੩. ਉਪ੍ਪਲਦਾਯਿਕਾਥੇਰੀਅਪਦਾਨਂ

੫੭. ‘‘ਨਗਰੇ ਅਰੁਣਵਤਿਯਾ, ਅਰੁਣੋ ਨਾਮ ਖਤ੍ਤਿਯੋ;

ਤਸ੍ਸ ਰਞ੍ਞੋ ਅਹੁਂ ਭਰਿਯਾ, ਏਕਜ੍ਝਂ ਚਾਰਯਾਮਹਂ.

੫੮. ‘‘ਰਹੋਗਤਾ ਨਿਸੀਦਿਤ੍ਵਾ, ਏਵਂ ਚਿਨ੍ਤੇਸਹਂ ਤਦਾ;

‘ਕੁਸਲਂ ਮੇ ਕਤਂ ਨਤ੍ਥਿ, ਆਦਾਯ ਗਮਿਯਂ ਮਮ.

੫੯. ‘‘‘ਮਹਾਭਿਤਾਪਂ ਕਟੁਕਂ, ਘੋਰਰੂਪਂ ਸੁਦਾਰੁਣਂ;

ਨਿਰਯਂ ਨੂਨ ਗਚ੍ਛਾਮਿ, ਏਤ੍ਥ ਮੇ ਨਤ੍ਥਿ ਸਂਸਯੋ’.

੬੦. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਪਹਂਸੇਤ੍ਵਾਨ ਮਾਨਸਂ;

ਰਾਜਾਨਂ ਉਪਗਨ੍ਤ੍ਵਾਨ, ਇਦਂ ਵਚਨਮਬ੍ਰਵਿਂ.

੬੧. ‘‘‘ਇਤ੍ਥੀ ਨਾਮ ਮਯਂ ਦੇਵ, ਪੁਰਿਸਾਨਿਤ੍ਤਰਾ ਅਹੁ [ਪੁਰਿਸਾਨੁਗਤਾ ਸਦਾ (ਸੀ.), ਪੁਰਿਸਾ ਨ ਭਵਾਮ ਨੋ (ਸ੍ਯਾ.), ਪੁਰਿਸਾਨਂ ਭਰਾ ਮਯਂ (ਪੀ.)];

ਏਕਂ ਮੇ ਸਮਣਂ ਦੇਹਿ, ਭੋਜਯਿਸ੍ਸਾਮਿ ਖਤ੍ਤਿਯ’.

੬੨. ‘‘ਅਦਾਸਿ ਮੇ ਤਦਾ ਰਾਜਾ, ਸਮਣਂ ਭਾਵਿਤਿਨ੍ਦ੍ਰਿਯਂ;

ਤਸ੍ਸ ਪਤ੍ਤਂ ਗਹੇਤ੍ਵਾਨ, ਪਰਮਨ੍ਨੇਨ ਪੂਰਯਿਂ.

੬੩. ‘‘ਪੂਰੇਤ੍ਵਾ ਪਰਮਂ ਅਨ੍ਨਂ, ਸਹ ਸੁਗਨ੍ਧਲੇਪਨਂ;

ਮਹਾਚੇਲੇਨ ਛਾਦਿਤ੍ਵਾ, ਅਦਾਸਿਂ ਤੁਟ੍ਠਮਾਨਸਾ.

੬੪. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੬੫. ‘‘ਸਹਸ੍ਸਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਹਸ੍ਸਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

੬੬. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਨਾਨਾਵਿਧਂ ਬਹੁਂ ਅਞ੍ਞਂ, ਤਸ੍ਸ ਕਮ੍ਮਫਲਂ ਤਤੋ.

੬੭. ‘‘ਉਪ੍ਪਲਸ੍ਸੇਵ ਮੇ ਵਣ੍ਣੋ, ਅਭਿਰੂਪਾ ਸੁਦਸ੍ਸਨਾ;

ਇਤ੍ਥਿਸਬ੍ਬਙ੍ਗਸਮ੍ਪਨ੍ਨਾ, ਅਭਿਜਾਤਾ ਜੁਤਿਨ੍ਧਰਾ.

੬੮. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਅਜਾਯਿਂ ਸਾਕਿਯੇ ਕੁਲੇ;

ਨਾਰੀਸਹਸ੍ਸਪਾਮੋਕ੍ਖਾ, ਸੁਦ੍ਧੋਦਨਸੁਤਸ੍ਸਹਂ.

੬੯. ‘‘ਨਿਬ੍ਬਿਨ੍ਦਿਤ੍ਵਾ ਅਗਾਰੇਹਂ, ਪਬ੍ਬਜਿਂ ਅਨਗਾਰਿਯਂ;

ਸਤ੍ਤਮੀਰਤ੍ਤਿਸਮ੍ਪਤ੍ਤਾ [ਸਤ੍ਤਮਿਂਰਤ੍ਤਿਮਪਤ੍ਤਾ (ਸੀ. ਸ੍ਯਾ. ਪੀ.)], ਚਤੁਸਚ੍ਚਮਪਾਪੁਣਿਂ.

੭੦. ‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਪਰਿਮੇਤੁਂ ਨ ਸਕ੍ਕੋਮਿ, ਪਿਣ੍ਡਪਾਤਸ੍ਸਿਦਂ ਫਲਂ.

੭੧. ‘‘ਯਂ ਮਯ੍ਹਂ ਪੂਰਿਤਂ ਕਮ੍ਮਂ, ਕੁਸਲਂ ਸਰਸੇ ਮੁਨਿ;

ਤੁਯ੍ਹਤ੍ਥਾਯ ਮਹਾਵੀਰ, ਪਰਿਚਤ੍ਤਂ ਬਹੁਂ ਮਯਾ.

੭੨. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਿਣ੍ਡਪਾਤਸ੍ਸਿਦਂ ਫਲਂ.

੭੩. ‘‘ਦ੍ਵੇ ਗਤਿਯੋ ਪਜਾਨਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਅਞ੍ਞਂ ਗਤਿਂ ਨ ਜਾਨਾਮਿ, ਪਿਣ੍ਡਪਾਤਸ੍ਸਿਦਂ ਫਲਂ.

੭੪. ‘‘ਉਚ੍ਚੇ ਕੁਲੇ ਪਜਾਯਾਮਿ, ਮਹਾਸਾਲੇ [ਤਯੋ ਸਾਲ (ਕ.)] ਮਹਦ੍ਧਨੇ;

ਅਞ੍ਞੇ ਕੁਲੇ ਨ ਜਾਯਾਮਿ, ਪਿਣ੍ਡਪਾਤਸ੍ਸਿਦਂ ਫਲਂ.

੭੫. ‘‘ਭਵਾਭਵੇ ਸਂਸਰਿਤ੍ਵਾ, ਸੁਕ੍ਕਮੂਲੇਨ ਚੋਦਿਤਾ;

ਅਮਨਾਪਂ ਨ ਪਸ੍ਸਾਮਿ, ਸੋਮਨਸ੍ਸਕਤਂ ਫਲਂ.

੭੬. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

੭੭. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੭੮. ‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮਮ ਮਹਾਵੀਰ, ਉਪ੍ਪਨ੍ਨਂ ਤਵ ਸਨ੍ਤਿਕੇ.

੭੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੮੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੮੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਉਪ੍ਪਲਦਾਯਿਕਾ ਭਿਕ੍ਖੁਨੀ ਭਗਵਤੋ ਸਮ੍ਮੁਖਾ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਪ੍ਪਲਦਾਯਿਕਾਥੇਰਿਯਾਪਦਾਨਂ ਤਤਿਯਂ.