੪. ਖਤ੍ਤਿਯਾਵਗ੍ਗੋ

੧. ਯਸਵਤੀਪਮੁਖਅਟ੍ਠਾਰਸਭਿਕ੍ਖੁਨੀਸਹਸ੍ਸਅਪਦਾਨਂ

੧. ‘‘ਭਵਾ ਸਬ੍ਬੇ ਪਰਿਕ੍ਖੀਣਾ, ਭਵਾ ਸਨ੍ਤਿ ਵਿਮੋਚਿਤਾ;

ਸਬ੍ਬਾਸਵਾ ਚ ਨੋ ਨਤ੍ਥਿ, ਆਰੋਚੇਮ ਮਹਾਮੁਨੇ.

੨. ‘‘ਪੁਰਿਮਂ ਕੁਸਲਂ ਕਮ੍ਮਂ [ਪਰਿਕਮ੍ਮਞ੍ਚ ਕੁਸਲਂ (ਸ੍ਯਾ.)], ਯਂ ਕਿਞ੍ਚਿ ਸਾਧੁਪਤ੍ਥਿਤਂ;

ਪਰਿਭੋਗਮਯਂ ਦਿਨ੍ਨਂ, ਤੁਯ੍ਹਤ੍ਥਾਯ ਮਹਾਮੁਨੇ.

੩. ‘‘ਬੁਦ੍ਧਪਚ੍ਚੇਕਬੁਦ੍ਧਾਨਂ, ਸਾਵਕਾਨਞ੍ਚ ਪਤ੍ਥਿਤਂ [ਬੁਦ੍ਧਾਨਂ ਸਾਵਕਾਨਞ੍ਚ (ਸੀ. ਕ.)];

ਪਰਿਭੋਗਮਯਂ ਦਿਨ੍ਨਂ, ਤੁਯ੍ਹਤ੍ਥਾਯ ਮਹਾਮੁਨੇ.

੪. ‘‘ਉਚ੍ਚਨੀਚਮਯਂ ਕਮ੍ਮਂ, ਭਿਕ੍ਖੂਨਂ ਸਾਧੁਪਤ੍ਥਿਤਂ;

ਉਚ੍ਚਾਕੁਲਪਰਿਕਮ੍ਮਂ, ਕਤਮੇਤਂ ਮਹਾਮੁਨੇ [ਕਤਮ੍ਹੇਹਿ ਮਹਾਮੁਨੇ (ਸ੍ਯਾ. ਪੀ.)].

੫. ‘‘ਤੇਨੇਵ ਸੁਕ੍ਕਮੂਲੇਨ, ਚੋਦਿਤਾ ਕਮ੍ਮਸਮ੍ਪਦਾ;

ਮਾਨੁਸਿਕਮਤਿਕ੍ਕਨ੍ਤਾ, ਜਾਯਿਂਸੁ ਖਤ੍ਤਿਯੇ ਕੁਲੇ.

੬. ‘‘ਉਪ੍ਪਤ੍ਤੇ ਚ ਕਤੇ ਕਮ੍ਮੇ, ਜਾਤਿਯਾ ਵਾਪਿ ਏਕਤੋ;

ਪਚ੍ਛਿਮੇ ਏਕਤੋ ਜਾਤਾ, ਖਤ੍ਤਿਯਾ ਕੁਲਸਮ੍ਭਵਾ.

੭. ‘‘ਰੂਪਵਤੀ ਭੋਗਵਤੀ, ਲਾਭਸਕ੍ਕਾਰਪੂਜਿਤਾ;

ਅਨ੍ਤੇਪੁਰੇ ਮਹਾਵੀਰ, ਦੇਵਾਨਂ ਵਿਯ ਨਨ੍ਦਨੇ.

੮. ‘‘ਨਿਬ੍ਬਿਨ੍ਦਿਤ੍ਵਾ ਅਗਾਰਮ੍ਹਾ, ਪਬ੍ਬਜਿਮ੍ਹਨਗਾਰਿਯਂ;

ਕਤਿਪਾਹਂ ਉਪਾਦਾਯ, ਸਬ੍ਬਾ ਪਤ੍ਤਾਮ੍ਹ ਨਿਬ੍ਬੁਤਿਂ.

੯. ‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਉਪਨੇਨ੍ਤਿ ਬਹੂ ਅਮ੍ਹੇ, ਸਦਾ ਸਕ੍ਕਤਪੂਜਿਤਾ.

੧੦. ‘‘ਕਿਲੇਸਾ ਝਾਪਿਤਾ ਅਮ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੀਵ ਬਨ੍ਧਨਂ ਛੇਤ੍ਵਾ, ਵਿਹਰਾਮ ਅਨਾਸਵਾ.

੧੧. ‘‘ਸ੍ਵਾਗਤਂ ਵਤ ਨੋ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਯਸਵਤੀਪਮੁਖਾਨਿ ਖਤ੍ਤਿਯਕਞ੍ਞਾਭਿਕ੍ਖੁਨਿਯੋ ਅਟ੍ਠਾਰਸਸਹਸ੍ਸਾਨਿ ਭਗਵਤੋ ਸਮ੍ਮੁਖਾ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਯਸਵਤੀਪਮੁਖਅਟ੍ਠਾਰਸਭਿਕ੍ਖੁਨੀਸਹਸ੍ਸਾਪਦਾਨਂ ਪਠਮਂ.

੨. ਚਤੁਰਾਸੀਤਿਭਿਕ੍ਖੁਨੀਸਹਸ੍ਸਅਪਦਾਨਂ

੧੩. ‘‘ਚੁਲ੍ਲਾਸੀਤਿਸਹਸ੍ਸਾਨਿ, ਬ੍ਰਾਹ੍ਮਞ੍ਞਕੁਲਸਮ੍ਭਵਾ [ਬ੍ਰਾਹ੍ਮਣਕੁਲਸਮ੍ਭਵਾ (ਸ੍ਯਾ. ਕ.)];

ਸੁਖੁਮਾਲਹਤ੍ਥਪਾਦਾ, ਪੁਰੇ ਤੁਯ੍ਹਂ ਮਹਾਮੁਨੇ.

੧੪. ‘‘ਵੇਸ੍ਸਸੁਦ੍ਦਕੁਲੇ ਜਾਤਾ, ਦੇਵਾ ਨਾਗਾ ਚ ਕਿਨ੍ਨਰਾ;

ਚਾਤੁਦ੍ਦੀਪਾ ਬਹੂ ਕਞ੍ਞਾ, ਪੁਰੇ ਤੁਯ੍ਹਂ ਮਹਾਮੁਨੇ.

੧੫. ‘‘ਕਾਚਿ ਪਬ੍ਬਜਿਤਾ ਅਤ੍ਥਿ, ਸਬ੍ਬਦਸ੍ਸਾਵਿਨੋ [ਸਚ੍ਚਦਸ੍ਸਾਵਿਨੋ (ਸੀ. ਪੀ.)] ਹੂ;

ਦੇਵਾ ਚ ਕਿਨ੍ਨਰਾ ਨਾਗਾ, ਫੁਸਿਸ੍ਸਨ੍ਤਿ ਅਨਾਗਤੇ.

੧੬. ‘‘ਅਨੁਭੋਤ੍ਵਾ ਯਸਂ ਸਬ੍ਬਂ, ਪਤ੍ਵਾਨ ਸਬ੍ਬਸਮ੍ਪਦਾ;

ਤੁਮ੍ਹਂ [ਤ੍ਵਯਿ (ਸੀ. ਪੀ.)] ਪਸਾਦਂ ਪਟਿਲਦ੍ਧਾ, ਬੁਜ੍ਝਿਸ੍ਸਨ੍ਤਿ ਅਨਾਗਤੇ.

੧੭. ‘‘ਅਮ੍ਹੇ ਬ੍ਰਾਹ੍ਮਣਧੀਤਾ ਤੁ, ਬ੍ਰਾਹ੍ਮਞ੍ਞਕੁਲਸਮ੍ਭਵਾ;

ਪੇਕ੍ਖਤੋ ਨੋ [ਲਕ੍ਖਣਾ ਚ (ਸ੍ਯਾ.)] ਮਹਾਵੀਰ, ਪਾਦੇ ਵਨ੍ਦਾਮ ਚਕ੍ਖੁਮ.

੧੮. ‘‘ਉਪਹਤਾ ਭਵਾ ਸਬ੍ਬੇ, ਮੂਲਤਣ੍ਹਾ ਸਮੂਹਤਾ;

ਸਮੁਚ੍ਛਿਨ੍ਨਾ ਅਨੁਸਯਾ, ਪੁਞ੍ਞਸਙ੍ਖਾਰਦਾਲਿਤਾ.

੧੯. ‘‘ਸਮਾਧਿਗੋਚਰਾ ਸਬ੍ਬਾ, ਸਮਾਪਤ੍ਤਿਵਸੀ ਕਤਾ;

ਝਾਨੇਨ ਧਮ੍ਮਰਤਿਯਾ, ਵਿਹਰਿਸ੍ਸਾਮ ਨੋ ਸਦਾ.

੨੦. ‘‘ਭਵਨੇਤ੍ਤਿ ਅਵਿਜ੍ਜਾ ਚ, ਸਙ੍ਖਾਰਾਪਿ ਚ ਖੇਪਿਤਾ;

ਸੁਦੁਦ੍ਦਸਂ ਪਦਂ ਗਨ੍ਤ੍ਵਾ, ਅਨੁਜਾਨਾਥ [ਅਨੁਜਾਨਿਮ੍ਹ (ਸ੍ਯਾ. ਪੀ. ਕ.)] ਨਾਯਕ.

੨੧. ‘‘ਉਪਕਾਰਾ ਮਮਂ ਤੁਮ੍ਹੇ, ਦੀਘਰਤ੍ਤਂ ਕਤਾਵਿਨੋ;

ਚਤੁਨ੍ਨਂ ਸਂਸਯਂ ਛੇਤ੍ਵਾ, ਸਬ੍ਬਾ ਗਚ੍ਛਨ੍ਤੁ ਨਿਬ੍ਬੁਤਿਂ.

੨੨. ‘‘ਵਨ੍ਦਿਤ੍ਵਾ ਮੁਨਿਨੋ ਪਾਦੇ, ਕਤ੍ਵਾ ਇਦ੍ਧਿਵਿਕੁਬ੍ਬਨਂ;

ਕਾਚਿ ਦਸ੍ਸੇਨ੍ਤਿ ਆਲੋਕਂ, ਅਨ੍ਧਕਾਰਮਥਾਪਰਾ.

੨੩. ‘‘ਦਸ੍ਸੇਨ੍ਤਿ ਚਨ੍ਦਸੂਰਿਯੇ, ਸਾਗਰਞ੍ਚ ਸਮਚ੍ਛਕਂ;

ਸਿਨੇਰੁਂ ਪਰਿਭਣ੍ਡਞ੍ਚ, ਦਸ੍ਸੇਨ੍ਤਿ ਪਾਰਿਛਤ੍ਤਕਂ.

੨੪. ‘‘ਤਾਵਤਿਂਸਞ੍ਚ ਭਵਨਂ, ਯਾਮਂ ਦਸ੍ਸੇਨ੍ਤਿ ਇਦ੍ਧਿਯਾ;

ਤੁਸਿਤਂ ਨਿਮ੍ਮਿਤੇ ਦੇਵੇ, ਵਸਵਤ੍ਤੀ ਮਹਿਸ੍ਸਰੇ.

੨੫. ‘‘ਬ੍ਰਹ੍ਮਾਨੋ ਕਾਚਿ ਦਸ੍ਸੇਨ੍ਤਿ, ਚਙ੍ਕਮਞ੍ਚ ਮਹਾਰਹਂ;

ਬ੍ਰਹ੍ਮਵਣ੍ਣਞ੍ਚ ਮਾਪੇਤ੍ਵਾ, ਧਮ੍ਮਂ ਦੇਸੇਨ੍ਤਿ ਸੁਞ੍ਞਤਂ.

੨੬. ‘‘ਨਾਨਾਵਿਕੁਬ੍ਬਨਂ ਕਤ੍ਵਾ, ਇਦ੍ਧਿਂ ਦਸ੍ਸਿਯ ਸਤ੍ਥੁਨੋ;

ਦਸ੍ਸਯਿਂਸੁ ਬਲਂ ਸਬ੍ਬਾ, ਪਾਦੇ ਵਨ੍ਦਿਂਸੁ ਸਤ੍ਥੁਨੋ.

੨੭. ‘‘ਇਦ੍ਧੀਸੁ ਚ ਵਸੀ ਹੋਮ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮ ਮਹਾਮੁਨੇ.

੨੮. ‘‘ਪੁਬ੍ਬੇਨਿਵਾਸਂ ਜਾਨਾਮ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੨੯. ‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਅਮ੍ਹਂ ਮਹਾਵੀਰ, ਉਪ੍ਪਨ੍ਨਂ ਤਵ ਸਨ੍ਤਿਕੇ.

੩੦. ‘‘ਪੁਬ੍ਬਾਨਂ ਲੋਕਨਾਥਾਨਂ, ਸਙ੍ਗਮਂ ਨੋ ਨਿਦਸ੍ਸਿਤਂ;

ਅਧਿਕਾਰਂ ਬਹੁਂ ਅਮ੍ਹਂ, ਤੁਯ੍ਹਤ੍ਥਾਯ ਮਹਾਮੁਨੇ.

੩੧. ‘‘ਯਂ ਅਮ੍ਹੇਹਿ ਕਤਂ ਕਮ੍ਮਂ, ਕੁਸਲਂ ਸਰ ਤਂ ਮੁਨੇ;

ਤੁਯ੍ਹਤ੍ਥਾਯ ਮਹਾਵੀਰ, ਪੁਞ੍ਞਾਨੁਪਚਿਤਾਨਿ ਨੋ.

੩੨. ‘‘ਸਤਸਹਸ੍ਸਿਤੋ ਕਪ੍ਪੇ, ਪਦੁਮੁਤ੍ਤਰੋ ਮਹਾਮੁਨਿ;

ਪੁਰਂ ਹਂਸਵਤੀ ਨਾਮ, ਸਮ੍ਬੁਦ੍ਧਸ੍ਸ ਕੁਲਾਸਯਂ.

੩੩. ‘‘ਦ੍ਵਾਰੇਨ ਹਂਸਵਤਿਯਾ, ਗਙ੍ਗਾ ਸਨ੍ਦਤਿ ਸਬ੍ਬਦਾ;

ਉਬ੍ਬਲ਼੍ਹਾ ਨਦਿਯਾ ਭਿਕ੍ਖੂ, ਗਮਨਂ ਨ ਲਭਨ੍ਤਿ ਤੇ.

੩੪. ‘‘ਦਿਵਸਂ ਦ੍ਵੇ ਤਯੋ ਚੇਵ, ਸਤ੍ਤਾਹਂ ਮਾਸਿਕਂ ਤਤੋ;

ਚਤੁਮਾਸਮ੍ਪਿ ਸਮ੍ਪੁਣ੍ਣਂ, ਗਮਨਂ ਨ ਲਭਨ੍ਤਿ ਤੇ.

੩੫. ‘‘ਤਦਾ ਅਹੁ ਸਤ੍ਤਸਾਰੋ, ਜਟਿਲੋ ਨਾਮ ਰਟ੍ਠਿਕੋ;

ਓਰੁਦ੍ਧੇ [ਓਰਤੀਰੇ (ਸ੍ਯਾ.)] ਭਿਕ੍ਖਵੋ ਦਿਸ੍ਵਾ, ਸੇਤੁਂ ਗਙ੍ਗਾਯ ਕਾਰਯਿ.

੩੬. ‘‘ਤਦਾ ਸਤਸਹਸ੍ਸੇਹਿ, ਸੇਤੁਂ ਗਙ੍ਗਾਯ ਕਾਰਯਿ;

ਸਙ੍ਘਸ੍ਸ ਓਰਿਮੇ ਤੀਰੇ, ਵਿਹਾਰਞ੍ਚ ਅਕਾਰਯਿ.

੩੭. ‘‘ਇਤ੍ਥਿਯੋ ਪੁਰਿਸਾ ਚੇਵ, ਉਚ੍ਚਨੀਚਕੁਲਾਨਿ ਚ;

ਤਸ੍ਸ ਸੇਤੁਂ ਵਿਹਾਰਞ੍ਚ [ਤੇਸੁ ਸੇਤੁਵਿਹਾਰੇਸੁ (ਸੀ.), ਤਸ੍ਸ ਸੇਤੂ ਵਿਹਾਰੇ ਚ (ਪੀ.)], ਸਮਭਾਗਂ ਅਕਂਸੁ ਤੇ.

੩੮. ‘‘ਅਮ੍ਹੇ ਅਞ੍ਞੇ ਚ ਮਾਨੁਜਾ, ਵਿਪ੍ਪਸਨ੍ਨੇਨ ਚੇਤਸਾ;

ਤਸ੍ਸ ਧਮ੍ਮੇਸੁ ਦਾਯਾਦਾ, ਨਗਰੇ ਜਨਪਦੇਸੁ ਚ.

੩੯. ‘‘ਇਤ੍ਥੀ ਪੁਮਾ ਕੁਮਾਰਾ ਚ, ਬਹੂ ਚੇਵ ਕੁਮਾਰਿਕਾ;

ਸੇਤੁਨੋ ਚ ਵਿਹਾਰਸ੍ਸ, ਵਾਲੁਕਾ ਆਕਿਰਿਂਸੁ ਤੇ.

੪੦. ‘‘ਵੀਥਿਂ ਸਮ੍ਮਜ੍ਜਨਂ ਕਤ੍ਵਾ, ਕਦਲੀਪੁਣ੍ਣਘਟੇ ਧਜੇ;

ਧੂਪਂ ਚੁਣ੍ਣਞ੍ਚ ਮਾਲਞ੍ਚ, ਕਾਰਂ ਕਤ੍ਵਾਨ ਸਤ੍ਥੁਨੋ.

੪੧. ‘‘ਸੇਤੁਵਿਹਾਰੇ ਕਾਰੇਤ੍ਵਾ, ਨਿਮਨ੍ਤੇਤ੍ਵਾ ਵਿਨਾਯਕਂ;

ਮਹਾਦਾਨਂ ਦਦਿਤ੍ਵਾਨ, ਸਮ੍ਬੋਧਿਂ ਅਭਿਪਤ੍ਥਯਿਂ.

੪੨. ‘‘ਪਦੁਮੁਤ੍ਤਰੋ ਮਹਾਵੀਰੋ, ਤਾਰਕੋ ਸਬ੍ਬਪਾਣਿਨਂ;

ਅਨੁਮੋਦਨੀਯਂਕਾਸਿ, ਜਟਿਲਸ੍ਸ ਮਹਾਮੁਨਿ [ਕਤ੍ਵਾ, ਵਿਯਾਕਾਸਿ ਮਹਾਮੁਨਿ (ਸ੍ਯਾ.)].

੪੩. ‘‘‘ਸਤਸਹਸ੍ਸਾਤਿਕ੍ਕਨ੍ਤੇ, ਕਪ੍ਪੋ ਹੇਸ੍ਸਤਿ ਭਦ੍ਦਕੋ;

ਭਵਾਭਵੇਨੁਭੋਤ੍ਵਾਨ, ਪਾਪੁਣਿਸ੍ਸਤਿ ਬੋਧਿਯਂ.

੪੪. ‘‘‘ਕਾਚਿ ਹਤ੍ਥਪਰਿਕਮ੍ਮਂ, ਕਤਾਵੀ ਨਰਨਾਰਿਯੋ;

ਅਨਾਗਤਮ੍ਹਿ ਅਦ੍ਧਾਨੇ, ਸਬ੍ਬਾ ਹੇਸ੍ਸਨ੍ਤਿ ਸਮ੍ਮੁਖਾ’.

੪੫. ‘‘ਤੇਨ ਕਮ੍ਮਵਿਪਾਕੇਨ, ਚੇਤਨਾਪਣਿਧੀਹਿ ਚ;

ਉਪ੍ਪਨ੍ਨਾ ਦੇਵਭਵਨਂ, ਤੁਯ੍ਹਂ ਤਾ ਪਰਿਚਾਰਿਕਾ.

੪੬. ‘‘ਦਿਬ੍ਬਸੁਖਂ ਅਸਙ੍ਖਿਯਂ, ਮਾਨੁਸਞ੍ਚ ਅਸਙ੍ਖਿਯਂ;

ਤੁਯ੍ਹਂ ਤੇ ਪਰਿਚਾਰੇਮ, ਸਂਸਰਿਮ੍ਹ ਭਵਾਭਵੇ.

੪੭. ‘‘ਸਤਸਹਸ੍ਸਿਤੋ ਕਪ੍ਪੇ, ਸੁਕਤਂ ਕਮ੍ਮਸਮ੍ਪਦਂ;

ਸੁਖੁਮਾਲੀ ਮਨੁਸ੍ਸਾਨਂ, ਅਥੋ ਦੇਵਪੁਰੇ ਵਰੇ.

੪੮. ‘‘ਰੂਪਭੋਗਯਸੇ ਚੇਵ, ਅਥੋ ਕਿਤ੍ਤਿਞ੍ਚ ਸਕ੍ਕਤਂ [ਕਿਤ੍ਤਿਸੁਖਂ ਪਿਯਂ (ਸ੍ਯਾ.)];

ਲਭਾਮ ਸਤਤਂ ਸਬ੍ਬਂ, ਸੁਕਤਂ ਕਮ੍ਮਸਮ੍ਪਦਂ.

੪੯. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਜਾਤਾਮ੍ਹ ਬ੍ਰਾਹ੍ਮਣੇ ਕੁਲੇ;

ਸੁਖੁਮਾਲਹਤ੍ਥਪਾਦਾ, ਸਕ੍ਯਪੁਤ੍ਤਨਿਵੇਸਨੇ.

੫੦. ‘‘ਸਬ੍ਬਕਾਲਮ੍ਪਿ ਪਥਵਿਂ, ਨ ਪਸ੍ਸਾਮ ਨ ਲਙ੍ਕਤਂ;

ਚਿਕ੍ਖਲ੍ਲਭੂਮਿਮਸੁਚਿਂ [ਚਿਕ੍ਖਲ੍ਲਂ ਭੂਮਿਂ ਗਮਨਂ (ਸ੍ਯਾ.)], ਨ ਪਸ੍ਸਾਮ ਮਹਾਮੁਨੇ.

੫੧. ‘‘ਅਗਾਰਂ ਵਸਨ੍ਤੇ ਅਮ੍ਹੇ, ਸਕ੍ਕਾਰਂ ਸਬ੍ਬਕਾਲਿਕਂ;

ਉਪਨੇਨ੍ਤਿ ਸਦਾ ਸਬ੍ਬਂ, ਪੁਬ੍ਬਕਮ੍ਮਫਲੇਨ ਨੋ [ਪੁਬ੍ਬਕਮ੍ਮਫਲਂ ਤਤੋ (ਸੀ. ਪੀ.)].

੫੨. ‘‘ਅਗਾਰਂ ਪਜਹਿਤ੍ਵਾਨ, ਪਬ੍ਬਜਿਤ੍ਵਾਨਗਾਰਿਯਂ;

ਸਂਸਾਰਪਥਨਿਤ੍ਥਿਣ੍ਣਾ, ਵੀਤਰਾਗਾ ਭਵਾਮਸੇ [ਨਤ੍ਥਿ ਦਾਨਿ ਪੁਨਬ੍ਭਵੋ (ਸੀ. ਸ੍ਯਾ. ਪੀ.)].

੫੩. ‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਉਪਨੇਨ੍ਤਿ ਸਦਾ ਅਮ੍ਹੇ, ਸਹਸ੍ਸਾਨਿ ਤਤੋ ਤਤੋ.

੫੪. ‘‘ਕਿਲੇਸਾ ਝਾਪਿਤਾ ਅਮ੍ਹਂ…ਪੇ… ਵਿਹਰਾਮ ਅਨਾਸਵਾ.

੫੫. ‘‘ਸ੍ਵਾਗਤਂ ਵਤ ਨੋ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਚਤੁਰਾਸੀਤਿਬ੍ਰਾਹ੍ਮਣਕਞ੍ਞਾਭਿਕ੍ਖੁਨੀਸਹਸ੍ਸਾਨਿ ਭਗਵਤੋ ਸਮ੍ਮੁਖਾ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਚਤੁਰਾਸੀਤਿਭਿਕ੍ਖੁਨੀਸਹਸ੍ਸਾਪਦਾਨਂ ਦੁਤਿਯਂ.

੩. ਉਪ੍ਪਲਦਾਯਿਕਾਥੇਰੀਅਪਦਾਨਂ

੫੭. ‘‘ਨਗਰੇ ਅਰੁਣਵਤਿਯਾ, ਅਰੁਣੋ ਨਾਮ ਖਤ੍ਤਿਯੋ;

ਤਸ੍ਸ ਰਞ੍ਞੋ ਅਹੁਂ ਭਰਿਯਾ, ਏਕਜ੍ਝਂ ਚਾਰਯਾਮਹਂ.

੫੮. ‘‘ਰਹੋਗਤਾ ਨਿਸੀਦਿਤ੍ਵਾ, ਏਵਂ ਚਿਨ੍ਤੇਸਹਂ ਤਦਾ;

‘ਕੁਸਲਂ ਮੇ ਕਤਂ ਨਤ੍ਥਿ, ਆਦਾਯ ਗਮਿਯਂ ਮਮ.

੫੯. ‘‘‘ਮਹਾਭਿਤਾਪਂ ਕਟੁਕਂ, ਘੋਰਰੂਪਂ ਸੁਦਾਰੁਣਂ;

ਨਿਰਯਂ ਨੂਨ ਗਚ੍ਛਾਮਿ, ਏਤ੍ਥ ਮੇ ਨਤ੍ਥਿ ਸਂਸਯੋ’.

੬੦. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਪਹਂਸੇਤ੍ਵਾਨ ਮਾਨਸਂ;

ਰਾਜਾਨਂ ਉਪਗਨ੍ਤ੍ਵਾਨ, ਇਦਂ ਵਚਨਮਬ੍ਰਵਿਂ.

੬੧. ‘‘‘ਇਤ੍ਥੀ ਨਾਮ ਮਯਂ ਦੇਵ, ਪੁਰਿਸਾਨਿਤ੍ਤਰਾ ਅਹੁ [ਪੁਰਿਸਾਨੁਗਤਾ ਸਦਾ (ਸੀ.), ਪੁਰਿਸਾ ਨ ਭਵਾਮ ਨੋ (ਸ੍ਯਾ.), ਪੁਰਿਸਾਨਂ ਭਰਾ ਮਯਂ (ਪੀ.)];

ਏਕਂ ਮੇ ਸਮਣਂ ਦੇਹਿ, ਭੋਜਯਿਸ੍ਸਾਮਿ ਖਤ੍ਤਿਯ’.

੬੨. ‘‘ਅਦਾਸਿ ਮੇ ਤਦਾ ਰਾਜਾ, ਸਮਣਂ ਭਾਵਿਤਿਨ੍ਦ੍ਰਿਯਂ;

ਤਸ੍ਸ ਪਤ੍ਤਂ ਗਹੇਤ੍ਵਾਨ, ਪਰਮਨ੍ਨੇਨ ਪੂਰਯਿਂ.

੬੩. ‘‘ਪੂਰੇਤ੍ਵਾ ਪਰਮਂ ਅਨ੍ਨਂ, ਸਹ ਸੁਗਨ੍ਧਲੇਪਨਂ;

ਮਹਾਚੇਲੇਨ ਛਾਦਿਤ੍ਵਾ, ਅਦਾਸਿਂ ਤੁਟ੍ਠਮਾਨਸਾ.

੬੪. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੬੫. ‘‘ਸਹਸ੍ਸਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਹਸ੍ਸਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

੬੬. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਨਾਨਾਵਿਧਂ ਬਹੁਂ ਅਞ੍ਞਂ, ਤਸ੍ਸ ਕਮ੍ਮਫਲਂ ਤਤੋ.

੬੭. ‘‘ਉਪ੍ਪਲਸ੍ਸੇਵ ਮੇ ਵਣ੍ਣੋ, ਅਭਿਰੂਪਾ ਸੁਦਸ੍ਸਨਾ;

ਇਤ੍ਥਿਸਬ੍ਬਙ੍ਗਸਮ੍ਪਨ੍ਨਾ, ਅਭਿਜਾਤਾ ਜੁਤਿਨ੍ਧਰਾ.

੬੮. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਅਜਾਯਿਂ ਸਾਕਿਯੇ ਕੁਲੇ;

ਨਾਰੀਸਹਸ੍ਸਪਾਮੋਕ੍ਖਾ, ਸੁਦ੍ਧੋਦਨਸੁਤਸ੍ਸਹਂ.

੬੯. ‘‘ਨਿਬ੍ਬਿਨ੍ਦਿਤ੍ਵਾ ਅਗਾਰੇਹਂ, ਪਬ੍ਬਜਿਂ ਅਨਗਾਰਿਯਂ;

ਸਤ੍ਤਮੀਰਤ੍ਤਿਸਮ੍ਪਤ੍ਤਾ [ਸਤ੍ਤਮਿਂਰਤ੍ਤਿਮਪਤ੍ਤਾ (ਸੀ. ਸ੍ਯਾ. ਪੀ.)], ਚਤੁਸਚ੍ਚਮਪਾਪੁਣਿਂ.

੭੦. ‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਪਰਿਮੇਤੁਂ ਨ ਸਕ੍ਕੋਮਿ, ਪਿਣ੍ਡਪਾਤਸ੍ਸਿਦਂ ਫਲਂ.

੭੧. ‘‘ਯਂ ਮਯ੍ਹਂ ਪੂਰਿਤਂ ਕਮ੍ਮਂ, ਕੁਸਲਂ ਸਰਸੇ ਮੁਨਿ;

ਤੁਯ੍ਹਤ੍ਥਾਯ ਮਹਾਵੀਰ, ਪਰਿਚਤ੍ਤਂ ਬਹੁਂ ਮਯਾ.

੭੨. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਿਣ੍ਡਪਾਤਸ੍ਸਿਦਂ ਫਲਂ.

੭੩. ‘‘ਦ੍ਵੇ ਗਤਿਯੋ ਪਜਾਨਾਮਿ, ਦੇਵਤ੍ਤਂ ਅਥ ਮਾਨੁਸਂ;