ਕਾਮਾਵਚਰਕੁਸਲਂ
ਨਿਦ੍ਦੇਸਵਾਰਕਥਾਵਣ੍ਣਨਾ
੨. ਫੁਸਨਕਵਸੇਨਾਤਿ ਸਨ੍ਤੇ ਅਸਨ੍ਤੇਪਿ ਵਿਸਯੇ ਆਪਾਥਗਤੇ ਚਿਤ੍ਤਸ੍ਸ ਸਨ੍ਨਿਪਤਨਵਸੇਨ ‘‘ਚਿਤ੍ਤਂ ਮਨੋ’’ਤਿਆਦੀਸੁ (ਧ. ਸ. ੬, ੧੭) ਵਿਯ ਕਿਚ੍ਚਵਿਸੇਸਂ, ‘‘ਮਾਨਸ’’ਨ੍ਤਿਆਦੀਸੁ (ਧ. ਸ. ੬, ੧੭) ਵਿਯ ਸਮਾਨੇ ਅਤ੍ਥੇ ਸਦ੍ਦਵਿਸੇਸਂ, ‘‘ਪਣ੍ਡਰ’’ਨ੍ਤਿਆਦੀਸੁ (ਧ. ਸ. ੬, ੧੭) ਵਿਯ ਗੁਣਵਿਸੇਸਂ, ‘‘ਚੇਤਸਿਕਂ ਸਾਤ’’ਨ੍ਤਿਆਦੀਸੁ (ਧ. ਸ. ੨, ੧੮) ਵਿਯ ਨਿਸ੍ਸਯਵਿਸੇਸਂ, ‘‘ਚਿਤ੍ਤਸ੍ਸ ਠਿਤੀ’’ਤਿਆਦੀਸੁ (ਧ. ਸ. ੧੫, ੨੪) ਵਿਯ ਅਞ੍ਞਸ੍ਸ ਅਵਤ੍ਥਾਭਾਵਵਿਸੇਸਂ, ‘‘ਅਲੁਬ੍ਭਨਾ’’ਤਿਆਦੀਸੁ (ਧ. ਸ. ੩੨) ਵਿਯ ਅਞ੍ਞਸ੍ਸ ਕਿਰਿਯਾਭਾਵਵਿਸੇਸਂ, ‘‘ਅਲੁਬ੍ਭਿਤਤ੍ਤ’’ਨ੍ਤਿਆਦੀਸੁ (ਧ. ਸ. ੩੨) ਵਿਯ ਅਞ੍ਞਸ੍ਸ ਕਿਰਿਯਾਭਾਵਭੂਤਤਾਵਿਸੇਸਨ੍ਤਿਆਦਿਕਂ ਅਨਪੇਕ੍ਖਿਤ੍ਵਾ ਧਮ੍ਮਮਤ੍ਤਦੀਪਨਂ ਸਭਾਵਪਦਂ. ਫੁਸਨ੍ਤਸ੍ਸ ਹਿ ਚਿਤ੍ਤਸ੍ਸ ਫੁਸਨਕਿਰਿਯਾ ਫੁਸਨਾਕਾਰੋ. ਸਮ੍ਫੁਸਨਾਤਿ ਆਰਮ੍ਮਣਸਮਾਗਮਫੁਸਨਾ, ਨ ਪਟਿਲਾਭਸਮ੍ਫੁਸਨਾ. ਸਮ੍ਫੁਸਿਤਸ੍ਸ ਆਰਮ੍ਮਣੇਨ ਸਮਾਗਤਸ੍ਸ ਚਿਤ੍ਤਸ੍ਸ ਭਾਵੋ ਸਮ੍ਫੁਸਿਤਤ੍ਤਂ. ਯਸ੍ਮਿਂ ਸਤਿ ਚਿਤ੍ਤਂ ਸਮ੍ਫੁਸਿਤਨ੍ਤਿ ਵੁਚ੍ਚਤਿ, ਸੋ ਤਸ੍ਸ ਭਾਵੋ. ਏਵਂ ਅਞ੍ਞੇਸੁਪਿ ਭਾਵਨਿਦ੍ਦੇਸੇਸੁ ਦਟ੍ਠਬ੍ਬਂ.
ਅਪਰਸ੍ਸ ਵੇਵਚਨਸ੍ਸ, ਅਪਰੇਨ ਵਾ ਪੁਰਿਮਤ੍ਥਸ੍ਸ ਦੀਪਨਾ ਅਪਰਦੀਪਨਾ. ‘‘ਪਣ੍ਡਿਚ੍ਚਂ ਕੋਸਲ੍ਲ’’ਨ੍ਤਿ ਏਵਮਾਦਯੋ ਪਞ੍ਞਾਵਿਸੇਸਾ ਨਾਨਾਕਾਲੇ ਲਬ੍ਭਮਾਨਾਪਿ ਏਕਸ੍ਮਿਂ ਚਿਤ੍ਤੇ ਲਬ੍ਭਨ੍ਤਿ. ਏਕਸ੍ਮਿਞ੍ਚ ਵਿਸੇਸੇ ਇਤਰੇਪਿ ਅਨੁਗਤਾ ਹੋਨ੍ਤੀਤਿ ਦਸ੍ਸੇਤੁਂ ਤਥਾ ਵਿਭਤ੍ਤਿ ਅਤ੍ਥਤੋ ਵਿਭਤ੍ਤਿ ਹੋਤਿ ਅਤ੍ਥਨਾਨਤ੍ਤੇਨ ਕਤਤ੍ਤਾ. ਅਥ ਵਾ ਯਥਾ ‘‘ਕੋਧੋ ਕੁਜ੍ਝਨਾ ਕੁਜ੍ਝਿਤਤ੍ਤ’’ਨ੍ਤਿ (ਧ. ਸ. ੧੦੬੬) ਸਭਾਵਾਕਾਰਭਾਵਨਿਦ੍ਦੇਸੇਹਿ ਕੋਧੋਤਿ ਏਵਮਾਕਾਰੋਵ ਅਤ੍ਥੋ ਵੁਤ੍ਤੋ, ਨ ਏਵਮਿਧ, ਇਧ ਪਨ ਪਣ੍ਡਿਤਾਦਿਭਾਵਾਕਾਰਭਿਨ੍ਨੋ ਅਤ੍ਥੋ ਵੁਤ੍ਤੋਤਿ ਇਦਂ ਵਿਭਤ੍ਤਿਗਮਨਂ ਅਤ੍ਥਵਸੇਨ ਹੋਤਿ. ਸਮ੍ਫੁਸਿਤਤ੍ਤਨ੍ਤਿ ਏਤ੍ਥਾਪਿ ਨ ‘‘ਫਸ੍ਸੋ’’ਤਿ ਏਵਮਾਕਾਰੋਵ ਅਤ੍ਥੋ ਵੁਤ੍ਤੋ. ਸਮ੍ਫਸ੍ਸੋਤਿ ਏਵਮਾਕਾਰੋ ਪਨ ਵੁਤ੍ਤੋਤਿ ਅਤ੍ਥਤੋ ਵਿਭਤ੍ਤਿਗਮਨਨ੍ਤਿ ਵੁਤ੍ਤਂ.
ਦੋਸੋ ਬ੍ਯਾਪਾਦੋਤਿ ਉਦ੍ਦੇਸੇਪਿ ਨਾਮਨਾਨਤ੍ਤੇਨ ਨਾਨਾਭੂਤੋ ਉਦ੍ਦਿਟ੍ਠੋ. ਨਿਦ੍ਦੇਸੇਪਿ ਤੇਨੇਵ ਨਾਨਤ੍ਤੇਨ ਨਿਦ੍ਦਿਟ੍ਠੋ. ਏਕੋਵ ਖਨ੍ਧੋ ਹੋਤੀਤਿ ਏਕੇਨ ਖਨ੍ਧਸਦ੍ਦੇਨ ਵਤ੍ਤਬ੍ਬਤਂ ਸਨ੍ਧਾਯਾਹ. ਚੇਤਨਾਤਿ ਸਙ੍ਖਾਰਕ੍ਖਨ੍ਧਂ ਦਸ੍ਸੇਤਿ ਤਪ੍ਪਮੁਖਤ੍ਤਾ. ਅਸਦ੍ਧਮ੍ਮਾਤਿ ਅਸਤਂ, ਅਸਨ੍ਤੋ ਵਾ ਧਮ੍ਮਾ, ਨ ਵਾ ਸਦ੍ਧਮ੍ਮਾਤਿ ਅਸਦ੍ਧਮ੍ਮਾਤਿ ਅਸਦ੍ਧਮ੍ਮਵਚਨੀਯਭਾਵੇਨ ਏਕੀਭੂਤੋਪਿ ਅਸਦ੍ਧਮ੍ਮੋ ਕੋਧਗਰੁਤਾਦਿਵਿਸਿਟ੍ਠੇਨ ਸਦ੍ਧਮ੍ਮਗਰੁਤਾਪਟਿਕ੍ਖੇਪਨਾਨਤ੍ਤੇਨ ਨਾਨਤ੍ਤਂ ਗਤੋਤਿ ‘‘ਚਤ੍ਤਾਰੋ’’ਤਿ ਵੁਤ੍ਤਂ. ਨ ਸਦ੍ਧਮ੍ਮਗਰੁਤਾਤਿ ਵੁਚ੍ਚਮਾਨਾ ਵਾ ਅਸਦ੍ਧਮ੍ਮਗਰੁਤਾ ਅਸਦ੍ਧਮ੍ਮਗਰੁਤਾਭਾਵੇਨ ਏਕੀਭੂਤਾਪਿ ਕੋਧਾਦਿਵਿਸਿਟ੍ਠਪਟਿਕ੍ਖੇਪਨਾਨਤ੍ਤੇਨ ਨਾਨਤ੍ਤਂ ਗਤਾ. ਪਟਿਪਕ੍ਖੋ ਵਾ ਪਟਿਕ੍ਖਿਪੀਯਤਿ ਤੇਨ, ਸਯਂ ਵਾ ਪਟਿਕ੍ਖਿਪਤੀਤਿ ਪਟਿਕ੍ਖੇਪੋਤਿ ਵੁਚ੍ਚਤੀਤਿ ਸਦ੍ਧਮ੍ਮਗਰੁਤਾਪਟਿਕ੍ਖੇਪਨਾਨਤ੍ਤੇਨ ਅਸਦ੍ਧਮ੍ਮਗਰੁਤਾ ਅਸਦ੍ਧਮ੍ਮਾ ਵਾ ਨਾਨਤ੍ਤਂ ਗਤਾ. ਅਲੋਭੋਤਿਆਦੀਨਂ ਫਸ੍ਸਾਦੀਹਿ ਨਾਨਤ੍ਤਂ ਲੋਭਾਦਿਵਿਸਿਟ੍ਠੇਨ ਪਟਿਕ੍ਖੇਪੇਨ ਲੋਭਾਦਿਪਟਿਪਕ੍ਖੇਨ ਵਾ ਵੇਦਿਤਬ੍ਬਂ. ਅਲੋਭਾਦੋਸਾਮੋਹਾਨਂ ਅਞ੍ਞਮਞ੍ਞਨਾਨਤ੍ਤਂ ਯਥਾਵੁਤ੍ਤੇਨ ਪਟਿਕ੍ਖੇਪਨਾਨਤ੍ਤੇਨ ਯੋਜੇਤਬ੍ਬਂ. ਪਦਤ੍ਥਸ੍ਸ ਪਦਨ੍ਤਰੇਨ ਵਿਭਾਵਨਂ ਪਦਤ੍ਥੁਤਿ. ਤੇਨ ਹਿ ਤਂ ਪਦਂ ਮਹਤ੍ਥਨ੍ਤਿ ਦੀਪਿਤਂ ਹੋਤਿ ਅਲਙ੍ਕਤਞ੍ਚਾਤਿ. ਅਤ੍ਥਵਿਸੇਸਾਭਾਵੇਪਿ ਆਭਰਣਵਸੇਨ ਚ ਆਦਰਵਸੇਨ ਚ ਪੁਨ ਵਚਨਂ ਦਲ਼੍ਹੀਕਮ੍ਮਂ.
੩. ਤਜ੍ਜਨ੍ਤਿ ਤਸ੍ਸ ਫਲਸ੍ਸ ਅਨੁਚ੍ਛਵਿਕਂ. ਨ ਕੇਵਲਂ ਨਿਦ੍ਦਿਸਿਯਮਾਨਂ ਸਾਤਮੇਵ ਅਧਿਕਤਂ, ਅਥ ਖੋ ਯਥਾਨਿਦ੍ਦਿਟ੍ਠਾਨਿ ਆਰਮ੍ਮਣਾਨਿਪੀਤਿ ‘‘ਤੇਹਿ ਵਾ’’ਤਿਆਦਿ ਵੁਤ੍ਤਂ. ਤਸ੍ਸ ਵਾ ਜਾਤਾ ਕਾਰਣਭਾਵੇਨ ਫਸ੍ਸਤ੍ਥਂ ਪਵਤ੍ਤਾਤਿ ਤਜ੍ਜਾ. ਤਂਸਮਙ੍ਗੀਪੁਗ੍ਗਲਂ, ਸਮ੍ਪਯੁਤ੍ਤਧਮ੍ਮੇ ਵਾ ਅਤ੍ਤਨਿ ਸਾਦਯਤੀਤਿ ਸਾਤਂ ਦ-ਕਾਰਸ੍ਸ ਤ-ਕਾਰਂ ਕਤ੍ਵਾ. ਸੁਟ੍ਠੁ ਖਾਦਤਿ, ਖਣਤਿ ਵਾ ਦੁਕ੍ਖਨ੍ਤਿ ਸੁਖਂ.
੫. ਪਾਸੋਤਿ ਰਾਗਪਾਸੋ. ਸੋ ਹਿ ਨਿਰਾਵਰਣਤ੍ਤਾ ਅਨ੍ਤਲਿਕ੍ਖਚਰੋ. ਅਕੁਸਲਮ੍ਪਿ ਪਣ੍ਡਰਨ੍ਤਿ ਵੁਤ੍ਤਂ, ਕੋ ਪਨ ਵਾਦੋ ਕੁਸਲਨ੍ਤਿ ਅਧਿਪ੍ਪਾਯੋ. ਤਞ੍ਹਿ ਪਣ੍ਡਰਤੋ ਨਿਕ੍ਖਨ੍ਤਂ ਸਯਞ੍ਚ ਪਣ੍ਡਰਨ੍ਤਿ. ਅਥ ਵਾ ਸਬ੍ਬਮ੍ਪਿ ਚਿਤ੍ਤਂ ਸਭਾਵਤੋ ਪਣ੍ਡਰਮੇਵ, ਆਗਨ੍ਤੁਕੋਪਕ੍ਕਿਲੇਸਵੋਦਾਨੇਹਿ ਪਨ ਸਾਵਜ੍ਜਾਨਵਜ੍ਜਾਨਂ ਉਪਕ੍ਕਿਲਿਟ੍ਠਵਿਸੁਦ੍ਧਤਰਤਾ ਹੋਨ੍ਤੀਤਿ. ਦਾਰੁਪ੍ਪਮਾਣੇਸੁ ਸਿਲਾਦੀਸੁ ਖਨ੍ਧਪਞ੍ਞਤ੍ਤਿਯਾ ਅਭਾਵਾ ਕਿਞ੍ਚਿ ਨਿਮਿਤ੍ਤਂ ਅਨਪੇਕ੍ਖਿਤ੍ਵਾ ਦਾਰੁਮ੍ਹਿ ਪਵਤ੍ਤਾ ਖਨ੍ਧਪਞ੍ਞਤ੍ਤੀਤਿ ‘‘ਪਣ੍ਣਤ੍ਤਿਮਤ੍ਤਟ੍ਠੇਨਾ’’ਤਿ ਵੁਤ੍ਤਂ. ਤਂ-ਸਦ੍ਦੇਨ ਮਨੋਵਿਞ੍ਞਾਣਧਾਤੁਯੇਵ ਵੁਚ੍ਚੇਯ੍ਯ ਨਿਦ੍ਦਿਸਿਤਬ੍ਬਤ੍ਤਾਤਿ ਨ ਤਸ੍ਸਾ ਤਜ੍ਜਤਾ. ਤੇਹਿ ਆਰਮ੍ਮਣੇਹਿ ਜਾਤਾ ਤਜ੍ਜਾਤਿ ਚ ਵੁਚ੍ਚਮਾਨੇ ਸਮ੍ਫਸ੍ਸਜਤਾ ਨ ਵਤ੍ਤਬ੍ਬਾ. ਨ ਹਿ ਸੋ ਆਰਮ੍ਮਣਂ, ਨਾਪਿ ਵਿਸੇਸਪਚ੍ਚਯੋ. ‘‘ਤਿਣ੍ਣਂ ਸਙ੍ਗਤਿ ਫਸ੍ਸੋ’’ਤਿ ਵਿਞ੍ਞਾਣਮੇਵ ਫਸ੍ਸਸ੍ਸ ਵਿਸੇਸਪਚ੍ਚਯੋਤਿ ਵੁਤ੍ਤੋਤਿ ਤਸ੍ਮਾ ਨ ਵਿਞ੍ਞਾਣਂ ਵਿਸੇਸਪਚ੍ਚਯਭੂਤਂ ਸਮ੍ਫਸ੍ਸਜਤਾਯ ਤਜ੍ਜਾਮਨੋਵਿਞ੍ਞਾਣਧਾਤੁਸਮ੍ਫਸ੍ਸਜਾਪਞ੍ਞਤ੍ਤਿਂ ਲਭਤਿ, ਨ ਚ ਤਦੇਵ ਤਸ੍ਸ ਕਾਰਣਭਾਵੇਨ ਫਲਭਾਵੇਨ ਚ ਵੁਚ੍ਚਮਾਨਂ ਸੁਵਿਞ੍ਞੇਯ੍ਯਂ ਹੋਤੀਤਿ. ਕਿਂ ਵਾ ਏਤੇਨ, ਯਥਾ ਭਗਵਤਾ ਵੁਤ੍ਤਾ ਤਂਸਭਾਵਾਯੇਵ ਤੇ ਧਮ੍ਮਾਤਿ ਨ ਏਵਂਵਿਧੇਸੁ ਕਾਰਣਂ ਮਗ੍ਗਿਤਬ੍ਬਂ.
੭. ਏਵਂ ਤਕ੍ਕਨਵਸੇਨ ਲੋਕਸਿਦ੍ਧੇਨਾਤਿ ਅਧਿਪ੍ਪਾਯੋ. ਏਵਞ੍ਚੇਵਞ੍ਚ ਭਵਿਤਬ੍ਬਨ੍ਤਿ ਵਿਵਿਧਂ ਤਕ੍ਕਨਂ ਕੂਪੇ ਵਿਯ ਉਦਕਸ੍ਸ ਆਰਮ੍ਮਣਸ੍ਸ ਆਕਡ੍ਢਨਂ ਵਿਤਕ੍ਕਨਂ.
੮. ਸਮਨ੍ਤਤੋ ਚਰਣਂ ਵਿਚਰਣਂ.
੯. ਅਤ੍ਤਮਨਤਾਤਿ ਏਤ੍ਥ ਅਤ੍ਤ-ਸਦ੍ਦੇਨ ਨ ਚਿਤ੍ਤਂ ਵੁਤ੍ਤਂ. ਨ ਹਿ ਚਿਤ੍ਤਸ੍ਸ ਮਨੋ ਅਤ੍ਥੀਤਿ. ਅਤ੍ਤਮਨਸ੍ਸ ਪਨ ਪੁਗ੍ਗਲਸ੍ਸ ਭਾਵੋ ਅਤ੍ਤਮਨਤਾਤਿ ਵਤ੍ਵਾ ਪੁਨ ਪੁਗ੍ਗਲਦਿਟ੍ਠਿਨਿਸੇਧਨਤ੍ਥਂ ‘‘ਚਿਤ੍ਤਸ੍ਸਾ’’ਤਿ ਵੁਤ੍ਤਂ.
੧੧. ਨ ਬਲਵਤੀ, ਕਸ੍ਮਾ ਅਵਟ੍ਠਿਤਿ ਵੁਤ੍ਤਾਤਿ? ਏਕਗ੍ਗਚਿਤ੍ਤੇਨ ਪਾਣਵਧਾਦਿਕਰਣੇ ਤਥਾ ਅਵਟ੍ਠਾਨਮਤ੍ਤਭਾਵਤੋ. ਵਿਰੂਪਂ, ਵਿਵਿਧਂ ਵਾ ਸਂਹਰਣਂ ਵਿਕਿਰਣਂ ਵਿਸਾਹਾਰੋ, ਸਂਹਰਣਂ ਵਾ ਸਮ੍ਪਿਣ੍ਡਨਂ, ਤਦਭਾਵੋ ਵਿਸਾਹਾਰੋ.
੧੨. ਅਞ੍ਞਸ੍ਮਿਂ ਪਰਿਯਾਯੇਤਿ ਅਞ੍ਞਸ੍ਮਿਂ ਕਾਰਣੇ. ਸਮਾਨਾਧਿਕਰਣਭਾਵੋ ਦ੍ਵਿਨ੍ਨਂ ਬਹੂਨਂ ਵਾ ਪਦਾਨਂ ਏਕਸ੍ਮਿਂ ਅਤ੍ਥੇ ਪਵਤ੍ਤਿ.
੧੩. ਆਰਮ੍ਭਤਿ ਚਾਤਿ ਆਪਜ੍ਜਤਿ ਚ. ਉਦ੍ਧਂ ਯਮਨਂ ਉਯ੍ਯਾਮੋ. ਧੁਰਨ੍ਤਿ ਨਿਪ੍ਫਾਦੇਤੁਂ ਆਰਦ੍ਧਂ ਕੁਸਲਂ, ਪਟਿਞ੍ਞਂ ਵਾ.
੧੪. ਤਿਣ੍ਣਨ੍ਤਿ ਬੁਦ੍ਧਾਦੀਨਂ. ਚਿਤ੍ਤੇ ਆਰਮ੍ਮਣਸ੍ਸ ਉਪਟ੍ਠਾਨਂ ਜੋਤਨਞ੍ਚ ਸਤਿਯੇਵਾਤਿ ਤਸ੍ਸਾ ਏਤਂ ਲਕ੍ਖਣਂ.
੧੬. ਪਾਸਾਣਸਕ੍ਖਰਵਾਲਿਕਾਦਿਰਹਿਤਾ ਭੂਮਿ ਸਣ੍ਹਾਤਿ ‘‘ਸਣ੍ਹਟ੍ਠੇਨਾ’’ਤਿ ਵੁਤ੍ਤਂ.
੧੯. ਅਯਨ੍ਤੀਤਿ ਏਕਕਮ੍ਮਨਿਬ੍ਬਤ੍ਤਮਨੁਸ੍ਸਾਦਿਸਨ੍ਤਤਿਅਵਿਚ੍ਛੇਦਵਸੇਨ ਪਵਤ੍ਤਨ੍ਤਿ. ਕੁਸਲਾਕੁਸਲੇਸੁਪਿ ਹਿ ਜੀਵਿਤਂ ਇਨ੍ਦ੍ਰਿਯਪਚ੍ਚਯਭਾਵੇਨ ਸਮ੍ਪਯੁਤ੍ਤੇ ਪਵਤ੍ਤਯਮਾਨਮੇਵ ਤਦਵਿਚ੍ਛੇਦਸ੍ਸ ਪਚ੍ਚਯੋ ਹੋਤਿ.
੩੦. ਯਂ ਹਿਰੀਯਤੀਤਿ ਹਿਰੀਯਤਿ-ਸਦ੍ਦੇਨ ਵੁਤ੍ਤੋ ਭਾਵੋ ਯਂ-ਸਦ੍ਦੇਨ ਵੁਚ੍ਚਤੀਤਿ ਯਨ੍ਤਿ ਭਾਵਨਪੁਂਸਕਂ ਵਾ ਏਤਂ ਦਟ੍ਠਬ੍ਬਂ. ਹਿਰਿਯਿਤਬ੍ਬੇਨਾਤਿ ਚ ਹੇਤੁਅਤ੍ਥੇ ਕਰਣਵਚਨਂ ਯੁਜ੍ਜਤਿ.
੩੨. ਅਲੁਬ੍ਭਨਕਵਸੇਨਾਤਿ ਏਤ੍ਥ ਅਲੁਬ੍ਭਨਮੇਵ ਅਲੁਬ੍ਭਨਕਨ੍ਤਿ ਭਾਵਨਿਦ੍ਦੇਸੋ ਦਟ੍ਠਬ੍ਬੋ.
੩੩. ਅਬ੍ਯਾਪਜ੍ਜੋਤਿ ਬ੍ਯਾਪਾਦੇਨ ਦੁਕ੍ਖੇਨ ਦੋਮਨਸ੍ਸਸਙ੍ਖਾਤੇਨ ਦੋਸੇਨ ਵਿਯ ਨ ਬ੍ਯਾਪਾਦੇਤਬ੍ਬੋਤਿਪਿ ਅਤ੍ਥੋ ਯੁਜ੍ਜਤਿ.
੪੨-੪੩. ਥਿਨਮਿਦ੍ਧਾਦਿਪਟਿਪਕ੍ਖਭਾਵੇਨ ਕੁਸਲਧਮ੍ਮੇ ਅਨਿਚ੍ਚਾਦਿਮਨਸਿਕਾਰੇ ਚ ਸੀਘਂ ਸੀਘਂ ਪਰਿਵਤ੍ਤਨਸਮਤ੍ਥਤਾ ਲਹੁਪਰਿਣਾਮਤਾ, ਅਵਿਜ੍ਜਾਨੀਵਰਣਾਨਞ੍ਹਿ ਤਣ੍ਹਾਸਂਯੋਜਨਾਨਂ ਸਤ੍ਤਾਨਂ ਅਕੁਸਲਪ੍ਪਵਤ੍ਤਿ ਪਕਤਿਭੂਤਾਤਿ ਨ ਤਤ੍ਥ ਲਹੁਪਰਿਣਾਮਤਾਯ ਅਤ੍ਥੋ. ਤੇਸਞ੍ਚ ਭਾਵੋ ਗਰੁਤਾਯੇਵਾਤਿ ਤਬ੍ਬਿਧੁਰਸਭਾਵਾਨਂ ਲਹੁਤਾ ਦਟ੍ਠਬ੍ਬਾ. ਸਾ ਹਿ ਪਵਤ੍ਤਮਾਨਾ ਸੀਘਂ ਭਵਙ੍ਗਵੁਟ੍ਠਾਨਸ੍ਸ ਪਚ੍ਚਯੋ ਹੋਤਿ.
੪੪-੪੫. ਯੇ ਚ ਧਮ੍ਮਾ ਮੋਹਸਮ੍ਪਯੁਤ੍ਤਾ ਵਿਯ ਅਵਿਪਨ੍ਨਲਹੁਤਾ, ਤੇਸਞ੍ਚ ਕੁਸਲਕਰਣੇ ਅਪ੍ਪਟਿਘਾਤੋ ਮੁਦੁਤਾ. ਅਪ੍ਪਟਿਘਾਤੇਨ ਮੁਦੁਤਾਦਿਰੂਪਸਦਿਸਤਾਯ ਅਰੂਪਧਮ੍ਮਾਨਮ੍ਪਿ ਮੁਦੁਤਾ ਮਦ੍ਦਵਤਾਤਿਆਦਿ ਵੁਤ੍ਤਂ.
੪੬-੪੭. ਸਿਨੇਹਵਸੇਨ ਕਿਲਿਨ੍ਨਂ ਅਤਿਮੁਦੁਕਂ ਚਿਤ੍ਤਂ ਅਕਮ੍ਮਞ੍ਞਂ ਹੋਤਿ ਵਿਲੀਨਂ ਵਿਯ ਸੁਵਣ੍ਣਂ, ਮਾਨਾਦਿਵਸੇਨ ਅਤਿਥਦ੍ਧਞ੍ਚ ਅਤਾਪਿਤਂ ਵਿਯ ਸੁਵਣ੍ਣਂ, ਯਂ ਪਨਾਨੁਰੂਪਮੁਦੁਤਾਯੁਤ੍ਤਂ, ਤਂ ਕਮ੍ਮਞ੍ਞਂ ਹੋਤਿ ਯੁਤ੍ਤਮਦ੍ਦਵਂ ਵਿਯ ਸੁਵਣ੍ਣਂ. ਤਸ੍ਸੇਵ ਮੁਦੁਕਸ੍ਸ ਯੋ ਕਮ੍ਮਞ੍ਞਾਕਾਰੋ, ਸਾ ਕਮ੍ਮਞ੍ਞਤਾਤਿ ਮੁਦੁਤਾਵਿਸਿਟ੍ਠਾ ਕਮ੍ਮਞ੍ਞਤਾ ਵੇਦਿਤਬ੍ਬਾ.
੫੦-੫੧. ਪਚ੍ਚੋਸਕ੍ਕਨਭਾਵੇਨ ਪਵਤ੍ਤਂ ਅਕੁਸਲਮੇਵ ਪਚ੍ਚੋਸਕ੍ਕਨਂ. ਏਕਵੀਸਤਿ ਅਨੇਸਨਾ ਨਾਮ ਵੇਜ੍ਜਕਮ੍ਮਂ ਕਰੋਤਿ, ਦੂਤਕਮ੍ਮਂ ਕਰੋਤਿ, ਪਹਿਣਕਮ੍ਮਂ ਕਰੋਤਿ, ਗਣ੍ਡਂ ਫਾਲੇਤਿ, ਅਰੁਮਕ੍ਖਨਂ ਦੇਤਿ, ਉਦ੍ਧਂਵਿਰੇਚਨਂ ਦੇਤਿ, ਅਧੋਵਿਰੇਚਨਂ ਦੇਤਿ, ਨਤ੍ਥੁਤੇਲਂ ਪਚਤਿ, ਚਕ੍ਖੁਤੇਲਂ ਪਚਤਿ, ਵੇਲ਼ੁਦਾਨਂ ਦੇਤਿ, ਪਣ੍ਣਦਾਨਂ ਦੇਤਿ, ਪੁਪ੍ਫਦਾਨਂ ਦੇਤਿ, ਫਲਦਾਨਂ ਦੇਤਿ, ਸਿਨਾਨਦਾਨਂ ਦੇਤਿ, ਦਨ੍ਤਕਟ੍ਠਦਾਨਂ ਦੇਤਿ, ਮੁਖੋਦਕਦਾਨਂ ਦੇਤਿ, ਚੁਣ੍ਣਦਾਨਂ ਦੇਤਿ, ਮਤ੍ਤਿਕਾਦਾਨਂ ਦੇਤਿ, ਚਾਟੁਕਕਮ੍ਮਂ ਕਰੋਤਿ, ਮੁਗ੍ਗਸੂਪਿਯਂ, ਪਾਰਿਭਟ੍ਯਂ, ਜਙ੍ਘਪੇਸਨਿਯਂ ਦ੍ਵਾਵੀਸਤਿਮਂ ਦੂਤਕਮ੍ਮੇਨ ਸਦਿਸਂ, ਤਸ੍ਮਾ ਏਕਵੀਸਤਿ. ਛ ਅਗੋਚਰਾ ਵੇਸਿਯਾਗੋਚਰੋ, ਵਿਧਵਾ, ਥੁਲ੍ਲਕੁਮਾਰੀ, ਪਣ੍ਡਕ, ਪਾਨਾਗਾਰ, ਭਿਕ੍ਖੁਨੀਅਗੋਚਰੋਤਿ. ਸਙ੍ਖੇਪਤੋਤਿ ਸਰੂਪੇਨ ਅਨੁਦ੍ਦਿਟ੍ਠਤ੍ਤਾ ‘‘ਤਤ੍ਥ ਕਤਮੋ ਛਨ੍ਦੋ’’ਤਿਆਦਿ ਨ ਸਕ੍ਕਾ ਵਤ੍ਤੁਨ੍ਤਿ ‘‘ਯੋ ਛਨ੍ਦੋ ਛਨ੍ਦਿਕਤਾ’’ਤਿਆਦਿਨਿਦ੍ਦੇਸਂ ਸਙ੍ਖਿਪਿਤ੍ਵਾ ‘‘ਯੇ ਵਾ ਪਨਾ’’ਤਿ ਨਿਦ੍ਦੇਸੋ ਕਤੋਤਿ ਅਤ੍ਥੋ.
ਨਿਦ੍ਦੇਸਵਾਰਕਥਾਵਣ੍ਣਨਾ ਨਿਟ੍ਠਿਤਾ.
ਕੋਟ੍ਠਾਸਵਾਰਵਣ੍ਣਨਾ
੫੮-੧੨੦. ਨਿਦ੍ਦੇਸਵਾਰੇ ਪੁਚ੍ਛਾਦੀਨਂ ਪਚ੍ਚੇਕਂ ਅਨੇਕਤ੍ਤੇਪਿ ਪੁਚ੍ਛਾਦਿਭਾਵੇਨ ਏਕਤ੍ਤਂ ਉਪਨੇਤ੍ਵਾ ਚਤੁਪਰਿਚ੍ਛੇਦਤਾ ਵੁਤ੍ਤਾ. ਚਤ੍ਤਾਰੋ ਦ੍ਵੇਤਿ ਏਵਮਾਦਿਕਂ ਸਙ੍ਖਿਪਿਤ੍ਵਾ ਸਹ ਵਾ ਗਹਣਂ ਸਙ੍ਗਹੋ. ਠਪੇਤ੍ਵਾ ਯੇਵਾਪਨਕੇਤਿ ਸਙ੍ਗਹੇਤਬ੍ਬੇ ਸਨ੍ਧਾਯ ਵੁਤ੍ਤਂ. ਤੇ ਹਿ ਵਿਸੁਂ ਵਿਸੁਂ ਉਦ੍ਦਿਟ੍ਠਤ੍ਤਾ ਨਿਦ੍ਦਿਟ੍ਠਤ੍ਤਾ ਚ ਵਿਪ੍ਪਕਿਣ੍ਣਾਤਿ ਸਙ੍ਗਹੇਤਬ੍ਬਾ ਹੋਨ੍ਤਿ, ਨ ਯੇਵਾਪਨਕਾ ਸਙ੍ਗਹਗਮਨੇਨੇਵ ਤਥਾ ਅਵਿਪ੍ਪਕਿਣ੍ਣਤ੍ਤਾ. ਯਸ੍ਮਾ ਪਨ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਹੋਨ੍ਤਿ, ਤਸ੍ਮਾ ਤਂਨਿਦ੍ਦੇਸੇ ਅਖਨ੍ਧਭਾਵਨਿਵਾਰਣਤ੍ਥਂ ਯੇਵਾਪਨਾਤ੍ਵੇਵ ਵੁਤ੍ਤਾਤਿ ਨ ਯੇਵਾਪਨਕਾ ਠਪੇਤਬ੍ਬਾਤਿ. ਪਚ੍ਚਯਸਙ੍ਖਾਤੇਨਾਤਿ ਆਹਾਰਪਚ੍ਚਯਸਙ੍ਖਾਤੇਨਾਤਿ ਵੁਤ੍ਤਂ ਹੋਤਿ. ਅਥ ਵਾ ‘‘ਹੇਤੁ ਪਚ੍ਚਯੋ’’ਤਿ ਏਤੇਸੁ ਦ੍ਵੀਸੁ ਜਨਕੋ ਹੇਤੁ ਉਪਤ੍ਥਮ੍ਭਕੋ ਪਚ੍ਚਯੋਤਿ ਏਵਂ ਵਿਸੇਸਵਨ੍ਤੇਸੁ ਪਚ੍ਚਯਸਙ੍ਖਾਤੇਨ. ਯਥਾ ਹਿ ਕਬਲ਼ੀਕਾਰਾਹਾਰੋ ਓਜਟ੍ਠਮਕਰੂਪਾਹਰਣੇਨ ਰੂਪਕਾਯਂ ਉਪਤ੍ਥਮ੍ਭੇਤਿ, ਏਵਮਿਮੇਪਿ ਵੇਦਨਾਦਿਆਹਰਣੇਨ ਨਾਮਕਾਯਨ੍ਤਿ. ਤਥਾ ਚ ਹੋਨ੍ਤੀਤਿ ਸਾਧਾਰਣੇ ਸਹਜਾਤਾਦਿਪਚ੍ਚਯੇ ਸਨ੍ਧਾਯਾਹ. ਅਞ੍ਞਥਾ ਚਾਤਿ ਅਞ੍ਞੇਨ ਚ ਏਕੇਨਾਕਾਰੇਨ ਪਚ੍ਚਯਾ ਹੋਨ੍ਤਿਯੇਵਾਤਿ ਆਹਾਰਾਤਿ ਵੁਚ੍ਚਨ੍ਤੀਤਿ ਅਤ੍ਥੋ. ਤਸ੍ਮਾ ਆਹਰਣਕਿਚ੍ਚਰਹਿਤਾਨਂ ਹੇਤੁਅਧਿਪਤਿਆਦੀਨਂ ਨਤ੍ਥਿ ਆਹਾਰਭਾਵਪ੍ਪਸਙ੍ਗੋ. ਤਿਸ੍ਸੋ ਚ ਵੇਦਨਾ ਆਹਰਤੀਤਿਆਦਿ ਯਥਾਸਮ੍ਭਵਵਸੇਨ ਵੁਤ੍ਤਂ, ਨ ਇਮਸ੍ਮਿਂਯੇਵ ਚਿਤ੍ਤੇ ਫਸ੍ਸਾਦਿਵਸੇਨ. ਤਯੋ ਚ ਭਵੇਤਿ ਕਾਮਾਦਿਭਵਭੂਤਂ ਵਿਞ੍ਞਾਣਂ ਵਿਸੇਸੇਨ, ਅਵਿਸੇਸੇਨ ਚ ਪਞ੍ਚੁਪਾਦਾਨਕ੍ਖਨ੍ਧੇ.
ਆਰਮ੍ਮਣਂ ਉਪਗਨ੍ਤ੍ਵਾ ਨਿਜ੍ਝਾਯਨਂ ਚਿਨ੍ਤਨਂ ਉਪਨਿਜ੍ਝਾਯਨਂ. ਹੇਤ੍ਵਟ੍ਠੇਨਾਤਿ ਉਪਾਯਤ੍ਥੇਨ, ਨ ਮੂਲਤ੍ਥੇਨ. ਪੁਬ੍ਬਭਾਗੇ ਗਤੋ ਪਟਿਪਨ੍ਨੋ ਨਾਨਾਕ੍ਖਣਿਕੋ ਅਟ੍ਠਙ੍ਗਿਕੋ ਮਗ੍ਗੋ ਲੋਕੁਤ੍ਤਰਕ੍ਖਣੇਵ ਸਹ ਪਵਤ੍ਤੋ ਯਥਾਗਤਮਗ੍ਗੋਤਿ ਵੁਤ੍ਤੋ. ਵਿਪਸ੍ਸਨਾਕ੍ਖਣਤੋ ਪੁਬ੍ਬੇਵ ਕਾਯਕਮ੍ਮਾਦੀਨਂ ਸੁਪਰਿਸੁਦ੍ਧਤਾਯ ਅਟ੍ਠਙ੍ਗਿਕਮਗ੍ਗੁਪਨਿਸ੍ਸਯਸ੍ਸ ‘‘ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਭਾਵਨਾਪਾਰਿਪੂਰਿਂ ਗਚ੍ਛਤੀ’’ਤਿ (ਮ. ਨਿ. ੩.੪੩੧) ਏਵਂ ਵੁਤ੍ਤੇਨ ਪਰਿਯਾਯੇਨ ਪੁਬ੍ਬਭਾਗਮਗ੍ਗਸ੍ਸ ਅਟ੍ਠਙ੍ਗਿਕਤਾ ਯਥਾਗਤਵਚਨੇਨ ਦੀਪਿਤਾ, ਨ ਏਕਕ੍ਖਣੇ ਅਟ੍ਠਨ੍ਨਂ ਅਙ੍ਗਾਨਂ ਸਬ੍ਭਾਵਾਤਿ ਏਵਮਸ੍ਸਪਿ ਪਰਿਯਾਯਦੇਸਨਤਾ ਵੇਦਿਤਬ੍ਬਾ. ਵਿਜਾਨਨਮੇਵ ਚਿਤ੍ਤਵਿਚਿਤ੍ਤਤਾਤਿ ‘‘ਚਿਤ੍ਤਵਿਚਿਤ੍ਤਟ੍ਠੇਨ ਏਕੋਵ ਧਮ੍ਮੋ ਵਿਞ੍ਞਾਣਕ੍ਖਨ੍ਧੋ’’ਤਿ ਆਹ. ਚਤ੍ਤਾਰੋ ਖਨ੍ਧਾ ਹੋਨ੍ਤੀਤਿਆਦੀਸੁ ਵੇਦਨਾਕ੍ਖਨ੍ਧਾਦੀਨਂ ਸਙ੍ਗਹੇ ਕਤੇਪਿ ਪੁਨ ‘‘ਏਕੋ ਵੇਦਨਾਕ੍ਖਨ੍ਧੋ ਹੋਤੀ’’ਤਿਆਦਿਵਚਨਂ ਨ ਅਨੇਕੇ ਵੇਦਨਾਕ੍ਖਨ੍ਧਾਦਯੋ ਜਾਤਿਨਿਦ੍ਦੇਸੇਨ ਇਧ ਵੁਤ੍ਤਾਤਿ ਦਸ੍ਸਨਤ੍ਥਂ. ਇਨ੍ਦ੍ਰਿਯੇਸੁ ਚ ਏਕਸ੍ਸ ਜਾਤਿਨਿਦ੍ਦੇਸਭਾਵੇ ਪਟਿਕ੍ਖਿਤ੍ਤੇ ਅਞ੍ਞੇਸਂ ਇਨ੍ਦ੍ਰਿਯਾਨਂ ਆਹਾਰਾਦੀਨਞ੍ਚ ਤਪ੍ਪਟਿਕ੍ਖੇਪੋ ਕਤੋ ਹੋਤੀਤਿ ਪੁਬ੍ਬਙ੍ਗਮਸ੍ਸ ਮਨਿਨ੍ਦ੍ਰਿਯਸ੍ਸੇਵ ਕਤੋਤਿ ਦਟ੍ਠਬ੍ਬੋ.
ਕੋਟ੍ਠਾਸਵਾਰਵਣ੍ਣਨਾ ਨਿਟ੍ਠਿਤਾ.
ਸੁਞ੍ਞਤਵਾਰਵਣ੍ਣਨਾ
੧੨੧-੧੪੫. ਏਤ੍ਥਾਤਿ ਏਤਸ੍ਮਿਂ ਯਥਾਵੁਤ੍ਤੇ ਸਮਯੇ, ਏਤੇਸੁ ਵਾ ਧਮ੍ਮੇਸੁ. ਭਾਵੋਤਿ ਸਤ੍ਤੋ, ਯੋ ਕੋਚਿ ਵਾ ਅਤ੍ਥੋ.
ਦੁਤਿਯਚਿਤ੍ਤਾਦਿਵਣ੍ਣਨਾ
੧੪੬. ਸਪ੍ਪਯੋਗੇਨਾਤਿ ਲੀਨਸ੍ਸ ਚਿਤ੍ਤਸ੍ਸ ਉਸ੍ਸਾਹਨਪਯੋਗਸਹਿਤੇਨ. ਸਉਪਾਯੇਨਾਤਿ ਕੁਸਲਸ੍ਸ ਕਰਣਾਕਰਣੇਸੁ ਆਦੀਨਵਾਨਿਸਂਸਪਚ੍ਚਵੇਕ੍ਖਣਂ ਪਰੇਹਿ ਉਸ੍ਸਾਹਨਨ੍ਤਿ ਏਵਮਾਦਿਉਪਾਯਸਹਿਤੇਨ.
੧੫੬-੧੫੯. ਮਹਾਅਟ੍ਠਕਥਾਯਂ ਅਨੁਞ੍ਞਾਤਾ ਨਾਤਿਸਮਾਹਿਤਾਯ ਭਾਵਨਾਯਾਤਿ ਯੇਵਾਪਨਕੇਹਿਪਿ ਨਿਬ੍ਬਿਸੇਸਤਂ ਦਸ੍ਸੇਤਿ.
ਪੁਞ੍ਞਕਿਰਿਯਵਤ੍ਥਾਦਿਕਥਾਵਣ੍ਣਨਾ
ਅਪਚਿਤਿ ਏਵ ਅਪਚਿਤਿਸਹਗਤਂ ਪੁਞ੍ਞਕਿਰਿਯਾਵਤ੍ਥੁ ਯਥਾ ‘‘ਨਨ੍ਦਿਰਾਗਸਹਗਤਾ’’ਤਿ. ਅਪਚਿਤਿ ਵਾ ਚੇਤਨਾਸਮ੍ਪਯੁਤ੍ਤਕਧਮ੍ਮਾ ਕਾਯਵਚੀਕਿਰਿਯਾ ਵਾ, ਤਂਸਹਿਤਾ ਚੇਤਨਾ ਅਪਚਿਤਿਸਹਗਤਂ. ਹਿਤਫਰਣੇਨਾਤਿ ਦੇਸਕੇ ਮੇਤ੍ਤਾਫਰਣੇਨ, ‘‘ਏਵਂ ਮੇ ਹਿਤਂ ਭਵਿਸ੍ਸਤੀ’’ਤਿ ਪਵਤ੍ਤੇਨ ਹਿਤਚਿਤ੍ਤੇਨ ਵਾ. ਕਮ੍ਮਸ੍ਸਕਤਾਞਾਣਂ ਦਿਟ੍ਠਿਜੁਕਮ੍ਮਂ. ਨਿਯਮਲਕ੍ਖਣਨ੍ਤਿ ਮਹਪ੍ਫਲਤਾਨਿਯਮਸ੍ਸ ਲਕ੍ਖਣਂ. ਸੀਲਮਯੇ ਸਙ੍ਗਹਂ ਗਚ੍ਛਨ੍ਤਿ ਚਾਰਿਤ੍ਤਵਸੇਨ. ਅਨਵਜ੍ਜਵਤ੍ਥੁਂ ਪਰਿਚ੍ਚਜਨ੍ਤੋ ਵਿਯ ਅਬ੍ਭਨੁਮੋਦਮਾਨੋਪਿ ਪਰਸ੍ਸ ਸਮ੍ਪਤ੍ਤਿਯਾ ਮੋਦਤੀਤਿ ਅਬ੍ਭਨੁਮੋਦਨਾ ਦਾਨਮਯੇ ਸਙ੍ਗਹਿਤਾ. ਭਾਵੇਨ੍ਤੋਪੀਤਿ ਅਸਮਤ੍ਤਭਾਵਨਂ ਸਨ੍ਧਾਯਾਹ. ਸਮਤ੍ਤਾ ਹਿ ਅਪ੍ਪਨਾ ਹੋਤੀਤਿ. ਅਟ੍ਠੇਵ ਕੋਟ੍ਠਾਸੇ ਕਤ੍ਵਾਤਿ ਏਕਸ੍ਸ ਸਤ੍ਤਸ੍ਸ ਏਕਸ੍ਮਿਂ ਖਣੇ ਉਪ੍ਪਨ੍ਨਮੇਕਂ ਪਠਮਚਿਤ੍ਤਂ ਦਸ੍ਸੇਤ੍ਵਾ ਅਞ੍ਞਾਨਿ ਤਾਦਿਸਾਨਿ ਅਦਸ੍ਸੇਨ੍ਤੇਨ ਸਬ੍ਬਾਨਿ ਤਾਨਿ ਸਰਿਕ੍ਖਟ੍ਠੇਨ ਏਕੀਕਤਾਨਿ ਹੋਨ੍ਤਿ, ਤਥਾ ਸੇਸਾਨਿਪੀਤਿ ਏਵਂ ਅਟ੍ਠ ਕਤ੍ਵਾ.
ਕਾਮਾਵਚਰਕੁਸਲਵਣ੍ਣਨਾ ਨਿਟ੍ਠਿਤਾ.
ਰੂਪਾਵਚਰਕੁਸਲਂ
ਚਤੁਕ੍ਕਨਯੋ
ਪਠਮਜ੍ਝਾਨਕਥਾਵਣ੍ਣਨਾ
੧੬੦. ਉਤ੍ਤਰਪਦਲੋਪਂ ਕਤ੍ਵਾ ਰੂਪਭਵੋ ਰੂਪਨ੍ਤਿ ਵੁਤ੍ਤੋ. ਝਾਨਸ੍ਸ ਅਮਗ੍ਗਭਾਵੇਪਿ ਸਤਿ ਮਗ੍ਗਵਚਨਂ ਅਞ੍ਞਮਗ੍ਗਭਾਵਨਿਵਾਰਣਤ੍ਥਨ੍ਤਿ ਇਮਸ੍ਮਿਂ ਅਤ੍ਥੇ ਮਗ੍ਗਗ੍ਗਹਣਸ੍ਸ ਪਯੋਜਨਂ ਵੁਤ੍ਤਂ, ਨ ਸਬ੍ਬਸ੍ਸ ਕੁਸਲਜ੍ਝਾਨਸ੍ਸ ਮਗ੍ਗਭਾਵੋਤਿ. ਤਤ੍ਥ ਮਗ੍ਗਸ੍ਸ ਭਾਵਨਾਯ ਸਮਯਵਵਤ੍ਥਾਨਸ੍ਸ ਕਤਤ੍ਤਾ ਅਮਗ੍ਗਭਾਵਨਾਸਮਯੇ ਪਵਤ੍ਤਾਨਂ ਫਸ੍ਸਾਦੀਨਂ ਕੁਸਲਭਾਵੋ ਨ ਦਸ੍ਸਿਤੋ ਸਿਯਾ, ਤਸ੍ਮਾ ਸਬ੍ਬਸ੍ਸ ਮਗ੍ਗਭਾਵੋ ਦਸ੍ਸੇਤਬ੍ਬੋਤਿ. ਇਤੋ ਅਞ੍ਞੋ ਮਗ੍ਗੋ ਨਤ੍ਥੀਤਿ ਏਵਂ ਅਞ੍ਞਭੂਮਿਕਵਿਧੁਰੋ ਸਤਿ ਪਚ੍ਚਯਨ੍ਤਰੇ ਰੂਪੂਪਪਤ੍ਤਿਜਨਕਸਭਾਵੋ ਵਿਪਾਕਧਮ੍ਮਸਭਾਵੋ ਵਿਯ ਵਿਪਾਕਧਮ੍ਮਵਸੇਨ ਸਬ੍ਬਸਮਾਨੋ ਮਗ੍ਗਸਦ੍ਦੇਨ ਵੁਤ੍ਤੋਤਿ ਦਸ੍ਸੇਤੀਤਿ ਵੇਦਿਤਬ੍ਬਂ. ਕੁਸਲਂ ਦਾਨਨ੍ਤਿ ਅਲੋਭੋ ਦਟ੍ਠਬ੍ਬੋ. ਅਥ ਵਾ ਚੇਤਨਾ ਦਾਨਂ, ਤਂ ਵਜ੍ਜੇਤ੍ਵਾ ਇਤਰੇ ਦ੍ਵੇ ਚੇਤਨਾਸਮ੍ਪਯੁਤ੍ਤਕਾਤਿ ਵੁਤ੍ਤਾ. ਵਟ੍ਟਨ੍ਤੀਤਿ ਮਗ੍ਗਭਾਵਤੋ ਝਾਨਵਚਨੇਨ ਸਙ੍ਗਹੇਤ੍ਵਾ ਮਗ੍ਗੋਤਿ ਵਤ੍ਤੁਂ ਵਟ੍ਟਨ੍ਤੀਤਿ ਅਤ੍ਥੋ. ਓਕਪ੍ਪਨਾਤਿ ਸਦ੍ਦਹਨਾ. ਅਞ੍ਞਤ੍ਥ ਦਿਟ੍ਠਂ ਅਤ੍ਥਂ ਪਰਿਚ੍ਚਜਿਤ੍ਵਾ ‘‘ਜਨੇਤਿ ਵਡ੍ਢੇਤੀ’’ਤਿ ਅਯਮਤ੍ਥੋ ਕਸ੍ਮਾ ਵੁਤ੍ਤੋਤਿ ਨਿਰੁਪਸਗ੍ਗਸ੍ਸ ਅਞ੍ਞਤ੍ਥ ਏਵਮਤ੍ਥਸ੍ਸੇਵ ਦਿਟ੍ਠਤ੍ਤਾਤਿ ਇਮਮਤ੍ਥਂ ਵਿਭਾਵੇਤੁਂ ‘‘ਪੁਨ ਚਪਰਂ ਉਦਾਯੀ’’ਤਿ (ਮ. ਨਿ. ੨.੨੪੬ ਆਦਯੋ) ਸੁਤ੍ਤਮਾਹਟਂ. ਕੇਸਞ੍ਚਿ ਅਰਿਯਾਨਂ ਅਰਿਯਮਗ੍ਗੇਨ ਸਿਦ੍ਧਾਨਿ ਅਞ੍ਞਾਨਿ ਚ ਝਾਨਾਨਿ ਭਾਵਨਾਸਭਾਵਾਨੇਵਾਤਿ ਤੇਸੁਪਿ ਭਾਵੇਨ੍ਤੇਨ ਸਮਯਵਵਤ੍ਥਾਨਂ ਇਜ੍ਝਤੀਤਿ.
ਨਿਸ੍ਸਰਨ੍ਤਿ ਨਿਗ੍ਗਚ੍ਛਨ੍ਤਿ ਏਤੇਨ, ਏਤ੍ਥ ਵਾਤਿ ਨਿਸ੍ਸਰਣਂ. ਕੇ ਨਿਗ੍ਗਚ੍ਛਨ੍ਤਿ? ਕਾਮਾ. ਤੇਸਂ ਕਾਮਾਨਂ ਨਿਸ੍ਸਰਣਂ ਪਹਾਨਨ੍ਤਿ ਅਤ੍ਥੋ. ਏਵਞ੍ਹਿ ‘‘ਕਾਮਾਨ’’ਨ੍ਤਿ ਕਤ੍ਤਰਿ ਸਾਮਿਵਚਨਂ ਯੁਜ੍ਜਤਿ. ਵਤ੍ਥੁਕਾਮੇਹਿਪੀਤਿ ਵਤ੍ਥੁਕਾਮੇਹਿ ਵਿਵਿਚ੍ਚੇਵਾਤਿਪਿ ਅਤ੍ਥੋ ਯੁਜ੍ਜਤੀਤਿ ਏਵਂ ਯੁਜ੍ਜਮਾਨਤ੍ਥਨ੍ਤਰਸਮੁਚ੍ਚਯਤ੍ਥੋ ਪਿ-ਸਦ੍ਦੋ, ਨ ਕਿਲੇਸਕਾਮਸਮੁਚ੍ਚਯਤ੍ਥੋ. ਕਸ੍ਮਾ? ਇਮਸ੍ਮਿਂ ਅਤ੍ਥੇ ਕਿਲੇਸਕਾਮਾਨਂ ਦੁਤਿਯਪਦੇਨ ਵਿਵੇਕਸ੍ਸ ਵੁਤ੍ਤਤ੍ਤਾ. ਅਕੁਸਲਸਦ੍ਦੇਨ ਯਦਿਪਿ ਕਿਲੇਸਕਾਮਾ, ਅਥਾਪਿ ਸਬ੍ਬਾਕੁਸਲਾ ਗਹਿਤਾ, ਸਬ੍ਬਥਾ ਪਨ ਕਿਲੇਸਕਾਮੇਹਿ ਵਿਵੇਕੋ ਵੁਤ੍ਤੋਤਿ ਆਹ ‘‘ਦੁਤਿਯੇਨ ਕਿਲੇਸਕਾਮੇਹਿ ਵਿਵੇਕਵਚਨਤੋ’’ਤਿ. ਕਾਮਗੁਣਾਧਿਗਮਹੇਤੁਪਿ ਪਾਣਾਤਿਪਾਤਾਦਿਅਸੁਦ੍ਧਪ੍ਪਯੋਗੋ ਹੋਤੀਤਿ ਤਬ੍ਬਿਵੇਕੇਨ ਪਯੋਗਸੁਦ੍ਧਿ ਵਿਭਾਵਿਤਾ. ਤਣ੍ਹਾਸਂਕਿਲੇਸਸੋਧਨੇਨ ਆਸਯਪੋਸਨਂ.
ਅਞ੍ਞੇਸਮ੍ਪਿ ਚਾਤਿ ਦਿਟ੍ਠਿਮਾਨਾਦੀਨਂ ਫਸ੍ਸਾਦੀਨਞ੍ਚ. ਉਪਰਿ ਵੁਚ੍ਚਮਾਨਾਨਿ ਝਾਨਙ੍ਗਾਨਿ ਉਪਰਿਜ੍ਝਾਨਙ੍ਗਾਨਿ, ਤੇਸਂ ਅਤ੍ਤਨੋ ਵਿਪਚ੍ਚਨੀਕਾਨਂ ਪਟਿਪਕ੍ਖਭਾਵਦਸ੍ਸਨਤ੍ਥਂ ਤਪ੍ਪਚ੍ਚਨੀਕਨੀਵਰਣਵਚਨਂ. ਬ੍ਯਾਪਾਦਵਿਵੇਕਵਚਨੇਨ ‘‘ਅਨਤ੍ਥਂ ਮੇ ਅਚਰੀ’’ਤਿਆਦਿਆਘਾਤਵਤ੍ਥੁਭੇਦਵਿਸਯਸ੍ਸ ਦੋਸਸ੍ਸ ਮੋਹਾਧਿਕਾਨਂ ਥਿਨਮਿਦ੍ਧਾਦੀਨਂ ਵਿਵੇਕਵਚਨੇਨ ਪਟਿਚ੍ਛਾਦਨਵਸੇਨ ਦੁਕ੍ਖਾਦਿਪੁਬ੍ਬਨ੍ਤਾਦਿਭੇਦਵਿਸਯਸ੍ਸ ਮੋਹਸ੍ਸ ਵਿਕ੍ਖਮ੍ਭਨਵਿਵੇਕੋ ਵੁਤ੍ਤੋ. ਕਾਮਰਾਗਬ੍ਯਾਪਾਦਤਦੇਕਟ੍ਠਥਿਨਮਿਦ੍ਧਾਦਿਵਿਕ੍ਖਮ੍ਭਨਕਞ੍ਚੇਦਂ ਸਬ੍ਬਾਕੁਸਲਪਟਿਪਕ੍ਖਸਭਾਵਤ੍ਤਾ ਸਬ੍ਬਕੁਸਲਾਨਂ ਤੇਨ ਸਭਾਵੇਨ ਸਬ੍ਬਾਕੁਸਲਾਨਂ ਪਹਾਨਂ ਹੋਨ੍ਤਮ੍ਪਿ ਕਾਮਰਾਗਾਦਿਵਿਕ੍ਖਮ੍ਭਨਸਭਾਵਮੇਵਾਤਿ ਤਂਸਭਾਵਤ੍ਤਾ ਅਵਿਸੇਸੇਤ੍ਵਾ ਨੀਵਰਣਾਕੁਸਲਮੂਲਾਦੀਨਂ ਵਿਕ੍ਖਮ੍ਭਨਵਿਵੇਕੋ ਵੁਤ੍ਤੋ ਹੋਤੀਤਿ ਆਹ.
ਵਿਤਕ੍ਕਸ੍ਸ ਕਿਚ੍ਚਵਿਸੇਸੇਨ ਥਿਰਭਾਵਪ੍ਪਤ੍ਤੇ ਪਠਮਜ੍ਝਾਨਸਮਾਧਿਮ੍ਹਿ ਪਚ੍ਚਨੀਕਦੂਰੀਭਾਵਕਤੇਨ ਥਿਰਭਾਵੇਨ ਤਂਸਦਿਸੇਸੁ ਵਿਤਕ੍ਕਰਹਿਤੇਸੁ ਦੁਤਿਯਜ੍ਝਾਨਾਦਿਸਮਾਧੀਸੁ ਚ ਅਪ੍ਪਨਾਤਿ ਅਟ੍ਠਕਥਾਵੋਹਾਰੋਤਿ ਵਿਤਕ੍ਕਸ੍ਸ ਅਪ੍ਪਨਾਯੋਗੋ ਵੁਤ੍ਤੋ, ਅਞ੍ਞਥਾ ਵਿਤਕ੍ਕੋਵ ਅਪ੍ਪਨਾਤਿ ਤਸ੍ਸ ਤਂਸਮ੍ਪਯੋਗੋ ਨ ਸਿਯਾਤਿ. ਅਤ੍ਥੋ…ਪੇ… ਦਟ੍ਠਬ੍ਬੋ ਝਾਨਸਮਙ੍ਗਿਨੋ ਵਿਤਕ੍ਕਵਿਚਾਰਸਮਙ੍ਗਿਤਾਦਸ੍ਸਨੇਨ ਝਾਨਸ੍ਸੇਵ ਸਵਿਤਕ੍ਕਸਵਿਚਾਰਭਾਵਸ੍ਸ ਵੁਤ੍ਤਤ੍ਤਾ.
ਵਿਵੇਕਜਂ ਪੀਤਿਸੁਖਨ੍ਤਿ ਏਤ੍ਥ ਪੁਰਿਮਸ੍ਮਿਂ ਅਤ੍ਥੇ ਵਿਵੇਕਜਨ੍ਤਿ ਝਾਨਂ. ਪੀਤਿਸੁਖਸਦ੍ਦਤੋ ਚ ਅਤ੍ਥਿਅਤ੍ਥਵਿਸੇਸਵਤੋ ਅਸ੍ਸ, ਅਸ੍ਮਿਂ ਵਾਤਿ ਏਤ੍ਥ ਅ-ਕਾਰੋ ਵੁਤ੍ਤੋ. ਦੁਤਿਯੇ ਪੀਤਿਸੁਖਮੇਵ ਵਿਵੇਕਜਂ. ਵਿਵੇਕਜਂਪੀਤਿਸੁਖਨ੍ਤਿ ਚ ਅਞ੍ਞਪਦਤ੍ਥੇ ਸਮਾਸੋ ਪਚ੍ਚਤ੍ਤਨਿਦ੍ਦੇਸਸ੍ਸ ਚ ਅਲੋਪੋ ਕਤੋ, ਲੋਪੇ ਵਾ ਸਤਿ ‘‘ਵਿਵੇਕਜਪੀਤਿਸੁਖ’’ਨ੍ਤਿ ਪਾਠੋਤਿ ਅਯਂ ਵਿਸੇਸੋ. ਗਣਨਾਨੁਪੁਬ੍ਬਤਾਤਿ ਗਣਨਾਨੁਪੁਬ੍ਬਤਾਯ, ਗਣਨਾਨੁਪੁਬ੍ਬਤਾਮਤ੍ਤਂ ਵਾ ਪਠਮਨ੍ਤਿ ਵਚਨਨ੍ਤਿ ਅਤ੍ਥੋ. ਨਿਚ੍ਚਾਦਿਵਿਪਲ੍ਲਾਸਪ੍ਪਹਾਨੇਨ ਮਗ੍ਗੋ ਅਸਮ੍ਮੋਹਤੋ ਅਨਿਚ੍ਚਾਦਿਲਕ੍ਖਣਾਨਿ ਪਟਿਵਿਜ੍ਝਤੀਤਿ ਲਕ੍ਖਣੂਪਨਿਜ੍ਝਾਨਂ. ਅਸਮ੍ਮੋਸਧਮ੍ਮਂ ਨਿਬ੍ਬਾਨਂ ਅਵਿਪਰੀਤਲਕ੍ਖਣਤ੍ਤਾ ਅਨਞ੍ਞਥਾਭਾਵਤੋ ਤਥਲਕ੍ਖਣਂ.
ਦੁਤਿਯਜ੍ਝਾਨਕਥਾਵਣ੍ਣਨਾ
੧੬੧-੨. ਵਿਤਕ੍ਕਵਿਚਾਰਾਨਂ ਵੂਪਸਮਾਤਿ ਏਤੇਨ ਯੇਹਿ ਵਿਤਕ੍ਕਵਿਚਾਰੇਹਿ ਪਠਮਜ੍ਝਾਨਸ੍ਸ ਓਲ਼ਾਰਿਕਤਾ, ਤੇਸਂ ਸਮਤਿਕ੍ਕਮਾ ਦੁਤਿਯਜ੍ਝਾਨਸ੍ਸ ਸਮਧਿਗਮੋ, ਨ ਸਭਾਵਤੋ ਅਨੋਲ਼ਾਰਿਕਾਨਂ ਫਸ੍ਸਾਦੀਨਂ ਸਮਤਿਕ੍ਕਮਾਤਿ ਅਯਮਤ੍ਥੋ ਦੀਪਿਤੋ ਹੋਤਿ. ਏਵਂ ‘‘ਪੀਤਿਯਾ ਚ ਵਿਰਾਗਾ’’ਤਿਆਦੀਸੁ ਨਯੋ. ਤਸ੍ਮਾ ਵਿਤਕ੍ਕਵਿਚਾਰਪੀਤਿਸੁਖਸਮਤਿਕ੍ਕਮਵਚਨਾਨਿ ਓਲ਼ਾਰਿਕੋਲ਼ਾਰਿਕਙ੍ਗਸਮਤਿਕ੍ਕਮਾ ਦੁਤਿਯਾਦਿਅਧਿਗਮਪਰਿਦੀਪਕਾਨੀਤਿ ਤੇਸਂ ਏਕਦੇਸਭੂਤਂ ਵਿਤਕ੍ਕਵਿਚਾਰਸਮਤਿਕ੍ਕਮਵਚਨਂ ਤਂਦੀਪਕਨ੍ਤਿ ਵੁਤ੍ਤਂ. ਅਥ ਵਾ ਵਿਤਕ੍ਕਵਿਚਾਰਵੂਪਸਮਵਚਨੇਨੇਵ ਤਂਸਮਤਿਕ੍ਕਮਾ ਦੁਤਿਯਾਧਿਗਮਦੀਪਕੇਨ ਪੀਤਿਵਿਰਾਗਾਦਿਵਚਨਾਨਂ ਪੀਤਿਯਾਦਿਸਮਤਿਕ੍ਕਮਾ ਤਤਿਯਾਦਿਅਧਿਗਮਦੀਪਕਤਾ ਹੋਤੀਤਿ ਤਸ੍ਸ ਤਂਦੀਪਕਤਾ ਵੁਤ੍ਤਾ.
ਨੀਲਵਣ੍ਣਯੋਗਤੋ ਨੀਲਵਤ੍ਥਂ ਵਿਯਾਤਿ ਨੀਲਯੋਗਤੋ ਵਤ੍ਥਂ ਨੀਲਂ ਵਿਯਾਤਿ ਅਧਿਪ੍ਪਾਯੋ. ਯੇਨ ਸਮ੍ਪਸਾਦਨੇਨ ਯੋਗਾ ਝਾਨਂ ਸਮ੍ਪਸਾਦਨਂ, ਤਸ੍ਮਿਂ ਦਸ੍ਸਿਤੇ ‘‘ਸਮ੍ਪਸਾਦਨਂ ਝਾਨ’’ਨ੍ਤਿ ਸਮਾਨਾਧਿਕਰਣਨਿਦ੍ਦੇਸੇਨੇਵ ਤਂਯੋਗਾ ਝਾਨੇ ਤਂਸਦ੍ਦਪ੍ਪਵਤ੍ਤਿ ਦਸ੍ਸਿਤਾਤਿ ਅਵਿਰੋਧੋ ਯੁਤ੍ਤੋ. ਏਕੋਦਿਭਾਵੇ ਕਥਨ੍ਤਿ ਏਕੋਦਿਮ੍ਹਿ ਦਸ੍ਸਿਤੇ ‘‘ਏਕੋਦਿਭਾਵਂ ਝਾਨ’’ਨ੍ਤਿ ਸਮਾਨਾਧਿਕਰਣਨਿਦ੍ਦੇਸੇਨੇਵ ਝਾਨਸ੍ਸ ਏਕੋਦਿਵਡ੍ਢਨਤਾ ਵੁਤ੍ਤਾ ਹੋਤੀਤਿ. ਏਕੋਦਿਭਾਵਨ੍ਤਿ ਪਨਿਦਂ ਉਦ੍ਧਰਿਤ੍ਵਾ ਏਕੋਦਿਸ੍ਸ ਨਿਦ੍ਦੇਸੋ ਨ ਕਤ੍ਤਬ੍ਬੋ ਸਿਯਾਤਿ ਏਕੋਦਿਭਾਵਸਦ੍ਦੋ ਏਵ ਸਮਾਧਿਮ੍ਹਿ ਪਵਤ੍ਤੋ ਸਮ੍ਪਸਾਦਨਸਦ੍ਦੋ ਵਿਯ ਝਾਨਮ੍ਹਿ ਪਵਤ੍ਤਤੀਤਿ ਯੁਤ੍ਤਂ.
ਅਪ੍ਪਿਤਾਤਿ ਗਮਿਤਾ ਵਿਨਾਸਂ. ਦੁਤਿਯਜ੍ਝਾਨਾਦਿਅਧਿਗਮੁਪਾਯਦੀਪਕੇਨ ਅਜ੍ਝਤ੍ਤਸਮ੍ਪਸਾਦਨਤਾਯ ਚੇਤਸੋ ਏਕੋਦਿਭਾਵਤਾਯ ਚ ਹੇਤੁਦੀਪਕੇਨ ਅਵਿਤਕ੍ਕਾਵਿਚਾਰਭਾਵਹੇਤੁਦੀਪਕੇਨ ਚ ਵਿਤਕ੍ਕਵਿਚਾਰਵੂਪਸਮਵਚਨੇਨੇਵ ਵਿਤਕ੍ਕਵਿਚਾਰਾਭਾਵੋ ਦੀਪਿਤੋਤਿ ਕਿਂ ਪੁਨ ਅਵਿਤਕ੍ਕਅਵਿਚਾਰਵਚਨੇਨ ਕਤੇਨਾਤਿ? ਨ, ਅਦੀਪਿਤਤ੍ਤਾ. ਨ ਹਿ ਵਿਤਕ੍ਕਵਿਚਾਰਵੂਪਸਮਵਚਨੇਨ ਵਿਤਕ੍ਕਵਿਚਾਰਾਨਂ ਅਪ੍ਪਵਤ੍ਤਿ ਵੁਤ੍ਤਾ ਹੋਤਿ. ਵਿਤਕ੍ਕਵਿਚਾਰੇਸੁ ਹਿ ਤਣ੍ਹਾਪਹਾਨਞ੍ਚ ਏਤੇਸਂ ਵੂਪਸਮਨਂ. ਯੇ ਚ ਸਙ੍ਖਾਰੇਸੁ ਤਣ੍ਹਾਪਹਾਨਂ ਕਰੋਨ੍ਤਿ, ਤੇਸੁ ਮਗ੍ਗੇਸੁ ਪਹੀਨਤਣ੍ਹੇਸੁ ਫਲੇਸੁ ਚ ਸਙ੍ਖਾਰਪ੍ਪਵਤ੍ਤਿ ਹੋਤਿ, ਏਵਮਿਧਾਪਿ ਵਿਕ੍ਖਮ੍ਭਿਤਵਿਤਕ੍ਕਵਿਚਾਰਤਣ੍ਹਸ੍ਸ ਦੁਤਿਯਜ੍ਝਾਨਸ੍ਸ ਵਿਤਕ੍ਕਵਿਚਾਰਸਮ੍ਪਯੋਗੋ ਪੁਰਿਮੇਨ ਨ ਨਿਵਾਰਿਤੋ ਸਿਯਾਤਿ ਤਂਨਿਵਾਰਣਤ੍ਥਂ ਆਵਜ੍ਜਿਤੁਕਾਮਤਾਦਿਅਤਿਕ੍ਕਮੋਵ ਤੇਸਂ ਵੂਪਸਮੋਤਿ ਦਸ੍ਸਨਤ੍ਥਞ੍ਚ ‘‘ਅਵਿਤਕ੍ਕਂ ਅਵਿਚਾਰ’’ਨ੍ਤਿ ਵੁਤ੍ਤਂ.
ਤਤਿਯਜ੍ਝਾਨਕਥਾਵਣ੍ਣਨਾ
੧੬੩. ਪਰਿਸੁਦ੍ਧਪਕਤਿ ਖੀਣਾਸਵਪਕਤਿ ਨਿਕ੍ਕਿਲੇਸਤਾ. ਉਪੇਕ੍ਖਾਨਿਮਿਤ੍ਤਨ੍ਤਿ ਏਤ੍ਥ ਲੀਨੁਦ੍ਧਚ੍ਚਪਕ੍ਖਪਾਤਰਹਿਤਂ ਮਜ੍ਝਤ੍ਤਂ ਵੀਰਿਯਂ ‘‘ਉਪੇਕ੍ਖਾ’’ਤਿ ਵੁਤ੍ਤਂ, ਤਦੇਵ ਤਂ ਆਕਾਰਂ ਗਹੇਤ੍ਵਾ ਪਵਤ੍ਤੇਤਬ੍ਬਸ੍ਸ ਤਾਦਿਸਸ੍ਸ ਵੀਰਿਯਸ੍ਸ ਨਿਮਿਤ੍ਤਭਾਵਤੋ ਉਪੇਕ੍ਖਾਨਿਮਿਤ੍ਤਂ. ਪਠਮਜ੍ਝਾਨਪ੍ਪਟਿਲਾਭਤ੍ਥਾਯ ਨੀਵਰਣੇ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਪਟਿਲਾਭਤ੍ਥਾਯ ਆਕਿਞ੍ਚਞ੍ਞਾਯਤਨਸਞ੍ਞਂ ਪਟਿਸਙ੍ਖਾਸਨ੍ਤਿਟ੍ਠਨਾਪਞ੍ਞਾਸਙ੍ਖਾਰੁਪੇਕ੍ਖਾਸੁ ਞਾਣਨ੍ਤਿ ਇਮਾ ਅਟ੍ਠ ਸਮਾਪਤ੍ਤਿਵਸੇਨ ਉਪ੍ਪਜ੍ਜਨ੍ਤਿ. ਸੋਤਾਪਤ੍ਤਿਮਗ੍ਗਪਟਿਲਾਭਤ੍ਥਾਯ ਉਪ੍ਪਾਦਂ ਪਵਤ੍ਤਂ ਨਿਮਿਤ੍ਤਂ ਆਯੂਹਨਂ ਪਟਿਸਨ੍ਧਿਂ ਗਤਿਂ ਨਿਬ੍ਬਤ੍ਤਿਂ ਉਪਪਤ੍ਤਿਂ ਜਾਤਿਂ ਜਰਾਮਰਣਸੋਕਪਰਿਦੇਵਦੁਕ੍ਖਦੋਮਨਸ੍ਸਉਪਾਯਾਸੇ. ਸੋਤਾਪਤ੍ਤਿਫਲਸਮਾਪਤ੍ਤਤ੍ਥਾਯ ਉਪ੍ਪਾਦਂ…ਪੇ… ਉਪਾਯਾਸੇ…ਪੇ… ਅਰਹਤ੍ਤਮਗ੍ਗਪਟਿਲਾਭਤ੍ਥਾਯ ਉਪ੍ਪਾਦਂ…ਪੇ… ਉਪਾਯਾਸੇ. ਅਰਹਤ੍ਤਫਲਸਮਾਪਤ੍ਤਤ੍ਥਾਯ…ਪੇ… ਸੁਞ੍ਞਤਵਿਹਾਰਸਮਾਪਤ੍ਤਤ੍ਥਾਯ…ਪੇ… ਅਨਿਮਿਤ੍ਤਵਿਹਾਰਸਮਾਪਤ੍ਤਤ੍ਥਾਯ ਉਪ੍ਪਾਦਂ ਪਵਤ੍ਤਂ ਆਯੂਹਨਂ ਪਟਿਸਨ੍ਧਿਂ…ਪੇ… ਪਟਿਸਙ੍ਖਾਸਨ੍ਤਿਟ੍ਠਨਾ ਪਞ੍ਞਾ ਸਙ੍ਖਾਰੁਪੇਕ੍ਖਾਸੁ ਞਾਣਨ੍ਤਿ ਇਮਾ ਦਸ ਵਿਪਸ੍ਸਨਾਵਸੇਨ ਉਪ੍ਪਜ੍ਜਨ੍ਤਿ.
ਯਦਤ੍ਥਿ ਯਂ ਭੂਤਨ੍ਤਿ ਖਨ੍ਧਪਞ੍ਚਕਂ, ਤਂ ਮੁਞ੍ਚਿਤੁਕਮ੍ਯਤਾਞਾਣੇਨ ਪਜਹਤਿ. ਦਿਟ੍ਠਸੋਵਤ੍ਥਿਕਤ੍ਤਯਸ੍ਸ ਸਪ੍ਪਲਕ੍ਖਣਵਿਚਿਨਨੇ ਵਿਯ ਦਿਟ੍ਠਲਕ੍ਖਣਤ੍ਤਯਸ੍ਸ ਭੂਤਸ੍ਸ ਸਙ੍ਖਾਰਲਕ੍ਖਣਵਿਚਿਨਨੇ ਉਪੇਕ੍ਖਂ ਪਟਿਲਭਤਿ. ਅਨਾਭੋਗਰਸਾਤਿ ਪਣੀਤਸੁਖੇਪਿ ਤਸ੍ਮਿਂ ਅਵਨਤਿ ਪਟਿਪਕ੍ਖਕਿਚ੍ਚਾਤਿ ਅਤ੍ਥੋ. ਨਾਮਕਾਯੇਨ ਚੇਤਸਿਕਸੁਖਂ ਕਾਯਿਕਸੁਖਹੇਤੁ ਰੂਪਸਮੁਟ੍ਠਾਪਨੇਨ ਕਾਯਿਕਸੁਖਞ੍ਚ ਝਾਨਸਮਙ੍ਗੀ ਪਟਿਸਂਵੇਦੇਤੀਤਿ ਵੁਚ੍ਚਤਿ. ਫੁਟਤ੍ਤਾ ਬ੍ਯਾਪਿਤਤ੍ਤਾ. ਯਥਾ ਹਿ ਉਦਕੇਨ ਫੁਟਸਰੀਰਸ੍ਸ ਤਾਦਿਸੇ ਨਾਤਿਪਚ੍ਚਨੀਕੇ ਵਾਤਾਦਿਕੇ ਫੋਟ੍ਠਬ੍ਬੇ ਫੁਟ੍ਠੇ ਸੁਖਂ ਉਪ੍ਪਜ੍ਜਤਿ, ਏਵਂ ਏਤੇਹਿ ਫੁਟਸਰੀਰਸ੍ਸਪਿ.
ਚਤੁਤ੍ਥਜ੍ਝਾਨਕਥਾਵਣ੍ਣਨਾ
੧੬੫. ਅਵਿਭੂਤਪਚ੍ਚੁਪਟ੍ਠਾਨਾਤਿ ਸੁਖਦੁਕ੍ਖਾਨਿ ਵਿਯ ਅਵਿਭੂਤਾਕਾਰਾ ਪਿਟ੍ਠਿਪਾਸਾਣਗਤਮਿਗਮਗ੍ਗੋ ਵਿਯ ਤਦਨੁਮਾਤਬ੍ਬਾਵਿਭੂਤਾਕਾਰੋਪਟ੍ਠਾਨਾ.
ਚਤੁਕ੍ਕਨਯਵਣ੍ਣਨਾ ਨਿਟ੍ਠਿਤਾ.
ਪਞ੍ਚਕਨਯਵਣ੍ਣਨਾ
੧੬੭. ਯਸ੍ਸਾ ਪਨ ਧਮ੍ਮਧਾਤੁਯਾਤਿ ਸਬ੍ਬਞ੍ਞੁਤਞ੍ਞਾਣਸ੍ਸ. ਤੇਨ ਹਿ ਧਮ੍ਮਾਨਂ ਆਕਾਰਭੇਦਂ ਞਤ੍ਵਾ ਤਦਨੁਰੂਪਂ ਦੇਸਨਂ ਨਿਯਾਮੇਤੀਤਿ. ਏਤ੍ਥ ਚ ਪਞ੍ਚਕਨਯੇ ਦੁਤਿਯਜ੍ਝਾਨਂ ਚਤੁਕ੍ਕਨਯੇ ਦੁਤਿਯਜ੍ਝਾਨਪਕ੍ਖਿਕਂ ਕਤ੍ਵਾ ਵਿਭਤ੍ਤਂ ‘‘ਯਸ੍ਮਿਂ…ਪੇ… ਮਗ੍ਗਂ ਭਾਵੇਤਿ ਅਵਿਤਕ੍ਕਂ ਵਿਚਾਰਮਤ੍ਤਂ ਸਮਾਧਿਜਂ ਪੀਤਿਸੁਖਂ ਦੁਤਿਯਜ੍ਝਾਨਂ ਉਪਸਮ੍ਪਜ੍ਜ ਵਿਹਰਤੀ’’ਤਿ. ਕਸ੍ਮਾ? ਏਕਤ੍ਤਕਾਯਨਾਨਤ੍ਤਸਞ੍ਞੀਸਤ੍ਤਾਵਾਸਫਲਤਾਯ ਦੁਤਿਯਜ੍ਝਾਨੇਨ ਸਮਾਨਫਲਤ੍ਤਾ ਪਠਮਜ੍ਝਾਨਸਮਾਧਿਤੋ ਜਾਤਤ੍ਤਾ ਚ. ਪਠਮਜ੍ਝਾਨਮੇਵ ਹਿ ਕਾਮੇਹਿ ਅਕੁਸਲੇਹਿ ਚ ਵਿਵਿਤ੍ਤਨ੍ਤਿ ਤਦਭਾਵਾ ਨ ਇਧ ‘‘ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹੀ’’ਤਿ ਸਕ੍ਕਾ ਵਤ੍ਤੁਂ, ਨਾਪਿ ‘‘ਵਿਵੇਕਜ’’ਨ੍ਤਿ. ਸੁਤ੍ਤਨ੍ਤਦੇਸਨਾਸੁ ਚ ਪਞ੍ਚਕਨਯੇ ਦੁਤਿਯਤਤਿਯਜ੍ਝਾਨਾਨਿ ਦੁਤਿਯਜ੍ਝਾਨਮੇਵ ਭਜਨ੍ਤਿ ਵਿਤਕ੍ਕਵੂਪਸਮਾ ਵਿਚਾਰਵੂਪਸਮਾ ਅਵਿਤਕ੍ਕਤ੍ਤਾ ਅਵਿਚਾਰਤ੍ਤਾ ਚਾਤਿ.
ਪਟਿਪਦਾਚਤੁਕ੍ਕਵਣ੍ਣਨਾ
੧੭੬-੧੮੦. ਤਸ੍ਸ ਤਸ੍ਸ ਝਾਨਸ੍ਸ ਉਪਚਾਰਨ੍ਤਿ ਨੀਵਰਣਵਿਤਕ੍ਕਵਿਚਾਰਨਿਕਨ੍ਤਿਯਾਦੀਨਂ ਵੂਪਸਮਾ ਥਿਰਭੂਤੋ ਕਾਮਾਵਚਰਸਮਾਧਿ. ਤਦਨੁਧਮ੍ਮਤਾਤਿ ਤਦਨੁਰੂਪਤਾਭੂਤਾ, ਸਾ ਪਨ ਤਦਸ੍ਸਾਦਸਙ੍ਖਾਤਾ ਤਦਸ੍ਸਾਦਸਮ੍ਪਯੁਤ੍ਤਕ੍ਖਨ੍ਧਸਙ੍ਖਾਤਾ ਵਾ ਮਿਚ੍ਛਾਸਤੀਤਿ ਵਦਨ੍ਤਿ. ਅਵਿਗਤਨਿਕਨ੍ਤਿਕਾ ਤਂਤਂਪਰਿਹਰਣਸਤੀਤਿਪਿ ਵਤ੍ਤੁਂ ਵਟ੍ਟਤੀਤਿ ਏਵਞ੍ਚ ਕਤ੍ਵਾ ‘‘ਸਤਿਯਾ ਵਾ ਨਿਕਨ੍ਤਿਯਾ ਵਾ’’ਤਿ ਵਿਕਪ੍ਪੋ ਕਤੋ. ਆਗਮਨਵਸੇਨਾਪਿ ਚ ਪਟਿਪਦਾ ਹੋਨ੍ਤਿਯੇਵਾਤਿ ਇਦਂ ਕਦਾਚਿ ਦੁਤਿਯਾਦੀਨਂ ਪਠਮਾਦਿਆਗਮਨਕਤਪਟਿਪਦਤਂ ਸਨ੍ਧਾਯ ਵੁਤ੍ਤਂ. ਅਪਿ-ਸਦ੍ਦੋ ਹਿ ਅਨੇਕਨ੍ਤਿਕਤਂ ਦੀਪੇਤਿ, ਏਤਸ੍ਸ ਅਨੇਕਨ੍ਤਿਕਤ੍ਤਾ ਏਵ ਚ ਪਾਲ਼ਿਯਂ ਏਕੇਕਸ੍ਮਿਂ ਝਾਨੇ ਚਤਸ੍ਸੋ ਪਟਿਪਦਾ ਚਤ੍ਤਾਰਿ ਆਰਮ੍ਮਣਾਨਿ ਸੋਲ਼ਸਕ੍ਖਤ੍ਤੁਕਞ੍ਚ ਵਿਸੁਂ ਵਿਸੁਂ ਯੋਜਿਤਂ. ਅਞ੍ਞਥਾ ਏਕੇਕਸ੍ਮਿਂ ਪਟਿਪਦਾਦਿਮ੍ਹਿ ਨਵ ਨਵ ਝਾਨਾਨਿ ਯੋਜੇਤਬ੍ਬਾਨਿ ਸਿਯੁਨ੍ਤਿ.
ਆਰਮ੍ਮਣਚਤੁਕ੍ਕਵਣ੍ਣਨਾ
੧੮੧. ਅਪ੍ਪਗੁਣਨ੍ਤਿ ਪਞ੍ਚਹਿ ਵਸਿਤਾਹਿ ਅਵਸੀਕਤਂ.
ਆਰਮ੍ਮਣਪਟਿਪਦਾਮਿਸ੍ਸਕਵਣ੍ਣਨਾ
੧੮੬. ਹੇਟ੍ਠਾਤਿ ਸੋਲ਼ਸਕ੍ਖਤ੍ਤੁਕਤੋ ਪੁਬ੍ਬੇ. ਯੇ ਕੇਚਿ ਝਾਨਂ ਉਪ੍ਪਾਦੇਨ੍ਤਿ ਨਾਮਾਤਿ ਵਚਨੇਨ ਯੇ ਕਤਾਧਿਕਾਰਾ ਸੇਕ੍ਖਾ ਮਗ੍ਗੇਨੇਵ ਉਪ੍ਪਾਦਿਤਜ੍ਝਾਨਾ, ਤੇਸਂ ਝਾਨਾਨਿ ਮਗ੍ਗਪਟਿਬਦ੍ਧਤਾਯ ਸੁਦ੍ਧਿਕਨਵਕਸਙ੍ਗਹਿਤਾਨੀਤਿ ਵੇਦਿਤਬ੍ਬਾਨਿ. ਨ ਹਿ ਤੇ ਉਪ੍ਪਾਦੇਨ੍ਤਿ ਨਾਮਾਤਿ.
ਕਸਿਣਕਥਾਵਣ੍ਣਨਾ
੨੦੩. ਨਿਰੋਧਪਾਦਕਤਾਵਚਨੇਨ ਆਰੁਪ੍ਪਪਾਦਕਤਾ ਚ ਦਸ੍ਸਿਤਾ. ਖਿਪ੍ਪਦਸ੍ਸਨਂ ਖਿਪ੍ਪਾਭਿਞ੍ਞਤਾ ਖਿਪ੍ਪਨਿਸਨ੍ਤਿਭਾਵੋ.
ਅਭਿਭਾਯਤਨਕਥਾਵਣ੍ਣਨਾ
੨੦੪. ਅਞ੍ਞਮ੍ਪੀਤਿ ਕੇਵਲਂ ਕਸਿਣਾਯਤਨਸਙ੍ਖਾਤਮੇਵ ਅਹੁਤ੍ਵਾ ਅਭਿਭਾਯਤਨਸਙ੍ਖਾਤਮ੍ਪਿ ਪਵਤ੍ਤਤੀਤਿ ਸਤਿਪਿ ਅਭਿਭਾਯਤਨਾਨਂ ਕਸਿਣਾਯਤਨਤ੍ਤੇ ਕਸਿਣਾਯਤਨਭਾਵਤੋ ਅਞ੍ਞੋ ਅਭਿਭਾਯਤਨਭਾਵੋ ਕਸਿਣਨਿਮਿਤ੍ਤਾਭਿਭਵਨਕਭਾਵਨਾਨਿਮਿਤ੍ਤਨਾਨਤ੍ਤਤੋਤਿ ਦਸ੍ਸੇਤਿ. ਤਤ੍ਥ ਅਭਿਭਵਤੀਤਿ ਅਭਿਭੁ, ਪਰਿਕਮ੍ਮਂ, ਞਾਣਂ ਵਾ. ਅਭਿਭੁ ਆਯਤਨਂ ਏਤਸ੍ਸਾਤਿ ਅਭਿਭਾਯਤਨਂ, ਝਾਨਂ. ਅਭਿਭਵਿਤਬ੍ਬਂ ਵਾ ਆਰਮ੍ਮਣਸਙ੍ਖਾਤਂ ਆਯਤਨਂ ਏਤਸ੍ਸਾਤਿ ਅਭਿਭਾਯਤਨਂ, ਝਾਨਂ. ਆਰਮ੍ਮਣਾਭਿਭਵਨਤੋ ਅਭਿਭੁ ਚ ਤਂ ਆਯਤਨਞ੍ਚ ਯੋਗਿਨੋ ਸੁਖਵਿਸੇਸਾਨਂ ਅਧਿਟ੍ਠਾਨਭਾਵਤੋ ਮਨਾਯਤਨਧਮ੍ਮਾਯਤਨਭਾਵਤੋ ਚਾਤਿਪਿ ਸਸਮ੍ਪਯੁਤ੍ਤਂ ਝਾਨਂ ਅਭਿਭਾਯਤਨਂ. ਮਗ੍ਗਪ੍ਪਟਿਬਦ੍ਧਤਾਯ ਤਦਾ ਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਆਭੋਗੋ ਪੁਬ੍ਬਭਾਗਭਾਵਨਾਵਸੇਨ ਝਾਨਕ੍ਖਣੇ ਪਵਤ੍ਤਂ ਅਭਿਭਵਨਾਕਾਰਂ ਗਹੇਤ੍ਵਾ ਪਵਤ੍ਤੋ ਵੁਤ੍ਤੋਤਿ ਦਟ੍ਠਬ੍ਬੋ. ਆਗਮੇਸੁ ਪਨ ‘‘ਅਜ੍ਝਤ੍ਤਂ ਰੂਪਸਞ੍ਞੀ ਏਕੋ ਬਹਿਦ੍ਧਾ ਰੂਪਾਨਿ ਪਸ੍ਸਤਿ ਪਰਿਤ੍ਤਾਨਿ ਸੁਵਣ੍ਣਦੁਬ੍ਬਣ੍ਣਾਨਿ. ਅਪ੍ਪਮਾਣਾਨਿ ਸੁਵਣ੍ਣਦੁਬ੍ਬਣ੍ਣਾਨਿ. ਅਜ੍ਝਤ੍ਤਂ ਅਰੂਪਸਞ੍ਞੀ ਏਕੋ…ਪੇ… ਪਰਿਤ੍ਤਾਨਿ ਸੁਵਣ੍ਣਦੁਬ੍ਬਣ੍ਣਾਨਿ. ਅਪ੍ਪਮਾਣਾਨਿ ਸੁਵਣ੍ਣਦੁਬ੍ਬਣ੍ਣਾਨੀ’’ਤਿ (ਦੀ. ਨਿ. ੨.੧੭੩; ਮ. ਨਿ. ੨.੨੪੯; ਅ. ਨਿ. ੮.੬੫) ਇਮੇਸਂ ਚਤੁਨ੍ਨਂ ਅਭਿਭਾਯਤਨਾਨਂ ਆਗਤਤ੍ਤਾ ਆਗਮਟ੍ਠਕਥਾਸੁ (ਦੀ. ਨਿ. ਅਟ੍ਠ. ੨.੧੭੩; ਮ. ਨਿ. ਅਟ੍ਠ. ੨. ੨੪੯-੨੫੦; ਅ. ਨਿ. ਅਟ੍ਠ. ੩.੮.੬੫) ‘‘ਵਣ੍ਣਵਸੇਨ ਆਭੋਗੇ ਵਿਜ੍ਜਮਾਨੇਪਿ ਪਰਿਤ੍ਤਅਪ੍ਪਮਾਣਵਸੇਨੇਵ ਇਮਾਨਿ ਅਭਿਭਾਯਤਨਾਨਿ ਦੇਸਿਤਾਨੀ’’ਤਿ ਵੁਤ੍ਤਂ. ਪਰਿਤ੍ਤਅਪ੍ਪਮਾਣਤਾ ਹਿ ਅਭਿਭਵਨਸ੍ਸ ਕਾਰਣਂ ਵਣ੍ਣਾਭੋਗੇ ਸਤਿਪਿ ਅਸਤਿਪਿ. ਤਤ੍ਥ ਚ ਵਣ੍ਣਾਭੋਗਰਹਿਤਾਨਿ ਸਹਿਤਾਨਿ ਚ ਸਬ੍ਬਾਨਿ ਪਰਿਤ੍ਤਾਨਿ ‘‘ਸੁਵਣ੍ਣਦੁਬ੍ਬਣ੍ਣਾਨੀ’’ਤਿ ਵੁਤ੍ਤਾਨਿ, ਤਥਾ ਅਪ੍ਪਮਾਣਾਨੀਤਿ ਦਟ੍ਠਬ੍ਬਾਨਿ. ਅਤ੍ਥਿ ਹਿ ਏਸੋ ਪਰਿਯਾਯੋ ਪਰਿਤ੍ਤਾਨਿ ਅਭਿਭੁਯ੍ਯ ਤਾਨਿ ਚੇ ਕਦਾਚਿ ਵਣ੍ਣਵਸੇਨ ਆਭੁਜਿਤਾਨਿ ਹੋਨ੍ਤਿ ਸੁਵਣ੍ਣਦੁਬ੍ਬਣ੍ਣਾਨਿ ਅਭਿਭੁਯ੍ਯਾਤਿ. ਇਧ ਪਨ ਨਿਪ੍ਪਰਿਯਾਯਦੇਸਨਤ੍ਤਾ ਵਣ੍ਣਾਭੋਗਰਹਿਤਾਨਿ ਵਿਸੁਂ ਵੁਤ੍ਤਾਨਿ ਸਹਿਤਾਨਿ ਚ. ਅਤ੍ਥਿ ਹਿ ਉਭਯਤ੍ਥ ਅਭਿਭਵਨਵਿਸੇਸੋਤਿ.
ਤਤ੍ਥ ਚ ਪਰਿਯਾਯਦੇਸਨਤ੍ਤਾ ਵਿਮੋਕ੍ਖਾਨਮ੍ਪਿ ਅਭਿਭਵਨਪਰਿਯਾਯੋ ਅਤ੍ਥੀਤਿ ‘‘ਅਜ੍ਝਤ੍ਤਂ ਰੂਪਸਞ੍ਞੀ’’ਤਿ ਅਭਿਭਾਯਤਨਦ੍ਵਯਂ ਵੁਤ੍ਤਂ, ਤਤਿਯਚਤੁਤ੍ਥਅਭਿਭਾਯਤਨੇਸੁ ਦੁਤਿਯਵਿਮੋਕ੍ਖੋ ਵਣ੍ਣਾਭਿਭਾਯਤਨੇਸੁ ਤਤਿਯਵਿਮੋਕ੍ਖੋ ਚ ਅਭਿਭਵਨਪ੍ਪਵਤ੍ਤਿਤੋ ਸਙ੍ਗਹਿਤੋ, ਇਧ ਪਨ ਨਿਪ੍ਪਰਿਯਾਯਦੇਸਨਤ੍ਤਾ ਵਿਮੋਕ੍ਖਾਭਿਭਾਯਤਨਾਨਿ ਅਸਙ੍ਕਰਤੋ ਦਸ੍ਸੇਤੁਂ ਵਿਮੋਕ੍ਖੇ ਵਜ੍ਜੇਤ੍ਵਾ ਅਭਿਭਾਯਤਨਾਨਿ ਕਥਿਤਾਨਿ. ਸਬ੍ਬਾਨਿ ਚ ਵਿਮੋਕ੍ਖਕਿਚ੍ਚਾਨਿ ਵਿਮੋਕ੍ਖਦੇਸਨਾਯ ਵੁਤ੍ਤਾਨਿ, ਤਦੇਤਂ ‘‘ਅਜ੍ਝਤ੍ਤਂ ਰੂਪਸਞ੍ਞੀ’’ਤਿ ਆਗਤਸ੍ਸ ਅਭਿਭਾਯਤਨਦ੍ਵਯਸ੍ਸ ਅਭਿਭਾਯਤਨੇਸੁ ਅਵਚਨਤੋ ‘‘ਰੂਪੀ ਰੂਪਾਨਿ ਪਸ੍ਸਤੀ’’ਤਿਆਦੀਨਞ੍ਚ ਸਬ੍ਬਵਿਮੋਕ੍ਖਕਿਚ੍ਚਸਾਧਾਰਣਵਚਨਭਾਵਤੋ ਵਵਤ੍ਥਾਨਂ ਕਤਨ੍ਤਿ ਵਿਞ੍ਞਾਯਤਿ.
ਅਜ੍ਝਤ੍ਤਰੂਪਾਨਂ ਅਨਭਿਭਵਨੀਯਤੋਤਿ ਇਦਂ ਕਤ੍ਥਚਿਪਿ ‘‘ਅਜ੍ਝਤ੍ਤਂ ਰੂਪਾਨਿ ਪਸ੍ਸਤੀ’’ਤਿ ਅਵਤ੍ਵਾ ਸਬ੍ਬਤ੍ਥ ਯਂ ਵੁਤ੍ਤਂ ‘‘ਬਹਿਦ੍ਧਾ ਰੂਪਾਨਿ ਪਸ੍ਸਤੀ’’ਤਿ, ਤਸ੍ਸ ਕਾਰਣਵਚਨਂ. ਤੇਨ ਯਂ ਅਞ੍ਞਹੇਤੁਕਂ, ਤਂ ਤੇਨ ਹੇਤੁਨਾ ਵੁਤ੍ਤਂ. ਯਂ ਪਨ ਦੇਸਨਾਵਿਲਾਸਹੇਤੁਕਂ ਅਜ੍ਝਤ੍ਤਂ ਅਰੂਪਸਞ੍ਞਿਤਾਯ ਏਵ ਇਧ ਵਚਨਂ, ਨ ਤਸ੍ਸ ਅਞ੍ਞਂ ਕਾਰਣਂ ਮਗ੍ਗਿਤਬ੍ਬਨ੍ਤਿ ਦਸ੍ਸੇਤਿ. ਅਜ੍ਝਤ੍ਤਰੂਪਾਨਂ ਅਨਭਿਭਵਨੀਯਤਾ ਚ ਬਹਿਦ੍ਧਾਰੂਪਾਨਂ ਵਿਯ ਅਵਿਭੂਤਤ੍ਤਾ, ਦੇਸਨਾਵਿਲਾਸੋ ਚ ਯਥਾਵੁਤ੍ਤਵਵਤ੍ਥਾਨਵਸੇਨ ਵੇਦਿਤਬ੍ਬੋ. ਸੁਵਣ੍ਣਦੁਬ੍ਬਣ੍ਣਾਨੀਤਿ ਏਤੇਨੇਵ ਸਿਦ੍ਧਤ੍ਤਾ ਨੀਲਾਦਿਅਭਿਭਾਯਤਨਾਨਿ ਨ ਵਤ੍ਤਬ੍ਬਾਨੀਤਿ ਚੇ? ਨ, ਨੀਲਾਦੀਸੁ ਕਤਾਧਿਕਾਰਾਨਂ ਨੀਲਾਦਿਭਾਵਸ੍ਸੇਵ ਅਭਿਭਵਨਕਾਰਣਤ੍ਤਾ. ਨ ਹਿ ਤੇਸਂ ਪਰਿਸੁਦ੍ਧਾਪਰਿਸੁਦ੍ਧਵਣ੍ਣਪਰਿਤ੍ਤਤਾ ਤਦਪ੍ਪਮਾਣਤਾ ਵਾ ਅਭਿਭਵਨਕਾਰਣਂ, ਅਥ ਖੋ ਨੀਲਾਦਿਭਾਵੋ ਏਵਾਤਿ.
ਅਭਿਭਾਯਤਨਕਥਾਵਣ੍ਣਨਾ ਨਿਟ੍ਠਿਤਾ.
ਵਿਮੋਕ੍ਖਕਥਾਵਣ੍ਣਨਾ
੨੪੮. ਰੂਪੀਤਿ ਯੇਨਾਯਂ ਸਸਨ੍ਤਤਿਪਰਿਯਾਪਨ੍ਨੇਨ ਰੂਪੇਨ ਸਮਨ੍ਨਾਗਤੋ, ਤਂ ਯਸ੍ਸ ਝਾਨਸ੍ਸ ਹੇਤੁਭਾਵੇਨ ਵਿਸਿਟ੍ਠਂ ਰੂਪਂ ਹੋਤਿ. ਯੇਨ ਵਿਸਿਟ੍ਠੇਨ ਰੂਪੀਤਿ ਵੁਚ੍ਚੇਯ੍ਯ, ਤਦੇਵ ਸਸਨ੍ਤਤਿਪਰਿਯਾਪਨ੍ਨਰੂਪਨਿਮਿਤ੍ਤਂ ਝਾਨਮਿਵ ਪਰਮਤ੍ਥਤੋ ਰੂਪੀਭਾਵਸਾਧਕਨ੍ਤਿ ਦਟ੍ਠਬ੍ਬਂ. ਕਸਿਣਦੇਸਨਾ ਝਾਨਾਨਮੇਵ ਕਸਿਣਭਾਵੇਨ ਪਵਤ੍ਤਾ ਅਭਿਧਮ੍ਮੇ, ਸੁਤ੍ਤੇ ਪਨ ਆਰਮ੍ਮਣਾਨਨ੍ਤਿ ‘‘ਅਭਿਧਮ੍ਮਵਸੇਨਾ’’ਤਿ ਵੁਤ੍ਤਂ.
ਵਿਮੋਕ੍ਖਕਥਾਵਣ੍ਣਨਾ ਨਿਟ੍ਠਿਤਾ.
ਬ੍ਰਹ੍ਮਵਿਹਾਰਕਥਾਵਣ੍ਣਨਾ
੨੫੧. ਸੋਮਨਸ੍ਸਦੋਮਨਸ੍ਸਰਹਿਤਂ ਅਞ੍ਞਾਣਮੇਵ ਅਞ੍ਞਾਣੁਪੇਕ੍ਖਾ. ਕਿਲੇਸੋਧੀਨਂ ਮਗ੍ਗੋਧੀਹਿ ਅਜਿਤਤ੍ਤਾ ਅਨੋਧਿਜਿਨਸ੍ਸ. ਸਤ੍ਤਮਭਵਾਦਿਤੋ ਉਦ੍ਧਂ ਪਵਤ੍ਤਵਿਪਾਕਸ੍ਸ ਅਜਿਤਤ੍ਤਾ ਅਵਿਪਾਕਜਿਨਸ੍ਸ. ਨਿਦ੍ਦੋਸਭਾਵੇਨਾਤਿ ਨਿਪ੍ਪਟਿਘਭਾਵੇਨ. ਏਕਸ੍ਸਪਿ ਸਤ੍ਤਸ੍ਸ ਅਪ੍ਪਟਿਭਾਗਨਿਮਿਤ੍ਤਤ੍ਤਾ ਪਰਿਚ੍ਛੇਦਗ੍ਗਹਣਂ ਨਤ੍ਥਿ, ਨ ਚ ਸਮ੍ਮੁਤਿਸਚ੍ਚਵਸੇਨ ਪਵਤ੍ਤਂ ਸਤ੍ਤਗ੍ਗਹਣਂ ਪਰਿਚ੍ਛਿਨ੍ਨਰੂਪਾਦਿਗ੍ਗਹਣਂ ਹੋਤੀਤਿ ਅਪ੍ਪਨਾਪ੍ਪਤ੍ਤਿਯਾਪਿ ਅਪਰਾਮਾਸਸਤ੍ਤਗ੍ਗਹਣਮੁਦ੍ਧਭੂਤਾਨਂ ਮੇਤ੍ਤਾਦੀਨਂ ਏਕਸਤ੍ਤਾਰਮ੍ਮਣਾਨਮ੍ਪਿ ਅਪ੍ਪਮਾਣਗੋਚਰਤਾ ਵੁਤ੍ਤਾਤਿ ਵੇਦਿਤਬ੍ਬਾ.
ਬ੍ਰਹ੍ਮਵਿਹਾਰਕਥਾਵਣ੍ਣਨਾ ਨਿਟ੍ਠਿਤਾ.
ਅਸੁਭਕਥਾਵਣ੍ਣਨਾ
੨੬੩. ਉਦ੍ਧਂ ਧੁਮਾਤਤ੍ਤਾ ਉਦ੍ਧੁਮਾਤਂ. ਸੇਤਰਤ੍ਤੇਹਿ ਪਰਿਭਿਨ੍ਨਂ ਵਿਮਿਸ੍ਸਿਤਂ ਨੀਲਂ ਵਿਨੀਲਂ, ਪੁਰਿਮਵਣ੍ਣਵਿਪਰਿਣਾਮਭੂਤਂ ਵਾ ਨੀਲਂ ਵਿਨੀਲਂ. ਸਙ੍ਘਾਟੋ ਅਙ੍ਗਾਨਂ ਸੁਸਮ੍ਬਦ੍ਧਤਾ. ਆਰਮ੍ਮਣਸ੍ਸ ਦੁਬ੍ਬਲਤਾ ਪਟਿਪਕ੍ਖਭਾਵੇਨ ਚਿਤ੍ਤਂ ਠਪੇਤੁਂ ਅਸਮਤ੍ਥਤਾ. ਅਤ੍ਤਨਿ ਆਨਿਸਂਸਦਸ੍ਸਨਨੀਵਰਣਰੋਗਵੂਪਸਮਾਨਂ ਯਥਾਕ੍ਕਮਂ ਪੁਪ੍ਫਛਡ੍ਡਕਵਮਨਵਿਰੇਚਨਉਪਮਾ ਯੋਜੇਤਬ੍ਬਾ. ਪਟਿਕੂਲਮਨਸਿਕਾਰਸਾਮਞ੍ਞੇਨ ਅਸੁਭੇਹਿ ਕੇਸਾਦੀਹਿ ਪਟਿਕੂਲਜ੍ਝਾਨਸ੍ਸ ਗਹਣਂ ਸਿਵਥਿਕਾਵਣ੍ਣਜ੍ਝਾਨਸ੍ਸ ਚ. ਤਮ੍ਪਿ ਹਿ ਪਟਿਕੂਲਮਨਸਿਕਾਰਵਸੇਨੇਵ ਉਪ੍ਪਜ੍ਜਤੀਤਿ, ਸਿਵਥਿਕਪ੍ਪਕਾਰਾਨਿ ਵਾ ਸਿਵਥਿਕਾਵਣ੍ਣਾਨਿ.
ਅਸੁਭਕਥਾਵਣ੍ਣਨਾ ਨਿਟ੍ਠਿਤਾ.
ਰੂਪਾਵਚਰਕੁਸਲਕਥਾਵਣ੍ਣਨਾ ਨਿਟ੍ਠਿਤਾ.
ਅਰੂਪਾਵਚਰਕੁਸਲਕਥਾਵਣ੍ਣਨਾ
੨੬੫. ਸਬ੍ਬਾਕਾਰੇਨਾਤਿ ਏਵਂ ਰੂਪਨਿਮਿਤ੍ਤਂ ਦਣ੍ਡਾਦਾਨਸਮ੍ਭਵਦਸ੍ਸਨਾਦਿਨਾ ਸਬ੍ਬੇਨ ਰੂਪਰੂਪਨਿਮਿਤ੍ਤੇਸੁ ਤਦਾਰਮ੍ਮਣਜ੍ਝਾਨੇਸੁ ਦੋਸਦਸ੍ਸਨਾਕਾਰੇਨ, ਰੂਪਾਦੀਸੁ ਨਿਕਨ੍ਤਿਪ੍ਪਹਾਨਅਨਾਵਜ੍ਜਿਤੁਕਾਮਤਾਦਿਨਾ ਵਾ. ਵਿਰਾਗਾਤਿ ਜਿਗੁਚ੍ਛਨਾ. ਆਨੇਞ੍ਜਾਭਿਸਙ੍ਖਾਰਵਚਨਾਦੀਹਿ ਆਨੇਞ੍ਜਤਾ ‘‘ਸਨ੍ਤਾ ਇਮੇ ਚੁਨ੍ਦ ਅਰਿਯਸ੍ਸ ਵਿਨਯੇ ਵਿਮੋਕ੍ਖਾ’’ਤਿਆਦਿਨਾ ਸਨ੍ਤਵਿਮੋਕ੍ਖਤਾ ਚ ਵੁਤ੍ਤਾ. ਦੋਸਦਸ੍ਸਨਪਟਿਪਕ੍ਖਭਾਵਨਾਵਸੇਨ ਪਟਿਘਸਞ੍ਞਾਨਂ ਸੁਪ੍ਪਹੀਨਤ੍ਤਾ ਮਹਤਾਪਿ ਸਦ੍ਦੇਨ ਅਰੂਪਸਮਾਪਤ੍ਤਿਤੋ ਨ ਵੁਟ੍ਠਾਤਿ. ਤਥਾ ਪਨ ਨ ਸੁਪ੍ਪਹੀਨਤ੍ਤਾ ਸਬ੍ਬਰੂਪਸਮਾਪਤ੍ਤਿਤੋ ਵੁਟ੍ਠਾਨਂ ਸਿਯਾ, ਪਠਮਜ੍ਝਾਨਂ ਪਨ ਅਪ੍ਪਕਮ੍ਪਿ ਸਦ੍ਦਂ ਨ ਸਹਤੀਤਿ ਤਂ ਸਮਾਪਨ੍ਨਸ੍ਸ ਸਦ੍ਦੋ ਕਣ੍ਟਕੋਤਿ ਵੁਤ੍ਤਂ.
ਆਰੁਪ੍ਪਭਾਵਨਾਯ ਅਭਾਵੇ ਚੁਤਿਤੋ ਉਦ੍ਧਂ ਉਪ੍ਪਤ੍ਤਿਰਹਾਨਂ ਰੂਪਸਞ੍ਞਾਪਟਿਘਸਞ੍ਞਾਨਂ ਯਾਵ ਅਤ੍ਤਨੋ ਵਿਪਾਕਪ੍ਪਵਤ੍ਤਿ, ਤਾਵ ਅਨੁਪ੍ਪਤ੍ਤਿਧਮ੍ਮਤਾਪਾਦਨੇਨ ਸਮਤਿਕ੍ਕਮੋ ਅਤ੍ਥਙ੍ਗਮੋ ਚ ਵੁਤ੍ਤੋ. ਨਾਨਤ੍ਤਸਞ੍ਞਾਸੁ ਪਨ ਯਾ ਤਸ੍ਮਿਂ ਭਵੇ ਨ ਉਪ੍ਪਜ੍ਜਨ੍ਤਿ, ਤਾ ਅਨੋਕਾਸਤਾਯ ਨ ਉਪ੍ਪਜ੍ਜਨ੍ਤਿ, ਨ ਆਰੁਪ੍ਪਭਾਵਨਾਯ ਨਿਵਾਰਿਤਤ੍ਤਾ. ਅਨਿਵਾਰਿਤਤ੍ਤਾ ਚ ਕਾਚਿ ਉਪ੍ਪਜ੍ਜਨ੍ਤਿ. ਤਸ੍ਮਾ ਤਾਸਂ ਅਮਨਸਿਕਾਰੋ ਅਨਾਵਜ੍ਜਨਂ ਅਪਚ੍ਚਵੇਕ੍ਖਣਂ, ਜਵਨਪਟਿਪਾਦਕੇਨ ਵਾ ਭਵਙ੍ਗਮਨਸ੍ਸ ਅਨ੍ਤਰੇ ਅਕਰਣਂ ਅਪ੍ਪਵੇਸਨਂ ਵੁਤ੍ਤਂ, ਤੇਨ ਚ ਨਾਨਤ੍ਤਸਞ੍ਞਾਮਨਸਿਕਾਰਹੇਤੂਨਂ ਰੂਪਾਨਂ ਸਮਤਿਕ੍ਕਮਾ ਸਮਾਧਿਸ੍ਸ ਥਿਰਭਾਵਂ ਦਸ੍ਸੇਤਿ. ਰੂਪਸਮਤਿਕ੍ਕਮਾਭਾਵੇਨੇਵ ਹਿ ਰੂਪਸਮਾਪਤ੍ਤੀਸੁ ‘‘ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ’’ਤਿ ਏਕਸ੍ਸ ਅਵਚਨਨ੍ਤਿ. ਕੋ ਆਨਿਸਂਸੋ, ਨ ਹਿ ਸਬ੍ਬਸ੍ਸਾਦਵਤ੍ਥੁਰਹਿਤੇ ਆਕਾਸੇ ਪਵਤ੍ਤਿਤਸਞ੍ਞਾਯ ਆਨਿਸਂਸੋ ਦਿਸ੍ਸਤੀਤਿ ਵੁਤ੍ਤਂ ਹੋਤਿ. ਰੂਪਸਞ੍ਞਾਸਮਤਿਕ੍ਕਮਨਾਦਿਕਂ ਵਚਨਂ ਆਨਿਸਂਸਸ੍ਸ ਪਕਾਸਨਂ, ਨ ਅਤ੍ਥੋ.
ਅਞ੍ਞਤ੍ਥਾਤਿ ਸੁਤ੍ਤੇਸੁ. ਤਤ੍ਥ ਹਿ ਪਰਿਤ੍ਤਕਸਿਣੁਗ੍ਘਾਟਨੇਪਿ ਰੂਪਵਿਵੇਕਮਤ੍ਤਗ੍ਗਹਣੇਨ ਪਰਿਚ੍ਛੇਦਸ੍ਸ ਅਗ੍ਗਹਣਤੋ ਅਨਨ੍ਤਫਰਣਤਾ ਚ ਵੁਤ੍ਤਾ, ਇਧ ਪਨ ਅਨਨ੍ਤਫਰਣਤਾਸਬ੍ਭਾਵੇਪਿ ਉਗ੍ਘਾਟਿਤਕਸਿਣਵਸੇਨ ਪਰਿਤ੍ਤਾਨਨ੍ਤਤਾ ਹੋਤੀਤਿ ਦਸ੍ਸਨਤ੍ਥਂ ‘‘ਅਨਨ੍ਤੋ ਆਕਾਸੋ’’ਤਿ ਨ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਸਮਯਵਵਤ੍ਥਾਪਨਝਾਨਵਿਸੇਸਨੇਨੇਵੇਤ੍ਥ ਅਤ੍ਥੋ, ਨ ਪਟਿਪਤ੍ਤਿਯਾਤਿ ਤਦਵਚਨਂ.
੨੬੬. ਪਠਮਾਰੁਪ੍ਪਵਿਞ੍ਞਾਣਂ ਅਤ੍ਤਨੋ ਫਰਣਾਕਾਰੇਨੇਵ ਅਨਨ੍ਤਨ੍ਤਿ ਮਨਸਿਕਾਤਬ੍ਬਤ੍ਤਾ ‘‘ਅਨਨ੍ਤ’’ਨ੍ਤਿ ਵੁਤ੍ਤਂ. ਉਗ੍ਘਾਟਭਾਵੋ ਉਗ੍ਘਾਟਿਮਂ.
੨੬੭. ਅਕਿਞ੍ਚਨਨ੍ਤਿ ਵਿਞ੍ਞਾਣਸ੍ਸ ਕਿਞ੍ਚਿ ਪਕਾਰਂ ਅਗ੍ਗਹੇਤ੍ਵਾ ਸਬ੍ਬੇਨ ਸਬ੍ਬਂ ਵਿਭਾਵਨਂ ਆਹ.
੨੬੮. ਯਾਯਾਤਿ ਸਙ੍ਖਾਰਾਵਸੇਸਸਞ੍ਞਾਯ. ਤਂ ਤਾਵ ਪਟਿਪਤ੍ਤਿਂ. ਆਵਜ੍ਜਿਸ੍ਸਾਮੀਤਿਆਦਿਨਾ ਤਨ੍ਨਿਨ੍ਨਾਵਜ੍ਜਨਾਦਿਪਵਤ੍ਤਿਯਾ ਅਭਾਵਂ ਦਸ੍ਸੇਤਿ, ਨ ਤਦਤਿਕ੍ਕਮਨਤ੍ਥਾਯ ਆਵਜ੍ਜਨਭਾਵਨਾਪਵਤ੍ਤਿਯਾ. ਨਾਸਞ੍ਞਾਤਿ ਸਞ੍ਞਾਭਾਵੋ ਚ ਏਤਿਸ੍ਸਾ ਅਤ੍ਥੀਤਿ ਅਤ੍ਥੋ. ਸਮੂਹਗਹਣਵਸੇਨ ਪਵਤ੍ਤਂ ਕਲਾਪਸਮ੍ਮਸਨਂ. ਫਸ੍ਸਾਦਿਏਕੇਕਧਮ੍ਮਗਹਣਵਸੇਨ ਪਵਤ੍ਤਾ ਅਨੁਪਦਧਮ੍ਮਵਿਪਸ੍ਸਨਾ.
ਆਕਾਸੇ ਪਵਤ੍ਤਿਤਵਿਞ੍ਞਾਣਾਤਿਕ੍ਕਮਤੋ ਤਤਿਯਾ. ਤਦਤਿਕ੍ਕਮਤੋ ਹਿ ਤਸ੍ਸੇਵ ਵਿਭਾਵਨਂ ਹੋਤਿ. ਦੁਤਿਯਾਰੁਪ੍ਪਵਿਞ੍ਞਾਣਵਿਭਾਵਨੇ ਹਿ ਤਦੇਵ ਅਤਿਕ੍ਕਨ੍ਤਂ ਸਿਯਾ, ਨ ਤਸ੍ਸ ਆਰਮ੍ਮਣਂ, ਨ ਚਾਰਮ੍ਮਣੇ ਦੋਸਂ ਦਿਸ੍ਵਾ ਅਨਾਰਮ੍ਮਣਸ੍ਸ ਵਿਭਾਵਨਾਤਿਕ੍ਕਮੋ ਯੁਜ੍ਜਤਿ. ਪਾਲ਼ਿਯਞ੍ਚ ‘‘ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿਂ ਸਤੋ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਹਿਤ੍ਵਾ ਤਞ੍ਞੇਵ ਵਿਞ੍ਞਾਣਂ ਅਭਾਵੇਤੀ’’ਤਿ (ਚੂਲ਼ਨਿ. ਉਪਸੀਵਮਾਣਵਪੁਚ੍ਛਾਨਿਦ੍ਦੇਸ ੩੯) ਤ੍ਤਂ, ਨ ਵੁਤ੍ਤਂ ‘‘ਤਞ੍ਞੇਵ ਵਿਞ੍ਞਾਣਞ੍ਚਾਯਤਨਂ ਅਭਾਵੇਤੀ’’ਤਿ, ‘‘ਤਞ੍ਞੇਵ ਅਭਾਵੇਤੀ’’ਤਿ ਵਾ. ‘‘ਅਨਨ੍ਤਂ ਵਿਞ੍ਞਾਣਨ੍ਤਿ ਵਿਞ੍ਞਾਣਞ੍ਚਾਯਤਨਂ ਉਪਸਮ੍ਪਜ੍ਜਾ’’ਤਿ (ਵਿਭ. ੫੦੮) ਏਤ੍ਥ ਪਨ ਦ੍ਵਯਂ ਵੁਤ੍ਤਂ ਆਰਮ੍ਮਣਞ੍ਚ ਵਿਞ੍ਞਾਣਂ ਵਿਞ੍ਞਾਣਞ੍ਚਾਯਤਨਞ੍ਚ. ਤਸ੍ਮਿਂ ਦ੍ਵਯੇ ਯੇਨ ਕੇਨਚਿ ਯਤੋ ਵਾ ਵੁਟ੍ਠਿਤੋ, ਤੇਨੇਵ ਪਟ੍ਠਾਨਨਿਦ੍ਦਿਟ੍ਠੇਨ ਤਂਸਦ੍ਦਸ੍ਸ ਸਮ੍ਬਨ੍ਧੇ ਆਪਨ੍ਨੇ ਵਿਞ੍ਞਾਣਞ੍ਚਾਯਤਨਸ੍ਸ ਨਿਵਤ੍ਤਨਤ੍ਥਂ ਵਿਞ੍ਞਾਣਵਚਨਂ, ਤਸ੍ਮਾ ਪਠਮਾਰੁਪ੍ਪਵਿਞ੍ਞਾਣਸ੍ਸੇਵ ਅਭਾਵਨਾਤਿਕ੍ਕਮੋ ਵੁਤ੍ਤੋ. ਤਨ੍ਨਿਸ੍ਸਿਤਨ੍ਤਿ ਤੇਨ ਨਿਸ੍ਸਿਤਂ. ਤਂ ਮਣ੍ਡਪਲਗ੍ਗਂ ਅਨਿਸ੍ਸਾਯ ਤੇਨ ਵਿਨਾਭੂਤੇ ਵਿਵਿਤ੍ਤੇ ਬਹਿ ਓਕਾਸੇ ਠਾਨਂ ਵਿਯ ਆਕਾਸਲਗ੍ਗਵਿਞ੍ਞਾਣਸ੍ਸ ਵਿਵੇਕੇ ਤਦਪਗਮੇ ਤਤਿਯਾਰੁਪ੍ਪਸ੍ਸ ਠਾਨਂ.
ਅਰੂਪਾਵਚਰਕੁਸਲਕਥਾਵਣ੍ਣਨਾ ਨਿਟ੍ਠਿਤਾ.
ਤੇਭੂਮਕਕੁਸਲਵਣ੍ਣਨਾ
੨੬੯. ਇਮੇ ਤਾਵ ਛਨ੍ਦਾਧਿਪਤੇਯ੍ਯੇ ਪਞ੍ਚ ਨਯਾਤਿ ਛਨ੍ਦਾਧਿਪਤੇਯ੍ਯਨਯੇ ਅਨ੍ਤੇ ਪੁਰਿਮਨਯਾਨਂ ਤਂਨਯਾਭਿਮੁਖਪ੍ਪਵਤ੍ਤਿਂ ਸਨ੍ਧਾਯ ਵੁਤ੍ਤਂ, ਅਯਂ ਪਨ ਪਕਾਰੋ ਨ ਪਾਲ਼ਿਅਨੁਗਤੋ. ਨ ਹਿ ਪਾਲ਼ਿਯਂ ਸੁਦ੍ਧਿਕਨਯਾਦਯੋ ਵਤ੍ਵਾ ਵੀਰਿਯਾਧਿਪਤੇਯ੍ਯਾਦਿਨਯਾ ਵੁਤ੍ਤਾਤਿ. ਮਹਾਪਕਰਣੇ ਸਤ੍ਤਹਿ ਮਹਾਵਾਰੇਹਿ ਅਨੁਲੋਮਾਦਿਨਯਵਿਚਿਤ੍ਤੇਹਿ ਹੀਨਤ੍ਤਿਕੋ ਵਿਭਤ੍ਤੋ. ਤਤ੍ਥ ਚ ਮਜ੍ਝਿਮਧਮ੍ਮੇਕਦੇਸਭੂਤਾ ਇਮੇ ਵੀਸਤਿ ਲੋਕਿਯਮਹਾਨਯਾਤਿ ਕਤ੍ਵਾ ‘‘ਤਤ੍ਥ ਵਿਭਤ੍ਤਾ’’ਤਿ ਵੁਤ੍ਤਂ, ਨ ਏਤੇਨ ਕਮੇਨ ਇਮੇਸਂ ਨਯਾਨਂ ਤਤ੍ਥ ਆਗਤਤ੍ਤਾ.
ਏਵਮੇਤੇਸਂ ਵਿਭਤ੍ਤਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਏਤਸ੍ਮਿਂ ਤੇਭੂਮਕਕੁਸਲਕਥਾਵਸਾਨਟ੍ਠਾਨੇ ਅਟ੍ਠਾਰਸਕਮ੍ਮਦ੍ਵਾਰਦਸ੍ਸਨਤ੍ਥਂ ‘‘ਇਮਸ੍ਮਿਂ ਪਨ ਠਾਨੇ’’ਤਿਆਦਿਮਾਹ. ਅਥ ਵਾ ਹੀਨਪਣੀਤੇਹਿ ਵਿਨਿਵਤ੍ਤੇਤ੍ਵਾ ਮਜ੍ਝਿਮਰਾਸਿਅਨ੍ਤੋਗਧਭਾਵਂ ਦਸ੍ਸੇਨ੍ਤੇਨ ਏਤੇਸਂ ਤੇਭੂਮਕਕੁਸਲਨਯਾਨਂ ਹੀਨਤ੍ਤਿਕੇ ਵਿਭਾਗੋ ਕਤੋ. ‘‘ਇਮਸ੍ਮਿਂ ਪਨ ਠਾਨੇ’’ਤਿਆਦਿਕਸ੍ਸ ਯਥਾਵੁਤ੍ਤੋਵ ਸਮ੍ਬਨ੍ਧੋ. ਹੀਨਤ੍ਤਿਕੇ ਮਜ੍ਝਿਮਰਾਸਿਮ੍ਹਿ ਯੇ ਸਵਿਪਾਕਾ ਵਟ੍ਟਨਿਸ੍ਸਿਤੇਨੇਵ ਦਾਨਾਦਿਵਸੇਨ ਪਵਤ੍ਤਿਤਾ, ਤੇ ਹੀਨਾਤਿ ਕਾਤਬ੍ਬਾ. ਯੇ ਵਿਵਟ੍ਟਨਿਸ੍ਸਿਤੇਨ ਦਾਨਾਦਿਵਸੇਨ ਪਵਤ੍ਤਿਤਾ, ਤੇ ਪਣੀਤਾਤਿ ਕਾਤਬ੍ਬਾ. ਅਵਿਪਾਕਾ ਮਜ੍ਝਿਮਾਤਿ ਕਾਤਬ੍ਬਾ. ਅਵਿਪਾਕਤ੍ਤਾ ਚ ਤੇਸੁ ਮਜ੍ਝਿਮਰਾਸਿਂ ਠਪੇਤ੍ਵਾ ਇਤਰੇ ਦ੍ਵੇ ਏਕਨ੍ਤਵਟ੍ਟਨਿਸ੍ਸਿਤਾ ਨਵ, ਵਿਵਟ੍ਟੁਪਨਿਸ੍ਸਯਭੂਤਾ ਚ ਨਵਾਤਿ ਅਟ੍ਠਾਰਸ ਕਮ੍ਮਦ੍ਵਾਰਾਨਿ, ਕਮ੍ਮਾਨਿ ਚ ਤਾਨਿ ਤਸ੍ਸ ਤਸ੍ਸ ਫਲਸ੍ਸ ਕਾਰਣਭਾਵੇਨ ਦ੍ਵਾਰਾਨਿ ਚਾਤਿ ਕਮ੍ਮਦ੍ਵਾਰਾਨਿ. ਤਤ੍ਥ ਤਤ੍ਥ ਵਾ ਚਿਤ੍ਤਾਨਿ ਕਮ੍ਮਦ੍ਵਾਰਾਨੀਤਿ ਆਹ. ਤਂਤਂਦ੍ਵਾਰਾਨਿ ਵਾ ਕਾਯਾਦੀਨਿ. ਅਟ੍ਠਾਰਸ ਖਤ੍ਤਿਯਾ ਚ ਅਭਬ੍ਬਾ ਹੀਨਹੀਨਤ੍ਤਯਾਦਯੋ ਨਵ, ਭਬ੍ਬਾ ਚ ਪਣੀਤਪਣੀਤਤ੍ਤਯਾਦਯੋ ਨਵਾਤਿ ਕਮ੍ਮਾਨੁਰੂਪੇਨੇਵ ਵੇਦਿਤਬ੍ਬਾ. ਏਵਂ ਬ੍ਰਾਹ੍ਮਣਾਦਯੋ ਦੇਵਾ ਚ ਯੋਜੇਤਬ੍ਬਾ. ਅਟ੍ਠਚਤ੍ਤਾਲੀਸ ਗੋਤ੍ਤਚਰਣਾਨਿ ਤੇਸਞ੍ਞੇਵ ਖਤ੍ਤਿਯਾਦੀਨਂ ਭੇਦਾ. ‘‘ਕਾਮਾਵਚਰਂ ਕੁਸਲਂ ਚਿਤ੍ਤਂ ਉਪ੍ਪਨ੍ਨਂ ਹੋਤਿ…ਪੇ… ਚਿਤ੍ਤਾਧਿਪਤੇਯ੍ਯ’’ਨ੍ਤਿ (ਧ. ਸ. ੨੬੯-੨੭੦) ਏਵਂ ਵੁਤ੍ਤੋ ਚਿਤ੍ਤਸ੍ਸ ਚਿਤ੍ਤਾਧਿਪਤੇਯ੍ਯਭਾਵੋ, ਚਿਤ੍ਤਚੇਤਸਿਕਸਮੁਦਾਯੇ ਸਮਯਵਵਤ੍ਥਾਪਕੋ ਚਿਤ੍ਤਸਦ੍ਦੋ ਪਵਤ੍ਤੋਤਿ ‘‘ਸਮ੍ਪਯੁਤ੍ਤਧਮ੍ਮਾਨਂ ਵਸੇਨ ਵੁਤ੍ਤੋ’’ਤਿ ਆਹ.
ਤੇਭੂਮਕਕੁਸਲਵਣ੍ਣਨਾ ਨਿਟ੍ਠਿਤਾ.
ਲੋਕੁਤ੍ਤਰਕੁਸਲਵਣ੍ਣਨਾ
੨੭੭. ਲੋਕਂ ਤਰਤੀਤਿ ਏਤੇਨ ਲੋਕਸਮਤਿਕ੍ਕਮਪਟਿਪਤ੍ਤਿਮਾਹ. ਉਤ੍ਤਰਤੀਤਿ ਏਤੇਨ ਲੋਕਸ੍ਸਨ੍ਤਗਮਨਂ ਫਲੇ ਪਤਿਟ੍ਠਾਨਂ ਫਲਂ. ਸਮਤਿਕ੍ਕਮ੍ਮਾਤਿਆਦਿਨਾ ਨਿਬ੍ਬਾਨਂ. ਸਮਤਿਕ੍ਕਮ੍ਮਾਤਿ ਹਿ ਨਿਸ੍ਸਰਿਤ੍ਵਾ. ਅਭਿਭੁਯ੍ਯਾਤਿ ਵਿਸਂਯੁਤ੍ਤਂ ਹੁਤ੍ਵਾਤਿ ਅਤ੍ਥੋ. ਤਿਵਿਧੋਪਿ ਚਤ੍ਥੋ ਮਗ੍ਗਾਦੀਸੁ ਏਕੇਕਸ੍ਮਿਂ ਯੋਜੇਤਬ੍ਬੋ, ਮਗ੍ਗੇਯੇਵ ਵਾ ਇਧ ਤਸ੍ਸ ਅਧਿਪ੍ਪੇਤਤ੍ਤਾ. ਏਕਚਿਤ੍ਤਕ੍ਖਣਿਕਨ੍ਤਿ ਏਕਮਗ੍ਗਸ੍ਸ ਦ੍ਵੇ ਵਾਰੇ ਅਨੁਪ੍ਪਤ੍ਤਿਂ ਸਨ੍ਧਾਯਾਹ. ਅਞ੍ਞਮਞ੍ਞਂ ਧਮ੍ਮਾਨਂ ਅਨਤਿਵਤ੍ਤਨਾਦਿਸਾਧਿਕਾਯ ਪਞ੍ਞਾਯ ਵਡ੍ਢੇਤਿ. ‘‘ਨਿਯ੍ਯਾਤੀਤਿ ਨਿਯ੍ਯਾਨੀਯ’’ਨ੍ਤਿ ਵਤ੍ਤਬ੍ਬੇ ਈ-ਕਾਰਸ੍ਸ ਰਸ੍ਸਤ੍ਤਂ ਯ-ਕਾਰਸ੍ਸ ਚ ਕ-ਕਾਰਂ ਕਤ੍ਵਾ ‘‘ਨਿਯ੍ਯਾਨਿਕ’’ਨ੍ਤਿ ਵੁਤ੍ਤਂ. ਨਿਯ੍ਯਾਤਿ ਏਤੇਨਾਤਿ ਨਿਯ੍ਯਾਨਂ, ਨਿਯ੍ਯਾਨਮੇਵ ਨਿਯ੍ਯਾਨਿਕਂ ਵੇਨਯਿਕੋ ਵਿਯ. ਏਤ੍ਥ ‘‘ਨੇਯ੍ਯਾਨਿਕ’’ਨ੍ਤਿ ਵਤ੍ਤਬ੍ਬੇ ਇ-ਕਾਰਸ੍ਸ ਏ-ਕਾਰਤ੍ਤਂ ਅਕਤ੍ਵਾ ਵੁਤ੍ਤਂ.
ਫਲਨ੍ਤਿ ਚਿਤ੍ਤਚੇਤਸਿਕਰਾਸਿ ਵੁਚ੍ਚਤਿ, ਤਂ ਅਞ੍ਞਮਞ੍ਞਂ ਸਮ੍ਪਯੁਤ੍ਤਾਨਂ ਧਮ੍ਮਾਨਂ ਅਤ੍ਤਨੋ ਅਵਯਵਭੂਤਾਨਂ ਨਿਸ੍ਸਯੋ ਹੋਤਿ. ਫਲਞਾਣਂ ਵਾ ਫਲਂ, ਸਮ੍ਮਾਦਿਟ੍ਠਿਆਦਯੋ ਅਙ੍ਗਾਨਿ ਵਾ. ਲੋਕੁਤ੍ਤਰਭਾਵੇਤਿ ਲੋਕਂ ਉਤ੍ਤਿਣ੍ਣਭਾਵੇ. ਤੇਨ ਫਲਨਿਬ੍ਬਾਨਾਨਿ ਸਙ੍ਗਣ੍ਹਾਤਿ. ਤੇਸੁ ਯਂ ਭਵਤਿ ਫਲਂ, ਤਂ ‘‘ਭੂਮੀ’’ਤਿ ਵੁਚ੍ਚਤਿ. ਯਥਾ ਵਾ ਕਮ੍ਮਨਿਬ੍ਬਤ੍ਤਾ ਕਾਮਭਵਾਦਯੋ ਤਂਸਮਙ੍ਗਿਨੋ ਨਿਸ੍ਸਯਭਾਵੇਨ ‘‘ਭੂਮੀ’’ਤਿ ਵੁਚ੍ਚਨ੍ਤਿ, ਏਵਂ ਮਗ੍ਗੇਨ ਨਿਬ੍ਬਤ੍ਤਂ ਫਲਂ ਅਰਿਯਸਾਵਕਸ੍ਸ ਕਾਲੇਨ ਕਾਲਂ ਸਮਾਪਜ੍ਜਿਤਬ੍ਬਤਾਯ ਨਿਸ੍ਸਯਭਾਵਤੋ ‘‘ਭੂਮੀ’’ਤਿ ਵੁਚ੍ਚਤਿ, ਤਤੋਯੇਵ ਅਰਿਯਾ ਚਿਰਤਰਂ ਤਿਟ੍ਠਨ੍ਤਿ. ਸਮੁਚ੍ਛੇਦਵਿਵੇਕਵਸੇਨਾਤਿ ਏਤ੍ਥ ਅਪਾਯਗਮਨੀਯਾਨਂ ਅਚ੍ਚਨ੍ਤਸਮੁਚ੍ਛੇਦੋ ਇਤਰੇਸਞ੍ਚ ਵਿਜ੍ਜੁਤੋਭਾਸੇਨ ਵਿਯ ਤਮਸ੍ਸ ਸਮੁਚ੍ਛੇਦੋ ਦਟ੍ਠਬ੍ਬੋ. ਲੋਕਿਯਜ੍ਝਾਨਮ੍ਪਿ ਪੁਥੁਜ੍ਜਨਸ੍ਸ ਅਰਿਯਸ੍ਸ ਚ ਅਕਤਾਧਿਕਾਰਸ੍ਸ ਨ ਵਿਨਾ ਪਟਿਪਦਾਯ ਇਜ੍ਝਤਿ, ਕਤਾਧਿਕਾਰਸ੍ਸ ਪਨ ਅਰਿਯਸ੍ਸ ਮਗ੍ਗੇਨੇਵ ਸਮਿਜ੍ਝਨਤੋ ਵਿਪਾਕਾਨਂ ਵਿਯ ਕੁਸਲੇਨ ਤਥਾ ਸਮਿਦ੍ਧਸ੍ਸ ਅਰਿਯਮਗ੍ਗੇਨ ਸਦਿਸਤਾਯ ਅਭਾਵਤੋ ਅਤਬ੍ਬਿਪਾਕਤ੍ਤਾ ਚ ਨ ਮਗ੍ਗਪਟਿਪਦਾ ਤਸ੍ਸ ਝਾਨਸ੍ਸ ਪਟਿਪਦਾਤਿ ਸਕ੍ਕਾ ਵਤ੍ਤੁਨ੍ਤਿ ਤਤ੍ਥ ਤਥਾ ਗਰੁਂ ਕਤ੍ਵਾ ਪਟਿਪਦਾਹਿ ਏਵ ਦੇਸਨਾ ਨ ਕਤਾ, ਯਥਾਵੁਤ੍ਤਜ੍ਝਾਨਸਙ੍ਗਹਤ੍ਥਂ ਸੁਦ੍ਧਿਕਦੇਸਨਾਪਿ ਕਤਾ.
ਇਧ ਪਨ ਕਸ੍ਸਚਿ ਵਿਨਾ ਪਟਿਪਦਾਯ ਅਸਿਦ੍ਧਿਤੋ ਗਰੁਂ ਕਤ੍ਵਾ ਦਸ੍ਸੇਤੁਂ ‘‘ਦੁਕ੍ਖਪਟਿਪਦ’’ਨ੍ਤਿਆਦਿ ਵੁਤ੍ਤਂ. ਯੋ ਕੋਚਿ ਵਾਰੋਤਿ ਸਕਿਂ ਦ੍ਵਿਕ੍ਖਤ੍ਤੁਂ ਤਿਕ੍ਖਤ੍ਤੁਂ ਚਤੁਕ੍ਖਤ੍ਤੁਂ ਅਨੇਕਕ੍ਖਤ੍ਤੁਨ੍ਤਿ ਏਵਮਾਦੀਸੁ ਵਿਕ੍ਖਮ੍ਭਨਵਾਰੇਸੁ ਯੋ ਕੋਚਿ. ਸਕਿਂ ਦ੍ਵਿਕ੍ਖਤ੍ਤੁਞ੍ਚ ਵਿਕ੍ਖਮ੍ਭਨਵਾਰਾ ਸੁਖਾ ਪਟਿਪਦਾ ਏਵ, ਨ ਚ ਤਤੋ ਉਦ੍ਧਂ ਸੁਖਾ ਪਟਿਪਦਾ ਹੋਤੀਤਿ ਤਿਕ੍ਖਤ੍ਤੁਂ ਵਿਕ੍ਖਮ੍ਭਨਵਾਰਂ ਦੁਕ੍ਖਾ ਪਟਿਪਦਾਤਿ ਰੋਚੇਸੁਂ ਅਟ੍ਠਕਥਾਚਰਿਯਾ. ਤਸ੍ਮਿਂ ਤਥਾਰੋਚਿਤੇ ਤਤੋ ਪਰੇਸੁ ਚਤੁਕ੍ਖਤ੍ਤੁਂ ਵਿਕ੍ਖਮ੍ਭਨਵਾਰਾਦੀਸੁ ਵਤ੍ਤਬ੍ਬਮੇਵ ਨਤ੍ਥੀਤਿ. ਰੂਪਾਰੂਪਾਨਂ ਲਕ੍ਖਣਾਦੀਹਿ ਪਰਿਚ੍ਛਿਨ੍ਦਿਤ੍ਵਾ ਗਹਣਂ ਰੂਪਾਰੂਪਪਰਿਗ੍ਗਹੋ, ਨਾਮਰੂਪਮਤ੍ਤਮੇਤਂ, ਨ ਅਞ੍ਞੋ ਕੋਚਿ ਸਤ੍ਤਾਦਿਕੋਤਿ ਵਵਤ੍ਥਾਪਨਂ ਨਾਮਰੂਪਵਵਤ੍ਥਾਪਨਂ. ਪਰਿਗ੍ਗਹਿਤਰੂਪਾਰੂਪਸ੍ਸ ਮਗ੍ਗਪਾਤੁਭਾਵਦਨ੍ਧਤਾ ਚ ਨਾਮਰੂਪਵਵਤ੍ਥਾਪਨਾਦੀਨਂ ਕਿਚ੍ਛਸਿਦ੍ਧਿਤੋ ਸਿਯਾਤਿ ਨ ਰੂਪਾਰੂਪਪਰਿਗ੍ਗਹਕਿਚ੍ਛਤਾਯ ਏਵ ਦੁਕ੍ਖਪਟਿਪਦਤਾ ਵਤ੍ਤਬ੍ਬਾਤਿ ਚੇ? ਤਂ ਨ, ਨਾਮਰੂਪਵਵਤ੍ਥਾਪਨਾਦੀਨਂ ਪਚ੍ਚਨੀਕਕਿਲੇਸਮਨ੍ਦਤਾਯ ਸੁਖਸਿਦ੍ਧਿਯਮ੍ਪਿ ਤਥਾਸਿਦ੍ਧਵਿਪਸ੍ਸਨਾਸਹਗਤਾਨਂ ਇਨ੍ਦ੍ਰਿਯਾਨਂ ਮਨ੍ਦਤਾਯ ਮਗ੍ਗਪਾਤੁਭਾਵਦਨ੍ਧਭਾਵਤੋ.
ਰੂਪਾਰੂਪਂ ਪਰਿਗ੍ਗਹੇਤ੍ਵਾਤਿ ਅਕਿਚ੍ਛੇਨਪਿ ਪਰਿਗ੍ਗਹੇਤ੍ਵਾ. ਕਿਚ੍ਛੇਨ ਪਰਿਗ੍ਗਹਿਤੇ ਵਤ੍ਤਬ੍ਬਮੇਵ ਨਤ੍ਥਿ. ਏਵਂ ਸੇਸੇਸੁਪਿ. ਇਮਂ ਵਾਰਂ ਰੋਚੇਸੁਨ੍ਤਿ ਕਲਾਪਸਮ੍ਮਸਨਾਵਸਾਨੇ ਉਦਯਬ੍ਬਯਾਨੁਪਸ੍ਸਨਾਯ ਵਤ੍ਤਮਾਨਾਯ ਉਪ੍ਪਨ੍ਨਸ੍ਸ ਵਿਪਸ੍ਸਨੁਪਕ੍ਕਿਲੇਸਸ੍ਸ ਤਿਕ੍ਖਤ੍ਤੁਂ ਵਿਕ੍ਖਮ੍ਭਨੇਨ ਕਿਚ੍ਛਤਾਵਾਰਂ ਦੁਕ੍ਖਾ ਪਟਿਪਦਾਤਿ ਰੋਚੇਸੁਂ ਏਤਦਨ੍ਤਤ੍ਤਾ ਪਟਿਪਦਾਯ. ਏਤਸ੍ਸ ਅਕਿਚ੍ਛਤ੍ਤੇਪਿ ਪੁਰਿਮਾਨਂ ਕਿਚ੍ਛਤ੍ਤੇ ਦੁਕ੍ਖਪਟਿਪਦਤਾ ਵੁਤ੍ਤਨਯਾਵਾਤਿ ਨ ਪਟਿਸਿਦ੍ਧਾਤਿ ਦਟ੍ਠਬ੍ਬਂ. ਯਥਾਵੁਤ੍ਤਂ ਵਾ ਸਬ੍ਬਂ ਰੂਪਾਰੂਪਪਰਿਗ੍ਗਹਾਦਿਕਿਚ੍ਛਤਂ ਤਿਕ੍ਖਤ੍ਤੁਂ ਵਿਕ੍ਖਮ੍ਭਨਵਾਰਤਾਵਸੇਨ ‘‘ਇਮਂ ਵਾਰ’’ਨ੍ਤਿ ਆਹ. ਯਸ੍ਸ ਪਨ ਸਬ੍ਬਤ੍ਥ ਅਕਿਚ੍ਛਤਾ, ਤਸ੍ਸ ਸੁਖਾ ਪਟਿਪਦਾ ਵੇਦਿਤਬ੍ਬਾ.
ਮੁਸਾਵਾਦਾਦੀਨਂ ਵਿਸਂਵਾਦਨਾਦਿਕਿਚ੍ਚਤਾਯ ਲੂਖਾਨਂ ਅਪਰਿਗ੍ਗਾਹਕਾਨਂ ਪਟਿਪਕ੍ਖਭਾਵਤੋ ਪਰਿਗ੍ਗਾਹਕਸਭਾਵਾ ਸਮ੍ਮਾਵਾਚਾ. ਸਾ ਸਿਨਿਦ੍ਧਭਾਵਤੋ ਸਮ੍ਪਯੁਤ੍ਤਧਮ੍ਮੇ ਪਰਿਗ੍ਗਣ੍ਹਾਤਿ ਸਮ੍ਮਾਵਾਚਾਪਚ੍ਚਯਸੁਭਾਸਿਤਸੋਤਾਰਞ੍ਚ ਜਨਂ. ਕਾਯਿਕਕਿਰਿਯਾਕਿਚ੍ਚਂ ਕਤ੍ਤਬ੍ਬਂ ਸਮੁਟ੍ਠਾਪੇਤਿ, ਸਯਞ੍ਚ ਸਮੁਟ੍ਠਹਨਂ ਘਟਨਂ ਹੋਤੀਤਿ ਸਮ੍ਮਾਕਮ੍ਮਨ੍ਤਸਙ੍ਖਾਤਾ ਵਿਰਤਿਪਿ ਸਮੁਟ੍ਠਾਨਸਭਾਵਾਤਿ ਵੁਤ੍ਤਾ. ਸਮ੍ਪਯੁਤ੍ਤਧਮ੍ਮਾਨਂ ਵਾ ਉਕ੍ਖਿਪਨਂ ਸਮੁਟ੍ਠਹਨਂ ਕਾਯਿਕਕਿਰਿਯਾਯ ਭਾਰੁਕ੍ਖਿਪਨਂ ਵਿਯ, ਜੀਵਮਾਨਸ੍ਸ ਸਤ੍ਤਸ੍ਸ, ਸਮ੍ਪਯੁਤ੍ਤਧਮ੍ਮਾਨਂ ਵਾ ਸੁਦ੍ਧਿ ਵੋਦਾਨਂ ਆਜੀਵਸ੍ਸੇਵ ਵਾ ਜੀਵਿਤਿਨ੍ਦ੍ਰਿਯਵੁਤ੍ਤਿਯਾ.
੨੮੩. ਮਗ੍ਗਸਨ੍ਨਿਸ੍ਸਿਤਨ੍ਤਿ ਪਰਮਤ੍ਥਮਗ੍ਗਸਭਾਵਤ੍ਤਾ ਮਗ੍ਗਾਵਯਵਭਾਵੇਨ ਸਮੁਦਾਯਸਨ੍ਨਿਸ੍ਸਿਤਨ੍ਤਿ ਅਤ੍ਥੋ.
੨੮੫. ਪਤਿਟ੍ਠਾਨਂ ਕਿਲੇਸਵਸੇਨ, ਆਯੂਹਨਂ ਅਭਿਸਙ੍ਖਾਰਵਸੇਨ. ਤਣ੍ਹਾਵਸੇਨ ਵਾ ਪਤਿਟ੍ਠਾਨਂ, ਦਿਟ੍ਠਿਵਸੇਨ ਆਯੂਹਨਂ. ਬੋਧੀਤਿ ਯਾ ਅਯਂ ਧਮ੍ਮਸਾਮਗ੍ਗੀ ਵੁਚ੍ਚਤੀਤਿ ਯੋਜੇਤਬ੍ਬਾ. ਸੇਨਙ੍ਗਰਥਙ੍ਗਾਦਯੋ ਵਿਯਾਤਿ ਏਤੇਨ ਪੁਗ੍ਗਲਪਞ੍ਞਤ੍ਤਿਯਾ ਅਵਿਜ੍ਜਮਾਨਪਞ੍ਞਤ੍ਤਿਭਾਵਂ ਦਸ੍ਸੇਤਿ. ਅਙ੍ਗ-ਸਦ੍ਦੋ ਕਾਰਣਤ੍ਥੋਪਿ ਹੋਤੀਤਿ ਚਤੁਸਚ੍ਚਬੋਧਾਯ ਸਂਵਤ੍ਤਨ੍ਤੀਤਿ ਬੋਜ੍ਝਙ੍ਗਾ. ਬੁਜ੍ਝਨ੍ਤੀਤਿ ਬੋਧਿਯੋ, ਬੋਧਿਯੋ ਏਵ ਅਙ੍ਗਾਤਿ ‘‘ਅਨੁਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ’’ਤਿ ਵੁਤ੍ਤਂ. ਵਿਪਸ੍ਸਨਾਦੀਨਂ ਕਾਰਣਾਨਂ ਬੁਜ੍ਝਿਤਬ੍ਬਾਨਞ੍ਚ ਸਚ੍ਚਾਨਂ ਅਨੁਰੂਪਂ ਪਚ੍ਚਕ੍ਖਭਾਵੇਨ ਪਟਿਮੁਖਂ ਅਵਿਪਰੀਤਤਾਯ ਸਮ੍ਮਾ ਚ ਬੁਜ੍ਝਨ੍ਤੀਤਿ ਏਵਮਤ੍ਥਵਿਸੇਸਦੀਪਕੇਹਿ ਉਪਸਗ੍ਗੇਹਿ ‘‘ਅਨੁਬੁਜ੍ਝਨ੍ਤੀ’’ਤਿਆਦਿ ਵੁਤ੍ਤਂ. ਬੋਧਿ-ਸਦ੍ਦੋ ਹਿ ਸਬ੍ਬਵਿਸੇਸਯੁਤ੍ਤਂ ਬੁਜ੍ਝਨਂ ਸਾਮਞ੍ਞੇਨ ਸਙ੍ਗਣ੍ਹਾਤੀਤਿ.
੨੯੯. ਤਿਣ੍ਣਨ੍ਤਿ ਰਾਗਾਦੀਨਂ. ਕਰੋਤਿ ਨਾਮ ਕਿਂ ਦੁਚ੍ਚਰਿਤਾਨਿ ਅਨੁਵਤ੍ਤਮਾਨਾਨਿ.
੩੦੧. ਪਾਣਾਤਿਪਾਤਾਦਿਨਿਪ੍ਫਾਦਿਤਪਚ੍ਚਯਾਨਂ ਨਿਚ੍ਚਸੇਵਨਂ ਧੁਵਪਟਿਸੇਵਨਂ. ਸਕਿਚ੍ਚਕੋਤਿ ਵਿਸੁਂ ਅਤ੍ਤਨੋ ਕਿਚ੍ਚਵਾ. ਨ ਹੋਤੀਤਿ ਅਤ੍ਥਨ੍ਤਰਭਾਵਂ ਪਟਿਕ੍ਖਿਪਤਿ. ਪਚ੍ਚਯਪਟਿਸੇਵਨਸਾਮਨ੍ਤਜਪ੍ਪਨਇਰਿਯਾਪਥਪ੍ਪਵਤ੍ਤਨਾਨਿ ਪਾਪਿਚ੍ਛਤਾਨਿਬ੍ਬਤ੍ਤਾਨਿ ਤੀਣਿ ਕੁਹਨਵਤ੍ਥੂਨੀਤਿ.
੩੪੩. ਵੁਟ੍ਠਾਨਗਾਮਿਨੀਵਿਪਸ੍ਸਨਾ ਸਙ੍ਖਾਰੁਪੇਕ੍ਖਾ ਸਾਨੁਲੋਮਾ, ਸਾ ਸੁਞ੍ਞਤੋ ਪਸ੍ਸਨ੍ਤੀ ‘‘ਸੁਞ੍ਞਤਾ’’ਤਿ ਵੁਚ੍ਚਤਿ, ਦੁਕ੍ਖਤੋ ਪਸ੍ਸਨ੍ਤੀ ਤਣ੍ਹਾਪਣਿਧਿਸੋਸਨਤੋ ‘‘ਅਪ੍ਪਣਿਹਿਤ’’ਨ੍ਤਿ. ਸਾ ਆਗਮਨੀਯਟ੍ਠਾਨੇ ਮਗ੍ਗਾਧਿਗਮਤ੍ਥਂ ਆਗਮਨਪਟਿਪਦਾਠਾਨੇ ਠਤ੍ਵਾ ਸੁਞ੍ਞਤਾਪ੍ਪਣਿਹਿਤਨ੍ਤਿ ਨਾਮਂ ਦੇਤਿ. ਆਗਮਨਤੋ ਨਾਮੇ ਲਦ੍ਧੇ ਸਗੁਣਤੋ ਆਰਮ੍ਮਣਤੋ ਚ ਨਾਮਂ ਸਿਦ੍ਧਮੇਵ ਹੋਤਿ, ਨ ਪਨ ਸਗੁਣਾਰਮ੍ਮਣੇਹਿ ਨਾਮਲਾਭੇ ਸਬ੍ਬਤ੍ਥ ਆਗਮਨਤੋ ਨਾਮਂ ਸਿਦ੍ਧਂ ਹੋਤੀਤਿ ਪਰਿਪੁਣ੍ਣਨਾਮਸਿਦ੍ਧਿਹੇਤੁਤ੍ਤਾ ਸਗੁਣਾਰਮ੍ਮਣੇਹਿ ਸਬ੍ਬੇਸਮ੍ਪਿ ਨਾਮਤ੍ਤਯਯੋਗੋ, ਨ ਆਗਮਨਤੋਤਿ ਵਵਤ੍ਥਾਨਕਰਤ੍ਤਾ ਚ ਨਿਪ੍ਪਰਿਯਾਯਦੇਸਨਾਯ ਆਗਮਨਤੋਵ ਇਧ ਨਾਮਂ ਲਭਤਿ, ਨ ਇਤਰੇਹੀਤਿ ਵੁਤ੍ਤਂ.
੩੫੦. ਅਨਿਮਿਤ੍ਤਵਿਪਸ੍ਸਨਨ੍ਤਿ ਅਨਿਚ੍ਚਾਨੁਪਸ੍ਸਨਂ. ਨਿਮਿਤ੍ਤਧਮ੍ਮੇਸੂਤਿ ਸਮੂਹਾਦਿਘਨਵਸੇਨ ਚ ਸਕਿਚ੍ਚਪਰਿਚ੍ਛੇਦਤਾਯ ਚ ਸਪਰਿਗ੍ਗਹੇਸੁ ਖਨ੍ਧੇਸੁ. ਅਨਿਮਿਤ੍ਤਵਿਮੋਕ੍ਖੋਤਿ ਅਨਿਚ੍ਚਾਨੁਪਸ੍ਸਨਮਾਹ. ਏਵਂਸਮ੍ਪਦਮਿਦਨ੍ਤਿ ਕਥਮਿਧ ਉਪਮਾਸਂਸਨ੍ਦਨਂ ਹੋਤਿ. ਨ ਹਿ ਛਨ੍ਦਚਿਤ੍ਤਾਨਂ ਮਗ੍ਗਸਙ੍ਖਾਤਅਧਿਪਤਿਭਾਵਾਭਾਵੋ ਵਿਯ ਸਦ੍ਧਿਨ੍ਦ੍ਰਿਯਾਧਿਕਸ੍ਸ ਅਨਿਮਿਤ੍ਤਵਿਮੋਕ੍ਖਸ੍ਸ ਅਨਿਮਿਤ੍ਤਭਾਵਾਭਾਵੋ ਅਤ੍ਥਿ, ਨ ਚ ਅਮਗ੍ਗਾਧਿਪਤੀਨਂ ਮਗ੍ਗਾਧਿਪਤਿਨਾਮਦਾਨਾਭਾਵੋ ਵਿਯ ਅਨਿਮਿਤ੍ਤਸ੍ਸ ਅਨਿਮਿਤ੍ਤਨਾਮਦਾਨਾਭਾਵੋਤਿ ਸਕ੍ਕਾ ਵਤ੍ਤੁਂ ਅਨਿਮਿਤ੍ਤਵਿਮੋਕ੍ਖਸ੍ਸ ਅਨਨਿਮਿਤ੍ਤਤਾਯ ਅਭਾਵਤੋ. ਮਗ੍ਗੋ ਅਧਿਪਤਿ ਏਤੇਸਨ੍ਤਿ ਚ ਮਗ੍ਗਾਧਿਪਤਿਨੋਤਿ ਯੁਤ੍ਤੋ ਤਤ੍ਥ ਛਨ੍ਦਚਿਤ੍ਤੇਹਿ ਤਂਸਮ੍ਪਯੁਤ੍ਤਾਨਂ ਮਗ੍ਗਾਧਿਪਤਿਭਾਵਾਭਾਵੋ. ਇਧ ਪਨ ਮਗ੍ਗੋ ਅਨਿਮਿਤ੍ਤਂ ਏਤਸ੍ਸਾਤਿ ਮਗ੍ਗਾਨਿਮਿਤ੍ਤੋਤਿ ਅਯਮਤ੍ਥੋ ਨ ਸਮ੍ਭਵਤੀਤਿ ਨ ਤੇਨ ਅਮਗ੍ਗੇਨ ਮਗ੍ਗਸ੍ਸ ਅਨਿਮਿਤ੍ਤਭਾਵੋ ਨ ਯੁਜ੍ਜਤਿ, ਕਿਂ ਵਾ ਏਤ੍ਥ ਸਾਮਞ੍ਞਂ ਅਧਿਪ੍ਪੇਤਨ੍ਤਿ. ਅਮਗ੍ਗਙ੍ਗਮਗ੍ਗਨਾਮਾਭਾਵੋ. ਯਥਾ ਸਤਿਪਿ ਅਧਿਪਤਿਭਾਵੇ ਛਨ੍ਦਚਿਤ੍ਤਾਨਂ ਨ ਮਗ੍ਗਾਧਿਪਤੀਤਿ ਮਗ੍ਗਨਾਮਂ, ਨ ਚ ਤੇਹਿ ਮਗ੍ਗਸ੍ਸ ਤੇਸਂ ਅਮਗ੍ਗਙ੍ਗਤ੍ਤਾ, ਤਥਾ ਸਤਿਪਿ ਸਦ੍ਧਾਯ ਆਗਮਨਭਾਵੇਨ ਤਸ੍ਸਾ ਅਨਿਮਿਤ੍ਤਨ੍ਤਿ ਮਗ੍ਗਨਾਮਂ, ਨ ਚ ਤਾਯ ਮਗ੍ਗਸ੍ਸ ਤਸ੍ਸਾ ਅਮਗ੍ਗਙ੍ਗਤ੍ਤਾ. ਏਵਂ ਅਨਿਮਿਤ੍ਤਵਿਪਸ੍ਸਨਾਯਪਿ ਅਨਿਮਿਤ੍ਤਭਾਵੋ ਨਿਪ੍ਪਰਿਯਾਯੇਨ ਨਤ੍ਥੀਤਿ ਦੀਪਿਤੋ ਹੋਤਿ.
ਨਨੁ ਚ ਇਧ ਝਾਨਂ ਸੁਞ੍ਞਤਾਦਿਨਾਮੇਨ ਵੁਤ੍ਤਂ, ਨ ਮਗ੍ਗੋਤਿ ਚੇ? ਨ, ਮਗ੍ਗਸਮ੍ਪਯੋਗਤੋ ਝਾਨਸ੍ਸ ਸੁਞ੍ਞਤਾਦਿਨਾਮਕਤ੍ਤਾ. ਸੁਤ੍ਤਨ੍ਤਪਰਿਯਾਯੇਨ ਸਗੁਣਾਰਮ੍ਮਣੇਹਿ ਇਧ ਅਭਿਧਮ੍ਮੇਪਿ ਨਾਮਂ ਲਭਤੀਤਿ ਆਹਂਸੁ. ਤਸ੍ਮਾ ਪਟਿਕ੍ਖਿਤ੍ਤਾ ‘‘ਨ ਪਨ ਲਭਨ੍ਤੀ’’ਤਿ. ਕਿਂ ਕਾਰਣਾ? ਅਭਿਧਮ੍ਮੇ ਸਰਸਂ ਅਨਾਮਸਿਤ੍ਵਾ ਪਚ੍ਚਨੀਕਤੋਵ ਨਾਮਲਾਭਾਤਿ ਅਧਿਪ੍ਪਾਯੋ. ਯੋ ਹਿ ਸਗੁਣਾਰਮ੍ਮਣੇਹਿ ਨਾਮਲਾਭੋ, ਸੋ ਸਰਸਪ੍ਪਧਾਨੋ ਹੋਤਿ. ਸਰਸੇਨੇਵ ਚ ਨਾਮਲਾਭੇ ਸਬ੍ਬਮਗ੍ਗਾਨਂ ਸੁਞ੍ਞਤਾਦਿਭਾਵੋਤਿ ਵਵਤ੍ਥਾਨਂ ਨ ਸਿਯਾ. ਤਸ੍ਮਾ ਅਭਿਧਮ੍ਮੇ ਸਤਿਪਿ ਦ੍ਵੀਹਿ ਨਾਮਲਾਭੇ ਪਚ੍ਚਨੀਕਤੋ ਨਾਮਵਵਤ੍ਥਾਨਕਰਂ ਗਹਿਤਨ੍ਤਿ ਸਗੁਣਾਰਮ੍ਮਣੇਹਿ ਸੁਞ੍ਞਤਾਪ੍ਪਣਿਹਿਤਮਗ੍ਗਾ ਨਾਮਂ ਨ ਲਭਨ੍ਤੀਤਿ ਆਹ. ਅਥ ਵਾ ਨ ਪਨ ਲਭਨ੍ਤੀਤਿ ਅਞ੍ਞਨਿਰਪੇਕ੍ਖੇਹਿ ਸਗੁਣਾਰਮ੍ਮਣੇਹਿ ਨ ਲਭਨ੍ਤਿ. ਕਿਂ ਕਾਰਣਾ? ਅਭਿਧਮ੍ਮੇ ਸਰਸਪਚ੍ਚਨੀਕੇਹਿ ਸਹਿਤੇਹਿ ਨਾਮਲਾਭਾਤਿ ਅਤ੍ਥੋ. ਪਚ੍ਚਨੀਕਞ੍ਹਿ ਵਵਤ੍ਥਾਨਕਰਂ ਅਨਪੇਕ੍ਖਿਤ੍ਵਾ ਕੇਵਲਸ੍ਸ ਸਰਸਸ੍ਸ ਨਾਮਹੇਤੁਭਾਵੋ ਅਭਿਧਮ੍ਮੇ ਨਤ੍ਥਿ ਅਵਵਤ੍ਥਾਨਾਪਤ੍ਤਿਤੋ. ਤਸ੍ਮਾ ਅਤ੍ਤਾਭਿਨਿਵੇਸਪਣਿਧਿਪਟਿਪਕ੍ਖਵਿਪਸ੍ਸਨਾਨੁਲੋਮਾ ਮਗ੍ਗਾ ਸਤਿਪਿ ਸਰਸਨ੍ਤਰੇ ਪਚ੍ਚਨੀਕਸਹਿਤੇਨ ਸਰਸੇਨ ਨਾਮਂ ਲਭਨ੍ਤਿ. ਅਨਿਮਿਤ੍ਤਮਗ੍ਗਸ੍ਸ ਪਨ ਵਿਪਸ੍ਸਨਾ ਨਿਮਿਤ੍ਤਪਟਿਪਕ੍ਖਾ ਨ ਹੋਤਿ ਸਯਂ ਨਿਮਿਤ੍ਤਗ੍ਗਹਣਤੋ ਨਿਮਿਤ੍ਤਗ੍ਗਹਣਾਨਿਵਾਰਣਾਤਿ ਤਦਨੁਲੋਮਮਗ੍ਗੋਪਿ ਨ ਨਿਮਿਤ੍ਤਸ੍ਸ ਪਟਿਪਕ੍ਖੋ. ਯਦਿ ਸਿਯਾ, ਨਿਮਿਤ੍ਤਗਤਵਿਪਸ੍ਸਨਾਯਪਿ ਪਟਿਪਕ੍ਖੋ ਸਿਯਾਤਿ. ਤਸ੍ਮਾ ਵਿਜ੍ਜਮਾਨੋਪਿ ਸਰਸੋ ਵਵਤ੍ਥਾਨਕਰਪਚ੍ਚਨੀਕਾਭਾਵਾ ਅਭਿਧਮ੍ਮੇ ਅਨਿਮਿਤ੍ਤਨ੍ਤਿ ਨਾਮਦਾਯਕੋ ਨ ਗਹਿਤੋ. ਅਨਿਚ੍ਚਾਨੁਪਸ੍ਸਨਾਨੁਲੋਮੋ ਪਨ ਮਗ੍ਗੋ ਸੁਦ੍ਧਿਕਪਟਿਪਦਾਨਯੇਯੇਵ ਸਙ੍ਗਹਿਤੋਤਿ ਦਟ੍ਠਬ੍ਬੋ. ਤਸ੍ਮਾ ਏਵ ਚ ਸੋ ਨਯੋ ਵੁਤ੍ਤੋਤਿ. ਏਵਨ੍ਤਿ ਯਂ ਵਕ੍ਖਤਿ ‘‘ਅਨਿਚ੍ਚਤੋ ਵੁਟ੍ਠਹਨ੍ਤਸ੍ਸ ਮਗ੍ਗੋ ਅਨਿਮਿਤ੍ਤੋ ਹੋਤੀ’’ਤਿ (ਧ. ਸ. ਅਟ੍ਠ. ੩੫੦), ਏਵਂ ਆਹਰਿਤ੍ਵਾ ਅਟ੍ਠਕਥਾਚਰਿਯੇਹਿ ਸੋ ਅਨਿਮਿਤ੍ਤਮਗ੍ਗੋ ਦੀਪਿਤੋਤਿ ਅਤ੍ਥੋ.
ਵੁਟ੍ਠਾਨ…ਪੇ… ਕਿਮਾਰਮ੍ਮਣਾਤਿ ਅਨਿਚ੍ਚਾਦਿਤੋ ਵੁਟ੍ਠਹਨ੍ਤਸ੍ਸ ਵੁਟ੍ਠਾਨਗਾਮਿਨਿਯਾ ਲਕ੍ਖਣਾਰਮ੍ਮਣਤ੍ਤੇ ਸਤਿ ਸਙ੍ਖਾਰੇਹਿ ਵੁਟ੍ਠਾਨਂ ਨ ਸਿਯਾ, ਸਙ੍ਖਾਰਾਰਮ੍ਮਣਤ੍ਤੇ ਚ ਲਕ੍ਖਣਪਟਿਵੇਧੋਤਿ ਮਞ੍ਞਮਾਨੋ ਪੁਚ੍ਛਤਿ. ‘‘ਅਨਿਚ੍ਚ’’ਨ੍ਤਿਆਦਿਨਾ ਸਙ੍ਖਾਰੇਸੁ ਪਵਤ੍ਤਮਾਨੇਨ ਞਾਣੇਨ ਲਕ੍ਖਣਾਨਿਪਿ ਪਟਿਵਿਦ੍ਧਾਨਿ ਹੋਨ੍ਤਿ ਤਦਾਕਾਰਸਙ੍ਖਾਰਗਹਣਤੋਤਿ ਆਹ ‘‘ਲਕ੍ਖਣਾਰਮ੍ਮਣਾ’’ਤਿ. ਸਙ੍ਖਾਰਾਰਮ੍ਮਣਾ ਏਵ ਯਥਾਵੁਤ੍ਤਾਧਿਪ੍ਪਾਯੇਨ ‘‘ਲਕ੍ਖਣਾਰਮ੍ਮਣਾ’’ਤਿ ਵੁਤ੍ਤਾਤਿ ਦਸ੍ਸੇਨ੍ਤੋ ‘‘ਲਕ੍ਖਣਂ ਨਾਮਾ’’ਤਿਆਦਿਮਾਹ. ਅਨਿਚ੍ਚਤਾ ਦੁਕ੍ਖਤਾ ਅਨਤ੍ਤਤਾਤਿ ਹਿ ਵਿਸੁਂ ਗਯ੍ਹਮਾਨਂ ਲਕ੍ਖਣਂ ਪਞ੍ਞਤ੍ਤਿਗਤਿਕਂ ਪਰਮਤ੍ਥਤੋ ਅਵਿਜ੍ਜਮਾਨਂ, ਅਵਿਜ੍ਜਮਾਨਤ੍ਤਾ ਏਵ ਪਰਿਤ੍ਤਾਦਿਵਸੇਨ ਨਵਤ੍ਤਬ੍ਬਧਮ੍ਮਭੂਤਂ. ਤਸ੍ਮਾ ਵਿਸੁਂ ਗਹੇਤਬ੍ਬਸ੍ਸ ਲਕ੍ਖਣਸ੍ਸ ਪਰਮਤ੍ਥਤੋ ਅਭਾਵਾ ‘‘ਅਨਿਚ੍ਚਂ ਦੁਕ੍ਖਮਨਤ੍ਤਾ’’ਤਿ ਸਙ੍ਖਾਰੇ ਸਭਾਵਤੋ ਸਲ੍ਲਕ੍ਖੇਨ੍ਤੋਵ ਲਕ੍ਖਣਾਨਿ ਸਲ੍ਲਕ੍ਖੇਤਿ ਨਾਮਾਤਿ ਆਹ ‘‘ਯੋ ਪਨ ਅਨਿਚ੍ਚਂ ਦੁਕ੍ਖਮਨਤ੍ਤਾਤਿ ਤੀਣਿ ਲਕ੍ਖਣਾਨਿ ਸਲ੍ਲਕ੍ਖੇਤੀ’’ਤਿ. ਯਸ੍ਮਾ ਚ ਅਨਿਚ੍ਚਨ੍ਤਿਆਦਿਨਾ ਸਙ੍ਖਾਰਾਵ ਦਿਸ੍ਸਮਾਨਾ, ਤਸ੍ਮਾ ਤੇ ਕਣ੍ਠੇ ਬਦ੍ਧਕੁਣਪਂ ਵਿਯ ਪਟਿਨਿਸ੍ਸਜ੍ਜਨੀਯਾ ਹੋਨ੍ਤਿ.
ਲੋਕੁਤ੍ਤਰਕੁਸਲਂ
ਪਕਿਣ੍ਣਕਕਥਾਵਣ੍ਣਨਾ
ਤਤ੍ਰਾਤਿ ਲੋਕੁਤ੍ਤਰਜ੍ਝਾਨੇ. ਅਜ੍ਝਤ੍ਤਞ੍ਚਾਤਿ ਉਪਡ੍ਢਗਾਥਾਯ ਅਭਿਨਿਵਿਸਿਤਬ੍ਬਂ ਵੁਟ੍ਠਾਤਬ੍ਬਂ ਵਿਪਸ੍ਸਨਾਭੂਮਿਂ ਪਞ੍ਚਧਾ ਉਦ੍ਦਿਸਤਿ. ਸਤ੍ਤਅਟ੍ਠਾਦੀਨਿ ਅਙ੍ਗਾਨਿ ਸਤ੍ਤਟ੍ਠਙ੍ਗਾਨੀਤਿ ਆਦਿਸਦ੍ਦਸ੍ਸ ਲੋਪੋ ਦਟ੍ਠਬ੍ਬੋ. ਨਿਮਿਤ੍ਤਨ੍ਤਿ ਯਤੋ ਵੁਟ੍ਠਾਨਂ, ਤਾਨਿ ਨਿਮਿਤ੍ਤਪਵਤ੍ਤਾਨਿ ਨਿਮਿਤ੍ਤਵਚਨੇਨੇਵ ਉਦ੍ਦਿਸਤਿ. ਸਙ੍ਖਾਰੁਪੇਕ੍ਖਾਞਾਣਮੇਵ ਅਰਿਯਮਗ੍ਗਸ੍ਸ ਬੋਜ੍ਝਙ੍ਗਾਦਿਵਿਸੇਸਂ ਨਿਯਮੇਤਿ. ਕਸ੍ਮਾ? ਤਤੋ ਤਤੋ ਦੁਤਿਯਾਦਿਪਾਦਕਜ੍ਝਾਨਤੋ ਉਪ੍ਪਨ੍ਨਸ੍ਸ ਸਸਙ੍ਖਾਰੁਪੇਕ੍ਖਾਞਾਣਸ੍ਸ ਪਾਦਕਜ੍ਝਾਨਾਤਿਕ੍ਕਨ੍ਤਾਨਂ ਅਙ੍ਗਾਨਂ ਅਸਮਾਪਜ੍ਜਿਤੁਕਾਮਤਾਵਿਰਾਗਭਾਵਨਾਭਾਵਤੋ ਇਤਰਸ੍ਸ ਚ ਅਤਬ੍ਭਾਵਤੋ. ਤੇਸਮ੍ਪਿ ਵਾਦੇਸੁ…ਪੇ… ਵਿਪਸ੍ਸਨਾਵ ਨਿਯਮੇਤੀਤਿ ਵੇਦਿਤਬ੍ਬਾ. ਕਸ੍ਮਾ? ਵਿਪਸ੍ਸਨਾਨਿਯਮੇਨੇਵ ਹਿ ਪਠਮਤ੍ਥੇਰਵਾਦੇਪਿ ਅਪਾਦਕਪਠਮਜ੍ਝਾਨਪਾਦਕਮਗ੍ਗਾ ਪਠਮਜ੍ਝਾਨਿਕਾਵ ਹੋਨ੍ਤਿ, ਇਤਰੇ ਚ ਪਾਦਕਜ੍ਝਾਨਵਿਪਸ੍ਸਨਾਨਿਯਮੇਹਿ ਤਂਤਂਝਾਨਿਕਾ. ਏਵਂ ਸੇਸਵਾਦੇਸੁਪਿ ਵਿਪਸ੍ਸਨਾਨਿਯਮੋ ਯਥਾਸਮ੍ਭਵਂ ਯੋਜੇਤਬ੍ਬੋ.
ਪਕਿਣ੍ਣਕਸਙ੍ਖਾਰੇਤਿ ਪਾਦਕਜ੍ਝਾਨਤੋ ਅਞ੍ਞਸਙ੍ਖਾਰੇ. ਤੇਨ ਪਾਦਕਜ੍ਝਾਨਸਙ੍ਖਾਰੇਸੁ ਸਮ੍ਮਸਿਤੇਸੁ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤਿ. ਤਤ੍ਰਾਪੀਤਿ ਦੁਤਿਯਤ੍ਥੇਰਵਾਦੇਪਿ. ਤਂਤਂਝਾਨਿਕਤਾ ਤਂਤਂਸਮ੍ਮਸਿਤਸਙ੍ਖਾਰਵਿਪਸ੍ਸਨਾਨਿਯਮੇਹਿ ਹੋਤਿ. ਤਤ੍ਰਾਪਿ ਹਿ ਵਿਪਸ੍ਸਨਾ ਤਂਤਂਵਿਰਾਗਾਵਿਰਾਗਭਾਵਨਾਭਾਵੇਨ ਸੋਮਨਸ੍ਸਸਹਗਤਾ ਉਪੇਕ੍ਖਾਸਹਗਤਾ ਚ ਹੁਤ੍ਵਾ ਝਾਨਙ੍ਗਾਦਿਨਿਯਮਂ ਮਗ੍ਗਸ੍ਸ ਕਰੋਤੀਤਿ ਏਵਂ ਵਿਪਸ੍ਸਨਾਨਿਯਮੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
ਤਨ੍ਤਿ ਤਂਤਂਝਾਨਸਦਿਸਭਵਨਂ. ਸ੍ਵਾਯਮਤ੍ਥੋ ਪਾਦਕਜ੍ਝਾਨਸਮ੍ਮਸਿਤਜ੍ਝਾਨੁਪਨਿਸ੍ਸਯੇਹਿ ਵਿਨਾ ਅਜ੍ਝਾਸਯਮਤ੍ਤੇਨ ਅਸਿਜ੍ਝਨਾ ਉਪਨਿਸ੍ਸਯੇਨ ਵਿਨਾ ਸਙ੍ਕਪ੍ਪਮਤ੍ਤੇਨ ਸਕਦਾਗਾਮਿਫਲਾਦੀਨਂ ਅਸਿਜ੍ਝਨਦੀਪਕੇਨ ਨਨ੍ਦਕੋਵਾਦੇਨ (ਮ. ਨਿ. ੩.੩੯੮ ਆਦਯੋ) ਦੀਪੇਤਬ੍ਬੋ. ਤਤ੍ਥ ਹਿ ਸੋਤਾਪਨ੍ਨਾਯਪਿ ਪਰਿਪੁਣ੍ਣਸਙ੍ਕਪ੍ਪਭਾਵਂ ਵਦਨ੍ਤੇਨ ਭਗਵਤਾ ਯਸ੍ਸ ਯਸ੍ਸ ਉਪਨਿਸ੍ਸਯੋ ਅਤ੍ਥਿ, ਤਸ੍ਸ ਤਸ੍ਸੇਵ ਅਜ੍ਝਾਸਯੋ ਨਿਯਾਮਕੋ, ਨਾਞ੍ਞਸ੍ਸਾਤਿ ਤੇਨ ਤੇਨ ਪਰਿਪੁਣ੍ਣਸਙ੍ਕਪ੍ਪਤਾ ਹੋਤਿ, ਨ ਤਤੋ ਪਰਂ ਸਙ੍ਕਪ੍ਪਸਬ੍ਭਾਵੇਪਿ ਅਸਿਜ੍ਝਨਤੋਤਿ ਅਯਮਤ੍ਥੋ ਦੀਪਿਤੋ ਹੋਤਿ. ਏਵਮਿਧਾਪਿ ਯਸ੍ਸ ਯਸ੍ਸ ਦੁਤਿਯਾਦਿਝਾਨਿਕਸ੍ਸ ਮਗ੍ਗਸ੍ਸ ਯਥਾਵੁਤ੍ਤੋ ਉਪਨਿਸ੍ਸਯੋ ਅਤ੍ਥਿ, ਤਸ੍ਸ ਤਸ੍ਸੇਵ ਅਜ੍ਝਾਸਯੋ ਨਿਯਾਮਕੋ, ਨਾਞ੍ਞਸ੍ਸ ਸਤਿਪਿ ਤਸ੍ਮਿਂ ਅਸਿਜ੍ਝਨਤੋ. ਇਮਸ੍ਮਿਂ ਪਨ ਵਾਦੇ ਪਾਦਕਸਮ੍ਮਸਿਤਜ੍ਝਾਨੁਪਨਿਸ੍ਸਯਸਬ੍ਭਾਵੇ ਅਜ੍ਝਾਸਯੋ ਏਕਨ੍ਤੇਨ ਹੋਤਿ, ਤਂਤਂਫਲੂਪਨਿਸ੍ਸਯਸਬ੍ਭਾਵੇ ਤਂਤਂਸਙ੍ਕਪ੍ਪੋ ਵਿਯਾਤਿ ਤਦਭਾਵਾਭਾਵਤੋ ਅਜ੍ਝਾਸਯੋ ਨਿਯਮੇਤੀਤਿ ਵੁਤ੍ਤਂ.
ਯਸ੍ਮਿਂ ਪਨ ਪਾਦਕਜ੍ਝਾਨਂ ਨਤ੍ਥੀਤਿ ਚਤੁਤ੍ਥਜ੍ਝਾਨਿਕਵਜ੍ਜਾਨਂ ਪਾਦਕਾਨਿ ਲੋਕਿਯਜ੍ਝਾਨਾਨਿ ਸਨ੍ਧਾਯ ਵੁਤ੍ਤਂ. ਅਪ੍ਪਨਾਪ੍ਪਤ੍ਤਿ ਚ ਓਲ਼ਾਰਿਕਙ੍ਗਾਤਿਕ੍ਕਮਨੁਪਨਿਸ੍ਸਯਾਭਾਵੇ ਪਞ੍ਚਹਿ ਅਙ੍ਗੇਹਿ ਵਿਨਾ ਨ ਹੋਤੀਤਿ ‘‘ਸੋਮਨਸ੍ਸਸਹਗਤਮਗ੍ਗੋ ਹੋਤੀ’’ਤਿ ਆਹ. ਉਪੇਕ੍ਖਾਸਹਗਤਮਗ੍ਗੋਤਿ ਏਤੇਨ ਚਤੁਤ੍ਥਜ੍ਝਾਨਿਕਤਾਪਿ ਸਮਾਨਾ ਅਨੁਸਯਸਮੁਗ੍ਘਾਟਨਸਮਤ੍ਥਸ੍ਸ ਨ ਸਙ੍ਖਾਰਾਵਸੇਸਤਾਤਿ ਦਸ੍ਸੇਤਿ. ਤੇ ਚ ਵਾਦਾ ਨ ਵਿਰੁਜ੍ਝਨ੍ਤਿ ਅਜ੍ਝਾਸਯਵਸੇਨ ਪਞ੍ਚਮਜ੍ਝਾਨਿਕਤਾਯ ਪਠਮਾਦਿਜ੍ਝਾਨਿਕਤਾਯ ਚ ਸਮ੍ਭਵਤੋਤਿ ਅਧਿਪ੍ਪਾਯੋ. ਅਜ੍ਝਾਸਯੋ ਚ ਸਾਤ੍ਥਕੋ ਹੋਤਿ, ਅਞ੍ਞਥਾ ਪਾਦਕਸਮ੍ਮਸਿਤਜ੍ਝਾਨੇਹੇਵ ਨਿਯਮਸ੍ਸ ਸਿਦ੍ਧਤ੍ਤਾ ਅਜ੍ਝਾਸਯੋ ਨਿਯਾਮਕੋ ਵੁਚ੍ਚਮਾਨੋ ਨਿਰਤ੍ਥਕੋ ਸਿਯਾਤਿ. ਇਧ ਪਨ ਅਟ੍ਠਸਾਲਿਨਿਯਾ ਨਿਯਾਮਨੇ ਏਕਨ੍ਤਿਕਂ ਵਿਪਸ੍ਸਨਾਸਙ੍ਖਾਤਂ ਅਤ੍ਥਮੇਵ ਉਦ੍ਧਰਿਤ੍ਵਾ ‘‘ਤੇਸਮ੍ਪਿ ਵਾਦੇਸੁ ਅਯਂ…ਪੇ… ਵਿਪਸ੍ਸਨਾਵ ਨਿਯਮੇਤੀ’’ਤਿ ਵਦਨ੍ਤੇਨ ਤਯੋਪੇਤੇ ਵਾਦੇ ਵਿਪਸ੍ਸਨਾਵ ਨਿਯਮੇਤੀਤਿ ਦਸ੍ਸਿਤਂ. ਤਂਤਂਵਾਦਾਨਞ੍ਹਿ ਵਿਪਸ੍ਸਨਾਸਹਿਤਾਨਮੇਵ ਸਿਦ੍ਧਿ, ਨਾਞ੍ਞਥਾਤਿ ਦਸ੍ਸਿਤਨ੍ਤਿ.
ਪਵੇਧਤੀਤਿ ਗੋਤ੍ਰਭੁਸ੍ਸ ਪਚ੍ਚਯੋ ਭਵਿਤੁਂ ਨ ਸਕ੍ਕੋਤੀਤਿ ਅਤ੍ਥੋ. ਯਦਿ ਪਞ੍ਚਮਚਿਤ੍ਤਕ੍ਖਣੇ ਜਵਨਂ ਪਤਿਤਂ ਨਾਮ ਹੋਤਿ, ਕਥਂ ਤਦਾ ਗੋਤ੍ਰਭੁ ਤਦਨਨ੍ਤਰਞ੍ਚ ਮਗ੍ਗੋ ਜਵਨਸ੍ਸ ਪਤਿਤਕ੍ਖਣੇ ਉਪ੍ਪਜ੍ਜਤੀਤਿ? ਅਪੁਬ੍ਬਸ੍ਸ ਜਵਨਨ੍ਤਰਸ੍ਸ ਪਤਿਤਤਾਭਾਵਤੋ. ਤਦੇਵ ਹਿ ਜਵਨਂ ਅਨੇਕਕ੍ਖਤ੍ਤੁਂ ਪਵਤ੍ਤਮਾਨਂ ਪਤਿਤਂ ਸਿਯਾਤਿ, ਗੋਤ੍ਰਭੁ ਪਨ ਆਰਮ੍ਮਣਨ੍ਤਰੇ ਉਪ੍ਪਨ੍ਨਂ ਅਪੁਬ੍ਬਂ ਜਵਨਂ, ਤਥਾ ਮਗ੍ਗੋ ਭੂਮਨ੍ਤਰਤੋ ਚਾਤਿ. ਨਨੁ ਚ ਸਤ੍ਤਮਜਵਨਚੇਤਨਾਯ ਬਲਵਤਾਯ ਉਪਪਜ੍ਜਵੇਦਨੀਯਭਾਵੋ ਹੋਤਿ ਆਨਨ੍ਤਰਿਯਤਾਪੀਤਿ, ਤਤ੍ਥਾਯਂ ਅਧਿਪ੍ਪਾਯੋ ਸਿਯਾ ‘‘ਪਟਿਸਨ੍ਧਿਯਾ ਅਨਨ੍ਤਰਪਚ੍ਚਯਭਾਵਿਨੋ ਵਿਪਾਕਸਨ੍ਤਾਨਸ੍ਸ ਅਨਨ੍ਤਰਪਚ੍ਚਯਭਾਵੇਨ ਅਨ੍ਤਿਮਜਵਨਚੇਤਨਾਯ ਸੁਸਙ੍ਖਤਤ੍ਤਾ ਸਾ ਸਤ੍ਤਮਜਵਨਚੇਤਨਾ ਉਪਪਜ੍ਜਵੇਦਨੀਯਾ ਆਨਨ੍ਤਰਿਕਾ ਚ ਹੋਤਿ, ਨ ਅਪਤਿਤਜਵਨਚੇਤਨਾ ਵਿਯ ਬਲਵਤਾਯਾ’’ਤਿ.
ਪੁਨ ਅਨੁਲੋਮਂ ਤਂ ਅਨੁਬਨ੍ਧੇਯ੍ਯਾਤਿ ਗੋਤ੍ਰਭੁਸ੍ਸ ਹਿ ਸਙ੍ਖਾਰਾਰਮ੍ਮਣਤ੍ਤੇ ਸਤਿ ਤਦਪਿ ਅਨੁਲੋਮਮੇਵਾਤਿ ਪੁਰਿਮਅਨੁਲੋਮਂ ਵਿਯ ਤਂ ਤਦਪਿ ਅਞ੍ਞਂ ਅਨੁਲੋਮਂ ਅਨੁਬਨ੍ਧੇਯ੍ਯ, ਨ ਮਗ੍ਗੋਤਿ ਮਗ੍ਗਵੁਟ੍ਠਾਨਮੇਵ ਚ ਨ ਭਵੇਯ੍ਯ ਅਤ੍ਤਨੋ ਸਦਿਸਾਲਮ੍ਬਨਸ੍ਸ ਆਵਜ੍ਜਨਟ੍ਠਾਨਿਯਸ੍ਸ ਪਚ੍ਚਯਸ੍ਸ ਅਲਾਭਾ. ਅਪ੍ਪਹੀਨਭਾਵੇਨ ਪਞ੍ਚਸੁ ਉਪਾਦਾਨਕ੍ਖਨ੍ਧੇਸੁ ਅਨੁਸਯਿਤਾ ਕਿਲੇਸਾ ਸਾ ਭੂਮਿ ਏਤੇਹਿ ਲਦ੍ਧਾਤਿ ਕਤ੍ਵਾ ਭੂਮਿਲਦ੍ਧਾ. ਵਟ੍ਟਂ ਸਿਨੋਨ੍ਤਿ ਬਨ੍ਧਨ੍ਤੀਤਿ ਕਤ੍ਵਾ ਵਟ੍ਟਸੇਤੂ ਚ, ਤੇਸਂ ਸਮੁਗ੍ਘਾਤਕਰਣਨ੍ਤਿਪਿ ਏਤਦੇਵਸ੍ਸ ਲੋਭਕ੍ਖਨ੍ਧਾਦਿਪਦਾਲਨਂ ਵੁਚ੍ਚਤਿ. ਤਨ੍ਤਿ ਪਵਤ੍ਤਂ. ਏਕਂ ਭਵਨ੍ਤਿ ਅਨਾਗਾਮਿਨੋ ਅਨੇਕਕ੍ਖਤ੍ਤੁਞ੍ਚ ਤਤ੍ਥੇਵ ਉਪਪਜ੍ਜਨ੍ਤਸ੍ਸ ਹੇਟ੍ਠਾ ਅਨਾਗਮਨਵਸੇਨ ਏਕੋ ਭਵੋਤਿ ਗਹੇਤ੍ਵਾ ਵੁਤ੍ਤਂ.
ਇਮਸ੍ਸ ਪਨਤ੍ਥਸ੍ਸਾਤਿ ਯਥਾਵੁਤ੍ਤਸ੍ਸ ਉਪਾਦਿਨ੍ਨਕਪਵਤ੍ਤਤੋ ਵੁਟ੍ਠਾਨਸ੍ਸ. ਅਪਾਯੇਸੁ ਸਤ੍ਤਮਭਵਤੋ ਉਦ੍ਧਂ ਸੁਗਤਿਯਞ੍ਚ ਵਿਪਾਕਦਾਯਕਸ੍ਸ ਅਭਿਸਙ੍ਖਾਰਵਿਞ੍ਞਾਣਸ੍ਸ ਪਚ੍ਚਯਘਾਤੋ ਸੋਤਾਪਤ੍ਤਿਮਗ੍ਗਞਾਣੇਨ ਅਭਿਸਙ੍ਖਾਰਵਿਞ੍ਞਾਣਸ੍ਸ ਨਿਰੋਧੋ ਦਟ੍ਠਬ੍ਬੋ. ਦ੍ਵੀਸੁ ਭਵੇਸੂਤਿ ਅਨਾਗਾਮਿਮਗ੍ਗੇ ਅਭਾਵਿਤੇ ਸਕਦਾਗਾਮਿਸ੍ਸ ਕਾਮਧਾਤੁਯਂ ਯੇ ਦ੍ਵੇ ਭਵਾ ਉਪ੍ਪਜ੍ਜੇਯ੍ਯੁਂ, ਤੇਸੂਤਿ ਅਤ੍ਥੋ. ਚਲਤੀਤਿ ਏਤੇਨ ਚਲਨਸਭਾਵਮੇਵ ਦਸ੍ਸੇਤਿ, ਨ ਅਚਲਨਾਭਾਵਂ, ਤਸ੍ਮਾ ਅਚਲਨਂ ਦਸ੍ਸੇਤ੍ਵਾ ਪੁਨ ਚਲਨਂ ਦਸ੍ਸੇਤੁਂ ‘‘ਤਥਾਗਤਸ੍ਸ ਹੀ’’ਤਿਆਦਿਮਾਹ. ਯੇਪਿ ਵਾ ਕਤ੍ਥਚਿ ਚਤ੍ਤਾਰੋਪਿ ਮਗ੍ਗੇ ਸਮਾਨਪਟਿਪਦੇ ਦਿਸ੍ਵਾ ਸਭਾਵਤੋ ਅਚਲਨਮੇਵ ਗਣ੍ਹੇਯ੍ਯੁਂ, ਤੇਸਂ ਤਂਗਹਣਨਿਵਾਰਣਤ੍ਥਂ ‘‘ਚਲਤੀ’’ਤਿ ਵੁਤ੍ਤਂ, ਨ ਚਲਨਾਵਧਾਰਣਤ੍ਥਨ੍ਤਿ ਯੁਤ੍ਤਂ ਉਭਯਦਸ੍ਸਨਂ. ਅਥ ਵਾ ਯਦਿਪਿ ਕੇਸਞ੍ਚਿ ਚਤ੍ਤਾਰੋਪਿ ਮਗ੍ਗਾ ਸਮਾਨਪਟਿਪਦਾ, ਤਥਾਪਿ ਕਿਲੇਸਿਨ੍ਦ੍ਰਿਯੇਹਿ ਸਿਜ੍ਝਮਾਨਾ ਪਟਿਪਦਾ ਤੇਸਂ ਵਸੇਨ ਚਲਨਪਕਤਿਕਾ ਏਵਾਤਿ ‘‘ਚਲਤਿ’’ਚ੍ਚੇਵ ਵੁਤ੍ਤਂ, ਨ ‘‘ਨ ਚਲਤੀ’’ਤਿ.
ਲੋਕੁਤ੍ਤਰਕੁਸਲਪਕਿਣ੍ਣਕਕਥਾਵਣ੍ਣਨਾ ਨਿਟ੍ਠਿਤਾ.
ਪਠਮਮਗ੍ਗਵੀਸਤਿਮਹਾਨਯਵਣ੍ਣਨਾ
੩੫੭. ਯਸ੍ਸ ਪੁਬ੍ਬਭਾਗੇ ‘‘ਮਗ੍ਗਂ ਭਾਵੇਮੀ’’ਤਿ ਅਜ੍ਝਾਸਯੋ ਪਵਤ੍ਤੋ, ਸੋ ਮਗ੍ਗਂ ਭਾਵੇਤਿ. ਏਵਂ ਸਬ੍ਬਤ੍ਥ ਅਜ੍ਝਾਸਯਵਿਸੇਸੇਨ ਤਂਤਂਭਾਵਨਾਵਿਸੇਸੋ ਦਟ੍ਠਬ੍ਬੋ.
੩੫੮. ਛਨ੍ਦਾਧਿਪਤੇਯ੍ਯਨ੍ਤਿਆਦੀਸੁ ਏਕਚਿਤ੍ਤਕ੍ਖਣੇ ਵਤ੍ਤਮਾਨੇਸੁ ਧਮ੍ਮੇਸੁ ਕਥਂ ਛਨ੍ਦਸ੍ਸ ਤਂਸਹਜਾਤਸ੍ਸ ਅਧਿਪਤਿਭਾਵੋ ਵੀਰਿਯਾਦੀਨਞ੍ਚਾਤਿ? ਉਪਨਿਸ੍ਸਯਵਸੇਨ. ਯਸ੍ਸ ਹਿ ਸਚੇ ਛਨ੍ਦਵਤੋ ਕੁਸਲਂ ਨਿਪ੍ਫਜ੍ਜਤਿ, ‘‘ਅਹਂ ਨਿਪ੍ਫਾਦੇਸ੍ਸਾਮੀ’’ਤਿ ਪਵਤ੍ਤਮਾਨਸ੍ਸ ਕੁਸਲਂ ਨਿਪ੍ਫਨ੍ਨਂ, ਤਸ੍ਸ ਤਂਸਹਜਾਤੋ ਛਨ੍ਦੋ ਤੇਨ ਪੁਰਿਮੁਪਨਿਸ੍ਸਯੇਨ ਵਿਸਿਟ੍ਠੋ ਸਹਜਾਤਧਮ੍ਮੇ ਅਤ੍ਤਨੋ ਵਸੇ ਵਤ੍ਤੇਤਿ. ਤਸ੍ਮਿਞ੍ਚ ਪਵਤ੍ਤਮਾਨੇ ਤੇ ਪਵਤ੍ਤਨ੍ਤਿ, ਨਿਵਤ੍ਤਮਾਨੇ ਨਿਵਤ੍ਤਨ੍ਤਿ, ਤਦਨੁਰੂਪਬਲਾ ਚ ਹੋਨ੍ਤਿ ਰਾਜਪੁਰਿਸਾ ਵਿਯਾਤਿ. ਏਵਂ ਵੀਰਿਯਾਦੀਸੁ. ਸੇਸਧਮ੍ਮਾਨਂ ਪਨ ਕਤ੍ਥਚਿ ਵੁਤ੍ਤਪ੍ਪਕਾਰਪ੍ਪਵਤ੍ਤਿਸਬ੍ਭਾਵੇਪਿ ਅਤਂਸਭਾਵਤ੍ਤਾ ਅਧਿਪਤਿਭਾਵੋ ਨਤ੍ਥੀਤਿ ਦਟ੍ਠਬ੍ਬੋ.
ਦੁਤਿਯਮਗ੍ਗਵਣ੍ਣਨਾ
੩੬੧. ਆ-ਕਾਰਸ੍ਸ ਰਸ੍ਸਤ੍ਤਂ ਕਤ੍ਵਾ ਅਞ੍ਞਿਨ੍ਦ੍ਰਿਯਂ ਵੁਤ੍ਤਂ, ਆ-ਕਾਰੋ ਚ ਧਮ੍ਮਮਰਿਯਾਦਤ੍ਥੋ.
ਤਤਿਯਚਤੁਤ੍ਥਮਗ੍ਗਵਣ੍ਣਨਾ
੩੬੨. ਮਗ੍ਗਙ੍ਗਾਨਿ ਨ ਪੂਰੇਨ੍ਤਿ ਅਕਿਚ੍ਚਕਤ੍ਤਾ ਸਮ੍ਮਾਦਿਟ੍ਠਿਯਾਤਿ ਅਧਿਪ੍ਪਾਯੋ. ਮਾਰੇਨ੍ਤੋ ਗਚ੍ਛਤੀਤਿ ਹਿ ਮਗ੍ਗੋ, ਨ ਚੇਤਾਯ ਮਾਰੇਤਬ੍ਬਂ ਅਤ੍ਥੀਤਿ. ਮਾਨਸ੍ਸ ਦਿਟ੍ਠਿਸਦਿਸਾ ਪਵਤ੍ਤਿ ਅਹਮਸ੍ਮੀਤਿ ਪਵਤ੍ਤਮਾਨਸ੍ਸ ਦਿਟ੍ਠਿਟ੍ਠਾਨੇ ਠਾਨਂ. ਆਲੋਕਸ੍ਸੇਵ ਪਵਤ੍ਤਿਕਾਲੋ ਵਿਯਾਤਿ ਚਿਰਪ੍ਪਵਤ੍ਤਿਂ ਸਨ੍ਧਾਯਾਹ. ਏਕਦੇਸਸਾਮਞ੍ਞੇਨ ਹਿ ਯਥਾਧਿਪ੍ਪੇਤੇਨ ਉਪਮਾ ਹੋਤੀਤਿ. ਖਾਰੇ ਵਾਤਿ ਕਟ੍ਠਾਦੀਨਂ ਖਾਰਚ੍ਛਾਰਿਕਾਯਂ. ਸਮ੍ਮਦ੍ਦਿਤ੍ਵਾਤਿ ਕਿਲੇਦੇਤ੍ਵਾ. ਛਨ੍ਦੋਤਿ ਤਣ੍ਹਾ. ਅਨੁਸਯੋਤਿ ਤਣ੍ਹਾ ਮਾਨਾਨੁਸਯੋ ਚ. ਏਤਸ੍ਮਿਞ੍ਚ ਸੁਤ੍ਤੇ ਅਸਮੂਹਤਸ੍ਸ ਗਨ੍ਧਸ੍ਸ ਸਮੁਗ੍ਘਾਟਨਂ ਵਿਯ ਅਸਮੂਹਤਮਾਨਾਦਿਸਮੁਗ੍ਘਾਤਂ ਦਸ੍ਸੇਨ੍ਤੇਨ ਅਞ੍ਞਮਞ੍ਞੇ ਕਿਲੇਸੇ ਪਜਹਤੀਤਿ ਦਸ੍ਸਿਤਨ੍ਤਿ ਆਨੀਤਂ, ਨ ਯਥਾਵੁਤ੍ਤਨਯੇਨ ਉਪਮਾਯ ਵੁਤ੍ਤਤ੍ਤਾਤਿ ਦਟ੍ਠਬ੍ਬਂ. ਨਿਰਨ੍ਤਰਂ ਪਵਤ੍ਤਮਾਨੇ ਚਿਤ੍ਤੇ ਤਸ੍ਸ ਸਂਕਿਲੇਸਵੋਦਾਨਕਰਾ ਸਾਵਜ੍ਜਾਨਵਜ੍ਜਾ ਚੇਤਸਿਕਾ ਉਪ੍ਪਜ੍ਜਮਾਨਾ ਤਸ੍ਸਙ੍ਗਭੂਤਾ ਅਵਯਵਾ ਵਿਯ ਹੋਨ੍ਤੀਤਿ ‘‘ਚਿਤ੍ਤਙ੍ਗਵਸੇਨਾ’’ਤਿ ਵੁਤ੍ਤਂ.
ਲੋਕੁਤ੍ਤਰਕੁਸਲਵਣ੍ਣਨਾ ਨਿਟ੍ਠਿਤਾ.
ਕੁਸਲਕਥਾਵਣ੍ਣਨਾ ਨਿਟ੍ਠਿਤਾ.
ਅਕੁਸਲਪਦਂ
ਧਮ੍ਮੁਦ੍ਦੇਸਵਾਰੋ
ਪਠਮਚਿਤ੍ਤਕਥਾਵਣ੍ਣਨਾ
੩੬੫. ਕੁਸਲੇ ਵੁਤ੍ਤਨਯਂ ਅਨੁਗਨ੍ਤ੍ਵਾ ਯਥਾਨੁਰੂਪਂ ਵੇਦਿਤਬ੍ਬਤਾਯ ‘‘ਵੁਤ੍ਤਨਯੇਨਾ’’ਤਿ ਆਹ. ਗਨ੍ਤਬ੍ਬਾਭਾਵਤੋਤਿ ਬੁਜ੍ਝਿਤਬ੍ਬਾਭਾਵਤੋ. ਦਿਟ੍ਠਿਯਾ ਗਤਮਤ੍ਤਨ੍ਤਿ ਦਿਟ੍ਠਿਯਾ ਗਤਿਮਤ੍ਤਂ ਗਹਣਮਤ੍ਤਂ. ਆਸਨ੍ਨਕਾਰਣਤ੍ਤਾ ਅਯੋਨਿਸੋਮਨਸਿਕਾਰਸ੍ਸ ਵਿਸੁਂ ਗਹਣਂ ਏਕਨ੍ਤਕਾਰਣਤ੍ਤਾ ਚ. ਸਤਿਸਂਵਰੋਤਿ ਇਧ ਸੀਤਾਦੀਹਿ ਫੁਟ੍ਠਸ੍ਸ ਅਪ੍ਪਮਜ੍ਜਨਂ ਖਮਨਂ ਦਟ੍ਠਬ੍ਬਂ. ਪਹਾਨਸਂਵਰੋਤਿ ਵੀਰਿਯਸਂਵਰੋ.
ਅਸ੍ਸਾਦਦਸ੍ਸਨਨ੍ਤਿ ਅਸ੍ਸਾਦਦਿਟ੍ਠਿ. ਫਲਟ੍ਠੇਨ ਪਚ੍ਚੁਪਟ੍ਠਾਨੇਨ ਅਸਮ੍ਮਾਪਟਿਪਤ੍ਤਿਪਚ੍ਚੁਪਟ੍ਠਾਨੋਮੋਹੋ, ਸਮ੍ਮਾਪਟਿਪਤ੍ਤਿਪਟਿਪਕ੍ਖਭਾਵਗ੍ਗਹਣਾਕਾਰੋ ਵਾ. ਸਬ੍ਬਸ੍ਸ ਲੋਭਸ੍ਸ ਅਭਿਜ੍ਝਾਭਾਵੇ ਸਤਿਪਿ ਵਿਸੇਸਯੁਤ੍ਤਾਯ ਅਭਿਜ੍ਝਾਯ ਕਮ੍ਮਪਥਪ੍ਪਤ੍ਤਾਯ ਇਧੁਪ੍ਪਜ੍ਜਮਾਨਾਯ ਲਕ੍ਖਣਾਦਿਂ ਦਸ੍ਸੇਤੁਂ ‘‘ਸਾ ਪਰਸਮ੍ਪਤ੍ਤੀਨ’’ਨ੍ਤਿਆਦਿਮਾਹ. ਅਤ੍ਤਨੋ ਪਰਿਣਾਮਨਸ੍ਸ ਪੁਰੇਚਾਰਿਕਾ ਤਣ੍ਹਾਭਿਰਤਿ ਅਭਿਰਤਿ.
ਅਨੁਪਪਰਿਕ੍ਖਾ ਮੋਹੋ. ਮੋਹਵਸੇਨ ਹਿ ਦਿਟ੍ਠਿਵਸੇਨ ਵਾ ਅਵਤ੍ਥੁਸ੍ਮਿਂ ਸਾਨੁਨਯੋ ਅਧਿਮੋਕ੍ਖੋ ਉਪ੍ਪਜ੍ਜਤੀਤਿ. ਅਸਤਿਯਚਿਤ੍ਤੇਤਿ ਅਹਿਰਿਕਾਦੀਹਿ ਆਰਕ੍ਖਰਹਿਤਚਿਤ੍ਤੇ. ਸਤਿਰਹਿਤਤ੍ਤਾ ਸਤਿਪਟਿਪਕ੍ਖਤ੍ਤਾ ਚਾਤਿ ਏਤੇਨ ਸਤਿਰਹਿਤਾ ਸਤਿਪਟਿਪਕ੍ਖਾ ਚ ਅਕੁਸਲਾ ਖਨ੍ਧਾ ਏਵ ਮਿਚ੍ਛਾਸਤੀਤਿ ਦਸ੍ਸੇਤਿ. ਤੇ ਪਨ ਉਪਨਾਹਾਦਿਪ੍ਪਵਤ੍ਤਿਯਂ ਚਿਰਕਤਾਦਿਸਲ੍ਲਕ੍ਖਣੇ ਪਟੁਸਞ੍ਞਾਸਮ੍ਪਯੁਤ੍ਤਾ ਦਟ੍ਠਬ੍ਬਾ. ਸਦਰਥਾਦਿਭਾਵੋ ਅਵਿਸੇਸੇਨ ਕਿਲੇਸਸਮ੍ਪਯੋਗਤੋ ਵੁਤ੍ਤੋ ਲਹੁਤਾਦਿਏਕਨ੍ਤਪਟਿਪਕ੍ਖਾਨਂ ਥਿਨਮਿਦ੍ਧਾਦੀਨਂ ਕੇਸਞ੍ਚਿ ਇਧ ਅਭਾਵਾ. ਅਵੂਪਸਮੋਤਿ ਅਸਨ੍ਨਿਸਿਨ੍ਨਸਬ੍ਭਾਵਮਾਹ. ਅਨਵਟ੍ਠਾਨਰਸਨ੍ਤਿ ਚਲਨਕਿਚ੍ਚਂ. ਚੇਤਸੋ ਅਵੂਪਸਮੇਤਿ ਨਿਪ੍ਫਾਦੇਤਬ੍ਬੇ ਪਯੋਜਨੇ ਭੁਮ੍ਮਂ, ਅਵੂਪਸਮਪਚ੍ਚਯਭੂਤਂ ਆਰਮ੍ਮਣਂ ਵਾ ‘‘ਅਵੂਪਸਮੋ’’ਤਿ ਵੁਤ੍ਤਂ.
ਧਮ੍ਮੁਦ੍ਦੇਸਵਾਰਕਥਾਵਣ੍ਣਨਾ ਨਿਟ੍ਠਿਤਾ.
ਨਿਦ੍ਦੇਸਵਾਰਕਥਾਵਣ੍ਣਨਾ
੩੭੭. ਸਹਜਾਤਧਮ੍ਮੇਸੁ ਅਕਮ੍ਪਨਂ ਨ ਕੋਸਜ੍ਜੇਸੁ ਅਕਮ੍ਪਨਂ ਵਿਯ ਤਪ੍ਪਟਿਪਕ੍ਖਭਾਵਤੋ ਦਟ੍ਠਬ੍ਬਂ, ਤਂਤਂਪਾਪਕਿਰਿਯਾਯ ਉਸ੍ਸਹਨਵਸੇਨ ਪਨ ਥਿਰਤਾ ਤਤ੍ਥ ਅਕਮ੍ਪਨਂ.
੩੮੧. ਦਿਟ੍ਠਿਯਾ ਵਿਰੂਪਂ ਫਨ੍ਦਿਤਨ੍ਤਿ ਤਥਾ ਤਥਾ ਸਸ੍ਸਤਾਦਿਵਸੇਨ ਪਵਤ੍ਤਾ ਦਿਟ੍ਠਿ ਏਵ ਵੁਚ੍ਚਤਿ. ਤਰਨ੍ਤੀਤਿ ਤਿਤ੍ਥੇ ਵਿਯ ਪਿਲਵਨ੍ਤਿ. ਵਿਪਰਿਯੇਸਤੋਤਿ ਵਤ੍ਥੁਸ੍ਸ ਵਿਪਰੀਤਤੋ.
੩੯੦. ਸਭਾਵਪਟਿਚ੍ਛਾਦਨਵਸੇਨ ਪਕਤਿਅਤ੍ਤਾਦਿਅਸਨ੍ਤਗਹਣਸ੍ਸ ਅਨਿਚ੍ਚਾਦੀਨਂ ਨਿਚ੍ਚਾਦਿਵਿਸਮਗਹਣਸ੍ਸ ਚ ਸਞ੍ਞਾਦਿਵਿਪਰਿਯੇਸਸ੍ਸ ਨਿਸ੍ਸਯਤ੍ਤਾ ‘‘ਅਸਨ੍ਤਂ ਅਸਮਞ੍ਚ ਬੁਜ੍ਝਤੀ’’ਤਿ ਵੁਤ੍ਤਂ.
ਦੁਤਿਯਚਿਤ੍ਤਵਣ੍ਣਨਾ
੩੯੯. ਕਿਞ੍ਚਾਪਿ…ਪੇ… ਪਰਾਮਸਨ੍ਤਸ੍ਸ ਉਪ੍ਪਜ੍ਜਤੀਤਿ ਪੁਰਿਮਚਿਤ੍ਤੇਨ ਅਵਿਸੇਸਂ ਦਸ੍ਸੇਤਿ. ਅਨੁਸ੍ਸਾਹਨਾਵਸੀਦਨਭਾਵੇਨ ਸਂਹਤਭਾਵੋ ਥਿਨਂ.
ਤਤਿਯਚਿਤ੍ਤਵਣ੍ਣਨਾ
੪੦੦. ਇਧ ਮਾਨੇਨ ਸਦ੍ਧਿਂ ਪਞ੍ਚ ਅਪਣ੍ਣਕਙ੍ਗਾਨੀਤਿ ਅਵਿਰਜ੍ਝਨਕਙ੍ਗਾਨਿ ਉਪ੍ਪਤ੍ਤਿਅਰਹਙ੍ਗਾਨਿ ਹੋਨ੍ਤੀਤਿ ਅਤ੍ਥੋ ਦਟ੍ਠਬ੍ਬੋ. ਮਾਨਸ੍ਸ ਅਨਿਯਤਤ੍ਤਾ ਨ ਨਿਯਤਯੇਵਾਪਨਕਾਤਿ. ਪਟ੍ਠਾਨੇ ਹਿ ‘‘ਸਂਯੋਜਨਂ ਧਮ੍ਮਂ ਪਟਿਚ੍ਚ ਸਂਯੋਜਨੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿ (ਪਟ੍ਠਾ. ੩.੪.੧) ਏਤ੍ਥ ‘‘ਚਤੁਕ੍ਖਤ੍ਤੁਂ ਕਾਮਰਾਗੇਨ ਤਿਕ੍ਖਤ੍ਤੁਂ ਪਟਿਘੇਨ ਚ ਮਾਨੋ ਵਿਚਿਕਿਚ੍ਛਾ ਭਵਰਾਗੋ ਤਯੋਪੇਤੇ ਸਕਦਾਗਾਮਿਨੋ ਸਂਯੋਜਨਾਨਂ ਸਂਯੋਜਨੇਹਿ ਦਸਵਿਧਾ ਯੋਜਨਾ’’ਤਿ ਦਸ੍ਸਿਤਾਯ ਦਸਵਿਧਾਯ ਯੋਜਨਾਯ ‘‘ਕਾਮਰਾਗਸਂਯੋਜਨਂ ਪਟਿਚ੍ਚ ਮਾਨਸਂਯੋਜਨਂ ਅਵਿਜ੍ਜਾਸਂਯੋਜਨ’’ਨ੍ਤਿ ਵਤ੍ਵਾ ‘‘ਕਾਮਰਾਗਸਂਯੋਜਨਂ ਪਟਿਚ੍ਚ ਅਵਿਜ੍ਜਾਸਂਯੋਜਨ’’ਨ੍ਤਿ ‘‘ਮਾਨਸਂਯੋਜਨਂ ਪਟਿਚ੍ਚ ਭਵਰਾਗਸਂਯੋਜਨਂ ਅਵਿਜ੍ਜਾਸਂਯੋਜਨ’’ਨ੍ਤਿ ਚ ਵਤ੍ਵਾ ‘‘ਭਵਰਾਗਸਂਯੋਜਨਂ ਪਟਿਚ੍ਚ ਅਵਿਜ੍ਜਾਸਂਯੋਜਨ’’ਨ੍ਤਿ ਵੁਤ੍ਤਾਹਿ ਯੋਜਨਾਹਿ ਮਾਨਸ੍ਸ ਅਨਿਯਤਭਾਵੋ ਪਕਾਸਿਤੋ, ਤਥਾ ਕਿਲੇਸਦੁਕੇਪਿ. ਇਧ ਚ ਵਕ੍ਖਤਿ ‘‘ਦਸਵਿਧਾ ਸਂਯੋਜਨਾਨਂ ਯੋਜਨਾ, ਤਥਾ ਦਸਵਿਧਾ ਕਿਲੇਸਾਨ’’ਨ੍ਤਿ ਚ. ਉਨ੍ਨਮਨਵਸੇਨੇਵ ਸਮ੍ਪਗ੍ਗਹਰਸੋ, ਨ ਵੀਰਿਯਂ ਵਿਯ ਤਂਤਂਕਿਚ੍ਚਸਾਧਨੇ ਅਬ੍ਭੁਸ੍ਸਾਹਨਵਸੇਨ. ਓਮਾਨਸ੍ਸਪਿ ਅਤ੍ਤਾਨਂ ਅਵਂਕਤ੍ਵਾ ਗਹਣਂ ਸਮ੍ਪਗ੍ਗਹੋਤਿ ਦਟ੍ਠਬ੍ਬੋ.
ਚਤੁਤ੍ਥਚਿਤ੍ਤਵਣ੍ਣਨਾ
੪੦੨. ਪਰਿਹਰਣਤ੍ਥਂ ਵਿਕ੍ਖਿਤ੍ਤਾ ਹੁਤ੍ਵਾ ਉਸ੍ਸਾਹਂ ਜਨੇਨ੍ਤਾ ‘‘ਪਰਿਹਰਣਤ੍ਥਂ ਸਉਸ੍ਸਾਹਾ’’ਤਿ ਵੁਤ੍ਤਾ, ਤੇਸਂ.
ਨਵਮਚਿਤ੍ਤਵਣ੍ਣਨਾ
੪੧੩. ਵਿਸਪ੍ਪਨਅਨਿਟ੍ਠਰੂਪਸਮੁਟ੍ਠਾਨਵਸੇਨ ਅਤ੍ਤਨੋ ਪਵਤ੍ਤਿਆਕਾਰਵਸੇਨ ਚ ਵਿਸਪ੍ਪਨਰਸੋ. ਦੋਸੋ ਉਪਯੋਗਫਲੇਸੁ ਅਨਿਟ੍ਠਤ੍ਤਾ ਵਿਸਸਂਸਟ੍ਠਪੂਤਿਮੁਤ੍ਤਂ ਵਿਯ ਦਟ੍ਠਬ੍ਬੋ. ਅਨਭਿਰਤਿਰਸਾਤਿ ਏਵਂਪਕਾਰੇਸੁ ਪਟਿਕ੍ਖੇਪੇਨ ਰਸਵਚਨੇਸੁ ਤਂਤਂਪਟਿਪਕ੍ਖਕਿਚ੍ਚਗਹਣਂ ਦਟ੍ਠਬ੍ਬਂ. ਕਟੁਕਾਕਾਰਗਤਿ ਕਟੁਕਞ੍ਚੁਕਤਾ, ਅਤ੍ਤਸਮ੍ਪਤ੍ਤਿ ਆਵਾਸਾਦਿ, ਪਰਾਯਤ੍ਤਤਾਯ ਦਾਸਬ੍ਯਂ ਵਿਯ ਦਟ੍ਠਬ੍ਬਂ. ਯਥਾ ਹਿ ਦਾਸਬ੍ਯੇ ਸਤਿ ਦਾਸੋ ਪਰਾਯਤ੍ਤੋ ਹੋਤਿ, ਏਵਂ ਕੁਕ੍ਕੁਚ੍ਚੇ ਸਤਿ ਤਂਸਮਙ੍ਗੀ. ਨ ਹਿ ਸੋ ਅਤ੍ਤਨੋ ਧਮ੍ਮਤਾਯ ਪਵਤ੍ਤਿਤੁਂ ਸਕ੍ਕੋਤਿ ਕੁਸਲੇਤਿ. ਅਥ ਵਾ ਕਤਾਕਤਾਕੁਸਲਕੁਸਲਾਨੁਸੋਚਨੇ ਆਯਤ੍ਤਤਾਯ ਤਦੁਭਯਵਸੇਨ ਕੁਕ੍ਕੁਚ੍ਚੇਨ ਤਂਸਮਙ੍ਗੀ ਹੋਤੀਤਿ ਦਾਸਬ੍ਯਂ ਵਿਯ ਤਂ ਹੋਤਿ.
੪੧੮. ਵਿਰੁਦ੍ਧਾਕਾਰੋਤਿ ਵਿਰੁਦ੍ਧਸ੍ਸ ਪੁਗ੍ਗਲਸ੍ਸ, ਚਿਤ੍ਤਸ੍ਸ ਵਾ ਆਕਾਰੋ ਵਿਰੁਦ੍ਧਭਾਵੋ. ਤੇਨ ਵਿਰੁਜ੍ਝਨਂ ਵਿਰੋਧੋਤਿ ਦਸ੍ਸੇਤਿ. ਵਚਨਨ੍ਤਿ ਏਤਂ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ. ਸਬ੍ਬਮੇਵ ਹਿ ਕਿਚ੍ਚਂ ਏਤੇਨ ਕਰਿਯਮਾਨਂ ਸੁਰੋਪਿਤਂ ਸੁਜਨਿਤਂ ਨ ਹੋਤੀਤਿ. ਰੋਪਸਦ੍ਦਵਚਨਤ੍ਥਮੇਵ ਕੇਚਿ ਵਣ੍ਣੇਨ੍ਤਿ. ਤਂ ਅਪ੍ਪਮਾਣਨ੍ਤਿ ਕੋਧਸ੍ਸ ਤਥਾਪਵਤ੍ਤਨਸਭਾਵਾਭਾਵਾ ਅਞ੍ਞੇਨ ਕੇਨਚਿ ਕਾਰਣੇਨ ਪਰਿਪੁਣ੍ਣਤਾ ਸਿਯਾਤਿ ਸਨ੍ਧਾਯ ਵੁਤ੍ਤਂ.
ਏਕਾਦਸਮਚਿਤ੍ਤਵਣ੍ਣਨਾ
੪੨੨. ਵਿਗਤਾ ਚਿਕਿਚ੍ਛਾਤਿ ਚਿਕਿਚ੍ਛਿਤੁਂ ਦੁਕ੍ਕਰਤਾਯ ਵੁਤ੍ਤਂ, ਨ ਸਬ੍ਬਥਾ ਚਿਕਿਚ੍ਛਾਭਾਵਾ ਵਿਚਿਕਿਚ੍ਛਾਯਾਤਿ ਤਦਤ੍ਥਂ ਦਸ੍ਸੇਤਿ.
੪੨੪. ਨਿਚ੍ਛਯਾਭਾਵਾ ਅਸਣ੍ਠਹਨਤੋ ਚੇਤਸੋ ਪਵਤ੍ਤਿਪਚ੍ਚਯਮਤ੍ਤਤਾਯ ‘‘ਪਵਤ੍ਤਿਟ੍ਠਿਤਿਮਤ੍ਤ’’ਨ੍ਤਿ ਵੁਤ੍ਤਂ.
੪੨੫. ਏਕਂ ਆਕਾਰਂ ਗਨ੍ਤੁਂ ਅਸਮਤ੍ਥਤਾਯ ਅਤ੍ਤਨੋ ਆਮੁਖਂ ਸਪ੍ਪਨਤੋ ਓਸਕ੍ਕਤਿ.