੯. ਅਮ੍ਬਪਾਲਿਥੇਰੀਅਪਦਾਨਂ

੨੦੪. ‘‘ਯੋ ਰਂਸਿਫੁਸਿਤਾਵੇਲ਼ੋ, ਫੁਸ੍ਸੋ ਨਾਮ ਮਹਾਮੁਨਿ;

ਤਸ੍ਸਾਹਂ ਭਗਿਨੀ ਆਸਿਂ, ਅਜਾਯਿਂ ਖਤ੍ਤਿਯੇ ਕੁਲੇ.

੨੦੫. ‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਹਂ, ਵਿਪ੍ਪਸਨ੍ਨੇਨ ਚੇਤਸਾ;

ਮਹਾਦਾਨਂ ਦਦਿਤ੍ਵਾਨ, ਪਤ੍ਥਯਿਂ ਰੂਪਸਮ੍ਪਦਂ.

੨੦੬. ‘‘ਏਕਤਿਂਸੇ ਇਤੋ ਕਪ੍ਪੇ, ਸਿਖੀ ਲੋਕਗ੍ਗਨਾਯਕੋ;

ਉਪ੍ਪਨ੍ਨੋ ਲੋਕਪਜ੍ਜੋਤੋ, ਤਿਲੋਕਸਰਣੋ ਜਿਨੋ.

੨੦੭. ‘‘ਤਦਾਰੁਣਪੁਰੇ ਰਮ੍ਮੇ, ਬ੍ਰਾਹ੍ਮਞ੍ਞਕੁਲਸਮ੍ਭਵਾ;

ਵਿਮੁਤ੍ਤਚਿਤ੍ਤਂ ਕੁਪਿਤਾ, ਭਿਕ੍ਖੁਨਿਂ ਅਭਿਸਾਪਯਿਂ.

੨੦੮. ‘‘ਵੇਸਿਕਾਵ ਅਨਾਚਾਰਾ, ਜਿਨਸਾਸਨਦੂਸਿਕਾ;

ਏਵਂ ਅਕ੍ਕੋਸਯਿਤ੍ਵਾਨ, ਤੇਨ ਪਾਪੇਨ ਕਮ੍ਮੁਨਾ.

੨੦੯. ‘‘ਦਾਰੁਣਂ ਨਿਰਯਂ ਗਨ੍ਤ੍ਵਾ, ਮਹਾਦੁਕ੍ਖਸਮਪ੍ਪਿਤਾ;

ਤਤੋ ਚੁਤਾ ਮਨੁਸ੍ਸੇਸੁ, ਉਪਪਨ੍ਨਾ ਤਪਸ੍ਸਿਨੀ.

੨੧੦. ‘‘ਦਸਜਾਤਿਸਹਸ੍ਸਾਨਿ, ਗਣਿਕਤ੍ਤਮਕਾਰਯਿਂ;

ਤਮ੍ਹਾ ਪਾਪਾ ਨ ਮੁਚ੍ਚਿਸ੍ਸਂ, ਭੁਤ੍ਵਾ ਦੁਟ੍ਠਵਿਸਂ ਯਥਾ.

੨੧੧. ‘‘ਬ੍ਰਹ੍ਮਚਰਿਯਮਸੇਵਿਸ੍ਸਂ [ਬ੍ਰਹ੍ਮਵੇਸਮਸੇਵਿਸ੍ਸਂ (ਸ੍ਯਾ.), ਬ੍ਰਹ੍ਮਚੇਰਮਸੇਵਿਸ੍ਸਂ (ਪੀ.)], ਕਸ੍ਸਪੇ ਜਿਨਸਾਸਨੇ;

ਤੇਨ ਕਮ੍ਮਵਿਪਾਕੇਨ, ਅਜਾਯਿਂ ਤਿਦਸੇ ਪੁਰੇ.

੨੧੨. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਅਹੋਸਿਂ ਓਪਪਾਤਿਕਾ;

ਅਮ੍ਬਸਾਖਨ੍ਤਰੇ ਜਾਤਾ, ਅਮ੍ਬਪਾਲੀਤਿ ਤੇਨਹਂ.

੨੧੩. ‘‘ਪਰਿਵੁਤਾ ਪਾਣਕੋਟੀਹਿ, ਪਬ੍ਬਜਿਂ ਜਿਨਸਾਸਨੇ;

ਪਤ੍ਤਾਹਂ ਅਚਲਂ ਠਾਨਂ, ਧੀਤਾ ਬੁਦ੍ਧਸ੍ਸ ਓਰਸਾ.

੨੧੪. ‘‘ਇਦ੍ਧੀਸੁ ਚ ਵਸੀ ਹੋਮਿ, ਸੋਤਧਾਤੁਵਿਸੁਦ੍ਧਿਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

੨੧੫. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੨੧੬. ‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮੇ ਵਿਮਲਂ ਸੁਦ੍ਧਂ, ਬੁਦ੍ਧਸੇਟ੍ਠਸ੍ਸ ਵਾਹਸਾ.

੨੧੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੨੧੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਅਮ੍ਬਪਾਲਿ ਭਿਕ੍ਖੁਨੀ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਅਮ੍ਬਪਾਲਿਥੇਰਿਯਾਪਦਾਨਂ ਨਵਮਂ.