੧੦. ਪੇਸਲਾਥੇਰੀਅਪਦਾਨਂ

੨੨੦. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੨੨੧. ‘‘ਸਾਵਤ੍ਥਿਯਂ ਪੁਰੇ ਵਰੇ, ਉਪਾਸਕਕੁਲੇ ਅਹਂ;

ਪਸੂਤਾ ਤਂ [ਨਂ (ਸ੍ਯਾ.)] ਜਿਨਵਰਂ, ਦਿਸ੍ਵਾ ਸੁਤ੍ਵਾ ਚ ਦੇਸਨਂ.

੨੨੨. ‘‘ਤਂ ਵੀਰਂ ਸਰਣਂ ਗਨ੍ਤ੍ਵਾ, ਸੀਲਾਨਿ ਚ ਸਮਾਦਿਯਿਂ;

ਕਦਾਚਿ ਸੋ ਮਹਾਵੀਰੋ, ਮਹਾਜਨਸਮਾਗਮੇ.

੨੨੩. ‘‘ਅਤ੍ਤਨੋ ਅਭਿਸਮ੍ਬੋਧਿਂ, ਪਕਾਸੇਸਿ ਨਰਾਸਭੋ;

ਅਨਨੁਸ੍ਸੁਤਧਮ੍ਮੇਸੁ, ਪੁਬ੍ਬੇ ਦੁਕ੍ਖਾਦਿਕੇਸੁ ਚ.

੨੨੪. ‘‘ਚਕ੍ਖੁ ਞਾਣਞ੍ਚ ਪਞ੍ਞਾ ਚ, ਵਿਜ੍ਜਾਲੋਕੋ ਚ ਆਸਿ ਮੇ;

ਤਂ ਸੁਤ੍ਵਾ ਉਗ੍ਗਹੇਤ੍ਵਾਨ, ਪਰਿਪੁਚ੍ਛਿਞ੍ਚ ਭਿਕ੍ਖਵੋ.

੨੨੫. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੨੨੬. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤਾ ਸੇਟ੍ਠਿਮਹਾਕੁਲੇ;

ਉਪੇਚ੍ਚ ਬੁਦ੍ਧਂ ਸਦ੍ਧਮ੍ਮਂ, ਸੁਤ੍ਵਾ ਸਚ੍ਚੂਪਸਂਹਿਤਂ.

੨੨੭. ‘‘ਪਬ੍ਬਜਿਤ੍ਵਾਚਿਰੇਨੇਵ, ਸਚ੍ਚਤ੍ਥਾਨਿ [ਸਬ੍ਬਤ੍ਥਾਨਿ (ਸ੍ਯਾ. ਕ.)] ਵਿਚਿਨ੍ਤਯਂ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਅਰਹਤ੍ਤਮਪਾਪੁਣਿਂ.

੨੨੮. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

੨੨੯. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੨੩੦. ‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮੇ ਵਿਮਲਂ ਸੁਦ੍ਧਂ, ਬੁਦ੍ਧਸੇਟ੍ਠਸ੍ਸ ਵਾਹਸਾ.

੨੩੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੀਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵਾ.

੨੩੨. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਪੇਸਲਾ [ਸੇਲਾ (ਸ੍ਯਾ. ਪੀ.)] ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੇਸਲਾਥੇਰਿਯਾਪਦਾਨਂ ਦਸਮਂ.

ਖਤ੍ਤਿਯਾਵਗ੍ਗੋ ਚਤੁਤ੍ਥੋ.