੪. ਸਿਙ੍ਗਾਲਮਾਤੁਥੇਰੀਅਪਦਾਨਂ

੮੨. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੮੩. ‘‘ਤਦਾਹਂ ਹਂਸਵਤਿਯਂ, ਜਾਤਾਮਚ੍ਚਕੁਲੇ ਅਹੁਂ;

ਨਾਨਾਰਤਨਪਜ੍ਜੋਤੇ, ਇਦ੍ਧੇ ਫੀਤੇ ਮਹਦ੍ਧਨੇ.

੮੪. ‘‘ਪਿਤੁਨਾ ਸਹ ਗਨ੍ਤ੍ਵਾਨ, ਮਹਾਜਨਪੁਰਕ੍ਖਤਾ;

ਧਮ੍ਮਂ ਬੁਦ੍ਧਸ੍ਸ ਸੁਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

੮੫. ‘‘ਪਬ੍ਬਜਿਤ੍ਵਾਨ ਕਾਯੇਨ, ਪਾਪਕਮ੍ਮਂ ਵਿਵਜ੍ਜਯਿਂ;

ਵਚੀਦੁਚ੍ਚਰਿਤਂ ਹਿਤ੍ਵਾ, ਆਜੀਵਂ ਪਰਿਸੋਧਯਿਂ.

੮੬. ‘‘ਬੁਦ੍ਧੇ ਪਸਨ੍ਨਾ ਧਮ੍ਮੇ ਚ, ਸਙ੍ਘੇ ਚ ਤਿਬ੍ਬਗਾਰਵਾ;

ਸਦ੍ਧਮ੍ਮਸ੍ਸਵਨੇ ਯੁਤ੍ਤਾ, ਬੁਦ੍ਧਦਸ੍ਸਨਲਾਲਸਾ [ਬੁਦ੍ਧਦਸ੍ਸਨਸਾਲਯਾ (ਸ੍ਯਾ.)].

੮੭. ‘‘ਅਗ੍ਗਂ ਸਦ੍ਧਾਧਿਮੁਤ੍ਤਾਨਂ, ਅਸ੍ਸੋਸਿਂ ਭਿਕ੍ਖੁਨਿਂ ਤਦਾ;

ਤਂ ਠਾਨਂ ਪਤ੍ਥਯਿਤ੍ਵਾਨ, ਤਿਸ੍ਸੋ ਸਿਕ੍ਖਾ ਅਪੂਰਯਿਂ.

੮੮. ‘‘ਤਤੋ ਮਂ ਸੁਗਤੋ ਆਹ, ਕਰੁਣਾਨੁਗਤਾਸਯੋ;

‘ਯਸ੍ਸ ਸਦ੍ਧਾ ਤਥਾਗਤੇ, ਅਚਲਾ ਸੁਪ੍ਪਤਿਟ੍ਠਿਤਾ;

ਸੀਲਞ੍ਚ ਯਸ੍ਸ ਕਲ੍ਯਾਣਂ, ਅਰਿਯਕਨ੍ਤਂ ਪਸਂਸਿਤਂ.

੮੯. ‘‘‘ਸਙ੍ਘੇ ਪਸਾਦੋ ਯਸ੍ਸਤ੍ਥਿ, ਉਜੁਭੂਤਞ੍ਚ ਦਸ੍ਸਨਂ;

ਅਦਲਿਦ੍ਦੋਤਿ ਤਂ ਆਹੁ, ਅਮੋਘਂ ਤਸ੍ਸ ਜੀਵਿਤਂ.

੯੦. ‘‘‘ਤਸ੍ਮਾ ਸਦ੍ਧਞ੍ਚ ਸੀਲਞ੍ਚ, ਪਸਾਦਂ ਧਮ੍ਮਦਸ੍ਸਨਂ;

ਅਨੁਯੁਞ੍ਜੇਥ ਮੇਧਾਵੀ, ਸਰਂ ਬੁਦ੍ਧਾਨ [ਬੁਦ੍ਧਾਨੁਸਾਸਨਂ (ਸੀ.), ਬੁਦ੍ਧਾਨਂ ਸਾਸਨਂ (ਸ੍ਯਾ.)] ਸਾਸਨਂ’.

੯੧. ‘‘ਤਂ ਸੁਤ੍ਵਾਹਂ ਪਮੁਦਿਤਾ, ਅਪੁਚ੍ਛਿਂ ਪਣਿਧਿਂ ਮਮ;

ਤਦਾ ਅਨੋਮੋ ਅਮਿਤੋ, ਬ੍ਯਾਕਰਿਤ੍ਥ ਵਿਨਾਯਕੋ;

‘ਬੁਦ੍ਧੇ ਪਸਨ੍ਨਾ ਕਲ੍ਯਾਣੀ, ਲਚ੍ਛਸੇ ਤਂ ਸੁਪਤ੍ਥਿਤਂ.

੯੨. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੯੩. ‘‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਸਿਙ੍ਗਾਲਕਸ੍ਸ [ਸਿਗਾਲਕਸ੍ਸ (ਸੀ. ਪੀ.)] ਮਾਤਾਤਿ, ਹੇਸ੍ਸਤਿ ਸਤ੍ਥੁ ਸਾਵਿਕਾ’.

੯੪. ‘‘ਤਂ ਸੁਤ੍ਵਾ ਮੁਦਿਤਾ ਹੁਤ੍ਵਾ, ਯਾਵਜੀਵਂ ਤਦਾ ਜਿਨਂ;

ਮੇਤ੍ਤਚਿਤ੍ਤਾ ਪਰਿਚਰਿਂ, ਪਟਿਪਤ੍ਤੀਹਿ ਨਾਯਕਂ.

੯੫. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੯੬. ‘‘ਪਚ੍ਛਿਮੇ ਚ ਭਵੇ ਦਾਨਿ, ਗਿਰਿਬ੍ਬਜਪੁਰੁਤ੍ਤਮੇ;

ਜਾਤਾ ਸੇਟ੍ਠਿਕੁਲੇ ਫੀਤੇ, ਮਹਾਰਤਨਸਞ੍ਚਯੇ.

੯੭. ‘‘ਪੁਤ੍ਤੋ ਸਿਙ੍ਗਾਲਕੋ ਨਾਮ, ਮਮਾਸਿ ਵਿਪਥੇ ਰਤੋ;

ਦਿਟ੍ਠਿਗਹਨਪਕ੍ਖਨ੍ਦੋ, ਦਿਸਾਪੂਜਨਤਪ੍ਪਰੋ.

੯੮. ‘‘ਨਾਨਾਦਿਸਾ ਨਮਸ੍ਸਨ੍ਤਂ [ਨਮਸ੍ਸਤਿ (ਸ੍ਯਾ.)], ਪਿਣ੍ਡਾਯ ਨਗਰਂ ਵਜਂ;

ਤਂ ਦਿਸ੍ਵਾ ਓਵਦੀ ਬੁਦ੍ਧੋ, ਮਗ੍ਗੇ ਠਤ੍ਵਾ ਵਿਨਾਯਕੋ.

੯੯. ‘‘ਤਸ੍ਸ ਦੇਸਯਤੋ ਧਮ੍ਮਂ, ਪਨਾਦੋ ਵਿਮ੍ਹਯੋ ਅਹੁ;

ਦ੍ਵੇਕੋਟਿਨਰਨਾਰੀਨਂ, ਧਮ੍ਮਾਭਿਸਮਯੋ ਅਹੁ.

੧੦੦. ‘‘ਤਦਾਹਂ ਪਰਿਸਂ ਗਨ੍ਤ੍ਵਾ, ਸੁਤ੍ਵਾ ਸੁਗਤਭਾਸਿਤਂ;

ਸੋਤਾਪਤ੍ਤਿਫਲਂ ਪਤ੍ਤਾ, ਪਬ੍ਬਜਿਂ ਅਨਗਾਰਿਯਂ.

੧੦੧. ‘‘ਨ ਚਿਰੇਨੇਵ ਕਾਲੇਨ, ਬੁਦ੍ਧਦਸ੍ਸਨਲਾਲਸਾ;

ਅਨੁਸ੍ਸਤਿਂ ਤਂ ਭਾਵੇਤ੍ਵਾ, ਅਰਹਤ੍ਤਮਪਾਪੁਣਿਂ.

੧੦੨. ‘‘ਦਸ੍ਸਨਤ੍ਥਾਯ ਬੁਦ੍ਧਸ੍ਸ, ਸਬ੍ਬਦਾ ਚ ਵਜਾਮਹਂ;

ਅਤਿਤ੍ਤਾਯੇਵ ਪਸ੍ਸਾਮਿ, ਰੂਪਂ ਨਯਨਨਨ੍ਦਨਂ.

੧੦੩. ‘‘ਸਬ੍ਬਪਾਰਮਿਸਮ੍ਭੂਤਂ, ਲਕ੍ਖੀਨਿਲਯਨਂ ਵਰਂ;

ਰੂਪਂ ਸਬ੍ਬਸੁਭਾਕਿਣ੍ਣਂ, ਅਤਿਤ੍ਤਾ ਵਿਹਰਾਮਹਂ.

੧੦੪. ‘‘ਜਿਨੋ ਤਸ੍ਮਿਂ ਗੁਣੇ ਤੁਟ੍ਠੋ, ਏਤਦਗ੍ਗੇ ਠਪੇਸਿ ਮਂ;

ਸਿਙ੍ਗਾਲਕਸ੍ਸ ਯਾ ਮਾਤਾ, ਅਗ੍ਗਾ ਸਦ੍ਧਾਧਿਮੁਤ੍ਤਿਕਾ [ਸਂਘਵਿਮੁਤ੍ਤਿਕਾ (ਪੀ.), ਮਮਾਧਿਮੁਤ੍ਤਿਕਾ (ਕ.)].

੧੦੫. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨਿ.

੧੦੬. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੦੭. ‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮਮ ਮਹਾਵੀਰ, ਉਪ੍ਪਨ੍ਨਂ ਤਵ ਸਨ੍ਤਿਕੇ.

੧੦੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੧੦੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਸਿਙ੍ਗਾਲਮਾਤਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਿਙ੍ਗਾਲਮਾਤੁਥੇਰਿਯਾਪਦਾਨਂ ਚਤੁਤ੍ਥਂ.