੫. ਸੁਕ੍ਕਾਥੇਰੀਅਪਦਾਨਂ

੧੧੧. ‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਨਾਮ ਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ, ਸਬ੍ਬਧਮ੍ਮਵਿਪਸ੍ਸਕੋ.

੧੧੨. ‘‘ਤਦਾਹਂ ਬਨ੍ਧੁਮਤਿਯਂ, ਜਾਤਾ ਅਞ੍ਞਤਰੇ ਕੁਲੇ;

ਧਮ੍ਮਂ ਸੁਤ੍ਵਾਨ ਮੁਨਿਨੋ, ਪਬ੍ਬਜਿਂ ਅਨਗਾਰਿਯਂ.

੧੧੩. ‘‘ਬਹੁਸ੍ਸੁਤਾ ਧਮ੍ਮਧਰਾ, ਪਟਿਭਾਨਵਤੀ ਤਥਾ;

ਵਿਚਿਤ੍ਤਕਥਿਕਾ ਚਾਪਿ, ਜਿਨਸਾਸਨਕਾਰਿਕਾ.

੧੧੪. ‘‘ਤਦਾ ਧਮ੍ਮਕਥਂ ਕਤ੍ਵਾ, ਹਿਤਾਯ ਜਨਤਂ ਬਹੁਂ [ਜਨਤਾਯ ਹਿਤਂ ਬਹੁਂ (ਸੀ.) … ਸਦਾ (ਸ੍ਯਾ.), ਹਿਤਾਯ ਜਨਸਂਸਰਿਂ (ਪੀ.)];

ਤਤੋ ਚੁਤਾਹਂ ਤੁਸਿਤਂ, ਉਪਪਨ੍ਨਾ ਯਸਸ੍ਸਿਨੀ.

੧੧੫. ‘‘ਏਕਤਿਂਸੇ ਇਤੋ ਕਪ੍ਪੇ, ਸਿਖੀ ਵਿਯ ਸਿਖੀ ਜਿਨੋ;

ਤਪਨ੍ਤੋ ਯਸਸਾ ਲੋਕੇ [ਲੋਕਂ (ਸ੍ਯਾ. ਪੀ.)], ਉਪ੍ਪਜ੍ਜਿ ਵਦਤਂ ਵਰੋ.

੧੧੬. ‘‘ਤਦਾਪਿ ਪਬ੍ਬਜਿਤ੍ਵਾਨ, ਬੁਦ੍ਧਸਾਸਨਕੋਵਿਦਾ;

ਜੋਤੇਤ੍ਵਾ ਜਿਨਵਾਕ੍ਯਾਨਿ, ਤਤੋਪਿ ਤਿਦਿਵਂ ਗਤਾ.

੧੧੭. ‘‘ਏਕਤਿਂਸੇਵ ਕਪ੍ਪਮ੍ਹਿ, ਵੇਸ੍ਸਭੂ ਨਾਮ ਨਾਯਕੋ;

ਉਪ੍ਪਜ੍ਜਿਤ੍ਥ ਮਹਾਞਾਣੀ, ਤਦਾਪਿ ਚ ਤਥੇਵਹਂ.

੧੧੮. ‘‘ਪਬ੍ਬਜਿਤ੍ਵਾ ਧਮ੍ਮਧਰਾ, ਜੋਤਯਿਂ ਜਿਨਸਾਸਨਂ;

ਗਨ੍ਤ੍ਵਾ ਮਰੁਪੁਰਂ ਰਮ੍ਮਂ, ਅਨੁਭੋਸਿਂ ਮਹਾਸੁਖਂ.

੧੧੯. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਕਕੁਸਨ੍ਧੋ ਜਿਨੁਤ੍ਤਮੋ;

ਉਪ੍ਪਜ੍ਜਿ ਨਰਸਰਣੋ [ਨਰਸਦ੍ਦੂਲੋ (ਸੀ. ਸ੍ਯਾ. ਪੀ.)], ਤਦਾਪਿ ਚ ਤਥੇਵਹਂ.

੧੨੦. ‘‘ਪਬ੍ਬਜਿਤ੍ਵਾ ਮੁਨਿਮਤਂ, ਜੋਤਯਿਤ੍ਵਾ ਯਥਾਯੁਕਂ;

ਤਤੋ ਚੁਤਾਹਂ ਤਿਦਿਵਂ, ਅਗਂ ਸਭਵਨਂ ਯਥਾ.

੧੨੧. ‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਕੋਣਾਗਮਨਨਾਯਕੋ;

ਉਪ੍ਪਜ੍ਜਿ ਲੋਕਸਰਣੋ, ਅਰਣੋ ਅਮਤਙ੍ਗਤੋ [ਵਦਤਂ ਵਰੋ, ਸਬ੍ਬਸਤ੍ਤਾਨਮੁਤ੍ਤਮੋ (ਸ੍ਯਾ.)].

੧੨੨. ‘‘ਤਦਾਪਿ ਪਬ੍ਬਜਿਤ੍ਵਾਨ, ਸਾਸਨੇ ਤਸ੍ਸ ਤਾਦਿਨੋ;

ਬਹੁਸ੍ਸੁਤਾ ਧਮ੍ਮਧਰਾ, ਜੋਤਯਿਂ ਜਿਨਸਾਸਨਂ.

੧੨੩. ‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਕਸ੍ਸਪੋ ਮੁਨਿਮੁਤ੍ਤਮੋ;

ਉਪ੍ਪਜ੍ਜਿ ਲੋਕਸਰਣੋ, ਅਰਣੋ ਮਰਣਨ੍ਤਗੂ.

੧੨੪. ‘‘ਤਸ੍ਸਾਪਿ ਨਰਵੀਰਸ੍ਸ, ਪਬ੍ਬਜਿਤ੍ਵਾਨ ਸਾਸਨੇ;

ਪਰਿਯਾਪੁਟਸਦ੍ਧਮ੍ਮਾ, ਪਰਿਪੁਚ੍ਛਾਵਿਸਾਰਦਾ.

੧੨੫. ‘‘ਸੁਸੀਲਾ ਲਜ੍ਜਿਨੀ ਚੇਵ, ਤੀਸੁ ਸਿਕ੍ਖਾਸੁ ਕੋਵਿਦਾ;

ਬਹੁਂ ਧਮ੍ਮਕਥਂ ਕਤ੍ਵਾ, ਯਾਵਜੀਵਂ ਮਹਾਮੁਨੇ.

੧੨੬. ‘‘ਤੇਨ ਕਮ੍ਮਵਿਪਾਕੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੨੭. ‘‘ਪਚ੍ਛਿਮੇ ਚ ਭਵੇ ਦਾਨਿ, ਗਿਰਿਬ੍ਬਜਪੁਰੁਤ੍ਤਮੇ;

ਜਾਤਾ ਸੇਟ੍ਠਿਕੁਲੇ ਫੀਤੇ, ਮਹਾਰਤਨਸਞ੍ਚਯੇ.

੧੨੮. ‘‘ਯਦਾ ਭਿਕ੍ਖੁਸਹਸ੍ਸੇਨ, ਪਰਿਵੁਤੋ ਲੋਕਨਾਯਕੋ;

ਉਪਾਗਮਿ ਰਾਜਗਹਂ, ਸਹਸ੍ਸਕ੍ਖੇਨ ਵਣ੍ਣਿਤੋ.

੧੨੯. ‘‘‘ਦਨ੍ਤੋ ਦਨ੍ਤੇਹਿ ਸਹ ਪੁਰਾਣਜਟਿਲੇਹਿ, ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸਵਣ੍ਣੋ, ਰਾਜਗਹਂ ਪਾਵਿਸਿ ਭਗਵਾ’.

੧੩੦. ‘‘ਦਿਸ੍ਵਾ ਬੁਦ੍ਧਾਨੁਭਾਵਂ ਤਂ, ਸੁਤ੍ਵਾਵ ਗੁਣਸਞ੍ਚਯਂ;

ਬੁਦ੍ਧੇ ਚਿਤ੍ਤਂ ਪਸਾਦੇਤ੍ਵਾ, ਪੂਜਯਿਂ ਤਂ ਯਥਾਬਲਂ.

੧੩੧. ‘‘ਅਪਰੇਨ ਚ ਕਾਲੇਨ, ਧਮ੍ਮਦਿਨ੍ਨਾਯ ਸਨ੍ਤਿਕੇ;

ਅਗਾਰਾ ਨਿਕ੍ਖਮਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

੧੩੨. ‘‘ਕੇਸੇਸੁ ਛਿਜ੍ਜਮਾਨੇਸੁ, ਕਿਲੇਸੇ ਝਾਪਯਿਂ ਅਹਂ;

ਉਗ੍ਗਹਿਂ ਸਾਸਨਂ ਸਬ੍ਬਂ, ਪਬ੍ਬਜਿਤ੍ਵਾਚਿਰੇਨਹਂ.

੧੩੩. ‘‘ਤਤੋ ਧਮ੍ਮਮਦੇਸੇਸਿਂ, ਮਹਾਜਨਸਮਾਗਮੇ;

ਧਮ੍ਮੇ ਦੇਸਿਯਮਾਨਮ੍ਹਿ, ਧਮ੍ਮਾਭਿਸਮਯੋ ਅਹੁ.

੧੩੪. ‘‘ਨੇਕਪਾਣਸਹਸ੍ਸਾਨਂ, ਤਂ ਵਿਦਿਤ੍ਵਾਤਿਵਿਮ੍ਹਿਤੋ;

ਅਭਿਪ੍ਪਸਨ੍ਨੋ ਮੇ ਯਕ੍ਖੋ, ਭਮਿਤ੍ਵਾਨ ਗਿਰਿਬ੍ਬਜਂ.

੧੩੫. ‘‘ਕਿਂ ਮੇ ਕਤਾ ਰਾਜਗਹੇ ਮਨੁਸ੍ਸਾ, ਮਧੁਂ ਪੀਤਾਵ ਅਚ੍ਛਰੇ;

ਯੇ ਸੁਕ੍ਕਂ ਨ ਉਪਾਸਨ੍ਤਿ, ਦੇਸੇਨ੍ਤਿਂ ਅਮਤਂ ਪਦਂ.

੧੩੬. ‘‘ਤਞ੍ਚ ਅਪ੍ਪਟਿਵਾਨੀਯਂ, ਅਸੇਚਨਕਮੋਜਵਂ;

ਪਿਵਨ੍ਤਿ ਮਞ੍ਞੇ ਸਪ੍ਪਞ੍ਞਾ, ਵਲਾਹਕਮਿਵਦ੍ਧਗੂ.

੧੩੭. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

੧੩੮. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੩੯. ‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮਮ ਮਹਾਵੀਰ, ਉਪ੍ਪਨ੍ਨਂ ਤਵ ਸਨ੍ਤਿਕੇ.

੧੪੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੧੪੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਸੁਕ੍ਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਕ੍ਕਾਥੇਰਿਯਾਪਦਾਨਂ ਪਞ੍ਚਮਂ.

ਪਞ੍ਚਮਂ ਭਾਣਵਾਰਂ.