੬. ਅਭਿਰੂਪਨਨ੍ਦਾਥੇਰੀਅਪਦਾਨਂ

੧੪੩. ‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਨਾਮ ਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ.

੧੪੪. ‘‘ਤਦਾਹਂ ਬਨ੍ਧੁਮਤਿਯਂ, ਇਦ੍ਧੇ ਫੀਤੇ ਮਹਾਕੁਲੇ;

ਜਾਤਾ ਸੁਰੂਪਾ ਦਯਿਤਾ, ਪੂਜਨੀਯਾ ਜਨਸ੍ਸ ਚ.

੧੪੫. ‘‘ਉਪਗਨ੍ਤ੍ਵਾ ਮਹਾਵੀਰਂ, ਵਿਪਸ੍ਸਿਂ ਲੋਕਨਾਯਕਂ;

ਧਮ੍ਮਂ ਸੁਣਿਤ੍ਵਾ ਸਰਣਂ, ਉਪੇਸਿਂ ਨਰਨਾਯਕਂ.

੧੪੬. ‘‘ਸੀਲੇਸੁ ਸਂਵੁਤਾ ਹੁਤ੍ਵਾ, ਨਿਬ੍ਬੁਤੇ ਚ ਨਰੁਤ੍ਤਮੇ;

ਧਾਤੁਥੂਪਸ੍ਸ ਉਪਰਿ, ਸੋਣ੍ਣਚ੍ਛਤ੍ਤਮਪੂਜਯਿਂ.

੧੪੭. ‘‘ਮੁਤ੍ਤਚਾਗਾ ਸੀਲਵਤੀ, ਯਾਵਜੀਵਂ ਤਤੋ ਚੁਤਾ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗਾ ਅਹਂ.

੧੪੮. ‘‘ਤਦਾ ਦਸਹਿ ਠਾਨੇਹਿ, ਅਧਿਭੋਤ੍ਵਾਨ ਸੇਸਕੇ [ਅਧਿਭੋਤ੍ਵਾ ਅਸੇਸਤੋ (ਸ੍ਯਾ.)];

ਰੂਪਸਦ੍ਦੇਹਿ ਗਨ੍ਧੇਹਿ, ਰਸੇਹਿ ਫੁਸਨੇਹਿ ਚ.

੧੪੯. ‘‘ਆਯੁਨਾਪਿ ਚ ਵਣ੍ਣੇਨ, ਸੁਖੇਨ ਯਸਸਾਪਿ ਚ;

ਤਥੇਵਾਧਿਪਤੇਯ੍ਯੇਨ, ਅਧਿਗਯ੍ਹ ਵਿਰੋਚਹਂ.

੧੫੦. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤਾਹਂ ਕਪਿਲਵ੍ਹਯੇ;

ਧੀਤਾ ਖੇਮਕਸਕ੍ਕਸ੍ਸ, ਨਨ੍ਦਾ ਨਾਮਾਤਿ ਵਿਸ੍ਸੁਤਾ.

੧੫੧. ‘‘ਅਭਿਰੂਪਸਮ੍ਪਦਮ੍ਪਿ [ਅਭਿਰੁਪਂ ਉਪਪਦਂ (ਸੀ.), ਅਭਿਰੁਪਂ ਉਪ੍ਪਾਦਂ (ਪੀ.)], ਅਹੁ ਮੇ ਕਨ੍ਤਿਸੂਚਕਂ;

ਯਦਾਹਂ ਯੋਬ੍ਬਨਪ੍ਪਤ੍ਤਾ, ਰੂਪਲਾਵਞ੍ਞਭੂਸਿਤਾ.

੧੫੨. ‘‘ਤਦਾ [ਤਦਾ ਮਮਤ੍ਥਂ (ਸੀ.), ਇਧ ਮਮਤ੍ਤੇ (ਸ੍ਯਾ. ਕ.)] ਮਤ੍ਥੇ ਸਕ੍ਯਾਨਂ, ਵਿਵਾਦੋ ਸੁਮਹਾ ਅਹੁ;

ਪਬ੍ਬਾਜੇਸਿ ਤਤੋ ਤਾਤੋ, ਮਾ ਸਕ੍ਯਾ ਵਿਨਸ੍ਸਿਂਸੁਤਿ.

੧੫੩. ‘‘ਪਬ੍ਬਜਿਤ੍ਵਾ ਤਥਾਗਤਂ, ਰੂਪਦੇਸ੍ਸਿਂ ਨਰੁਤ੍ਤਮਂ;

ਸੁਤ੍ਵਾਨ ਨੋਪਗਚ੍ਛਾਮਿ, ਮਮ ਰੂਪੇਨ ਗਬ੍ਬਿਤਾ.

੧੫੪. ‘‘ਓਵਾਦਮ੍ਪਿ ਨ ਗਚ੍ਛਾਮਿ, ਬੁਦ੍ਧਦਸ੍ਸਨਭੀਰੁਤਾ;

ਤਦਾ ਜਿਨੋ ਉਪਾਯੇਨ, ਉਪਨੇਤ੍ਵਾ ਸਸਨ੍ਤਿਕਂ.

੧੫੫. ‘‘ਤਿਸ੍ਸਿਤ੍ਥਿਯੋ [ਤਿਸ੍ਸੋ ਥੀਯੋ (ਸੀ. ਪੀ.)] ਨਿਦਸ੍ਸੇਸਿ, ਇਦ੍ਧਿਯਾ ਮਗ੍ਗਕੋਵਿਦੋ;

ਅਚ੍ਛਰਾਰੂਪਸਦਿਸਂ, ਤਰੁਣਿਂ ਜਰਿਤਂ [ਜਰਿਕਂ (ਸ੍ਯਾ. ਕ.)] ਮਤਂ.

੧੫੬. ‘‘ਤਾਯੋ ਦਿਸ੍ਵਾ ਸੁਸਂਵਿਗ੍ਗਾ, ਵਿਰਤ੍ਤਾਸੇ ਕਲ਼ੇਵਰੇ;

ਅਟ੍ਠਾਸਿਂ ਭਵਨਿਬ੍ਬਿਨ੍ਦਾ, ਤਦਾ ਮਂ ਆਹ ਨਾਯਕੋ.

੧੫੭. ‘‘‘ਆਤੁਰਂ ਅਸੁਚਿਂ ਪੂਤਿਂ, ਪਸ੍ਸ ਨਨ੍ਦੇ ਸਮੁਸ੍ਸਯਂ;

ਉਗ੍ਘਰਨ੍ਤਂ ਪਗ੍ਘਰਨ੍ਤਂ, ਬਾਲਾਨਂ ਅਭਿਨਨ੍ਦਿਤਂ.

੧੫੮. ‘‘‘ਅਸੁਭਾਯ ਚਿਤ੍ਤਂ ਭਾਵੇਹਿ, ਏਕਗ੍ਗਂ ਸੁਸਮਾਹਿਤਂ;

ਯਥਾ ਇਦਂ ਤਥਾ ਏਤਂ, ਯਥਾ ਏਤਂ ਤਥਾ ਇਦਂ.

੧੫੯. ‘‘‘ਏਵਮੇਤਂ ਅਵੇਕ੍ਖਨ੍ਤੀ, ਰਤ੍ਤਿਨ੍ਦਿਵਮਤਨ੍ਦਿਤਾ;

ਤਤੋ ਸਕਾਯ ਪਞ੍ਞਾਯ, ਅਭਿਨਿਬ੍ਬਿਜ੍ਝ ਵਚ੍ਛਸਿ’.

੧੬੦. ‘‘ਤਸ੍ਸਾ ਮੇ ਅਪ੍ਪਮਤ੍ਤਾਯ, ਵਿਚਰਨ੍ਤਿਯਾ [ਵਿਚਰਨ੍ਤ੍ਵਾਧ (ਸੀ.), ਵਿਚਿਨਨ੍ਤੀਧ (ਸ੍ਯਾ. ਪੀ.)] ਯੋਨਿਸੋ;

ਯਥਾਭੂਤਂ ਅਯਂ ਕਾਯੋ, ਦਿਟ੍ਠੋ ਸਨ੍ਤਰਬਾਹਿਰੋ.

੧੬੧. ‘‘ਅਥ ਨਿਬ੍ਬਿਨ੍ਦਹਂ ਕਾਯੇ, ਅਜ੍ਝਤ੍ਤਞ੍ਚ ਵਿਰਜ੍ਜਹਂ;

ਅਪ੍ਪਮਤ੍ਤਾ ਵਿਸਂਯੁਤ੍ਤਾ, ਉਪਸਨ੍ਤਾਮ੍ਹਿ ਨਿਬ੍ਬੁਤਾ.

੧੬੨. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

੧੬੩. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੬੪. ‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮਮ ਮਹਾਵੀਰ, ਉਪ੍ਪਨ੍ਨਂ ਤਵ ਸਨ੍ਤਿਕੇ.

੧੬੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੧੬੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੬੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਅਭਿਰੂਪਨਨ੍ਦਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਭਿਰੂਪਨਨ੍ਦਾਥੇਰਿਯਾਪਦਾਨਂ ਛਟ੍ਠਂ.