ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਕਨਿਕਾਯੇ

ਥੇਰੀਅਪਦਾਨਪਾਲ਼ਿ

੧. ਸੁਮੇਧਾਵਗ੍ਗੋ

੧. ਸੁਮੇਧਾਥੇਰੀਅਪਦਾਨਂ

ਅਥ ਥੇਰਿਕਾਪਦਾਨਾਨਿ ਸੁਣਾਥ –

੧. ‘‘ਭਗਵਤਿ ਕੋਣਾਗਮਨੇ, ਸਙ੍ਘਾਰਾਮਮ੍ਹਿ ਨਵਨਿਵੇਸਨਮ੍ਹਿ [ਨਿਵੇਸਮ੍ਹਿ (ਸ੍ਯਾ.)];

ਸਖਿਯੋ ਤਿਸ੍ਸੋ ਜਨਿਯੋ, ਵਿਹਾਰਦਾਨਂ ਅਦਾਸਿਮ੍ਹ.

੨. ‘‘ਦਸਕ੍ਖਤ੍ਤੁਂ ਸਤਕ੍ਖਤ੍ਤੁਂ, ਦਸਸਤਕ੍ਖਤ੍ਤੁਂ ਸਤਾਨਞ੍ਚ ਸਤਕ੍ਖਤ੍ਤੁਂ [ਸਤਾਨਿ ਚ ਸਤ੍ਤਕ੍ਖਤ੍ਤੁਂ (ਸੀ. ਕ.)];

ਦੇਵੇਸੁ ਉਪਪਜ੍ਜਿਮ੍ਹ, ਕੋ ਵਾਦੋ ਮਾਨੁਸੇ ਭਵੇ.

੩. ‘‘ਦੇਵੇ ਮਹਿਦ੍ਧਿਕਾ ਅਹੁਮ੍ਹ, ਮਾਨੁਸਕਮ੍ਹਿ ਕੋ ਵਾਦੋ;

ਸਤ੍ਤਰਤਨਮਹੇਸੀ [ਸਤ੍ਤਰਤਨਸ੍ਸ ਮਹੇਸੀ (ਸੀ. ਪੀ.)], ਇਤ੍ਥਿਰਤਨਂ ਅਹਂ ਭਵਿਂ.

੪. ‘‘ਇਧ ਸਞ੍ਚਿਤਕੁਸਲਾ [ਤਤ੍ਥ ਸਞ੍ਚਿਤਂ ਕੁਸਲਂ (ਸ੍ਯਾ.)], ਸੁਸਮਿਦ੍ਧਕੁਲਪ੍ਪਜਾ;

ਧਨਞ੍ਜਾਨੀ ਚ ਖੇਮਾ ਚ, ਅਹਮ੍ਪਿ ਚ ਤਯੋ ਜਨਾ.

੫. ‘‘ਆਰਾਮਂ ਸੁਕਤਂ ਕਤ੍ਵਾ, ਸਬ੍ਬਾਵਯਵਮਣ੍ਡਿਤਂ;

ਬੁਦ੍ਧਪ੍ਪਮੁਖਸਙ੍ਘਸ੍ਸ, ਨਿਯ੍ਯਾਦੇਤ੍ਵਾ ਸਮੋਦਿਤਾ.

੬. ‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਤਸ੍ਸ ਕਮ੍ਮਸ੍ਸ ਵਾਹਸਾ;

ਦੇਵੇਸੁ ਅਗ੍ਗਤਂ ਪਤ੍ਤਾ, ਮਨੁਸ੍ਸੇਸੁ ਤਥੇਵ ਚ.

੭. ‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੮. ‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

੯. ‘‘ਤਸ੍ਸਾਸੁਂ ਸਤ੍ਤ ਧੀਤਰੋ, ਰਾਜਕਞ੍ਞਾ ਸੁਖੇਧਿਤਾ [ਸੁਖੇਥਿਤਾ (ਸ੍ਯਾ.)];

ਬੁਦ੍ਧੋਪਟ੍ਠਾਨਨਿਰਤਾ, ਬ੍ਰਹ੍ਮਚਰਿਯਂ ਚਰਿਂਸੁ ਤਾ.

੧੦. ‘‘ਤਾਸਂ ਸਹਾਯਿਕਾ ਹੁਤ੍ਵਾ, ਸੀਲੇਸੁ ਸੁਸਮਾਹਿਤਾ;

ਦਤ੍ਵਾ ਦਾਨਾਨਿ ਸਕ੍ਕਚ੍ਚਂ, ਅਗਾਰੇਵ ਵਤਂ [ਅਗਾਰੇਵ ਵਤ੍ਤਂ (ਸ੍ਯਾ.)] ਚਰਿਂ.

੧੧. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗਾ ਅਹਂ.

੧੨. ‘‘ਤਤੋ ਚੁਤਾ ਯਾਮਮਗਂ [ਯਾਮਸਗ੍ਗਂ (ਸ੍ਯਾ.)], ਤਤੋਹਂ ਤੁਸਿਤਂ ਗਤਾ;

ਤਤੋ ਚ ਨਿਮ੍ਮਾਨਰਤਿਂ, ਵਸਵਤ੍ਤਿਪੁਰਂ ਤਤੋ.

੧੩. ‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਪੁਞ੍ਞਕਮ੍ਮਸਮੋਹਿਤਾ;

ਤਤ੍ਥ ਤਤ੍ਥੇਵ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

੧੪. ‘‘ਤਤੋ ਚੁਤਾ ਮਨੁਸ੍ਸਤ੍ਤੇ, ਰਾਜੂਨਂ ਚਕ੍ਕਵਤ੍ਤਿਨਂ;

ਮਣ੍ਡਲੀਨਞ੍ਚ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

੧੫. ‘‘ਸਮ੍ਪਤ੍ਤਿਮਨੁਭੋਤ੍ਵਾਨ, ਦੇਵੇਸੁ ਮਾਨੁਸੇਸੁ ਚ;

ਸਬ੍ਬਤ੍ਥ ਸੁਖਿਤਾ ਹੁਤ੍ਵਾ, ਨੇਕਜਾਤੀਸੁ ਸਂਸਰਿਂ.

੧੬. ‘‘ਸੋ ਹੇਤੁ ਚ ਸੋ ਪਭਵੋ, ਤਮ੍ਮੂਲਂ ਸਾਸਨੇ ਖਮਂ [ਤਮ੍ਮੂਲਂ ਸਾ ਚ ਸਾਸਨੇ ਖਨ੍ਤਿ (ਸੀ. ਪੀ. ਕ.)];

ਪਠਮਂ ਤਂ ਸਮੋਧਾਨਂ, ਤਂ ਧਮ੍ਮਰਤਾਯ ਨਿਬ੍ਬਾਨਂ [ਨਿਬ੍ਬੁਤਂ (ਸ੍ਯਾ.)].

੧੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੀਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵਾ.

੧੮. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ [ਬੁਦ੍ਧਸੇਟ੍ਠਸ੍ਸ (ਸੀ. ਸ੍ਯਾ. ਕ.)] ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਸੁਮੇਧਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਮੇਧਾਥੇਰਿਯਾਪਦਾਨਂ ਪਠਮਂ.

੨. ਮੇਖਲਾਦਾਯਿਕਾਥੇਰੀਅਪਦਾਨਂ

੨੦. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਥੂਪਕਾਰਾਪਿਕਾ ਅਹੁਂ [ਥੂਪਕਾਰ ਮਕਾਸਹਂ (ਸ੍ਯਾ.)];

ਮੇਖਲਿਕਾ ਮਯਾ ਦਿਨ੍ਨਾ, ਨਵਕਮ੍ਮਾਯ ਸਤ੍ਥੁਨੋ.

੨੧. ‘‘ਨਿਟ੍ਠਿਤੇ ਚ ਮਹਾਥੂਪੇ, ਮੇਖਲਂ ਪੁਨਦਾਸਹਂ;

ਲੋਕਨਾਥਸ੍ਸ ਮੁਨਿਨੋ, ਪਸਨ੍ਨਾ ਸੇਹਿ ਪਾਣਿਭਿ.

੨੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਮੇਖਲਮਦਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਥੂਪਕਾਰਸ੍ਸਿਦਂ ਫਲਂ.

੨੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੨੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਮੇਖਲਾਦਾਯਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮੇਖਲਾਦਾਯਿਕਾਥੇਰਿਯਾਪਦਾਨਂ ਦੁਤਿਯਂ.

੩. ਮਣ੍ਡਪਦਾਯਿਕਾਥੇਰੀਅਪਦਾਨਂ

੨੬. ‘‘ਕੋਣਾਗਮਨਬੁਦ੍ਧਸ੍ਸ, ਮਣ੍ਡਪੋ ਕਾਰਿਤੋ ਮਯਾ;

ਧੁਵਂ ਤਿਚੀਵਰਂਦਾਸਿਂ [ਥੂਪਞ੍ਚ ਪਵਰਮਦਂ (ਸ੍ਯਾ.), ਧੁਵਞ੍ਚ ਚੀਵਰਂ ਅਦਂ (ਪੀ.)], ਬੁਦ੍ਧਸ੍ਸ ਲੋਕਬਨ੍ਧੁਨੋ.

੨੭. ‘‘ਯਂ ਯਂ ਜਨਪਦਂ ਯਾਮਿ, ਨਿਗਮੇ ਰਾਜਧਾਨਿਯੋ;

ਸਬ੍ਬਤ੍ਥ ਪੂਜਿਤੋ ਹੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੨੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੨੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਮਣ੍ਡਪਦਾਯਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਣ੍ਡਪਦਾਯਿਕਾਥੇਰਿਯਾਪਦਾਨਂ ਤਤਿਯਂ.

੪. ਸਙ੍ਕਮਨਤ੍ਥਾਥੇਰੀਅਪਦਾਨਂ

੩੧. ‘‘ਵਿਪਸ੍ਸਿਸ੍ਸ ਭਗਵਤੋ [ਕੋਣ੍ਡਞ੍ਞਸ੍ਸ ਭਗਵਤੋ (ਸ੍ਯਾ. ਪੀ.)], ਲੋਕਜੇਟ੍ਠਸ੍ਸ ਤਾਦਿਨੋ;

ਰਥਿਯਂ ਪਟਿਪਨ੍ਨਸ੍ਸ, ਤਾਰਯਨ੍ਤਸ੍ਸ ਪਾਣਿਨੋ.

੩੨. ‘‘ਘਰਤੋ ਨਿਕ੍ਖਮਿਤ੍ਵਾਨ, ਅਵਕੁਜ੍ਜਾ ਨਿਪਜ੍ਜਹਂ;

ਅਨੁਕਮ੍ਪਕੋ ਲੋਕਨਾਥੋ, ਸਿਰਸਿ [ਸੀਸਨ੍ਤੇ (ਸੀ. ਕ.)] ਅਕ੍ਕਮੀ ਮਮ [ਤਦਾ (ਸ੍ਯਾ. ਪੀ.)].

੩੩. ‘‘ਅਕ੍ਕਮਿਤ੍ਵਾਨ ਸਿਰਸਿ [ਸਮ੍ਬੁਦ੍ਧੋ (ਕ.)], ਅਗਮਾ ਲੋਕਨਾਯਕੋ;

ਤੇਨ ਚਿਤ੍ਤਪ੍ਪਸਾਦੇਨ, ਤੁਸਿਤਂ ਅਗਮਾਸਹਂ.

੩੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੩੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਸਙ੍ਕਮਨਤ੍ਥਾ [ਸਙ੍ਕਮਨਦਾ (ਸ੍ਯਾ.)] ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਙ੍ਕਮਨਤ੍ਥਾਥੇਰਿਯਾਪਦਾਨਂ ਚਤੁਤ੍ਥਂ.

੫. ਨਲ਼ਮਾਲਿਕਾਥੇਰੀਅਪਦਾਨਂ

੩੭. ‘‘ਚਨ੍ਦਭਾਗਾਨਦੀਤੀਰੇ, ਅਹੋਸਿਂ ਕਿਨ੍ਨਰੀ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਸਯਮ੍ਭੁਂ ਅਪਰਾਜਿਤਂ.

੩੮. ‘‘ਪਸਨ੍ਨਚਿਤ੍ਤਾ ਸੁਮਨਾ, ਵੇਦਜਾਤਾ ਕਤਞ੍ਜਲੀ;

ਨਲ਼ਮਾਲਂ ਗਹੇਤ੍ਵਾਨ, ਸਯਮ੍ਭੁਂ ਅਭਿਪੂਜਯਿਂ.

੩੯. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਕਿਨ੍ਨਰੀਦੇਹਂ, ਅਗਚ੍ਛਿਂ ਤਿਦਸਂ ਗਤਿਂ.

੪੦. ‘‘ਛਤ੍ਤਿਂਸਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਦਸਨ੍ਨਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ;

ਸਂਵੇਜੇਤ੍ਵਾਨ ਮੇ ਚਿਤ੍ਤਂ [ਵੇਦਯਿਤ੍ਵਾਨ ਕੁਸਲਂ (ਸ੍ਯਾ.), ਸਂਵੇਦਯਿਤ੍ਵਾ ਕੁਸਲਂ (ਪੀ.)], ਪਬ੍ਬਜਿਂ ਅਨਗਾਰਿਯਂ.

੪੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ [ਭਵਾ ਸਂਘਾਤਿਤਾ ਮਮ (ਕ.)];

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੪੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਪੂਜਾਯਿਦਂ ਫਲਂ.

੪੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੪੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਨਲ਼ਮਾਲਿਕਾ ਥੇਰੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਨਲ਼ਮਾਲਿਕਾਥੇਰਿਯਾਪਦਾਨਂ ਪਞ੍ਚਮਂ.

੬. ਏਕਪਿਣ੍ਡਪਾਤਦਾਯਿਕਾਥੇਰੀਅਪਦਾਨਂ

੪੬. ‘‘ਨਗਰੇ ਬਨ੍ਧੁਮਤਿਯਾ, ਬਨ੍ਧੁਮਾ ਨਾਮ ਖਤ੍ਤਿਯੋ;

ਤਸ੍ਸ ਰਞ੍ਞੋ ਅਹੁਂ ਭਰਿਯਾ, ਏਕਜ੍ਝਂ ਚਾਰਯਾਮਹਂ [ਏਕਚ੍ਚਂ ਵਾਦਯਾਮਹਂ (ਸ੍ਯਾ.)].

੪੭. ‘‘ਰਹੋਗਤਾ ਨਿਸੀਦਿਤ੍ਵਾ, ਏਵਂ ਚਿਨ੍ਤੇਸਹਂ ਤਦਾ;

‘ਆਦਾਯ ਗਮਨੀਯਞ੍ਹਿ, ਕੁਸਲਂ ਨਤ੍ਥਿ ਮੇ ਕਤਂ.

੪੮. ‘‘‘ਮਹਾਭਿਤਾਪਂ ਕਟੁਕਂ, ਘੋਰਰੂਪਂ ਸੁਦਾਰੁਣਂ;

ਨਿਰਯਂ ਨੂਨ ਗਚ੍ਛਾਮਿ, ਏਤ੍ਥ ਮੇ ਨਤ੍ਥਿ ਸਂਸਯੋ’.

੪੯. ‘‘ਰਾਜਾਨਂ ਉਪਸਙ੍ਕਮ੍ਮ, ਇਦਂ ਵਚਨਮਬ੍ਰਵਿਂ;

‘ਏਕਂ ਮੇ ਸਮਣਂ ਦੇਹਿ, ਭੋਜਯਿਸ੍ਸਾਮਿ ਖਤ੍ਤਿਯ’.

੫੦. ‘‘ਅਦਾਸਿ ਮੇ ਮਹਾਰਾਜਾ, ਸਮਣਂ ਭਾਵਿਤਿਨ੍ਦ੍ਰਿਯਂ;

ਤਸ੍ਸ ਪਤ੍ਤਂ ਗਹੇਤ੍ਵਾਨ, ਪਰਮਨ੍ਨੇਨ ਪੂਰਯਿਂ [ਤਪ੍ਪਯਿਂ (ਸੀ.)].

੫੧. ‘‘ਪੂਰਯਿਤ੍ਵਾ ਪਰਮਨ੍ਨਂ, ਗਨ੍ਧਾਲੇਪਂ ਅਕਾਸਹਂ;

ਜਾਲੇਨ ਪਿਦਹਿਤ੍ਵਾਨ, ਵਤ੍ਥਯੁਗੇਨ [ਪੀਤਚੋਲ਼ੇਨ (ਸ੍ਯਾ.), ਮਹਾਨੇਲੇਨ (ਪੀ.)] ਛਾਦਯਿਂ.

੫੨. ‘‘ਆਰਮ੍ਮਣਂ ਮਮਂ ਏਤਂ, ਸਰਾਮਿ ਯਾਵਜੀਵਿਹਂ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਤਾਵਤਿਂਸਮਗਚ੍ਛਹਂ.

੫੩. ‘‘ਤਿਂਸਾਨਂ ਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਮਨਸਾ ਪਤ੍ਥਿਤਂ ਮਯ੍ਹਂ, ਨਿਬ੍ਬਤ੍ਤਤਿ ਯਥਿਚ੍ਛਿਤਂ [ਯਤਿਚ੍ਛਕਂ (ਸ੍ਯਾ.), ਯਦਿਚ੍ਛਕਂ (ਪੀ. ਕ.)].

੫੪. ‘‘ਵੀਸਾਨਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ;

ਓਚਿਤਤ੍ਤਾਵ [ਉਪਚਿਤਤ੍ਤਾ (ਸ੍ਯਾ.)] ਹੁਤ੍ਵਾਨ, ਸਂਸਰਾਮਿ ਭਵੇਸ੍ਵਹਂ.

੫੫. ‘‘ਸਬ੍ਬਬਨ੍ਧਨਮੁਤ੍ਤਾਹਂ, ਅਪੇਤਾ ਮੇ ਉਪਾਦਿਕਾ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੫੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਿਣ੍ਡਪਾਤਸ੍ਸਿਦਂ ਫਲਂ.

੫੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੫੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਏਕਪਿਣ੍ਡਪਾਤਦਾਯਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਪਿਣ੍ਡਪਾਤਦਾਯਿਕਾਥੇਰਿਯਾਪਦਾਨਂ ਛਟ੍ਠਂ.

੭. ਕਟਚ੍ਛੁਭਿਕ੍ਖਾਦਾਯਿਕਾਥੇਰੀਅਪਦਾਨਂ

੬੦. ‘‘ਪਿਣ੍ਡਚਾਰਂ ਚਰਨ੍ਤਸ੍ਸ, ਤਿਸ੍ਸਨਾਮਸ੍ਸ ਸਤ੍ਥੁਨੋ;

ਕਟਚ੍ਛੁਭਿਕ੍ਖਂ ਪਗ੍ਗਯ੍ਹ, ਬੁਦ੍ਧਸੇਟ੍ਠਸ੍ਸ ਦਾਸਹਂ.

੬੧. ‘‘ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਤਿਸ੍ਸੋ ਲੋਕਗ੍ਗਨਾਯਕੋ;

ਵੀਥਿਯਾ ਸਣ੍ਠਿਤੋ ਸਤ੍ਥਾ, ਅਕਾ ਮੇ ਅਨੁਮੋਦਨਂ.

੬੨. ‘‘‘ਕਟਚ੍ਛੁਭਿਕ੍ਖਂ ਦਤ੍ਵਾਨ, ਤਾਵਤਿਂਸਂ ਗਮਿਸ੍ਸਸਿ;

ਛਤ੍ਤਿਂਸਦੇਵਰਾਜੂਨਂ, ਮਹੇਸਿਤ੍ਤਂ ਕਰਿਸ੍ਸਸਿ.

੬੩. ‘‘‘ਪਞ੍ਞਾਸਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਂ ਕਰਿਸ੍ਸਸਿ;

ਮਨਸਾ ਪਤ੍ਥਿਤਂ ਸਬ੍ਬਂ, ਪਟਿਲਚ੍ਛਸਿ ਸਬ੍ਬਦਾ.

੬੪. ‘‘‘ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਪਬ੍ਬਜਿਸ੍ਸਸਿਕਿਞ੍ਚਨਾ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਸਿਨਾਸਵਾ’.

੬੫. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਤਿਸ੍ਸੋ ਲੋਕਗ੍ਗਨਾਯਕੋ;

ਨਭਂ ਅਬ੍ਭੁਗ੍ਗਮੀ ਵੀਰੋ, ਹਂਸਰਾਜਾਵ ਅਮ੍ਬਰੇ.

੬੬. ‘‘ਸੁਦਿਨ੍ਨਂ ਮੇ ਦਾਨਵਰਂ [ਸੁਦਿਨ੍ਨਮੇਵ ਮੇ ਦਾਨਂ (ਸ੍ਯਾ.)], ਸੁਯਿਟ੍ਠਾ ਯਾਗਸਮ੍ਪਦਾ;

ਕਟਚ੍ਛੁਭਿਕ੍ਖਂ ਦਤ੍ਵਾਨ, ਪਤ੍ਤਾਹਂ ਅਚਲਂ ਪਦਂ.

੬੭. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਿਕ੍ਖਾਦਾਨਸ੍ਸਿਦਂ ਫਲਂ.

੬੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੬੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੭੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਕਟਚ੍ਛੁਭਿਕ੍ਖਾਦਾਯਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਟਚ੍ਛੁਭਿਕ੍ਖਾਦਾਯਿਕਾਥੇਰਿਯਾਪਦਾਨਂ ਸਤ੍ਤਮਂ.

੮. ਸਤ੍ਤੁਪ੍ਪਲਮਾਲਿਕਾਥੇਰੀਅਪਦਾਨਂ