੮. ਪੁਣ੍ਣਿਕਾਥੇਰੀਅਪਦਾਨਂ

੧੮੪. ‘‘ਵਿਪਸ੍ਸਿਨੋ ਭਗਵਤੋ, ਸਿਖਿਨੋ ਵੇਸ੍ਸਭੁਸ੍ਸ ਚ;

ਕਕੁਸਨ੍ਧਸ੍ਸ ਮੁਨਿਨੋ, ਕੋਣਾਗਮਨਤਾਦਿਨੋ.

੧੮੫. ‘‘ਕਸ੍ਸਪਸ੍ਸ ਚ ਬੁਦ੍ਧਸ੍ਸ, ਪਬ੍ਬਜਿਤ੍ਵਾਨ ਸਾਸਨੇ;

ਭਿਕ੍ਖੁਨੀ ਸੀਲਸਮ੍ਪਨ੍ਨਾ, ਨਿਪਕਾ ਸਂਵੁਤਿਨ੍ਦ੍ਰਿਯਾ.

੧੮੬. ‘‘ਬਹੁਸ੍ਸੁਤਾ ਧਮ੍ਮਧਰਾ, ਧਮ੍ਮਤ੍ਥਪਟਿਪੁਚ੍ਛਿਕਾ;

ਉਗ੍ਗਹੇਤਾ ਚ ਧਮ੍ਮਾਨਂ, ਸੋਤਾ ਪਯਿਰੁਪਾਸਿਤਾ.

੧੮੭. ‘‘ਦੇਸੇਨ੍ਤੀ ਜਨਮਜ੍ਝੇਹਂ, ਅਹੋਸਿਂ ਜਿਨਸਾਸਨੇ;

ਬਾਹੁਸਚ੍ਚੇਨ ਤੇਨਾਹਂ, ਪੇਸਲਾ ਅਤਿਮਞ੍ਞਿਸਂ.

੧੮੮. ‘‘ਪਚ੍ਛਿਮੇ ਚ ਭਵੇ ਦਾਨਿ, ਸਾਵਤ੍ਥਿਯਂ ਪੁਰੁਤ੍ਤਮੇ;

ਅਨਾਥਪਿਣ੍ਡਿਨੋ ਗੇਹੇ, ਜਾਤਾਹਂ ਕੁਮ੍ਭਦਾਸਿਯਾ.

੧੮੯. ‘‘ਗਤਾ ਉਦਕਹਾਰਿਯਂ, ਸੋਤ੍ਥਿਯਂ ਦਿਜਮਦ੍ਦਸਂ;

ਸੀਤਟ੍ਟਂ ਤੋਯਮਜ੍ਝਮ੍ਹਿ, ਤਂ ਦਿਸ੍ਵਾ ਇਦਮਬ੍ਰਵਿਂ.

੧੯੦. ‘‘‘ਉਦਹਾਰੀ ਅਹਂ ਸੀਤੇ, ਸਦਾ ਉਦਕਮੋਤਰਿਂ;

ਅਯ੍ਯਾਨਂ ਦਣ੍ਡਭਯਭੀਤਾ, ਵਾਚਾਦੋਸਭਯਟ੍ਟਿਤਾ [ਵਾਚਾਰੋਸਭਯਟ੍ਟਿਤਾ (ਸ੍ਯਾ.)].

੧੯੧. ‘‘‘ਕਸ੍ਸ ਬ੍ਰਾਹ੍ਮਣ ਤ੍ਵਂ ਭੀਤੋ, ਸਦਾ ਉਦਕਮੋਤਰਿ;

ਵੇਧਮਾਨੇਹਿ ਗਤ੍ਤੇਹਿ, ਸੀਤਂ ਵੇਦਯਸੇ ਭੁਸਂ’.

੧੯੨. ‘‘‘ਜਾਨਨ੍ਤੀ ਵਤ ਮਂ ਭੋਤਿ, ਪੁਣ੍ਣਿਕੇ ਪਰਿਪੁਚ੍ਛਸਿ;

ਕਰੋਨ੍ਤਂ ਕੁਸਲਂ ਕਮ੍ਮਂ, ਰੁਨ੍ਧਨ੍ਤਂ [ਨਿਦ੍ਧਨ੍ਤਂ (ਸੀ. ਪੀ.), ਨੁਦਨ੍ਤਂ (ਸ੍ਯਾ.)] ਕਤਪਾਪਕਂ.

੧੯੩. ‘‘‘ਯੋ ਚੇ ਵੁਡ੍ਢੋ ਦਹਰੋ ਵਾ, ਪਾਪਕਮ੍ਮਂ ਪਕੁਬ੍ਬਤਿ;

ਦਕਾਭਿਸਿਞ੍ਚਨਾ ਸੋਪਿ [ਭੋਤਿ (ਸੀ. ਕ.) ਥੇਰੀਗਾ. ੨੩੯], ਪਾਪਕਮ੍ਮਾ ਪਮੁਚ੍ਚਤਿ’.

੧੯੪. ‘‘ਉਤ੍ਤਰਨ੍ਤਸ੍ਸ ਅਕ੍ਖਾਸਿਂ, ਧਮ੍ਮਤ੍ਥਸਂਹਿਤਂ ਪਦਂ;

ਤਞ੍ਚ ਸੁਤ੍ਵਾ ਸ ਸਂਵਿਗ੍ਗੋ [ਸੁਸਂਵਿਗ੍ਗੋ (ਸ੍ਯਾ.)], ਪਬ੍ਬਜਿਤ੍ਵਾਰਹਾ ਅਹੁ.

੧੯੫. ‘‘ਪੂਰੇਨ੍ਤੀ ਊਨਕਸਤਂ, ਜਾਤਾ ਦਾਸਿਕੁਲੇ ਯਤੋ;

ਤਤੋ ਪੁਣ੍ਣਾਤਿ ਨਾਮਂ ਮੇ, ਭੁਜਿਸ੍ਸਂ ਮਂ ਅਕਂਸੁ ਤੇ.

੧੯੬. ‘‘ਸੇਟ੍ਠਿਂ ਤਤੋਨੁਜਾਨੇਤ੍ਵਾ [ਤਤੋ ਅਨੁਮੋਦੇਤ੍ਵਾ (ਸੀ. ਸ੍ਯਾ.), ਤਤੋ ਅਨੁਮਾਨੇਤ੍ਵਾ (ਪੀ.)], ਪਬ੍ਬਜਿਂ ਅਨਗਾਰਿਯਂ;

ਨ ਚਿਰੇਨੇਵ ਕਾਲੇਨ, ਅਰਹਤ੍ਤਮਪਾਪੁਣਿਂ.

੧੯੭. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

੧੯੮. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੯੯. ‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮੇ ਵਿਮਲਂ ਸੁਦ੍ਧਂ, ਬੁਦ੍ਧਸੇਟ੍ਠਸ੍ਸ ਵਾਹਸਾ.

੨੦੦. ‘‘ਭਾਵਨਾਯ ਮਹਾਪਞ੍ਞਾ, ਸੁਤੇਨੇਵ ਸੁਤਾਵਿਨੀ;

ਮਾਨੇਨ ਨੀਚਕੁਲਜਾ, ਨ ਹਿ ਕਮ੍ਮਂ ਵਿਨਸ੍ਸਤਿ [ਪਨਸ੍ਸਤਿ (ਸ੍ਯਾ.)].

੨੦੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੨੦੨. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੦੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਪੁਣ੍ਣਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਣ੍ਣਿਕਾਥੇਰਿਯਾਪਦਾਨਂ ਅਟ੍ਠਮਂ.