.ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.
ਅਙ੍ਗੁਤ੍ਤਰਨਿਕਾਯੇ
ਤਿਕਨਿਪਾਤ-ਟੀਕਾ
੧. ਪਠਮਪਣ੍ਣਾਸਕਂ
੧. ਬਾਲਵਗ੍ਗੋ
੧. ਭਯਸੁਤ੍ਤਵਣ੍ਣਨਾ
੧. ਤਿਕਨਿਪਾਤਸ੍ਸ ਪਠਮੇ ਭਯਨ੍ਤਿ ਭੀਤਿ ਚੇਤਸੋ ਬ੍ਯਧੋਤਿ ਆਹ ‘‘ਚਿਤ੍ਤੁਤ੍ਰਾਸੋ’’ਤਿ. ਉਪਦ੍ਦਵੋਤਿ ਅਨ੍ਤਰਾਯੋ. ਤਸ੍ਸ ਪਨ ਵਿਕ੍ਖੇਪਕਾਰਣਤ੍ਤਾ ਵੁਤ੍ਤਂ ‘‘ਅਨੇਕਗ੍ਗਤਾਕਾਰੋ’’ਤਿ. ਉਪਸਗ੍ਗੋਤਿ ਉਪਸਜ੍ਜਨਂ, ਦੇਵਤੋਪਪੀਲ਼ਾਦਿਨਾ ਅਪ੍ਪਟਿਕਾਰਵਿਘਾਤਾਪਤ੍ਤਿ. ਸਾ ਪਨ ਯਸ੍ਮਾ ਪਟਿਕਾਰਾਭਾਵੇਨ ਵਿਹਞ੍ਞਮਾਨਸ੍ਸ ਕਿਞ੍ਚਿ ਕਾਤੁਂ ਅਸਮਤ੍ਥਸ੍ਸ ਓਸੀਦਨਕਾਰਣਂ, ਤਸ੍ਮਾ ਵੁਤ੍ਤਂ ‘‘ਤਤ੍ਥ ਤਤ੍ਥ ਲਗ੍ਗਨਾਕਾਰੋ’’ਤਿ. ਯਥਾਵੁਤ੍ਤੇ ਦਿਵਸੇ ਅਨਾਗਚ੍ਛਨ੍ਤੇਸੂਤਿ ਵਞ੍ਚੇਤ੍ਵਾ ਆਗਨ੍ਤੁਂ ਨਿਯਮਿਤਦਿਵਸੇ ਅਨਾਗਚ੍ਛਨ੍ਤੇਸੁ. ਦ੍ਵਾਰੇ ਅਗ੍ਗਿਂ ਦਤ੍ਵਾਤਿ ਬਹਿ ਅਨਿਕ੍ਖਮਨਤ੍ਥਾਯ ਦ੍ਵਾਰੇ ਅਗ੍ਗਿਂ ਦਤ੍ਵਾ.
ਨਲ਼ੇਹਿ ਛਨ੍ਨਪਟਿਚ੍ਛਨ੍ਨਾਤਿ ਨਲ਼ੇਹਿ ਤਿਣਚ੍ਛਦਨਸਙ੍ਖੇਪੇਨ ਉਪਰਿ ਛਾਦੇਤ੍ਵਾ ਤੇਹਿਯੇਵ ਦਾਰੁਕੁਟਿਕਨਿਯਾਮੇਨ ਪਰਿਤੋਪਿ ਛਾਦਿਤਾ. ਏਸੇਵ ਨਯੋਤਿ ਇਮਿਨਾ ਤਿਣੇਹਿ ਛਨ੍ਨਤਂ ਸੇਸਸਮ੍ਭਾਰਾਨਂ ਰੁਕ੍ਖਮਯਤਞ੍ਚ ਅਤਿਦਿਸਤਿ.
ਵਿਧਵਪੁਤ੍ਤੇਤਿ ਅਨ੍ਤਭਾਵੋਪਲਕ੍ਖਣਂ. ਤੇ ਹਿ ਨਿਪ੍ਪਿਤਿਕਾ ਅਵਿਨੀਤਾ ਅਸਂਯਤਾ ਯਂ ਕਿਞ੍ਚਿ ਕਾਰਿਨੋ. ਸੇਸਮੇਤ੍ਥ ਉਤ੍ਤਾਨਮੇਵ.
ਭਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਲਕ੍ਖਣਸੁਤ੍ਤਵਣ੍ਣਨਾ
੨. ਦੁਤਿਯੇ ਲਕ੍ਖੀਯਤਿ ਬਾਲੋ ਅਯਨ੍ਤਿ ਞਾਯਤਿ ਏਤੇਨਾਤਿ ਲਕ੍ਖਣਂ, ਕਮ੍ਮਂ ਲਕ੍ਖਣਮੇਤਸ੍ਸਾਤਿ ਕਮ੍ਮਲਕ੍ਖਣੋਤਿ ਆਹ ‘‘ਕਾਯਦ੍ਵਾਰਾਦਿਪਵਤ੍ਤਂ ਕਮ੍ਮ’’ਨ੍ਤਿਆਦਿ. ਅਪਦੀਯਨ੍ਤਿ ਦੋਸਾ ਏਤੇਨ ਰਕ੍ਖੀਯਨ੍ਤਿ, ਲੂਯਨ੍ਤਿ ਛਿਜ੍ਜਨ੍ਤਿ ਵਾਤਿ ਅਪਦਾਨਂ, ਸਤ੍ਤਾਨਂ ਸਮ੍ਮਾ, ਮਿਚ੍ਛਾ ਵਾ ਪਵਤ੍ਤਪ੍ਪਯੋਗੋ. ਤੇਨ ਸੋਭਤੀਤਿ ਅਪਦਾਨਸੋਭਨੀ. ਤੇਨਾਹ ‘‘ਪਞ੍ਞਾ ਨਾਮਾ’’ਤਿਆਦਿ. ਅਤ੍ਤਨੋ ਚਰਿਤੇਨੇਵਾਤਿ ਅਤ੍ਤਨੋ ਚਰਿਯਾਯ ਏਵ. ਸੇਸਮੇਤ੍ਥ ਉਤ੍ਤਾਨਮੇਵ.
ਲਕ੍ਖਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩-੪. ਚਿਨ੍ਤੀਸੁਤ੍ਤਾਦਿਵਣ੍ਣਨਾ
੩-੪. ਤਤਿਯੇ ਏਤੇਹੀਤਿ ਦੁਚ੍ਚਿਨ੍ਤਿਤਚਿਨ੍ਤਿਤਾਦੀਹਿ. ਏਤੇਨ ਲਕ੍ਖਣਸਦ੍ਦਸ੍ਸ ਸਰਣਤ੍ਥਤਮਾਹ. ਤਾਨੇਵਾਤਿ ਲਕ੍ਖਣਾਨਿ ਏਵ. ਅਸ੍ਸਾਤਿ ਬਾਲਸ੍ਸ. ਬਾਲੋ ਅਯਨ੍ਤਿ ਨਿਮੀਯਤਿ ਸਞ੍ਜਾਨੀਯਤਿ ਏਤੇਹੀਤਿ ਬਾਲਨਿਮਿਤ੍ਤਾਨਿ. ਅਪਦਾਨਂ ਵੁਚ੍ਚਤਿ, ਵਿਖ੍ਯਾਤਂ ਕਮ੍ਮਂ, ਦੁਚ੍ਚਿਨ੍ਤਿਤਚਿਨ੍ਤਿਤਾਦੀਨਿ ਚ ਬਾਲੇ ਵਿਖ੍ਯਾਤਾਨਿ ਅਸਾਧਾਰਣਭਾਵੇਨ. ਤਸ੍ਮਾ ‘‘ਬਾਲਸ੍ਸ ਅਪਦਾਨਾਨੀ’’ਤਿ. ਅਭਿਜ੍ਝਾਦੀਹਿ ਦੁਟ੍ਠਂ ਦੂਸਿਤਂ ਚਿਨ੍ਤਿਤਂ ਦੁਚ੍ਚਿਨ੍ਤਿਤਂ, ਤਂ ਚਿਨ੍ਤੇਤੀਤਿ ਦੁਚ੍ਚਿਨ੍ਤਿਤਚਿਨ੍ਤੀ. ਲੋਭਾਦੀਹਿ ਦੁਟ੍ਠਂ ਭਾਸਿਤਂ ਮੁਸਾਵਾਦਾਦਿਂ ਭਾਸਤੀਤਿ ਦੁਬ੍ਭਾਸਿਤਭਾਸੀ. ਤੇਸਂਯੇਵ ਵਸੇਨ ਕਤ੍ਤਬ੍ਬਤੋ ਦੁਕ੍ਕਟਕਮ੍ਮਂ ਪਾਣਾਤਿਪਾਤਾਦਿਂ ਕਰੋਤੀਤਿ ਦੁਕ੍ਕਟਕਮ੍ਮਕਾਰੀ. ਤੇਨਾਹ ‘‘ਚਿਨ੍ਤਯਨ੍ਤੋ’’ਤਿਆਦਿ. ਵੁਤ੍ਤਾਨੁਸਾਰੇਨਾਤਿ ‘‘ਬਾਲੋ ਅਯ’’ਨ੍ਤਿਆਦਿਨਾ ਵੁਤ੍ਤਸ੍ਸ ਅਤ੍ਥਵਚਨਸ੍ਸ ‘‘ਪਣ੍ਡਿਤੋ ਅਯਨ੍ਤਿ ਏਤੇਹਿ ਲਕ੍ਖੀਯਤੀ’’ਤਿਆਦਿਨਾ ਅਨੁਸ੍ਸਰਣੇਨ. ਮਨੋਸੁਚਰਿਤਾਦੀਨਂ ਵਸੇਨਾਤਿ ‘‘ਚਿਨ੍ਤਯਨ੍ਤੋ ਅਨਭਿਜ੍ਝਾਬ੍ਯਾਪਾਦਸਮ੍ਮਾਦਸ੍ਸਨਵਸੇਨ ਸੁਚਿਨ੍ਤਿਤਮੇਵ ਚਿਨ੍ਤੇਤੀ’’ਤਿਆਦਿਨਾ ਮਨੋਸੁਚਰਿਤਾਦੀਨਂ ਤਿਣ੍ਣਂ ਸੁਚਰਿਤਾਨਂ ਵਸੇਨ ਯੋਜੇਤਬ੍ਬਾਨਿ. ਚਤੁਤ੍ਥਂ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.
ਚਿਨ੍ਤੀਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੫-੧੦. ਅਯੋਨਿਸੋਸੁਤ੍ਤਾਦਿਵਣ੍ਣਨਾ
੫-੧੦. ਪਞ੍ਚਮੇ ਕਤਿ ਨੁ ਖੋ ਅਨੁਸ੍ਸਤਿਟ੍ਠਾਨਾਨੀਤਿਆਦਿ ਛਕ੍ਕੇ ਆਵਿ ਭਵਿਸ੍ਸਤੀਤਿ. ਏਵਂ ਚਿਨ੍ਤਿਤਨ੍ਤਿ ਅਯੋਨਿਸੋ ਚਿਨ੍ਤਿਤਂ. ਅਪਞ੍ਹਮੇਵ ਪਞ੍ਹਨ੍ਤਿ ਕਥੇਸੀਤਿ ਅਪਞ੍ਹਮੇਵ ਪਞ੍ਹੋ ਅਯਨ੍ਤਿ ਮਞ੍ਞਮਾਨੋ ਵਿਸ੍ਸਜ੍ਜੇਸਿ. ਦਸਵਿਧਂ ਬ੍ਯਞ੍ਜਨਬੁਦ੍ਧਿਂ ਅਪਰਿਹਾਪੇਤ੍ਵਾਤਿ –
‘‘ਸਿਥਿਲਂ ਧਨਿਤਞ੍ਚ ਦੀਘਰਸ੍ਸਂ, ਗਰੁਕਂ ਲਹੁਕਞ੍ਚ ਨਿਗ੍ਗਹੀਤਂ;
ਸਮ੍ਬਨ੍ਧਂ ਵਵਤ੍ਥਿਤਂ ਵਿਮੁਤ੍ਤਂ, ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋ’’ਤਿ. (ਦੀ. ਨਿ. ਅਟ੍ਠ. ੧.੧੯੦; ਮ. ਨਿ. ਅਟ੍ਠ. ੨.੨੯੧; ਪਰਿ. ਅਟ੍ਠ. ੪੮੫; ਵਿ. ਸਙ੍ਗ. ਅਟ੍ਠ. ੨੫੨) –
ਏਵਂ ਵੁਤ੍ਤਂ ਦਸਵਿਧਂ ਬ੍ਯਞ੍ਜਨਬੁਦ੍ਧਿਂ ਅਪਰਿਹਾਪੇਤ੍ਵਾ.
ਤਤ੍ਥ ਠਾਨਕਰਣਾਨਿ ਸਿਥਿਲਾਨਿ ਕਤ੍ਵਾ ਉਚ੍ਚਾਰੇਤਬ੍ਬਂ ਅਕ੍ਖਰਂ ਸਿਥਿਲਂ, ਤਾਨਿਯੇਵ ਧਨਿਤਾਨਿ ਅਸਿਥਿਲਾਨਿ ਕਤ੍ਵਾ ਉਚ੍ਚਾਰੇਤਬ੍ਬਂ ਅਕ੍ਖਰਂ ਧਨਿਤਂ. ਦ੍ਵਿਮਤ੍ਤਕਾਲਂ ਦੀਘਂ, ਏਕਮਤ੍ਤਕਾਲਂ ਰਸ੍ਸਂ. ਗਰੁਕਨ੍ਤਿ ਦੀਘਮੇਵ, ਯਂ ਵਾ ‘‘ਆਯਸ੍ਮਤੋ ਬੁਦ੍ਧਰਕ੍ਖਿਤਤ੍ਥੇਰਸ੍ਸਾ’’ਤਿ ਸਂਯੋਗਪਰਂ ਕਤ੍ਵਾ ਵੁਚ੍ਚਤਿ, ਲਹੁਕਨ੍ਤਿ ਰਸ੍ਸਮੇਵ, ਯਂ ਵਾ ‘‘ਆਯਸ੍ਮਤੋ ਬੁਦ੍ਧਰਕ੍ਖਿਤਥੇਰਸ੍ਸਾ’’ਤਿ ਏਵਂ ਵਿਸਂਯੋਗਪਰਂ ਕਤ੍ਵਾ ਵੁਚ੍ਚਤਿ. ਨਿਗ੍ਗਹੀਤਨ੍ਤਿ ਯਂ ਕਰਣਾਨਿ ਨਿਗ੍ਗਹੇਤ੍ਵਾ ਅਵਿਸ੍ਸਜ੍ਜੇਤ੍ਵਾ ਅਵਿਵਟੇਨ ਮੁਖੇਨ ਸਾਨੁਨਾਸਿਕਂ ਕਤ੍ਵਾ ਵਤ੍ਤਬ੍ਬਂ. ਸਮ੍ਬਨ੍ਧਨ੍ਤਿ ਯਂ ਪਰਪਦੇਨ ਸਮ੍ਬਨ੍ਧਿਤ੍ਵਾ ‘‘ਤੁਣ੍ਹਸ੍ਸਾ’’ਤਿ ਵੁਚ੍ਚਤਿ. ਵਵਤ੍ਥਿਤਨ੍ਤਿ ਯਂ ਪਰਪਦੇਨ ਅਸਮ੍ਬਨ੍ਧਂ ਕਤ੍ਵਾ ਵਿਚ੍ਛਿਨ੍ਦਿਤ੍ਵਾ ‘‘ਤੁਣ੍ਹੀ ਅਸ੍ਸਾ’’ਤਿ ਵੁਚ੍ਚਤਿ. ਵਿਮੁਤ੍ਤਨ੍ਤਿ ਯਂ ਕਰਣਾਨਿ ਅਨਿਗ੍ਗਹੇਤ੍ਵਾ ਵਿਸ੍ਸਜ੍ਜੇਤ੍ਵਾ ਵਿਵਟੇਨ ਮੁਖੇਨ ਸਾਨੁਨਾਸਿਕਂ ਅਕਤ੍ਵਾ ਵੁਚ੍ਚਤਿ. ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋਤਿ ਏਵਂ ਸਿਥਿਲਾਦਿਵਸੇਨ ਬ੍ਯਞ੍ਜਨਬੁਦ੍ਧਿਯਾ ਅਕ੍ਖਰੁਪ੍ਪਾਦਕਚਿਤ੍ਤਸ੍ਸ ਦਸਪ੍ਪਕਾਰੇਨ ਪਭੇਦੋ. ਸਬ੍ਬਾਨਿ ਹਿ ਅਕ੍ਖਰਾਨਿ ਚਿਤ੍ਤਸਮੁਟ੍ਠਾਨਾਨਿ ਯਥਾਧਿਪ੍ਪੇਤਤ੍ਥਬ੍ਯਞ੍ਜਨਤੋ ਬ੍ਯਞ੍ਜਨਾਨਿ ਚ.
‘‘ਅਟ੍ਠਾਨਂ ਖੋ ਏਤਂ, ਆਵੁਸੋ ਸਾਰਿਪੁਤ੍ਤਾ’’ਤਿਆਦਿ ਪਞ੍ਚਕੇ ਆਵਿ ਭਵਿਸ੍ਸਤਿ. ‘‘ਕਤਿ ਨੁ ਖੋ, ਆਨਨ੍ਦ, ਅਨੁਸ੍ਸਤਿਟ੍ਠਾਨਾਨੀ’’ਤਿਆਦਿ ਪਨ ਛਕ੍ਕੇ ਆਵਿ ਭਵਿਸ੍ਸਤਿ. ਛਟ੍ਠਾਦੀਸੁ ਨਤ੍ਥਿ ਵਤ੍ਤਬ੍ਬਂ.
ਅਯੋਨਿਸੋਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
ਬਾਲਵਗ੍ਗਵਣ੍ਣਨਾ ਨਿਟ੍ਠਿਤਾ.
੨. ਰਥਕਾਰਵਗ੍ਗੋ
੧. ਞਾਤਸੁਤ੍ਤਵਣ੍ਣਨਾ
੧੧. ਦੁਤਿਯਸ੍ਸ ਪਠਮੇ ਞਾਤੋਯੇਵ ਪਞ੍ਞਾਤੋਤਿ ਆਹ ‘‘ਞਾਤੋ ਪਞ੍ਞਾਤੋ’’ਤਿ. ਕਸ੍ਸ ਅਨਨੁਲੋਮਿਕੇਤਿ ਆਹ ‘‘ਸਾਸਨਸ੍ਸਾ’’ਤਿ, ਸਾਸਨਸ੍ਸ ਅਨਨੁਲੋਮਿਕੇ ਅਪ੍ਪਤਿਰੂਪੇਤਿ ਅਤ੍ਥੋ. ਇਦਾਨਿ ਅਨਨੁਲੋਮਿਕਸਦ੍ਦਸ੍ਸ ਨਿਬ੍ਬਚਨਂ ਦਸ੍ਸੇਨ੍ਤੋ ‘‘ਨ ਅਨੁਲੋਮੇਤੀਤਿ ਅਨਨੁਲੋਮਿਕ’’ਨ੍ਤਿ ਆਹ. ਸਾਸਨਸ੍ਸਾਤਿ ਵਾ ਸਾਸਨਨ੍ਤਿ ਅਤ੍ਥੋ. ਸਾਸਨਂ ਨ ਅਨੁਲੋਮੇਤੀਤਿ ਅਨਨੁਲੋਮਿਕਨ੍ਤਿ ਏਵਮੇਤ੍ਥ ਸਮ੍ਬਨ੍ਧੋ ਦਟ੍ਠਬ੍ਬੋ. ਸਭਾਗਵਿਸਭਾਗਨ੍ਤਿ ਲਿਙ੍ਗਤੋ ਸਭਾਗਵਿਸਭਾਗਂ. ‘‘ਵਿਯਪੁਗ੍ਗਲੇ’’ਤਿ ਆਹਾਤਿ ਲਿਙ੍ਗਸਭਾਗੇਹਿ ਅਵਿਸੇਸੇਤ੍ਵਾ ਆਹ. ਉਮ੍ਮਾਦਂ ਪਾਪੁਣੀਤਿ ਸੋ ਕਿਰ ਸੀਲਂ ਅਧਿਟ੍ਠਾਯ ਪਿਹਿਤਦ੍ਵਾਰਗਬ੍ਭੇ ਸਯਨਪਿਟ੍ਠੇ ਨਿਸੀਦਿਤ੍ਵਾ ਭਰਿਯਂ ਆਰਬ੍ਭ ਮੇਤ੍ਤਂ ਭਾਵੇਨ੍ਤੋ ਮੇਤ੍ਤਾਮੁਖੇਨ ਉਪ੍ਪਨ੍ਨੇਨ ਰਾਗੇਨ ਅਨ੍ਧੀਕਤੋ ਭਰਿਯਾਯ ਸਨ੍ਤਿਕਂ ਗਨ੍ਤੁਕਾਮੋ ਦ੍ਵਾਰਂ ਅਸਲ੍ਲਕ੍ਖੇਤ੍ਵਾ ਭਿਤ੍ਤਿਂ ਭਿਨ੍ਦਿਤ੍ਵਾਪਿ ਨਿਕ੍ਖਮਿਤੁਕਾਮਤਾਯ ਭਿਤ੍ਤਿਂ ਪਹਰਨ੍ਤੋ ਸਬ੍ਬਰਤ੍ਤਿਂ ਭਿਤ੍ਤਿਯੁਦ੍ਧਮਕਾਸਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.
ਞਾਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਸਾਰਣੀਯਸੁਤ੍ਤਵਣ੍ਣਨਾ
੧੨. ਦੁਤਿਯੇ ਚਤੁਪਾਰਿਸੁਦ੍ਧਿਸੀਲਮ੍ਪਿ ਪਬ੍ਬਜ੍ਜਾਨਿਸ੍ਸਿਤਮੇਵਾਤਿ ਇਮਿਨਾ ਪਬ੍ਬਜ੍ਜੂਪਗਤਸਮਨਨ੍ਤਰਮੇਵ ਚਤੁਪਾਰਿਸੁਦ੍ਧਿਸੀਲਮ੍ਪਿ ਸਮਾਦਿਨ੍ਨਮੇਵ ਹੋਤੀਤਿ ਦਸ੍ਸੇਤਿ. ਮਗ੍ਗਸਨ੍ਨਿਸ੍ਸਿਤਾਨੇਵ ਹੋਨ੍ਤੀਤਿ ਮਗ੍ਗਾਧਿਗਮਤ੍ਥਾਯ ਪਟਿਪਜ੍ਜਿਤਬ੍ਬਤ੍ਤਾ ਕਸਿਣਪਰਿਕਮ੍ਮਾਦੀਨਿ ਮਗ੍ਗਸਨ੍ਨਿਸ੍ਸਿਤਾਨੇਵ ਹੋਨ੍ਤਿ, ਤਸ੍ਮਾ ਮਗ੍ਗਗ੍ਗਹਣੇਨੇਵ ਤੇਸਮ੍ਪਿ ਗਹਣਂ ਵੇਦਿਤਬ੍ਬਂ, ਤੇਹਿ ਵਿਨਾ ਮਗ੍ਗਾਧਿਗਮਸ੍ਸ ਅਸਮ੍ਭਵਤੋਤਿ ਅਧਿਪ੍ਪਾਯੋ.
ਅਗ੍ਗਮਗ੍ਗਾਧਿਗਮੇਨ ਅਸਮ੍ਮੋਹਪ੍ਪਟਿਵੇਧਸ੍ਸ ਸਿਖਾਪਤ੍ਤਤ੍ਤਾ ਮਗ੍ਗਧਮ੍ਮੇਸੁ ਵਿਯ ਫਲਧਮ੍ਮੇਸੁਪਿ ਸਾਤਿਸਯੋ ਅਸਮ੍ਮੋਹੋਤਿ ‘‘ਸਯਂ ਅਭਿਞ੍ਞਾ’’ਤਿ ਵੁਤ੍ਤਂ, ਸਾਮਂ ਜਾਨਿਤ੍ਵਾਤਿ ਅਤ੍ਥੋ. ਤਥਾ ਜਾਨਨਾ ਪਨਸ੍ਸ ਸਚ੍ਛਿਕਰਣਂ ਅਤ੍ਤਪਚ੍ਚਕ੍ਖਕਿਰਿਯਾਤਿ ‘‘ਸਚ੍ਛਿਕਤ੍ਵਾ’’ਤਿ ਵੁਤ੍ਤਂ. ਤੇਨਾਹ ‘‘ਅਤ੍ਤਨਾਵ ਅਭਿਵਿਸਿਟ੍ਠਾਯ ਪਞ੍ਞਾਯ ਪਚ੍ਚਕ੍ਖਂ ਕਤ੍ਵਾ’’ਤਿ. ਤਥਾ ਸਚ੍ਛਿਕਿਰਿਯਾ ਚਸ੍ਸ ਅਤ੍ਤਨਿ ਪਟਿਲਾਭੋਤਿ ‘‘ਉਪਸਮ੍ਪਜ੍ਜਾ’’ਤਿ ਵੁਤ੍ਤਨ੍ਤਿ ਆਹ ‘‘ਪਟਿਲਭਿਤ੍ਵਾ’’ਤਿ.
ਸਾਰਣੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਆਸਂਸਸੁਤ੍ਤਵਣ੍ਣਨਾ
੧੩. ਤਤਿਯੇ ਸਨ੍ਤੋਤਿ ਏਤ੍ਥ ਸਨ੍ਤ-ਸਦ੍ਦੋ ‘‘ਦੀਘਂ ਸਨ੍ਤਸ੍ਸ ਯੋਜਨ’’ਨ੍ਤਿਆਦੀਸੁ (ਧ. ਪ. ੬੦) ਕਿਲਨ੍ਤਭਾਵੇ ਆਗਤੋ. ‘‘ਅਯਞ੍ਚ ਵਿਤਕ੍ਕੋ, ਅਯਞ੍ਚ ਵਿਚਾਰੋ ਸਨ੍ਤੋ ਹੋਨ੍ਤਿ ਸਮਿਤਾ’’ਤਿਆਦੀਸੁ (ਵਿਭ. ੫੭੬) ਨਿਰੁਦ੍ਧਭਾਵੇ. ‘‘ਅਧਿਗਤੋ ਖੋ ਮ੍ਯਾਯਂ ਧਮ੍ਮੋ, ਗਮ੍ਭੀਰੋ ਦੁਦ੍ਦਸੋ ਦੁਰਨੁਬੋਧੋ ਸਨ੍ਤੋ ਪਣੀਤੋ’’ਤਿਆਦੀਸੁ (ਦੀ. ਨਿ. ੨.੬੭; ਮ. ਨਿ. ੧.੨੮੧; ਸਂ. ਨਿ. ੧.੧੭੨; ਮਹਾਵ. ੭-੮) ਸਨ੍ਤਞਾਣਗੋਚਰਤਾਯਂ. ‘‘ਉਪਸਨ੍ਤਸ੍ਸ ਸਦਾ ਸਤਿਮਤੋ’’ਤਿਆਦੀਸੁ (ਉਦਾ. ੨੭) ਕਿਲੇਸਵੂਪਸਮੇ. ‘‘ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤੀ’’ਤਿਆਦੀਸੁ (ਧ. ਪ. ੧੫੧) ਸਾਧੂਸੁ. ‘‘ਪਞ੍ਚਿਮੇ, ਭਿਕ੍ਖਵੇ, ਮਹਾਚੋਰਾ ਸਨ੍ਤੋ ਸਂਵਿਜ੍ਜਮਾਨਾ’’ਤਿਆਦੀਸੁ (ਪਾਰਾ. ੧੯੫) ਅਤ੍ਥਿਭਾਵੇ. ਇਧਾਪਿ ਅਤ੍ਥਿਭਾਵੇਯੇਵਾਤਿ ਆਹ ‘‘ਸਨ੍ਤੋਤਿ ਅਤ੍ਥਿ ਉਪਲਬ੍ਭਨ੍ਤੀ’’ਤਿ. ਤਤ੍ਥ ਅਤ੍ਥੀਤਿ ਲੋਕਸਙ੍ਕੇਤਵਸੇਨ ਸਂਵਿਜ੍ਜਨ੍ਤਿ. ਅਤ੍ਥਿਭਾਵੋ ਹੇਤ੍ਥ ਪੁਗ੍ਗਲਸਮ੍ਬਨ੍ਧੇਨ ਵੁਤ੍ਤਤ੍ਤਾ ਲੋਕਸਮਞ੍ਞਾਵਸੇਨੇਵ ਵੇਦਿਤਬ੍ਬੋ, ਨ ਪਰਮਤ੍ਥਵਸੇਨ. ਅਤ੍ਥੀਤਿ ਚੇਤਂ ਨਿਪਾਤਪਦਂ ਦਟ੍ਠਬ੍ਬਂ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ’’ਤਿਆਦੀਸੁ (ਮ. ਨਿ. ੧.੧੧੦) ਵਿਯ.
ਸਂਵਿਜ੍ਜਮਾਨਾਤਿ ਉਪਲਬ੍ਭਮਾਨਾ. ਯਞ੍ਹਿ ਸਂਵਿਜ੍ਜਤਿ, ਤਂ ਉਪਲਬ੍ਭਤਿ. ਤੇਨਾਹ ‘‘ਸਂਵਿਜ੍ਜਮਾਨਾਤਿ ਤਸ੍ਸੇਵ ਵੇਵਚਨ’’ਨ੍ਤਿ. ਅਨਾਸੋਤਿ ਪਤ੍ਥਨਾਰਹਿਤੋ. ਤੇਨਾਹ ‘‘ਅਪਤ੍ਥਨੋ’’ਤਿ. ਆਸਂਸਤਿ ਪਤ੍ਥੇਤੀਤਿ ਆਸਂਸੋ. ਵੇਣੁਵੇਤ੍ਤਾਦਿਵਿਲੀਵੇਹਿ ਸੁਪ੍ਪਾਦਿਭਾਜਨਕਾਰਕਾ ਵਿਲੀਵਕਾਰਕਾ. ਮਿਗਮਚ੍ਛਾਦੀਨਂ ਨਿਸਾਦਨਤੋ ਨੇਸਾਦਾ, ਮਾਗਵਿਕਮਚ੍ਛਬਨ੍ਧਾਦਯੋ. ਰਥੇਸੁ ਚਮ੍ਮੇਨ ਨਹਨਕਰਣਤੋ ਰਥਕਾਰਾ, ਧਮ੍ਮਕਾਰਾ. ਪੁਇਤਿ ਕਰੀਸਸ੍ਸ ਨਾਮਂ, ਤਂ ਕੁਸੇਨ੍ਤਿ ਅਪਨੇਨ੍ਤੀਤਿ ਪੁਕ੍ਕੁਸਾ, ਪੁਪ੍ਫਚ੍ਛਡ੍ਡਕਾ.
ਦੁਬ੍ਬਣ੍ਣੋਤਿ ਵਿਰੂਪੋ. ਓਕੋਟਿਮਕੋਤਿ ਆਰੋਹਾਭਾਵੇਨ ਹੇਟ੍ਠਿਮਕੋ, ਰਸ੍ਸਕਾਯੋਤਿ ਅਤ੍ਥੋ. ਤੇਨਾਹ ‘‘ਲਕੁਣ੍ਡਕੋ’’ਤਿ. ਲਕੁ ਵਿਯ ਘਟਿਕਾ ਵਿਯ ਡੇਤਿ ਪਵਤ੍ਤਤੀਤਿ ਹਿ ਲਕੁਣ੍ਡਕੋ, ਰਸ੍ਸੋ. ਕਣਤਿ ਨਿਮੀਲਤੀਤਿ ਕਾਣੋ. ਤਂ ਪਨਸ੍ਸ ਨਿਮੀਲਨਂ ਏਕੇਨ ਅਕ੍ਖਿਨਾ ਦ੍ਵੀਹਿਪਿ ਚਾਤਿ ਆਹ ‘‘ਏਕਕ੍ਖਿਕਾਣੋ ਵਾ ਉਭਯਕ੍ਖਿਕਾਣੋ ਵਾ’’ਤਿ. ਕੁਣਨਂ ਕੁਣੋ, ਹਤ੍ਥਵੇਕਲ੍ਲਂ. ਤਂ ਏਤਸ੍ਸ ਅਤ੍ਥੀਤਿ ਕੁਣੀ. ਖਞ੍ਜੋ ਵੁਚ੍ਚਤਿ ਪਾਦਵਿਕਲੋ. ਹੇਟ੍ਠਿਮਕਾਯਸਙ੍ਖਾਤੋ ਸਰੀਰਸ੍ਸ ਪਕ੍ਖੋ ਪਦੇਸੋ ਹਤੋ ਅਸ੍ਸਾਤਿ ਪਕ੍ਖਹਤੋ. ਤੇਨਾਹ ‘‘ਪੀਠਸਪ੍ਪੀ’’ਤਿ. ਪਦੀਪੇ ਪਦੀਪਨੇ ਏਤਬ੍ਬਂ ਨੇਤਬ੍ਬਨ੍ਤਿ ਪਦੀਪੇਯ੍ਯਂ, ਤੇਲਾਦਿਉਪਕਰਣਂ.
ਆਸਂ ਨ ਕਰੋਤੀਤਿ ਰਜ੍ਜਾਭਿਸੇਕੇ ਕਨਿਟ੍ਠੋ ਪਤ੍ਥਨਂ ਨ ਕਰੋਤਿ ਜੇਟ੍ਠੇ ਸਤਿ ਕਨਿਟ੍ਠਸ੍ਸ ਅਨਧਿਕਾਰਤ੍ਤਾ. ਅਭਿਸੇਕਂ ਅਰਹਤੀਤਿ ਅਭਿਸੇਕਾਰਹੋ, ਨ ਅਭਿਸੇਕਾਰਹੋ ਕਾਣਕੁਣਿਆਦਿਦੋਸਸਮਨ੍ਨਾਗਤੋ.
ਸੀਲਸ੍ਸ ਦੁਟ੍ਠੁ ਨਾਮ ਨਤ੍ਥਿ, ਤਸ੍ਮਾ ਅਭਾਵਤ੍ਥੋ ਇਧ ਦੁ-ਸਦ੍ਦੋਤਿ ਆਹ ‘‘ਨਿਸ੍ਸੀਲੋ’’ਤਿ. ‘‘ਪਾਪਂ ਪਾਪੇਨ ਸੁਕਰ’’ਨ੍ਤਿਆਦੀਸੁ (ਉਦਾ. ੪੮; ਚੂਲ਼ਵ. ੩੪੩) ਵਿਯ ਪਾਪ-ਸਦ੍ਦੋ ਨਿਹੀਨਪਰਿਯਾਯੋਤਿ ਆਹ ‘‘ਲਾਮਕਧਮ੍ਮੋ’’ਤਿ. ਸੀਲਵਿਪਤ੍ਤਿਯਾ ਵਾ ਦੁਸ੍ਸੀਲੋ. ਦਿਟ੍ਠਿਵਿਪਤ੍ਤਿਯਾ ਪਾਪਧਮ੍ਮੋ. ਕਾਯਵਾਚਾਸਂਵਰਭੇਦੇਨ ਵਾ ਦੁਸ੍ਸੀਲੋ, ਮਨੋਸਂਵਰਭੇਦੇਨ, ਸਤਿਸਂਵਰਾਦਿਭੇਦੇਨ ਵਾ ਪਾਪਧਮ੍ਮੋ. ਅਸੁਦ੍ਧਪ੍ਪਯੋਗਤਾਯ ਦੁਸ੍ਸੀਲੋ, ਅਸੁਦ੍ਧਾਸਯਤਾਯ ਪਾਪਧਮ੍ਮੋ. ਕੁਸਲਸੀਲਵਿਰਹੇਨ ਦੁਸ੍ਸੀਲੋ, ਅਕੁਸਲਸੀਲਸਮਨ੍ਨਾਗਮੇਨ ਪਾਪਧਮ੍ਮੋ. ਅਸੁਚੀਹੀਤਿ ਅਪਰਿਸੁਦ੍ਧੇਹਿ. ਸਙ੍ਕਾਹਿ ਸਰਿਤਬ੍ਬਸਮਾਚਾਰੋਤਿ ‘‘ਇਮਸ੍ਸ ਮਞ੍ਞੇ ਇਦਂ ਕਮ੍ਮ’’ਨ੍ਤਿ ਏਵਂ ਪਰੇਹਿ ਸਙ੍ਕਾਯ ਸਰਿਤਬ੍ਬਸਮਾਚਾਰੋ. ਤੇਨਾਹ ‘‘ਕਿਞ੍ਚਿਦੇਵਾ’’ਤਿਆਦਿ. ਅਤ੍ਤਨਾਯੇਵ ਵਾ ਸਙ੍ਕਾਹਿ ਸਰਿਤਬ੍ਬਸਮਾਚਾਰੋਤਿ ਏਤੇਨਪਿ ਕਮ੍ਮਸਾਧਨਤਂਯੇਵ ਸਙ੍ਕਸ੍ਸਰਸਦ੍ਦਸ੍ਸ ਦਸ੍ਸੇਤਿ. ਅਤ੍ਤਨੋ ਸਙ੍ਕਾਯ ਪਰੇਸਂ ਸਮਾਚਾਰਕਿਰਿਯਂ ਸਰਤਿ ਆਸਙ੍ਕਤਿ ਵਿਧਾਵਤੀਤਿਪਿ ਸਙ੍ਕਸ੍ਸਰਸਮਾਚਾਰੋਤਿ ਏਵਮੇਤ੍ਥ ਕਤ੍ਤੁਸਾਧਨਤਾਪਿ ਦਟ੍ਠਬ੍ਬਾ. ਤਸ੍ਸ ਹਿ ਦ੍ਵੇ ਤਯੋ ਜਨੇ ਕਥੇਨ੍ਤੇ ਦਿਸ੍ਵਾ ‘‘ਮਮ ਦੋਸਂ ਮਞ੍ਞੇ ਕਥੇਨ੍ਤੀ’’ਤਿ ਤੇਸਂ ਸਮਾਚਾਰਂ ਸਙ੍ਕਾਯ ਸਰਤਿ ਧਾਵਤਿ.
ਏਵਂਪਟਿਞ੍ਞੋਤਿ ਸਲਾਕਗ੍ਗਹਣਾਦੀਸੁ ‘‘ਕਿਤ੍ਤਕਾ ਵਿਹਾਰੇ ਸਮਣਾ’’ਤਿ ਗਣਨਾਯ ਆਰਦ੍ਧਾਯ ‘‘ਅਹਮ੍ਪਿ ਸਮਣੋ, ਅਹਮ੍ਪਿ ਸਮਣੋ’’ਤਿ ਪਟਿਞ੍ਞਂ ਦਤ੍ਵਾ ਸਲਾਕਗ੍ਗਹਣਾਦੀਨਿ ਕਰੋਤੀਤਿ ਸਮਣੋ ਅਹਨ੍ਤਿ ਏਵਂਸਮਣਪ੍ਪਟਿਞ੍ਞੋ. ਸੁਮ੍ਭਕਪਤ੍ਤਧਰੇਤਿ ਮਤ੍ਤਿਕਾਪਤ੍ਤਧਰੇ. ਪੂਤਿਨਾ ਕਮ੍ਮੇਨਾਤਿ ਸਂਕਿਲਿਟ੍ਠਕਮ੍ਮੇਨ, ਨਿਗ੍ਗੁਣਤਾਯ ਵਾ ਗੁਣਸਾਰਵਿਰਹਿਤਤ੍ਤਾ ਅਨ੍ਤੋਪੂਤਿ. ਕਸਮ੍ਬੁਕਚਵਰੋ ਜਾਤੋ ਸਞ੍ਜਾਤੋ ਅਸ੍ਸਾਤਿ ਕਸਮ੍ਬੁਜਾਤੋਤਿ ਆਹ ‘‘ਸਞ੍ਜਾਤਰਾਗਾਦਿਕਚਵਰੋ’’ਤਿ. ਅਥ ਵਾ ਕਸਮ੍ਬੁ ਵੁਚ੍ਚਤਿ ਤਿਨ੍ਤਕੁਣਪਕਸਟਂ ਉਦਕਂ, ਇਮਸ੍ਮਿਞ੍ਚ ਸਾਸਨੇ ਦੁਸ੍ਸੀਲੋ ਨਾਮ ਜਿਗੁਚ੍ਛਨੀਯਤ੍ਤਾ ਤਿਨ੍ਤਕੁਣਪਉਦਕਸਦਿਸੋ, ਤਸ੍ਮਾ ਕਸਮ੍ਬੁ ਵਿਯ ਜਾਤੋਤਿ ਕਸਮ੍ਬੁਜਾਤੋ. ਲੋਕੁਤ੍ਤਰਧਮ੍ਮਉਪਨਿਸ੍ਸਯਸ੍ਸ ਨਤ੍ਥਿਤਾਯਾਤਿ ਯਤ੍ਥ ਪਤਿਟ੍ਠਿਤੇਨ ਸਕ੍ਕਾ ਭਵੇਯ੍ਯ ਅਰਹਤ੍ਤਂ ਲਦ੍ਧੁਂ, ਤਸ੍ਸਾ ਪਤਿਟ੍ਠਾਯ ਭਿਨ੍ਨਤ੍ਤਾ ਵੁਤ੍ਤਂ. ਮਹਾਸੀਲਸ੍ਮਿਂ ਪਰਿਪੂਰਕਾਰਿਤਾਯਾਤਿ ਯਤ੍ਥ ਪਤਿਟ੍ਠਿਤੇਨ ਸਕ੍ਕਾ ਭਵੇਯ੍ਯ ਅਰਹਤ੍ਤਂ ਪਾਪੁਣਿਤੁਂ, ਤਸ੍ਮਿਂ ਪਰਿਪੂਰਕਾਰਿਤਾਯ.
ਆਸਂਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ
੧੪. ਚਤੁਤ੍ਥੇ ਚਤੂਹਿ ਸਙ੍ਗਹਵਤ੍ਥੂਹੀਤਿ ਦਾਨਪਿਯਵਚਨਅਤ੍ਥਚਰਿਯਾਸਮਾਨਤ੍ਤਤਾਸਙ੍ਖਾਤੇਹਿ ਚਤੂਹਿ ਸਙ੍ਗਹਕਾਰਣੇਹਿ. ਚਕ੍ਕਂ ਵਤ੍ਤੇਤੀਤਿ ਆਣਾਚਕ੍ਕਂ ਪਵਤ੍ਤੇਤਿ. ਚਕ੍ਕਨ੍ਤਿ ਵਾ ਇਧ ਰਤਨਚਕ੍ਕਂ ਵੇਦਿਤਬ੍ਬਂ. ਅਯਞ੍ਹਿ ਚਕ੍ਕਸਦ੍ਦੋ ਸਮ੍ਪਤ੍ਤਿਯਂ, ਲਕ੍ਖਣੇ, ਰਥਙ੍ਗੇ, ਇਰਿਯਾਪਥੇ, ਦਾਨੇ, ਰਤਨਧਮ੍ਮਖੁਰਚਕ੍ਕਾਦੀਸੁ ਚ ਦਿਸ੍ਸਤਿ. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਚਕ੍ਕਾਨਿ, ਯੇਹਿ ਸਮਨ੍ਨਾਗਤਾਨਂ ਦੇਵਮਨੁਸ੍ਸਾਨ’’ਨ੍ਤਿਆਦੀਸੁ (ਅ. ਨਿ. ੪.੩੧) ਹਿ ਸਮ੍ਪਤ੍ਤਿਯਂ ਦਿਸ੍ਸਤਿ. ‘‘ਪਾਦਤਲੇਸੁ ਚਕ੍ਕਾਨਿ ਜਾਤਾਨੀ’’ਤਿ (ਦੀ. ਨਿ. ੨.੩੫; ੩.੨੦੪) ਏਤ੍ਥ ਲਕ੍ਖਣੇ. ‘‘ਚਕ੍ਕਂਵ ਵਹਤੋ ਪਦ’’ਨ੍ਤਿ (ਧ. ਪ. ੧) ਏਤ੍ਥ ਰਥਙ੍ਗੇ. ‘‘ਚਤੁਚਕ੍ਕਂ ਨਵਦ੍ਵਾਰ’’ਨ੍ਤਿ (ਸਂ. ਨਿ. ੧.੨੯) ਏਤ੍ਥ ਇਰਿਯਾਪਥੇ. ‘‘ਦਦਂ ਭੁਞ੍ਜ ਮਾ ਚ ਪਮਾਦੋ, ਚਕ੍ਕਂ ਵਤ੍ਤਯ ਸਬ੍ਬਪਾਣਿਨ’’ਨ੍ਤਿ (ਜਾ. ੧.੭.੧੪੯) ਏਤ੍ਥ ਦਾਨੇ. ‘‘ਦਿਬ੍ਬਂ ਚਕ੍ਕਰਤਨਂ ਪਾਤੁਰਹੋਸੀ’’ਤਿ (ਦੀ. ਨਿ. ੨.੨੪੩) ਏਤ੍ਥ ਰਤਨਚਕ੍ਕੇ. ‘‘ਮਯਾ ਪਵਤ੍ਤਿਤਂ ਚਕ੍ਕ’’ਨ੍ਤਿ (ਸੁ. ਨਿ. ੫੬੨) ਏਤ੍ਥ ਧਮ੍ਮਚਕ੍ਕੇ. ‘‘ਇਚ੍ਛਾਹਤਸ੍ਸ ਪੋਸਸ੍ਸ, ਚਕ੍ਕਂ ਭਮਤਿ ਮਤ੍ਥਕੇ’’ਤਿ (ਜਾ. ੧.੫.੧੦੩) ਏਤ੍ਥ ਖੁਰਚਕ੍ਕੇ. ‘‘ਖੁਰਪਰਿਯਨ੍ਤੇਨ ਚਕ੍ਕੇਨਾ’’ਤਿ (ਦੀ. ਨਿ. ੧.੧੬੬) ਏਤ੍ਥ ਪਹਰਣਚਕ੍ਕੇ. ‘‘ਅਸਨਿਵਿਚਕ੍ਕ’’ਨ੍ਤਿ (ਦੀ. ਨਿ. ੩.੬੧) ਏਤ੍ਥ ਅਸਨਿਮਣ੍ਡਲੇ. ਇਧ ਪਨਾਯਂ ਰਤਨਚਕ੍ਕੇ ਦਟ੍ਠਬ੍ਬੋ.
ਕਿਤ੍ਤਾਵਤਾ ਪਨਾਯਂ ਚਕ੍ਕਵਤ੍ਤੀ ਨਾਮ ਹੋਤਿ? ਏਕਙ੍ਗੁਲਦ੍ਵਙ੍ਗੁਲਮਤ੍ਤਮ੍ਪਿ ਚਕ੍ਕਰਤਨਂ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਪਵਤ੍ਤਤਿ. ਸਬ੍ਬਚਕ੍ਕਵਤ੍ਤੀਨਞ੍ਹਿ ਨਿਸਿਨ੍ਨਾਸਨਤੋ ਉਟ੍ਠਹਿਤ੍ਵਾ ਚਕ੍ਕਰਤਨਸਮੀਪਂ ਗਨ੍ਤ੍ਵਾ ਹਤ੍ਥਿਸੋਣ੍ਡਸਦਿਸਪਨਾਲ਼ਿਂ ਸੁਵਣ੍ਣਭਿਙ੍ਗਾਰਂ ਉਕ੍ਖਿਪਿਤ੍ਵਾ ਉਦਕੇਨ ਅਬ੍ਭੁਕ੍ਕਿਰਿਤ੍ਵਾ ‘‘ਅਭਿਵਿਜਿਨਾਤੁ ਭਵਂ ਚਕ੍ਕਰਤਨ’’ਨ੍ਤਿ ਵਚਨਸਮਨਨ੍ਤਰਮੇਵ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਚਕ੍ਕਰਤਨਂ ਪਵਤ੍ਤਤੀਤਿ. ਯਸ੍ਸ ਪਵਤ੍ਤਿਸਮਕਾਲਮੇਵ, ਸੋ ਰਾਜਾ ਚਕ੍ਕਵਤ੍ਤੀ ਨਾਮ ਹੋਤਿ.
ਧਮ੍ਮੋਤਿ ਦਸਕੁਸਲਕਮ੍ਮਪਥਧਮ੍ਮੋ, ਦਸਵਿਧਂ ਵਾ ਚਕ੍ਕਵਤ੍ਤਿਵਤ੍ਤਂ. ਦਸਵਿਧੇ ਵਾ ਕੁਸਲਧਮ੍ਮੇ ਅਗਰਹਿਤੇ ਵਾ ਰਾਜਧਮ੍ਮੇ ਨਿਯੁਤ੍ਤੋਤਿ ਧਮ੍ਮਿਕੋ. ਤੇਨ ਚ ਧਮ੍ਮੇਨ ਸਕਲਲੋਕਂ ਰਞ੍ਜੇਤੀਤਿ ਧਮ੍ਮਰਾਜਾ. ਧਮ੍ਮੇਨ ਵਾ ਲਦ੍ਧਰਜ੍ਜਤ੍ਤਾ ਧਮ੍ਮਰਾਜਾ. ਚਕ੍ਕਵਤ੍ਤੀਹਿ ਧਮ੍ਮੇਨ ਞਾਯੇਨ ਰਜ੍ਜਂ ਅਧਿਗਚ੍ਛਤਿ, ਨ ਅਧਮ੍ਮੇਨ. ਦਸਵਿਧੇਨ ਚਕ੍ਕਵਤ੍ਤਿਵਤ੍ਤੇਨਾਤਿ ਦਸਪ੍ਪਭੇਦੇਨ ਚਕ੍ਕਵਤ੍ਤੀਨਂ ਵਤ੍ਤੇਨ.
ਕਿਂ ਪਨ ਤਂ ਦਸਵਿਧਂ ਚਕ੍ਕਵਤ੍ਤਿਵਤ੍ਤਨ੍ਤਿ? ਵੁਚ੍ਚਤੇ –
‘‘ਕਤਮਂ ਪਨ ਤਂ, ਦੇਵ, ਅਰਿਯਂ ਚਕ੍ਕਵਤ੍ਤਿਵਤ੍ਤਨ੍ਤਿ? ਤੇਨ ਹਿ ਤ੍ਵਂ, ਤਾਤ, ਧਮ੍ਮਂਯੇਵ ਨਿਸ੍ਸਾਯ ਧਮ੍ਮਂ ਸਕ੍ਕਰੋਨ੍ਤੋ ਧਮ੍ਮਂ ਗਰੁਂ ਕਰੋਨ੍ਤੋ ਧਮ੍ਮਂ ਮਾਨੇਨ੍ਤੋ ਧਮ੍ਮਂ ਪੂਜੇਨ੍ਤੋ ਧਮ੍ਮਂ ਅਪਚਾਯਮਾਨੋ ਧਮ੍ਮਦ੍ਧਜੋ ਧਮ੍ਮਕੇਤੁ ਧਮ੍ਮਾਧਿਪਤੇਯ੍ਯੋ ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਸਂਵਿਦਹਸ੍ਸੁ ਅਨ੍ਤੋਜਨਸ੍ਮਿਂ ਬਲਕਾਯਸ੍ਮਿਂ ਖਤ੍ਤਿਯੇਸੁ ਅਨੁਯਨ੍ਤੇਸੁ ਬ੍ਰਾਹ੍ਮਣਗਹਪਤਿਕੇਸੁ ਨੇਗਮਜਾਨਪਦੇਸੁ ਸਮਣਬ੍ਰਾਹ੍ਮਣੇਸੁ ਮਿਗਪਕ੍ਖੀਸੁ. ਮਾ ਚ ਤੇ, ਤਾਤ, ਵਿਜਿਤੇ ਅਧਮ੍ਮਕਾਰੋ ਪਵਤ੍ਤਿਤ੍ਥ. ਯੇ ਚ ਤੇ, ਤਾਤ, ਵਿਜਿਤੇ ਅਧਨਾ ਅਸ੍ਸੁ, ਤੇਸਞ੍ਚ ਧਨਮਨੁਪ੍ਪਦੇਯ੍ਯਾਸਿ. ਯੇ ਚ ਤੇ, ਤਾਤ, ਵਿਜਿਤੇ ਸਮਣਬ੍ਰਾਹ੍ਮਣਾ ਮਦਪ੍ਪਮਾਦਾ ਪਟਿਵਿਰਤਾ ਖਨ੍ਤਿਸੋਰਚ੍ਚੇ ਨਿਵਿਟ੍ਠਾ ਏਕਮਤ੍ਤਾਨਂ ਦਮੇਨ੍ਤਿ, ਏਕਮਤ੍ਤਾਨਂ ਸਮੇਨ੍ਤਿ, ਏਕਮਤ੍ਤਾਨਂ ਪਰਿਨਿਬ੍ਬਾਪੇਨ੍ਤਿ. ਤੇ ਕਾਲੇਨ ਕਾਲਂ ਉਪਸਙ੍ਕਮਿਤ੍ਵਾ ਪਰਿਪੁਚ੍ਛੇਯ੍ਯਾਸਿ ਪਰਿਗ੍ਗਣ੍ਹੇਯ੍ਯਾਸਿ – ‘ਕਿਂ, ਭਨ੍ਤੇ, ਕੁਸਲਂ ਕਿਂ ਅਕੁਸਲਂ, ਕਿਂ ਸਾਵਜ੍ਜਂ ਕਿਂ ਅਨਵਜ੍ਜਂ, ਕਿਂ ਸੇਵਿਤਬ੍ਬਂ ਕਿਂ ਨ ਸੇਵਿਤਬ੍ਬਂ, ਕਿਂ ਮੇ ਕਰਿਯਮਾਨਂ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਅਸ੍ਸ, ਕਿਂ ਵਾ ਪਨ ਮੇ ਕਰਿਯਮਾਨਂ ਦੀਘਰਤ੍ਤਂ ਹਿਤਾਯ ਸੁਖਾਯ ਅਸ੍ਸਾ’ਤਿ. ਤੇਸਂ ਸੁਤ੍ਵਾ ਯਂ ਅਕੁਸਲਂ, ਤਂ ਅਭਿਨਿਵਜ੍ਜੇਯ੍ਯਾਸਿ, ਯਂ ਕੁਸਲਂ, ਤਂ ਸਮਾਦਾਯ ਵਤ੍ਤੇਯ੍ਯਾਸਿ. ਇਦਂ ਖੋ, ਤਾਤ, ਤਂ ਅਰਿਯਂ ਚਕ੍ਕਵਤ੍ਤਿਵਤ੍ਤ’’ਨ੍ਤਿ –
ਏਵਂ ਚਕ੍ਕਵਤ੍ਤਿਸੁਤ੍ਤੇ (ਦੀ. ਨਿ. ੩.੮੪) ਆਗਤਨਯੇਨ ਅਨ੍ਤੋਜਨਸ੍ਮਿਂ ਬਲਕਾਯੇ ਏਕਂ, ਖਤ੍ਤਿਯੇਸੁ ਏਕਂ, ਅਨੁਯਨ੍ਤੇਸੁ ਏਕਂ, ਬ੍ਰਾਹ੍ਮਣਗਹਪਤਿਕੇਸੁ ਏਕਂ, ਨੇਗਮਜਾਨਪਦੇਸੁ ਏਕਂ, ਸਮਣਬ੍ਰਾਹ੍ਮਣੇਸੁ ਏਕਂ, ਮਿਗਪਕ੍ਖੀਸੁ ਏਕਂ, ਅਧਮ੍ਮਕਾਰਪ੍ਪਟਿਕ੍ਖੇਪੋ ਏਕਂ, ਅਧਨਾਨਂ ਧਨਾਨੁਪ੍ਪਦਾਨਂ ਏਕਂ, ਸਮਣਬ੍ਰਾਹ੍ਮਣੇ ਉਪਸਙ੍ਕਮਿਤ੍ਵਾ ਪਞ੍ਹਪੁਚ੍ਛਨਂ ਏਕਨ੍ਤਿ ਏਵਮੇਵਂ ਤਂ ਚਕ੍ਕਵਤ੍ਤਿਵਤ੍ਤਂ ਦਸਵਿਧਂ ਹੋਤਿ. ਗਹਪਤਿਕੇ ਪਨ ਪਕ੍ਖਿਜਾਤੇ ਚ ਵਿਸੁਂ ਕਤ੍ਵਾ ਗਣ੍ਹਨ੍ਤਸ੍ਸ ਦ੍ਵਾਦਸਵਿਧਂ ਹੋਤਿ.
ਅਞ੍ਞਥਾ ਵਤ੍ਤਿਤੁਂ ਅਦੇਨ੍ਤੋ ਸੋ ਧਮ੍ਮੋ ਅਧਿਟ੍ਠਾਨਂ ਏਤਸ੍ਸਾਤਿ ਤਦਧਿਟ੍ਠਾਨਂ. ਤੇਨ ਤਦਧਿਟ੍ਠਾਨੇਨ ਚੇਤਸਾ. ਸਕ੍ਕਰੋਨ੍ਤੋਤਿ ਆਦਰਕਿਰਿਯਾਵਸੇਨ ਕਰੋਨ੍ਤੋ. ਤੇਨਾਹ ‘‘ਯਥਾ’’ਤਿਆਦਿ. ਗਰੁਂ ਕਰੋਨ੍ਤੋਤਿ ਪਾਸਾਣਚ੍ਛਤ੍ਤਂ ਵਿਯ ਗਰੁਕਰਣਵਸੇਨ ਗਰੁਂ ਕਰੋਨ੍ਤੋ. ਤੇਨੇਵਾਹ ‘‘ਤਸ੍ਮਿਂ ਗਾਰਵੁਪ੍ਪਤ੍ਤਿਯਾ’’ਤਿ. ਧਮ੍ਮਾਧਿਪਤਿਭੂਤਾਗਤਭਾਵੇਨਾਤਿ ਇਮਿਨਾ ਯਥਾਵੁਤ੍ਤਧਮ੍ਮਸ੍ਸ ਜੇਟ੍ਠਕਭਾਵੇਨ ਪੁਰਿਮਤਰਂ ਅਤ੍ਤਭਾਵੇਸੁ ਸਕ੍ਕਚ੍ਚਂ ਸਮੁਪਚਿਤਭਾਵਂ ਦਸ੍ਸੇਤਿ. ਧਮ੍ਮਵਸੇਨੇਵ ਚ ਸਬ੍ਬਕਿਰਿਯਾਨਂ ਕਰਣੇਨਾਤਿ ਏਤੇਨ ਠਾਨਨਿਸਜ੍ਜਾਦੀਸੁ ਯਥਾਵੁਤ੍ਤਧਮ੍ਮਨਿਨ੍ਨਪੋਣਪਬ੍ਭਾਰਭਾਵਂ ਦਸ੍ਸੇਤਿ. ਅਸ੍ਸਾਤਿ ਰਕ੍ਖਾਵਰਣਗੁਤ੍ਤਿਯਾ. ਪਰਂ ਰਕ੍ਖਨ੍ਤੋਤਿ ਅਞ੍ਞਂ ਦਿਟ੍ਠਧਮ੍ਮਿਕਾਦਿਅਨਤ੍ਥਤੋ ਰਕ੍ਖਨ੍ਤੋ. ਤੇਨੇਵ ਪਰਰਕ੍ਖਸਾਧਨੇਨ ਖਨ੍ਤਿਆਦਿਗੁਣੇਨ ਅਤ੍ਤਾਨਂ ਤਤੋ ਏਵ ਰਕ੍ਖਤਿ. ਮੇਤ੍ਤਚਿਤ੍ਤਤਾਤਿ ਮੇਤ੍ਤਚਿਤ੍ਤਤਾਯ. ਨਿਵਾਸਨਪਾਰੁਪਨਗੇਹਾਦੀਨਿ ਸੀਤੁਣ੍ਹਾਦਿਪ੍ਪਟਿਬਾਹਨੇਨ ਆਵਰਣਂ.
ਅਨ੍ਤੋਜਨਸ੍ਮਿਨ੍ਤਿ ਅਬ੍ਭਨ੍ਤਰਭੂਤੇ ਪੁਤ੍ਤਦਾਰਾਦਿਜਨੇ. ਸੀਲਸਂਵਰੇ ਪਤਿਟ੍ਠਾਪੇਨ੍ਤੋਤਿ ਇਮਿਨਾ ਰਕ੍ਖਂ ਦਸ੍ਸੇਤਿ. ਵਤ੍ਥਗਨ੍ਧਮਾਲਾਦੀਨਿ ਚਸ੍ਸ ਦਦਮਾਨੋਤਿ ਇਮਿਨਾ ਆਵਰਣਂ, ਇਤਰੇਨ ਗੁਤ੍ਤਿਂ. ਸਮ੍ਪਦਾਨੇਨਪੀਤਿ ਪਿ-ਸਦ੍ਦੇਨ ਸੀਲਸਂਵਰੇਸੁ ਪਤਿਟ੍ਠਾਪਨਾਦੀਨਂ ਸਮ੍ਪਿਣ੍ਡੇਤਿ. ਏਸ ਨਯੋ ਪਰੇਸੁਪਿ ਪਿ-ਸਦ੍ਦਗ੍ਗਹਣੇ. ਨਿਗਮੋ ਨਿਵਾਸੋ ਏਤੇਸਨ੍ਤਿ ਨੇਗਮਾ. ਏਵਂ ਜਾਨਪਦਾਤਿ ਆਹ ‘‘ਤਥਾ ਨਿਗਮਵਾਸਿਨੋ’’ਤਿਆਦਿਨਾ.
ਰਕ੍ਖਾਵਰਣਗੁਤ੍ਤਿਯਾ ਕਾਯਕਮ੍ਮਾਦੀਸੁ ਸਂਵਿਦਹਨਂ ਠਪਨਂ ਨਾਮ ਤਦੁਪਦੇਸੋਯੇਵਾਤਿ ਵੁਤ੍ਤਂ ‘‘ਕਥੇਤ੍ਵਾ’’ਤਿ. ਏਤੇਸੂਤਿ ਪਾਲ਼ਿਯਂ ਵੁਤ੍ਤੇਸੁ ਸਮਣਾਦੀਸੁ. ਪਟਿਵਤ੍ਤੇਤੁਂ ਨ ਸਕ੍ਕਾ ਖੀਣਾਨਂ ਕਿਲੇਸਾਨਂ ਪੁਨ ਅਨੁਪ੍ਪਜ੍ਜਨਤੋ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.
ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਸਚੇਤਨਸੁਤ੍ਤਵਣ੍ਣਨਾ
੧੫. ਪਞ੍ਚਮੇ ਇਸਯੋ ਪਤਨ੍ਤਿ ਸਨ੍ਨਿਪਤਨ੍ਤਿ ਏਤ੍ਥਾਤਿ ਇਸਿਪਤਨਨ੍ਤਿ ਆਹ ‘‘ਬੁਦ੍ਧਪਚ੍ਚੇਕਬੁਦ੍ਧਸਙ੍ਖਾਤਾਨ’’ਨ੍ਤਿਆਦਿ. ਸਬ੍ਬੂਪਕਰਣਾਨਿ ਸਜ੍ਜੇਤ੍ਵਾਤਿ ਸਬ੍ਬਾਨਿ ਰੁਕ੍ਖਸ੍ਸ ਛੇਦਨਤਚ੍ਛਨਾਦਿਸਾਧਨਾਨਿ ਉਪਕਰਣਾਨਿ ਰਞ੍ਞਾ ਆਣਤ੍ਤਦਿਵਸੇਯੇਵ ਸਜ੍ਜੇਤ੍ਵਾ. ਨਾਨਾ ਕਰੀਯਤਿ ਏਤੇਨਾਤਿ ਨਾਨਾਕਰਣਂ, ਨਾਨਾਭਾਵੋਤਿ ਆਹ ‘‘ਨਾਨਤ੍ਤ’’ਨ੍ਤਿ. ਨੇਸਨ੍ਤਿ ਸਰਲੋਪੇਨਾਯਂ ਨਿਦ੍ਦੇਸੋਤਿ ਆਹ ‘‘ਨ ਏਸ’’ਨ੍ਤਿ. ਤਥਾ ਅਤ੍ਥੇਸਨ੍ਤਿ ਏਤ੍ਥਾਪੀਤਿ ਆਹ ‘‘ਅਤ੍ਥਿ ਏਸ’’ਨ੍ਤਿ. ਪਵਤ੍ਤਨਤ੍ਥਂ ਅਭਿਸਙ੍ਖਰਣਂ ਅਭਿਸਙ੍ਖਾਰੋ, ਤਸ੍ਸ ਗਤਿ ਵੇਗਸਾ ਪਵਤ੍ਤਿ. ਤਂ ਸਨ੍ਧਾਯਾਹ ‘‘ਪਯੋਗਸ੍ਸ ਗਮਨ’’ਨ੍ਤਿ.
ਸਗਣ੍ਡਾਤਿ ਖੁਦ੍ਦਾਨੁਖੁਦ੍ਦਕਗਣ੍ਡਾ. ਤੇਨਾਹ ‘‘ਉਣ੍ਣਤੋਣਤਟ੍ਠਾਨਯੁਤ੍ਤਾ’’ਤਿ. ਸਕਸਾਵਾਤਿ ਸਕਸਟਾ. ਤੇਨਾਹ ‘‘ਪੂਤਿਸਾਰੇਨਾ’’ਤਿਆਦਿ. ਏਵਂ ਗੁਣਪਤਨੇਨ ਪਤਿਤਾਤਿ ਯਥਾ ਤਂ ਚਕ੍ਕਂ ਨਾਭਿਅਰਨੇਮੀਨਂ ਸਦੋਸਤਾਯ ਨ ਪਤਿਟ੍ਠਾਸਿ, ਏਵਮੇਕਚ੍ਚੇ ਪੁਗ੍ਗਲਾ ਕਾਯਵਙ੍ਕਾਦਿਵਸੇਨ ਸਦੋਸਤਾਯ ਗੁਣਪਤਨੇਨ ਪਤਿਤਾ ਸਕਟ੍ਠਾਨੇ ਨ ਤਿਟ੍ਠਨ੍ਤਿ. ਏਤ੍ਥ ਚ ਫਰੁਸਵਾਚਾਦਯੋਪਿ ਅਪਾਯਗਮਨੀਯਾ ਸੋਤਾਪਤ੍ਤਿਮਗ੍ਗੇਨੇਵ ਪਹੀਯਨ੍ਤੀਤਿ ਦਟ੍ਠਬ੍ਬਾ.
ਸਚੇਤਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਅਪਣ੍ਣਕਸੁਤ੍ਤਵਣ੍ਣਨਾ
੧੬. ਛਟ੍ਠੇ ਵਿਰਜ੍ਝਨਕਿਰਿਯਾ ਨਾਮ ਪਚ੍ਛਾ ਸਮਾਦਾਤਬ੍ਬਤਾਯ ਅਪਣ੍ਣਕਪ੍ਪਯੋਗਸਮਾਦਾਨਾ ਵਿਯ ਹੋਤਿ, ਅਵਿਰਜ੍ਝਨਕਿਰਿਯਾ ਪਨ ਪਚ੍ਛਾ ਅਸਮਾਦਾਤਬ੍ਬਤਾਯ ਅਨੂਨਾਤਿ ਤਂਸਮਙ੍ਗਿਪੁਗ੍ਗਲੋ ਅਪਣ੍ਣਕੋ, ਤਸ੍ਸ ਭਾਵੋ ਅਪਣ੍ਣਕਤਾਤਿ ਆਹ ‘‘ਅਪਣ੍ਣਕਪਟਿਪਦਨ੍ਤਿ ਅਵਿਰਦ੍ਧਪਟਿਪਦ’’ਨ੍ਤਿਆਦਿ. ਯਸ੍ਮਾ ਸਾ ਅਧਿਪ੍ਪੇਤਤ੍ਥਸਾਧਨੇਨ ਏਕਂਸਿਕਾ ਵਟ੍ਟਤੋ ਨਿਯ੍ਯਾਨਾਵਹਾ, ਤਤ੍ਥ ਚ ਯੁਤ੍ਤਿਯੁਤ੍ਤਾ ਅਸਾਰਾਪਗਤਾ ਅਵਿਰੁਦ੍ਧਤਾਯ ਅਪਚ੍ਚਨੀਕਾ ਅਨੁਲੋਮਿਕਾ ਅਨੁਧਮ੍ਮਭੂਤਾ ਚ, ਤਸ੍ਮਾ ਵੁਤ੍ਤਂ ‘‘ਏਕਂਸਪਟਿਪਦ’’ਨ੍ਤਿਆਦਿ. ਨ ਤਕ੍ਕਗ੍ਗਾਹੇਨ ਵਾ ਨਯਗ੍ਗਾਹੇਨ ਵਾਤਿ ਤਕ੍ਕਗ੍ਗਾਹੇਨ ਵਾ ਪਟਿਪਨ੍ਨੋ ਨ ਹੋਤਿ ਨਯਗ੍ਗਾਹੇਨ ਵਾ ਅਪਣ੍ਣਕਪਟਿਪਦਂ ਪਟਿਪਨ੍ਨੋ. ਤਤ੍ਥ ਤਕ੍ਕਗ੍ਗਾਹੇਨ ਵਾਤਿ ਆਚਰਿਯਂ ਅਲਭਿਤ੍ਵਾ ‘‘ਏਵਂ ਮੇ ਸੁਗਤਿ, ਨਿਬ੍ਬਾਨਂ ਵਾ ਭਵਿਸ੍ਸਤੀ’’ਤਿ ਅਤ੍ਤਨੋ ਤਕ੍ਕਗ੍ਗਹਣਮਤ੍ਤੇਨ. ਨਯਗ੍ਗਾਹੇਨਾਤਿ ਪਚ੍ਚਕ੍ਖਤੋ ਅਦਿਸ੍ਵਾ ਨਯਤੋ ਅਨੁਮਾਨਤੋ ਗਹਣੇਨ. ਏਵਂ ਗਹੇਤ੍ਵਾ ਪਟਿਪਨ੍ਨੋਤਿ ਤਕ੍ਕਮਤ੍ਤੇਨ, ਨਯਗ੍ਗਾਹੇਨ ਵਾ ਪਟਿਪਨ੍ਨੋ. ਪਣ੍ਡਿਤਸਤ੍ਥਵਾਹੋ ਵਿਯ ਸਮ੍ਪਤ੍ਤੀਹਿ ਨ ਪਰਿਹਾਯਤੀਤਿ ਯੋਜਨਾ.
ਯਂ ਸਨ੍ਧਾਯ ਵੁਤ੍ਤਨ੍ਤਿ ਪਰਿਹਾਨਞ੍ਚ ਅਪਰਿਹਾਨਞ੍ਚ ਸਨ੍ਧਾਯ ਜਾਤਕੇ (ਜਾ. ੧.੧.੧) ਵੁਤ੍ਤਂ. ਅਯਂ ਪਨੇਤ੍ਥ ਗਾਥਾਯ ਅਤ੍ਥਯੋਜਨਾ – ਅਪਣ੍ਣਕਂ ਠਾਨਂ ਅਵਿਰਦ੍ਧਕਾਰਣਂ ਨਿਯ੍ਯਾਨਿਕਕਾਰਣਂ ਏਕੇ ਬੋਧਿਸਤ੍ਤਪ੍ਪਮੁਖਾ ਪਣ੍ਡਿਤਮਨੁਸ੍ਸਾ ਗਣ੍ਹਿਂਸੁ. ਯੇ ਪਨ ਤੇ ਬਾਲਸਤ੍ਥਵਾਹਪੁਤ੍ਤਪ੍ਪਮੁਖਾ ਤਕ੍ਕਿਕਾ ਆਹੁ, ਤੇ ਦੁਤਿਯਂ ਸਾਪਰਾਧਂ ਅਨੇਕਂਸਿਕਂ ਠਾਨਂ ਅਨਿਯ੍ਯਾਨਿਕਂ ਕਾਰਣਂ ਅਗ੍ਗਹੇਸੁਂ, ਤੇ ਕਣ੍ਹਪਟਿਪਦਂ ਪਟਿਪਨ੍ਨਾ. ਤਤ੍ਥ ਸੁਕ੍ਕਪਟਿਪਦਾ ਅਪਰਿਹਾਨਿਪਟਿਪਦਾ, ਕਣ੍ਹਪਟਿਪਦਾ ਪਰਿਹਾਨਿਪਟਿਪਦਾ, ਤਸ੍ਮਾ ਯੇ ਸੁਕ੍ਕਪਟਿਪਦਂ ਪਟਿਪਨ੍ਨਾ, ਤੇ ਅਪਰਿਹੀਨਾ ਸੋਤ੍ਥਿਭਾਵਂ ਪਤ੍ਤਾ. ਯੇ ਪਨ ਕਣ੍ਹਪਟਿਪਦਂ ਪਟਿਪਨ੍ਨਾ, ਤੇ ਪਰਿਹੀਨਾ ਅਨਯਬ੍ਯਸਨਂ ਆਪਨ੍ਨਾਤਿ ਇਮਮਤ੍ਥਂ ਭਗਵਾ ਅਨਾਥਪਿਣ੍ਡਿਕਸ੍ਸ ਗਹਪਤਿਨੋ ਵਤ੍ਵਾ ਉਤ੍ਤਰਿ ਇਦਮਾਹ ‘‘ਏਤਦਞ੍ਞਾਯ ਮੇਧਾਵੀ, ਤਂ ਗਣ੍ਹੇ ਯਦਪਣ੍ਣਕ’’ਨ੍ਤਿ.
ਤਤ੍ਥ ਏਤਦਞ੍ਞਾਯ ਮੇਧਾਵੀਤਿ ਮੇਧਾਤਿ ਲਦ੍ਧਨਾਮਾਯ ਵਿਸੁਦ੍ਧਾਯ ਉਤ੍ਤਮਾਯ ਪਞ੍ਞਾਯ ਸਮਨ੍ਨਾਗਤੋ ਕੁਲਪੁਤ੍ਤੋ ਏਤਂ ਅਪਣ੍ਣਕਂ ਠਾਨਂ ਦੁਤਿਯਞ੍ਚਾਤਿ ਦ੍ਵੀਸੁ ਅਤਕ੍ਕਗ੍ਗਾਹਤਕ੍ਕਗ੍ਗਾਹਸਙ੍ਖਾਤੇਸੁ ਠਾਨੇਸੁ ਗੁਣਦੋਸਂ ਵੁਦ੍ਧਿਹਾਨਿਂ ਅਤ੍ਥਾਨਤ੍ਥਂ ਞਤ੍ਵਾਤਿ ਅਤ੍ਥੋ. ਤਂ ਗਣ੍ਹੇ ਯਦਪਣ੍ਣਕਨ੍ਤਿ ਯਂ ਅਪਣ੍ਣਕਂ ਏਕਂਸਿਕਂ ਸੁਕ੍ਕਪਟਿਪਦਾਅਪਰਿਹਾਨਿਯਪਟਿਪਦਾਸਙ੍ਖਾਤਂ ਨਿਯ੍ਯਾਨਿਕਕਾਰਣਂ, ਤਦੇਵ ਗਣ੍ਹੇਯ੍ਯ. ਕਸ੍ਮਾ? ਏਕਂਸਿਕਾਦਿਭਾਵਤੋਯੇਵ. ਇਤਰਂ ਪਨ ਨ ਗਣ੍ਹੇਯ੍ਯ. ਕਸ੍ਮਾ? ਅਨੇਕਂਸਿਕਾਦਿਭਾਵਤੋਯੇਵ.
ਯਵਨ੍ਤਿ ਤਾਯ ਸਤ੍ਤਾ ਅਮਿਸ੍ਸਿਤਾਪਿ ਸਮਾਨਜਾਤਿਤਾਯ ਮਿਸ੍ਸਿਤਾ ਵਿਯ ਹੋਨ੍ਤੀਤਿ ਯੋਨਿ. ਸਾ ਪਨ ਅਤ੍ਥਤੋ ਅਣ੍ਡਾਦਿਉਪ੍ਪਤ੍ਤਿਟ੍ਠਾਨਵਿਸਿਟ੍ਠੋ ਖਨ੍ਧਾਨਂ ਭਾਗਸੋ ਪਵਤ੍ਤਿਵਿਸੇਸੋਤਿ ਆਹ ‘‘ਖਨ੍ਧਕੋਟ੍ਠਾਸੋ ਯੋਨਿ ਨਾਮਾ’’ਤਿ. ਕਾਰਣਂ ਯੋਨਿ ਨਾਮ, ਯੋਨੀਤਿ ਤਂ ਤਂ ਫਲਂ ਅਨੁਪਚਿਤਞਾਣਸਮ੍ਭਾਰੇਹਿ ਦੁਰਵਗਾਧਭੇਦਤਾਯ ਮਿਸ੍ਸਿਤਂ ਵਿਯ ਹੋਤੀਤਿ. ਯਤੋ ਏਕਤ੍ਤਨਯੇਨ ਸੋ ਏਵਾਯਨ੍ਤਿ ਬਾਲਾਨਂ ਮਿਚ੍ਛਾਗਾਹੋ. ਪਸ੍ਸਾਵਮਗ੍ਗੋ ਯੋਨਿ ਨਾਮ ਯਵਨ੍ਤਿ ਤਾਯ ਸਤ੍ਤਾ ਯੋਨਿਸਮ੍ਬਨ੍ਧੇਨ ਮਿਸ੍ਸਿਤਾ ਹੋਨ੍ਤੀਤਿ. ਪਗ੍ਗਹਿਤਾ ਅਨੁਟ੍ਠਾਨੇਨ, ਪੁਨਪ੍ਪੁਨਂ ਆਸੇਵਨਾਯ ਪਰਿਪੁਣ੍ਣਾ.
‘‘ਚਕ੍ਖੁਤੋਪੀ’’ਤਿਆਦਿਮ੍ਹਿ ਪਨ ਚਕ੍ਖੁਵਿਞ੍ਞਾਣਾਦਿਵੀਥੀਸੁ ਤਦਨੁਗਤਮਨੋਵਿਞ੍ਞਾਣਵੀਥੀਸੁ ਚ ਕਿਞ੍ਚਾਪਿ ਕੁਸਲਾਦੀਨਂ ਪਵਤ੍ਤਿ ਅਤ੍ਥਿ, ਕਾਮਾਸਵਾਦਯੋ ਏਵ ਪਨ ਵਣਤੋ ਯੂਸਂ ਵਿਯ ਪਗ੍ਘਰਨਕਅਸੁਚਿਭਾਵੇਨ ਸਨ੍ਦਨ੍ਤਿ, ਤਸ੍ਮਾ ਤੇ ਏਵ ‘‘ਆਸਵਾ’’ਤਿ ਵੁਚ੍ਚਨ੍ਤਿ. ਤਤ੍ਥ ਹਿ ਪਗ੍ਘਰਨਕਅਸੁਚਿਮ੍ਹਿ ਆਸਵਸਦ੍ਦੋ ਨਿਰੁਲ਼੍ਹੋਤਿ. ਧਮ੍ਮਤੋ ਯਾਵ ਗੋਤ੍ਰਭੂਤਿ ਤਤੋ ਪਰਂ ਮਗ੍ਗਫਲੇਸੁ ਅਪ੍ਪਵਤ੍ਤਨਤੋ ਵੁਤ੍ਤਂ. ਏਤੇ ਹਿ ਆਰਮ੍ਮਣਕਰਣਵਸੇਨ ਧਮ੍ਮੇ ਗਚ੍ਛਨ੍ਤਾ ਤਤੋ ਪਰਂ ਨ ਗਚ੍ਛਨ੍ਤਿ. ਨਨੁ ਤਤੋ ਪਰਂ ਭਵਙ੍ਗਾਦੀਨਿਪਿ ਗਚ੍ਛਨ੍ਤੀਤਿ ਚੇ? ਨ, ਤੇਸਮ੍ਪਿ ਪੁਬ੍ਬੇ ਆਲਮ੍ਬਿਤੇਸੁ ਲੋਕਿਯਧਮ੍ਮੇਸੁ ਸਾਸਵਭਾਵੇਨ ਅਨ੍ਤੋਗਧਤ੍ਤਾ ਤਤੋ ਪਰਤਾਭਾਵਤੋ. ਏਤ੍ਥ ਚ ਗੋਤ੍ਰਭੁਵਚਨੇਨ ਗੋਤ੍ਰਭੁਵੋਦਾਨਫਲਸਮਾਪਤ੍ਤਿਪੁਰੇਚਾਰਿਕਪਰਿਕਮ੍ਮਾਨਿ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ. ਪਠਮਮਗ੍ਗਪੁਰੇਚਾਰਿਕਮੇਵ ਵਾ ਗੋਤ੍ਰਭੁ ਅਵਧਿਨਿਦਸ੍ਸਨਭਾਵੇਨ ਗਹਿਤਂ, ਤਤੋ ਪਰਂ ਪਨ ਮਗ੍ਗਫਲਸਮਾਨਤਾਯ ਅਞ੍ਞੇਸੁ ਮਗ੍ਗੇਸੁ ਮਗ੍ਗਵੀਥਿਯਂ ਸਮਾਪਤ੍ਤਿਵੀਥੀਯਂ ਨਿਰੋਧਾਨਨ੍ਤਰਞ੍ਚ ਪਵਤ੍ਤਮਾਨੇਸੁ ਫਲੇਸੁ ਨਿਬ੍ਬਾਨੇ ਚ ਆਸਵਾਨਂ ਪਵਤ੍ਤਿ ਨਿਵਾਰਿਤਾਤਿ ਵੇਦਿਤਬ੍ਬਂ. ਸਵਨ੍ਤੀਤਿ ਗਚ੍ਛਨ੍ਤਿ, ਆਰਮ੍ਮਣਕਰਣਵਸੇਨ ਪਵਤ੍ਤਨ੍ਤੀਤਿ ਅਤ੍ਥੋ. ਅਵਧਿਅਤ੍ਥੋ ਆ-ਕਾਰੋ, ਅਵਧਿ ਚ ਮਰਿਯਾਦਾਭਿਵਿਧਿਭੇਦਤੋ ਦੁਵਿਧੋ. ਤਤ੍ਥ ਮਰਿਯਾਦਂ ਕਿਰਿਯਂ ਬਹਿ ਕਤ੍ਵਾ ਪਵਤ੍ਤਤਿ ਯਥਾ ‘‘ਆਪਾਟਲੀਪੁਤ੍ਤਂ ਵੁਟ੍ਠੋ ਦੇਵੋ’’ਤਿ. ਅਭਿਵਿਧਿ ਪਨ ਕਿਰਿਯਂ ਬ੍ਯਾਪੇਤ੍ਵਾ ਪਵਤ੍ਤਤਿ ਯਥਾ ‘‘ਆਭਵਗ੍ਗਂ ਭਗਵਤੋ ਯਸੋ ਪਵਤ੍ਤਤੀ’’ਤਿ. ਅਭਿਵਿਧਿਅਤ੍ਥੋ ਚਾਯਮਾ-ਕਾਰੋ ਇਧ ਗਹਿਤੋਤਿ ਵੁਤ੍ਤਂ ‘‘ਅਨ੍ਤੋਕਰਣਤ੍ਥੋ’’ਤਿ.
ਮਦਿਰਾਦਯੋਤਿ ਆਦਿ-ਸਦ੍ਦੇਨ ਸਿਨ੍ਧਵਕਾਦਮ੍ਬਰਿਕਾਪੋਤਿਕਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਚਿਰਪਾਰਿਵਾਸਿਯਟ੍ਠੋ ਚਿਰਪਰਿਵੁਟ੍ਠਤਾ ਪੁਰਾਣਭਾਵੋ. ਅਵਿਜ੍ਜਾ ਨਾਹੋਸੀਤਿਆਦੀਤਿ ਏਤ੍ਥ ਆਦਿ-ਸਦ੍ਦੇਨ ‘‘ਪੁਰਿਮਾ, ਭਿਕ੍ਖਵੇ, ਕੋਟਿ ਨ ਪਞ੍ਞਾਯਤਿ ਭਵਤਣ੍ਹਾਯਾ’’ਤਿ (ਅ. ਨਿ. ੧੦.੬੨) ਇਦਂ ਸੁਤ੍ਤਂ ਸਙ੍ਗਹਿਤਂ. ਅਵਿਜ੍ਜਾਸਵਭਵਾਸਵਾਨਂ ਚਿਰਪਰਿਵੁਟ੍ਠਤਾਯ ਦਸ੍ਸਿਤਾਯ ਤਬ੍ਭਾਵਭਾਵਿਨੋ ਕਾਮਾਸਵਸ੍ਸ ਚਿਰਪਰਿਵੁਟ੍ਠਤਾ ਦਸ੍ਸਿਤਾਵ ਹੋਤਿ. ਅਞ੍ਞੇਸੁ ਚ ਯਥਾਵੁਤ੍ਤੇ ਧਮ੍ਮੇ ਓਕਾਸਞ੍ਚ ਆਰਮ੍ਮਣਂ ਕਤ੍ਵਾ ਪਵਤ੍ਤਮਾਨੇਸੁ ਮਾਨਾਦੀਸੁ ਵਿਜ੍ਜਮਾਨੇਸੁ ਅਤ੍ਤਤ੍ਤਨਿਯਾਦਿਗ੍ਗਾਹਵਸੇਨ ਅਭਿਬ੍ਯਾਪਨਂ ਮਦਕਰਣਵਸੇਨ ਆਸਵਸਦਿਸਤਾ ਚ ਏਤੇਸਂਯੇਵ, ਨ ਅਞ੍ਞੇਸਨ੍ਤਿ ਏਤੇਸ੍ਵੇਵ ਆਸਵਸਦ੍ਦੋ ਨਿਰੁਲ਼੍ਹੋਤਿ ਦਟ੍ਠਬ੍ਬੋ. ਆਯਤਂ ਅਨਾਦਿਕਾਲਿਕਤ੍ਤਾ. ਪਸਵਨ੍ਤੀਤਿ ਫਲਨ੍ਤਿ. ਨ ਹਿ ਕਿਞ੍ਚਿ ਸਂਸਾਰਦੁਕ੍ਖਂ ਅਤ੍ਥਿ, ਯਂ ਆਸਵੇਹਿ ਵਿਨਾ ਉਪ੍ਪਜ੍ਜੇਯ੍ਯ. ਪੁਰਿਮਾਨਿ ਚੇਤ੍ਥਾਤਿ ਏਤੇਸੁ ਚਤੂਸੁ ਅਤ੍ਥਵਿਕਪ੍ਪੇਸੁ ਪੁਰਿਮਾਨਿ ਤੀਣਿ. ਯਤ੍ਥਾਤਿ ਯੇਸੁ ਸੁਤ੍ਤਾਭਿਧਮ੍ਮਪ੍ਪਦੇਸੇਸੁ. ਤਤ੍ਥ ਯੁਜ੍ਜਨ੍ਤਿ ਕਿਲੇਸੇਸੁਯੇਵ ਯਥਾਵੁਤ੍ਤਸ੍ਸ ਅਤ੍ਥਤ੍ਤਯਸ੍ਸ ਸਮ੍ਭਵਤੋ. ਪਚ੍ਛਿਮਂ ਕਮ੍ਮੇਪੀਤਿ ਪਚ੍ਛਿਮਂ ‘‘ਆਯਤਂ ਵਾ ਸਂਸਾਰਦੁਕ੍ਖਂ ਸਵਨ੍ਤਿ ਪਸਵਨ੍ਤੀ’’ਤਿ ਵੁਤ੍ਤਨਿਬ੍ਬਚਨਂ ਕਮ੍ਮੇਪਿ ਯੁਜ੍ਜਤਿ ਦੁਕ੍ਖਪ੍ਪਸਵਨਸ੍ਸ ਕਿਲੇਸਕਮ੍ਮਸਾਧਾਰਣਤ੍ਤਾ.
ਦਿਟ੍ਠਧਮ੍ਮਾ ਵੁਚ੍ਚਨ੍ਤਿ ਪਚ੍ਚਕ੍ਖਭੂਤਾ ਖਨ੍ਧਾ, ਦਿਟ੍ਠਧਮ੍ਮੇ ਭਵਾ ਦਿਟ੍ਠਧਮ੍ਮਿਕਾ. ਵਿਵਾਦਮੂਲਭੂਤਾਤਿ ਵਿਵਾਦਸ੍ਸ ਮੂਲਕਾਰਣਭੂਤਾ ਕੋਧੂਪਨਾਹਮਕ੍ਖਪਲਾਸਇਸ੍ਸਾਮਚ੍ਛਰਿਯਮਾਯਾਸਾਠੇਯ੍ਯਥਮ੍ਭਸਾਰਮ੍ਭਮਾਨਾਤਿਮਾਨਾ. ਯੇਨ ਦੇਵੂਪਪਤ੍ਯਸ੍ਸਾਤਿ ਯੇਨ ਕਮ੍ਮਕਿਲੇਸਪ੍ਪਕਾਰੇਨ ਆਸਵੇਨ ਦੇਵੇਸੁ ਉਪਪਤ੍ਤਿ ਨਿਬ੍ਬਤ੍ਤਿ ਅਸ੍ਸ ਮਯ੍ਹਨ੍ਤਿ ਸਮ੍ਬਨ੍ਧੋ. ਗਨ੍ਧਬ੍ਬੋ ਵਾ ਵਿਹਙ੍ਗਮੋ ਆਕਾਸਚਾਰੀ ਅਸ੍ਸਨ੍ਤਿ ਵਿਭਤ੍ਤਿਂ ਵਿਪਰਿਣਾਮੇਤ੍ਵਾ ਯੋਜੇਤਬ੍ਬਂ. ਏਤ੍ਥ ਚ ਯਕ੍ਖਗਨ੍ਧਬ੍ਬਵਿਨਿਮੁਤ੍ਤਾ ਸਬ੍ਬਾ ਦੇਵਤਾ ਦੇਵਗ੍ਗਹਣੇਨ ਗਹਿਤਾ. ਨਲ਼ੋ ਵੁਚ੍ਚਤਿ ਮੂਲਂ, ਤਸ੍ਮਾ ਵਿਨਲ਼ੀਕਤਾਤਿ ਵਿਗਤਨਲ਼ਾ ਵਿਗਤਮੂਲਾ ਕਤਾਤਿ ਅਤ੍ਥੋ. ਅਵਸੇਸਾ ਚ ਅਕੁਸਲਾ ਧਮ੍ਮਾਤਿ ਅਕੁਸਲਕਮ੍ਮਤੋ ਅਵਸੇਸਾ ਅਕੁਸਲਾ ਧਮ੍ਮਾ ਆਸਵਾਤਿ ਆਗਤਾਤਿ ਸਮ੍ਬਨ੍ਧੋ.
ਪਟਿਘਾਤਾਯਾਤਿ ਪਟਿਸੇਧਨਾਯ. ਪਰੂਪਵਾਦ…ਪੇ… ਉਪਦ੍ਦਵਾਤਿ ਇਦਂ ਯਦਿ ਭਗਵਾ ਸਿਕ੍ਖਾਪਦਂ ਨ ਪਞ੍ਞਾਪੇਯ੍ਯ, ਤਤੋ ਅਸਦ੍ਧਮ੍ਮਪ੍ਪਟਿਸੇਵਨਅਦਿਨ੍ਨਾਦਾਨਪਾਣਾਤਿਪਾਤਾਦਿਹੇਤੁ ਯੇ ਉਪ੍ਪਜ੍ਜੇਯ੍ਯੁਂ ਪਰੂਪਵਾਦਾਦਯੋ ਦਿਟ੍ਠਧਮ੍ਮਿਕਾ ਨਾਨਪ੍ਪਕਾਰਾ ਅਨਤ੍ਥਾ, ਯੇ ਚ ਤਨ੍ਨਿਮਿਤ੍ਤਮੇਵ ਨਿਰਯਾਦੀਸੁ ਨਿਬ੍ਬਤ੍ਤਸ੍ਸ ਪਞ੍ਚਵਿਧਬਨ੍ਧਨਕਮ੍ਮਕਾਰਣਾਦਿਵਸੇਨ ਮਹਾਦੁਕ੍ਖਾਨੁਭਵਾਦਿਪ੍ਪਕਾਰਾ ਅਨਤ੍ਥਾ, ਤੇ ਸਨ੍ਧਾਯ ਵੁਤ੍ਤਂ.
ਤੇ ਪਨੇਤੇਤਿ ਏਤੇ ਕਾਮਰਾਗਾਦਿਕਿਲੇਸਤੇਭੂਮਕਕਮ੍ਮਪਰੂਪਵਾਦਾਦਿਉਪ੍ਪਦ੍ਦਵਪ੍ਪਕਾਰਾ ਆਸਵਾ. ਯਤ੍ਥਾਤਿ ਯਸ੍ਮਿਂ ਵਿਨਯਾਦਿਪਾਲ਼ਿਪ੍ਪਦੇਸੇ. ਯਥਾਤਿ ਯੇਨ ਦੁਵਿਧਾਦਿਪ੍ਪਕਾਰੇਨ ਅਵਸੇਸੇਸੁ ਚ ਸੁਤ੍ਤਨ੍ਤੇਸੁ ਤਿਧਾ ਆਗਤਾਤਿ ਸਮ੍ਬਨ੍ਧੋ. ਨਿਰਯਂ ਗਮੇਨ੍ਤੀਤਿ ਨਿਰਯਗਾਮਿਨਿਯਾ. ਛਕ੍ਕਨਿਪਾਤੇਤਿ ਛਕ੍ਕਨਿਪਾਤੇ ਆਹੁਨੇਯ੍ਯਸੁਤ੍ਤੇ (ਅ. ਨਿ. ੬.੫੮). ਤਤ੍ਥ ਹਿ ਆਸਵਾ ਛਧਾ ਆਗਤਾ.
ਸਰਸਭੇਦੋਤਿ ਖਣਿਕਨਿਰੋਧੋ. ਖੀਣਾਕਾਰੋਤਿ ਅਚ੍ਚਨ੍ਤਾਯ ਖੀਣਤਾ. ਆਸਵਾ ਖੀਯਨ੍ਤਿ ਪਹੀਯਨ੍ਤਿ ਏਤੇਨਾਤਿ ਆਸਵਕ੍ਖਯੋ, ਮਗ੍ਗੋ. ਆਸਵਾਨਂ ਖਯਨ੍ਤੇ ਉਪ੍ਪਜ੍ਜਨਤੋ ਆਸਵਕ੍ਖਯੋ, ਫਲਂ. ਆਸਵਕ੍ਖਯੇਨ ਪਤ੍ਤਬ੍ਬਤੋ ਆਸਵਾ ਖੀਯਨ੍ਤਿ ਏਤ੍ਥਾਤਿ ਆਸਵਕ੍ਖਯੋ, ਨਿਬ੍ਬਾਨਂ. ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੫੫੭-੫੬੦) ਵਿਤ੍ਥਾਰਿਤੋ, ਤਸ੍ਮਾ ਤਤ੍ਥ, ਤਂ ਸਂਵਣ੍ਣਨਾਯ ਚ ਵੁਤ੍ਤਨਯੇਨ ਵੇਦਿਤਬ੍ਬੋ.
ਤਥਾਤਿ ਇਮਿਨਾ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਤਂ ਉਪਸਂਹਰਤਿ. ਕੁਸਲਪ੍ਪਵਤ੍ਤਿਂ ਆਵਰਨ੍ਤਿ ਨਿਵਾਰੇਨ੍ਤੀਤਿ ਆਵਰਣੀਯਾ. ਪੁਰਿਮਪ੍ਪਵਤ੍ਤਿਵਸੇਨਾਤਿ ਨਿਦ੍ਦੋਕ੍ਕਮਨਤੋ ਪੁਬ੍ਬੇ ਕਮ੍ਮਟ੍ਠਾਨਸ੍ਸ ਪਵਤ੍ਤਿਵਸੇਨ. ਠਪੇਤ੍ਵਾਤਿ ਹਤ੍ਥਗਤਂ ਕਿਞ੍ਚਿ ਠਪੇਨ੍ਤੋ ਵਿਯ ਕਮ੍ਮਟ੍ਠਾਨਂ ਸਤਿਸਮ੍ਪਜਞ੍ਞਵਸੇਨ ਠਪੇਤ੍ਵਾ ਕਮ੍ਮਟ੍ਠਾਨਮੇਵ ਮਨਸਿਕਰੋਨ੍ਤੋ ਨਿਦ੍ਦਂ ਓਕ੍ਕਮਤਿ, ਝਾਨਸਮਾਪਨ੍ਨੋ ਵਿਯ ਯਥਾਪਰਿਚ੍ਛਿਨ੍ਨੇਨੇਵ ਕਾਲੇਨ ਪਬੁਜ੍ਝਮਾਨੋ ਕਮ੍ਮਟ੍ਠਾਨਂ ਠਪਿਤਟ੍ਠਾਨੇ ਗਣ੍ਹਨ੍ਤੋਯੇਵ ਪਬੁਜ੍ਝਤਿ ਨਾਮ. ਤੇਨ ਵੁਤ੍ਤਂ ‘‘ਤਸ੍ਮਾ…ਪੇ… ਨਾਮ ਹੋਤੀ’’ਤਿ. ਮੂਲਕਮ੍ਮਟ੍ਠਾਨੇਤਿ ਆਦਿਤੋ ਪਟ੍ਠਾਯ ਪਰਿਹਰਿਯਮਾਨਕਮ੍ਮਟ੍ਠਾਨੇ. ਪਰਿਗ੍ਗਹਕਮ੍ਮਟ੍ਠਾਨਵਸੇਨਾਤਿ ਸਯਨਂ ਉਪਗਚ੍ਛਨ੍ਤੇਨ ਪਰਿਗ੍ਗਹਮਾਨਕਮ੍ਮਟ੍ਠਾਨਮਨਸਿਕਾਰਵਸੇਨ. ਸੋ ਪਨ ਧਾਤੁਮਨਸਿਕਾਰਵਸੇਨ ਇਚ੍ਛਿਤਬ੍ਬੋਤਿ ਦਸ੍ਸੇਤੁਂ ‘‘ਅਯਂ ਹੀ’’ਤਿਆਦਿ ਵੁਤ੍ਤਂ.
ਅਪਣ੍ਣਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਅਤ੍ਤਬ੍ਯਾਬਾਧਸੁਤ੍ਤਵਣ੍ਣਨਾ
੧੭. ਸਤ੍ਤਮੇ ਬ੍ਯਾਬਾਧਨਂ ਦੁਕ੍ਖਾਪਨਨ੍ਤਿ ਆਹ ‘‘ਅਤ੍ਤਬ੍ਯਾਬਾਧਾਯਾਤਿ ਅਤ੍ਤਦੁਕ੍ਖਾਯਾ’’ਤਿ. ਮਗ੍ਗਫਲਚਿਤ੍ਤੁਪ੍ਪਾਦਾਪਿ ਕਾਯਸੁਚਰਿਤਾਦਿਸਙ੍ਗਹੋ ਏਵਾਤਿ ਆਹ ‘‘ਅਵਾਰਿਤਾਨੇਵਾ’’ਤਿ.
ਅਤ੍ਤਬ੍ਯਾਬਾਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਦੇਵਲੋਕਸੁਤ੍ਤਵਣ੍ਣਨਾ
੧੮. ਅਟ੍ਠਮੇ ਇਤੀਤਿ ਪਦਸਨ੍ਧਿਬ੍ਯਞ੍ਜਨਸਿਲਿਟ੍ਠਤਾਤਿ ਪੁਰਿਮਪਦਾਨਂ ਪਚ੍ਛਿਮਪਦੇਹਿ ਅਤ੍ਥਤੋ ਸਹਿਤਤਾਯ ਬ੍ਯਞ੍ਜਨਾਨਂ ਵਾਕ੍ਯਾਨਂ ਸਿਲਿਟ੍ਠਤਾਯ ਦੀਪਨੇ ਨਿਪਾਤੋ.
ਦੇਵਲੋਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਪਠਮਪਾਪਣਿਕਸੁਤ੍ਤਵਣ੍ਣਨਾ
੧੯. ਨਵਮੇ ਉਗ੍ਘਾਟੇਤ੍ਵਾਤਿ ਆਸਨਦ੍ਵਾਰਞ੍ਚੇਵ ਭਣ੍ਡਪਸਿਬ੍ਬਕੇ ਚ ਵਿਵਰਿਤ੍ਵਾ. ਨਾਧਿਟ੍ਠਾਤੀਤਿ ਤਂਤਂਕਯਵਿਕ੍ਕਯੇ ਅਤ੍ਤਨਾ ਵੋਯੋਗਂ ਨਾਪਜ੍ਜਤਿ. ਦਿਵਾਕਾਲੇਤਿ ਮਜ੍ਝਨ੍ਹਿਕਸਮਯੇ. ਅਸ੍ਸਾਮਿਕੋ ਹੋਤਿ ਤੀਸੁਪਿ ਕਾਲੇਸੁ ਲਦ੍ਧਬ੍ਬਲਾਭਸ੍ਸ ਅਲਭਨਤੋ. ਅਪਤਿਵਾਤਾਬਾਧਂ ਰਤ੍ਤਿਟ੍ਠਾਨਂ. ਛਾਯੁਦਕਸਮ੍ਪਨ੍ਨਂ ਦਿਵਾਟ੍ਠਾਨਂ. ਵਿਪਸ੍ਸਨਾਪਿ ਵਟ੍ਟਤਿ ਵਿਪਸ੍ਸਨਾਕਮ੍ਮਿਕੋਯੇਵ. ਤੇਨਪਿ ਹਿ ਨਵਧਾ ਇਨ੍ਦ੍ਰਿਯਾਨਂ ਤਿਕ੍ਖਤ੍ਤਂ ਆਪਾਦੇਨ੍ਤੇਨ ਸਮਾਧਿਨਿਮਿਤ੍ਤਂ ਗਹੇਤਬ੍ਬਂ, ਵਿਪਸ੍ਸਨਾਨਿਮਿਤ੍ਤਂ ਸਮਾਹਿਤਾਕਾਰਸਲ੍ਲਕ੍ਖਣਾਯ.
ਪਠਮਪਾਪਣਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਦੁਤਿਯਪਾਪਣਿਕਸੁਤ੍ਤਵਣ੍ਣਨਾ
੨੦. ਦਸਮੇ ਵਿਸਿਟ੍ਠਧੁਰੋਤਿ ਵਿਸਿਟ੍ਠਧੁਰਸਮ੍ਪਗ੍ਗਾਹੋ ਵੀਰਿਯਸਮ੍ਪਨ੍ਨੋ. ਞਾਣਵੀਰਿਯਾਯਤ੍ਤਾ ਹਿ ਅਤ੍ਥਸਿਦ੍ਧਿਯੋ. ਤੇਨਾਹ ‘‘ਉਤ੍ਤਮਧੁਰੋ’’ਤਿਆਦਿ. ਵਿਕ੍ਕਾਯਿਕਭਣ੍ਡਨ੍ਤਿ ਵਿਕ੍ਕਯੇਤਬ੍ਬਭਣ੍ਡਂ. ਨਿਕ੍ਖਿਤ੍ਤਧਨੇਨਾਤਿ ਨਿਦਹਿਤ੍ਵਾ ਠਪਿਤਧਨਵਸੇਨ. ਵਲ਼ਞ੍ਜਨਕਵਸੇਨਾਤਿ ਦਿਵਸੇ ਦਿਵਸੇ ਦਾਨੂਪਭੋਗਵਸੇਨ ਵਲ਼ਞ੍ਜਿਤਬ੍ਬਧਨਵਸੇਨ. ਉਪਭੋਗਪਰਿਭੋਗਭਣ੍ਡੇਨਾਤਿ ਉਪਭੋਗਪਰਿਭੋਗੂਪਕਰਣੇਨ. ਨਿਪਤਨ੍ਤੀਤਿ ਨਿਪਾਤੇਨ੍ਤਿ, ਅਤ੍ਤਨੋ ਧਨਗ੍ਗਹੇਨ ਨਿਪਾਤਵੁਤ੍ਤਿਕੇ ਕਰੋਨ੍ਤਿ. ਤੇਨਾਹ ‘‘ਨਿਮਨ੍ਤੇਨ੍ਤੀ’’ਤਿ.
ਞਾਣਥਾਮੇਨਾਤਿ ਞਾਣਸ੍ਸ ਥਿਰਭਾਵੇਨ. ਞਾਣਪਰਕ੍ਕਮੇਨਾਤਿ ਞਾਣਸਹਿਤੇਨ ਵੀਰਿਯੇਨ. ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਭੇਦਞ੍ਹਿ ਯੇਨ ਸੁਤੇਨ ਇਜ੍ਝਤਿ, ਤਂ ਸੁਤਂ ਨਾਮ. ਉਕ੍ਕਟ੍ਠਨਿਦ੍ਦੇਸੇਨ ਦਸ੍ਸੇਨ੍ਤੋ ‘‘ਏਕਨਿਕਾਯ…ਪੇ… ਬਹੁਸ੍ਸੁਤਾ’’ਤਿ ਆਹ. ਆਗਤੋਤਿ ਸੁਪ੍ਪਵਤ੍ਤਿਭਾਵੇਨ ਸ੍ਵਾਗਤੋ. ਤੇਨਾਹ ‘‘ਪਗੁਣੋ ਪਵਤ੍ਤਿਤੋ’’ਤਿ. ਅਭਿਧਮ੍ਮੇ ਆਗਤਾ ਕੁਸਲਾਦਿਕ੍ਖਨ੍ਧਾਦਿਭੇਦਭਿਨ੍ਨਾ ਧਮ੍ਮਾ ਸੁਤ੍ਤਨ੍ਤਪਿਟਕੇਪਿ ਓਤਰਨ੍ਤੀਤਿ ‘‘ਧਮ੍ਮਧਰਾਤਿ ਸੁਤ੍ਤਨ੍ਤਪਿਟਕਧਰਾ’’ਇਚ੍ਚੇਵ ਵੁਤ੍ਤਂ. ਨ ਹਿ ਆਭਿਧਮ੍ਮਿਕਭਾਵੇਨ ਵਿਨਾ ਨਿਪ੍ਪਰਿਯਾਯਤੋ ਸੁਤ੍ਤਨ੍ਤਪਿਟਕਞ੍ਞੁਤਾ ਸਮ੍ਭਵਤਿ. ਦ੍ਵੇਮਾਤਿਕਾਧਰਾਤਿ ਭਿਕ੍ਖੁਭਿਕ੍ਖੁਨਿਮਾਤਿਕਾਵਸੇਨ ਦ੍ਵੇਮਾਤਿਕਾਧਰਾਤਿ ਵਦਨ੍ਤਿ, ‘‘ਵਿਨਯਾਭਿਧਮ੍ਮਮਾਤਿਕਾਧਰਾ’’ਤਿ ਯੁਤ੍ਤਂ. ਪਰਿਪੁਚ੍ਛਤੀਤਿ ਸਬ੍ਬਭਾਗੇਨ ਪੁਚ੍ਛਿਤਬ੍ਬਂ ਪੁਚ੍ਛਤਿ. ਤੇਨਾਹ ‘‘ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਪੁਚ੍ਛਤੀ’’ਤਿ. ਪਰਿਗ੍ਗਣ੍ਹਾਤੀਤਿ ਵਿਚਾਰੇਤਿ.
ਨ ਏਵਂ ਅਤ੍ਥੋ ਦਟ੍ਠਬ੍ਬੋਤਿ ਏਵਂ ਦੇਸਨਾਨੁਕ੍ਕਮੇਨ ਅਤ੍ਥੋ ਨ ਗਹੇਤਬ੍ਬੋ. ਅਞ੍ਞੋ ਹਿ ਦੇਸਨਾਕ੍ਕਮੋ ਵੇਨੇਯ੍ਯਜ੍ਝਾਸਯਵਸੇਨ ਪਵਤ੍ਤਨਤੋ, ਅਞ੍ਞੋ ਪਟਿਪਤ੍ਤਿਕ੍ਕਮੋ. ਹੇਟ੍ਠਿਮੇਨ ਵਾ ਪਰਿਚ੍ਛੇਦੋਤਿ ਸੀਲਸਮਾਧਿਪਞ੍ਞਾਸਙ੍ਖਾਤੇਸੁ ਤੀਸੁ ਭਾਗੇਸੁ ਕਤ੍ਥਚਿ ਹੇਟ੍ਠਿਮਨਯੇਨ ਦੇਸਨਾਯ ਪਰਿਚ੍ਛੇਦਂ ਵੇਦਿਤਬ੍ਬਂ ਸੀਲੇਨ, ਕਤ੍ਥਚਿ ਉਪਰਿਮੇਨ ਭਾਗੇਨ ਪਞ੍ਞਾਯ, ਕਤ੍ਥਚਿ ਦ੍ਵੀਹਿਪਿ ਭਾਗੇਹਿ ਸੀਲਪਞ੍ਞਾਵਸੇਨ. ਇਧ ਪਨ ਸੁਤ੍ਤੇ ਉਪਰਿਮੇਨ ਭਾਗੇਨ ਪਰਿਚ੍ਛੇਦੋ ਵੇਦਿਤਬ੍ਬੋਤਿ ਵਤ੍ਵਾ ਤਂ ਦਸ੍ਸੇਨ੍ਤੋ ‘‘ਤਸ੍ਮਾ’’ਤਿਆਦਿਮਾਹ. ਯਸ੍ਮਾ ਵਾ ਭਗਵਾ ਵੇਨੇਯ੍ਯਜ੍ਝਾਸਯਵਸੇਨ ਪਠਮਂ ਕਲ੍ਯਾਣਮਿਤ੍ਤਂ ਦਸ੍ਸੇਨ੍ਤੋ ਅਰਹਤ੍ਤਂ ਪਵੇਦੇਤ੍ਵਾ ‘‘ਤਯਿਦਂ ਅਰਹਤ੍ਤਂ ਇਮਾਯ ਆਰਦ੍ਧਵੀਰਿਯਤਾਯ ਹੋਤੀ’’ਤਿ ਦਸ੍ਸੇਨ੍ਤੋ ਵੀਰਿਯਾਰਮ੍ਭਂ ਪਵੇਦੇਤ੍ਵਾ ‘‘ਸ੍ਵਾਯਂ ਵੀਰਿਯਾਰਮ੍ਭੋ ਇਮਿਨਾ ਕਲ੍ਯਾਣਮਿਤ੍ਤਸਨ੍ਨਿਸ੍ਸਯੇਨ ਭਵਤੀ’’ਤਿ ਦਸ੍ਸੇਨ੍ਤੋ ਨਿਸ੍ਸਯਸਮ੍ਪਤ੍ਤਿਂ ਪਵੇਦੇਤਿ ਹੇਟ੍ਠਾ ਦਸ੍ਸਿਤਨਿਦਸ੍ਸਨਾਨੁਰੂਪਨ੍ਤਿ ਦਟ੍ਠਬ੍ਬਂ.
ਦੁਤਿਯਪਾਪਣਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਰਥਕਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.
੩. ਪੁਗ੍ਗਲਵਗ੍ਗੋ
੧. ਸਮਿਦ੍ਧਸੁਤ੍ਤਵਣ੍ਣਨਾ
੨੧. ਤਤਿਯਸ੍ਸ ਪਠਮੇ ਰੁਚ੍ਚਤੀਤਿ ਕਾਯਸਕ੍ਖਿਆਦੀਸੁ ਪੁਗ੍ਗਲੇਸੁ ਅਤਿਵਿਯ ਸੁਨ੍ਦਰਤਰਪਣੀਤਤਰਭਾਵੇਨ ਤੇ ਚਿਤ੍ਤਸ੍ਸ ਅਭਿਰੁਚਿਉਪ੍ਪਾਦਕੋ ਕਤਮੋਤਿ ਪੁਚ੍ਛਤਿ. ਸਦ੍ਧਿਨ੍ਦ੍ਰਿਯਂ ਧੁਰਂ ਅਹੋਸਿ ਸਦ੍ਧਾਧੁਰਂ ਮਗ੍ਗਵੁਟ੍ਠਾਨਨ੍ਤਿ ਕਤ੍ਵਾ, ਸੇਸਿਨ੍ਦ੍ਰਿਯਾਨਿ ਪਨ ਕਥਨ੍ਤਿ ਆਹ ‘‘ਸੇਸਾਨੀ’’ਤਿਆਦਿ. ਪਟਿਵਿਦ੍ਧਮਗ੍ਗੋਵਾਤਿ ਤੀਹਿਪਿ ਥੇਰੇਹਿ ਅਤ੍ਤਨੋ ਅਤ੍ਤਨੋ ਪਟਿਵਿਦ੍ਧਅਰਹਤ੍ਤਮਗ੍ਗੋ ਏਵ ਕਥਿਤੋ, ਤਸ੍ਮਾ ਨ ਸੁਕਰਂ ਏਕਂਸੇਨ ਬ੍ਯਾਕਾਤੁਂ ‘‘ਅਯਂ…ਪੇ… ਪਣੀਤਤਰੋ ਚਾ’’ਤਿ. ਭੁਮ੍ਮਨ੍ਤਰੇਨੇਵ ਕਥੇਸਿ ‘‘ਤੀਸੁਪਿ ਪੁਗ੍ਗਲੇਸੁ ਅਗ੍ਗਮਗ੍ਗਟ੍ਠੋਵ ਪਣੀਤਤਰੋ’’ਤਿ.
ਸਮਿਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਗਿਲਾਨਸੁਤ੍ਤਵਣ੍ਣਨਾ
੨੨. ਦੁਤਿਯੇ ਹਿਤਾਨੀਤਿ ਭਬ੍ਯਾਨਿ. ਵੁਦ੍ਧਿਕਰਾਨੀਤਿ ਆਰੋਗ੍ਯਾਦਿਵੁਦ੍ਧਿਕਰਾਨਿ. ਅਨੁਚ੍ਛਵਿਕਨ੍ਤਿ ਉਪਟ੍ਠਾਨਕਿਰਿਯਾਯ ਅਨੁਰੂਪਂ. ਵਾਤਾਪਮਾਰਰੋਗੇਨਾਤਿ ਵਾਤਰੋਗੇਨ ਚ ਅਪਮਾਰਰੋਗੇਨ ਚ, ਵਾਤਨਿਦਾਨੇਨ ਵਾ ਅਪਮਾਰਰੋਗੇਨ. ਨਿਟ੍ਠਪ੍ਪਤ੍ਤਗਿਲਾਨੋਤਿ ‘‘ਇਮਿਨਾ ਰੋਗੇਨ ਨ ਚਿਰਸ੍ਸੇਵ ਮਰਿਸ੍ਸਤੀ’’ਤਿ ਨਿਟ੍ਠਂ ਪਤ੍ਤੋ ਗਿਲਾਨੋ. ਖਿਪਿਤਕਂ ਨਾਮ ਵਮਥੁਰੋਗੋ. ਕਚ੍ਛੂਤਿ ਥੁਲ੍ਲਕਚ੍ਛੁਆਬਾਧੋ. ਤਿਣਪੁਪ੍ਫਕਜਰੋ ਵਿਸਮਵਾਤਸਮ੍ਫਸ੍ਸਜਰੋਗੋ. ਯੇਸਨ੍ਤਿ ਯੇਸਂ ਰੋਗਾਨਂ. ਪਟਿਜਗ੍ਗਨੇਨਾਤਿ ਪਟਿਕਾਰਮਤ੍ਤੇਨ. ਫਾਸੁਕਨ੍ਤਿ ਬ੍ਯਾਧਿਵੂਪਸਮਨੇਨ ਸਰੀਰਸ੍ਸ ਫਾਸੁਭਾਵੋ. ਬ੍ਯਾਧਿਨਿਦਾਨਸਮੁਟ੍ਠਾਨਜਾਨਨੇਨ ਪਣ੍ਡਿਤੋ, ਪਟਿਕਾਰਕਿਰਿਯਾਯ ਯੁਤ੍ਤਕਾਰਿਤਾਯ ਦਕ੍ਖੋ, ਉਟ੍ਠਾਨਵੀਰਿਯਸਮ੍ਪਤ੍ਤਿਯਾ ਅਨਲਸੋ.
ਪਦਪਰਮੋ ਪੁਗ੍ਗਲੋ ਕਥਿਤੋ ਸਮ੍ਮਤ੍ਤਨਿਯਾਮੋਕ੍ਕਮਨਸ੍ਸ ਅਯੋਗ੍ਗਭਾਵਤੋ. ਅਲਭਨ੍ਤੋਵ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਸਵਨਾਯ ਓਕ੍ਕਮਤਿ ਨਿਯਾਮਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਂ ਪਚ੍ਚੇਕਬੋਧਿਂ. ਯਨ੍ਤਿ, ਯਤੋ. ਓਵਾਦਂ ਲਭਿਤ੍ਵਾਤਿ ਆਭਿਸਮਾਚਾਰਿਕਵਤ੍ਤਂ ਓਵਾਦਮਤ੍ਤਂ. ਏਤ੍ਤਕੋਪਿ ਹਿ ਤਸ੍ਸ ਹਿਤਾਵਹੋਤਿ. ਤਨ੍ਨਿਸ੍ਸਿਤੋਵਾਤਿ ਵਿਪਞ੍ਚਿਤਞ੍ਞੁਨਿਸ੍ਸਿਤੋਵ ਹੋਤਿ. ਪੁਨਪ੍ਪੁਨਂ ਦੇਸੇਤਬ੍ਬੋਵ ਸਮ੍ਮਤ੍ਤਨਿਯਾਮੋਕ੍ਕਮਨਸ੍ਸ ਯੋਗ੍ਗਭਾਵਤੋ.
ਗਿਲਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਸਙ੍ਖਾਰਸੁਤ੍ਤਵਣ੍ਣਨਾ
੨੩. ਤਤਿਯੇ ਵਿਵਿਧੇਹਿ ਆਕਾਰੇਹਿ ਆਬਾਧਨਤੋ ਬ੍ਯਾਬਾਧੋਵ ਬ੍ਯਾਬਜ੍ਝਂ, ਕਾਯਿਕਂ ਚੇਤਸਿਕਞ੍ਚ ਦੁਕ੍ਖਂ. ਸਹ ਬ੍ਯਾਬਜ੍ਝੇਨ ਵਤ੍ਤਤੀਤਿ ਸਬ੍ਯਾਬਜ੍ਝਂ. ਤੇਨਾਹ ‘‘ਸਦੁਕ੍ਖ’’ਨ੍ਤਿ. ਚੇਤਨਾਰਾਸਿਨ੍ਤਿ ਪੁਬ੍ਬਚੇਤਨਾਦਿਰਾਸਿਂ. ਚੇਤਨਂ ਪੁਨਪ੍ਪੁਨਂ ਪਵਤ੍ਤੇਨ੍ਤੋ ‘‘ਰਾਸਿਂ ਕਰੋਤਿ ਪਿਣ੍ਡਂ ਕਰੋਤੀ’’ਤਿ ਚ ਵੁਤ੍ਤੋ. ਸਦੁਕ੍ਖਨ੍ਤਿ ਨਿਰਨ੍ਤਰਦੁਕ੍ਖਂ. ਤੇਨਾਹ ‘‘ਸਾਬਾਧਂ ਨਿਰਸ੍ਸਾਦ’’ਨ੍ਤਿ. ਅਤ੍ਥੀਤਿ ਉਜੁਕਂ ਦੁਕ੍ਖਵੇਦਨਾ ਨਤ੍ਥੀਤਿ ਅਵਤ੍ਤਬ੍ਬਤ੍ਤਾ ਵੁਤ੍ਤਂ. ਅਨਿਟ੍ਠਸਭਾਵਤ੍ਤਾ ਅਨਿਟ੍ਠਾਰਮ੍ਮਣਤ੍ਤਾ ਚ ਦੁਕ੍ਖਪਕ੍ਖਿਕਾਵ ਸਾ ਦਟ੍ਠਬ੍ਬਾ. ਨ ਹਿ ਅਕੁਸਲਵਿਪਾਕਾ ਇਟ੍ਠਾ ਨਾਮ ਅਤ੍ਥੀ, ਕੁਸਲਵਿਪਾਕਾ ਪਨ ਉਪੇਕ੍ਖਾਵੇਦਨਾ ਤਤ੍ਥ ਅਪ੍ਪਾਵਸਰਾ. ਅਟ੍ਠਕਥਾਯਂ ਪਨ ਨਿਰਯਸ੍ਸ ਦੁਕ੍ਖਬਹੁਲਤ੍ਤਾ ਦੁਕ੍ਖਸ੍ਸ ਚ ਤਤ੍ਥ ਬਲਵਤਾਯ ਸਾ ਅਬ੍ਬੋਹਾਰਿਕਟ੍ਠਾਨੇ ਠਿਤਾਤਿ ਵੁਤ੍ਤਂ. ਉਪਮਂ ਕਤ੍ਵਾ ਆਹਟੋ ਵਿਸੇਸੋ ਵਿਯ ਸਾਮਞ੍ਞਸ੍ਸ ਯਥਾ ਅਯੋਪਿਣ੍ਡਿਰੋਹਿਨੋ ਵਿਯ ਰੂਪਾਨਨ੍ਤਿ. ਪਟਿਭਾਗਉਪਮਾਤਿ ਪਟਿਬਿਮ੍ਬਉਪਮਾ.
ਤੇ ਅਗ੍ਗਹੇਤ੍ਵਾਤਿ ਹੇਟ੍ਠਿਮਬ੍ਰਹ੍ਮਲੋਕੇ ਅਗ੍ਗਹੇਤ੍ਵਾ. ਵੋਮਿਸ੍ਸਕਸੁਖਦੁਕ੍ਖਨ੍ਤਿ ਵਿਮਿਸ੍ਸਕਸੁਖਦੁਕ੍ਖਂ ਪੀਤਿਮਿਸ੍ਸਕਭਾਵਤੋ. ਕਮ੍ਮਨ੍ਤਿ ਪਾਪਕਮ੍ਮਂ. ਕਮ੍ਮਸੀਸੇਨ ਫਲਂ ਵਦਤਿ. ਕਾਮਞ੍ਚੇਤ੍ਥ ‘‘ਅਬ੍ਯਾਬਜ੍ਝਂ ਲੋਕਂ ਉਪਪਜ੍ਜਤੀ’’ਤਿ ਆਗਤਂ, ‘‘ਅਬ੍ਯਾਬਜ੍ਝਾ ਫਸ੍ਸਾ ਫੁਸਨ੍ਤੀ’’ਤਿ ਪਨ ਵਚਨੇਨ ਲੋਕੁਤ੍ਤਰਫਸ੍ਸਾਪਿ ਸਙ੍ਗਯ੍ਹਨ੍ਤੀਤਿ ‘‘ਤੀਣਿ ਸੁਚਰਿਤਾਨਿ ਲੋਕਿਯਲੋਕੁਤ੍ਤਰਮਿਸ੍ਸਕਾਨਿ ਕਥਿਤਾਨੀ’’ਤਿ ਵੁਤ੍ਤਂ.
ਸਙ੍ਖਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਬਹੁਕਾਰਸੁਤ੍ਤਵਣ੍ਣਨਾ
੨੪. ਚਤੁਤ੍ਥੇ ਅਵਸ੍ਸਯਂ ਗਤੋਤਿ ਵਟ੍ਟਦੁਕ੍ਖਪਰਿਮੁਤ੍ਤਿਯਾ ਅਵਸ੍ਸਯੋ ਮਯ੍ਹਨ੍ਤਿ ਸਰਣਗਮਨਕ੍ਕਮੇਨ ਉਪਗਤੋ ਹੋਤਿ. ਸਤਨ੍ਤਿਕਨ੍ਤਿ ਸਪਰਿਯਤ੍ਤਿਧਮ੍ਮਂ. ਅਗ੍ਗਹਿਤਸਰਣਪੁਬ੍ਬਸ੍ਸਾਤਿ ਅਗ੍ਗਹਿਤਪੁਬ੍ਬਸਰਣਸ੍ਸ. ਅਕਤਾਭਿਨਿਵੇਸਸ੍ਸ ਵਸੇਨ ਵੁਤ੍ਤਨ੍ਤਿ ਤਸ੍ਮਿਂ ਅਤ੍ਤਭਾਵੇ ਨ ਕਤੋ ਸਰਣਗਮਨਾਭਿਨਿਵੇਸੋ ਯੇਨਾਤਿ ਅਕਤਾਭਿਨਿਵੇਸੋ, ਤਸ੍ਸ ਵਸੇਨ ਵੁਤ੍ਤਂ. ਕਾਮਂ ਪੁਬ੍ਬੇਪਿ ਸਰਣਦਾਯਕੋ ਆਚਰਿਯੋ ਵੁਤ੍ਤੋ, ਪਬ੍ਬਜ੍ਜਾਦਾਯਕੋਪਿ ਸਰਣਦਾਯਕੋਵ. ਪੁਬ੍ਬੇ ਪਨ ਉਪਾਸਕਭਾਵਾਪਾਦਕਵਸੇਨ ਸਰਣਦਾਯਕੋ ਅਧਿਪ੍ਪੇਤੋ. ਇਦਂ ਪਨ ਗਹਿਤਪਬ੍ਬਜ੍ਜਸ੍ਸ ਸਰਣਗਮਨਂ. ਪਬ੍ਬਜਾ ਹਿ ਸਵਿਸੇਸਂ ਸਰਣਗਮਨਨ੍ਤਿ ਪਬ੍ਬਜ੍ਜਾਦਾਯਕੋ ਪੁਨ ਵੁਤ੍ਤੋ. ਏਤੇਤਿ ਪਬ੍ਬਜ੍ਜਾਦਾਯਕਾਦਯੋ. ਦੁਵਿਧੇਨ ਪਰਿਚ੍ਛਿਨ੍ਨਾਤਿ ਲੋਕਿਯਧਮ੍ਮਸਮ੍ਪਾਪਕੋ ਲੋਕੁਤ੍ਤਰਧਮ੍ਮਸਮ੍ਪਾਪਕੋਤਿ ਦ੍ਵਿਪ੍ਪਕਾਰੇਨ ਪਰਿਚ੍ਛਿਨ੍ਨਾ, ਕਤਾਭਿਨਿਵੇਸਅਕਤਾਭਿਨਿਵੇਸਵਸੇਨ ਵਾ. ਉਪਰੀਤਿ ਪਠਮਮਗ੍ਗਤੋ ਉਪਰਿ. ਨੇਵ ਸਕ੍ਕੋਤੀਤਿ ਆਚਰਿਯੇਨ ਕਤਸ੍ਸ ਉਪਕਾਰਸ੍ਸ ਮਹਾਨੁਭਾਵਤ੍ਤਾ ਤਸ੍ਸ ਪਤਿਕਾਰਂ ਨਾਮ ਕਾਤੁਂ ਨ ਸਕ੍ਕੋਤਿ.
ਬਹੁਕਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਵਜਿਰੂਪਮਸੁਤ੍ਤਵਣ੍ਣਨਾ
੨੫. ਪਞ੍ਚਮੇ ਅਰੁਇਤਿ ਪੁਰਾਣਂ ਦੁਟ੍ਠਵਣਂ ਵੁਚ੍ਚਤਿ. ਕ-ਕਾਰੋ ਪਦਸਨ੍ਧਿਕਰੋਤਿ ਅਰੁਕੂਪਮਂ ਚਿਤ੍ਤਂ ਏਤਸ੍ਸਾਤਿ ਅਰੁਕੂਪਮਚਿਤ੍ਤੋ ਅਪ੍ਪਮਤ੍ਤਕਸ੍ਸਪਿ ਦੁਕ੍ਖਸ੍ਸ ਅਸਹਨਤੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਇਤ੍ਤਰਕਾਲੋਭਾਸੇਨਾਤਿ ਪਰਿਤ੍ਤਮੇਵ ਕਾਲੋ ਞਾਣੋਭਾਸਵਿਰਹੇਨ. ਲਗਤੀਤਿ ਕੋਧਾਸਙ੍ਗਵਸੇਨ ਕੁਪ੍ਪਨ੍ਤੋ ਪੁਗ੍ਗਲੋ ਸਮ੍ਮੁਖਾ, ‘‘ਕਿਂ ਵਦਸੀ’’ਤਿਆਦਿਨਾ ਪਰਮ੍ਮੁਖਾ ਚ ਉਪਨਯ੍ਹਨਵਸੇਨ ਲਗਤਿ, ਨ ਤਣ੍ਹਾਸਙ੍ਗਵਸੇਨ. ਕੁਪ੍ਪਤੀਤਿ ਕੁਜ੍ਝਤਿ. ਬ੍ਯਾਪਜ੍ਜਤੀਤਿ ਵਿਪਨ੍ਨਚਿਤ੍ਤੋ ਹੋਤਿ. ਥਦ੍ਧਭਾਵਂ ਆਪਜ੍ਜਤਿ ਈਸਕਮ੍ਪਿ ਮੁਦੁਤ੍ਤਾਭਾਵਤੋ. ਦੁਟ੍ਠਾਰੁਕੋਤਿ ਮਂਸਲੋਹਿਤਾਨਂ ਦੁਟ੍ਠਭਾਵੇਨ ਪਕਤਿਭਾਵਂ ਜਹਿਤ੍ਵਾ ਠਿਤੋ ਦੁਟ੍ਠਵਣੋ. ‘‘ਦੁਟ੍ਠਾਰੁਤਾ’’ਤਿਪਿ ਪਠਨ੍ਤਿ, ਤਤ੍ਥਾਪਿ ਤਾਕਾਰੋ ਪਦਸਨ੍ਧਿਕਰੋ.
ਤਸ੍ਸਾਤਿ ਦੁਟ੍ਠਾਰੁਕਸ੍ਸ. ਸਵਨਨ੍ਤਿ ਅਸੁਚਿਵਿਸਨ੍ਦਨਂ. ਉਦ੍ਧੁਮਾਤਸ੍ਸ ਵਿਯਾਤਿ ਕੋਧੇਨ ਉਦ੍ਧਂ ਉਦ੍ਧਂ ਧੁਮਾਤਕਸ੍ਸ ਵਿਯ ਕੋਧੂਪਾਯਾਸਸ੍ਸ ਅਵਿਸ੍ਸਜ੍ਜਨਤੋ. ਚਣ੍ਡਿਕਤਸ੍ਸਾਤਿ ਕੁਪਿਤਸ੍ਸ. ਏਤ੍ਥ ਚ ਕਿਞ੍ਚਾਪਿ ਹੇਟ੍ਠਿਮਮਗ੍ਗਵਜ੍ਝਾਪਿ ਕਿਲੇਸਾ ਤੇਹਿ ਅਨੁਪ੍ਪਤ੍ਤਿਧਮ੍ਮਤਂ ਆਪਾਦਿਤਤ੍ਤਾ ਸਮੁਚ੍ਛਿਨ੍ਨਾ, ਤਥਾਪਿ ਤਸ੍ਮਿਂ ਸਨ੍ਤਾਨੇ ਅਗ੍ਗਮਗ੍ਗਸ੍ਸ ਅਨੁਪ੍ਪਨ੍ਨਤ੍ਤਾ ਤਤ੍ਥ ਅਪ੍ਪਹੀਨਾਪਿ ਕਿਲੇਸਾ ਅਤ੍ਥੇਵਾਤਿ ਕਤ੍ਵਾ ਤੇਸਂ ਞਾਣਾਨਂ ਵਿਜ੍ਜੂਪਮਤਾ ਵੁਤ੍ਤਾ, ਨ ਤੇਹਿ ਮਗ੍ਗੇਹਿ ਪਹੀਨਾਨਂ ਕਿਲੇਸਾਨਂ ਅਤ੍ਥਿਭਾਵਤੋਤਿ ਦਟ੍ਠਬ੍ਬਂ.
ਵਜਿਰੂਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਸੇਵਿਤਬ੍ਬਸੁਤ੍ਤਵਣ੍ਣਨਾ
੨੬. ਛਟ੍ਠੇ ਉਪਸਙ੍ਕਮਿਤਬ੍ਬੋਤਿ ਕਾਲੇਨ ਕਾਲਂ ਉਪਸਙ੍ਕਮਿਤਬ੍ਬੋ. ਅਲ੍ਲੀਯਿਤਬ੍ਬੋਤਿ ਛਾਯਾਯ ਵਿਯ ਵਿਨਾ ਭਾਵਨਾਯ ਨਿਲ੍ਲੀਯਿਤਬ੍ਬੋ. ਪੁਨਪ੍ਪੁਨਂ ਉਪਾਸਿਤਬ੍ਬੋਤਿ ਅਭਿਣ੍ਹਸੋ ਉਪਨਿਸੀਦਿਤਬ੍ਬੋ. ਅਨੁਦ੍ਦਯਾਤਿ ਮੇਤ੍ਤਾਪੁਬ੍ਬਭਾਗੋ. ਉਪਸਙ੍ਕਮਿਤੁਂ ਵਟ੍ਟਤੀਤਿ ‘‘ਏਤਸ੍ਸ ਸੀਲੇਨ ਅਭਿਵੁਦ੍ਧਿ ਭਵਿਸ੍ਸਤੀ’’ਤਿ ਉਪਕਾਰਤ੍ਥਂ ਉਪਸੇਵਨਾਦਿ ਵਟ੍ਟਤਿ.
ਨ ਪਟਿਹਞ੍ਞਿਸ੍ਸਤੀਤਿ ‘‘ਅਪੇਹਿ, ਕਿਂ ਏਤੇਨਾ’’ਤਿ ਪਟਿਕ੍ਖੇਪਾਭਾਵਤੋ ਪਿਯਸੀਲਤ੍ਤਾ ਨ ਪਟਿਹਞ੍ਞਿਸ੍ਸਤਿ. ਫਾਸੁ ਭਵਿਸ੍ਸਤੀਤਿ ਦ੍ਵੀਸੁ ਹਿ ਸੀਲਵਨ੍ਤੇਸੁ ਏਕੇਨ ਸੀਲਸ੍ਸ ਵਣ੍ਣੇ ਕਥਿਤੇ ਇਤਰੋ ਅਨੁਮੋਦਤਿ. ਤੇਨ ਤੇਸਂ ਕਥਾ ਫਾਸੁ ਚੇਵ ਹੋਤਿ ਪਵਤ੍ਤਿਨੀ ਚ. ਏਕਸ੍ਮਿਂ ਪਨ ਦੁਸ੍ਸੀਲੇ ਸਤਿ ਦੁਸ੍ਸੀਲਸ੍ਸ ਸੀਲਕਥਾ ਦੁਕ੍ਕਥਾ, ਨੇਵ ਸੀਲਕਥਾ ਹੋਤਿ, ਨ ਫਾਸੁ ਹੋਤਿ, ਨ ਪਵਤ੍ਤਿਨੀ. ਦੁਸ੍ਸੀਲਸ੍ਸ ਹਿ ਸੀਲਕਥਾ ਅਫਾਸੁ ਭਵਿਸ੍ਸਤਿ. ਸੀਲਕਥਾਯ ਵੁਤ੍ਤਮਤ੍ਥਂ ਸਮਾਧਿਪਞ੍ਞਾਕਥਾਸੁਪਿ ਅਤਿਦਿਸਤਿ ‘‘ਸਮਾਧਿਪਞ੍ਞਾਕਥਾਸੁਪਿ ਏਸੇਵ ਨਯੋ’’ਤਿ. ਦ੍ਵੇ ਹਿ ਸਮਾਧਿਲਾਭਿਨੋ ਸਮਾਧਿਕਥਂ ਸਪ੍ਪਞ੍ਞਾ ਚ ਪਞ੍ਞਾਕਥਂ ਕਥੇਨ੍ਤਾ ਰਤ੍ਤਿਂ ਵਾ ਦਿਵਸਂ ਵਾ ਅਤਿਕ੍ਕਮਨ੍ਤਮ੍ਪਿ ਨ ਜਾਨਨ੍ਤਿ.
ਤਤ੍ਥ ਤਤ੍ਥ ਪਞ੍ਞਾਯ ਅਨੁਗ੍ਗਹੇਸ੍ਸਾਮੀਤਿ ਤਸ੍ਮਿਂ ਤਸ੍ਮਿਂ ਅਨੁਗ੍ਗਹੇਤਬ੍ਬੇ ਪਞ੍ਞਾਯ ਸੋਧੇਤਬ੍ਬੇ ਵਡ੍ਢੇਤਬ੍ਬੇ ਚ ਅਧਿਕਸੀਲਂ ਨਿਸ੍ਸਾਯ ਉਪ੍ਪਨ੍ਨਪਞ੍ਞਾਯ ਅਨੁਗ੍ਗਹੇਸ੍ਸਾਮੀਤਿ ਅਤ੍ਥੋ. ਤਞ੍ਚ ਅਨੁਗ੍ਗਣ੍ਹਨਂ ਸੀਲਸ੍ਸ ਅਸਪ੍ਪਾਯਾਨੁਪਕਾਰਧਮ੍ਮੇ ਵਜ੍ਜੇਤ੍ਵਾ ਤਪ੍ਪਟਿਪਕ੍ਖਸੇਵਨੇਨ ਹੋਤੀਤਿ ਆਹ ‘‘ਸੀਲਸ੍ਸ ਅਸਪ੍ਪਾਯੇ’’ਤਿਆਦਿ. ਸੀਲਸ੍ਸ ਅਸਪ੍ਪਾਯਾਨੁਪਕਾਰਧਮ੍ਮਾ ਨਾਮ ਅਨਾਚਾਰਾਗੋਚਰਾਦਯੋ, ਤਪ੍ਪਟਿਪਕ੍ਖਤੋ ਉਪਕਾਰਧਮ੍ਮਾ ਵੇਦਿਤਬ੍ਬਾ. ਤਸ੍ਮਿਂ ਤਸ੍ਮਿਂ ਠਾਨੇਤਿ ਤਂਤਂਸਿਕ੍ਖਾਕੋਟ੍ਠਾਸਪਦਟ੍ਠਾਨੇ. ਅਨੁਗ੍ਗਣ੍ਹਾਤਿ ਨਾਮਾਤਿ ਅਭਿਨ੍ਨਂ ਅਸਂਕਿਲਿਟ੍ਠਂ ਕਤ੍ਵਾ ਅਨੁਗ੍ਗਣ੍ਹਾਤਿ ਨਾਮ. ਖਾਰਪਰਿਸ੍ਸਾਵਨੇਤਿ ਰਜਕਾਨਂ ਊਸਖਾਰਾਦਿਖਾਰਪਰਿਸ੍ਸਾਵਨਪਟੇ. ਹਾਯਤੀਤਿ ਸੀਲਾਦਿਨਾ ਪਰਿਹਾਯਤਿ. ਸੇਟ੍ਠਂ ਪੁਗ੍ਗਲਨ੍ਤਿ ਸੀਲਾਦਿਗੁਣੇਹਿ ਸੇਟ੍ਠਂ ਉਤ੍ਤਰਿਤਰਂ ਉਤ੍ਤਮਂ ਪੁਗ੍ਗਲਂ.
ਸੇਵਿਤਬ੍ਬਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਜਿਗੁਚ੍ਛਿਤਬ੍ਬਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਅਬ੍ਭੁਗ੍ਗਚ੍ਛਤੀਤਿ ਏਤ੍ਥ ਅਭਿ-ਸਦ੍ਦਾਪੇਕ੍ਖਾਯ ‘‘ਨ’’ਨ੍ਤਿ ਸਾਮਿਅਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਅਸ੍ਸਾ’’ਤਿ ‘‘ਤਂ ਖੋ ਪਨ ਭਵਨ੍ਤ’’ਨ੍ਤਿਆਦੀਸੁ ਵਿਯ. ਪਾਪਕੋ ਕਿਤ੍ਤਿਸਦ੍ਦੋਤਿ ਲਾਮਕਭਾਵੇਨ ਕਥੇਤਬ੍ਬਸਦ੍ਦੋ. ਗੂਥਕੂਪੋ ਵਿਯ ਦੁਸ੍ਸੀਲ੍ਯਨ੍ਤਿ ਏਤੇਨ ਦੁਸ੍ਸੀਲਸ੍ਸ ਗੂਥਸਦਿਸਤ੍ਤਮੇਵ ਦਸ੍ਸੇਤਿ. ਵਚਨਨ੍ਤਿ ਅਨਿਟ੍ਠਵਚਨਂ. ਪੁਰਿਮਨਯੇਨੇਵਾਤਿ ‘‘ਗੂਥਕੂਪੋ ਵਿਯ ਦੁਸ੍ਸੀਲ੍ਯ’’ਨ੍ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨ. ਸੁਚਿਮਿਤ੍ਤੋਤਿ ਸੀਲਾਚਾਰਸੁਦ੍ਧਿਯਾ ਸੁਚਿਮਿਤ੍ਤੋ. ਸਹ ਅਯਨ੍ਤਿ ਪਵਤ੍ਤਨ੍ਤੀਤਿ ਸਹਾਯਾਤਿ ਆਹ ‘‘ਸਹਗਾਮਿਨੋ’’ਤਿ.
ਜਿਗੁਚ੍ਛਿਤਬ੍ਬਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਗੂਥਭਾਣੀਸੁਤ੍ਤਵਣ੍ਣਨਾ
੨੮. ਅਟ੍ਠਮੇ ਗੂਥਭਾਣੀਤਿ ਗੂਥਸਦਿਸਵਚਨਤ੍ਤਾ ਗੂਥਭਾਣੀ. ਯਥਾ ਹਿ ਗੂਥਂ ਨਾਮ ਮਹਾਜਨਸ੍ਸ ਅਨਿਟ੍ਠਂ ਹੋਤਿ, ਏਵਮੇਵ ਇਮਸ੍ਸ ਪੁਗ੍ਗਲਸ੍ਸ ਵਚਨਂ ਦੇਵਮਨੁਸ੍ਸਾਨਂ ਅਨਿਟ੍ਠਂ ਹੋਤਿ. ਦੁਗ੍ਗਨ੍ਧਕਥਨ੍ਤਿ ਕਿਲੇਸਾਸੁਚਿਸਂਕਿਲਿਟ੍ਠਤਾਯ ਗੂਥਂ ਵਿਯ ਦੁਗ੍ਗਨ੍ਧਵਾਯਨਕਥਂ. ਪੁਪ੍ਫਭਾਣੀਤਿ ਸੁਪੁਪ੍ਫਸਦਿਸਵਚਨਤ੍ਤਾ ਪੁਪ੍ਫਭਾਣੀ. ਯਥਾ ਹਿ ਫੁਲ੍ਲਾਨਿ ਵਸ੍ਸਿਕਾਨਿ ਵਾ ਅਧਿਮੁਤ੍ਤਿਕਾਨਿ ਵਾ ਮਹਾਜਨਸ੍ਸ ਇਟ੍ਠਾਨਿ ਕਨ੍ਤਾਨਿ ਹੋਨ੍ਤਿ, ਏਵਮੇਵ ਇਮਸ੍ਸ ਪੁਗ੍ਗਲਸ੍ਸ ਵਚਨਂ ਦੇਵਮਨੁਸ੍ਸਾਨਂ ਇਟ੍ਠਂ ਹੋਤਿ ਕਨ੍ਤਂ. ਪੁਪ੍ਫਾਨਿ ਵਿਯਾਤਿ ਚਮ੍ਪਕਸੁਮਨਾਦਿਸੁਗਨ੍ਧਪੁਪ੍ਫਾਨਿ ਵਿਯ. ਸੁਗਨ੍ਧਕਥਨ੍ਤਿ ਸੁਚਿਗਨ੍ਧਵਾਯਨਕਥਂ ਕਿਲੇਸਦੁਗ੍ਗਨ੍ਧਾਭਾਵਤੋ. ਮਧੁਭਾਣੀਤਿ ਏਤ੍ਥ ‘‘ਮੁਦੁਭਾਣੀ’’ਤਿਪਿ ਪਠਨ੍ਤਿ. ਉਭਯਤ੍ਥਾਪਿ ਹਿ ਮਧੁਰਵਚਨੋਤਿ ਅਤ੍ਥੋ. ਯਥਾ ਹਿ ਚਤੁਮਧੁਰਂ ਨਾਮ ਮਧੁਰਂ ਪਣੀਤਂ, ਏਵਮੇਵ ਇਮਸ੍ਸ ਪੁਗ੍ਗਲਸ੍ਸ ਵਚਨਂ ਦੇਵਮਨੁਸ੍ਸਾਨਂ ਮਧੁਰਂ ਹੋਤਿ. ਮਧੁਰਕਥਨ੍ਤਿ ਕਣ੍ਣਸੁਖਤਾਯ ਪੇਮਨੀਯਤਾਯ ਚ ਸਦ੍ਦਤੋ ਅਤ੍ਥਤੋ ਚ ਮਧੁਰਸਭਾਵਕਥਂ. ਅਤ੍ਤਹੇਤੁ ਵਾਤਿ ਅਤ੍ਤਨੋ ਵਾ ਹਤ੍ਥਪਾਦਾਦਿਚ੍ਛੇਦਨਹਰਣਹੇਤੁ. ਪਰਹੇਤੁ ਵਾਤਿ ਏਤ੍ਥਾਪਿ ਏਸੇਵ ਨਯੋ. ਤੇਨਾਹ ‘‘ਅਤ੍ਤਨੋ ਵਾ’’ਤਿਆਦਿ.
‘‘ਨੇਲਙ੍ਗੋਤਿ ਖੋ, ਭਨ੍ਤੇ, ਸੀਲਾਨਮੇਤਂ ਅਧਿਵਚਨ’’ਨ੍ਤਿ ਸੁਤ੍ਤੇ (ਸਂ. ਨਿ. ੪.੩੪੭) ਆਗਤਤ੍ਤਾ ਵੁਤ੍ਤਂ ‘‘ਏਤ੍ਥ ਵੁਤ੍ਤਸੀਲਂ ਵਿਯਾ’’ਤਿ. ਪੂਰੇਤਿ ਗੁਣਾਨਂ ਪਾਰਿਪੂਰਿਯਂ. ਸੁਕੁਮਾਰਾਤਿ ਅਫਰੁਸਤਾਯ ਮੁਦੁਕਾ ਕੋਮਲਾ. ਪੁਰਸ੍ਸਾਤਿ ਏਤ੍ਥ ਪੁਰ-ਸਦ੍ਦੋ ਤਨ੍ਨਿਵਾਸਿਵਾਚਕੋ ਦਟ੍ਠਬ੍ਬੋ ‘‘ਗਾਮੋ ਆਗਤੋ’’ਤਿਆਦੀਸੁ ਵਿਯ. ਤੇਨਾਹ ‘‘ਨਗਰਵਾਸੀਨ’’ਨ੍ਤਿ. ਮਨਂ ਅਪ੍ਪਾਯਤਿ ਵਡ੍ਢੇਤੀਤਿ ਮਨਾਪਾ. ਤੇਨਾਹ ‘‘ਚਿਤ੍ਤਵੁਦ੍ਧਿਕਰਾ’’ਤਿ.
ਗੂਥਭਾਣੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਅਨ੍ਧਸੁਤ੍ਤਵਣ੍ਣਨਾ
੨੯. ਨਵਮੇ ਅਨ੍ਧੋਤਿਆਦੀਸੁ ਪਾਲ਼ਿਪਦੇਸੁ ਪਠਮੋ ਦਿਟ੍ਠਧਮ੍ਮਿਕਭੋਗਸਂਹਰਣਪਞ੍ਞਾਚਕ੍ਖੁਨੋ ਚ ਸਮ੍ਪਰਾਯਿਕਤ੍ਥਸਾਧਨਪਞ੍ਞਾਚਕ੍ਖੁਨੋ ਚ ਅਭਾਵਾ ‘‘ਅਨ੍ਧੋ’’ਤਿ ਵੁਚ੍ਚਤਿ ਦੁਤਿਯੋਪਿ, ਤਤਿਯੋ ਪਨ ਦ੍ਵਿਨ੍ਨਮ੍ਪਿ ਭਾਵਾ ‘‘ਦ੍ਵਿਚਕ੍ਖੂ’’ਤਿ ਵੁਚ੍ਚਤਿ. ਪਞ੍ਞਾਚਕ੍ਖੂਤਿ ਆਯਕੋਸਲ੍ਲਭੂਤਾ ਪਞ੍ਞਾਚਕ੍ਖੁ. ਤੇਨਾਹ ‘‘ਫਾਤਿਂ ਕਰੇਯ੍ਯਾ’’ਤਿ. ਅਧਮੁਤ੍ਤਮੇਤਿ ਅਧਮੇ ਚੇਵ ਉਤ੍ਤਮੇ ਚ. ਪਟਿਪਕ੍ਖਵਸੇਨਾਤਿ ਪਟਿਪਕ੍ਖਸ੍ਸ ਅਤ੍ਥਿਤਾਵਸੇਨ. ਸੁਕ੍ਕਸਪ੍ਪਟਿਭਾਗਾਤਿ ਸੁਕ੍ਕਧਮ੍ਮੇਹਿ ਪਹਾਯਕੇਹਿ ਸਪ੍ਪਟਿਭਾਗਾਤਿ ਜਾਨੇਯ੍ਯ. ਕਣ੍ਹਸਪ੍ਪਟਿਭਾਗਾਤਿ ਕਣ੍ਹਧਮ੍ਮੇਹਿ ਪਹਾਤਬ੍ਬੇਹਿ ਸਪ੍ਪਟਿਭਾਗਾਤਿ ਜਾਨੇਯ੍ਯ.
ਤਥਾਜਾਤਿਕਾਤਿ ਯਾਦਿਸੇਹਿ ਸਪੁਤ੍ਤਦਾਰਪਰਿਜਨਸਞਾਤਿਮਿਤ੍ਤਬਨ੍ਧਵਗ੍ਗਂ ਅਤ੍ਤਾਨਂ ਸੁਖੇਤਿ ਪੀਣੇਤਿ, ਤਾਦਿਸਾ ਭੋਗਾਪਿ ਨ ਸਨ੍ਤਿ. ਪੁਞ੍ਞਾਨਿ ਚ ਨ ਕਰੋਤੀਤਿ ਸਮਣਬ੍ਰਾਹ੍ਮਣਕਪਣਦ੍ਧਿਕਯਾਚਕਾਨਂ ਸਨ੍ਤਪ੍ਪਨਵਸੇਨ ਪੁਞ੍ਞਾਨਿ ਨ ਕਰੋਤਿ. ਉਭਯਤ੍ਥਾਤਿ ਉਭਯਸ੍ਮਿਂ ਲੋਕੇ, ਉਭਯਸ੍ਮਿਂ ਵਾ ਅਤ੍ਥੇਤਿ ਵਿਗ੍ਗਹੋਤਿ ਦਸ੍ਸੇਨ੍ਤੋ ‘‘ਇਧਲੋਕੇ’’ਤਿਆਦਿਮਾਹ. ਉਭਯੇਨਾਤਿ ਵੁਤ੍ਤਮਤ੍ਥਂ ਯੋਜੇਤ੍ਵਾ ਦਸ੍ਸੇਤੁਂ ‘‘ਕਥ’’ਨ੍ਤਿਆਦਿ ਵੁਤ੍ਤਂ. ਯਸ੍ਮਿਂ ਠਾਨੇਤਿ ਯਸ੍ਮਿਂਯੇਵ ਠਾਨੇ. ਨ ਸੋਚਤੀਤਿ ਸੋਕਹੇਤੂਨਂ ਤਤ੍ਥ ਅਭਾਵਤੋ ਨ ਸੋਚਤਿ.
ਅਨ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਅਵਕੁਜ੍ਜਸੁਤ੍ਤਵਣ੍ਣਨਾ
੩੦. ਦਸਮੇ ਅਵਕੁਜ੍ਜਪਞ੍ਞੋਤਿ ਨਿਕ੍ਕੁਜ੍ਜਪਞ੍ਞੋ. ਤੇਨਾਹ ‘‘ਅਧੋਮੁਖਪਞ੍ਞੋ’’ਤਿ. ਪੁਬ੍ਬਪਟ੍ਠਪਨਾਤਿ ਪਠਮਾਰਮ੍ਭੋ. ਸਨ੍ਨਿਟ੍ਠਾਨਨ੍ਤਿ ਕਥਾਪਰਿਯੋਸਾਨਂ. ਅਪ੍ਪਨਾਤਿ ਦੇਸਨਾਯ ਨਿਟ੍ਠਾਪਨਂ. ਅਨੇਕੇ ਵਾ ਅਨੁਸਨ੍ਧਿਯੋਤਿ ਯੋਜੇਤਬ੍ਬਂ. ਸਮਾਧਿ ਵਾਤਿਆਦੀਸੁ ਲੋਕੁਤ੍ਤਰਧਮ੍ਮਾ ਪਰਮਤ੍ਥਤੋ ਸਾਸਨਨ੍ਤਿ ਤਦਤ੍ਥੋਪਾਦਕਸਮਾਧਿ ਤਸ੍ਸ ਆਦੀਤਿ ਵੁਤ੍ਤੋ, ਤਦਾਸਨ੍ਨਤ੍ਤਾ ਵਿਪਸ੍ਸਨਾ, ਤਸ੍ਸ ਮੂਲਭਾਵੇਨ ਏਕਦੇਸਤ੍ਤਾ ਮਗ੍ਗੋ.
ਸਾਸਨਸ੍ਸ ਪਾਰਿਪੂਰਿਸੁਦ੍ਧਿਯੋ ਨਾਮ ਸਤ੍ਥਾਰਾ ਦੇਸਿਤਨਿਯਾਮੇਨੇਵ ਸਿਦ੍ਧਾ, ਤਾ ਪਨੇਤ੍ਥ ਕਥੇਨ੍ਤਸ੍ਸ ਵਸੇਨ ਗਹੇਤਬ੍ਬਾਤਿ ਦਸ੍ਸੇਤੁਂ ‘‘ਅਨੂਨਂ ਕਤ੍ਵਾ ਦੇਸੇਨ੍ਤੀ’’ਤਿ, ‘‘ਨਿਗ੍ਗਣ੍ਠਿਂ ਕਤ੍ਵਾ ਦੇਸੇਨ੍ਤੀ’’ਤਿ ਚ ਵੁਤ੍ਤਂ. ਤਤ੍ਥ ਨਿਜ੍ਜਟਨ੍ਤਿ ਨਿਗ੍ਗੁਮ੍ਬਂ ਅਨਾਕੁਲਂ. ਨਿਗ੍ਗਣ੍ਠਿਨ੍ਤਿ ਗਣ੍ਠਿਟ੍ਠਾਨਰਹਿਤਂ ਸੁਵਿਞ੍ਞੇਯ੍ਯਂ ਕਤ੍ਵਾ.
ਆਕਿਣ੍ਣਾਨੀਤਿ ਆਕਿਰਿਤ੍ਵਾ ਸਂਕਿਰਿਤ੍ਵਾ ਠਪਿਤਾਨੀਤਿ ਅਤ੍ਥੋ. ਤੇਨਾਹ ‘‘ਪਕ੍ਖਿਤ੍ਤਾਨੀ’’ਤਿ. ਉਚ੍ਛਙ੍ਗੋ ਵਿਯ ਉਚ੍ਛਙ੍ਗਪਞ੍ਞੋ ਪੁਗ੍ਗਲੋ ਦਟ੍ਠਬ੍ਬੋਤਿ ਉਚ੍ਛਙ੍ਗਸਦਿਸਪਞ੍ਞਤਾਯ ਉਚ੍ਛਙ੍ਗਪਞ੍ਞੋ. ਏਵਂ ਪਞ੍ਞਾ ਵਿਯ ਪੁਗ੍ਗਲੋਪਿ ਉਚ੍ਛਙ੍ਗੋ ਵਿਯ ਹੋਤਿ, ਤਸ੍ਮਿਂ ਧਮ੍ਮਾਨਂ ਅਚਿਰਟ੍ਠਾਨਤੋਤਿ ਅਧਿਪ੍ਪਾਯੇਨ ਵੁਤ੍ਤਂ. ਯਥਾ ਚ ਉਚ੍ਛਙ੍ਗਸਦਿਸਾ ਪਞ੍ਞਾ, ਏਵਂ ਨਿਕ੍ਕੁਜ੍ਜਕੁਮ੍ਭਸਦਿਸਾ ਪਞ੍ਞਾ ਏਵਾਤਿ ਦਟ੍ਠਬ੍ਬਾ.
ਸਂਵਿਦਹਨਪਞ੍ਞਾਯਾਤਿ ‘‘ਏਵਂ ਕਤੇ ਇਦਂ ਨਾਮ ਭਵਿਸ੍ਸਤੀ’’ਤਿ ਏਵਂ ਤਂਤਂਅਤ੍ਥਕਿਚ੍ਚਂ ਸਂਵਿਧਾਤੁਂ ਸਮਤ੍ਥਤਾਯ ਵਿਚਾਰਣਪਞ੍ਞਾਯ ਰਹਿਤੋ. ਸੇਯ੍ਯੋਤਿ ਸੇਟ੍ਠੋ ਪਾਸਂਸੋ. ਪੁਬ੍ਬਭਾਗਪਟਿਪਦਨ੍ਤਿ ਚਿਤ੍ਤਵਿਸੁਦ੍ਧਿਆਦਿਕਂ ਅਰਿਯਮਗ੍ਗਸ੍ਸ ਅਧਿਗਮਾਯ ਪੁਬ੍ਬਭਾਗਪਟਿਪਤ੍ਤਿਂ.
ਅਵਕੁਜ੍ਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਪੁਗ੍ਗਲਵਗ੍ਗਵਣ੍ਣਨਾ ਨਿਟ੍ਠਿਤਾ.
੪. ਦੇਵਦੂਤਵਗ੍ਗੋ
੧. ਸਬ੍ਰਹ੍ਮਕਸੁਤ੍ਤਵਣ੍ਣਨਾ
੩੧. ਚਤੁਤ੍ਥਸ੍ਸ ਪਠਮੇ ਸਬ੍ਰਹ੍ਮਕਾਨੀਤਿ ਸਸੇਟ੍ਠਕਾਨਿ. ਯੇਸਨ੍ਤਿ ਯੇਸਂ ਕੁਲਾਨਂ. ਪੁਤ੍ਤਾਨਨ੍ਤਿ ਪੁਤ੍ਤੇਹਿ. ਪੂਜਿਤਸਦ੍ਦਯੋਗੇਨ ਹਿ ਇਦਂ ਕਰਣਤ੍ਥੇ ਸਾਮਿਵਚਨਂ. ਤੇਨਾਤਿ ਆਹਾਰਾਦਿਨਾ. ਪਟਿਜਗ੍ਗਿਤਾ ਗੋਪਿਤਾਤਿ ਯਥਾਕਾਲਂ ਤਸ੍ਸ ਤਸ੍ਸ ਦਾਤਬ੍ਬਸ੍ਸ ਦਾਨੇਨ ਵੇਯ੍ਯਾਵਚ੍ਚਸ੍ਸ ਚ ਕਰਣੇਨ ਪਟਿਜਗ੍ਗਿਤਾ ਚੇਵ ਉਪ੍ਪਨ੍ਨਾਨਤ੍ਥਪ੍ਪਹਰਣੇਨ ਗੋਪਿਤਾ ਚ ਹੋਨ੍ਤਿ. ਤੇਸਨ੍ਤਿ ਮਾਤਾਪਿਤੂਨਂ. ਬ੍ਰਹ੍ਮਾਦਿਭਾਵਸਾਧਨਤ੍ਥਨ੍ਤਿ ਤੇਸਂ ਗੁਣਾਨਂ ਅਤ੍ਥਿਤਾਯ ਲੋਕੇ ਬ੍ਰਹ੍ਮਾ ਨਾਮ ਵੁਚ੍ਚਤਿ, ਆਚਰਿਯੋ ਨਾਮ ਵੁਚ੍ਚਤਿ, ਆਹੁਨੇਯ੍ਯੋ ਨਾਮ ਵੁਚ੍ਚਤਿ, ਤੇ ਮਾਤਾਪਿਤੂਨਂ ਪੁਤ੍ਤਕਂ ਪਟਿਲਭਨ੍ਤੀਤਿ ਦਸ੍ਸਨਵਸੇਨ ਨੇਸਂ ਬ੍ਰਹ੍ਮਾਦਿਭਾਵਸਾਧਨਤ੍ਥਂ ‘‘ਬਹੁਕਾਰਾ’’ਤਿ, ਵਤ੍ਵਾ ਤਂ ਤੇਸਂ ਬਹੁਕਾਰਤਂ ਨਾਨਾਕਾਰਤੋ ਦਸ੍ਸੇਤੁਂ ‘‘ਆਪਾਦਕਾ’’ਤਿਆਦਿ ਵੁਤ੍ਤਂ. ਮਾਤਾਪਿਤਰੋ ਹਿ ਪੁਤ੍ਤਾਨਂ ਜੀਵਿਤਸ੍ਸ ਆਪਾਦਕਾ, ਸਰੀਰਸ੍ਸ ਪੋਸਕਾ, ਆਚਾਰਸਮਾਚਾਰਾਨਂ ਸਿਕ੍ਖਾਪਕਾ ਸਕਲਸ੍ਸਪਿ ਇਮਸ੍ਸ ਲੋਕਸ੍ਸ ਦਸ੍ਸੇਤਾਰੋ. ਤੇਨਾਹ ‘‘ਪੁਤ੍ਤਾਨਂ ਹੀ’’ਤਿਆਦਿ. ਇਟ੍ਠਾਰਮ੍ਮਣਂ ਤਾਵ ਤੇ ਦਸ੍ਸੇਨ੍ਤੁ, ਅਨਿਟ੍ਠਾਰਮ੍ਮਣਂ ਕਥਨ੍ਤਿ? ਤਮ੍ਪਿ ਦਸ੍ਸੇਤਬ੍ਬਮੇਵ ਵਜ੍ਜਨੀਯਭਾਵਜਾਨਾਪਨਤ੍ਥਂ.
ਅਵਿਜਹਿਤਾ ਹੋਨ੍ਤੀਤਿ ਤਾਸਂ ਭਾਵਨਾਯ ਬ੍ਰਹ੍ਮਾਨਂ ਬ੍ਰਹ੍ਮਲੋਕੇ ਉਪ੍ਪਨ੍ਨਤ੍ਤਾ ਅਵਿਜਹਿਤਾ ਹੋਨ੍ਤਿ ਭਾਵਨਾ. ਲੋਭਨੀਯਵਯਸ੍ਮਿਂ ਪਠਮਯੋਬ੍ਬਨੇ ਅਤਿਵਿਯ ਮੁਦੁਭਾਵਪ੍ਪਤ੍ਤਦਸ੍ਸਨਤ੍ਥਂ ਸਤਵਿਹਤਗ੍ਗਹਣਂ. ਪਾਟਿਯੇਕ੍ਕਨ੍ਤਿ ਵਿਸੁਂ. ਇਮਿਨਾ ਕਾਰਣੇਨਾਤਿ ਇਮਿਨਾ ਯਥਾਵੁਤ੍ਤੇਨ ਪੁਤ੍ਤੇਸੁ ਪਵਤ੍ਤਿਤੇਹਿ ਅਤਿਕ੍ਕਮੇਨ ਮੇਤ੍ਤਾਦਿਸਮੁਪ੍ਪਤ੍ਤਿਸਙ੍ਖਾਤੇਨ ਕਾਰਣੇਨ.
ਥਰੁਸਿਪ੍ਪਨ੍ਤਿ ਅਸਿਸਤ੍ਤਿਕੁਨ੍ਤਕਲਾਪਾਦਿਆਯੁਧਸਿਪ੍ਪਂ. ਮੁਦ੍ਦਾਗਣਨਾਤਿ ਅਙ੍ਗੁਲਿਸਂਕੋਚਨਾਦਿਨਾ ਹਤ੍ਥਮੁਦ੍ਦਾਯ ਗਣਨਾ. ਆਦਿਸਦ੍ਦੇਨ ਪਾਣਾਦੀਨਂ ਸਙ੍ਗਹੋ. ਪਚ੍ਛਾਚਰਿਯਾ ਨਾਮ ਮਾਤਾਪਿਤੂਨਂ ਸਨ੍ਤਿਕੇ ਉਗ੍ਗਹਿਤਗਹਟ੍ਠਵਤ੍ਤਸ੍ਸੇਵ ਪੁਗ੍ਗਲਸ੍ਸ ਯਥਾਸਕਂ ਹਤ੍ਥਾਚਰਿਯਾਦੀਨਂ ਸਿਪ੍ਪਗ੍ਗਾਹਾਪਨਨ੍ਤਿ ਕਤ੍ਵਾ ਸਬ੍ਬਪਠਮਂ ਆਚਰਿਯਾ ਨਾਮਾਤਿ ਯੋਜੇਤਬ੍ਬਂ. ਆਨੀਯ ਹੁਤਂ ਆਹੁਤਂ. ਪਕਾਰੇਹਿ ਹੁਤਂ ਪਾਹੁਤਂ. ਅਭਿਸਙ੍ਖਤਨ੍ਤਿ ਤਸ੍ਸੇਵ ਵੇਵਚਨਂ.
ਨਮੋ ਕਰੇਯ੍ਯਾਤਿ ਸਾਯਂ ਪਾਤਂ ਉਪਟ੍ਠਾਨਂ ਗਨ੍ਤ੍ਵਾ ‘‘ਇਦਂ ਮਯ੍ਹਂ ਉਤ੍ਤਮਪੁਞ੍ਞਕ੍ਖੇਤ੍ਤ’’ਨ੍ਤਿ ਨਮਕ੍ਕਾਰਂ ਕਰੇਯ੍ਯ. ਤਾਯ ਨਂ ਪਾਰਿਚਰਿਯਾਯਾਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ, ਯਥਾਵੁਤ੍ਤਪਰਿਚਰਣੇਨਾਤਿ ਅਤ੍ਥੋ. ਅਥ ਵਾ ਪਾਰਿਚਰਿਯਾਯਾਤਿ ਭਰਣਕਿਚ੍ਚਕਰਣਕੁਲਵਂਸਪ੍ਪਤਿਟ੍ਠਾਨਾਪਨਾਦਿਨਾ ਪਞ੍ਚਵਿਧਉਪਟ੍ਠਾਨੇਨ. ਵੁਤ੍ਤਞ੍ਹੇਤਂ –
‘‘ਪਞ੍ਚਹਿ ਖੋ, ਗਹਪਤਿਪੁਤ੍ਤ, ਠਾਨੇਹਿ ਪੁਤ੍ਤੇਨ ਪੁਰਤ੍ਥਿਮਾ ਦਿਸਾ ਮਾਤਾਪਿਤਰੋ ਪਚ੍ਚੁਪਟ੍ਠਾਤਬ੍ਬਾ – ‘ਭਤੋ ਨੇਸਂ ਭਰਿਸ੍ਸਾਮਿ, ਕਿਚ੍ਚਂ ਨੇਸਂ ਕਰਿਸ੍ਸਾਮਿ, ਕੁਲਵਂਸਂ ਠਪੇਸ੍ਸਾਮਿ, ਦਾਯਜ੍ਜਂ ਪਟਿਪਜ੍ਜਾਮਿ, ਅਥ ਵਾ ਪਨ ਪੇਤਾਨਂ ਕਾਲਕਤਾਨਂ ਦਕ੍ਖਿਣਂ ਅਨੁਪ੍ਪਦਸ੍ਸਾਮੀ’ਤਿ. ਇਮੇਹਿ ਖੋ, ਗਹਪਤਿਪੁਤ੍ਤ, ਪਞ੍ਚਹਿ ਠਾਨੇਹਿ ਪੁਤ੍ਤੇਨ ਪੁਰਤ੍ਥਿਮਾ ਦਿਸਾ ਮਾਤਾਪਿਤਰੋ ਪਚ੍ਚੁਪਟ੍ਠਿਤਾ ਪਞ੍ਚਹਿ ਠਾਨੇਹਿ ਪੁਤ੍ਤਂ ਅਨੁਕਮ੍ਪਨ੍ਤਿ, ਪਾਪਾ ਨਿਵਾਰੇਨ੍ਤਿ, ਕਲ੍ਯਾਣੇ ਨਿਵੇਸੇਨ੍ਤਿ, ਸਿਪ੍ਪਂ ਸਿਕ੍ਖਾਪੇਨ੍ਤਿ, ਪਤਿਰੂਪੇਨ ਦਾਰੇਨ ਸਂਯੋਜੇਨ੍ਤਿ, ਸਮਯੇ ਦਾਯਜ੍ਜਂ ਨਿਯ੍ਯਾਦੇਨ੍ਤੀ’’ਤਿ (ਦੀ. ਨਿ. ੩.੨੬੭).
ਅਪਿਚ ਯੋ ਮਾਤਾਪਿਤਰੋ ਤੀਸੁ ਵਤ੍ਥੂਸੁ ਅਭਿਪ੍ਪਸਨ੍ਨੇ ਕਤ੍ਵਾ ਸੀਲੇਸੁ ਵਾ ਪਤਿਟ੍ਠਾਪੇਤ੍ਵਾ ਪਬ੍ਬਜ੍ਜਾਯ ਵਾ ਨਿਯੋਜੇਤ੍ਵਾ ਉਪਟ੍ਠਹਤਿ, ਅਯਂ ਮਾਤਾਪਿਤੂਪਟ੍ਠਾਕਾਨਂ ਅਗ੍ਗੋਤਿ ਵੇਦਿਤਬ੍ਬੋ. ਸਾ ਪਨਾਯਂ ਪਾਰਿਚਰਿਯਾ ਪੁਤ੍ਤਸ੍ਸ ਉਭਯਲੋਕਹਿਤਸੁਖਾਵਹਾਤਿ ਤਂ ਦਸ੍ਸੇਤੁਂ ‘‘ਇਧੇਵ ਨਂ ਪਸਂਸਨ੍ਤਿ, ਪੇਚ੍ਚ ਸਗ੍ਗੇ ਪਮੋਦਤੀ’’ਤਿ ਵੁਤ੍ਤਂ. ਪਸਂਸਨ੍ਤੀਤਿ ‘‘ਅਯਂ ਪੁਗ੍ਗਲੋ ਮਤ੍ਤੇਯ੍ਯੋ ਪੇਤ੍ਤੇਯ੍ਯੋ ਸਗ੍ਗਸਂਵਤ੍ਤਨਿਯਂ ਪਟਿਪਦਂ ਪੂਰੇਤੀ’’ਤਿ ਇਧੇਵ ਨਂ ਪਸਂਸਨ੍ਤਿ. ਆਮੋਦਤਿ ਆਦਿਤੋ ਪਟ੍ਠਾਯ ਮੋਦਪ੍ਪਤ੍ਤਿਯਾ. ਪਮੋਦਤਿ ਨਾਨਪ੍ਪਕਾਰਮੋਦਸਮ੍ਪਵਤ੍ਤਿਯਾ.
ਸਬ੍ਰਹ੍ਮਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਆਨਨ੍ਦਸੁਤ੍ਤਵਣ੍ਣਨਾ
੩੨. ਦੁਤਿਯੇ ਤਥਾਜਾਤਿਕੋਤਿ ਤਥਾਸਭਾਵੋ. ਚਿਤ੍ਤੇਕਗ੍ਗਤਾਲਾਭੋਤਿ ਚਿਤ੍ਤੇਕਗ੍ਗਤਾਯ ਅਧਿਗਮੋ. ਰੂਪਮੇਵ ਕਿਲੇਸੁਪ੍ਪਤ੍ਤਿਯਾ ਕਾਰਣਭਾਵਤੋ ਰੂਪਨਿਮਿਤ੍ਤਂ. ਏਸ ਨਯੋ ਸੇਸੇਸੁਪਿ. ਸਸ੍ਸਤਾਦਿਨਿਮਿਤ੍ਤਨ੍ਤਿ ਸਸ੍ਸਤੁਚ੍ਛੇਦਭਾਵਨਿਮਿਤ੍ਤਂ. ਪੁਗ੍ਗਲਨਿਮਿਤ੍ਤਨ੍ਤਿ ਪੁਗ੍ਗਲਾਭਿਨਿਵੇਸਨਨਿਮਿਤ੍ਤਂ. ਧਮ੍ਮਨਿਮਿਤ੍ਤਨ੍ਤਿ ਧਮ੍ਮਾਰਮ੍ਮਣਸਙ੍ਖਾਤਂ ਨਿਮਿਤ੍ਤਂ. ‘‘ਸਿਯਾ ਨੁ ਖੋ, ਭਨ੍ਤੇ’’ਤਿ ਥੇਰੇਨ ਪੁਟ੍ਠੋ ਭਗਵਾ ‘‘ਸਿਯਾ’’ਤਿ ਅਵੋਚ ਲੋਕੁਤ੍ਤਰਸਮਾਧਿਪ੍ਪਟਿਲਾਭਂ ਸਨ੍ਧਾਯ. ਸੋ ਹਿ ਨਿਬ੍ਬਾਨਂ ਸਨ੍ਤਂ ਪਣੀਤਨ੍ਤਿ ਚ ਪਸ੍ਸਤਿ. ਤੇਨਾਹ ‘‘ਇਧਾਨਨ੍ਦਾ’’ਤਿਆਦਿ.
ਨਿਬ੍ਬਾਨਂ ਸਨ੍ਤਨ੍ਤਿ ਸਮਾਪਤ੍ਤਿਂ ਅਪ੍ਪੇਤ੍ਵਾਤਿ ਨਿਬ੍ਬਾਨਂ ਸਨ੍ਤਨ੍ਤਿ ਆਭੁਜਿਤ੍ਵਾ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ. ਦਿਵਸਮ੍ਪੀਤਿਆਦਿਨਾ ਅਸਙ੍ਖਤਾਯ ਧਾਤੁਯਾ ਅਚ੍ਚਨ੍ਤਸਨ੍ਤਪਣੀਤਾਦਿਭਾਵਂ ਦਸ੍ਸੇਤਿ. ਅਟ੍ਠਵਿਧੇਤਿ ‘‘ਸਨ੍ਤਂ ਪਣੀਤਂ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨ’’ਨ੍ਤਿ ਏਵਂ ਅਟ੍ਠਵਿਧੇ ਆਭੋਗਸਞ੍ਞਿਤੇ ਸਮਨ੍ਨਾਹਾਰੇ. ਨਿਦ੍ਧਾਰਣੇ ਚੇਤਂ ਭੁਮ੍ਮਂ. ਇਮਸ੍ਮਿਂ ਠਾਨੇ…ਪੇ… ਲਬ੍ਭਨ੍ਤੇਵਾਤਿ ‘‘ਇਧਾਨਨ੍ਦ, ਭਿਕ੍ਖੁਨੋ ਏਵਂ ਹੋਤੀ’’ਤਿ ਆਗਤੇ ਇਮਸ੍ਮਿਂ ਸੁਤ੍ਤਪ੍ਪਦੇਸੇ ਏਕੋਪਿ ਆਭੋਗਸਮਨ੍ਨਾਹਾਰੋ ਚੇਪਿ ਸਬ੍ਬੇ ਅਟ੍ਠਪਿ ਆਭੋਗਸਮਨ੍ਨਾਹਾਰਾ ਲਬ੍ਭਨ੍ਤੇਵ ਸਮਨ੍ਨਾਹਰਤਂ ਅਤ੍ਥਾਵਹਤ੍ਤਾ.
ਞਾਣੇਨ ਜਾਨਿਤ੍ਵਾਤਿ ਵਿਪਸ੍ਸਨਾਞਾਣਸਹਿਤੇਨ ਮਗ੍ਗਞਾਣੇਨ ਜਾਨਿਤ੍ਵਾ. ਪਰਾਨਿ ਚ ਓਪਰਾਨਿ ਚ ਚਕ੍ਖਾਦੀਨਿ ਆਯਤਨਾਨਿ. ਸਨ੍ਤਤਾਯਾਤਿ ਪਟਿਪ੍ਪਸ੍ਸਦ੍ਧਿਤਾਯ. ਕਾਯਦੁਚ੍ਚਰਿਤਾਦਿਧੂਮਵਿਰਹਿਤੋਤਿ ਕਾਯਦੁਚ੍ਚਰਿਤਾਦਿ ਏਵ ਸਨ੍ਤਾਪਨਟ੍ਠੇਨ ਧੂਮੋ, ਤੇਨ ਵਿਰਹਿਤੋ. ਅਨੀਘੋਤਿ ਅਪਾਪੋ. ਜਾਤਿਜਰਾਗਹਣੇਨੇਵ ਬ੍ਯਾਧਿਮਰਣਮ੍ਪਿ ਗਹਿਤਮੇਵਾਤਿ ਤਬ੍ਭਾਵਭਾਵਤੋਤਿ ਵੁਤ੍ਤਂ.
ਆਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਸਾਰਿਪੁਤ੍ਤਸੁਤ੍ਤਵਣ੍ਣਨਾ
੩੩. ਤਤਿਯੇ, ‘‘ਸਾਰਿਪੁਤ੍ਤ, ਮਯਾ ਸਂਖਿਤ੍ਤੇਨ ਦੇਸਿਤਂ ਧਮ੍ਮਂ ਤਾਦਿਸੇਨਪਿ ਨ ਸੁਕਰਂ ਵਿਞ੍ਞਾਤੁ’’ਨ੍ਤਿ ਇਮਿਨਾ ਅਧਿਪ੍ਪਾਯੇਨੇਵ ਵਦਨ੍ਤੋ ਥੇਰਸ੍ਸ ਞਾਣਂ ਸਬ੍ਬਮਤਿਕ੍ਕਮਂ. ਅਞ੍ਞਾਤਾਰੋ ਚ ਦੁਲ੍ਲਭਾਤਿ ਹਿ ਇਮਿਨਾ ਸਾਮਞ੍ਞਵਚਨੇਨ ਸਾਰਿਪੁਤ੍ਤਤ੍ਥੇਰਮ੍ਪਿ ਅਨ੍ਤੋਗਧਂ ਕਤ੍ਵਾ ਦਸ੍ਸੇਨ੍ਤੋ ਤੇਨਪਿ ਅਤ੍ਤਨੋ ਦੇਸਨਾਯ ਦੁਪ੍ਪਟਿਵਿਦ੍ਧਭਾਵਂ ਦਸ੍ਸੇਤਿ.
ਸਮ੍ਮਾਤਿ ਹੇਤੁਨਾ ਕਾਰਣੇਨ. ਤੇਨਾਹ ‘‘ਉਪਾਯੇਨਾ’’ਤਿਆਦਿ. ਮਾਨਾਭਿਸਮਯਾਤਿ ਮਾਨਸ੍ਸ ਦਸ੍ਸਨਾਭਿਸਮਯਾ. ਪਹਾਨਾਭਿਸਮਯੋਤਿ ਚ ਦਸ੍ਸਨਾਭਿਸਮਯੋਤਿ ਚ ਪਰਿਞ੍ਞਾਭਿਸਮਯੋ ਵੁਤ੍ਤੋ. ਅਰਹਤ੍ਤਮਗ੍ਗੋ ਹਿ ਪਰਿਞ੍ਞਾਕਿਚ੍ਚਸਿਦ੍ਧਿਯਾ ਕਿਚ੍ਚਵਸੇਨ ਮਾਨਂ ਪਸ੍ਸਤਿ, ਅਸਮ੍ਮੋਹਪ੍ਪਟਿਵੇਧਵਸੇਨਾਤਿ ਵੁਤ੍ਤਂ ਹੋਤਿ, ਅਯਮਸ੍ਸ ਦਸ੍ਸਨਾਭਿਸਮਯੋ. ਤੇਨ ਦਿਟ੍ਠੋ ਪਨ ਪਹਾਨਾਭਿਸਮਯੋ ਚ. ਦਸ੍ਸਨਾਭਿਸਮਯੇਨ ਹਿ ਪਰਿਞ੍ਞਾਭਿਸਮਯਮੇਵ ਪਹੀਯਤਿ. ਦਿਟ੍ਠਵਿਸੇਨ ਦਿਟ੍ਠਸਤ੍ਤਾਨਂ ਜੀਵਿਤਂ ਵਿਯ ਅਯਮਸ੍ਸ ਪਹਾਨਾਭਿਸਮਯੋ. ਅਟ੍ਠਕਥਾਯਂ ਪਨ ਪਹਾਨਾਭਿਸਮਯਸ੍ਸ ਦਸ੍ਸਨਾਭਿਸਮਯਨਾਨਨ੍ਤਰਿਯਕਤ੍ਤਾ ‘‘ਪਹਾਨਾਭਿਸਮਯੇਨ’’ਇਚ੍ਚੇਵ ਵੁਤ੍ਤਂ. ਪਹਾਨਾਭਿਸਮਯੇ ਹਿ ਗਹਿਤੇ ਦਸ੍ਸਨਾਭਿਸਮਯੋ ਗਹਿਤੋਵ ਹੋਤਿ.
ਅਨ੍ਤਮਕਾਸਿ ਦੁਕ੍ਖਸ੍ਸਾਤਿ ਅਰਹਤ੍ਤਮਗ੍ਗੇਨ ਮਾਨਸ੍ਸ ਪਹੀਨਤ੍ਤਾ ਯੇ ਇਮੇ ‘‘ਕਾਯਬਨ੍ਧਨਸ੍ਸ ਅਨ੍ਤੋ ਜੀਰਤਿ (ਚੂਲ਼ਵ. ੨੭੮), ਹਰਿਤਨ੍ਤਂ ਵਾ’’ਤਿ (ਮ. ਨਿ. ੧.੩੦੪) ਏਵਂ ਵੁਤ੍ਤਅਨ੍ਤਿਮਮਰਿਯਾਦਨ੍ਤੋ ਚ ‘‘ਅਨ੍ਤਮਿਦਂ, ਭਿਕ੍ਖਵੇ, ਜੀਵਿਕਾਨ’’ਨ੍ਤਿ (ਸਂ. ਨਿ. ੩.੮੦; ਇਤਿਵੁ. ੯੧) ਏਵਂ ਵੁਤ੍ਤਲਾਮਕਨ੍ਤੋ ਚ ‘‘ਸਕ੍ਕਾਯੋ ਏਕੋ ਅਨ੍ਤੋ’’ਤਿ (ਸਂ. ਨਿ. ੩.੧੦੩) ਏਵਂ ਵੁਤ੍ਤਕੋਟ੍ਠਾਸਨ੍ਤੋ ਚ ‘‘ਏਸੇਵਨ੍ਤੋ ਦੁਕ੍ਖਸ੍ਸ ਸਪਚ੍ਚਯਸਙ੍ਖਯਾ’’ਤਿ ਏਵਂ ਵੁਤ੍ਤਕੋਟ੍ਠਾਸਨ੍ਤੋ ਚਾਤਿ ਚਤ੍ਤਾਰੋ ਅਨ੍ਤਾ, ਤੇਸੁ ਸਬ੍ਬਸ੍ਸੇਵ ਵਟ੍ਟਦੁਕ੍ਖਸ੍ਸ ਅਦੁਂ ਚਤੁਤ੍ਥਕੋਟਿਸਙ੍ਖਾਤਂ ਅਨ੍ਤਮਕਾਸਿ, ਪਰਿਚ੍ਛੇਦਂ ਪਰਿਵਟੁਮਂ ਅਕਾਸਿ, ਅਨ੍ਤਿਮਸਮੁਦਯਮਤ੍ਤਾਵਸੇਸਂ ਦੁਕ੍ਖਮਕਾਸੀਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਵਟ੍ਟਦੁਕ੍ਖਸ੍ਸ ਅਨ੍ਤਮਕਾਸੀ’’ਤਿ.
ਨਨੁ ਚ ‘‘ਪਹਾਨ’’ਨ੍ਤਿ ਇਮਸ੍ਸ ਨਿਦ੍ਦੇਸੇ ਨਿਬ੍ਬਾਨਂ ਆਗਤਂ? ਇਧ ਪਟਿਪ੍ਪਸ੍ਸਦ੍ਧਿਪ੍ਪਹਾਨਸਙ੍ਖਾਤਂ ਅਰਹਤ੍ਤਫਲਂ ਵੁਤ੍ਤਂ, ਤਸ੍ਮਾ ਨਿਦ੍ਦੇਸੇਨਾਯਂ ਵਣ੍ਣਨਾ ਵਿਰੁਜ੍ਝਤੀਤਿ ਆਹ ‘‘ਨਿਦ੍ਦੇਸੇ ਪਨਾ’’ਤਿਆਦਿ. ਤਤ੍ਥ ਤਾਨਿ ਪਦਾਨਿ ਆਗਤਾਨੀਤਿ ਤਸ੍ਮਿਂ ਨਿਦ੍ਦੇਸੇ ‘‘ਪਹਾਨਂ ਵੂਪਸਮਂ ਪਟਿਨਿਸ੍ਸਗ੍ਗ’’ਨ੍ਤਿਆਦੀਨਿ (ਚੂਲ਼ਨਿ. ੭੫ ਉਦਯਮਾਣਵਪੁਚ੍ਛਾਨਿਦ੍ਦੇਸੋ) ਪਦਾਨਿ ਆਗਤਾਨਿ.
ਧਮ੍ਮਤਕ੍ਕਪੁਰੇਜਵਨ੍ਤਿ ਇਮਿਨਾ ਤਸ੍ਮਿਂ ਚਤੁਤ੍ਥਜ੍ਝਾਨਵਿਮੋਕ੍ਖੇ ਠਤ੍ਵਾ ਝਾਨਙ੍ਗਾਨਿ ਵਿਪਸ੍ਸਿਤ੍ਵਾ ਅਧਿਗਤਂ ਅਰਹਤ੍ਤਵਿਮੋਕ੍ਖਂ ਵਦਤਿ. ਅਰਹਤ੍ਤਵਿਮੋਕ੍ਖਸ੍ਸ ਹਿ ਮਗ੍ਗਸਮ੍ਪਯੁਤ੍ਤਸਮ੍ਮਾਸਙ੍ਕਪ੍ਪਸਙ੍ਖਾਤੋ ਧਮ੍ਮਤਕ੍ਕੋ ਪੁਰੇਜਵੋ ਹੋਤਿ.
ਸਾਰਿਪੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਨਿਦਾਨਸੁਤ੍ਤਵਣ੍ਣਨਾ
੩੪. ਚਤੁਤ੍ਥੇ ਪਿਣ੍ਡਕਰਣਤ੍ਥਾਯਾਤਿ ਆਯੂਹਨਵਸੇਨ ਰਾਸਿਕਰਣਤ੍ਥਾਯ. ਅਭਿਨ੍ਨਾਨੀਤਿ ਏਕਦੇਸੇਨਪਿ ਅਖਣ੍ਡਿਤਾਨਿ. ਭਿਨ੍ਨਕਾਲਤੋ ਪਟ੍ਠਾਯ ਹਿ ਬੀਜਂ ਬੀਜਕਿਚ੍ਚਾਯ ਨ ਉਪਕਪ੍ਪਤਿ. ਅਪੂਤੀਨੀਤਿ ਉਦਕਤੇਮਨੇਨ ਪੂਤਿਭਾਵਂ ਨ ਉਪਗਤਾਨਿ. ਪੂਤਿਬੀਜਞ੍ਹਿ ਬੀਜਤ੍ਥਾਯ ਨ ਉਪਕਪ੍ਪਤਿ. ਤੇਨਾਹ ‘‘ਪੂਤਿਭਾਵੇਨ ਅਬੀਜਤ੍ਤਂ ਅਪ੍ਪਤ੍ਤਾਨੀ’’ਤਿ. ਨ ਵਾਤੇਨ ਨ ਚ ਆਤਪੇਨ ਹਤਾਨੀਤਿ ਵਾਤੇਨ ਚ ਆਤਪੇਨ ਚ ਨ ਹਤਾਨਿ, ਨਿਰੋਜਤਂ ਨ ਪਾਪਿਤਾਨਿ. ਨਿਰੋਜਞ੍ਹਿ ਕਸਟਬੀਜਂ ਬੀਜਤ੍ਥਾਯ ਨ ਉਪਕਪ੍ਪਤਿ. ਸਾਰਾਦਾਨੀਤਿ ਤਣ੍ਡੁਲਸਾਰਸ੍ਸ ਆਦਾਨਤੋ ਸਾਰਾਦਾਨਿ. ਨਿਸ੍ਸਾਰਞ੍ਹਿ ਬੀਜਂ ਬੀਜਤ੍ਥਾਯ ਨ ਉਪਕਪ੍ਪਤਿ. ਤੇਨਾਹ ‘‘ਗਹਿਤਸਾਰਾਨੀ’’ਤਿ, ਪਤਿਟ੍ਠਿਤਸਾਰਾਨੀਤਿ ਅਤ੍ਥੋ. ਸਨ੍ਨਿਚਯਭਾਵੇਨ ਸੁਖਂ ਸਯਿਤਾਨੀਤਿ ਚਤ੍ਤਾਰੋ ਮਾਸੇ ਕੋਟ੍ਠਪਕ੍ਖਿਤ੍ਤਨਿਯਾਮੇਨੇਵ ਸੁਖਸਯਿਤਾਨਿ.
ਕਮ੍ਮਵਿਭਤ੍ਤੀਤਿ ਕਮ੍ਮਵਿਭਾਗੋ. ਦਿਟ੍ਠਧਮ੍ਮੋ ਵੁਚ੍ਚਤਿ ਪਚ੍ਚਕ੍ਖਭੂਤੋ ਪਚ੍ਚੁਪ੍ਪਨ੍ਨੋ ਅਤ੍ਤਭਾਵੋ, ਤਤ੍ਥ ਵੇਦਿਤਬ੍ਬਫਲਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ. ਪਚ੍ਚੁਪਨ੍ਨਭਵਤੋ ਅਨਨ੍ਤਰਂ ਵੇਦਿਤਬ੍ਬਫਲਂ ਕਮ੍ਮਂ ਉਪਪਜ੍ਜਵੇਦਨੀਯਂ. ਅਪਰਪਰਿਯਾਯਵੇਦਨੀਯਨ੍ਤਿ ਦਿਟ੍ਠਧਮ੍ਮਾਨਨ੍ਤਰਭਵਤੋ ਅਞ੍ਞਸ੍ਮਿਂ ਅਤ੍ਤਭਾਵਪਰਿਯਾਯੇ ਅਤ੍ਤਭਾਵਪਰਿਵਤ੍ਤੇ ਵੇਦਿਤਬ੍ਬਫਲਂ ਕਮ੍ਮਂ. ਪਟਿਪਕ੍ਖੇਹਿ ਅਨਭਿਭੂਤਤਾਯ ਪਚ੍ਚਯਵਿਸੇਸੇਨ ਪਟਿਲਦ੍ਧਵਿਸੇਸਤਾਯ ਚ ਬਲਵਭਾਵਪ੍ਪਤ੍ਤਾ ਤਾਦਿਸਸ੍ਸ ਪੁਬ੍ਬਾਭਿਸਙ੍ਖਾਰਸ੍ਸ ਵਸੇਨ ਸਾਤਿਸਯਾ ਹੁਤ੍ਵਾ ਪਵਤ੍ਤਾ ਪਠਮਜਵਨਚੇਤਨਾ ਤਸ੍ਮਿਂਯੇਵ ਅਤ੍ਤਭਾਵੇ ਫਲਦਾਯਿਨੀ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਨਾਮ. ਸਾ ਹਿ ਵੁਤ੍ਤਾਕਾਰੇਨ ਬਲਵਤੀ ਜਵਨਸਨ੍ਤਾਨੇ ਗੁਣਵਿਸੇਸਯੁਤ੍ਤੇਸੁ ਉਪਕਾਰਾਨੁਪਕਾਰਵਸਪ੍ਪਵਤ੍ਤਿਯਾ ਆਸੇਵਨਾਲਾਭੇਨ ਅਪ੍ਪਵਿਪਾਕਤਾਯ ਚ ਪਠਮਜਵਨਚੇਤਨਾ ਇਤਰਦ੍ਵਯਂ ਵਿਯ ਪਵਤ੍ਤਸਨ੍ਤਾਨੁਪਰਮਾਪੇਕ੍ਖਂ ਓਕਾਸਲਾਭਾਪੇਕ੍ਖਞ੍ਚ ਕਮ੍ਮਂ ਨ ਹੋਤੀਤਿ ਇਧੇਵ ਪੁਪ੍ਫਮਤ੍ਤਂ ਵਿਯ ਪਵਤ੍ਤਿਵਿਪਾਕਮਤ੍ਤਂ ਫਲਂ ਦੇਤਿ. ਤਥਾ ਅਸਕ੍ਕੋਨ੍ਤਨ੍ਤਿ ਕਮ੍ਮਸ੍ਸ ਵਿਪਾਕਦਾਨਂ ਨਾਮ ਉਪਧਿਪ੍ਪਯੋਗਾਦਿਪਚ੍ਚਯਨ੍ਤਰਸਮਵਾਯੇਨੇਵ ਹੋਤੀਤਿ ਤਦਭਾਵਤੋ ਤਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦਾਤੁਂ ਅਸਕ੍ਕੋਨ੍ਤਂ. ਅਹੋਸਿਕਮ੍ਮਨ੍ਤਿ ਅਹੋਸਿ ਏਵ ਕਮ੍ਮਂ, ਨ ਤਸ੍ਸ ਵਿਪਾਕੋ ਅਹੋਸਿ ਅਤ੍ਥਿ ਭਵਿਸ੍ਸਤਿ ਚਾਤਿ ਏਵਂ ਵੇਦਿਤਬ੍ਬਂ ਕਮ੍ਮਂ.