੪-੧੨. ਸਾਰਗਨ੍ਧਾਦਿਦਾਤਾਸੁਤ੍ਤਨਵਕਂ

੪੪੧-੪੪੯. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ, ਹੇਤੁ, ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸਾਰਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ…ਪੇ… ਫੇਗ੍ਗੁਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਤਚਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਪਪਟਿਕਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਪਤ੍ਤਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਪੁਪ੍ਫਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਫਲਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਰਸਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਗਨ੍ਧਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ? ‘‘ਇਧ, ਭਿਕ੍ਖੁ, ਏਕਚ੍ਚੋ ਕਾਯੇਨ ਸੁਚਰਿਤਂ ਚਰਤਿ, ਵਾਚਾਯ ਸੁਚਰਿਤਂ ਚਰਤਿ, ਮਨਸਾ ਸੁਚਰਿਤਂ ਚਰਤਿ. ਤਸ੍ਸ ਸੁਤਂ ਹੋਤਿ – ‘ਸਾਰਗਨ੍ਧੇ ਅਧਿਵਤ੍ਥਾ ਦੇਵਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ’ਤਿ. ਤਸ੍ਸ ਏਵਂ ਹੋਤਿ – ‘ਅਹੋ ਵਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਸਾਰਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ…ਪੇ… ਫੇਗ੍ਗੁਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਤਚਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਪਪਟਿਕਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਪਤ੍ਤਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਪੁਪ੍ਫਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਫਲਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਰਸਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ… ਗਨ੍ਧਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ. ਸੋ ਦਾਤਾ ਹੋਤਿ ਸਾਰਗਨ੍ਧਾਨਂ…ਪੇ… ਸੋ ਦਾਤਾ ਹੋਤਿ ਫੇਗ੍ਗੁਗਨ੍ਧਾਨਂ… ਸੋ ਦਾਤਾ ਹੋਤਿ ਤਚਗਨ੍ਧਾਨਂ… ਸੋ ਦਾਤਾ ਹੋਤਿ ਪਪਟਿਕਗਨ੍ਧਾਨਂ… ਸੋ ਦਾਤਾ ਹੋਤਿ ਪਤ੍ਤਗਨ੍ਧਾਨਂ… ਸੋ ਦਾਤਾ ਹੋਤਿ ਪੁਪ੍ਫਗਨ੍ਧਾਨਂ… ਸੋ ਦਾਤਾ ਹੋਤਿ ਫਲਗਨ੍ਧਾਨਂ… ਸੋ ਦਾਤਾ ਹੋਤਿ ਰਸਗਨ੍ਧਾਨਂ… ਸੋ ਦਾਤਾ ਹੋਤਿ ਗਨ੍ਧਗਨ੍ਧਾਨਂ. ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਗਨ੍ਧਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਤਿ. ਅਯਂ ਖੋ, ਭਿਕ੍ਖੁ, ਹੇਤੁ, ਅਯਂ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਕਾਯਸ੍ਸ ਭੇਦਾ ਪਰਂ ਮਰਣਾ ਗਨ੍ਧਗਨ੍ਧੇ ਅਧਿਵਤ੍ਥਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਤੀ’’ਤਿ. ਦ੍ਵਾਦਸਮਂ.