੨. ਰੂਪਕਣ੍ਡਂ

ਉਦ੍ਦੇਸਵਣ੍ਣਨਾ

ਇਦਾਨਿ ਰੂਪਮਬ੍ਯਾਕਤਂ ਭਾਜੇਤਬ੍ਬਂ, ਤਞ੍ਚ ਕੇਨਚਿ ਸਮਯਵਵਤ੍ਥਾਨਂ ਕਤ੍ਵਾ ਨ ਸਕ੍ਕਾ ਭਾਜੇਤੁਂ. ਨ ਹਿ ਰੂਪਸ੍ਸ ਚਿਤ੍ਤੁਪ੍ਪਾਦੇਨ ਸਮਯਵਵਤ੍ਥਾਨਂ ਸਕ੍ਕਾ ਕਾਤੁਂ ਅਚਿਤ੍ਤਸਮੁਟ੍ਠਾਨਸਬ੍ਭਾਵਤੋ, ਚਿਤ੍ਤਸਮੁਟ੍ਠਾਨਸ੍ਸ ਚ ਅਨੇਕਚਿਤ੍ਤਸਮੁਟ੍ਠਾਨਤਾਯ ਰੂਪਸਮੁਟ੍ਠਾਪਕਚਿਤ੍ਤਾਨਞ੍ਚ ਕੇਸਞ੍ਚਿ ਕਤ੍ਥਚਿ ਅਸਮੁਟ੍ਠਾਪਨਤਾਯ ਵਵਤ੍ਥਾਨਾਭਾਵਤੋ, ਵਿਞ੍ਞਤ੍ਤਿਦ੍ਵਯਵਜ੍ਜਿਤਸ੍ਸ ਰੂਪਸ੍ਸ ਅਚਿਤ੍ਤਸਹਭੁਭਾਵਤੋ ਚ, ਨ ਚ ਰੂਪਾਨਂ ਉਪਸਮ੍ਪਜ੍ਜ ਵਿਹਰਣੇਨ ਸਮਯਵਵਤ੍ਥਾਨਂ ਯੁਜ੍ਜਤਿ ਮਹਗ੍ਗਤਪ੍ਪਮਾਣਾਨਂ ਝਾਨਾਨਂ ਵਿਯ ਰੂਪਾਨਂ ਉਪਸਮ੍ਪਜ੍ਜ ਵਿਹਾਤਬ੍ਬਤਾਭਾਵਾ, ਉਪਾਦਾਰੂਪੇਹਿ ਚ ਨ ਯੁਜ੍ਜਤਿ ਤੇਸਂ ਸਹਜਾਤਾਦਿਪਚ੍ਚਯਭਾਵੇਨ ਅਪ੍ਪਵਤ੍ਤਨਤੋ, ਨਾਪਿ ਮਹਾਭੂਤੇਹਿ ਯੁਜ੍ਜਤਿ ਕੇਸਞ੍ਚਿ ਮਹਾਭੂਤਾਨਂ ਕੇਹਿਚਿ ਉਪਾਦਾਰੂਪੇਹਿ ਵਿਨਾ ਪਵਤ੍ਤਿਤੋ ਅਸਮਾਨਕਾਲਾਨਞ੍ਚ ਸਬ੍ਭਾਵਤੋ. ਨ ਹਿ ‘‘ਯਸ੍ਮਿਂ ਸਮਯੇ ਪਥਵੀਧਾਤੁ ਉਪ੍ਪਨ੍ਨਾ ਹੋਤਿ, ਤਸ੍ਮਿਂ ਸਮਯੇ ਚਕ੍ਖਾਯਤਨਂ ਹੋਤੀ’’ਤਿ ਸਕ੍ਕਾ ਵਤ੍ਤੁਂ ਸੋਤਾਦਿਨਿਸ੍ਸਯਭੂਤਾਯ ਪਥਵਿਯਾ ਚਿਤ੍ਤਾਦਿਸਮੁਟ੍ਠਾਨਾਯ ਚ ਸਹ ਚਕ੍ਖਾਯਤਨਸ੍ਸ ਅਭਾਵਾ. ਏਵਂ ਸੋਤਾਯਤਨਾਦੀਸੁਪਿ ਯੋਜੇਤਬ੍ਬਂ.

ਮਹਾਭੂਤੇਹਿ ਅਸਮਾਨਕਾਲਾਨਿ ਵਿਞ੍ਞਤ੍ਤਿਉਪਚਯਾਦੀਨਿਪਿ ਤਸ੍ਮਿਂ ਸਮਯੇ ਹੋਨ੍ਤੀਤਿ ਨ ਸਕ੍ਕਾ ਵਤ੍ਤੁਨ੍ਤਿ. ਏਕਸ੍ਮਿਞ੍ਚ ਕਾਲੇ ਅਨੇਕਾਨਿ ਕਲਾਪਸਹਸ੍ਸਾਨਿ ਉਪ੍ਪਜ੍ਜਨ੍ਤਿ ਪਵਤ੍ਤਨ੍ਤਿ ਚ, ਨ ਅਰੂਪਧਮ੍ਮਾਨਂ ਵਿਯ ਰੂਪਾਨਂ ਕਲਾਪਦ੍ਵਯਸਹਾਭਾਵੋ ਅਤ੍ਥਿ. ਏਕਸ੍ਮਿਞ੍ਚ ਕਲਾਪੇ ਵਤ੍ਤਮਾਨੇ ਏਵ ਅਞ੍ਞਸ੍ਸ ਨਿਰੋਧੋ, ਅਞ੍ਞਸ੍ਸ ਚੁਪ੍ਪਤ੍ਤਿ ਹੋਤੀਤਿ ਸਬ੍ਬਥਾ ਰੂਪਾਬ੍ਯਾਕਤਂ ਸਮਯਵਵਤ੍ਥਾਨਂ ਕਤ੍ਵਾ ਨ ਸਕ੍ਕਾ ਵਿਭਜਿਤੁਂ. ਏਕਕਾਦੀਹਿ ਪਨ ਨਯੇਹਿ ਨ ਹੇਤੁਆਦਿਨਾ ਸਭਾਵੇਨ ਵਿਭਜਿਤੁਂ ਸਕ੍ਕਾਤਿ ਤਥਾ ਵਿਭਜਨਤ੍ਥਂ ਚਿਤ੍ਤੁਪ੍ਪਾਦਕਣ੍ਡੇ ਤਾਵ ਅਵਿਭਤ੍ਤਂ ਅਬ੍ਯਾਕਤਂ ਅਤ੍ਥੀਤਿ ਦਸ੍ਸੇਤੁਂ ਸਮਯਵਵਤ੍ਥਾਨੇਨ ਵਿਨਾ ਅਬ੍ਯਾਕਤਸ੍ਸ ਸਭਾਵਤੋਯੇਵ ਨਿਦ੍ਦੇਸੇ ਏਕਦੇਸਂ ਨਿਦ੍ਦਿਸਿਤ੍ਵਾ ਨਿਗਮਨਕਰਣਸ੍ਸ ਅਨੁਪਪਤ੍ਤਿਤੋ ਚ ਵਿਭਤ੍ਤਞ੍ਚ ਅਵਿਭਤ੍ਤਞ੍ਚ ਸਬ੍ਬਂ ਸਙ੍ਗਣ੍ਹਨ੍ਤੋ ਆਹ ‘‘ਕਤਮੇ ਧਮ੍ਮਾ ਅਬ੍ਯਾਕਤਾ? ਕੁਸਲਾ…ਪੇ… ਅਸਙ੍ਖਤਾ ਚ ਧਾਤੁ. ਇਮੇ ਧਮ੍ਮਾ ਅਬ੍ਯਾਕਤਾ’’ਤਿ. ਅਵਿਭਤ੍ਤੇ ਹਿ ਵਿਭਜਿਤਬ੍ਬੇ ਦਸ੍ਸਿਤੇ ਵਿਭਜਨਂ ਯੁਤ੍ਤਂ ਞਾਤੁਂ ਇਚ੍ਛਾਯ ਉਪ੍ਪਾਦਿਤਾਯਾਤਿ. ਏਤ੍ਥ ਪਨ ਵਿਪਾਕਕਿਰਿਯਾਬ੍ਯਾਕਤਂ ਵਿਭਤ੍ਤਤ੍ਤਾ ਨ ਵਿਭਜਿਤਬ੍ਬਂ, ਅਸਙ੍ਖਤਾ ਚ ਧਾਤੁ ਭੇਦਾਭਾਵਤੋ. ਯਂ ਪਨੇਤ੍ਥ ਭੇਦਯੁਤ੍ਤਤ੍ਤਾ ਅਵਿਭਤ੍ਤਤ੍ਤਾ ਚ ਵਿਭਜਿਤਬ੍ਬਂ, ਤਂ ਵਿਭਜਨ੍ਤੋ ਆਹ ‘‘ਤਤ੍ਥ ਕਤਮਂ ਸਬ੍ਬਂ ਰੂਪ’’ਨ੍ਤਿਆਦਿ. ਅਯਮੇਤ੍ਥ ਪਾਲ਼ਿਯੋਜਨਾ.

ਨਯਂ ਦਸ੍ਸੇਤ੍ਵਾਤਿ ਏਤ੍ਥ ਹੇਟ੍ਠਾ ਗਹਣਮੇਵ ਨਯਦਸ੍ਸਨਂ. ਤਂ ਵਿਪਾਕੇਸੁ ਕਤ੍ਵਾ ਵਿਞ੍ਞਾਤਤ੍ਤਾ ਕਿਰਿਯਾਬ੍ਯਾਕਤੇਸੁ ਨਿਸ੍ਸਟ੍ਠਂ. ਕਾਮਾਵਚਰਾਦਿਭਾਵੇਨ ਵਤ੍ਤਬ੍ਬਸ੍ਸ ਕਿਰਿਯਾਬ੍ਯਾਕਤਸ੍ਸ ਵਾ ਦਸ੍ਸਨਂ, ਤਂ ਕਤ੍ਵਾ ਕਾਮਾਵਚਰਾਤਿਆਦਿਕਂ ਗਹੇਤ੍ਵਾ ਵੁਤ੍ਤਤ੍ਤਾ ਨਿਸ੍ਸਟ੍ਠਂ. ਪਞ੍ਚਵੀਸਤਿ ਰੂਪਾਨੀਤਿ ਪਾਲ਼ਿਯਂ ਵੁਤ੍ਤਾਨਿ ਦਸਾਯਤਨਾਨਿ ਪਞ੍ਚਦਸ ਚ ਸੁਖੁਮਰੂਪਾਨਿ, ਉਪਚਯਸਨ੍ਤਤਿਯੋ ਵਾ ਏਕਨ੍ਤਿ ਕਤ੍ਵਾ ਹਦਯਵਤ੍ਥੁਞ੍ਚ. ਛਨ੍ਨਵੁਤੀਤਿ ਚਕ੍ਖਾਦਿਦਸਕਾ ਸਤ੍ਤ ਉਤੁਸਮੁਟ੍ਠਾਨਾਦਯੋ ਤਯੋ ਅਟ੍ਠਕਾ ਉਤੁਚਿਤ੍ਤਜਾ ਦ੍ਵੇ ਸਦ੍ਦਾ ਚ. ਕਲਾਪਭਾਵੇਨ ਪਵਤ੍ਤਰੂਪਰੂਪਾਨਿ ‘‘ਰੂਪਕੋਟ੍ਠਾਸਾ’’ਤਿ ਵੁਤ੍ਤਾਨਿ ਰੂਪਕਲਾਪਕੋਟ੍ਠਾਸਭਾਵਤੋ. ਕੋਟ੍ਠਾਸਾਤਿ ਚ ਅਂਸਾ, ਅਵਯਵਾਤਿ ਅਤ੍ਥੋ. ਕੋਟ੍ਠਨ੍ਤਿ ਵਾ ਸਰੀਰਂ, ਤਸ੍ਸ ਅਂਸਾ ਕੇਸਾਦਯੋ ਕੋਟ੍ਠਾਸਾਤਿ ਅਞ੍ਞੇਪਿ ਅਵਯਵਾ ਕੋਟ੍ਠਾਸਾ ਵਿਯ ਕੋਟ੍ਠਾਸਾ. ਨਿਬ੍ਬਾਨਂ ਨਿਪ੍ਪਦੇਸਤੋ ਗਹਿਤਨ੍ਤਿ ਸੋਪਾਦਿਸੇਸਨਿਰੁਪਾਦਿਸੇਸਰਾਗਕ੍ਖਯਾਦਿਅਸਙ੍ਖਤਾਦਿਵਚਨੀਯਭਾਵੇਨ ਭਿਨ੍ਨਂ ਨਿਪ੍ਪਦੇਸਤੋ ਗਹਿਤਂ. ਅਤ੍ਥਤੋ ਹਿ ਏਕਾਵ ਅਸਙ੍ਖਤਾ ਧਾਤੂਤਿ.

੫੮੪. ਸਬ੍ਬਨ੍ਤਿ ਸਕਲਂ ਚਕ੍ਕਵਾਲ਼ਂ. ਪਰਿਮਣ੍ਡਲਂ ਪਰਿਮਣ੍ਡਲਸਣ੍ਠਾਨਂ, ਪਰਿਕ੍ਖੇਪਤੋ ਛਤ੍ਤਿਂਸ ਸਤਸਹਸ੍ਸਾਨਿ ਦਸ ਚੇਵ ਸਹਸ੍ਸਾਨਿ ਅਡ੍ਢਚਤੁਤ੍ਥਾਨਿ ਚ ਯੋਜਨਸਤਾਨਿ ਹੋਨ੍ਤੀਤਿ ਅਤ੍ਥੋ. ਏਤ੍ਥ ਚ ਵਟ੍ਟਂ ‘‘ਪਰਿਮਣ੍ਡਲ’’ਨ੍ਤਿ ਵੁਤ੍ਤਂ. ਚਤ੍ਤਾਰਿ ਨਹੁਤਾਨੀਤਿ ਚਤ੍ਤਾਲੀਸ ਸਹਸ੍ਸਾਨਿ. ਨਗਵ੍ਹਯਾਤਿ ਨਗਾਤਿ ਅਵ੍ਹਾਤਬ੍ਬਾ ਨਗਸਦ੍ਦਨਾਮਾਤਿ ਅਤ੍ਥੋ.

ਦੇਵਦਾਨਵਾਦੀਨਂ ਤਿਗਾਵੁਤਾਦਿਸਰੀਰਵਸੇਨ ਮਹਨ੍ਤਾਨਿ ਪਾਤੁਭੂਤਾਨਿ. ਤਤ੍ਥਾਯਂ ਵਚਨਤ੍ਥੋ – ਭੂਤਾਨਿ ਜਾਤਾਨਿ ਨਿਬ੍ਬਤ੍ਤਾਨਿ ਮਹਨ੍ਤਾਨਿ ਮਹਾਭੂਤਾਨੀਤਿ. ਅਨੇਕਚ੍ਛਰਿਯਦਸ੍ਸਨੇਨ ਅਨੇਕਾਭੂਤਵਿਸੇਸਦਸ੍ਸਨਵਸੇਨ ਚ ਮਾਯਾਕਾਰੋ ਮਹਨ੍ਤੋ ਭੂਤੋਤਿ ਮਹਾਭੂਤੋ. ਯਕ੍ਖਾਦਯੋ ਜਾਤਿਵਸੇਨੇਵ ਮਹਨ੍ਤਾ ਭੂਤਾਤਿ ਮਹਾਭੂਤਾ. ਨਿਰੁਲ਼੍ਹੋ ਵਾ ਅਯਂ ਮਹਾਭੂਤਸਦ੍ਦੋ ਤੇਸੁ ਦਟ੍ਠਬ੍ਬੋ. ਪਥਵਿਯਾਦਯੋ ਪਨ ਮਹਾਭੂਤਾ ਵਿਯ ਮਹਾਭੂਤਾ. ਭੂਤਸਦ੍ਦਸ੍ਸ ਉਭਯਲਿਙ੍ਗਤ੍ਤਾ ਨਪੁਂਸਕਤਾ ਕਤਾ. ਮਹਾਪਰਿਹਾਰਤੋਤਿ ਏਤ੍ਥ ਵਚਨਤ੍ਥਂ ਵਦਨ੍ਤੋ ਆਹ ‘‘ਮਹਨ੍ਤੇਹਿ ਭੂਤਾਨਿ, ਮਹਾਪਰਿਹਾਰਾਨਿ ਵਾ ਭੂਤਾਨੀ’’ਤਿ. ਤਤ੍ਥ ਪਚ੍ਛਿਮਤ੍ਥੇ ਪੁਰਿਮਪਦੇ ਉਤ੍ਤਰਪਦਸ੍ਸ ਪਰਿਹਾਰਸਦ੍ਦਸ੍ਸ ਲੋਪਂ ਕਤ੍ਵਾ ‘‘ਮਹਾਭੂਤਾਨੀ’’ਤਿ ਵੁਚ੍ਚਨ੍ਤਿ.

ਅਚ੍ਚਿਮਤੋਤਿ ਅਗ੍ਗਿਸ੍ਸ. ਕੋਟਿਸਤਸਹਸ੍ਸਂ ਏਕਂ ਕੋਟਿਸਤਸਹਸ੍ਸੇਕਂ. ਚਕ੍ਕਵਾਲ਼ਨ੍ਤਿ ਤਂ ਸਬ੍ਬਂ ਆਣਾਕ੍ਖੇਤ੍ਤਵਸੇਨ ਏਕਂ ਕਤ੍ਵਾ ਵੋਹਰਨ੍ਤਿ. ਵਿਲੀਯਤਿ ਖਾਰੋਦਕੇਨ. ਵਿਕੀਰਤੀਤਿ ਵਿਦ੍ਧਂਸਤਿ. ਉਪਾਦਿਨ੍ਨਕੇਸੁ ਵਿਕਾਰਂ ਦਸ੍ਸੇਨ੍ਤੋ ‘‘ਪਤ੍ਥਦ੍ਧੋ’’ਤਿਆਦਿਮਾਹ. ਕਟ੍ਠਮੁਖੇਨ ਵਾਤਿ ਵਾ-ਸਦ੍ਦੋ ਉਪਮਤ੍ਥੋ. ਯਥਾ ਕਟ੍ਠਮੁਖਸਪ੍ਪੇਨ ਦਟ੍ਠੋ ਪਤ੍ਥਦ੍ਧੋ ਹੋਤਿ, ਏਵਂ ਪਥਵੀਧਾਤੁਪ੍ਪਕੋਪੇਨ ਸੋ ਕਾਯੋ ਕਟ੍ਠਮੁਖੇਵ ਹੋਤਿ, ਕਟ੍ਠਮੁਖਮੁਖਗਤੋ ਵਿਯ ਪਤ੍ਥਦ੍ਧੋ ਹੋਤੀਤਿ ਅਤ੍ਥੋ. ਅਥ ਵਾ ਵਾ-ਸਦ੍ਦੋ ਏਵਸਦ੍ਦਸ੍ਸਤ੍ਥੇ. ‘‘ਪਥਵੀਧਾਤੁਪ੍ਪਕੋਪੇਨਾ’’ਤਿ ਏਤਸ੍ਸ ਚ ਪਰਤੋ ਆਹਰਿਤ੍ਵਾ ਵੇਦਿਤਬ੍ਬੋ. ਤਤ੍ਰਾਯਮਤ੍ਥੋ – ‘‘ਕਟ੍ਠਮੁਖੇਨ ਦਟ੍ਠੋਪਿ ਕਾਯੋ ਪਥਵੀਧਾਤੁਪ੍ਪਕੋਪੇਨੇਵ ਪਤ੍ਥਦ੍ਧੋ ਹੋਤਿ, ਤਸ੍ਮਾ ਪਥਵੀਧਾਤੁਯਾ ਅਵਿਯੁਤ੍ਤੋ ਸੋ ਕਾਯੋ ਸਬ੍ਬਦਾ ਕਟ੍ਠਮੁਖਮੁਖਗਤੋ ਵਿਯ ਹੋਤੀ’’ਤਿ. ਅਥ ਵਾ ਅਨਿਯਮਤ੍ਥੋ ਵਾ-ਸਦ੍ਦੋ. ਤਤ੍ਰਾਯਮਤ੍ਥੋ – ‘‘ਕਟ੍ਠਮੁਖੇਨ ਦਟ੍ਠੋ ਕਾਯੋ ਪਤ੍ਥਦ੍ਧੋ ਹੋਤਿ ਵਾ ਨ ਵਾ ਹੋਤਿ ਮਨ੍ਤਾਗਦਵਸੇਨ, ਪਥਵੀਧਾਤੁਪ੍ਪਕੋਪੇਨ ਪਨ ਮਨ੍ਤਾਗਦਰਹਿਤੋ ਸੋ ਕਾਯੋ ਕਟ੍ਠਮੁਖਮੁਖਗਤੋ ਵਿਯ ਹੋਤਿ ਏਕਨ੍ਤਪਤ੍ਥਦ੍ਧੋ’’ਤਿ. ਪੂਤਿਯੋਤਿ ਕੁਥਿਤੋ. ਮਹਾਵਿਕਾਰਾਨਿ ਭੂਤਾਨੀਤਿ ਮਹਾਵਿਕਾਰਾਨਿ ਜਾਤਾਨਿ, ਵਿਜ੍ਜਮਾਨਾਨੀਤਿ ਵਾ ਅਤ੍ਥੋ. ਏਤ੍ਥ ਚ ਪੁਰਿਮਪਦੇ ਉਤ੍ਤਰਪਦਸ੍ਸ ਵਿਕਾਰਸਦ੍ਦਸ੍ਸ ਲੋਪਂ ਕਤ੍ਵਾ ‘‘ਮਹਾਭੂਤਾਨੀ’’ਤਿ ਵੁਤ੍ਤਾਨਿ.

ਪਥਵੀਤਿਆਦਿਨਾ ਸਬ੍ਬਲੋਕਸ੍ਸ ਪਾਕਟਾਨਿਪਿ ਵਿਪਲ੍ਲਾਸਂ ਮੁਞ੍ਚਿਤ੍ਵਾ ਯਥਾਸਭਾਵਤੋ ਪਰਿਗ੍ਗਯ੍ਹਮਾਨਾਨਿ ਮਹਨ੍ਤੇਨ ਵਾਯਾਮੇਨ ਵਿਨਾ ਨ ਪਰਿਗ੍ਗਯ੍ਹਨ੍ਤੀਤਿ ਪਾਕਟਾਨਿਪਿ ਦੁਵਿਞ੍ਞੇਯ੍ਯਸਭਾਵਤ੍ਤਾ ‘‘ਮਹਨ੍ਤਾਨੀ’’ਤਿ ਵੁਚ੍ਚਨ੍ਤਿ. ਤਾਨਿ ਹਿ ਸੁਵਿਞ੍ਞੇਯ੍ਯਾਨਿ ਅਮਹਨ੍ਤਾਨੀਤਿ ਗਹੇਤ੍ਵਾ ਠਿਤੋ ਤੇਸਂ ਦੁਪ੍ਪਰਿਗ੍ਗਹਿਤਤਂ ਦਿਸ੍ਵਾ ‘‘ਅਹੋ ਮਹਨ੍ਤਾਨਿ ਏਤਾਨੀ’’ਤਿ ਪਜਾਨਾਤਿ. ਉਪਾਦਾਯਾਤਿ ਏਤੇਨ ਵਿਞ੍ਞਾਯਮਾਨਾ ਪਚ੍ਛਿਮਕਾਲਕਿਰਿਯਾ ਪਵਤ੍ਤੀਤਿ ਕਤ੍ਵਾ ‘‘ਪਵਤ੍ਤਰੂਪ’’ਨ੍ਤਿ ਵੁਤ੍ਤਂ. ਏਵਞ੍ਹਿ ‘‘ਉਪਾਦਾਯਾ’’ਤਿ ਏਤੇਨ ਪਟਿਚ੍ਚਸਮੁਪ੍ਪਨ੍ਨਤਾ ਵੁਤ੍ਤਾ ਹੋਤੀਤਿ. ਅਥ ਵਾ ਉਪਾਦਾਯਤਿ ਨਿਸ੍ਸਯਤੀਤਿ ਉਪਾਦਾਯਂ, ਉਪਾਦਾਯਮੇਵ ਰੂਪਂ ਉਪਾਦਾਯਰੂਪਂ, ਅਞ੍ਞਨਿਸ੍ਸਯਸ੍ਸ ਏਕਨ੍ਤਨਿਸ੍ਸਿਤਸ੍ਸ ਰੂਪਸ੍ਸੇਤਂ ਅਧਿਵਚਨਂ. ਤਂ ਪਨ ਨ ਸਤ੍ਤਸ੍ਸ, ਨਾਪਿ ਵੇਦਨਾਦਿਨੋ ਤਦਭਾਵੇਪਿ ਭਾਵਤੋਤਿ ਦਸ੍ਸੇਤੁਂ ‘‘ਚਤੁਨ੍ਨਂ ਮਹਾਭੂਤਾਨ’’ਨ੍ਤਿਆਦਿਮਾਹ. ਭਵਤਿ ਹਿ ਨਿਸ੍ਸਯਰੂਪਾਨਂ ਸਾਮਿਭਾਵੋਤਿ.

ਤਿਵਿਧਰੂਪਸਙ੍ਗਹਵਣ੍ਣਨਾ

੫੮੫. ਪਕਿਣ੍ਣਕਦੁਕੇਸੁ ਅਜ੍ਝਤ੍ਤਿਕਦੁਕਂ ਮੁਞ੍ਚਿਤ੍ਵਾ ਅਞ੍ਞੋ ਸਬ੍ਬਦੁਕੇਹਿ ਤਿਕਵਸੇਨ ਯੋਜਨਂ ਗਚ੍ਛਨ੍ਤੋ ਨਤ੍ਥਿ, ਵਿਞ੍ਞਤ੍ਤਿਦੁਕੋ ਚ ਯੋਜਨਂ ਨ ਗਚ੍ਛਤੀਤਿ ਸਬ੍ਬਦੁਕਯੋਗੀਸੁ ਆਦਿਭੂਤਂ ਅਜ੍ਝਤ੍ਤਿਕਦੁਕਮੇਵ ਗਹੇਤ੍ਵਾ ਸੇਸੇਹਿ ਸਬ੍ਬਦੁਕੇਹਿ ਯੋਜੇਤ੍ਵਾ ਤਿਕਾ ਵੁਤ੍ਤਾ. ਸਕ੍ਕਾ ਹਿ ਏਤੇਨ ਨਯੇਨ ਅਞ੍ਞੇਸਮ੍ਪਿ ਦੁਕਾਨਂ ਦੁਕਨ੍ਤਰੇਹਿ ਲਬ੍ਭਮਾਨਾ ਤਿਕਯੋਜਨਾ ਵਿਞ੍ਞਾਤੁਨ੍ਤਿ.

ਚਤੁਬ੍ਬਿਧਾਦਿਰੂਪਸਙ੍ਗਹਵਣ੍ਣਨਾ

੫੮੬. ਚਤੁਕ੍ਕੇਸੁ ਏਕਨ੍ਤਚਿਤ੍ਤਸਮੁਟ੍ਠਾਨਸ੍ਸ ਵਿਞ੍ਞਤ੍ਤਿਦ੍ਵਯਭਾਵਤੋ ਵਿਞ੍ਞਤ੍ਤਿਦੁਕਾਦੀਹਿ ਸਮਾਨਗਤਿਕੋ ਚਿਤ੍ਤਸਮੁਟ੍ਠਾਨਦੁਕੋਤਿ ਤੇਨ ਸਹ ਉਪਾਦਾਦੁਕਸ੍ਸ ਯੋਜਨਾਯ ਲਬ੍ਭਮਾਨੋਪਿ ਚਤੁਕ੍ਕੋ ਨ ਵੁਤ੍ਤੋ, ਤਥਾ ਸਨਿਦਸ੍ਸਨਦੁਕਾਦੀਨਂ ਤੇਨ ਤਸ੍ਸ ਚ ਓਲ਼ਾਰਿਕਦੂਰਦੁਕੇਹਿ ਯੋਜਨਾਯ ਲਬ੍ਭਮਾਨਾ ਨ ਵੁਤ੍ਤਾ, ਧਮ੍ਮਾਨਂ ਵਾ ਸਭਾਵਕਿਚ੍ਚਾਨਿ ਬੋਧੇਤਬ੍ਬਾਕਾਰਞ੍ਚ ਯਾਥਾਵਤੋ ਜਾਨਨ੍ਤੇਨ ਭਗਵਤਾ ਤੇਨ ਅਞ੍ਞੇਸਂ ਤਸ੍ਸ ਚ ਅਞ੍ਞੇਹਿ ਯੋਜਨਾ ਨ ਕਤਾਤਿ ਕਿਂ ਏਤ੍ਥ ਕਾਰਣਪਰਿਯੇਸਨਾਯ, ਅਦ੍ਧਾ ਸਾ ਯੋਜਨਾ ਨ ਕਾਤਬ੍ਬਾ, ਯਤੋ ਭਗਵਤਾ ਨ ਕਤਾਤਿ ਵੇਦਿਤਬ੍ਬਾ. ਅਞ੍ਞੇ ਪਨ ਪਕਿਣ੍ਣਕਦੁਕਾ ਅਞ੍ਞੇਹਿ ਪਕਿਣ੍ਣਕਦੁਕੇਹਿ ਯੋਜੇਤੁਂ ਯੁਤ੍ਤਾ, ਤੇਹਿ ਯੋਜਿਤਾ ਏਵ. ਵਤ੍ਥੁਦੁਕਾਦੀਸੁ ਪਨ ਸੋਤਸਮ੍ਫਸ੍ਸਾਰਮ੍ਮਣਦੁਕਾਦਯੋ ਵਜ੍ਜੇਤ੍ਵਾ ਅਞ੍ਞੇਹਿ ਆਰਮ੍ਮਣਬਾਹਿਰਾਯਤਨਾਦਿਲਬ੍ਭਮਾਨਦੁਕੇਹਿ ਉਪਾਦਿਨ੍ਨਕਦੁਕਸ੍ਸ ਉਪਾਦਿਨ੍ਨੁਪਾਦਾਨਿਯਦੁਕਸ੍ਸ ਚ ਯੋਜਨਾਯ ਚਤੁਕ੍ਕਾ ਲਬ੍ਭਨ੍ਤਿ, ਚਿਤ੍ਤਸਮੁਟ੍ਠਾਨਦੁਕਸ੍ਸ ਚ ਸਬ੍ਬਾਰਮ੍ਮਣਬਾਹਿਰਾਯਤਨਾਦਿਲਬ੍ਭਮਾਨਦੁਕੇਹਿ. ਅਵਸੇਸੇਹਿ ਪਨ ਤੇਸਂ ਅਞ੍ਞੇਸਞ੍ਚ ਸਬ੍ਬਵਤ੍ਥੁਦੁਕਾਦੀਹਿ ਯੋਜਨਾਯ ਨ ਲਬ੍ਭਨ੍ਤੀਤਿ ਵੇਦਿਤਬ੍ਬਾ.

ਉਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਰੂਪਵਿਭਤ੍ਤਿ

ਏਕਕਨਿਦ੍ਦੇਸਵਣ੍ਣਨਾ

੫੯੪. ਅਵਿਜ੍ਜਮਾਨਵਿਭਾਗਸ੍ਸ ਵਿਭਾਗਾਭਾਵਦਸ੍ਸਨਮੇਵ ਨਿਦ੍ਦੇਸੋ ਨਿਚ੍ਛਯਕਰਣਤੋ, ਤਸ੍ਮਾ ‘‘ਸਬ੍ਬਂ ਰੂਪਂ ਨ ਹੇਤੁਮੇਵਾ’’ਤਿਆਦਿਨਾ ਵਿਭਾਗਾਭਾਵਾਵਧਾਰਣੇਨ ਏਵ-ਸਦ੍ਦੇਨ ਨਿਦ੍ਦੇਸਂ ਕਰੋਤਿ. ਹੇਤੁਹੇਤੂਤਿ ਮੂਲਹੇਤੁ, ਹੇਤੁਪਚ੍ਚਯਹੇਤੂਤਿ ਵਾ ਅਯਮਤ੍ਥੋ. ਮਹਾਭੂਤਾ ਹੇਤੂਤਿ ਅਯਮੇਵਤ੍ਥੋ ਮਹਾਭੂਤਾ ਪਚ੍ਚਯੋਤਿ ਏਤੇਨਪਿ ਵੁਤ੍ਤੋਤਿ. ਹੇਤੁਪਚ੍ਚਯਸਦ੍ਦਾਨਂ ਸਮਾਨਤ੍ਥਤ੍ਤਾ ਪਚ੍ਚਯੋ ਏਵ ਹੇਤੁ ਪਚ੍ਚਯਹੇਤੁ. ਯੋ ਚ ਰੂਪਕ੍ਖਨ੍ਧਸ੍ਸ ਹੇਤੁ, ਸੋ ਏਵ ਤਸ੍ਸ ਪਞ੍ਞਾਪਨਾਯ ਹੇਤੂਤਿ ਵੁਤ੍ਤੋ ਤਦਭਾਵੇ ਅਭਾਵਤੋ. ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਕਮ੍ਮਸਮਾਦਾਨਾਨਂ ਠਾਨਸੋ ਹੇਤੁਸੋ ਵਿਪਾਕਨ੍ਤਿ ਏਤ੍ਥ ਵਿਜ੍ਜਮਾਨੇਸੁਪਿ ਅਞ੍ਞੇਸੁ ਪਚ੍ਚਯੇਸੁ ਇਟ੍ਠਾਨਿਟ੍ਠਵਿਪਾਕਨਿਯਾਮਕਤ੍ਤਾ ਉਤ੍ਤਮਂ ਪਧਾਨਂ ਕੁਸਲਾਕੁਸਲਂ ਗਤਿਉਪਧਿਕਆਲਪਯੋਗਸਮ੍ਪਤ੍ਤਿਵਿਪਤ੍ਤਿਟ੍ਠਾਨਨਿਪ੍ਫਾਦਿਤਂ ਇਟ੍ਠਾਨਿਟ੍ਠਾਰਮ੍ਮਣਞ੍ਚ ਕਮ੍ਮਮਿਵ ਪਧਾਨਤ੍ਤਾ ‘‘ਹੇਤੂ’’ਤਿ ਵੁਤ੍ਤਨ੍ਤਿ ਇਮਿਨਾ ਅਧਿਪ੍ਪਾਯੇਨ ਕਮ੍ਮਾਰਮ੍ਮਣਾਨਿ ‘‘ਉਤ੍ਤਮਹੇਤੂ’’ਤਿ ਵੁਤ੍ਤਾਨਿ. ਵਕ੍ਖਤਿ ਚ ‘‘ਗਤਿਉਪਧਿਕਾਲਪਯੋਗਾ ਵਿਪਾਕਸ੍ਸ ਠਾਨਂ, ਕਮ੍ਮਂ ਹੇਤੂ’’ਤਿ. ਇਧ ਪਨ ਕਮ੍ਮਮਿਵ ਉਤ੍ਤਮਤ੍ਤਾ ਆਰਮ੍ਮਣਮ੍ਪਿ ਹੇਤੁਵਚਨਂ ਅਰਹਤੀਤਿ ‘‘ਉਤ੍ਤਮਹੇਤੂ’’ਤਿ ਵੁਤ੍ਤਂ. ਸਙ੍ਖਾਰਾਨਨ੍ਤਿ ਪੁਞ੍ਞਾਭਿਸਙ੍ਖਾਰਾਦੀਨਂ ਅਵਿਜ੍ਜਾ ਸਾਧਾਰਣਪਚ੍ਚਯਤ੍ਤਾ ‘‘ਹੇਤੂ’’ਤਿ ਵੁਤ੍ਤਾ. ਫਰਤੀਤਿ ਗਚ੍ਛਤਿ ਪਾਪੁਣਾਤਿ. ਪਟਿਕ੍ਖੇਪਨਿਦ੍ਦੇਸੋਤਿ ਇਦਂ ਮਾਤਿਕਾਯ ਆਗਤਪਟਿਕ੍ਖੇਪਵਸੇਨ ਵੁਤ੍ਤਂ. ਇਧ ਪਨ ਮਾਤਿਕਾਯ ਨ ਹੇਤੁਪਦਾਦਿਸਙ੍ਗਹਿਤਤਾ ਚ ਰੂਪਸ੍ਸ ਵੁਤ੍ਤਾ ਤਂਤਂਸਭਾਵਤ੍ਤਾ, ਅਵਧਾਰਿਤਤਾ ਚ ਅਨਞ੍ਞਸਭਾਵਤੋ.

ਰੂਪੀਦੁਕੇ ਰੂਪੀਪਦਮੇਵ ਇਧ ‘‘ਰੂਪ’’ਨ੍ਤਿ ਵੁਤ੍ਤਂ. ਤੇਨ ਰੂਪੀਰੂਪਪਦਾਨਂ ਏਕਤ੍ਥਤਾ ਸਿਦ੍ਧਾ ਹੋਤਿ ਰੁਪ੍ਪਨਲਕ੍ਖਣਯੁਤ੍ਤਸ੍ਸੇਵ ਰੂਪੀਰੂਪਭਾਵਤੋ. ਉਪ੍ਪਨ੍ਨਂ ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯਨ੍ਤਿ ਅਰੂਪਤੋ ਵਿਧੁਰਂ ਰੂਪਸ੍ਸ ਸਭਾਵਂ ਦਸ੍ਸੇਤਿ. ਨ ਹਿ ਅਰੂਪਂ ਉਪ੍ਪਨ੍ਨਂ ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯਂ ਯਥਾ ਰੂਪਂ, ਤੇਨ ਰੂਪਂ ਉਪ੍ਪਨ੍ਨਂ ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯਂ, ਨ ਅਰੂਪਨ੍ਤਿ ਅਰੂਪਤੋ ਨਿਵਤ੍ਤੇਤ੍ਵਾ ਰੂਪੇ ਏਵ ਏਤਂ ਸਭਾਵਂ ਨਿਯਮੇਤਿ, ਨ ਰੂਪਂ ਏਤਸ੍ਮਿਂ ਸਭਾਵੇ. ਅਤ੍ਥਿ ਹਿ ਰੂਪਂ ਅਤੀਤਾਨਾਗਤਂ ਯਂ ਉਪ੍ਪਨ੍ਨਂ ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯਸਭਾਵਂ ਨ ਹੋਤੀਤਿ. ਏਤਮੇਵ ਚ ਨਿਯਮਂ ਪੁਨ ਏਵਸਦ੍ਦੇਨ ਨਿਯਮੇਤਿ ‘‘ਯਥਾਵੁਤ੍ਤੋ ਨਿਯਮੋ ਰੂਪੇ ਅਤ੍ਥਿ ਏਵ, ਅਰੂਪੇ ਵਿਯ ਨ ਨਤ੍ਥੀ’’ਤਿ. ਅਥ ਵਾ ਸਬ੍ਬਂ ਰੂਪਨ੍ਤਿ ਭੂਤੁਪਾਦਾਯਰੂਪਂ ਕਾਲਭੇਦਂ ਅਨਾਮਸਿਤ੍ਵਾ ‘‘ਸਬ੍ਬ’’ਨ੍ਤਿ ਵੁਤ੍ਤਂ, ਤਂ ਸਬ੍ਬਂ ਅਰੂਪੇਹਿ ਸਮਾਨਵਿਞ੍ਞੇਯ੍ਯਸਭਾਵਂ ਅਤੀਤਾਨਾਗਤਂ ਨਿਵਤ੍ਤੇਤੁਂ ਉਪ੍ਪਨ੍ਨਨ੍ਤਿ ਏਤੇਨ ਵਿਸੇਸੇਤਿ, ਤਂ ਉਪ੍ਪਨ੍ਨਂ ਸਬ੍ਬਂ ਰੂਪਂ ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯਮੇਵਾਤਿ ਅਤ੍ਥੋ.

ਨਨੁ ਏਵਂ ਰੂਪਾਯਤਨਸ੍ਸਪਿ ਸੋਤਵਿਞ੍ਞਾਣਾਦੀਹਿ ਵਿਞ੍ਞੇਯ੍ਯਤਾ ਆਪਜ੍ਜਤੀਤਿ? ਨਾਪਜ੍ਜਤਿ ਰੂਪਂ ਸਬ੍ਬਂ ਸਮ੍ਪਿਣ੍ਡੇਤ੍ਵਾ ਏਕਨ੍ਤਲਕ੍ਖਣਦਸ੍ਸਨਵਸੇਨ ਏਕੀਭਾਵੇਨ ਗਹੇਤ੍ਵਾ ਅਰੂਪਤੋ ਵਿਧੁਰਸ੍ਸ ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯਸਭਾਵਸ੍ਸ ਦਸ੍ਸਨਤੋ. ਪਚ੍ਚੁਪ੍ਪਨ੍ਨਰੂਪਮੇਵ ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯਨ੍ਤਿ ਏਤਸ੍ਮਿਂ ਪਨ ਨਿਯਮੇ ‘‘ਸਬ੍ਬਂ ਰੂਪ’’ਨ੍ਤਿ ਏਤ੍ਥਾਯਂ ਵਿਞ੍ਞੇਯ੍ਯਭਾਵਨਿਯਮੋ ਨ ਵੁਤ੍ਤੋ, ਅਥ ਖੋ ਪਚ੍ਚੁਪ੍ਪਨ੍ਨਨ੍ਤਿ ਸਬ੍ਬਰੂਪਸ੍ਸ ਏਕਨ੍ਤਲਕ੍ਖਣਨਿਯਮੋ ਦਸ੍ਸਿਤੋ ਨ ਸਿਯਾ. ਪਾਲ਼ਿਯਞ੍ਚ ਵਿਞ੍ਞੇਯ੍ਯਮੇਵਾਤਿ ਏਵ-ਕਾਰੋ ਵੁਤ੍ਤੋ, ਨ ਉਪ੍ਪਨ੍ਨਮੇਵਾਤਿ. ਤਸ੍ਮਾ ਉਪ੍ਪਨ੍ਨਸ੍ਸੇਵ ਮਨੋਵਿਞ੍ਞੇਯ੍ਯਨਿਯਮਾਪਤ੍ਤਿ ਨਤ੍ਥੀਤਿ ਕਿਂ ਸੋਤਪਤਿਤਤ੍ਤੇਨ, ਤਸ੍ਮਾ ਵੁਤ੍ਤਨਯੇਨਤ੍ਥੋ ਯੋਜੇਤਬ੍ਬੋ.

ਕਥਂਵਿਧਨ੍ਤਿ ਗੁਣੇਹਿ ਕਥਂ ਸਣ੍ਠਿਤਂ. ਞਾਣਮੇਵ ਞਾਣਵਤ੍ਥੁ. ਸਮਾਨਜਾਤਿਕਾਨਂ ਸਙ੍ਗਹੋ, ਸਮਾਨਜਾਤਿਯਾ ਵਾ ਸਙ੍ਗਹੋ ਸਜਾਤਿਸਙ੍ਗਹੋ. ਸਞ੍ਜਾਯਨ੍ਤਿ ਏਤ੍ਥਾਤਿ ਸਞ੍ਜਾਤਿ, ਸਞ੍ਜਾਤਿਯਾ ਸਙ੍ਗਹੋ ਸਞ੍ਜਾਤਿਸਙ੍ਗਹੋ, ਸਞ੍ਜਾਤਿਦੇਸੇਨ ਸਙ੍ਗਹੋਤਿ ਅਤ੍ਥੋ. ਅਞ੍ਞਮਞ੍ਞੋਪਕਾਰਵਸੇਨ ਅਵਿਪ੍ਪਯੋਗੇਨ ਚ ਸਮਾਧਿਦੇਸੇ ਜਾਤਾ ਸਮ੍ਮਾਸਤਿਆਦਯੋ ਸਮਾਧਿਕ੍ਖਨ੍ਧੇ ਸਙ੍ਗਹਿਤਾ. ਯਤ੍ਥ ਚ ਸਤਿਆਦਿਸਹਾਯਵਤੋ ਸਮਾਧਿਸ੍ਸ ਅਤ੍ਤਨੋ ਕਿਚ੍ਚਕਰਣਂ, ਸੋ ਚਿਤ੍ਤੁਪ੍ਪਾਦੋ ਸਮਾਧਿਦੇਸੋ. ਸਮ੍ਮਾਸਙ੍ਕਪ੍ਪਸ੍ਸ ਚ ਅਪ੍ਪਨਾਭਾਵਤੋ ਪਟਿਵੇਧਸਦਿਸਂ ਕਿਚ੍ਚਨ੍ਤਿ ਸਮਾਨੇਨ ਪਟਿਵੇਧਕਿਚ੍ਚੇਨ ਦਿਟ੍ਠਿਸਙ੍ਕਪ੍ਪਾ ਪਞ੍ਞਕ੍ਖਨ੍ਧੇ ਸਙ੍ਗਹਿਤਾ.

ਰੂਪਵਿਭਤ੍ਤਿਏਕਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਦੁਕਨਿਦ੍ਦੇਸੋ

ਉਪਾਦਾਭਾਜਨੀਯਕਥਾਵਣ੍ਣਨਾ

੫੯੬. ਅਪ੍ਪਰਜਕ੍ਖਾਦਿਸਤ੍ਤਸਮੂਹਦਸ੍ਸਨਂ ਬੁਦ੍ਧਚਕ੍ਖੁ, ਛਸੁ ਅਸਾਧਾਰਣਞਾਣੇਸੁ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਂ ਦਟ੍ਠਬ੍ਬਂ. ਸਬ੍ਬਸਙ੍ਖਤਾਸਙ੍ਖਤਦਸ੍ਸਨਂ ਸਮਨ੍ਤਚਕ੍ਖੁ. ‘‘ਦੁਕ੍ਖਂ ਪਰਿਞ੍ਞੇਯ੍ਯਂ ਪਰਿਞ੍ਞਾਤ’’ਨ੍ਤਿ (ਸਂ. ਨਿ. ੫.੧੦੮੧; ਮਹਾਵ. ੧੫) ਏਵਮਾਦਿਨਾ ਆਕਾਰੇਨ ਪਵਤ੍ਤਂ ਞਾਣਦਸ੍ਸਨਂ ਞਾਣਚਕ੍ਖੁ, ਤਮ੍ਪਿ ਪੁਰਿਮਦ੍ਵਯਮਿਵ ਕਾਮਾਵਚਰਂ. ਚਤੁਸਚ੍ਚਧਮ੍ਮਦਸ੍ਸਨਂ ਧਮ੍ਮਚਕ੍ਖੁ. ਉਪਤ੍ਥਮ੍ਭਭੂਤਾ ਚਤੁਸਮੁਟ੍ਠਾਨਿਕਰੂਪਸਨ੍ਤਤਿਯੋ ਸਮ੍ਭਾਰਾ. ਸਹ ਸਮ੍ਭਾਰੇਹਿ ਸਸਮ੍ਭਾਰਂ, ਸਮ੍ਭਾਰਵਨ੍ਤਂ. ਸਮ੍ਭਵੋਤਿ ਆਪੋਧਾਤੁਮੇਵ ਸਮ੍ਭਵਸਮ੍ਭੂਤਮਾਹ. ਸਣ੍ਠਾਨਨ੍ਤਿ ਵਣ੍ਣਾਯਤਨਮੇਵ ਪਰਿਮਣ੍ਡਲਾਦਿਸਣ੍ਠਾਨਭੂਤਂ. ਤੇਸਂ ਪਨ ਵਿਸੁਂ ਵਚਨਂ ਤਥਾਭੂਤਾਨਂ ਅਤਥਾਭੂਤਾਨਞ੍ਚ ਆਪੋਧਾਤੁਵਣ੍ਣਾਯਤਨਾਨਂ ਯਥਾਵੁਤ੍ਤੇ ਮਂਸਪਿਣ੍ਡੇ ਵਿਜ੍ਜਮਾਨਤ੍ਤਾ. ਚੁਦ੍ਦਸਸਮ੍ਭਾਰੋ ਹਿ ਮਂਸਪਿਣ੍ਡੋ. ਸਮ੍ਭਵਸ੍ਸ ਚਤੁਧਾਤੁਨਿਸ੍ਸਿਤੇਹਿ ਸਹ ਵੁਤ੍ਤਸ੍ਸ ਧਾਤੁਤ੍ਤਯਨਿਸ੍ਸਿਤਤਾ ਯੋਜੇਤਬ੍ਬਾ. ਆਪੋਧਾਤੁਵਣ੍ਣਾਯਤਨਾਨਮੇਵ ਵਾ ਸਮ੍ਭਵਸਣ੍ਠਾਨਾਭਾਵਾ ਵਿਸੁਂ ਵੁਤ੍ਤਾਤਿ ਚਤੁਧਾਤੁਨਿਸ੍ਸਿਤਤਾ ਚ ਨ ਵਿਰੁਜ੍ਝਤਿ. ਯਂ ਮਂਸਪਿਣ੍ਡਂ ਸੇਤਾਦਿਨਾ ਸਞ੍ਜਾਨਨ੍ਤੋ ਨ ਪਸਾਦਚਕ੍ਖੁਂ ਸਞ੍ਜਾਨਾਤਿ, ਪਤ੍ਥਿਣ੍ਣਤਾਦਿਵਿਸੇਸਂ ਵਤ੍ਤੁਕਾਮੋ ‘‘ਪਥਵੀਪਿ ਅਤ੍ਥੀ’’ਤਿਆਦਿ ਵੁਤ੍ਤਮ੍ਪਿ ਵਦਤਿ.

ਸਰੀਰਸਣ੍ਠਾਨੁਪ੍ਪਤ੍ਤਿਦੇਸਭੂਤੇਤਿ ਏਤੇਨ ਅਵਸੇਸਂ ਕਣ੍ਹਮਣ੍ਡਲਂ ਪਟਿਕ੍ਖਿਪਤਿ. ਸ੍ਨੇਹਮਿਵ ਸਤ੍ਤਕ੍ਖਿਪਟਲਾਨਿ ਬ੍ਯਾਪੇਤ੍ਵਾ ਠਿਤਾਹੇਵ ਅਤ੍ਤਨੋ ਨਿਸ੍ਸਯਭੂਤਾਹਿ ਚਤੂਹਿ ਧਾਤੂਹਿ ਕਤੂਪਕਾਰਂ ਤਂਨਿਸ੍ਸਿਤੇਹਿ ਏਵ ਆਯੁਵਣ੍ਣਾਦੀਹਿ ਅਨੁਪਾਲਿਤਪਰਿਵਾਰਿਤਂ ਤਿਸਨ੍ਤਤਿਰੂਪਸਮੁਟ੍ਠਾਪਕੇਹਿ ਉਤੁਚਿਤ੍ਤਾਹਾਰੇਹਿ ਉਪਤ੍ਥਮ੍ਭਿਯਮਾਨਂ ਤਿਟ੍ਠਤਿ. ਸਤ੍ਤਕ੍ਖਿਪਟਲਾਨਂ ਬ੍ਯਾਪਨਵਚਨੇਨ ਚ ਅਨੇਕਕਲਾਪਗਤਭਾਵਂ ਚਕ੍ਖੁਸ੍ਸ ਦਸ੍ਸੇਤਿ. ਪਮਾਣਤੋ ਊਕਾਸਿਰਮਤ੍ਤਨ੍ਤਿ ਊਕਾਸਿਰਮਤ੍ਤੇ ਪਦੇਸੇ ਪਵਤ੍ਤਨਤੋ ਵੁਤ੍ਤਂ. ਰੂਪਾਨਿ ਮਨੁਪਸ੍ਸਤੀਤਿ ਮ-ਕਾਰੋ ਪਦਸਨ੍ਧਿਕਰੋ. ਅਥ ਵਾ ਮਨੂਤਿ ਮਚ੍ਚੋ. ਉਪਕਾਰਭੂਤੇਹਿ ਸਙ੍ਗਹਿਤੋ. ਪਰਿਯਾਯੇਨਾਤਿ ਚਤੁਨ੍ਨਂ ਪਸਾਦੋ ਤੇਸੁ ਏਕਸ੍ਸ ਦ੍ਵਿਨ੍ਨਞ੍ਚਾਤਿਪਿ ਵਤ੍ਤੁਂ ਯੁਤ੍ਤੋ ਸਮਾਨਧਨਾਨਂ ਧਨਂ ਵਿਯਾਤਿ ਏਤੇਨ ਪਰਿਯਾਯੇਨ. ਸਰੀਰਂ ਰੂਪਕ੍ਖਨ੍ਧੋ ਏਵ. ਪਟਿਘਟ੍ਟਨਮੇਵ ਨਿਘਂਸੋ ਪਟਿਘਟ੍ਟਨਾਨਿਘਂਸੋ. ਰੂਪਾਭਿਮੁਖਭਾਵੇਨ ਚਕ੍ਖੁਵਿਞ੍ਞਾਣਸ੍ਸ ਨਿਸ੍ਸਯਭਾਵਾਪਤ੍ਤਿਸਙ੍ਖਾਤੋ ਪਟਿਘਟ੍ਟਨਤੋ ਜਾਤੋ ਵਾ ਨਿਘਂਸੋ ਪਟਿਘਟ੍ਟਨਾਨਿਘਂਸੋ.

ਪਰਿਕਪ੍ਪਵਚਨਂ ‘‘ਸਚੇ ਆਪਾਥਂ ਆਗਚ੍ਛੇਯ੍ਯਾ’’ਤਿ ਹੇਤੁਕਿਰਿਯਂ, ‘‘ਪਸ੍ਸੇਯ੍ਯਾ’’ਤਿ ਫਲਕਿਰਿਯਞ੍ਚ ਪਰਿਕਪ੍ਪੇਤ੍ਵਾ ਤੇਨ ਪਰਿਕਪ੍ਪੇਨ ਵਚਨਂ. ਏਤ੍ਥ ਚ ਹੇਤੁਕਿਰਿਯਾ ਅਨੇਕਤ੍ਤਾ ਅਵੁਤ੍ਤਾਪਿ ਵਿਞ੍ਞਾਯਤੀਤਿ ਦਟ੍ਠਬ੍ਬਾ. ‘‘ਪਸ੍ਸੇ ਵਾ’’ਤਿ ਇਮਿਨਾ ਵਚਨੇਨ ਤੀਸੁਪਿ ਕਾਲੇਸੁ ਚਕ੍ਖੁਵਿਞ੍ਞਾਣਸ੍ਸ ਨਿਸ੍ਸਯਭਾਵਂ ਅਨੁਪਗਚ੍ਛਨ੍ਤਂ ਚਕ੍ਖੁਂ ਸਙ੍ਗਣ੍ਹਾਤਿ. ਦਸ੍ਸਨੇ ਪਰਿਣਾਯਕਭਾਵੋ ਦਸ੍ਸਨਪਰਿਣਾਯਕਟ੍ਠੋ. ਯਥਾ ਹਿ ਇਸ੍ਸਰੋ ‘‘ਇਦਞ੍ਚਿਦਞ੍ਚ ਕਰੋਥਾ’’ਤਿ ਵਦਨ੍ਤੋ ਤਸ੍ਮਿਂ ਤਸ੍ਮਿਂ ਕਿਚ੍ਚੇ ਸਪੁਰਿਸੇ ਪਰਿਣਾਯਤਿ ਪਵਤ੍ਤਯਤਿ, ਏਵਮਿਦਮ੍ਪਿ ਚਕ੍ਖੁਸਮ੍ਫਸ੍ਸਾਦੀਨਂ ਨਿਸ੍ਸਯਭਾਵੇਨ ਤੇ ਧਮ੍ਮੇ ਦਸ੍ਸਨਕਿਚ੍ਚੇ ਆਣਾਪੇਨ੍ਤਂ ਵਿਯ ਪਰਿਣਾਯਤੀਤਿ ਚਕ੍ਖੂਤਿ ਵੁਚ੍ਚਤਿ. ਚਕ੍ਖਤੀਤਿ ਹਿ ਚਕ੍ਖੁ, ਯਥਾਵੁਤ੍ਤੇਨ ਨਯੇਨ ਆਚਿਕ੍ਖਤਿ ਪਰਿਣਾਯਤੀਤਿ ਅਤ੍ਥੋ. ਅਥ ਵਾ ਸਮਵਿਸਮਾਨਿ ਰੂਪਾਨਿ ਚਕ੍ਖਤਿ ਆਚਿਕ੍ਖਤਿ, ਪਕਾਸੇਤੀਤਿ ਵਾ ਚਕ੍ਖੁ. ਸਞ੍ਜਾਯਨ੍ਤਿ ਏਤ੍ਥਾਤਿ ਸਞ੍ਜਾਤਿ. ਕੇ ਸਞ੍ਜਾਯਨ੍ਤਿ? ਫਸ੍ਸਾਦੀਨਿ. ਤਥਾ ਸਮੋਸਰਣਂ. ਚਕ੍ਖੁਸਮ੍ਫਸ੍ਸਾਦੀਨਂ ਅਤ੍ਤਨੋ ਤਿਕ੍ਖਮਨ੍ਦਭਾਵਾਨੁਪਵਤ੍ਤਨੇਨ ਇਨ੍ਦਟ੍ਠਂ ਕਾਰੇਤੀਤਿ. ਨਿਚ੍ਚਂ ਧੁਵਂ ਅਤ੍ਤਾਤਿ ਗਹਿਤਸ੍ਸਪਿ ਲੁਜ੍ਜਨਪਲੁਜ੍ਜਨਟ੍ਠੇਨ. ਵਲ਼ਞ੍ਜਨ੍ਤਿ ਪਵਿਸਨ੍ਤਿ ਏਤੇਨਾਤਿ ਵਲ਼ਞ੍ਜਨਂ, ਤਂਦ੍ਵਾਰਿਕਾਨਂ ਫਸ੍ਸਾਦੀਨਂ ਵਲ਼ਞ੍ਜਨਟ੍ਠੇਨ.

੫੯੭. ਪੁਬ੍ਬੇ ਵੁਤ੍ਤੋ ਪਰਿਕਪ੍ਪੋ ਏਵ ਵਿਕਪ੍ਪਨਤ੍ਥੋ. ਘਟ੍ਟਯਮਾਨਮੇਵਾਤਿ ਪਸਾਦਸ੍ਸ ਅਭਿਮੁਖਭਾਵਵਿਸੇਸਂ ਗਚ੍ਛਨ੍ਤਮੇਵ.

੫੯੯. ਰੂਪਂ ਆਰਬ੍ਭ ਚਕ੍ਖੁਸਮ੍ਫਸ੍ਸਾਦੀਨਂ ਉਪ੍ਪਤ੍ਤਿਵਚਨੇਨੇਵ ਤੇਸਂ ਤਂਦ੍ਵਾਰਿਕਾਨਂ ਅਞ੍ਞੇਸਞ੍ਚ ਰੂਪਂ ਆਰਬ੍ਭ ਉਪ੍ਪਤ੍ਤਿ ਵੁਤ੍ਤਾ ਹੋਤਿ. ਯਥਾ ਚ ਤੇਸਂ ਰੂਪਂ ਪਚ੍ਚਯੋ ਹੋਤਿ, ਤੇਨ ਪਚ੍ਚਯੇਨ ਉਪ੍ਪਤ੍ਤਿ ਵੁਤ੍ਤਾ ਹੋਤੀਤਿ ਅਧਿਪ੍ਪਾਯੇਨ ‘‘ਇਮਿਨਾ’’ਤਿਆਦਿਮਾਹ. ਤਤ੍ਥ ਚਕ੍ਖੁਪਸਾਦਵਤ੍ਥੁਕਾਨਂ ਫਸ੍ਸਾਦੀਨਨ੍ਤਿ ਇਮਿਨਾ ਵਚਨੇਨ ਤਦਾਲਮ੍ਬਨਰੂਪਾਰਮ੍ਮਣਤਾਯ ਤਂਸਦਿਸਾਨਂ ਮਨੋਧਾਤੁਆਦੀਨਞ੍ਚ ਪੁਰੇਜਾਤਪਚ੍ਚਯੇਨ ਉਪ੍ਪਤ੍ਤਿ ਦਸ੍ਸਿਤਾਤਿ ਦਟ੍ਠਬ੍ਬਾ. ਯਤ੍ਥ ਪਨ ਵਿਸੇਸੋ ਅਤ੍ਥਿ, ਤਂ ਦਸ੍ਸੇਤੁਂ ‘‘ਚਕ੍ਖੁਦ੍ਵਾਰਜਵਨਵੀਥਿਪਰਿਯਾਪਨ੍ਨਾਨ’’ਨ੍ਤਿਆਦਿਮਾਹ. ਤਾਨਿ ਹਿ ਰੂਪਂ ਗਰੁਂ ਕਤ੍ਵਾ ਪਵਤ੍ਤਮਾਨਸ੍ਸਾਦਨਾਭਿਨਨ੍ਦਨਭੂਤਾਨਿ ਤਂਸਮ੍ਪਯੁਤ੍ਤਾਨਿ ਚ ਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯੇਹਿ ਉਪ੍ਪਜ੍ਜਨ੍ਤਿ, ਅਞ੍ਞਾਨਿ ਆਰਮ੍ਮਣਪੁਰੇਜਾਤੇਨੇਵਾਤਿ ਏਵਂ ‘‘ਆਰਬ੍ਭਾ’’ਤਿ ਵਚਨਂ ਆਰਮ੍ਮਣਪਚ੍ਚਯਤੋ ਅਞ੍ਞਪਚ੍ਚਯਭਾਵਸ੍ਸਪਿ ਦੀਪਕਂ, ਆਰਮ੍ਮਣਵਚਨਂ ਆਰਮ੍ਮਣਪਚ੍ਚਯਭਾਵਸ੍ਸੇਵਾਤਿ ਅਯਮੇਤੇਸਂ ਵਿਸੇਸੋ.

੬੦੦. ਸੁਣਾਤੀਤਿ ਸੋਤਵਿਞ੍ਞਾਣਸ੍ਸ ਨਿਸ੍ਸਯਭਾਵੇਨ ਸੁਣਾਤਿ. ਜਿਵ੍ਹਾਸਦ੍ਦੇਨ ਵਿਞ੍ਞਾਯਮਾਨਾ ਕਿਰਿਯਾ ਸਾਯਨਨ੍ਤਿ ਕਤ੍ਵਾ ‘‘ਸਾਯਨਟ੍ਠੇਨਾ’’ਤਿ ਆਹ. ਕੁਚ੍ਛਿਤਾਨਂ ਦੁਕ੍ਖਸਮ੍ਪਯੁਤ੍ਤਫਸ੍ਸਾਦੀਨਂ ਆਯੋਤਿ ਕਾਯੋ, ਦੁਕ੍ਖਦੁਕ੍ਖਵਿਪਰਿਣਾਮਦੁਕ੍ਖਾਨਂ ਵਾ. ਕਾਯਾਯਤਨਸ੍ਸ ਬ੍ਯਾਪਿਤਾਯ ਚਕ੍ਖੁਪਸਾਦੇ ਕਾਯਪਸਾਦਭਾਵੋਪਿ ਅਤ੍ਥਿ, ਤੇਨ ਚਕ੍ਖੁਪਸਾਦਸ੍ਸ ਅਨੁਵਿਦ੍ਧਤ੍ਤਾ ਨੋ ਬ੍ਯਾਪਿਤਾ ਚ ਨ ਸਿਯਾ, ਵੁਤ੍ਤਾ ਚ ਸਾ. ਤਸ੍ਮਾ ਚਕ੍ਖੁਪਸਾਦਸ੍ਸ ਫੋਟ੍ਠਬ੍ਬਾਵਭਾਸਨਂ ਕਾਯਪਸਾਦਸ੍ਸ ਚ ਰੂਪਾਵਭਾਸਨਂ ਆਪਨ੍ਨਨ੍ਤਿ ਲਕ੍ਖਣਸਮ੍ਮਿਸ੍ਸਤਂ ਚੋਦੇਤਿ. ਚਕ੍ਖੁਕਾਯਾਨਂ ਅਞ੍ਞਨਿਸ੍ਸਯਤ੍ਤਾ ਕਲਾਪਨ੍ਤਰਗਤਤਾਯ ‘‘ਅਞ੍ਞਸ੍ਸ ਅਞ੍ਞਤ੍ਥ ਅਭਾਵਤੋ’’ਤਿ ਆਹ. ਰੂਪਰਸਾਦਿਨਿਦਸ੍ਸਨਂ ਸਮਾਨਨਿਸ੍ਸਯਾਨਞ੍ਚ ਅਞ੍ਞਮਞ੍ਞਸਭਾਵਾਨੁਪਗਮੇਨ ਅਞ੍ਞਮਞ੍ਞਸ੍ਮਿਂ ਅਭਾਵੋ, ਕੋ ਪਨ ਵਾਦੋ ਅਸਮਾਨਨਿਸ੍ਸਯਾਨਨ੍ਤਿ ਦਸ੍ਸੇਤੁਂ ਵੁਤ੍ਤਂ.

ਰੂਪਾਭਿਘਾਤਾਰਹੋ ਚ ਸੋ ਭੂਤਪ੍ਪਸਾਦੋ ਚਾਤਿ ਰੂਪਾਭਿਘਾਤਾਰਹਭੂਤਪ੍ਪਸਾਦੋ. ਏਵਂਲਕ੍ਖਣਂ ਚਕ੍ਖੁ. ਰੂਪਾਭਿਘਾਤੋਤਿ ਚ ਰੂਪੇ, ਰੂਪਸ੍ਸ ਵਾ ਅਭਿਘਾਤੋਤਿ ਅਤ੍ਥੋ. ਪਰਿਪੁਣ੍ਣਾਪਰਿਪੁਣ੍ਣਾਯਤਨਤ੍ਤਭਾਵਨਿਬ੍ਬਤ੍ਤਕਸ੍ਸ ਕਮ੍ਮਸ੍ਸ ਨਿਦਾਨਭੂਤਾ ਕਾਮਤਣ੍ਹਾ ਰੂਪਤਣ੍ਹਾ ਚ ਤਦਾਯਤਨਿਕਭਵਪਤ੍ਥਨਾਭਾਵਤੋ ਦਟ੍ਠੁਕਾਮਤਾਦਿਵੋਹਾਰਂ ਅਰਹਤੀਤਿ ਦੁਤਿਯੋ ਨਯੋ ਸਬ੍ਬਤ੍ਥ ਵੁਤ੍ਤੋ. ਤਤ੍ਥ ਦਟ੍ਠੁਕਾਮਤਾਨਿਦਾਨਂ ਕਮ੍ਮਂ ਸਮੁਟ੍ਠਾਨਮੇਤੇਸਨ੍ਤਿ ਦਟ੍ਠੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਾਨਿ, ਏਵਂਵਿਧਾਨਂ ਭੂਤਾਨਂ ਪਸਾਦਲਕ੍ਖਣਂ ਚਕ੍ਖੁ, ਏਵਂਵਿਧੋ ਵਾ ਭੂਤਪ੍ਪਸਾਦੋ ਦਟ੍ਠੁਕਾਮਤਾਨਿ…ਪੇ… ਪਸਾਦੋ. ਏਵਂਲਕ੍ਖਣਂ ਚਕ੍ਖੁ. ਰੂਪੇਸੁ ਪੁਗ੍ਗਲਸ੍ਸ ਵਾ ਵਿਞ੍ਞਾਣਸ੍ਸ ਵਾ ਆਵਿਞ੍ਛਨਰਸਂ.

ਕਾਯੋ ਸਬ੍ਬੇਸਨ੍ਤਿ ਕੋ ਏਤ੍ਥ ਵਿਸੇਸੋ, ਨਨੁ ਤੇਜਾਦਿਅਧਿਕਾਨਞ੍ਚ ਭੂਤਾਨਂ ਪਸਾਦਾ ਸਬ੍ਬੇਸਂਯੇਵਾਤਿ? ਸਚ੍ਚਮੇਤਂ, ਇਦਂ ਪਨ ‘‘ਸਬ੍ਬੇਸ’’ਨ੍ਤਿ ਵਚਨਂ ‘‘ਸਮਾਨਾਨ’’ਨ੍ਤਿ ਇਮਮਤ੍ਥਂ ਦੀਪੇਤਿ ਅਨੁਵਤ੍ਤਮਾਨਸ੍ਸ ਏਕਦੇਸਾਧਿਕਭਾਵਸ੍ਸ ਨਿਵਾਰਣਵਸੇਨ ਵੁਤ੍ਤਤ੍ਤਾ. ਤੇਜਾਦੀਨਨ੍ਤਿ ਪਦੀਪਸਙ੍ਖਾਤਸ੍ਸ ਤੇਜਸ੍ਸ ਓਭਾਸੇਨ ਵਾਯੁਸ੍ਸ ਸਦ੍ਦੇਨ ਪਥਵਿਯਾ ਗਨ੍ਧੇਨ ਖੇਲ਼ਸਙ੍ਖਾਤਸ੍ਸ ਉਦਕਸ੍ਸ ਰਸੇਨਾਤਿ ਪੁਰਿਮਵਾਦੇ ਪਚ੍ਛਿਮਵਾਦੇ ਚ ਯਥਾਯੋਗਂ ਤਂਤਂਭੂਤਗੁਣੇਹਿ ਅਨੁਗ੍ਗਯ੍ਹਭਾਵਤੋ ਰੂਪਾਦਿਗ੍ਗਹਣੇ ਉਪਕਰਿਤਬ੍ਬਤੋਤਿ ਅਤ੍ਥੋ. ਰੂਪਾਦੀਨਂ ਅਧਿਕਭਾਵਦਸ੍ਸਨਤੋਤਿ ਅਗ੍ਗਿਮ੍ਹਿ ਰੂਪਸ੍ਸ ਪਭਸ੍ਸਰਸ੍ਸ ਵਾਯੁਮ੍ਹਿ ਸਦ੍ਦਸ੍ਸ ਸਭਾਵੇਨ ਸੁਯ੍ਯਮਾਨਸ੍ਸ ਪਥਵਿਯਾ ਸੁਰਭਿਆਦਿਨੋ ਗਨ੍ਧਸ੍ਸ ਆਪੇ ਚ ਰਸਸ੍ਸ ਮਧੁਰਸ੍ਸ ਵਿਸੇਸਯੁਤ੍ਤਾਨਂ ਦਸ੍ਸਨਤੋ ‘‘ਰੂਪਾਦਯੋ ਤੇਸਂ ਗੁਣਾ’’ਤਿ ਪਠਮਵਾਦੀ ਆਹ. ਤਸ੍ਸੇਵ ਚ ‘‘ਇਚ੍ਛੇਯ੍ਯਾਮਾ’’ਤਿਆਦਿਨਾ ਉਤ੍ਤਰਮਾਹ. ਇਮਿਨਾਵੁਪਾਯੇਨ ਦੁਤਿਯਵਾਦਿਸ੍ਸਪਿ ਨਿਗ੍ਗਹੋ ਹੋਤੀਤਿ.

ਅਥ ਵਾ ਰੂਪਾਦਿਵਿਸੇਸਗੁਣੇਹਿ ਤੇਜਆਕਾਸਪਥਵੀਆਪਵਾਯੂਹਿ ਚਕ੍ਖਾਦੀਨਿ ਕਤਾਨੀਤਿ ਵਦਨ੍ਤਸ੍ਸ ਕਣਾਦਸ੍ਸ ਵਾਦਂ ਤਤਿਯਂ ਉਦ੍ਧਰਿਤ੍ਵਾ ਤਂ ਨਿਗ੍ਗਹੇਤੁਂ ‘‘ਅਥਾਪਿ ਵਦੇਯ੍ਯੁ’’ਨ੍ਤਿਆਦਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਆਸਵੇ ਉਪਲਬ੍ਭਮਾਨੋਪਿ ਗਨ੍ਧੋ ਪਥਵਿਯਾ ਆਪੋਸਂਯੁਤ੍ਤਾਯ ਕਪ੍ਪਾਸਤੋ ਵਿਸਦਿਸਾਯਾਤਿ ਨ ਕਪ੍ਪਾਸਗਨ੍ਧਸ੍ਸ ਅਧਿਕਭਾਵਾਪਤ੍ਤੀਤਿ ਚੇ? ਨ, ਅਨਭਿਭੂਤਤ੍ਤਾ. ਆਸਵੇਹਿ ਉਦਕਸਂਯੁਤ੍ਤਾ ਪਥਵੀ ਉਦਕੇਨ ਅਭਿਭੂਤਾ, ਨ ਕਪ੍ਪਾਸਪਥਵੀਤਿ ਤਸ੍ਸਾਯੇਵ ਅਧਿਕੇਨ ਗਨ੍ਧੇਨ ਭਵਿਤਬ੍ਬਨ੍ਤਿ. ਉਣ੍ਹੋਦਕਸਞ੍ਞੁਤ੍ਤੋ ਚ ਅਗ੍ਗਿ ਉਪਲਬ੍ਭਨੀਯੋ ਮਹਨ੍ਤੋਤਿ ਕਤ੍ਵਾ ਤਸ੍ਸ ਫਸ੍ਸੋ ਵਿਯ ਵਣ੍ਣੋਪਿ ਪਭਸ੍ਸਰੋ ਉਪਲਬ੍ਭਿਤਬ੍ਬੋਤਿ ਉਣ੍ਹੋਦਕਵਣ੍ਣਤੋ ਅਗ੍ਗਿਨਾ ਅਨਭਿਸਮ੍ਬਨ੍ਧਸ੍ਸ ਸੀਤੁਦਕਸ੍ਸ ਵਣ੍ਣੋ ਪਰਿਹਾਯੇਥ. ਤਸ੍ਮਾਤਿ ਏਤਸ੍ਸੁਭਯਸ੍ਸ ਅਭਾਵਾ. ਤਦਭਾਵੇਨ ਹਿ ਰੂਪਾਦੀਨਂ ਤੇਜਾਦਿਵਿਸੇਸਗੁਣਤਾ ਨਿਵਤ੍ਤਿਤਾ, ਤਂਨਿਵਤ੍ਤਨੇਨ ‘‘ਤੇਜਾਦੀਨਂ ਗੁਣੇਹਿ ਰੂਪਾਦੀਹਿ ਅਨੁਗ੍ਗਯ੍ਹਭਾਵਤੋ’’ਤਿ ਇਦਂ ਕਾਰਣਂ ਨਿਵਤ੍ਤਿਤਨ੍ਤਿ. ਏਵਂ ਪਰਮ੍ਪਰਾਯ ਉਭਯਾਭਾਵੋ ਵਿਸੇਸਕਪ੍ਪਨਪ੍ਪਹਾਨਸ੍ਸ ਕਾਰਣਂ ਹੋਤੀਤਿ ਆਹ ‘‘ਤਸ੍ਮਾ ਪਹਾਯੇਥੇਤ’’ਨ੍ਤਿਆਦਿ. ਏਕਕਲਾਪੇਪਿ ਰੂਪਰਸਾਦਯੋ ਵਿਸਦਿਸਾ, ਕੋ ਪਨ ਵਾਦੋ ਨਾਨਾਕਲਾਪੇ ਚਕ੍ਖਾਦਯੋ ਭੂਤਵਿਸੇਸਾਭਾਵੇਪੀਤਿ ਦਸ੍ਸੇਤੁਂ ਰੂਪਰਸਾਦਿਨਿਦਸ੍ਸਨਂ ਵੁਤ੍ਤਂ.

ਯਦਿ ਭੂਤਵਿਸੇਸੋ ਨਤ੍ਥਿ, ਕਿਂ ਪਨ ਚਕ੍ਖਾਦਿਵਿਸੇਸਸ੍ਸ ਕਾਰਣਨ੍ਤਿ ਤਂ ਦਸ੍ਸੇਤੁਂ ‘‘ਯਂ ਅਞ੍ਞਮਞ੍ਞਸ੍ਸਾ’’ਤਿਆਦਿਮਾਹ. ਏਕਮ੍ਪਿ ਕਮ੍ਮਂ ਪਞ੍ਚਾਯਤਨਿਕਤ੍ਤਭਾਵਪਤ੍ਥਨਾਨਿਪ੍ਫਨ੍ਨਂ ਚਕ੍ਖਾਦੀਨਂ ਵਿਸੇਸਹੇਤੁਤ੍ਤਾ ‘‘ਅਞ੍ਞਮਞ੍ਞਸ੍ਸ ਅਸਾਧਾਰਣ’’ਨ੍ਤਿ ਚ ‘‘ਕਮ੍ਮਵਿਸੇਸੋ’’ਤਿ ਚ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਨ ਹਿ ਤਂ ਯੇਨ ਵਿਸੇਸੇਨ ਚਕ੍ਖੁਸ੍ਸ ਪਚ੍ਚਯੋ, ਤੇਨੇਵ ਸੋਤਸ੍ਸ ਹੋਤਿ ਇਨ੍ਦ੍ਰਿਯਨ੍ਤਰਾਭਾਵਪ੍ਪਤ੍ਤਿਤੋ. ‘‘ਪਟਿਸਨ੍ਧਿਕ੍ਖਣੇ ਮਹਗ੍ਗਤਾ ਏਕਾ ਚੇਤਨਾ ਕਟਤ੍ਤਾਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੨.੧੨.੭੮) ਵਚਨੇਨ ਪਟਿਸਨ੍ਧਿਕ੍ਖਣੇ ਵਿਜ੍ਜਮਾਨਾਨਂ ਸਬ੍ਬੇਸਂ ਕਟਤ੍ਤਾਰੂਪਾਨਂ ਏਕਾ ਚੇਤਨਾ ਕਮ੍ਮਪਚ੍ਚਯੋ ਹੋਤੀਤਿ ਵਿਞ੍ਞਾਯਤਿ. ਨਾਨਾਚੇਤਨਾਯ ਹਿ ਤਦਾ ਇਨ੍ਦ੍ਰਿਯੁਪ੍ਪਤ੍ਤਿਯਂ ਸਤਿ ਪਰਿਤ੍ਤੇਨ ਚ ਮਹਗ੍ਗਤੇਨ ਚ ਕਮ੍ਮੁਨਾ ਨਿਬ੍ਬਤ੍ਤਿਤਂ ਕਟਤ੍ਤਾਰੂਪਂ ਆਪਜ੍ਜੇਯ੍ਯਾਤਿ ਨ ਚੇਕਾ ਪਟਿਸਨ੍ਧਿ ਅਨੇਕਕਮ੍ਮਨਿਬ੍ਬਤ੍ਤਾ ਹੋਤੀਤਿ ਸਿਦ੍ਧਮੇਕੇਨ ਕਮ੍ਮੇਨ ਅਨੇਕਿਨ੍ਦ੍ਰਿਯੁਪ੍ਪਤ੍ਤਿ ਹੋਤੀਤਿ. ਅਨਲ੍ਲੀਨੋ ਨਿਸ੍ਸਯੋ ਏਤਸ੍ਸਾਤਿ ਅਨਲ੍ਲੀਨਨਿਸ੍ਸਯੋ, ਰੂਪਸਦ੍ਦਸਙ੍ਖਾਤੋ ਵਿਸਯੋ. ਗਨ੍ਧਰਸਾਨਂ ਨਿਸ੍ਸਯਾ ਘਾਨਜਿਵ੍ਹਾਨਿਸ੍ਸਯੇ ਅਲ੍ਲੀਯਨ੍ਤੀਤਿ ਤੇ ਨਿਸ੍ਸਯਵਸੇਨ ਅਲ੍ਲੀਨਾ, ਫੋਟ੍ਠਬ੍ਬਂ ਸਯਂ ਕਾਯਨਿਸ੍ਸਯਅਲ੍ਲੀਨਂ ਭੂਤਤ੍ਤਯਤ੍ਤਾ. ਦੂਰੇ…ਪੇ… ਸਮ੍ਪਤ੍ਤੋ ਏਵ ਨਾਮ ਪਟਿਘਟ੍ਟਨਨਿਘਂਸਜਨਕਤੋਤਿ ਅਧਿਪ੍ਪਾਯੋ. ਸਦ੍ਦੋ ਪਨ ਧਾਤੁਪਰਮ੍ਪਰਾਯ ਵਾਯੁ ਵਿਯ ਆਗਨ੍ਤ੍ਵਾ ਨਿਸ੍ਸਯਵਸੇਨ ਸੋਤਨਿਸ੍ਸਯੇ ਅਲ੍ਲੀਯਿਤ੍ਵਾ ਸੋਤਂ ਘਟ੍ਟੇਤ੍ਵਾ ਵਵਤ੍ਥਾਨਂ ਗਚ੍ਛਨ੍ਤੋ ਸਣਿਕਂ ਵਵਤ੍ਥਾਨਂ ਗਚ੍ਛਤੀਤਿ ਵੁਤ੍ਤੋ. ਏਵਂ ਪਨ ਸਤਿਚਿਤ੍ਤਸਮੁਟ੍ਠਾਨਂ ਸਦ੍ਦਾਯਤਨਂ ਸੋਤਵਿਞ੍ਞਾਣਸ੍ਸ ਕਦਾਚਿਪਿ ਆਰਮ੍ਮਣਪਚ੍ਚਯੋ ਨ ਸਿਯਾ. ਨ ਹਿ ਬਹਿਦ੍ਧਾ ਚਿਤ੍ਤਸਮੁਟ੍ਠਾਨੁਪ੍ਪਤ੍ਤਿ ਉਪਪਜ੍ਜਤੀਤਿ.

ਚਿਰੇਨ ਸੁਯ੍ਯੇਯ੍ਯਾਤਿ ਕਸ੍ਮਾ ਏਤਂ ਵੁਤ੍ਤਂ, ਨਨੁ ਦੂਰੇ ਠਿਤੇਹਿ ਰਜਕਾਦਿਸਦ੍ਦਾ ਚਿਰੇਨ ਸੁਯ੍ਯਨ੍ਤੀਤਿ? ਨ, ਦੂਰਾਸਨ੍ਨਾਨਂ ਯਥਾਪਾਕਟੇ ਸਦ੍ਦੇ ਗਹਣਵਿਸੇਸਤੋ. ਯਥਾ ਹਿ ਦੂਰਾਸਨ੍ਨਾਨਂ ਵਚਨਸਦ੍ਦੇ ਯਥਾ ਪਾਕਟੀਭੂਤੇ ਗਹਣਵਿਸੇਸਤੋ ਆਕਾਰਵਿਸੇਸਾਨਂ ਅਗ੍ਗਹਣਂ ਗਹਣਞ੍ਚ ਹੋਤਿ, ਏਵਂ ਰਜਕਾਦਿਸਦ੍ਦੇਪਿ ਆਸਨ੍ਨਸ੍ਸ ਆਦਿਤੋ ਪਭੁਤਿ ਯਾਵਾਵਸਾਨਾ ਕਮੇਨ ਪਾਕਟੀਭੂਤੇ ਦੂਰਸ੍ਸ ਚਾਵਸਾਨੇ ਮਜ੍ਝੇ ਵਾ ਪਿਣ੍ਡਵਸੇਨ ਪਵਤ੍ਤਿਪਾਕਟੀਭੂਤੇ ਨਿਚ੍ਛਯਗਹਣਾਨਂ ਸੋਤਵਿਞ੍ਞਾਣਵੀਥਿਯਾ ਪਰਤੋ ਪਵਤ੍ਤਾਨਂ ਵਿਸੇਸਤੋ ਲਹੁਕਂ ਸੁਤੋ ਚਿਰੇਨ ਸੁਤੋਤਿ ਅਭਿਮਾਨੋ ਹੋਤਿ. ਸੋ ਪਨ ਸਦ੍ਦੋ ਯਤ੍ਥ ਉਪ੍ਪਨ੍ਨੋ, ਤਂ ਨਿਸ੍ਸਿਤੋਵ ਅਤ੍ਤਨੋ ਵਿਜ੍ਜਮਾਨਕ੍ਖਣੇ ਸੋਤਸ੍ਸ ਆਪਾਥਮਾਗਚ੍ਛਤਿ. ਦੂਰੇ ਠਿਤੋ ਪਨ ਸਦ੍ਦੋ ਅਞ੍ਞਤ੍ਥ ਪਟਿਘੋਸੁਪ੍ਪਤ੍ਤਿਯਾ ਭਾਜਨਾਦਿਚਲਨਸ੍ਸ ਚ ਅਯੋਕਨ੍ਤੋ ਵਿਯ ਅਯੋਚਲਨਸ੍ਸ ਪਚ੍ਚਯੋ ਹੋਤੀਤਿ ਦਟ੍ਠਬ੍ਬੋ. ਯਥਾ ਵਾ ਘਣ੍ਟਾਭਿਘਾਤਾਨੁਜਾਨਿ ਭੂਤਾਨਿ ਅਨੁਰਵਸ੍ਸ ਨਿਸ੍ਸਯਭੂਤਾਨਿ ਘਟ੍ਟਨਸਭਾਵਾਨਿ, ਏਵਂ ਘਟ੍ਟਨਾਨੁਜਾਨਿ ਯਾਵ ਸੋਤਪ੍ਪਸਾਦਾ ਉਪ੍ਪਤ੍ਤਿਵਸੇਨ ਆਗਤਾਨਿ ਭੂਤਾਨਿ ਘਟ੍ਟਨਸਭਾਵਾਨੇਵਾਤਿ ਤਂਨਿਸ੍ਸਿਤੋ ਸਦ੍ਦੋ ਨਿਸ੍ਸਯਵਸੇਨ ਧਾਤੁਪਰਮ੍ਪਰਾਯ ਘਟ੍ਟੇਤ੍ਵਾ ਸਣਿਕਂ ਵਵਤ੍ਥਾਨਂ ਗਚ੍ਛਤੀਤਿ ਵੁਤ੍ਤੋ. ਅਸੁਕਦਿਸਾਯ ਨਾਮਾਤਿ ਨ ਪਞ੍ਞਾਯੇਯ੍ਯ. ਕਸ੍ਮਾ? ਸੋਤਪ੍ਪਦੇਸਸ੍ਸੇਵ ਸਦ੍ਦਸ੍ਸ ਗਹਣਤੋ.

ਵਿਸਮੇ ਅਜ੍ਝਾਸਯੋ ਏਤਸ੍ਸਾਤਿ ਵਿਸਮਜ੍ਝਾਸਯੋ, ਅਜ੍ਝਾਸਯਰਹਿਤਮ੍ਪਿ ਚਕ੍ਖੁ ਵਿਸਮਨਿਨ੍ਨਤ੍ਤਾ ਵਿਸਮਜ੍ਝਾਸਯਂ ਵਿਯ ਹੋਤੀਤਿ ‘‘ਵਿਸਮਜ੍ਝਾਸਯ’’ਨ੍ਤਿ ਵੁਤ੍ਤਂ. ਚਕ੍ਖੁਮਤੋ ਵਾ ਪੁਗ੍ਗਲਸ੍ਸ ਅਜ੍ਝਾਸਯਵਸੇਨ ਚਕ੍ਖੁ ‘‘ਵਿਸਮਜ੍ਝਾਸਯ’’ਨ੍ਤਿ ਵੁਤ੍ਤਂ.

ਕਣ੍ਣਕੂਪਛਿਦ੍ਦੇਯੇਵ ਪਵਤ੍ਤਨਤੋ ਆਰਮ੍ਮਣਗ੍ਗਹਣਹੇਤੁਤੋ ਚ ਤਤ੍ਥੇਵ ‘‘ਅਜ੍ਝਾਸਯਂ ਕਰੋਤੀ’’ਤਿ ਵੁਤ੍ਤਂ. ਤਸ੍ਸ ਸੋਤਸ੍ਸ ਸੋਤਵਿਞ੍ਞਾਣਨਿਸ੍ਸਯਭਾਵੇਨ ਸਦ੍ਦਸਵਨੇ. ਅਜਟਾਕਾਸੋਪਿ ਵਟ੍ਟਤੀਤਿ ਏਤਸ੍ਸ ਅਟ੍ਠਕਥਾਧਿਪ੍ਪਾਯੇਨ ਅਤ੍ਥਂ ਵਦਨ੍ਤੋ ‘‘ਅਨ੍ਤੋਲੇਣਸ੍ਮਿ’’ਨ੍ਤਿਆਦਿਮਾਹ. ਅਤ੍ਤਨੋ ਅਧਿਪ੍ਪਾਯੇਨ ਵਦਨ੍ਤੋ ‘‘ਕਿਂ ਏਤਾਯ ਧਮ੍ਮਤਾਯਾ’’ਤਿਆਦਿਮਵੋਚ.

ਵਾਤੂਪਨਿਸ੍ਸਯੋ ਗਨ੍ਧੋ ਗੋਚਰੋ ਏਤਸ੍ਸਾਤਿ ਵਾਤੂਪਨਿਸ੍ਸਯਗਨ੍ਧਗੋਚਰਂ. ਏਤ੍ਥ ਚ ਗਨ੍ਧਗ੍ਗਹਣਸ੍ਸ ਵਾਤੋ ਉਪਨਿਸ੍ਸਯੋ, ਤਬ੍ਬੋਹਾਰੇਨ ਪਨ ਗਨ੍ਧੋ ‘‘ਵਾਤੂਪਨਿਸ੍ਸਯੋ’’ਤਿ ਵੁਤ੍ਤੋ. ਅਥ ਵਾ ਵਾਤੋ ਏਵ ਉਪਨਿਸ੍ਸਯੋ ਵਾਤੂਪਨਿਸ੍ਸਯੋ. ਕਸ੍ਸਾਤਿ? ਘਾਨਵਿਞ੍ਞਾਣਸ੍ਸ. ਸੋ ਸਹਕਾਰੀਪਚ੍ਚਯਨ੍ਤਰਭੂਤੋ ਏਤਸ੍ਸ ਅਤ੍ਥੀਤਿ ਵਾਤੂਪਨਿਸ੍ਸਯੋ, ਗਨ੍ਧੋ ਪਚ੍ਚਯੋ.

ਆਪੋ ਚ ਸਹਕਾਰੀਪਚ੍ਚਯਨ੍ਤਰਭੂਤੋ ਖੇਲ਼ਾਦਿਕੋ. ਤਥਾ ਪਥਵੀ. ਗਹੇਤਬ੍ਬਸ੍ਸ ਹਿ ਫੋਟ੍ਠਬ੍ਬਸ੍ਸ ਉਪ੍ਪੀਲ਼ਿਯਮਾਨਸ੍ਸ ਆਧਾਰਭੂਤਾ ਪਥਵੀ ਕਾਯਸ੍ਸ ਚ ਫੋਟ੍ਠਬ੍ਬੇਨ ਉਪ੍ਪੀਲ਼ਿਯਮਾਨਸ੍ਸ ਨਿਸ੍ਸਯਭੂਤਾਨਂ ਆਧਾਰਭੂਤਾ ਸਬ੍ਬਦਾ ਫੋਟ੍ਠਬ੍ਬਗਹਣਸ੍ਸ ਉਪਨਿਸ੍ਸਯੋਤਿ. ਉਪ੍ਪੀਲ਼ਨੇਨ ਪਨ ਵਿਨਾ ਫੋਟ੍ਠਬ੍ਬਗਹਣੇ ਕਾਯਾਯਤਨਸ੍ਸ ਨਿਸ੍ਸਯਭੂਤਾ ਪਥਵੀ ਉਪਨਿਸ੍ਸਯੋਤਿ ਦਟ੍ਠਬ੍ਬਾ. ਸਬ੍ਬਦਾਪਿ ਚ ਤਸ੍ਸਾ ਉਪਨਿਸ੍ਸਯਭਾਵੋ ਯੁਤ੍ਤੋ ਏਵ.

ਪਞ੍ਚਵਣ੍ਣਾਨਨ੍ਤਿ ਵਚਨਂ ਤਦਾਧਾਰਾਨਂ ਸੁਤ੍ਤਾਨਂ ਨਾਨਤ੍ਤਦਸ੍ਸਨਤ੍ਥਂ. ਪਞ੍ਚਪ੍ਪਕਾਰਾ ਪਞ੍ਚਵਣ੍ਣਾ. ਏਕਨ੍ਤਤੋਤਿ ਇਦਂ ਸਬ੍ਬਦਾ ਉਪ੍ਪੀਲ਼ਨੇਨ ਵਿਨਿਬ੍ਭੁਜ੍ਜਿਤੁਂ ਅਸਕ੍ਕੁਣੇਯ੍ਯਾਨਂ ਕਲਾਪਨ੍ਤਰਰੂਪਾਨਂ ਸਬ੍ਭਾਵਾ ਤੇਸਂ ਨਿਵਤ੍ਤਨਤ੍ਥਂ ਵੁਤ੍ਤਂ. ਨ ਹਿ ਤਾਨਿ ਏਕਨ੍ਤੇਨ ਅਵਿਨਿਭੁਤ੍ਤਾਨਿ ਕਲਾਪਨ੍ਤਰਗਤਤ੍ਤਾਤਿ.

੬੧੬. ਵਣ੍ਣਨਿਭਾਤਿ ਰੂਪਾਯਤਨਮੇਵ ਨਿਦ੍ਦਿਟ੍ਠਨ੍ਤਿ ਤਦੇਵ ਅਪੇਕ੍ਖਿਤ੍ਵਾ ‘‘ਸਨਿਦਸ੍ਸਨ’’ਨ੍ਤਿ ਨਪੁਂਸਕਨਿਦ੍ਦੇਸੋ ਕਤੋ. ਤਸ੍ਮਾਤਿ ਨਿਪ੍ਪਰਿਯਾਯਰੂਪਾਨਂ ਨੀਲਾਦੀਨਂ ਫੁਸਿਤ੍ਵਾ ਅਜਾਨਿਤਬ੍ਬਤੋ ਦੀਘਾਦੀਨਞ੍ਚ ਫੁਸਿਤ੍ਵਾ ਜਾਨਿਤਬ੍ਬਤੋ ਨ ਨਿਪ੍ਪਰਿਯਾਯੇਨ ਦੀਘਂ ਰੂਪਾਯਤਨਂ. ਤਂ ਤਂ ਨਿਸ੍ਸਾਯਾਤਿ ਦੀਘਾਦਿਸਨ੍ਨਿਵੇਸਂ ਭੂਤਸਮੁਦਾਯਂ ਨਿਸ੍ਸਾਯ. ਤਥਾ ਤਥਾ ਠਿਤਨ੍ਤਿ ਦੀਘਾਦਿਸਨ੍ਨਿਵੇਸੇਨ ਠਿਤਂ ਵਣ੍ਣਸਮੁਦਾਯਭੂਤਂ ਰੂਪਾਯਤਨਮੇਵ ਦੀਘਾਦਿਵੋਹਾਰੇਨ ਭਾਸਿਤਂ. ਅਞ੍ਞਮਞ੍ਞਪਰਿਚ੍ਛਿਨ੍ਨਂ ਏਕਸ੍ਮਿਂ ਇਤਰਸ੍ਸ ਅਭਾਵਾ. ਵਿਸਯਗੋਚਰਾਨਂ ਵਿਸੇਸੋ ਅਨਞ੍ਞਤ੍ਥਭਾਵੋ ਤਬ੍ਬਹੁਲਚਾਰਿਤਾ ਚ ਚਕ੍ਖੁਵਿਞ੍ਞਾਣਸ੍ਸ.

੬੨੦. ਭੇਰਿਸਦ੍ਦਾਦੀਨਞ੍ਚ ਵਾਦਿਤਸਦ੍ਦਤ੍ਤਾ ‘‘ਵੁਤ੍ਤਾਵਸੇਸਾਨ’’ਨ੍ਤਿ ਆਹ. ਅਮਨੁਸ੍ਸਵਚਨੇਨ ਨ ਮਨੁਸ੍ਸੇਹਿ ਅਞ੍ਞੇ ਪਾਣਿਨੋ ਏਵ ਗਹਿਤਾ, ਅਥ ਖੋ ਕਟ੍ਠਾਦਯੋਪੀਤਿ ਅਧਿਪ੍ਪਾਯੇਨ ‘‘ਸੇਸੋ ਸਬ੍ਬੋਪੀ’’ਤਿ ਆਹ. ਏਵਂ ਸਨ੍ਤੇਪਿ ਵਤ੍ਥੁਵਿਸੇਸਕਿਤ੍ਤਨਵਸੇਨ ਪਾਲ਼ਿਯਂ ਅਨਾਗਤੋ ਤਥਾ ਕਿਤ੍ਤੇਤਬ੍ਬੋ ਯੇ ਵਾ ਪਨਾਤਿ ਵੁਤ੍ਤੋਤਿ ਅਧਿਪ੍ਪਾਯੋ.

੬੨੪. ਵਿਸ੍ਸਗਨ੍ਧੋਤਿ ਵਿਰੂਪੋ ਮਂਸਾਦਿਗਨ੍ਧੋ. ਲਮ੍ਬਿਲਨ੍ਤਿ ਮਧੁਰਮ੍ਬਿਲਂ.

੬੩੨. ਸਞ੍ਜਾਨਨ੍ਤਿ ਏਤੇਨਾਤਿ ਸਞ੍ਜਾਨਨਂ, ਉਪਲਕ੍ਖਣਂ. ਸਕੇਨ ਸਕੇਨ ਕਮ੍ਮਚਿਤ੍ਤਾਦਿਨਾ ਪਚ੍ਚਯੇਨ ਸਮੁਟ੍ਠਿਤਾਨਿਪਿ ਇਤ੍ਥਿਲਿਙ੍ਗਾਦੀਨਿ ਇਨ੍ਦ੍ਰਿਯਸਹਿਤੇ ਸਰੀਰੇ ਉਪ੍ਪਜ੍ਜਮਾਨਾਨਿ ਤਂਤਦਾਕਾਰਾਨਿ ਹੁਤ੍ਵਾ ਉਪ੍ਪਜ੍ਜਨ੍ਤੀਤਿ ‘‘ਇਤ੍ਥਿਨ੍ਦ੍ਰਿਯਂ ਪਟਿਚ੍ਚ ਸਮੁਟ੍ਠਹਨ੍ਤੀ’’ਤਿ ਵੁਤ੍ਤਾਨਿ. ਇਤ੍ਥਿਲਿਙ੍ਗਾਦੀਸੁ ਏਵ ਚ ਅਧਿਪਤਿਭਾਵਾ ਏਤਸ੍ਸ ਇਨ੍ਦ੍ਰਿਯਤਾ ਵੁਤ੍ਤਾ, ਇਨ੍ਦ੍ਰਿਯਸਹਿਤੇ ਸਨ੍ਤਾਨੇ ਇਤ੍ਥਿਲਿਙ੍ਗਾਦਿਆਕਾਰਰੂਪਪਚ੍ਚਯਾਨਂ ਅਞ੍ਞਥਾ ਅਨੁਪ੍ਪਾਦਨਤੋ ਇਤ੍ਥਿਗ੍ਗਹਣਸ੍ਸ ਚ ਤੇਸਂ ਰੂਪਾਨਂ ਪਚ੍ਚਯਭਾਵਤੋ. ਯਸ੍ਮਾ ਪਨ ਭਾਵਦਸਕੇਪਿ ਰੂਪਾਨਂ ਇਤ੍ਥਿਨ੍ਦ੍ਰਿਯਂ ਨ ਜਨਕਂ, ਨਾਪਿ ਅਨੁਪਾਲਕਂ ਉਪਤ੍ਥਮ੍ਭਕਂ ਵਾ, ਨ ਚ ਅਞ੍ਞਕਲਾਪਰੂਪਾਨਂ, ਤਸ੍ਮਾ ਤਂ ਜੀਵਿਤਿਨ੍ਦ੍ਰਿਯਂ ਵਿਯ ਸਕਲਾਪਰੂਪਾਨਂ ਆਹਾਰੋ ਵਿਯ ਵਾ ਕਲਾਪਨ੍ਤਰਰੂਪਾਨਞ੍ਚ ਇਨ੍ਦ੍ਰਿਯਅਤ੍ਥਿਅਵਿਗਤਪਚ੍ਚਯੋਤਿ ਨ ਵੁਤ੍ਤਂ. ਏਸ ਨਯੋ ਪੁਰਿਸਿਨ੍ਦ੍ਰਿਯੇਪਿ. ਲਿਙ੍ਗਾਦਿਆਕਾਰੇਸੁ ਰੂਪੇਸੁ ਰੂਪਾਯਤਨਸ੍ਸ ਚਕ੍ਖੁਵਿਞ੍ਞੇਯ੍ਯਤ੍ਤਾ ਲਿਙ੍ਗਾਦੀਨਂ ਚਕ੍ਖੁਵਿਞ੍ਞੇਯ੍ਯਤਾ ਵੁਤ੍ਤਾ.

੬੩੩. ਉਭਯਮ੍ਪਿ…ਪੇ… ਕੁਸਲੇਨ ਪਤਿਟ੍ਠਾਤੀਤਿ ਸੁਗਤਿਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਦੁਗ੍ਗਤਿਯਞ੍ਹਿ ਪਟਿਸਨ੍ਧਿ ਅਕੁਸਲੇਨੇਵਾਤਿ ਤਦਾ ਉਪ੍ਪਜ੍ਜਮਾਨੋ ਭਾਵੋਪਿ ਅਕੁਸਲੇਨੇਵ ਭਵੇਯ੍ਯ, ਪਟਿਸਨ੍ਧਿਯਂ ਵਿਯ ਪਵਤ੍ਤੇਪੀਤਿ. ਤਯਿਦਂ ਦ੍ਵਯਂ ਯਸ੍ਮਾ ਸਨ੍ਤਾਨੇ ਸਹ ਨ ਪਵਤ੍ਤਤਿ ‘‘ਯਸ੍ਸ ਇਤ੍ਥਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਸ੍ਸ ਪੁਰਿਸਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ? ਨੋ’’ਤਿਆਦਿਵਚਨਤੋ (ਯਮ. ੩.ਇਨ੍ਦ੍ਰਿਯਯਮਕ.੧੮੮), ਤਸ੍ਮਾ ਉਭਤੋਬ੍ਯਞ੍ਜਨਕਸ੍ਸਪਿ ਏਕਮੇਵਿਨ੍ਦ੍ਰਿਯਂ ਹੋਤੀਤਿ ਵੁਤ੍ਤਂ.

੬੩੫. ਏਕਨ੍ਤਂ ਕਾਯਵਿਞ੍ਞਤ੍ਤਿਯਂ ਕਾਯਵੋਹਾਰਸ੍ਸ ਪਵਤ੍ਤਿਦਸ੍ਸਨਤ੍ਥਂ ‘‘ਕਾਯੇਨ ਸਂਵਰੋ ਸਾਧੂ’’ਤਿ (ਧ. ਪ. ੩੬੧; ਸਂ. ਨਿ. ੧.੧੧੬) ਸਾਧਕਸੁਤ੍ਤਂ ਆਹਟਂ. ਭਾਵਸ੍ਸ ਗਮਨਂ ਪਕਾਸਨਂ ਚੋਪਨਂ. ਥਮ੍ਭਨਾਤਿ ਵਾਯੋਧਾਤੁਅਧਿਕਾਨਂ ਭੂਤਾਨਂ ਥਮ੍ਭਨਾਕਾਰੋ ਵਿਞ੍ਞਤ੍ਤੀਤਿ ਅਤ੍ਥੋ. ਉਦ੍ਧਙ੍ਗਮਵਾਤਾਦਯੋ ਵਿਯ ਹਿ ਯੋ ਵਾਤਾਧਿਕੋ ਕਲਾਪੋ, ਤਤ੍ਥ ਭੂਤਾਨਂ ਵਿਞ੍ਞਤ੍ਤਿਆਕਾਰਤਾ ਹੋਤੀਤਿ. ਤੇਨੇਵ ‘‘ਕਾਯਂ ਥਮ੍ਭੇਤ੍ਵਾ ਥਦ੍ਧਂ ਕਰੋਤੀਤਿ ਥਮ੍ਭਨਾ’’ਤਿ ਵਾਯੋਧਾਤੁਕਿਚ੍ਚਵਸੇਨ ਵਿਞ੍ਞਤ੍ਤਿ ਵੁਤ੍ਤਾ. ਤਤੋ ਏਵ ਚ ‘‘ਵਾਯੋਧਾਤੁਯਾ ਆਕਾਰੋ ਕਾਯਵਿਞ੍ਞਤ੍ਤੀ’’ਤਿ ਚ ਵਤ੍ਤੁਂ ਵਟ੍ਟਤਿ, ਤਥਾ ‘‘ਪਥਵੀਧਾਤੁਯਾ ਵਚੀਵਿਞ੍ਞਤ੍ਤੀ’’ਤਿ ਪਥਵੀਧਾਤੁਅਧਿਕਭੂਤਵਿਕਾਰਤੋ.

੬੩੬. ਪਭੇਦਗਤਾ ਵਾਚਾ ਏਵਾਤਿ ਤਿਸ੍ਸ ਫੁਸ੍ਸਾਤਿ ਪਭੇਦਗਤਾ. ਅਥ ਵਾ ਵਚੀਸਙ੍ਖਾਰੇਹਿ ਵਿਤਕ੍ਕਵਿਚਾਰੇਹਿ ਪਰਿਗ੍ਗਹਿਤਾ ਸਵਨਵਿਸਯਭਾਵਂ ਅਨੁਪਨੀਤਤਾਯ ਅਭਿਨ੍ਨਾ ਤਬ੍ਭਾਵਂ ਨੀਯਮਾਨਾ ਵਾਚਾ ‘‘ਵਚੀਭੇਦੋ’’ਤਿ ਵੁਚ੍ਚਤਿ. ਇਰਿਯਾਪਥਮ੍ਪਿ ਉਪਤ੍ਥਮ੍ਭੇਨ੍ਤੀਤਿ ਯਥਾਪਵਤ੍ਤਂ ਇਰਿਯਾਪਥਂ ਉਪਤ੍ਥਮ੍ਭੇਨ੍ਤਿ. ਯਥਾ ਹਿ ਅਬ੍ਬੋਕਿਣ੍ਣੇ ਭਵਙ੍ਗੇ ਵਤ੍ਤਮਾਨੇ ਅਙ੍ਗਾਨਿ ਓਸੀਦਨ੍ਤਿ ਪਵਿਟ੍ਠਾਨਿ ਵਿਯ ਹੋਨ੍ਤਿ, ਨ ਏਵਂ ‘‘ਦ੍ਵਤ੍ਤਿਂਸ ਛਬ੍ਬੀਸਾ’’ਤਿ ਵੁਤ੍ਤੇਸੁ ਜਾਗਰਣਚਿਤ੍ਤੇਸੁ ਵਤ੍ਤਮਾਨੇਸੁ. ਤੇਸੁ ਪਨ ਵਤ੍ਤਮਾਨੇਸੁ ਅਙ੍ਗਾਨਿ ਉਪਤ੍ਥਦ੍ਧਾਨਿ ਯਥਾਪਵਤ੍ਤਿਰਿਯਾਪਥਭਾਵੇਨੇਵ ਪਵਤ੍ਤਨ੍ਤੀਤਿ. ਖੀਣਾਸਵਾਨਂ ਚੁਤਿਚਿਤ੍ਤਨ੍ਤਿ ਵਿਸੇਸੇਤ੍ਵਾ ਵੁਤ੍ਤਂ, ‘‘ਕਾਮਾਵਚਰਾਨਂ ਪਚ੍ਛਿਮਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਯਸ੍ਸ ਚਿਤ੍ਤਸ੍ਸ ਅਨਨ੍ਤਰਾ ਕਾਮਾਵਚਰਾਨਂ ਪਚ੍ਛਿਮਚਿਤ੍ਤਂ ਉਪ੍ਪਜ੍ਜਿਸ੍ਸਤਿ, ਰੂਪਾਵਚਰੇ ਅਰੂਪਾਵਚਰੇ ਪਚ੍ਛਿਮਭਵਿਕਾਨਂ, ਯੇ ਚ ਰੂਪਾਵਚਰਂ ਅਰੂਪਾਵਚਰਂ ਉਪਪਜ੍ਜਿਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤਿ, ਤੇਸਂ ਚਵਨ੍ਤਾਨਂ ਤੇਸਂ ਵਚੀਸਙ੍ਖਾਰੋ ਨਿਰੁਜ੍ਝਿਸ੍ਸਤਿ, ਨੋ ਚ ਤੇਸਂ ਕਾਯਸਙ੍ਖਾਰੋ ਨਿਰੁਜ੍ਝਿਸ੍ਸਤੀ’’ਤਿ (ਯਮ. ੨.ਸਙ੍ਖਾਰਯਮਕ.੮੮) ਪਨ ਵਚਨਤੋ ਅਞ੍ਞੇਸਮ੍ਪਿ ਚੁਤਿਚਿਤ੍ਤਂ ਰੂਪਂ ਨ ਸਮੁਟ੍ਠਾਪੇਤੀਤਿ ਵਿਞ੍ਞਾਯਤਿ. ਨ ਹਿ ਰੂਪਸਮੁਟ੍ਠਾਪਕਚਿਤ੍ਤਸ੍ਸ ਗਬ੍ਭਗਮਨਾਦਿਵਿਨਿਬਦ੍ਧਾਭਾਵੇਨ ਕਾਯਸਙ੍ਖਾਰਾਸਮੁਟ੍ਠਾਪਨਂ ਅਤ੍ਥਿ, ਨ ਚ ਯੁਤ੍ਤਂ ‘‘ਚੁਤੋ ਚ ਚਿਤ੍ਤਸਮੁਟ੍ਠਾਨਞ੍ਚਸ੍ਸ ਪਵਤ੍ਤਤੀ’’ਤਿ, ਨਾਪਿ ‘‘ਚੁਤਿਚਿਤ੍ਤਂ ਰੂਪਂ ਸਮੁਟ੍ਠਾਪੇਤੀ’’ਤਿ ਪਾਲ਼ਿ ਅਤ੍ਥੀਤਿ.

੬੩੭. ਨ ਕਸ੍ਸਤੀਤਿ ਨ ਵਿਲੇਖਿਯਤਿ. ਗਤਨ੍ਤਿ ਵਿਞ੍ਞਾਤਂ. ਅਸਮ੍ਫੁਟ੍ਠਂ ਚਤੂਹਿ ਮਹਾਭੂਤੇਹੀਤਿ ਯਸ੍ਮਿਂ ਕਲਾਪੇ ਭੂਤਾਨਂ ਪਰਿਚ੍ਛੇਦੋ, ਤੇਹੇਵ ਅਸਮ੍ਫੁਟ੍ਠਂ. ਵਿਜ੍ਜਮਾਨੇਪਿ ਹਿ ਕਲਾਪਨ੍ਤਰਭੂਤਾਨਂ ਕਲਾਪਨ੍ਤਰਭੂਤਸਮ੍ਫੁਟ੍ਠਭਾਵੇ ਤਂਤਂਭੂਤਵਿਵਿਤ੍ਤਤਾ ਰੂਪਪਰਿਯਨ੍ਤੋ ਆਕਾਸੋਤਿ ਯੇਸਂ ਯੋ ਪਰਿਚ੍ਛੇਦੋ, ਤੇਹਿ ਸੋ ਅਸਮ੍ਫੁਟ੍ਠੋਵ, ਅਞ੍ਞਥਾ ਪਰਿਚ੍ਛਿਨ੍ਨਭਾਵੋ ਨ ਸਿਯਾ ਤੇਸਂ ਭੂਤਾਨਂ ਬ੍ਯਾਪਿਤਭਾਵਾਪਤ੍ਤਿਤੋ. ਅਬ੍ਯਾਪਿਤਾ ਹਿ ਅਸਮ੍ਫੁਟ੍ਠਤਾਤਿ.

੬੩੮. ਲਹੁਤਾਦੀਨਂ ਅਞ੍ਞਮਞ੍ਞਾਵਿਜਹਨੇਨ ਦੁਬ੍ਬਿਞ੍ਞੇਯ੍ਯਨਾਨਤ੍ਤਤਾ ਵੁਤ੍ਤਾਤਿ ਤਂਤਂਵਿਕਾਰਾਧਿਕਰੂਪੇਹਿ ਤਂਤਂਨਾਨਤ੍ਤਪ੍ਪਕਾਸਨਤ੍ਥਂ ‘‘ਏਵਂ ਸਨ੍ਤੇਪੀ’’ਤਿਆਦਿਮਾਹ. ਯਥਾਵੁਤ੍ਤਾ ਚ ਪਚ੍ਚਯਾ ਤਂਤਂਵਿਕਾਰਸ੍ਸ ਵਿਸੇਸਪਚ੍ਚਯਭਾਵਤੋ ਵੁਤ੍ਤਾ, ਅਵਿਸੇਸੇਨ ਪਨ ਸਬ੍ਬੇ ਸਬ੍ਬੇਸਂ ਪਚ੍ਚਯਾਤਿ.

੬੪੧. ਆਦਿਤੋ ਚਯੋ ਆਚਯੋ, ਪਠਮੁਪ੍ਪਤ੍ਤਿ. ਉਪਰਿ ਚਯੋ ਉਪਚਯੋ. ਪਬਨ੍ਧੋ ਸਨ੍ਤਤਿ. ਤਤ੍ਥ ਉਦ੍ਦੇਸੇ ਅਵੁਤ੍ਤੋਪਿ ਆਚਯੋ ਉਪਚਯਸਦ੍ਦੇਨੇਵ ਵਿਞ੍ਞਾਯਤੀਤਿ ‘‘ਯੋ ਆਯਤਨਾਨਂ ਆਚਯੋ ਪੁਨਪ੍ਪੁਨਂ ਨਿਬ੍ਬਤ੍ਤਮਾਨਾਨਂ, ਸੋਵ ਰੂਪਸ੍ਸ ਉਪਚਯੋ’’ਤਿ ਆਹ. ਪਾਲ਼ਿਯਂ ਪਨ ਉਪ-ਸਦ੍ਦੋ ਪਠਮਤ੍ਥੋ ਉਪਰਿਅਤ੍ਥੋ ਚ ਹੋਤੀਤਿ ‘‘ਆਦਿਚਯੋ ਉਪਚਯੋ, ਉਪਰਿਚਯੋ ਸਨ੍ਤਤੀ’’ਤਿ ਅਯਮਤ੍ਥੋ ਵਿਞ੍ਞਾਯਤੀਤਿ. ਅਞ੍ਞਥਾ ਹਿ ਆਚਯਸਙ੍ਖਾਤਸ੍ਸ ਪਠਮੁਪ੍ਪਾਦਸ੍ਸ ਅਵੁਤ੍ਤਤਾ ਆਪਜ੍ਜੇਯ੍ਯ.

ਏਵਨ੍ਤਿ ‘‘ਯੋ ਆਯਤਨਾਨਂ ਆਚਯੋ’’ਤਿਆਦਿਨਿਦ੍ਦੇਸੇਨ ਕਿਂ ਕਥਿਤਂ ਹੋਤਿ? ਆਯਤਨੇਨ ਆਚਯੋ ਕਥਿਤੋ. ਆਚਯੂਪਚਯਸਨ੍ਤਤਿਯੋ ਹਿ ਨਿਬ੍ਬਤ੍ਤਿਭਾਵੇਨ ਆਚਯੋ ਏਵਾਤਿ ਆਯਤਨੇਹਿ ਆਚਯਾਦੀਨਂ ਪਕਾਸਿਤਤ੍ਤਾ ਤੇਹਿ ਆਚਯੋ ਕਥਿਤੋ. ਆਯਤਨਾਨਂ ਆਚਯਾਦਿਵਚਨੇਨੇਵ ਆਚਯਸਭਾਵਾਨਿ ਉਪ੍ਪਾਦਧਮ੍ਮਾਨਿ ਆਯਤਨਾਨੀਤਿ ਆਚਯੇਨ ਤਂਪਕਤਿਕਾਨਿ ਆਯਤਨਾਨਿ ਕਥਿਤਾਨਿ. ਲਕ੍ਖਣਞ੍ਹਿ ਉਪ੍ਪਾਦੋ, ਨ ਰੂਪਰੂਪਨ੍ਤਿ. ਤੇਨੇਵਾਧਿਪ੍ਪਾਯੇਨਾਹ ‘‘ਆਯਤਨਮੇਵ ਕਥਿਤ’’ਨ੍ਤਿ. ਆਚਯਞ੍ਹਿ ਲਕ੍ਖਣਂ ਕਥਯਨ੍ਤੇਨ ਤਂਲਕ੍ਖਣਾਨਿ ਆਯਤਨਾਨੇਵ ਕਥਿਤਾਨਿ ਹੋਨ੍ਤੀਤਿ. ਏਵਮ੍ਪਿ ਕਿਂ ਕਥਿਤਂ ਹੋਤੀਤਿ ਆਯਤਨਾਚਯੇਹਿ ਆਚਯਾਯਤਨੇਹਿ ਆਚਯਮੇਵ ਆਯਤਨਮੇਵ ਕਥੇਨ੍ਤੇਨ ਉਦ੍ਦੇਸੇ ਨਿਦ੍ਦੇਸੇ ਚ ਆਚਯੋਤਿ ਇਦਮੇਵ ਅਵਤ੍ਵਾ ਉਪਚਯਸਨ੍ਤਤਿਯੋ ਉਦ੍ਦਿਸਿਤ੍ਵਾ ਤੇਸਂ ਵਿਭਜਨਵਸੇਨ ਆਯਤਨੇਨ ਆਚਯਕਥਨਾਦਿਨਾ ਕਿਂ ਕਥਿਤਂ ਹੋਤੀਤਿ ਅਧਿਪ੍ਪਾਯੋ. ਆਚਯੋਤਿ ਉਪਚਯਮਾਹ, ਉਪਚਯੋਤਿ ਚ ਸਨ੍ਤਤਿਂ. ਤਦੇਵੁਭਯਂ ਯਥਾਕ੍ਕਮਂ ਵਿਵਰਨ੍ਤੋ ‘‘ਨਿਬ੍ਬਤ੍ਤਿ ਵਡ੍ਢਿ ਕਥਿਤਾ’’ਤਿ ਆਹ. ਉਪਚਯਸਨ੍ਤਤਿਯੋ ਹਿ ਅਤ੍ਥਤੋ ਏਕਤ੍ਤਾ ਆਚਯੋਵਾਤਿ ਤਦੁਦ੍ਦੇਸਵਿਭਜਨਵਸੇਨ ਆਯਤਨੇਨ ਆਚਯਕਥਨਾਦਿਨਾ ਨਿਬ੍ਬਤ੍ਤਿਵਡ੍ਢਿਆਕਾਰਨਾਨਤ੍ਤਂ ਆਚਯਸ੍ਸ ਕਥਿਤਨ੍ਤਿ ਅਤ੍ਥੋ. ਇਮਮੇਵਤ੍ਥਂ ਵਿਭਾਵੇਤੁਂ ‘‘ਅਤ੍ਥਤੋ ਹੀ’’ਤਿਆਦਿਮਾਹ. ਯਸ੍ਮਾ ਚ ਉਭਯਮ੍ਪਿ ਏਤਂ ਜਾਤਿਰੂਪਸ੍ਸੇਵਾਧਿਵਚਨਂ, ਤਸ੍ਮਾ ਜਾਤਿਰੂਪਸ੍ਸ ਲਕ੍ਖਣਾਦਿਵਿਸੇਸੇਸੁ ਆਚਯਾਦੀਸੁ ਪਵਤ੍ਤਿਆਦੀਸੁ ਚ ਆਚਯਾਦਿਲਕ੍ਖਣਾਦਿਕੋ ਉਪਚਯੋ, ਪਵਤ੍ਤਿਆਦਿਲਕ੍ਖਣਾਦਿਕਾ ਸਨ੍ਤਤੀਤਿ ਵੇਦਿਤਬ੍ਬਾਤਿ ਅਤ੍ਥੋ.

੬੪੩. ਪਕਤਿਨਿਦ੍ਦੇਸਾਤਿ ਫਲਵਿਪਚ੍ਚਨਪਕਤਿਯਾ ਨਿਦ੍ਦੇਸਾ, ਜਰਾਯ ਪਾਪੁਣਿਤਬ੍ਬਂ ਫਲਮੇਵ ਵਾ ਪਕਤਿ. ਨ ਚ ਖਣ੍ਡਿਚ੍ਚਾਦੀਨੇਵ ਜਰਾਤਿ ਕਲਲਕਾਲਤੋ ਪਭੁਤਿ ਪੁਰਿਮਰੂਪਾਨਂ ਜਰਾਪਤ੍ਤਕ੍ਖਣੇ ਉਪ੍ਪਜ੍ਜਮਾਨਾਨਿ ਪਚ੍ਛਿਮਰੂਪਾਨਿ ਪਰਿਪਕ੍ਕਰੂਪਾਨੁਰੂਪਾਨਿ ਪਰਿਣਤਪਰਿਣਤਾਨਿ ਉਪ੍ਪਜ੍ਜਨ੍ਤੀਤਿ ਅਨੁਕ੍ਕਮੇਨ ਸੁਪਰਿਣਤਰੂਪਪਰਿਪਾਕਕਾਲੇ ਉਪ੍ਪਜ੍ਜਮਾਨਾਨਿ ਖਣ੍ਡਿਚ੍ਚਾਦਿਸਭਾਵਾਨਿ ਉਪ੍ਪਜ੍ਜਨ੍ਤਿ. ਤਾਨਿ ਉਦਕਾਦਿਮਗ੍ਗੇਸੁ ਤਿਣਰੁਕ੍ਖਸਂਭਗ੍ਗਤਾਦਯੋ ਵਿਯ ਪਰਿਪਾਕਗਤਮਗ੍ਗਸਙ੍ਖਾਤੇਸੁ ਪਰਿਪਕ੍ਕਰੂਪੇਸੁ ਉਪ੍ਪਨ੍ਨਾਨਿ ਜਰਾਯ ਗਤਮਗ੍ਗੋਇਚ੍ਚੇਵ ਵੁਤ੍ਤਾਨਿ, ਨ ਜਰਾਤਿ. ਅਵਿਞ੍ਞਾਯਮਾਨਨ੍ਤਰਜਰਾ ਅਵੀਚਿਜਰਾ. ਮਰਣੇ ਉਪਨਯਨਰਸਾ.

੬੪੪. ਤਂ ਪਤ੍ਵਾਤਿ ਤਂ ਅਤ੍ਤਨੋ ਏਵ ਖਯਵਯਸਙ੍ਖਾਤਂ ਸਭਾਵਂ ਪਤ੍ਵਾ ਰੂਪਂ ਖੀਯਤਿ ਵੇਤਿ ਭਿਜ੍ਜਤਿ. ਪੋਥੇਤ੍ਵਾ ਪਾਤਿਤਸ੍ਸ ਦੁਬ੍ਬਲਤਾ ਪਰਾਧੀਨਤਾ ਸਯਨਪਰਾਯਣਤਾ ਚ ਹੋਤਿ, ਤਥਾ ਜਰਾਭਿਭੂਤਸ੍ਸਾਤਿ ਪੋਥਕਸਦਿਸੀ ਜਰਾ.

੬੪੫. ਕਤ੍ਤਬ੍ਬਤੋਤਿ ਕਤ੍ਤਬ੍ਬਸਭਾਵਤੋ. ਵਿਸਾਣਾਦੀਨਂ ਤਰਚ੍ਛਖੇਲ਼ਤੇਮਿਤਾਨਂ ਪਾਸਾਣਾਨਂ ਵਿਯ ਥਦ੍ਧਭਾਵਾਭਾਵਤੋ ਅਹਿਵਿਚ੍ਛਿਕਾਨਂ ਵਿਯ ਸਵਿਸਤ੍ਤਾਭਾਵਤੋ ਚ ਸੁਖੁਮਤਾ ਵੁਤ੍ਤਾ. ਓਜਾਲਕ੍ਖਣੋਤਿ ਏਤ੍ਥ ਅਙ੍ਗਮਙ੍ਗਾਨੁਸਾਰਿਨੋ ਰਸਸ੍ਸ ਸਾਰੋ ਉਪਤ੍ਥਮ੍ਭਬਲਕਾਰੋ ਭੂਤਨਿਸ੍ਸਿਤੋ ਏਕੋ ਵਿਸੇਸੋ ਓਜਾਤਿ.

ਉਪਾਦਾਭਾਜਨੀਯਕਥਾਵਣ੍ਣਨਾ ਨਿਟ੍ਠਿਤਾ.

ਨੋਉਪਾਦਾਭਾਜਨੀਯਕਥਾਵਣ੍ਣਨਾ

੬੪੬. ਨ ਉਪਾਦਿਯਤੇਵਾਤਿ ਨ ਨਿਸ੍ਸਯਤਿ ਏਵ, ਕਿਨ੍ਤੁ ਨਿਸ੍ਸਯਤਿ ਚ ਨਿਸ੍ਸੀਯਤਿ ਚਾਤਿ ਅਤ੍ਥੋ.

੬੪੭. ਪੁਰਿਮਾ ਪਨਾਤਿ ਪਞ੍ਚਵਿਧਸਙ੍ਗਹੇ ਪਥਵੀਧਾਤੁਆਪੋਧਾਤੁਤੇਜੋਧਾਤੁਵਾਯੋਧਾਤੂਨਂ ਪੁਰਿਮੁਦ੍ਦੇਸਵਸੇਨ ਵੁਤ੍ਤਂ. ਫੋਟ੍ਠਬ੍ਬਾਯਤਨਨਿਦ੍ਦੇਸੇ ਵਾ ਵੁਤ੍ਤਾਨਂ ਪਥਵੀਧਾਤੁਆਦੀਨਂ ਪੁਰਿਮਾ ਉਦ੍ਦੇਸੇ ਵੁਤ੍ਤਾ ਆਪੋਧਾਤੂਤਿ ਅਧਿਪ੍ਪਾਯੋ, ਵੁਤ੍ਤਸ੍ਸ ਵਾ ਫੋਟ੍ਠਬ੍ਬਾਯਤਨਸ੍ਸ ਅਤੀਤਤਾਯ ਪਚ੍ਛਿਮਤਾ, ਅਨਾਗਤਤਾਯ ਚ ਆਪੋਧਾਤੁਯਾ ਪੁਰਿਮਤਾ ਵੁਤ੍ਤਾਤਿ ਦਟ੍ਠਬ੍ਬਾ. ਆਯੂਤਿ ਜੀਵਿਤਿਨ੍ਦ੍ਰਿਯਂ. ਕਮ੍ਮਜਤੇਜਂ ਉਸ੍ਮਾ. ਯਂ ਕਿਞ੍ਚਿ ਧਾਤੁਂ…ਪੇ… ਏਕਪ੍ਪਹਾਰੇਨ ਨੁਪ੍ਪਜ੍ਜਤੀਤਿ ਏਕਸ੍ਮਿਂ ਖਣੇ ਅਨੇਕਾਸੁ ਪਥਵੀਸੁ ਆਪਾਥਗਤਾਸੁ ਤਾਸੁ ਤਾਸੁ ਸਹ ਨੁਪ੍ਪਜ੍ਜਤਿ, ਤਥਾ ਤੇਜਵਾਯੂਸੁ ਚਾਤਿ ਅਤ੍ਥੋ. ਅਨੇਕੇਸੁ ਆਰਮ੍ਮਣੇਸੁ ਸਨ੍ਨਿਪਤਿਤੇਸੁ ਆਭੁਜਿਤਵਸੇਨ ਆਰਮ੍ਮਣਪਸਾਦਾਧਿਮਤ੍ਤਤਾਵਸੇਨ ਚ ਪਠਮਂ ਕਤ੍ਥਚਿ ਉਪ੍ਪਤ੍ਤਿ ਦਸ੍ਸਿਤਾ, ਅਞ੍ਞਤ੍ਥ ਚ ਪਨ ਉਪ੍ਪਤ੍ਤਿ ਅਤ੍ਥਿ ਏਵ. ਸਾਯਂ ਆਰਮ੍ਮਣਤੋ ਆਰਮ੍ਮਣਨ੍ਤਰਸਙ੍ਕਨ੍ਤਿ ਯੇਨ ਉਪਾਯੇਨ ਹੋਤਿ, ਤਸ੍ਸ ਵਿਜਾਨਨਤ੍ਥਂ ਪੁਚ੍ਛਤਿ ‘‘ਕਥਂ ਪਨ ਚਿਤ੍ਤਸ੍ਸ ਆਰਮ੍ਮਣਤੋ ਸਙ੍ਕਨ੍ਤਿ ਹੋਤੀ’’ਤਿ.

੬੫੧. ਅਯਪਿਣ੍ਡਿਆਦੀਸੁ ਪਥਵੀਧਾਤੁ ਤਾਦਿਸਾਯ ਆਪੋਧਾਤੁਯਾ ਅਨਾਬਦ੍ਧਾ ਸਨ੍ਤੀ ਵਿਸਰੇਯ੍ਯ, ਤਸ੍ਮਾ ‘‘ਤਾਨਿ ਆਪੋਧਾਤੁ ਆਬਨ੍ਧਿਤ੍ਵਾ ਬਦ੍ਧਾਨਿ ਕਰੋਤੀ’’ਤਿ ਵੁਤ੍ਤਂ. ਯਥਾ ਹਿ ਯੁਤ੍ਤਪ੍ਪਮਾਣਂ ਉਦਕਂ ਪਂਸੁਚੁਣ੍ਣਾਨਿ ਆਬਨ੍ਧਿਤ੍ਵਾ ਮਤ੍ਤਿਕਾਪਿਣ੍ਡਂ ਕਤ੍ਵਾ ਠਪੇਤਿ, ਏਵਂ ਅਯੋਪਿਣ੍ਡਿਆਦੀਸੁਪਿ ਤਦਨੁਰੂਪਪਚ੍ਚਯੇਹਿ ਤਤ੍ਥੇਵ ਉਪ੍ਪਨ੍ਨਾ ਆਪੋਧਾਤੁ ਤਥਾ ਆਬਨ੍ਧਿਤ੍ਵਾ ਠਪੇਤੀਤਿ ਦਟ੍ਠਬ੍ਬਾ.

ਅਫੁਸਿਤ੍ਵਾ ਪਤਿਟ੍ਠਾ ਹੋਤੀਤਿ ਆਪੋਧਾਤੁਯਾ ਅਫੋਟ੍ਠਬ੍ਬਭਾਵਤੋ ਵੁਤ੍ਤਂ, ਤਥਾ ‘‘ਅਫੁਸਿਤ੍ਵਾਵ ਆਬਨ੍ਧਤੀ’’ਤਿ. ਨ ਹਿ ਯਥਾ ਫੋਟ੍ਠਬ੍ਬਧਾਤੂਨਂ ਫੋਟ੍ਠਬ੍ਬਭਾਵੇਨ ਅਞ੍ਞਮਞ੍ਞਨਿਸ੍ਸਯਤਾ, ਏਵਂ ਫੋਟ੍ਠਬ੍ਬਾਫੋਟ੍ਠਬ੍ਬਧਾਤੂਨਂ ਹੋਤੀਤਿ ਅਧਿਪ੍ਪਾਯੋ ਵੇਦਿਤਬ੍ਬੋ. ਅਵਿਨਿਬ੍ਭੋਗਵੁਤ੍ਤੀਸੁ ਹਿ ਭੂਤੇਸੁ ਅਞ੍ਞਮਞ੍ਞਨਿਸ੍ਸਯਤਾ ਅਞ੍ਞਮਞ੍ਞਪਚ੍ਚਯਭੂਤੇਸੁ ਨ ਸਕ੍ਕਾ ਨਿਵਾਰੇਤੁਂ, ਨਾਪਿ ਸਹਜਾਤੇਸੁ ਅਵਿਨਿਬ੍ਭੋਗਤਾਯ ਏਕੀਭੂਤੇਸੁ ਫੁਸਨਾਫੁਸਨਾਨਿ ਵਿਚਾਰੇਤੁਂ ਯੁਤ੍ਤਾਨੀਤਿ. ਨ ਉਣ੍ਹਾ ਹੁਤ੍ਵਾ ਝਾਯਤੀਤਿ ਤੇਜੋਸਭਾਵਤਂਯੇਵ ਪਟਿਕ੍ਖਿਪਤਿ, ਨ ਸੀਤਤ੍ਤਂ ਅਨੁਜਾਨਾਤਿ, ਤੇਜੋਸਭਾਵਪਟਿਕ੍ਖੇਪੇਨੇਵ ਚ ਸੀਤਤ੍ਤਞ੍ਚ ਪਟਿਕ੍ਖਿਤ੍ਤਂ ਹੋਤਿ. ਤੇਜੋ ਏਵ ਹਿ ਸੀਤਂ ਹਿਮਪਾਤਸਮਯਾਦੀਸੁ ਸੀਤਸ੍ਸ ਪਰਿਪਾਚਕਤਾਦਸ੍ਸਨਤੋ, ਸੀਤੁਣ੍ਹਾਨਞ੍ਚ ਅਞ੍ਞਮਞ੍ਞਪਟਿਪਕ੍ਖਭਾਵਤੋ ਉਣ੍ਹੇਨ ਸਹ ਨ ਸੀਤਂ ਭੂਤਨ੍ਤਰਂ ਪਵਤ੍ਤਤੀਤਿ ਯੁਜ੍ਜਤਿ. ਉਣ੍ਹਕਲਾਪੇ ਪਨ ਸੀਤਸ੍ਸ ਅਪ੍ਪਵਤ੍ਤਿ ਸੀਤਕਲਾਪੇ ਚ ਉਣ੍ਹਸ੍ਸ ਦ੍ਵਿਨ੍ਨਂ ਅਞ੍ਞਮਞ੍ਞਪਟਿਪਕ੍ਖਤ੍ਤਾ ਤੇਜੋਵਿਸੇਸਭਾਵੇ ਯੁਜ੍ਜਤੀਤਿ. ਭਾਵਞ੍ਞਥਤ੍ਤਨ੍ਤਿ ਖਰਾਨਂ ਗੁਲ਼ਾਦੀਨਂ ਦਵਤਾ ਮੁਦੁਤਾ ਰਸਾਦੀਨਞ੍ਚ ਦਵਾਨਂ ਖਰਤਾ ਪਚ੍ਚਯਵਿਸੇਸੇਹਿ ਓਮਤ੍ਤਾਧਿਮਤ੍ਤਪਥਵੀਧਾਤੁਆਦਿਕਾਨਂ ਉਪ੍ਪਤ੍ਤਿ. ਲਕ੍ਖਣਞ੍ਞਥਤ੍ਤਂ ਕਕ੍ਖਲ਼ਾਦਿਲਕ੍ਖਣਵਿਜਹਨਂ, ਤਂ ਏਤੇਸਂ ਨ ਹੋਤਿ, ਓਮਤ੍ਤਾਧਿਮਤ੍ਤਤਾਸਙ੍ਖਾਤਂ ਭਾਵਞ੍ਞਥਤ੍ਤਂਯੇਵ ਹੋਤੀਤਿ ਅਤ੍ਥੋ.

੬੫੨. ਅਨੁਪਾਦਿਨ੍ਨਾਦੀਨਂਯੇਵਾਤਿ ਏਕਨ੍ਤਅਨੁਪਾਦਿਨ੍ਨਏਕਨ੍ਤਨਚਿਤ੍ਤਸਮੁਟ੍ਠਾਨਾਦੀਨਂ ਨਿਦ੍ਦੇਸੇਸੁ ਗਹਣੇਸੁ ਗਹਿਤਾਤਿ ਅਤ੍ਥੋ. ਯਂ ਵਾ ਪਨਞ੍ਞਮ੍ਪੀਤਿ ਪਨ ਵਚਨੇਨ ਪੁਰਿਮਾਨਮ੍ਪਿ ਨਕਮ੍ਮਸ੍ਸਕਤਤ੍ਤਾਭਾਵਾਦਿਕਂ ਦੀਪੇਤਿ. ਤਾ ਹਿ ਅਨੁਪਾਦਿਨ੍ਨਾਦਿਨਕਮ੍ਮਸ੍ਸਕਤਤ੍ਤਾਦਿਵਚਨਾਨਂ ਸਮਾਨਤ੍ਥਤ੍ਤਾ ਏਕੇਨ ਅਵਤ੍ਤਬ੍ਬਤ੍ਤੇ ਇਤਰੇਨਪਿ ਅਵਤ੍ਤਬ੍ਬਾ ਸਿਯੁਂ, ਵਤ੍ਤਬ੍ਬਤ੍ਤੇ ਵਾ ਵਤ੍ਤਬ੍ਬਾ. ਤਸ੍ਮਾ ਏਕਨ੍ਤਾਕਮ੍ਮਜਾਦੀਸ੍ਵੇਵ ਗਹੇਤਬ੍ਬਤ੍ਤਾ ਤਾ ਅਨੇਕਨ੍ਤੇਸੁ ਨ ਗਹਿਤਾਤਿ ਦਟ੍ਠਬ੍ਬਾ.

੬੬੬. ਏਕਨ੍ਤ …ਪੇ… ਪਞ੍ਞਾਯਤਿ ਤੇਸਂ ਵਿਕਾਰਤ੍ਤਾ, ਅਨਿਪ੍ਫਨ੍ਨਤ੍ਤਾ ਪਨ ਤਸ੍ਸ ਉਪ੍ਪਾਦੋ ਨ ਕੇਨਚਿ ਸਕ੍ਕਾ ਵਤ੍ਤੁਨ੍ਤਿ ਅਧਿਪ੍ਪਾਯੋ.

ਦੁਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਚਤੁਕ੍ਕਨਿਦ੍ਦੇਸਵਣ੍ਣਨਾ

੯੬੬. ਪਚ੍ਛਿਮਪਦਸ੍ਸਾਤਿ ਵਿਞ੍ਞਾਤਪਦਸ੍ਸ. ਸਬ੍ਬਮੇਵ ਹਿ ਰੂਪਂ ਵਿਞ੍ਞਾਤਨ੍ਤਿ ਤਸ੍ਸ ਅਭਿਨ੍ਦਿਤਬ੍ਬਤ੍ਤਾ ਵਿਞ੍ਞਾਤਤੋ ਅਞ੍ਞਂ ਦਿਟ੍ਠਂ ਸੁਤਂ ਮੁਤਞ੍ਚ ਨ ਹੋਤੀਤਿ ਪੁਚ੍ਛਂ ਅਕਤ੍ਵਾਵ ਵਿਸ੍ਸਜ੍ਜਿਤਂ. ਨ ਹਿ ਸਕ੍ਕਾ ਵਿਞ੍ਞਾਤਤੋ ਅਞ੍ਞਂ ‘‘ਕਤਮਂ ਰੂਪਂ ਦਿਟ੍ਠ’’ਨ੍ਤਿ ਪੁਚ੍ਛਿਤੁਨ੍ਤਿ ਅਧਿਪ੍ਪਾਯੋ. ਯਥਾ ਹਿ ਦ੍ਵੀਸੁ ਉਦ੍ਦਿਟ੍ਠੇਸੁ ਨੋਪਾਦਤੋ ਅਞ੍ਞਤ੍ਤਂ ਸਨ੍ਧਾਯ ‘‘ਕਤਮਂ ਤਂ ਰੂਪਂ ਉਪਾਦਾ’’ਤਿ ਪੁਚ੍ਛਿਤਂ, ਏਵਂ ਦਿਟ੍ਠਾਦੀਸੁ ਚਤੂਸੁ ਉਦ੍ਦਿਟ੍ਠੇਸੁ ਸੁਤਾਦੀਹਿ ਤੀਹਿਪਿ ਅਞ੍ਞਤ੍ਤਂ ਸਨ੍ਧਾਯ ‘‘ਕਤਮਂ ਤਂ ਰੂਪਂ ਦਿਟ੍ਠ’’ਨ੍ਤਿ ਪੁਚ੍ਛਿਤਬ੍ਬਂ ਸਿਯਾ, ਤਦਭਾਵੋ ਨ ਪੁਚ੍ਛਿਤਂ, ਏਵਂ ਸੁਤਾਦੀਸੁਪੀਤਿ. ਦਸ੍ਸਨਾਦਿਗ੍ਗਹਣਵਿਸੇਸਤੋ ਪਨ ਦਿਟ੍ਠਾਦੀਹਿ ਅਞ੍ਞਸ੍ਸ ਵਿਞ੍ਞਾਤਸ੍ਸ ਸਬ੍ਭਾਵਤੋ ਚ ਚਤੁਕ੍ਕੋ ਵੁਤ੍ਤੋ.

ਪਞ੍ਚਕਨਿਦ੍ਦੇਸਵਣ੍ਣਨਾ

੯੬੯. ਤੇਜੋਭਾਵਂ ਗਤਨ੍ਤਿ ਸਭਾਵੇਨੇਵ ਤੇਜੋਭਾਵਂ ਪਤ੍ਤਨ੍ਤਿ ਅਤ੍ਥੋ. ਵੁਤ੍ਤਸ੍ਸਪਿ ਅਞ੍ਞੇਨ ਪਕਾਰੇਨ ਸਙ੍ਗਹਾਰਹਸ੍ਸ ਸਙ੍ਗਣ੍ਹਨਂ ਨਯਕਰਣਂ ਇਧ ਦਟ੍ਠਬ੍ਬਂ, ਤਯਿਦਂ ‘‘ਵਿਞ੍ਞਾਤ’’ਨ੍ਤਿ ਚਤੁਕ੍ਕਪਦੇਪਿ ਯੋਜੇਤਬ੍ਬਂ. ਫੋਟ੍ਠਬ੍ਬਸ੍ਸ ਭੇਦਸਬ੍ਭਾਵੋ ਅਟ੍ਠਕੇ ਨਯੋ.

ਪਕਿਣ੍ਣਕਕਥਾਵਣ੍ਣਨਾ

੯੭੫. ਨਤ੍ਥਿ ਨੀਵਰਣਾਤਿ ਵਚਨੇਨ ਮਿਦ੍ਧਸ੍ਸਪਿ ਨੀਵਰਣਸ੍ਸ ਪਹਾਨਂ ਵੁਤ੍ਤਂ, ਨ ਚ ਰੂਪਂ ਪਹਾਤਬ੍ਬਂ, ਨ ਚ ਰੂਪਕਾਯਗੇਲਞ੍ਞਂ ਮੁਨਿਨੋ ਨਤ੍ਥੀਤਿ ਸਕ੍ਕਾ ਵਤ੍ਤੁਂ ‘‘ਪਿਟ੍ਠਿ ਮੇ ਆਗਿਲਾਯਤਿ, ਤਮਹਂ ਆਯਮਿਸ੍ਸਾਮੀ’’ਤਿ (ਮ. ਨਿ. ੨.੨੨) ਵਚਨਤੋ. ਸਵਿਞ੍ਞਾਣਕਸਦ੍ਦੋਤਿ ਵਿਞ੍ਞਾਣੇਨ ਪਵਤ੍ਤਿਤੋ ਵਚੀਘੋਸਾਦਿਸਦ੍ਦੋ. ਨ ਹਿ ਏਤਾਨਿ ਜਾਯਨ੍ਤੀਤਿ ਪਰਿਪਚ੍ਚਮਾਨਸ੍ਸ ਰੂਪਸ੍ਸ ਪਰਿਪਚ੍ਚਨਂ ਜਰਾ, ਖੀਯਮਾਨਸ੍ਸ ਖਯੋ ਅਨਿਚ੍ਚਤਾਤਿ ਰੂਪਭਾਵਮਤ੍ਤਾਨਿ ਏਤਾਨਿ, ਨ ਸਯਂ ਸਭਾਵਵਨ੍ਤਾਨੀਤਿ ਸਨ੍ਧਾਯ ਵੁਤ੍ਤਂ. ਤਥਾ ਜਾਯਮਾਨਸ੍ਸ ਜਨਨਂ ਜਾਤਿ, ਸਾ ਚ ਰੂਪਭਾਵੋਵ, ਨ ਸਯਂ ਸਭਾਵਵਤੀਤਿ ‘‘ਨ ਪਨ ਪਰਮਤ੍ਥਤੋ ਜਾਤਿ ਜਾਯਤੀ’’ਤਿ ਵੁਤ੍ਤਂ.

ਤੇਸਂ ਪਚ੍ਚਯੋ ਏਤਿਸ੍ਸਾਤਿ ਤਪ੍ਪਚ੍ਚਯਾ, ਤਪ੍ਪਚ੍ਚਯਾਯ ਭਾਵੋ ਤਪ੍ਪਚ੍ਚਯਭਾਵੋ, ਤਪ੍ਪਚ੍ਚਯਭਾਵੇਨ ਪਵਤ੍ਤੋ ਵੋਹਾਰੋ ਤਪ੍ਪਚ੍ਚਯਭਾਵਵੋਹਾਰੋ, ਤਂ ਲਭਤਿ. ਅਭਿਨਿਬ੍ਬਤ੍ਤਿਤਧਮ੍ਮਕ੍ਖਣਸ੍ਮਿਨ੍ਤਿ ਅਭਿਨਿਬ੍ਬਤ੍ਤਿਯਮਾਨਧਮ੍ਮਕ੍ਖਣਸ੍ਮਿਨ੍ਤਿ ਅਧਿਪ੍ਪਾਯੋ. ਨ ਹਿ ਤਦਾ ਤੇ ਧਮ੍ਮਾ ਨ ਜਾਯਨ੍ਤੀਤਿ ਜਾਯਮਾਨਭਾਵੋਵ ਜਾਤੀਤਿ ਯੁਤ੍ਤਾ ਤਸ੍ਸਾ ਕਮ੍ਮਾਦਿਸਮੁਟ੍ਠਾਨਤਾ ਤਂਨਿਬ੍ਬਤ੍ਤਤਾ ਚ, ਨ ਪਨ ਤਦਾ ਤੇ ਧਮ੍ਮਾ ਜੀਯਨ੍ਤਿ ਖੀਯਨ੍ਤਿ ਚ, ਤਸ੍ਮਾ ਨ ਤੇਸਂ ਤੇ ਜੀਰਣਭਿਜ੍ਜਨਭਾਵਾ ਚਿਤ੍ਤਾਦਿਸਮੁਟ੍ਠਾਨਾ ਤਂਨਿਬ੍ਬਤ੍ਤਾ ਚਾਤਿ ਵਚਨਂ ਅਰਹਨ੍ਤਿ. ਏਵਮਪਿ ਉਪਾਦਿਨ੍ਨ-ਸਦ੍ਦੋ ਉਪੇਤੇਨ ਕਮ੍ਮੁਨਾ ਆਦਿਨ੍ਨਤਂ ਵਦਤਿ, ਨ ਨਿਬ੍ਬਤ੍ਤਿਨ੍ਤਿ ਉਪਾਦਿਨ੍ਨਪਾਕਭੇਦਾਨਂ ਉਪਾਦਿਨ੍ਨਤਾ ਤੇਸਂ ਵਤ੍ਤਬ੍ਬਾਤਿ ਚੇ? ਨ, ਆਦਿਨ੍ਨ-ਸਦ੍ਦਸ੍ਸ ਨਿਬ੍ਬਤ੍ਤਿਵਾਚਕਤ੍ਤਾ. ਉਪੇਤੇਨ ਨਿਬ੍ਬਤ੍ਤਞ੍ਹਿ ਉਪਾਦਿਨ੍ਨਨ੍ਤਿ ਪਚ੍ਚਯਾਨੁਭਾਵਕ੍ਖਣਞ੍ਚ ਨਿਬ੍ਬਤ੍ਤਿਞ੍ਚ ਗਹੇਤ੍ਵਾਵ ਪਵਤ੍ਤੋ ਅਯਂ ਵੋਹਾਰੋ ਤਦਾ ਅਭਾਵਾ ਜਰਾਮਰਣੇ ਨ ਪਵਤ੍ਤਤੀਤਿ. ਪਟਿਚ੍ਚਸਮੁਪ੍ਪਨ੍ਨਾਨਂ ਧਮ੍ਮਾਨਂ ਜਰਾਮਰਣਤ੍ਤਾ ਤੇਸਂ ਉਪ੍ਪਾਦੇ ਸਤਿ ਜਰਾਮਰਣਂ ਹੋਤਿ, ਅਸਤਿ ਨ ਹੋਤਿ. ਨ ਹਿ ਅਜਾਤਂ ਪਰਿਪਚ੍ਚਤਿ ਭਿਜ੍ਜਤਿ ਵਾ, ਤਸ੍ਮਾ ਜਾਤਿਪਚ੍ਚਯਤਂ ਸਨ੍ਧਾਯ ‘‘ਜਰਾਮਰਣਂ ਪਟਿਚ੍ਚਸਮੁਪ੍ਪਨ੍ਨ’’ਨ੍ਤਿ ਵੁਤ੍ਤਂ.

ਨਿਸ੍ਸਯਪਟਿਬਦ੍ਧਵੁਤ੍ਤਿਤੋਤਿ ਜਾਯਮਾਨਪਰਿਪਚ੍ਚਮਾਨਭਿਜ੍ਜਮਾਨਾਨਂ ਜਾਯਮਾਨਾਦਿਭਾਵਮਤ੍ਤਤ੍ਤਾ ਜਾਯਮਾਨਾਦਿਨਿਸ੍ਸਯਪਟਿਬਦ੍ਧਵੁਤ੍ਤਿਕਾ ਜਾਤਿਆਦਯੋਤਿ ਵੁਤ੍ਤਂ ਹੋਤਿ. ਯਦਿ ਏਵਂ ਉਪਾਦਾਯਰੂਪਾਨਞ੍ਚ ਚਕ੍ਖਾਯਤਨਾਦੀਨਂ ਉਪ੍ਪਾਦਾਦਿਸਭਾਵਭੂਤਾ ਜਾਤਿਆਦਯੋ ਤਂਨਿਸ੍ਸਿਤਾ ਹੋਨ੍ਤੀਤਿ ਭੂਤਨਿਸ੍ਸਿਤਾਨਂ ਤੇਸਂ ਲਕ੍ਖਣਾਨਂ ਉਪਾਦਾਯਭਾਵੋ ਵਿਯ ਉਪਾਦਾਯਰੂਪਨਿਸ੍ਸਿਤਾਨਂ ਉਪਾਦਾਯੁਪਾਦਾਯਭਾਵੋ ਆਪਜ੍ਜਤੀਤਿ ਚੇ? ਨ, ਭੂਤਪਟਿਬਦ੍ਧਉਪਾਦਾਯਰੂਪਲਕ੍ਖਣਾਨਞ੍ਚ ਭੂਤਪਟਿਬਦ੍ਧਭਾਵਸ੍ਸ ਅਵਿਨਿਵਤ੍ਤਨਤੋ. ਅਪਿਚ ਏਕਕਲਾਪਪਰਿਯਾਪਨ੍ਨਾਨਂ ਰੂਪਾਨਂ ਸਹੇਵ ਉਪ੍ਪਾਦਾਦਿਪ੍ਪਵਤ੍ਤਿਤੋ ਏਕਸ੍ਸ ਕਲਾਪਸ੍ਸ ਉਪ੍ਪਾਦਾਦਯੋ ਏਕੇਕਾਵ ਹੋਨ੍ਤੀਤਿ ਯਥਾ ਏਕੇਕਸ੍ਸ ਕਲਾਪਸ੍ਸ ਜੀਵਿਤਿਨ੍ਦ੍ਰਿਯਂ ਕਲਾਪਾਨੁਪਾਲਕਂ ‘‘ਉਪਾਦਾਯਰੂਪ’’ਨ੍ਤਿ ਵੁਚ੍ਚਤਿ, ਏਵਂ ਕਲਾਪੁਪ੍ਪਾਦਾਦਿਸਭਾਵਾ ਜਾਤਿਆਦਯੋ ‘‘ਉਪਾਦਾਯਰੂਪਾਨਿ’’ਚ੍ਚੇਵ ਵੁਚ੍ਚਨ੍ਤਿ. ਏਵਂ ਵਿਕਾਰਪਰਿਚ੍ਛੇਦਰੂਪਾਨਿ ਚ ਯੋਜੇਤਬ੍ਬਾਨਿ.

ਕਮ੍ਮਸਮੁਟ੍ਠਾਨਸਮ੍ਬਨ੍ਧਂ ਉਤੁਸਮੁਟ੍ਠਾਨਂ ਕਮ੍ਮਵਿਸੇਸੇਨ ਸੁਵਣ੍ਣਦੁਬ੍ਬਣ੍ਣਸੁਸਣ੍ਠਿਤਦੁਸ੍ਸਣ੍ਠਿਤਾਦਿਵਿਸੇਸਂ ਹੋਤੀਤਿ ‘‘ਕਮ੍ਮਪਚ੍ਚਯ’’ਨ੍ਤਿ ਵੁਤ੍ਤਂ. ਕਮ੍ਮਵਿਪਾਕਾਨੁਭਵਨਸ੍ਸ ਕਾਰਣਭੂਤਂ ਬਾਹਿਰਉਤੁਸਮੁਟ੍ਠਾਨਂ ਕਮ੍ਮਪਚ੍ਚਯਉਤੁਸਮੁਟ੍ਠਾਨਂ. ਕਮ੍ਮਸਹਾਯੋ ਪਚ੍ਚਯੋ, ਕਮ੍ਮਸ੍ਸ ਵਾ ਸਹਾਯਭੂਤੋ ਪਚ੍ਚਯੋ ਕਮ੍ਮਪਚ੍ਚਯੋ, ਸੋਵ ਉਤੁ ਕਮ੍ਮਪਚ੍ਚਯਉਤੁ, ਸੋ ਸਮੁਟ੍ਠਾਨਂ ਏਤਸ੍ਸਾਤਿ ਕਮ੍ਮਪਚ੍ਚਯਉਤੁਸਮੁਟ੍ਠਾਨਨ੍ਤਿ ਵਚਨਤ੍ਥੋ. ਸੀਤੇ ਉਣ੍ਹੇ ਵਾ ਕਿਸ੍ਮਿਞ੍ਚਿ ਉਤੁਮ੍ਹਿ ਸਮਾਗਤੇ ਤਤੋ ਸੁਦ੍ਧਟ੍ਠਕਂ ਉਪ੍ਪਜ੍ਜਤਿ, ਤਸ੍ਸ ਸੋ ਉਤੁ ਸਮੁਟ੍ਠਾਨਂ. ਦੁਤਿਯਸ੍ਸ ਸੁਦ੍ਧਟ੍ਠਕਸ੍ਸ ਉਤੁਸਮੁਟ੍ਠਾਨਿਕਪਟਿਬਨ੍ਧਕਸ੍ਸ ਸੋ ਏਵ ਪੁਰਿਮੋ ਉਤੁ ਪਚ੍ਚਯੋ. ਤਤਿਯਂ ਪਨ ਸੁਦ੍ਧਟ੍ਠਕਂ ਪੁਰਿਮਉਤੁਸਹਾਯੇਨ ਉਤੁਨਾ ਨਿਬ੍ਬਤ੍ਤਤ੍ਤਾ ਪੁਬ੍ਬੇ ਵੁਤ੍ਤਨਯੇਨੇਵ ‘‘ਉਤੁਪਚ੍ਚਯਉਤੁਸਮੁਟ੍ਠਾਨ’’ਨ੍ਤਿ ਵੁਤ੍ਤਂ. ਏਵਮਯਂ ਪੁਰਿਮੋ ਉਤੁ ਤਿਸ੍ਸੋ ਸਨ੍ਤਤਿਯੋ ਘਟ੍ਟੇਤਿ, ਤਤੋ ਪਰਂ ਅਞ੍ਞਉਤੁਸਮਾਗਮੇ ਅਞ੍ਞਸਨ੍ਤਤਿਤ੍ਤਯਂ, ਤਤੋ ਚ ਅਞ੍ਞੇਨ ਅਞ੍ਞਨ੍ਤਿ ਏਵਂ ਪਵਤ੍ਤਿ ਦਟ੍ਠਬ੍ਬਾ. ਤਦੇਤਂ ਸੀਤੁਣ੍ਹਾਨਂ ਅਪ੍ਪਬਹੁਭਾਵੇ ਤਂਸਮ੍ਫਸ੍ਸਸ੍ਸ ਅਚਿਰਪ੍ਪਵਤ੍ਤਿਯਾ ਚਿਰਪ੍ਪਵਤ੍ਤਿਯਾ ਚ ਵੇਦਿਤਬ੍ਬਂ, ਅਨੁਪਾਦਿਨ੍ਨੇਨ ਦੀਪਨਾ ਨ ਸਨ੍ਤਤਿਤ੍ਤਯਵਸੇਨ, ਅਥ ਖੋ ਮੇਘਸਮੁਟ੍ਠਾਪਕਮੂਲਉਤੁਵਸੇਨ ਪਕਾਰਨ੍ਤਰੇਨ ਦਟ੍ਠਬ੍ਬਾ, ਤਂ ਦਸ੍ਸੇਤੁਂ ‘‘ਉਤੁਸਮੁਟ੍ਠਾਨੋ ਨਾਮ ਵਲਾਹਕੋ’’ਤਿਆਦਿਮਾਹ. ਰੂਪਰੂਪਾਨਂ ਵਿਕਾਰਾਦਿਮਤ੍ਤਭਾਵਤੋ ਅਪਰਿਨਿਪ੍ਫਨ੍ਨਤਾ ਵੁਤ੍ਤਾ. ਤੇਸਞ੍ਹਿ ਰੂਪਵਿਕਾਰਾਦਿਭਾਵਤੋ ਰੂਪਤਾਤਿ ਅਧਿਪ੍ਪਾਯੋ. ਰੂਪਵਿਕਾਰਾਦਿਭਾਵਤੋ ਏਵ ਪਨ ਰੂਪੇ ਸਤਿ ਸਨ੍ਤਿ, ਅਸਤਿ ਨ ਸਨ੍ਤੀਤਿ ਅਸਙ੍ਖਤਭਾਵਨਿਵਾਰਣਤ੍ਥਂ ਪਰਿਨਿਪ੍ਫਨ੍ਨਤਾ ਵੁਤ੍ਤਾਤਿ.

ਰੂਪਕਣ੍ਡਵਣ੍ਣਨਾ ਨਿਟ੍ਠਿਤਾ.