੩. ਨਿਕ੍ਖੇਪਕਣ੍ਡਂ

ਤਿਕਨਿਕ੍ਖੇਪਕਥਾਵਣ੍ਣਨਾ

੯੮੫. ਸਬ੍ਬੇਸਨ੍ਤਿ ਚਿਤ੍ਤੁਪ੍ਪਾਦਵਸੇਨ ਰੂਪਾਸਙ੍ਖਤਵਸੇਨ ਚ ਭਿਨ੍ਨਾਨਂ ਸਬ੍ਬੇਸਂ ਫਸ੍ਸਾਦਿਚਕ੍ਖਾਦਿਪਦਭਾਜਨਨਯੇਨ ਵਿਤ੍ਥਾਰਿਤੋ. ਤਤ੍ਥ ਪਨ ਅਸਙ੍ਖਤਸ੍ਸ ਭੇਦਾਭਾਵਤੋ ਅਸਙ੍ਖਤਾ ਧਾਤੂਤ੍ਵੇਵ ਪਦਭਾਜਨਂ ਦਟ੍ਠਬ੍ਬਂ. ਯੇਵਾਪਨਕਾਨਂ ਪਨ ਸੁਖੁਮੁਪਾਦਾਯਰੂਪਸ੍ਸ ਚ ਇਨ੍ਦ੍ਰਿਯਵਿਕਾਰਪਰਿਚ੍ਛੇਦਲਕ੍ਖਣਰੂਪੁਪਤ੍ਥਮ੍ਭਕਭਾਵਰਹਿਤਸ੍ਸ ਹਦਯਵਤ੍ਥੁਸ੍ਸ ਪਦੁਦ੍ਧਾਰੇਨ ਇਧ ਨਿਦ੍ਦੇਸਾਨਰਹਤ੍ਤਾ ਨਿਦ੍ਦੇਸੋ ਨ ਕਤੋਤਿ ਦਟ੍ਠਬ੍ਬੋ. ਨ ਹਿ ਤਥਾਗਤਸ੍ਸ ਧਮ੍ਮੇਸੁ ਆਚਰਿਯਮੁਟ੍ਠਿ ਅਤ੍ਥੀਤਿ. ਨਿਕ੍ਖਿਪਿਤ੍ਵਾਤਿ ਵਿਤ੍ਥਾਰਦੇਸਨਂ ਠਪੇਤ੍ਵਾ, ਅਪਨੇਤ੍ਵਾਤਿ ਅਤ੍ਥੋ, ਵਿਤ੍ਥਾਰਦੇਸਨਂ ਅਨ੍ਤੋਗਧਂ ਕਤ੍ਵਾਤਿ ਵਾ. ਗਾਥਾਤ੍ਥੋ ਨਿਦਾਨੇ ਵੁਤ੍ਤੋ ਏਵ.

ਮੂਲਵਸੇਨ ਪਚ੍ਚਯਭਾਵੋ ਹੇਤੁਪਚ੍ਚਯਤ੍ਥੋ. ਪਭਵਤਿ ਏਤਸ੍ਮਾਤਿ ਪਭਵੋ, ਸੋ ਏਵ ‘‘ਜਨਕੋ’’ਤਿ ਵਿਸੇਸਿਤੋ. ਸਮੁਟ੍ਠਾਤਿ ਏਤੇਨਾਤਿ ਸਮੁਟ੍ਠਾਨਂ, ਤਸ੍ਸ ਵਿਸੇਸਨਂ ਨਿਬ੍ਬਤ੍ਤਕਨ੍ਤਿ. ਸਬ੍ਬਾਨਿ ਵਾ ਏਤਾਨਿ ਪਰਿਯਾਯਵਚਨਾਨਿ. ਅਤ੍ਥਵਸੇਨਾਤਿ ਕਸ੍ਮਾ ਵੁਤ੍ਤਂ, ਨਨੁ ਕੁਸਲਮੂਲਾਨਂ ਹੇਤੁਭਾਵਤੋ ਧਮ੍ਮਵਸੇਨਾਤਿ ਯੁਤ੍ਤਨ੍ਤਿ? ਸਚ੍ਚਮੇਤਂ, ਅਲੋਭਾਦੀਨਂ ਪਨ ਤਿਣ੍ਣਂ ਸਮਾਨਸ੍ਸ ਮੂਲਟ੍ਠਸ੍ਸ ਵਸੇਨ ਦਸ੍ਸਿਤਤਂ ਸਨ੍ਧਾਯ ‘‘ਅਤ੍ਥਵਸੇਨਾ’’ਤਿ ਵੁਤ੍ਤਂ. ਇਮਿਨਾ ਧਮ੍ਮੋਤਿ ਭਾਵੋ, ਅਤ੍ਥੋਤਿ ਧਮ੍ਮਕਿਚ੍ਚਂ ਅਧਿਪ੍ਪੇਤਨ੍ਤਿ ਵਿਞ੍ਞਾਯਤਿ. ‘‘ਅਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾ’’ਤਿਆਦਿਵਚਨਤੋ (ਅ. ਨਿ. ੩.੩੪) ਤਾਨਿ ਕੁਸਲਮੂਲਾਨਿ ਸਮੁਟ੍ਠਾਨਂ ਏਤਸ੍ਸਾਤਿਪਿ ਤਂਸਮੁਟ੍ਠਾਨਂ. ਤਂ ਪਨ ਤੇਹਿ ਸਮੁਟ੍ਠਿਤਂ ਹੋਤੀਤਿ ‘‘ਅਲੋਭਾਦੀਹਿ ਸਮੁਟ੍ਠਿਤ’’ਨ੍ਤਿ ਆਹ. ਤੇ ਕੁਸਲਮੂਲਤਂਸਮ੍ਪਯੁਤ੍ਤਾ ਸਮੁਟ੍ਠਾਨਂ ਏਤਸ੍ਸਾਤਿਪਿ ਅਤ੍ਥੋ ਸਮ੍ਭਵਤਿ. ਏਤ੍ਥ ਪਨ ਚੇਤਨਂ ਠਪੇਤ੍ਵਾ ਅਞ੍ਞੇ ‘‘ਤਂਸਮ੍ਪਯੁਤ੍ਤਾ’’ਤਿ ਸਮੁਟ੍ਠਾਨਭਾਵੇ ਵਤ੍ਤਬ੍ਬਾ. ਤਤ੍ਥ ਮੂਲੇਹਿ ਅਤ੍ਤਨੋ ਪਚ੍ਚਯਤੋ ਕੁਸਲੇ ਪਰਿਯਾਦਿਯਤਿ, ਖਨ੍ਧੇਹਿ ਸਭਾਵਤੋ, ਕਮ੍ਮੇਹਿ ਅਞ੍ਞਸ੍ਸ ਨਿਬ੍ਬਤ੍ਤਨਕਿਚ੍ਚਤੋ. ਮੂਲੇਹਿ ਚ ਕੁਸਲਾਨਂ ਅਨਵਜ੍ਜਤਾਯ ਹੇਤੁਂ ਦਸ੍ਸੇਤਿ, ਖਨ੍ਧੇਹਿ ਤਂਸਮ੍ਪਯੋਗਕਤਂ ਅਨਵਜ੍ਜਸਭਾਵਂ, ਕਮ੍ਮੇਹਿ ਸੁਖਵਿਪਾਕਤਂ. ਮੂਲੇਹਿ ਵਾ ਨਿਦਾਨਸਮ੍ਪਤ੍ਤਿਯਾ ਆਦਿਕਲ੍ਯਾਣਤਂ, ਖਨ੍ਧੇਹਿ ਸਭਾਵਸਮ੍ਪਤ੍ਤਿਯਾ ਮਜ੍ਝੇਕਲ੍ਯਾਣਤਂ, ਕਮ੍ਮੇਹਿ ਨਿਬ੍ਬਤ੍ਤਿਸਮ੍ਪਤ੍ਤਿਯਾ ਪਰਿਯੋਸਾਨਕਲ੍ਯਾਣਤਂ.

੯੮੬. ਤਂ …ਪੇ… ਉਦ੍ਧਂ ਅਕੁਸਲਂ ਨਾਮ ਨਤ੍ਥੀਤਿ ਕਸ੍ਮਾ ਵੁਤ੍ਤਂ, ਨਨੁ ਵਿਚਿਕਿਚ੍ਛੁਦ੍ਧਚ੍ਚਸਹਗਤਮੋਹੋ ਅਤ੍ਥੀਤਿ? ਸਚ੍ਚਮੇਤਂ, ਤੇਨ ਪਨ ਵਿਨਾ ਤਂਸਮ੍ਪਯੁਤ੍ਤਤਾ ਨਤ੍ਥੀਤਿ ਤਂਸਮ੍ਪਯੁਤ੍ਤੇਸੁ ਗਹਿਤੇਸੁ ਮੋਹੋ ਗਹਿਤੋ ਏਵਾਤਿ ਕਤ੍ਵਾ ‘‘ਤਤੋ ਉਦ੍ਧਂ ਨਤ੍ਥੀ’’ਤਿ ਵੁਤ੍ਤਂ ਅਞ੍ਞਤ੍ਥ ਅਭਾਵਾ. ਏਕਸ੍ਮਿਂ ਠਿਤਂ ਏਕਟ੍ਠਂ, ਸਹਜਭਾਵੇਨ ਏਕਟ੍ਠਂ ਸਹਜੇਕਟ੍ਠਂ. ਪਹਾਤਬ੍ਬਨ੍ਤਿ ਪਹਾਨਂ, ਪਹਾਨਭਾਵੇਨ ਏਕਟ੍ਠਂ ਪਹਾਨੇਕਟ੍ਠਂ. ਯੇਨ ਹਿ ਯਂ ਸਹ ਪਹਾਤਬ੍ਬਂ, ਤੇਨ ਤਂ ਏਕਸ੍ਮਿਂ ਪੁਗ੍ਗਲੇ ਠਿਤਂ ਹੋਤਿ, ਏਕਸ੍ਮਿਂ ਸਮੁਚ੍ਛਿਨ੍ਨੇ ਅਸਮੁਚ੍ਛਿਨ੍ਨੇ ਚ ਇਤਰਸ੍ਸ ਸਮੁਚ੍ਛਿਨ੍ਨਤਾਯ ਅਸਮੁਚ੍ਛਿਨ੍ਨਤਾਯ ਚ ਵਸੇਨ ਅਞ੍ਞਮਞ੍ਞਾਵਿਰਹਿਤਤੋ.

੯੮੭. ਤੀਣਿ ਲਕ੍ਖਣਾਨੀਤਿ ਅਨਿਚ੍ਚਦੁਕ੍ਖਅਨਤ੍ਤਤਾ. ਨਾਮਕਸਿਣਸਤ੍ਤਪਞ੍ਞਤ੍ਤਿਯੋ ਤਿਸ੍ਸੋ ਪਞ੍ਞਤ੍ਤਿਯੋ. ਪਰਮਤ੍ਥੇ ਅਮੁਞ੍ਚਿਤ੍ਵਾ ਵੋਹਰਿਯਮਾਨਾ ਵਿਹਾਰਮਞ੍ਚਾਦਿਕਾ ਉਪਾਦਾਪਞ੍ਞਤ੍ਤਿ ਸਤ੍ਤਪਞ੍ਞਤ੍ਤਿਗ੍ਗਹਣੇਨ ਗਹਿਤਾਤਿ ਵੇਦਿਤਬ੍ਬਾ, ਏਤਾਨਿ ਚ ਲਕ੍ਖਣਾਦੀਨਿ ਹੇਟ੍ਠਾ ਦ੍ਵੀਸੁ ਕਣ੍ਡੇਸੁ ਵਿਞ੍ਞਤ੍ਤਿਆਦੀਨਿ ਵਿਯ ਨ ਵੁਤ੍ਤਾਨਿ, ਨ ਚ ਸਭਾਵਧਮ੍ਮਾਤਿ ਕਤ੍ਵਾ ਨ ਲਬ੍ਭਨ੍ਤੀਤਿ ਵੁਤ੍ਤਾਨਿ. ਨ ਹਿ ਕੋਚਿ ਸਭਾਵੋ ਕੁਸਲਤ੍ਤਿਕਾਸਙ੍ਗਹਿਤੋਤਿ ਵਤ੍ਤੁਂ ਯੁਤ੍ਤਨ੍ਤਿ.

੯੮੮. ਸੁਖਭੂਮੀਤਿ ਕਾਮਾਵਚਰਾਦਯੋਪਿ ਯੁਜ੍ਜਨ੍ਤਿ. ਸੁਖਸਹਗਤਾ ਹਿ ਕਾਮਾਵਚਰਾਦਿਭੂਮਿ ਸੁਖਭੂਮਿ. ਕਾਮਾਵਚਰਾਦਿਭੂਮੀਤਿ ਚ ਕਾਮਾਵਚਰਾਦਿਤਾਯ ਧਮ੍ਮਾ ਏਵ ਵੁਚ੍ਚਨ੍ਤੀਤਿ ਕਾਮਾਵਚਰਾਦਿਚਿਤ੍ਤੁਪ੍ਪਾਦੇਸੂਤਿ ਅਤ੍ਥਤੋ ਵਿਞ੍ਞਾਯਤਿ. ਏਵਞ੍ਚ ਕਤ੍ਵਾ ‘‘ਸੁਖਭੂਮਿਯ’’ਨ੍ਤਿ ਵਤ੍ਵਾ ਤਸ੍ਸਾ ਏਵ ਵਿਭਾਗਦਸ੍ਸਨਤ੍ਥਂ ‘‘ਕਾਮਾਵਚਰੇ’’ਤਿਆਦਿ ਵੁਤ੍ਤਂ. ਭੂਮਿ-ਸਦ੍ਦੋ ਚ ਅਭਿਧਮ੍ਮੇ ਕਾਮਾਵਚਰਾਦੀਸੁ ਨਿਰੁਲ਼੍ਹੋਤਿ ‘‘ਚਤੂਸੁ ਭੂਮੀਸੁ ਕੁਸਲ’’ਨ੍ਤਿਆਦੀਸੁ (ਧ. ਸ. ੧੩੮੪) ਅਞ੍ਞਭੂਮਿਗ੍ਗਹਣਂ ਨ ਹੋਤੀਤਿ. ਪਾਲ਼ਿਤੋ ਚਾਤਿ ‘‘ਵਿਸਿਟ੍ਠਾਨਂ ਪਾਕਾਤਿ ਵਿਪਾਕਾ’’ਤਿਆਦਿਵਚਨਤ੍ਥਵਿਭਾਵਨੇਨ ਪਾਲ਼ਿਤੋ. ‘‘ਵਿਪਕ੍ਕਭਾਵਮਾਪਨ੍ਨਾਨਂ ਅਰੂਪਧਮ੍ਮਾਨਮੇਤਂ ਅਧਿਵਚਨ’’ਨ੍ਤਿਆਦਿਨਾ ਭਾਸਿਤਤ੍ਥਵਿਭਾਵਨੇਨ ਅਤ੍ਥਤੋ ਚ. ਨਾਮਪਰਿਚ੍ਛੇਦਾਦੀਹਿ ਤਿਕਦੁਕਾਨਂ ਵਵਤ੍ਥਾਨਦਸ੍ਸਨੇਨ ਵਾ ਪਾਲ਼ਿਤੋ, ਤਦਤ੍ਥਵਿਞ੍ਞਾਪਨੇਨ ਅਤ੍ਥਤੋ.

੯੯੧. ਸਾਲਿਫਲਨ੍ਤਿ ਸਾਲਿਪਾਕਮਾਹ.

੯੯੪. ਅਮ੍ਹਾਕਂ ਮਾਤੁਲਤ੍ਥੇਰੋਤਿ ਪੁਗ੍ਗਲਾਰਮ੍ਮਣਸ੍ਸਪਿ ਉਪਾਦਾਨਸ੍ਸ ਉਪਾਦਾਨਕ੍ਖਨ੍ਧਾ ਏਵ ਪਚ੍ਚਯੋ, ਨ ਲੋਕੁਤ੍ਤਰਾ, ਕੋ ਪਨ ਵਾਦੋ ਖਨ੍ਧਾਰਮ੍ਮਣਸ੍ਸ. ਤੇਨਾਹ ‘‘ਅਗ੍ਗਹਿਤਾਨੀ’’ਤਿ.

੯੯੮. ਯਥਾ ਉਪਾਦਾਨੇਹਿ ਅਗ੍ਗਹੇਤਬ੍ਬਾ ਅਨੁਪਾਦਾਨਿਯਾ, ਏਵਂ ਸਂਕਿਲੇਸੇਹਿ ਅਗ੍ਗਹੇਤਬ੍ਬਾ ਅਸਂਕਿਲੇਸਿਕਾਤਿ ਕਤ੍ਵਾ ‘‘ਅਸਂ…ਪੇ… ਏਸੇਵ ਨਯੋ’’ਤਿ ਆਹ.

੧੦੦੬. ਦਿਟ੍ਠਿਯਾ ਗਹਿਤੋ ਅਤ੍ਤਾ ਨ ਵਿਜ੍ਜਤਿ. ਯੇਸੁ ਪਨ ਵਿਪਲ੍ਲਤ੍ਥਗਾਹੋ, ਤੇ ਉਪਾਦਾਨਕ੍ਖਨ੍ਧਾਵ ਵਿਜ੍ਜਨ੍ਤਿ. ਤਸ੍ਮਾ ਯਸ੍ਮਿਂ ਅਵਿਜ੍ਜਮਾਨਨਿਚ੍ਚਾਦਿਵਿਪਰਿਯਾਸਾਕਾਰਗਹਣਂ ਅਤ੍ਥਿ, ਸੋਵ ਉਪਾਦਾਨਕ੍ਖਨ੍ਧਪਞ੍ਚਕਸਙ੍ਖਾਤੋ ਕਾਯੋ. ਤਤ੍ਥ ਨਿਚ੍ਚਾਦਿਆਕਾਰਸ੍ਸ ਅਵਿਜ੍ਜਮਾਨਤਾਦਸ੍ਸਨਤ੍ਥਂ ਰੁਪ੍ਪਨਾਦਿਸਭਾਵਸ੍ਸੇਵ ਚ ਵਿਜ੍ਜਮਾਨਤਾਦਸ੍ਸਨਤ੍ਥਂ ਵਿਜ੍ਜਮਾਨੋ ਕਾਯੋਤਿ ਵਿਸੇਸੇਤ੍ਵਾ ਵੁਤ੍ਤੋ, ਲੋਕੁਤ੍ਤਰਾ ਪਨ ਨ ਕਦਾਚਿ ਅਵਿਜ੍ਜਮਾਨਾਕਾਰੇਨ ਗਯ੍ਹਨ੍ਤੀਤਿ ਨ ਇਦਂ ਵਿਸੇਸਨਂ ਅਰਹਨ੍ਤਿ. ਸਕ੍ਕਾਯੇ ਦਿਟ੍ਠਿ, ਸਤੀ ਵਾ ਕਾਯੇ ਦਿਟ੍ਠਿ ਸਕ੍ਕਾਯਦਿਟ੍ਠਿ. ਅਤ੍ਤਨਾ ਗਹਿਤਾਕਾਰਸ੍ਸ ਅਵਿਜ੍ਜਮਾਨਤਾਯ ਸਯਮੇਵ ਸਤੀ, ਨ ਤਾਯ ਗਹਿਤੋ ਅਤ੍ਤਾ ਅਤ੍ਤਨਿਯਂ ਵਾਤਿ ਅਤ੍ਥੋ. ਅਯਂ ਪਨਤ੍ਥੋ ਸਮ੍ਭਵਤੀਤਿ ਕਤ੍ਵਾ ਵੁਤ੍ਤੋ, ਪੁਰਿਮੋ ਏਵ ਪਨ ਪਧਾਨੋ. ਦੁਤਿਯੇ ਹਿ ਦਿਟ੍ਠਿਯਾ ਵਤ੍ਥੁ ਅਵਿਸੇਸਿਤਂ ਹੋਤਿ. ਕਾਯੋਤਿ ਹਿ ਖਨ੍ਧਪਞ੍ਚਕੇ ਵੁਚ੍ਚਮਾਨੇ ਲੋਕੁਤ੍ਤਰਾਪਨਯਨਂ ਨਤ੍ਥਿ. ਨ ਹਿ ਲੋਕੁਤ੍ਤਰੇਸੁ ਕਾਯ-ਸਦ੍ਦੋ ਨ ਵਤ੍ਤਤਿ. ਕਾਯਪਸ੍ਸਦ੍ਧਿਆਦੀਸੁ ਹਿ ਲੋਕੁਤ੍ਤਰੇਸੁ ਕਾਯ-ਸਦ੍ਦੋਪਿ ਲੋਕੁਤ੍ਤਰਕ੍ਖਨ੍ਧਵਾਚਕੋਤਿ. ਸੀਲੇਨਾਤਿ ਸੁਦ੍ਧਿਯਾ ਅਹੇਤੁਭੂਤੇਨ ਸੀਲੇਨ. ਗਹਿਤਸਮਾਦਾਨਨ੍ਤਿ ਉਪ੍ਪਾਦਿਤਪਰਾਮਾਸੋਵ. ਸੋ ਹਿ ਸਮਾਦਿਯਨ੍ਤਿ ਏਤੇਨ ਕੁਕ੍ਕੁਰਸੀਲਵਤਾਦੀਨੀਤਿ ‘‘ਸਮਾਦਾਨ’’ਨ੍ਤਿ ਵੁਤ੍ਤੋ. ਤਤ੍ਥ ਅਵੀਤਿਕ੍ਕਮਨੀਯਤਾਯ ਸੀਲਂ, ਭਤ੍ਤਿਵਸੇਨ ਸਤਤਂ ਚਰਿਤਬ੍ਬਤਾਯ ਵਤਂ ਦਟ੍ਠਬ੍ਬਂ.

੧੦੦੭. ਇਧੇਵ ਤਿਟ੍ਠਮਾਨਸ੍ਸਾਤਿ ਇਮਿਸ੍ਸਾਯੇਵ ਇਨ੍ਦਸਾਲਗੁਹਾਯਂ ਤਿਟ੍ਠਮਾਨਸ੍ਸ. ਵਾਚੁਗ੍ਗਤਕਰਣਂ ਉਗ੍ਗਹੋ. ਅਤ੍ਥਪਰਿਪੁਚ੍ਛਨਂ ਪਰਿਪੁਚ੍ਛਾ. ਕੁਸਲੇਹਿ ਸਹ ਚੋਦਨਾਪਰਿਹਰਣਵਸੇਨ ਵਿਨਿਚ੍ਛਯਕਰਣਂ ਵਿਨਿਚ੍ਛਯੋ. ਬਹੂਨਂ ਨਾਨਪ੍ਪਕਾਰਾਨਂ ਸਕ੍ਕਾਯਦਿਟ੍ਠੀਨਂ ਅਵਿਹਤਤ੍ਤਾ ਤਾ ਜਨੇਨ੍ਤਿ, ਤਾਹਿ ਜਨਿਤਾਤਿ ਵਾ ਪੁਥੁਜ੍ਜਨਾ. ਅਵਿਘਾਤਮੇਵ ਵਾ ਜਨ-ਸਦ੍ਦੋ ਵਦਤਿ. ਪੁਥੁ ਸਤ੍ਥਾਰਾਨਂ ਮੁਖੁਲ੍ਲੋਕਿਕਾਤਿ ਏਤ੍ਥ ਪੁਥੂ ਜਨਾ ਏਤੇਸਨ੍ਤਿ ਪੁਥੁਜ੍ਜਨਾਤਿ ਵਚਨਤ੍ਥੋ. ਪੁਥੁ…ਪੇ… ਅਵੁਟ੍ਠਿਤਾਤਿ ਏਤ੍ਥ ਜਨੇਤਬ੍ਬਾ, ਜਾਯਨ੍ਤਿ ਵਾ ਏਤ੍ਥਾਤਿ ਜਨਾ, ਗਤਿਯੋ. ਪੁਥੂ ਜਨਾ ਏਤੇਸਨ੍ਤਿ ਪੁਥੁਜ੍ਜਨਾ. ਇਤੋ ਪਰੇ ਜਾਯਨ੍ਤਿ ਏਤੇਹੀਤਿ ਜਨਾ, ਅਭਿਸਙ੍ਖਾਰਾਦਯੋ. ਤੇ ਏਤੇਸਂ ਪੁਥੂ ਵਿਜ੍ਜਨ੍ਤੀਤਿ ਪੁਥੁਜ੍ਜਨਾ. ਅਭਿਸਙ੍ਖਰਣਾਦਿਅਤ੍ਥੋ ਏਵ ਵਾ ਜਨ-ਸਦ੍ਦੋ ਦਟ੍ਠਬ੍ਬੋ. ਰਾਗਗ੍ਗਿਆਦਯੋ ਸਨ੍ਤਾਪਾ. ਤੇ ਏਵ ਸਬ੍ਬੇਪਿ ਵਾ ਕਿਲੇਸਾ ਪਰਿਲ਼ਾਹਾ. ਪੁਥੁ ਪਞ੍ਚਸੁ ਕਾਮਗੁਣੇਸੂਤਿ ਏਤ੍ਥ ਜਾਯਤੀਤਿ ਜਨੋ, ‘‘ਰਾਗੋ ਗੇਧੋ’’ਤਿ ਏਵਮਾਦਿਕੋ. ਪੁਥੁ ਜਨੋ ਏਤੇਸਨ੍ਤਿ ਪੁਥੁਜ੍ਜਨਾ. ਪੁਥੂਸੁ ਵਾ ਜਨਾ ਜਾਤਾ ਰਤ੍ਤਾਤਿ ਏਵਂ ਰਾਗਾਦਿਅਤ੍ਥੋ ਏਵ ਜਨ-ਸਦ੍ਦੋ ਦਟ੍ਠਬ੍ਬੋ. ਪਲਿਬੁਦ੍ਧਾਤਿ ਸਮ੍ਬਦ੍ਧਾ ਉਪਦ੍ਦੁਤਾ ਵਾ. ਅਸ੍ਸੁਤਵਾਤਿ ਏਤੇਨ ਅਨ੍ਧਤਾ ਵੁਤ੍ਤਾਤਿ ‘‘ਅਨ੍ਧਪੁਥੁਜ੍ਜਨੋ ਵੁਤ੍ਤੋ’’ਤਿ ਆਹ.

ਅਨਯੇਤਿ ਅਵਡ੍ਢਿਯਂ. ਸਬ੍ਬਤ੍ਥ ਨਿਰੁਤ੍ਤਿਲਕ੍ਖਣੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਅਨੇਕੇਸੁ ਚ ਕਪ੍ਪਸਤਸਹਸ੍ਸੇਸੁ ਕਤਂ ਜਾਨਨ੍ਤਿ, ਪਾਕਟਞ੍ਚ ਕਰੋਨ੍ਤਿ ਉਪਕਾਰਂ ਸਤਿਜਨਨਆਮਿਸਪਟਿਗ੍ਗਹਣਾਦਿਨਾ ਪਚ੍ਚੇਕਸਮ੍ਬੁਦ੍ਧਾ, ਤਥੇਵ ਦੁਕ੍ਖਿਤਸ੍ਸ ਸਕ੍ਕਚ੍ਚਂ ਕਾਤਬ੍ਬਂ ਕਰੋਨ੍ਤਿ. ਸਮ੍ਮਾਸਮ੍ਬੁਦ੍ਧੋ ਪਨ ਅਸਙ੍ਖ੍ਯੇਯ੍ਯਅਪ੍ਪਮੇਯ੍ਯੇਸੁਪਿ ਕਤਂ ਉਪਕਾਰਂ ਮਗ੍ਗਫਲਾਨਂ ਉਪਨਿਸ੍ਸਯਞ੍ਚ ਜਾਨਾਤਿ, ਪਾਕਟਞ੍ਚ ਕਰੋਤਿ, ਸੀਹੋ ਵਿਯ ਚ ਜਵਂ ਸਬ੍ਬਤ੍ਥ ਸਕ੍ਕਚ੍ਚਮੇਵ ਧਮ੍ਮਦੇਸਨਂ ਕਰੋਤਿ. ਅਰਿਯਭਾਵੋਤਿ ਯੇਹਿ ਯੋਗਤੋ ਅਰਿਯਾ ਵੁਚ੍ਚਨ੍ਤਿ, ਤੇ ਮਗ੍ਗਫਲਧਮ੍ਮਾ ਦਟ੍ਠਬ੍ਬਾ. ਅਰਿਯਕਰਧਮ੍ਮਾ ਅਨਿਚ੍ਚਦਸ੍ਸਨਾਦਯੋ, ਵਿਪਸ੍ਸਿਯਮਾਨਾ ਵਾ ਅਨਿਚ੍ਚਾਦਯੋ.

ਸੋਤਾਨੀਤਿ ਤਣ੍ਹਾਦਿਟ੍ਠਿਕਿਲੇਸਦੁਚ੍ਚਰਿਤਅਵਿਜ੍ਜਾਸੋਤਾਨਿ. ‘‘ਸੋਤਾਨਂ ਸਂਵਰਂ ਬ੍ਰੂਮੀ’’ਤਿ ਵਤ੍ਵਾ ‘‘ਪਞ੍ਞਾਯੇਤੇ ਪਿਧੀਯਰੇ’’ਤਿ ਵਚਨੇਨ ਸੋਤਾਨਂ ਸਂਵਰੋ ਪਿਦਹਨਂ ਸਮੁਚ੍ਛੇਦਞਾਣਨ੍ਤਿ ਵਿਞ੍ਞਾਯਤਿ. ਖਨ੍ਤੀਤਿ ਅਧਿਵਾਸਨਾ, ਸਾ ਚ ਤਥਾਪਵਤ੍ਤਾ ਖਨ੍ਧਾ. ਪਞ੍ਞਾਤਿ ਏਕੇ, ਅਦੋਸੋ ਏਵ ਵਾ. ਕਾਯਦੁਚ੍ਚਰਿਤਾਦੀਨਨ੍ਤਿ ਦੁਸ੍ਸੀਲ੍ਯਸਙ੍ਖਾਤਾਨਂ ਕਾਯਵਚੀਦੁਚ੍ਚਰਿਤਾਨਂ ਮੁਟ੍ਠਸ੍ਸਚ੍ਚਸਙ੍ਖਾਤਸ੍ਸ ਪਮਾਦਸ੍ਸ ਅਭਿਜ੍ਝਾਦੋਮਨਸ੍ਸਾਨਂ ਪਾਪਕਾਨਂ ਅਕ੍ਖਨ੍ਤਿਅਞ੍ਞਾਣਕੋਸਜ੍ਜਾਨਞ੍ਚ. ਅਨੁਪੇਕ੍ਖਾ ਸਙ੍ਖਾਰੇਹਿ ਅਵਿਵਟ੍ਟਨਂ, ਸਾਲਯਤਾਤਿ ਅਤ੍ਥੋ. ਧਮ੍ਮਟ੍ਠਿਤਿਯਂ ਪਟਿਚ੍ਚਸਮੁਪ੍ਪਾਦੇ ਪਟਿਲੋਮਭਾਵੋ ਸਸ੍ਸਤੁਚ੍ਛੇਦਗਾਹੋ, ਤਪ੍ਪਟਿਚ੍ਛਾਦਕਮੋਹੋ ਵਾ. ਨਿਬ੍ਬਾਨੇ ਪਟਿਲੋਮਭਾਵੋ ਸਙ੍ਖਾਰੇਸੁ ਰਤਿ, ਨਿਬ੍ਬਾਨਪਟਿਚ੍ਛਾਦਕੋ ਮੋਹੋ ਵਾ. ਸਙ੍ਖਾਰਨਿਮਿਤ੍ਤਗ੍ਗਾਹੋਤਿ ਯਾਦਿਸਸ੍ਸ ਕਿਲੇਸਸ੍ਸ ਅਪ੍ਪਹੀਨਤ੍ਤਾ ਵਿਪਸ੍ਸਨਾ ਸਙ੍ਖਾਰਨਿਮਿਤ੍ਤਂ ਨ ਮੁਞ੍ਚਤਿ, ਸੋ ਕਿਲੇਸੋ ਦਟ੍ਠਬ੍ਬੋ. ਸਙ੍ਖਾਰਨਿਮਿਤ੍ਤਗ੍ਗਹਣਸ੍ਸ ਅਤਿਕ੍ਕਮਨਂ ਵਾ ਪਹਾਨਂ.

ਚਤੁਨ੍ਨਂ ਅਰਿਯਮਗ੍ਗਾਨਂ ਭਾਵਿਤਤ੍ਤਾ ਅਚ੍ਚਨ੍ਤਂ ਅਪ੍ਪਵਤ੍ਤਿਭਾਵੇਨ ਯਂ ਪਹਾਨਨ੍ਤਿ ਯੋਜਨਾ ਵੇਦਿਤਬ੍ਬਾ. ਕੇਨ ਪਨ ਪਹਾਨਨ੍ਤਿ? ਅਰਿਯਮਗ੍ਗੇਹੇਵਾਤਿ ਵਿਞ੍ਞਾਯਮਾਨੋ ਅਯਮਤ੍ਥੋ ਤੇਸਂ ਭਾਵਿਤਤ੍ਤਾ ਅਪ੍ਪਵਤ੍ਤਿਵਚਨੇਨ. ਸਮੁਦਯਪਕ੍ਖਿਕਸ੍ਸਾਤਿ ਏਤ੍ਥ ਚਤ੍ਤਾਰੋਪਿ ਮਗ੍ਗਾ ਚਤੁਸਚ੍ਚਾਭਿਸਮਯਾਤਿ ਕਤ੍ਵਾ ਤੇਹਿ ਪਹਾਤਬ੍ਬੇਨ ਤੇਨ ਤੇਨ ਸਮੁਦਯੇਨ ਸਹ ਪਹਾਤਬ੍ਬਤ੍ਤਾ ਸਮੁਦਯਸਭਾਗਤ੍ਤਾ ਚ ਸਚ੍ਚਵਿਭਙ੍ਗੇ ਚ ਸਬ੍ਬਕਿਲੇਸਾਨਂ ਸਮੁਦਯਭਾਵਸ੍ਸ ਵੁਤ੍ਤਤ੍ਤਾ ‘‘ਸਮੁਦਯਪਕ੍ਖਿਕਾ’’ਤਿ ਦਿਟ੍ਠਿਆਦਯੋ ਵੁਚ੍ਚਨ੍ਤਿ. ਕਾਯਵਾਚਾਚਿਤ੍ਤਾਨਂ ਵਿਰੂਪਪ੍ਪਵਤ੍ਤਿਯਾ ਨਯਨਂ ਅਪਯਾਪਨਂ, ਕਾਯਦੁਚ੍ਚਰਿਤਾਦੀਨਂ ਵਿਨਾਸਨਯਨਂ ਵਾ ਵਿਨਯੋ, ਤੇਸਂ ਵਾ ਜਿਮ੍ਹਪ੍ਪਵਤ੍ਤਿਂ ਵਿਚ੍ਛਿਨ੍ਦਿਤ੍ਵਾ ਉਜੁਕਨਯਨਂ ਵਿਨਯਨਂ. ਏਸੇਸੇਤਿ ਏਸੋ ਸੋ ਏਵ, ਅਤ੍ਥਤੋ ਅਨਞ੍ਞੋਤਿ ਅਤ੍ਥੋ. ਤਜ੍ਜਾਤੇਤਿ ਅਤ੍ਥਤੋ ਤਂਸਭਾਵੋਵ. ਸਪ੍ਪੁਰਿਸੋ ਅਰਿਯਸਭਾਵੋ, ਅਰਿਯੋ ਚ ਸਪ੍ਪੁਰਿਸਭਾਵੋਤਿ ਅਤ੍ਥੋ.

ਅਦ੍ਵਯਨ੍ਤਿ ਦ੍ਵਯਤਾਰਹਿਤਂ, ਵਣ੍ਣਮੇਵ ‘‘ਅਚ੍ਚੀ’’ਤਿ ਗਹੇਤ੍ਵਾ ਅਚ੍ਚਿਂ ਵਾ ‘‘ਵਣ੍ਣੋ ਏਵਾ’’ਤਿ ਤੇਸਂ ਏਕਤ੍ਤਂ ਪਸ੍ਸਨ੍ਤੋ ਵਿਯ ਯਥਾਤਕ੍ਕਿਤਂ ਅਤ੍ਤਾਨਂ ‘‘ਰੂਪ’’ਨ੍ਤਿ, ਯਥਾਦਿਟ੍ਠਂ ਵਾ ਰੂਪਂ ‘‘ਅਤ੍ਤਾ’’ਤਿ ਗਹੇਤ੍ਵਾ ਤੇਸਂ ਏਕਤ੍ਤਂ ਪਸ੍ਸਨ੍ਤੋ ਦਟ੍ਠਬ੍ਬੋ. ਏਤ੍ਥ ਚ ‘‘ਰੂਪਂ ਅਤ੍ਤਾ’’ਤਿ ਇਮਿਸ੍ਸਾ ਪਵਤ੍ਤਿਯਾ ਅਭਾਵੇਪਿ ਰੂਪੇ ਅਤ੍ਤਗ੍ਗਹਣਂ ਪਵਤ੍ਤਮਾਨਂ ਅਚ੍ਚਿਯਂ ਵਣ੍ਣਗ੍ਗਹਣਂ ਵਿਯ. ਉਪਮਾਯੋ ਚ ਅਨਞ੍ਞਤ੍ਤਾਦਿਗ੍ਗਹਣਨਿਦਸ੍ਸਨਵਸੇਨੇਵ ਵੁਤ੍ਤਾ, ਨ ਵਣ੍ਣਾਦੀਨਂ ਵਿਯ ਅਤ੍ਤਨੋ ਵਿਜ੍ਜਮਾਨਤ੍ਤਸ੍ਸ, ਅਤ੍ਤਨੋ ਵਿਯ ਵਾ ਵਣ੍ਣਾਦੀਨਂ ਅਵਿਜ੍ਜਮਾਨਤ੍ਤਸ੍ਸ ਦਸ੍ਸਨਤ੍ਥਂ.

੧੦੦੮. ਸਰੀਰਨਿਪ੍ਫਤ੍ਤਿਯਾਤਿ ਸਰੀਰਪਾਰਿਪੂਰਿਯਾ. ਨਿਚ੍ਛੇਤੁਂ ਅਸਕ੍ਕੋਨ੍ਤੋ ਵਿਚਿਨਨ੍ਤੋ ਕਿਚ੍ਛਤੀਤਿ ਵਿਚਿਕਿਚ੍ਛਾ. ਇਦਪ੍ਪਚ੍ਚਯਾਨਂ ਭਾਵੋਤਿ ਜਾਤਿਆਦਿਸਭਾਵਮੇਵ ਆਹ, ਜਾਤਿਆਦੀਨਂ ਵਾ ਜਰਾਮਰਣਾਦਿਉਪ੍ਪਾਦਨਸਮਤ੍ਥਤਂ. ਸਾ ਪਨ ਜਾਤਿਆਦਿਵਿਨਿਮੁਤ੍ਤਾ ਨਤ੍ਥੀਤਿ ਤੇਸਂਯੇਵਾਧਿਵਚਨਂ ਹੋਤਿ ‘‘ਇਦਪ੍ਪਚ੍ਚਯਤਾ’’ਤਿ.

੧੦੦੯. ਇਧ ਅਨਾਗਤਕਿਲੇਸਾ ‘‘ਤਦੇਕਟ੍ਠਾ ਕਿਲੇਸਾ’’ਤਿ ਵੁਚ੍ਚਨ੍ਤੀਤਿ ਤੇ ਦਸ੍ਸੇਤੁਂ ‘‘ਇਮਿਸ੍ਸਾ ਚ ਪਾਲ਼ਿਯਾ’’ਤਿਆਦਿ ਆਰਦ੍ਧਂ. ਸਹਜੇਕਟ੍ਠਵਸੇਨਾਤਿ ਤਤ੍ਥ ਉਪ੍ਪਨ੍ਨਦਿਟ੍ਠਿਯਾ ਸਹਜੇਕਟ੍ਠਵਸੇਨਾਤਿ ਅਤ੍ਥਤੋ ਵਿਞ੍ਞਾਯਤਿ. ਤਂਸਮ੍ਪਯੁਤ੍ਤੋਤਿ ਤੇਹਿ ਸਂਯੋਜਨਕਿਲੇਸੇਹਿ ਸਮ੍ਪਯੁਤ੍ਤੋਤਿਪਿ ਅਤ੍ਥੋ ਯੁਜ੍ਜਤਿ. ਤਥਾ ਤੇ ਸਂਯੋਜਨਕਿਲੇਸਾ ਸਮੁਟ੍ਠਾਨਂ ਏਤਸ੍ਸਾਤਿ ਤਂਸਮੁਟ੍ਠਾਨਨ੍ਤਿ ਵਾ. ਸਂਯੋਜਨਰਹਿਤੇਹਿ ਚ ਪਨ ਕਿਲੇਸੇਹਿ ਸਮ੍ਪਯੁਤ੍ਤਾਨਂ ਸਮੁਟ੍ਠਿਤਾਨਞ੍ਚ ਸਬ੍ਭਾਵਤੋ ਕਿਲੇਸੇਹੇਵ ਯੋਜਨਾ ਕਤਾ.

੧੦੧੧. ਸਂਯੋਜਨਾਦੀਨਂ ਵਿਯਾਤਿ ਸਂਯੋਜਨਤਦੇਕਟ੍ਠਕਿਲੇਸਾਦੀਨਂ ਯਥਾਵੁਤ੍ਤਾਨਂ ਵਿਯ. ਤੇਹੀਤਿ ਦਸ੍ਸਨਭਾਵਨਾਮਗ੍ਗੇਹਿ. ਅਭਿਸਙ੍ਖਾਰਵਿਞ੍ਞਾਣਂ ਕੁਸਲਾਕੁਸਲਂ, ਨਾਮਰੂਪਞ੍ਚ ਵਿਪਾਕਨ੍ਤਿ ਕਤ੍ਵਾ ‘‘ਕੁਸਲਾਦੀਨਮ੍ਪਿ ਪਹਾਨਂ ਅਨੁਞ੍ਞਾਤ’’ਨ੍ਤਿ ਆਹ.

੧੦੧੩. ਹੇਤੂ ਚੇਵਾਤਿ ‘‘ਪਹਾਤਬ੍ਬਹੇਤੁਕਾ’’ਤਿ ਏਤਸ੍ਮਿਂ ਸਮਾਸਪਦੇ ਏਕਦੇਸੇਨ ਸਮਾਸਪਦਤ੍ਥਂ ਵਦਤਿ. ਏਤ੍ਥ ਚ ਪੁਰਿਮਨਯੇਨ ‘‘ਇਮੇ ਧਮ੍ਮਾ ਦਸ੍ਸਨੇਨਪਹਾਤਬ੍ਬਹੇਤੁਕਾ’’ਤਿ ਇਮੇਯੇਵ ਦਸ੍ਸਨੇਨਪਹਾਤਬ੍ਬਹੇਤੁਕਾ, ਨ ਇਤੋ ਅਞ੍ਞੇਤਿ ਅਯਂ ਨਿਯਮੋ ਪਞ੍ਞਾਯਤਿ, ਨ ਇਮੇ ਦਸ੍ਸਨੇਨਪਹਾਤਬ੍ਬਹੇਤੁਕਾਯੇਵਾਤਿ. ਤਸ੍ਮਾ ਇਮੇਸਂ ਦਸ੍ਸਨੇਨਪਹਾਤਬ੍ਬਹੇਤੁਕਭਾਵੋ ਅਨਿਯਤੋ ਵਿਚਿਕਿਚ੍ਛਾਸਹਗਤਮੋਹਸ੍ਸ ਅਹੇਤੁਕਤ੍ਤਾਤਿ ਪੁਰਿਮਨਯੋ ਵਿਵਰਣੀਯਤ੍ਥਵਾ ਹੋਤਿ. ਤਸ੍ਮਾ ਪੁਰਿਮਨਯੇਨ ਧਮ੍ਮਤੋ ਦਸ੍ਸਨੇਨਪਹਾਤਬ੍ਬਹੇਤੁਕੇ ਨਿਕ੍ਖਿਪਿਤ੍ਵਾ ਅਤ੍ਥਤੋ ਨਿਕ੍ਖਿਪਿਤੁਂ ਦੁਤਿਯਨਯੋ ਵੁਤ੍ਤੋ.

੧੦੨੯. ਮਹਗ੍ਗਤਾ ਵਾ ਇਦ੍ਧਿਵਿਧਾਦਯੋ. ਅਪ੍ਪਮਾਣਾਰਮ੍ਮਣਾ ਮਹਗ੍ਗਤਾ ਚੇਤੋਪਰਿਯਪੁਬ੍ਬੇਨਿਵਾਸਾਨਾਗਤਂਸਞਾਣਸਮ੍ਪਯੁਤ੍ਤਾ.

੧੦੩੫. ਅਨਨ੍ਤਰੇ ਨਿਯੁਤ੍ਤਾਨਿ, ਅਨਨ੍ਤਰਫਲਪ੍ਪਯੋਜਨਾਨਿ, ਅਨਨ੍ਤਰਫਲਕਰਣਸੀਲਾਨਿ ਵਾ ਆਨਨ੍ਤਰਿਕਾਨਿ. ਤਾਨਿ ਪਨ ਪਟਿਪਕ੍ਖੇਨ ਅਨਿਵਾਰਣੀਯਫਲਤ੍ਤਾ ਅਨ੍ਤਰਾਯਰਹਿਤਾਨੀਤਿ ‘‘ਅਨਨ੍ਤਰਾਯੇਨ ਫਲਦਾਯਕਾਨੀ’’ਤਿ ਵੁਤ੍ਤਂ. ਅਨਨ੍ਤਰਾਯਾਨਿ ਵਾ ਆਨਨ੍ਤਰਿਕਾਨੀਤਿ ਨਿਰੁਤ੍ਤਿਵਸੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਏਕਸ੍ਮਿਮ੍ਪੀਤਿ ਪਿ-ਸਦ੍ਦੇਨ ਅਨੇਕਸ੍ਮਿਮ੍ਪਿ ਆਯੂਹਿਤੇ ਵਤ੍ਤਬ੍ਬਮੇਵਨਤ੍ਥੀਤਿ ਦਸ੍ਸੇਤਿ. ਨ ਚ ਤੇਸਂ ਅਞ੍ਞਮਞ੍ਞਪਟਿਬਾਹਕਤ੍ਤਂ ਅਤ੍ਥਿ ਅਪ੍ਪਟਿਪਕ੍ਖਤ੍ਤਾ, ਅਪ੍ਪਟਿਪਕ੍ਖਤਾ ਚ ਸਮਾਨਫਲਤ੍ਤਾ ਅਨੁਬਲਪ੍ਪਦਾਨਤੋ ਚ. ‘‘ਨਤ੍ਥਿ ਹੇਤੁ ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਸਂਕਿਲੇਸਾਯਾ’’ਤਿ (ਦੀ. ਨਿ. ੧.੧੬੮) ਏਵਮਾਦਿਕੋ ਅਹੇਤੁਕਵਾਦੋ. ‘‘ਕਰੋਤੋ ਖੋ ਕਾਰਯਤੋ ਛਿਨ੍ਦਤੋ ਛੇਦਾਪਯਤੋ…ਪੇ… ਕਰੋਤੋ ਨ ਕਰੀਯਤਿ ਪਾਪ’’ਨ੍ਤਿ (ਦੀ. ਨਿ. ੧.੧੬੬) ਏਵਮਾਦਿਕੋ ਅਕਿਰਿਯਵਾਦੋ. ‘‘ਨਤ੍ਥਿ ਦਿਨ੍ਨ’’ਨ੍ਤਿ (ਦੀ. ਨਿ. ੧.੧੭੧; ਮ. ਨਿ. ੨.੯੪; ੩.੯੧) ਏਵਮਾਦਿਕੋ ਨਤ੍ਥਿਕਵਾਦੋ. ਏਤੇਸੁ ਪੁਰਿਮਵਾਦੋ ਬਨ੍ਧਮੋਕ੍ਖਾਨਂ ਹੇਤੁਂ ਪਟਿਸੇਧੇਤਿ, ਦੁਤਿਯੋ ਕਮ੍ਮਂ, ਤਤਿਯੋ ਵਿਪਾਕਨ੍ਤਿ ਅਯਮੇਤੇਸਂ ਵਿਸੇਸੋ. ਤਞ੍ਹੀਤਿ ਅਹੇਤੁਕਾਦਿਨਿਯਤਮਿਚ੍ਛਾਦਿਟ੍ਠਿਂ, ਨ ਪਨ ਨਿਯਤਭਾਵਂ ਅਪ੍ਪਤ੍ਤਂ.

੧੦੩੯. ਪਚ੍ਚਯਟ੍ਠੇਨਾਤਿ ਮਗ੍ਗਪਚ੍ਚਯਸਙ੍ਖਾਤੇਨ ਸਮ੍ਪਯੋਗਵਿਸਿਟ੍ਠੇਨ ਪਚ੍ਚਯਭਾਵੇਨਾਤਿ ਵੇਦਿਤਬ੍ਬਂ. ਏਤ੍ਥ ਚ ਮਗ੍ਗਙ੍ਗਾਨਂ ਠਪਨਂ ਮਗ੍ਗਪਚ੍ਚਯਭਾਵਰਹਿਤੇ ਮਗ੍ਗਹੇਤੁਕੇ ਦਸ੍ਸੇਤੁਂ, ਤੇਨ ਮਗ੍ਗਹੇਤੁਕੇ ਅਸਙ੍ਕਰਤੋ ਵਵਤ੍ਥਪੇਤਿ. ਸਚੇ ਪਨ ਕੋਚਿ ਵਦੇਯ੍ਯ ‘‘ਏਕੇਕਂ ਅਙ੍ਗਂ ਠਪੇਤ੍ਵਾ ਤਂਤਂਸਮ੍ਪਯੁਤ੍ਤਾਨਂ ਮਗ੍ਗਹੇਤੁਕਭਾਵੇਪਿ ‘ਮਗ੍ਗਙ੍ਗਾਨਿ ਠਪੇਤ੍ਵਾ’ਤਿ ਇਦਂ ਵਚਨਂ ਯੁਜ੍ਜਤੀ’’ਤਿ. ਏਵਞ੍ਹਿ ਸਤਿ ਤਤਿਯਨਯੇ ਵਿਯ ਇਧਾਪਿ ‘‘ਠਪੇਤ੍ਵਾ’’ਤਿ ਨ ਵਤ੍ਤਬ੍ਬਂ ਸਿਯਾ, ਵੁਤ੍ਤਞ੍ਚੇਤਂ, ਤਸ੍ਮਾ ਵੁਤ੍ਤਨਯੇਨੇਵਤ੍ਥੋ ਵੇਦਿਤਬ੍ਬੋ. ਮਗ੍ਗਙ੍ਗਾਮਗ੍ਗਙ੍ਗਾਨਞ੍ਹਿ ਸਮ੍ਪਯੁਤ੍ਤਾਨਂ ਵਿਸੇਸਦਸ੍ਸਨਤ੍ਥੋ ਅਯਂ ਨਯੋਤਿ. ਸੇਸਮਗ੍ਗਙ੍ਗਾਨਂ ਪੁਬ੍ਬੇ ਠਪਿਤਾਨਨ੍ਤਿ ਅਧਿਪ੍ਪਾਯੋ. ਫਸ੍ਸਾਦੀਨਞ੍ਹਿ ਪੁਰਿਮਨਯੇਪਿ ਮਗ੍ਗਹੇਤੁਕਤਾ ਸਿਦ੍ਧਾਤਿ.

ਸਮ੍ਮਾਦਿਟ੍ਠਿਯਾ ਦੁਤਿਯਨਯੇਪਿ ਠਪਿਤਾਯ ਤਤਿਯਨਯੇ ਸਹੇਤੁਕਭਾਵੋ ਦਸ੍ਸਿਤੋ. ਕਥਂ ਦਸ੍ਸਿਤੋ, ਨਨੁ ਅਰਿਯਮਗ੍ਗਸਮਙ੍ਗਿਸ੍ਸ ‘‘ਅਲੋਭੋ ਅਦੋਸੋ ਇਮੇ ਧਮ੍ਮਾ ਮਗ੍ਗਹੇਤੂ’’ਤਿ (ਧ. ਸ. ੧੦੩੯) ਅਵਤ੍ਵਾ ‘‘ਅਲੋਭੋ ਅਦੋਸੋ ਅਮੋਹੋ ਇਮੇ ਧਮ੍ਮਾ ਮਗ੍ਗਹੇਤੂ’’ਤਿ ਵਿਸੁਂ ਸਮ੍ਮਾਦਿਟ੍ਠਿਆਦਿਕੇ ਮਗ੍ਗਹੇਤੂ ਦਸ੍ਸੇਤ੍ਵਾ ‘‘ਤਂਸਮ੍ਪਯੁਤ੍ਤੋ…ਪੇ… ਵਿਞ੍ਞਾਣਕ੍ਖਨ੍ਧੋ’’ਤਿ (ਧ. ਸ. ੧੦੩੯) ਵਿਸੁਂ ਮਗ੍ਗਹੇਤੁਕਾਨਂ ਦਸ੍ਸਿਤਤ੍ਤਾ ‘‘ਮਗ੍ਗਹੇਤੂਸੁ ਅਮੋਹੋ’’ਤਿ (ਧ. ਸ. ੧੦੩੯) ਵੁਤ੍ਤਾਯ ਸਮ੍ਮਾਦਿਟ੍ਠਿਯਾ ਮਗ੍ਗਹੇਤੁਕਤਾ ਨ ਦਸ੍ਸਿਤਾ ਸਿਯਾ? ਨੋ ਨ ਦਸ੍ਸਿਤਾ. ਯਥਾ ਹਿ ਤੀਣਿ ਸਂਯੋਜਨਾਨਿ ਦਸ੍ਸੇਤ੍ਵਾ ‘‘ਤਦੇਕਟ੍ਠੋ ਲੋਭੋ ਦੋਸੋ ਮੋਹੋ, ਇਮੇ ਧਮ੍ਮਾ ਦਸ੍ਸਨੇਨ ਪਹਾਤਬ੍ਬਹੇਤੂ’’ਤਿ (ਧ. ਸ. ੧੦੧੭) ਵਿਸੁਂ ਪਹਾਤਬ੍ਬਹੇਤੂ ਨਿਯਮੇਤ੍ਵਾ ‘‘ਤਦੇਕਟ੍ਠਾ ਚ ਕਿਲੇਸਾ’’ਤਿਆਦਿਵਚਨੇਨ (ਧ. ਸ. ੧੦੧੭) ਲੋਭਦੋਸਮੋਹਾ ਚ ਅਞ੍ਞਮਞ੍ਞਸਹਜੇਕਟ੍ਠਾ ਅਞ੍ਞਮਞ੍ਞਸਮ੍ਪਯੁਤ੍ਤਾ ਸਙ੍ਖਾਰਕ੍ਖਨ੍ਧਭੂਤਾ ਚ ਦਸ੍ਸਨੇਨਪਹਾਤਬ੍ਬਹੇਤੁਕਾਤਿ ਦਸ੍ਸਿਤਾ ਹੋਨ੍ਤਿ, ਏਵਮਿਧਾਪਿ ‘‘ਅਲੋਭਾਦਯੋ ਇਮੇ ਧਮ੍ਮਾ ਮਗ੍ਗਹੇਤੂ’’ਤਿ ਨਿਗਮਿਤਾਪਿ ਅਞ੍ਞਮਞ੍ਞਸਮ੍ਪਯੁਤ੍ਤਸਙ੍ਖਾਰਕ੍ਖਨ੍ਧਭਾਵਤੋ ਤਂਸਮ੍ਪਯੁਤ੍ਤਸਙ੍ਖਾਰਕ੍ਖਨ੍ਧਵਚਨੇਨ ‘‘ਮਗ੍ਗਹੇਤੁਕਾ’’ਤਿ ਦਸ੍ਸਿਤਾ ਏਵਾਤਿ ਸਿਦ੍ਧਂ ਹੋਤਿ, ਸਮ੍ਮਾਦਿਟ੍ਠਿਯਾਪਿ ਅਮੋਹੋਤਿ ਵੁਤ੍ਤਾਯ ਮਗ੍ਗਹੇਤੁਕਭਾਵਦਸ੍ਸਨਂ. ਸਚੇ ਪਨ ਯੋ ਦੁਤਿਯਨਯੇ ਮਗ੍ਗੋ ਚੇਵ ਹੇਤੁ ਚਾਤਿ ਵੁਤ੍ਤੋ, ਤਤੋ ਅਞ੍ਞਸ੍ਸੇਵ ਅਞ੍ਞੇਨ ਅਸਾਧਾਰਣੇਨ ਪਰਿਯਾਯੇਨ ਮਗ੍ਗਹੇਤੁਭਾਵਂ ਦਸ੍ਸੇਤ੍ਵਾ ਤਂਸਮ੍ਪਯੋਗਤੋ ਸਮ੍ਮਾਦਿਟ੍ਠਿਯਾ ਮਗ੍ਗਹੇਤੁਕਭਾਵਦਸ੍ਸਨਤ੍ਥੋ ਤਤਿਯਨਯੋ ਸਿਯਾ. ‘‘ਅਰਿਯਮਗ੍ਗਸਮਙ੍ਗਿਸ੍ਸ ਅਲੋਭੋ ਅਦੋਸੋ ਇਮੇ ਧਮ੍ਮਾ ਮਗ੍ਗਹੇਤੂ’’ਤਿਆਦਿ ਵਤ੍ਤਬ੍ਬਂ ਸਿਯਾ. ਯਸ੍ਮਾ ਪਨ ‘‘ਮਗ੍ਗਹੇਤੂ’’ਤਿ ਇਮਿਨਾ ਅਞ੍ਞੇਨ ਸਾਧਾਰਣੇਨ ਪਰਿਯਾਯੇਨ ਯੇਸਂ ਮਗ੍ਗਹੇਤੁਭਾਵੋ ਸਮ੍ਭਵਤਿ, ਤੇ ਸਬ੍ਬੇ ‘‘ਮਗ੍ਗਹੇਤੂ’’ਤਿ ਦਸ੍ਸੇਤ੍ਵਾ ਤਂਸਮ੍ਪਯੁਤ੍ਤਾਨਂ ਤੇਸਂ ਅਞ੍ਞੇਸਞ੍ਚ ਮਗ੍ਗਹੇਤੁਕਭਾਵਦਸ੍ਸਨਤ੍ਥੋ ਤਤਿਯਨਯੋ, ਤਸ੍ਮਾ ਤਤ੍ਥ ‘‘ਅਮੋਹੋ’’ਤਿਪਿ ਵੁਤ੍ਤਂ. ਨ ਹਿ ਸੋ ਮਗ੍ਗਹੇਤੁ ਨ ਹੋਤੀਤਿ. ਇਮੇ ਪਨ ਤਯੋਪਿ ਨਯਾ ਅਤ੍ਥਵਿਸੇਸਵਸੇਨ ਨਿਕ੍ਖਿਤ੍ਤਤ੍ਤਾ ਅਤ੍ਥਤੋ ਨਿਕ੍ਖੇਪਾ ਦਟ੍ਠਬ੍ਬਾ. ਅਥ ਵਾ ਸਰੂਪੇਨ ਵਚਨਂ ਧਮ੍ਮਤੋ ਨਿਕ੍ਖੇਪੋ, ਅਤ੍ਥੇਨ ਅਤ੍ਥਤੋਤਿ ਏਵਮ੍ਪਿ ਯੋਜਨਾ ਸਮ੍ਭਵਤਿ. ਤਤ੍ਥ ਦੁਤਿਯਤਤਿਯਨਯਾ ਸਰੂਪਤੋ ਹੇਤੁਹੇਤੁਮਨ੍ਤੁਦਸ੍ਸਨਵਸੇਨ ਧਮ੍ਮਤੋ ਨਿਕ੍ਖੇਪੋ. ਪਠਮਨਯੋ ਤਥਾਅਦਸ੍ਸਨਤੋ ਅਤ੍ਥੇਨ ਚ ਮਗ੍ਗਙ੍ਗਤਂਸਮ੍ਪਯੁਤ੍ਤਾਨਂ ਹੇਤੁਹੇਤੁਮਨ੍ਤੁਭਾਵਾਵਗਮਨਤੋ ਅਤ੍ਥਤੋ ਨਿਕ੍ਖੇਪੋਤਿ.

੧੦੪੦. ਯਸ੍ਮਿਂ ਸਭਾਵਧਮ੍ਮੇ ਨਿਨ੍ਨਪੋਣਪਬ੍ਭਾਰਭਾਵੇਨ ਚਿਤ੍ਤਂ ਪਵਤ੍ਤਤਿ, ਸੋ ਤਸ੍ਸ ਆਰਮ੍ਮਣਾਧਿਪਤਿ ਵੇਦਿਤਬ੍ਬੋ. ਚੇਤੋਪਰਿਯਞਾਣੇਨ ਜਾਨਿਤ੍ਵਾ ਪਚ੍ਚਵੇਕ੍ਖਮਾਨੋ ਤੇਨ ਪਚ੍ਚਵੇਕ੍ਖਮਾਨੋਤਿ ਵੁਤ੍ਤੋ. ਏਤ੍ਥਾਪੀਤਿ ਏਤਸ੍ਮਿਮ੍ਪਿ ਅਟ੍ਠਕਥਾਵਚਨੇ, ਏਤ੍ਥ ਵਾ ਪਟ੍ਠਾਨੇ ਮਗ੍ਗਾਦੀਨਿ ਠਪੇਤ੍ਵਾ ਅਞ੍ਞੇਸਂ ਅਧਿਪਤਿਪਚ੍ਚਯਭਾਵਸ੍ਸ ਅਵਚਨੇਨੇਵ ਪਟਿਕ੍ਖੇਪਪਾਲ਼ਿਯਂ. ਅਯਮੇਵਤ੍ਥੋਤਿ ਅਤ੍ਤਨੋ ਮਗ੍ਗਫਲਂ ਠਪੇਤ੍ਵਾਤਿ ਅਤ੍ਥੋ. ਵੀਮਂਸਾਧਿਪਤੇਯ੍ਯਨ੍ਤਿ ਪਧਾਨੇਨ ਅਧਿਪਤਿਨਾ ਸਹਜਾਤਾਧਿਪਤਿ ਨਿਦਸ੍ਸਿਤੋ, ਤਯਿਦਂ ਨਯਦਸ੍ਸਨਮਤ੍ਤਮੇਵ ਹੋਤੀਤਿ ਅਞ੍ਞੋਪਿ ਏਵਂਪਕਾਰੋ ਸਹਜਾਤੋ ਮਗ੍ਗਾਧਿਪਤਿ ਨਿਦਸ੍ਸਿਤੋ ਹੋਤਿ, ਤਸ੍ਮਾ ਵੀਰਿਯਾਧਿਪਤੇਯ੍ਯਨ੍ਤਿ ਚ ਯੋਜੇਤਬ੍ਬਂ. ਇਦਮ੍ਪਿ ਹਿ ਅਤ੍ਥਤੋ ਵੁਤ੍ਤਮੇਵਾਤਿ.

੧੦੪੧. ਅਤ੍ਤਨੋ ਸਭਾਵੋ ਅਤ੍ਤਭਾਵੋ. ਲਦ੍ਧੋਕਾਸਸ੍ਸ ਕਮ੍ਮਸ੍ਸ ਵਿਪਾਕੋ ਕਪ੍ਪਸਹਸ੍ਸਾਤਿਕ੍ਕਮੇ ਉਪ੍ਪਜ੍ਜਤਿ ਅਨੇਕਕਪ੍ਪਸਹਸ੍ਸਾਯੁਕਾਨਂ ਸਤ੍ਤਾਨਂ, ਕਪ੍ਪਸਹਸ੍ਸਾਤਿਕ੍ਕਮੇਪਿ ਵਾ ਲਦ੍ਧੋਕਾਸਂ ਯਂ ਭਵਿਸ੍ਸਤਿ, ਤਦਪਿ ਲਦ੍ਧੋਕਾਸਮੇਵਾਤਿ ਅਤ੍ਤਨੋ ਵਿਪਾਕਂ ਸਨ੍ਧਾਯ ਵੁਚ੍ਚਤਿ. ਨਤ੍ਥਿ ਨਾਮ ਨ ਹੋਤੀਤਿ ਅਨੁਪ੍ਪਨ੍ਨੋ ਨਾਮ ਨ ਹੋਤੀਤਿ ਅਧਿਪ੍ਪਾਯੋ. ਉਪ੍ਪਾਦੀਸੁ ਅਨ੍ਤੋਗਧਤ੍ਤਾ ‘‘ਉਪ੍ਪਾਦਿਨੋ ਧਮ੍ਮਾ’’ਤਿ ਏਤੇਨ ਵਚਨੇਨ ਵੁਚ੍ਚਤੀਤਿ ਕਤ੍ਵਾ ਆਹ ‘‘ਉਪ੍ਪਾਦਿਨੋ ਧਮ੍ਮਾ ਨਾਮ ਜਾਤੋ’’ਤਿ. ਅਰੂਪਸਙ੍ਖਾਤੋ ਅਤ੍ਤਾਤਿ ਅਰੂਪਭਵਙ੍ਗਂ ਆਹ. ਤਤ੍ਥ ਆਕਾਸਾਨਞ੍ਚਾਯਤਨਸਞ੍ਞਾਦਿਮਯੋ ਅਤ੍ਤਾਤਿ ਹਿ ਅਤ੍ਥਤੋ ਵੋਹਾਰੋ ਪਵਤ੍ਤੋਤਿ.

ਯਦਿ ਪਨ ਆਯੂ…ਪੇ… ਸਬ੍ਬਂ ਵਿਪਾਕਂ ਦਦੇਯ੍ਯ, ਅਲਦ੍ਧੋਕਾਸਞ੍ਚ ਵਿਪਾਕਂ ਦੇਤੀਤਿ ਕਤ੍ਵਾ ਵਿਪਕ੍ਕਵਿਪਾਕਞ੍ਚ ਦਦੇਯ੍ਯ, ਤਤੋ ਏਕਸ੍ਸੇਵ ਕਮ੍ਮਸ੍ਸ ਸਬ੍ਬਵਿਪਾਕੇਨ ਭਵਿਤਬ੍ਬਨ੍ਤਿ ਅਞ੍ਞਸ੍ਸ ਕਮ੍ਮਸ੍ਸ ਓਕਾਸੋ ਨ ਭਵੇਯ੍ਯ ਨਿਰਤ੍ਥਕਤ੍ਤਾ, ਉਪ੍ਪਤ੍ਤਿਯਾਯੇਵ ਓਕਾਸੋ ਨ ਭਵੇਯ੍ਯ, ਉਪ੍ਪਨ੍ਨਸ੍ਸ ਵਾ ਫਲਦਾਨੇ. ਅਥ ਵਾ ਅਲਦ੍ਧੋਕਾਸਸ੍ਸ ਵਿਪਾਕਦਾਨੇ ਪਚ੍ਚਯਨ੍ਤਰਰਹਿਤਸ੍ਸਪਿ ਵਿਪਾਕਦਾਨਂ ਆਪਨ੍ਨਨ੍ਤਿ ਅਵਿਜ੍ਜਾਤਣ੍ਹਾਦਿਪਚ੍ਚਯਨ੍ਤਰਖੇਪਕਸ੍ਸ ਅਞ੍ਞਸ੍ਸ ਅਪਚਯਗਾਮਿਕਮ੍ਮਸ੍ਸ ਕਮ੍ਮਕ੍ਖਯਕਰਸ੍ਸ ਓਕਾਸੋ ਨ ਭਵੇਯ੍ਯ. ਭਾਵਿਤੇਪਿ ਮਗ੍ਗੇ ਅਵਿਜ੍ਜਾਦਿਪਚ੍ਚਯਨ੍ਤਰਰਹਿਤਸ੍ਸ ਚ ਕਮ੍ਮਸ੍ਸ ਵਿਪਚ੍ਚਨਤੋ ਸਮਤ੍ਥਤਾ ਨ ਸਿਯਾਤਿ ਅਤ੍ਥੋ. ਸਬ੍ਬਦਾ ਵਾ ਵਿਪਾਕਪ੍ਪਵਤ੍ਤਿਯਾ ਏਵ ਭਵਿਤਬ੍ਬਤ੍ਤਾ ਵਿਪਾਕਤੋ ਅਞ੍ਞਸ੍ਸ ਪਵਤ੍ਤਿਓਕਾਸੋ ਨ ਭਵੇਯ੍ਯ. ਤਂ ਪਨਾਤਿ ਆਯੂਹਿਤਂ ਕਮ੍ਮਂ. ਇਦਂ ਪਨ ਧੁਵਵਿਪਾਕਸ੍ਸ ਵਿਪਾਕੇਨ ਅਧੁਵਵਿਪਾਕਸ੍ਸਪਿ ਲਦ੍ਧੋਕਾਸਸ੍ਸ ਵਿਪਾਕਂ ਉਪ੍ਪਾਦੀਤਿ ਦਸ੍ਸੇਤੁਂ ਆਰਦ੍ਧਨ੍ਤਿ ਦਟ੍ਠਬ੍ਬਂ. ਅਟ੍ਠ ਸਮਾਪਤ੍ਤਿਯੋ ਚ ਬਲਵਵਿਰਹੇ ਅਗ੍ਗਮਗ੍ਗਭਾਵਨਾਵਿਰਹੇ ਚ ਅਪ੍ਪਹੀਨਸਭਾਵਤੋ ਧੁਵਂ ਵਿਪਚ੍ਚਨ੍ਤੀਤਿ ਧੁਵਵਿਪਾਕਾਤਿ ਵੁਤ੍ਤਾ. ਆਯੂਹਿਤਕਮ੍ਮੇ ਵੁਚ੍ਚਮਾਨੇ ਅਨੁਪ੍ਪਨ੍ਨਂ ਕਸ੍ਮਾ ਵੁਤ੍ਤਨ੍ਤਿ? ਯਂ ਆਯੂਹਿਤਂ ਭਵਿਸ੍ਸਤਿ, ਤਤ੍ਥਾਪਿ ਆਯੂਹਿਤ-ਸਦ੍ਦਪ੍ਪਵਤ੍ਤਿਸਬ੍ਭਾਵਾ.

੧੦੫੦. ਉਪਾਦਿਨ੍ਨਾਤਿ ਏਤ੍ਥ ਨ ਉਪੇਤੇਨ ਆਦਿਨ੍ਨਾਤਿ ਅਯਮਤ੍ਥੋ, ਉਪਸਦ੍ਦੋ ਪਨ ਉਪਸਗ੍ਗਮਤ੍ਤਮੇਵ, ਤਸ੍ਮਾ ਉਪਾਦਾਨਾਰਮ੍ਮਣਾ ਉਪਾਦਾਨੇਹਿ, ਅਞ੍ਞੇ ਚ ਅਨਭਿਨਿਵੇਸੇਨ ‘‘ਅਹਂ ਮਗ੍ਗਂ ਭਾਵਯਿਂ, ਮਮ ਮਗ੍ਗੋ ਉਪ੍ਪਨ੍ਨੋ’’ਤਿਆਦਿਕੇਨ ਗਹਣੇਨ ਆਦਿਨ੍ਨਾ ਇਚ੍ਚੇਵ ਉਪਾਦਿਨ੍ਨਾ. ਉਪਾਦਿਨ੍ਨ-ਸਦ੍ਦੇਨ ਵਾ ਅਮਗ੍ਗਫਲਧਮ੍ਮਾਯੇਵ ਵੁਤ੍ਤਾ, ਇਤਰੇਹਿ ਮਗ੍ਗਫਲਧਮ੍ਮਾ ਚਾਤਿ ਵੇਦਿਤਬ੍ਬਂ.

ਤਿਕਨਿਕ੍ਖੇਪਕਥਾਵਣ੍ਣਨਾ ਨਿਟ੍ਠਿਤਾ.

ਦੁਕਨਿਕ੍ਖੇਪਕਥਾਵਣ੍ਣਨਾ

੧੦੬੨. ਮੇਤ੍ਤਾਯਨਵਸੇਨਾਤਿ ਮੇਤ੍ਤਾਫਰਣਵਸੇਨ. ‘‘ਮੇਤ੍ਤਯਨਵਸੇਨਾ’’ਤਿ ਵਤ੍ਤਬ੍ਬੇ ਦੀਘਂ ਕਤ੍ਵਾ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਮੇਤ੍ਤਾ, ਮੇਦਨਂ ਵਾ ਮੇਤ੍ਤਾਯਨਂ, ਤਞ੍ਚ ਸਿਨੇਹਵਸੇਨ. ਅਨੁਦਯਤੀਤਿ ਅਨੁਦਾਤਿ ਵਤ੍ਤਬ੍ਬੇ ‘‘ਅਨੁਦ੍ਦਾ’’ਤਿ ਦ-ਕਾਰਾਗਮਨਂ ਕਤ੍ਵਾ ਵੁਤ੍ਤਂ. ਅਨੁਦ੍ਦਾਯਨਾਕਾਰੋਤਿ ਅਨੁਰਕ੍ਖਣਾਕਾਰੋ. ਰਕ੍ਖਣਞ੍ਹਿ ਦਾਯਨਾ. ਅਨੁਦ੍ਦਾਯਿਤਸ੍ਸਾਤਿ ਅਨੁਦ੍ਦਾਯ ਅਯਿਤਸ੍ਸ. ‘‘ਜਾਤਿਪਿ ਦੁਕ੍ਖਾ’’ਤਿਆਦਿਂ ਸੁਣਨ੍ਤਸ੍ਸ ਸਵਨੇ, ਅਨਿਚ੍ਚਾਦਿਤੋ ਸਮ੍ਮਸਨ੍ਤਸ੍ਸ ਸਮ੍ਮਸਨੇ, ਮਗ੍ਗੇਨੇਤ੍ਥ ਸਮ੍ਮੋਹਂ ਵਿਦ੍ਧਂਸੇਨ੍ਤਸ੍ਸ ਪਟਿਵੇਧੇ, ਪਟਿਵਿਜ੍ਝਿਤ੍ਵਾ ਪਚ੍ਚਵੇਕ੍ਖਨ੍ਤਸ੍ਸ ਪਚ੍ਚਵੇਕ੍ਖਣੇਤਿ ਚਤੂਸੁ ਕਾਲੇਸੁ ਦੁਕ੍ਖੇ ਞਾਣਂ ਵਤ੍ਤਤਿ.

੧੦੬੫. ਚਿਤ੍ਤਸ੍ਸ ਸਂਰਞ੍ਜਨਂ ਚਿਤ੍ਤਸ੍ਸ ਸਾਰਾਗੋ. ਗਿਜ੍ਝਨ੍ਤੀਤਿ ਅਭਿਕਙ੍ਖਨ੍ਤਿ. ਸਞ੍ਜਂਨ੍ਤੀਤਿ ਬਨ੍ਧਨ੍ਤਿ. ਲਗ੍ਗਨਟ੍ਠੇਨਾਤਿ ਸਂਵਰਣਟ੍ਠੇਨ, ਓਲਮ੍ਬਨਟ੍ਠੇਨ ਵਾ. ਤਸ੍ਸ ਤਸ੍ਸੇਵ ਭਵਸ੍ਸਾਤਿ ਕਾਮਭਵਾਦਿਸਙ੍ਖਾਤਸ੍ਸ ਵਿਪਾਕਕਟਤ੍ਤਾਰੂਪਸ੍ਸ ਅਭਿਨਿਬ੍ਬਤ੍ਤਿਅਤ੍ਥਂ ਪਟਿਸਨ੍ਧਿਯਾ ਪਚ੍ਚਯਭਾਵਵਸੇਨ ਪਰਿਕਡ੍ਢਤਿ. ਚਿਤ੍ਤਮਸ੍ਸ ਭਵਨ੍ਤਰੇ ਵਿਧਾਵਤਿ ਨਿਬ੍ਬਤ੍ਤਤਿ. ਤਣ੍ਹਾਵਿਪ੍ਫਨ੍ਦਿਤਨਿਵੇਸੋ ਅਟ੍ਠਸਤਤਣ੍ਹਾਵਿਚਰਿਤਾਦਿਭਾਵੇਨ ਤਣ੍ਹਾਪਵਤ੍ਤਿਯੇਵ.

ਸਰਿਤਾਨੀਤਿ ਰਾਗਵਸੇਨ ਅਲ੍ਲਾਨਿ. ਤਂਸਮ੍ਪਯੁਤ੍ਤਪੀਤਿਵਸੇਨ ਸਿਨਿਦ੍ਧਾਨਿ ਸਿਨੇਹਿਤਾਨਿ. ਵਿਸਤਾਤਿ ਵਿਤ੍ਥਤਾ. ਰੂਪਾਦੀਸੁ ਤੇਭੂਮਕਧਮ੍ਮੇਸੁ ਬ੍ਯਾਪਨਵਸੇਨ ਵਿਸਟਾ. ਪੁਰਿਮਵਚਨਮੇਵ ਤ-ਕਾਰਸ੍ਸ ਟ-ਕਾਰਂ ਕਤ੍ਵਾ ਵੁਤ੍ਤਂ. ਵਿਸਾਲਾਤਿ ਵਿਪੁਲਾ. ਵਿਸਕ੍ਕਤੀਤਿ ਪਰਿਸਪ੍ਪਤਿ, ਸਹਤਿ ਵਾ. ਰਤ੍ਤੋ ਹਿ ਰਾਗਵਤ੍ਥੁਨਾ ਪਾਦੇਨ ਤਾਲਿਯਮਾਨੋਪਿ ਸਹਤੀਤਿ. ਓਸਕ੍ਕਨਂ, ਵਿਪ੍ਫਨ੍ਦਨਂ ਵਾ ਵਿਸਕ੍ਕਨਨ੍ਤਿ ਵਦਨ੍ਤਿ. ਅਨਿਚ੍ਚਾਦਿਂ ਨਿਚ੍ਚਾਦਿਤੋ ਗਣ੍ਹਨ੍ਤੀ ਵਿਸਂਵਾਦਿਕਾ ਹੋਤਿ. ਵਿਸਂਹਰਤੀਤਿ ਤਥਾ ਤਥਾ ਕਾਮੇਸੁ ਆਨਿਸਂਸਂ ਪਸ੍ਸਨ੍ਤੀ ਵਿਵਿਧੇਹਾਕਾਰੇਹਿ ਨੇਕ੍ਖਮ੍ਮਾਭਿਮੁਖਪ੍ਪਵਤ੍ਤਿਤੋ ਚਿਤ੍ਤਂ ਸਂਹਰਤਿ ਸਙ੍ਖਿਪਤਿ. ਵਿਸਂ ਵਾ ਦੁਕ੍ਖਂ, ਤਂ ਹਰਤਿ ਵਹਤੀਤਿ ਅਤ੍ਥੋ. ਦੁਕ੍ਖਨਿਬ੍ਬਤ੍ਤਕਸ੍ਸ ਕਮ੍ਮਸ੍ਸ ਹੇਤੁਭਾਵਤੋ ਵਿਸਮੂਲਾ, ਵਿਸਂ ਵਾ ਦੁਕ੍ਖਵੇਦਨਾਮੂਲਂ ਏਤਿਸ੍ਸਾਤਿ ਵਿਸਮੂਲਾ. ਦੁਕ੍ਖਸਮੁਦਯਤ੍ਤਾ ਵਿਸਂ ਫਲਂ ਏਤਿਸ੍ਸਾਤਿ ਵਿਸਫਲਾ. ਤਣ੍ਹਾਯ ਰੂਪਾਦਿਕਸ੍ਸ ਦੁਕ੍ਖਸ੍ਸੇਵ ਪਰਿਭੋਗੋ ਹੋਤਿ, ਨ ਅਮਤਸ੍ਸਾਤਿ ਸਾ ‘‘ਵਿਸਪਰਿਭੋਗਾ’’ਤਿ ਵੁਤ੍ਤਾ. ਸਬ੍ਬਤ੍ਥ ਨਿਰੁਤ੍ਤਿਵਸੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਯੋ ਪਨੇਤ੍ਥ ਪਧਾਨੋ ਅਤ੍ਥੋ, ਤਂ ਦਸ੍ਸੇਤੁਂ ਪੁਨ ‘‘ਵਿਸਤਾ ਵਾ ਪਨਾ’’ਤਿਆਦਿ ਵੁਤ੍ਤਂ. ਇਤ੍ਥਭਾਵਞ੍ਞਥਾਭਾਵਨ੍ਤਿ ਮਨੁਸ੍ਸਭਾਵਦੇਵਾਦਿਭਾਵਭੂਤਂ.

ਪਣਿਧਾਨਕਵਸੇਨਾਤਿ ਚਿਤ੍ਤਸ੍ਸ ਰੂਪਾਦੀਸੁ ਠਪਨਕਵਸੇਨ. ਅਞ੍ਞੋਪਿ ਬਨ੍ਧੁ ਤਣ੍ਹਾਯ ਏਵ ਹੋਤਿ, ਸੋ ਪਨ ਅਬਨ੍ਧੁਪਿ ਹੋਤਿ. ਤਣ੍ਹਾ ਪਨ ਨਿਚ੍ਚਸਨ੍ਨਿਸ੍ਸਿਤਾਤਿ ‘‘ਪਾਟਿਯੇਕ੍ਕੋ ਬਨ੍ਧੂ’’ਤਿ ਵੁਤ੍ਤਾ. ਅਸਨਤੋਤਿ ਬ੍ਯਾਪਨਤੋ ਭੁਞ੍ਜਨਤੋ ਚ. ਤਦੁਭਯਂ ਦਸ੍ਸੇਤਿ ‘‘ਅਜ੍ਝੋਤ੍ਥਰਣਤੋ’’ਤਿਆਦਿਨਾ. ਆਸੀਸਨਵਸੇਨਾਤਿ ਇਚ੍ਛਨਵਸੇਨ. ਅਞ੍ਞੇਨਾਕਾਰੇਨਾਤਿ ਜਪ੍ਪਨਾਜਪ੍ਪਿਤਤ੍ਤਾਨਂ ਜਪ੍ਪਾਯ ਅਨਞ੍ਞਤ੍ਤਦਸ੍ਸਨਾਕਾਰੇਨ. ਚਿਤ੍ਤਂ ਪਰਿਯੁਟ੍ਠਾਤੀਤਿ ਚਿਤ੍ਤਂ ਮੂਸਤਿ. ਮਾਰਪਾਸੋਤਿ ਮਾਰੇਨ ਗਹਿਤਤਾਯ ਰਾਗੋ ਮਾਰਪਾਸੋ.

੧੦੬੬. ਸਙ੍ਖਾਰੇਸੁ ਉਪ੍ਪਨ੍ਨੋ ਕਮ੍ਮਪਥਭੇਦਂ ਨ ਕਰੋਤੀਤਿ ਏਤੇਨ ਸਤ੍ਤੇਸੁ ਉਪ੍ਪਨ੍ਨੋ ਅਟ੍ਠਾਨਕੋਪੋ ਕਰੋਤੀਤਿ ਵਿਞ੍ਞਾਯਤਿ. ‘‘ਅਤ੍ਥਂ ਮੇ ਨਾਚਰਿ, ਨ ਚਰਤਿ, ਨ ਚਰਿਸ੍ਸਤਿ, ਪਿਯਸ੍ਸ ਮੇ ਮਨਾਪਸ੍ਸ ਅਤ੍ਥਂ ਨਾਚਰਿ, ਨ ਚਰਤਿ, ਨ ਚਰਿਸ੍ਸਤਿ, ਅਪ੍ਪਿਯਸ੍ਸ ਮੇ ਅਮਨਾਪਸ੍ਸ ਅਨਤ੍ਥਂ ਨਾਚਰਿ, ਨ ਚਰਤਿ, ਨ ਚਰਿਸ੍ਸਤੀ’’ਤਿ ਉਪ੍ਪਜ੍ਜਮਾਨੋਪਿ ਹਿ ਕੋਪੋ ਅਵਤ੍ਥੁਸ੍ਮਿਂ ਉਪ੍ਪਨ੍ਨਤ੍ਤਾ ਅਟ੍ਠਾਨਕੋਪੋ ਏਵ ਭਵਿਤੁਂ ਯੁਤ੍ਤੋ. ਆਘਾਤੇਨ੍ਤੋਤਿ ਹਨਨ੍ਤੋ. ਪੁਨਰੁਤ੍ਤਿਦੋਸੋ ਪਟਿਸੇਧਿਤੋਤਿ ਦੋਸ-ਪਦਸ੍ਸ ਪਟਿਵਿਰੋਧ-ਪਦਸ੍ਸ ਚ ਦ੍ਵਿਕ੍ਖਤ੍ਤੁਂ ਆਗਤਤ੍ਤਾ ਵੁਤ੍ਤਂ. ਪਟਿਘਸ੍ਸ ਵਾ ਵਿਸੇਸਨਤ੍ਥਂ ਪੁਬ੍ਬੇ ‘‘ਪਟਿਵਿਰੋਧੋ’’ਤਿ, ਪਦੋਸਾਦਿਵਿਸੇਸਨਤ੍ਥਂ ‘‘ਦੋਸੋ’’ਤਿ ਚ ਵੁਤ੍ਤਂ, ਦੁਸ੍ਸਨਾਦਿਵਿਸੇਸਨਤ੍ਥਂ ਪਚ੍ਛਾ ‘‘ਦੋਸੋ’’ਤਿ, ਵਿਰੋਧਵਿਸੇਸਨਤ੍ਥਞ੍ਚ ‘‘ਪਟਿਵਿਰੋਧੋ’’ਤਿ ਵੁਤ੍ਤਨ੍ਤਿ ਨਤ੍ਥਿ ਪੁਨਰੁਤ੍ਤਿਦੋਸੋ.

੧੦੯੧. ਅਨਿਦ੍ਧਾਰਿਤਪਰਿਚ੍ਛੇਦੇ ਧਮ੍ਮਾਨਂ ਅਤ੍ਥਿਤਾਮਤ੍ਤਦੀਪਕੇ ਮਾਤਿਕੁਦ੍ਦੇਸੇ ਅਪਰਿਚ੍ਛੇਦੇਨ ਬਹੁਵਚਨੇਨ ਉਦ੍ਦੇਸੋ ਕਤੋਤਿ ਬਹੁਵਚਨੇਨੇਵ ਪੁਚ੍ਛਤਿ – ‘‘ਕਤਮੇ ਧਮ੍ਮਾ ਅਪ੍ਪਚ੍ਚਯਾ’’ਤਿ. ਸਭਾਵਸਙ੍ਖਾਪਰਿਚ੍ਛੇਦਾਦਿਵਸੇਨ ਹਿ ਧਮ੍ਮੇ ਅਜਾਨਨ੍ਤਸ੍ਸ ਵਸੇਨ ਉਦ੍ਦੇਸੋ ਪੁਚ੍ਛਾ ਚ ਕਰੀਯਤੀਤਿ. ਤਸ੍ਮਾ ਪਰਿਚ੍ਛੇਦਂ ਅਕਤ੍ਵਾ ਉਦ੍ਦਿਟ੍ਠਾ ਪੁਚ੍ਛਿਤਾ ਚ. ਇਮੇਤਿ ਅਸਙ੍ਖਤਧਾਤੁਤੋ ਉਦ੍ਧਂ ਨਤ੍ਥੀਤਿ ਦੀਪਨਤ੍ਥਂ ਏਕਮ੍ਪਿ ਤਂ ਨਿਦ੍ਦਿਸਿਤ੍ਵਾ ਬਹੁਵਚਨੇਨੇਵ ਨਿਗਮਨਂ ਕਤਂ ਨਿਦ੍ਦੇਸਤੋ ਪੁਬ੍ਬੇ ਬੋਧਨੇਯ੍ਯਸ੍ਸ ਅਜਾਨਨਕਾਲਂ ਉਪਾਦਾਯ.

੧੧੦੧. ਕਿਂ ਪਨ ਨਤ੍ਥਿ, ਕਿਂ ਤੇਨ ਨ ਵੁਤ੍ਤਾਤਿ ਯੋਜਨਾ ਕਾਤਬ੍ਬਾ. ਇਦਮੇਵ ਮਨੋਵਿਞ੍ਞੇਯ੍ਯਨ੍ਤਿ ਨਿਯਮਾਭਾਵੋ ਵਵਤ੍ਥਾਨਾਭਾਵੋ. ਚਕ੍ਖੁਵਿਞ੍ਞਾਣਾਦਿਵਿਞ੍ਞੇਯ੍ਯਮੇਵ ਚਕ੍ਖਾਦਿਵਿਞ੍ਞੇਯ੍ਯਨ੍ਤਿ ਪਾਲ਼ਿਯਂ ਵੁਤ੍ਤਨ੍ਤਿ ਮਨੋਵਿਞ੍ਞਾਣਵਿਞ੍ਞੇਯ੍ਯੇਨਪਿ ਮਨੋਵਿਞ੍ਞੇਯ੍ਯੇਨ ਭਵਿਤਬ੍ਬਨ੍ਤਿ ਕਤ੍ਵਾ ਅਟ੍ਠਕਥਾਯ ‘‘ਕਿਂ ਪਨ ਮਨੋਵਿਞ੍ਞਾਣੇਨਾ’’ਤਿਆਦਿ ਵੁਤ੍ਤਂ. ਕੇਹਿਚਿ ਵਿਞ੍ਞੇਯ੍ਯਾ ਕੇਹਿਚਿ ਅਵਿਞ੍ਞੇਯ੍ਯਾਤਿ ਇਦਂ ਕਾਮਾਵਚਰਂ ਮਨੋਵਿਞ੍ਞਾਣਂ ਆਰਮ੍ਮਣਾਦਿਵਸੇਨ ਭਿਨ੍ਦਿਤ੍ਵਾ ਯੋਜੇਤਬ੍ਬਂ. ਰੂਪਾਵਚਰਾਦਿਆਰਮ੍ਮਣੇਨ ਹਿ ਕਾਮਾਵਚਰਮਨੋਵਿਞ੍ਞਾਣੇਨ ਰੂਪਰਾਗਾਦਿਸਮ੍ਪਯੁਤ੍ਤੇਨ ਚ ਕਾਮਾਵਚਰਧਮ੍ਮਾ ਨ ਵਿਞ੍ਞੇਯ੍ਯਾ, ਇਤਰੇਨ ਚ ਵਿਞ੍ਞੇਯ੍ਯਾ. ਏਵਂ ਕਾਮਾਵਚਰਾਨਮੇਵ ਆਰਮ੍ਮਣਾਨਂ ਕੇਸਞ੍ਚਿ ਸਦ੍ਦਾਦੀਨਂ ਰੂਪਾਰਮ੍ਮਣਾਦੀਹਿ ਅਵਿਞ੍ਞੇਯ੍ਯਤਾ ਵਿਞ੍ਞੇਯ੍ਯਤਾ ਚ ਯੋਜੇਤਬ੍ਬਾ, ਤਥਾ ਦ੍ਵਾਰਭੇਦਵਸੇਨ. ਅਥ ਵਾ ਸੋਮਨਸ੍ਸਸਹਗਤਸਨ੍ਤੀਰਣਂ ਇਟ੍ਠਾਰਮ੍ਮਣਮੇਵਾਤਿ ਇਤਰਂ ਤੇਨ ਨ ਵਿਞ੍ਞੇਯ੍ਯਂ. ਏਵਂ ਉਪੇਕ੍ਖਾਸਹਗਤੇ ਕੁਸਲਵਿਪਾਕੇ ਅਕੁਸਲਵਿਪਾਕੇ ਚਾਤਿ ਸਬ੍ਬਤ੍ਥ ਯਥਾਯੋਗਂ ਯੋਜੇਤਬ੍ਬਂ. ਰੂਪਾਵਚਰਾਦਯੋ ਕਾਮਾਵਚਰਵਿਪਾਕਾਦੀਹਿ ਅਵਿਞ੍ਞੇਯ੍ਯਾ, ਕੇਚਿਦੇਵ ਵਿਞ੍ਞੇਯ੍ਯਾ ਅਰੂਪਾਵਚਰੇਹੀਤਿ ਯੋਜੇਤਬ੍ਬਂ ਅਨੁਵਤ੍ਤਮਾਨਤ੍ਤਾ. ਨਿਬ੍ਬਾਨੇਨ ਅਵਿਞ੍ਞੇਯ੍ਯਤ੍ਤਾਤਿ ‘‘ਕੇਹਿਚਿ ਅਵਿਞ੍ਞੇਯ੍ਯਾ’’ਤਿ ਇਮਸ੍ਸ ਪਦਸ੍ਸ ਅਤ੍ਥਸਮ੍ਭਵਮਤ੍ਤਂ ਸਨ੍ਧਾਯ ਵੁਤ੍ਤਂ, ਨ ਨਿਬ੍ਬਾਨਸ੍ਸ ਅਨੁਵਤ੍ਤਮਾਨਮਨੋਵਿਞ੍ਞਾਣਭਾਵਤੋ.

੧੧੦੨. ਪਞ੍ਚਕਾਮਗੁਣਿਕਰਾਗੋਤਿ ਉਕ੍ਕਟ੍ਠਵਸੇਨ ਵੁਤ੍ਤਂ. ਭਵਾਸਵਂ ਠਪੇਤ੍ਵਾ ਸਬ੍ਬੋ ਲੋਭੋ ਕਾਮਾਸਵੋਤਿ ਯੁਤ੍ਤਂ ਸਿਯਾ. ਸਸ੍ਸਤਦਿਟ੍ਠਿਸਹਗਤੋ ਰਾਗੋ ਭਵਦਿਟ੍ਠਿਸਮ੍ਪਯੁਤ੍ਤਤ੍ਤਾ ‘‘ਭਵਾਸਵੋ’’ਤਿ ਅਟ੍ਠਕਥਾਯਂ ਵੁਤ੍ਤੋ. ਭਵਾਸਵੋ ਪਨ ‘‘ਦਿਟ੍ਠਿਗਤਵਿਪ੍ਪਯੁਤ੍ਤੇਸੁ ਏਵ ਉਪ੍ਪਜ੍ਜਤੀ’’ਤਿ ਪਾਲ਼ਿਯਂ ਵੁਤ੍ਤੋ. ਸੋਪਿ ਰਾਗੋ ਕਾਮਾਸਵੋ ਭਵਿਤੁਂ ਯੁਤ੍ਤੋ. ਦਿਟ੍ਠਧਮ੍ਮਿਕਸਮ੍ਪਰਾਯਿਕਦੁਕ੍ਖਾਨਂ ਕਾਰਣਭੂਤਾ ਕਾਮਾਸਵਾਦਯੋਪਿ ਦ੍ਵਿਧਾ ਵੁਤ੍ਤਾ.

੧੧੦੩. ਕਾਮਾਸਵਨਿਦ੍ਦੇਸੇ ਚ ਕਾਮੇਸੂਤਿ ਕਾਮਰਾਗਦਿਟ੍ਠਿਰਾਗਾਦਿਆਰਮ੍ਮਣਭੂਤੇਸੁ ਤੇਭੂਮਕੇਸੁ ਵਤ੍ਥੁਕਾਮੇਸੂਤਿ ਅਤ੍ਥੋ ਸਮ੍ਭਵਤਿ. ਤਤ੍ਥ ਹਿ ਉਪ੍ਪਜ੍ਜਮਾਨਾ ਸਾ ਤਣ੍ਹਾ ਸਬ੍ਬਾਪਿ ਨ ਕਾਮਚ੍ਛਨ੍ਦਾਦਿਨਾਮਂ ਨ ਲਭਤੀਤਿ. ਕਤ੍ਤੁਕਮ੍ਯਤਾਛਨ੍ਦੋ ਅਕੁਸਲੇਪਿ ਉਪ੍ਪਜ੍ਜਤਿ, ਨ ਪਨ ਧਮ੍ਮਚ੍ਛਨ੍ਦੋ.

੧੧੦੫. ਅਞ੍ਞਂ ਜੀਵਨ੍ਤਿ ਗਹਣਂ ਯਦਿਪਿ ਉਪਾਦਾਨਕ੍ਖਨ੍ਧੇਸ੍ਵੇਵ ਪਵਤ੍ਤਤਿ, ਰੂਪੇ…ਪੇ… ਵਿਞ੍ਞਾਣੇ ਵਾ ਪਨ ਨ ਪਤਿਟ੍ਠਾਤਿ. ਤਤੋ ਅਞ੍ਞਂ ਕਤ੍ਵਾ ਜੀਵਂ ਗਣ੍ਹਾਤੀਤਿ ਸਸ੍ਸਤਦਿਟ੍ਠਿ ਹੋਤੀਤਿ. ਬ੍ਰਹ੍ਮਾਦਿਂ ਏਕਚ੍ਚਂ ਅਤ੍ਤਾਨਂ ‘‘ਹੋਤੀ’’ਤਿ ਨਿਚ੍ਚਤੋ ਅਞ੍ਞਞ੍ਚ ‘‘ਨ ਹੋਤੀ’’ਤਿ ਅਨਿਚ੍ਚਤੋ ਗਣ੍ਹਨ੍ਤਸ੍ਸ ‘‘ਹੋਤਿ ਚ ਨ ਚ ਹੋਤੀ’’ਤਿ ਏਕਚ੍ਚਸਸ੍ਸਤਦਿਟ੍ਠਿ. ‘‘ਹੋਤੀ’’ਤਿ ਚ ਪੁਟ੍ਠੇ ‘‘ਨੇਵਾ’’ਤਿ, ‘‘ਨ ਹੋਤੀ’’ਤਿ ਚ ਪੁਟ੍ਠੇ ‘‘ਨ’’ਇਤਿ ਸਬ੍ਬਤ੍ਥ ਪਟਿਕ੍ਖਿਪਨ੍ਤਸ੍ਸ ਅਮਰਾਵਿਕ੍ਖੇਪਦਿਟ੍ਠਿ, ਅਮਰਾ ਅਨੁਪਚ੍ਛੇਦਾ, ਅਮਰਮਚ੍ਛਸਦਿਸੀ ਵਾ ਵਿਕ੍ਖੇਪਦਿਟ੍ਠੀਤਿ ਅਤ੍ਥੋ.

ਪਞ੍ਚਕਾਮਗੁਣਿਕੋ ਰਾਗੋ ਕਾਮਾਸਵੋਤਿ ਵੁਤ੍ਤੋਤਿ ਕਤ੍ਵਾ ਬ੍ਰਹ੍ਮਾਨਂ ਵਿਮਾਨਾਦੀਸੁ ਰਾਗਸ੍ਸ ਦਿਟ੍ਠਿਰਾਗਸ੍ਸ ਚ ਕਾਮਾਸਵਭਾਵਂ ਪਟਿਕ੍ਖਿਪਤਿ. ਯਦਿ ਪਨ ਲੋਭੋ ਕਾਮਾਸਵਭਵਾਸਵਵਿਨਿਮੁਤ੍ਤੋ ਅਤ੍ਥਿ, ਸੋ ਯਦਾ ਦਿਟ੍ਠਿਗਤਵਿਪ੍ਪਯੁਤ੍ਤੇਸੁ ਉਪ੍ਪਜ੍ਜਤਿ, ਤਦਾ ਤੇਨ ਸਮ੍ਪਯੁਤ੍ਤੋ ਅਵਿਜ੍ਜਾਸਵੋ ਆਸਵਵਿਪ੍ਪਯੁਤ੍ਤੋਤਿ ਦੋਮਨਸ੍ਸਵਿਚਿਕਿਚ੍ਛੁਦ੍ਧਚ੍ਚਸਮ੍ਪਯੁਤ੍ਤਸ੍ਸ ਵਿਯ ਤਸ੍ਸਪਿ ਆਸਵਵਿਪ੍ਪਯੁਤ੍ਤਤਾ ਵਤ੍ਤਬ੍ਬਾ ਸਿਯਾ ‘‘ਚਤੂਸੁ ਦਿਟ੍ਠਿਗਤਵਿਪ੍ਪਯੁਤ੍ਤੇਸੁ ਲੋਭਸਹਗਤੇਸੁ ਚਿਤ੍ਤੁਪ੍ਪਾਦੇਸੁ ਉਪ੍ਪਨ੍ਨੋ ਮੋਹੋ ਸਿਯਾ ਆਸਵਸਮ੍ਪਯੁਤ੍ਤੋ ਸਿਯਾ ਆਸਵਵਿਪ੍ਪਯੁਤ੍ਤੋ’’ਤਿ. ‘‘ਕਾਮਾਸਵੋ ਅਟ੍ਠਸੁ ਲੋਭਸਹਗਤੇਸੁ ਚਿਤ੍ਤੁਪ੍ਪਾਦੇਸੁ ਉਪ੍ਪਜ੍ਜਤੀ’’ਤਿ, ‘‘ਕਾਮਾਸਵਂ ਪਟਿਚ੍ਚ ਦਿਟ੍ਠਾਸਵੋ ਅਵਿਜ੍ਜਾਸਵੋ’’ਤਿ (ਪਟ੍ਠਾ. ੩.੩.੧) ਚ ਵਚਨਤੋ ਦਿਟ੍ਠਿਸਹਗਤੋ ਰਾਗੋ ਕਾਮਾਸਵੋ ਨ ਹੋਤੀਤਿ ਨ ਸਕ੍ਕਾ ਵਤ੍ਤੁਂ. ਕਿਲੇਸਪਟਿਪਾਟਿਯਾਪਿ ਆਹਰਿਤੁਂ ਵਟ੍ਟਤੀਤਿ ਆਸਵਾਨਂ ਵਚਨਂ ਪਹਾਤਬ੍ਬਦਸ੍ਸਨਤ੍ਥਨ੍ਤਿ ਕਤ੍ਵਾ ਤੇ ਪਹਾਨੇ ਆਹਰਿਯਮਾਨਾ ਪਹਾਤਬ੍ਬਾਨਮ੍ਪਿ ਤੇਸਂ ਕਿਲੇਸਾਨਂ ਉਦ੍ਦੇਸਕ੍ਕਮੇਨ ਆਹਰਿਤੁਂ ਵਟ੍ਟਨ੍ਤਿ ਪਜਹਨਕਾਨਂ ਮਗ੍ਗਾਨਮ੍ਪੀਤਿ ਅਤ੍ਥੋ.

੧੧੨੧. ਪਠਮਕਮਾਨਭਾਜਨੀਯੇਤਿ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨਸ੍ਸ ਨਿਦ੍ਦੇਸੇ. ਤਤ੍ਥ ਹਿ ‘‘ਏਕਚ੍ਚੋ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਾ ਵਤ੍ਥੁਨਾ ਮਾਨਂ ਜਪ੍ਪੇਤਿ, ਯੋ ਏਵਰੂਪੋ ਮਾਨੋ ਮਞ੍ਞਨਾ…ਪੇ… ਕੇਤੁਕਮ੍ਯਤਾ ਚਿਤ੍ਤਸ੍ਸਾ’’ਤਿ (ਵਿਭ. ੮੬੬) ਸੇਯ੍ਯਸ੍ਸ ਸਦਿਸਸ੍ਸ ਹੀਨਸ੍ਸ ਚ ਪਵਤ੍ਤਮਾਨੋ ਪੁਗ੍ਗਲਵਿਸੇਸਂ ਅਨਾਮਸਿਤ੍ਵਾ ਸੇਯ੍ਯਮਾਨੋ ਵਿਭਤ੍ਤੋਤਿ ਇਮਮਤ੍ਥਂ ਸਨ੍ਧਾਯ ‘‘ਏਕੋ ਮਾਨੋ ਤਿਣ੍ਣਂ ਜਨਾਨਂ ਉਪ੍ਪਜ੍ਜਤੀਤਿ ਕਥਿਤੋ’’ਤਿ ਆਹ. ਨ ਕੇਵਲਞ੍ਚਾਯਂ ਪਠਮਕਮਾਨਭਾਜਨੀਯੇ ਏਵ ਏਵਂ ਕਥਿਤੋ, ਦੁਤਿਯਕਤਤਿਯਕਮਾਨਭਾਜਨੀਯੇਪਿ ਕਥਿਤੋ ਏਵਾਤਿ ਨਿਦਸ੍ਸਨਮਤ੍ਥਂ ਏਤਂ ਦਟ੍ਠਬ੍ਬਂ. ਅਥ ਵਾ ਪੁਗ੍ਗਲੇ ਅਨਿਸ੍ਸਾਯ ਵੁਤ੍ਤਾਨਂ ਤਿਣ੍ਣਮ੍ਪਿ ਮਾਨਾਨਂ ਭਾਜਨੀਯਂ ‘‘ਪਠਮਕਮਾਨਭਾਜਨੀਯੇ’’ਤਿ ਆਹ. ਸੇਯ੍ਯਸ੍ਸ ‘‘ਸੇਯ੍ਯੋਹਮਸ੍ਮੀਤਿ ਮਾਨੋ’’ਤਿਆਦੀਨਞ੍ਹਿ ਪੁਗ੍ਗਲਂ ਆਮਸਿਤ੍ਵਾ ਵੁਤ੍ਤਾਨਂ ਨਵਨ੍ਨਂ ਮਾਨਾਨਂ ਭਾਜਨੀਯਂ ਦੁਤਿਯਕਮਾਨਭਾਜਨੀਯਂ ਹੋਤਿ, ਤਸ੍ਸ ਮਾਨਰਾਸਿਸ੍ਸ ਪੁਗ੍ਗਲਂ ਅਨਾਮਸਿਤ੍ਵਾ ਵੁਤ੍ਤਮਾਨਰਾਸਿਤੋ ਦੁਤਿਯਤਤਿਯਕਤ੍ਤਾਤਿ, ਅਥਾਪਿ ਚ ਯਥਾਵੁਤ੍ਤੇ ਦੁਤਿਯਕਮਾਨਭਾਜਨੀਯੇ ‘‘ਏਕੇਕਸ੍ਸ ਤਯੋ ਤਯੋ ਮਾਨਾ ਉਪ੍ਪਜ੍ਜਨ੍ਤੀਤਿ ਕਥਿਤ’’ਨ੍ਤਿ ਇਧ ਵੁਤ੍ਤਾਯ ਅਤ੍ਥਵਣ੍ਣਨਾਯ ਸਮਾਨਦਸ੍ਸਨਤ੍ਥਂ ‘‘ਪਠਮਕਮਾਨਭਾਜਨੀਯੇ’’ਤਿ ਵੁਤ੍ਤਂ. ਸੋ ਏਵ ਮਾਨੋ ਇਧਾਗਤੋਤਿ ਤਤ੍ਥ ਕਥਿਤੋ ਏਵ ਅਤ੍ਥੋ ਯੁਜ੍ਜਤੀਤਿ ਅਧਿਪ੍ਪਾਯੋ. ਮਾਨਕਰਣਵਸੇਨਾਤਿ ‘‘ਸੇਯ੍ਯੋ’’ਤਿਆਦਿਕਿਚ੍ਚਕਰਣਵਸੇਨ. ਅਪਰਾਪਰੇ ਉਪਾਦਾਯਾਤਿ ਇਦਂ ਪੁਰਿਮਪੁਰਿਮਾ ਮਾਨਾ ਅਪਰਾਪਰੇ ਉਪਨਿਸ੍ਸਯਭਾਵੇਨ ਤੇ ਉਪ੍ਪਾਦੇਨ੍ਤਾ ਅਚ੍ਚੁਗ੍ਗਚ੍ਛਨ੍ਤੀਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ. ਕੇਤੁਕਮ੍ਯਤਾਚਿਤ੍ਤਂ ਅਚ੍ਚੁਗ੍ਗਤਭਾਵਂ ਗਚ੍ਛਤੀਤਿ ਕਤ੍ਵਾ ਚਿਤ੍ਤੇਨੇਵ ਵਿਸੇਸਿਤਂ.

੧੧੨੬. ਅਕ੍ਖਮਨਭਾਵਪ੍ਪਕਾਸਨਂ ਖਿਯ੍ਯਨਂ. ਮਨੇਨ ਪਿਯਕਰਣਨ੍ਤਿ ਏਵਂਪਕਾਰਂ ਪੂਜਨਂ ਮਾਨਨਨ੍ਤਿ ਵੁਚ੍ਚਤੀਤਿ ਅਤ੍ਥੋ. ਇਸ੍ਸਾਕਰਣਵਸੇਨਾਤਿ ਲਾਭਾਦਿਅਕ੍ਖਮਨਕਿਚ੍ਚਵਸੇਨ.

੧੧੨੭. ਅਰਿਯਸਾਵਕਾਤਿ ਵਚਨਂ ‘‘ਅਰਿਯਸਾਵਕਾਨਂਯੇਵ ਪਟਿਵੇਧੋ ਅਤ੍ਥਿ, ਤੇ ਚ ਤਂ ਨ ਮਚ੍ਛਰਾਯਨ੍ਤੀ’’ਤਿ ਪਟਿਵੇਧਧਮ੍ਮੇ ਮਚ੍ਛਰਿਯਾਭਾਵਦਸ੍ਸਨਤ੍ਥਂ. ਗਨ੍ਥੋਤਿ ਪਾਲ਼ਿ. ਕਥਾਮਗ੍ਗੋਤਿ ਅਟ੍ਠਕਥਾਪਬਨ੍ਧੋ. ਧਮ੍ਮਨ੍ਤਰਨ੍ਤਿ ਕੁਸਲਾਦਿਧਮ੍ਮਂ ਭਿਨ੍ਦਿਤ੍ਵਾ ਅਕੁਸਲਾਦਿਂ ਅਤ੍ਤਨੋ ਲੋਲਤਾਯ ਤਥਾਗਤਭਾਸਿਤਂ ਤਿਤ੍ਥਿਯਭਾਸਿਤਂ ਵਾ ਕਰੋਨ੍ਤੋ ਆਲੋਲੇਸ੍ਸਤਿ. ਅਤ੍ਤਾਨਂ ਆਵਿਕਤ੍ਵਾਤਿ ਅਤ੍ਤਾਨਂ ਅਞ੍ਞਥਾ ਸਨ੍ਤਂ ਅਞ੍ਞਥਾ ਪਵੇਦਯਿਤ੍ਵਾ. ਯੋ ਪਨਾਤਿ ਤਿਤ੍ਥਿਯੋ ਗਹਟ੍ਠੋ ਵਾ ਅਤ੍ਤਨੋ ਸਮਯਸ੍ਸ ਸਦੋਸਭਾਵਂ ਦਟ੍ਠੁਂ ਅਨਿਚ੍ਛਨ੍ਤੋ ਅਞ੍ਞਾਣੇਨ ਅਭਿਨਿਵੇਸੇਨ ਵਾ.

ਬ੍ਯਾਪਿਤੁਮਨਿਚ੍ਛੋਤਿ ਵਿਵਿਚ੍ਛੋ, ਤਸ੍ਸ ਭਾਵੋ ਵੇਵਿਚ੍ਛਂ. ਅਨਾਦਰੋਤਿ ਮਚ੍ਛਰਿਯੇਨ ਦਾਨੇ ਆਦਰਰਹਿਤੋ. ਕਟਚ੍ਛੁਨਾ ਗਾਹੋ ਭਤ੍ਤਸ੍ਸ ਕਟਚ੍ਛੁਗ੍ਗਾਹੋ, ਕਟਚ੍ਛੁਗ੍ਗਾਹੋ ਵਿਯ ਕਟਚ੍ਛੁਗ੍ਗਾਹੋ. ਯਥਾ ਹਿ ਕਟਚ੍ਛੁਗ੍ਗਾਹੋ ਯਥਾਵੁਤ੍ਤੇ ਭਤ੍ਤੇ ਨ ਸਂਪਸਾਰਯਤਿ, ਏਵਂ ਮਚ੍ਛਰਿਯਮ੍ਪਿ ਆਵਾਸਾਦੀਸੂਤਿ. ਗਯ੍ਹਤਿ ਏਤੇਨਾਤਿ ਵਾ ਗਾਹੋ, ਕਟਚ੍ਛੁ ਏਵ ਗਾਹੋ ਕਟਚ੍ਛੁਗ੍ਗਾਹੋ. ਸੋ ਯਥਾ ਸਙ੍ਕੁਟਿਤਗ੍ਗੋ ਨ ਸਂਪਸਾਰਯਤਿ, ਏਵਂ ਮਚ੍ਛਰਿਯਮ੍ਪੀਤਿ. ਆਵਰਿਤ੍ਵਾ ਗਹਿਤਂ ਅਗ੍ਗਹਿਤਂ, ਤਸ੍ਸ ਭਾਵੋ ਅਗ੍ਗਹਿਤਤ੍ਤਂ, ਮਚ੍ਛਰਿਯਂ. ‘‘ਆਵਾਸਾਦਿ ਪਰੇਹਿ ਸਾਧਾਰਣਮਸਾਧਾਰਣਂ ਵਾ ਮਯ੍ਹੇਵ ਹੋਤੂ’’ਤਿ ਪਵਤ੍ਤਿਵਸੇਨ ਅਤ੍ਤਸਮ੍ਪਤ੍ਤਿਗ੍ਗਹਣਲਕ੍ਖਣਤਾ, ‘‘ਮਾ ਅਞ੍ਞਸ੍ਸਾ’’ਤਿ ਪਵਤ੍ਤਿਵਸੇਨ ਅਤ੍ਤਸਮ੍ਪਤ੍ਤਿਨਿਗੂਹਣਲਕ੍ਖਣਤਾ ਚ ਯੋਜੇਤਬ੍ਬਾ. ਯਂ ਪਨ ‘‘ਪਰਸਨ੍ਤਕਂ ਗਣ੍ਹਿਤੁਕਾਮੋ’’ਤਿ ਵੁਤ੍ਤਂ, ਤਂ ਮਚ੍ਛਰਿਯਸ੍ਸ ਪਰਸਨ੍ਤਕਲੋਭਸ੍ਸ ਉਪਨਿਸ੍ਸਯਭਾਵਂ ਦਸ੍ਸੇਤੁਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਯਦਿ ਹਿ ਤਂ ਮਚ੍ਛਰਿਯਪ੍ਪਵਤ੍ਤਿਦਸ੍ਸਨਂ, ਪਰਸਮ੍ਪਤ੍ਤਿਗ੍ਗਹਣਲਕ੍ਖਣਤਾ ਚ ਵਤ੍ਤਬ੍ਬਾ ਸਿਯਾਤਿ.

੧੧੪੦. ਅਭਿਜ੍ਝਾਕਾਮਰਾਗਾਨਂ ਵਿਸੇਸੋ ਆਸਵਦ੍ਵਯਏਕਾਸਵਭਾਵੋ ਸਿਯਾ, ਨਅਭਿਜ੍ਝਾਯ ਨੋਆਸਵਭਾਵੋ ਚਾਤਿ ਨੋਆਸਵਲੋਭਸ੍ਸ ਸਬ੍ਭਾਵੋ ਵਿਚਾਰੇਤਬ੍ਬੋ. ਨ ਹਿ ਅਤ੍ਥਿ ‘‘ਆਸਵੋ ਚ ਨੋਆਸਵੋ ਚ ਧਮ੍ਮਾ ਆਸਵਸ੍ਸ ਧਮ੍ਮਸ੍ਸ ਆਸਵਸ੍ਸ ਚ ਨੋਆਸਵਸ੍ਸ ਚ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ’’ਤਿ ਸਤ੍ਤਮੋ ਚ ਨਵਮੋ ਚ ਪਞ੍ਹੋ. ਗਣਨਾਯ ਚ ‘‘ਹੇਤੁਯਾ ਸਤ੍ਤਾ’’ਤਿ ਵੁਤ੍ਤਂ, ਨ ‘‘ਨਵਾ’’ਤਿ. ਦਿਟ੍ਠਿਸਮ੍ਪਯੁਤ੍ਤੇ ਪਨ ਲੋਭੇ ਨੋਆਸਵੇ ਵਿਜ੍ਜਮਾਨੇ ਸਤ੍ਤਮਨਵਮਾਪਿ ਪਞ੍ਹਵਿਸ੍ਸਜ੍ਜਨਂ ਲਭੇਯ੍ਯੁਂ, ਗਣਨਾ ਚ ‘‘ਹੇਤੁਯਾ ਨਵਾ’’ਤਿ ਵਤ੍ਤਬ੍ਬਾ ਸਿਯਾ. ਦਿਟ੍ਠਿਵਿਪ੍ਪਯੁਤ੍ਤੇ ਚ ਲੋਭੇ ਨੋਆਸਵੇ ਵਿਜ੍ਜਮਾਨੇ ਪੁਬ੍ਬੇ ਦਸ੍ਸਿਤੋ ਦੋਸੋਤਿ.

੧੧੫੯. ਕਾਮਚ੍ਛਨ੍ਦਨੀਵਰਣਨਿਦ੍ਦੇਸੇ ਕਾਮੇਸੂਤਿ ਤੇਭੂਮਕੇਸੁ ਸਾਸਵੇਸੁ ਸਬ੍ਬੇਸੁ ਵਤ੍ਥੁਕਾਮੇਸੁ. ਸਬ੍ਬੋ ਹਿ ਲੋਭੋ ਕਾਮਚ੍ਛਨ੍ਦਨੀਵਰਣਂ. ਤੇਨੇਵ ਤਸ੍ਸ ਆਰੁਪ੍ਪੇ ਉਪ੍ਪਤ੍ਤਿ ਵੁਤ੍ਤਾ ‘‘ਨੀਵਰਣਂ ਧਮ੍ਮਂ ਪਟਿਚ੍ਚ ਨੀਵਰਣੋ ਧਮ੍ਮੋ ਉਪ੍ਪਜ੍ਜਤਿ ਨ ਪੁਰੇਜਾਤਪਚ੍ਚਯਾ. ਆਰੁਪ੍ਪੇ ਕਾਮਚ੍ਛਨ੍ਦਨੀਵਰਣਂ ਪਟਿਚ੍ਚ ਉਦ੍ਧਚ੍ਚਨੀਵਰਣਂ ਅਵਿਜ੍ਜਾਨੀਵਰਣਂ. ਆਰੁਪ੍ਪੇ ਕਾਮਚ੍ਛਨ੍ਦਨੀਵਰਣਂ ਪਟਿਚ੍ਚ ਥਿਨਮਿਦ੍ਧਨੀਵਰਣਂ ਉਦ੍ਧਚ੍ਚਨੀਵਰਣਂ ਅਵਿਜ੍ਜਾਨੀਵਰਣ’’ਨ੍ਤਿ (ਪਟ੍ਠਾ. ੩.੮.੧).

੧੧੬੨. ਇਰਿਯਾਪਥਿਕਚਿਤ੍ਤਨ੍ਤਿ ਇਰਿਯਾਪਥੂਪਤ੍ਥਮ੍ਭਕਂ ਅਟ੍ਠਪਞ੍ਞਾਸਵਿਧਂ ਚਿਤ੍ਤਂ. ਤਤ੍ਥ ਪਨ ਬਲਵਥਿਨਮਿਦ੍ਧਸਹਗਤਂ ਚਿਤ੍ਤਂ ‘‘ਇਰਿਯਾਪਥਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤ’’ਨ੍ਤਿ ਵੁਤ੍ਤਂ. ਓਲੀਯਤੀਤਿ ਓਲਮ੍ਬਤਿ.

੧੧੬੩. ਓਨਯ੍ਹਤੀਤਿ ਛਾਦੇਤਿ, ਅਵਤ੍ਥਰਤਿ ਵਾ. ਨਾਨਾਰਮ੍ਮਣੇਸੁ ਪਵਤ੍ਤਿਨਿਵਾਰਣੇਨ, ਵਿਪ੍ਫਾਰਿਕਤਾਨਿਵਾਰਣੇਨੇਵ ਵਾ ਅਨ੍ਤੋਸਮੋਰੋਧੋ. ਏਕਚ੍ਚਾਨਨ੍ਤਿ ਸਿਰੀਸਾਦਿਰੁਕ੍ਖਾਨਂ. ਰੂਪਕਾਯੇਨੇਵ ਸਿਯੁਂ, ਤੇਨ ਸੁਖਪ੍ਪਟਿਸਂਵੇਦਨਨਿਬ੍ਬਾਨਸਚ੍ਛਿਕਿਰਿਯਾਨਂ ਰੂਪਤਾਪਤ੍ਤਿ ਸਿਯਾਤਿ ਅਧਿਪ੍ਪਾਯੋ. ਤਸ੍ਮਾਤਿ ‘‘ਕਾਯਸ੍ਸਾ’’ਤਿ ਵਚਨਸ੍ਸ ਰੂਪਤ੍ਤਾਸਾਧਕਤ੍ਤਾ. ਨ ਹਿ ਨਾਮਕਾਯੋ ਸੁਪਤੀਤਿ ਇਦਂ ਥਿਨਮਿਦ੍ਧਸਮੁਟ੍ਠਿਤਰੂਪੇਹਿ ਰੂਪਕਾਯਸ੍ਸ ਗਰੁਭਾਵਪ੍ਪਤ੍ਤਂ ਅਙ੍ਗਪਚ੍ਚਙ੍ਗਾਦੀਨਂ ਸਂਸੀਦਨਂ ਸੋਪ੍ਪਨ੍ਤਿ ਸਨ੍ਧਾਯ ਵੁਤ੍ਤਂ, ਨ ਜਾਗਰਣਚਿਤ੍ਤਰਹਿਤਂ ਭਵਙ੍ਗਸਨ੍ਤਤਿਨ੍ਤਿ. ਤਸ੍ਸ ਫਲਤ੍ਤਾਤਿ ਫਲੂਪਚਾਰੇਨ ਇਨ੍ਦ੍ਰਿਯਂ ਵਿਯ ਮਿਦ੍ਧਂ ਦਸ੍ਸੇਤੁਂ ਮਿਦ੍ਧਸ੍ਸ ਫਲਤ੍ਤਾ ਇਨ੍ਦ੍ਰਿਯਨਿਦ੍ਦੇਸੇ ਵਿਯ ਲਿਙ੍ਗਾਦੀਨਿ ਮਿਦ੍ਧਨਿਦ੍ਦੇਸੇਪਿ ਸੋਪ੍ਪਾਦੀਨਿ ਵੁਤ੍ਤਾਨੀਤਿ ਅਤ੍ਥੋ.

ਰੂਪਕਾਯਸ੍ਸ ਅਨ੍ਤੋਸਮੋਰੋਧੋ ਨਤ੍ਥੀਤਿ ਸੋ ਨਾਮਕਾਯੇ ਵੁਤ੍ਤੋਤਿ ਵਿਞ੍ਞਾਯਤਿ. ਤੇਨ ਸਹ ਵੁਤ੍ਤਾ ਓਨਾਹਪਰਿਯੋਨਾਹਾ ਚ. ਰੂਪਕਾਯਸ੍ਸ ਵਾ ਵਿਪ੍ਫਾਰਿਕਾਵਿਪ੍ਫਾਰਿਕਭਾਵੋ ਨਾਮ ਅਤ੍ਤਨੋ ਸਭਾਵੇਨ ਨਤ੍ਥਿ, ਨਾਮਕਾਯਸ੍ਸ ਨਾਮਕਾਯੇ ਵਿਪ੍ਫਾਰਿਕੇ ਲਹੁਕੋ, ਅਵਿਪ੍ਫਾਰਿਕੇ ਗਰੁਕੋਤਿ ਅਵਿਪ੍ਫਾਰਿਕਭਾਵੇਨ ਓਨਾਹਨਾਦਿ ਨਾਮਕਾਯਸ੍ਸੇਵ ਹੋਤੀਤਿ ਓਨਾਹਨਾਦਯੋਪਿ ਨਾਮਕਾਯੇ ਵਿਞ੍ਞਾਯਨ੍ਤਿ. ਤੇਨਾਹ ‘‘ਨ ਹਿ ਰੂਪਂ ਨਾਮਕਾਯਸ੍ਸ ਓਨਾਹੋ…ਪੇ… ਹੋਤੀ’’ਤਿ. ਆਵਰਣਭਾਵੋ ਵਿਯ ਹਿ ਓਨਾਹਨਾਦਿਭਾਵੋਪਿ ਨਾਮਕਾਯਸ੍ਸੇਵ ਹੋਤੀਤਿ. ਇਤਰੋ ਅਧਿਪ੍ਪਾਯਂ ਅਜਾਨਨ੍ਤੋ ਮੇਘਾਦੀਹਿ ਰੂਪੇਹਿ ਰੂਪਾਨਂ ਓਨਾਹਨਾਦਿਂ ਪਸ੍ਸਨ੍ਤੋ ‘‘ਨਨੁ ਚਾ’’ਤਿਆਦਿਮਾਹ. ਯਦਿ ਏਵਨ੍ਤਿ ਯਦਿ ਰੂਪਸ੍ਸ ਓਨਾਹਨਾਦਿਤਾ ਸਿਦ੍ਧਾ, ਅਰੂਪਸ੍ਸ ਨ ਸਿਯਾ, ਸੇਤੁਬਨ੍ਧਾਦੀਸੁ ਰੂਪਸ੍ਸ ਆਵਰਣਂ ਦਿਟ੍ਠਨ੍ਤਿ ਆਵਰਣਮ੍ਪਿ ਅਰੂਪਸ੍ਸ ਨ ਭਵੇਯ੍ਯਾਤਿ ਅਤ੍ਥੋ.

ਸੁਰਾਮੇਰਯਪਾਨਂ ਅਕੁਸਲਨ੍ਤਿ ਕਤ੍ਵਾ ਯੁਤ੍ਤੋ ਤਸ੍ਸ ਉਪਕ੍ਕਿਲੇਸਭਾਵੋ, ਸੁਰਾ…ਪੇ… ਪਮਾਦਟ੍ਠਾਨਾਨੁਯੋਗਸ੍ਸ ਚ ਅਕੁਸਲਤ੍ਤਾ ਪਞ੍ਞਾਯ ਦੁਬ੍ਬਲੀਕਰਣਭਾਵੋ ਯੁਤ੍ਤੋ, ਤਥਾਪਿ ਪਰਸ੍ਸ ਅਧਿਪ੍ਪਾਯਂ ਅਨੁਜਾਨਿਤ੍ਵਾ ਸੁਰਾਮੇਰਯਸ੍ਸ ਉਪਕ੍ਕਿਲੇਸਤਾ ਪਞ੍ਞਾਯ ਦੁਬ੍ਬਲੀਕਰਣਤਾ ਚ ਉਪਕ੍ਕਿਲੇਸਾਨਂ ਪਞ੍ਞਾਯ ਦੁਬ੍ਬਲੀਕਰਣਾਨਞ੍ਚ ਪਚ੍ਚਯਤ੍ਤਾ ਫਲਵੋਹਾਰੇਨ ਵੁਤ੍ਤਾਤਿ ਦਸ੍ਸੇਨ੍ਤੋ ਆਹ ‘‘ਨ, ਪਚ੍ਚਯਨਿਦ੍ਦੇਸਤੋ’’ਤਿ. ਏਵਮੇਵ ਖੋਤਿ ਯਥਾ ਜਾਤਰੂਪਸ੍ਸ ਅਯੋ ਲੋਹਂ ਤਿਪੁ ਸੀਸਂ ਸਜ੍ਜਨ੍ਤਿ ਪਞ੍ਚੁਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਂ ਜਾਤਰੂਪਂ ਨ ਚੇਵ ਮੁਦੁ ਹੋਤਿ, ਨ ਚ ਕਮ੍ਮਨਿਯਂ, ਨ ਚ ਪਭਸ੍ਸਰਂ ਪਭਙ੍ਗੁ ਚ, ਨ ਚ ਸਮ੍ਮਾ ਉਪੇਤਿ ਕਮ੍ਮਾਯ, ਏਵਮੇਵ. ਪਚ੍ਚਯਨਿਦ੍ਦੇਸਤੋਤਿ ਉਪਕ੍ਕਿਲੇਸਪਞ੍ਞਾਦੁਬ੍ਬਲੀਕਰਣਾਨਂ ਪਚ੍ਚਯਭਾਵਨਿਦ੍ਦੇਸਤੋ, ਪਚ੍ਚਯੇ ਫਲਨਿਦ੍ਦੇਸਤੋਤਿ ਅਤ੍ਥੋ. ਸਯਮੇਵ ਕਿਲੇਸੋ ਉਪਕ੍ਕਿਲੇਸਨਿਦ੍ਦੇਸੇਸੁ ਨਿਦ੍ਦਿਟ੍ਠੋਤਿ ਅਧਿਪ੍ਪਾਯੋ.

ਨੀਵਰਣਂ ਹੁਤ੍ਵਾਵ ਨੀਵਰਣਸਮ੍ਪਯੁਤ੍ਤੇ ਦਸ੍ਸਿਯਮਾਨੇ ਨ ਨੀਵਰਣਤਾਦਸ੍ਸਨਤ੍ਥੋ ਆਰਮ੍ਭੋ, ਅਥ ਖੋ ਸਿਦ੍ਧਨੀਵਰਣਭਾਵਸ੍ਸ ਨੀਵਰਣਸਮ੍ਪਯੁਤ੍ਤਤਾਦਸ੍ਸਨਤ੍ਥੋਤਿ ਯਥਾਲਾਭਵਸੇਨ ਚ ਅਸਮ੍ਪਯੁਤ੍ਤਸ੍ਸ ਵਚਨਂ ਨ ਯੁਜ੍ਜਤਿ. ਯਥਾ ਹਿ ਤਿਟ੍ਠਨ੍ਤਮ੍ਪਿ ਚਰਨ੍ਤਮ੍ਪੀਤਿ ਸਿਪ੍ਪਿਸਮ੍ਬੁਕਾਦੀਸੁ ਯਥਾਲਾਭਸਮ੍ਭਵਂ ਤਂ ਦ੍ਵਯਂ ਵੁਤ੍ਤਂ, ਨ ਏਵਂ ‘‘ਥਿਨਮਿਦ੍ਧਨੀਵਰਣਂ ਸਮ੍ਪਯੁਤ੍ਤਮ੍ਪਿ ਅਸਮ੍ਪਯੁਤ੍ਤਮ੍ਪੀ’’ਤਿ ਵਚਨਂ ਅਤ੍ਥਿ, ਯਂ ਯਥਾਲਾਭਂ ਸਮ੍ਭਵੇਯ੍ਯਾਤਿ. ਚਿਤ੍ਤਜਸ੍ਸਾਸਮ੍ਭਵਵਚਨਤੋਤਿ ‘‘ਚਤ੍ਤਤ੍ਤਾ’’ਤਿਆਦਿਵਚਨਸ੍ਸ ਝਾਨਕ੍ਖਣੇ ਚਿਤ੍ਤਜਸ੍ਸ ਥਿਨਮਿਦ੍ਧਸ੍ਸ ਅਸਮ੍ਭਵਵਚਨਭਾਵਤੋਤਿ ਅਤ੍ਥੋ, ‘‘ਚਤ੍ਤਤ੍ਤਾ’’ਤਿਆਦਿਵਚਨੇਨ ਵਾ ਅਸਮ੍ਭਵਸ੍ਸ ਵਚਨਤੋ ਪਕਾਸਨਤੋਤਿ ਅਤ੍ਥੋ.

ਕਾਮੇਸੁ ਖੋ ਪਨ…ਪੇ… ਸੁਦਿਟ੍ਠੋਤਿ ਇਮਿਨਾ ਕਾਮਾਦੀਨਵੇ ਅਞ੍ਞਾਣਸ੍ਸ ਪਹਾਨਮਾਹ. ਤਂ ਤਤ੍ਥ ਪਹਾਨਨ੍ਤਿ ਤਂ ਤਤ੍ਥ ਰੂਪੇ ਪਹਾਨਨ੍ਤਿ ਪਹਾਨਂ ਅਪੇਕ੍ਖਿਤ੍ਵਾ ‘‘ਤ’’ਨ੍ਤਿ ਵੁਤ੍ਤਂ, ਤਂ ਵਿਨਯਨਨ੍ਤਿ ਵਾ ਅਤ੍ਥੋ. ਤੇਨ ਰੂਪਸ੍ਸ ਅਪ੍ਪਹਾਤਬ੍ਬਤ੍ਤਮੇਵ ਦਸ੍ਸੇਤਿ, ਨ ਪਨ ‘‘ਛ ਧਮ੍ਮੇ ਪਹਾਯਾ’’ਤਿਆਦੀਸੁ ਮਿਦ੍ਧਸ੍ਸ ਅਪ੍ਪਹਾਤਬ੍ਬਤਾਦਸ੍ਸਨਤੋ ਅਞ੍ਞੋ ਪਕਾਰੋ ਵੁਤ੍ਤੋ. ਨ ਯਥਾ…ਪੇ… ਵੁਤ੍ਤਨ੍ਤਿ ਛ ਧਮ੍ਮਾ ਪਞ੍ਚ ਨੀਵਰਣਾਨਿ ਚ ਯਥਾ ਪਹਾਤਬ੍ਬਾਨੇਵ ਹੋਨ੍ਤਾਨਿ ‘‘ਪਹਾਤਬ੍ਬਾਨੀ’’ਤਿ ਵੁਤ੍ਤਾਨਿ, ਨ ਏਵਂ ਰੂਪਂ ਪਹਾਤਬ੍ਬਮੇਵ ਹੋਨ੍ਤਂ ‘‘ਪਹਾਤਬ੍ਬ’’ਨ੍ਤਿ ਵੁਤ੍ਤਨ੍ਤਿ ਅਤ੍ਥੋ.

ਅਞ੍ਞੇਹਿ ਚ ਸੁਤ੍ਤੇਹੀਤਿ ਵੁਤ੍ਤਸੁਤ੍ਤਾਨਂ ਦਸ੍ਸਨਤ੍ਥਂ ‘‘ਤਥਾ ਹੀ’’ਤਿਆਦਿਮਾਹ. ਕੁਸਲਪ੍ਪਵਤ੍ਤਿਂ ਆਵਰਨ੍ਤੀਤਿ ਆਵਰਣਾ. ਨੀਵਾਰੇਨ੍ਤੀਤਿ ਨੀਵਰਣਾ. ਚਿਤ੍ਤਂ ਅਭਿਭਵਨ੍ਤਾ ਆਰੋਹਨ੍ਤੀਤਿ ਚੇਤਸੋ ਅਜ੍ਝਾਰੁਹਾ. ਆਵਰਣਾਦਿਕਿਚ੍ਚਞ੍ਚ ਅਰੂਪਸ੍ਸੇਵ ਯੁਜ੍ਜਤਿ, ਤਥਾ ਅਨ੍ਧਕਰਣਾਦਿਕਿਚ੍ਚਂ. ਤਤ੍ਥ ਚਤੂਸੁ ਪਦੇਸੁ ਪੁਰਿਮਪੁਰਿਮਸ੍ਸ ਪਚ੍ਛਿਮਪਚ੍ਛਿਮੋ ਅਤ੍ਥੋ. ਸਂਸਾਰਦੁਕ੍ਖਂ ਵਿਘਾਤੋ, ਤਂਜਨਕਤਾਯ ਵਿਘਾਤਪਕ੍ਖਿਕਂ. ਚੇਤਸੋ ਪਰਿਯੁਟ੍ਠਾਨਂ ਅਯੋਨਿਸੋਮਨਸਿਕਾਰਤੋ ਉਪ੍ਪਤ੍ਤਿ ਅਕੁਸਲਰਾਸਿਭਾਵੋ ਚ ਅਰੂਪਸ੍ਸੇਵ ਹੋਤੀਤਿ ਅਰੂਪਮੇਵ ਮਿਦ੍ਧਂ.

੧੧੬੬. ਗਣਭੋਜਨਾਦਿਅਕਪ੍ਪਿਯਭੋਜਨਂ ਕਪ੍ਪਿਯਸਞ੍ਞੀ ਭੁਞ੍ਜਿਤ੍ਵਾ ਪੁਨ ਜਾਨਿਤ੍ਵਾ ਕੋਚਿ ਵਿਪ੍ਪਟਿਸਾਰੀ ਹੋਤਿ, ਅਨਵਜ੍ਜਞ੍ਚ ਭਿਕ੍ਖੁਦਸ੍ਸਨਚੇਤਿਯਵਨ੍ਦਨਾਦਿਂ ਵਜ੍ਜਸਞ੍ਞੀ ਅਕਤ੍ਵਾ ਕਤ੍ਵਾ ਚ ਕੋਚਿ ਅਸ੍ਸਦ੍ਧੋ ਵਿਪ੍ਪਟਿਸਾਰੀ ਹੋਤਿ. ਵਤ੍ਥੁਨ੍ਤਿ ਮੂਲਂ. ਏਵਰੂਪਨ੍ਤਿ ਮੂਲਵਸੇਨ ਏਵਂਪਕਾਰਨ੍ਤਿ ਅਤ੍ਥੋ. ਕੁਕ੍ਕੁਚ੍ਚਪਦਂ ਯੇਵਾਪਨਕੇਸੁ ‘‘ਕੁਚ੍ਛਿਤਂ ਕਤਂ ਕੁਕਤਂ, ਤਸ੍ਸ ਭਾਵੋ’’ਤਿ ਵੁਤ੍ਤਤ੍ਥਮੇਵ. ਕੁਕ੍ਕੁਚ੍ਚਾਯਨਾਕਾਰੋਤਿ ਕੁਕ੍ਕੁਚ੍ਚਭਾਵਨਾਕਾਰੋ ਕੁਕ੍ਕੁਚ੍ਚਕਰਣਾਕਾਰੋ ਕੁਕ੍ਕੁਚ੍ਚਗਮਨਾਕਾਰੋ ਵਾ. ਏਤੇਨ ਕੁਕ੍ਕੁਚ੍ਚਂ ਕਿਰਿਯਭਾਵੇਨ ਦਸ੍ਸੇਤਿ. ‘‘ਕਪ੍ਪਤਿ ਨ ਕਪ੍ਪਤੀ’’ਤਿ ਪਵਤ੍ਤਚਿਤ੍ਤੁਪ੍ਪਾਦੋਵ ਵਿਨਯਕੁਕ੍ਕੁਚ੍ਚਂ.

੧੧੭੬. ਚਿਤ੍ਤਵਿਕ੍ਖਿਪਨਕਿਚ੍ਚਸਾਮਞ੍ਞੇਨ ਉਦ੍ਧਚ੍ਚਂ ਕੁਕ੍ਕੁਚ੍ਚਞ੍ਚ ਸਹ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਕਾਮਚ੍ਛਨ੍ਦਸ੍ਸ ਅਨਾਗਾਮਿਮਗ੍ਗੇਨ ਪਹਾਨਂ ਉਕ੍ਕਟ੍ਠਨੀਵਰਣਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਯਦਿ ਹਿ ਲੋਭੋ ਨੋਨੀਵਰਣੋ ਸਿਯਾ, ‘‘ਨੋਨੀਵਰਣੋ ਧਮ੍ਮੋ ਨੀਵਰਣਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ’’ਤਿਆਦਿ ਵਤ੍ਤਬ੍ਬਂ ਸਿਯਾ, ਨ ਚੇਤਂ ਵੁਤ੍ਤਂ. ਗਣਨਾਯ ਚ ‘‘ਹੇਤੁਯਾ ਚਤ੍ਤਾਰੀ’’ਤਿ ਵੁਤ੍ਤਂ, ਨ ‘‘ਨਵਾ’’ਤਿ. ਤਸ੍ਮਾ ਸਬ੍ਬੋ ਲੋਭੋ ਕਾਮਚ੍ਛਨ੍ਦਨੀਵਰਣਨ੍ਤਿ ਅਰਹਤ੍ਤਮਗ੍ਗੇਨਸ੍ਸ ਪਹਾਨਵਚਨਂ ਯੁਤ੍ਤਂ.

੧੨੧੯. ਕਾਮੋ ਚਾਤਿ ਕਿਲੇਸਕਾਮੋ ਚ. ਪੁਰਿਮਦਿਟ੍ਠਿਂ ਉਤ੍ਤਰਦਿਟ੍ਠਿ ਉਪਾਦਿਯਤੀਤਿ ਪੁਰਿਮਦਿਟ੍ਠਿਂ ‘‘ਸਸ੍ਸਤੋ’’ਤਿ ਗਣ੍ਹਨ੍ਤੀ ਉਪਾਦਿਯਤਿ, ਪੁਰਿਮਦਿਟ੍ਠਿਆਕਾਰੇਨੇਵ ਵਾ ਉਪ੍ਪਜ੍ਜਮਾਨਾ ਉਤ੍ਤਰਦਿਟ੍ਠਿ ਤੇਨੇਵ ਪੁਰਿਮਦਿਟ੍ਠਿਂ ਦਲ਼੍ਹਂ ਕਰੋਨ੍ਤੀ ਤਂ ਉਪਾਦਿਯਤੀਤਿ ਵੁਤ੍ਤਂ. ਗੋਸੀਲਗੋਵਤਾਦੀਨੀਤਿ ਤਥਾਭੂਤਂ ਦਿਟ੍ਠਿਮਾਹ. ਅਭਿਨਿਵੇਸਤੋਤਿ ਅਭਿਨਿਵੇਸਭਾਵਤੋ, ਅਭਿਨਿਵਿਸਨਤੋ ਵਾ. ਅਤ੍ਤਵਾਦਮਤ੍ਤਮੇਵਾਤਿ ਅਤ੍ਤਸ੍ਸ ਅਭਾਵਾ ‘‘ਅਤ੍ਤਾ’’ਤਿ ਇਦਂ ਵਚਨਮਤ੍ਤਮੇਵ. ਉਪਾਦਿਯਨ੍ਤਿ ਦਲ਼੍ਹਂ ਗਣ੍ਹਨ੍ਤਿ. ਕਥਂ? ਅਤ੍ਤਾਤਿ. ਅਤ੍ਤਾਤਿ ਹਿ ਅਭਿਨਿਵਿਸਨ੍ਤਾ ਵਚਨਮੇਵ ਦਲ਼੍ਹਂ ਕਤ੍ਵਾ ਗਣ੍ਹਨ੍ਤੀਤਿ ਅਤ੍ਥੋ. ਏਵਂ ਅਤ੍ਤਵਾਦਮਤ੍ਤਮੇਵ ਉਪਾਦਿਯਨ੍ਤੀਤਿ ਵੁਤ੍ਤਂ. ‘‘ਅਤ੍ਤਵਾਦਮਤ੍ਤ’’ਨ੍ਤਿ ਵਾ ਵਾਚਾਵਤ੍ਥੁਮਤ੍ਤਮਾਹ. ਵਾਚਾਵਤ੍ਥੁਮਤ੍ਤਮੇਵ ਹਿ ‘‘ਅਤ੍ਤਾ’’ਤਿ ਉਪਾਦਿਯਨ੍ਤਿ ਅਤ੍ਥਸ੍ਸ ਅਭਾਵਾਤਿ.

੧੨੨੧. ਦਿਨ੍ਨਨ੍ਤਿ ਦਾਨਮਾਹ, ਤਂ ਅਫਲਤ੍ਤਾ ਰੂਪਂ ਵਿਯ ਦਾਨਂ ਨਾਮ ਨ ਹੋਤੀਤਿ ਪਟਿਕ੍ਖਿਪਤਿ. ਮਹਾਵਿਜਿਤਯਞ੍ਞਸਦਿਸੋ ਯਞ੍ਞੋ ਮਹਾਯਾਗੋ. ਆਮਨ੍ਤੇਤ੍ਵਾ ਹਵਨਂ ਦਾਨਂ ਆਹੁਨਂ, ਪਾਹੁਨਾਨਂ ਅਤਿਥੀਨਂ ਅਤਿਥਿਕਿਰਿਯਾ ਪਾਹੁਨਂ, ਆਵਾਹਾਦੀਸੁ ਮਙ੍ਗਲਤ੍ਥਂ ਦਾਨਂ ਮਙ੍ਗਲਕਿਰਿਯਾ. ਪਰਲੋਕੇ ਠਿਤੋ ਇਮਂ ਲੋਕਂ ‘‘ਨਤ੍ਥੀ’’ਤਿ ਗਣ੍ਹਾਤੀਤਿ ਇਮਂ ਲੋਕਂ ਅਵੇਕ੍ਖਿਤ੍ਵਾ ਪਰਲੋਕੋ, ਪਰਞ੍ਚ ਅਵੇਕ੍ਖਿਤ੍ਵਾ ਅਯਂ ਲੋਕੋ ਹੋਤਿ ਗਨ੍ਤਬ੍ਬਤੋ ਆਗਨ੍ਤਬ੍ਬਤੋ ਚਾਤਿ ਪਰਲੋਕਤੋ ਇਧਾਗਮਨਸ੍ਸ ਅਭਾਵਾ ਤਤ੍ਥੇਵ ਉਚ੍ਛਿਜ੍ਜਨਤੋ ਚਿਤ੍ਤੇਨ ਪਰਲੋਕੇ ਠਿਤੋ ਇਮਂ ਲੋਕਂ ‘‘ਨਤ੍ਥੀ’’ਤਿ ਗਣ੍ਹਾਤੀਤਿ ਅਤ੍ਥੋ ਵੇਦਿਤਬ੍ਬੋ. ਨ ਹਿ ਅਯਂ ਦਿਟ੍ਠਿ ਪਰਲੋਕੇ ਨਿਬ੍ਬਤ੍ਤਸ੍ਸੇਵ ਹੋਤੀਤਿ. ਇਧਲੋਕੇ ਠਿਤੋਤਿ ਏਤ੍ਥਾਪਿ ਅਯਮੇਵ ਨਯੋ. ਅਯਂ ਵਾ ਏਤ੍ਥ ਅਤ੍ਥੋ ‘‘ਸਂਸਰਣਪ੍ਪਦੇਸੋ ਇਧਲੋਕੋ ਚ ਪਰਲੋਕੋ ਚ ਨਾਮ ਕੋਚਿ ਨਤ੍ਥਿ ਸਂਸਰਣਸ੍ਸ ਅਭਾਵਾ ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨਤੋ’’ਤਿ. ਪੁਰਿਮਭਵਤੋ ਪਚ੍ਛਿਮਭਵੇ ਉਪਪਤਨਂ ਉਪਪਾਤੋ, ਸੋ ਯੇਸਂ ਸੀਲਂ, ਤੇ ਓਪਪਾਤਿਕਾ. ਤੇ ਪਨ ਚਵਨਕਾ ਉਪਪਜ੍ਜਨਕਾ ਹੋਨ੍ਤੀਤਿ ਕਤ੍ਵਾ ਆਹ ‘‘ਚਵਨਕਉਪਪਜ੍ਜਨਕਸਤ੍ਤਾ ਨਤ੍ਥੀਤਿ ਗਣ੍ਹਾਤੀ’’ਤਿ. ਅਨੁਲੋਮਪ੍ਪਟਿਪਦਨ੍ਤਿ ਨਿਬ੍ਬਾਨਾਨੁਕੂਲਂ ਸੀਲਾਦਿਪ੍ਪਟਿਪਦਂ.

੧੨੩੬. ਨਿਪ੍ਪਦੇਸਤੋਵ ਗਹਿਤੋਤਿ ਇਮਿਨਾ ਯਂ ਆਸਵਗੋਚ੍ਛਕੇ ਬ੍ਰਹ੍ਮਾਨਂ ਕਪ੍ਪਰੁਕ੍ਖਾਦੀਸੁ ਰਾਗਸ੍ਸ ਚ ਦਿਟ੍ਠਿਰਾਗਸ੍ਸ ਚ ਅਸਙ੍ਗਹਣੇਨ ਨੀਵਰਣਗੋਚ੍ਛਕੇ ਚ ਕਾਮਚ੍ਛਨ੍ਦਸ੍ਸ ਅਨਾਗਾਮਿਮਗ੍ਗੇਨ ਪਹਾਤਬ੍ਬਤਾਦਸ੍ਸਨੇਨ ਸਪ੍ਪਦੇਸਤ੍ਤਂ ਵੁਤ੍ਤਂ, ਤਂ ਨਿਵਾਰਿਤਂ ਹੋਤਿ. ਅਰਹਤ੍ਤਮਗ੍ਗੇਨਾਤਿ ਵਚਨੇਨ ਚਤੂਹਿ ਮਗ੍ਗੇਹਿ ਪਹਾਤਬ੍ਬਤਾ ਵੁਤ੍ਤਾਤਿ ਦਟ੍ਠਬ੍ਬਂ. ਨ ਹਿ ਪੁਰਿਮੇਹਿ ਅਤਨੁਕਤਾ ਮੋਹਾਦਯੋ ਅਰਹਤ੍ਤਮਗ੍ਗੇਨ ਪਹੀਯਨ੍ਤੀਤਿ.

੧੨੮੭. ਨਿਰਤਿਅਤ੍ਥੇਨਾਤਿ ਪੀਤਿਵਿਰਹੇਨ, ਬਲਵਨਿਕਨ੍ਤਿਵਿਰਹੇਨ ਵਾ. ਨ ਹਿ ਦੁਕ੍ਖਾਯ ਵੇਦਨਾਯ ਰਜ੍ਜਨ੍ਤੀਤਿ. ਅਵ-ਸਦ੍ਦੇਨ ਅਵਗਾਹਤ੍ਥੋ ਅਧੋਅਤ੍ਥੋ ਚਾਤਿ ਦ੍ਵਿਧਾ ਅਵ-ਸਦ੍ਦਸ੍ਸ ਅਤ੍ਥੋ ਵੁਤ੍ਤੋ.

੧੩੦੧. ਵਿਚਿਕਿਚ੍ਛਾਸਹਗਤੋ ਮੋਹਰਣੋ ਪਹਾਨੇਕਟ੍ਠੇਨ ਦਿਟ੍ਠਿਸਮ੍ਪਯੁਤ੍ਤੇਨ ਰਾਗਰਣੇਨ ਸਰਣੋ, ਉਦ੍ਧਚ੍ਚਸਹਗਤੋ ਰੂਪਰਾਗਅਰੂਪਰਾਗਸਙ੍ਖਾਤੇਨ. ਅਰਣਵਿਭਙ੍ਗਸੁਤ੍ਤੇ (ਮ. ਨਿ. ੩.੩੩੩) ਪਨ ‘‘ਯੋ ਕਾਮਪਟਿਸਨ੍ਧਿਸੁਖਿਨੋ ਸੋਮਨਸ੍ਸਾਨੁਯੋਗੋ ਹੀਨੋ ਗਮ੍ਮੋ ਪੋਥੁਜ੍ਜਨਿਕੋ ਅਨਰਿਯੋ ਅਨਤ੍ਥਸਂਹਿਤੋ, ਸਦੁਕ੍ਖੋ ਏਸੋ ਧਮ੍ਮੋ ਸਉਪਘਾਤੋ ਸਉਪਾਯਾਸੋ ਸਪਰਿਲ਼ਾਹੋ ਮਿਚ੍ਛਾਪਟਿਪਦਾ. ਤਸ੍ਮਾ ਏਸੋ ਧਮ੍ਮੋ ਸਰਣੋ’’ਤਿਆਦਿਵਚਨਤੋ ਫਲਭੂਤਦੁਕ੍ਖਉਪਘਾਤਉਪਾਯਾਸਪਰਿਲ਼ਾਹਸਭਾਵਭੂਤੋ ਮਿਚ੍ਛਾਪਟਿਪਦਾਭਾਵੋਵ ‘‘ਸਰਣੋ’’ਤਿ ਵਿਞ੍ਞਾਯਤੀਤਿ ਤੇਹਿ ਸਬ੍ਬਾਕੁਸਲਾਨਂ ਸਰਣਤਾ ਸਿਦ੍ਧਾ ਹੋਤੀਤਿ.

ਸੁਤ੍ਤਨ੍ਤਿਕਦੁਕਨਿਕ੍ਖੇਪਕਥਾਵਣ੍ਣਨਾ

੧੩੦੩. ਵਿਵੇਚਿਤਤ੍ਤਾਤਿ ਵਿਸੁਂ ਕਤਤ੍ਤਾ ਪਕਾਸਿਤਤ੍ਤਾ. ਅਸੇਸੇਤ੍ਵਾ ਖੇਪੇਤੀਤਿ ਵਜਿਰਂ ਅਤ੍ਤਨਾ ਪਤਿਤਟ੍ਠਾਨਂ ਅਸੇਸੇਤ੍ਵਾ ਖੇਪੇਤਿ ਪੁਨ ਅਪਾਕਤਿਕਤਾਆਪਾਦਨੇਨ.

੧੩੧੧. ਤਪ੍ਪਤੀਤਿ ਵਿਪ੍ਪਟਿਸਾਰੀ ਹੋਤਿ, ਅਨੁਸੋਚਤਿ ਵਾ.

੧੩੧੩. ਅਹਨ੍ਤਿ ਇਤਿ-ਸਦ੍ਦਪਰੇਨ ਅਹਂ-ਸਦ੍ਦੇਨ ਹੇਤੁਭੂਤੇਨ ਯੋ ਅਤ੍ਥੋ ਵਿਞ੍ਞਾਯਤਿ, ਸੋ ਸਂਕਥੀਯਤਿ, ਉਦੀਰੀਯਤੀਤਿ ਅਤ੍ਥੋ. ਅਞ੍ਞਥਾ ਹਿ ਵੁਚ੍ਚਮਾਨਸ੍ਸ ਵਚਨੇਨ ਪਕਾਸਿਯਮਾਨਸ੍ਸ ਪਦਤ੍ਥਸ੍ਸ ਸਙ੍ਖਾਦਿਭਾਵੇ ਸਬ੍ਬੇਸਂ ਕੁਸਲਾਦਿਧਮ੍ਮਾਨਂ ਅਧਿਵਚਨਾਦਿਤਾ ਸਿਯਾਤਿ. ਭਾਵੋਤਿ ਸਤ੍ਤਵੇਵਚਨਨ੍ਤਿ ਭਣਨ੍ਤਿ, ਧਾਤੁਯਾ ਵਾ ਏਤਂ ਅਧਿਵਚਨਂ. ਦਤ੍ਤੋਤਿ ਏਤ੍ਤਾਵਤਾ ਸਤ੍ਤਪਞ੍ਞਤ੍ਤਿਂ ਦਸ੍ਸੇਤ੍ਵਾ ਅਞ੍ਞਮ੍ਪਿ ਉਪਾਦਾਪਞ੍ਞਤ੍ਤਿਂ ਦਸ੍ਸੇਤੁਂ ‘‘ਮਞ੍ਚੋ’’ਤਿਆਦਿਮਾਹ. ਅਹਨ੍ਤਿ ਚ ਪਵਤ੍ਤਂ ਅਧਿਵਚਨਂ ਵਦਨ੍ਤੇਨ ਸੁਣਨ੍ਤੇਨ ਚ ਪੁਬ੍ਬੇ ਗਹਿਤਸਞ੍ਞੇਨ ਅਤ੍ਥਪ੍ਪਕਾਸਨਭਾਵੇਨ ਵਿਞ੍ਞਾਯਤਿ. ਨ ਹਿ ਤਸ੍ਮਿਂ ਅਵਿਞ੍ਞਾਤੇ ਤਦਤ੍ਥਵਿਜਾਨਨਂ ਅਤ੍ਥੀਤਿ ਵਿਸੇਸੇਨ ਅਧਿਵਚਨਂ ‘‘ਞਾਯਤੀਤਿ ਸਮਞ੍ਞਾ’’ਤਿ ਵੁਤ੍ਤਂ. ਏਤਸ੍ਸਤ੍ਥਸ੍ਸ ਅਹਨ੍ਤਿ ਇਦਂ ਅਧਿਵਚਨਨ੍ਤਿ ਏਵਂ ਵਾ ਸਞ੍ਞਾਗਹਣਵਸੇਨ ਞਾਯਤਿ ਸਮਞ੍ਞਾਯਤਿ ਪਾਕਟਾ ਹੋਤੀਤਿ ਸਮਞ੍ਞਾ. ਪਞ੍ਞਾਪੀਯਤੀਤਿ ਅਹਨ੍ਤਿ ਇਦਂ ਏਤਸ੍ਸ ਅਧਿਵਚਨਨ੍ਤਿ ਏਵਂ ਠਪੀਯਤੀਤਿ ਅਤ੍ਥੋ. ਵੋਹਰੀਯਤੀਤਿ ਵੁਚ੍ਚਤਿ. ਉਦ੍ਧੇਯ੍ਯਨ੍ਤਿ ਉਦ੍ਧਰਿਤਬ੍ਬਂ. ਅਪਿ ਨਾਮਸਹਸ੍ਸਤੋਤਿ ਅਨੇਕੇਹਿਪਿ ਨਾਮਸਹਸ੍ਸੇਹੀਤਿ ਅਤ੍ਥੋ. ਸਯਮੇਵ ਉਪਪਤਨਸੀਲਂ ਨਾਮਂ ‘‘ਓਪਪਾਤਿਕਨਾਮ’’ਨ੍ਤਿ ਵੁਚ੍ਚਤਿ.

ਕਰੀਯਤੀਤਿ ਕਮ੍ਮਂ, ਨਾਮਮੇਵ ਕਮ੍ਮਂ ਨਾਮਕਮ੍ਮਂ. ਤਥਾ ਨਾਮਧੇਯ੍ਯਂ. ਕਰਣਠਪਨਸਦ੍ਦਾਪਿ ਹਿ ਕਮ੍ਮਤ੍ਥਾ ਹੋਨ੍ਤੀਤਿ. ਅਥ ਕਰਣਤ੍ਥਾ, ਕਰੀਯਤਿ ਚ ਠਪੀਯਤਿ ਚ ਏਤੇਨ ਅਤ੍ਥੋ ਏਵਂਨਾਮੋਤਿ ਪਞ੍ਞਾਪੀਯਤੀਤਿ ਕਰਣਂ ਠਪਨਞ੍ਚ ਨਾਮ ਹੋਤਿ. ਅਥ ਭਾਵਤ੍ਥਾ, ਞਾਪਨਮਤ੍ਤਮੇਵ ਕਰਣਂ ਠਪਨਨ੍ਤਿ ਚ ਵੁਤ੍ਤਂ. ਨਾਮਨਿਰੁਤ੍ਤਿ ਨਾਮਬ੍ਯਞ੍ਜਨਨ੍ਤਿ ਨਾਮਮਿਚ੍ਚੇਵ ਵੁਤ੍ਤਂ ਹੋਤਿ. ਨ ਹਿ ਪਥਵੀਸਙ੍ਖਾਤਂ ਅਤ੍ਥਪ੍ਪਕਾਰਮਤ੍ਤਂ ਨਿਵਦਤਿ ਬ੍ਯਞ੍ਜਯਤਿ ਵਾ ਪਥਵੀਤਿ ਨਾਮਂ ਨਿਵਦਤਿ ਬ੍ਯਞ੍ਜਯਤਿ ਵਾ, ਤਸ੍ਮਾ ਅਨਾਮਸ੍ਸ ਨਿਰੁਤ੍ਤਿਬ੍ਯਞ੍ਜਨਭਾਵਨਿਵਾਰਣਤ੍ਥਂ ‘‘ਨਾਮਨਿਰੁਤ੍ਤਿ ਨਾਮਬ੍ਯਞ੍ਜਨ’’ਨ੍ਤਿ ਵੁਤ੍ਤਂ. ਏਵਂ ਨਾਮਾਭਿਲਾਪੋਤਿ ਏਤ੍ਥਾਪਿ ਨਯੋ. ਏਤ੍ਥ ਪਨ ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ ਵੋਹਾਰੋਤਿ ਚਤੂਹਿ ਪਦੇਹਿ ਪਞ੍ਞਾਪਿਤਬ੍ਬਤੋ ਪਞ੍ਞਤ੍ਤਿ ਵੁਤ੍ਤਾ, ਇਤਰੇਹਿ ਪਞ੍ਞਾਪਨਤੋ.

ਤਤ੍ਥ ਚ ‘‘ਪੁਰਿਮਾ ਉਪਾਦਾਪਞ੍ਞਤ੍ਤਿ ਉਪ੍ਪਾਦਵਯਕਿਚ੍ਚਰਹਿਤਾ ਲੋਕਸਙ੍ਕੇਤਸਿਦ੍ਧਾ, ਪਚ੍ਛਿਮਾ ਨਾਮਪਞ੍ਞਤ੍ਤਿ, ਯਾਯ ਪੁਰਿਮਾ ਪਞ੍ਞਤ੍ਤਿ ਰੂਪਾਦਯੋ ਚ ਸੋਤਦ੍ਵਾਰਵਿਞ੍ਞਾਣਸਨ੍ਤਾਨਾਨਨ੍ਤਰਮੁਪ੍ਪਨ੍ਨੇਨ ਗਹਿਤਪੁਬ੍ਬਸਙ੍ਕੇਤੇਨ ਮਨੋਦ੍ਵਾਰਵਿਞ੍ਞਾਣਸਨ੍ਤਾਨੇਨ ਗਹਿਤਾਯ ਪਞ੍ਞਾਪੀਯਨ੍ਤੀ’’ਤਿ ਆਚਰਿਯਾ ਵਦਨ੍ਤਿ. ਏਤਸ੍ਮਿਂ ਪਨ ਇਮਿਸ੍ਸਾ ਪਾਲ਼ਿਯਾ ਅਟ੍ਠਕਥਾਯ ਚ ਅਤ੍ਥੇ ਸਤਿ ਯਂ ਵੁਤ੍ਤਂ ਮਾਤਿਕਾਯਂ ‘‘ਵਚਨਮਤ੍ਤਮੇਵ ਅਧਿਕਾਰਂ ਕਤ੍ਵਾ ਪਵਤ੍ਤਾ ਅਧਿਵਚਨਾ ਨਾਮ, ਸਹੇਤੁਕਂ ਕਤ੍ਵਾ ਵੁਚ੍ਚਮਾਨਾ ਅਭਿਲਾਪਾ ਨਿਰੁਤ੍ਤਿ ਨਾਮ, ਪਕਾਰੇਨ ਞਾਪਨਤੋ ਪਞ੍ਞਤ੍ਤਿ ਨਾਮਾ’’ਤਿ (ਧ. ਸ. ਅਟ੍ਠ. ੧੦੧-੧੦੮), ਤੇਨ ਵਿਰੋਧੋ ਸਿਯਾ. ਨ ਹਿ ਉਪ੍ਪਾਦਵਯਕਿਚ੍ਚਰਹਿਤਸ੍ਸ ਵਚਨਮਤ੍ਤਂ ਅਧਿਕਾਰਂ ਕਤ੍ਵਾ ਪਵਤ੍ਤਿ ਅਤ੍ਥਿ ਉਪ੍ਪਾਦਾਦਿਸਹਿਤਸ੍ਸੇਵ ਪਵਤ੍ਤਿਸਬ੍ਭਾਵਤੋ, ਨ ਚ ਵਚਨਵਚਨਤ੍ਥਵਿਮੁਤ੍ਤਸ੍ਸ ਨਾਮਸ੍ਸ ਨਿਦ੍ਧਾਰੇਤ੍ਵਾ ਸਹੇਤੁਕਂ ਕਤ੍ਵਾ ਵੁਚ੍ਚਮਾਨਤਾ ਅਤ੍ਥਿ, ਨਾਪਿ ਅਨਿਦ੍ਧਾਰਿਤਸਭਾਵਸ੍ਸ ਪਦਤ੍ਥਸ੍ਸ ਤੇਨ ਤੇਨ ਪਕਾਰੇਨ ਞਾਪਨਂ ਅਤ੍ਥੀਤਿ.

ਦੁਵਿਧਾ ਚਾਯਂ ਪਞ੍ਞਤ੍ਤਿ ਯਥਾਵੁਤ੍ਤਪ੍ਪਕਾਰਾਤਿ ਅਟ੍ਠਕਥਾਵਚਨਞ੍ਚ ਨ ਦਿਸ੍ਸਤਿ, ਅਟ੍ਠਕਥਾਯਂ ਪਨ ਵਿਜ੍ਜਮਾਨਪਞ੍ਞਤ੍ਤਿਆਦਯੋ ਛ ਪਞ੍ਞਤ੍ਤਿਯੋਵ ਵੁਤ੍ਤਾ. ਤਤ੍ਥ ‘‘ਰੂਪਂ ਵੇਦਨਾ’’ਤਿਆਦਿਕਾ ਵਿਜ੍ਜਮਾਨਪਞ੍ਞਤ੍ਤਿ. ‘‘ਇਤ੍ਥੀ ਪੁਰਿਸੋ’’ਤਿਆਦਿਕਾ ਅਵਿਜ੍ਜਮਾਨਪਞ੍ਞਤ੍ਤਿ. ‘‘ਤੇਵਿਜ੍ਜੋ ਛਲ਼ਭਿਞ੍ਞੋ’’ਤਿਆਦਿਕਾ ਵਿਜ੍ਜਮਾਨੇਨ ਅਵਿਜ੍ਜਮਾਨਪਞ੍ਞਤ੍ਤਿ. ‘‘ਇਤ੍ਥਿਸਦ੍ਦੋ ਪੁਰਿਸਸਦ੍ਦੋ’’ਤਿਆਦਿਕਾ ਅਵਿਜ੍ਜਮਾਨੇਨ ਵਿਜ੍ਜਮਾਨਪਞ੍ਞਤ੍ਤਿ. ‘‘ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣ’’ਨ੍ਤਿਆਦਿਕਾ ਵਿਜ੍ਜਮਾਨੇਨ ਵਿਜ੍ਜਮਾਨਪਞ੍ਞਤ੍ਤਿ. ‘‘ਖਤ੍ਤਿਯਕੁਮਾਰੋ ਬ੍ਰਾਹ੍ਮਣਕੁਮਾਰੋ’’ਤਿਆਦਿਕਾ ਅਵਿਜ੍ਜਮਾਨੇਨ ਅਵਿਜ੍ਜਮਾਨਪਞ੍ਞਤ੍ਤਿ. ਨ ਚੇਤ੍ਥ ਯਥਾਵੁਤ੍ਤਪ੍ਪਕਾਰਾ ਦੁਵਿਧਾ ਪਞ੍ਞਤ੍ਤਿ ਵੁਤ੍ਤਾਤਿ ਸਕ੍ਕਾ ਵਿਞ੍ਞਾਤੁਂ. ਵਿਜ੍ਜਮਾਨਸ੍ਸ ਹਿ ਸਙ੍ਖਾ…ਪੇ… ਅਭਿਲਾਪੋ ਵਿਜ੍ਜਮਾਨਪਞ੍ਞਤ੍ਤਿ. ਅਵਿਜ੍ਜਮਾਨਸ੍ਸ ਚ ਸਙ੍ਖਾਦਿਕਾ ਅਵਿਜ੍ਜਮਾਨਪਞ੍ਞਤ੍ਤਿ. ਤੇਸਂਯੇਵ ਵਿਸੇਸਨਵਿਸੇਸਿਤਬ੍ਬਭਾਵੇਨ ਪਵਤ੍ਤਾ ਸਙ੍ਖਾਦਯੋ ਇਤਰਾਤਿ.

ਅਵਿਜ੍ਜਮਾਨਪਞ੍ਞਤ੍ਤਿਵਚਨੇਨ ਪਞ੍ਞਾਪਿਤਬ੍ਬਾ ਉਪਾਦਾਪਞ੍ਞਤ੍ਤਿ, ਤਸ੍ਸਾ ਪਞ੍ਞਾਪਨਭੂਤਾ ਨਾਮਪਞ੍ਞਤ੍ਤਿ ਚ ਵੁਤ੍ਤਾ, ਇਤਰੇਹਿ ਨਾਮਪਞ੍ਞਤ੍ਤਿਯੇਵ ਯਥਾਵੁਤ੍ਤਾਤਿ ਚੇ? ਨ, ਅਸਿਦ੍ਧਤ੍ਤਾ. ਸਤਿ ਹਿ ਉਜੁਕੇ ਪੁਰਿਮੇ ਪਾਲ਼ਿਅਨੁਗਤੇ ਅਤ੍ਥੇ ਅਯਮਤ੍ਥੋ ਇਮਾਯ ਅਟ੍ਠਕਥਾਯ ਵੁਤ੍ਤੋਤਿ ਅਸਿਦ੍ਧਮੇਤਂ. ਯਦਿ ਚ ਸਤ੍ਤਰਥਘਟਾਦਿਦਿਸਾਕਾਲਕਸਿਣਅਜਟਾਕਾਸਕਸਿਣੁਗ੍ਘਾਟਿਮਾਕਾਸਆਕਿਞ੍ਚਞ੍ਞਾਯਤਨਵਿਸਯਨਿਰੋਧਸਮਾਪਤ੍ਤਿਆਦਿਪ੍ਪਕਾਰਾ ਉਪਾਦਾਪਞ੍ਞਤ੍ਤਿ ਅਵਿਜ੍ਜਮਾਨਪਞ੍ਞਤ੍ਤਿ, ਏਤੇਨੇਵ ਵਚਨੇਨ ਤਸ੍ਸਾ ਅਵਿਜ੍ਜਮਾਨਤਾ ਵੁਤ੍ਤਾਤਿ ਨ ਸਾ ਅਤ੍ਥੀਤਿ ਵਤ੍ਤਬ੍ਬਾ. ਯਥਾ ਚ ਪਞ੍ਞਾਪਿਤਬ੍ਬਤੋ ਅਵਿਜ੍ਜਮਾਨਾਨਂ ਸਤ੍ਤਾਦੀਨਂ ਅਵਿਜ੍ਜਮਾਨਪਞ੍ਞਤ੍ਤਿਭਾਵੋ, ਏਵਂ ਰੂਪਾਦੀਨਂ ਵਿਜ੍ਜਮਾਨਾਨਂ ਪਞ੍ਞਪੇਤਬ੍ਬਤੋ ਵਿਜ੍ਜਮਾਨਪਞ੍ਞਤ੍ਤਿਭਾਵੋ ਆਪਜ੍ਜਤਿ. ਤਤੋ ‘‘ਸਬ੍ਬੇ ਧਮ੍ਮਾ ਪਞ੍ਞਤ੍ਤੀ’’ਤਿ ਪਞ੍ਞਤ੍ਤਿਪਥੇਹਿ ਅਵਿਸਿਟ੍ਠੋ ਪਞ੍ਞਤ੍ਤਿਧਮ੍ਮਨਿਦ੍ਦੇਸੋ ਵਤ੍ਤਬ੍ਬੋ ਸਿਯਾ. ਅਥਾਪਿ ਪਞ੍ਞਾਪਿਤਬ੍ਬਪਞ੍ਞਾਪਨਵਿਸੇਸਦਸ੍ਸਨਤ੍ਥੋ ਸਙ੍ਖਾਦਿਨਿਦ੍ਦੇਸੋ, ਤਥਾਪਿ ‘‘ਏਕਧਮ੍ਮੋ ਸਬ੍ਬਧਮ੍ਮੇਸੁ ਨਿਪਤਤਿ, ਸਬ੍ਬਧਮ੍ਮਾ ਏਕਧਮ੍ਮਸ੍ਮਿਂ ਨਿਪਤਨ੍ਤੀ’’ਤਿਆਦਿਨਾ ਪਞ੍ਞਾਪਿਤਬ੍ਬਾਨਂ ਪਞ੍ਞਤ੍ਤਿਪਥਭਾਵਸ੍ਸ ਦਸ੍ਸਿਤਤ੍ਤਾ ਪਞ੍ਞਾਪਿਤਬ੍ਬਾਨਂ ਪਞ੍ਞਤ੍ਤਿਭਾਵੇ ਪਞ੍ਞਤ੍ਤਿਪਥਾ ਪਞ੍ਞਤ੍ਤਿਸਦ੍ਦੇਨੇਵ ਵੁਤ੍ਤਾਤਿ ਪਞ੍ਞਤ੍ਤਿਪਥਪਦਂ ਨ ਵਤ੍ਤਬ੍ਬਂ ਸਿਯਾ, ਨਾਪਿ ਸਕ੍ਕਾ ਪਞ੍ਞਾਪਿਤਬ੍ਬਪਞ੍ਞਾਪਨਵਿਸੇਸਦਸ੍ਸਨਤ੍ਥੋ ਸਙ੍ਖਾਦਿਨਿਦ੍ਦੇਸੋਤਿ ਵਤ੍ਤੁਂ ਸਙ੍ਖਾਦਿਸਦ੍ਦਾਨਂ ਸਮਾਨਤ੍ਥਤ੍ਤਾ. ਵੁਤ੍ਤਞ੍ਹਿ ‘‘ਮਰਣੇਨਪਿ ਤਂ ਪਹੀਯਤਿ, ਯਂ ਪੁਰਿਸੋ ਮਮਿਦਨ੍ਤਿ ਮਞ੍ਞਤੀ’’ਤਿ (ਮਹਾਨਿ. ੪੧) ਏਤ੍ਥ ‘‘ਪੁਰਿਸੋਤਿ ਸਙ੍ਖਾ ਸਮਞ੍ਞਾ…ਪੇ… ਅਭਿਲਾਪੋ’’ਤਿ (ਮਹਾਨਿ. ੪੧). ਤਥਾ ‘‘ਮਾਗਣ੍ਡਿਯੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਨਾਮਂ ਸਙ੍ਖਾ ਸਮਞ੍ਞਾ’’ਤਿਆਦਿ (ਮਹਾਨਿ. ੭੩). ਨ ਚ ‘‘ਅਯਂ ਇਤ੍ਥਨ੍ਨਾਮੋ’’ਤਿ ਸਙ੍ਕੇਤਗ੍ਗਹਣਂ ‘‘ਰੂਪਂ ਤਿਸ੍ਸੋ’’ਤਿਆਦਿਵਚਨਗ੍ਗਹਣਞ੍ਚ ਮੁਞ੍ਚਿਤ੍ਵਾ ਅਞ੍ਞਸ੍ਸ ਅਸਿਦ੍ਧਸਭਾਵਸ੍ਸ ਅਤ੍ਥਪਞ੍ਞਾਪਨੇ ਸਮਤ੍ਥਤਾ ਸਮ੍ਭਵਤਿ, ਤੇਸਞ੍ਚ ਅਸਮਤ੍ਥਤਾ. ਯਦਿ ਹਿ ਤੇਸਂ ਵਿਨਾ ਪਞ੍ਞਤ੍ਤਿਯਾ ਅਤ੍ਥਪਞ੍ਞਾਪਨੇ ਅਸਮਤ੍ਥਤਾ ਸਿਯਾ, ਪਞ੍ਞਤ੍ਤਿਪਞ੍ਞਾਪਨੇ ਚ ਅਸਮਤ੍ਥਤਾਤਿ ਤਸ੍ਸਾ ਅਞ੍ਞਾ ਪਞ੍ਞਤ੍ਤਿ ਵਤ੍ਤਬ੍ਬਾ ਸਿਯਾ, ਤਸ੍ਸਾ ਤਸ੍ਸਾਤਿ ਅਨਵਤ੍ਥਾਨਂ, ਤਤੋ ਅਤ੍ਥਵਿਜਾਨਨਮੇਵ ਨ ਸਿਯਾ, ਨਾਪਿ ਸਙ੍ਕੇਤਗ੍ਗਹਣਂ ਸਙ੍ਕੇਤਸ੍ਸ ਪਞ੍ਞਤ੍ਤਿਭਾਵੇ ‘‘ਅਯਂ ਇਮਸ੍ਸ ਭਾਸਿਤਸ੍ਸ ਅਤ੍ਥੋ’’ਤਿ ਵਾ, ‘‘ਇਮਸ੍ਸਤ੍ਥਸ੍ਸ ਇਦਂ ਵਚਨਂ ਜੋਤਕ’’ਨ੍ਤਿ ਵਾ. ਸਞ੍ਞੁਪ੍ਪਾਦਮਤ੍ਤੇ ਪਨ ਸਙ੍ਕੇਤਗ੍ਗਹਣੇ ਵਚਨਸ੍ਸ ਵਚਨਤ੍ਥਵਿਨਿਮੁਤ੍ਤਸ੍ਸ ਕਪ੍ਪਨੇ ਪਯੋਜਨਂ ਨਤ੍ਥਿ. ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕਿਯੇ ਸੋਤੇ ਪਟਿਹਞ੍ਞਤਿ’’ (ਕਥਾ. ੩੪੭), ‘‘ਅਭਿਜਾਨਾਸਿ ਨੋ ਤ੍ਵਂ ਆਨਨ੍ਦ ਇਤੋ ਪੁਬ੍ਬੇ ਏਵਰੂਪਂ ਨਾਮਧੇਯ੍ਯਂ ਸੁਤਂ ਯਦਿਦਂ ਜਨਵਸਭੋ’’ਤਿ (ਦੀ. ਨਿ. ੨.੨੮੦), ‘‘ਨਾਮਞ੍ਚ ਸਾਵੇਤਿ ਕੋਣ੍ਡਞ੍ਞੋ ਅਹਂ ਭਗਵਾ’’ਤਿਆਦੀਹਿ (ਸਂ. ਨਿ. ੧.੨੧੭) ਚ ਪਞ੍ਞਤ੍ਤਿਯਾ ਵਚਨਭਾਵੋ ਸਿਦ੍ਧੋ. ਤਸ੍ਮਾ ਪਾਲ਼ਿਯਾ ਅਟ੍ਠਕਥਾਯ ਚ ਅਵਿਰੁਦ੍ਧੋ ਅਤ੍ਥੋ ਵਿਚਾਰੇਤ੍ਵਾ ਗਹੇਤਬ੍ਬੋ.

ਯਦਿ ਸਤ੍ਤਾਦਯੋ ਅਵਿਜ੍ਜਮਾਨਪਞ੍ਞਤ੍ਤਿ ਨ ਹੋਨ੍ਤਿ, ਕਾ ਪਨ ਅਵਿਜ੍ਜਮਾਨਪਞ੍ਞਤ੍ਤਿ ਨਾਮਾਤਿ? ਪਕਾਸਿਤੋ ਅਯਮਤ੍ਥੋ ‘‘ਅਵਿਜ੍ਜਮਾਨਾਨਂ ਸਤ੍ਤਾਦੀਨਂ ਸਙ੍ਖਾ…ਪੇ… ਅਭਿਲਾਪੋ ਅਵਿਜ੍ਜਮਾਨਪਞ੍ਞਤ੍ਤੀ’’ਤਿ. ਸਤ੍ਤਾਦੀਨਞ੍ਚ ਅਵਿਜ੍ਜਮਾਨਤ੍ਤਾ ਅਤ੍ਥਿਤਾ ਨੇਵ ਵਤ੍ਤਬ੍ਬਾ, ਯੇ ਚ ਵਦੇਯ੍ਯੁਂ ‘‘ਰੂਪਾਦੀਨਿ ਵਿਯ ਅਵਿਜ੍ਜਮਾਨਤ੍ਤਾ ਅਵਿਜ੍ਜਮਾਨਤਾ ਵੁਤ੍ਤਾ, ਨ ਨਤ੍ਥਿਭਾਵਤੋ’’ਤਿ, ਅਯਞ੍ਚ ਵਾਦੋ ਹੇਵਤ੍ਥਿਕਥਾਯ ਪਟਿਸਿਦ੍ਧੋ, ਨ ਚ ਰੂਪਂ ਵੇਦਨਾ ਨ ਹੋਤੀਤਿ ਅਵਿਜ੍ਜਮਾਨਂ ਨਾਮ ਹੋਤਿ. ਏਵਂ ਸਤ੍ਤਾਦਯੋਪਿ ਯਦਿ ਅਤ੍ਥਿ, ਰੂਪਾਦਯੋ ਨ ਹੋਨ੍ਤੀਤਿ ਅਵਿਜ੍ਜਮਾਨਾਤਿ ਨ ਵਤ੍ਤਬ੍ਬਾ. ਯਸ੍ਮਾ ਪਨ ਯੇਸੁ ਰੂਪਾਦੀਸੁ ਚਕ੍ਖਾਦੀਸੁ ਚ ਤਥਾ ਤਥਾ ਪਵਤ੍ਤਮਾਨੇਸੁ ‘‘ਸਤ੍ਤੋ ਇਤ੍ਥੀ ਰਥੋ ਘਟੋ’’ਤਿਆਦਿਕਾ ਵਿਚਿਤ੍ਤਸਞ੍ਞਾ ਉਪ੍ਪਜ੍ਜਤਿ, ਸਞ੍ਞਾਨੁਲੋਮਾਨਿ ਚ ਅਧਿਵਚਨਾਨਿ, ਤੇਹਿ ਰੂਪਚਕ੍ਖਾਦੀਹਿ ਅਞ੍ਞੋ ਸਤ੍ਤਰਥਾਦਿਸਞ੍ਞਾਵਲਮ੍ਬਿਤੋ ਵਚਨਤ੍ਥੋ ਵਿਜ੍ਜਮਾਨੋ ਨ ਹੋਤਿ, ਤਸ੍ਮਾ ਸਤ੍ਤਰਥਾਦਿਅਭਿਲਾਪਾ ‘‘ਅਵਿਜ੍ਜਮਾਨਪਞ੍ਞਤ੍ਤੀ’’ਤਿ ਵੁਚ੍ਚਨ੍ਤਿ, ਨ ਚ ਤੇ ‘‘ਮੁਸਾ’’ਤਿ ਵੁਚ੍ਚਨ੍ਤਿ ਲੋਕਸਮਞ੍ਞਾਵਸੇਨ ਪਵਤ੍ਤਤ੍ਤਾ. ਤਤੋ ਏਵ ਤੇ ਅਭਿਲਾਪਾ ‘‘ਸਮ੍ਮੁਤਿਸਚ੍ਚ’’ਨ੍ਤਿ ਵੁਚ੍ਚਨ੍ਤਿ. ਸੋ ਚ ਵਚਨਤ੍ਥੋ ਸਯਂ ਅਵਿਜ੍ਜਮਾਨੋਪਿ ਵਿਜ੍ਜਮਾਨਸ੍ਸ ਵਚਨਸ੍ਸੇਵ ਵਸੇਨ ਪਞ੍ਞਤ੍ਤਿਵੋਹਾਰਂ ਲਭਤਿ, ‘‘ਸਮ੍ਮੁਤਿਸਚ੍ਚ’’ਨ੍ਤਿ ਚ ਵੁਚ੍ਚਤਿ ਯਥਾਗਹਿਤਸਞ੍ਞਾਵਸੇਨ ਪਵਤ੍ਤਵਚਨਤ੍ਥਭਾਵਤੋ. ‘‘ਸਮ੍ਮੁਤਿਞਾਣਂ ਸਚ੍ਚਾਰਮ੍ਮਣਮੇਵ, ਨਾਞ੍ਞਾਰਮ੍ਮਣ’’ਨ੍ਤਿ (ਕਥਾ. ੪੩੪) ਕਥਾਯ ਚ ‘‘ਪਥਵੀਕਸਿਣਾਦਿ ਚੀਵਰਾਦਿ ਚ ਸਮ੍ਮੁਤਿਸਚ੍ਚਮ੍ਹੀ’’ਤਿ ਇਮਿਨਾਵ ਅਧਿਪ੍ਪਾਯੇਨ ਵੁਤ੍ਤਨ੍ਤਿ ਵਿਞ੍ਞਾਯਤਿ. ਯਸ੍ਮਾ ਰੂਪਾਦੀਸੁ ਸਨ੍ਤਾਨੇਨ ਪਵਤ੍ਤਮਾਨੇਸੁ ਏਕਤ੍ਤਗ੍ਗਹਣਵਸੇਨ ਤੇ ਅਮੁਞ੍ਚਿਤ੍ਵਾ ਪਵਤ੍ਤਂ ਸਤ੍ਤਾਦਿਗ੍ਗਹਣਂ ਚਕ੍ਖੁਵਿਞ੍ਞਾਣਾਦੀਨਿ ਵਿਯ ਰੂਪਾਦੀਸੁ ਤੇਸੁ ਖਨ੍ਧੇਸੁ ਚਕ੍ਖਾਦੀਸੁ ਚ ਅਸਨ੍ਤਂ ਅਵਿਜ੍ਜਮਾਨਂ ਸਤ੍ਤਰਥਾਦਿਂ ਗਣ੍ਹਾਤਿ, ਤਸ੍ਮਾ ਤਂ ਪਰਿਤ੍ਤਾਰਮ੍ਮਣਾਦਿਭਾਵੇਨ ਨ ਵਤ੍ਤਬ੍ਬਨ੍ਤਿ ਵੁਤ੍ਤਂ. ਤਥਾ ਯਂ ਖਨ੍ਧਸਮੂਹਸਨ੍ਤਾਨਂ ਏਕਤ੍ਤੇਨ ਗਹਿਤਂ ਉਪਾਦਾਯ ‘‘ਕਲ੍ਯਾਣਮਿਤ੍ਤੋ ਪਾਪਮਿਤ੍ਤੋ ਪੁਗ੍ਗਲੋ’’ਤਿ ਗਹਣਂ ਪਞ੍ਞਤ੍ਤਿ ਚ ਪਵਤ੍ਤਤਿ, ਤਂ ਤਦੁਪਾਦਾਨਭੂਤਂ ਪੁਗ੍ਗਲਸਞ੍ਞਾਯ ਸੇਵਮਾਨਸ੍ਸ ਕੁਸਲਾਕੁਸਲਾਨਂ ਉਪ੍ਪਤ੍ਤਿ ਹੋਤੀਤਿ ‘‘ਪੁਗ੍ਗਲੋਪਿ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੧.੧.੯) ਵੁਤ੍ਤਂ. ਯਸ੍ਮਾ ਪਨ ਪੁਗ੍ਗਲੋ ਨਾਮ ਕੋਚਿ ਭਾਵੋ ਨਤ੍ਥਿ, ਤਸ੍ਮਾ ਯਥਾ ਆਪੋਧਾਤੁਆਦੀਨਿ ਚਿਤ੍ਤੇਨ ਵਿਵੇਚੇਤ੍ਵਾ ਪਥਵੀਧਾਤੁ ਉਪਲਬ੍ਭਤਿ, ਨ ਏਵਂ ਰੂਪਾਦਯੋ ਖਨ੍ਧੇ ਵਿਵੇਚੇਤ੍ਵਾ ਪੁਗ੍ਗਲੋ ਉਪਲਬ੍ਭਤਿ. ਪਟਿਸੇਧਿਤਾ ਚ ਪੁਗ੍ਗਲਕਥਾਯ ਪੁਗ੍ਗਲਦਿਟ੍ਠਿ. ਵਜਿਰਾਯ ਚ ਭਿਕ੍ਖੁਨਿਯਾ ਵੁਤ੍ਤਂ –

‘‘ਕਂ ਨੁ ਸਤ੍ਤੋਤਿ ਪਚ੍ਚੇਸਿ, ਮਾਰ ਦਿਟ੍ਠਿਗਤਂ ਨੁ ਤੇ;

ਸੁਦ੍ਧਸਙ੍ਖਾਰਪੁਞ੍ਜੋਯਂ, ਨਯਿਧ ਸਤ੍ਤੁਪਲਬ੍ਭਤੀ’’ਤਿ. (ਸਂ. ਨਿ. ੧.੧੭੧; ਮਹਾਨਿ. ੧੮੬; ਕਥਾ. ੨੩੩);

ਸਤ੍ਤੋਤਿ ਪਨ ਵਚਨਸ੍ਸ ਪਞ੍ਞਤ੍ਤਿਯਾ ਪਵਤ੍ਤਿਂ ਦਸ੍ਸੇਤੁਂ ਸਾ ਏਵਮਾਹ –

‘‘ਯਥਾਪਿ ਅਙ੍ਗਸਮ੍ਭਾਰਾ, ਹੋਤਿ ਸਦ੍ਦੋ ਰਥੋ ਇਤਿ;

ਏਵਂ ਖਨ੍ਧੇਸੁ ਸਨ੍ਤੇਸੁ, ਹੋਤਿ ਸਤ੍ਤੋਤਿ ਸਮ੍ਮੁਤੀ’’ਤਿ. (ਸਂ. ਨਿ. ੧.੧੭੧; ਮਹਾਨਿ. ੧੮੬; ਕਥਾ. ੨੩੩);

ਯਦਿ ਪੁਗ੍ਗਲੋ ਨ ਵਿਜ੍ਜਤਿ, ਕਥਂ ਪੁਗ੍ਗਲਗ੍ਗਹਣਸ੍ਸ ਸਾਰਮ੍ਮਣਤਾ ਸਿਯਾਤਿ? ਅਵਿਜ੍ਜਮਾਨਸ੍ਸਪਿ ਆਰਮ੍ਮਣਸ੍ਸ ਗਹਣਤੋ. ਅਵਿਜ੍ਜਮਾਨਮ੍ਪਿ ਹਿ ਪਰਿਕਪ੍ਪਿਤਂ ਲੋਕਸਞ੍ਞਾਤਂ ਵਾ ਵਿਜ੍ਜਮਾਨਂ ਵਾ ਸਭਾਵਭੂਤਂ ਆਰਮ੍ਮਣਂ ਗਹੇਤ੍ਵਾਵ ਉਪ੍ਪਜ੍ਜਨਤੋ ਸਾਰਮ੍ਮਣਤਾ ਵੁਤ੍ਤਾ. ਸਾਰਮ੍ਮਣਾਤਿ ਹਿ ਵਚਨਂ ਚਿਤ੍ਤਚੇਤਸਿਕਾਨਂ ਆਰਮ੍ਮਣੇਨ ਵਿਨਾ ਅਪ੍ਪਵਤ੍ਤਿਞ੍ਞੇਵ ਦੀਪੇਤਿ, ਨ ਤੇਹਿ ਗਹਿਤਸ੍ਸ ਆਰਮ੍ਮਣਸ੍ਸ ਵਿਜ੍ਜਮਾਨਤਂ ਅਵਿਜ੍ਜਮਾਨਤਂ ਵਾਤਿ. ਅਯਂ ਸਙ੍ਖਤਾਸਙ੍ਖਤਵਿਨਿਮੁਤ੍ਤਸ੍ਸ ਅਤ੍ਥਿਤਾਪਟਿਸੇਧਂ ਸਬ੍ਬਥਾ ਅਨੁਵਤ੍ਤਨ੍ਤਾਨਂ ਵਿਨਿਚ੍ਛਯੋ.

੧੩੧੬. ਨਾਮਕਰਣਟ੍ਠੇਨਾਤਿ ਅਞ੍ਞਂ ਅਨਪੇਕ੍ਖਿਤ੍ਵਾ ਸਯਮੇਵ ਅਤ੍ਤਨੋ ਨਾਮਕਰਣਸਭਾਵਤੋਤਿ ਅਤ੍ਥੋ. ਯਞ੍ਹਿ ਪਰਸ੍ਸ ਨਾਮਂ ਕਰੋਤਿ, ਤਸ੍ਸ ਚ ਤਦਪੇਕ੍ਖਤ੍ਤਾ ਅਞ੍ਞਾਪੇਕ੍ਖਂ ਨਾਮਕਰਣਨ੍ਤਿ ਨਾਮਕਰਣਸਭਾਵਤਾ ਨ ਹੋਤਿ. ਤਸ੍ਮਾ ਮਹਾਜਨਸ੍ਸ ਞਾਤੀਨਂ ਗੁਣਾਨਞ੍ਚ ਸਾਮਞ੍ਞਨਾਮਾਦਿਕਾਰਕਾਨਂ ਨਾਮਭਾਵੋ ਨਾਪਜ੍ਜਤਿ. ਯਸ੍ਸ ਚ ਅਞ੍ਞੇਹਿ ਨਾਮਂ ਕਰੀਯਤਿ, ਤਸ੍ਸ ਚ ਨਾਮਕਰਣਸਭਾਵਤਾ ਨਤ੍ਥੀਤਿ ਨਤ੍ਥਿਯੇਵ ਨਾਮਭਾਵੋ, ਵੇਦਨਾਦੀਨਂ ਪਨ ਸਭਾਵਸਿਦ੍ਧਤ੍ਤਾ ਵੇਦਨਾਦਿਨਾਮਸ੍ਸ ਨਾਮਕਰਣਸਭਾਵਤੋ ਨਾਮਤਾ ਵੁਤ੍ਤਾ. ਪਥਵੀਆਦਿਨਿਦਸ੍ਸਨੇਨ ਨਾਮਸ੍ਸ ਸਭਾਵਸਿਦ੍ਧਤਂਯੇਵ ਨਿਦਸ੍ਸੇਤਿ, ਨ ਨਾਮਭਾਵਸਾਮਞ੍ਞਂ, ਨਿਰੁਲ਼੍ਹਤ੍ਤਾ ਪਨ ਨਾਮਸਦ੍ਦੋ ਅਰੂਪਧਮ੍ਮੇਸੁ ਏਵ ਵੁਤ੍ਤੋ, ਨ ਪਥਵੀਆਦੀਸੂਤਿ ਨ ਤੇਸਂ ਨਾਮਭਾਵੋ. ਮਾਤਿਕਾਯ ਚ ਪਥਵੀਆਦੀਨਂ ਨਾਮਤਾਨਾਪਤ੍ਤਿ ਵੁਤ੍ਤਾਵ. ਨ ਹਿ ਪਥਵੀਆਦਿਨਾਮਂ ਵਿਜਹਿਤ੍ਵਾ ਕੇਸਾਦਿਨਾਮੇਹਿ ਰੂਪਧਮ੍ਮਾਨਂ ਵਿਯ ਵੇਦਨਾਦਿਨਾਮਂ ਵਿਜਹਿਤ੍ਵਾ ਅਞ੍ਞੇਨ ਨਾਮੇਨ ਅਰੂਪਧਮ੍ਮਾਨਂ ਵੋਹਰਿਤਬ੍ਬੇਨ ਪਿਣ੍ਡਾਕਾਰੇਨ ਪਵਤ੍ਤਿ ਅਤ੍ਥੀਤਿ.

ਅਥ ਵਾ ਰੂਪਧਮ੍ਮਾ ਚਕ੍ਖਾਦਯੋ ਰੂਪਾਦਯੋ ਚ ਤੇਸਂ ਪਕਾਸਕਪਕਾਸਿਤਬ੍ਬਭਾਵਤੋ ਵਿਨਾ ਨਾਮੇਨ ਪਾਕਟਾ ਹੋਨ੍ਤਿ, ਨ ਏਵਂ ਅਰੂਪਧਮ੍ਮਾਤਿ ਅਧਿਵਚਨਸਮ੍ਫਸ੍ਸੋ ਵਿਯ ਨਾਮਾਯਤ੍ਤਗਹਣੀਯਭਾਵੇਨ ‘‘ਨਾਮ’’ਨ੍ਤਿ ਵੁਤ੍ਤਾ, ਪਟਿਘਸਮ੍ਫਸ੍ਸੋਪਿ ਨ ਚਕ੍ਖਾਦੀਨਿ ਵਿਯ ਨਾਮੇਨ ਵਿਨਾ ਪਾਕਟੋਤਿ ‘‘ਨਾਮ’’ਨ੍ਤਿ ਵੁਤ੍ਤੋ. ਅਰੂਪਤਾਯ ਵਾ ਅਞ੍ਞਨਾਮਸਭਾਗਤ੍ਤਾ ਸਙ੍ਗਹਿਤੋਯਂ, ਅਞ੍ਞਫਸ੍ਸਸਭਾਗਤ੍ਤਾ ਵਾ. ਵਚਨਤ੍ਥੋਪਿ ਹਿ ‘‘ਰੂਪਯਤੀਤਿ ਰੂਪਂ, ਨਾਮਯਤੀਤਿ ਨਾਮ’’ਨ੍ਤਿ ਇਧ ਪਚ੍ਛਿਮਪੁਰਿਮਾਨਂ ਸਮ੍ਭਵਤਿ. ਰੂਪਯਤੀਤਿ ਵਿਨਾਪਿ ਨਾਮੇਨ ਅਤ੍ਤਾਨਂ ਪਕਾਸਯਤੀਤਿ ਅਤ੍ਥੋ, ਨਾਮਯਤੀਤਿ ਨਾਮੇਨ ਵਿਨਾ ਅਪਾਕਟਭਾਵਤੋ ਅਤ੍ਤਨੋ ਪਕਾਸਕਂ ਨਾਮਂ ਕਰੋਤੀਤਿ ਅਤ੍ਥੋ. ਆਰਮ੍ਮਣਾਧਿਪਤਿਪਚ੍ਚਯਤਾਯਾਤਿ ਸਤਿਪਿ ਰੂਪਸ੍ਸ ਆਰਮ੍ਮਣਾਧਿਪਤਿਪਚ੍ਚਯਭਾਵੇ ਨ ਪਰਮਸ੍ਸਾਸਭੂਤਂ ਨਿਬ੍ਬਾਨਂ ਵਿਯ ਸਾਤਿਸਯਂ ਤਂਨਾਮਨਸਭਾਵੇਨ ਪਚ੍ਚਯੋਤਿ ਨਿਬ੍ਬਾਨਮੇਵ ‘‘ਨਾਮ’’ਨ੍ਤਿ ਵੁਤ੍ਤਂ.

੧੩੧੮. ਵਟ੍ਟਮੂਲਸਮੁਦਾਚਾਰਦਸ੍ਸਨਤ੍ਥਨ੍ਤਿ ਸਤ੍ਤਾਨਂ ਵਟ੍ਟਮੂਲਸਮੁਦਾਚਾਰੋ ਨਾਮ ਅਵਿਜ੍ਜਾ ਚ ਭਵਤਣ੍ਹਾ ਚ, ਤਂਦਸ੍ਸਨਤ੍ਥਨ੍ਤਿ ਅਤ੍ਥੋ. ਤਤ੍ਥ ਸਮੁਦਾਚਰਤੀਤਿ ਸਮੁਦਾਚਾਰੋ, ਵਟ੍ਟਮੂਲਮੇਵ ਸਮੁਦਾਚਾਰੋ ਵਟ੍ਟਮੂਲਸਮੁਦਾਚਾਰੋ, ਵਟ੍ਟਮੂਲਦਸ੍ਸਨੇਨ ਵਟ੍ਟਮੂਲਾਨਂ ਪਵਤ੍ਤਿ ਦਸ੍ਸਿਤਾ ਹੋਤੀਤਿ ਵਟ੍ਟਮੂਲਾਨਂ ਸਮੁਦਾਚਾਰਸ੍ਸ ਦਸ੍ਸਨਤ੍ਥਨ੍ਤਿਪਿ ਅਤ੍ਥੋ.

੧੩੨੦. ਏਕੇਕਸ੍ਮਿਞ੍ਚ ਅਤ੍ਤਾਤਿ ਚ ਲੋਕੋਤਿ ਚ ਗਹਣਵਿਸੇਸਂ ਉਪਾਦਾਯ ‘‘ਅਤ੍ਤਾ ਚ ਲੋਕੋ ਚਾ’’ਤਿ ਵੁਤ੍ਤਂ. ਏਕਂ ਵਾ ਖਨ੍ਧਂ ਅਤ੍ਤਤੋ ਗਹੇਤ੍ਵਾ ਅਞ੍ਞਂ ਅਤ੍ਤਨੋ ਉਪਭੋਗਭੂਤੋ ਲੋਕੋਤਿ ਗਣ੍ਹਨ੍ਤਸ੍ਸ ਅਤ੍ਤਨੋ ਅਤ੍ਤਾਨਂ ‘‘ਅਤ੍ਤਾ’’ਤਿ ਗਹੇਤ੍ਵਾ ਪਰਸ੍ਸ ਅਤ੍ਤਾਨਂ ‘‘ਲੋਕੋ’’ਤਿ ਗਣ੍ਹਨ੍ਤਸ੍ਸ ਵਾ ਵਸੇਨ ‘‘ਅਤ੍ਤਾ ਚ ਲੋਕੋ ਚਾ’’ਤਿ ਵੁਤ੍ਤਂ. ਤਂ ਭਵਿਸ੍ਸਤੀਤਿ ਤਂ ਦ੍ਵਿਧਾਪਿ ਗਹਿਤਂ ਖਨ੍ਧਪਞ੍ਚਕਂ ਭਵਿਸ੍ਸਤੀਤਿ ਨਿਵਿਟ੍ਠਾ ਪਰਾਮਸਨ੍ਤੀਤਿ ਅਤ੍ਥੋ.

੧੩੩੨. ਸਹ ਸਿਕ੍ਖਿਤਬ੍ਬੋ ਧਮ੍ਮੋ ਸਹਧਮ੍ਮੋ, ਤਤ੍ਥ ਭਵਂ ਸਹਧਮ੍ਮਿਕਂ. ਕਮ੍ਮਤ੍ਥੇ ਵਤ੍ਤਮਾਨਤੋ ਦੋਵਚਸ੍ਸਸਦ੍ਦਤੋ ਆਯ-ਸਦ੍ਦਂ ਅਨਞ੍ਞਤ੍ਥਂ ਕਤ੍ਵਾ ‘‘ਦੋਵਚਸ੍ਸਾਯ’’ਨ੍ਤਿ ਵੁਤ੍ਤਨ੍ਤਿ ਅਧਿਪ੍ਪਾਯੇਨ ‘‘ਦੁਬ੍ਬਚਸ੍ਸ ਕਮ੍ਮ’’ਨ੍ਤਿ ਆਹ. ਦੋਵਚਸ੍ਸਸ੍ਸ ਵਾ ਅਯਨਂ ਪਵਤ੍ਤਿ ਦੋਵਚਸ੍ਸਾਯਂ. ਵਚਨਸ੍ਸ ਪਟਿਵਿਰੁਦ੍ਧਵਚਨਂ ਪਟਾਣਿਕਗਹਣਂ. ਗੁਣੇਹਿ ਗਰੂਸੁ ਗਾਰਵੇਨ ਵਸਨਂ ਗਰੁਵਾਸੋ. ਜਾਤਿਆਦੀਹਿ ਜੇਟ੍ਠਕੇਸੁ ਪਟਿਸ੍ਸੁਣਿਤਬ੍ਬੇਸੁ ਵਸਨਂ ਸਜੇਟ੍ਠਕਵਾਸੋ. ਓਤ੍ਤਪ੍ਪਿਤਬ੍ਬਾ ਵਾ ਗਰੁਨੋ. ਹਿਰਿਯਿਤਬ੍ਬਾ ਜੇਟ੍ਠਕਾ. ਯਾਯ ਚੇਤਨਾਯ ਦੁਬ੍ਬਚੋ ਹੋਤਿ, ਸਾ ਦੋਵਚਸ੍ਸਤਾ ਭਵਿਤੁਂ ਅਰਹਤੀਤਿ ‘‘ਸਙ੍ਖਾਰਕ੍ਖਨ੍ਧੋਯੇਵਾ’’ਤਿ ਆਹ.

੧੩੩੩. ਦੁ-ਸਦ੍ਦੇਨ ਯੁਤ੍ਤਂ ਨਾਮਂ ਦੁਨ੍ਨਾਮਂ. ਅਨੁਪਸਙ੍ਕਮਨ੍ਤਸ੍ਸਪਿ ਅਨੁਸਿਕ੍ਖਨਂ ਸੇਵਨਾਤਿ ਅਧਿਪ੍ਪਾਯੇਨ ‘‘ਭਜਨਾਤਿ ਉਪਸਙ੍ਕਮਨਾ’’ਤਿ ਆਹ. ਸਬ੍ਬਤੋਭਾਗੇਨਾਤਿ ਕਾਯਵਾਚਾਚਿਤ੍ਤੇਹਿ ਆਵਿ ਚੇਵ ਰਹੋ ਚ.

੧੩੩੬. ਵਿਨਯੋਤਿ ਵਿਭਙ੍ਗਖਨ੍ਧਕਾ ਵੁਤ੍ਤਾ. ਵਤ੍ਥੁਵੀਤਿਕ੍ਕਮਤੋ ਪੁਬ੍ਬੇ ਪਰਤੋ ਚ ਆਪਤ੍ਤਿਂ ਆਪਜ੍ਜਨ੍ਤੋ ਨਾਮ ਨ ਹੋਤੀਤਿ ਸਹ ਵਤ੍ਥੁਨਾ ਆਪਤ੍ਤਿਂ ਪਰਿਚ੍ਛਿਨ੍ਦਤਿ. ਤੇਨਾਹ ‘‘ਸਹ ਵਤ੍ਥੁਨਾ…ਪੇ… ਆਪਤ੍ਤਿਕੁਸਲਤਾ ਨਾਮਾ’’ਤਿ. ਸਹ ਕਮ੍ਮਵਾਚਾਯਾਤਿ ਅਬ੍ਭਾਨਤਿਣਵਤ੍ਥਾਰਕਕਮ੍ਮਵਾਚਾਯ ‘‘ਅਹਂ, ਭਨ੍ਤੇ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਜ੍ਜਿ’’ਨ੍ਤਿਆਦਿਕਾਯ ਚ. ਸਹੇਵ ਹਿ ਕਮ੍ਮਵਾਚਾਯ ਆਪਤ੍ਤਿਵੁਟ੍ਠਾਨਞ੍ਚ ਪਰਿਚ੍ਛਿਨ੍ਦਤੀਤਿ. ਆਪਤ੍ਤਿਯਾ ਵਾ ਕਾਰਣਂ ਵਤ੍ਥੁ, ਵੁਟ੍ਠਾਨਸ੍ਸ ਕਾਰਣਂ ਕਮ੍ਮਵਾਚਾਤਿ ਕਾਰਣੇਨ ਸਹ ਫਲਸ੍ਸ ਜਾਨਨਵਸੇਨ ‘‘ਸਹ ਵਤ੍ਥੁਨਾ ਸਹ ਕਮ੍ਮਵਾਚਾਯਾ’’ਤਿ ਵੁਤ੍ਤਂ.

੧੩੩੮. ਅਯਮੇਵਤ੍ਥੋ ਸਹ ਪਰਿਕਮ੍ਮੇਨਾਤਿ ਏਤ੍ਥ ਵੁਤ੍ਤੋ. ਵੁਟ੍ਠਾਨਕਪਞ੍ਞਾਯਾਤਿ ਵੁਟ੍ਠਾਨਸ੍ਸ ਕਾਰਣਭੂਤਾਯ ਪਰਿਕਮ੍ਮਪਞ੍ਞਾਯ.

੧੩੪੦. ਧਾਤੁਵਿਸਯਾ ਸਬ੍ਬਾਪਿ ਪਞ੍ਞਾ ਧਾਤੁਕੁਸਲਤਾ, ਤਦੇਕਦੇਸਾ ਮਨਸਿਕਾਰਕੁਸਲਤਾਤਿ ਅਧਿਪ੍ਪਾਯੇਨ ਪੁਰਿਮਪਦੇਪਿ ਉਗ੍ਗਹਮਨਸਿਕਾਰਜਾਨਨਪਞ੍ਞਾ ਵੁਤ੍ਤਾ. ਪੁਰਿਮਪਦੇ ਵਾ ਵਾਚੁਗ੍ਗਤਾਯ ਧਾਤੁਪਾਲ਼ਿਯਾ ਮਨਸਿਕਰਣਂ ‘‘ਮਨਸਿਕਾਰੋ’’ਤਿ ਵੁਤ੍ਤਂ. ਤਤ੍ਥ ਉਗ੍ਗਣ੍ਹਨ੍ਤੀ ਮਨਸਿਕਰੋਨ੍ਤੀ ਧਾਤੁਪਾਲ਼ਿਯਾ ਅਤ੍ਥਂ ਸੁਣਨ੍ਤੀ ਗਨ੍ਥਤੋ ਚ ਅਤ੍ਥਤੋ ਚ ਧਾਰੇਨ੍ਤੀ ‘‘ਅਯਂ ਚਕ੍ਖੁਧਾਤੁ ਨਾਮਾ’’ਤਿਆਦਿਨਾ ਸਭਾਵਤੋ ਅਟ੍ਠਾਰਸੇਵਾਤਿ ਗਣਨਤੋ ਚ ਪਰਿਚ੍ਛੇਦਂ ਜਾਨਨ੍ਤੀ ਚ ਪਞ੍ਞਾ ਉਗ੍ਗਹਪਞ੍ਞਾਦਿਕਾ ਵੁਤ੍ਤਾ. ਪਚ੍ਛਿਮਪਦੇ ਪਞ੍ਚਵਿਧਾਪਿ ਸਾ ਪਞ੍ਞਾ ਉਗ੍ਗਹੋਤਿ ਤਤੋ ਚ ਪਵਤ੍ਤੋ ਅਨਿਚ੍ਚਾਦਿਮਨਸਿਕਾਰੋ ‘‘ਉਗ੍ਗਹਮਨਸਿਕਾਰੋ’’ਤਿ ਵੁਤ੍ਤੋ, ਤਸ੍ਸ ਜਾਨਨਂ ਪਵਤ੍ਤਨਮੇਵ, ਯਥਾ ਪਵਤ੍ਤਂ ਵਾ ਉਗ੍ਗਹਂ, ਏਵਮੇਵ ਪਵਤ੍ਤੋ ਉਗ੍ਗਹੋਤਿ ਜਾਨਨਂ ਉਗ੍ਗਹਜਾਨਨਂ. ਮਨਸਿਕਾਰੋਪਿ ‘‘ਏਵਂ ਪਵਤ੍ਤੇਤਬ੍ਬੋ ਏਵਞ੍ਚ ਪਵਤ੍ਤੋ’’ਤਿ ਜਾਨਨਂ ਮਨਸਿਕਾਰਜਾਨਨਂ. ਤਦੁਭਯਮ੍ਪਿ ਮਨਸਿਕਾਰਕੋਸਲ੍ਲਨ੍ਤਿ ਵੁਤ੍ਤਂ. ਉਗ੍ਗਹੋਪਿ ਹਿ ਮਨਸਿਕਾਰਸਮ੍ਪਯੋਗਤੋ ਮਨਸਿਕਾਰਨਿਰੁਤ੍ਤਿਂ ਲਦ੍ਧੁਂ ਯੁਤ੍ਤੋਤਿ ਯੋ ਚ ਮਨਸਿ ਕਾਤਬ੍ਬੋ, ਯੋ ਚ ਮਨਸਿਕਰਣੁਪਾਯੋ, ਸਬ੍ਬੋ ਸੋ ਮਨਸਿਕਾਰੋਤਿ ਵਤ੍ਤੁਂ ਵਟ੍ਟਤੀਤਿ. ਤਤ੍ਥ ਚ ਕੋਸਲ੍ਲਂ ਮਨਸਿਕਾਰਕੁਸਲਤਾਤਿ.

੧੩੪੨. ਤੀਸੁਪਿ ਵਾ…ਪੇ… ਵਟ੍ਟਤੀਤਿ ਤਸ੍ਸਾ ਚ ਉਗ੍ਗਹਾਦਿਭਾਵੋ ਵੁਤ੍ਤੋ. ਸਮ੍ਮਸਨਂ ਪਞ੍ਞਾ, ਸਾ ਮਗ੍ਗਸਮ੍ਪਯੁਤ੍ਤਾ ਅਨਿਚ੍ਚਾਦਿਸਮ੍ਮਸਨਕਿਚ੍ਚਂ ਸਾਧੇਤਿ ਨਿਚ੍ਚਸਞ੍ਞਾਦਿਪਜਹਨਤੋ. ਮਨਸਿਕਾਰੋ ਸਮ੍ਮਸਨਸਮ੍ਪਯੁਤ੍ਤੋ ਤਥੇਵ ਅਨਿਚ੍ਚਾਦਿਮਨਸਿਕਾਰਕਿਚ੍ਚਂ ਮਗ੍ਗਸਮ੍ਪਯੁਤ੍ਤੋ ਸਾਧੇਤਿ. ਤੇਨਾਹ ‘‘ਸਮ੍ਮਸਨਮਨਸਿਕਾਰਾ ਲੋਕਿਯਲੋਕੁਤ੍ਤਰਮਿਸ੍ਸਕਾ’’ਤਿ. ਇਮਿਨਾ ਪਨ ਪਚ੍ਚਯੇਨ ਇਦਂ ਹੋਤੀਤਿ ਏਵਂ ਅਵਿਜ੍ਜਾਦੀਨਂ ਸਙ੍ਖਾਰਾਦਿਪਚ੍ਚਯੁਪ੍ਪਨ੍ਨਸ੍ਸ ਪਚ੍ਚਯਭਾਵਜਾਨਨਂ ਪਟਿਚ੍ਚਸਮੁਪ੍ਪਾਦਕੁਸਲਤਾਤਿ ਦਸ੍ਸੇਤਿ.

੧੩੪੪. ਅਮ੍ਬਬੀਜਾਦੀਨਿ ਅਨੁਪਾਦਿਨ੍ਨਕਦਸ੍ਸਨਤ੍ਥਂ ਵੁਤ੍ਤਾਨਿ. ਸੋਤਵਿਞ੍ਞਾਣਾਦੀਨਂ ਵਿਸਭਾਗਾ ਅਨਨੁਰੂਪਾ ਅਨੁਪ੍ਪਾਦਕਾਯੇਵ ਚਕ੍ਖਾਦਯੋ ‘‘ਵਿਸਭਾਗਪਚ੍ਚਯਾ’’ਤਿ ਵੁਤ੍ਤਾ, ਤੇਹਿ ਅਨੁਪ੍ਪਜ੍ਜਮਾਨਾਨੇਵ ਚ ਸੋਤਵਿਞ੍ਞਾਣਾਦੀਨਿ ‘‘ਵਿਸਭਾਗਪਚ੍ਚਯਸਮੁਪ੍ਪਨ੍ਨਧਮ੍ਮਾ’’ਤਿ. ਸੋਤਵਿਞ੍ਞਾਣੇਨ ਵਾ ਵਿਸਭਾਗਸ੍ਸ ਚਕ੍ਖੁਵਿਞ੍ਞਾਣਸ੍ਸ ਪਚ੍ਚਯੋਤਿ ਵਿਸਭਾਗਪਚ੍ਚਯੋ, ਚਕ੍ਖਾਯਤਨਸ੍ਸ ਵਿਸਭਾਗੇਨ ਸੋਤਾਯਤਨੇਨ ਪਚ੍ਚਯੇਨ ਸਮੁਪ੍ਪਨ੍ਨੋ ਵਿਸਭਾਗਪਚ੍ਚਯਸਮੁਪ੍ਪਨ੍ਨੋ.

੧੩੪੬. ਅਜ੍ਜਵਨਿਦ੍ਦੇਸੇ ਅਜ੍ਜਵੋ ਅਜ੍ਜਵਤਾਤਿ ਉਜੁਤਾ ਉਜੁਕਤਾ ਇਚ੍ਚੇਵ ਵੁਤ੍ਤਂ ਹੋਤੀਤਿ ਅਜ੍ਜਵਮਦ੍ਦਵਨਿਦ੍ਦੇਸੇਸੁ ਉਜੁਕਤਾਮੁਦੁਤਾਨਿਦ੍ਦੇਸੇਹਿ ਵਿਸੇਸਂ ਮਦ੍ਦਵਨਿਦ੍ਦੇਸੇ ਵੁਤ੍ਤਂ ‘‘ਨੀਚਚਿਤ੍ਤਤਾ’’ਤਿਪਦਮਾਹ. ਤਤ੍ਥ ‘‘ਨੀਚਚਿਤ੍ਤਤਾ ਮੁਦੁਤਾ’’ਤਿ ਪੁਨ ਮੁਦੁਤਾਵਚਨਂ ਨੀਚਚਿਤ੍ਤਤਾਯ ਵਿਸੇਸਨਤ੍ਥਂ. ਓਮਾਨੋਪਿ ਹਿ ਨੀਚਚਿਤ੍ਤਤਾ ਹੋਤਿ, ਨ ਪਨ ਮੁਦੁਤਾਤਿ.

੧੩੪੮. ਪਰੇਸਂ ਦੁਕ੍ਕਟਂ ਦੁਰੁਤ੍ਤਞ੍ਚ ਪਟਿਵਿਰੋਧਾਕਰਣੇਨ ਅਤ੍ਤਨੋ ਉਪਰਿ ਆਰੋਪੇਤ੍ਵਾ ਵਾਸੇਨ੍ਤਿ. ਚਿਤ੍ਤਸ੍ਸ ਸਕਮਨਤਾਤਿ ਚਿਤ੍ਤਸ੍ਸ ਅਬ੍ਯਾਪਨ੍ਨੋ ਸਕੋ ਮਨੋਭਾਵੋਤਿ ਅਤ੍ਥੋ. ਚਿਤ੍ਤਨ੍ਤਿ ਵਾ ਚਿਤ੍ਤਪ੍ਪਬਨ੍ਧਂ ਏਕਤ੍ਤੇਨ ਗਹੇਤ੍ਵਾ ਤਸ੍ਸ ਅਨ੍ਤਰਾ ਉਪ੍ਪਨ੍ਨੇਨ ਪੀਤਿਸਹਗਤਮਨੇਨ ਸਕਮਨਤ੍ਤਂ ਆਹ. ਅਤ੍ਤਮਨੋ ਵਾ ਪੁਗ੍ਗਲੋ, ਤਸ੍ਸ ਭਾਵੋ ਅਤ੍ਤਮਨਤਾ. ਸਾ ਨ ਸਤ੍ਤਸ੍ਸਾਤਿ ਪੁਗ੍ਗਲਦਿਟ੍ਠਿਨਿਵਾਰਣਤ੍ਤਂ ‘‘ਚਿਤ੍ਤਸ੍ਸਾ’’ਤਿ ਵੁਤ੍ਤਂ.

੧੩੪੯. ਕਾਯਵਾਚਾਹਿ ਕਤ੍ਤਬ੍ਬਸ੍ਸ ਅਕਰਣੇਨ ਅਸਾਦਿਯਿਤਬ੍ਬਸ੍ਸ ਸਾਦਿਯਨੇਨ ਚ ਮਨਸਾਪਿ ਆਚਰਤਿ ਏਵ, ਇਨ੍ਦ੍ਰਿਯਸਂਵਰਾਦਿਭੇਦਨਵਸੇਨ ਵਾ ਏਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੧੩੫੦. ਸਦੋਸਵਣੇ ਰੁਕ੍ਖੇ ਨਿਯ੍ਯਾਸਪਿਣ੍ਡਿਯੋ, ਅਹਿਚ੍ਛਤ੍ਤਕਾਨਿ ਵਾ ਉਟ੍ਠਿਤਾਨਿ ‘‘ਅਣ੍ਡਕਾਨੀ’’ਤਿ ਵਦਨ੍ਤਿ. ਫੇਗ੍ਗੁਰੁਕ੍ਖਸ੍ਸ ਪਨ ਕੁਥਿਤਸ੍ਸ ਅਣ੍ਡਾਨਿ ਵਿਯ ਉਟ੍ਠਿਤਾ ਚੁਣ੍ਣਪਿਣ੍ਡਿਯੋ ਗਣ੍ਠਿਯੋ ਵਾ ‘‘ਅਣ੍ਡਕਾਨੀ’’ਤਿ ਵੇਦਿਤਬ੍ਬਾ. ਪਦੁਮਨਾਲ਼ਂ ਵਿਯ ਸੋਤਂ ਘਂਸਯਮਾਨਾ ਵਿਯ ਪਵਿਸਨ੍ਤੀ ਕਕ੍ਕਸਾ ਦਟ੍ਠਬ੍ਬਾ. ਕੋਧੇਨ ਨਿਬ੍ਬਤ੍ਤਾ ਤਸ੍ਸ ਪਰਿਵਾਰਭੂਤਾ ਕੋਧਸਾਮਨ੍ਤਾ. ਪੁਰੇ ਸਂਵਡ੍ਢਨਾਰੀ ਪੋਰੀ, ਸਾ ਵਿਯ ਸੁਕੁਮਾਰਾ ਮੁਦੁਕਾ ਵਾਚਾ ਪੋਰੀ ਵਿਯਾਤਿ ਪੋਰੀ. ਤਤ੍ਥਾਤਿ ‘‘ਭਾਸਿਤਾ ਹੋਤੀ’’ਤਿ ਵੁਤ੍ਤਾਯ ਕਿਰਿਯਾਯਾਤਿਪਿ ਯੋਜਨਾ ਸਮ੍ਭਵਤਿ, ਤਤ੍ਥ ਵਾਚਾਯਾਤਿ ਵਾ. ਸਣ੍ਹਵਾਚਤਾਤਿਆਦਿਨਾ ਤਂ ਵਾਚਂ ਪਵਤ੍ਤਯਮਾਨਂ ਚੇਤਨਂ ਦਸ੍ਸੇਤਿ.

੧੩੫੧. ਆਮਿਸਾਲਾਭੇਨ ਯਂ ਛਿਦ੍ਦਂ ਹੋਤਿ, ਤਂ ਆਮਿਸਾਲਾਭੇਨ ‘‘ਛਿਦ੍ਦ’’ਨ੍ਤਿ ਵੁਤ੍ਤਂ. ਦ੍ਵੇਯੇਵ ਹੀਤਿ ਯਥਾਵੁਤ੍ਤਾਨਿ ਆਮਿਸਧਮ੍ਮਾਲਾਭੇਹਿ ਪਵਤ੍ਤਮਾਨਾਨਿ ਛਿਦ੍ਦਾਨਿ ਆਹ. ਗਮਨਸਭਾਗੇਨਾਤਿ ਗਮਨਮਗ੍ਗਸ੍ਸ ਅਨੁਚ੍ਛਵਿਕਦਿਸਾਭਾਗੇਨ. ਸਙ੍ਗਹਪਕ੍ਖੇ ਠਤ੍ਵਾਤਿ ਸਙ੍ਗਹਂ ਕਰੋਮਿਚ੍ਚੇਵ ਕਥੇਤਬ੍ਬਂ, ਨ ਲਾਭਸਕ੍ਕਾਰਕਾਮਤਾਦੀਹੀਤਿ ਅਤ੍ਥੋ. ਅਵਸ੍ਸਂ ਕਾਤਬ੍ਬਂ ਕਿਚ੍ਚਂ, ਇਤਰਂ ਕਰਣੀਯਂ. ਅਬ੍ਭਾਨਤੋ ਅਞ੍ਞਂ ਆਪਤ੍ਤਿਵੁਟ੍ਠਾਨਂ ‘‘ਵੁਟ੍ਠਾਨ’’ਨ੍ਤਿ ਵੁਤ੍ਤਂ.

੧੩੫੨. ਸਸਮ੍ਭਾਰਕਥਾਤਿ ਦਸ੍ਸਨਸ੍ਸ ਕਾਰਣਸਹਿਤਾਤਿ ਅਤ੍ਥੋ, ਸਸਮ੍ਭਾਰਸ੍ਸ ਵਾ ਦਸ੍ਸਨਸ੍ਸ ਕਥਾ ਸਸਮ੍ਭਾਰਕਥਾ. ਯਸ੍ਸ ਚਕ੍ਖੁਨ੍ਦ੍ਰਿਯਾਸਂਵਰਸ੍ਸ ਹੇਤੂਤਿ ਵਤ੍ਵਾ ਪੁਨ ‘‘ਤਸ੍ਸ ਚਕ੍ਖੁਨ੍ਦ੍ਰਿਯਸ੍ਸ ਸਤਿਕਵਾਟੇਨ ਪਿਦਹਨਤ੍ਥਾਯਾ’’ਤਿ ਵੁਤ੍ਤਂ, ਨ ਅਸਂਵਰਸ੍ਸਾਤਿ. ਤਦਿਦਂ ਯਂ ਚਕ੍ਖੁਨ੍ਦ੍ਰਿਯਾਸਂਵਰਸ੍ਸ ਹੇਤੁ ਅਭਿਜ੍ਝਾਦਿਅਨ੍ਵਾਸ੍ਸਵਨਂ ਦਸ੍ਸਿਤਂ, ਤਂ ਅਸਂਵੁਤਚਕ੍ਖੁਨ੍ਦ੍ਰਿਯਸ੍ਸੇਵ ਹੇਤੁਪਵਤ੍ਤਂ ਦਸ੍ਸਿਤਨ੍ਤਿ ਕਤ੍ਵਾ ਵੁਤ੍ਤਨ੍ਤਿ ਵੇਦਿਤਬ੍ਬਂ, ਯਤ੍ਵਾਧਿਕਰਣਨ੍ਤਿ ਹਿ ਯਸ੍ਸ ਚਕ੍ਖੁਨ੍ਦ੍ਰਿਯਸ੍ਸ ਕਾਰਣਾਤਿ ਅਤ੍ਥੋ. ਕਸ੍ਸ ਚ ਕਾਰਣਾਤਿ? ਅਸਂਵੁਤਸ੍ਸ. ਕਿਞ੍ਚ ਅਸਂਵੁਤਂ? ਯਸ੍ਸ ਚਕ੍ਖੁਨ੍ਦ੍ਰਿਯਾਸਂਵਰਸ੍ਸ ਹੇਤੁ ਅਨ੍ਵਾਸ੍ਸਵਨ੍ਤਿ ਤਦੁਪਲਕ੍ਖਿਤਂ, ਤਸ੍ਸ ਸਂਵਰਾਯਾਤਿ ਅਯਮਤ੍ਥਯੋਜਨਾ.

ਜਵਨਕ੍ਖਣੇ ਪਨ ਦੁਸ੍ਸੀਲ੍ਯਂ ਵਾਤਿਆਦਿ ਪੁਨ ਅਵਚਨਤ੍ਥਂ ਇਧੇਵ ਸਬ੍ਬਂ ਵੁਤ੍ਤਨ੍ਤਿ ਛਸੁ ਦ੍ਵਾਰੇਸੁ ਯਥਾਸਮ੍ਭਵਂ ਯੋਜੇਤਬ੍ਬਂ. ਨ ਹਿ ਪਞ੍ਚਦ੍ਵਾਰੇ ਕਾਯਵਚੀਦੁਚ੍ਚਰਿਤਸਙ੍ਖਾਤਂ ਦੁਸ੍ਸੀਲ੍ਯਂ ਅਤ੍ਥੀਤਿ. ਯਥਾ ਕਿਨ੍ਤਿਆਦਿਨਾ ਨਗਰਦ੍ਵਾਰੇ ਅਸਂਵਰੇ ਸਤਿ ਤਂਸਮ੍ਬਨ੍ਧਾਨਂ ਘਰਾਦੀਨਂ ਅਸਂਵੁਤਤਾ ਵਿਯ ਜਵਨੇ ਅਸਂਵਰੇ ਸਤਿ ਤਂਸਮ੍ਬਨ੍ਧਾਨਂ ਦ੍ਵਾਰਾਦੀਨਂ ਅਸਂਵੁਤਤਾਤਿ ਏਵਂ ਅਞ੍ਞੇਸਂ ਸਂਵਰੇ, ਅਞ੍ਞੇਸਂ ਸਂਵੁਤਤਾਸਾਮਞ੍ਞਮੇਵ ਨਿਦਸ੍ਸੇਤਿ, ਨ ਪੁਬ੍ਬਾਪਰਸਾਮਞ੍ਞਂ ਅਨ੍ਤੋ ਬਹਿ ਸਾਮਞ੍ਞਂ ਵਾ. ਸਤਿ ਵਾ ਦ੍ਵਾਰਭਵਙ੍ਗਾਦਿਕੇ ਪੁਨ ਉਪ੍ਪਜ੍ਜਮਾਨਂ ਜਵਨਂ ਬਾਹਿਰਂ ਵਿਯ ਕਤ੍ਵਾ ਨਗਰਦ੍ਵਾਰਸਮਾਨਂ ਵੁਤ੍ਤਂ, ਇਤਰਞ੍ਚ ਅਨ੍ਤੋਨਗਰਦ੍ਵਾਰਸਮਾਨਂ. ਜਵਨੇ ਵਾ ਅਸਂਵਰੇ ਉਪ੍ਪਨ੍ਨੇ ਤਤੋ ਪਰਂ ਦ੍ਵਾਰਭਵਙ੍ਗਾਦੀਨਂ ਅਸਂਵਰਹੇਤੁਭਾਵਾਪਤ੍ਤਿਤੋ ਨਗਰਦ੍ਵਾਰਸਦਿਸੇਨ ਜਵਨੇਨ ਪਵਿਸਿਤ੍ਵਾ ਦੁਸ੍ਸੀਲ੍ਯਾਦਿਚੋਰਾਨਂ ਦ੍ਵਾਰਭਵਙ੍ਗਾਦਿਮੂਸਨਂ ਕੁਸਲਭਣ੍ਡਵਿਨਾਸਨਂ ਕਥਿਤਨ੍ਤਿ ਦਟ੍ਠਬ੍ਬਂ.

੧੩੫੩. ਇਮਿਨਾ ਆਹਾਰੇਨ ਨਿਤ੍ਥਰਣਤ੍ਥੇਨ ਅਤ੍ਥਿਕਭਾਵੋ ਇਦਮਤ੍ਥਿਕਤਾ. ਆਹਾਰਪਰਿਭੋਗੇ ਅਸਨ੍ਤੁਸ੍ਸਨਾਤਿ ਆਹਾਰਪਰਿਭੋਗਕ੍ਖਣੇ ਪਵਤ੍ਤਾ ਅਸਨ੍ਤੁਸ੍ਸਨਾ, ਦਵਤ੍ਥਾਦਿਅਭਿਲਾਸੋਤਿ ਅਤ੍ਥੋ. ਏਤ੍ਥ ਚ ਅਸਨ੍ਤੁਟ੍ਠਿਤਾ ਲੋਭੋ, ਅਮਤ੍ਤਞ੍ਞੁਤਾ ਅਪ੍ਪਟਿਸਙ੍ਖਾ ਚ ਮੋਹੋਤਿ ਇਮੇ ਦ੍ਵੇ ਧਮ੍ਮਾ ‘‘ਭੋਜਨੇ ਅਮਤ੍ਤਞ੍ਞੁਤਾ’’ਤਿ ਵੇਦਿਤਬ੍ਬਾ.

੧੩੫੫. ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ ਪਵਤ੍ਤਮਾਨੋਵ ਮਾਨਮਦੋ. ਅਸਦ੍ਧਮ੍ਮਸੇਵਨਾਸਮਤ੍ਥਤਂ ਨਿਸ੍ਸਾਯ ਪਵਤ੍ਤੋ ਮਾਨੋ, ਰਾਗੋ ਏਵ ਵਾ ਪੁਰਿਸਮਦੋ. ਸਕ੍ਕਰਸਪ੍ਪਿਖੀਰਾਦੀਨਿ ਯੋਜੇਤ੍ਵਾ ਬਹਲਪਕ੍ਕਂ ਭੋਜਨਂ ਪਿਣ੍ਡਰਸਭੋਜਨਂ, ਬਹਲਪਕ੍ਕਂ ਵਾ ਮਂਸਰਸਾਦਿਭੋਜਨਂ. ਮਨ੍ਦਨ੍ਤਿ ਅਪ੍ਪਂ. ਠਿਤਿਯਾਤਿ ਠਿਤਤ੍ਥਂ. ਤਦਤ੍ਥਞ੍ਚ ਭੁਞ੍ਜਨ੍ਤੋ ਯਸ੍ਮਾ ‘‘ਕਾਯਂ ਠਪੇਸ੍ਸਾਮੀ’’ਤਿ ਭੁਞ੍ਜਤਿ, ਤਸ੍ਮਾ ‘‘ਠਪਨਤ੍ਥਾਯਾ’’ਤਿ ਵੁਤ੍ਤਂ. ਅਭੁਤ੍ਤਪਚ੍ਚਯਾ ਉਪ੍ਪਜ੍ਜਨਕਾਤਿ ਇਦਂ ਖੁਦਾਯ ਵਿਸੇਸਨਂ ਯਸ੍ਸਾ ਅਪ੍ਪਵਤ੍ਤਿ ਭੋਜਨੇਨ ਕਾਤਬ੍ਬਾ, ਤਸ੍ਸਾ ਦਸ੍ਸਨਤ੍ਥਂ. ਸਕਲਂ ਸਾਸਨਨ੍ਤਿ ਪਾਲ਼ਿਧਮ੍ਮਮ੍ਪਿ ਸਬ੍ਬਕੁਸਲੇਪਿ ਸਙ੍ਗਣ੍ਹਾਤਿ. ਅਭੁਤ੍ਤਪਚ੍ਚਯਾ ਉਪ੍ਪਜ੍ਜਨਕਵੇਦਨਾ, ਭੁਤ੍ਤਪਚ੍ਚਯਾ ਨ ਉਪ੍ਪਜ੍ਜਨਕਵੇਦਨਾਤਿ ਏਤਾਸਂ ਕੋ ਵਿਸੇਸੋ? ਪੁਰਿਮਾ ਯਥਾਪਵਤ੍ਤਾ ਜਿਘਚ੍ਛਾਨਿਮਿਤ੍ਤਾ ਵੇਦਨਾ. ਸਾ ਹਿ ਅਭੁਞ੍ਜਨ੍ਤਸ੍ਸ ਭਿਯ੍ਯੋ ਪਵਤ੍ਤਨਵਸੇਨ ਉਪ੍ਪਜ੍ਜਤੀਤਿ. ਪਚ੍ਛਿਮਾਪਿ ਖੁਦਾਨਿਮਿਤ੍ਤਾਵ ਅਙ੍ਗਦਾਹਸੂਲਾਦਿਵੇਦਨਾ ਅਪ੍ਪਵਤ੍ਤਾ. ਸਾ ਹਿ ਭੁਤ੍ਤਪਚ੍ਚਯਾ ਪੁਬ੍ਬੇ ਅਨੁਪ੍ਪਨ੍ਨਾਵ ਨ ਉਪ੍ਪਜ੍ਜਿਸ੍ਸਤਿ. ਵਿਹਿਂਸਾਨਿਮਿਤ੍ਤਤਾ ਚੇਤਾਸਂ ਵਿਹਿਂਸਾਯ ਵਿਸੇਸੋ.

ਯਾਤ੍ਰਾਤਿ ਯਾਪਨਾ ਵੁਤ੍ਤਾ, ਪੁਬ੍ਬੇਪਿ ‘‘ਯਾਪਨਾਯਾ’’ਤਿ ਵੁਤ੍ਤਂ, ਕੋ ਏਤ੍ਥ ਵਿਸੇਸੋ? ਪੁਬ੍ਬੇ ‘‘ਯਾਪਨਾਯਾਤਿ ਜੀਵਿਤਿਨ੍ਦ੍ਰਿਯਯਾਪਨਤ੍ਥਾਯਾ’’ਤਿ ਵੁਤ੍ਤਂ, ਇਧ ਪਨ ਚਤੁਨ੍ਨਂ ਇਰਿਯਾਪਥਾਨਂ ਅਵਿਚ੍ਛੇਦਸਙ੍ਖਾਤਾ ਯਾਪਨਾ ਯਾਤ੍ਰਾਤਿ ਅਯਮੇਤ੍ਥ ਵਿਸੇਸੋ. ਦਾਯਕਦੇਯ੍ਯਧਮ੍ਮਾਨਂ ਅਤ੍ਤਨੋ ਚ ਪਮਾਣਂ ਅਜਾਨਿਤ੍ਵਾ ਪਟਿਗ੍ਗਹਣਂ, ਸਦ੍ਧਾਦੇਯ੍ਯਵਿਨਿਪਾਤਨਤ੍ਥਂ ਵਾ ਪਟਿਗ੍ਗਹਣਂ ਅਧਮ੍ਮਿਕਪਟਿਗ੍ਗਹਣਂ, ਯੇਨ ਵਾ ਆਪਤ੍ਤਿਂ ਆਪਜ੍ਜੇਯ੍ਯ. ਅਪਚ੍ਚਵੇਕ੍ਖਿਤਪਰਿਭੋਗੋ ਅਧਮ੍ਮੇਨ ਪਰਿਭੋਗੋ. ਅਨਵਜ੍ਜੇ ਅਨਿਨ੍ਦਿਤਬ੍ਬੇ ਪਚ੍ਚਯੇ ਸਾਵਜ੍ਜਂ ਸਨਿਨ੍ਦਂ ਪਰਿਭੋਗੇਨ ਅਤ੍ਤਾਨਂ ਕਰੋਤਿ. ਅਨਵਜ੍ਜਤਾ ਚ ਭਵਿਸ੍ਸਤੀਤਿ ਅਤ੍ਤਨੋ ਪਕਤਿਅਗ੍ਗਿਬਲਾਦਿਂ ਜਾਨਿਤ੍ਵਾ ‘‘ਏਵਂ ਮੇ ਅਗਰਹਿਤਬ੍ਬਤਾ ਚ ਭਵਿਸ੍ਸਤੀ’’ਤਿ ਪਮਾਣਯੁਤ੍ਤਂ ਆਹਾਰੇਤੀਤਿ ਅਤ੍ਥੋ.

ਸੁਖੋ ਇਰਿਯਾਪਥਵਿਹਾਰੋ ਫਾਸੁਵਿਹਾਰੋ. ਏਤ੍ਤਕਞ੍ਹਿ ਭੁਞ੍ਜਿਤ੍ਵਾ…ਪੇ… ਪਵਤ੍ਤਨ੍ਤੀਤਿ ਇਰਿਯਾਪਥਾਨਂ ਸੁਖਪ੍ਪਵਤ੍ਤਿਯਾ ਕਾਰਣਭੂਤਂ ਭੁਞ੍ਜਨਂ ਪਿਵਨਞ੍ਚ ਇਰਿਯਾਪਥੇਹਿ ਕਾਰਣਭਾਵੇਨ ਗਹਿਤਤ੍ਤਾ ਤੇਹਿ ਸਾਧਿਤਂ ਵਿਯ ਵੁਤ੍ਤਂ. ‘‘ਅਭੁਤ੍ਵਾ ਉਦਕਂ ਪਿਵੇ’’ਤਿ ਲਿਖਨ੍ਤਿ, ‘‘ਭੁਤ੍ਵਾਨਾ’’ਤਿ ਪਨ ਪਾਠੋ. ਪੁਨਪਿ ਹਿ ਅਪ੍ਪਸ੍ਸੇਵ ਅਨੁਜਾਨਨਵਸੇਨ –

‘‘ਕਪ੍ਪਿਯਂ ਤਂ ਚੇ ਛਾਦੇਤਿ, ਚੀਵਰਂ ਇਦਮਤ੍ਥਿਕਂ;

ਅਲਂ ਫਾਸੁਵਿਹਾਰਾਯ.

‘‘ਪਲ੍ਲਙ੍ਕੇਨ ਨਿਸਿਨ੍ਨਸ੍ਸ, ਜਣ੍ਣੁਕੇ ਨਾਭਿਵਸ੍ਸਤਿ;

ਅਲਂ ਫਾਸੁਵਿਹਾਰਾਯਾ’’ਤਿ. (ਥੇਰਗਾ. ੯੮੪-੯੮੫) –

ਆਹ.

ਭੋਜਨਾਨਿਸਂਸੋਤਿ ਯਥਾਵੁਤ੍ਤੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭੋਜਨਸ੍ਸ ਅਗਰਹਿਤਬ੍ਬਤਾ ਸੁਖਵਿਹਾਰੋ ਚ ਆਨਿਸਂਸੋਤਿ ਅਤ੍ਥੋ. ਯੁਤ੍ਤਸ੍ਸ ਨਿਦ੍ਦੋਸਸ੍ਸ ਭੋਜਨਸ੍ਸ ਪਰਿਮਾਣਸ੍ਸ ਚ ਵਸੇਨ ਜਾਨਨਂ ਯੁਤ੍ਤਪਮਾਣਜਾਨਨਂ ਨਾਮ.

੧੩੫੬. ਵਿਨਾਸਂ ਪਤ੍ਤਿਯਾ ਨਟ੍ਠਾ, ਪਟਿਪਕ੍ਖੇਹਿ ਅਭਿਭੂਤਤ੍ਤਾ ਮੁਟ੍ਠਾ ਚ ਸਤਿ ਯਸ੍ਸ, ਸੋ ਨਟ੍ਠਮੁਟ੍ਠਸ੍ਸਤਿ, ਤਸ੍ਸ ਭਾਵੋ ਨਟ੍ਠਮੁਟ੍ਠਸ੍ਸਤਿਤਾ.

੧੩੬੮. ਵਿਸੁਦ੍ਧਿਪ੍ਪਤ੍ਤਨ੍ਤਿ ਮਗ੍ਗਫਲਸੀਲਂ ਵੁਚ੍ਚਤਿ. ਲੋਕੁਤ੍ਤਰਧਮ੍ਮਾਵਾਤਿ ਲੋਕੁਤ੍ਤਰਸਤਿਆਦਿਧਮ੍ਮਾਵ. ਸੀਲਸਮ੍ਪਦਾ ਪਨ ਰੂਪਾਰੂਪਾਵਚਰਾ ਨਤ੍ਥੀਤਿ ਸਮ੍ਭਵਤੋ ਯੋਜੇਤਬ੍ਬਾ.

੧੩੭੩. ਭੋਗੂਪਕਰਣੇਹਿ ਸਭੋਗੋ. ਚਤੁਨ੍ਨਂ ਸਚ੍ਚਾਨਂ ਅਨੁਲੋਮਨ੍ਤਿ ਚਤੁਸਚ੍ਚਪ੍ਪਟਿਵੇਧਸ੍ਸ ਅਨੁਲੋਮਨ੍ਤਿ ਅਤ੍ਥੋ. ‘‘ਸਚ੍ਚਾਨ’’ਨ੍ਤਿ ਹਿ ਪਟਿਵਿਜ੍ਝਿਤਬ੍ਬੇਹਿ ਪਟਿਵੇਧੋ ਵੁਤ੍ਤੋ, ਚਤੁਸਚ੍ਚਪ੍ਪਟਿਵੇਧਸ੍ਸ ਵਾ ਉਪਨਿਸ੍ਸਯਭੂਤਂ ਪਟਿਵਿਜ੍ਝਿਤਬ੍ਬਾਨਂ ਚਤੁਨ੍ਨਂ ਸਚ੍ਚਾਨਂ ਅਨੁਲੋਮਨ੍ਤਿ ਵੁਤ੍ਤਂ.

੧੩੭੮. ‘‘ਮਮ ਘਰਂ ਧੁਰਂ ਕਤ੍ਵਾ ਭਿਕ੍ਖਂ ਪਵਿਸਥਾ’’ਤਿ ਦਿਯ੍ਯਮਾਨਂ ਧੁਰਭਤ੍ਤਨ੍ਤਿ ਵਦਨ੍ਤਿ. ਨਿਚ੍ਚਭਤ੍ਤਾਦਿ ਵਾ ਅਞ੍ਞੇਪਿ ਆਣਾਪੇਤ੍ਵਾ ਸਯਂ ਧੁਰਂ ਹੁਤ੍ਵਾ ਦਿਨ੍ਨਂ ਧੁਰਭਤ੍ਤਂ.

੧੩੭੯. ਪਟਿਵਾਸੇਤਿ ਨਾਮਾਤਿ ਨਿਵਤ੍ਤੇਤਿ ਨਾਮ ਓਸਕ੍ਕੇਤਿ ਨਾਮ.

੧੩੮੦. ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਾਤਿ ਪੁਰਿਮਜਾਤੀਸੁ ਸਨ੍ਤਤਿਪਰਿਯਾਪਨ੍ਨੇ ਖਨ੍ਧੇ ਆਹ. ਖਨ੍ਧਪਟਿਬਦ੍ਧਨ੍ਤਿ ਵਤ੍ਥਾਭਰਣਯਾਨਗਾਮਜਨਪਦਾਦਿ. ਖਯਸਮਯੇਤਿ ਮਗ੍ਗਕ੍ਖਣਂ ਆਹ.

੧੩੮੧. ਅਧਿਮੁਚ੍ਚਨਟ੍ਠੇਨਾਤਿ ਅਨਿਗ੍ਗਹਿਤਪਕ੍ਖਨ੍ਦਨਸਙ੍ਖਾਤੇਨ ਯਥਾਸੁਖਂ ਪਵਤ੍ਤਨਟ੍ਠੇਨ.

੧੩੮੨. ਖੀਣਾਨਂ ਅਨ੍ਤੋ ਅਵਸਾਨਂ ਨਿਟ੍ਠਿਤਭਾਵੋ ਖੀਣਨ੍ਤੋ, ਖੀਣਾਨਂ ਵਾ ਆਦਿਕਾਲੋ, ਤਸ੍ਮਿਂ ਖੀਣਨ੍ਤੇ. ਏਸ ਨਯੋ ਨਿਰੁਦ੍ਧਨ੍ਤੇਤਿਆਦੀਸੁ.

ਦੁਕਨਿਕ੍ਖੇਪਕਥਾਵਣ੍ਣਨਾ ਨਿਟ੍ਠਿਤਾ.

ਨਿਕ੍ਖੇਪਕਣ੍ਡਵਣ੍ਣਨਾ ਨਿਟ੍ਠਿਤਾ.