੧੦. ਪਰਿਬ੍ਬਾਜਕਸੁਤ੍ਤਵਣ੍ਣਨਾ

੩੦. ਦਸਮੇ ਅਭਿਞ੍ਞਾਤਾਤਿ ਏਦਿਸੋ ਚ ਏਦਿਸੋ ਚਾਤਿ ਅਭਿਲਕ੍ਖਣਵਸੇਨ ਞਾਤਾ. ਤੇਨਾਹ ‘‘ਞਾਤਾ ਪਾਕਟਾ’’ਤਿ. ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਏਤ੍ਥ ਪਟਿਸਲ੍ਲਾਨਨ੍ਤਿ ਤੇਹਿ ਤੇਹਿ ਸਦ੍ਧਿਵਿਹਾਰਿਕਅਨ੍ਤੇਵਾਸਿਕਉਪਾਸਕਾਦਿਸਤ੍ਤੇਹਿ ਚੇਵ ਰੂਪਾਰਮ੍ਮਣਾਦਿਸਙ੍ਖਾਰੇਹਿ ਚ ਪਟਿਨਿਵਤ੍ਤਿਤ੍ਵਾ ਅਪਸਕ੍ਕਿਤ੍ਵਾ ਸਲ੍ਲੀਨਂ ਨਿਲੀਯਨਂ, ਏਕੀਭਾਵੋ ਪਵਿਵੇਕੋਤਿ ਵੁਤ੍ਤਂ ਹੋਤਿ. ਯੋ ਤਤੋ ਵੁਟ੍ਠਿਤੋ, ਸੋ ਪਟਿਸਲ੍ਲਾਨਾ ਵੁਟ੍ਠਿਤੋ ਨਾਮ ਹੋਤਿ. ਭਗਵਾ ਪਨ ਯਸ੍ਮਾ ਪਟਿਸਲ੍ਲਾਨਾ ਉਤ੍ਤਮਤੋ ਫਲਸਮਾਪਤ੍ਤਿਤੋ ਵੁਟ੍ਠਾਸਿ, ਤਸ੍ਮਾ ਵੁਤ੍ਤਂ ‘‘ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਫਲਸਮਾਪਤ੍ਤਿਤੋ ਵੁਟ੍ਠਿਤੋ’’ਤਿ. ਵਤ੍ਥੁਕਾਮੇਸੂਤਿ ਰੂਪਾਦੀਸੁ ਕਿਲੇਸਕਾਮਸ੍ਸ ਵਤ੍ਥੁਭੂਤੇਸੁ ਕਾਮੇਸੁ. ਬਹਲਰਾਗਨ੍ਤਿ ਥਿਰਮੂਲਦੁਮ੍ਮੋਚਨੀਯਤਾਹਿ ਅਜ੍ਝੋਸਾਨੇਨ ਬਹਲਭੂਤਂ ਕਿਲੇਸਕਾਮਂ. ਸਕਾਰਣਾਤਿ ਯੇਹਿ ਕਾਰਣੇਹਿ ਪਰੇਸਂ ਵਾਦੇ ਦੋਸਂ ਦਸ੍ਸੇਨ੍ਤਿ, ਤੇਹਿ ਕਾਰਣੇਹਿ ਸਕਾਰਣਾ. ਨ ਹਿ ਲਕ੍ਖਣਯੁਤ੍ਤੇਨ ਹੇਤੁਨਾ ਵਿਨਾ ਪਰਵਾਦੇਸੁ ਦੋਸਂ ਦਸ੍ਸੇਤੁਂ ਸਕ੍ਕਾ.

ਏਵਮਾਦੀਤਿ ਏਤ੍ਥ ਆਦਿਸਦ੍ਦੇਨ ‘‘ਨਤ੍ਥਿ ਹੇਤੁ ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਸਂਕਿਲੇਸਾਯਾ’’ਤਿ (ਦੀ. ਨਿ. ੧.੧੬੮) ਏਵਮਾਦਿਂ ਸਙ੍ਗਣ੍ਹਾਤਿ, ਤਸ੍ਮਾ ਏਵਮਾਦਿਵਾਦਿਨੋ ਏਵਂ ਹੇਤੁਪ੍ਪਟਿਕ੍ਖੇਪਵਾਦਿਨੋਤਿ ਅਤ੍ਥੋ. ਏਤ੍ਥ ਚ ਨਤ੍ਥਿਕਦਿਟ੍ਠਿ ਵਿਪਾਕਂ ਪਟਿਬਾਹਤਿ, ਅਕਿਰਿਯਦਿਟ੍ਠਿ ਕਮ੍ਮਂ ਪਟਿਬਾਹਤਿ, ਅਹੇਤੁਕਦਿਟ੍ਠਿ ਉਭਯਂ ਪਟਿਬਾਹਤਿ. ਤਤ੍ਥ ਕਮ੍ਮਂ ਪਟਿਬਾਹਨ੍ਤੇਨ ਵਿਪਾਕੋ ਪਟਿਬਾਹਿਤੋ ਹੋਤਿ, ਵਿਪਾਕਂ ਪਟਿਬਾਹਨ੍ਤੇਨਪਿ ਕਮ੍ਮਂ ਪਟਿਬਾਹਿਤਂ. ਇਤਿ ਸਬ੍ਬੇਪੇਤੇ ਅਤ੍ਥਤੋ ਉਭਯਪਟਿਬਾਹਕਾ ਅਹੇਤੁਵਾਦਾ ਚੇਵ ਅਕਿਰਿਯਵਾਦਾ ਚ ਨਤ੍ਥਿਕਵਾਦਾ ਚ ਹੋਨ੍ਤਿ.

ਓਕ੍ਕਨ੍ਤਨਿਯਮਾਤਿ ਓਗਾਲ਼੍ਹਮਿਚ੍ਛਤ੍ਤਨਿਯਮਾ. ਸਜ੍ਝਾਯਤੀਤਿ ਤਂ ਦਿਟ੍ਠਿਦੀਪਕਂ ਗਨ੍ਥਂ ਉਗ੍ਗਹੇਤ੍ਵਾ ਪਠਤਿ. ਵੀਮਂਸਤੀਤਿ ਤਸ੍ਸ ਅਤ੍ਥਂ ਵਿਚਾਰੇਤਿ. ਤਸ੍ਸਾਤਿਆਦਿ ਵੀਮਂਸਨਾਕਾਰਦਸ੍ਸਨਂ. ਤਸ੍ਮਿਂ ਆਰਮ੍ਮਣੇਤਿ ਯਥਾਪਰਿਕਪ੍ਪਿਤਹੇਤੁਪਚ੍ਚਯਾਭਾਵਾਦਿਕੇ ਨਤ੍ਥਿ ਹੇਤੂਤਿਆਦਿਨਯਪ੍ਪਵਤ੍ਤਾਯ ਲਦ੍ਧਿਯਾ ਆਰਮ੍ਮਣੇ. ਮਿਚ੍ਛਾਸਤਿ ਸਨ੍ਤਿਟ੍ਠਤੀਤਿ ‘‘ਨਤ੍ਥਿ ਹੇਤੂ’’ਤਿਆਦਿਵਸੇਨ ਅਨੁਸ੍ਸਵੂਪਲਦ੍ਧੇ ਅਤ੍ਥੇ ਤਦਾਕਾਰਪਰਿਵਿਤਕ੍ਕਨੇਹਿ ਸਵਿਗ੍ਗਹੇ ਵਿਯ ਸਰੂਪਤੋ ਚਿਤ੍ਤਸ੍ਸ ਪਚ੍ਚੁਪਟ੍ਠਿਤੇ ਚਿਰਕਾਲਪਰਿਚਯੇਨ ਏਵਮੇਤਨ੍ਤਿ ਨਿਜ੍ਝਾਨਕ੍ਖਮਭਾਵੂਪਗਮਨੇਨ ਨਿਜ੍ਝਾਨਕ੍ਖਨ੍ਤਿਯਾ ਤਥਾਗਹਿਤੇ ਪੁਨਪ੍ਪੁਨਂ ਤਥੇਵ ਆਸੇਵਨ੍ਤਸ੍ਸ ਬਹੁਲੀਕਰੋਨ੍ਤਸ੍ਸ ਮਿਚ੍ਛਾਵਿਤਕ੍ਕੇਨ ਸਮਾਨੀਯਮਾਨਾ ਮਿਚ੍ਛਾਵਾਯਾਮੋਪਤ੍ਥਮ੍ਭਿਤਾ ਅਤਂਸਭਾਵਂ ਤਂਸਭਾਵਨ੍ਤਿ ਗਣ੍ਹਨ੍ਤੀ ਮਿਚ੍ਛਾਸਤੀਤਿ ਲਦ੍ਧਨਾਮਾ ਤਂਲਦ੍ਧਿਸਹਗਤਾ ਤਣ੍ਹਾ ਸਨ੍ਤਿਟ੍ਠਤਿ. ਚਿਤ੍ਤਂ ਏਕਗ੍ਗਂ ਹੋਤੀਤਿ ਯਥਾਵੁਤ੍ਤਵਿਤਕ੍ਕਾਦਿਪਚ੍ਚਯਲਾਭੇਨ ਤਸ੍ਮਿਂ ਆਰਮ੍ਮਣੇ ਅਵਟ੍ਠਿਤਤਾਯ ਅਨੇਕਗ੍ਗਤਂ ਪਹਾਯ ਚਿਤ੍ਤਂ ਏਕਗ੍ਗਂ ਅਪ੍ਪਿਤਂ ਵਿਯ ਹੋਤਿ ਮਿਚ੍ਛਾਸਮਾਧਿਨਾ. ਸੋਪਿ ਹਿ ਪਚ੍ਚਯਵਿਸੇਸੇਨ ਲਦ੍ਧਭਾਵਨਾਬਲੋ ਕਦਾਚਿ ਸਮਾਧਾਨਪਟਿਰੂਪਕਿਚ੍ਚਕਰੋ ਹੋਤਿਯੇਵ ਪਹਰਣਵਿਜ੍ਝਨਾਦੀਸੁ ਵਿਯਾਤਿ ਦਟ੍ਠਬ੍ਬਂ.

ਜਵਨਾਨਿ ਜਵਨ੍ਤੀਤਿ ਅਨੇਕਕ੍ਖਤ੍ਤੁਂ ਤੇਨਾਕਾਰੇਨ ਪੁਬ੍ਬਭਾਗਿਯੇਸੁ ਜਵਨਵਾਰੇਸੁ ਪਵਤ੍ਤੇਸੁ ਸਬ੍ਬਪਚ੍ਛਿਮੇ ਜਵਨਵਾਰੇ ਸਤ੍ਤ ਜਵਨਾਨਿ ਜਵਨ੍ਤਿ. ਪਠਮਜਵਨੇ ਸਤੇਕਿਚ੍ਛੋ ਹੋਤਿ, ਤਥਾ ਦੁਤਿਯਾਦੀਸੂਤਿ ਧਮ੍ਮਸਭਾਵਦਸ੍ਸਨਮੇਤਂ, ਨ ਪਨ ਤਸ੍ਮਿਂ ਖਣੇ ਤੇਸਂ ਸਤੇਕਿਚ੍ਛਭਾਵਾਪਾਦਨਂ ਕੇਨਚਿ ਸਕ੍ਕਾ ਕਾਤੁਂ. ਤਤ੍ਥਾਤਿ ਤੇਸੁ ਤੀਸੁ ਮਿਚ੍ਛਾਦਸ੍ਸਨੇਸੁ. ਕੋਚਿ ਏਕਂ ਦਸ੍ਸਨਂ ਓਕ੍ਕਮਤੀਤਿ ਯਸ੍ਸ ਏਕਸ੍ਮਿਂਯੇਵ ਅਭਿਨਿਵੇਸੋ ਆਸੇਵਨਾ ਪਵਤ੍ਤਾ, ਸੋ ਏਕਂਯੇਵ ਦਸ੍ਸਨਂ ਓਕ੍ਕਮਤਿ. ਯਸ੍ਸ ਦ੍ਵੀਸੁ ਤੀਸੁਪਿ ਵਾ ਅਭਿਨਿਵੇਸੋ ਆਸੇਵਨਾ ਪਵਤ੍ਤਾ, ਸੋ ਦ੍ਵੇ ਤੀਣਿ ਓਕ੍ਕਮਤਿ. ਏਤੇਨ ਯਾ ਪੁਬ੍ਬੇ ਉਭਯਪਟਿਬਾਹਿਕਤਾਮੁਖੇਨ ਪਵਤ੍ਤਾ ਅਤ੍ਥਸਿਦ੍ਧਾ ਸਬ੍ਬਦਿਟ੍ਠਿਕਾ, ਸਾ ਪੁਬ੍ਬਭਾਗਿਯਾ, ਮਿਚ੍ਛਾਨਿਯਾਮੋਕ੍ਕਨ੍ਤਿਯਾ ਪਨ ਯਥਾਸਕਂ ਪਚ੍ਚਯਸਮੁਦਾਗਮਦਿਟ੍ਠਿਤੋ ਭਿਨ੍ਨਾਰਮ੍ਮਣਾਨਂ ਵਿਯ ਵਿਸੇਸਾਧਿਗਮਾਨਂ ਏਕਜ੍ਝਂ ਅਨੁਪ੍ਪਤ੍ਤਿਯਾ ਅਭਿਕਿਣ੍ਣਾ ਏਵਾਤਿ ਦਸ੍ਸੇਤਿ. ਏਕਸ੍ਮਿਂ ਓਕ੍ਕਨ੍ਤੇਪਿ ਦ੍ਵੀਸੁ ਤੀਸੁ ਓਕ੍ਕਨ੍ਤੇਸੁਪਿ ਨਿਯਤਮਿਚ੍ਛਾਦਿਟ੍ਠਿਕੋਵ ਹੋਤੀਤਿ ਇਮਿਨਾ ਤਿਸ੍ਸਨ੍ਨਮ੍ਪਿ ਦਿਟ੍ਠੀਨਂ ਸਮਾਨਫਲਤਂ ਸਮਾਨਬਲਞ੍ਚ ਦਸ੍ਸੇਤਿ. ਤਸ੍ਮਾ ਤਿਸ੍ਸੋਪਿ ਚੇਤਨਾ ਏਕਸ੍ਸ ਉਪ੍ਪਨ੍ਨਾ ਅਞ੍ਞਮਞ੍ਞਂ ਅਨੁਬਲਪ੍ਪਦਾਯਿਕਾ ਹੋਨ੍ਤਿ.

ਕਿਂ ਪਨੇਸ ਏਤਸ੍ਮਿਞ੍ਞੇਵ ਅਤ੍ਤਭਾਵੇ ਨਿਯਤੋ, ਉਦਾਹੁ ਅਞ੍ਞਸ੍ਮਿਮ੍ਪੀਤਿ? ਏਤਸ੍ਮਿਞ੍ਞੇਵ ਨਿਯਤੋ. ਅਕੁਸਲਞ੍ਹਿ ਨਾਮੇਤਂ ਅਬਲਂ, ਨ ਕੁਸਲਂ ਵਿਯ ਮਹਾਬਲਂ. ਅਞ੍ਞਥਾ ਸਮ੍ਮਤ੍ਤਨਿਯਾਮੋ ਵਿਯ ਅਚ੍ਚਨ੍ਤਿਕੋ ਸਿਯਾ, ਆਸੇਵਨਵਸੇਨ ਪਨ ਭਵਨ੍ਤਰੇਪਿ ਤਂ ਤਂ ਦਿਟ੍ਠਿਂ ਰੋਚੇਤਿਯੇਵ. ਤੇਨੇਵਾਹ ‘‘ਵਟ੍ਟਖਾਣੁਕੋ ਨਾਮੇਸ ਸਤ੍ਤੋ’’ਤਿ. ਤਸ੍ਮਾ ‘‘ਸਕਿਂ ਨਿਮੁਗ੍ਗੋ ਨਿਮੁਗ੍ਗੋ ਏਵ ਬਾਲੋ’’ਤਿ ਵਿਯ ਵਟ੍ਟਖਾਣੁਜੋਤਨਾ, ਯਾਦਿਸੇਹਿ ਪਨ ਪਚ੍ਚਯੇਹਿ ਅਯਂ ਤਂ ਦਸ੍ਸਨਂ ਓਕ੍ਕਨ੍ਤੋ ਪੁਨ ਕਦਾਚਿ ਮਿਚ੍ਛਤ੍ਤਨਿਯਾਮੋ ਤਪ੍ਪਟਿਕ੍ਖੇਪਪਚ੍ਚਯੇ ਪਟਿਚ੍ਚ ਤਤੋ ਸੀਸੁਕ੍ਖੇਪਨਮਸ੍ਸ ਨ ਹੋਤੀਤਿ ਨ ਵਤ੍ਤਬ੍ਬਂ. ਤੇਨ ਵੁਤ੍ਤਂ ‘‘ਯੇਭੁਯ੍ਯੇਨਾ’’ਤਿ. ਏਦਿਸਾਤਿ ‘‘ਬੁਦ੍ਧਾਨਮ੍ਪਿ ਅਤੇਕਿਚ੍ਛਾ’’ਤਿਆਦਿਨਾ ਵੁਤ੍ਤਸਦਿਸਾ.

ਅਤ੍ਤਨੋ ਨਿਨ੍ਦਾਭਯੇਨਾਤਿ ‘‘ਸਮ੍ਮਾ ਦਿਟ੍ਠਿਞ੍ਚ ਨਾਮ ਤੇ ਗਰਹਨ੍ਤੀ’’ਤਿਆਦਿਨਾ ਅਤ੍ਤਨੋ ਉਪਰਿ ਪਰੇਹਿ ਵਤ੍ਤਬ੍ਬਨਿਨ੍ਦਾਭਯੇਨ. ਘਟ੍ਟਨਭਯੇਨਾਤਿ ਤਥਾ ਪਰੇਸਂ ਅਪਸਾਦਨਭਯੇਨ. ਸਹਧਮ੍ਮੇਨ ਪਰੇਨ ਅਤ੍ਤਨੋ ਉਪਰਿ ਕਾਤਬ੍ਬਨਿਗ੍ਗਹੋ ਉਪਾਰਮ੍ਭੋ, ਤਤੋ ਪਰਿਤ੍ਤਾਸੋ ਉਪਾਰਮ੍ਭਭਯਂ. ਤਂ ਪਨ ਅਤ੍ਥਤੋ ਉਪਵਾਦਭਯਂ ਹੋਤੀਤਿ ਆਹ ‘‘ਉਪਵਾਦਭਯੇਨਾ’’ਤਿ. ਪਟਿਪ੍ਪਸ੍ਸਦ੍ਧਿਵਸੇਨ ਅਭਿਜ੍ਝਾ ਵਿਨਯਤਿ ਏਤੇਨਾਤਿ ਅਭਿਜ੍ਝਾਵਿਨਯੋ, ਅਰਹਤ੍ਤਫਲਂ. ਤੇਨਾਹ ‘‘ਅਭਿਜ੍ਝਾਵਿਨਯੋ ਵੁਚ੍ਚਤਿ ਅਰਹਤ੍ਤ’’ਨ੍ਤਿ.

ਪਰਿਬ੍ਬਾਜਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਉਰੁਵੇਲਵਗ੍ਗਵਣ੍ਣਨਾ ਨਿਟ੍ਠਿਤਾ.