੯. ਅਕੁਸਲਮੂਲਸੁਤ੍ਤਵਣ੍ਣਨਾ

੭੦. ਨਵਮੇ ਲੁਬ੍ਭਤੀਤਿ ਲੋਭੋ. ਦੁਸ੍ਸਤੀਤਿ ਦੋਸੋ. ਮੁਯ੍ਹਤੀਤਿ ਮੋਹੋ. ਲੋਭਾਦੀਨਿ ਪਨੇਤਾਨਿ ਅਸਹਜਾਤਾਨਂ ਪਾਣਾਤਿਪਾਤਾਦੀਨਂ ਕੇਸਞ੍ਚਿ ਅਕੁਸਲਾਨਂ ਉਪਨਿਸ੍ਸਯਪਚ੍ਚਯਟ੍ਠੇਨ, ਸਹਜਾਤਾਨਂ ਅਦਿਨ੍ਨਾਦਾਨਾਦੀਨਂ ਕੇਸਞ੍ਚਿ ਸਮ੍ਪਯੁਤ੍ਤਾ ਹੁਤ੍ਵਾ ਉਪ੍ਪਾਦਕਟ੍ਠੇਨ, ਸਯਞ੍ਚ ਅਕੁਸਲਾਨੀਤਿ ਸਾਵਜ੍ਜਦੁਕ੍ਖਵਿਪਾਕਟ੍ਠੇਨਾਤਿ ਆਹ ‘‘ਅਕੁਸਲਾਨਂ ਮੂਲਾਨਿ, ਅਕੁਸਲਾਨਿ ਚ ਤਾਨਿ ਮੂਲਾਨੀ’’ਤਿ. ਵੁਤ੍ਤਮ੍ਪਿ ਚੇਤਂ ‘‘ਰਤ੍ਤੋ ਖੋ, ਆਵੁਸੋ, ਰਾਗੇਨ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਪਾਣਮ੍ਪਿ ਹਨਤੀ’’ਤਿਆਦਿ. ਯਦਪੀਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਯੋਪਿ, ਭਿਕ੍ਖਵੇ, ਲੋਭੋ’’ਤਿ. ਤਦਪੀਤਿ ਏਤ੍ਥਾਪਿ ਏਸੇਵ ਨਯੋਤਿ ਆਹ ‘‘ਸੋਪਿ ਅਕੁਸਲਮੂਲ’’ਨ੍ਤਿ. ਵਿਨਾਪਿ ਲਿਙ੍ਗਵਿਪਲ੍ਲਾਸੇਨ ਅਤ੍ਥਯੋਜਨਂ ਦਸ੍ਸੇਨ੍ਤੋ ‘‘ਅਕੁਸਲਮੂਲਂ ਵਾ’’ਤਿਆਦਿਮਾਹ. ਸਬ੍ਬਤ੍ਥਾਤਿ ‘‘ਯਦਪਿ, ਭਿਕ੍ਖਵੇ, ਦੋਸੋ, ਤਦਪਿ ਅਕੁਸਲਮੂਲ’’ਨ੍ਤਿਆਦੀਸੁ. ਅਭਿਸਙ੍ਖਰੋਤੀਤਿ ਏਤ੍ਥ ਆਯੂਹਤੀਤਿ ਅਤ੍ਥਂ ਵਤ੍ਵਾ ਤਞ੍ਚ ਆਯੂਹਨਂ ਪਚ੍ਚਯਸਮਵਾਯਸਿਦ੍ਧਿਤੋ ਸਮ੍ਪਿਣ੍ਡਨਂ ਰਾਸਿਕਰਣਂ ਵਿਯ ਹੋਤੀਤਿ ਆਹ ‘‘ਸਮ੍ਪਿਣ੍ਡੇਤਿ ਰਾਸਿਂ ਕਰੋਤੀ’’ਤਿ.

ਪਾਲ਼ਿਯਂ ‘‘ਵਧੇਨਾ’’ਤਿਆਦੀਸੁ ਵਧੇਨਾਤਿ ਮਾਰਣੇਨ ਵਾ ਪੋਥਨੇਨ ਵਾ. ਵਧਸਦ੍ਦੋ ਹਿ ਹਿਂਸਨਤ੍ਥੋ ਵਿਹੇਠਨਤ੍ਥੋ ਚ ਹੋਤਿ. ਬਨ੍ਧਨੇਨਾਤਿ ਅਦ੍ਦੁਬਨ੍ਧਨਾਦਿਨਾ. ਜਾਨਿਯਾਤਿ ਧਨਜਾਨਿਯਾ, ‘‘ਸਤਂ ਗਣ੍ਹਥ, ਸਹਸ੍ਸਂ ਗਣ੍ਹਥਾ’’ਤਿ ਏਵਂ ਪਵਤ੍ਤਿਤਦਣ੍ਡੇਨਾਤਿ ਅਤ੍ਥੋ. ਗਰਹਾਯਾਤਿ ਪਞ੍ਚਸਿਖਮੁਣ੍ਡਕਕਰਣਂ, ਗੋਮਯਸਿਞ੍ਚਨਂ, ਗੀਵਾਯ ਕੁਰਣ੍ਡਕਬਨ੍ਧਨਨ੍ਤਿ ਏਵਮਾਦੀਨਿ ਕਤ੍ਵਾ ਗਰਹਪਾਪਨੇਨ. ਤਤ੍ਥ ਪਞ੍ਚਸਿਖਮੁਣ੍ਡਕਕਰਣਂ ਨਾਮ ਕਾਕਪਕ੍ਖਕਰਣਂ. ਗੋਮਯਸਿਞ੍ਚਨਂ ਸੀਸੇਨ ਕਣੋਦਕਾਵਸੇਚਨਂ. ਕੁਰਣ੍ਡਕਬਨ੍ਧਨਂ ਗਦ੍ਦੁਲਬਨ੍ਧਨਂ.

ਕਾਲਸ੍ਮਿਂ ਨ ਵਦਤੀਤਿ ਯੁਤ੍ਤਕਾਲੇ ਨ ਵਦਤਿ, ਵਤ੍ਤਬ੍ਬਕਾਲਸ੍ਸ ਪੁਬ੍ਬੇ ਵਾ ਪਚ੍ਛਾ ਵਾ ਅਯੁਤ੍ਤਕਾਲੇ ਵਤ੍ਤਾ ਹੋਤਿ. ਅਭੂਤਵਾਦੀਤਿ ਯਂ ਨਤ੍ਥਿ, ਤਸ੍ਸ ਵਤ੍ਤਾ. ਤੇਨਾਹ ‘‘ਭੂਤਂ ਨ ਵਦਤੀ’’ਤਿ. ਅਤ੍ਥਂ ਨ ਵਦਤੀਤਿ ਕਾਰਣਂ ਨ ਵਦਤਿ, ਅਕਾਰਣਨਿਸ੍ਸਿਤਂ ਨਿਪ੍ਫਲਂ ਵਤ੍ਤਾ ਹੋਤਿ. ਧਮ੍ਮਂ ਨ ਵਦਤੀਤਿ ਸਭਾਵਂ ਨ ਵਦਤਿ, ਅਸਭਾਵਂ ਵਤ੍ਤਾ ਅਯਥਾਵਾਦੀਤਿ ਅਤ੍ਥੋ. ਵਿਨਯਂ ਨ ਵਦਤੀਤਿ ਸਂਵਰਵਿਨਯਂ ਨ ਵਦਤਿ, ਨ ਸਂਵਰਵਿਨਯਪ੍ਪਟਿਸਂਯੁਤ੍ਤਸ੍ਸ ਵਤ੍ਤਾ ਹੋਤਿ, ਅਤ੍ਤਨੋ ਸੁਣਨ੍ਤਸ੍ਸ ਚ ਨ ਸਂਵਰਵਿਨਯਾਵਹਸ੍ਸ ਵਤ੍ਤਾਤਿ ਅਤ੍ਥੋ.

ਅਤਚ੍ਛਨ੍ਤਿ ਅਭੂਤਤ੍ਥਂ. ਤੇਨਾਹ ‘‘ਇਤਰਂ ਤਸ੍ਸੇਵ ਵੇਵਚਨ’’ਨ੍ਤਿ. ਅਥ ਵਾ ਅਭੂਤਨ੍ਤਿ ਅਸਨ੍ਤਂ ਅਵਿਜ੍ਜਮਾਨਂ. ਅਤਚ੍ਛਨ੍ਤਿ ਅਤਥਾਕਾਰਂ.

ਪੁਞ੍ਞਕਮ੍ਮਤੋ ਏਤਿ ਉਪ੍ਪਜ੍ਜਤੀਤਿ ਅਯੋ, ਵਡ੍ਢਿ. ਤਪ੍ਪਟਿਕ੍ਖੇਪੇਨ ਅਨਯੋ, ਅਵਡ੍ਢੀਤਿ ਆਹ ‘‘ਅਨਯਂ ਆਪਜ੍ਜਤੀਤਿ ਅਵਡ੍ਢਿਂ ਆਪਜ੍ਜਤੀ’’ਤਿ. ਮਾਲੁਵਾਸਿਪਾਟਿਕਾ ਨਾਮ ਦੀਘਸਣ੍ਠਾਨਂ ਮਾਲੁਵਾਪਕ੍ਕਂ, ਮਾਲੁਵਾਫਲਪੋਟ੍ਠਲਿਕਾਤਿ ਅਤ੍ਥੋ. ਫਲਿਤਾਯਾਤਿ ਆਤਪੇਨ ਸੁਸ੍ਸਿਤ੍ਵਾ ਭਿਨ੍ਨਾਯ. ਵਟਰੁਕ੍ਖਾਦੀਨਂ ਮੂਲੇਤਿ ਵਟਰੁਕ੍ਖਾਦੀਨਂ ਸਮੀਪੇ. ਸਕਭਾਵੇਨ ਸਣ੍ਠਾਤੁਂ ਨ ਸਕ੍ਕੋਨ੍ਤੀਤਿ ਕਸ੍ਮਾ ਨ ਸਕ੍ਕੋਨ੍ਤਿ? ਭਵਨਵਿਨਾਸਭਯਾ. ਰੁਕ੍ਖਮੂਲੇ ਪਤਿਤਮਾਲੁਵਾਬੀਜਤੋ ਹਿ ਲਤਾ ਉਪ੍ਪਜ੍ਜਿਤ੍ਵਾ ਰੁਕ੍ਖਂ ਅਭਿਰੁਹਤਿ. ਸਾ ਮਹਾਪਤ੍ਤਾ ਚੇਵ ਬਹੁਪਤ੍ਤਾ ਚ ਮਹਾਕੋਲਿਰਪਤ੍ਤਸਣ੍ਠਾਨੇਹਿ ਤਤੋ ਚ ਮਹਨ੍ਤਤਰੇਹਿ ਸਾਖਾਵਿਟਪਨ੍ਤਰੇਹਿ ਪਤ੍ਤੇਹਿ ਸਮਨ੍ਨਾਗਤਾ. ਅਥ ਨਂ ਰੁਕ੍ਖਂ ਮੂਲਤੋ ਪਟ੍ਠਾਯ ਵਿਨਨ੍ਧਮਾਨਾ ਸਬ੍ਬਵਿਟਪਾਨਿ ਸਞ੍ਛਾਦੇਤ੍ਵਾ ਮਹਨ੍ਤਂ ਭਾਰਂ ਜਨੇਤ੍ਵਾ ਤਿਟ੍ਠਤਿ, ਸਾ ਵਾਤੇ ਵਾਯਨ੍ਤੇ ਦੇਵੇ ਵਾ ਵਸ੍ਸਨ੍ਤੇ ਓਘਨਹੇਟ੍ਠਾਗਤਾ ਓਲਮ੍ਬਨਹੇਤੁਭੂਤਂ ਘਨਭਾਵਂ ਜਨੇਤ੍ਵਾ ਤਸ੍ਸ ਰੁਕ੍ਖਸ੍ਸ ਸਬ੍ਬਸਾਖਂ ਭਿਜ੍ਜਤਿ, ਭੂਮਿਯਂ ਨਿਪਾਤੇਤਿ. ਤਤੋ ਤਸ੍ਮਿਂ ਰੁਕ੍ਖੇ ਪਤਿਟ੍ਠਿਤਵਿਮਾਨਂ ਭਿਜ੍ਜਤਿ ਵਿਨਸ੍ਸਤਿ. ਇਤਿ ਤਾ ਦੇਵਤਾਯੋ ਭਵਨਵਿਨਾਸਭਯਾ ਸਕਭਾਵੇਨ ਸਣ੍ਠਾਤੁਂ ਨ ਸਕ੍ਕੋਨ੍ਤਿ. ਏਤ੍ਥ ਚ ਯਂ ਸਾਖਟ੍ਠਕਵਿਮਾਨਂ ਹੋਤਿ, ਤਂ ਸਾਖਾਸੁ ਭਿਜ੍ਜਮਾਨਾਸੁ ਤਤ੍ਥ ਤਤ੍ਥੇਵ ਭਿਜ੍ਜਿਤ੍ਵਾ ਸਬ੍ਬਸਾਖਾਸੁ ਭਿਨ੍ਨਾਸੁ ਸਬ੍ਬਂ ਭਿਜ੍ਜਤਿ, ਰੁਕ੍ਖਟ੍ਠਕਵਿਮਾਨਂ ਪਨ ਯਾਵ ਰੁਕ੍ਖਸ੍ਸ ਮੂਲਮਤ੍ਤਮ੍ਪਿ ਤਿਟ੍ਠਤਿ, ਤਾਵ ਨ ਨਸ੍ਸਤੀਤਿ ਵੇਦਿਤਬ੍ਬਂ. ਤਤ੍ਥ ਤਤ੍ਥ ਪਲੁਜ੍ਜਿਤ੍ਵਾਤਿ ਤਤ੍ਥ ਤਤ੍ਥ ਭਿਜ੍ਜਿਤ੍ਵਾ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਅਕੁਸਲਮੂਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.