੯. ਧਮ੍ਮਪਦਸੁਤ੍ਤਵਣ੍ਣਨਾ

੨੯. ਨਵਮੇ ਝਾਨਾਦਿਭੇਦੋ ਧਮ੍ਮੋ ਪਜ੍ਜਤਿ ਏਤੇਨਾਤਿ ਧਮ੍ਮਪਦਂ, ਅਨਭਿਜ੍ਝਾਵ ਧਮ੍ਮਪਦਂ ਅਨਭਿਜ੍ਝਾਧਮ੍ਮਪਦਂ, ਅਨਭਿਜ੍ਝਾਪਧਾਨੋ ਵਾ ਧਮ੍ਮਕੋਟ੍ਠਾਸੋ ਅਨਭਿਜ੍ਝਾਧਮ੍ਮਪਦਂ. ਏਵਂ ਸੇਸੇਸੁਪਿ. ਅਤ੍ਥਤੋ ਪਨ ਅਨਭਿਜ੍ਝਾਧਮ੍ਮਪਦਂ ਨਾਮ ਅਲੋਭੋ ਵਾ ਅਲੋਭਸੀਸੇਨ ਅਧਿਗਤਜ੍ਝਾਨਵਿਪਸ੍ਸਨਾਮਗ੍ਗਫਲਨਿਬ੍ਬਾਨਾਨਿ ਵਾ. ਅਬ੍ਯਾਪਾਦੋ ਧਮ੍ਮਪਦਂ ਨਾਮ ਮੇਤ੍ਤਾ ਵਾ ਮੇਤ੍ਤਾਸੀਸੇਨ ਅਧਿਗਤਜ੍ਝਾਨਾਦੀਨਿ ਵਾ. ਸਮ੍ਮਾਸਤਿਧਮ੍ਮਪਦਂ ਨਾਮ ਸੂਪਟ੍ਠਿਤਸ੍ਸਤਿ ਵਾ ਸਤਿਸੀਸੇਨ ਅਧਿਗਤਜ੍ਝਾਨਾਦੀਨਿ ਵਾ. ਸਮ੍ਮਾਸਮਾਧਿਧਮ੍ਮਪਦਂ ਨਾਮ ਅਟ੍ਠਸਮਾਪਤ੍ਤਿ ਵਾ ਅਟ੍ਠਸਮਾਪਤ੍ਤਿਸੀਸੇਨ ਅਧਿਗਤਜ੍ਝਾਨਵਿਪਸ੍ਸਨਾਮਗ੍ਗਫਲਨਿਬ੍ਬਾਨਾਨਿ ਵਾ. ਦਸਅਸੁਭਵਸੇਨ ਵਾ ਅਧਿਗਤਜ੍ਝਾਨਾਦੀਨਿ ਅਨਭਿਜ੍ਜਾ ਧਮ੍ਮਪਦਂ. ਚਤੁਬ੍ਰਹ੍ਮਵਿਹਾਰਵਸੇਨ ਅਧਿਗਤਾਨਿ ਅਬ੍ਯਾਪਾਦੋ ਧਮ੍ਮਪਦਂ. ਦਸਾਨੁਸ੍ਸਤਿ ਆਹਾਰੇਪਟਿਕੂਲਸਞ੍ਞਾਵਸੇਨ ਅਧਿਗਤਾਨਿ ਸਮ੍ਮਾਸਤਿਧਮ੍ਮਪਦਂ. ਦਸਕਸਿਣਆਨਾਪਾਨਵਸੇਨ ਅਧਿਗਤਾਨਿ ਸਮ੍ਮਾਸਮਾਧਿਧਮ੍ਮਪਦਂ. ਅਨਭਿਜ੍ਝਾਲੂਤਿ ਅਨਭਿਜ੍ਝਾਯਨਸੀਲੋ. ਅਭਿਪੁਬ੍ਬੋ ਝੇਸਦ੍ਦੋ ਅਭਿਜ੍ਝਾਯਨਟ੍ਠੋ. ਤੇਨੇਵਾਹ ‘‘ਨਿਤ੍ਤਣ੍ਹੋ ਹੁਤ੍ਵਾ’’ਤਿ. ਪਕਤਿਭਾਵਂ ਅਵਿਜਹਨ੍ਤੇਨਾਤਿ ਪਰਿਸੁਦ੍ਧਭਾਵਂ ਸਭਾਵਸਙ੍ਖਾਤਅਨਵਜ੍ਜਸਙ੍ਖਾਤਂ ਪਕਤਿਭਾਵਂ ਅਵਿਜਹਨ੍ਤੇਨ. ਸਾਵਜ੍ਜਧਮ੍ਮਸਮੁਪ੍ਪਤ੍ਤਿਯਾ ਹਿ ਚਿਤ੍ਤਸ੍ਸ ਅਨਵਜ੍ਜਭਾਵੋ ਜਹਿਤੋ ਹੋਤੀਤਿ.

ਧਮ੍ਮਪਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.