੩. ਉਰੁਵੇਲਵਗ੍ਗੋ
੧. ਪਠਮਉਰੁਵੇਲਸੁਤ੍ਤਵਣ੍ਣਨਾ
੨੧. ਤਤਿਯਸ੍ਸ ਪਠਮੇ ਮਹਾਵੇਲਾ ਵਿਯ ਮਹਾਵੇਲਾ, ਵਿਪੁਲਵਾਲਿਕਪੁਞ੍ਜਤਾਯ ਮਹਨ੍ਤੋ ਵੇਲਾਤਟੋ ਵਿਯਾਤਿ ਅਤ੍ਥੋ. ਤੇਨਾਹ ‘‘ਮਹਾਵਾਲਿਕਰਾਸੀਤਿ ਅਤ੍ਥੋ’’ਤਿ. ਉਰੁ, ਮਰੁ, ਸਿਕਤਾ, ਵਾਲੁਕਾ, ਵਣ੍ਣੁ, ਵਾਲਿਕਾਤਿ ਇਮੇ ਸਦ੍ਦਾ ਸਮਾਨਤ੍ਥਾ, ਬ੍ਯਞ੍ਜਨਮੇਵ ਨਾਨਂ. ਤੇਨਾਹ ‘‘ਉਰੂਤਿ ਵਾਲਿਕਾ ਵੁਚ੍ਚਤੀ’’ਤਿ.
ਨਜ੍ਜਾਤਿ ਨਦਤਿ ਸਦ੍ਦਾਯਤੀਤਿ ਨਦੀ, ਤਸ੍ਸਾ ਨਜ੍ਜਾ, ਨਦਿਯਾ ਨਿਨ੍ਨਗਾਯਾਤਿ ਅਤ੍ਥੋ. ਨੇਰਞ੍ਜਰਾਯਾਤਿ ‘‘ਨੇਲਞ੍ਜਲਾਯਾ’’ਤਿ ਵਤ੍ਤਬ੍ਬੇ ਲ-ਕਾਰਸ੍ਸ ਰ-ਕਾਰਂ ਕਤ੍ਵਾ ‘‘ਨੇਰਞ੍ਜਰਾਯਾ’’ਤਿ ਵੁਤ੍ਤਂ, ਕਦ੍ਦਮਸੇਵਾਲਪਣਕਾਦਿਦੋਸਰਹਿਤਸਲਿਲਾਯਾਤਿ ਅਤ੍ਥੋ. ਕੇਚਿ ‘‘ਨੀਲਂ-ਜਲਾਯਾਤਿ ਵਤ੍ਤਬ੍ਬੇ ਨੇਰਞ੍ਜਰਾਯਾ’’ਤਿ ਵਦਨ੍ਤਿ. ਨਾਮਮੇਵ ਵਾ ਏਤਂ ਤਸ੍ਸਾ ਨਦਿਯਾਤਿ ਵੇਦਿਤਬ੍ਬਂ. ਤਸ੍ਸਾ ਨਦਿਯਾ ਤੀਰੇ ਯਤ੍ਥ ਭਗਵਾ ਵਿਹਾਸਿ, ਤਂ ਦਸ੍ਸੇਤੁਂ ‘‘ਅਜਪਾਲਨਿਗ੍ਰੋਧੇ’’ਤਿ ਵੁਤ੍ਤਂ. ਕਸ੍ਮਾ ਪਨਾਯਂ ਅਜਪਾਲਨਿਗ੍ਰੋਧੋ ਨਾਮ ਜਾਤੋਤਿ ਆਹ ‘‘ਤਸ੍ਸਾ’’ਤਿਆਦਿ. ਕੇਚਿ ਪਨ ‘‘ਯਸ੍ਮਾ ਤਤ੍ਥ ਵੇਦੇ ਸਜ੍ਝਾਯਿਤੁਂ ਅਸਮਤ੍ਥਾ ਮਹਲ੍ਲਕਬ੍ਰਾਹ੍ਮਣਾ ਪਾਕਾਰਪਰਿਕ੍ਖੇਪਯੁਤ੍ਤਾਨਿ ਨਿਵੇਸਨਾਨਿ ਕਤ੍ਵਾ ਸਬ੍ਬੇ ਵਸਿਂਸੁ, ਤਸ੍ਮਾਸ੍ਸ ਅਜਪਾਲਨਿਗ੍ਰੋਧੋਤਿ ਨਾਮਂ ਜਾਤ’’ਨ੍ਤਿ ਵਦਨ੍ਤਿ. ਤਤ੍ਰਾਯਂ ਵਚਨਤ੍ਥੋ – ਨ ਜਪਨ੍ਤੀਤਿ ਅਜਪਾ, ਮਨ੍ਤਾਨਂ ਅਨਜ੍ਝਾਯਕਾਤਿ ਅਤ੍ਥੋ. ਅਜਪਾਲਨ੍ਤਿ ਆਦਿਯਨ੍ਤਿ ਨਿਵਾਸਂ ਏਤ੍ਥਾਤਿ ਅਜਪਾਲੋਤਿ. ਅਪਰੇ ਪਨ ਵਦਨ੍ਤਿ ‘‘ਯਸ੍ਮਾ ਮਜ੍ਝਨ੍ਹਿਕਸਮਯੇ ਅਨ੍ਤੋਪਵਿਟ੍ਠੇ ਅਜੇ ਅਤ੍ਤਨੋ ਛਾਯਾਯ ਪਾਲੇਤਿ ਰਕ੍ਖਤਿ, ਤਸ੍ਮਾ ‘ਅਜਪਾਲੋ’ਤਿਸ੍ਸ ਨਾਮਂ ਰੁਲ਼੍ਹ’’ਨ੍ਤਿ. ਸਬ੍ਬਤ੍ਥਾਪਿ ਨਾਮਮੇਤਂ ਤਸ੍ਸ ਰੁਕ੍ਖਸ੍ਸ.
ਪਠਮਾਭਿਸਮ੍ਬੁਦ੍ਧੋਤਿ ਪਠਮਂ ਅਭਿਸਮ੍ਬੁਦ੍ਧੋ, ਅਨੁਨਾਸਿਕਲੋਪੇਨਾਯਂ ਨਿਦ੍ਦੇਸੋ. ਤੇਨੇਵਾਹ ‘‘ਸਮ੍ਬੁਦ੍ਧੋ ਹੁਤ੍ਵਾ ਪਠਮਮੇਵਾ’’ਤਿ. ਪਠਮਨ੍ਤਿ ਚ ਭਾਵਨਪੁਂਸਕਨਿਦ੍ਦੇਸੋ, ਤਸ੍ਮਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਪਠਮਂ ਅਜਪਾਲਨਿਗ੍ਰੋਧੇ ਵਿਹਰਾਮੀਤਿ ਏਵਮੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ. ਅਯਂ ਵਿਤਕ੍ਕੋਤਿ ਅਯਂ ‘‘ਕਿਨ੍ਨੁ ਖ੍ਵਾਹਂ…ਪੇ… ਵਿਹਰੇਯ੍ਯ’’ਨ੍ਤਿ ਏਵਂ ਪਵਤ੍ਤਵਿਤਕ੍ਕੋ. ਹਤ੍ਥੀ ਚ ਵਾਨਰੋ ਚ ਤਿਤ੍ਤਿਰੋ ਚ ਹਤ੍ਥਿਵਾਨਰਤਿਤ੍ਤਿਰਾ.
ਯੇ ਵੁਦ੍ਧਮਪਚਾਯਨ੍ਤੀਤਿ ਜਾਤਿਵੁਦ੍ਧੋ, ਵਯੋਵੁਦ੍ਧੋ, ਗੁਣਵੁਦ੍ਧੋਤਿ ਤਯੋ ਵੁਦ੍ਧਾ. ਤੇਸੁ ਜਾਤਿਸਮ੍ਪਨ੍ਨੋ ਜਾਤਿਵੁਦ੍ਧੋ ਨਾਮ, ਵਯੇ ਠਿਤੋ ਵਯੋਵੁਦ੍ਧੋ ਨਾਮ, ਗੁਣਸਮ੍ਪਨ੍ਨੋ ਗੁਣਵੁਦ੍ਧੋ ਨਾਮ. ਤੇਸੁ ਗੁਣਸਮ੍ਪਨ੍ਨੋ ਵਯੋਵੁਦ੍ਧੋ ਇਮਸ੍ਮਿਂ ਠਾਨੇ ਵੁਦ੍ਧੋਤਿ ਅਧਿਪ੍ਪੇਤੋ. ਅਪਚਾਯਨ੍ਤੀਤਿ ਜੇਟ੍ਠਾਪਚਾਯਿਕਾਕਮ੍ਮੇਨ ਪੂਜੇਨ੍ਤਿ. ਧਮ੍ਮਸ੍ਸ ਕੋਵਿਦਾਤਿ ਜੇਟ੍ਠਾਪਚਾਯਨਧਮ੍ਮਸ੍ਸ ਕੋਵਿਦਾ ਕੁਸਲਾ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਪਾਸਂਸਾਤਿ ਪਸਂਸਾਰਹਾ. ਸਮ੍ਪਰਾਯੇ ਚ ਸੁਗ੍ਗਤੀਤਿ ਸਮ੍ਪਰੇਤਬ੍ਬੇ ਇਮਂ ਲੋਕਂ ਹਿਤ੍ਵਾ ਗਨ੍ਤਬ੍ਬੇ ਪਰਲੋਕੇਪਿ ਤੇਸਂ ਸੁਗਤਿਯੇਵ. ਅਯਂ ਪਨੇਤ੍ਥ ਪਿਣ੍ਡਤ੍ਥੋ – ਖਤ੍ਤਿਯਾ ਵਾ ਹੋਨ੍ਤੁ ਬ੍ਰਾਹ੍ਮਣਾ ਵਾ ਵੇਸ੍ਸਾ ਵਾ ਸੁਦ੍ਦਾ ਵਾ ਗਹਟ੍ਠਾ ਵਾ ਪਬ੍ਬਜਿਤਾ ਵਾ ਤਿਰਚ੍ਛਾਨਗਤਾ ਵਾ, ਯੇ ਕੇਚਿ ਸਤ੍ਤਾ ਜੇਟ੍ਠਾਪਚਿਤਿਕਮ੍ਮੇਨ ਸੀਲਾਦਿਗੁਣਸਮ੍ਪਨ੍ਨਾਨਂ ਵਯੋਵੁਦ੍ਧਾਨਂ ਅਪਚਿਤਿਂ ਕਰੋਨ੍ਤਿ, ਤੇ ਇਮਸ੍ਮਿਞ੍ਚ ਅਤ੍ਤਭਾਵੇ ਜੇਟ੍ਠਾਪਚਿਤਿਕਾਰਕਾਤਿ ਪਸਂਸਂ ਵਣ੍ਣਨਂ ਥੋਮਨਂ ਲਭਨ੍ਤਿ, ਕਾਯਸ੍ਸ ਚ ਭੇਦਾ ਸਗ੍ਗੇ ਨਿਬ੍ਬਤ੍ਤਨ੍ਤੀਤਿ.
ਅਞ੍ਞਸ੍ਮਿਨ੍ਤਿ ਪਰਸ੍ਮਿਂ. ਅਤ੍ਤਾ ਨ ਹੋਤੀਤਿ ਅਞ੍ਞੋ, ਪਰੋ. ਸੋ ਪਨੇਤ੍ਥ ਨ ਯੋ ਕੋਚਿ ਅਧਿਪ੍ਪੇਤੋ, ਅਥ ਖੋ ਗਰੁਟ੍ਠਾਨਿਯੋ. ਤੇਨਾਹ ‘‘ਕਞ੍ਚਿ ਗਰੁਟ੍ਠਾਨੇ ਅਟ੍ਠਪੇਤ੍ਵਾ’’ਤਿ. ਪਤਿਸ੍ਸਤਿ ਗਰੁਨੋ ਆਣਂ ਸਮ੍ਪਟਿਚ੍ਛਤੀਤਿ ਪਤਿਸ੍ਸੋ, ਨ ਪਤਿਸ੍ਸੋ ਅਪ੍ਪਤਿਸ੍ਸੋ, ਪਤਿਸ੍ਸਯਰਹਿਤੋ, ਗਰੁਪਸ੍ਸਯਰਹਿਤੋਤਿ ਅਤ੍ਥੋ.
ਸਦੇਵਕੇਤਿ ਅਵਯਵੇਨ ਵਿਗ੍ਗਹੋ ਸਮੁਦਾਯੋ ਸਮਾਸਤ੍ਥੋ. ਸਦੇਵਕਗ੍ਗਹਣੇਨ ਪਞ੍ਚਕਾਮਾਵਚਰਦੇਵਗ੍ਗਹਣਂ ਪਾਰਿਸੇਸਞਾਯੇਨ ਇਤਰੇਸਂ ਪਦਨ੍ਤਰੇਹਿ ਸਙ੍ਗਹਿਤਤ੍ਤਾ. ਸਮਾਰਕਗ੍ਗਹਣੇਨ ਛਟ੍ਠਕਾਮਾਵਚਰਦੇਵਗ੍ਗਹਣਂ ਪਚ੍ਚਾਸਤ੍ਤਿਞਾਯੇਨ. ਤਤ੍ਥ ਹਿ ਮਾਰੋ ਜਾਤੋ ਤਨ੍ਨਿਵਾਸੀ ਚ ਹੋਤਿ. ਸਬ੍ਰਹ੍ਮਕਵਚਨੇਨ ਬ੍ਰਹ੍ਮਕਾਯਿਕਾਦਿਬ੍ਰਹ੍ਮਗ੍ਗਹਣਂ ਪਚ੍ਚਾਸਤ੍ਤਿਞਾਯੇਨੇਵ. ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯਾਤਿ ਸਾਸਨਸ੍ਸ ਪਚ੍ਚਤ੍ਥਿਕਸਮਣਬ੍ਰਾਹ੍ਮਣਗ੍ਗਹਣਂ. ਨਿਦਸ੍ਸਨਮਤ੍ਤਞ੍ਚੇਤਂ ਅਪਚ੍ਚਤ੍ਥਿਕਾਨਂ ਅਸਮਿਤਾਬਾਹਿਤਪਾਪਾਨਞ੍ਚ ਸਮਣਬ੍ਰਾਹ੍ਮਣਾਨਂ ਤੇਨੇਵ ਵਚਨੇਨ ਗਹਿਤਤ੍ਤਾ. ਕਾਮਂ ‘‘ਸਦੇਵਕੇ’’ਤਿਆਦਿਵਿਸੇਸਨਾਨਂ ਵਸੇਨ ਸਤ੍ਤਵਿਸਯੋ ਲੋਕਸਦ੍ਦੋਤਿ ਵਿਞ੍ਞਾਯਤਿ ਤੁਲ੍ਯਯੋਗਵਿਸਯਤ੍ਤਾ ਤੇਸਂ, ‘‘ਸਲੋਮਕੋ ਸਪਕ੍ਖਕੋ’’ਤਿਆਦੀਸੁ ਪਨ ਅਤੁਲ੍ਯਯੋਗੇ ਅਯਂ ਸਮਾਸੋ ਲਬ੍ਭਤੀਤਿ ਬ੍ਯਭਿਚਾਰਦਸ੍ਸਨਤੋ ਪਜਾਗਹਣਨ੍ਤਿ ਪਜਾਵਚਨੇਨ ਸਤ੍ਤਲੋਕਗ੍ਗਹਣਂ.
ਦੇਵਭਾਵਸਾਮਞ੍ਞੇਨ ਮਾਰਬ੍ਰਹ੍ਮੇਸੁ ਗਹਿਤੇਸੁਪਿ ਇਤਰੇਹਿ ਤੇਸਂ ਲਬ੍ਭਮਾਨਵਿਸੇਸਦਸ੍ਸਨਤ੍ਥਂ ਵਿਸੁਂ ਗਹਣਨ੍ਤਿ ਦਸ੍ਸੇਨ੍ਤੋ ‘‘ਮਾਰੋ ਨਾਮਾ’’ਤਿਆਦਿਮਾਹ. ਮਾਰੋ ਬ੍ਰਹ੍ਮਾਨਮ੍ਪਿ ਵਿਚਕ੍ਖੁਕਮ੍ਮਾਯ ਪਹੋਤੀਤਿ ਆਹ ‘‘ਸਬ੍ਬੇਸ’’ਨ੍ਤਿ. ਉਪਰੀਤਿ ਉਪਰਿਭਾਗੇ. ਬ੍ਰਹ੍ਮਾਤਿ ਦਸਸਹਸ੍ਸਿਬ੍ਰਹ੍ਮਾਨਂ ਸਨ੍ਧਾਯਾਹ. ਤਥਾ ਚਾਹ ‘‘ਦਸਹਿ ਅਙ੍ਗੁਲੀਹੀ’’ਤਿਆਦਿ. ਇਧ ਦੀਘਨਿਕਾਯਾਦਯੋ ਵਿਯ ਬਾਹਿਰਕਾਨਮ੍ਪਿ ਗਨ੍ਥਨਿਕਾਯੋ ਲਬ੍ਭਤੀਤਿ ਆਹ ‘‘ਏਕਨਿਕਾਯਾਦਿਵਸੇਨਾ’’ਤਿ. ਵਤ੍ਥੁਵਿਜ੍ਜਾਦੀਤਿ ਆਦਿ-ਸਦ੍ਦੇਨ ਵਿਜ੍ਜਾਟ੍ਠਾਨਾਨਿ ਸਙ੍ਗਯ੍ਹਨ੍ਤਿ. ਯਥਾਸਕਂ ਕਮ੍ਮਕਿਲੇਸੇਹਿ ਪਜਾਤਤ੍ਤਾ ਨਿਬ੍ਬਤ੍ਤਤ੍ਤਾ ਪਜਾ, ਸਤ੍ਤਨਿਕਾਯੋ, ਤਸ੍ਸਾ ਪਜਾਯ. ਸਦੇਵਮਨੁਸ੍ਸਾਯਾਤਿ ਵਾ ਇਮਿਨਾ ਸਮ੍ਮੁਤਿਦੇਵਗ੍ਗਹਣਂ ਤਦਵਸਿਟ੍ਠਮਨੁਸ੍ਸਲੋਕਗ੍ਗਹਣਞ੍ਚ ਦਟ੍ਠਬ੍ਬਂ.
ਏਵਂ ਭਾਗਸੋ ਲੋਕਂ ਗਹੇਤ੍ਵਾ ਯੋਜਨਂ ਦਸ੍ਸੇਤ੍ਵਾ ਇਦਾਨਿ ਅਭਾਗਸੋ ਲੋਕਂ ਗਹੇਤ੍ਵਾ ਯੋਜਨਂ ਦਸ੍ਸੇਤੁਂ ‘‘ਅਪਿਚੇਤ੍ਥਾ’’ਤਿਆਦਿ ਵੁਤ੍ਤਂ. ਲੋਕਵਸੇਨ ਵੁਤ੍ਤਾਨਿ ‘‘ਲੋਕੀਯਨ੍ਤਿ ਏਤ੍ਥ ਕਮ੍ਮਂ ਕਮ੍ਮਫਲਾਨੀ’’ਤਿ ਕਤ੍ਵਾ. ਪਜਾਵਸੇਨ ‘‘ਹੇਤੁਪਚ੍ਚਯੇਹਿ ਪਜਾਤਾ’’ਤਿ ਕਤ੍ਵਾ. ਸੀਲਸਮ੍ਪਨ੍ਨਤਰਨ੍ਤਿ ਏਤ੍ਥ ਪਰਿਪੁਣ੍ਣਸਮ੍ਪਨ੍ਨਤਾ ਅਧਿਪ੍ਪੇਤਾ ‘‘ਸਮ੍ਪਨ੍ਨਂ ਸਾਲਿਕੇਦਾਰ’’ਨ੍ਤਿਆਦੀਸੁ (ਜਾ. ੧.੧੪.੧) ਵਿਯ. ਤੇਨਾਹ ‘‘ਅਧਿਕਤਰਨ੍ਤਿ ਅਤ੍ਥੋ’’ਤਿ. ਪਰਿਪੁਣ੍ਣਞ੍ਹਿ ਅਧਿਕਤਰਨ੍ਤਿ ਵਤ੍ਤੁਂ ਅਰਹਤਿ. ਕਾਰਣਨ੍ਤਿ ਯੁਤ੍ਤਿਂ. ਅਤ੍ਥਨ੍ਤਿ ਅਵਿਪਰੀਤਤ੍ਥਂ. ਵਡ੍ਢਿਨ੍ਤਿ ਅਤਿਵਡ੍ਢਿਨਿਮਿਤ੍ਤਂ.
ਇਮਿਨਾ ਵਚਨੇਨਾਤਿ ਇਮਸ੍ਮਿਂ ਸੁਤ੍ਤੇ ਅਨਨ੍ਤਰਂ ਵੁਤ੍ਤਵਚਨੇਨ. ਨ ਕੇਵਲਂ ਇਮਿਨਾਵ, ਸੁਤ੍ਤਨ੍ਤਰਮ੍ਪਿ ਆਨੇਤ੍ਵਾ ਪਟਿਬਾਹਿਤਬ੍ਬੋਤਿ ਦਸ੍ਸੇਨ੍ਤੋ ‘‘ਨ ਮੇ ਆਚਰਿਯੋ ਅਤ੍ਥੀ’’ਤਿਆਦਿਮਾਹ. ਤਤ੍ਥ ਨ ਮੇ ਆਚਰਿਯੋ ਅਤ੍ਥੀਤਿ ਲੋਕੁਤ੍ਤਰਧਮ੍ਮੇ ਮਯ੍ਹਂ ਆਚਰਿਯੋ ਨਾਮ ਨਤ੍ਥਿ. ਕਿਞ੍ਚਾਪਿ ਲੋਕਿਯਧਮ੍ਮਾਨਮ੍ਪਿ ਯਾਦਿਸੋ ਲੋਕਨਾਥਸ੍ਸ ਅਧਿਗਮੋ, ਨ ਤਾਦਿਸੋ ਅਧਿਗਮੋ ਪਰੂਪਦੇਸੋ ਅਤ੍ਥਿ. ਲੋਕੁਤ੍ਤਰਧਮ੍ਮੇ ਪਨਸ੍ਸ ਲੇਸੋਪਿ ਨਤ੍ਥਿ. ਨਤ੍ਥਿ ਮੇ ਪਟਿਪੁਗ੍ਗਲੋਤਿ ਮਯ੍ਹਂ ਸੀਲਾਦੀਹਿ ਗੁਣੇਹਿ ਪਟਿਨਿਧਿਭੂਤੋ ਪੁਗ੍ਗਲੋ ਨਾਮ ਨਤ੍ਥਿ. ਸਰਨ੍ਤਿ ਕਰਣੇ ਏਤਂ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਸਰਨ੍ਤੇਨਾ’’ਤਿ, ਸਰਨ੍ਤਿ ਵਾ ਸਰਣਹੇਤੁ ਚਾਤਿ ਅਤ੍ਥੋ.
ਯਤੋਤਿ ਭੁਮ੍ਮਤ੍ਥੇ ਤੋਸਦ੍ਦੋਤਿ ਆਹ ‘‘ਯਸ੍ਮਿਂ ਕਾਲੇ’’ਤਿ. ਰਤ੍ਤਿਯੋ ਜਾਨਨ੍ਤੀਤਿ ਰਤ੍ਤਞ੍ਞੂ, ਅਤ੍ਤਨੋ ਪਬ੍ਬਜਿਤਦਿਵਸਤੋ ਪਟ੍ਠਾਯ ਬਹੂ ਰਤ੍ਤਿਯੋ ਜਾਨਨ੍ਤਿ, ਚਿਰਪਬ੍ਬਜਿਤਾਤਿ ਵੁਤ੍ਤਂ ਹੋਤਿ. ਰਤ੍ਤਞ੍ਞੂਨਂ ਮਹਨ੍ਤਭਾਵੋ ਰਤ੍ਤਞ੍ਞੁਮਹਨ੍ਤਂ. ਭਾਵਪ੍ਪਧਾਨੋ ਏਸ ਨਿਦ੍ਦੇਸੋ. ‘‘ਰਤ੍ਤਞ੍ਞੁਮਹਤ੍ਤ’’ਨ੍ਤਿ ਵਾ ਪਾਠੋ. ਏਸ ਨਯੋ ਸੇਸੇਸੁਪਿ. ਥੇਰਨਵਮਜ੍ਝਿਮਾਨਂ ਵਸੇਨ ਵਿਪੁਲਭਾਵੋ ਵੇਪੁਲ੍ਲਮਹਨ੍ਤਂ. ਸਿਕ੍ਖਤ੍ਤਯਸਙ੍ਗਹਿਤਸ੍ਸ ਸਾਸਨਬ੍ਰਹ੍ਮਚਰਿਯਸ੍ਸ ਝਾਨਾਭਿਞ੍ਞਾਦਿਵਸੇਨ ਵਿਪੁਲਭਾਵੋ ਬ੍ਰਹ੍ਮਚਰਿਯਮਹਨ੍ਤਂ. ਵਿਸਿਟ੍ਠਸ੍ਸ ਪਚ੍ਚਯਲਾਭਸ੍ਸ ਵਿਪੁਲਭਾਵੋ ਲਾਭਗ੍ਗਮਹਨ੍ਤਂ. ਚਤੁਬ੍ਬਿਧੇਨ ਮਹਨ੍ਤੇਨਾਤਿ ਚਤੁਬ੍ਬਿਧੇਨ ਮਹਨ੍ਤਭਾਵੇਨ. ਮਹਾਪਜਾਪਤਿਯਾ ਦੁਸ੍ਸਯੁਗਦਾਨਕਾਲੇਤਿ ਭਗਵਤੋ ਸਙ੍ਘੇ ਗਾਰਵਸ੍ਸ ਪਾਕਟਕਾਲਦਸ੍ਸਨਮਤ੍ਤਂ. ਨ ਹਿ ਭਗਵਾ ਤਤੋ ਪੁਬ੍ਬੇ ਸਙ੍ਘੇ ਗਾਰਵਰਹਿਤੋ ਵਿਹਾਸਿ.
ਪਠਮਉਰੁਵੇਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨.ਦੁਤਿਯਉਰੁਵੇਲਸੁਤ੍ਤਵਣ੍ਣਨਾ
੨੨. ਦੁਤਿਯੇ ਹੁਹੁਙ੍ਕਜਾਤਿਕੇਨਾਤਿ ਸੋ ਕਿਰ ਦਿਟ੍ਠਮਙ੍ਗਲਿਕੋ ਮਾਨਵਸੇਨ ਕੋਧਵਸੇਨ ਚ ‘‘ਹੁਹੁ’’ਨ੍ਤਿ ਕਰੋਨ੍ਤੋ ਵਿਚਰਤਿ, ਤਸ੍ਮਾ ਹੁਹੁਙ੍ਕਜਾਤਿਕੋਤਿ ਵੁਚ੍ਚਤਿ. ‘‘ਹੁਹੁਕ੍ਕਜਾਤਿਕੋ’’ਤਿਪਿ ਪਠਨ੍ਤਿ, ਤੇਨ ਸਦ੍ਧਿਂ ਆਗਤਾਤਿ ਅਤ੍ਥੋ. ਜਰਾਜਿਣ੍ਣਾਤਿ ਜਰਾਯ ਖਣ੍ਡਦਨ੍ਤਪਲਿਤਕੇਸਾਦਿਭਾਵਂ ਆਪਾਦਿਤਾ. ਵਯੋਵੁਦ੍ਧਾਤਿ ਅਙ੍ਗਪਚ੍ਚਙ੍ਗਾਨਂ ਵੁਦ੍ਧਿਮਰਿਯਾਦਪ੍ਪਤ੍ਤਾ. ਜਾਤਿਮਹਲ੍ਲਕਾਤਿ ਉਪਪਤ੍ਤਿਯਾ ਮਹਲ੍ਲਕਭਾਵੇਨ ਸਮਨ੍ਨਾਗਤਾ. ਮਹਤ੍ਤਂ ਲਨ੍ਤਿ ਗਣ੍ਹਨ੍ਤੀਤਿ ਮਹਲ੍ਲਕਾ, ਜਾਤਿਯਾ ਮਹਲ੍ਲਕਾ, ਨ ਵਿਭਵਾਦਿਨਾਤਿ ਜਾਤਿਮਹਲ੍ਲਕਾ. ਵਯੋਅਨੁਪ੍ਪਤ੍ਤਾਤਿ ਪਚ੍ਛਿਮਵਯਂ ਸਮ੍ਪਤ੍ਤਾ, ਪਚ੍ਛਿਮਵਯੋ ਨਾਮ ਵਸ੍ਸਸਤਸ੍ਸ ਪਚ੍ਛਿਮੋ ਤਤਿਯੋ ਭਾਗੋ. ਜਿਣ੍ਣਾਤਿ ਵਾ ਪੋਰਾਣਾ, ਚਿਰਕਾਲਪ੍ਪਵਤ੍ਤਕੁਲਨ੍ਵਯਾਤਿ ਵੁਤ੍ਤਂ ਹੋਤਿ. ਵੁਦ੍ਧਾਤਿ ਸੀਲਾਚਾਰਾਦਿਗੁਣਵੁਦ੍ਧਿਯੁਤ੍ਤਾ. ਮਹਲ੍ਲਕਾਤਿ ਵਿਭਵਮਹਨ੍ਤਤਾਯ ਸਮਨ੍ਨਾਗਤਾ. ਮਹਦ੍ਧਨਾਤਿ ਮਹਾਭੋਗਾ. ਅਦ੍ਧਗਤਾਤਿ ਮਗ੍ਗਪ੍ਪਟਿਪਨ੍ਨਾ ਬ੍ਰਾਹ੍ਮਣਾਨਂ ਵਤਚਰਿਯਾਦਿਮਰਿਯਾਦਂ ਅਵੀਤਿਕ੍ਕਮ੍ਮ ਚਰਮਾਨਾ. ਵਯੋਅਨੁਪ੍ਪਤ੍ਤਾਤਿ ਜਾਤਿਵੁਦ੍ਧਭਾਵਂ ਅਨ੍ਤਿਮਵਯਂ ਅਨੁਪ੍ਪਤ੍ਤਾ. ਸੁਤਂ ਨੇਤਨ੍ਤਿ ਏਤ੍ਥ ਸੁਤਂ ਨੋ ਏਤਨ੍ਤਿ ਪਦਚ੍ਛੇਦੋ. ਨੋਤਿ ਚ ਕਰਣਤ੍ਥੇ ਸਾਮਿਵਚਨਂ. ਤੇਨਾਹ ‘‘ਅਮ੍ਹੇਹਿ ਸੁਤ’’ਨ੍ਤਿ.
ਅਕਾਲੇਤਿ ਅਯੁਤ੍ਤਕਾਲੇ. ਅਸਭਾਵਂ ਵਦਤੀਤਿ ਯਂ ਨਤ੍ਥਿ, ਤਂ ਵਦਤਿ. ਅਨਤ੍ਥਂ ਵਦਤੀਤਿ ਅਕਾਰਣਨਿਸ੍ਸਿਤਂ ਵਦਤਿ. ਅਕਾਰਣਨਿਸ੍ਸਿਤਨ੍ਤਿ ਚ ਨਿਪ੍ਫਲਨ੍ਤਿ ਅਤ੍ਥੋ. ਫਲਞ੍ਹਿ ਕਾਰਣਨਿਸ੍ਸਿਤਂ. ਅਕਾਰਣਨਿਸ੍ਸਿਤਤਾ ਚ ਤਦਵਿਨਾਭਾਵਤੋ ਅਕਾਰਣੇ ਨਿਸ੍ਸਿਤਂ, ਨਿਪ੍ਫਲਂ ਸਮ੍ਫਨ੍ਤਿ ਵੁਤ੍ਤਂ ਹੋਤਿ. ਅਵਿਨਯਂ ਵਦਤੀਤਿ ਨ ਸਂਵਰਵਿਨਯਪ੍ਪਟਿਸਂਯੁਤ੍ਤਂ ਵਦਤਿ, ਅਤ੍ਤਨੋ ਸੁਣਨ੍ਤਸ੍ਸ ਚ ਨ ਸਂਵਰਵਿਨਯਾਵਹਂ ਵਦਤੀਤਿ ਵੁਤ੍ਤਂ ਹੋਤਿ. ਨ ਹਦਯੇ ਨਿਧੇਤਬ੍ਬਯੁਤ੍ਤਕਨ੍ਤਿ ਅਹਿਤਸਂਹਿਤਤ੍ਤਾ ਚਿਤ੍ਤਂ ਅਨੁਪ੍ਪਵੇਸੇਤ੍ਵਾ ਨਿਧੇਤੁਂ ਅਯੁਤ੍ਤਂ. ਕਥੇਤੁਂ ਅਯੁਤ੍ਤਕਾਲੇਨਾਤਿ ਧਮ੍ਮਂ ਕਥੇਨ੍ਤੇਨ ਯੋ ਅਤ੍ਥੋ ਯਸ੍ਮਿਂ ਕਾਲੇ ਵਤ੍ਤਬ੍ਬੋ, ਤਤੋ ਪੁਬ੍ਬੇ ਪਚ੍ਛਾ ਚ ਤਸ੍ਸ ਅਕਾਲੋ, ਤਸ੍ਮਿਂ ਅਯੁਤ੍ਤਕਾਲੇ ਵਤ੍ਤਾ. ਅਪਦੇਸਰਹਿਤਨ੍ਤਿ ਸੁਤ੍ਤਾਪਦੇਸਰਹਿਤਂ. ਸਾਪਦੇਸਂ ਸਕਾਰਣਂ ਕਤ੍ਵਾ ਨ ਕਥੇਤੀਤਿ ‘‘ਭਗਵਤਾ ਅਸੁਕੇ ਸੁਤ੍ਤੇ ਏਵਂ ਵੁਤ੍ਤ’’ਨ੍ਤਿ ਏਵਂ ਸਾਪਦੇਸਂ ਕਾਰਣਸਹਿਤਂ ਕਤ੍ਵਾ ਨ ਕਥੇਤਿ.
ਪਰਿਯਨ੍ਤਰਹਿਤਨ੍ਤਿ ਪਰਿਚ੍ਛੇਦਰਹਿਤਂ, ਸੁਤ੍ਤਂ ਵਾ ਜਾਤਕਂ ਵਾ ਨਿਕ੍ਖਿਪਿਤ੍ਵਾ ਤਸ੍ਸ ਅਨੁਯੋਗਂ ਉਪਮਂ ਵਾ ਵਤ੍ਥੁਂ ਵਾ ਆਹਰਿਤ੍ਵਾ ਯਂ ਸੁਤ੍ਤਂ ਜਾਤਕਂ ਵਾ ਨਿਕ੍ਖਿਪਿਤਂ, ਤਸ੍ਸ ਸਰੀਰਭੂਤਂ ਕਥਂ ਅਨਾਮਸਿਤ੍ਵਾ ਬਾਹਿਰਕਥਂਯੇਵ ਕਥੇਤਿ, ਨਿਕ੍ਖਿਤ੍ਤਂ ਨਿਕ੍ਖਿਤ੍ਤਮਤ੍ਤਮੇਵ ਹੋਤਿ, ‘‘ਸੁਤ੍ਤਂ ਨੁ ਖੋ ਕਥੇਤਿ ਜਾਤਕਂ ਨੁ ਖੋ, ਨਾਸ੍ਸ ਅਨ੍ਤਂ ਵਾ ਕੋਟਿਂ ਵਾ ਪਸ੍ਸਾਮਾ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਯਥਾ ਵਟਰੁਕ੍ਖਸਾਖਾਨਂ ਗਤਗਤਟ੍ਠਾਨੇ ਪਾਰੋਹਾ ਓਤਰਨ੍ਤਿ, ਓਤਿਣ੍ਣੋ-ਤਿਣ੍ਣਟ੍ਠਾਨੇ ਵਿਰੁਲ਼੍ਹਿਂ ਆਪਜ੍ਜਿਤ੍ਵਾ ਪੁਨ ਵਡ੍ਢਨ੍ਤਿਯੇਵ, ਏਵਂ ਅਡ੍ਢਯੋਜਨਮ੍ਪਿ ਯੋਜਨਮ੍ਪਿ ਗਚ੍ਛਤਿਯੇਵ. ਗਚ੍ਛਨ੍ਤੇ ਗਚ੍ਛਨ੍ਤੇ ਪਨ ਮੂਲਰੁਕ੍ਖੋ ਵਿਨਸ੍ਸਤਿ, ਅਨੁਜਾਤਪਾਰੋਹਮੂਲਾਨਿਯੇਵ ਤਿਟ੍ਠਨ੍ਤਿ, ਏਵਂ ਅਯਮ੍ਪਿ ਨਿਗ੍ਰੋਧਧਮ੍ਮਕਥਿਕੋ ਨਾਮ ਹੋਤਿ. ਨਿਕ੍ਖਿਤ੍ਤਂ ਨਿਕ੍ਖਿਤ੍ਤਮੇਵ ਕਤ੍ਵਾ ਪਸ੍ਸੇਨੇਵ ਪਰਿਹਰਨ੍ਤੋ ਗਚ੍ਛਤਿ. ਯੋ ਪਨ ਬਹੁਮ੍ਪਿ ਭਣਨ੍ਤੋ ‘‘ਏਤਦਤ੍ਥਮਿਦਂ ਵੁਤ੍ਤ’’ਨ੍ਤਿ ਨਿਕ੍ਖਿਤ੍ਤਸੁਤ੍ਤਤੋ ਅਞ੍ਞਮ੍ਪਿ ਅਨੁਯੋਗੂਪਮਾਵਤ੍ਥੁਵਸੇਨ ਤਦੁਪਯੋਗੀਨਂ ਆਹਰਿਤ੍ਵਾ ਆਹਰਿਤ੍ਵਾ ਜਾਨਾਪੇਤੁਂ ਸਕ੍ਕੋਤਿ, ਤਥਾਰੂਪਸ੍ਸ ਧਮ੍ਮਕਥਿਕਸ੍ਸ ਬਹੁਮ੍ਪਿ ਕਥੇਤੁਂ ਵਟ੍ਟਤਿ. ਨ ਲੋਕਿਯਲੋਕੁਤ੍ਤਰਅਤ੍ਥਨਿਸ੍ਸਿਤਨ੍ਤਿ ਅਤ੍ਤਨੋ ਪਰੇਸਞ੍ਚ ਨ ਲੋਕਿਯਲੋਕੁਤ੍ਤਰਹਿਤਾਵਹਂ.
ਪਕਟ੍ਠਾਨਂ ਉਕ੍ਕਟ੍ਠਾਨਂ ਸੀਲਾਦਿਅਤ੍ਥਾਨਂ ਬੋਧਨਤੋ ਸਭਾਵਨਿਰੁਤ੍ਤਿਵਸੇਨ ਚ ਬੁਦ੍ਧਾਦੀਹਿ ਭਾਸਿਤਤ੍ਤਾ ਪਕਟ੍ਠਾਨਂ ਵਚਨਪ੍ਪਬਨ੍ਧਾਨਂ ਆਲ਼ੀਤਿ ਪਾਲ਼ਿ, ਪਰਿਯਤ੍ਤਿਧਮ੍ਮੋ. ਪੁਰਿਮਸ੍ਸ ਅਤ੍ਥਸ੍ਸ ਪਚ੍ਛਿਮੇਨ ਅਤ੍ਥੇਨ ਅਨੁਸਨ੍ਧਾਨਂ ਅਨੁਸਨ੍ਧਿ, ਅਤ੍ਥਮੁਖੇਨ ਪਨ ਪਾਲ਼ਿਪ੍ਪਦੇਸਾਨਮ੍ਪਿ ਅਨੁਸਨ੍ਧਿ ਹੋਤਿਯੇਵ. ਸ੍ਵਾਯਂ ਅਨੁਸਨ੍ਧਿ ਪੁਚ੍ਛਾਨੁਸਨ੍ਧਿਅਜ੍ਝਾਸਯਾਨੁਸਨ੍ਧਿਯਥਾਨੁਸਨ੍ਧਿਆਦਿਵਸੇਨ ਚਤੁਬ੍ਬਿਧੋ, ਤਂਤਂਦੇਸਨਾਨਂ ਪਨ ਪੁਬ੍ਬਾਪਰਪਾਲ਼ਿਵਸੇਨ ਅਨੁਸਨ੍ਧਿਵਸੇਨ ਪੁਬ੍ਬਾਪਰਵਸੇਨਾਤਿ ਪਚ੍ਚੇਕਂ ਯੋਜੇਤਬ੍ਬਂ. ਉਗ੍ਗਹਿਤਨ੍ਤਿ ਬ੍ਯਞ੍ਜਨਸੋ ਅਤ੍ਥਸੋ ਚ ਉਦ੍ਧਂ ਉਦ੍ਧਂ ਗਹਿਤਂ, ਪਰਿਯਾਪੁਣਨਵਸੇਨ ਚੇਵ ਪਰਿਪੁਚ੍ਛਾਵਸੇਨ ਚ ਹਦਯੇਨ ਗਹਿਤਨ੍ਤਿ ਅਤ੍ਥੋ. ਵਟ੍ਟਦੁਕ੍ਖਨਿਸ੍ਸਰਣਤ੍ਥਿਕੇਹਿ ਸੋਤਬ੍ਬਤੋ ਸੁਤਂ, ਪਰਿਯਤ੍ਤਿਧਮ੍ਮੋ. ਤਂ ਧਾਰੇਤੀਤਿ ਸੁਤਧਰੋ. ਯੋ ਹਿ ਸੁਤਧਰੋ, ਸੁਤਂ ਤਸ੍ਮਿਂ ਪਤਿਟ੍ਠਿਤਂ ਹੋਤਿ ਸੁਪ੍ਪਤਿਟ੍ਠਿਤਂ ਅਰੋਗਿਕਂ, ਤਸ੍ਮਾ ਵੁਤ੍ਤਂ ‘‘ਸੁਤਸ੍ਸ ਆਧਾਰਭੂਤੋ’’ਤਿ. ਤੇਨਾਹ ‘‘ਯਸ੍ਸ ਹੀ’’ਤਿਆਦਿ. ਏਕਂ ਪਦਂ ਏਕਕ੍ਖਰਮ੍ਪਿ ਅਵਿਨਟ੍ਠਂ ਹੁਤ੍ਵਾ ਸਨ੍ਨਿਚੀਯਤੀਤਿ ਸਨ੍ਨਿਚਯੋ, ਸੁਤਂ ਸਨ੍ਨਿਚਯੋ ਏਤਸ੍ਮਿਨ੍ਤਿ ਸੁਤਸਨ੍ਨਿਚਯੋ. ਅਜ੍ਝੋਸਾਯਾਤਿ ਅਨੁਪ੍ਪਵਿਸਿਤ੍ਵਾ. ਤਿਟ੍ਠਤੀਤਿ ਨ ਸਮ੍ਮੁਸ੍ਸਤਿ.
ਪਗੁਣਾਤਿ ਵਾਚੁਗ੍ਗਤਾ. ਨਿਚ੍ਚਲਿਕਨ੍ਤਿ ਅਵਿਪਰਿਵਤ੍ਤਂ. ਸਂਸਨ੍ਦਿਤ੍ਵਾਤਿ ਅਞ੍ਞੇਹਿ ਸਂਸਨ੍ਦਿਤ੍ਵਾ. ਸਮਨੁਗ੍ਗਾਹਿਤ੍ਵਾਤਿ ਪਰਿਪੁਚ੍ਛਾਵਸੇਨ ਅਤ੍ਥਂ ਓਗਾਹਿਤ੍ਵਾ. ਪਬਨ੍ਧਸ੍ਸ ਵਿਚ੍ਛੇਦਾਭਾਵਤੋ ਗਙ੍ਗਾਸੋਤਸਦਿਸਂ. ‘‘ਭਵਙ੍ਗਸੋਤਸਦਿਸ’’ਨ੍ਤਿ ਵਾ ਪਾਠੋ, ਅਕਿਤ੍ਤਿਮਂ ਸੁਖਪ੍ਪਵਤ੍ਤੀਤਿ ਅਤ੍ਥੋ. ਸੁਤ੍ਤੇਕਦੇਸਸ੍ਸ ਸੁਤ੍ਤਮਤ੍ਤਸ੍ਸ ਚ ਵਚਸਾ ਪਰਿਚਯੋ ਇਧ ਨਾਧਿਪ੍ਪੇਤੋ, ਵਗ੍ਗਾਦਿਵਸੇਨ ਪਨ ਅਧਿਪ੍ਪੇਤੋਤਿ ਆਹ ‘‘ਸੁਤ੍ਤਦਸਕ…ਪੇ… ਸਜ੍ਝਾਯਿਤਾ’’ਤਿ, ‘‘ਦਸਸੁਤ੍ਤਾਨਿ ਗਤਾਨਿ, ਦਸਵਗ੍ਗਾਨਿ ਗਤਾਨੀ’’ਤਿਆਦਿਨਾ ਸਲ੍ਲਕ੍ਖੇਤ੍ਵਾ ਵਾਚਾਯ ਸਜ੍ਝਾਯਿਤਾਤਿ ਅਤ੍ਥੋ. ਮਨਸਾ ਅਨੁ ਅਨੁ ਪੇਕ੍ਖਿਤਾ ਭਾਗਸੋ ਨਿਜ੍ਝਾਯਿਤਾ ਚਿਨ੍ਤਿਤਾ ਮਨਸਾਨੁਪੇਕ੍ਖਿਤਾ. ਰੂਪਗਤਂ ਵਿਯ ਪਞ੍ਞਾਯਤੀਤਿ ਰੂਪਗਤਂ ਵਿਯ ਚਕ੍ਖੁਸ੍ਸ ਵਿਭੂਤਂ ਹੁਤ੍ਵਾ ਪਞ੍ਞਾਯਤਿ. ਸੁਪ੍ਪਟਿਵਿਦ੍ਧਾਤਿ ਨਿਜ੍ਜਟਂ ਨਿਗ੍ਗੁਮ੍ਬਂ ਕਤ੍ਵਾ ਸੁਟ੍ਠੁ ਯਾਥਾਵਤੋ ਪਟਿਵਿਦ੍ਧਾ.
ਅਧਿਕਂ ਚੇਤੋਤਿ ਅਭਿਚੇਤੋ, ਉਪਚਾਰਜ੍ਝਾਨਚਿਤ੍ਤਂ. ਤਸ੍ਸ ਪਨ ਅਧਿਕਤਾ ਪਾਕਤਿਕਕਾਮਾਵਚਰਚਿਤ੍ਤੇਹਿ ਸੁਨ੍ਦਰਤਾਯ, ਸਾ ਪਟਿਪਕ੍ਖਤੋ ਸੁਦ੍ਧਿਯਾਤਿ ਆਹ ‘‘ਅਭਿਕ੍ਕਨ੍ਤਂ ਵਿਸੁਦ੍ਧਂ ਚਿਤ੍ਤ’’ਨ੍ਤਿ. ਅਧਿਚਿਤ੍ਤਨ੍ਤਿ ਸਮਾਧਿਮਾਹ. ਸੋਪਿ ਉਪਚਾਰਸਮਾਧਿ ਦਟ੍ਠਬ੍ਬੋ. ਵਿਵੇਕਜਂ ਪੀਤਿਸੁਖਂ, ਸਮਾਧਿਜਂ ਪੀਤਿਸੁਖਂ, ਅਪੀਤਿਜਂ ਕਾਯਸੁਖਂ, ਸਤਿਪਾਰਿਸੁਦ੍ਧਿਜਂ ਞਾਣਸੁਖਨ੍ਤਿ ਚਤੁਬ੍ਬਿਧਮ੍ਪਿ ਝਾਨਸੁਖਂ ਪਟਿਪਕ੍ਖਤੋ ਨਿਕ੍ਖਨ੍ਤਤਂ ਉਪਾਦਾਯ ਨੇਕ੍ਖਮ੍ਮਸੁਖਨ੍ਤਿ ਵੁਚ੍ਚਤੀਤਿ ਆਹ ‘‘ਨੇਕ੍ਖਮ੍ਮਸੁਖਂ ਵਿਨ੍ਦਤੀ’’ਤਿ. ਇਚ੍ਛਿਤਿਚ੍ਛਿਤਕ੍ਖਣੇ ਸਮਾਪਜ੍ਜਿਤੁਂ ਸਮਤ੍ਥੋਤਿ ਇਮਿਨਾ ਤੇਸੁ ਝਾਨੇਸੁ ਸਮਾਪਜ੍ਜਨਵਸੀਭਾਵਮਾਹ. ਨਿਕਾਮਲਾਭੀਤਿ ਪਨ ਵਚਨਤੋ ਆਵਜ੍ਜਨਾਧਿਟ੍ਠਾਨਪਚ੍ਚਵੇਕ੍ਖਣਵਸਿਯੋਪਿ ਵੁਤ੍ਤਾ ਏਵਾਤਿ ਵੇਦਿਤਬ੍ਬਾ. ਸੁਖੇਨੇਵ ਪਚ੍ਚਨੀਕਧਮ੍ਮੇ ਵਿਕ੍ਖਮ੍ਭੇਤ੍ਵਾਤਿ ਏਤੇਨ ਤੇਸਂ ਝਾਨਾਨਂ ਸੁਖਪ੍ਪਟਿਪਦਤਂ ਖਿਪ੍ਪਾਭਿਞ੍ਞਤਞ੍ਚ ਦਸ੍ਸੇਤਿ.
ਵਿਪੁਲਾਨਨ੍ਤਿ ਵੇਪੁਲ੍ਲਂ ਪਾਪਿਤਾਨਂ ਝਾਨਾਨਂ. ਵਿਪੁਲਤਾ ਨਾਮ ਸੁਭਾਵਿਤਭਾਵੇਨ ਚਿਰਤਰਪ੍ਪਵਤ੍ਤਿਯਾ, ਸਾ ਚ ਪਰਿਚ੍ਛੇਦਾਨੁਰੂਪਾਵ ਇਚ੍ਛਿਤਬ੍ਬਾਤਿ ‘‘ਵਿਪੁਲਾਨ’’ਨ੍ਤਿ ਵਤ੍ਵਾ ‘‘ਯਥਾਪਰਿਚ੍ਛੇਦੇਨ ਵੁਟ੍ਠਾਤੁਂ ਸਮਤ੍ਥੋਤਿ ਵੁਤ੍ਤਂ ਹੋਤੀ’’ਤਿ ਆਹ. ਪਰਿਚ੍ਛੇਦਕਾਲਞ੍ਹਿ ਅਪ੍ਪਤ੍ਵਾਵ ਵੁਟ੍ਠਹਨ੍ਤੋ ਅਕਸਿਰਲਾਭੀ ਨ ਹੋਤਿ ਯਾਵਦਿਚ੍ਛਿਤਂ ਪਵਤ੍ਤੇਤੁਂ ਅਸਮਤ੍ਥਤ੍ਤਾ. ਇਦਾਨਿ ਯਥਾਵੁਤ੍ਤੇ ਸਮਾਪਜ੍ਜਨਾਦਿਵਸੀਭਾਵੇ ਬ੍ਯਤਿਰੇਕਵਸੇਨ ਵਿਭਾਵੇਤੁਂ ‘‘ਏਕਚ੍ਚੋ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਲਾਭੀਯੇਵ ਹੋਤੀਤਿ ਇਦਂ ਪਟਿਲਦ੍ਧਮਤ੍ਤਸ੍ਸ ਝਾਨਸ੍ਸ ਵਸੇਨ ਵੁਤ੍ਤਂ. ਤਥਾਤਿ ਇਚ੍ਛਿਤਿਚ੍ਛਿਤਕ੍ਖਣੇ. ਪਾਰਿਪਨ੍ਥਿਕੇਤਿ ਵਸੀਭਾਵਸ੍ਸ ਪਚ੍ਚਨੀਕਧਮ੍ਮੇ. ਝਾਨਾਧਿਗਮਸ੍ਸ ਪਨ ਪਚ੍ਚਨੀਕਧਮ੍ਮਾ ਪਗੇਵ ਵਿਕ੍ਖਮ੍ਭਿਤਾ, ਅਞ੍ਞਥਾ ਝਾਨਾਧਿਗਮੋ ਏਵ ਨ ਸਿਯਾ. ਕਿਚ੍ਛੇਨ ਵਿਕ੍ਖਮ੍ਭੇਤੀਤਿ ਕਿਚ੍ਛੇਨ ਵਿਸੋਧੇਤਿ. ਕਾਮਾਦੀਨਵਪਚ੍ਚਵੇਕ੍ਖਣਾਦੀਹਿ ਕਾਮਚ੍ਛਨ੍ਦਾਦੀਨਂ ਵਿਯ ਅਞ੍ਞੇਸਮ੍ਪਿ ਸਮਾਧਿਪਾਰਿਪਨ੍ਥਿਕਾਨਂ ਦੂਰਸਮੁਸ੍ਸਾਰਣਂ ਇਧ ਵਿਕ੍ਖਮ੍ਭਨਂ ਵਿਸੋਧਨਞ੍ਚਾਤਿ ਵੇਦਿਤਬ੍ਬਂ. ਨਾਲ਼ਿਕਯਨ੍ਤਨ੍ਤਿ ਕਾਲਮਾਨਨਾਲ਼ਿਕਯਨ੍ਤਮਾਹ.
ਅਟ੍ਠਪਿਤਸਙ੍ਕਪ੍ਪੋਤਿ ਨ ਸਮ੍ਮਾਪਣਿਹਿਤਸਙ੍ਕਪ੍ਪੋ. ਅਭਿਞ੍ਞਾਪਾਰਗੂਤਿ ਸਬ੍ਬੇਸਂ ਲੋਕਿਯਲੋਕੁਤ੍ਤਰਧਮ੍ਮਾਨਂ ਅਭਿਞ੍ਞਾਯ ਪਾਰਂ ਗਤੋ, ਸਬ੍ਬਧਮ੍ਮੇ ਅਭਿਵਿਸਿਟ੍ਠਾਯ ਅਗ੍ਗਮਗ੍ਗਪਞ੍ਞਾਯ ਜਾਨਿਤ੍ਵਾ ਠਿਤੋਤਿ ਅਤ੍ਥੋ. ਪਰਿਞ੍ਞਾਪਾਰਗੂਤਿ ਪਞ੍ਚਨ੍ਨਂ ਖਨ੍ਧਾਨਂ ਪਰਿਞ੍ਞਾਯ ਪਾਰਂ ਗਤੋ, ਪਞ੍ਚਕ੍ਖਨ੍ਧੇ ਪਰਿਜਾਨਿਤ੍ਵਾ ਠਿਤੋਤਿ ਅਤ੍ਥੋ. ਭਾਵਨਾਪਾਰਗੂਤਿ ਚਤੁਨ੍ਨਂ ਮਗ੍ਗਾਨਂ ਭਾਵਨਾਯ ਪਾਰਂ ਗਤੋ, ਚਤ੍ਤਾਰੋ ਮਗ੍ਗੇ ਭਾਵੇਤ੍ਵਾ ਠਿਤੋਤਿ ਅਤ੍ਥੋ. ਪਹਾਨਪਾਰਗੂਤਿ ਸਬ੍ਬਕਿਲੇਸਾਨਂ ਪਹਾਨੇਨ ਪਾਰਂ ਗਤੋ, ਸਬ੍ਬਕਿਲੇਸੇ ਪਜਹਿਤ੍ਵਾ ਠਿਤੋਤਿ ਅਤ੍ਥੋ. ਸਚ੍ਛਿਕਿਰਿਯਾਪਾਰਗੂਤਿ ਨਿਰੋਧਸਚ੍ਛਿਕਿਰਿਯਾਯ ਪਾਰਂ ਗਤੋ, ਨਿਰੋਧਂ ਸਚ੍ਛਿਕਤ੍ਵਾ ਠਿਤੋਤਿ ਅਤ੍ਥੋ. ਸਮਾਪਤ੍ਤਿਪਾਰਗੂਤਿ ਸਬ੍ਬਸਮਾਪਤ੍ਤੀਨਂ ਸਮਾਪਜ੍ਜਨੇਨ ਪਾਰਂ ਗਤੋ, ਸਬ੍ਬਾ ਸਮਾਪਤ੍ਤਿਯੋ ਸਮਾਪਜ੍ਜਿਤ੍ਵਾ ਠਿਤੋਤਿ ਅਤ੍ਥੋ. ਬ੍ਰਹ੍ਮਚਰਿਯਸ੍ਸ ਕੇਵਲੀਤਿ ਯਂ ਬ੍ਰਹ੍ਮਚਰਿਯਸ੍ਸ ਕੇਵਲਂ ਸਕਲਭਾਵੋ, ਤੇਨ ਸਮਨ੍ਨਾਗਤੋ, ਸਕਲਚਤੁਮਗ੍ਗਬ੍ਰਹ੍ਮਚਰਿਯਵਾਸੋਤਿ ਅਤ੍ਥੋ. ਤੇਨਾਹ ‘‘ਸਕਲਬ੍ਰਹ੍ਮਚਰਿਯੋ’’ਤਿ, ਪਰਿਪੁਣ੍ਣਮਗ੍ਗਬ੍ਰਹ੍ਮਚਰਿਯੋਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਦੁਤਿਯਉਰੁਵੇਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਲੋਕਸੁਤ੍ਤਵਣ੍ਣਨਾ
੨੩. ਤਤਿਯੇ ਲੋਕੋਤਿ ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋ. ਅਤ੍ਥਤੋ ਪੁਰਿਮਸ੍ਮਿਂ ਅਰਿਯਸਚ੍ਚਦ੍ਵਯਂ, ਇਧ ਪਨ ਦੁਕ੍ਖਂ ਅਰਿਯਸਚ੍ਚਂ ਵੇਦਿਤਬ੍ਬਂ. ਤੇਨਾਹ ‘‘ਲੋਕੋਤਿ ਦੁਕ੍ਖਸਚ੍ਚ’’ਨ੍ਤਿ. ਵਿਸਂਯੁਤ੍ਤੋਤਿ ਵਿਸਂਸਟ੍ਠੋ ਨ ਪਟਿਬਦ੍ਧੋ, ਸਬ੍ਬੇਸਂ ਸਂਯੋਜਨਾਨਂ ਸਮ੍ਮਦੇਵ ਸਮੁਚ੍ਛਿਨ੍ਨਤ੍ਤਾ ਤਤੋ ਵਿਪ੍ਪਮੁਤ੍ਤੋਤਿ ਅਤ੍ਥੋ. ਲੋਕਸਮੁਦਯੋਤਿ ਸੁਤ੍ਤਨ੍ਤਨਯੇਨ ਤਣ੍ਹਾ, ਅਭਿਧਮ੍ਮਨਯੇਨ ਪਨ ਅਭਿਸਙ੍ਖਾਰੇਹਿ ਸਦ੍ਧਿਂ ਦਿਯਡ੍ਢਕਿਲੇਸਸਹਸ੍ਸਂ. ਲੋਕਨਿਰੋਧੋਤਿ ਨਿਬ੍ਬਾਨਂ. ਸਚ੍ਛਿਕਤੋਤਿ ਅਤ੍ਤਪਚ੍ਚਕ੍ਖੋ ਕਤੋ. ਲੋਕਨਿਰੋਧਗਾਮਿਨੀ ਪਟਿਪਦਾਤਿ ਸੀਲਾਦਿਕ੍ਖਨ੍ਧਤ੍ਤਯਸਙ੍ਗਹੋ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ. ਸੋ ਹਿ ਲੋਕਨਿਰੋਧਂ ਨਿਬ੍ਬਾਨਂ ਗਚ੍ਛਤਿ ਅਧਿਗਚ੍ਛਤਿ, ਤਦਤ੍ਥਂ ਅਰਿਯੇਹਿ ਪਟਿਪਜ੍ਜੀਯਤਿ ਚਾਤਿ ਲੋਕਨਿਰੋਧਗਾਮਿਨੀ ਪਟਿਪਦਾਤਿ ਵੁਚ੍ਚਤਿ.
ਏਤ੍ਤਾਵਤਾ ਤਥਾਨਿ ਅਭਿਸਮ੍ਬੁਦ੍ਧੋ ਯਾਥਾਵਤੋ ਗਤੋਤਿ ਤਥਾਗਤੋਤਿ ਅਯਮਤ੍ਥੋ ਦਸ੍ਸਿਤੋ ਹੋਤਿ. ਚਤ੍ਤਾਰਿ ਹਿ ਅਰਿਯਸਚ੍ਚਾਨਿ ਤਥਾਨਿ ਨਾਮ. ਯਥਾਹ –
‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਤਥਾਨਿ ਅਵਿਤਥਾਨਿ ਅਨਞ੍ਞਥਾਨਿ. ਕਤਮਾਨਿ ਚਤ੍ਤਾਰਿ? ਇਦਂ ਦੁਕ੍ਖਨ੍ਤਿ, ਭਿਕ੍ਖਵੇ, ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤ’’ਨ੍ਤਿ (ਸਂ. ਨਿ. ੫.੧੦੯੦; ਪਟਿ. ਮ. ੨.੮) ਵਿਤ੍ਥਾਰੋ.
ਅਪਿਚ ਤਥਾਯ ਗਤੋਤਿ ਤਥਾਗਤੋ, ਗਤੋਤਿ ਚ ਅਵਗਤੋ ਅਤੀਤੋ ਪਤ੍ਤੋ ਪਟਿਪਨ੍ਨੋਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਯਸ੍ਮਾ ਭਗਵਾ ਸਕਲਲੋਕਂ ਤੀਰਣਪਰਿਞ੍ਞਾਯ ਤਥਾਯ ਅਵਿਪਰੀਤਾਯ ਗਤੋ ਅਵਗਤੋ, ਤਸ੍ਮਾ ਲੋਕੋ ਤਥਾਗਤੇਨ ਅਭਿਸਮ੍ਬੁਦ੍ਧੋਤਿ ਤਥਾਗਤੋ. ਲੋਕਸਮੁਦਯਂ ਪਹਾਨਪਰਿਞ੍ਞਾਯ ਤਥਾਯ ਗਤੋ ਅਤੀਤੋਤਿ ਤਥਾਗਤੋ. ਲੋਕਨਿਰੋਧਂ ਸਚ੍ਛਿਕਿਰਿਯਾਯ ਤਥਾਯ ਗਤੋ ਪਤ੍ਤੋਤਿ ਤਥਾਗਤੋ. ਲੋਕਨਿਰੋਧਗਾਮਿਨਿਂ ਪਟਿਪਦਂ ਤਥਂ ਅਵਿਪਰੀਤਂ ਗਤੋ ਪਟਿਪਨ੍ਨੋਤਿ ਤਥਾਗਤੋਤਿ. ਏਵਂ ਇਮਿਸ੍ਸਾ ਪਾਲ਼ਿਯਾ ਤਥਾਗਤਭਾਵਦੀਪਨਵਸੇਨ ਅਤ੍ਥੋ ਵੇਦਿਤਬ੍ਬੋ.
ਇਤਿ ਭਗਵਾ ਚਤੁਸਚ੍ਚਾਭਿਸਮ੍ਬੋਧਵਸੇਨ ਅਤ੍ਤਨੋ ਤਥਾਗਤਭਾਵਂ ਪਕਾਸੇਤ੍ਵਾ ਇਦਾਨਿ ਤਤ੍ਥ ਦਿਟ੍ਠਾਦਿਅਭਿਸਮ੍ਬੋਧਵਸੇਨਪਿ ਤਂ ਦਸ੍ਸੇਤੁਂ ‘‘ਯਂ, ਭਿਕ੍ਖਵੇ’’ਤਿਆਦਿਮਾਹ. ਅਟ੍ਠਕਥਾਯਂ ਪਨ ‘‘ਚਤੂਹਿ ਸਚ੍ਚੇਹਿ ਅਤ੍ਤਨੋ ਬੁਦ੍ਧਭਾਵਂ ਕਥੇਤ੍ਵਾ’’ਤਿ ਵੁਤ੍ਤਂ, ਤਂ ਤਥਾਗਤਸਦ੍ਦਬੁਦ੍ਧਸਦ੍ਦਾਨਂ ਅਤ੍ਥਤੋ ਨਿਨ੍ਨਾਨਾਕਰਣਤਂ ਦਸ੍ਸੇਤੁਂ ਵੁਤ੍ਤਂ. ਤਥਾ ਚੇਵ ਹਿ ਪਾਲ਼ਿ ਪਵਤ੍ਤਾਤਿ. ਦਿਟ੍ਠਨ੍ਤਿ ਰੂਪਾਯਤਨਂ ਦਟ੍ਠਬ੍ਬਤੋ. ਤੇਨ ਯਂ ਦਿਟ੍ਠਂ ਯਂ ਦਿਸ੍ਸਤਿ, ਯਂ ਦਕ੍ਖਤਿ, ਯਂ ਸਮਵਾਯੇ ਪਸ੍ਸੇਯ੍ਯ, ਤਂ ਸਬ੍ਬਂ ਦਿਟ੍ਠਨ੍ਤੇਵ ਗਹਿਤਂ ਕਾਲਵਿਸੇਸਸ੍ਸ ਅਨਾਮਟ੍ਠਭਾਵਤੋ ਯਥਾ ‘‘ਦੁਦ੍ਧ’’ਨ੍ਤਿ ਦਸ੍ਸੇਤਿ. ਸੁਤਨ੍ਤਿਆਦੀਸੁਪਿ ਏਸੇਵ ਨਯੋ. ਸੁਤਨ੍ਤਿ ਸਦ੍ਦਾਯਤਨਂ ਸੋਤਬ੍ਬਤੋ. ਮੁਤਨ੍ਤਿ ਸਨਿਸ੍ਸਯੇ ਇਨ੍ਦ੍ਰਿਯੇ ਨਿਸ੍ਸਯਂ ਮੁਞ੍ਚਿਤ੍ਵਾ ਪਾਪੁਣਿਤ੍ਵਾ ਗਹੇਤਬ੍ਬਂ. ਤੇਨਾਹ ‘‘ਪਤ੍ਵਾ ਗਹੇਤਬ੍ਬਤੋ’’ਤਿ. ਵਿਞ੍ਞਾਤਨ੍ਤਿ ਵਿਜਾਨਿਤਬ੍ਬਂ. ਤਂ ਪਨ ਦਿਟ੍ਠਾਦਿਵਿਨਿਮੁਤ੍ਤਂ ਵਿਞ੍ਞੇਯ੍ਯਨ੍ਤਿ ਆਹ ‘‘ਸੁਖਦੁਕ੍ਖਾਦਿ ਧਮ੍ਮਾਰਮ੍ਮਣ’’ਨ੍ਤਿ. ਪਤ੍ਤਨ੍ਤਿ ਯਥਾ ਤਥਾ ਪਤ੍ਵਾ ਹਤ੍ਥਗਤਂ, ਅਧਿਗਤਨ੍ਤਿ ਅਤ੍ਥੋ. ਤੇਨਾਹ ‘‘ਪਰਿਯੇਸਿਤ੍ਵਾ ਵਾ ਅਪਰਿਯੇਸਿਤ੍ਵਾ ਵਾ’’ਤਿ. ਪਰਿਯੇਸਿਤਨ੍ਤਿ ਪਤ੍ਤਿਯਾ ਅਤ੍ਥਂ ਪਰਿਯਿਟ੍ਠਂ. ਤਂ ਪਨ ਪਤ੍ਤਂ ਵਾ ਸਿਯਾ ਅਪ੍ਪਤ੍ਤਂ ਵਾ, ਉਭਯਥਾਪਿ ਪਰਿਯੇਸਿਤਮੇਵਾਤਿ ਆਹ ‘‘ਪਤ੍ਤਂ ਵਾ ਅਪ੍ਪਤ੍ਤਂ ਵਾ’’ਤਿ. ਦ੍ਵਯੇਨਪਿ ਦ੍ਵਿਪ੍ਪਕਾਰਮ੍ਪਿ ਪਤ੍ਤਂ ਦ੍ਵਿਪ੍ਪਕਾਰਮ੍ਪਿ ਪਰਿਯੇਸਿਤਂ ਤੇਨ ਤੇਨ ਪਕਾਰੇਨ ਤਥਾਗਤੇਨ ਅਭਿਸਮ੍ਬੁਦ੍ਧਨ੍ਤਿ ਦਸ੍ਸੇਤਿ. ਚਿਤ੍ਤੇਨ ਅਨੁਸਞ੍ਚਰਿਤਨ੍ਤਿ ਤੇ ਪਨ ਅਪਾਪੇਤ੍ਵਾ ਚਿਤ੍ਤੇਨੇਵ ਅਨੁ ਅਨੁ ਸਞ੍ਚਰਿਤਂ, ਵਿਪਰਿਤਕ੍ਕਿਤਨ੍ਤਿ ਅਤ੍ਥੋ.
ਪੀਤਕਨ੍ਤਿਆਦੀਤਿ ਆਦਿਸਦ੍ਦੇਨ ਲੋਹਿਤਓਦਾਤਾਦਿਸਬ੍ਬਂ ਰੂਪਾਰਮ੍ਮਣਭਾਗਂ ਸਙ੍ਗਣ੍ਹਾਤਿ. ਸੁਮਨੋਤਿ ਰਾਗਵਸੇਨ ਲੋਭਵਸੇਨ ਸਦ੍ਧਾਦਿਵਸੇਨ ਵਾ ਸੁਮਨੋ. ਦੁਮ੍ਮਨੋਤਿ ਬ੍ਯਾਪਾਦਵਿਤਕ੍ਕਵਸੇਨ ਵਾ ਵਿਹਿਂਸਾਵਿਤਕ੍ਕਵਸੇਨ ਵਾ ਦੁਮ੍ਮਨੋ. ਮਜ੍ਝਤ੍ਤੋਤਿ ਅਞ੍ਞਾਣਵਸੇਨ, ਞਾਣਵਸੇਨ ਵਾ ਮਜ੍ਝਤ੍ਤੋ. ਏਸ ਨਯੋ ਸਬ੍ਬਤ੍ਥ. ਤਤ੍ਥ ਆਦਿਸਦ੍ਦੇਨ ਸਙ੍ਖਸਦ੍ਦੋ, ਪਣਵਸਦ੍ਦੋ, ਪਤ੍ਤਗਨ੍ਧੋ, ਪੁਪ੍ਫਗਨ੍ਧੋ, ਪੁਪ੍ਫਰਸੋ, ਫਲਰਸੋ, ਉਪਾਦਿਨ੍ਨਂ, ਅਨੁਪਾਦਿਨ੍ਨਂ, ਮਜ੍ਝਤ੍ਤਵੇਦਨਾ ਕੁਸਲਕਮ੍ਮਂ ਅਕੁਸਲਕਮ੍ਮਨ੍ਤਿ ਏਵਮਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਅਪ੍ਪਤ੍ਤਨ੍ਤਿ ਞਾਣੇਨ ਅਸਮ੍ਪਤ੍ਤਂ, ਅਵਿਦਿਤਨ੍ਤਿ ਅਤ੍ਥੋ. ਤੇਨਾਹ ‘‘ਞਾਣੇਨ ਅਸਚ੍ਛਿਕਤ’’ਨ੍ਤਿ. ਲੋਕੇਨ ਗਤਨ੍ਤਿ ਲੋਕੇਨ ਞਾਤਂ. ਤਥੇਵ ਗਤਤ੍ਤਾਤਿ ਤਥੇਵ ਞਾਤਤ੍ਤਾ ਅਭਿਸਮ੍ਬੁਦ੍ਧਤ੍ਤਾ, ਗਤਸਦ੍ਦੇਨ ਏਕਤ੍ਤਂ ਬੁਦ੍ਧਿਅਤ੍ਥਨ੍ਤਿ ਅਤ੍ਥੋ. ਗਤਿਅਤ੍ਥੋ ਹਿ ਧਾਤਵੋ ਬੁਦ੍ਧਿਅਤ੍ਥਾ ਭਵਨ੍ਤੀਤਿ ਅਕ੍ਖਰਚਿਨ੍ਤਕਾ.
ਯਞ੍ਚ, ਭਿਕ੍ਖਵੇ, ਰਤਿਂ ਤਥਾਗਤੋ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਜ੍ਝਤੀਤਿ ਯਸ੍ਸਞ੍ਚ ਵਿਸਾਖਪੁਣ੍ਣਮਾਯ ਰਤ੍ਤਿਯਂ ਤਥਾਆਗਤਤ੍ਤਾਦਿਅਤ੍ਥੇਨ ਤਥਾਗਤੋ ਭਗਵਾ ਬੋਧਿਮਣ੍ਡੇ ਅਪਰਾਜਿਤਪਲ੍ਲਙ੍ਕੇ ਨਿਸਿਨ੍ਨੋ ਤਿਣ੍ਣਂ ਮਾਰਾਨਂ ਮਤ੍ਥਕਂ ਮਦ੍ਦਿਤ੍ਵਾ ਉਤ੍ਤਰਿਤਰਾਭਾਵਤੋ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਆਸਵਕ੍ਖਯਞਾਣੇਨ ਸਦ੍ਧਿਂ ਸਬ੍ਬਞ੍ਞੁਤਞ੍ਞਾਣਂ ਅਧਿਗਚ੍ਛਤਿ. ਯਞ੍ਚ ਰਤ੍ਤਿਂ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਤੀਤਿ ਯਸ੍ਸਞ੍ਚ ਵਿਸਾਖਪੁਣ੍ਣਮਾਯ ਰਤ੍ਤਿਯਂਯੇਵ ਕੁਸਿਨਾਰਾਯਂ ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇ ਯਮਕਸਾਲਾਨਮਨ੍ਤਰੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਤਿ. ਯਂ ਏਤਸ੍ਮਿਂ ਅਨ੍ਤਰੇਤਿ ਇਮਾਸਂ ਦ੍ਵਿਨ੍ਨਂ ਸਉਪਾਦਿਸੇਸਅਨੁਪਾਦਿਸੇਸਨਿਬ੍ਬਾਨਧਾਤੂਨਂ ਮਜ੍ਝੇ ਪਞ੍ਚਚਤ੍ਤਾਲੀਸਵਸ੍ਸਪਰਿਮਾਣਕਾਲੇ ਪਠਮਬੋਧਿਯਮ੍ਪਿ ਮਜ੍ਝਿਮਬੋਧਿਯਮ੍ਪਿ ਪਚ੍ਛਿਮਬੋਧਿਯਮ੍ਪਿ ਯਂ ਸੁਤ੍ਤਗੇਯ੍ਯਾਦਿਪ੍ਪਭੇਦਂ ਧਮ੍ਮਂ ਭਾਸਤਿ ਨਿਦਸ੍ਸਨਵਸੇਨ, ਲਪਤਿ ਉਦ੍ਦਿਸਨਵਸੇਨ, ਨਿਦ੍ਦਿਸਤਿ ਪਰਿਨਿਦ੍ਦਿਸਨਵਸੇਨ. ਸਬ੍ਬਂ ਤਂ ਤਥੇਵ ਹੋਤੀਤਿ ਤਂ ਏਤ੍ਥਨ੍ਤਰੇ ਦੇਸਿਤਂ ਸਬ੍ਬਂ ਸੁਤ੍ਤਗੇਯ੍ਯਾਦਿਨਵਙ੍ਗਂ ਬੁਦ੍ਧਵਚਨਂ ਅਤ੍ਥਤੋ ਬ੍ਯਞ੍ਜਨਤੋ ਚ ਅਨੂਨਂ ਅਨਧਿਕਂ ਸਬ੍ਬਾਕਾਰਪਰਿਪੁਣ੍ਣਂ ਰਾਗਮਦਨਿਮ੍ਮਦਨਂ ਦੋਸਮਦਨਿਮ੍ਮਦਨਂ ਮੋਹਮਦਨਿਮ੍ਮਦਨਂ, ਨਤ੍ਥਿ ਤਤ੍ਥ ਵਾਲਗ੍ਗਮਤ੍ਤਮ੍ਪਿ ਅਵਕ੍ਖਲਿਤਂ, ਏਕਮੁਦ੍ਦਿਕਾਯ ਲਞ੍ਛਿਤਂ ਵਿਯ ਏਕਾਯ ਨਾਲ਼ਿਯਾ ਮਿਤਂ ਵਿਯ ਏਕਤੁਲਾਯ ਤੁਲਿਤਂ ਵਿਯ ਚ ਤਂ ਤਥੇਵ ਹੋਤਿ ਯਸ੍ਸਤ੍ਥਾਯ ਭਾਸਿਤਂ, ਏਕਨ੍ਤੇਨੇਵ ਤਸ੍ਸ ਸਾਧਨਤੋ, ਨੋ ਅਞ੍ਞਥਾ, ਤਸ੍ਮਾ ਤਥਂ ਅਵਿਤਥਂ ਅਨਞ੍ਞਥਂ. ਏਤੇਨ ਤਥਾਵਾਦਿਤਾਯ ਤਥਾਗਤੋਤਿ ਦਸ੍ਸੇਤਿ. ਗਦਅਤ੍ਥੋ ਅਯਂ ਗਤਸਦ੍ਦੋ ਦ-ਕਾਰਸ੍ਸ ਤ-ਕਾਰਂ ਕਤ੍ਵਾ, ਤਸ੍ਮਾ ਤਥਂ ਗਦਤੀਤਿ ਤਥਾਗਤੋਤਿ ਅਤ੍ਥੋ. ਅਥ ਵਾ ਆਗਦਨਂ ਆਗਦੋ, ਵਚਨਨ੍ਤਿ ਅਤ੍ਥੋ. ਤਤੋ ਅਵਿਪਰੀਤੋ ਆਗਦੋ ਅਸ੍ਸਾਤਿ ਦ-ਕਾਰਸ੍ਸ ਤ-ਕਾਰਂ ਕਤ੍ਵਾ ਤਥਾਗਤੋਤਿ ਏਵਮੇਤ੍ਥ ਪਦਸਿਦ੍ਧਿ ਵੇਦਿਤਬ੍ਬਾ.
ਯਥਾਵਾਦੀਤਿ ਯੇ ਧਮ੍ਮੇ ਭਗਵਾ ‘‘ਇਮੇ ਧਮ੍ਮਾ ਅਕੁਸਲਾ ਸਾਵਜ੍ਜਾ ਵਿਞ੍ਞੁਗਰਹਿਤਾ ਸਮਤ੍ਤਾ ਸਮਾਦਿਨ੍ਨਾ ਅਹਿਤਾਯ ਦੁਕ੍ਖਾਯ ਸਂਵਤ੍ਤਨ੍ਤੀ’’ਤਿ ਪਰੇਸਂ ਧਮ੍ਮਂ ਦੇਸੇਨ੍ਤੋ ਵਦਤਿ, ਤੇ ਧਮ੍ਮੇ ਏਕਨ੍ਤੇਨੇਵ ਸਯਂ ਪਹਾਸਿ. ਯੇ ਪਨ ਧਮ੍ਮੇ ਭਗਵਾ – ‘‘ਇਮੇ ਧਮ੍ਮਾ ਕੁਸਲਾ ਅਨਵਜ੍ਜਾ ਵਿਞ੍ਞੁਪ੍ਪਸਤ੍ਥਾ ਸਮਤ੍ਤਾ ਸਮਾਦਿਨ੍ਨਾ ਹਿਤਾਯ ਸੁਖਾਯ ਸਂਵਤ੍ਤਨ੍ਤੀ’’ਤਿ ਵਦਤਿ, ਤੇ ਧਮ੍ਮੇ ਏਕਨ੍ਤੇਨੇਵ ਸਯਂ ਉਪਸਮ੍ਪਜ੍ਜ ਵਿਹਰਤਿ, ਤਸ੍ਮਾ ਯਥਾਵਾਦੀ ਭਗਵਾ ਤਥਾਕਾਰੀਤਿ ਵੇਦਿਤਬ੍ਬੋ. ਤਥਾ ਸਮ੍ਮਦੇਵ ਸੀਲਾਦਿਪਰਿਪੂਰਣਵਸੇਨ ਸਮ੍ਮਾਪਟਿਪਦਾਯਂ ਯਥਾਕਾਰੀ ਭਗਵਾ, ਤਥੇਵ ਧਮ੍ਮਦੇਸਨਾਯ ਪਰੇਸਂ ਤਤ੍ਥ ਪਤਿਟ੍ਠਾਪਨਵਸੇਨ ਤਥਾਵਾਦੀ. ਭਗਵਤੋ ਹਿ ਵਾਚਾਯ ਕਾਯੋ ਅਨੁਲੋਮੇਤਿ, ਕਾਯਸ੍ਸਪਿ ਵਾਚਾ, ਤਸ੍ਮਾ ਯਥਾਵਾਦੀ ਤਥਾਕਾਰੀ, ਯਥਾਕਾਰੀ ਤਥਾਵਾਦੀ ਚ ਹੋਤਿ. ਏਵਂਭੂਤਸ੍ਸ ਚ ਯਥਾ ਵਾਚਾ, ਕਾਯੋਪਿ ਤਥਾ ਗਤੋ ਪਵਤ੍ਤੋ. ਯਥਾ ਚ ਕਾਯੋ, ਵਾਚਾਪਿ ਤਥਾ ਗਤਾ ਪਵਤ੍ਤਾਤਿ ਅਤ੍ਥੋ.
ਅਭਿਭੂ ਅਨਭਿਭੂਤੋਤਿ ਉਪਰਿ ਭਵਗ੍ਗਂ, ਹੇਟ੍ਠਾ ਅਵੀਚਿਨਿਰਯਂ ਪਰਿਯਨ੍ਤਂ ਕਤ੍ਵਾ ਤਿਰਿਯਂ ਅਪਰਿਮਾਣਾਸੁ ਲੋਕਧਾਤੂਸੁ ਭਗਵਾ ਸਬ੍ਬਸਤ੍ਤੇ ਅਭਿਭਵਤਿ ਸੀਲੇਨਪਿ ਸਮਾਧਿਨਾਪਿ ਪਞ੍ਞਾਯਪਿ ਵਿਮੁਤ੍ਤਿਯਾਪਿ, ਨ ਤਸ੍ਸ ਤੁਲਾ ਵਾ ਪਮਾਣਂ ਵਾ ਅਤ੍ਥਿ. ਅਸਮੋ ਅਸਮਸਮੋ ਅਪ੍ਪਟਿਮੋ ਅਪ੍ਪਟਿਭਾਗੋ ਅਪ੍ਪਟਿਪੁਗ੍ਗਲੋ ਅਤੁਲੋ ਅਪ੍ਪਮੇਯ੍ਯੋ ਅਨੁਤ੍ਤਰੋ ਧਮ੍ਮਰਾਜਾ ਦੇਵਦੇਵੋ ਸਕ੍ਕਾਨਂ ਅਤਿਸਕ੍ਕੋ ਬ੍ਰਹ੍ਮਾਨਂ ਅਤਿਬ੍ਰਹ੍ਮਾ, ਤਤੋ ਏਵ ਅਯਂ ਨ ਕੇਨਚਿ ਅਭਿਭੂਤੋ. ਦਕ੍ਖਤੀਤਿ ਸਬ੍ਬਂ ਪਸ੍ਸਤਿ. ਵਿਸੇਸਵਚਨਿਚ੍ਛਾਯਪਿ ਅਭਾਵਤੋ ਅਨਵਸੇਸਵਿਸਯੋ ਦਸਸਦ੍ਦੋ. ਤੇਨ ਯਂ ਕਿਞ੍ਚਿ ਨੇਯ੍ਯਂ ਨਾਮ, ਸਬ੍ਬਂ ਤਂ ਹਤ੍ਥਤਲੇ ਆਮਲਕਂ ਵਿਯ ਪਸ੍ਸਤੀਤਿ ਦੀਪੇਤਿ. ਅਵਿਪਰੀਤਂ ਆਸਯਾਦਿਅਵਬੋਧੇਨ ਹਿਤੂਪਸਂਹਾਰਾਦਿਨਾ ਚ ਸਤ੍ਤੇ, ਭਾਵਞ੍ਞਤ੍ਥਤ੍ਤੂਪਨਯਵਸੇਨ ਸਙ੍ਖਾਰੇ, ਸਬ੍ਬਾਕਾਰੇਨ ਸੁਚਿਣ੍ਣਵਸਿਤਾਯ ਸਮਾਪਤ੍ਤਿਯੋ, ਚਿਤ੍ਤਞ੍ਚ ਵਸੇ ਵਤ੍ਤੇਤੀਤਿ ਵਸਵਤ੍ਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.
ਵਿਸਂਯੁਤ੍ਤੋਤਿ ਚਤੂਹਿ ਯੋਗੇਹਿ ਵਿਸਂਯੁਤ੍ਤੋ. ਤੇਨਾਹ ‘‘ਚਤੁਨ੍ਨਂ ਯੋਗਾਨਂ ਪਹਾਨੇਨ ਵਿਸਂਯੁਤ੍ਤੋ’’ਤਿ. ਤਣ੍ਹਾਦਿਟ੍ਠਿਉਪਯੇਹਿ ਵਿਰਹਿਤੋਤਿ ਸਬ੍ਬਸ੍ਮਿਮ੍ਪਿ ਲੋਕੇ ਤਣ੍ਹਾਦਿਟ੍ਠਿਸਙ੍ਖਾਤੇਹਿ ਉਪਯੇਹਿ ਵਿਰਹਿਤੋ.
ਅਭਿਭਵਿਤ੍ਵਾ ਠਿਤੋਤਿ ਤਬ੍ਬਿਸਯਕਿਲੇਸਪ੍ਪਹਾਨੇਨ ਅਭਿਭੁਯ੍ਯ ਅਤਿਕ੍ਕਮਿਤ੍ਵਾ ਠਿਤੋ. ਚਤ੍ਤਾਰੋਪਿ ਗਨ੍ਥੇ ਮੋਚੇਤ੍ਵਾ ਠਿਤੋਤਿ ਸਬ੍ਬੇ ਅਭਿਜ੍ਝਾਕਾਯਗਨ੍ਥਾਦਿਕੇ ਸਕਸਨ੍ਤਾਨਤੋ ਮੋਚੇਤ੍ਵਾ ਠਿਤੋ. ਵੇਨੇਯ੍ਯਸਨ੍ਤਾਨੇ ਵਾ ਅਤ੍ਤਨੋ ਦੇਸਨਾਵਿਲਾਸੇਨ ਤੇਸਂ ਪਮੋਚਨੋਤਿ ਸਬ੍ਬਗਨ੍ਥਪ੍ਪਮੋਚਨੋ. ਫੁਟ੍ਠਸ੍ਸ ਪਰਮਾ ਸਨ੍ਤੀਤਿ ਅਸ੍ਸ ਅਨੇਨ ਖੀਣਾਸਵੇਨ ਬੁਦ੍ਧੇਨ ਪਰਮਾ ਸਨ੍ਤਿ ਞਾਣਫੁਸਨੇਨ ਫੁਟ੍ਠਾਤਿ ਏਵਮੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ. ਤੇਨਾਹ ‘‘ਫੁਟ੍ਠਸ੍ਸਾ’’ਤਿਆਦਿ. ਨਿਬ੍ਬਾਨੇ ਕੁਤੋਚਿ ਭਯਂ ਨਤ੍ਥੀਤਿ ਕੁਤੋਚਿ ਭਯਕਾਰਣਤੋ ਨਿਬ੍ਬਾਨੇ ਭਯਂ ਨਤ੍ਥਿ ਅਸਙ੍ਖਤਭਾਵੇਨ ਸਬ੍ਬਸੋ ਖੇਮਤ੍ਤਾ. ਤੇਨਾਹ ਭਗਵਾ – ‘‘ਖੇਮਞ੍ਚ ਵੋ, ਭਿਕ੍ਖਵੇ, ਧਮ੍ਮਂ ਦੇਸੇਸ੍ਸਾਮਿ ਖੇਮਗਾਮਿਨਿਞ੍ਚ ਪਟਿਪਦ’’ਨ੍ਤਿਆਦਿ (ਸਂ. ਨਿ. ੪.੩੭੯-੪੦੮). ਨਿਬ੍ਬਾਨਪ੍ਪਤ੍ਤਸ੍ਸ ਵਾ ਕੁਤੋਚਿ ਭਯਂ ਨਤ੍ਥੀਤਿ ਨਿਬ੍ਬਾਨਂ ਅਕੁਤੋਭਯਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ, ਨ ਕੁਤੋਚਿ ਭਯਂ ਏਤ੍ਥ ਏਤਸ੍ਮਿਂ ਅਧਿਗਤੇਤਿ ਅਕੁਤੋਭਯਂ, ਨਿਬ੍ਬਾਨਨ੍ਤਿ ਏਵਮੇਤ੍ਥ ਨਿਬ੍ਬਚਨਞ੍ਚ ਦਟ੍ਠਬ੍ਬਂ.
ਅਨੀਘੋ ਨਿਦ੍ਦੁਕ੍ਖੋ. ਸਬ੍ਬਕਮ੍ਮਕ੍ਖਯਂ ਪਤ੍ਤੋਤਿ ਸਬ੍ਬੇਸਂ ਕਮ੍ਮਾਨਂ ਖਯਂ ਪਰਿਯੋਸਾਨਂ ਅਚ੍ਚਨ੍ਤਭਾਵਂ ਪਤ੍ਤੋ. ਉਪਧੀ ਸਮ੍ਮਦੇਵ ਖੀਯਨ੍ਤਿ ਏਤ੍ਥਾਤਿ ਉਪਧਿਸਙ੍ਖਯੋ, ਨਿਬ੍ਬਾਨਨ੍ਤਿ ਆਹ ‘‘ਉਪਧਿਸਙ੍ਖਯਸਙ੍ਖਾਤੇ ਨਿਬ੍ਬਾਨੇ’’ਤਿ. ਚਕ੍ਕਨ੍ਤਿ ਧਮ੍ਮਚਕ੍ਕਂ. ਪਵਤ੍ਤਯੀਤਿ ਤੇਪਰਿਵਟ੍ਟਂ ਦ੍ਵਾਦਸਾਕਾਰਂ ਪਵਤ੍ਤੇਸਿ. ਮਹਨ੍ਤੇਹਿ ਸੀਲਾਦਿਗੁਣੇਹਿ ਸਮਨ੍ਨਾਗਤਤ੍ਤਾ ਮਹਨ੍ਤਂ. ਵੀਤਸਾਰਦਨ੍ਤਿ ਚਤੁਵੇਸਾਰਜ੍ਜਯੋਗੇਨ ਵੀਤਸਾਰਦਂ. ਸੇਸਂ ਉਤ੍ਤਾਨਮੇਵ.
ਲੋਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਕਾਲ਼ਕਾਰਾਮਸੁਤ੍ਤਵਣ੍ਣਨਾ
੨੪. ਚਤੁਤ੍ਥੇ ਬਾਲ਼੍ਹਂ ਖੋ ਨੇ ਪਸਂਸਸੀਤਿ ਨੇ ਸਮਣੇ ਬਾਲ਼੍ਹਂ ਕਤ੍ਵਾ ਪਸਂਸਸਿ ਵਣ੍ਣਯਸਿ. ਕੀਦਿਸਂ ਸੀਲਂ ਏਤੇਸਨ੍ਤਿ ਕਿਂਸੀਲਾ. ਕੋ ਸਮਾਚਾਰੋ ਏਤੇਸਨ੍ਤਿ ਕਿਂਸਮਾਚਾਰਾ. ਗੁਣਮਗ੍ਗਸਣ੍ਠਿਤਾਤਿ ਗੁਣਗ੍ਗਸਣ੍ਠਿਤਾ. ਮ-ਕਾਰੋ ਪਦਸਨ੍ਧਿਕਰੋ, ਅਗ੍ਗਗੁਣੇ ਪਤਿਟ੍ਠਿਤਾਤਿ ਵੁਤ੍ਤਂ ਹੋਤਿ. ਸਨ੍ਤਿਨ੍ਦ੍ਰਿਯਾ ਸਨ੍ਤਮਾਨਸਾ, ‘‘ਸਨ੍ਤਂ ਤੇਸਂ ਗਤਂ ਠਿਤ’’ਨ੍ਤਿਪਿ ਪਠਨ੍ਤਿ. ਏਕਕਿਯਾਤਿ ਏਕਕਾ, ਚਤੂਸੁ ਇਰਿਯਾਪਥੇਸੁ ਏਕਕਾ ਹੁਤ੍ਵਾ ਵਿਹਰਨ੍ਤੀਤਿ ਅਧਿਪ੍ਪਾਯੋ. ਤੇਨੇਵਾਹ ‘‘ਅਦੁਤਿਯਾ’’ਤਿ. ਤਾਦਿਸਾ ਸਮਣਾ ਮਮਾਤੀਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ. ਤੇਨ –
‘‘ਕਾਯਕਮ੍ਮਂ ਸੁਚਿ ਨੇਸਂ, ਵਾਚਾਕਮ੍ਮਂ ਅਨਾਵਿਲਂ;
ਮਨੋਕਮ੍ਮਂ ਸੁਵਿਸੁਦ੍ਧਂ, ਤਾਦਿਸਾ ਸਮਣਾ ਮਮ.
‘‘ਵਿਮਲਾ ਸਙ੍ਖਮੁਤ੍ਤਾਭਾ, ਸੁਦ੍ਧਾ ਅਨ੍ਤਰਬਾਹਿਰਾ;
ਪੁਣ੍ਣਾ ਸੁਦ੍ਧੇਹਿ ਧਮ੍ਮੇਹਿ, ਤਾਦਿਸਾ ਸਮਣਾ ਮਮ.
‘‘ਲਾਭੇਨ ਉਨ੍ਨਤੋ ਲੋਕੋ, ਅਲਾਭੇਨ ਚ ਓਨਤੋ;
ਲਾਭਾਲਾਭੇਨ ਏਕਟ੍ਠਾ, ਤਾਦਿਸਾ ਸਮਣਾ ਮਮ.
‘‘ਯਸੇਨ ਉਨ੍ਨਤੋ ਲੋਕੋ, ਅਯਸੇਨ ਚ ਓਨਤੋ;
ਯਸਾਯਸੇਨ ਏਕਟ੍ਠਾ, ਤਾਦਿਸਾ ਸਮਣਾ ਮਮ.
‘‘ਪਸਂਸਾਯੁਨ੍ਨਤੋ ਲੋਕੋ, ਨਿਨ੍ਦਾਯਪਿ ਚ ਓਨਤੋ;
ਸਮਾ ਨਿਨ੍ਦਾਪਸਂਸਾਸੁ, ਤਾਦਿਸਾ ਸਮਣਾ ਮਮ.
‘‘ਸੁਖੇਨ ਉਨ੍ਨਤੋ ਲੋਕੋ, ਦੁਕ੍ਖੇਨਪਿ ਚ ਓਨਤੋ;
ਅਕਮ੍ਪਾ ਸੁਖਦੁਕ੍ਖੇਸੁ, ਤਾਦਿਸਾ ਸਮਣਾ ਮਮਾ’’ਤਿ. (ਧ. ਪ. ਅਟ੍ਠ. ੨.੩੦੩ ਚੂਲ਼ਸੁਭਦ੍ਦਾਵਤ੍ਥੁ) –
ਏਵਮਾਦਿਂ ਸਙ੍ਗਣ੍ਹਾਤਿ.
‘‘ਦੂਰੇ ਸਨ੍ਤੋ’’ਤਿਆਦਿਗਾਥਾਯ ਅਯਮਤ੍ਥੋ. ਸਨ੍ਤੋਤਿ ਰਾਗਾਦੀਨਂ ਸਨ੍ਤਤਾਯ ਬੁਦ੍ਧਾਦਯੋ ਸਨ੍ਤੋ ਨਾਮ, ਇਧ ਪਨ ਪੁਬ੍ਬਬੁਦ੍ਧੇਸੁ ਕਤਾਧਿਕਾਰਾ ਉਸ੍ਸਨ੍ਨਕੁਸਲਮੂਲਾ ਭਾਵਿਤਭਾਵਨਾ ਸਤ੍ਤਾ ਸਨ੍ਤੋਤਿ ਅਧਿਪ੍ਪੇਤਾ. ਪਕਾਸਨ੍ਤੀਤਿ ਦੂਰੇ ਠਿਤਾਪਿ ਬੁਦ੍ਧਾਨਂ ਞਾਣਪਥਂ ਆਗਚ੍ਛਨ੍ਤਾ ਪਾਕਟਾ ਹੋਨ੍ਤਿ. ਹਿਮਵਨ੍ਤੋਵਾਤਿ ਯਥਾ ਤਿਯੋਜਨਸਹਸ੍ਸਵਿਤ੍ਥਤੋ ਪਞ੍ਚਯੋਜਨਸਤੁਬ੍ਬੇਧੋ ਚਤੁਰਾਸੀਤਿਯਾ ਕੂਟਸਹਸ੍ਸੇਹਿ ਪਟਿਮਣ੍ਡਿਤੋ ਹਿਮਵਨ੍ਤਪਬ੍ਬਤੋ ਦੂਰੇ ਠਿਤਾਨਮ੍ਪਿ ਅਭਿਮੁਖੇ ਠਿਤੋ ਵਿਯ ਪਕਾਸਤਿ, ਏਵਂ ਪਕਾਸਨ੍ਤੀਤਿ ਅਤ੍ਥੋ. ਅਸਨ੍ਤੇਤ੍ਥ ਨ ਦਿਸ੍ਸਨ੍ਤੀਤਿ ਲਾਭਗਰੁਕਾ, ਵਿਤ੍ਥਿਣ੍ਣਪਰਲੋਕਾ, ਆਮਿਸਚਕ੍ਖੁਕਾ, ਜੀਵਿਕਤ੍ਥਾਯ ਪਬ੍ਬਜਿਤਾ, ਬਾਲਪੁਗ੍ਗਲਾ ਅਸਨ੍ਤੋ ਨਾਮ. ਤੇ ਏਤ੍ਥ ਬੁਦ੍ਧਾਨਂ ਦਕ੍ਖਿਣਸ੍ਸ ਜਾਣੁਮਣ੍ਡਲਸ੍ਸ ਸਨ੍ਤਿਕੇ ਨਿਸਿਨ੍ਨਾਪਿ ਨ ਦਿਸ੍ਸਨ੍ਤਿ ਨ ਪਞ੍ਞਾਯਨ੍ਤਿ. ਰਤ੍ਤਿਂ ਖਿਤ੍ਤਾ ਯਥਾ ਸਰਾਤਿ ਰਤ੍ਤਿਂ ਚਤੁਰਙ੍ਗਸਮਨ੍ਨਾਗਤੇ ਅਨ੍ਧਕਾਰੇ ਖਿਤ੍ਤਾ ਸਰਾ ਵਿਯ ਤਥਾਰੂਪਸ੍ਸ ਉਪਨਿਸ੍ਸਯਭੂਤਸ੍ਸ ਪੁਬ੍ਬਹੇਤੁਨੋ ਅਭਾਵੇਨ ਨ ਪਞ੍ਞਾਯਨ੍ਤੀਤਿ ਅਤ੍ਥੋ.
ਬ੍ਰਹ੍ਮਦੇਯ੍ਯਨ੍ਤਿ ਸੇਟ੍ਠਦੇਯ੍ਯਂ, ਯਥਾ ਦਿਨ੍ਨਂ ਨ ਪੁਨ ਗਹੇਤਬ੍ਬਂ ਹੋਤਿ ਨਿਸ੍ਸਟ੍ਠਂ ਪਰਿਚ੍ਚਤ੍ਤਂ, ਏਵਂ ਦਿਨ੍ਨਨ੍ਤਿ ਅਤ੍ਥੋ.
ਦਿਟ੍ਠਂ ਨ ਮਞ੍ਞਤੀਤਿ ਏਤ੍ਥ ਦਿਟ੍ਠਨ੍ਤਿ ਮਂਸਚਕ੍ਖੁਨਾਪਿ ਦਿਟ੍ਠਂ, ਦਿਬ੍ਬਚਕ੍ਖੁਨਾਪਿ ਦਿਟ੍ਠਂ, ਰੂਪਾਯਤਨਸ੍ਸੇਤਂ ਅਧਿਵਚਨਂ. ਯਞ੍ਹਿ ਚਕ੍ਖੁਦ੍ਵਯੇਨ ਕਤਦਸ੍ਸਨਕਿਰਿਯਾਸਮਾਪਨਂ, ਯਂ ਚਕ੍ਖੁਦ੍ਵਯਂ ਪਸ੍ਸਤਿ ਅਪਸ੍ਸਿ ਪਸ੍ਸਿਸ੍ਸਤਿ, ਸਮਵਾਯੇ ਪਸ੍ਸੇਯ੍ਯ, ਤਂ ਸਬ੍ਬਂ ਕਾਲਵਿਸੇਸਵਚਨਿਚ੍ਛਾਯ ਅਭਾਵਤੋ ‘‘ਦਿਟ੍ਠ’’ਨ੍ਤੇਵ ਵੁਤ੍ਤਂ ਯਥਾ ‘‘ਦੁਦ੍ਧ’’ਨ੍ਤਿ. ਤੇਨੇਵਾਹ ‘‘ਦਿਟ੍ਠਂ ਰੂਪਾਯਤਨ’’ਨ੍ਤਿ. ਏਵਰੂਪਾਨਿ ਹਿ ਵਚਨਾਨੀਤਿ ‘‘ਦਟ੍ਠਬ੍ਬਂ ਸੋਤਬ੍ਬ’’ਨ੍ਤਿਆਦੀਨਿ.
ਲਾਭੇਪਿ ਤਾਦੀ, ਅਲਾਭੇਪਿ ਤਾਦੀਤਿ ਯਥਾ ਅਲਾਭਕਾਲੇ ਲਾਭਸ੍ਸ ਲਦ੍ਧਕਾਲੇਪਿ ਤਥੇਵਾਤਿ ਤਾਦਿਸੋ. ਯਸੇਪੀਤਿ ਯਸੇ ਸਤਿਪਿ ਮਹਾਪਰਿਵਾਰਕਾਲੇਪਿ. ਸੇਸਮੇਤ੍ਥ ਉਤ੍ਤਾਨਮੇਵ.
ਕਾਲ਼ਕਾਰਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਬ੍ਰਹ੍ਮਚਰਿਯਸੁਤ੍ਤਵਣ੍ਣਨਾ
੨੫. ਪਞ੍ਚਮੇ ਨਯਿਦਨ੍ਤਿ ਏਤ੍ਥ ਨ-ਇਤਿ ਪਟਿਸੇਧੇ ਨਿਪਾਤੋ, ਤਸ੍ਸ ‘‘ਵੁਸ੍ਸਤੀ’’ਤਿ ਇਮਿਨਾ ਸਮ੍ਬਨ੍ਧੋ ‘‘ਨ ਵੁਸ੍ਸਤੀ’’ਤਿ, ਯ-ਕਾਰੋ ਪਦਸਨ੍ਧਿਕਰੋ. ਇਦਂ-ਸਦ੍ਦੋ ‘‘ਏਕਮਿਦਾਹਂ, ਭਿਕ੍ਖਵੇ, ਸਮਯਂ ਉਕ੍ਕਟ੍ਠਾਯਂ ਵਿਹਰਾਮਿ ਸੁਭਗਵਨੇ ਸਾਲਰਾਜਮੂਲੇ’’ਤਿਆਦੀਸੁ (ਦੀ. ਨਿ. ੨.੯੧; ਮ. ਨਿ. ੧.੫੦੧) ਨਿਪਾਤਮਤ੍ਤਂ, ‘‘ਇਦਂ ਖੋ ਤਂ, ਭਿਕ੍ਖਵੇ, ਅਪ੍ਪਮਤ੍ਤਕਂ ਸੀਲਮਤ੍ਤਕ’’ਨ੍ਤਿਆਦੀਸੁ (ਦੀ. ਨਿ. ੧.੨੭) ਯਥਾਵੁਤ੍ਤੇ ਆਸਨ੍ਨਪਚ੍ਚਕ੍ਖੇ ਆਗਤੋ.
‘‘ਇਦਞ੍ਹਿ ਤਂ ਜੇਤਵਨਂ, ਇਸਿਸਙ੍ਘਨਿਸੇਵਿਤਂ;
ਆਵੁਤ੍ਥਂ ਧਮ੍ਮਰਾਜੇਨ, ਪੀਤਿਸਞ੍ਜਨਨਂ ਮਮਾ’’ਤਿ. (ਮ. ਨਿ. ੩.੩੮੭-੩੮੮; ਸਂ. ਨਿ. ੧.੪੮, ੧੦੧) –
ਆਦੀਸੁ ਵਕ੍ਖਮਾਨੇ ਆਸਨ੍ਨਪਚ੍ਚਕ੍ਖੇ. ਇਧਾਪਿ ਵਕ੍ਖਮਾਨੇਯੇਵ ਆਸਨ੍ਨਪਚ੍ਚਕ੍ਖੇ ਦਟ੍ਠਬ੍ਬੋ.
ਬ੍ਰਹ੍ਮਚਰਿਯ-ਸਦ੍ਦੋ –
‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ,
ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;
ਇਦ੍ਧੀ ਜੁਤੀ ਬਲਵੀਰਿਯੂਪਪਤ੍ਤਿ,
ਇਦਞ੍ਚ ਤੇ ਨਾਗ ਮਹਾਵਿਮਾਨਂ.
‘‘ਅਹਞ੍ਚ ਭਰਿਯਾ ਚ ਮਨੁਸ੍ਸਲੋਕੇ,
ਸਦ੍ਧਾ ਉਭੋ ਦਾਨਪਤੀ ਅਹੁਮ੍ਹਾ;
ਓਪਾਨਭੂਤਂ ਮੇ ਘਰਂ ਤਦਾਸਿ,
ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ.
‘‘ਤਂ ਮੇ ਵਤਂ ਤਂ ਪਨ ਬ੍ਰਹ੍ਮਚਰਿਯਂ,
ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;
ਇਦ੍ਧੀ ਜੁਤੀ ਬਲਵੀਰਿਯੂਪਪਤ੍ਤਿ,
ਇਦਞ੍ਚ ਮੇ ਵੀਰ ਮਹਾਵਿਮਾਨ’’ਨ੍ਤਿ. –
ਇਮਸ੍ਮਿਂ ਪੁਣ੍ਣਕਜਾਤਕੇ (ਜਾ. ੨.੨੨.੧੫੯੫) ਦਾਨੇ ਆਗਤੋ.
‘‘ਕੇਨ ਪਾਣਿ ਕਾਮਦਦੋ, ਕੇਨ ਪਾਣਿ ਮਧੁਸ੍ਸਵੋ;
ਕੇਨ ਤੇ ਬ੍ਰਹ੍ਮਚਰਿਯੇਨ, ਪੁਞ੍ਞਂ ਪਾਣਿਮ੍ਹਿ ਇਜ੍ਝਤੀ’’ਤਿ. –
ਇਮਸ੍ਮਿਂ ਅਙ੍ਕੁਰਪੇਤਵਤ੍ਥੁਸ੍ਮਿਂ (ਪੇ. ਵ. ੨੭੫, ੨੭੭) ਵੇਯ੍ਯਾਵਚ੍ਚੇ.
‘‘ਏਵਂ ਖੋ ਤਂ, ਭਿਕ੍ਖਵੇ, ਤਿਤ੍ਤਿਰਿਯਂ ਨਾਮ ਬ੍ਰਹ੍ਮਚਰਿਯਂ ਅਹੋਸੀ’’ਤਿ ਇਮਸ੍ਮਿਂ ਤਿਤ੍ਤਿਰਜਾਤਕੇ (ਚੂਲ਼ਵ. ੩੧੧) ਪਞ੍ਚਸਿਕ੍ਖਾਪਦਸੀਲੇ.
‘‘ਤਂ ਖੋ ਪਨ ਮੇ, ਪਞ੍ਚਸਿਖ, ਬ੍ਰਹ੍ਮਚਰਿਯਂ ਨੇਵ ਨਿਬ੍ਬਿਦਾਯ ਨ ਵਿਰਾਗਾਯ…ਪੇ… ਯਾਵਦੇਵ ਬ੍ਰਹ੍ਮਲੋਕੂਪਪਤ੍ਤਿਯਾ’’ਤਿ ਇਮਸ੍ਮਿਂ ਮਹਾਗੋਵਿਨ੍ਦਸੁਤ੍ਤੇ (ਦੀ. ਨਿ. ੨.੩੨੯) ਬ੍ਰਹ੍ਮਵਿਹਾਰੇ.
‘‘ਪਰੇ ਅਬ੍ਰਹ੍ਮਚਾਰੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਬ੍ਰਹ੍ਮਚਾਰੀ ਭਵਿਸ੍ਸਾਮਾ’’ਤਿ ਇਮਸ੍ਮਿਂ ਸਲ੍ਲੇਖਸੁਤ੍ਤੇ (ਮ. ਨਿ. ੧.੮੩) ਮੇਥੁਨਵਿਰਤਿਯਂ.
‘‘ਮਯਞ੍ਚ ਭਰਿਯਾ ਨਾਤਿਕ੍ਕਮਾਮ,
ਅਮ੍ਹੇ ਚ ਭਰਿਯਾ ਨਾਤਿਕ੍ਕਮਨ੍ਤਿ;
ਅਞ੍ਞਤ੍ਰ ਤਾਹਿ ਬ੍ਰਹ੍ਮਚਰਿਯਂ ਚਰਾਮ,
ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮੀਯਰੇ’’ਤਿ. –
ਇਮਸ੍ਮਿਂ ਮਹਾਧਮ੍ਮਪਾਲਜਾਤਕੇ (ਜਾ. ੧.੧੦.੯੭) ਸਦਾਰਸਨ੍ਤੋਸੇ.
‘‘ਅਭਿਜਾਨਾਮਿ ਖੋ ਪਨਾਹਂ, ਸਾਰਿਪੁਤ੍ਤ, ਚਤੁਰਙ੍ਗਸਮਨ੍ਨਾਗਤਂ ਬ੍ਰਹ੍ਮਚਰਿਯਂ ਚਰਿਤਾ, ਤਪਸ੍ਸੀ ਸੁਦਂ ਹੋਮੀ’’ਤਿ ਲੋਮਹਂਸਸੁਤ੍ਤੇ (ਮ. ਨਿ. ੧.੧੫੫) ਵੀਰਿਯੇ.
‘‘ਹੀਨੇਨ ਬ੍ਰਹ੍ਮਚਰਿਯੇਨ, ਖਤ੍ਤਿਯੇ ਉਪਪਜ੍ਜਤਿ;
ਮਜ੍ਝਿਮੇਨ ਚ ਦੇਵਤ੍ਤਂ, ਉਤ੍ਤਮੇਨ ਵਿਸੁਜ੍ਝਤੀ’’ਤਿ. –
ਨਿਮਿਜਾਤਕੇ (ਜਾ. ੨.੨੨.੪੨੯) ਅਤ੍ਤਦਮਨਵਸੇਨ ਕਤੇ ਅਟ੍ਠਙ੍ਗਿਕੇ ਉਪੋਸਥੇ.
‘‘ਇਦਂ ਖੋ ਪਨ ਮੇ, ਪਞ੍ਚਸਿਖ, ਬ੍ਰਹ੍ਮਚਰਿਯਂ ਏਕਨ੍ਤਨਿਬ੍ਬਿਦਾਯ ਵਿਰਾਗਾਯ…ਪੇ… ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ’’ਤਿ ਮਹਾਗੋਵਿਨ੍ਦਸੁਤ੍ਤੇਯੇਵ (ਦੀ. ਨਿ. ੨.੩੨੯) ਅਰਿਯਮਗ੍ਗੇ.
‘‘ਤਯਿਦਂ ਬ੍ਰਹ੍ਮਚਰਿਯਂ ਇਦ੍ਧਞ੍ਚੇਵ ਫੀਤਞ੍ਚ ਵਿਤ੍ਥਾਰਿਕਂ ਬਾਹੁਜਞ੍ਞਂ ਪੁਥੁਭੂਤਂ ਯਾਵ ਦੇਵਮਨੁਸ੍ਸੇਹਿ ਸੁਪ੍ਪਕਾਸਿਤ’’ਨ੍ਤਿ ਪਾਸਾਦਿਕਸੁਤ੍ਤੇ (ਦੀ. ਨਿ. ੩.੧੭੪) ਸਿਕ੍ਖਤ੍ਤਯਸਙ੍ਗਹਿਤੇ ਸਕਲਸ੍ਮਿਂ ਸਾਸਨੇ. ਇਧਾਪਿ ਅਰਿਯਮਗ੍ਗੇ ਸਾਸਨੇ ਚ ਵਤ੍ਤਤਿ.
ਵੁਸ੍ਸਤੀਤਿ ਵੁਸੀਯਤਿ, ਚਰੀਯਤੀਤਿ ਅਤ੍ਥੋ. ਜਨਕੁਹਨਤ੍ਥਨ੍ਤਿ ‘‘ਅਹੋ ਅਯ੍ਯੋ ਸੀਲਵਾ ਵਤ੍ਤਸਮ੍ਪਨ੍ਨੋ ਅਪ੍ਪਿਚ੍ਛੋ ਸਨ੍ਤੁਟ੍ਠੋ ਮਹਿਦ੍ਧਿਕੋ ਮਹਾਨੁਭਾਵੋ’’ਤਿਆਦਿਨਾ ਜਨਸ੍ਸ ਸਤ੍ਤਲੋਕਸ੍ਸ ਵਿਮ੍ਹਾਪਨਤ੍ਥਂ. ਕੇਚਿ ਪਨ ‘‘ਕੁਹਨਤ੍ਥਨ੍ਤਿ ਪਾਪਿਚ੍ਛਸ੍ਸ ਇਚ੍ਛਾਪਕਤਸ੍ਸ ਸਤੋ ਸਾਮਨ੍ਤਜਪ੍ਪਨਇਰਿਯਾਪਥਨਿਸ੍ਸਿਤਪਚ੍ਚਯਪਟਿਸੇਵਨਸਙ੍ਖਾਤੇਨ ਤਿਵਿਧੇਨ ਕੁਹਨਵਤ੍ਥੁਨਾ ਕੁਹਕਭਾਵੇਨ ਜਨਸ੍ਸ ਵਿਮ੍ਹਾਪਨਤ੍ਥ’’ਨ੍ਤਿ ਵਦਨ੍ਤਿ. ਇਧਾਪਿ ਅਯਮੇਵਤ੍ਥੋ ਦਸ੍ਸਿਤੋ. ਤੇਨੇਵਾਹ ‘‘ਤੀਹਿ ਕੁਹਨਵਤ੍ਥੂਹਿ ਜਨਸ੍ਸ ਕੁਹਨਤ੍ਥਾਯਾ’’ਤਿ, ਜਨਸ੍ਸ ਵਿਮ੍ਹਾਪਨਤ੍ਥਾਯਾਤਿ ਅਤ੍ਥੋ. ਜਨਲਾਪਨਤ੍ਥਨ੍ਤਿ ‘‘ਏਵਰੂਪਸ੍ਸ ਨਾਮ ਅਯ੍ਯਸ੍ਸ ਦਿਨ੍ਨਂ ਮਹਪ੍ਫਲਂ ਭਵਿਸ੍ਸਤੀ’’ਤਿ ਪਸਨ੍ਨਚਿਤ੍ਤੇਹਿ ‘‘ਕੇਨਤ੍ਥੋ, ਕਿਂ ਆਹਰੀਯਤੂ’’ਤਿ ਵਦਾਪਨਤ੍ਥਂ. ‘‘ਜਨਲਪਨਤ੍ਥ’’ਨ੍ਤਿਪਿ ਪਠਨ੍ਤਿ, ਤਸ੍ਸ ਪਾਪਿਚ੍ਛਸ੍ਸ ਸਤੋ ਪਚ੍ਚਯਤ੍ਥਂ ਪਰਿਕਥੋਭਾਸਾਦਿਵਸੇਨ ਲਪਨਭਾਵੇਨ ਉਪਲਾਪਕਭਾਵੇਨ ਜਨਸ੍ਸ ਲਪਨਤ੍ਥਨ੍ਤਿ ਅਤ੍ਥੋ. ਤੇਨੇਵਾਹ ‘‘ਨ ਜਨਲਪਨਤ੍ਥਨ੍ਤਿ ਨ ਜਨਸ੍ਸ ਉਪਲਾਪਨਤ੍ਥ’’ਨ੍ਤਿ.
ਨ ਇਤਿਵਾਦਪ੍ਪਮੋਕ੍ਖਾਨਿਸਂਸਤ੍ਥਨ੍ਤਿ ਏਤ੍ਥ ‘‘ਨ ਲਾਭਸਕ੍ਕਾਰਸਿਲੋਕਾਨਿਸਂਸਤ੍ਥ’’ਨ੍ਤਿਪਿ ਪਠਨ੍ਤਿ. ਤਤ੍ਥ ਯ੍ਵਾਯਂ ‘‘ਆਕਙ੍ਖੇਯ੍ਯ ਚੇ, ਭਿਕ੍ਖਵੇ, ਭਿਕ੍ਖੁ ‘ਲਾਭੀ ਅਸ੍ਸਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’ਨ੍ਤਿ, ਸੀਲੇਸ੍ਵੇਵਸ੍ਸ ਪਰਿਪੂਰਕਾਰੀ’’ਤਿ (ਮ. ਨਿ. ੧.੬੫) ਸੀਲਾਨਿਸਂਸਭਾਵੇਨ ਵੁਤ੍ਤੋ ਚਤੁਪਚ੍ਚਯਲਾਭੋ ਚ. ਚਤੁਨ੍ਨਂ ਪਚ੍ਚਯਾਨਂ ਸਕ੍ਕਚ੍ਚਦਾਨਸਙ੍ਖਾਤੋ ਆਦਰਬਹੁਮਾਨਗਰੁਕਰਣਸਙ੍ਖਾਤੋ ਚ ਸਕ੍ਕਾਰੋ, ਯੋ ਚ ‘‘ਸੀਲਸਮ੍ਪਨ੍ਨੋ ਬਹੁਸ੍ਸੁਤੋ ਸੁਤਧਰੋ ਆਰਦ੍ਧਵੀਰਿਯੋ’’ਤਿਆਦਿਨਾ ਨਯੇਨ ਉਗ੍ਗਚ੍ਛਨਕਥੁਤਿਘੋਸਸਙ੍ਖਾਤੋ ਸਿਲੋਕੋ ਬ੍ਰਹ੍ਮਚਰਿਯਂ ਵਸਨ੍ਤਾਨਂ ਦਿਟ੍ਠਧਮ੍ਮਿਕੋ ਆਨਿਸਂਸੋ, ਤਦਤ੍ਥਨ੍ਤਿ ਅਤ੍ਥੋ. ਕੇਚਿ ਪਨ ‘‘ਲਾਭਸਕ੍ਕਾਰਸਿਲੋਕਾਨਿਸਂਸਤ੍ਥਨ੍ਤਿ ਪਾਪਿਚ੍ਛਸ੍ਸੇਵ ਸਤੋ ਲਾਭਾਦਿਗਰੁਤਾਯ ਲਾਭਸਕ੍ਕਾਰਸਿਲੋਕਸਙ੍ਖਾਤਸ੍ਸ ਆਨਿਸਂਸਸ੍ਸ ਉਦਯਸ੍ਸ ਨਿਪ੍ਫਾਦਨਤ੍ਥ’’ਨ੍ਤਿ ਏਵਮਤ੍ਥਂ ਵਦਨ੍ਤਿ.
ਨ ਇਤਿ ਮਂ ਜਨੋ ਜਾਨਾਤੂਤਿ ਏਵਂ ਬ੍ਰਹ੍ਮਚਰਿਯਵਾਸੇ ਸਤਿ ‘‘ਸੀਲਵਾ ਕਲ੍ਯਾਣਧਮ੍ਮੋ’’ਤਿਆਦਿਨਾ ਮਂ ਲੋਕੋ ਜਾਨਾਤੁ ਸਮ੍ਭਾਵੇਤੂਤਿ ਅਤ੍ਤਨੋ ਸਨ੍ਤਗੁਣਵਸੇਨ ਸਮ੍ਭਾਵਨਤ੍ਥਮ੍ਪਿ ਨ ਇਦਂ ਬ੍ਰਹ੍ਮਚਰਿਯਂ ਵੁਸ੍ਸਤੀਤਿ ਸਮ੍ਬਨ੍ਧੋ. ਕੇਚਿ ਪਨ ‘‘ਪਾਪਿਚ੍ਛਸ੍ਸ ਸਤੋ ਅਸਨ੍ਤਗੁਣਸਮ੍ਭਾਵਨਾਧਿਪ੍ਪਾਯੇਨ ‘ਇਤਿ ਏਵਂਗੁਣੋਤਿ ਮਂ ਲੋਕੋ ਜਾਨਾਤੂ’ਤਿ ਨ ਇਦਂ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ ਏਵਮੇਤ੍ਥ ਅਤ੍ਥਂ ਵਦਨ੍ਤਿ. ਸਬ੍ਬਤ੍ਥਾਪਿ ਪਨੇਤ੍ਥ ਪੁਰਿਮੋ ਪੁਰਿਮੋਯੇਵ ਅਤ੍ਥਵਿਕਪ੍ਪੋ ਸੁਨ੍ਦਰਤਰੋ.
ਅਥ ਖੋਤਿ ਏਤ੍ਥ ਅਥਾਤਿ ਅਞ੍ਞਤ੍ਥੇ ਨਿਪਾਤੋ, ਖੋਤਿ ਅਵਧਾਰਣੇ. ਤੇਨ ਕੁਹਨਾਦਿਤੋ ਅਞ੍ਞਦਤ੍ਥਂਯੇਵ ਇਦਂ, ਭਿਕ੍ਖਵੇ, ਬ੍ਰਹ੍ਮਚਰਿਯਂ ਵੁਸ੍ਸਤੀਤਿ ਦਸ੍ਸੇਤਿ. ਇਦਾਨਿ ਤਂ ਪਯੋਜਨਂ ਦਸ੍ਸੇਨ੍ਤੋ ‘‘ਸਂਵਰਤ੍ਥਂ ਪਹਾਨਤ੍ਥ’’ਨ੍ਤਿ ਆਹ. ਤਤ੍ਥ ਪਞ੍ਚਵਿਧੋ ਸਂਵਰੋ – ਪਾਤਿਮੋਕ੍ਖਸਂਵਰੋ, ਸਤਿਸਂਵਰੋ, ਞਾਣਸਂਵਰੋ, ਖਨ੍ਤਿਸਂਵਰੋ, ਵੀਰਿਯਸਂਵਰੋਤਿ. ‘‘ਇਤਿ ਇਮਿਨਾ ਪਾਤਿਮੋਕ੍ਖਸਂਵਰੇਨ ਉਪੇਤੋ ਹੋਤਿ ਸਮੁਪੇਤੋ’’ਤਿਆਦਿਨਾ (ਵਿਭ. ੫੧੧) ਨਯੇਨ ਆਗਤੋ ਅਯਂ ਪਾਤਿਮੋਕ੍ਖਸਂਵਰੋ, ਸੀਲਸਂਵਰੋਤਿਪਿ ਵੁਚ੍ਚਤਿ. ‘‘ਰਕ੍ਖਤਿ ਚਕ੍ਖੁਨ੍ਦ੍ਰਿਯਂ, ਚਕ੍ਖੁਨ੍ਦ੍ਰਿਯੇ ਸਂਵਰਂ ਆਪਜ੍ਜਤੀ’’ਤਿ (ਮ. ਨਿ. ੧.੨੯੫; ਸਂ. ਨਿ. ੪.੨੩੯; ਅ. ਨਿ. ੩.੧੬) ਆਗਤੋ ਅਯਂ ਸਤਿਸਂਵਰੋ.
‘‘ਯਾਨਿ ਸੋਤਾਨਿ ਲੋਕਸ੍ਮਿਂ, ਸਤਿ ਤੇਸਂ ਨਿਵਾਰਣਂ;
ਸੋਤਾਨਂ ਸਂਵਰਂ ਬ੍ਰੂਮਿ, ਪਞ੍ਞਾਯੇਤੇ ਪਿਧੀਯਰੇ’’ਤਿ. (ਸੁ. ਨਿ. ੧੦੪੧; ਚੂਲ਼ਨਿ. ਅਜਿਤਮਾਣਵਪੁਚ੍ਛਾਨਿਦ੍ਦੇਸੋ ੪; ਨੇਤ੍ਤਿ. ੪.੧੧, ੪੫) –
ਆਗਤੋ ਅਯਂ ਞਾਣਸਂਵਰੋ. ‘‘ਖਮੋ ਹੋਤਿ ਸੀਤਸ੍ਸ ਉਣ੍ਹਸ੍ਸਾ’’ਤਿਆਦਿਨਾ (ਮ. ਨਿ. ੧.੨੪; ਅ. ਨਿ. ੪.੧੧੪; ੬.੫੮) ਨਯੇਨ ਆਗਤੋ ਅਯਂ ਖਨ੍ਤਿਸਂਵਰੋ.
‘‘ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤੀ’’ਤਿਆਦਿਨਾ (ਮ. ਨਿ. ੧.੨੬; ਅ. ਨਿ. ੪.੧੧੪; ੬.੫੮) ਨਯੇਨ ਆਗਤੋ ਅਯਂ ਵੀਰਿਯਸਂਵਰੋ.
ਅਤ੍ਥਤੋ ਪਨ ਪਾਣਾਤਿਪਾਤਾਦੀਨਂ ਪਜਹਨਵਸੇਨ ਵਤ੍ਤਪ੍ਪਟਿਵਤ੍ਤਾਨਂ ਪੂਰਣਵਸੇਨ ਚ ਪਵਤ੍ਤਾ ਚੇਤਨਾ ਚੇਵ ਵਿਰਤਿ ਚ. ਸਙ੍ਖੇਪਤੋ ਸਬ੍ਬੋ ਕਾਯਵਚੀਸਂਯਮੋ, ਵਿਤ੍ਥਾਰਤੋ ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਅਵੀਤਿਕ੍ਕਮੋ ਸੀਲਸਂਵਰੋ. ਸਤਿ ਏਵ ਸਤਿਸਂਵਰੋ, ਸਤਿਪ੍ਪਧਾਨਾ ਵਾ ਕੁਸਲਾ ਖਨ੍ਧਾ. ਞਾਣਮੇਵ ਞਾਣਸਂਵਰੋ. ਅਧਿਵਾਸਨਵਸੇਨ ਅਦੋਸੋ, ਅਦੋਸਪ੍ਪਧਾਨਾ ਵਾ ਤਥਾਪਵਤ੍ਤਾ ਕੁਸਲਾ ਖਨ੍ਧਾ ਖਨ੍ਤਿਸਂਵਰੋ, ਪਞ੍ਞਾਤਿ ਏਕੇ. ਕਾਮਵਿਤਕ੍ਕਾਦੀਨਂ ਅਭਿਭਵਨਵਸੇਨ ਪਵਤ੍ਤਂ ਵੀਰਿਯਮੇਵ ਵੀਰਿਯਸਂਵਰੋ. ਤੇਸੁ ਪਠਮੋ ਕਾਯਦੁਚ੍ਚਰਿਤਾਦੀਸੁ ਦੁਸ੍ਸੀਲਸ੍ਸ ਸਂਵਰਣਤੋ ਸਂਵਰੋ, ਦੁਤਿਯੋ ਮੁਟ੍ਠਸ੍ਸਚ੍ਚਸ੍ਸ, ਤਤਿਯੋ ਅਞ੍ਞਾਣਸ੍ਸ, ਚਤੁਤ੍ਥੋ ਅਕ੍ਖਨ੍ਤਿਯਾ, ਪਞ੍ਚਮੋ ਕੋਸਜ੍ਜਸ੍ਸ ਸਂਵਰਣਤੋ ਪਿਦਹਨਤੋ ਸਂਵਰੋਤਿ ਵੇਦਿਤਬ੍ਬੋ. ਏਵਮੇਤਸ੍ਸ ਸਂਵਰਸ੍ਸ ਅਤ੍ਥਾਯ ਸਂਵਰਤ੍ਥਂ ਸਂਵਰਨਿਪ੍ਫਾਦਨਤ੍ਥਨ੍ਤਿ ਅਤ੍ਥੋ.
ਤੀਹਿ ਪਹਾਨੇਹੀਤਿ ਤਦਙ੍ਗਵਿਕ੍ਖਮ੍ਭਨਸਮੁਚ੍ਛੇਦਸਙ੍ਖਾਤੇਹਿ ਤੀਹਿ ਪਹਾਨੇਹਿ. ਪਞ੍ਚਵਿਧਪ੍ਪਹਾਨਮ੍ਪਿ ਇਧ ਵਤ੍ਤੁਂ ਵਟ੍ਟਤਿਯੇਵ. ਪਞ੍ਚਵਿਧਞ੍ਹਿ ਪਹਾਨਂ ਤਦਙ੍ਗਵਿਕ੍ਖਮ੍ਭਨਸਮੁਚ੍ਛੇਦਪ੍ਪਟਿਪ੍ਪਸ੍ਸਦ੍ਧਿਨਿਸ੍ਸਰਣਵਸੇਨ. ਤਤ੍ਥ ਯਂ ਦੀਪਾਲੋਕੇਨੇਵ ਤਮਸ੍ਸ ਪਟਿਪਕ੍ਖਭਾਵਤੋ ਅਲੋਭਾਦੀਹਿ ਲੋਭਾਦਿਕਸ੍ਸ ਨਾਮਰੂਪਪਰਿਚ੍ਛੇਦਾਦਿਵਿਪਸ੍ਸਨਾਞਾਣੇਹਿ ਤਸ੍ਸ ਤਸ੍ਸ ਅਨਤ੍ਥਸ੍ਸ ਪਹਾਨਂ, ਸੇਯ੍ਯਥਿਦਂ – ਪਰਿਚ੍ਚਾਗੇਨ ਲੋਭਾਦਿਮਲਸ੍ਸ, ਸੀਲੇਨ ਪਾਣਾਤਿਪਾਤਾਦਿਦੁਸ੍ਸੀਲ੍ਯਸ੍ਸ, ਸਦ੍ਧਾਦੀਹਿ ਅਸ੍ਸਦ੍ਧਿਯਾਦਿਕਸ੍ਸ, ਨਾਮਰੂਪਵਵਤ੍ਥਾਨੇਨ ਸਕ੍ਕਾਯਦਿਟ੍ਠਿਯਾ, ਪਚ੍ਚਯਪਰਿਗ੍ਗਹੇਨ ਅਹੇਤੁਵਿਸਮਹੇਤੁਦਿਟ੍ਠੀਨਂ, ਤਸ੍ਸੇਵ ਅਪਰਭਾਗੇਨ ਕਙ੍ਖਾਵਿਤਰਣੇਨ ਕਥਂਕਥੀਭਾਵਸ੍ਸ, ਕਲਾਪਸਮ੍ਮਸਨੇਨ ਅਹਂਮਮਾਤਿ ਗਾਹਸ੍ਸ, ਮਗ੍ਗਾਮਗ੍ਗਵਵਤ੍ਥਾਨੇਨ ਅਮਗ੍ਗੇ ਮਗ੍ਗਸਞ੍ਞਾਯ, ਉਦਯਦਸ੍ਸਨੇਨ ਉਚ੍ਛੇਦਦਿਟ੍ਠਿਯਾ, ਵਯਦਸ੍ਸਨੇਨ ਸਸ੍ਸਤਦਿਟ੍ਠਿਯਾ, ਭਯਦਸ੍ਸਨੇਨ ਸਭਯੇ ਅਭਯਸਞ੍ਞਾਯ, ਆਦੀਨਵਦਸ੍ਸਨੇਨ ਅਸ੍ਸਾਦਸਞ੍ਞਾਯ, ਨਿਬ੍ਬਿਦਾਨੁਪਸ੍ਸਨੇਨ ਅਭਿਰਤਿਸਞ੍ਞਾਯ, ਮੁਚ੍ਚਿਤੁਕਮ੍ਯਤਾਞਾਣੇਨ ਅਮੁਚ੍ਚਿਤੁਕਮ੍ਯਤਾਯ, ਉਪੇਕ੍ਖਾਞਾਣੇਨ ਅਨੁਪੇਕ੍ਖਾਯ, ਅਨੁਲੋਮੇਨ ਧਮ੍ਮਟ੍ਠਿਤਿਯਂ ਨਿਬ੍ਬਾਨੇ ਚ ਪਟਿਲੋਮਭਾਵਸ੍ਸ, ਗੋਤ੍ਰਭੁਨਾ ਸਙ੍ਖਾਰਨਿਮਿਤ੍ਤਗ੍ਗਾਹਸ੍ਸ ਪਹਾਨਂ, ਏਤਂ ਤਦਙ੍ਗਪ੍ਪਹਾਨਂ ਨਾਮ.
ਯਂ ਪਨ ਉਪਚਾਰਪ੍ਪਨਾਭੇਦੇਨ ਸਮਾਧਿਨਾ ਪਵਤ੍ਤਿਭਾਵਨਿਵਾਰਣਤੋ ਘਟਪ੍ਪਹਾਰੇਨੇਵ ਉਦਕਪਿਟ੍ਠੇ ਸੇਵਾਲਸ੍ਸ, ਤੇਸਂ ਤੇਸਂ ਨੀਵਰਣਾਦਿਧਮ੍ਮਾਨਂ ਪਹਾਨਂ, ਏਤਂ ਵਿਕ੍ਖਮ੍ਭਨਪ੍ਪਹਾਨਂ ਨਾਮ. ਯਂ ਚਤੁਨ੍ਨਂ ਅਰਿਯਮਗ੍ਗਾਨਂ ਭਾਵਿਤਤ੍ਤਾ ਤਂਤਂਮਗ੍ਗਵਤੋ ਅਤ੍ਤਨੋ ਸਨ੍ਤਾਨੇ ‘‘ਦਿਟ੍ਠਿਗਤਾਨਂ ਪਹਾਨਾਯਾ’’ਤਿਆਦਿਨਾ (ਧ. ਸ. ੨੭੭; ਵਿਭ. ੬੨੮) ਨਯੇਨ ਵੁਤ੍ਤਸ੍ਸ ਸਮੁਦਯਪਕ੍ਖਿਯਸ੍ਸ ਕਿਲੇਸਗਹਣਸ੍ਸ ਅਚ੍ਚਨ੍ਤਂ ਅਪ੍ਪਵਤ੍ਤਿਭਾਵੇਨ ਸਮੁਚ੍ਛਿਨ੍ਦਨਂ, ਏਤਂ ਸਮੁਚ੍ਛੇਦਪ੍ਪਹਾਨਂ ਨਾਮ. ਯਂ ਪਨ ਫਲਕ੍ਖਣੇ ਪਟਿਪ੍ਪਸ੍ਸਦ੍ਧਤ੍ਥਂ ਕਿਲੇਸਾਨਂ, ਏਤਂ ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ ਨਾਮ. ਯਂ ਸਬ੍ਬਸਙ੍ਖਤਨਿਸ੍ਸਟਤ੍ਤਾ ਪਹੀਨਸਬ੍ਬਸਙ੍ਖਤਂ ਨਿਬ੍ਬਾਨਂ, ਏਤਂ ਨਿਸ੍ਸਰਣਪ੍ਪਹਾਨਂ ਨਾਮ. ਤਸ੍ਸ ਪਞ੍ਚਵਿਧਸ੍ਸਪਿ ਤਥਾ ਤਥਾ ਰਾਗਾਦਿਕਿਲੇਸਾਨਂ ਪਟਿਨਿਸ੍ਸਜ੍ਜਨਟ੍ਠੇਨ ਸਮਤਿਕ੍ਕਮਨਟ੍ਠੇਨ ਵਾ ਪਹਾਨਸ੍ਸ ਅਤ੍ਥਾਯ, ਪਹਾਨਸਾਧਨਤ੍ਥਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.
ਤਤ੍ਥ ਸਂਵਰੇਨ ਕਿਲੇਸਾਨਂ ਚਿਤ੍ਤਸਨ੍ਤਾਨੇ ਪਵੇਸਨਿਵਾਰਣਂ ਪਹਾਨੇਨ ਚ ਪਵੇਸਨਿਵਾਰਣਮੇਵ ਸਮੁਗ੍ਘਾਤੋ ਚਾਤਿ ਵਦਨ੍ਤਿ. ਉਭਯੇਨਪਿ ਪਨ ਯਥਾਰਹਂ ਉਭਯਂ ਸਮ੍ਪਜ੍ਜਤੀਤਿ ਦਟ੍ਠਬ੍ਬਂ. ਸੀਲਾਦਿਧਮ੍ਮਾ ਏਵ ਹਿ ਸਂਵਰਣਤੋ ਸਂਵਰਂ, ਪਜਹਨਤੋ ਪਹਾਨਨ੍ਤਿ.
ਅਨੀਤਿਹਨ੍ਤਿ ਈਤਿਯੋ ਵੁਚ੍ਚਨ੍ਤਿ ਉਪਦ੍ਦਵਾ ਦਿਟ੍ਠਧਮ੍ਮਿਕਾ ਸਮ੍ਪਰਾਯਿਕਾ ਚ. ਈਤਿਯੋ ਹਨ੍ਤੀਤਿ ਈਤਿਹਂ, ਅਨੁ ਈਤਿਹਨ੍ਤਿ ਅਨੀਤਿਹਂ, ਸਾਸਨਬ੍ਰਹ੍ਮਚਰਿਯਂ ਮਗ੍ਗਬ੍ਰਹ੍ਮਚਰਿਯਞ੍ਚ. ਅਥ ਵਾ ਈਤੀਹਿ ਅਨਤ੍ਥੇਹਿ ਸਦ੍ਧਿਂ ਹਨਨ੍ਤਿ ਗਚ੍ਛਨ੍ਤਿ ਪਵਤ੍ਤਨ੍ਤੀਤਿ ਈਤਿਹਾ, ਤਣ੍ਹਾਦਿਉਪਕ੍ਕਿਲੇਸਾ. ਨਤ੍ਥਿ ਏਤ੍ਥ ਈਤਿਹਾਤਿ ਅਨੀਤਿਹਂ. ਈਤਿਹਾ ਵਾ ਯਥਾਵੁਤ੍ਤੇਨਤ੍ਥੇਨ ਤਿਤ੍ਥਿਯਸਮਯਾ, ਤਪ੍ਪਟਿਪਕ੍ਖਤੋ ਇਦਂ ਅਨੀਤਿਹਂ. ‘‘ਅਨਿਤਿਹ’’ਨ੍ਤਿਪਿ ਪਾਠੋ. ਤਸ੍ਸਤ੍ਥੋ – ‘‘ਇਤਿਹਾਯ’’ਨ੍ਤਿ ਧਮ੍ਮੇਸੁ ਅਨੇਕਂਸਗ੍ਗਾਹਭਾਵਤੋ ਵਿਚਿਕਿਚ੍ਛਾ ਇਤਿਹਂ ਨਾਮ, ਸਮ੍ਮਾਸਮ੍ਬੁਦ੍ਧਪ੍ਪਵੇਦਿਤਤ੍ਤਾ ਯਥਾਨੁਸਿਟ੍ਠਂ ਪਟਿਪਜ੍ਜਨ੍ਤਾਨਂ ਨਿਕ੍ਕਙ੍ਖਭਾਵਸਾਧਨਤੋ ਚ ਨਤ੍ਥਿ ਏਤ੍ਥ ਇਤਿਹਨ੍ਤਿ ਅਨਿਤਿਹਂ, ਅਪਰਪਤ੍ਤਿਯਨ੍ਤਿ ਅਤ੍ਥੋ. ਵੁਤ੍ਤਞ੍ਹੇਤਂ ‘‘ਪਚ੍ਚਤ੍ਤਂ ਵੇਦਿਤਬ੍ਬੋ ਵਿਞ੍ਞੂਹੀ’’ਤਿ, ‘‘ਅਤਕ੍ਕਾਵਚਰੋ’’ਤਿ (ਦੀ. ਨਿ. ੨.੬੭; ਮ. ਨਿ. ੧.੨੮੧; ੨.੩੩੭; ਸਂ. ਨਿ. ੧.੧੭੨; ਮਹਾਵ. ੭-੮) ਚ. ਗਾਥਾਬਨ੍ਧਸੁਖਤ੍ਥਂ ਪਨ ‘‘ਅਨੀਤਿਹ’’ਨ੍ਤਿ ਦੀਘਂ ਕਤ੍ਵਾ ਪਠਨ੍ਤਿ. ਪਚ੍ਛਿਮਂ ਪਨੇਤ੍ਥ ਅਤ੍ਥਵਿਕਪ੍ਪਂ ਦਸ੍ਸੇਤੁਂ ‘‘ਇਤਿਹਪਰਿਵਜ੍ਜਿਤ’’ਨ੍ਤਿਆਦਿ ਵੁਤ੍ਤਂ.
ਨਿਬ੍ਬਾਨਸਙ੍ਖਾਤਂ ਓਗਧਂ ਪਤਿਟ੍ਠਂ ਪਾਰਂ ਗਚ੍ਛਤੀਤਿ ਨਿਬ੍ਬਾਨੋਗਧਗਾਮੀ, ਵਿਮੁਤ੍ਤਿਰਸਤ੍ਤਾ ਏਕਨ੍ਤੇਨੇਵ ਨਿਬ੍ਬਾਨਸਮ੍ਪਾਪਕੋਤਿ ਅਤ੍ਥੋ, ਤਂ ਨਿਬ੍ਬਾਨੋਗਧਗਾਮਿਨਂ ਬ੍ਰਹ੍ਮਚਰਿਯਂ. ਨਿਬ੍ਬਾਨੋਗਧੋਤਿ ਵਾ ਅਰਿਯਮਗ੍ਗੋ ਵੁਚ੍ਚਤਿ ਤੇਨ ਵਿਨਾ ਨਿਬ੍ਬਾਨਾਵਗਾਹਣਸ੍ਸ ਅਸਮ੍ਭਵਤੋ ਤਸ੍ਸ ਚ ਨਿਬ੍ਬਾਨਂ ਅਨਾਲਮ੍ਬਿਤ੍ਵਾ ਅਪ੍ਪਵਤ੍ਤਨਤੋ, ਤਞ੍ਚੇਤਂ ਏਕਨ੍ਤਸਮ੍ਪਾਦਨੇਨ ਗਚ੍ਛਤੀਤਿ ਨਿਬ੍ਬਾਨੋਗਧਗਾਮੀ. ਅਥ ਵਾ ਨਿਬ੍ਬਾਨੋਗਧਗਾਮਿਨਨ੍ਤਿ ਨਿਬ੍ਬਾਨਸ੍ਸ ਅਨ੍ਤੋਗਾਮਿਨਂ. ਮਗ੍ਗਬ੍ਰਹ੍ਮਚਰਿਯਞ੍ਹਿ ਨਿਬ੍ਬਾਨਂ ਆਰਮ੍ਮਣਂ ਕਰਿਤ੍ਵਾ ਤਸ੍ਸ ਅਨ੍ਤੋ ਏਵ ਪਵਤ੍ਤਤੀਤਿ. ਇਮਮੇਵ ਚ ਅਤ੍ਥਵਿਕਪ੍ਪਂ ਦਸ੍ਸੇਤੁਂ ‘‘ਨਿਬ੍ਬਾਨਸ੍ਸ ਅਨ੍ਤੋਗਾਮਿਨ’’ਨ੍ਤਿਆਦਿ ਵੁਤ੍ਤਂ. ਸੋਤਿ ਯੋ ਸੋ ਸਮਤਿਂਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਕਿਲੇਸੇ ਭਞ੍ਜਿਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ, ਸੋ ਭਗਵਾ ਅਦੇਸਯਿ ਦੇਸੇਸਿ. ਮਹਨ੍ਤੇਹੀਤਿ ਮਹਾਆਤੁਮੇਹਿ ਉਲ਼ਾਰਜ੍ਝਾਸਯੇਹਿ. ਮਹਨ੍ਤਂ ਨਿਬ੍ਬਾਨਂ, ਮਹਨ੍ਤੇ ਵਾ ਸੀਲਕ੍ਖਨ੍ਧਾਦਿਕੇ ਏਸਨ੍ਤਿ ਗਵੇਸਨ੍ਤੀਤਿ ਮਹੇਸਿਨੋ, ਬੁਦ੍ਧਾਦਯੋ ਅਰਿਯਾ. ਤੇਹਿ ਅਨੁਯਾਤੋ ਪਟਿਪਨ੍ਨੋ.
ਯਥਾ ਬੁਦ੍ਧੇਨ ਦੇਸਿਤਨ੍ਤਿ ਯਥਾ ਅਭਿਞ੍ਞੇਯ੍ਯਾਦਿਭਾਵੇਨ ਸਮ੍ਮਾਸਮ੍ਬੁਦ੍ਧੇਨ ਮਯਾ ਦੇਸਿਤਂ, ਏਵਂ ਯੇ ਏਤਂ ਮਗ੍ਗਬ੍ਰਹ੍ਮਚਰਿਯਂ ਤਦਤ੍ਥਂ ਸਾਸਨਬ੍ਰਹ੍ਮਚਰਿਯਞ੍ਚ ਪਟਿਪਜ੍ਜਨ੍ਤਿ. ਤੇ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਯਥਾਰਹਂ ਅਨੁਸਾਸਨ੍ਤਸ੍ਸ ਸਤ੍ਥੁ ਮਯ੍ਹਂ ਸਾਸਨਕਾਰਿਨੋ ਓਵਾਦਪ੍ਪਟਿਕਰਾ ਸਕਲਸ੍ਸ ਵਟ੍ਟਦੁਕ੍ਖਸ੍ਸ ਅਨ੍ਤਂ ਪਰਿਯਨ੍ਤਂ ਅਪ੍ਪਵਤ੍ਤਿਂ ਕਰਿਸ੍ਸਨ੍ਤਿ, ਦੁਕ੍ਖਸ੍ਸ ਵਾ ਅਨ੍ਤਂ ਨਿਬ੍ਬਾਨਂ ਸਚ੍ਛਿਕਰਿਸ੍ਸਨ੍ਤੀਤਿ.
ਬ੍ਰਹ੍ਮਚਰਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਕੁਹਸੁਤ੍ਤਵਣ੍ਣਨਾ
੨੬. ਛਟ੍ਠੇ ਕੁਹਕਾਤਿ ਸਾਮਨ੍ਤਜਪ੍ਪਨਾਦਿਨਾ ਕੁਹਨਵਤ੍ਥੁਨਾ ਕੁਹਕਾ, ਅਸਨ੍ਤਗੁਣਸਮ੍ਭਾਵਨਿਚ੍ਛਾਯ ਕੋਹਞ੍ਞਂ ਕਤ੍ਵਾ ਪਰੇਸਂ ਵਿਦ੍ਧਂਸਕਾਤਿ ਅਤ੍ਥੋ. ਥਦ੍ਧਾਤਿ ‘‘ਕੋਧਨੋ ਹੋਤਿ ਉਪਾਯਾਸਬਹੁਲੋ, ਅਪ੍ਪਮ੍ਪਿ ਵੁਤ੍ਤੋ ਸਮਾਨੋ ਅਭਿਸਜ੍ਜਤਿ ਕੁਪ੍ਪਤਿ ਬ੍ਯਾਪਜ੍ਜਤਿ ਪਤਿਤ੍ਥੀਯਤੀ’’ਤਿ (ਅ. ਨਿ. ੩.੨੫, ੨੭) ਏਵਂ ਵੁਤ੍ਤੇਨ ਕੋਧੇਨ ਚ, ‘‘ਦੁਬ੍ਬਚੋ ਹੋਤਿ ਦੋਵਚਸ੍ਸਕਰਣੇਹਿ ਧਮ੍ਮੇਹਿ ਸਮਨ੍ਨਾਗਤੋ ਅਕ੍ਖਮੋ ਅਪ੍ਪਦਕ੍ਖਿਣਗ੍ਗਾਹੀ ਅਨੁਸਾਸਨਿ’’ਨ੍ਤਿ (ਮ. ਨਿ. ੧.੧੮੧; ਪਾਰਾ. ੪੨੬). ਏਵਂ ਵੁਤ੍ਤੇਨ ਦੋਵਚਸ੍ਸੇਨ ਚ, ‘‘ਜਾਤਿਮਦੋ, ਗੋਤ੍ਤਮਦੋ, ਲਾਭਮਦੋ, ਆਰੋਗ੍ਯਮਦੋ, ਯੋਬ੍ਬਨਮਦੋ, ਜੀਵਿਤਮਦੋ’’ਤਿ (ਵਿਭ. ੮੩੨) ਏਵਂ ਵੁਤ੍ਤਜਾਤਿਮਦਾਦਿਭੇਦੇਨ ਮਾਨੇਨ ਚ ਗਰੁਕਾਤਬ੍ਬੇਸੁ ਗਰੂਸੁਪਿ ਨਿਪਚ੍ਚਕਾਰਂ ਅਕਤ੍ਵਾ ਅਯੋਸਲਾਕਂ ਗਿਲਿਤ੍ਵਾ ਠਿਤਾ ਵਿਯ ਅਨੋਨਤਾ ਹੁਤ੍ਵਾ ਵਿਚਰਣਕਾ. ਤੇਨਾਹ ‘‘ਕੋਧੇਨ ਚਾ’’ਤਿਆਦਿ.
ਉਪਲਾਪਕਾਤਿ ਮਿਚ੍ਛਾਜੀਵਵਸੇਨ ਕੁਲਸਙ੍ਗਣ੍ਹਕਾ. ਲਪਾਤਿ ਪਚ੍ਚਯਤ੍ਥਂ ਪਯੁਤ੍ਤਵਾਚਾਵਸੇਨ ਨਿਪ੍ਪੇਸਿਕਤਾਵਸੇਨ ਲਪਕਾਤਿ ਅਤ੍ਥੋ. ਸਿਙ੍ਗਨ੍ਤਿ ਸਿਙ੍ਗਾਰਂ. ਤਞ੍ਹਿ ਕੁਸਲਸ੍ਸ ਵਿਜ੍ਝਨਤੋ ਸੁਟ੍ਠੁ ਆਸੇਵਿਤਤਾਯ ਸੀਸੇ ਪਰਿਕ੍ਖਿਤ੍ਤਂ ਸੁਨਿਬ੍ਬਤ੍ਤਂ ਵਿਸਾਣਂ ਵਿਯ ਥਿਰਤ੍ਤਾ ਚ ਸਿਙ੍ਗਂ ਵਿਯਾਤਿ ਸਿਙ੍ਗਂ, ਨਾਗਰਿਕਭਾਵਸਙ੍ਖਾਤਸ੍ਸ ਕਿਲੇਸਸਿਙ੍ਗਸ੍ਸੇਤਂ ਨਾਮਂ. ਸਿਙ੍ਗਾਰਭਾਵੋ ਸਿਙ੍ਗਾਰਤਾ, ਸਿਙ੍ਗਾਰਕਰਣਕਆਕਾਰੋ ਵਾ. ਚਾਤੁਰਭਾਵੋ ਚਾਤੁਰਤਾ. ਤਥਾ ਚਾਤੁਰਿਯਂ. ਪਰਿਕ੍ਖਤਭਾਵੋ ਪਰਿਕ੍ਖਤਤਾ, ਪਰਿਖਣਿਤ੍ਵਾ ਠਪਿਤਸ੍ਸੇਵ ਦਲ਼੍ਹਸਿਙ੍ਗਾਰਸ੍ਸੇਤਂ ਨਾਮਂ. ਇਤਰਂ ਤਸ੍ਸੇਵ ਵੇਵਚਨਂ. ਏਵਂ ਸਬ੍ਬੇਹਿ ਵਾਰੇਹਿ ਕਿਲੇਸਸਿਙ੍ਗਾਰਤਾਵ ਕਥਿਤਾ.
ਉਗ੍ਗਤਨਲ਼ਾਤਿ ਨਲ਼ਸਦਿਸਂ ਤੁਚ੍ਛਮਾਨਂ ਉਕ੍ਖਿਪਿਤ੍ਵਾ ਵਿਚਰਣਕਾ. ਤੇਨਾਹ ‘‘ਤੁਚ੍ਛਮਾਨਂ ਉਕ੍ਖਿਪਿਤ੍ਵਾ ਠਿਤਾ’’ਤਿ. ਯਸ੍ਮਾ ਤੇ ਕੁਹਨਾਦਿਯੋਗਤੋ ਨ ਸਮ੍ਮਾਪਟਿਪਨ੍ਨਾ, ਤਸ੍ਮਾ ‘‘ਮਮ ਸਨ੍ਤਕਾ ਨ ਹੋਨ੍ਤੀ’’ਤਿ ਵੁਤ੍ਤਂ. ਅਪਗਤਾਤਿ ਯਦਿਪਿ ਤੇ ਮਮ ਸਾਸਨੇ ਪਬ੍ਬਜਿਤਾ, ਯਥਾਨੁਸਿਟ੍ਠਂ ਪਨ ਅਪ੍ਪਟਿਪਜ੍ਜਨਤੋ ਅਪਗਤਾ ਏਵ ਇਮਸ੍ਮਾ ਧਮ੍ਮਵਿਨਯਾ, ਇਤੋ ਤੇ ਸੁਵਿਦੂਰੇ ਠਿਤਾਤਿ ਦਸ੍ਸੇਤਿ. ਵੁਤ੍ਤਞ੍ਹੇਤਂ –
‘‘ਨਭਞ੍ਚ ਦੂਰੇ ਪਥਵੀ ਚ ਦੂਰੇ,
ਪਾਰਂ ਸਮੁਦ੍ਦਸ੍ਸ ਤਦਾਹੁ ਦੂਰੇ;
ਤਤੋ ਹਵੇ ਦੂਰਤਰਂ ਵਦਨ੍ਤਿ,
ਸਤਞ੍ਚ ਧਮ੍ਮੋ ਅਸਤਞ੍ਚ ਰਾਜਾ’’ਤਿ. (ਜਾ. ੨.੨੧.੪੧੪);
ਸਬ੍ਬਤ੍ਥ ਪਤ੍ਥਟਤਾਯ ਵੇਪੁਲ੍ਲਂ ਪਾਪੁਣਨ੍ਤੀਤਿ ਸਬ੍ਬਤ੍ਥ ਪਤ੍ਥਟਭਾਵੇਨ ਸੀਲਾਦਿਧਮ੍ਮਕ੍ਖਨ੍ਧਪਾਰਿਪੂਰਿਯਾ ਵੇਪੁਲ੍ਲਂ ਪਾਪੁਣਨ੍ਤਿ.
ਕੁਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਸਨ੍ਤੁਟ੍ਠਿਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਨਿਦ੍ਦੋਸਾਨੀਤਿ ਅਵਜ੍ਜਰਹਿਤਾਨਿ ਆਗਮਨਸੁਦ੍ਧਿਤੋ ਕਾਯਮਣ੍ਡਨਾਦਿਕਿਲੇਸਵਤ੍ਥੁਭਾਵਾਭਾਵਤੋ ਚ. ਤਤ੍ਥ ਸੁਲਭਤਾਯ ਪਰਿਯੇਸਨਦੁਕ੍ਖਸ੍ਸ ਅਭਾਵੋ ਦਸ੍ਸਿਤੋ, ਅਪ੍ਪਤਾਯ ਪਰਿਹਰਣਦੁਕ੍ਖਸ੍ਸਪਿ ਅਭਾਵੋ ਦਸ੍ਸਿਤੋ, ਅਨਵਜ੍ਜਤਾਯ ਅਗਰਹਿਤਬ੍ਬਤਾਯ ਭਿਕ੍ਖੁਸਾਰੁਪ੍ਪਭਾਵੋ ਦਸ੍ਸਿਤੋ ਹੋਤਿ. ਅਪ੍ਪਤਾਯ ਵਾ ਪਰਿਤ੍ਤਾਸਸ੍ਸ ਅਵਤ੍ਥੁਤਾ, ਸੁਲਭਤਾਯ ਗੇਧਾਦੀਨਂ ਅਵਤ੍ਥੁਤਾ, ਅਨਵਜ੍ਜਤਾਯ ਆਦੀਨਵਦਸ੍ਸਨਨਿਸ੍ਸਰਣਪਞ੍ਞਾਨਂ ਅਤ੍ਥਿਤਾ ਦਸ੍ਸਿਤਾ ਹੋਤਿ. ਅਪ੍ਪਤਾਯ ਵਾ ਲਾਭੇਨ ਨ ਸੋਮਨਸ੍ਸਂ ਜਨਯਨ੍ਤਿ, ਅਲਾਭੇਨ ਨ ਦੋਮਨਸ੍ਸਂ ਜਨਯਨ੍ਤਿ, ਅਨਵਜ੍ਜਤਾਯ ਵਿਪ੍ਪਟਿਸਾਰਨਿਮਿਤ੍ਤਂ ਅਞ੍ਞਾਣੁਪੇਕ੍ਖਂ ਨ ਜਨਯਨ੍ਤਿ ਅਵਿਪ੍ਪਟਿਸਾਰਵਤ੍ਥੁਭਾਵਤੋ.
ਪਂਸੁਕੂਲਨ੍ਤਿ ਸਙ੍ਕਾਰਕੂਟਾਦੀਸੁ ਯਤ੍ਥ ਕਤ੍ਥਚਿ ਪਂਸੂਨਂ ਉਪਰਿ ਠਿਤਤ੍ਤਾ ਅਬ੍ਭੁਗ੍ਗਤਟ੍ਠੇਨ ਪਂਸੁਕੂਲਂ ਵਿਯਾਤਿ ਪਂਸੁਕੂਲਂ, ਪਂਸੁ ਵਿਯ ਕੁਚ੍ਛਿਤਭਾਵਂ ਉਲਤਿ ਗਚ੍ਛਤੀਤਿ ਪਂਸੁਕੂਲਨ੍ਤਿ ਏਵਂ ਲਦ੍ਧਨਾਮਂ ਰਥਿਕਾਦੀਸੁ ਪਤਿਤਨਨ੍ਤਕਾਨਿ ਉਚ੍ਚਿਨਿਤ੍ਵਾ ਕਤਚੀਵਰਂ. ਰੁਕ੍ਖਮੂਲਨ੍ਤਿ ਵਿਵੇਕਾਨੁਰੂਪਂ ਯਂ ਕਿਞ੍ਚਿ ਰੁਕ੍ਖਸਮੀਪਂ. ਯਂ ਕਿਞ੍ਚਿ ਮੁਤ੍ਤਨ੍ਤਿ ਯਂ ਕਿਞ੍ਚਿ ਗੋਮੁਤ੍ਤਂ. ਕੇਚਿ ਪਨੇਤ੍ਥ ‘‘ਗੋਮੁਤ੍ਤਪਰਿਭਾਵਿਤਹਰੀਤਕਖਣ੍ਡਂ ਪੂਤਿਮੁਤ੍ਤ’’ਨ੍ਤਿ ਵਦਨ੍ਤਿ. ‘‘ਪੂਤਿਭਾਵੇਨ ਆਪਣਾਦਿਤੋ ਵਿਸ੍ਸਟ੍ਠਂ ਛਡ੍ਡਿਤਂ ਅਪਰਿਗ੍ਗਹਿਤਂ ਯਂ ਕਿਞ੍ਚਿ ਭੇਸਜ੍ਜਂ ਪੂਤਿਮੁਤ੍ਤਨ੍ਤਿ ਅਧਿਪ੍ਪੇਤ’’ਨ੍ਤਿ ਅਪਰੇ.
ਯਤੋ ਖੋਤਿ ਪਚ੍ਚਤ੍ਤੇ ਨਿਸ੍ਸਕ੍ਕਵਚਨਂ, ਯਂ ਖੋਤਿ ਵੁਤ੍ਤਂ ਹੋਤਿ. ਤੇਨ ਤੁਟ੍ਠੋ ਹੋਤੀਤਿ ਵੁਤ੍ਤਕਿਰਿਯਂ ਪਰਾਮਸਤਿ. ਤੁਟ੍ਠੋਤਿ ਸਨ੍ਤੁਟ੍ਠੋ. ਇਦਮਸ੍ਸਾਹਨ੍ਤਿ ਯ੍ਵਾਯਂ ਚਤੁਬ੍ਬਿਧੇਨ ਯਥਾਵੁਤ੍ਤੇਨ ਪਚ੍ਚਯੇਨ ਅਪ੍ਪੇਨ ਸੁਲਭੇਨ ਸਨ੍ਤੋਸੋ, ਇਦਂ ਇਮਸ੍ਸ ਭਿਕ੍ਖੁਨੋ ਸੀਲਸਂਵਰਾਦੀਸੁ ਅਞ੍ਞਤਰਂ ਏਕਂ ਸਾਮਞ੍ਞਙ੍ਗਂ ਸਮਣਭਾਵਕਾਰਣਨ੍ਤਿ ਅਹਂ ਵਦਾਮਿ. ਸਨ੍ਤੁਟ੍ਠਸ੍ਸ ਹਿ ਚਤੁਪਾਰਿਸੁਦ੍ਧਿਸੀਲਂ ਪਰਿਪੁਣ੍ਣਂ ਹੋਤਿ, ਸਮਥਵਿਪਸ੍ਸਨਾ ਚ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ. ਅਥ ਵਾ ਸਾਮਞ੍ਞਂ ਨਾਮ ਅਰਿਯਮਗ੍ਗੋ, ਤਸ੍ਸ ਸਙ੍ਖੇਪਤੋ ਦ੍ਵੇ ਅਙ੍ਗਾ ਬਾਹਿਰਂ ਅਜ੍ਝਤ੍ਤਿਕਨ੍ਤਿ. ਤਤ੍ਥ ਬਾਹਿਰਂ ਸਪ੍ਪੁਰਿਸੂਪਨਿਸ੍ਸਯੋ ਸਦ੍ਧਮ੍ਮਸ੍ਸਵਨਞ੍ਚ. ਅਜ੍ਝਤ੍ਤਿਕਂ ਪਨ ਯੋਨਿਸੋਮਨਸਿਕਾਰੋ ਧਮ੍ਮਾਨੁਧਮ੍ਮਪ੍ਪਟਿਪਤ੍ਤਿ ਚ. ਤੇਸੁ ਯਸ੍ਮਾ ਯਥਾਰਹਂ ਧਮ੍ਮਾਨੁਧਮ੍ਮਪ੍ਪਟਿਪਤ੍ਤਿਭੂਤਾ ਤਸ੍ਸ ਮੂਲਭੂਤਾ ਚੇਤੇ ਧਮ੍ਮਾ, ਯਦਿਦਂ ਅਪ੍ਪਿਚ੍ਛਤਾ ਸਨ੍ਤੁਟ੍ਠਿਤਾ ਪਵਿਵਿਤ੍ਤਤਾ ਅਸਂਸਟ੍ਠਤਾ ਆਰਦ੍ਧਵੀਰਿਯਤਾਤਿ ਏਵਮਾਦਯੋ, ਤਸ੍ਮਾ ਵੁਤ੍ਤਂ ‘‘ਇਦਮਸ੍ਸਾਹਂ ਅਞ੍ਞਤਰਂ ਸਾਮਞ੍ਞਙ੍ਗਨ੍ਤਿ ਵਦਾਮੀ’’ਤਿ.
ਸੇਨਾਸਨਮਾਰਬ੍ਭਾਤਿ ਵਿਹਾਰਾਦਿਂ ਮਞ੍ਚਪੀਠਾਦਿਞ੍ਚ ਸੇਨਾਸਨਂ ਨਿਸ੍ਸਾਯ. ਚੀਵਰਂ ਪਾਨਭੋਜਨਨ੍ਤਿ ਨਿਵਾਸਨਾਦਿਚੀਵਰਂ ਅਮ੍ਬਪਾਨਕਾਦਿਪਾਨਂ ਖਾਦਨੀਯਭੋਜਨੀਯਾਦਿਭੁਞ੍ਜਿਤਬ੍ਬਵਤ੍ਥੁਞ੍ਚ ਆਰਬ੍ਭਾਤਿ ਸਮ੍ਬਨ੍ਧੋ. ਵਿਘਾਤੋਤਿ ਵਿਘਾਤਭਾਵੋ, ਚਿਤ੍ਤਸ੍ਸ ਦੁਕ੍ਖਂ ਨ ਹੋਤੀਤਿ ਯੋਜਨਾ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ‘‘ਅਮੁਕਸ੍ਮਿਂ ਨਾਮ ਆਵਾਸੇ ਪਚ੍ਚਯਾ ਸੁਲਭਾ’’ਤਿ ਲਭਿਤਬ੍ਬਟ੍ਠਾਨਗਮਨੇਨ ਵਾ ‘‘ਮਯ੍ਹਂ ਪਾਪੁਣਾਤਿ, ਨ ਤੁਯ੍ਹ’’ਨ੍ਤਿ ਵਿਵਾਦਾਪਜ੍ਜਨੇਨ ਵਾ ਨਵਕਮ੍ਮਕਰਣਾਦਿਵਸੇਨ ਵਾ ਸੇਨਾਸਨਾਦੀਨਿ ਪਰਿਯੇਸਨ੍ਤਾਨਂ ਅਸਨ੍ਤੁਟ੍ਠਾਨਂ ਇਚ੍ਛਿਤਾਲਾਭਾਦਿਨਾ ਯੋ ਵਿਘਾਤੋ ਚਿਤ੍ਤਸ੍ਸ ਹੋਤਿ, ਸੋ ਤਤ੍ਥ ਸਨ੍ਤੁਟ੍ਠਸ੍ਸ ਨ ਹੋਤਿ. ਦਿਸਾ ਨਪ੍ਪਟਿਹਞ੍ਞਤੀਤਿ ਸਨ੍ਤੁਟ੍ਠਿਯਾ ਚਾਤੁਦ੍ਦਿਸਭਾਵੇਨ ਦਿਸਾ ਨ ਪਟਿਹਨਤਿ. ਵੁਤ੍ਤਞ੍ਹੇਤਂ ‘‘ਚਾਤੁਦ੍ਦਿਸੋ ਅਪ੍ਪਟਿਘੋ ਚ ਹੋਤਿ, ਸਨ੍ਤੁਸ੍ਸਮਾਨੋ ਇਤਰੀਤਰੇਨਾ’’ਤਿ (ਸੁ. ਨਿ. ੪੨).
ਸਮਣਧਮ੍ਮਸ੍ਸ ਅਨੁਲੋਮਾਤਿ ਸਮਣਧਮ੍ਮਸ੍ਸ ਸਮਥਵਿਪਸ੍ਸਨਾਭਾਵਨਾਯ, ਅਰਿਯਮਗ੍ਗਸ੍ਸੇਵ ਵਾ ਅਨੁਚ੍ਛਵਿਕਾ ਅਪ੍ਪਿਚ੍ਛਤਾਦਯੋ. ਤੁਟ੍ਠਚਿਤ੍ਤਸ੍ਸ ਭਿਕ੍ਖੁਨੋਤਿ ਤੁਟ੍ਠਚਿਤ੍ਤੇਨ ਭਿਕ੍ਖੁਨਾ. ਅਧਿਗ੍ਗਹਿਤਾ ਹੋਨ੍ਤੀਤਿ ਪਟਿਪਕ੍ਖਧਮ੍ਮੇ ਅਭਿਭਵਿਤ੍ਵਾ ਗਹਿਤਾ ਹੋਨ੍ਤਿ. ਅਨ੍ਤੋਗਤਾਤਿ ਅਬ੍ਭਨ੍ਤਰਗਤਾ. ਨ ਪਰਿਬਾਹਿਰਾਤਿ ਨ ਬਾਹਿਰਾ ਕਤਾ.
ਸਨ੍ਤੁਟ੍ਠਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਅਰਿਯਵਂਸਸੁਤ੍ਤਵਣ੍ਣਨਾ
੨੮. ਅਟ੍ਠਮੇ ਵਂਸ-ਸਦ੍ਦੋ ‘‘ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸੀਦਤੀ’’ਤਿਆਦੀਸੁ ਦ੍ਵਿਨ੍ਨਂ ਗੋਪਾਨਸੀਨਂ ਸਨ੍ਧਾਨਟ੍ਠਾਨੇ ਠਪੇਤਬ੍ਬਦਣ੍ਡਕੇ ਆਗਤੋ.
‘‘ਵਂਸੋ ਵਿਸਾਲੋ ਚ ਯਥਾ ਵਿਸਤ੍ਤੋ,
ਪੁਤ੍ਤੇਸੁ ਦਾਰੇਸੁ ਚ ਯਾ ਅਪੇਕ੍ਖਾ;
ਵਂਸਕ੍ਕਲ਼ੀਰੋਵ ਅਸਜ੍ਜਮਾਨੋ,
ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ’’ਤਿ. –
ਆਦੀਸੁ ਕਟ੍ਠਕੇ. ‘‘ਭੇਰਿਸਦ੍ਦੋ ਮੁਦਿਙ੍ਗਸਦ੍ਦੋ ਵਂਸਤਾਲਸਦ੍ਦੋ’’ਤਿਆਦੀਸੁ ਤੂਰਿਯਵਿਸੇਸੇ, ਵੇਣੂਤਿਪਿ ਵੁਚ੍ਚਤਿ. ‘‘ਭਿਨ੍ਨੇਨ ਪਿਟ੍ਠਿਵਂਸੇਨ ਮਤੋ ਹਤ੍ਥੀ’’ਤਿਆਦੀਸੁ ਹਤ੍ਥਿਆਦੀਨਂ ਪਿਟ੍ਠਿਵੇਮਜ੍ਝੇ ਪਦੇਸੇ. ‘‘ਕੁਲਵਂਸਂ ਠਪੇਸ੍ਸਾਮੀ’’ਤਿਆਦੀਸੁ ਕੁਲਨ੍ਵਯੇ. ‘‘ਵਂਸਾਨੁਰਕ੍ਖਕੋ ਪਵੇਣੀਪਾਲਕੋ’’ਤਿਆਦੀਸੁ ਗੁਣਾਨੁਪੁਬ੍ਬਿਯਂ ਗੁਣਾਨਂ ਪਬਨ੍ਧਪ੍ਪਵਤ੍ਤਿਯਂ. ਇਧ ਪਨ ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਤਾਸਙ੍ਖਾਤਗੁਣਾਨਂ ਪਬਨ੍ਧੇ ਦਟ੍ਠਬ੍ਬੋ. ਤਸ੍ਸ ਪਨ ਵਂਸਸ੍ਸ ਕੁਲਨ੍ਵਯਂ ਗੁਣਨ੍ਵਯਞ੍ਚ ਨਿਦਸ੍ਸਨਵਸੇਨ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਖਤ੍ਤਿਯਵਂਸੋਤਿ ਖਤ੍ਤਿਯਕੁਲਵਂਸੋ. ਏਸ ਨਯੋ ਸੇਸਪਦੇਸੁਪਿ. ਸਮਣਵਂਸੋ ਪਨ ਸਮਣਤਨ੍ਤਿ ਸਮਣਪਵੇਣੀ. ਮੂਲਗਨ੍ਧਾਦੀਨਨ੍ਤਿ ਆਦਿ-ਸਦ੍ਦੇਨ ਯਥਾ ਸਾਰਗਨ੍ਧਾਦੀਨਂ ਸਙ੍ਗਹੋ, ਏਵਮੇਤ੍ਥ ਗੋਰਸਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ, ਦੁਤਿਯੇਨ ਪਨ ਆਦਿ-ਸਦੇਨ ਕਾਸਿਕਵਤ੍ਥਸਪ੍ਪਿਮਣ੍ਡਾਦੀਨਂ.
ਅਰਿਯ-ਸਦ੍ਦੋ ਅਮਿਲਕ੍ਖੇਸੁਪਿ ਮਨੁਸ੍ਸੇਸੁ ਪਵਤ੍ਤਤਿ, ਯੇਸਂ ਨਿਵਸਨਟ੍ਠਾਨਂ ਅਰਿਯਂ ਆਯਤਨਨ੍ਤਿ ਵੁਚ੍ਚਤਿ. ਯਥਾਹ ‘‘ਯਾਵਤਾ, ਆਨਨ੍ਦ, ਅਰਿਯਂ ਆਯਤਨ’’ਨ੍ਤਿ (ਦੀ. ਨਿ. ੨.੧੫੨; ਉਦਾ. ੭੬). ਲੋਕਿਯਸਾਧੁਜਨੇਸੁਪਿ ‘‘ਯੇ ਹਿ ਵੋ ਅਰਿਯਾ ਪਰਿਸੁਦ੍ਧਕਾਯਸਮਾਚਾਰਾ, ਤੇਸਂ ਅਹਂ ਅਞ੍ਞਤਰੋ’’ਤਿਆਦੀਸੁ (ਮ. ਨਿ. ੧.੩੫). ਇਧ ਪਨ ਯੇ ‘‘ਆਰਕਾ ਕਿਲੇਸੇਹੀ’’ਤਿਆਦਿਨਾ ਲਦ੍ਧਨਿਬ੍ਬਚਨਾ ਪਟਿਵਿਦ੍ਧਅਰਿਯਸਚ੍ਚਾ, ਤੇ ਏਵ ਅਧਿਪ੍ਪੇਤਾਤਿ ਦਸ੍ਸੇਤੁਂ ‘‘ਕੇ ਪਨ ਤੇ ਅਰਿਯਾ’’ਤਿ ਪੁਚ੍ਛਂ ਕਤ੍ਵਾ ‘‘ਅਰਿਯਾ ਵੁਚ੍ਚਨ੍ਤੀ’’ਤਿਆਦਿ ਵੁਤ੍ਤਂ. ਤਤ੍ਥ ਯੇ ਮਹਾਪਣਿਧਾਨਕਪ੍ਪਤੋ ਪਟ੍ਠਾਯ ਯਾਵਾਯਂ ਕਪ੍ਪੋ, ਏਤ੍ਥਨ੍ਤਰੇ ਉਪ੍ਪਨ੍ਨਾ ਸਮ੍ਮਾਸਮ੍ਬੁਦ੍ਧਾ. ਤੇ ਤਾਵ ਸਰੂਪਤੋ ਦਸ੍ਸੇਤ੍ਵਾ ਤਦਞ੍ਞੇਪਿ ਸਮ੍ਮਾਸਮ੍ਬੁਦ੍ਧੇ ਪਚ੍ਚੇਕਬੁਦ੍ਧੇ ਬੁਦ੍ਧਸਾਵਕੇ ਚ ਸਙ੍ਗਹੇਤ੍ਵਾ ਅਨਵਸੇਸਤੋ ਅਰਿਯੇ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਾਵ ਸਾਸਨਂ ਅਨ੍ਤਰਧਾਯਤਿ, ਤਾਵ ਸਤ੍ਥਾ ਧਰਤਿ ਏਵ ਨਾਮਾਤਿ ਇਮਮੇਵ ਭਗਵਨ੍ਤਂ. ਯੇ ਚੇਤਰਹਿ ਬੁਦ੍ਧਸਾਵਕਾ, ਤੇ ਚ ਸਨ੍ਧਾਯ ਪਚ੍ਚੁਪ੍ਪਨ੍ਨਗ੍ਗਹਣਂ. ਤਸ੍ਮਿਂ ਤਸ੍ਮਿਂ ਕਾਲੇ ਤੇ ਤੇ ਪਚ੍ਚੁਪ੍ਪਨ੍ਨਾਤਿ ਚੇ, ਅਤੀਤਾਨਾਗਤਗ੍ਗਹਣਂ ਨ ਕਤ੍ਤਬ੍ਬਂ ਸਿਯਾ.
ਇਦਾਨਿ ਯਥਾ ਭਗਵਾ ‘‘ਧਮ੍ਮਂ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਸ੍ਸਾਮਿ, ਯਦਿਦਂ ਛ ਛਕ੍ਕਾਨੀ’’ਤਿ ਛਛਕ੍ਕਦੇਸਨਾਯ (ਮ. ਨਿ. ੩.੪੨੦) ਅਟ੍ਠਹਿ ਪਦੇਹਿ ਵਣ੍ਣਂ ਅਭਾਸਿ. ਏਵਂ ਮਹਾਅਰਿਯਵਂਸਦੇਸਨਾਯ ਅਰਿਯਾਨਂ ਵਂਸਂ ‘‘ਚਤ੍ਤਾਰੋਮੇ, ਭਿਕ੍ਖਵੇ, ਅਰਿਯਵਂਸਾ ਅਗ੍ਗਞ੍ਞਾ ਰਤ੍ਤਞ੍ਞਾ ਵਂਸਞ੍ਞਾ ਪੋਰਾਣਾ, ਅਸਂਕਿਣ੍ਣਾ ਅਸਂਕਿਣ੍ਣਪੁਬ੍ਬਾ ਨ ਸਂਕੀਯਨ੍ਤਿ ਨ ਸਂਕੀਯਿਸ੍ਸਨ੍ਤਿ, ਅਪ੍ਪਟਿਕੁਟ੍ਠਾ ਸਮਣੇਹਿ ਬ੍ਰਾਹ੍ਮਣੇਹਿ ਵਿਞ੍ਞੂਹੀ’’ਤਿ ਯੇਹਿ ਨਵਹਿ ਪਦੇਹਿ ਵਣ੍ਣਂ ਅਭਾਸਿ, ਤਾਨਿ ਤਾਵ ਆਨੇਤ੍ਵਾ ਥੋਮਨਾਵਸੇਨੇਵ ਵਣ੍ਣੇਨ੍ਤੋ ‘‘ਤੇ ਖੋ ਪਨੇਤੇ’’ਤਿਆਦਿਮਾਹ. ਅਗ੍ਗਾਤਿ ਜਾਨਿਤਬ੍ਬਾ ਸਬ੍ਬਵਂਸੇਹਿ ਸੇਟ੍ਠਭਾਵਤੋ ਸੇਟ੍ਠਭਾਵਸਾਧਨਤੋ ਚ.
ਰਤ੍ਤਞ੍ਞਾ ਚਿਰਰਤ੍ਤਾਤਿ ਜਾਨਿਤਬ੍ਬਾ ਰਤ੍ਤਞ੍ਞੂਹਿ ਬੁਦ੍ਧਾਦੀਹਿ ਤੇਹਿ ਚ ਤਥਾ ਅਨੁਟ੍ਠਿਤਤ੍ਤਾ. ਵਂਸਾਤਿ ਜਾਨਿਤਬ੍ਬਾਤਿ ਬੁਦ੍ਧਾਦੀਨਂ ਅਰਿਯਾਨਂ ਵਂਸਾਤਿ ਜਾਨਿਤਬ੍ਬਾ. ਪੋਰਾਣਾਤਿ ਪੁਰਾਤਨਾ. ਨ ਅਧੁਨਪ੍ਪਤ੍ਤਿਕਾਤਿ ਨ ਅਧੁਨਾਤਨਾ. ਅਵਿਕਿਣ੍ਣਾਤਿ ਨ ਖਿਤ੍ਤਾ ਨ ਛਡ੍ਡਿਤਾ. ਤੇਨਾਹ ‘‘ਅਨਪਨੀਤਾ’’ਤਿ. ਨ ਅਪਨੀਤਪੁਬ੍ਬਾਤਿ ਨ ਛਡ੍ਡਿਤਪੁਬ੍ਬਾ, ਤਿਸ੍ਸਨ੍ਨਮ੍ਪਿ ਸਿਕ੍ਖਾਨਂ ਪਰਿਪੂਰਣੂਪਾਯਭਾਵਤੋ ਨ ਪਰਿਚ੍ਚਤ੍ਤਪੁਬ੍ਬਾ. ਤਤੋ ਏਵ ਇਦਾਨਿਪਿ ਨ ਅਪਨੀਯਨ੍ਤਿ, ਅਨਾਗਤੇਪਿ ਨ ਅਪਨੀਯਿਸ੍ਸਨ੍ਤਿਯੇਵ. ਧਮ੍ਮਸਭਾਵਸ੍ਸ ਵਿਜਾਨਨੇਨ ਵਿਞ੍ਞੂ. ਸਮਿਤਪਾਪਾ ਸਮਣਾ ਚੇਵ ਬਾਹਿਤਪਾਪਾ ਬ੍ਰਾਹ੍ਮਣਾ ਚ. ਤੇਹਿ ਅਪ੍ਪਟਿਕੁਟ੍ਠਾ ਅਪ੍ਪਟਿਕ੍ਖਿਤ੍ਤਾ. ਯੇ ਹਿ ਨ ਪਟਿਕ੍ਕੋਸਿਤਬ੍ਬਾ, ਤੇ ਅਨਿਨ੍ਦਿਤਬ੍ਬਾ. ਅਗਰਹਿਤਬ੍ਬਾ ਅਪਰਿਚ੍ਚਜਿਤਬ੍ਬਤਾਯ ਅਪ੍ਪਟਿਕ੍ਖਿਪਿਤਬ੍ਬਾ ਹੋਨ੍ਤੀਤਿ.
ਸਨ੍ਤੁਟ੍ਠੋਤਿ ਏਤ੍ਥ ਯਥਾਧਿਪ੍ਪੇਤਸਨ੍ਤੋਸਮੇਵ ਦਸ੍ਸੇਨ੍ਤੇਨ ਪਚ੍ਚਯਸਨ੍ਤੋਸਵਸੇਨ ਸਨ੍ਤੁਟ੍ਠੋਤਿ ਵੁਤ੍ਤਂ, ਝਾਨਵਿਪਸ੍ਸਨਾਦਿਵਸੇਨਪਿ ਇਧ ਭਿਕ੍ਖੁਨੋ ਸਨ੍ਤੁਟ੍ਠਤਾ ਹੋਤੀਤਿ. ਇਤਰੀਤਰੇਨਾਤਿ ਇਤਰੇਨ ਇਤਰੇਨ. ਇਤਰਸਦ੍ਦੋ ਅਨਿਯਮਵਚਨੋ ਦ੍ਵਿਕ੍ਖਤ੍ਤੁਂ ਵੁਚ੍ਚਮਾਨੋ ਯਂ-ਕਿਞ੍ਚਿਸਦ੍ਦੇਹਿ ਸਮਾਨਤ੍ਥੋ ਹੋਤੀਤਿ ਵੁਤ੍ਤਂ ‘‘ਯੇਨ ਕੇਨਚੀ’’ਤਿ. ਸ੍ਵਾਯਂ ਅਨਿਯਮਵਾਚਿਤਾਯ ਏਵ ਯਥਾ ਥੂਲਾਦੀਨਂ ਅਞ੍ਞਤਰਵਚਨੋ, ਏਵਂ ਯਥਾਲਦ੍ਧਾਦੀਨਮ੍ਪਿ ਅਞ੍ਞਤਰਵਚਨੋਤਿ. ਤਤ੍ਥ ਦੁਤਿਯਪਕ੍ਖਸ੍ਸੇਵ ਇਧ ਇਚ੍ਛਿਤਭਾਵਂ ਦਸ੍ਸੇਨ੍ਤੋ ‘‘ਅਥ ਖੋ’’ਤਿਆਦਿਮਾਹ. ਨਨੁ ਚ ਯਥਾਲਦ੍ਧਾਦਯੋਪਿ ਥੂਲਾਦਯੋ ਏਵ? ਸਚ੍ਚਮੇਤਂ, ਤਥਾਪਿ ਅਤ੍ਥਿ ਵਿਸੇਸੋ. ਯੋ ਹਿ ਯਥਾਲਦ੍ਧੇਸੁ ਥੂਲਾਦੀਸੁ ਸਨ੍ਤੋਸੋ, ਸੋ ਯਥਾਲਾਭਸਨ੍ਤੋਸੋਵ, ਨ ਇਤਰੋ. ਨ ਹਿ ਸੋ ਪਚ੍ਚਯਮਤ੍ਤਸਨ੍ਨਿਸ੍ਸਯੋ ਇਚ੍ਛਿਤੋ, ਅਥ ਖੋ ਅਤ੍ਤਨੋ ਕਾਯਬਲਸਾਰੁਪ੍ਪਭਾਵਸਨ੍ਨਿਸ੍ਸਯੋਪਿ. ਥੂਲਦੁਕਾਦਯੋ ਤਯੋਪਿ ਚੀਵਰੇ ਲਬ੍ਭਨ੍ਤਿ, ਮਜ੍ਝਿਮੋ ਚਤੁਪਚ੍ਚਯਸਾਧਾਰਣੋ, ਪਚ੍ਛਿਮੋ ਪਨ ਚੀਵਰੇ ਸੇਨਾਸਨੇ ਚ ਲਬ੍ਭਤੀਤਿ ਦਟ੍ਠਬ੍ਬਂ. ਇਮੇ ਤਯੋ ਸਨ੍ਤੋਸੇਤਿ ਇਦਂ ਸਬ੍ਬਸਙ੍ਗਾਹਿਕਨਯੇਨ ਵੁਤ੍ਤਂ. ਯੇ ਹਿ ਪਰਤੋ ਗਿਲਾਨਪਚ੍ਚਯਂ ਪਿਣ੍ਡਪਾਤੇ ਏਵ ਪਕ੍ਖਿਪਿਤ੍ਵਾ ਚੀਵਰੇ ਵੀਸਤਿ, ਪਿਣ੍ਡਪਾਤੇ ਪਨ੍ਨਰਸ, ਸੇਨਾਸਨੇ ਪਨ੍ਨਰਸਾਤਿ ਸਮਪਞ੍ਞਾਸ ਸਨ੍ਤੋਸਾ ਵੁਚ੍ਚਨ੍ਤਿ, ਤੇ ਸਬ੍ਬੇਪਿ ਯਥਾਰਹਂ ਇਮੇਸੁ ਏਵ ਤੀਸੁ ਸਨ੍ਤੋਸੇਸੁ ਸਙ੍ਗਹਂ ਸਮੋਸਰਣਂ ਗਚ੍ਛਨ੍ਤੀਤਿ.
ਚੀਵਰਂ ਜਾਨਿਤਬ੍ਬਨ੍ਤਿ ‘‘ਇਦਂ ਨਾਮ ਚੀਵਰਂ ਕਪ੍ਪਿਯ’’ਨ੍ਤਿ ਜਾਤਿਤੋ ਚੀਵਰਂ ਜਾਨਿਤਬ੍ਬਂ. ਚੀਵਰਖੇਤ੍ਤਨ੍ਤਿ ਚੀਵਰਸ੍ਸ ਉਪ੍ਪਤ੍ਤਿਕ੍ਖੇਤ੍ਤਂ. ਪਂਸੁਕੂਲਨ੍ਤਿ ਪਂਸੁਕੂਲਚੀਵਰਂ, ਪਂਸੁਕੂਲਲਕ੍ਖਣਪ੍ਪਤ੍ਤਂ ਚੀਵਰਂ ਜਾਨਿਤਬ੍ਬਨ੍ਤਿ ਅਤ੍ਥੋ. ਚੀਵਰਸਨ੍ਤੋਸੋਤਿ ਚੀਵਰੇ ਲਬ੍ਭਮਾਨੋ ਸਬ੍ਬੋ ਸਨ੍ਤੋਸੋ ਜਾਨਿਤਬ੍ਬੋ. ਚੀਵਰਪ੍ਪਟਿਸਂਯੁਤ੍ਤਾਨਿ ਧੁਤਙ੍ਗਾਨਿ ਜਾਨਿਤਬ੍ਬਾਨਿ, ਯਾਨਿ ਗੋਪੇਨ੍ਤੋ ਚੀਵਰਸਨ੍ਤੋਸੇਨ ਸਮ੍ਮਦੇਵ ਸਨ੍ਤੁਟ੍ਠੋ ਹੋਤੀਤਿ. ਖੋਮਕਪ੍ਪਾਸਿਕਕੋਸੇਯ੍ਯਕਮ੍ਬਲਸਾਣਭਙ੍ਗਾਨਿ ਖੋਮਾਦੀਨਿ. ਤਤ੍ਥ ਖੋਮਂ ਨਾਮ ਖੋਮਸੁਤ੍ਤੇਹਿ ਵਾਯਿਤਂ ਖੋਮਪਟ੍ਟਚੀਵਰਂ. ਤਥਾ ਸੇਸਾਨਿਪਿ. ਸਾਣਨ੍ਤਿ ਸਾਣਵਾਕਸੁਤ੍ਤੇਹਿ ਕਤਚੀਵਰਂ. ਭਙ੍ਗਨ੍ਤਿ ਪਨ ਖੋਮਸੁਤ੍ਤਾਦੀਨਿ ਸਬ੍ਬਾਨਿ, ਏਕਚ੍ਚਾਨਿ ਵਾ ਮਿਸ੍ਸੇਤ੍ਵਾ ਕਤਚੀਵਰਂ. ਭਙ੍ਗਮ੍ਪਿ ਵਾਕਮਯਮੇਵਾਤਿ ਕੇਚਿ. ਛਾਤਿ ਗਣਨਪਰਿਚ੍ਛੇਦੋ. ਯਦਿ ਏਵਂ ਇਤੋ ਅਞ੍ਞਾ ਵਤ੍ਥਜਾਤਿ ਨਤ੍ਥੀਤਿ? ਨੋ ਨਤ੍ਥਿ. ਸਾ ਪਨ ਏਤੇਸਂ ਅਨੁਲੋਮਾਤਿ ਦਸ੍ਸੇਤੁਂ ‘‘ਦੁਕੂਲਾਦੀਨੀ’’ਤਿਆਦਿ ਵੁਤ੍ਤਂ. ਆਦਿ-ਸਦ੍ਦੇਨ ਪਤ੍ਤੁਣ੍ਣਂ, ਸੋਮਾਰਪਟ੍ਟਂ, ਚੀਨਪਟ੍ਟਂ, ਇਦ੍ਧਿਜਂ, ਦੇਵਦਿਨ੍ਨਨ੍ਤਿ ਤੇਸਂ ਸਙ੍ਗਹੋ. ਤਤ੍ਥ ਦੁਕੂਲਂ ਸਾਣਸ੍ਸ ਅਨੁਲੋਮਂ ਵਾਕਮਯਤ੍ਤਾ. ਪਤ੍ਤੁਣ੍ਣਦੇਸੇ ਸਞ੍ਜਾਤਵਤ੍ਥਂ ਪਤ੍ਤੁਣ੍ਣਂ. ‘‘ਕੋਸੇਯ੍ਯਵਿਸੇਸੋ’’ਤਿ ਹਿ ਅਭਿਧਾਨਕੋਸੇ ਵੁਤ੍ਤਂ. ਸੋਮਾਰਦੇਸੇ ਚੀਨਦੇਸੇ ਚ ਜਾਤਵਤ੍ਥਾਨਿ ਸੋਮਾਰਚੀਨਪਟ੍ਟਾਨਿ. ਪਤ੍ਤੁਣ੍ਣਾਦੀਨਿ ਤੀਣਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ. ਇਦ੍ਧਿਜਂ ਏਹਿਭਿਕ੍ਖੂਨਂ ਪੁਞ੍ਞਿਦ੍ਧਿਯਾ ਨਿਬ੍ਬਤ੍ਤਚੀਵਰਂ, ਤਂ ਖੋਮਾਦੀਨਂ ਅਞ੍ਞਤਰਂ ਹੋਤੀਤਿ ਤੇਸਂ ਏਵ ਅਨੁਲੋਮਂ. ਦੇਵਤਾਹਿ ਦਿਨ੍ਨਚੀਵਰਂ ਦੇਵਦਿਨ੍ਨਂ, ਤਂ ਕਪ੍ਪਰੁਕ੍ਖੇ ਨਿਬ੍ਬਤ੍ਤਂ ਜਾਲਿਨਿਯਾ ਦੇਵਕਞ੍ਞਾਯ ਅਨੁਰੁਦ੍ਧਤ੍ਥੇਰਸ੍ਸ ਦਿਨ੍ਨਵਤ੍ਥਸਦਿਸਂ, ਤਮ੍ਪਿ ਖੋਮਾਦੀਨਂਯੇਵ ਅਨੁਲੋਮਂ ਹੋਤਿ ਤੇਸੁ ਅਞ੍ਞਤਰਭਾਵਤੋ.
ਇਮਾਨੀਤਿ ਅਨ੍ਤੋਗਧਾਵਧਾਰਣਵਚਨਂ, ਇਮਾਨਿ ਏਵਾਤਿ ਅਤ੍ਥੋ. ਬੁਦ੍ਧਾਦੀਨਂ ਪਰਿਭੋਗਯੋਗ੍ਗਤਾਯ ਕਪ੍ਪਿਯਚੀਵਰਾਨਿ. ਇਦਾਨਿ ਅਵਧਾਰਣੇਨ ਨਿਵਤ੍ਤਿਤਾਨਿ ਏਕਦੇਸੇਨ ਦਸ੍ਸੇਤੁਂ ‘‘ਕੁਸਚੀਰ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਕੁਸਤਿਣੇਹਿ ਅਞ੍ਞੇਹਿ ਵਾ ਤਾਦਿਸੇਹਿ ਤਿਣੇਹਿ ਕਤਚੀਵਰਂ ਕੁਸਚੀਰਂ. ਅਕ੍ਕਵਾਕਾਦੀਹਿ ਵਾਕੇਹਿ ਕਤਚੀਵਰਂ ਵਾਕਚੀਰਂ. ਚਤੁਕ੍ਕੋਣੇਹਿ ਤਿਕੋਣੇਹਿ ਵਾ ਫਲਕੇਹਿ ਕਤਚੀਵਰਂ ਫਲਕਚੀਰਂ. ਮਨੁਸ੍ਸਾਨਂ ਕੇਸੇਹਿ ਕਤਕਮ੍ਬਲਂ ਕੇਸਕਮ੍ਬਲਂ. ਚਾਮਰਿਵਾਲਅਸ੍ਸਵਾਲਾਦੀਹਿ ਕਤਂ ਵਾਲਕਮ੍ਬਲਂ. ਮਕਚਿਤਨ੍ਤੂਹਿ ਵਾਯਿਤੋ ਪੋਤ੍ਥਕੋ. ਚਮ੍ਮਨ੍ਤਿ ਮਿਗਚਮ੍ਮਾਦਿ ਯਂ ਕਿਞ੍ਚਿ ਚਮ੍ਮਂ. ਉਲੂਕਪਕ੍ਖੇਹਿ ਗਨ੍ਥਿਤ੍ਵਾ ਕਤਚੀਵਰਂ ਉਲੂਕਪਕ੍ਖਂ. ਭੁਜਪਤ੍ਤਤਚਾਦਿਮਯਂ ਰੁਕ੍ਖਦੁਸ੍ਸਂ. ਤਿਰੀਟਕਨ੍ਤਿ ਅਤ੍ਥੋ. ਸੁਖੁਮਤਰਾਹਿ ਲਤਾਹਿ ਲਤਾਵਾਕੇਹਿ ਵਾ ਵਾਯਿਤਂ ਲਤਾਦੁਸ੍ਸਂ. ਏਰਕਵਾਕੇਹਿ ਕਤਂ ਏਰਕਦੁਸ੍ਸਂ. ਤਥਾ ਕਦਲਿਦੁਸ੍ਸਂ. ਸੁਖੁਮੇਹਿ ਵੇਲ਼ੁਵਿਲੀਵੇਹਿ ਕਤਂ ਵੇਲ਼ੁਦੁਸ੍ਸਂ. ਆਦਿ-ਸਦ੍ਦੇਨ ਵਕ੍ਕਲਾਦੀਨਂ ਸਙ੍ਗਹੋ. ਅਕਪ੍ਪਿਯਚੀਵਰਾਨਿ ਤਿਤ੍ਥਿਯਦ੍ਧਜਭਾਵਤੋ.
ਅਟ੍ਠਨ੍ਨਂ ਮਾਤਿਕਾਨਂ ਵਸੇਨਾਤਿ ‘‘ਸੀਮਾਯ ਦੇਤਿ, ਕਤਿਕਾਯ ਦੇਤੀ’’ਤਿਆਦਿਨਾ (ਮਹਾਵ. ੩੭੯) ਆਗਤਾਨਂ ਅਟ੍ਠਨ੍ਨਂ ਚੀਵਰੁਪ੍ਪਤ੍ਤਿਮਾਤਿਕਾਨਂ ਵਸੇਨ. ਚੀਵਰਾਨਂ ਪਟਿਲਾਭਕ੍ਖੇਤ੍ਤਦਸ੍ਸਨਤ੍ਥਞ੍ਹਿ ਭਗਵਤਾ ‘‘ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ’’ਤਿਆਦਿਨਾ ਮਾਤਿਕਾ ਠਪਿਤਾ. ਮਾਤਿਕਾਤਿ ਹਿ ਮਾਤਰੋ ਚੀਵਰੁਪ੍ਪਤ੍ਤਿਜਨਿਕਾਤਿ.
ਸੋਸਾਨਿਕਨ੍ਤਿ ਸੁਸਾਨੇ ਪਤਿਤਂ. ਪਾਪਣਿਕਨ੍ਤਿ ਆਪਣਦ੍ਵਾਰੇ ਪਤਿਤਂ. ਰਥਿਯਨ੍ਤਿ ਪੁਞ੍ਞਤ੍ਥਿਕੇਹਿ ਵਾਤਪਾਨਨ੍ਤਰੇਨ ਰਥਿਕਾਯ ਛਡ੍ਡਿਤਚੋਲ਼ਕਂ. ਸਙ੍ਕਾਰਕੂਟਕਨ੍ਤਿ ਸਙ੍ਕਾਰਟ੍ਠਾਨੇ ਛਡ੍ਡਿਤਚੋਲ਼ਕਂ. ਸਿਨਾਨਨ੍ਤਿ ਨਹਾਨਚੋਲ਼ਕਂ, ਯਂ ਭੂਤਵੇਜ੍ਜੇਹਿ ਸਸੀਸਂ ਨਹਾਯਿਤ੍ਵਾ ਕਾਲਕਣ੍ਣਿਚੋਲ਼ਨ੍ਤਿ ਛਡ੍ਡੇਤ੍ਵਾ ਗਚ੍ਛਨ੍ਤਿ. ਤਿਤ੍ਥਨ੍ਤਿ ਤਿਤ੍ਥਚੋਲ਼ਂ, ਸਿਨਾਨਤਿਤ੍ਥੇ ਛਡ੍ਡਿਤਪਿਲੋਤਿਕਾ. ਅਗ੍ਗਿਦਡ੍ਢਨ੍ਤਿ ਅਗ੍ਗਿਨਾ ਦਡ੍ਢਪ੍ਪਦੇਸਂ. ਤਞ੍ਹਿ ਮਨੁਸ੍ਸਾ ਛਡ੍ਡੇਨ੍ਤਿ. ਗੋਖਾਯਿਤਾਦੀਨਿ ਪਾਕਟਾਨੇਵ. ਤਾਨਿਪਿ ਹਿ ਮਨੁਸ੍ਸਾ ਛਡ੍ਡੇਨ੍ਤਿ. ਧਜਂ ਉਸ੍ਸਾਪੇਤ੍ਵਾਤਿ ਨਾਵਂ ਆਰੋਹਨ੍ਤੇਹਿ ਵਾ ਯੁਦ੍ਧਂ ਪਵਿਸਨ੍ਤੇਹਿ ਵਾ ਧਜਯਟ੍ਠਿਂ ਉਸ੍ਸਾਪੇਤ੍ਵਾ, ਤਤ੍ਥ ਬਦ੍ਧਂ ਵਾਤੇਨ ਆਨੀਤਂ ਤੇਹਿ ਛਡ੍ਡਿਤਨ੍ਤਿ ਅਧਿਪ੍ਪਾਯੋ.
ਸਾਦਕਭਿਕ੍ਖੁਨਾਤਿ ਗਹਪਤਿਚੀਵਰਸ੍ਸ ਸਾਦਿਯਨਭਿਕ੍ਖੁਨਾ. ਏਕਮਾਸਮਤ੍ਤਨ੍ਤਿ ਚੀਵਰਮਾਸਸਞ੍ਞਿਤਂ ਏਕਮਾਸਮਤ੍ਤਂ ਵਿਤਕ੍ਕੇਤੁਂ ਵਟ੍ਟਤਿ, ਨ ਤਤੋ ਪਰਨ੍ਤਿ ਅਧਿਪ੍ਪਾਯੋ. ਸਬ੍ਬਸ੍ਸਪਿ ਹਿ ਤਣ੍ਹਾਨਿਗ੍ਗਹਤ੍ਥਾ ਸਾਸਨੇ ਪਟਿਪਤ੍ਤੀਤਿ. ਪਂਸੁਕੂਲਿਕੋ ਅਦ੍ਧਮਾਸੇਨੇਵ ਕਰੋਤਿ ਅਪਰਪ੍ਪਟਿਬਦ੍ਧਤ੍ਤਾ ਪਟਿਲਾਭਸ੍ਸ, ਇਤਰਸ੍ਸ ਪਨ ਪਰਪ੍ਪਟਿਬਦ੍ਧਤ੍ਤਾ ਮਾਸਮਤ੍ਤਂ ਅਨੁਞ੍ਞਾਤਂ. ਇਦਂ ਮਾਸਡ੍ਢਮਾਸਮਤ੍ਤਂ…ਪੇ… ਵਿਤਕ੍ਕਸਨ੍ਤੋਸੋ ਵਿਤਕ੍ਕੇਨ੍ਤਸ੍ਸ ਪਰਿਮਿਤਕਾਲਿਕਤ੍ਤਾ. ਮਹਾਥੇਰਂ ਤਤ੍ਥ ਅਤ੍ਤਨੋ ਸਹਾਯਂ ਇਚ੍ਛਨ੍ਤੋਪਿ ਗਰੁਗਾਰਵੇਨ ‘‘ਗਾਮਦ੍ਵਾਰਂ, ਭਨ੍ਤੇ, ਗਮਿਸ੍ਸਾਮਿ’’ਇਚ੍ਚੇਵਾਹ. ਥੇਰੋਪਿ ਤਸ੍ਸ ਅਜ੍ਝਾਸਯਂ ਞਤ੍ਵਾ ‘‘ਅਹਮ੍ਪਾਵੁਸੋ, ਗਮਿਸ੍ਸਾਮੀ’’ਤਿ ਆਹ. ‘‘ਇਮਸ੍ਸ ਭਿਕ੍ਖੁਨੋ ਵਿਤਕ੍ਕਸ੍ਸ ਅਵਸਰੋ ਮਾ ਹੋਤੂ’’ਤਿ ਪਞ੍ਹਂ ਪੁਚ੍ਛਮਾਨੋ ਗਾਮਂ ਪਾਵਿਸਿ. ਉਚ੍ਚਾਰਪਲਿਬੁਦ੍ਧੋਤਿ ਉਚ੍ਚਾਰੇਨ ਪੀਲ਼ਿਤੋ. ਤਦਾ ਭਗਵਤੋ ਦੁਕ੍ਕਰਕਿਰਿਯਾਨੁਸ੍ਸਰਣਮੁਖੇਨ ਤਥਾਗਤੇ ਉਪ੍ਪਨ੍ਨਸ੍ਸ ਪੀਤਿਸੋਮਨਸ੍ਸਵੇਗਸ੍ਸ ਬਲਵਭਾਵੇਨ ਕਿਲੇਸਾਨਂ ਵਿਕ੍ਖਮ੍ਭਿਤਤ੍ਤਾ ਤਸ੍ਮਿਂਯੇਵ…ਪੇ… ਤੀਣਿ ਫਲਾਨਿ ਪਤ੍ਤੋ.
ਕਤ੍ਥ ਲਭਿਸ੍ਸਾਮੀਤਿ ਚਿਨ੍ਤਨਾਪਿ ਲਾਭਾਸਾਪੁਬ੍ਬਿਕਾਤਿ ਤਥਾ ‘‘ਅਚਿਨ੍ਤੇਤ੍ਵਾ’’ਤਿ ਵੁਤ੍ਤਂ. ‘‘ਸੁਨ੍ਦਰਂ ਲਭਿਸ੍ਸਾਮਿ, ਮਨਾਪਂ ਲਭਿਸ੍ਸਾਮੀ’’ਤਿਏਵਮਾਦਿਚਿਨ੍ਤਨਾਯ ਕਾ ਨਾਮ ਕਥਾ, ਕਥਂ ਪਨ ਗਨ੍ਤਬ੍ਬਨ੍ਤਿ ਆਹ ‘‘ਕਮ੍ਮਟ੍ਠਾਨਸੀਸੇਨੇਵ ਗਮਨ’’ਨ੍ਤਿ. ਤੇਨ ਚੀਵਰਂ ਪਟਿਚ੍ਚ ਕਿਞ੍ਚਿਪਿ ਨ ਚਿਨ੍ਤੇਤਬ੍ਬਮੇਵਾਤਿ ਦਸ੍ਸੇਤਿ. ਅਪੇਸਲੋ ਅਪ੍ਪਤਿਰੂਪਾਯਪਿ ਪਰਿਯੇਸਨਾਯ ਪਚ੍ਚਯੋ ਭਵੇਯ੍ਯਾਤਿ ‘‘ਪੇਸਲਂ ਭਿਕ੍ਖੁਂ ਗਹੇਤ੍ਵਾ’’ਤਿ ਵੁਤ੍ਤਂ. ਆਹਰਿਯਮਾਨਨ੍ਤਿ ਸੁਸਾਨਾਦੀਸੁ ਪਤਿਤਂ ਵਤ੍ਥਂ ‘‘ਇਮੇ ਭਿਕ੍ਖੂ ਪਂਸੁਕੂਲਪਰਿਯੇਸਨਂ ਚਰਨ੍ਤੀ’’ਤਿ ਞਤ੍ਵਾ ਕੇਨਚਿ ਪੁਰਿਸੇਨ ਤਤੋ ਆਨੀਯਮਾਨਂ. ਏਵਂ ਲਦ੍ਧਂ ਗਣ੍ਹਨ੍ਤਸ੍ਸਪੀਤਿ ਏਵਂ ਪਟਿਲਾਭਸਨ੍ਤੋਸਂ ਅਕੋਪੇਤ੍ਵਾ ਲਦ੍ਧਂ ਗਣ੍ਹਨ੍ਤਸ੍ਸਪਿ. ਅਤ੍ਤਨੋਪਹੋਨਕਮਤ੍ਤੇਨੇਵਾਤਿ ਯਥਾਲਦ੍ਧਾਨਂ ਪਂਸੁਕੂਲਾਨਂ ਏਕਪਟ੍ਟਦੁਪਟ੍ਟਾਨਂ ਅਤ੍ਥਾਯ ਅਤ੍ਤਨੋ ਪਹੋਨਕਪ੍ਪਮਾਣੇਨੇਵ. ਅਵਧਾਰਣੇਨ ਉਪਰਿ ਪਚ੍ਚਾਸਂ ਨਿਵਤ੍ਤੇਤਿ. ਗਾਮੇ ਭਿਕ੍ਖਾਯ ਆਹਿਣ੍ਡਨ੍ਤੇਨ ਸਪਦਾਨਚਾਰਿਨਾ ਵਿਯ ਦ੍ਵਾਰਪ੍ਪਟਿਪਾਟਿਯਾ ਚਰਣਂ ਲੋਲੁਪ੍ਪਵਿਵਜ੍ਜਨਂ ਨਾਮ ਲੋਲੁਪ੍ਪਸ੍ਸ ਦੂਰਸਮੁਸ੍ਸਾਰਿਤਤ੍ਤਾ.
ਯਾਪੇਤੁਨ੍ਤਿ ਅਤ੍ਤਭਾਵਂ ਪਵਤ੍ਤੇਤੁਂ. ਧੋਵਨੁਪਗੇਨਾਤਿ ਧੋਵਨਯੋਗ੍ਗੇਨ. ਪਣ੍ਣਾਨੀਤਿ ਅਮ੍ਬਜਮ੍ਬਾਦਿਪਣ੍ਣਾਨਿ. ਅਕੋਪੇਤ੍ਵਾਤਿ ਸਨ੍ਤੋਸਂ ਅਕੋਪੇਤ੍ਵਾ. ਪਹੋਨਕਨੀਹਾਰੇਨੇਵਾਤਿ ਅਨ੍ਤਰਵਾਸਕਾਦੀਸੁ ਯਂ ਕਾਤੁਕਾਮੋ, ਤਸ੍ਸ ਪਹੋਨਕਨਿਯਾਮੇਨੇਵ ਯਥਾਲਦ੍ਧਂ ਥੂਲਸੁਖੁਮਾਦਿਂ ਗਹੇਤ੍ਵਾ ਕਰਣਂ. ਤਿਮਣ੍ਡਲਪ੍ਪਟਿਚ੍ਛਾਦਨਮਤ੍ਤਸ੍ਸੇਵਾਤਿ ਨਿਵਾਸਨਂ ਚੇ ਨਾਭਿਮਣ੍ਡਲਂ, ਜਾਣੁਮਣ੍ਡਲਂ, ਇਤਰਞ੍ਚੇ ਗਲਵਾਟਮਣ੍ਡਲਂ, ਜਾਣੁਮਣ੍ਡਲਨ੍ਤਿ ਤਿਮਣ੍ਡਲਪ੍ਪਟਿਚ੍ਛਾਦਨਮਤ੍ਤਸ੍ਸੇਵ ਕਰਣਂ. ਤਂ ਪਨ ਅਤ੍ਥਤੋ ਤਿਣ੍ਣਂ ਚੀਵਰਾਨਂ ਹੇਟ੍ਠਿਮਨ੍ਤੇਨ ਵੁਤ੍ਤਪਰਿਮਾਣਂਯੇਵ ਹੋਤਿ. ਅਵਿਚਾਰੇਤ੍ਵਾ ਨ ਵਿਚਾਰੇਤ੍ਵਾ.
ਕੁਸਿਬਨ੍ਧਨਕਾਲੇਤਿ ਮਣ੍ਡਲਾਨਿ ਯੋਜੇਤ੍ਵਾ ਸਿਬ੍ਬਨਕਾਲੇ. ਸਤ੍ਤ ਵਾਰੇਤਿ ਸਤ੍ਤ ਸਿਬ੍ਬਨਵਾਰੇ. ਕਪ੍ਪਬਿਨ੍ਦੁਅਪਦੇਸੇਨ ਕਸ੍ਸਚਿ ਵਿਕਾਰਸ੍ਸ ਅਕਰਣਂ ਕਪ੍ਪਸਨ੍ਤੋਸੋ.
ਸੀਤਪ੍ਪਟਿਘਾਤਨਾਦਿ ਅਤ੍ਥਾਪਤ੍ਤਿਤੋ ਸਿਜ੍ਝਤੀਤਿ ਮੁਖ੍ਯਮੇਵ ਚੀਵਰਪਰਿਭੋਗੇ ਪਯੋਜਨਂ ਦਸ੍ਸੇਤੁਂ ‘‘ਹਿਰਿਕੋਪੀਨਪ੍ਪਟਿਚ੍ਛਾਦਨਮਤ੍ਤਵਸੇਨਾ’’ਤਿ ਵੁਤ੍ਤਂ. ਤੇਨਾਹ ਭਗਵਾ ‘‘ਯਾਵਦੇਵ ਹਿਰਿਕੋਪੀਨਪ੍ਪਟਿਚ੍ਛਾਦਨਤ੍ਥ’’ਨ੍ਤਿ (ਮ. ਨਿ. ੧.੨੩; ਅ. ਨਿ. ੬.੫੮; ਮਹਾਨਿ. ੨੦੬). ਵਟ੍ਟਤਿ, ਨ ਤਾਵਤਾ ਸਨ੍ਤੋਸੋ ਕੁਪ੍ਪਤਿ ਸਮ੍ਭਾਰਾਨਂ ਦਕ੍ਖਿਣੇਯ੍ਯਾਨਂ ਅਲਾਭਤੋ. ਸਾਰਣੀਯਧਮ੍ਮੇ ਠਤ੍ਵਾਤਿ ਸੀਲਵਨ੍ਤੇਹਿ ਭਿਕ੍ਖੂਹਿ ਸਾਧਾਰਣਭੋਗਿਭਾਵੇ ਠਤ੍ਵਾ. ਇਤੀਤਿਆਦਿਨਾ ਪਠਮਸ੍ਸੇਵ ਅਰਿਯਵਂਸਸ੍ਸ ਪਂਸੁਕੂਲਿਕਙ੍ਗਤੇਚੀਵਰਿਕਙ੍ਗਾਨਂ ਤੇਸਞ੍ਚਸ੍ਸ ਪਚ੍ਚਯਤਂ ਦਸ੍ਸੇਨ੍ਤੋ ‘‘ਇਤਿ ਇਮੇ ਧਮ੍ਮਾ ਅਞ੍ਞਮਞ੍ਞਸ੍ਸ ਸਮੁਟ੍ਠਾਪਕਾ ਉਪਤ੍ਥਮ੍ਭਕਾ ਚਾ’’ਤਿ ਦੀਪੇਤਿ. ਏਸ ਨਯੋ ਇਤੋ ਪਰੇਸੁ.
ਸਨ੍ਤੁਟ੍ਠੋ ਹੋਤਿ ਵਣ੍ਣਵਾਦੀਤਿ ਏਤ੍ਥ ਚਤੁਕ੍ਕੋਟਿਕਂ ਸਮ੍ਭਵਤਿ. ਤਤ੍ਥ ਚਤੁਤ੍ਥੋਯੇਵ ਪਕ੍ਖੋ ਵਣ੍ਣਿਤਥੋਮਿਤੋਤਿ ਤਥਾ ਦੇਸਨਾ ਕਤਾ. ਏਕੋ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਨ ਕਥੇਤਿ ਸੇਯ੍ਯਥਾਪਿ ਥੇਰੋ ਨਾਲ਼ਕੋ. ਏਕੋ ਨ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ ਸੇਯ੍ਯਥਾਪਿ ਉਪਨਨ੍ਦੋ ਸਕ੍ਯਪੁਤ੍ਤੋ. ਏਕੋ ਨੇਵ ਸਨ੍ਤੁਟ੍ਠੋ ਹੋਤਿ, ਨ ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ ਸੇਯ੍ਯਥਾਪਿ ਥੇਰੋ ਲਾਲ਼ੁਦਾਯਿ. ਏਕੋ ਸਨ੍ਤੁਟ੍ਠੋ ਚੇਵ ਹੋਤਿ, ਸਨ੍ਤੋਸਸ੍ਸ ਚ ਵਣ੍ਣਂ ਕਥੇਤਿ ਸੇਯ੍ਯਥਾਪਿ ਥੇਰੋ ਮਹਾਕਸ੍ਸਪੋ.
ਅਨੇਸਨਨ੍ਤਿ ਅਯੁਤ੍ਤਂ ਏਸਨਂ. ਤੇਨਾਹ ‘‘ਅਪ੍ਪਤਿਰੂਪ’’ਨ੍ਤਿ, ਸਾਸਨੇ ਠਿਤਾਨਂ ਅਪ੍ਪਤਿਰੂਪਂ ਅਯੋਗ੍ਗਂ. ਕੋਹਞ੍ਞਂ ਕਰੋਨ੍ਤੋਤਿ ਚੀਵਰੁਪ੍ਪਾਦਨਨਿਮਿਤ੍ਤਂ ਪਰੇਸਂ ਕੁਹਨਂ ਵਿਮ੍ਹਾਪਨਂ ਕਰੋਨ੍ਤੋ. ਉਤ੍ਤਸਤੀਤਿ ਤਣ੍ਹਾਸਨ੍ਤਾਸੇਨ ਉਪਰੂਪਰਿ ਤਸਤਿ. ਪਰਿਤਸ੍ਸਤੀਤਿ ਪਰਿਤੋ ਤਸ੍ਸਤਿ. ਯਥਾ ਸਬ੍ਬੇ ਕਾਯਵਚਿਪ੍ਪਯੋਗਾ ਤਦਤ੍ਥਾ ਏਵ ਜਾਯਨ੍ਤਿ, ਏਵਂ ਸਬ੍ਬਭਾਗੇਹਿ ਤਸਤਿ. ਗਧਿਤਂ ਵੁਚ੍ਚਤਿ ਗਿਦ੍ਧੋ, ਸੋ ਚੇਤ੍ਥ ਅਭਿਜ੍ਝਾਲਕ੍ਖਣੋ ਅਧਿਪ੍ਪੇਤੋ. ਗਧਿਤਂ ਏਤਸ੍ਸ ਨਤ੍ਥੀਤਿ ਅਗਧਿਤੋਤਿ ਆਹ ‘‘ਵਿਗਤਲੋਭਗਿਦ੍ਧੋ’’ਤਿ. ਮੁਚ੍ਛਨ੍ਤਿ ਤਣ੍ਹਾਵਸੇਨ ਮੁਯ੍ਹਨਂ. ਤਸ੍ਸ ਸਮੁਸ੍ਸਯਸ੍ਸ ਅਧਿਗਤਂ ਅਨਾਪਨ੍ਨੋ ਅਨੁਪਗਤੋ. ਅਨੋਤ੍ਥਤੋ ਅਨਜ੍ਝੋਤ੍ਥਤੋ. ਅਪਰਿਯੋਨਦ੍ਧੋਤਿ ਤਣ੍ਹਚ੍ਛਦਨੇਨ ਅਚ੍ਛਾਦਿਤੋ. ਆਦੀਨਵਂ ਪਸ੍ਸਮਾਨੋਤਿ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਦੋਸਂ ਪਸ੍ਸਨ੍ਤੋ. ਗਧਿਤਪਰਿਭੋਗਤੋ ਨਿਸ੍ਸਰਤਿ ਏਤੇਨਾਤਿ ਨਿਸ੍ਸਰਣਂ, ਇਦਮਟ੍ਠਿਕਤਾ. ਤਂ ਪਜਾਨਾਤੀਤਿ ਨਿਸ੍ਸਰਣਪਞ੍ਞੋ. ਤੇਨਾਹ ‘‘ਯਾਵਦੇਵ…ਪੇ… ਜਾਨਨ੍ਤੋ’’ਤਿ.
ਨੇਵਤ੍ਤਾਨੁਕ੍ਕਂਸੇਤੀਤਿ ਅਤ੍ਤਾਨਂ ਨੇਵ ਉਕ੍ਕਂਸੇਤਿ ਨ ਉਕ੍ਖਿਪਤਿ ਨ ਉਕ੍ਕਟ੍ਠਤੋ ਦਹਤਿ. ਅਹਨ੍ਤਿਆਦਿ ਉਕ੍ਕਂਸਨਾਕਾਰਦਸ੍ਸਨਂ. ਨ ਵਮ੍ਭੇਤਿ ਨ ਹੀਲ਼ੇਤਿ ਨ ਨਿਹੀਨਤੋ ਦਹਤਿ. ਤਸ੍ਮਿਂ ਚੀਵਰਸਨ੍ਤੋਸੇਤਿ ਤਸ੍ਮਿਂ ਯਥਾਵੁਤ੍ਤੇ ਵੀਸਤਿਵਿਧੇ ਚੀਵਰਸਨ੍ਤੋਸੇ. ਕਾਮਞ੍ਚੇਤ੍ਥ ਵੁਤ੍ਤਪ੍ਪਕਾਰਸਨ੍ਤੋਸਗ੍ਗਹਣੇਨੇਵ ਚੀਵਰਹੇਤੁ ਅਨੇਸਨਾਪਜ੍ਜਨਾਦਿਪਿ ਗਹਿਤਮੇਵ ਤਸ੍ਮਿਂ ਸਤਿ ਤਸ੍ਸ ਭਾਵਤੋ, ਅਸਤਿ ਚ ਅਭਾਵਤੋ. ਵਣ੍ਣਵਾਦਿਤਾਅਤ੍ਤੁਕ੍ਕਂਸਨਪਰਵਮ੍ਭਨਾਨਿ ਪਨ ਗਹਿਤਾਨਿ ਨ ਹੋਨ੍ਤੀਤਿ ‘‘ਵਣ੍ਣਵਾਦਾਦੀਸੁ ਵਾ’’ਤਿ ਵਿਕਪ੍ਪੋ ਵੁਤ੍ਤੋ. ਏਤ੍ਥ ਚ ਦਕ੍ਖੋਤਿਆਦਿ ਯੇਸਂ ਧਮ੍ਮਾਨਂ ਵਸੇਨਸ੍ਸ ਯਥਾਵੁਤ੍ਤਸਨ੍ਤੋਸਾਦੀ ਇਜ੍ਝਨ੍ਤਿ, ਤਂਦਸ੍ਸਨਂ. ਤਤ੍ਥ ਦਕ੍ਖੋਤਿ ਇਮਿਨਾ ਤੇਸਂ ਸਮੁਟ੍ਠਾਪਨਪਞ੍ਞਂ ਦਸ੍ਸੇਤਿ. ਅਨਲਸੋਤਿ ਇਮਿਨਾ ਪਗ੍ਗਣ੍ਹਨਵੀਰਿਯਂ, ਸਮ੍ਪਜਾਨੋਤਿ ਇਮਿਨਾ ਪਾਰਿਹਾਰਿਯਪਞ੍ਞਂ, ਪਟਿਸ੍ਸਤੋਤਿ ਇਮਿਨਾ ਤਤ੍ਥ ਅਸਮ੍ਮੋਸਵੁਤ੍ਤਿਂ ਦਸ੍ਸੇਤਿ.
ਪਿਣ੍ਡਪਾਤੋ ਜਾਨਿਤਬ੍ਬੋਤਿ ਪਭੇਦਤੋ ਪਿਣ੍ਡਪਾਤੋ ਜਾਨਿਤਬ੍ਬੋ. ਪਿਣ੍ਡਪਾਤਕ੍ਖੇਤ੍ਤਨ੍ਤਿ ਪਿਣ੍ਡਪਾਤਸ੍ਸ ਉਪ੍ਪਤ੍ਤਿਟ੍ਠਾਨਂ. ਪਿਣ੍ਡਪਾਤਸਨ੍ਤੋਸੋ ਜਾਨਿਤਬ੍ਬੋਤਿ ਪਿਣ੍ਡਪਾਤਸਨ੍ਤੋਸਪ੍ਪਭੇਦੋ ਜਾਨਿਤਬ੍ਬੋ. ਇਧ ਭੇਸਜ੍ਜਮ੍ਪਿ ਪਿਣ੍ਡਪਾਤਗਤਿਕਮੇਵ. ਆਹਰਿਤਬ੍ਬਤੋ ਹਿ ਸਪ੍ਪਿਆਦੀਨਮ੍ਪਿ ਗਹਣਂ ਕਤਂ.