੮. ਅਰਿਯਵਂਸਸੁਤ੍ਤਵਣ੍ਣਨਾ

੨੮. ਅਟ੍ਠਮੇ ਵਂਸ-ਸਦ੍ਦੋ ‘‘ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸੀਦਤੀ’’ਤਿਆਦੀਸੁ ਦ੍ਵਿਨ੍ਨਂ ਗੋਪਾਨਸੀਨਂ ਸਨ੍ਧਾਨਟ੍ਠਾਨੇ ਠਪੇਤਬ੍ਬਦਣ੍ਡਕੇ ਆਗਤੋ.

‘‘ਵਂਸੋ ਵਿਸਾਲੋ ਚ ਯਥਾ ਵਿਸਤ੍ਤੋ,

ਪੁਤ੍ਤੇਸੁ ਦਾਰੇਸੁ ਚ ਯਾ ਅਪੇਕ੍ਖਾ;

ਵਂਸਕ੍ਕਲ਼ੀਰੋਵ ਅਸਜ੍ਜਮਾਨੋ,

ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ’’ਤਿ. –

ਆਦੀਸੁ ਕਟ੍ਠਕੇ. ‘‘ਭੇਰਿਸਦ੍ਦੋ ਮੁਦਿਙ੍ਗਸਦ੍ਦੋ ਵਂਸਤਾਲਸਦ੍ਦੋ’’ਤਿਆਦੀਸੁ ਤੂਰਿਯਵਿਸੇਸੇ, ਵੇਣੂਤਿਪਿ ਵੁਚ੍ਚਤਿ. ‘‘ਭਿਨ੍ਨੇਨ ਪਿਟ੍ਠਿਵਂਸੇਨ ਮਤੋ ਹਤ੍ਥੀ’’ਤਿਆਦੀਸੁ ਹਤ੍ਥਿਆਦੀਨਂ ਪਿਟ੍ਠਿਵੇਮਜ੍ਝੇ ਪਦੇਸੇ. ‘‘ਕੁਲਵਂਸਂ ਠਪੇਸ੍ਸਾਮੀ’’ਤਿਆਦੀਸੁ ਕੁਲਨ੍ਵਯੇ. ‘‘ਵਂਸਾਨੁਰਕ੍ਖਕੋ ਪਵੇਣੀਪਾਲਕੋ’’ਤਿਆਦੀਸੁ ਗੁਣਾਨੁਪੁਬ੍ਬਿਯਂ ਗੁਣਾਨਂ ਪਬਨ੍ਧਪ੍ਪਵਤ੍ਤਿਯਂ. ਇਧ ਪਨ ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਤਾਸਙ੍ਖਾਤਗੁਣਾਨਂ ਪਬਨ੍ਧੇ ਦਟ੍ਠਬ੍ਬੋ. ਤਸ੍ਸ ਪਨ ਵਂਸਸ੍ਸ ਕੁਲਨ੍ਵਯਂ ਗੁਣਨ੍ਵਯਞ੍ਚ ਨਿਦਸ੍ਸਨਵਸੇਨ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਖਤ੍ਤਿਯਵਂਸੋਤਿ ਖਤ੍ਤਿਯਕੁਲਵਂਸੋ. ਏਸ ਨਯੋ ਸੇਸਪਦੇਸੁਪਿ. ਸਮਣਵਂਸੋ ਪਨ ਸਮਣਤਨ੍ਤਿ ਸਮਣਪਵੇਣੀ. ਮੂਲਗਨ੍ਧਾਦੀਨਨ੍ਤਿ ਆਦਿ-ਸਦ੍ਦੇਨ ਯਥਾ ਸਾਰਗਨ੍ਧਾਦੀਨਂ ਸਙ੍ਗਹੋ, ਏਵਮੇਤ੍ਥ ਗੋਰਸਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ, ਦੁਤਿਯੇਨ ਪਨ ਆਦਿ-ਸਦੇਨ ਕਾਸਿਕਵਤ੍ਥਸਪ੍ਪਿਮਣ੍ਡਾਦੀਨਂ.

ਅਰਿਯ-ਸਦ੍ਦੋ ਅਮਿਲਕ੍ਖੇਸੁਪਿ ਮਨੁਸ੍ਸੇਸੁ ਪਵਤ੍ਤਤਿ, ਯੇਸਂ ਨਿਵਸਨਟ੍ਠਾਨਂ ਅਰਿਯਂ ਆਯਤਨਨ੍ਤਿ ਵੁਚ੍ਚਤਿ. ਯਥਾਹ ‘‘ਯਾਵਤਾ, ਆਨਨ੍ਦ, ਅਰਿਯਂ ਆਯਤਨ’’ਨ੍ਤਿ (ਦੀ. ਨਿ. ੨.੧੫੨; ਉਦਾ. ੭੬). ਲੋਕਿਯਸਾਧੁਜਨੇਸੁਪਿ ‘‘ਯੇ ਹਿ ਵੋ ਅਰਿਯਾ ਪਰਿਸੁਦ੍ਧਕਾਯਸਮਾਚਾਰਾ, ਤੇਸਂ ਅਹਂ ਅਞ੍ਞਤਰੋ’’ਤਿਆਦੀਸੁ (ਮ. ਨਿ. ੧.੩੫). ਇਧ ਪਨ ਯੇ ‘‘ਆਰਕਾ ਕਿਲੇਸੇਹੀ’’ਤਿਆਦਿਨਾ ਲਦ੍ਧਨਿਬ੍ਬਚਨਾ ਪਟਿਵਿਦ੍ਧਅਰਿਯਸਚ੍ਚਾ, ਤੇ ਏਵ ਅਧਿਪ੍ਪੇਤਾਤਿ ਦਸ੍ਸੇਤੁਂ ‘‘ਕੇ ਪਨ ਤੇ ਅਰਿਯਾ’’ਤਿ ਪੁਚ੍ਛਂ ਕਤ੍ਵਾ ‘‘ਅਰਿਯਾ ਵੁਚ੍ਚਨ੍ਤੀ’’ਤਿਆਦਿ ਵੁਤ੍ਤਂ. ਤਤ੍ਥ ਯੇ ਮਹਾਪਣਿਧਾਨਕਪ੍ਪਤੋ ਪਟ੍ਠਾਯ ਯਾਵਾਯਂ ਕਪ੍ਪੋ, ਏਤ੍ਥਨ੍ਤਰੇ ਉਪ੍ਪਨ੍ਨਾ ਸਮ੍ਮਾਸਮ੍ਬੁਦ੍ਧਾ. ਤੇ ਤਾਵ ਸਰੂਪਤੋ ਦਸ੍ਸੇਤ੍ਵਾ ਤਦਞ੍ਞੇਪਿ ਸਮ੍ਮਾਸਮ੍ਬੁਦ੍ਧੇ ਪਚ੍ਚੇਕਬੁਦ੍ਧੇ ਬੁਦ੍ਧਸਾਵਕੇ ਚ ਸਙ੍ਗਹੇਤ੍ਵਾ ਅਨਵਸੇਸਤੋ ਅਰਿਯੇ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਾਵ ਸਾਸਨਂ ਅਨ੍ਤਰਧਾਯਤਿ, ਤਾਵ ਸਤ੍ਥਾ ਧਰਤਿ ਏਵ ਨਾਮਾਤਿ ਇਮਮੇਵ ਭਗਵਨ੍ਤਂ. ਯੇ ਚੇਤਰਹਿ ਬੁਦ੍ਧਸਾਵਕਾ, ਤੇ ਚ ਸਨ੍ਧਾਯ ਪਚ੍ਚੁਪ੍ਪਨ੍ਨਗ੍ਗਹਣਂ. ਤਸ੍ਮਿਂ ਤਸ੍ਮਿਂ ਕਾਲੇ ਤੇ ਤੇ ਪਚ੍ਚੁਪ੍ਪਨ੍ਨਾਤਿ ਚੇ, ਅਤੀਤਾਨਾਗਤਗ੍ਗਹਣਂ ਨ ਕਤ੍ਤਬ੍ਬਂ ਸਿਯਾ.

ਇਦਾਨਿ ਯਥਾ ਭਗਵਾ ‘‘ਧਮ੍ਮਂ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਸ੍ਸਾਮਿ, ਯਦਿਦਂ ਛ ਛਕ੍ਕਾਨੀ’’ਤਿ ਛਛਕ੍ਕਦੇਸਨਾਯ (ਮ. ਨਿ. ੩.੪੨੦) ਅਟ੍ਠਹਿ ਪਦੇਹਿ ਵਣ੍ਣਂ ਅਭਾਸਿ. ਏਵਂ ਮਹਾਅਰਿਯਵਂਸਦੇਸਨਾਯ ਅਰਿਯਾਨਂ ਵਂਸਂ ‘‘ਚਤ੍ਤਾਰੋਮੇ, ਭਿਕ੍ਖਵੇ, ਅਰਿਯਵਂਸਾ ਅਗ੍ਗਞ੍ਞਾ ਰਤ੍ਤਞ੍ਞਾ ਵਂਸਞ੍ਞਾ ਪੋਰਾਣਾ, ਅਸਂਕਿਣ੍ਣਾ ਅਸਂਕਿਣ੍ਣਪੁਬ੍ਬਾ ਨ ਸਂਕੀਯਨ੍ਤਿ ਨ ਸਂਕੀਯਿਸ੍ਸਨ੍ਤਿ, ਅਪ੍ਪਟਿਕੁਟ੍ਠਾ ਸਮਣੇਹਿ ਬ੍ਰਾਹ੍ਮਣੇਹਿ ਵਿਞ੍ਞੂਹੀ’’ਤਿ ਯੇਹਿ ਨਵਹਿ ਪਦੇਹਿ ਵਣ੍ਣਂ ਅਭਾਸਿ, ਤਾਨਿ ਤਾਵ ਆਨੇਤ੍ਵਾ ਥੋਮਨਾਵਸੇਨੇਵ ਵਣ੍ਣੇਨ੍ਤੋ ‘‘ਤੇ ਖੋ ਪਨੇਤੇ’’ਤਿਆਦਿਮਾਹ. ਅਗ੍ਗਾਤਿ ਜਾਨਿਤਬ੍ਬਾ ਸਬ੍ਬਵਂਸੇਹਿ ਸੇਟ੍ਠਭਾਵਤੋ ਸੇਟ੍ਠਭਾਵਸਾਧਨਤੋ ਚ.

ਰਤ੍ਤਞ੍ਞਾ ਚਿਰਰਤ੍ਤਾਤਿ ਜਾਨਿਤਬ੍ਬਾ ਰਤ੍ਤਞ੍ਞੂਹਿ ਬੁਦ੍ਧਾਦੀਹਿ ਤੇਹਿ ਚ ਤਥਾ ਅਨੁਟ੍ਠਿਤਤ੍ਤਾ. ਵਂਸਾਤਿ ਜਾਨਿਤਬ੍ਬਾਤਿ ਬੁਦ੍ਧਾਦੀਨਂ ਅਰਿਯਾਨਂ ਵਂਸਾਤਿ ਜਾਨਿਤਬ੍ਬਾ. ਪੋਰਾਣਾਤਿ ਪੁਰਾਤਨਾ. ਨ ਅਧੁਨਪ੍ਪਤ੍ਤਿਕਾਤਿ ਨ ਅਧੁਨਾਤਨਾ. ਅਵਿਕਿਣ੍ਣਾਤਿ ਨ ਖਿਤ੍ਤਾ ਨ ਛਡ੍ਡਿਤਾ. ਤੇਨਾਹ ‘‘ਅਨਪਨੀਤਾ’’ਤਿ. ਨ ਅਪਨੀਤਪੁਬ੍ਬਾਤਿ ਨ ਛਡ੍ਡਿਤਪੁਬ੍ਬਾ, ਤਿਸ੍ਸਨ੍ਨਮ੍ਪਿ ਸਿਕ੍ਖਾਨਂ ਪਰਿਪੂਰਣੂਪਾਯਭਾਵਤੋ ਨ ਪਰਿਚ੍ਚਤ੍ਤਪੁਬ੍ਬਾ. ਤਤੋ ਏਵ ਇਦਾਨਿਪਿ ਨ ਅਪਨੀਯਨ੍ਤਿ, ਅਨਾਗਤੇਪਿ ਨ ਅਪਨੀਯਿਸ੍ਸਨ੍ਤਿਯੇਵ. ਧਮ੍ਮਸਭਾਵਸ੍ਸ ਵਿਜਾਨਨੇਨ ਵਿਞ੍ਞੂ. ਸਮਿਤਪਾਪਾ ਸਮਣਾ ਚੇਵ ਬਾਹਿਤਪਾਪਾ ਬ੍ਰਾਹ੍ਮਣਾ ਚ. ਤੇਹਿ ਅਪ੍ਪਟਿਕੁਟ੍ਠਾ ਅਪ੍ਪਟਿਕ੍ਖਿਤ੍ਤਾ. ਯੇ ਹਿ ਨ ਪਟਿਕ੍ਕੋਸਿਤਬ੍ਬਾ, ਤੇ ਅਨਿਨ੍ਦਿਤਬ੍ਬਾ. ਅਗਰਹਿਤਬ੍ਬਾ ਅਪਰਿਚ੍ਚਜਿਤਬ੍ਬਤਾਯ ਅਪ੍ਪਟਿਕ੍ਖਿਪਿਤਬ੍ਬਾ ਹੋਨ੍ਤੀਤਿ.

ਸਨ੍ਤੁਟ੍ਠੋਤਿ ਏਤ੍ਥ ਯਥਾਧਿਪ੍ਪੇਤਸਨ੍ਤੋਸਮੇਵ ਦਸ੍ਸੇਨ੍ਤੇਨ ਪਚ੍ਚਯਸਨ੍ਤੋਸਵਸੇਨ ਸਨ੍ਤੁਟ੍ਠੋਤਿ ਵੁਤ੍ਤਂ, ਝਾਨਵਿਪਸ੍ਸਨਾਦਿਵਸੇਨਪਿ ਇਧ ਭਿਕ੍ਖੁਨੋ ਸਨ੍ਤੁਟ੍ਠਤਾ ਹੋਤੀਤਿ. ਇਤਰੀਤਰੇਨਾਤਿ ਇਤਰੇਨ ਇਤਰੇਨ. ਇਤਰਸਦ੍ਦੋ ਅਨਿਯਮਵਚਨੋ ਦ੍ਵਿਕ੍ਖਤ੍ਤੁਂ ਵੁਚ੍ਚਮਾਨੋ ਯਂ-ਕਿਞ੍ਚਿਸਦ੍ਦੇਹਿ ਸਮਾਨਤ੍ਥੋ ਹੋਤੀਤਿ ਵੁਤ੍ਤਂ ‘‘ਯੇਨ ਕੇਨਚੀ’’ਤਿ. ਸ੍ਵਾਯਂ ਅਨਿਯਮਵਾਚਿਤਾਯ ਏਵ ਯਥਾ ਥੂਲਾਦੀਨਂ ਅਞ੍ਞਤਰਵਚਨੋ, ਏਵਂ ਯਥਾਲਦ੍ਧਾਦੀਨਮ੍ਪਿ ਅਞ੍ਞਤਰਵਚਨੋਤਿ. ਤਤ੍ਥ ਦੁਤਿਯਪਕ੍ਖਸ੍ਸੇਵ ਇਧ ਇਚ੍ਛਿਤਭਾਵਂ ਦਸ੍ਸੇਨ੍ਤੋ ‘‘ਅਥ ਖੋ’’ਤਿਆਦਿਮਾਹ. ਨਨੁ ਚ ਯਥਾਲਦ੍ਧਾਦਯੋਪਿ ਥੂਲਾਦਯੋ ਏਵ? ਸਚ੍ਚਮੇਤਂ, ਤਥਾਪਿ ਅਤ੍ਥਿ ਵਿਸੇਸੋ. ਯੋ ਹਿ ਯਥਾਲਦ੍ਧੇਸੁ ਥੂਲਾਦੀਸੁ ਸਨ੍ਤੋਸੋ, ਸੋ ਯਥਾਲਾਭਸਨ੍ਤੋਸੋਵ, ਨ ਇਤਰੋ. ਨ ਹਿ ਸੋ ਪਚ੍ਚਯਮਤ੍ਤਸਨ੍ਨਿਸ੍ਸਯੋ ਇਚ੍ਛਿਤੋ, ਅਥ ਖੋ ਅਤ੍ਤਨੋ ਕਾਯਬਲਸਾਰੁਪ੍ਪਭਾਵਸਨ੍ਨਿਸ੍ਸਯੋਪਿ. ਥੂਲਦੁਕਾਦਯੋ ਤਯੋਪਿ ਚੀਵਰੇ ਲਬ੍ਭਨ੍ਤਿ, ਮਜ੍ਝਿਮੋ ਚਤੁਪਚ੍ਚਯਸਾਧਾਰਣੋ, ਪਚ੍ਛਿਮੋ ਪਨ ਚੀਵਰੇ ਸੇਨਾਸਨੇ ਚ ਲਬ੍ਭਤੀਤਿ ਦਟ੍ਠਬ੍ਬਂ. ਇਮੇ ਤਯੋ ਸਨ੍ਤੋਸੇਤਿ ਇਦਂ ਸਬ੍ਬਸਙ੍ਗਾਹਿਕਨਯੇਨ ਵੁਤ੍ਤਂ. ਯੇ ਹਿ ਪਰਤੋ ਗਿਲਾਨਪਚ੍ਚਯਂ ਪਿਣ੍ਡਪਾਤੇ ਏਵ ਪਕ੍ਖਿਪਿਤ੍ਵਾ ਚੀਵਰੇ ਵੀਸਤਿ, ਪਿਣ੍ਡਪਾਤੇ ਪਨ੍ਨਰਸ, ਸੇਨਾਸਨੇ ਪਨ੍ਨਰਸਾਤਿ ਸਮਪਞ੍ਞਾਸ ਸਨ੍ਤੋਸਾ ਵੁਚ੍ਚਨ੍ਤਿ, ਤੇ ਸਬ੍ਬੇਪਿ ਯਥਾਰਹਂ ਇਮੇਸੁ ਏਵ ਤੀਸੁ ਸਨ੍ਤੋਸੇਸੁ ਸਙ੍ਗਹਂ ਸਮੋਸਰਣਂ ਗਚ੍ਛਨ੍ਤੀਤਿ.

ਚੀਵਰਂ ਜਾਨਿਤਬ੍ਬਨ੍ਤਿ ‘‘ਇਦਂ ਨਾਮ ਚੀਵਰਂ ਕਪ੍ਪਿਯ’’ਨ੍ਤਿ ਜਾਤਿਤੋ ਚੀਵਰਂ ਜਾਨਿਤਬ੍ਬਂ. ਚੀਵਰਖੇਤ੍ਤਨ੍ਤਿ ਚੀਵਰਸ੍ਸ ਉਪ੍ਪਤ੍ਤਿਕ੍ਖੇਤ੍ਤਂ. ਪਂਸੁਕੂਲਨ੍ਤਿ ਪਂਸੁਕੂਲਚੀਵਰਂ, ਪਂਸੁਕੂਲਲਕ੍ਖਣਪ੍ਪਤ੍ਤਂ ਚੀਵਰਂ ਜਾਨਿਤਬ੍ਬਨ੍ਤਿ ਅਤ੍ਥੋ. ਚੀਵਰਸਨ੍ਤੋਸੋਤਿ ਚੀਵਰੇ ਲਬ੍ਭਮਾਨੋ ਸਬ੍ਬੋ ਸਨ੍ਤੋਸੋ ਜਾਨਿਤਬ੍ਬੋ. ਚੀਵਰਪ੍ਪਟਿਸਂਯੁਤ੍ਤਾਨਿ ਧੁਤਙ੍ਗਾਨਿ ਜਾਨਿਤਬ੍ਬਾਨਿ, ਯਾਨਿ ਗੋਪੇਨ੍ਤੋ ਚੀਵਰਸਨ੍ਤੋਸੇਨ ਸਮ੍ਮਦੇਵ ਸਨ੍ਤੁਟ੍ਠੋ ਹੋਤੀਤਿ. ਖੋਮਕਪ੍ਪਾਸਿਕਕੋਸੇਯ੍ਯਕਮ੍ਬਲਸਾਣਭਙ੍ਗਾਨਿ ਖੋਮਾਦੀਨਿ. ਤਤ੍ਥ ਖੋਮਂ ਨਾਮ ਖੋਮਸੁਤ੍ਤੇਹਿ ਵਾਯਿਤਂ ਖੋਮਪਟ੍ਟਚੀਵਰਂ. ਤਥਾ ਸੇਸਾਨਿਪਿ. ਸਾਣਨ੍ਤਿ ਸਾਣਵਾਕਸੁਤ੍ਤੇਹਿ ਕਤਚੀਵਰਂ. ਭਙ੍ਗਨ੍ਤਿ ਪਨ ਖੋਮਸੁਤ੍ਤਾਦੀਨਿ ਸਬ੍ਬਾਨਿ, ਏਕਚ੍ਚਾਨਿ ਵਾ ਮਿਸ੍ਸੇਤ੍ਵਾ ਕਤਚੀਵਰਂ. ਭਙ੍ਗਮ੍ਪਿ ਵਾਕਮਯਮੇਵਾਤਿ ਕੇਚਿ. ਛਾਤਿ ਗਣਨਪਰਿਚ੍ਛੇਦੋ. ਯਦਿ ਏਵਂ ਇਤੋ ਅਞ੍ਞਾ ਵਤ੍ਥਜਾਤਿ ਨਤ੍ਥੀਤਿ? ਨੋ ਨਤ੍ਥਿ. ਸਾ ਪਨ ਏਤੇਸਂ ਅਨੁਲੋਮਾਤਿ ਦਸ੍ਸੇਤੁਂ ‘‘ਦੁਕੂਲਾਦੀਨੀ’’ਤਿਆਦਿ ਵੁਤ੍ਤਂ. ਆਦਿ-ਸਦ੍ਦੇਨ ਪਤ੍ਤੁਣ੍ਣਂ, ਸੋਮਾਰਪਟ੍ਟਂ, ਚੀਨਪਟ੍ਟਂ, ਇਦ੍ਧਿਜਂ, ਦੇਵਦਿਨ੍ਨਨ੍ਤਿ ਤੇਸਂ ਸਙ੍ਗਹੋ. ਤਤ੍ਥ ਦੁਕੂਲਂ ਸਾਣਸ੍ਸ ਅਨੁਲੋਮਂ ਵਾਕਮਯਤ੍ਤਾ. ਪਤ੍ਤੁਣ੍ਣਦੇਸੇ ਸਞ੍ਜਾਤਵਤ੍ਥਂ ਪਤ੍ਤੁਣ੍ਣਂ. ‘‘ਕੋਸੇਯ੍ਯਵਿਸੇਸੋ’’ਤਿ ਹਿ ਅਭਿਧਾਨਕੋਸੇ ਵੁਤ੍ਤਂ. ਸੋਮਾਰਦੇਸੇ ਚੀਨਦੇਸੇ ਚ ਜਾਤਵਤ੍ਥਾਨਿ ਸੋਮਾਰਚੀਨਪਟ੍ਟਾਨਿ. ਪਤ੍ਤੁਣ੍ਣਾਦੀਨਿ ਤੀਣਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ. ਇਦ੍ਧਿਜਂ ਏਹਿਭਿਕ੍ਖੂਨਂ ਪੁਞ੍ਞਿਦ੍ਧਿਯਾ ਨਿਬ੍ਬਤ੍ਤਚੀਵਰਂ, ਤਂ ਖੋਮਾਦੀਨਂ ਅਞ੍ਞਤਰਂ ਹੋਤੀਤਿ ਤੇਸਂ ਏਵ ਅਨੁਲੋਮਂ. ਦੇਵਤਾਹਿ ਦਿਨ੍ਨਚੀਵਰਂ ਦੇਵਦਿਨ੍ਨਂ, ਤਂ ਕਪ੍ਪਰੁਕ੍ਖੇ ਨਿਬ੍ਬਤ੍ਤਂ ਜਾਲਿਨਿਯਾ ਦੇਵਕਞ੍ਞਾਯ ਅਨੁਰੁਦ੍ਧਤ੍ਥੇਰਸ੍ਸ ਦਿਨ੍ਨਵਤ੍ਥਸਦਿਸਂ, ਤਮ੍ਪਿ ਖੋਮਾਦੀਨਂਯੇਵ ਅਨੁਲੋਮਂ ਹੋਤਿ ਤੇਸੁ ਅਞ੍ਞਤਰਭਾਵਤੋ.

ਇਮਾਨੀਤਿ ਅਨ੍ਤੋਗਧਾਵਧਾਰਣਵਚਨਂ, ਇਮਾਨਿ ਏਵਾਤਿ ਅਤ੍ਥੋ. ਬੁਦ੍ਧਾਦੀਨਂ ਪਰਿਭੋਗਯੋਗ੍ਗਤਾਯ ਕਪ੍ਪਿਯਚੀਵਰਾਨਿ. ਇਦਾਨਿ ਅਵਧਾਰਣੇਨ ਨਿਵਤ੍ਤਿਤਾਨਿ ਏਕਦੇਸੇਨ ਦਸ੍ਸੇਤੁਂ ‘‘ਕੁਸਚੀਰ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਕੁਸਤਿਣੇਹਿ ਅਞ੍ਞੇਹਿ ਵਾ ਤਾਦਿਸੇਹਿ ਤਿਣੇਹਿ ਕਤਚੀਵਰਂ ਕੁਸਚੀਰਂ. ਅਕ੍ਕਵਾਕਾਦੀਹਿ ਵਾਕੇਹਿ ਕਤਚੀਵਰਂ ਵਾਕਚੀਰਂ. ਚਤੁਕ੍ਕੋਣੇਹਿ ਤਿਕੋਣੇਹਿ ਵਾ ਫਲਕੇਹਿ ਕਤਚੀਵਰਂ ਫਲਕਚੀਰਂ. ਮਨੁਸ੍ਸਾਨਂ ਕੇਸੇਹਿ ਕਤਕਮ੍ਬਲਂ ਕੇਸਕਮ੍ਬਲਂ. ਚਾਮਰਿਵਾਲਅਸ੍ਸਵਾਲਾਦੀਹਿ ਕਤਂ ਵਾਲਕਮ੍ਬਲਂ. ਮਕਚਿਤਨ੍ਤੂਹਿ ਵਾਯਿਤੋ ਪੋਤ੍ਥਕੋ. ਚਮ੍ਮਨ੍ਤਿ ਮਿਗਚਮ੍ਮਾਦਿ ਯਂ ਕਿਞ੍ਚਿ ਚਮ੍ਮਂ. ਉਲੂਕਪਕ੍ਖੇਹਿ ਗਨ੍ਥਿਤ੍ਵਾ ਕਤਚੀਵਰਂ ਉਲੂਕਪਕ੍ਖਂ. ਭੁਜਪਤ੍ਤਤਚਾਦਿਮਯਂ ਰੁਕ੍ਖਦੁਸ੍ਸਂ. ਤਿਰੀਟਕਨ੍ਤਿ ਅਤ੍ਥੋ. ਸੁਖੁਮਤਰਾਹਿ ਲਤਾਹਿ ਲਤਾਵਾਕੇਹਿ ਵਾ ਵਾਯਿਤਂ ਲਤਾਦੁਸ੍ਸਂ. ਏਰਕਵਾਕੇਹਿ ਕਤਂ ਏਰਕਦੁਸ੍ਸਂ. ਤਥਾ ਕਦਲਿਦੁਸ੍ਸਂ. ਸੁਖੁਮੇਹਿ ਵੇਲ਼ੁਵਿਲੀਵੇਹਿ ਕਤਂ ਵੇਲ਼ੁਦੁਸ੍ਸਂ. ਆਦਿ-ਸਦ੍ਦੇਨ ਵਕ੍ਕਲਾਦੀਨਂ ਸਙ੍ਗਹੋ. ਅਕਪ੍ਪਿਯਚੀਵਰਾਨਿ ਤਿਤ੍ਥਿਯਦ੍ਧਜਭਾਵਤੋ.

ਅਟ੍ਠਨ੍ਨਂ ਮਾਤਿਕਾਨਂ ਵਸੇਨਾਤਿ ‘‘ਸੀਮਾਯ ਦੇਤਿ, ਕਤਿਕਾਯ ਦੇਤੀ’’ਤਿਆਦਿਨਾ (ਮਹਾਵ. ੩੭੯) ਆਗਤਾਨਂ ਅਟ੍ਠਨ੍ਨਂ ਚੀਵਰੁਪ੍ਪਤ੍ਤਿਮਾਤਿਕਾਨਂ ਵਸੇਨ. ਚੀਵਰਾਨਂ ਪਟਿਲਾਭਕ੍ਖੇਤ੍ਤਦਸ੍ਸਨਤ੍ਥਞ੍ਹਿ ਭਗਵਤਾ ‘‘ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ’’ਤਿਆਦਿਨਾ ਮਾਤਿਕਾ ਠਪਿਤਾ. ਮਾਤਿਕਾਤਿ ਹਿ ਮਾਤਰੋ ਚੀਵਰੁਪ੍ਪਤ੍ਤਿਜਨਿਕਾਤਿ.

ਸੋਸਾਨਿਕਨ੍ਤਿ ਸੁਸਾਨੇ ਪਤਿਤਂ. ਪਾਪਣਿਕਨ੍ਤਿ ਆਪਣਦ੍ਵਾਰੇ ਪਤਿਤਂ. ਰਥਿਯਨ੍ਤਿ ਪੁਞ੍ਞਤ੍ਥਿਕੇਹਿ ਵਾਤਪਾਨਨ੍ਤਰੇਨ ਰਥਿਕਾਯ ਛਡ੍ਡਿਤਚੋਲ਼ਕਂ. ਸਙ੍ਕਾਰਕੂਟਕਨ੍ਤਿ ਸਙ੍ਕਾਰਟ੍ਠਾਨੇ ਛਡ੍ਡਿਤਚੋਲ਼ਕਂ. ਸਿਨਾਨਨ੍ਤਿ ਨਹਾਨਚੋਲ਼ਕਂ, ਯਂ ਭੂਤਵੇਜ੍ਜੇਹਿ ਸਸੀਸਂ ਨਹਾਯਿਤ੍ਵਾ ਕਾਲਕਣ੍ਣਿਚੋਲ਼ਨ੍ਤਿ ਛਡ੍ਡੇਤ੍ਵਾ ਗਚ੍ਛਨ੍ਤਿ. ਤਿਤ੍ਥਨ੍ਤਿ ਤਿਤ੍ਥਚੋਲ਼ਂ, ਸਿਨਾਨਤਿਤ੍ਥੇ ਛਡ੍ਡਿਤਪਿਲੋਤਿਕਾ. ਅਗ੍ਗਿਦਡ੍ਢਨ੍ਤਿ ਅਗ੍ਗਿਨਾ ਦਡ੍ਢਪ੍ਪਦੇਸਂ. ਤਞ੍ਹਿ ਮਨੁਸ੍ਸਾ ਛਡ੍ਡੇਨ੍ਤਿ. ਗੋਖਾਯਿਤਾਦੀਨਿ ਪਾਕਟਾਨੇਵ. ਤਾਨਿਪਿ ਹਿ ਮਨੁਸ੍ਸਾ ਛਡ੍ਡੇਨ੍ਤਿ. ਧਜਂ ਉਸ੍ਸਾਪੇਤ੍ਵਾਤਿ ਨਾਵਂ ਆਰੋਹਨ੍ਤੇਹਿ ਵਾ ਯੁਦ੍ਧਂ ਪਵਿਸਨ੍ਤੇਹਿ ਵਾ ਧਜਯਟ੍ਠਿਂ ਉਸ੍ਸਾਪੇਤ੍ਵਾ, ਤਤ੍ਥ ਬਦ੍ਧਂ ਵਾਤੇਨ ਆਨੀਤਂ ਤੇਹਿ ਛਡ੍ਡਿਤਨ੍ਤਿ ਅਧਿਪ੍ਪਾਯੋ.

ਸਾਦਕਭਿਕ੍ਖੁਨਾਤਿ ਗਹਪਤਿਚੀਵਰਸ੍ਸ ਸਾਦਿਯਨਭਿਕ੍ਖੁਨਾ. ਏਕਮਾਸਮਤ੍ਤਨ੍ਤਿ ਚੀਵਰਮਾਸਸਞ੍ਞਿਤਂ ਏਕਮਾਸਮਤ੍ਤਂ ਵਿਤਕ੍ਕੇਤੁਂ ਵਟ੍ਟਤਿ, ਨ ਤਤੋ ਪਰਨ੍ਤਿ ਅਧਿਪ੍ਪਾਯੋ. ਸਬ੍ਬਸ੍ਸਪਿ ਹਿ ਤਣ੍ਹਾਨਿਗ੍ਗਹਤ੍ਥਾ ਸਾਸਨੇ ਪਟਿਪਤ੍ਤੀਤਿ. ਪਂਸੁਕੂਲਿਕੋ ਅਦ੍ਧਮਾਸੇਨੇਵ ਕਰੋਤਿ ਅਪਰਪ੍ਪਟਿਬਦ੍ਧਤ੍ਤਾ ਪਟਿਲਾਭਸ੍ਸ, ਇਤਰਸ੍ਸ ਪਨ ਪਰਪ੍ਪਟਿਬਦ੍ਧਤ੍ਤਾ ਮਾਸਮਤ੍ਤਂ ਅਨੁਞ੍ਞਾਤਂ. ਇਦਂ ਮਾਸਡ੍ਢਮਾਸਮਤ੍ਤਂ…ਪੇ… ਵਿਤਕ੍ਕਸਨ੍ਤੋਸੋ ਵਿਤਕ੍ਕੇਨ੍ਤਸ੍ਸ ਪਰਿਮਿਤਕਾਲਿਕਤ੍ਤਾ. ਮਹਾਥੇਰਂ ਤਤ੍ਥ ਅਤ੍ਤਨੋ ਸਹਾਯਂ ਇਚ੍ਛਨ੍ਤੋਪਿ ਗਰੁਗਾਰਵੇਨ ‘‘ਗਾਮਦ੍ਵਾਰਂ, ਭਨ੍ਤੇ, ਗਮਿਸ੍ਸਾਮਿ’’ਇਚ੍ਚੇਵਾਹ. ਥੇਰੋਪਿ ਤਸ੍ਸ ਅਜ੍ਝਾਸਯਂ ਞਤ੍ਵਾ ‘‘ਅਹਮ੍ਪਾਵੁਸੋ, ਗਮਿਸ੍ਸਾਮੀ’’ਤਿ ਆਹ. ‘‘ਇਮਸ੍ਸ ਭਿਕ੍ਖੁਨੋ ਵਿਤਕ੍ਕਸ੍ਸ ਅਵਸਰੋ ਮਾ ਹੋਤੂ’’ਤਿ ਪਞ੍ਹਂ ਪੁਚ੍ਛਮਾਨੋ ਗਾਮਂ ਪਾਵਿਸਿ. ਉਚ੍ਚਾਰਪਲਿਬੁਦ੍ਧੋਤਿ ਉਚ੍ਚਾਰੇਨ ਪੀਲ਼ਿਤੋ. ਤਦਾ ਭਗਵਤੋ ਦੁਕ੍ਕਰਕਿਰਿਯਾਨੁਸ੍ਸਰਣਮੁਖੇਨ ਤਥਾਗਤੇ ਉਪ੍ਪਨ੍ਨਸ੍ਸ ਪੀਤਿਸੋਮਨਸ੍ਸਵੇਗਸ੍ਸ ਬਲਵਭਾਵੇਨ ਕਿਲੇਸਾਨਂ ਵਿਕ੍ਖਮ੍ਭਿਤਤ੍ਤਾ ਤਸ੍ਮਿਂਯੇਵ…ਪੇ… ਤੀਣਿ ਫਲਾਨਿ ਪਤ੍ਤੋ.

ਕਤ੍ਥ ਲਭਿਸ੍ਸਾਮੀਤਿ ਚਿਨ੍ਤਨਾਪਿ ਲਾਭਾਸਾਪੁਬ੍ਬਿਕਾਤਿ ਤਥਾ ‘‘ਅਚਿਨ੍ਤੇਤ੍ਵਾ’’ਤਿ ਵੁਤ੍ਤਂ. ‘‘ਸੁਨ੍ਦਰਂ ਲਭਿਸ੍ਸਾਮਿ, ਮਨਾਪਂ ਲਭਿਸ੍ਸਾਮੀ’’ਤਿਏਵਮਾਦਿਚਿਨ੍ਤਨਾਯ ਕਾ ਨਾਮ ਕਥਾ, ਕਥਂ ਪਨ ਗਨ੍ਤਬ੍ਬਨ੍ਤਿ ਆਹ ‘‘ਕਮ੍ਮਟ੍ਠਾਨਸੀਸੇਨੇਵ ਗਮਨ’’ਨ੍ਤਿ. ਤੇਨ ਚੀਵਰਂ ਪਟਿਚ੍ਚ ਕਿਞ੍ਚਿਪਿ ਨ ਚਿਨ੍ਤੇਤਬ੍ਬਮੇਵਾਤਿ ਦਸ੍ਸੇਤਿ. ਅਪੇਸਲੋ ਅਪ੍ਪਤਿਰੂਪਾਯਪਿ ਪਰਿਯੇਸਨਾਯ ਪਚ੍ਚਯੋ ਭਵੇਯ੍ਯਾਤਿ ‘‘ਪੇਸਲਂ ਭਿਕ੍ਖੁਂ ਗਹੇਤ੍ਵਾ’’ਤਿ ਵੁਤ੍ਤਂ. ਆਹਰਿਯਮਾਨਨ੍ਤਿ ਸੁਸਾਨਾਦੀਸੁ ਪਤਿਤਂ ਵਤ੍ਥਂ ‘‘ਇਮੇ ਭਿਕ੍ਖੂ ਪਂਸੁਕੂਲਪਰਿਯੇਸਨਂ ਚਰਨ੍ਤੀ’’ਤਿ ਞਤ੍ਵਾ ਕੇਨਚਿ ਪੁਰਿਸੇਨ ਤਤੋ ਆਨੀਯਮਾਨਂ. ਏਵਂ ਲਦ੍ਧਂ ਗਣ੍ਹਨ੍ਤਸ੍ਸਪੀਤਿ ਏਵਂ ਪਟਿਲਾਭਸਨ੍ਤੋਸਂ ਅਕੋਪੇਤ੍ਵਾ ਲਦ੍ਧਂ ਗਣ੍ਹਨ੍ਤਸ੍ਸਪਿ. ਅਤ੍ਤਨੋਪਹੋਨਕਮਤ੍ਤੇਨੇਵਾਤਿ ਯਥਾਲਦ੍ਧਾਨਂ ਪਂਸੁਕੂਲਾਨਂ ਏਕਪਟ੍ਟਦੁਪਟ੍ਟਾਨਂ ਅਤ੍ਥਾਯ ਅਤ੍ਤਨੋ ਪਹੋਨਕਪ੍ਪਮਾਣੇਨੇਵ. ਅਵਧਾਰਣੇਨ ਉਪਰਿ ਪਚ੍ਚਾਸਂ ਨਿਵਤ੍ਤੇਤਿ. ਗਾਮੇ ਭਿਕ੍ਖਾਯ ਆਹਿਣ੍ਡਨ੍ਤੇਨ ਸਪਦਾਨਚਾਰਿਨਾ ਵਿਯ ਦ੍ਵਾਰਪ੍ਪਟਿਪਾਟਿਯਾ ਚਰਣਂ ਲੋਲੁਪ੍ਪਵਿਵਜ੍ਜਨਂ ਨਾਮ ਲੋਲੁਪ੍ਪਸ੍ਸ ਦੂਰਸਮੁਸ੍ਸਾਰਿਤਤ੍ਤਾ.

ਯਾਪੇਤੁਨ੍ਤਿ ਅਤ੍ਤਭਾਵਂ ਪਵਤ੍ਤੇਤੁਂ. ਧੋਵਨੁਪਗੇਨਾਤਿ ਧੋਵਨਯੋਗ੍ਗੇਨ. ਪਣ੍ਣਾਨੀਤਿ ਅਮ੍ਬਜਮ੍ਬਾਦਿਪਣ੍ਣਾਨਿ. ਅਕੋਪੇਤ੍ਵਾਤਿ ਸਨ੍ਤੋਸਂ ਅਕੋਪੇਤ੍ਵਾ. ਪਹੋਨਕਨੀਹਾਰੇਨੇਵਾਤਿ ਅਨ੍ਤਰਵਾਸਕਾਦੀਸੁ ਯਂ ਕਾਤੁਕਾਮੋ, ਤਸ੍ਸ ਪਹੋਨਕਨਿਯਾਮੇਨੇਵ ਯਥਾਲਦ੍ਧਂ ਥੂਲਸੁਖੁਮਾਦਿਂ ਗਹੇਤ੍ਵਾ ਕਰਣਂ. ਤਿਮਣ੍ਡਲਪ੍ਪਟਿਚ੍ਛਾਦਨਮਤ੍ਤਸ੍ਸੇਵਾਤਿ ਨਿਵਾਸਨਂ ਚੇ ਨਾਭਿਮਣ੍ਡਲਂ, ਜਾਣੁਮਣ੍ਡਲਂ, ਇਤਰਞ੍ਚੇ ਗਲਵਾਟਮਣ੍ਡਲਂ, ਜਾਣੁਮਣ੍ਡਲਨ੍ਤਿ ਤਿਮਣ੍ਡਲਪ੍ਪਟਿਚ੍ਛਾਦਨਮਤ੍ਤਸ੍ਸੇਵ ਕਰਣਂ. ਤਂ ਪਨ ਅਤ੍ਥਤੋ ਤਿਣ੍ਣਂ ਚੀਵਰਾਨਂ ਹੇਟ੍ਠਿਮਨ੍ਤੇਨ ਵੁਤ੍ਤਪਰਿਮਾਣਂਯੇਵ ਹੋਤਿ. ਅਵਿਚਾਰੇਤ੍ਵਾ ਨ ਵਿਚਾਰੇਤ੍ਵਾ.

ਕੁਸਿਬਨ੍ਧਨਕਾਲੇਤਿ ਮਣ੍ਡਲਾਨਿ ਯੋਜੇਤ੍ਵਾ ਸਿਬ੍ਬਨਕਾਲੇ. ਸਤ੍ਤ ਵਾਰੇਤਿ ਸਤ੍ਤ ਸਿਬ੍ਬਨਵਾਰੇ. ਕਪ੍ਪਬਿਨ੍ਦੁਅਪਦੇਸੇਨ ਕਸ੍ਸਚਿ ਵਿਕਾਰਸ੍ਸ ਅਕਰਣਂ ਕਪ੍ਪਸਨ੍ਤੋਸੋ.

ਸੀਤਪ੍ਪਟਿਘਾਤਨਾਦਿ ਅਤ੍ਥਾਪਤ੍ਤਿਤੋ ਸਿਜ੍ਝਤੀਤਿ ਮੁਖ੍ਯਮੇਵ ਚੀਵਰਪਰਿਭੋਗੇ ਪਯੋਜਨਂ ਦਸ੍ਸੇਤੁਂ ‘‘ਹਿਰਿਕੋਪੀਨਪ੍ਪਟਿਚ੍ਛਾਦਨਮਤ੍ਤਵਸੇਨਾ’’ਤਿ ਵੁਤ੍ਤਂ. ਤੇਨਾਹ ਭਗਵਾ ‘‘ਯਾਵਦੇਵ ਹਿਰਿਕੋਪੀਨਪ੍ਪਟਿਚ੍ਛਾਦਨਤ੍ਥ’’ਨ੍ਤਿ (ਮ. ਨਿ. ੧.੨੩; ਅ. ਨਿ. ੬.੫੮; ਮਹਾਨਿ. ੨੦੬). ਵਟ੍ਟਤਿ, ਨ ਤਾਵਤਾ ਸਨ੍ਤੋਸੋ ਕੁਪ੍ਪਤਿ ਸਮ੍ਭਾਰਾਨਂ ਦਕ੍ਖਿਣੇਯ੍ਯਾਨਂ ਅਲਾਭਤੋ. ਸਾਰਣੀਯਧਮ੍ਮੇ ਠਤ੍ਵਾਤਿ ਸੀਲਵਨ੍ਤੇਹਿ ਭਿਕ੍ਖੂਹਿ ਸਾਧਾਰਣਭੋਗਿਭਾਵੇ ਠਤ੍ਵਾ. ਇਤੀਤਿਆਦਿਨਾ ਪਠਮਸ੍ਸੇਵ ਅਰਿਯਵਂਸਸ੍ਸ ਪਂਸੁਕੂਲਿਕਙ੍ਗਤੇਚੀਵਰਿਕਙ੍ਗਾਨਂ ਤੇਸਞ੍ਚਸ੍ਸ ਪਚ੍ਚਯਤਂ ਦਸ੍ਸੇਨ੍ਤੋ ‘‘ਇਤਿ ਇਮੇ ਧਮ੍ਮਾ ਅਞ੍ਞਮਞ੍ਞਸ੍ਸ ਸਮੁਟ੍ਠਾਪਕਾ ਉਪਤ੍ਥਮ੍ਭਕਾ ਚਾ’’ਤਿ ਦੀਪੇਤਿ. ਏਸ ਨਯੋ ਇਤੋ ਪਰੇਸੁ.

ਸਨ੍ਤੁਟ੍ਠੋ ਹੋਤਿ ਵਣ੍ਣਵਾਦੀਤਿ ਏਤ੍ਥ ਚਤੁਕ੍ਕੋਟਿਕਂ ਸਮ੍ਭਵਤਿ. ਤਤ੍ਥ ਚਤੁਤ੍ਥੋਯੇਵ ਪਕ੍ਖੋ ਵਣ੍ਣਿਤਥੋਮਿਤੋਤਿ ਤਥਾ ਦੇਸਨਾ ਕਤਾ. ਏਕੋ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਨ ਕਥੇਤਿ ਸੇਯ੍ਯਥਾਪਿ ਥੇਰੋ ਨਾਲ਼ਕੋ. ਏਕੋ ਨ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ ਸੇਯ੍ਯਥਾਪਿ ਉਪਨਨ੍ਦੋ ਸਕ੍ਯਪੁਤ੍ਤੋ. ਏਕੋ ਨੇਵ ਸਨ੍ਤੁਟ੍ਠੋ ਹੋਤਿ, ਨ ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ ਸੇਯ੍ਯਥਾਪਿ ਥੇਰੋ ਲਾਲ਼ੁਦਾਯਿ. ਏਕੋ ਸਨ੍ਤੁਟ੍ਠੋ ਚੇਵ ਹੋਤਿ, ਸਨ੍ਤੋਸਸ੍ਸ ਚ ਵਣ੍ਣਂ ਕਥੇਤਿ ਸੇਯ੍ਯਥਾਪਿ ਥੇਰੋ ਮਹਾਕਸ੍ਸਪੋ.

ਅਨੇਸਨਨ੍ਤਿ ਅਯੁਤ੍ਤਂ ਏਸਨਂ. ਤੇਨਾਹ ‘‘ਅਪ੍ਪਤਿਰੂਪ’’ਨ੍ਤਿ, ਸਾਸਨੇ ਠਿਤਾਨਂ ਅਪ੍ਪਤਿਰੂਪਂ ਅਯੋਗ੍ਗਂ. ਕੋਹਞ੍ਞਂ ਕਰੋਨ੍ਤੋਤਿ ਚੀਵਰੁਪ੍ਪਾਦਨਨਿਮਿਤ੍ਤਂ ਪਰੇਸਂ ਕੁਹਨਂ ਵਿਮ੍ਹਾਪਨਂ ਕਰੋਨ੍ਤੋ. ਉਤ੍ਤਸਤੀਤਿ ਤਣ੍ਹਾਸਨ੍ਤਾਸੇਨ ਉਪਰੂਪਰਿ ਤਸਤਿ. ਪਰਿਤਸ੍ਸਤੀਤਿ ਪਰਿਤੋ ਤਸ੍ਸਤਿ. ਯਥਾ ਸਬ੍ਬੇ ਕਾਯਵਚਿਪ੍ਪਯੋਗਾ ਤਦਤ੍ਥਾ ਏਵ ਜਾਯਨ੍ਤਿ, ਏਵਂ ਸਬ੍ਬਭਾਗੇਹਿ ਤਸਤਿ. ਗਧਿਤਂ ਵੁਚ੍ਚਤਿ ਗਿਦ੍ਧੋ, ਸੋ ਚੇਤ੍ਥ ਅਭਿਜ੍ਝਾਲਕ੍ਖਣੋ ਅਧਿਪ੍ਪੇਤੋ. ਗਧਿਤਂ ਏਤਸ੍ਸ ਨਤ੍ਥੀਤਿ ਅਗਧਿਤੋਤਿ ਆਹ ‘‘ਵਿਗਤਲੋਭਗਿਦ੍ਧੋ’’ਤਿ. ਮੁਚ੍ਛਨ੍ਤਿ ਤਣ੍ਹਾਵਸੇਨ ਮੁਯ੍ਹਨਂ. ਤਸ੍ਸ ਸਮੁਸ੍ਸਯਸ੍ਸ ਅਧਿਗਤਂ ਅਨਾਪਨ੍ਨੋ ਅਨੁਪਗਤੋ. ਅਨੋਤ੍ਥਤੋ ਅਨਜ੍ਝੋਤ੍ਥਤੋ. ਅਪਰਿਯੋਨਦ੍ਧੋਤਿ ਤਣ੍ਹਚ੍ਛਦਨੇਨ ਅਚ੍ਛਾਦਿਤੋ. ਆਦੀਨਵਂ ਪਸ੍ਸਮਾਨੋਤਿ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਦੋਸਂ ਪਸ੍ਸਨ੍ਤੋ. ਗਧਿਤਪਰਿਭੋਗਤੋ ਨਿਸ੍ਸਰਤਿ ਏਤੇਨਾਤਿ ਨਿਸ੍ਸਰਣਂ, ਇਦਮਟ੍ਠਿਕਤਾ. ਤਂ ਪਜਾਨਾਤੀਤਿ ਨਿਸ੍ਸਰਣਪਞ੍ਞੋ. ਤੇਨਾਹ ‘‘ਯਾਵਦੇਵ…ਪੇ… ਜਾਨਨ੍ਤੋ’’ਤਿ.

ਨੇਵਤ੍ਤਾਨੁਕ੍ਕਂਸੇਤੀਤਿ ਅਤ੍ਤਾਨਂ ਨੇਵ ਉਕ੍ਕਂਸੇਤਿ ਨ ਉਕ੍ਖਿਪਤਿ ਨ ਉਕ੍ਕਟ੍ਠਤੋ ਦਹਤਿ. ਅਹਨ੍ਤਿਆਦਿ ਉਕ੍ਕਂਸਨਾਕਾਰਦਸ੍ਸਨਂ. ਨ ਵਮ੍ਭੇਤਿ ਨ ਹੀਲ਼ੇਤਿ ਨ ਨਿਹੀਨਤੋ ਦਹਤਿ. ਤਸ੍ਮਿਂ ਚੀਵਰਸਨ੍ਤੋਸੇਤਿ ਤਸ੍ਮਿਂ ਯਥਾਵੁਤ੍ਤੇ ਵੀਸਤਿਵਿਧੇ ਚੀਵਰਸਨ੍ਤੋਸੇ. ਕਾਮਞ੍ਚੇਤ੍ਥ ਵੁਤ੍ਤਪ੍ਪਕਾਰਸਨ੍ਤੋਸਗ੍ਗਹਣੇਨੇਵ ਚੀਵਰਹੇਤੁ ਅਨੇਸਨਾਪਜ੍ਜਨਾਦਿਪਿ ਗਹਿਤਮੇਵ ਤਸ੍ਮਿਂ ਸਤਿ ਤਸ੍ਸ ਭਾਵਤੋ, ਅਸਤਿ ਚ ਅਭਾਵਤੋ. ਵਣ੍ਣਵਾਦਿਤਾਅਤ੍ਤੁਕ੍ਕਂਸਨਪਰਵਮ੍ਭਨਾਨਿ ਪਨ ਗਹਿਤਾਨਿ ਨ ਹੋਨ੍ਤੀਤਿ ‘‘ਵਣ੍ਣਵਾਦਾਦੀਸੁ ਵਾ’’ਤਿ ਵਿਕਪ੍ਪੋ ਵੁਤ੍ਤੋ. ਏਤ੍ਥ ਚ ਦਕ੍ਖੋਤਿਆਦਿ ਯੇਸਂ ਧਮ੍ਮਾਨਂ ਵਸੇਨਸ੍ਸ ਯਥਾਵੁਤ੍ਤਸਨ੍ਤੋਸਾਦੀ ਇਜ੍ਝਨ੍ਤਿ, ਤਂਦਸ੍ਸਨਂ. ਤਤ੍ਥ ਦਕ੍ਖੋਤਿ ਇਮਿਨਾ ਤੇਸਂ ਸਮੁਟ੍ਠਾਪਨਪਞ੍ਞਂ ਦਸ੍ਸੇਤਿ. ਅਨਲਸੋਤਿ ਇਮਿਨਾ ਪਗ੍ਗਣ੍ਹਨਵੀਰਿਯਂ, ਸਮ੍ਪਜਾਨੋਤਿ ਇਮਿਨਾ ਪਾਰਿਹਾਰਿਯਪਞ੍ਞਂ, ਪਟਿਸ੍ਸਤੋਤਿ ਇਮਿਨਾ ਤਤ੍ਥ ਅਸਮ੍ਮੋਸਵੁਤ੍ਤਿਂ ਦਸ੍ਸੇਤਿ.

ਪਿਣ੍ਡਪਾਤੋ ਜਾਨਿਤਬ੍ਬੋਤਿ ਪਭੇਦਤੋ ਪਿਣ੍ਡਪਾਤੋ ਜਾਨਿਤਬ੍ਬੋ. ਪਿਣ੍ਡਪਾਤਕ੍ਖੇਤ੍ਤਨ੍ਤਿ ਪਿਣ੍ਡਪਾਤਸ੍ਸ ਉਪ੍ਪਤ੍ਤਿਟ੍ਠਾਨਂ. ਪਿਣ੍ਡਪਾਤਸਨ੍ਤੋਸੋ ਜਾਨਿਤਬ੍ਬੋਤਿ ਪਿਣ੍ਡਪਾਤਸਨ੍ਤੋਸਪ੍ਪਭੇਦੋ ਜਾਨਿਤਬ੍ਬੋ. ਇਧ ਭੇਸਜ੍ਜਮ੍ਪਿ ਪਿਣ੍ਡਪਾਤਗਤਿਕਮੇਵ. ਆਹਰਿਤਬ੍ਬਤੋ ਹਿ ਸਪ੍ਪਿਆਦੀਨਮ੍ਪਿ ਗਹਣਂ ਕਤਂ.

ਪਿਣ੍ਡਪਾਤਕ੍ਖੇਤ੍ਤਂ ਪਿਣ੍ਡਪਾਤਸ੍ਸ ਉਪ੍ਪਤ੍ਤਿਟ੍ਠਾਨਂ ਖੇਤ੍ਤਂ ਵਿਯ ਖੇਤ੍ਤਂ. ਉਪ੍ਪਜ੍ਜਤਿ ਏਤ੍ਥ, ਏਤੇਨਾਤਿ ਚ ਉਪ੍ਪਤ੍ਤਿਟ੍ਠਾਨਂ. ਸਙ੍ਘਤੋ ਵਾ ਹਿ ਭਿਕ੍ਖੁਨੋ ਪਿਣ੍ਡਪਾਤੋ ਉਪ੍ਪਜ੍ਜਤਿ ਉਦ੍ਦਿਸ੍ਸਵਸੇਨ ਵਾ. ਤਤ੍ਥ ਸਕਲਸ੍ਸ ਸਙ੍ਘਸ੍ਸ ਦਾਤਬ੍ਬਭਤ੍ਤਂ ਸਙ੍ਘਭਤ੍ਤਂ. ਕਤਿਪਯੇ ਭਿਕ੍ਖੂ ਉਦ੍ਦਿਸਿਤ੍ਵਾ ਉਦ੍ਦੇਸੇਨ ਦਾਤਬ੍ਬਭਤ੍ਤਂ ਉਦ੍ਦੇਸਭਤ੍ਤਂ. ਨਿਮਨ੍ਤੇਤ੍ਵਾ ਦਾਤਬ੍ਬਭਤ੍ਤਂ ਨਿਮਨ੍ਤਨਂ. ਸਲਾਕਾਯ ਦਾਤਬ੍ਬਭਤ੍ਤਂ ਸਲਾਕਭਤ੍ਤਂ. ਏਕਸ੍ਮਿਂ ਪਕ੍ਖੇ ਏਕਦਿਵਸਂ ਦਾਤਬ੍ਬਭਤ੍ਤਂ ਪਕ੍ਖਿਕਂ. ਉਪੋਸਥੇ ਉਪੋਸਥੇ ਦਾਤਬ੍ਬਭਤ੍ਤਂ ਉਪੋਸਥਿਕਂ. ਪਾਟਿਪਦਦਿਵਸੇ ਦਾਤਬ੍ਬਭਤ੍ਤਂ ਪਾਟਿਪਦਿਕਂ. ਆਗਨ੍ਤੁਕਾਨਂ ਦਾਤਬ੍ਬਭਤ੍ਤਂ ਆਗਨ੍ਤੁਕਭਤ੍ਤਂ. ਧੁਰਗੇਹੇ ਏਵ ਠਪੇਤ੍ਵਾ ਦਾਤਬ੍ਬਭਤ੍ਤਂ ਧੁਰਭਤ੍ਤਂ. ਕੁਟਿਂ ਉਦ੍ਦਿਸ੍ਸ ਦਾਤਬ੍ਬਭਤ੍ਤਂ ਕੁਟਿਭਤ੍ਤਂ. ਗਾਮਵਾਸਿਆਦੀਹਿ ਵਾਰੇਨ ਦਾਤਬ੍ਬਭਤ੍ਤਂ ਵਾਰਭਤ੍ਤਂ. ਵਿਹਾਰਂ ਉਦ੍ਦਿਸ੍ਸ ਦਾਤਬ੍ਬਭਤ੍ਤਂ ਵਿਹਾਰਭਤ੍ਤਂ. ਸੇਸਾਨਿ ਪਾਕਟਾਨੇਵ.

ਵਿਤਕ੍ਕੇਤਿ ‘‘ਕਤ੍ਥ ਨੁ ਖੋ ਅਹਂ ਅਜ੍ਜ ਪਿਣ੍ਡਾਯ ਚਰਿਸ੍ਸਾਮੀ’’ਤਿ. ‘‘ਸ੍ਵੇ ਕਤ੍ਥ ਪਿਣ੍ਡਾਯ ਚਰਿਸ੍ਸਾਮਾ’’ਤਿ ਥੇਰੇਨ ਵੁਤ੍ਤੇ ‘‘ਅਸੁਕਗਾਮੇ, ਭਨ੍ਤੇ’’ਤਿ ਕਾਮਮੇਤਂ ਪਟਿਵਚਨਦਾਨਂ, ਯੇਨ ਪਨ ਚਿਤ੍ਤੇਨ ਚਿਨ੍ਤੇਤ੍ਵਾ ਤਂ ਵੁਤ੍ਤਂ, ਤਂ ਸਨ੍ਧਾਯਾਹ ‘‘ਏਤ੍ਤਕਂ ਚਿਨ੍ਤੇਤ੍ਵਾ’’ਤਿ. ਤਤੋ ਪਟ੍ਠਾਯਾਤਿ ਵਿਤਕ੍ਕਮਾਲ਼ਕੇ ਠਤ੍ਵਾ ਵਿਤਕ੍ਕਿਤਕਾਲਤੋ ਪਟ੍ਠਾਯ. ਤਤੋ ਪਰਂ ਵਿਤਕ੍ਕੇਨ੍ਤੋ ਅਰਿਯਵਂਸਾ ਚੁਤੋ ਹੋਤੀਤਿ ਇਦਂ ਤਿਣ੍ਣਮ੍ਪਿ ਅਰਿਯਵਂਸਿਕਾਨਂ ਵਸੇਨ ਗਹੇਤਬ੍ਬਂ, ਨ ਏਕਚਾਰਿਕਸ੍ਸੇਵ. ਸਬ੍ਬੋਪਿ ਹਿ ਅਰਿਯਵਂਸਿਕੋ ਏਕਵਾਰਮੇਵ ਵਿਤਕ੍ਕੇਤੁਂ ਲਭਤਿ, ਨ ਤਤੋ ਪਰਂ. ਪਰਿਬਾਹਿਰੋਤਿ ਅਰਿਯਵਂਸਿਕਭਾਵਤੋ ਬਹਿਭੂਤੋ. ਸ੍ਵਾਯਂ ਵਿਤਕ੍ਕਸਨ੍ਤੋਸੋ ਕਮ੍ਮਟ੍ਠਾਨਮਨਸਿਕਾਰੇਨ ਨ ਕੁਪ੍ਪਤਿ ਵਿਸੁਜ੍ਝਤਿ ਚ. ਇਤੋ ਪਰੇਸੁਪਿ ਏਸੇਵ ਨਯੋ. ਤੇਨੇਵਾਹ ‘‘ਕਮ੍ਮਟ੍ਠਾਨਸੀਸੇਨ ਗਨ੍ਤਬ੍ਬ’’ਨ੍ਤਿ. ਗਹੇਤਬ੍ਬਮੇਵਾਤਿ ਅਟ੍ਠਾਨਪ੍ਪਯੁਤ੍ਤੋ ਏਵ-ਸਦ੍ਦੋ. ਯਾਪਨਮਤ੍ਤਮੇਵ ਗਹੇਤਬ੍ਬਨ੍ਤਿ ਯੋਜੇਤਬ੍ਬਂ.

ਏਤ੍ਥਾਤਿ ਏਤਸ੍ਮਿਂ ਪਿਣ੍ਡਪਾਤਪ੍ਪਟਿਗ੍ਗਹਣੇ. ਅਪ੍ਪਨ੍ਤਿ ਅਤ੍ਤਨੋ ਯਾਪਨਪ੍ਪਮਾਣਤੋਪਿ ਅਪ੍ਪਂ ਗਹੇਤਬ੍ਬਂ ਦਾਯਕਸ੍ਸ ਚਿਤ੍ਤਾਰਾਧਨਤ੍ਥਂ. ਪਮਾਣੇਨੇਵਾਤਿ ਅਤ੍ਤਨੋ ਪਮਾਣੇਨੇਵ ਅਪ੍ਪਂ ਗਹੇਤਬ੍ਬਂ. ਪਮਾਣੇਨ ਗਹੇਤਬ੍ਬਨ੍ਤਿ ਏਤ੍ਥ ਕਾਰਣਂ ਦਸ੍ਸੇਤੁਂ ‘‘ਪਟਿਗ੍ਗਹਣਸ੍ਮਿਞ੍ਹੀ’’ਤਿਆਦਿ ਵੁਤ੍ਤਂ. ਮਕ੍ਖੇਤੀਤਿ ਵਿਦ੍ਧਂਸੇਤਿ ਅਪਨੇਤਿ. ਵਿਨਿਪਾਤੇਤਿ ਵਿਨਾਸੇਤਿ ਅਟ੍ਠਾਨਵਿਨਿਯੋਗੇਨ. ਸਾਸਨਨ੍ਤਿ ਸਤ੍ਥੁਸਾਸਨਂ ਅਨੁਸਿਟ੍ਠਿਂ ਨ ਕਰੋਤਿ ਨ ਪਟਿਪਜ੍ਜਤਿ. ਸਪਦਾਨਚਾਰਿਨਾ ਵਿਯ ਦ੍ਵਾਰਪਟਿਪਾਟਿਯਾ ਚਰਣਂ ਲੋਲੁਪ੍ਪਵਿਵਜ੍ਜਨਸਨ੍ਤੋਸੋਤਿ ਆਹ ‘‘ਦ੍ਵਾਰਪਟਿਪਾਟਿਯਾ ਗਨ੍ਤਬ੍ਬ’’ਨ੍ਤਿ.

ਹਰਾਪੇਤ੍ਵਾਤਿ ਅਧਿਕਂ ਅਪਨੇਤ੍ਵਾ. ਆਹਾਰਗੇਧਤੋ ਨਿਸ੍ਸਰਤਿ ਏਤੇਨਾਤਿ ਨਿਸ੍ਸਰਣਂ. ਜਿਘਚ੍ਛਾਯ ਪਟਿਵਿਨੋਦਨਤ੍ਥਂ ਕਤਾ, ਕਾਯਸ੍ਸ ਠਿਤਿਆਦਿਪਯੋਜਨਂ ਪਨ ਅਤ੍ਥਾਪਤ੍ਤਿਤੋ ਆਗਤਮੇਵਾਤਿ ਆਹ ‘‘ਜਿਘਚ੍ਛਾਯ…ਪੇ… ਸਨ੍ਤੋਸੋ ਨਾਮਾ’’ਤਿ. ਨਿਦਹਿਤ੍ਵਾ ਨ ਪਰਿਭੁਞ੍ਜਿਤਬ੍ਬਂ ਤਦਹੁਪੀਤਿ ਅਧਿਪ੍ਪਾਯੋ. ਇਤਰਤ੍ਥ ਪਨ ਸਿਕ੍ਖਾਪਦੇਨੇਵ ਵਾਰਿਤਂ. ਸਾਰਣੀਯਧਮ੍ਮੇ ਠਿਤੇਨਾਤਿ ਸੀਲਵਨ੍ਤੇਹਿ ਭਿਕ੍ਖੂਹਿ ਸਾਧਾਰਣਭੋਗਿਭਾਵੇ ਠਿਤੇਨ.

ਸੇਨਾਸਨੇਨਾਤਿ ਸਯਨੇਨ ਆਸਨੇਨ ਚ. ਯਤ੍ਥ ਯਤ੍ਥ ਹਿ ਮਞ੍ਚਾਦਿਕੇ ਵਿਹਾਰਾਦਿਕੇ ਚ ਸੇਤਿ, ਤਂ ਸੇਨਂ. ਯਤ੍ਥ ਯਤ੍ਥ ਪੀਠਾਦਿਕੇ ਆਸਤਿ, ਤਂ ਆਸਨਂ. ਤਦੁਭਯਂ ਏਕਤੋ ਕਤ੍ਵਾ ‘‘ਸੇਨਾਸਨ’’ਨ੍ਤਿ ਵੁਤ੍ਤਂ. ਤੇਨਾਹ ‘‘ਮਞ੍ਚੋ’’ਤਿਆਦਿ. ਤਤ੍ਥ ਮਞ੍ਚੋ ਮਸਾਰਕਾਦਿ. ਤਥਾ ਪੀਠਂ. ਮਞ੍ਚਭਿਸਿ, ਪੀਠਭਿਸੀਤਿ ਦੁਵਿਧੋ ਭਿਸਿ. ਵਿਹਾਰੋ ਪਾਕਾਰਪਰਿਚ੍ਛਿਨ੍ਨੋ ਸਕਲੋ ਆਵਾਸੋ, ‘‘ਦੀਘਮੁਖਪਾਸਾਦੋ’’ਤਿ ਕੇਚਿ. ਅਡ੍ਢਯੋਗੋ ਦੀਘਪਾਸਾਦੋ, ‘‘ਏਕਪਸ੍ਸਚ੍ਛਾਦਨਕਸੇਨਾਸਨ’’ਨ੍ਤਿ ਕੇਚਿ. ਪਾਸਾਦੋਤਿ ਚਤੁਰਸ੍ਸਪਾਸਾਦੋ, ‘‘ਆਯਤਚਤੁਰਸ੍ਸਪਾਸਾਦੋ’’ਤਿ ਕੇਚਿ. ਹਮ੍ਮਿਯਨ੍ਤਿ ਮੁਣ੍ਡਚ੍ਛਦਨਪਾਸਾਦੋ. ਗੁਹਾਤਿ ਕੇਵਲਾ ਪਬ੍ਬਤਗੁਹਾ. ਲੇਣਂ ਦ੍ਵਾਰਬਨ੍ਧਂ. ਅਟ੍ਟੋ ਬਹਲਭਿਤ੍ਤਿਕਗੇਹਂ, ਯਸ੍ਸ ਗੋਪਾਨਸਿਯੋ ਅਗ੍ਗਹੇਤ੍ਵਾ ਇਟ੍ਠਕਾਹਿ ਏਵ ਛਦਨਂ ਹੋਤਿ, ‘‘ਅਟ੍ਟਲਾਕਾਰੇਨ ਕਰੀਯਤੀ’’ਤਿਪਿ ਵਦਨ੍ਤਿ. ਮਾਲ਼ੋ ਏਕਕੂਟਸਙ੍ਗਹਿਤੋ ਅਨੇਕਕੋਣੋ ਪਟਿਸ੍ਸਯਵਿਸੇਸੋ, ‘‘ਵਟ੍ਟਾਕਾਰੇਨ ਕਤਸੇਨਾਸਨ’’ਨ੍ਤਿ ਕੇਚਿ.

ਪਿਣ੍ਡਪਾਤੇ ਵੁਤ੍ਤਨਯੇਨੇਵਾਤਿ ‘‘ਸਾਦਕੋ ਭਿਕ੍ਖੁ ‘ਅਹਂ ਕਤ੍ਥ ਵਸਿਸ੍ਸਾਮੀ’ਤਿ ਵਿਤਕ੍ਕੇਤੀ’’ਤਿਆਦਿਨਾ ਯਥਾਰਹਂ ਪਿਣ੍ਡਪਾਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ‘‘ਤਤੋ ਪਰਂ ਵਿਤਕ੍ਕੇਨ੍ਤੋ ਅਰਿਯਵਂਸਾ ਚੁਤੋ ਹੋਤਿ ਪਰਿਬਾਹਿਰੋ, ਸੇਨਾਸਨਂ ਕੁਹਿਂ ਲਭਿਸ੍ਸਾਮੀਤਿ ਅਚਿਨ੍ਤੇਤ੍ਵਾ ਕਮ੍ਮਟ੍ਠਾਨਸੀਸੇਨੇਵ ਗਨ੍ਤਬ੍ਬ’’ਨ੍ਤਿ ਚ ਏਵਮਾਦਿ ਸਬ੍ਬਂ ਪੁਰਿਮਨਯੇਨੇਵ.

ਕਸ੍ਮਾ ਪਨੇਤ੍ਥ ਪਚ੍ਚਯਸਨ੍ਤੋਸਂ ਦਸ੍ਸੇਨ੍ਤੇਨ ਭਗਵਤਾ ਗਿਲਾਨਪਚ੍ਚਯਸਨ੍ਤੋਸੋ ਨ ਗਹਿਤੋਤਿ? ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਗਿਲਾਨਪਚ੍ਚਯੋ ਪਨ ਪਿਣ੍ਡਪਾਤੇ ਏਵ ਪਵਿਟ੍ਠੋ’’ਤਿ ਆਹ, ਆਹਰਿਤਬ੍ਬਤਾਸਾਮਞ੍ਞੇਨਾਤਿ ਅਧਿਪ੍ਪਾਯੋ. ਯਦਿ ਏਵਂ ਤਤ੍ਥਾਪਿ ਪਿਣ੍ਡਪਾਤੇ ਵਿਯ ਵਿਤਕ੍ਕਸਨ੍ਤੋਸਾਦਯੋਪਿ ਪਨ੍ਨਰਸ ਸਨ੍ਤੋਸਾ ਇਚ੍ਛਿਤਬ੍ਬਾਤਿ? ਨੋਤਿ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਨਨੁ ਚੇਤ੍ਥ ਦ੍ਵਾਦਸੇਵ ਧੁਤਙ੍ਗਾਨਿ ਵਿਨਿਯੋਗਂ ਗਤਾਨਿ, ਏਕਂ ਪਨ ਨੇਸਜ੍ਜਿਕਙ੍ਗਂ ਨ ਕਤ੍ਥਚਿ ਵਿਨਿਯੁਤ੍ਤਨ੍ਤਿ ਆਹ ‘‘ਨੇਸਜ੍ਜਿਕਙ੍ਗਂ ਭਾਵਨਾਰਾਮਅਰਿਯਵਂਸਂ ਭਜਤੀ’’ਤਿ. ਅਯਞ੍ਚ ਅਤ੍ਥੋ ਅਟ੍ਠਕਥਾਰੁਲ਼੍ਹੋ ਏਵਾਤਿ ਦਸ੍ਸੇਨ੍ਤੋ ‘‘ਵੁਤ੍ਤਮ੍ਪਿ ਚੇਤ’’ਨ੍ਤਿਆਦਿਮਾਹ.

ਪਥਵਿਂ ਪਤ੍ਥਰਮਾਨੋ ਵਿਯਾਤਿਆਦਿ ਅਰਿਯਵਂਸਦੇਸਨਾਯ ਸੁਦੁਕ੍ਕਰਭਾਵਦਸ੍ਸਨਂ ਮਹਾਵਿਸਯਤ੍ਤਾ ਤਸ੍ਸਾ ਦੇਸਨਾਯ. ਯਸ੍ਮਾ ਨਯਸਹਸ੍ਸਪਟਿਮਣ੍ਡਿਤਂ ਹੋਤਿ, ਅਰਿਯਮਗ੍ਗਾਧਿਗਮਾਯ ਵਿਤ੍ਥਾਰਤੋ ਪਵਤ੍ਤਿਯਮਾਨਾ ਦੇਸਨਾ ਚਿਤ੍ਤੁਪ੍ਪਾਦਕਣ੍ਡੇ ਅਯਞ੍ਚ ਭਾਵਨਾਰਾਮਅਰਿਯਵਂਸਕਥਾ ਅਰਿਯਮਗ੍ਗਾਧਿਗਮਾਯ ਵਿਤ੍ਥਾਰਤੋ ਪਵਤ੍ਤਿਯਮਾਨਾ ਏਵ ਹੋਤੀਤਿ ਵੁਤ੍ਤਂ ‘‘ਸਹਸ੍ਸਨਯਪਟਿਮਣ੍ਡਿਤਂ…ਪੇ… ਦੇਸਨਂ ਆਰਭੀ’’ਤਿ.

ਪਟਿਪਕ੍ਖਵਿਧਮਨਤੋ ਅਭਿਮੁਖਭਾਵੇਨ ਰਮਣਂ ਆਰਮਣਂ ਆਰਾਮੋਤਿ ਆਹ ‘‘ਅਭਿਰਤੀਤਿ ਅਤ੍ਥੋ’’ਤਿ. ਬ੍ਯਧਿਕਰਣਾਨਮ੍ਪਿ ਪਦਾਨਂ ਵਸੇਨ ਭਵਤਿ ਬਾਹਿਰਤ੍ਥਸਮਾਸੋ ਯਥਾ ‘‘ਉਰਸਿਲੋਮੋ ਕਣ੍ਠੇਕਾਲ਼ੋ’’ਤਿ ਆਹ ‘‘ਭਾਵਨਾਯ ਆਰਾਮੋ ਅਸ੍ਸਾਤਿ ਭਾਵਨਾਰਾਮੋ’’ਤਿ. ਅਭਿਰਮਿਤਬ੍ਬਟ੍ਠੇਨ ਵਾ ਆਰਾਮੋ, ਭਾਵਨਾ ਆਰਾਮੋ ਅਸ੍ਸਾਤਿ ਭਾਵਨਾਰਾਮੋਤਿ ਏਵਮ੍ਪੇਤ੍ਥ ਸਮਾਸਯੋਜਨਾ ਵੇਦਿਤਬ੍ਬਾ. ਭਾਵੇਨ੍ਤੋ ਰਮਤੀਤਿ ਏਤੇਨ ਭਾਵਨਾਰਾਮਸਦ੍ਦਾਨਂ ਕਤ੍ਤੁਸਾਧਨਤਂ ਕਮ੍ਮਧਾਰਯਸਮਾਸਤਞ੍ਚ ਦਸ੍ਸੇਤਿ. ‘‘ਪਜਹਨ੍ਤੋ ਰਮਤੀ’’ਤਿ ਵੁਤ੍ਤਤ੍ਤਾ ਪਹਾਨਾਰਾਮੋਤਿ ਏਤ੍ਥਾਪਿ ਏਸੇਵ ਨਯੋ.

ਕਾਮਂ ‘‘ਨੇਸਜ੍ਜਿਕਙ੍ਗਂ ਭਾਵਨਾਰਾਮਅਰਿਯਵਂਸਂ ਭਜਤੀ’’ਤਿ ਵੁਤ੍ਤਂ ਭਾਵਨਾਨੁਯੋਗਸ੍ਸ ਅਨੁਚ੍ਛਵਿਕਤ੍ਤਾ, ਨੇਸਜ੍ਜਿਕਙ੍ਗਵਸੇਨ ਪਨ ਨੇਸਜ੍ਜਿਕਸ੍ਸ ਭਿਕ੍ਖੁਨੋ ਏਕਚ੍ਚਾਹਿ ਆਪਤ੍ਤੀਹਿ ਅਨਾਪਤ੍ਤਿਭਾਵੋਤਿ ਤਮ੍ਪਿ ਸਙ੍ਗਣ੍ਹਨ੍ਤੋ ‘‘ਤੇਰਸਨ੍ਨਂ ਧੁਤਙ੍ਗਾਨ’’ਨ੍ਤਿ ਵਤ੍ਵਾ ਵਿਨਯਂ ਪਤ੍ਵਾ ਗਰੁਕੇ ਠਾਤਬ੍ਬਨ੍ਤਿ ਇਚ੍ਛਿਤਤ੍ਤਾ ਸਲ੍ਲੇਖਸ੍ਸ ਅਪਰਿਚ੍ਚਜਨਵਸੇਨ ਪਟਿਪਤ੍ਤਿ ਨਾਮ ਵਿਨਯੇ ਠਿਤਸ੍ਸੇਵਾਤਿ ਆਹ ‘‘ਤੇਰਸਨ੍ਨਂ…ਪੇ… ਕਥਿਤਂ ਹੋਤੀ’’ਤਿ. ਕਾਮਂ ਸੁਤ੍ਤਾਭਿਧਮ੍ਮਪਿਟਕੇਸੁਪਿ ਤਤ੍ਥ ਤਤ੍ਥ ਸੀਲਕਥਾ ਆਹਟਾਯੇਵ, ਯੇਹਿ ਪਨ ਗੁਣੇਹਿ ਸੀਲਸ੍ਸ ਵੋਦਾਨਂ ਹੋਤਿ, ਤੇਸੁ ਕਥਿਤੇਸੁ ਯਥਾ ਸੀਲਕਥਾਬਾਹੁਲ੍ਲਂ ਵਿਨਯਪਿਟਕਂ ਕਥਿਤਂ ਹੋਤਿ, ਏਵਂ ਭਾਵਨਾਕਥਾਬਾਹੁਲ੍ਲਂ ਸੁਤ੍ਤਪਿਟਕਂ ਅਭਿਧਮ੍ਮਪਿਟਕਞ੍ਚ ਚਤੁਤ੍ਥੇਨ ਅਰਿਯਵਂਸੇਨ ਕਥਿਤੇਨ ਕਥਿਤਮੇਵ ਹੋਤੀਤਿ ਵੁਤ੍ਤਂ ‘‘ਭਾਵਨਾਰਾਮੇਨ ਅਵਸੇਸਂ ਪਿਟਕਦ੍ਵਯਂ ਕਥਿਤ’’ਨ੍ਤਿ. ‘‘ਸੋ ਨੇਕ੍ਖਮ੍ਮਂ ਭਾਵੇਨ੍ਤੋ ਰਮਤੀ’’ਤਿ ਨੇਕ੍ਖਮ੍ਮਪਦਂ ਆਦਿਂ ਕਤ੍ਵਾ ਤਤ੍ਥ ਦੇਸਨਾਯ ਪਵਤ੍ਤਤ੍ਤਾ ਸਬ੍ਬੇਸਮ੍ਪਿ ਵਾ ਸਮਥਵਿਪਸ੍ਸਨਾਮਗ੍ਗਧਮ੍ਮਾਨਂ ਯਥਾਸਕਂ ਪਟਿਪਕ੍ਖਤੋ ਨਿਕ੍ਖਮਨੇਨ ਨੇਕ੍ਖਮ੍ਮਸਞ੍ਞਿਤਾਨਂ ਤਤ੍ਥ ਆਗਤਤ੍ਤਾ ਸੋ ਪਾਠੋ ਨੇਕ੍ਖਮ੍ਮਪਾਲ਼ੀਤਿ ਵੁਚ੍ਚਤੀਤਿ ਆਹ ‘‘ਨੇਕ੍ਖਮਪਾਲ਼ਿਯਾ ਕਥੇਤਬ੍ਬੋ’’ਤਿ. ਤੇਨਾਹ ਅਟ੍ਠਕਥਾਯਂ ‘‘ਸਬ੍ਬੇਪਿ ਕੁਸਲਾ ਧਮਾ, ਨੇਕ੍ਖਮ੍ਮਨ੍ਤਿ ਪਵੁਚ੍ਚਰੇ’’ਤਿ. ਦਸੁਤ੍ਤਰਸੁਤ੍ਤਨ੍ਤਪਰਿਯਾਯੇਨਾਤਿ ਦਸੁਤ੍ਤਰਸੁਤ੍ਤਨ੍ਤਧਮ੍ਮੇਨ (ਦੀ. ਨਿ. ੩.੩੫੦ ਆਦਯੋ) ਦਸੁਤ੍ਤਰਸੁਤ੍ਤਨ੍ਤੇ ਆਗਤਨਯੇਨਾਤਿ ਵਾ ਅਤ੍ਥੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ.

ਸੋਤਿ ਜਾਗਰਿਯਂ ਅਨੁਯੁਤ੍ਤੋ ਭਿਕ੍ਖੁ. ਨੇਕ੍ਖਮ੍ਮਨ੍ਤਿ ਕਾਮੇਹਿ ਨਿਕ੍ਖਨ੍ਤਭਾਵਤੋ ਨੇਕ੍ਖਮ੍ਮਸਞ੍ਞਿਤਂ ਪਠਮਜ੍ਝਾਨੂਪਚਾਰਂ, ਸੋ ‘‘ਅਭਿਜ੍ਝਂ ਲੋਕੇ ਪਹਾਯਾ’’ਤਿਆਦਿਨਾ (ਵਿਭ. ੫੦੮) ਆਗਤੋ. ਪਠਮਜ੍ਝਾਨਸ੍ਸ ਪੁਬ੍ਬਭਾਗਭਾਵਨਾ ਹਿ ਇਧਾਧਿਪ੍ਪੇਤਾ, ਤਸ੍ਮਾ ‘‘ਅਬ੍ਯਾਪਾਦ’’ਨ੍ਤਿਆਦੀਸੁਪਿ ਏਵਮੇਵ ਅਤ੍ਥੋ ਵੇਦਿਤਬ੍ਬੋ. ਸਉਪਾਯਾਨਞ੍ਹਿ ਅਟ੍ਠਨ੍ਨਂ ਸਮਾਪਤ੍ਤੀਨਂ ਅਟ੍ਠਾਰਸਨ੍ਨਂ ਮਹਾਵਿਪਸ੍ਸਨਾਨਂ ਚਤੁਨ੍ਨਂ ਅਰਿਯਮਗ੍ਗਾਨਞ੍ਚ ਵਸੇਨੇਤ੍ਥ ਦੇਸਨਾ ਪਵਤ੍ਤਾਤਿ. ਤਤ੍ਥ ਅਬ੍ਯਾਪਾਦਨ੍ਤਿ ਮੇਤ੍ਤਾ. ਆਲੋਕਸਞ੍ਞਨ੍ਤਿ ਵਿਭੂਤਂ ਕਤ੍ਵਾ ਮਨਸਿਕਰਣੇਨ ਉਪਟ੍ਠਿਤਆਲੋਕਸਞ੍ਜਾਨਨਂ. ਅਵਿਕ੍ਖੇਪਨ੍ਤਿ ਸਮਾਧਿਂ. ਧਮ੍ਮਵਵਤ੍ਥਾਨਨ੍ਤਿ ਕੁਸਲਾਦਿਧਮ੍ਮਾਨਂ ਯਾਥਾਵਨਿਚ੍ਛਯਂ, ‘‘ਸਪਚ੍ਚਯਨਾਮਵਵਤ੍ਥਾਨ’’ਨ੍ਤਿਪਿ ਵਦਨ੍ਤਿ. ਏਵਂ ਕਾਮਚ੍ਛਨ੍ਦਾਦਿਨੀਵਰਣਪ੍ਪਹਾਨੇਨ ‘‘ਅਭਿਜ੍ਝਂ ਲੋਕੇ ਪਹਾਯਾ’’ਤਿਆਦਿਨਾ ਵੁਤ੍ਤਸ੍ਸ ਪਠਮਜ੍ਝਾਨਸ੍ਸ ਪੁਬ੍ਬਭਾਗਪਟਿਪਦਾਯ ਭਾਵਨਾਰਾਮਤਂ ਪਹਾਨਾਰਾਮਤਞ੍ਚ ਦਸ੍ਸੇਤ੍ਵਾ ਇਦਾਨਿ ਸਹ ਉਪਾਯੇਨ ਅਟ੍ਠਸਮਾਪਤ੍ਤੀਹਿ ਅਟ੍ਠਾਰਸਹਿ ਚ ਮਹਾਵਿਪਸ੍ਸਨਾਹਿ ਤਂ ਦਸ੍ਸੇਤੁਂ ‘‘ਞਾਣ’’ਨ੍ਤਿਆਦਿਮਾਹ. ਨਾਮਰੂਪਪਰਿਗ੍ਗਹਣਕਙ੍ਖਾਵਿਤਰਣਾਨਞ੍ਹਿ ਵਿਬਨ੍ਧਭੂਤਸ੍ਸ ਮੋਹਸ੍ਸ ਦੂਰੀਕਰਣੇਨ ਞਾਤਪਰਿਞ੍ਞਾਯ ਠਿਤਸ੍ਸ ਅਨਿਚ੍ਚਸਞ੍ਞਾਦਯੋ ਸਿਜ੍ਝਨ੍ਤਿ. ਤਥਾ ਝਾਨਸਮਾਪਤ੍ਤੀਸੁ ਅਨਭਿਰਤਿਨਿਮਿਤ੍ਤੇਨ ਪਾਮੋਜ੍ਜੇਨ ਤਤ੍ਥ ਅਨਭਿਰਤਿਯਾ ਵਿਨੋਦਿਤਾਯ ਝਾਨਾਦੀਨਂ ਸਮਧਿਗਮੋਤਿ ਸਮਾਪਤ੍ਤਿਵਿਪਸ੍ਸਨਂ ਅਰਤਿਵਿਨੋਦਨਅਵਿਜ੍ਜਾਪਦਾਲਨਉਪਾਯੋ. ਉਪ੍ਪਟਿਪਾਟਿਨਿਦ੍ਦੇਸੋ ਪਨ ਨੀਵਰਣਸਭਾਵਾਯ ਅਵਿਜ੍ਜਾਯ ਹੇਟ੍ਠਾਨੀਵਰਣੇਸੁ ਸਙ੍ਗਹਦਸ੍ਸਨਤ੍ਥਨ੍ਤਿ ਦਟ੍ਠਬ੍ਬਂ. ਕਿਞ੍ਚਾਪਿ ਪਠਮਜ੍ਝਾਨੂਪਚਾਰੇਯੇਵ ਦੁਕ੍ਖਂ, ਚਤੁਤ੍ਥਜ੍ਝਾਨੂਪਚਾਰੇਯੇਵ ਸੁਖਂ ਪਹੀਯਤਿ, ਅਤਿਸਯਪ੍ਪਹਾਨਂ ਪਨ ਸਨ੍ਧਾਯਾਹ ‘‘ਚਤੁਤ੍ਥਜ੍ਝਾਨਂ ਸੁਖਦੁਕ੍ਖੇ’’ਤਿ.

ਅਨਿਚ੍ਚਸ੍ਸ, ਅਨਿਚ੍ਚਨ੍ਤਿ ਚ ਅਨੁਪਸ੍ਸਨਾ ਅਨਿਚ੍ਚਾਨੁਪਸ੍ਸਨਾ, ਤੇਭੂਮਕਧਮ੍ਮਾਨਂ ਅਨਿਚ੍ਚਤਂ ਗਹੇਤ੍ਵਾ ਪਵਤ੍ਤਾਯ ਅਨੁਪਸ੍ਸਨਾਯੇਤਂ ਨਾਮਂ. ਨਿਚ੍ਚਸਞ੍ਞਨ੍ਤਿ ਸਙ੍ਖਤਧਮ੍ਮੇਸੁ ਨਿਚ੍ਚਾ ਸਸ੍ਸਤਾਤਿ ਪਵਤ੍ਤਂ ਮਿਚ੍ਛਾਸਞ੍ਞਂ. ਸਞ੍ਞਾਸੀਸੇਨ ਦਿਟ੍ਠਿਚਿਤ੍ਤਾਨਮ੍ਪਿ ਗਹਣਂ ਦਟ੍ਠਬ੍ਬਂ. ਏਸ ਨਯੋ ਇਤੋ ਪਰੇਸੁਪਿ. ਨਿਬ੍ਬਿਦਾਨੁਪਸ੍ਸਨਨ੍ਤਿ ਸਙ੍ਖਾਰੇਸੁ ਨਿਬ੍ਬਿਨ੍ਦਨਾਕਾਰੇਨ ਪਵਤ੍ਤਂ ਅਨੁਪਸ੍ਸਨਂ. ਨਨ੍ਦਿਨ੍ਤਿ ਸਪ੍ਪੀਤਿਕਤਣ੍ਹਂ. ਵਿਰਾਗਾਨੁਪਸ੍ਸਨਨ੍ਤਿ ਵਿਰਜ੍ਜਨਾਕਾਰੇਨ ਪਵਤ੍ਤਂ ਅਨੁਪਸ੍ਸਨਂ. ਨਿਰੋਧਾਨੁਪਸ੍ਸਨਨ੍ਤਿ ਸਙ੍ਖਾਰਾਨਂ ਨਿਰੋਧਸ੍ਸ ਅਨੁਪਸ੍ਸਨਂ. ‘‘ਤੇ ਸਙ੍ਖਾਰਾ ਨਿਰੁਜ੍ਝਨ੍ਤਿਯੇਵ, ਆਯਤਿਂ ਸਮੁਦਯਵਸੇਨ ਨ ਉਪ੍ਪਜ੍ਜਨ੍ਤੀ’’ਤਿ ਏਵਂ ਵਾ ਅਨੁਪਸ੍ਸਨਾ ਨਿਰੋਧਾਨੁਪਸ੍ਸਨਾ. ਤੇਨੇਵਾਹ ‘‘ਨਿਰੋਧਾਨੁਪਸ੍ਸਨਾਯ ਨਿਰੋਧੇਤਿ ਨੋ ਸਮੁਦੇਤੀ’’ਤਿ. ਮੁਚ੍ਚਿਤੁਕਾਮਤਾ ਹਿ ਅਯਂ ਬਲਪ੍ਪਤ੍ਤਾਤਿ. ਪਟਿਨਿਸ੍ਸਜ੍ਜਨਾਕਾਰੇਨ ਪਵਤ੍ਤਾ ਅਨੁਪਸ੍ਸਨਾ ਪਟਿਨਿਸ੍ਸਗ੍ਗਾਨੁਪਸ੍ਸਨਾ. ਪਟਿਸਙ੍ਖਾ ਸਨ੍ਤਿਟ੍ਠਨਾ ਹਿ ਅਯਂ. ਆਦਾਨਨ੍ਤਿ ਨਿਚ੍ਚਾਦਿਵਸੇਨ ਗਹਣਂ. ਸਨ੍ਤਤਿਸਮੂਹਕਿਚ੍ਚਾਰਮ੍ਮਣਾਨਂ ਵਸੇਨ ਏਕਤ੍ਤਗ੍ਗਹਣਂ ਘਨਸਞ੍ਞਾ. ਆਯੂਹਨਂ ਅਭਿਸਙ੍ਖਰਣਂ. ਅਵਤ੍ਥਾਵਿਸੇਸਾਪਤ੍ਤਿ ਵਿਪਰਿਣਾਮੋ. ਧੁਵਸਞ੍ਞਨ੍ਤਿ ਥਿਰਭਾਵਗ੍ਗਹਣਂ.

ਨਿਮਿਤ੍ਤਨ੍ਤਿ ਸਮੂਹਘਨਵਸੇਨ, ਸਕਿਚ੍ਚਪਰਿਚ੍ਛੇਦਤਾਯ ਚ ਸਙ੍ਖਾਰਾਨਂ ਸਵਿਗ੍ਗਹਤਂ. ਪਣਿਧਿਨ੍ਤਿ ਰਾਗਾਦਿਪਣਿਧਿਂ. ਸਾ ਪਨਤ੍ਥਤੋ ਤਣ੍ਹਾਵਸੇਨ ਸਙ੍ਖਾਰੇਸੁ ਨਿਨ੍ਨਤਾ. ਅਭਿਨਿਵੇਸਨ੍ਤਿ ਅਤ੍ਤਾਨੁਦਿਟ੍ਠਿ. ਅਨਿਚ੍ਚਦੁਕ੍ਖਾਦਿਵਸੇਨ ਸਬ੍ਬਧਮ੍ਮਤੀਰਣਂ ਅਧਿਪਞ੍ਞਾਧਮ੍ਮਵਿਪਸ੍ਸਨਾ. ਸਾਰਾਦਾਨਾਭਿਨਿਵੇਸਨ੍ਤਿ ਅਸਾਰੇ ਸਾਰਨ੍ਤਿ ਗਹਣਵਿਪਲ੍ਲਾਸਂ. ‘‘ਇਸ੍ਸਰਕੁਤ੍ਤਾਦਿਵਸੇਨ ਲੋਕੋ ਸਮੁਪ੍ਪਨ੍ਨੋ’’ਤਿ ਅਭਿਨਿਵੇਸੋ ਸਮ੍ਮੋਹਾਭਿਨਿਵੇਸੋ. ਕੇਚਿ ਪਨ ‘‘ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨਨ੍ਤਿਆਦਿਨਾ (ਮ. ਨਿ. ੧.੧੮; ਸਂ. ਨਿ. ੨.੨੦) ਪਵਤ੍ਤਸਂਸਯਾਪਤ੍ਤਿ ਸਮ੍ਮੋਹਾਭਿਨਿਵੇਸੋ’’ਤਿ ਵਦਨ੍ਤਿ. ਸਙ੍ਖਾਰੇਸੁ ਤਾਣਲੇਣਭਾਵਗ੍ਗਹਣਂ ਆਲਯਾਭਿਨਿਵੇਸੋ. ‘‘ਆਲਯਰਤਾ ਆਲਯਸਮ੍ਮੁਦਿਤਾ’’ਤਿ (ਦੀ. ਨਿ. ੨.੬੪, ੬੭; ਮ. ਨਿ. ੧.੨੮੧; ੨.੩੩੭; ਸਂ. ਨਿ. ੧.੧੭੨; ਮਹਾਵ. ੭, ੮) ਚ ਵਚਨਤੋ ਆਲਯੋ ਤਣ੍ਹਾ, ਸਾਯੇਵ ਚਕ੍ਖਾਦੀਸੁ ਰੂਪਾਦੀਸੁ ਚ ਅਭਿਨਿਵੇਸਵਸੇਨ ਪਵਤ੍ਤਿਯਾ ਆਲਯਾਭਿਨਿਵੇਸੋਤਿ ਕੇਚਿ. ਏਵਂ ਠਿਤਾ ਤੇ ਸਙ੍ਖਾਰਾ ਪਟਿਨਿਸ੍ਸਜ੍ਜੀਯਨ੍ਤੀਤਿ ਪਵਤ੍ਤਂ ਞਾਣਂ ਪਟਿਸਙ੍ਖਾਨੁਪਸ੍ਸਨਾ. ਵਟ੍ਟਤੋ ਵਿਗਤਤ੍ਤਾ ਵਿਵਟ੍ਟਂ ਨਿਬ੍ਬਾਨਂ, ਤਤ੍ਥ ਆਰਮ੍ਮਣਸਙ੍ਖਾਤੇਨ ਅਨੁਪਸ੍ਸਨੇਨ ਪਵਤ੍ਤਿਯਾ ਵਿਵਟ੍ਟਾਨੁਪਸ੍ਸਨਾ ਗੋਤ੍ਰਭੁ. ਸਂਯੋਗਾਭਿਨਿਵੇਸਨ੍ਤਿ ਸਂਯੁਜ੍ਜਨਵਸੇਨ ਸਙ੍ਖਾਰੇਸੁ ਨਿਵੇਸਨਂ. ਦਿਟ੍ਠੇਕਟ੍ਠੇਤਿ ਦਿਟ੍ਠਿਯਾ ਸਹਜਾਤੇਕਟ੍ਠੇ ਪਹਾਨੇਕਟ੍ਠੇ ਚ. ਓਲ਼ਾਰਿਕੇਤਿ ਉਪਰਿਮਗ੍ਗਵਜ੍ਝੇ ਕਿਲੇਸੇ ਅਪੇਕ੍ਖਿਤ੍ਵਾ ਵੁਤ੍ਤਂ, ਅਞ੍ਞਥਾ ਦਸ੍ਸਨਪ੍ਪਹਾਤਬ੍ਬਾਪਿ ਦੁਤਿਯਮਗ੍ਗਵਜ੍ਝੇਹਿਪਿ ਓਲ਼ਾਰਿਕਾਤਿ. ਅਣੁਸਹਗਤੇਤਿ ਅਣੁਭੂਤੇ. ਇਦਂ ਹੇਟ੍ਠਿਮਮਗ੍ਗਵਜ੍ਝੇ ਅਪੇਕ੍ਖਿਤ੍ਵਾ ਵੁਤ੍ਤਂ. ਸਬ੍ਬਕਿਲੇਸੇਤਿ ਅਵਸਿਟ੍ਠਸਬ੍ਬਕਿਲੇਸੇ. ਨ ਹਿ ਪਠਮਾਦਿਮਗ੍ਗੇਹਿਪਿ ਪਹੀਨਾ ਕਿਲੇਸਾ ਪੁਨ ਪਹੀਯਨ੍ਤੀਤਿ.

ਏਵਨ੍ਤਿ ਪਟਿਸਮ੍ਭਿਦਾਮਗ੍ਗੇ (ਪਟਿ. ਮ. ੧.੪੧, ੯੫) ਨੇਕ੍ਖਮ੍ਮਪਾਲ਼ਿਯਾ ਯੋਜਨਂ ਨਿਗਮੇਤ੍ਵਾ ਦੀਘਨਿਕਾਯੇਤਿਆਦਿਨਾ ਦਸੁਤ੍ਤਰਪਰਿਯਾਯੇਨ (ਦੀ. ਨਿ. ੩.੩੫੦ ਆਦਯੋ) ਯੋਜਨਂ ਦਸ੍ਸੇਤਿ. ਏਕਂ ਧਮ੍ਮਂ ਭਾਵੇਨ੍ਤੋ ਰਮਤਿ, ਏਕਂ ਧਮ੍ਮਂ ਪਜਹਨ੍ਤੋ ਰਮਤੀਤਿ ਚ ਨਯਿਦਂ ਦਸੁਤ੍ਤਰਸੁਤ੍ਤੇ (ਦੀ. ਨਿ. ੩.੩੫੦ ਆਦਯੋ) ਆਗਤਨਿਯਾਮੇਨ ਵੁਤ੍ਤਂ, ਤਤ੍ਥ ਪਨ ‘‘ਏਕੋ ਧਮ੍ਮੋ ਭਾਵੇਤਬ੍ਬੋ, ਏਕੋ ਧਮ੍ਮੋ ਪਹਾਤਬ੍ਬੋ’’ਤਿ ਦੇਸਨਾ ਆਗਤਾ. ਏਵਂ ਸਨ੍ਤੇਪਿ ਯਸ੍ਮਾ ਅਤ੍ਥਤੋ ਭੇਦੋ ਨਤ੍ਥਿ, ਤਸ੍ਮਾ ਪਟਿਸਮ੍ਭਿਦਾਮਗ੍ਗੇ (ਪਟਿ. ਮ. ੧.੪੧, ੯੫) ਨੇਕ੍ਖਮ੍ਮਪਾਲ਼ਿਯਂ ਆਗਤਨੀਹਾਰੇਨੇਵ ‘‘ਏਕਂ ਧਮ੍ਮਂ ਭਾਵੇਨ੍ਤੋ ਰਮਤਿ, ਏਕਂ ਧਮ੍ਮਂ ਪਜਹਨ੍ਤੋ ਰਮਤੀ’’ਤਿ ਵੁਤ੍ਤਂ. ਏਸ ਨਯੋ ਸੇਸਵਾਰੇਸੁਪਿ.

ਏਵਨ੍ਤਿਆਦਿਨਾ ਦਸੁਤ੍ਤਰਪਰਿਯਾਯੇਨ (ਦੀ. ਨਿ. ੩.੩੫੦ ਆਦਯੋ) ਯੋਜਨਂ ਨਿਗਮੇਤ੍ਵਾ ਇਦਾਨਿ ਸਤਿਪਟ੍ਠਾਨਸੁਤ੍ਤਨ੍ਤਪਰਿਯਾਯੇਨ (ਮ. ਨਿ. ੧.੧੦੫ ਆਦਯੋ) ਯੋਜਨਂ ਦਸ੍ਸੇਤੁਂ ‘‘ਮਜ੍ਝਿਮਨਿਕਾਯੇ’’ਤਿਆਦਿ ਆਰਦ੍ਧਂ. ਕਾਮਞ੍ਚੇਤ੍ਥ ਕਾਯਾਨੁਪਸ੍ਸਨਾਵਸੇਨੇਵ ਸਂਖਿਪਿਤ੍ਵਾ ਯੋਜਨਾ ਕਤਾ, ਏਕਵੀਸਤਿਯਾ ਪਨ ਠਾਨਾਨਂ ਵਸੇਨਪਿ ਯੋਜਨਾ ਕਾਤਬ੍ਬਾ. ਇਦਾਨਿ ਅਭਿਧਮ੍ਮਨਿਦ੍ਦੇਸਪਰਿਯਾਯੇਨ ਦਸ੍ਸੇਤੁਂ ‘‘ਅਭਿਧਮ੍ਮੇ ਨਿਦ੍ਦੇਸਪਰਿਯਾਯੇਨਾ’’ਤਿਆਦਿ ਆਰਦ੍ਧਂ. ਅਨਿਚ੍ਚਤੋਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗਸਂਵਣ੍ਣਨਾਸੁ (ਵਿਸੁਦ੍ਧਿ. ੨.੬੯੮; ਵਿਸੁਦ੍ਧਿ. ਮਹਾਟੀ. ੨.੬੯੮) ਵੁਤ੍ਤਨਯੇਨ ਵੇਦਿਤਬ੍ਬਂ.

ਉਕ੍ਕਣ੍ਠਿਤਨ੍ਤਿ ਅਧਿਕੁਸਲੇਸੁ ਧਮ੍ਮੇਸੁ ਪਨ੍ਤਸੇਨਾਸਨੇਸੁ ਚ ਉਕ੍ਕਣ੍ਠਾਦਿਞ੍ਚ, ਅਨਨੁਯੋਗੋਤਿ ਅਤ੍ਥੋ. ਅਰਿਯਵਂਸਪੂਰਕੋ ਧੀਰੋ ਸੀਲਵਾ ਭਿਕ੍ਖੁ ਅਰਿਯਵਂਸਪਰਿਪੂਰਣਸ੍ਸ ਭੇਦਂ ਅਨਿਚ੍ਛਨ੍ਤੋ ਸਮਾਹਿਤੋ ਵਿਪਸ੍ਸਕੋ ਚ ਪਚ੍ਚਯਘਾਤੇਨ ਅਰਤਿਯਾ ਰਤਿਯਾ ਚ ਸਹਿਤਾ ਅਭਿਭਵਿਤਾ ਹੋਤੀਤਿ ਵੁਤ੍ਤਂ ‘‘ਅਰਤਿਰਤਿਸਹੋ, ਭਿਕ੍ਖਵੇ, ਧੀਰੋ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਅਰਿਯਵਂਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.