅਨੁਪੁਬ੍ਬਵਿਹਾਰਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ. ਭੇਰੀਨਂ ਵਜ੍ਜਨਂ ਚਕ੍ਕਵਾਲ਼ਪਰਿਯਨ੍ਤਾਯ ਪਰਿਸਾਯ ਪਵੇਦਨਸਮਤ੍ਥਸ੍ਸ ਧਮ੍ਮਭੇਰਿਯਾ ਅਨੁਸਾਵਨਸ੍ਸ ਅਮਤਦੁਨ੍ਦੁਭਿਘੋਸਨਸ੍ਸ ਪੁਬ੍ਬਨਿਮਿਤ੍ਤਂ. ਅਨ੍ਦੁਬਨ੍ਧਨਾਦੀਨਂ ਛੇਦੋ ਮਾਨਵਿਨਿਬਨ੍ਧਭੇਦਨਸ੍ਸ ਪੁਬ੍ਬਨਿਮਿਤ੍ਤਂ. ਮਹਾਜਨਸ੍ਸ ਰੋਗਵਿਗਮੋ ਤਸ੍ਸੇਵ ਸਕਲਵਟ੍ਟਦੁਕ੍ਖਰੋਗਵਿਗਮਭੂਤਸ੍ਸ ਸਚ੍ਚਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ. ‘‘ਮਹਾਜਨਸ੍ਸਾ’’ਤਿ ਪਦਂ ‘‘ਮਹਾਜਨਸ੍ਸ ਦਿਬ੍ਬਚਕ੍ਖੁਪਟਿਲਾਭਸ੍ਸ, ਮਹਾਜਨਸ੍ਸ ਦਿਬ੍ਬਸੋਤਧਾਤੁਪਟਿਲਾਭਸ੍ਸਾ’’ਤਿਆਦਿਨਾ ਤਤ੍ਥ ਤਤ੍ਥ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਇਦ੍ਧਿਪਾਦਭਾਵਨਾਵਸੇਨ ਸਾਤਿਸਯਞਾਣਜਵਸਮ੍ਪਤ੍ਤਿਸਿਦ੍ਧੀਤਿ ਆਹ ‘‘ਪੀਠਸਪ੍ਪੀਨਂ ਜਵਸਮ੍ਪਦਾ ਚਤੁਰਿਦ੍ਧਿਪਾਦਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤ’’ਨ੍ਤਿ. ਸੁਪਟ੍ਟਨਸਮ੍ਪਾਪੁਣਨਂ ਚਤੁਪਟਿਸਮ੍ਭਿਦਾਧਿਗਮਸ੍ਸ ਪੁਬ੍ਬਨਿਮਿਤ੍ਤਂ. ਅਤ੍ਥਾਦਿਅਨੁਰੂਪਂ ਅਤ੍ਥਾਦੀਸੁ ਸਮ੍ਪਟਿਪਤ੍ਤਿਭਾਵਤੋ. ਰਤਨਾਨਂ ਸਕਤੇਜੋਭਾਸਿਤਤ੍ਤਂ ਯਂ ਲੋਕਸ੍ਸ ਧਮ੍ਮੋਭਾਸਂ ਦਸ੍ਸੇਸ੍ਸਤਿ, ਤੇਨ ਤਸ੍ਸ ਸਕਤੇਜੋਭਾਸਿਤਤ੍ਤਸ੍ਸ ਪੁਬ੍ਬਨਿਮਿਤ੍ਤਂ.

ਚਤੁਬ੍ਰਹ੍ਮਵਿਹਾਰਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ ਤਸ੍ਸ ਸਬ੍ਬਸੋ ਵੇਰਵੂਪਸਮਨਤੋ. ਏਕਾਦਸਅਗ੍ਗਿਨਿਬ੍ਬਾਪਨਸ੍ਸ ਪੁਬ੍ਬਨਿਮਿਤ੍ਤਂ ਦੁਨ੍ਨਿਬ੍ਬਾਪਨਨਿਬ੍ਬਾਨਭਾਵਤੋ. ਞਾਣਾਲੋਕਾਦਸ੍ਸਨਸ੍ਸ ਪੁਬ੍ਬਨਿਮਿਤ੍ਤਂ ਅਨਾਲੋਕੇ ਆਲੋਕਦਸ੍ਸਨਭਾਵਤੋ. ਨਿਬ੍ਬਾਨਰਸੇਨਾਤਿ ਕਿਲੇਸਾਨਂ ਨਿਬ੍ਬਾਯਨਰਸੇਨ. ਏਕਰਸਭਾਵਸ੍ਸਾਤਿ ਸਾਸਨਸ੍ਸ ਸਬ੍ਬਤ੍ਥ ਏਕਰਸਭਾਵਸ੍ਸ, ਤਞ੍ਚ ਖੋ ਅਮਧੁਰਸ੍ਸ ਲੋਕਸ੍ਸ ਸਬ੍ਬਸੋ ਮਧੁਰਭਾਵਾਪਾਦਨੇਨ. ਦ੍ਵਾਸਟ੍ਠਿਦਿਟ੍ਠਿਗਤਭਿਨ੍ਦਨਸ੍ਸ ਪੁਬ੍ਬਨਿਮਿਤ੍ਤਂ ਸਬ੍ਬਸੋ ਦਿਟ੍ਠਿਗਤਵਾਤਾਪਨਯਨਵਸੇਨ. ਆਕਾਸਾਦਿਅਪ੍ਪਤਿਟ੍ਠਵਿਸਮਚਞ੍ਚਲਟ੍ਠਾਨਂ ਪਹਾਯ ਸਕੁਣਾਨਂ ਪਥਵਿਗਮਨਂ ਤਾਦਿਸਂ ਮਿਚ੍ਛਾਗਾਹਂ ਪਹਾਯ ਸਤ੍ਤਾਨਂ ਪਾਣੇਹਿ ਰਤਨਤ੍ਤਯਸਰਣਗਮਨਸ੍ਸ ਪੁਬ੍ਬਨਿਤ੍ਤਂ. ਬਹੁਜਨਕਨ੍ਤਤਾਯਾਤਿ ਚਨ੍ਦਸ੍ਸ ਵਿਯ ਬਹੁਜਨਸ੍ਸ ਕਨ੍ਤਤਾਯ. ਸੂਰਿਯਸ੍ਸ ਉਣ੍ਹਸੀਤਵਿਵਜ੍ਜਿਤਉਤੁਸੁਖਤਾ ਪਰਿਲ਼ਾਹਵਿਵਜ੍ਜਿਤਕਾਯਿਕਚੇਤਸਿਕਸੁਖਪ੍ਪਤ੍ਤਿਯਾ ਪੁਬ੍ਬਨਿਮਿਤ੍ਤਂ.ਦੇਵਤਾਨਂ ਅਪ੍ਫੋਟਨਾਦੀਹਿ ਕੀਲ਼ਨਂ ਪਮੋਦੁਪ੍ਪਤ੍ਤਿ ਭਵਨ੍ਤਗਮਨੇਨ, ਧਮ੍ਮਸਭਾਵਬੋਧਨੇਨ ਚ ਉਦਾਨਵਸੇਨ ਪਮੋਦਵਿਭਾਵਨਸ੍ਸ ਪੁਬ੍ਬਨਿਮਿਤ੍ਤਂ. ਧਮ੍ਮਵੇਗਵਸ੍ਸਨਸ੍ਸਾਤਿ ਦੇਸਨਾਞਾਣਵੇਗੇਨ ਧਮ੍ਮਾਮਤਸ੍ਸ ਵਸ੍ਸਨਸ੍ਸ ਪੁਬ੍ਬਨਿਮਿਤ੍ਤਂ. ਕਾਯਗਤਾਸਤਿਵਸੇਨ ਲਦ੍ਧਂ ਝਾਨਂ ਪਾਦਕਂ ਕਤ੍ਵਾ ਉਪ੍ਪਾਦਿਤਮਗ੍ਗਫਲਸੁਖਾਨੁਭਵੋ ਕਾਯਗਤਾਸਤਿਅਮਤਪਟਿਲਾਭੋ, ਤਸ੍ਸ ਪਨ ਕਾਯਸ੍ਸਾਪਿ ਅਤਪ੍ਪਕਸੁਖਾਵਹਤ੍ਤਾ ਖੁਦਾਪਿਪਾਸਾਪੀਲ਼ਨਾਭਾਵੋ ਪੁਬ੍ਬਨਿਮਿਤ੍ਤਂ ਵੁਤ੍ਤੋ. ਅਟ੍ਠਕਥਾਯਂਪਨ ਖੁਦਂ, ਪਿਪਾਸਞ੍ਚ ਭਿਨ੍ਦਿਤ੍ਵਾ ਵੁਤ੍ਤਂ. ਤਤ੍ਥ ਪੁਬ੍ਬਨਿਮਿਤ੍ਤਾਨਂ ਭੇਦੋ ਵਿਸੇਸਸਾਮਞ੍ਞਵਿਭਾਗੇਨ, ਗੋਬਲੀਬਦ੍ਦਞਾਯੇਨ ਚ ਗਹੇਤਬ੍ਬੋ. ‘‘ਸਯਮੇਵਾ’’ਤਿ ਪਦਂ ‘‘ਅਟ੍ਠਙ੍ਗਿਕਮਗ੍ਗਦ੍ਵਾਰਵਿਵਰਣਸ੍ਸਾ’’ਤਿ ਏਤ੍ਥਾਪਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਭਰਿਤਭਾਵਸ੍ਸਾਤਿ ਪਰਿਪੁਣ੍ਣਭਾਵਸ੍ਸ. ‘‘ਅਰਿਯਦ੍ਧਜਮਾਲਾਮਾਲਿਤਾਯਾਤਿ ਕਾਸਾਯਦ੍ਧਜਮਾਲਾਵਨ੍ਤਤਾਯਾ’’ਤਿ ਕੇਚਿ, ਸਦੇਵਕਸ੍ਸ ਲੋਕਸ੍ਸ ਪਨ ਅਰਿਯਮਗ੍ਗਬੋਜ੍ਝਙ੍ਗਦ੍ਧਜਮਾਲਾਹਿ ਮਾਲਿਭਾਵਸ੍ਸ ਪੁਬ੍ਬਨਿਮਿਤ੍ਤਂ. ਯਂ ਪਨੇਤ੍ਥ ਅਨੁਦ੍ਧਟਂ, ਤਂ ਸੁਵਿਞ੍ਞੇਯ੍ਯਮੇਵ.

ਏਤ੍ਥਾਤਿ ‘‘ਸਮ੍ਪਤਿਜਾਤੋ’’ਤਿਆਦਿਨਾ ਆਗਤੇ ਇਮਸ੍ਮਿਂ ਵਾਰੇ. ਵਿਸ੍ਸਜ੍ਜਿਤੋਵ, ਤਸ੍ਮਾ ਅਮ੍ਹੇਹਿ ਇਧ ਅਪੁਬ੍ਬਂ ਵਤ੍ਤਬ੍ਬਂ ਨਤ੍ਥੀਤਿ ਅਧਿਪ੍ਪਾਯੋ. ਤਦਾ ਪਥਵਿਯਂ ਗਚ੍ਛਨ੍ਤੋਪਿ ਮਹਾਸਤ੍ਤੋ ਆਕਾਸੇਨ ਗਚ੍ਛਨ੍ਤੋ ਵਿਯ ਮਹਾਜਨਸ੍ਸ ਤਥਾ ਉਪਟ੍ਠਾਸੀਤਿ ਅਯਮੇਤ੍ਥ ਨਿਯਤਿ ਧਮ੍ਮਨਿਯਾਮੋ ਬੋਧਿਸਤ੍ਤਾਨਂ ਧਮ੍ਮਤਾ ਤਿ ਇਦਂ ਨਿਯਤਿਵਾਦਵਸੇਨ ਕਥਨਂ. ਪੁਬ੍ਬੇ ਪੁਰਿਮਜਾਤੀਸੁ ਤਾਦਿਸਸ੍ਸ ਪੁਞ੍ਞਸਮ੍ਭਾਰਕਮ੍ਮਸ੍ਸ ਕਤਤ੍ਤਾ ਉਪਚਿਤਤ੍ਤਾ ਮਹਾਜਨਸ੍ਸ ਤਥਾ ਉਪਟ੍ਠਾਸੀਤਿ ਇਦਂ ਪੁਬ੍ਬੇਕਤਕਮ੍ਮਵਾਦਵਸੇਨ ਕਥਨਂ. ਇਮੇਸਂ ਸਤ੍ਤਾਨਂ ਉਪਰਿ ਈਸਨਸੀਲਤਾਯ ਯਥਾਸਕਂ ਕਮ੍ਮਮੇਵ ਇਸ੍ਸਰੋ ਨਾਮ, ਤਸ੍ਸ ਨਿਮ੍ਮਾਨਂ ਅਤ੍ਤਨੋ ਫਲਸ੍ਸ ਨਿਬ੍ਬਤ੍ਤਨਂ ਮਹਾਪੁਰਿਸੋਪਿ ਸਦੇਵਕਂ ਲੋਕਂ ਅਭਿਭਵਿਤੁਂ ਸਮਤ੍ਥੇਨ ਉਲ਼ਾਰੇਨ ਪੁਞ੍ਞਕਮ੍ਮੇਨ ਨਿਬ੍ਬਤ੍ਤਿਤੋ, ਤੇਨ ਇਸ੍ਸਰੇਨ ਨਿਮ੍ਮਿਤੋ ਨਾਮ, ਤਸ੍ਸ ਚਾਯਂ ਨਿਮ੍ਮਾਨਵਿਸੇਸੋ, ਯਦਿਦਂ ਮਹਾਨੁਭਾਵਤਾ, ਯਾਯ ਮਹਾਜਨਸ੍ਸ ਤਥਾ ਉਪਟ੍ਠਾਸੀਤਿ ਇਦਂ ਇਸ੍ਸਰਨਿਮ੍ਮਾਨਵਸੇਨ ਕਥਨਂ. ਏਵਂ ਤਂ ਤਂ ਬਹੁਲਂ ਵਤ੍ਵਾ ਕਿਂ ਇਮਾਯ ਪਰਿਯਾਯਕਥਾਯਾਤਿ ਅਵਸਾਨੇ ਉਜੁਕਮੇਵ ਬ੍ਯਾਕਰਿ. ਸਮ੍ਪਤਿਜਾਤੋ ਪਥਵਿਯਂ ਕਥਂ ਪਦਸਾ ਗਚ੍ਛਤਿ, ਏਵਂ ਮਹਾਨੁਭਾਵੋ ਆਕਾਸੇਨ ਮਞ੍ਞੇ ਗਚ੍ਛਤੀਤਿ ਪਰਿਕਪ੍ਪਨਵਸੇਨ ਆਕਾਸੇਨ ਗਚ੍ਛਨ੍ਤੋ ਵਿਯ ਅਹੋਸਿ. ਸੀਘਤਰਂ ਪਨ ਸਤ੍ਤਪਦਵੀਤਿਹਾਰੇਨ ਗਤਤ੍ਤਾ ਦਿਸ੍ਸਮਾਨਰੂਪੋਪਿ ਮਹਾਜਨਸ੍ਸ ਅਦਿਸ੍ਸਮਾਨੋ ਵਿਯ ਅਹੋਸਿ. ਅਚੇਲਕਭਾਵੋ, ਖੁਦ੍ਦਕਸਰੀਰਤਾ ਚ ਤਾਦਿਸਸ੍ਸ ਇਰਿਯਾਪਥਸ੍ਸ ਨ ਅਨੁਚ੍ਛਵਿਕਾਤਿ ਕਮ੍ਮਾਨੁਭਾਵਸਞ੍ਜਨਿਤਪਾਟਿਹਾਰਿਯਵਸੇਨ ਅਲਙ੍ਕਤਪਟਿਯਤ੍ਤੋ ਵਿਯ, ਸੋਲ਼ਸਵਸ੍ਸੁਦ੍ਦੇਸਿਕੋ ਵਿਯ ਚ ਮਹਾਜਨਸ੍ਸ ਉਪਟ੍ਠਾਸੀਤਿ ਵੇਦਿਤਬ੍ਬਂ. ਮਹਾਸਤ੍ਤਸ੍ਸ ਪੁਞ੍ਞਾਨੁਭਾਵੇਨ ਤਦਾ ਤਥਾ ਉਪਟ੍ਠਾਨਮਤ੍ਤਮੇਵੇਤਨ੍ਤਿ. ਪਚ੍ਛਾ ਬਾਲਦਾਰਕੋਵ ਅਹੋਸਿ, ਨ ਤਾਦਿਸੋਤਿ. ਬੁਦ੍ਧਭਾਵਾਨੁਚ੍ਛਵਿਕਸ੍ਸ ਬੋਧਿਸਤ੍ਤਾਨੁਭਾਵਸ੍ਸ ਯਾਥਾਵਤੋ ਪਵੇਦਿਤਤ੍ਤਾ ਪਰਿਸਾ ਚਸ੍ਸ ਬ੍ਯਾਕਰਣੇਨ ਬੁਦ੍ਧੇਨ ਵਿਯ…ਪੇ… ਅਤ੍ਤਮਨਾ ਅਹੋਸਿ.

ਸਬ੍ਬਧਮ੍ਮਤਾਤਿ ਸਬ੍ਬਾ ਸੋਲ਼ਸਵਿਧਾਪਿ ਯਥਾਵੁਤ੍ਤਾ ਧਮ੍ਮਤਾ ਸਬ੍ਬਬੋਧਿਸਤ੍ਤਾਨਂ ਹੋਨ੍ਤੀਤਿ ਵੇਦਿਤਬ੍ਬਾ ਪੁਞ੍ਞਞਾਣਸਮ੍ਭਾਰਦਸ੍ਸਨੇਨ ਨੇਸਂ ਏਕਸਦਿਸਤ੍ਤਾ.

ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਵਣ੍ਣਨਾ

੩੩. ਦੁਕੂਲਚੁਮ੍ਬਟਕੇਤਿ ਦਹਰਸ੍ਸ ਨਿਪਜ੍ਜਨਯੋਗ੍ਯਤਾਵਸੇਨ ਪਟਿਸਂਹਟਦੁਕੂਲਸੁਖੁਮੇ. ‘‘ਖਤ੍ਤਿਯੋ ਬ੍ਰਾਹ੍ਮਣੋ’’ਤਿ ਏਵਮਾਦਿ ਜਾਤਿ. ‘‘ਕੋਣ੍ਡਞ੍ਞੋ ਗੋਤਮੋ’’ਤਿ ਏਵਮਾਦਿ ਗੋਤ੍ਤਂ. ‘‘ਪੋਣਿਕਾ ਚਿਕ੍ਖਲ੍ਲਿਕਾ ਸਾਕਿਯਾ ਕੋਲ਼ਿਯਾ’’ਤਿ ਏਵਮਾਦਿ ਕੁਲਪਦੇਸੋ. ਆਦਿ-ਸਦ੍ਦੇਨ ਰੂਪਿਸ੍ਸਰਿਯਪਰਿਵਾਰਾਦਿਸਬ੍ਬਸਮ੍ਪਤ੍ਤਿਯੋ ਸਙ੍ਗਣ੍ਹਾਤਿ. ਮਹਨ੍ਤਸ੍ਸਾਤਿ ਵਿਪੁਲਸ੍ਸ, ਉਲ਼ਾਰਸ੍ਸਾਤਿ ਅਤ੍ਥੋ. ਨਿਪ੍ਫਤ੍ਤਿਯੋਤਿ ਸਿਦ੍ਧਿਯੋ. ਗਨ੍ਤਬ੍ਬਗਤਿਯਾਤਿ ਗਤਿ-ਸਦ੍ਦਸ੍ਸ ਕਮ੍ਮਸਾਧਨਤਮਾਹ. ਉਪਪਜ੍ਜਨਵਸੇਨ ਹਿ ਸੁਚਰਿਤਦੁਚ੍ਚਰਿਤੇਹਿ ਗਨ੍ਤਬ੍ਬਾਤਿ ਗਤਿਯੋ, ਉਪਪਤ੍ਤਿਭਵਵਿਸੇਸੋ. ਗਚ੍ਛਤਿ ਯਥਾਰੁਚਿ ਪਵਤ੍ਤਤੀਤਿ ਗਤਿ, ਅਜ੍ਝਾਸਯੋ. ਪਟਿਸਰਣੇਤਿ ਪਰਾਯਣੇ ਅਵਸ੍ਸਯੇ. ਸਬ੍ਬਸਙ੍ਖਤਵਿਸਂਯੁਤ੍ਤਸ੍ਸ ਹਿ ਅਰਹਤੋ ਨਿਬ੍ਬਾਨਮੇਵ ਤਂਪਟਿਸਰਣਂ. ਤ੍ਯਾਹਨ੍ਤਿ ਤੇ ਅਹਂ.

ਦਸਵਿਧੇ ਕੁਸਲਧਮ੍ਮੇ, ਅਗਰਹਿਤੇ ਚ ਰਾਜਧਮ੍ਮੇ (ਜਾ. ੨ ਮਹਾਮਂਸਜਾਤਕੇ ਵਿਤ੍ਥਾਰੋ) ਨਿਯੁਤ੍ਤੋਤਿ ਧਮ੍ਮਿਕੋ. ਤੇਨ ਚ ਧਮ੍ਮੇਨ ਸਕਲਂ ਲੋਕਂ ਰਞ੍ਜੇਤੀਤਿ ਧਮ੍ਮਰਾਜਾ. ਯਸ੍ਮਾ ਚਕ੍ਕਵਤ੍ਤੀ ਧਮ੍ਮੇਨ ਞਾਯੇਨ ਰਜ੍ਜਂ ਅਧਿਗਚ੍ਛਤਿ, ਨ ਅਧਮ੍ਮੇਨ, ਤਸ੍ਮਾ ਵੁਤ੍ਤਂ ‘‘ਧਮ੍ਮੇਨ ਲਦ੍ਧਰਜ੍ਜਤ੍ਤਾ ਧਮ੍ਮਰਾਜਾ’’ਤਿ. ਚਤੂਸੁ ਦਿਸਾਸੁ ਸਮੁਦ੍ਦਪਰਿਯੋਸਾਨਤਾਯ ਚਤੁਰਨ੍ਤਾ ਨਾਮ ਤਤ੍ਥ ਤਤ੍ਥ ਦੀਪੇ ਮਹਾਪਥਵੀਤਿ ਆਹ ‘‘ਪੁਰਤ੍ਥਿਮ…ਪੇ… ਇਸ੍ਸਰੋ’’ਤਿ. ਵਿਜਿਤਾਵੀਤਿ ਵਿਜੇਤਬ੍ਬਸ੍ਸ ਵਿਜਿਤਵਾ, ਕਾਮਕੋਧਾਦਿਕਸ੍ਸ ਅਬ੍ਭਨ੍ਤਰਸ੍ਸ, ਪਟਿਰਾਜਭੂਤਸ੍ਸ ਬਾਹਿਰਸ੍ਸ ਚ ਅਰਿਗਣਸ੍ਸ ਵਿਜਯਿ, ਵਿਜੇਤ੍ਵਾ ਠਿਤੋਤਿ ਅਤ੍ਥੋ. ਕਾਮਂ ਚਕ੍ਕਵਤ੍ਤਿਨੋ ਕੇਨਚਿ ਯੁਦ੍ਧਂ ਨਾਮ ਨਤ੍ਥਿ, ਯੁਦ੍ਧੇਨ ਪਨ ਸਾਧੇਤਬ੍ਬਸ੍ਸ ਵਿਜਯਸ੍ਸ ਸਿਦ੍ਧਿਯਾ ‘‘ਵਿਜਿਤਸਙ੍ਗਾਮੋ’’ਤਿ ਵੁਤ੍ਤਂ. ਜਨਪਦੋਵ ਚਤੁਬ੍ਬਿਧਅਚ੍ਛਰਿਯਧਮ੍ਮਾਦਿਸਮਨ੍ਨਾਗਤੇ ਅਸ੍ਮਿਂ ਰਾਜਿਨਿ ਥਾਵਰਿਯਂ ਕੇਨਚਿ ਅਸਂਹਾਰਿਯਂ ਦਲ਼੍ਹਂ ਭਤ੍ਤਭਾਵਂ ਪਤ੍ਤੋ, ਜਨਪਦੇ ਵਾ ਅਤ੍ਤਨੋ ਧਮ੍ਮਿਕਾਯ ਪਟਿਪਤ੍ਤਿਯਾ ਥਾਵਰਿਯਂ ਥਿਰਭਾਵਂ ਪਤ੍ਤੋਤਿ ਜਨਪਦਤ੍ਥਾਵਰਿਯਪ੍ਪਤ੍ਤੋ. ਮਨੁਸ੍ਸਾਨਂ ਉਰੇ ਸਤ੍ਥਂ ਠਪੇਤ੍ਵਾ ਇਚ੍ਛਿਤਧਨਹਰਣਾਦਿਨਾ ਪਰਸਾਹਸਕਾਰਿਤਾਯ ਸਾਹਸਿਕਾ.

ਰਤਿਜਨਨਟ੍ਠੇਨਾਤਿ ਅਤਪ੍ਪਕਪੀਤਿਸੋਮਨਸ੍ਸੁਪ੍ਪਾਦਨੇਨ. ਸਦ੍ਦਤ੍ਥਤੋ ਪਨ ਰਮੇਤੀਤਿ ਰਤਨਂ. ‘‘ਅਹੋ ਮਨੋਹਰ’’ਨ੍ਤਿ ਚਿਤ੍ਤੇ ਕਤ੍ਤਬ੍ਬਤਾਯ ਚਿਤ੍ਤੀਕਤਂ. ‘‘ਸ੍ਵਾਯਂ ਚਿਤ੍ਤੀਕਾਰੋ ਤਸ੍ਸ ਪੂਜਨੀਯਤਾਯਾ’’ਤਿ ਚਿਤ੍ਤੀਕਤਨ੍ਤਿ ਪੂਜਨੀਯਨ੍ਤਿ ਅਤ੍ਥਂ ਵਦਨ੍ਤਿ. ਮਹਨ੍ਤਂ ਵਿਪੁਲਂ ਅਪਰਿਮਿਤਂ ਮੂਲਂ ਅਗ੍ਘਤੀਤਿ ਮਹਗ੍ਘਂ. ਨਤ੍ਥਿ ਏਤਸ੍ਸ ਤੁਲਾ ਉਪਮਾਤਿ ਅਤੁਲਂ, ਅਸਦਿਸਂ. ਕਦਾਚਿ ਏਵ ਉਪ੍ਪਜ੍ਜਨਤੋ ਦੁਕ੍ਖੇਨ ਲਦ੍ਧਬ੍ਬਤ੍ਤਾ ਦੁਲ੍ਲਭਦਸ੍ਸਨਂ. ਅਨੋਮੇਹਿ ਉਲ਼ਾਰਗੁਣੇਹੇਵ ਸਤ੍ਤੇਹਿ ਪਰਿਭੁਞ੍ਜਿਤਬ੍ਬਤੋ ਅਨੋਮਸਤ੍ਤਪਰਿਭੋਗਂ. ਇਦਾਨਿ ਨੇਸਂ ਚਿਤ੍ਤੀਕਤਾਦਿਅਤ੍ਥਾਨਂ ਸਵਿਸੇਸਂ ਚਕ੍ਕਰਤਨੇ ਲਬ੍ਭਮਾਨਤਂ ਦਸ੍ਸੇਤ੍ਵਾ ਇਤਰੇਸੁਪਿ ਤੇ ਅਤਿਦਿਸਿਤੁਂ ‘‘ਚਕ੍ਕਰਤਨਸ੍ਸ ਚਾ’’ਤਿਆਦਿ ਆਰਦ੍ਧਂ. ਅਞ੍ਞਂ ਦੇਵਟ੍ਠਾਨਂ ਨਾਮ ਨ ਹੋਤਿ ਰਞ੍ਞੋ ਅਨਞ੍ਞਸਾਧਾਰਣਿਸ੍ਸਰਿਯਾਦਿਸਮ੍ਪਤ੍ਤਿਪਟਿਲਾਭਹੇਤੁਤੋ, ਸਤ੍ਤਾਨਞ੍ਚ ਯਥਿਚ੍ਛਿਤਤ੍ਥਪਟਿਲਾਭਹੇਤੁਤੋ. ਅਗ੍ਘੋ ਨਤ੍ਥਿ ਅਤਿਵਿਯ ਉਲ਼ਾਰਸਮੁਜ੍ਜਲਸਤ੍ਤਰਤਨਮਯਤ੍ਤਾ, ਅਚ੍ਛਰਿਯਬ੍ਭੁਤਮਹਾਨੁਭਾਵਤਾਯ ਚ. ਯਦਗ੍ਗੇਨ ਮਹਗ੍ਘਂ, ਤਦਗ੍ਗੇਨ ਅਤੁਲਂ. ਸਤ੍ਤਾਨਂ ਪਾਪਜਿਗੁਚ੍ਛਨੇਨ ਵਿਗਤਕਾਲ਼ਕੋ ਪੁਞ੍ਞਪਸੁਤਤਾਯ ਮਣ੍ਡਭੂਤੋ ਯਾਦਿਸੋ ਕਾਲੋ ਬੁਦ੍ਧੁਪ੍ਪਾਦਾਰਹੋ, ਤਾਦਿਸੇ ਏਵ ਚਕ੍ਕਵਤ੍ਤੀਨਮ੍ਪਿ ਸਮ੍ਭਵੋਤਿ ਆਹ ‘‘ਯਸ੍ਮਾ ਚ ਪਨਾ’’ਤਿਆਦਿ. ਉਪਮਾਵਸੇਨ ਚੇਤਂ ਵੁਤ੍ਤਂ, ਉਪਮੋਪਮੇਯ੍ਯਾਨਞ੍ਚ ਨ ਅਚ੍ਚਨ੍ਤਮੇਵ ਸਦਿਸਤਾ. ਤਸ੍ਮਾ ਯਥਾ ਬੁਦ੍ਧਾ ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤਿ, ਨ ਤਥਾ ਚਕ੍ਕਵਤ੍ਤਿਨੋ, ਏਵਂ ਸਨ੍ਤੇਪਿ ਚਕ੍ਕਵਤ੍ਤਿਵਤ੍ਤਪਰਿਪੂਰਣਸ੍ਸਾਪਿ ਦੁਕ੍ਕਰਭਾਵਤੋਪਿ ਦੁਲ੍ਲਭੁਪ੍ਪਾਦਾਯੇਵਾਤਿ, ਇਮਿਨਾ ਦੁਲ੍ਲਭੁਪ੍ਪਾਦਤਾਸਾਮਞ੍ਞੇਨ ਤੇਸਂ ਦੁਲ੍ਲਭਦਸ੍ਸਨਤਾ ਵੁਤ੍ਤਾਤਿ ਵੇਦਿਤਬ੍ਬਂ. ਕਾਮਂ ਚਕ੍ਕਰਤਨਾਨੁਭਾਵੇਨ ਸਿਜ੍ਝਮਾਨੋ ਗੁਣੋ ਚਕ੍ਕਵਤ੍ਤਿਪਰਿਵਾਰਸਾਧਾਰਣੋ, ਤਥਾਪਿ ‘‘ਚਕ੍ਕਵਤ੍ਤੀ ਏਵ ਨਂ ਸਾਮਿਭਾਵੇਨ ਵਿਸਵਿਤਾਯ ਪਰਿਭੁਞ੍ਜਤੀ’’ਤਿ ਵਤ੍ਤਬ੍ਬਤਂ ਅਰਹਤਿ ਤਦਤ੍ਥਂ ਉਪ੍ਪਜ੍ਜਨਤੋਤਿ ਦਸ੍ਸੇਨ੍ਤੋ ‘‘ਤਦੇਤ’’ਨ੍ਤਿਆਦਿਮਾਹ. ਯਥਾਵੁਤ੍ਤਾਨਂ ਪਞ੍ਚਨ੍ਨਂ, ਛਨ੍ਨਮ੍ਪਿ ਵਾ ਅਤ੍ਥਾਨਂ ਇਤਰਰਤਨੇਸੁਪਿ ਲਬ੍ਭਨਤੋ ‘‘ਏਵਂ ਸੇਸਾਨਿਪੀ’’ਤਿ ਵੁਤ੍ਤਂ. ਹਤ੍ਥਿਅਸ੍ਸ-ਪਰਿਣਾਯਕਰਤਨੇਹਿ ਅਜਿਤਵਿਜਯਤੋ, ਚਕ੍ਕਰਤਨੇਨ ਚ ਪਰਿਵਾਰਭਾਵੇਨ, ਸੇਸੇਹਿ ਪਰਿਭੋਗੂਪਕਰਣਭਾਵੇਨ ਸਮਨ੍ਨਾਗਤੋ. ਹਤ੍ਥਿਅਸ੍ਸਮਣਿਇਤ੍ਥਿਰਤਨੇਹਿ ਪਰਿਭੋਗੂਪਕਰਣਭਾਵੇਨ ਸੇਸੇਹਿ ਪਰਿਵਾਰਭਾਵੇਨਾਤਿ ਯੋਜਨਾ.

ਚਤੁਨ੍ਨਂ ਮਹਾਦੀਪਾਨਂ ਸਿਰਿਵਿਭਵਨ੍ਤਿ ਤਤ੍ਥ ਲਦ੍ਧਂ ਸਿਰਿਸਮ੍ਪਤ੍ਤਿਞ੍ਚੇਵ ਭੋਗਸਮ੍ਪਤ੍ਤਿਞ੍ਚ. ਤਾਦਿਸਮੇਵਾਤਿ ‘‘ਪੁਰੇਭਤ੍ਤਮੇਵਾ’’ਤਿਆਦਿਨਾ ਵੁਤ੍ਤਾਨੁਭਾਵਮੇਵ. ਯੋਜਨਪ੍ਪਮਾਣਂ ਪਦੇਸਂ ਬ੍ਯਾਪਨੇਨ ਯੋਜਨਪ੍ਪਮਾਣਂ ਅਨ੍ਧਕਾਰਂ. ਅਤਿਦੀਘਤਾਦਿਛਬ੍ਬਿਧਦੋਸਪਰਿਵਜ੍ਜਿਤਂ.

ਸੂਰਾਤਿ ਸਤ੍ਤਿਵਨ੍ਤੋ, ਨਿਬ੍ਭਯਾਤਿ ਅਤ੍ਥੋਤਿ ਆਹ ‘‘ਅਭੀਰੁਕਾ’’ਤਿ. ਅਙ੍ਗਨ੍ਤਿ ਕਾਰਣਂ. ਯੇਨ ਕਾਰਣੇਨ ‘‘ਵੀਰਾ’’ਤਿ ਵੁਚ੍ਚੇਯ੍ਯੁਂ, ਤਂ ਵੀਰਙ੍ਗਂ. ਤੇਨਾਹ ‘‘ਵੀਰਿਯਸ੍ਸੇਤਂ ਨਾਮ’’ਨ੍ਤਿ. ਯਾਵ ਚਕ੍ਕਵਾਲ਼ਪਬ੍ਬਤਾ ਚਕ੍ਕਸ੍ਸ ਵਤ੍ਤਨਤੋ ‘‘ਚਕ੍ਕਵਾਲ਼ਪਬ੍ਬਤਂ ਸੀਮਂ ਕਤ੍ਵਾ ਠਿਤਸਮੁਦ੍ਦਪਰਿਯਨ੍ਤ’’ਨ੍ਤਿ ਵੁਤ੍ਤਂ. ‘‘ਅਦਣ੍ਡੇਨਾ’’ਤਿ ਇਮਿਨਾਵ ਧਨਦਣ੍ਡਸ੍ਸ, ਸਰੀਰਦਣ੍ਡਸ੍ਸ ਚ ਅਕਰਣਂ ਵੁਤ੍ਤਂ. ‘‘ਅਸਤ੍ਥੇਨਾ’’ਤਿ ਇਮਿਨਾ ਪਨ ਸੇਨਾਯ ਯੁਜ੍ਝਨਸ੍ਸਾਤਿ ਤਦੁਭਯਂ ਦਸ੍ਸੇਤੁਂ ‘‘ਯੇ ਕਤਾਪਰਾਧੇ’’ਤਿਆਦਿ ਵੁਤ੍ਤਂ. ਵੁਤ੍ਤਪ੍ਪਕਾਰਨ੍ਤਿ ਸਾਗਰਪਰਿਯਨ੍ਤਂ.

‘‘ਰਞ੍ਜਨਟ੍ਠੇਨ ਰਾਗੋ, ਤਣ੍ਹਾਯਨਟ੍ਠੇਨ ਤਣ੍ਹਾ’’ਤਿ ਪਵਤ੍ਤਿਆਕਾਰਭੇਦੇਨ ਲੋਭੋ ਏਵ ਦ੍ਵਿਧਾ ਵੁਤ੍ਤੋ. ਤਥਾ ਹਿਸ੍ਸ ਦ੍ਵਿਧਾਪਿ ਛਦਨਟ੍ਠੋ ਏਕਨ੍ਤਿਕੋ. ਯਥਾਹ ‘‘ਅਨ੍ਧਤਮਂ ਤਦਾ ਹੋਤਿ, ਯਂ ਰਾਗੋ ਸਹਤੇ ਨਰ’’ਨ੍ਤਿ, (ਨੇਤ੍ਤਿ. ੧੧, ੨੭) ‘‘ਤਣ੍ਹਾਛਦਨਛਾਦਿਤਾ’’ਤਿ (ਉਦਾ. ੬੪) ਚ. ਇਮਿਨਾ ਨਯੇਨ ਦੋਸਾਦੀਨਮ੍ਪਿ ਛਦਨਟ੍ਠੋ ਵਤ੍ਤਬ੍ਬੋ. ਕਿਲੇਸਗ੍ਗਹਣੇਨ ਵਿਚਿਕਿਚ੍ਛਾਦਯੋ ਸੇਸਕਿਲੇਸਾ ਵੁਤ੍ਤਾ. ਯਸ੍ਮਾ ਤੇ ਸਬ੍ਬੇ ਪਾਪਧਮ੍ਮਾ ਉਪ੍ਪਜ੍ਜਮਾਨਾ ਸਤ੍ਤਸਨ੍ਤਾਨਂ ਛਾਦੇਤ੍ਵਾ ਪਰਿਯੋਨਨ੍ਧਿਤ੍ਵਾ ਤਿਟ੍ਠਨ੍ਤਿ ਕੁਸਲਪ੍ਪਵਤ੍ਤਿਂ ਨਿਵਾਰੇਨ੍ਤਿ, ਤਸ੍ਮਾ ਤੇ ‘‘ਛਦਨਾ, ਛਦਾ’’ਤਿ ਚ ਵੁਤ੍ਤਾ. ਵਿਵਟ੍ਟਚ੍ਛਦਾਤਿ ਚ ਓ-ਕਾਰਸ੍ਸ ਆ-ਕਾਰਂ ਕਤ੍ਵਾ ਨਿਦ੍ਦੇਸੋ.

੩੫. ਤਾਸਨ੍ਤਿ ਦ੍ਵਿਨ੍ਨਮ੍ਪਿ ਨਿਪ੍ਫਤ੍ਤੀਨਂ. ਨਿਮਿਤ੍ਤਭੂਤਾਨੀਤਿ ਞਾਪਕਕਾਰਣਭੂਤਾਨਿ. ਤਥਾ ਹਿ ਲਕ੍ਖੀਯਤਿ ਮਹਾਪੁਰਿਸਭਾਵੋ ਏਤੇਹੀਤਿ ਲਕ੍ਖਣਾਨਿ. ਠਾਨਗਮਨਾਦੀਸੁ ਭੂਮਿਯਂ ਸੁਟ੍ਠੁ ਸਮਂ ਪਤਿਟ੍ਠਿਤਾ ਪਾਦਾ ਏਤਸ੍ਸਾਤਿ ਸੁਪ੍ਪਤਿਟ੍ਠਿਤਪਾਦੋ. ਤਂ ਪਨਸ੍ਸ ਸੁਪ੍ਪਤਿਟ੍ਠਿਤਪਾਦਤਂ ਬ੍ਯਤਿਰੇਕਮੁਖੇਨ ਵਿਭਾਵੇਤੁਂ ‘‘ਯਥਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਗ੍ਗਤਲਨ੍ਤਿ ਅਗ੍ਗਪਾਦਤਲਂ. ਪਣ੍ਹੀਤਿ ਪਣ੍ਹਿਤਲਂ. ਪਸ੍ਸਨ੍ਤਿ ਪਾਦਤਲਸ੍ਸ ਦ੍ਵੀਸੁ ਪਸ੍ਸੇਸੁ ਏਕੇਕਂ, ਉਭਯਮੇਵ ਵਾ ਪਰਿਯਨ੍ਤਂ ਪਸ੍ਸਂ. ‘‘ਅਸ੍ਸ ਪਨਾ’’ਤਿਆਦਿ ਅਨ੍ਵਯਤੋ ਅਤ੍ਥਵਿਭਾਵਨਂ. ਸੁਵਣ੍ਣਪਾਦੁਕਤਲਮਿਵ ਉਜੁਕਂ ਨਿਕ੍ਖਿਪਿਯਮਾਨਂ. ਏਕਪ੍ਪਹਾਰੇਨੇਵਾਤਿ ਏਕਕ੍ਖਣੇਯੇਵ. ਸਕਲਂ ਪਾਦਤਲਂ ਭੂਮਿਂ ਫੁਸਤਿ ਨਿਕ੍ਖਿਪਨੇ. ਏਕਪ੍ਪਹਾਰੇਨੇਵ ਸਕਲਂ ਪਾਦਤਲਂ ਭੂਮਿਤੋ ਉਟ੍ਠਹਤੀਤਿ ਯੋਜਨਾ. ਤਸ੍ਮਾ ਅਯਂ ਸੁਪ੍ਪਤਿਟ੍ਠਿਤਪਾਦੋਤਿ ਨਿਗਮਨਂ. ਯਂ ਪਨੇਤ੍ਥ ਵਤ੍ਤਬ੍ਬਂ ਅਨੁਪੁਬ੍ਬਨਿਨ੍ਨਾਦਿਅਚ੍ਛਰਿਯਬ੍ਭੁਤਂ ਨਿਸ੍ਸਨ੍ਦਫਲਂ, ਤਂ ਪਰਤੋ ਲਕ੍ਖਣਸੁਤ੍ਤਵਣ੍ਣਨਾਯਂ (ਦੀ. ਨਿ. ਅਟ੍ਠ. ੩.੨੦੧) ਆਵਿਭਵਿਸ੍ਸਤੀਤਿ.

ਨਾਭਿ ਦਿਸ੍ਸਤੀਤਿ ਲਕ੍ਖਣਚਕ੍ਕਸ੍ਸ ਨਾਭਿ ਪਰਿਮਣ੍ਡਲਸਣ੍ਠਾਨਾ ਸੁਪਰਿਬ੍ਯਤ੍ਤਾ ਹੁਤ੍ਵਾ ਦਿਸ੍ਸਤਿ, ਲਬ੍ਭਤੀਤਿ ਅਧਿਪ੍ਪਾਯੋ. ਨਾਭਿਪਰਿਚ੍ਛਿਨ੍ਨਾਤਿ ਤਸ੍ਸਂ ਨਾਭਿਯਂ ਪਰਿਚ੍ਛਿਨ੍ਨਾ ਪਰਿਚ੍ਛੇਦਵਸੇਨ ਠਿਤਾ. ਨਾਭਿਮੁਖਪਰਿਕ੍ਖੇਪਪਟ੍ਟੋਤਿ ਪਕਤਿਚਕ੍ਕਸ੍ਸ ਅਕ੍ਖਬ੍ਭਾਹਤਪਰਿਹਰਣਤ੍ਥਂ ਨਾਭਿਮੁਖੇ ਠਪੇਤਬ੍ਬਂ ਪਰਿਕ੍ਖੇਪਪਟ੍ਟੋ, ਤਪ੍ਪਟਿਚ੍ਛਨ੍ਨੋ ਇਧ ਅਧਿਪ੍ਪੇਤੋ. ਨੇਮਿਮਣਿਕਾਤਿ ਨੇਮਿਯਂ ਆਵਲਿਭਾਵੇਨ ਠਿਤਮਣਿਕਾਲੇਖਾ. ਸਮ੍ਬਹੁਲਵਾਰੋਤਿ ਬਹੁਵਿਧਲੇਖਙ੍ਗਵਿਭਾਵਨਵਾਰੋ. ਸਤ੍ਤੀਤਿ ਆਵੁਧਸਤ੍ਤਿ. ਸਿਰਿਵਚ੍ਛੋਤਿ ਸਿਰਿਅਙ੍ਗਾ. ਨਨ੍ਦੀਤਿ ਦਕ੍ਖਿਣਾਵਤ੍ਤਂ. ਸੋਵਤ੍ਤਿਕੋਤਿ ਸੋਵਤ੍ਤਿਅਙ੍ਗੋ. ਵਟਂਸਕੋਤਿ ਆਵੇਲ਼ਂ. ਵਡ੍ਢਮਾਨਕਨ੍ਤਿ ਪੁਰਿਮਹਾਦੀਸੁ ਦੀਪਙ੍ਕਂ. ਮੋਰਹਤ੍ਥਕੋਤਿ ਮੋਰਪਿਞ੍ਛਕਲਾਪੋ, ਮੋਰਪਿਞ੍ਛਪਟਿਸਿਬ੍ਬਿਤੋ ਵਾ ਬੀਜਨੀਵਿਸੇਸੋ. ਵਾਲ਼ਬੀਜਨੀਤਿ ਚਾਮਰਿਵਾਲਂ. ਸਿਦ੍ਧਤ੍ਥਾਦਿ ਪੁਣ੍ਣਘਟਪੁਣ੍ਣਪਾਤਿਯੋ. ‘‘ਚਕ੍ਕਵਾਲ਼ੋ’’ਤਿ ਵਤ੍ਵਾ ਤਸ੍ਸ ਪਧਾਨਾਵਯਵੇ ਦਸ੍ਸੇਤੁਂ ‘‘ਹਿਮਵਾ ਸਿਨੇਰੁ…ਪੇ… ਸਹਸ੍ਸਾਨੀ’’ਤਿ ਵੁਤ੍ਤਂ. ‘‘ਚਕ੍ਕਵਤ੍ਤਿਰਞ੍ਞੋ ਪਰਿਸਂ ਉਪਾਦਾਯਾ’’ਤਿ ਇਦਂ ਹਤ੍ਥਿਰਤਨਾਦੀਨਮ੍ਪਿ ਤਤ੍ਥ ਲਬ੍ਭਮਾਨਭਾਵਦਸ੍ਸਨਂ. ਸਬ੍ਬੋਤਿਸਤ੍ਤਿਆਦਿਕੋ ਯਥਾਵੁਤ੍ਤੋ ਅਙ੍ਗਵਿਸੇਸੋ ਚਕ੍ਕਲਕ੍ਖਣਸ੍ਸੇਵ ਪਰਿਵਾਰੋਤਿ ਵੇਦਿਤਬ੍ਬੋ.

‘‘ਆਯਤਪਣ੍ਹੀ’’ਤਿ ਇਦਂ ਅਞ੍ਞੇਸਂ ਪਣ੍ਹਿਤੋ ਦੀਘਤਂ ਸਨ੍ਧਾਯ ਵੁਤ੍ਤਂ, ਨ ਪਨ ਅਤਿਦੀਘਤਨ੍ਤਿ ਆਹ ‘‘ਪਰਿਪੁਣ੍ਣਪਣ੍ਹੀ’’ਤਿ. ਯਥਾ ਪਨ ਪਣ੍ਹਿਲਕ੍ਖਣਂ ਪਰਿਪੁਣ੍ਣਂ ਨਾਮ ਹੋਤਿ, ਤਂ ਬ੍ਯਤਿਰੇਕਮੁਖੇਨ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਆਰਗ੍ਗੇਨਾਤਿ ਮਣ੍ਡਲਾਯ ਸਿਖਾਯ. ਵਟ੍ਟੇਤ੍ਵਾਤਿ ਯਥਾ ਸੁਵਟ੍ਟਂ ਹੋਤਿ, ਏਵਂ ਵਟ੍ਟੇਤ੍ਵਾ. ਰਤ੍ਤਕਮ੍ਬਲਗੇਣ੍ਡੁਕਸਦਿਸਾਤਿ ਰਤ੍ਤਕਮ੍ਬਲਮਯਗੇਣ੍ਡੁਕਸਦਿਸਾ.

‘‘ਮਕ੍ਕਟਸ੍ਸੇਵਾ’’ਤਿ ਦੀਘਭਾਵਂ, ਸਮਤਞ੍ਚ ਸਨ੍ਧਾਯੇਤਂ ਵੁਤ੍ਤਂ. ਨਿਯ੍ਯਾਸਤੇਲੇਨਾਤਿ ਛਤ੍ਤਿਰਿਤਨਿਯ੍ਯਾਸਾਦਿਨਿਯ੍ਯਾਸਸਮ੍ਮਿਸ੍ਸੇਨ ਤੇਲੇਨ, ਯਂ ‘‘ਸੁਰਭਿਨਿਯ੍ਯਾਸ’’ਨ੍ਤਿਪਿ ਵਦਨ੍ਤਿ. ਨਿਯ੍ਯਾਸਤੇਲਗ੍ਗਹਣਞ੍ਚੇਤ੍ਥ ਹਰਿਤਾਲਵਟ੍ਟਿਯਾ ਘਨਸਿਨਿਦ੍ਧਭਾਵਦਸ੍ਸਨਤ੍ਥਂ.

ਯਥਾ ਸਤਕ੍ਖਤ੍ਤੁਂ ਵਿਹਤਂ ਕਪ੍ਪਾਸਪਟਲਂ ਸਪ੍ਪਿਮਣ੍ਡੇ ਓਸਾਰਿਤਂ ਅਤਿਵਿਯ ਮੁਦੁ ਹੋਤਿ, ਏਵਂ ਮਹਾਪੁਰਿਸਸ੍ਸ ਹਤ੍ਥਪਾਦਾਤਿ ਦਸ੍ਸੇਨ੍ਤੋ ‘‘ਸਪ੍ਪਿਮਣ੍ਡੇ’’ਤਿਆਦਿਮਾਹ. ਤਲੁਨਾਤਿ ਸੁਖੁਮਾਲਾ.

ਚਮ੍ਮੇਨਾਤਿ ਅਙ੍ਗੁਲਨ੍ਤਰਵੇਠਿਤਚਮ੍ਮੇਨ. ਪਟਿਬਦ੍ਧਅਙ੍ਗੁਲਨ੍ਤਰੋਤਿ ਏਕਤੋ ਸਮ੍ਬਦ੍ਧਅਙ੍ਗੁਲਨ੍ਤਰੋ ਨ ਹੋਤਿ. ਏਕਪ੍ਪਮਾਣਾਤਿ ਦੀਘਤੋ ਸਮਾਨਪ੍ਪਮਾਣਾ. ਯਵਲਕ੍ਖਣਨ੍ਤਿ ਅਬ੍ਭਨ੍ਤਰਤੋ ਅਙ੍ਗੁਲਿਪਬ੍ਬੇ ਠਿਤਂ ਯਵਲਕ੍ਖਣਂ. ਪਟਿਵਿਜ੍ਝਿਤ੍ਵਾਤਿ ਤਂਤਂਪਬ੍ਬਾਨਂ ਸਮਾਨਦੇਸਤਾਯ ਅਙ੍ਗੁਲੀਨਂ ਪਸਾਰਿਤਕਾਲੇਪਿ ਅਞ੍ਞਮਞ੍ਞਂ ਵਿਜ੍ਝਿਤਾਨਿ ਵਿਯ ਫੁਸਿਤ੍ਵਾ ਤਿਟ੍ਠਨ੍ਤਿ.

ਸਙ੍ਖਾ ਵੁਚ੍ਚਨ੍ਤਿ ਗੋਪ੍ਫਕਾ, ਉਦ੍ਧਂ ਸਙ੍ਖਾ ਏਤੇਸਨ੍ਤਿ ਉਸ੍ਸਙ੍ਖਾ, ਪਾਦਾ. ਪਿਟ੍ਠਿਪਾਦੇਤਿ ਪਿਟ੍ਠਿਪਾਦਸਮੀਪੇ. ਤੇਨਾਤਿ ਪਿਟ੍ਠਿਪਾਦੇ ਠਿਤਗੋਪ੍ਫਕਭਾਵੇਨ ਬਦ੍ਧਾ ਹੋਨ੍ਤੀਤਿ ਯੋਜਨਾ. ਤਯਿਦਂ ‘‘ਤੇਨਾ’’ਤਿ ਪਦਂ ਉਪਰਿਪਦਦ੍ਵਯੇਪਿ ਯੋਜੇਤਬ੍ਬਂ ‘‘ਤੇਨ ਬਦ੍ਧਭਾਵੇਨ ਨ ਯਥਾਸੁਖਂ ਪਰਿਵਟ੍ਟਨ੍ਤਿ, ਤੇਨ ਯਥਾਸੁਖਂ ਨਪਰਿਵਟ੍ਟਨੇਨ ਗਚ੍ਛਨ੍ਤਾਨਂ ਪਾਦਤਲਾਨਿਪਿ ਨ ਦਿਸ੍ਸਨ੍ਤੀ’’ਤਿ. ਉਪਰੀਤਿ ਪਿਟ੍ਠਿਪਾਦਤੋ ਦ੍ਵਿਤਿਅਙ੍ਗੁਲਿਮਤ੍ਤਂ ਉਦ੍ਧਂ, ‘‘ਚਤੁਰਙ੍ਗੁਲਮਤ੍ਤ’’ਨ੍ਤਿ ਚ ਵਦਨ੍ਤਿ. ਨਿਗੂਲ਼੍ਹਾਨਿ ਚ ਹੋਨ੍ਤਿ, ਨ ਅਞ੍ਞੇਸਂ ਵਿਯ ਪਞ੍ਞਾਯਮਾਨਾਨਿ. ਤੇਨਾਤਿ ਗੋਪ੍ਫਕਾਨਂ ਉਪਰਿ ਪਤਿਟ੍ਠਿਤਭਾਵੇਨ. ਅਸ੍ਸਾਤਿ ਮਹਾਪੁਰਿਸਸ੍ਸ. ਸਤਿਪਿ ਦੇਸਨ੍ਤਰਪ੍ਪਵਤ੍ਤਿਯਂ ਨਿਚ੍ਚਲੋਤਿ ਦਸ੍ਸਨਤ੍ਥਂ ਨਾਭਿਗ੍ਗਹਣਂ. ‘‘ਅਧੋਕਾਯੋਵ ਇਞ੍ਜਤੀ’’ਤਿ ਇਦਂ ਪੁਰਿਮਪਦਸ੍ਸ ਕਾਰਣਵਚਨਂ. ਯਸ੍ਮਾ ਅਧੋਕਾਯੋਵ ਇਞ੍ਜਤਿ, ਤਸ੍ਮਾ ਨਾਭਿਤੋ…ਪੇ… ਨਿਚ੍ਚਲੋ ਹੋਤਿ. ‘‘ਸੁਖੇਨ ਪਾਦਾ ਪਰਿਵਟ੍ਟਨ੍ਤੀ’’ਤਿ ਇਦਂ ਪਨ ਪੁਰਿਮਸ੍ਸ, ਪਚ੍ਛਿਮਸ੍ਸ ਚ ਕਾਰਣਵਚਨਂ. ਯਸ੍ਮਾ ਸੁਖੇਨ ਪਾਦਾ ਪਰਿਵਟ੍ਟਨ੍ਤਿ, ਤਸ੍ਮਾ ਅਧੋਕਾਯੋਵ ਇਞ੍ਜਤਿ, ਯਸ੍ਮਾ ਸੁਖੇਨ ਪਾਦਾ ਪਰਿਵਟ੍ਟਨ੍ਤਿ, ਤਸ੍ਮਾ ਪੁਰਤੋਪਿ…ਪੇ… ਪਚ੍ਛਤੋਯੇਵਾਤਿ.

ਯਸ੍ਮਾ ਏਣਿਮਿਗਸ੍ਸ ਸਮਨ੍ਤਤੋ ਏਕਸਦਿਸਮਂਸਾ ਅਨੁਕ੍ਕਮੇਨ ਉਦ੍ਧਂ ਥੂਲਾ ਜਙ੍ਘਾ ਹੋਨ੍ਤਿ, ਤਥਾ ਮਹਾਪੁਰਿਸਸ੍ਸਾਪਿ, ਤਸ੍ਮਾ ਵੁਤ੍ਤਂ ‘‘ਏਣਿਮਿਗਸਦਿਸਜਙ੍ਘੋ’’ਤਿ. ਪਰਿਪੁਣ੍ਣਜਙ੍ਘੋਤਿ ਸਮਨ੍ਤਤੋ ਮਂਸੂਪਚਯੇਨ ਪਰਿਪੁਣ੍ਣਜਙ੍ਘੋ. ਤੇਨਾਹ ‘‘ਨ ਏਕਤੋ’’ਤਿਆਦਿ.

ਏਤੇਨਾਤਿ ‘‘ਅਨੋਨਮਨ੍ਤੋ’’ਤਿਆਦਿਵਚਨੇਨ, ਜਾਣੁਫਾਸੁਭਾਵਦੀਪਨੇਨਾਤਿ ਅਤ੍ਥੋ. ਅਵਸੇਸਜਨਾਤਿ ਇਮਿਨਾ ਲਕ੍ਖਣੇਨ ਰਹਿਤਜਨਾ. ਖੁਜ੍ਜਾ ਵਾ ਹੋਨ੍ਤਿ ਹੇਟ੍ਠਿਮਕਾਯਤੋ ਉਪਰਿਮਕਾਯਸ੍ਸ ਰਸ੍ਸਤਾਯ, ਵਾਮਨਾ ਵਾ ਉਪਰਿਮਕਾਯਤੋ ਹੇਟ੍ਠਿਮਕਾਯਸ੍ਸ ਰਸ੍ਸਤਾਯ, ਏਤੇਨ ਠਪੇਤ੍ਵਾ ਸਮ੍ਮਾਸਮ੍ਬੁਦ੍ਧਂ, ਚਕ੍ਕਵਤ੍ਤਿਨਞ੍ਚ ਇਤਰੇ ਸਤ੍ਤਾ ਖੁਜ੍ਜਪਕ੍ਖਿਕਾ, ਵਾਮਨਪਕ੍ਖਿਕਾ ਚਾਤਿ ਦਸ੍ਸੇਤਿ.

ਕਾਮਂ ਸਬ੍ਬਾਪਿ ਪਦੁਮਕਣ੍ਣਿਕਾ ਸੁਵਣ੍ਣਵਣ੍ਣਾਵ, ਕਞ੍ਚਨਪਦੁਮਕਣ੍ਣਿਕਾ ਪਨ ਪਭਸ੍ਸਰਭਾਵੇਨ ਤਤੋ ਸਾਤਿਸਯਾਤਿ ਆਹ ‘‘ਸੁਵਣ੍ਣਪਦੁਮਕਣ੍ਣਿਕਸਦਿਸੇਹੀ’’ਤਿ. ਓਹਿਤਨ੍ਤਿ ਸਮੋਹਿਤਂ ਅਨ੍ਤੋਗਧਂ. ਤਥਾਭੂਤਂ ਪਨ ਤਂ ਤੇਨ ਛਨ੍ਨਂ ਹੋਤੀਤਿ ਆਹ ‘‘ਪਟਿਚ੍ਛਨ੍ਨ’’ਨ੍ਤਿ.

ਸੁਵਣ੍ਣਵਣ੍ਣੋਤਿ ਸੁਵਣ੍ਣਵਣ੍ਣਵਣ੍ਣੋਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਜਾਤਿਹਿਙ੍ਗੁਲਕੇਨਾ’’ਤਿਆਦਿ, ਸ੍ਵਾਯਮਤ੍ਥੋ ਆਵੁਤ੍ਤਿਞਾਯੇਨ ਚ ਵੇਦਿਤਬ੍ਬੋ. ਸਰੀਰਪਰਿਯਾਯੋ ਇਧ ਵਣ੍ਣ-ਸਦ੍ਦੋਤਿ ਅਧਿਪ੍ਪਾਯੋ. ਪਠਮਵਿਕਪ੍ਪਂ ਵਤ੍ਵਾ ਤਥਾਰੂਪਾਯ ਪਨ ਰੁਲ਼੍ਹਿਯਾ ਅਭਾਵਂ ਮਨਸਿ ਕਤ੍ਵਾ ਵਣ੍ਣਧਾਤੁਪਰਿਯਾਯਮੇਵ ਵਣ੍ਣ-ਸਦ੍ਦਂ ਗਹੇਤ੍ਵਾ ਦੁਤਿਯਵਿਕਪ੍ਪੋ ਵੁਤ੍ਤੋ. ਤਸ੍ਮਾ ਪਦਦ੍ਵਯੇਨਾਪਿ ਸੁਨਿਦ੍ਧਨ੍ਤਸੁਵਣ੍ਣਸਦਿਸਛਵਿਵਣ੍ਣੋਤਿ ਵੁਤ੍ਤਂ ਹੋਤਿ.

ਰਜੋਤਿ ਸੁਖੁਮਰਜੋ. ਜਲ੍ਲਨ੍ਤਿ ਮਲੀਨਭਾਵਾਵਹੋ ਰੇਣੁਸਞ੍ਚਯੋ. ਤੇਨਾਹ ‘‘ਮਲਂ ਵਾ’’ਤਿ. ਯਦਿ ਵਿਵਤ੍ਤਤਿ, ਕਥਂ ਨ੍ਹਾਨਾਦੀਨੀਤਿ ਆਹ ‘‘ਹਤ੍ਥਧੋਵਨਾਦੀਨੀ’’ਤਿਆਦਿ.

ਆਵਟ੍ਟਪਰਿਯੋਸਾਨੇਤਿ ਪਦਕ੍ਖਿਣਾਵਟ੍ਟਨਵਸੇਨ ਪਵਤ੍ਤਸ੍ਸ ਆਵਟ੍ਟਸ੍ਸ ਅਨ੍ਤੇ.

ਬ੍ਰਹ੍ਮੁਨੋ ਸਰੀਰਂ ਪੁਰਤੋ ਵਾ ਪਚ੍ਛਤੋ ਵਾ ਅਨੋਨਮਿਤ੍ਵਾ ਉਜੁਕਮੇਵ ਉਗ੍ਗਤਨ੍ਤਿ ਆਹ ‘‘ਬ੍ਰਹ੍ਮਾ ਵਿਯ ਉਜੁਗਤ੍ਤੋ’’ਤਿ. ਸਾ ਪਨਾਯਂ ਉਜੁਗਤ੍ਤਤਾ ਅਵਯਵੇਸੁ ਬੁਦ੍ਧਿਪ੍ਪਤ੍ਤੇਸੁ ਦਟ੍ਠਬ੍ਬਾ, ਨ ਦਹਰਕਾਲੇਤਿ ਵੁਤ੍ਤਂ ‘‘ਉਗ੍ਗਤਦੀਘਸਰੀਰੋ ਭਵਿਸ੍ਸਤੀ’’ਤਿ. ਇਤਰੇਸੂਤਿ ‘‘ਖਨ੍ਧਜਾਣੂਸੂ’’ਤਿ ਇਮੇਸੁ ਦ੍ਵੀਸੁ ਠਾਨੇਸੁ ਨਮਨ੍ਤਾ ਪੁਰਤੋ ਨਮਨ੍ਤੀਤਿ ਆਨੇਤ੍ਵਾ ਸਮ੍ਬਨ੍ਧੋ. ਪਸ੍ਸਵਙ੍ਕਾਤਿ ਦਕ੍ਖਿਣਪਸ੍ਸੇਨ ਵਾ ਵਾਮਪਸ੍ਸੇਨ ਵਾ ਵਙ੍ਕਾ. ਸੂਲਸਦਿਸਾਤਿ ਪੋਤ੍ਥਕਰੂਪਕਰਣੇ ਠਪਿਤਸੂਲਪਾਦਸਦਿਸਾ.

ਹਤ੍ਥਪਿਟ੍ਠਿਆਦਿਵਸੇਨ ਸਤ੍ਤ ਸਰੀਰਾਵਯਵਾ ਉਸ੍ਸਦਾ ਉਪਚਿਤਮਂਸਾ ਏਤਸ੍ਸਾਤਿ ਸਤ੍ਤੁਸ੍ਸਦੋ. ਅਟ੍ਠਿਕੋਟਿਯੋ ਪਞ੍ਞਾਯਨ੍ਤੀਤਿ ਯੋਜਨਾ. ਨਿਗੂਲ਼੍ਹਸਿਰਾਜਾਲੇਹੀਤਿ ਲਕ੍ਖਣਵਚਨਮੇਤਨ੍ਤਿ ਤੇਨ ਨਿਗੂਲ਼੍ਹਅਟ੍ਠਿਕੋਟੀਹੀਤਿਪਿ ਵੁਤ੍ਤਮੇਵ ਹੋਤੀਤਿ. ਹਤ੍ਥਪਿਟ੍ਠਾਦੀਹੀਤਿ ਏਤ੍ਥ ਆਦਿ-ਸਦ੍ਦੇਨ ਅਂਸਕੂਟਖਨ੍ਧਕੂਟਾਨਂ ਸਙ੍ਗਹੇ ਸਿਦ੍ਧੇ ਤਂ ਏਕਦੇਸੇਨ ਦਸ੍ਸੇਨ੍ਤੋ ‘‘ਵਟ੍ਟੇਤ੍ਵਾ…ਪੇ… ਖਨ੍ਧੇਨਾ’’ਤਿ ਆਹ. ‘‘ਸਿਲਾਰੂਪਕਂ ਵਿਯਾ’’ਤਿਆਦਿਨਾ ਵਾ ਨਿਗੂਲ਼੍ਹਅਂਸਕੂਟਤਾਪਿ ਵਿਭਾਵਿਤਾ ਯੇਵਾਤਿ ਦਟ੍ਠਬ੍ਬਂ.

ਸੀਹਸ੍ਸ ਪੁਬ੍ਬਦ੍ਧਂ ਸੀਹਪੁਬ੍ਬਦ੍ਧਂ, ਪਰਿਪੁਣ੍ਣਾਵਯਵਤਾਯ ਸੀਹਪੁਬ੍ਬਦ੍ਧਂ ਵਿਯ ਸਕਲੋ ਕਾਯੋ ਅਸ੍ਸਾਤਿ ਸੀਹਪੁਬ੍ਬਦ੍ਧਕਾਯੋ. ਤੇਨਾਹ ‘‘ਸੀਹਸ੍ਸ ਪੁਬ੍ਬਦ੍ਧਕਾਯੋ ਵਿਯ ਸਬ੍ਬੋ ਕਾਯੋ ਪਰਿਪੁਣ੍ਣੋ’’ਤਿ. ਸੀਹਸ੍ਸੇਵਾਤਿ ਸੀਹਸ੍ਸ ਵਿਯ. ਦੁਸ੍ਸਣ੍ਠਿਤਵਿਸਣ੍ਠਿਤੋ ਨ ਹੋਤੀਤਿ ਦੁਟ੍ਠੁ ਸਣ੍ਠਿਤੋ, ਵਿਰੂਪਸਣ੍ਠਿਤੋ ਚ ਨ ਹੋਤਿ, ਤੇਸਂ ਤੇਸਂ ਅਵਯਵਾਨਂ ਅਯੁਤ੍ਤਭਾਵੇਨ, ਵਿਰੂਪਭਾਵੇਨ ਚ ਸਣ੍ਠਿਤਿ ਉਪਗਤੋ ਨ ਹੋਤੀਤਿ ਅਤ੍ਥੋ. ਸਣ੍ਠਨ੍ਤੀਤਿ ਸਣ੍ਠਹਨ੍ਤਿ. ਦੀਘੇਹੀਤਿ ਅਙ੍ਗੁਲਿਨਾਸਾਦੀਹਿ. ਰਸ੍ਸੇਹੀਤਿ ਗੀਵਾਦੀਹਿ. ਥੂਲੇਹੀਤਿ ਊਰੁਬਾਹੁਆਦੀਹਿ. ਕਿਸੇਹੀਤਿ ਕੇਸਲੋਮਮਜ੍ਝਾਦੀਹਿ. ਪੁਥੁਲੇਹੀਤਿ ਅਕ੍ਖਿਹਤ੍ਥਤਲਾਦੀਹਿ. ਵਟ੍ਟੇਹੀਤਿ ਜਙ੍ਘਹਤ੍ਥਾਦੀਹਿ.

ਸਤਪੁਞ੍ਞਲਕ੍ਖਣਤਾਯ ਨਾਨਾਚਿਤ੍ਤੇਨ ਪੁਞ੍ਞਚਿਤ੍ਤੇਨ ਚਿਤ੍ਤਿਤੋ ਸਞ੍ਜਾਤਚਿਤ੍ਤਭਾਵੋ ‘‘ਈਦਿਸੋ ਏਵ ਬੁਦ੍ਧਾਨਂ ਧਮ੍ਮਕਾਯਸ੍ਸ ਅਧਿਟ੍ਠਾਨਂ ਭਵਿਤੁਂ ਯੁਤ੍ਤੋ’’ਤਿ ਦਸਪਾਰਮੀਹਿ ਸਜ੍ਜਿਤੋ ਅਭਿਸਙ੍ਖਤੋ, ‘‘ਦਾਨਚਿਤ੍ਤੇਨ ਪੁਞ੍ਞਚਿਤ੍ਤੇਨਾ’’ਤਿ ਵਾ ਪਾਠੋ, ਦਾਨਵਸੇਨ, ਸੀਲਾਦਿਵਸੇਨ ਚ ਪਵਤ੍ਤਪੁਞ੍ਞਚਿਤ੍ਤੇਨਾਤਿ ਅਤ੍ਥੋ.

ਦ੍ਵਿਨ੍ਨਂ ਕੋਟ੍ਟਾਨਂ ਅਨ੍ਤਰਨ੍ਤਿ ਦ੍ਵਿਨ੍ਨਂ ਪਿਟ੍ਠਿਬਾਹਾਨਂ ਵੇਮਜ੍ਝਂ ਪਿਟ੍ਠਿਮਜ੍ਝਸ੍ਸ ਉਪਰਿਭਾਗੋ. ਚਿਤਂ ਪਰਿਪੁਣ੍ਣਨ੍ਤਿ ਅਨਿਨ੍ਨਭਾਵੇਨ ਚਿਤਂ, ਦ੍ਵੀਹਿ ਕੋਟ੍ਟੇਹਿ ਸਮਤਲਤਾਯ ਪਰਿਪੁਣ੍ਣਂ. ਉਗ੍ਗਮ੍ਮਾਤਿ ਉਗ੍ਗਨ੍ਤ੍ਵਾ, ਅਨਿਨ੍ਨਂ ਸਮਤਲਂ ਹੁਤ੍ਵਾਤਿ ਅਧਿਪ੍ਪਾਯੋ. ਤੇਨਾਹ ‘‘ਸੁਵਣ੍ਣਫਲਕਂ ਵਿਯਾ’’ਤਿ.

ਨਿਗ੍ਰੋਧੋ ਵਿਯ ਪਰਿਮਣ੍ਡਲੋਤਿ ਪਰਿਮਣ੍ਡਲਨਿਗ੍ਰੋਧੋ ਵਿਯ ਪਰਿਮਣ੍ਡਲੋ, ‘‘ਨਿਗ੍ਰੋਧਪਰਿਮਣ੍ਡਲਪਰਿਮਣ੍ਡਲੋ’’ਤਿ ਵਤ੍ਤਬ੍ਬੇ ਏਕਸ੍ਸ ਪਰਿਮਣ੍ਡਲ-ਸਦ੍ਦਸ੍ਸ ਲੋਪਂ ਕਤ੍ਵਾ ‘‘ਨਿਗ੍ਰੋਧਪਰਿਮਣ੍ਡਲੋ’’ਤਿ ਵੁਤ੍ਤੋ. ਤੇਨਾਹ ‘‘ਸਮਕ੍ਖਨ੍ਧਸਾਖੋ ਨਿਗ੍ਰੋਧੋ’’ਤਿਆਦਿ. ਨ ਹਿ ਸਬ੍ਬੋ ਨਿਗ੍ਰੋਧੋ ਪਰਿਮਣ੍ਡਲੋਤਿ, ਪਰਿਮਣ੍ਡਲਸਦ੍ਦਸਨ੍ਨਿਧਾਨੇਨ ਵਾ ਪਰਿਮਣ੍ਡਲੋਵ ਨਿਗ੍ਰੋਧੋ ਗਯ੍ਹਤੀਤਿ ਏਕਸ੍ਸ ਪਰਿਮਣ੍ਡਲਸਦ੍ਦਸ੍ਸ ਲੋਪੇਨ ਵਿਨਾਪਿ ਅਯਮਤ੍ਥੋ ਲਬ੍ਭਤੀਤਿ ਆਹ ‘‘ਨਿਗ੍ਰੋਧੋ ਵਿਯ ਪਰਿਮਣ੍ਡਲੋ’’ਤਿ. ਯਾਵਤਕੋ ਅਸ੍ਸਾਤਿ ਯਾਵਤਕ੍ਵਸ੍ਸ ਓ-ਕਾਰਸ੍ਸ ਵ-ਕਾਰਾਦੇਸਂ ਕਤ੍ਵਾ.

ਸਮਵਟ੍ਟਿਤਕ੍ਖਨ੍ਧੋਤਿ ਸਮਂ ਸੁਵਟ੍ਟਿਤਕ੍ਖਨ੍ਧੋ. ਕੋਞ੍ਚਾ ਵਿਯ ਦੀਘਗਲਾ, ਬਕਾ ਵਿਯ ਵਙ੍ਕਗਲਾ, ਵਰਾਹਾ ਵਿਯ ਪੁਥੁਲਗਲਾਤਿ ਯੋਜਨਾ. ਸੁਵਣ੍ਣਾਲ਼ਿਙ੍ਗਸਦਿਸੋਤਿ ਸੁਵਣ੍ਣਮਯਖੁਦ੍ਦਕਮੁਦਿਙ੍ਗਸਦਿਸੋ.

ਰਸਗ੍ਗਸਗ੍ਗੀਤਿ ਮਧੁਰਾਦਿਭੇਦਂ ਰਸਂ ਗਸਨ੍ਤਿ ਅਨ੍ਤੋ ਪਵੇਸਨ੍ਤੀਤਿ ਰਸਗ੍ਗਸਾ ਰਸਗ੍ਗਸਾਨਂ ਅਗ੍ਗਾ ਰਸਗ੍ਗਸਗ੍ਗਾ, ਤਾ ਏਤਸ੍ਸ ਸਨ੍ਤੀਤਿ ਰਸਗ੍ਗਸਗ੍ਗੀ. ਤੇਨਾਤਿ ਓਜਾਯ ਅਫਰਣੇਨ ਹੀਨਧਾਤੁਕਤ੍ਤਾ ਤੇ ਬਹ੍ਵਾਬਾਧਾ ਹੋਨ੍ਤਿ.

ਹਨੂਤਿ ਸਨ੍ਨਿਸ੍ਸਯਦਨ੍ਤਾਧਾਰਸ੍ਸ ਸਮਞ੍ਞਾ, ਤਂ ਭਗਵਤੋ ਸੀਹਸ੍ਸ ਹਨੁ ਵਿਯ, ਤਸ੍ਮਾ ਭਗਵਾ ਸੀਹਹਨੁ. ਤਤ੍ਥ ਯਸ੍ਮਾ ਬੁਦ੍ਧਾਨਂ ਰੂਪਕਾਯਸ੍ਸ, ਧਮ੍ਮਕਾਯਸ੍ਸ ਚ ਉਪਮਾ ਨਾਮ ਹੀਨੂਪਮਾਵ, ਨਤ੍ਥਿ ਸਮਾਨੂਪਮਾ, ਕੁਤੋ ਅਧਿਕੂਪਮਾ, ਤਸ੍ਮਾ ਅਯਮ੍ਪਿ ਹੀਨੂਪਮਾਤਿ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਯਸ੍ਮਾ ਮਹਾਪੁਰਿਸਸ੍ਸ ਹੇਟ੍ਠਿਮਾਨੁਰੂਪਵਸੇਨੇਵ ਉਪਰਿਮਮ੍ਪਿ ਸਣ੍ਠਿਤਂ, ਤਸ੍ਮਾ ਵੁਤ੍ਤਂ ‘‘ਦ੍ਵੇਪਿ ਪਰਿਪੁਣ੍ਣਾਨੀ’’ਤਿ, ਤਞ੍ਚ ਖੋ ਨ ਸਬ੍ਬਸੋ ਪਰਿਮਣ੍ਡਲਤਾਯ, ਅਥ ਖੋ ਤਿਭਾਗਾਵਸੇਸਮਣ੍ਡਲਤਾਯਾਤਿ ਆਹ ‘‘ਦ੍ਵਾਦਸਿਯਾ ਪਕ੍ਖਸ੍ਸ ਚਨ੍ਦਸਦਿਸਾਨੀ’’ਤਿ. ਸਲ੍ਲਕ੍ਖੇਤ੍ਵਾਤਿ ਅਤ੍ਤਨੋ ਲਕ੍ਖਣਸਤ੍ਥਾਨੁਸਾਰੇਨ ਉਪਧਾਰੇਤ੍ਵਾ. ਦਨ੍ਤਾਨਂ ਉਚ੍ਚਨੀਚਤਾ ਅਬ੍ਭਨ੍ਤਰਬਾਹਿਰਪਸ੍ਸਵਸੇਨਪਿ ਵੇਦਿਤਬ੍ਬਾ, ਨ ਅਗ੍ਗਵਸੇਨੇਵ. ਤੇਨਾਹ ‘‘ਅਯਪਟ੍ਟਕੇਨ ਛਿਨ੍ਨਸਙ੍ਖਪਟਲਂ ਵਿਯਾ’’ਤਿ. ਅਯਪਟ੍ਟਕਨ੍ਤਿ ਕਕਚਂ ਅਧਿਪ੍ਪੇਤਂ. ਸਮਾ ਭਵਿਸ੍ਸਨ੍ਤਿ, ਨ ਵਿਸਮਾ, ਸਮਸਣ੍ਠਾਨਾਤਿ ਅਤ੍ਥੋ.

ਸਾਤਿਸਯਂ ਮੁਦੁਦੀਘਪੁਥੁਲਤਾਦਿਪ੍ਪਕਾਰਗੁਣਾ ਹੁਤ੍ਵਾ ਭੂਤਾ ਜਾਤਾਤਿ ਪਭੂਤਾ, ਭ-ਕਾਰਸ੍ਸ ਹ-ਕਾਰਂ ਕਤ੍ਵਾ ਪਹੂਤਾ ਜਿਵ੍ਹਾ ਏਤਸ੍ਸਾਤਿ ਪਹੂਤਜਿਵ੍ਹੋ.

ਵਿਚ੍ਛਿਨ੍ਦਿਤ੍ਵਾ ਵਿਚ੍ਛਿਨ੍ਦਿਤ੍ਵਾ ਪਵਤ੍ਤਸਰਤਾਯ ਛਿਨ੍ਨਸ੍ਸਰਾਪਿ. ਅਨੇਕਾਕਾਰਤਾਯ ਭਿਨ੍ਨਸ੍ਸਰਾਪਿ. ਕਾਕਸ੍ਸ ਵਿਯ ਅਮਨੁਞ੍ਞਸਰਤਾਯ ਕਾਕਸ੍ਸਰਾਪਿ. ਅਪਲਿਬੁਦ੍ਧਤ੍ਤਾਤਿ ਅਨੁਪਦ੍ਦੁਤਵਤ੍ਥੁਕਤ੍ਤਾ, ਵਤ੍ਥੂਤਿ ਚ ਅਕ੍ਖਰੁਪ੍ਪਤ੍ਤਿਟ੍ਠਾਨਂ ਵੇਦਿਤਬ੍ਬਂ. ਅਟ੍ਠਙ੍ਗਸਮਨ੍ਨਾਗਤੋਤਿ ਏਤ੍ਥ ਅਙ੍ਗਾਨਿ ਪਰਤੋ ਆਗਮਿਸ੍ਸਨ੍ਤਿ. ਮਞ੍ਜੁਘੋਸੋਤਿ ਮਧੁਰਸ੍ਸਰੋ.

ਅਭਿਨੀਲਨੇਤ੍ਤੋਤਿ ਅਧਿਕਨੀਲਨੇਤ੍ਤੋ, ਅਧਿਕਤਾ ਚ ਸਾਤਿਸਯਂ ਨੀਲਭਾਵੇਨ ਵੇਦਿਤਬ੍ਬਾ, ਨ ਨੇਤ੍ਤਨੀਲਭਾਵਸ੍ਸੇਵ ਅਧਿਕਭਾਵਤੋਤਿ ਆਹ ‘‘ਨ ਸਕਲਨੀਲਨੇਤ੍ਤੋ’’ਤਿਆਦਿ. ਪੀਤਲੋਹਿਤਵਣ੍ਣਾ ਸੇਤਮਣ੍ਡਲਗਤਰਾਜਿਵਸੇਨ. ਨੀਲਸੇਤਕਾਲ਼ਵਣ੍ਣਾ ਪਨ ਤਂਤਂਮਣ੍ਡਲਵਸੇਨੇਵ ਵੇਦਿਤਬ੍ਬਾ.

‘‘ਚਕ੍ਖੁਭਣ੍ਡਨ੍ਤਿ ਅਕ੍ਖਿਦਲ’’ਨ੍ਤਿ ਕੇਚਿ. ‘‘ਅਕ੍ਖਿਦਲਵਟੁਮ’’ਨ੍ਤਿ ਅਞ੍ਞੇ. ਅਕ੍ਖਿਦਲੇਹਿ ਪਨ ਸਦ੍ਧਿਂ ਅਕ੍ਖਿਬਿਮ੍ਬਨ੍ਤਿ ਵੇਦਿਤਬ੍ਬਂ. ਏਵਞ੍ਹਿ ਵਿਨਿਗ੍ਗਤਗਮ੍ਭੀਰਜੋਤਨਾਪਿ ਯੁਤ੍ਤਾ ਹੋਤਿ. ‘‘ਅਧਿਪ੍ਪੇਤ’’ਨ੍ਤਿ ਇਮਿਨਾ ਅਯਮੇਤ੍ਥ ਅਧਿਪ੍ਪਾਯੋ ਏਕਦੇਸੇਨ ਸਮੁਦਾਯੁਪਲਕ੍ਖਣਞਾਯੇਨਾਤਿ ਦਸ੍ਸੇਤਿ. ਯਸ੍ਮਾ ਪਖੁਮ-ਸਦ੍ਦੋ ਲੋਕੇ ਅਕ੍ਖਿਦਲਲੋਮੇਸੁ ਨਿਰੁਲ਼੍ਹੋ, ਤੇਨੇਵਾਹ ‘‘ਮੁਦੁਸਿਨਿਦ੍ਧਨੀਲਸੁਖੁਮਪਖੁਮਾਚਿਤਾਨਿ ਅਕ੍ਖੀਨੀ’’ਤਿ.

ਕਿਞ੍ਚਾਪਿ ਉਣ੍ਣਾ-ਸਦ੍ਦੋ ਲੋਕੇ ਅਵਿਸੇਸਤੋ ਲੋਮਪਰਿਯਾਯੋ, ਇਧ ਪਨ ਲੋਮਵਿਸੇਸਵਾਚਕੋਤਿ ਆਹ ‘‘ਉਣ੍ਣਾ ਲੋਮ’’ਨ੍ਤਿ. ਨਲਾਟਵੇਮਜ੍ਝੇ ਜਾਤਾਤਿ ਨਲਾਟਮਜ੍ਝਗਤਾ ਜਾਤਾ. ਓਦਾਤਤਾਯ ਉਪਮਾ, ਨ ਮੁਦੁਤਾਯ. ਉਣ੍ਣਾ ਹਿ ਤਤੋਪਿ ਸਾਤਿਸਯਂ ਮੁਦੁਤਰਾ. ਤੇਨਾਹ‘‘ਸਪ੍ਪਿ ਮਣ੍ਡੇ’’ਤਿਆਦਿ. ਰਜਤਪੁਬ੍ਬੁਲ਼ਕਨ੍ਤਿ ਰਜਤਮਯਤਾਰਕਮਾਹ.

ਦ੍ਵੇ ਅਤ੍ਥਵਸੇ ਪਟਿਚ੍ਚ ਵੁਤ੍ਤਨ੍ਤਿ ਯਸ੍ਮਾ ਬੁਦ੍ਧਾ, ਚਕ੍ਕਵਤ੍ਤਿਨੋ ਚ ਪਰਿਪੁਣ੍ਣਨਲਾਟਤਾਯ, ਪਰਿਪੁਣ੍ਣਸੀਸਬਿਮ੍ਬਤਾਯ ਚ ‘‘ਉਣ੍ਹੀਸਸੀਸਾ’’ਤਿ ਵੁਚ੍ਚਨ੍ਤਿ, ਤਸ੍ਮਾ ਤੇ ਦ੍ਵੇ ਅਤ੍ਥਵਸੇ ਪਟਿਚ੍ਚ ‘‘ਉਣ੍ਹੀਸਸੀਸੋ’’ਤਿ ਇਦਂ ਵੁਤ੍ਤਂ. ਇਦਾਨਿ ਤਂ ਅਤ੍ਥਦ੍ਵਯਂ ਮਹਾਪੁਰਿਸੇ ਸੁਪ੍ਪਤਿਟ੍ਠਿਤਨ੍ਤਿ ‘‘ਮਹਾਪੁਰਿਸਸ੍ਸ ਹੀ’’ਤਿਆਦਿ ਵੁਤ੍ਤਂ. ਸਣ੍ਹਤਮਤਾਯ, ਸੁਵਣ੍ਣਵਣ੍ਣਤਾਯ, ਪਭਸ੍ਸਰਤਾਯ, ਪਰਿਪੁਣ੍ਣਤਾਯ ਚ ਰਞ੍ਞੋ ਬਨ੍ਧਉਣ੍ਹੀਸਪਟ੍ਟੋ ਵਿਯ ਵਿਰੋਚਤਿ. ਕਪਿਸੀਸਾਤਿ ਦ੍ਵਿਧਾਭੂਤਸੀਸਾ. ਫਲਸੀਸਾਤਿ ਫਲਿਤਸੀਸਾ. ਅਟ੍ਠਿਸੀਸਾਤਿ ਮਂਸਸ੍ਸ ਅਭਾਵਤੋ ਅਤਿਵਿਯ ਅਟ੍ਠਿਤਾਯ, ਪਤਨੁਭਾਵਤੋ ਵਾ ਤਚੋਨਦ੍ਧਅਟ੍ਠਿਮਤ੍ਤਸੀਸਾ. ਤੁਮ੍ਬਸੀਸਾਤਿ ਲਾਬੁਸਦਿਸਸੀਸਾ. ਪਬ੍ਭਾਰਸੀਸਾਤਿ ਪਿਟ੍ਠਿਭਾਗੇਨ ਓਲਮ੍ਬਮਾਨਸੀਸਾ. ਪੁਰਿਮਨਯੇਨਾਤਿ ਪਰਿਪੁਣ੍ਣਨਲਾਟਤਾਪਕ੍ਖੇਨ. ਉਣ੍ਹੀਸਵੇਠਿਤਸੀਸੋ ਵਿਯਾਤਿ ਉਣ੍ਹੀਸਪਟ੍ਟੇਨ ਵੇਠਿਤਸੀਸਪਦੇਸੋ ਵਿਯ. ਉਣ੍ਹੀਸਂ ਵਿਯਾਤਿ ਛੇਕੇਨ ਸਿਪ੍ਪਿਨਾ ਵਿਰਚਿਤਉਣ੍ਹੀਸਮਣ੍ਡਲਂ ਵਿਯ.

ਵਿਪਸ੍ਸੀਸਮਞ੍ਞਾਵਣ੍ਣਨਾ

੩੭. ਤਸ੍ਸ ਵਿਤ੍ਥਾਰੋਤਿ ਤਸ੍ਸ ਲਕ੍ਖਣਪਰਿਗ੍ਗਣ੍ਹਨੇ ਨੇਮਿਤ੍ਤਕਾਨਂ ਸਨ੍ਤਪ੍ਪਨਸ੍ਸ ਵਿਤ੍ਥਾਰੋ ਵਿਤ੍ਥਾਰਕਥਾ. ਗਬ੍ਭੋਕ੍ਕਨ੍ਤਿਯਂ ਨਿਮਿਤ੍ਤਭੂਤ ਸੁਪਿਨਪਟਿਗ੍ਗਾਹਕਸਨ੍ਤਪ੍ਪਨੇ ਵੁਤ੍ਤੋਯੇਵ. ਨਿਦ੍ਦੋਸੇਨਾਤਿ ਖਾਰਿਕਲੋਣਿਕਾਦਿਦੋਸਰਹਿਤੇਨ. ਧਾਤਿਯੋਤਿ ਥਞ੍ਞਪਾਯਿਕਾ ਧਾਤਿਯੋ. ਤਾ ਹਿ ਧਾਪੇਨ੍ਤਿ ਥਞ੍ਞਂ ਪਾਯੇਨ੍ਤੀਤਿ ਧਾਤਿਯੋ.‘‘ਤਥਾ’’ਤਿ ਇਮਿਨਾ ‘‘ਸਟ੍ਠਿ’’ਨ੍ਤਿ ਪਦਂ ਉਪਸਂਹਰਤਿ, ਸੇਸਾਪੀਤਿ ਨ੍ਹਾਪਿਕਾ, ਧਾਰਿਕਾ, ਪਰਿਹਾਰਿਕਾਤਿ ਇਮਾ ਤਿਵਿਧਾ. ਤਾਪਿ ਦਹਨ੍ਤਿ ਵਿਦਹਨ੍ਤਿ ਨ੍ਹਾਨਂ ਦਹਨ੍ਤਿ ਧਾਰੇਨ੍ਤੀਤਿ ‘‘ਧਾਤਿਯੋ’’ ਤ੍ਵੇਵ ਵੁਚ੍ਚਨ੍ਤਿ. ਤਤ੍ਥ ਧਾਰਣਂ ਉਰਸਾ, ਊਰੁਨਾ, ਹਤ੍ਥੇਹਿ ਵਾ ਸੁਚਿਰਂ ਵੇਲਂ ਸਨ੍ਧਾਰਣਂ. ਪਰਿਹਰਣਂ ਅਞ੍ਞਸ੍ਸ ਅਙ੍ਕਤੋ ਅਤ੍ਤਨੋ ਅਙ੍ਕਂ, ਅਞ੍ਞਸ੍ਸ ਬਾਹੁਤੋ ਅਤ੍ਤਨੋ ਬਾਹੁਂ ਉਪਸਂਹਰਨ੍ਤੇਹਿ ਹਰਣਂ ਸਮ੍ਪਾਪਨਂ.

੩੮. ਮਞ੍ਜੁਸ੍ਸਰੋਤਿ ਸਣ੍ਹਸ੍ਸਰੋ. ਯੋ ਹਿ ਸਣ੍ਹੋ, ਸੋ ਖਰੋ ਨ ਹੋਤੀਤਿ ਆਹ ‘‘ਅਖਰਸ੍ਸਰੋ’’ਤਿ. ਵਗ੍ਗੁਸ੍ਸਰੋਤਿ ਮਨੋਰਮ੍ਮਸ੍ਸਰੋ, ਮਨੋਰਮ੍ਮਤਾ ਚਸ੍ਸ ਚਾਤੁਰਿਯਨੇ ਪੁਞ੍ਞਯੋਗਤੋਤਿ ਆਹ ‘‘ਛੇਕਨਿਪੁਣਸ੍ਸਰੋ’’ਤਿ. ਮਧੁਰਸ੍ਸਰੋਤਿ ਸੋਤਸੁਖਸ੍ਸਰੋ, ਸੋਤਸੁਖਤਾ ਚਸ੍ਸ ਅਤਿਵਿਯ ਇਟ੍ਠਭਾਵੇਨਾਤਿ ਆਹ ‘‘ਸਾਤਸ੍ਸਰੋ’’ਤਿ. ਪੇਮਨੀਯਸ੍ਸਰੋਤਿ ਪਿਯਾਯਿਤਬ੍ਬਸ੍ਸਰੋ, ਪਿਯਾਯਿਤਬ੍ਬਤਾ ਚਸ੍ਸ ਸੁਣਨ੍ਤਾਨਂ ਅਤ੍ਤਨਿ ਭਤ੍ਤਿਸਮੁਪ੍ਪਾਦਨੇਨਾਤਿ ਆਹ ‘‘ਪੇਮਜਨਕਸ੍ਸਰੋ’’ਤਿ. ਕਰਵੀਕਸ੍ਸਰੋਤਿ. ਕਰਵੀਕਸਦ੍ਦੋ ਯੇਸਂ ਸਤ੍ਤਾਨਂ ਸੋਤਪਥਂ ਉਪਗਚ੍ਛਤਿ, ਤੇ ਅਤ੍ਤਨੋ ਸਰਸਮ੍ਪਤ੍ਤਿਯਾ ਪਕਤਿਂ ਜਹਾਪੇਤ੍ਵਾ ਅਵਸੇ ਕਰੋਨ੍ਤੋ ਅਤ੍ਤਨੋ ਵਸੇ ਵਤ੍ਤੇਤਿ, ਏਵਂ ਮਧੁਰੋਤਿ ਦਸ੍ਸੇਨ੍ਤੋ ‘‘ਤਤ੍ਰਿਦ’’ਨ੍ਤਿਆਦਿਮਾਹ. ਤਤ੍ਥ ‘‘ਕਰਵੀਕਸਕੁਣੇ’’ਤਿਆਦਿ ਤਸ੍ਸ ਸਭਾਵਕਥਨਂ. ਲਲ਼ਿਤਨ੍ਤਿ ਪੀਤਿਵੇਗਸਮੁਟ੍ਠਿਤਂ ਲੀਲ਼ਂ. ਛਡ੍ਡੇਤ੍ਵਾਤਿ ‘‘ਸਙ੍ਖਰਣਮ੍ਪਿ ਮਧੁਰਸਦ੍ਦਸਵਨਨ੍ਤਰਾਯਕਰ’’ਨ੍ਤਿ ਤਿਣਾਨਿ ਅਪਨੇਤ੍ਵਾ. ਅਨਿਕ੍ਖਿਪਿਤ੍ਵਾਤਿ ਭੂਮਿਯਂ ਅਨਿਕ੍ਖਿਪਿਤ੍ਵਾ ਆਕਾਸਗਤਮੇਵ ਕਤ੍ਵਾ. ਅਨੁਬਦ੍ਧਮਿਗਾ ਵਾਲ਼ਮਿਗੇਹਿ. ਤਤੋ ਮਰਣਭਯਂ ਹਿਤ੍ਵਾ. ਪਕ੍ਖੇ ਪਸਾਰੇਤ੍ਵਾਤਿ ਪਕ੍ਖੇ ਯਥਾਪਸਾਰਿਤੇ ਕਤ੍ਵਾ ਅਪਤਨ੍ਤਾ ਤਿਟ੍ਠਨ੍ਤਿ.

ਸੁਵਣ੍ਣਪਞ੍ਜਰਂ ਵਿਸ੍ਸਜ੍ਜੇਸਿ ਯੋਜਨਪ੍ਪਮਾਣੇ ਆਕਾਸੇ ਅਤ੍ਤਨੋ ਆਣਾਯ ਪਵਤ੍ਤਨਤੋ. ਤੇਨਾਹ ‘‘ਸੋ ਰਾਜਾਣਾਯਾ’’ਤਿਆਦਿ. ਲਲ਼ਿਂਸੂਤਿ ਲਲ਼ਿਤਂ ਕਾਤੁਂ ਆਰਭਿਂਸੁ. ਤਂ ਪੀਤਿਨ੍ਤਿ ਤਂ ਬੁਦ੍ਧਗੁਣਾਰਮ੍ਮਣਂ ਪੀਤਿਂ ਤੇਨੇਵ ਨੀਹਾਰੇਨ ਪੁਨਪ੍ਪੁਨਂ ਪਵਤ੍ਤਂ ਪੀਤਿਂ ਅਵਿਜਹਿਤ੍ਵਾ ਵਿਕ੍ਖਮ੍ਭਿਤਕਿਲੇਸਾ ਥੇਰਾਨਂ ਸਨ੍ਤਿਕੇ ਲਦ੍ਧਧਮ੍ਮਸ੍ਸਵਨਸਪ੍ਪਾਯਾ ਉਪਨਿਸ੍ਸਯਸਮ੍ਪਤ੍ਤਿਯਾ ਪਰਿਪਕ੍ਕਞਾਣਤਾਯ ਸਤ੍ਤਹਿ…ਪੇ… ਪਤਿਟ੍ਠਾਸਿ. ਸਤ੍ਤਸਤਮਤ੍ਤੇਨ ਓਰੋਧਜਨੇਨ ਸਦ੍ਧਿਂ ਪਦਸਾਵ ਥੇਰਾਨਂ ਸਨ੍ਤਿਕਂ ਉਪਗਤਤ੍ਤਾ ‘‘ਸਤ੍ਤਹਿ ਜਙ੍ਘਸਤੇਹਿ ਸਦ੍ਧਿ’’ਨ੍ਤਿ ਵੁਤ੍ਤਂ. ਤਤੋਤਿ ਕਰਵੀਕਸਦ੍ਦਤੋ. ਸਤਭਾਗੇਨ…ਪੇ… ਵੇਦਿਤਬ੍ਬੋ ਅਨੇਕਕਪ੍ਪਕੋਟਿਸਤਸਮ੍ਭੂਤਪੁਞ੍ਞਸਮ੍ਭਾਰਸਮੁਦਾਗਤਵਤ੍ਥੁਸਮ੍ਪਤ੍ਤਿਭਾਵਤੋ.