੯. ਉਪ੍ਪਲਵਣ੍ਣਾਥੇਰੀਅਪਦਾਨਂ

੩੮੪. ‘‘ਭਿਕ੍ਖੁਨੀ ਉਪ੍ਪਲਵਣ੍ਣਾ, ਇਦ੍ਧਿਯਾ ਪਾਰਮਿਂ ਗਤਾ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਇਦਂ ਵਚਨਮਬ੍ਰਵਿ.

੩੮੫. ‘‘‘ਨਿਤ੍ਥਿਣ੍ਣਾ ਜਾਤਿਸਂਸਾਰਂ [ਜਾਤਿਸਂਸਾਰਾ (ਪੀ.)], ਪਤ੍ਤਾਹਂ ਅਚਲਂ ਪਦਂ;

ਸਬ੍ਬਦੁਕ੍ਖਂ ਮਯਾ ਖੀਣਂ, ਆਰੋਚੇਮਿ ਮਹਾਮੁਨਿ.

੩੮੬. ‘‘‘ਯਾਵਤਾ ਪਰਿਸਾ ਅਤ੍ਥਿ, ਪਸਨ੍ਨਾ ਜਿਨਸਾਸਨੇ;

ਯਸ੍ਸਾ ਚ ਮੇਪਰਾਧੋਤ੍ਥਿ, ਖਮਨ੍ਤੁ ਜਿਨਸਮ੍ਮੁਖਾ.

੩੮੭. ‘‘‘ਸਂਸਾਰੇ ਸਂਸਰਨ੍ਤਿਯਾ [ਸਂਸਰਨ੍ਤਾ ਮੇ (ਸ੍ਯਾ.)], ਖਲਿਤਂ ਮੇ ਸਚੇ ਭਵੇ;

ਆਰੋਚੇਮਿ ਮਹਾਵੀਰ, ਅਪਰਾਧਂ ਖਮਸ੍ਸੁ ਤਂ [ਮੇ (ਸ੍ਯਾ.)].

੩੮੮. ‘‘‘ਇਦ੍ਧਿਞ੍ਚਾਪਿ ਨਿਦਸ੍ਸੇਹਿ, ਮਮ ਸਾਸਨਕਾਰਿਕੇ;

ਚਤਸ੍ਸੋ ਪਰਿਸਾ ਅਜ੍ਜ, ਕਙ੍ਖਂ ਛਿਨ੍ਦਾਹਿ ਯਾਵਤਾ.

੩੮੯. ‘‘‘ਧੀਤਾ ਤੁਯ੍ਹਂ ਮਹਾਵੀਰ, ਪਞ੍ਞਵਨ੍ਤ ਜੁਤਿਨ੍ਧਰ;

ਬਹੁਞ੍ਚ ਦੁਕ੍ਕਰਂ ਕਮ੍ਮਂ, ਕਤਂ ਮੇ ਅਤਿਦੁਕ੍ਕਰਂ.

੩੯੦. ‘‘‘ਉਪ੍ਪਲਸ੍ਸੇਵ ਮੇ ਵਣ੍ਣੋ, ਨਾਮੇਨੁਪ੍ਪਲਨਾਮਿਕਾ;

ਸਾਵਿਕਾ ਤੇ ਮਹਾਵੀਰ, ਪਾਦੇ ਵਨ੍ਦਾਮਿ ਚਕ੍ਖੁਮ.

੩੯੧. ‘‘‘ਰਾਹੁਲੋ ਚ ਅਹਞ੍ਚੇਵ, ਨੇਕਜਾਤਿਸਤੇ ਬਹੂ;

ਏਕਸ੍ਮਿਂ ਸਮ੍ਭਵੇ ਜਾਤਾ, ਸਮਾਨਛਨ੍ਦਮਾਨਸਾ.

੩੯੨. ‘‘‘ਨਿਬ੍ਬਤ੍ਤਿ ਏਕਤੋ ਹੋਤਿ, ਜਾਤਿਯਾਪਿ ਚ ਏਕਤੋ [ਜਾਤੀਸੁ ਬਹੁਸੋ ਮਮ (ਸੀ.)];

ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਉਭੋਪਿ ਨਾਨਾਸਮ੍ਭਵਾ.

੩੯੩. ‘‘‘ਪੁਤ੍ਤੋ ਚ ਰਾਹੁਲੋ ਨਾਮ, ਧੀਤਾ ਉਪ੍ਪਲਸਵ੍ਹਯਾ;

ਪਸ੍ਸ ਵੀਰ ਮਮਂ ਇਦ੍ਧਿਂ, ਬਲਂ ਦਸ੍ਸੇਮਿ ਸਤ੍ਥੁਨੋ.

੩੯੪. ‘‘‘ਮਹਾਸਮੁਦ੍ਦੇ ਚਤੁਰੋ, ਪਕ੍ਖਿਪਿ ਹਤ੍ਥਪਾਤਿਯਂ;

ਤੇਲਂ ਹਤ੍ਥਗਤਞ੍ਚੇਵ, ਖਿਡ੍ਡੋ [ਵੇਜ੍ਜੋ (ਸੀ. ਪੀ.)] ਕੋਮਾਰਕੋ ਯਥਾ.

੩੯੫. ‘‘‘ਉਬ੍ਬਤ੍ਤਯਿਤ੍ਵਾ ਪਥਵਿਂ, ਪਕ੍ਖਿਪਿ ਹਤ੍ਥਪਾਤਿਯਂ;

ਚਿਤ੍ਤਂ ਮੁਞ੍ਜਂ ਯਥਾ ਨਾਮ, ਲੁਞ੍ਚਿ ਕੋਮਾਰਕੋ ਯੁਵਾ.

੩੯੬. ‘‘‘ਚਕ੍ਕਵਾਲ਼ਸਮਂ ਪਾਣਿਂ, ਛਾਦਯਿਤ੍ਵਾਨ ਮਤ੍ਥਕੇ;

ਵਸ੍ਸਾਪੇਤ੍ਵਾਨ ਫੁਸਿਤਂ, ਨਾਨਾਵਣ੍ਣਂ ਪੁਨਪ੍ਪੁਨਂ.

੩੯੭. ‘‘‘ਭੂਮਿਂ ਉਦੁਕ੍ਖਲਂ ਕਤ੍ਵਾ, ਧਞ੍ਞਂ ਕਤ੍ਵਾਨ ਸਕ੍ਖਰਂ;

ਸਿਨੇਰੁਂ ਮੁਸਲਂ ਕਤ੍ਵਾ, ਮਦ੍ਦਿ ਕੋਮਾਰਿਕਾ ਯਥਾ.

੩੯੮. ‘‘‘ਧੀਤਾਹਂ ਬੁਦ੍ਧਸੇਟ੍ਠਸ੍ਸ, ਨਾਮੇਨੁਪ੍ਪਲਸਵ੍ਹਯਾ;

ਅਭਿਞ੍ਞਾਸੁ ਵਸੀਭੂਤਾ, ਤਵ ਸਾਸਨਕਾਰਿਕਾ.

੩੯੯. ‘‘‘ਨਾਨਾਵਿਕੁਬ੍ਬਨਂ ਕਤ੍ਵਾ, ਦਸ੍ਸੇਤ੍ਵਾ ਲੋਕਨਾਯਕਂ;

ਨਾਮਗੋਤ੍ਤਞ੍ਚ ਸਾਵੇਤ੍ਵਾ [ਪਕਾਸੇਤ੍ਵਾ (ਸ੍ਯਾ.)], ਪਾਦੇ ਵਨ੍ਦਾਮਿ ਚਕ੍ਖੁਮ.

੪੦੦. ‘‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

੪੦੧. ‘‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੪੦੨. ‘‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮੇ ਵਿਮਲਂ [ਵਿਪੁਲਂ (ਸ੍ਯਾ.)] ਸੁਦ੍ਧਂ, ਸਭਾਵੇਨ ਮਹੇਸਿਨੋ.

੪੦੩. ‘‘‘ਪੁਰਿਮਾਨਂ ਜਿਨਗ੍ਗਾਨਂ, ਸਙ੍ਗਮਂ ਤੇ ਨਿਦਸ੍ਸਿਤਂ [ਸਮ੍ਮੁਖਾ ਚ ਪਰਮ੍ਮੁਖਾ (ਸੀ.)];

ਅਧਿਕਾਰਂ ਬਹੁਂ ਮਯ੍ਹਂ, ਤੁਯ੍ਹਤ੍ਥਾਯ ਮਹਾਮੁਨਿ.

੪੦੪. ‘‘‘ਯਂ ਮਯਾ ਪੂਰਿਤਂ ਕਮ੍ਮਂ, ਕੁਸਲਂ ਸਰ ਮੇ ਮੁਨਿ;

ਤਵਤ੍ਥਾਯ ਮਹਾਵੀਰ, ਪੁਞ੍ਞਂ ਉਪਚਿਤਂ ਮਯਾ.

੪੦੫. ‘‘‘ਅਭਬ੍ਬਟ੍ਠਾਨੇ ਵਜ੍ਜੇਤ੍ਵਾ, ਵਾਰਯਨ੍ਤੀ [ਪਰਿਵਜ੍ਜਨ੍ਤਿ (ਸੀ.), ਪਰਿਪਾਚੇਨ੍ਤੋ (ਸ੍ਯਾ.)] ਅਨਾਚਰਂ;

ਤਵਤ੍ਥਾਯ ਮਹਾਵੀਰ, ਚਤ੍ਤਂ ਮੇ ਜੀਵਿਤੁਤ੍ਤਮਂ.

੪੦੬. ‘‘‘ਦਸਕੋਟਿਸਹਸ੍ਸਾਨਿ, ਅਦਾਸਿਂ ਮਮ ਜੀਵਿਤਂ;

ਪਰਿਚ੍ਚਤ੍ਤਾ ਚ ਮੇ ਹੋਮਿ, ਤਵਤ੍ਥਾਯ ਮਹਾਮੁਨਿ.

੪੦੭. ‘‘‘ਤਦਾਤਿਵਿਮ੍ਹਿਤਾ ਸਬ੍ਬਾ, ਸਿਰਸਾਵ ਕਤਞ੍ਜਲੀ;

ਅਵੋਚਯ੍ਯੇ ਕਥਂ ਆਸਿ, ਅਤੁਲਿਦ੍ਧਿਪਰਕ੍ਕਮਾ’.

੪੦੮. ‘‘ਸਤਸਹਸ੍ਸਿਤੋ ਕਪ੍ਪੇ, ਨਾਗਕਞ੍ਞਾ ਅਹਂ ਤਦਾ;

ਵਿਮਲਾ ਨਾਮ ਨਾਮੇਨ, ਕਞ੍ਞਾਨਂ ਸਾਧੁਸਮ੍ਮਤਾ.

੪੦੯. ‘‘ਮਹੋਰਗੋ ਮਹਾਨਾਗੋ, ਪਸਨ੍ਨੋ ਜਿਨਸਾਸਨੇ;

ਪਦੁਮੁਤ੍ਤਰਂ ਮਹਾਤੇਜਂ, ਨਿਮਨ੍ਤੇਸਿ ਸਸਾਵਕਂ.

੪੧੦. ‘‘ਰਤਨਮਯਂ ਮਣ੍ਡਪਂ, ਪਲ੍ਲਙ੍ਕਂ ਰਤਨਾਮਯਂ;

ਰਤਨਂ ਵਾਲੁਕਾਕਿਣ੍ਣਂ, ਉਪਭੋਗਂ ਰਤਨਾਮਯਂ.

੪੧੧. ‘‘ਮਗ੍ਗਞ੍ਚ ਪਟਿਯਾਦੇਸਿ, ਰਤਨਦ੍ਧਜਭੂਸਿਤਂ;

ਪਚ੍ਚੁਗ੍ਗਨ੍ਤ੍ਵਾਨ ਸਮ੍ਬੁਦ੍ਧਂ, ਵਜ੍ਜਨ੍ਤੋ ਤੂਰਿਯੇਹਿ ਸੋ.

੪੧੨. ‘‘ਪਰਿਸਾਹਿ ਚ ਚਤੂਹਿ [ਪਰਿਸਾਹਿ ਚਤੂਹਿ ਸੋ (ਸੀ.), ਪਰਿਸਾਹਿ ਚਤਸ੍ਸੋ ਹਿ (ਪੀ.)], ਪਰਿਵੁਤੋ [ਸਹਿਤੋ (ਸੀ.), ਫਰਤੇ (ਸ੍ਯਾ.), ਪਰੇਤੋ (ਪੀ.)] ਲੋਕਨਾਯਕੋ;

ਮਹੋਰਗਸ੍ਸ ਭਵਨੇ, ਨਿਸੀਦਿ ਪਰਮਾਸਨੇ.

੪੧੩. ‘‘ਅਨ੍ਨਂ ਪਾਨਂ ਖਾਦਨੀਯਂ, ਭੋਜਨਞ੍ਚ ਮਹਾਰਹਂ;

ਵਰਂ ਵਰਞ੍ਚ ਪਾਦਾਸਿ, ਨਾਗਰਾਜਾ ਮਹਾਯਸਂ.

੪੧੪. ‘‘ਭੁਞ੍ਜਿਤ੍ਵਾਨ ਸਮ੍ਬੁਦ੍ਧੋ, ਪਤ੍ਤਂ ਧੋਵਿਤ੍ਵਾ ਯੋਨਿਸੋ;

ਅਨੁਮੋਦਨੀਯਂਕਾਸਿ, ਨਾਗਕਞ੍ਞਾ ਮਹਿਦ੍ਧਿਕਾ.

੪੧੫. ‘‘ਸਬ੍ਬਞ੍ਞੁਂ ਫੁਲ੍ਲਿਤਂ ਦਿਸ੍ਵਾ, ਨਾਗਕਞ੍ਞਾ ਮਹਾਯਸਂ;

ਪਸਨ੍ਨਂ ਸਤ੍ਥੁਨੋ ਚਿਤ੍ਤਂ, ਸੁਨਿਬਨ੍ਧਞ੍ਚ ਮਾਨਸਂ.

੪੧੬. ‘‘ਮਮਞ੍ਚ ਚਿਤ੍ਤਮਞ੍ਞਾਯ, ਜਲਜੁਤ੍ਤਮਨਾਮਕੋ;

ਤਸ੍ਮਿਂ ਖਣੇ ਮਹਾਵੀਰੋ, ਭਿਕ੍ਖੁਨਿਂ ਦਸ੍ਸਯਿਦ੍ਧਿਯਾ.

੪੧੭. ‘‘ਇਦ੍ਧੀ ਅਨੇਕਾ ਦਸ੍ਸੇਸਿ, ਭਿਕ੍ਖੁਨੀ ਸਾ ਵਿਸਾਰਦਾ;

ਪਮੋਦਿਤਾ ਵੇਦਜਾਤਾ, ਸਤ੍ਥਾਰਂ ਇਦਮਬ੍ਰਵਿ [ਏਤਦਬ੍ਰਵਿਂ (ਸ੍ਯਾ. ਪੀ.)].

੪੧੮. ‘‘‘ਅਦ੍ਦਸਾਹਂ ਇਮਂ ਇਦ੍ਧਿਂ, ਸੁਮਨਂ ਇਤਰਾਯਪਿ;

ਕਥਂ ਅਹੋਸਿ ਸਾ ਵੀਰ, ਇਦ੍ਧਿਯਾ ਸੁਵਿਸਾਰਦਾ’.

੪੧੯. ‘‘‘ਓਰਸਾ ਮੁਖਤੋ ਜਾਤਾ, ਧੀਤਾ ਮਮ ਮਹਿਦ੍ਧਿਕਾ;

ਮਮਾਨੁਸਾਸਨਿਕਰਾ, ਇਦ੍ਧਿਯਾ ਸੁਵਿਸਾਰਦਾ’.

੪੨੦. ‘‘ਬੁਦ੍ਧਸ੍ਸ ਵਚਨਂ ਸੁਤ੍ਵਾ, ਏਵਂ ਪਤ੍ਥੇਸਹਂ ਤਦਾ [ਤੁਟ੍ਠਾ ਏਵਂ ਅਵੋਚਹਂ (ਸ੍ਯਾ.), ਏਵਮਹੋਸਹਂ ਤਦਾ (ਕ.)];

ਅਹਮ੍ਪਿ ਤਾਦਿਸਾ ਹੋਮਿ, ਇਦ੍ਧਿਯਾ ਸੁਵਿਸਾਰਦਾ.

੪੨੧. ‘‘ਪਮੋਦਿਤਾਹਂ ਸੁਮਨਾ, ਪਤ੍ਥੇ ਉਤ੍ਤਮਮਾਨਸਾ [ਪਤ੍ਤਉਤ੍ਤਮਮਾਨਸਾ (ਸੀ. ਸ੍ਯਾ. ਪੀ.)];

ਅਨਾਗਤਮ੍ਹਿ ਅਦ੍ਧਾਨੇ, ਈਦਿਸਾ ਹੋਮਿ ਨਾਯਕ.

੪੨੨. ‘‘ਮਣਿਮਯਮ੍ਹਿ ਪਲ੍ਲਙ੍ਕੇ, ਮਣ੍ਡਪਮ੍ਹਿ ਪਭਸ੍ਸਰੇ;

ਅਨ੍ਨਪਾਨੇਨ ਤਪ੍ਪੇਤ੍ਵਾ, ਸਸਙ੍ਘਂ ਲੋਕਨਾਯਕਂ.

੪੨੩. ‘‘ਨਾਗਾਨਂ ਪਵਰਂ ਪੁਪ੍ਫਂ, ਅਰੁਣਂ ਨਾਮ ਉਪ੍ਪਲਂ;

ਵਣ੍ਣਂ ਮੇ ਈਦਿਸਂ ਹੋਤੁ, ਪੂਜੇਸਿਂ ਲੋਕਨਾਯਕਂ.

੪੨੪. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੪੨੫. ‘‘ਤਤੋ ਚੁਤਾਹਂ ਮਨੁਜੇ, ਉਪਪਨ੍ਨਾ ਸਯਮ੍ਭੁਨੋ;

ਉਪ੍ਪਲੇਹਿ ਪਟਿਚ੍ਛਨ੍ਨਂ, ਪਿਣ੍ਡਪਾਤਮਦਾਸਹਂ.

੪੨੬. ‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਨਾਮ ਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ.

੪੨੭. ‘‘ਸੇਟ੍ਠਿਧੀਤਾ ਤਦਾ ਹੁਤ੍ਵਾ, ਬਾਰਾਣਸਿਪੁਰੁਤ੍ਤਮੇ;

ਨਿਮਨ੍ਤੇਤ੍ਵਾਨ ਸਮ੍ਬੁਦ੍ਧਂ, ਸਸਙ੍ਘਂ ਲੋਕਨਾਯਕਂ.

੪੨੮. ‘‘ਮਹਾਦਾਨਂ ਦਦਿਤ੍ਵਾਨ, ਉਪ੍ਪਲੇਹਿ ਵਿਨਾਯਕਂ;

ਪੂਜਯਿਤ੍ਵਾ ਚੇਤਸਾਵ [ਚ ਤੇਹੇਵ (ਸ੍ਯਾ. ਪੀ.)], ਵਣ੍ਣਸੋਭਂ ਅਪਤ੍ਥਯਿਂ.

੪੨੯. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੪੩੦. ‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

੪੩੧. ‘‘ਤਸ੍ਸਾਸਿਂ ਦੁਤਿਯਾ ਧੀਤਾ, ਸਮਣਗੁਤ੍ਤਸਵ੍ਹਯਾ;

ਧਮ੍ਮਂ ਸੁਤ੍ਵਾ ਜਿਨਗ੍ਗਸ੍ਸ, ਪਬ੍ਬਜ੍ਜਂ ਸਮਰੋਚਯਿਂ.

੪੩੨. ‘‘ਅਨੁਜਾਨਿ ਨ ਨੋ ਤਾਤੋ, ਅਗਾਰੇਵ ਤਦਾ ਮਯਂ;

ਵੀਸਵਸ੍ਸਸਹਸ੍ਸਾਨਿ, ਵਿਚਰਿਮ੍ਹ ਅਤਨ੍ਦਿਤਾ.

੪੩੩. ‘‘ਕੋਮਾਰਿਬ੍ਰਹ੍ਮਚਰਿਯਂ, ਰਾਜਕਞ੍ਞਾ ਸੁਖੇਧਿਤਾ;

ਬੁਦ੍ਧੋਪਟ੍ਠਾਨਨਿਰਤਾ, ਮੁਦਿਤਾ ਸਤ੍ਤਧੀਤਰੋ.

੪੩੪. ‘‘ਸਮਣੀ ਸਮਣਗੁਤ੍ਤਾ ਚ, ਭਿਕ੍ਖੁਨੀ ਭਿਕ੍ਖੁਦਾਯਿਕਾ [ਭਿਕ੍ਖੁਦਾਸਿਕਾ (ਸੀ. ਸ੍ਯਾ.)];

ਧਮ੍ਮਾ ਚੇਵ ਸੁਧਮ੍ਮਾ ਚ, ਸਤ੍ਤਮੀ ਸਙ੍ਘਦਾਯਿਕਾ [ਸਂਘਦਾਸਿਕਾ (ਸੀ. ਸ੍ਯਾ.)].

੪੩੫. ‘‘ਅਹਂ ਖੇਮਾ ਚ ਸਪ੍ਪਞ੍ਞਾ, ਪਟਾਚਾਰਾ ਚ ਕੁਣ੍ਡਲਾ;

ਕਿਸਾਗੋਤਮੀ ਧਮ੍ਮਦਿਨ੍ਨਾ, ਵਿਸਾਖਾ ਹੋਤਿ ਸਤ੍ਤਮੀ.

੪੩੬. ‘‘ਤੇਹਿ ਕਮ੍ਮੇਹਿ ਸੁਕਤੇਹਿ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੪੩੭. ‘‘ਤਤੋ ਚੁਤਾ ਮਨੁਸ੍ਸੇਸੁ, ਉਪਪਨ੍ਨਾ ਮਹਾਕੁਲੇ;

ਪੀਤਂ ਮਟ੍ਠਂ ਵਰਂ ਦੁਸ੍ਸਂ, ਅਦਂ ਅਰਹਤੋ ਅਹਂ.

੪੩੮. ‘‘ਤਤੋ ਚੁਤਾਰਿਟ੍ਠਪੁਰੇ, ਜਾਤਾ ਵਿਪ੍ਪਕੁਲੇ ਅਹਂ;

ਧੀਤਾ ਤਿਰਿਟਿਵਚ੍ਛਸ੍ਸ, ਉਮ੍ਮਾਦਨ੍ਤੀ ਮਨੋਹਰਾ.

੪੩੯. ‘‘ਤਤੋ ਚੁਤਾ ਜਨਪਦੇ, ਕੁਲੇ ਅਞ੍ਞਤਰੇ ਅਹਂ;

ਪਸੂਤਾ ਨਾਤਿਫੀਤਮ੍ਹਿ, ਸਾਲਿਂ ਗੋਪੇਮਹਂ ਤਦਾ.

੪੪੦. ‘‘ਦਿਸ੍ਵਾ ਪਚ੍ਚੇਕਸਮ੍ਬੁਦ੍ਧਂ, ਪਞ੍ਚਲਾਜਾਸਤਾਨਿਹਂ;

ਦਤ੍ਵਾ ਪਦੁਮਚ੍ਛਨ੍ਨਾਨਿ, ਪਞ੍ਚ ਪੁਤ੍ਤਸਤਾਨਿਹਂ.

੪੪੧. ‘‘ਪਤ੍ਥਯਿਂ ਤੇਪਿ ਪਤ੍ਥੇਸੁਂ, ਮਧੁਂ ਦਤ੍ਵਾ ਸਯਮ੍ਭੁਨੋ;

ਤਤੋ ਚੁਤਾ ਅਰਞ੍ਞੇਹਂ, ਅਜਾਯਿਂ ਪਦੁਮੋਦਰੇ.

੪੪੨. ‘‘ਕਾਸਿਰਞ੍ਞੋ ਮਹੇਸੀਹਂ, ਹੁਤ੍ਵਾ ਸਕ੍ਕਤਪੂਜਿਤਾ;

ਅਜਨਿਂ ਰਾਜਪੁਤ੍ਤਾਨਂ, ਅਨੂਨਂ ਸਤਪਞ੍ਚਕਂ.

੪੪੩. ‘‘ਯਦਾ ਤੇ ਯੋਬ੍ਬਨਪ੍ਪਤ੍ਤਾ, ਕੀਲ਼ਨ੍ਤਾ ਜਲਕੀਲ਼ਿਤਂ;

ਦਿਸ੍ਵਾ ਓਪਤ੍ਤਪਦੁਮਂ, ਆਸੁਂ ਪਚ੍ਚੇਕਨਾਯਕਾ.

੪੪੪. ‘‘ਸਾਹਂ ਤੇਹਿ ਵਿਨਾਭੂਤਾ, ਸੁਤਵੀਰੇਹਿ ਸੋਕਿਨੀ [ਸੁਤਵਰੇਹਿ ਸੋਕਿਨੀ (ਸੀ. ਸ੍ਯਾ.)];

ਚੁਤਾ ਇਸਿਗਿਲਿਪਸ੍ਸੇ, ਗਾਮਕਮ੍ਹਿ ਅਜਾਯਿਹਂ.

੪੪੫. ‘‘ਯਦਾ ਬੁਦ੍ਧਾ ਸੁਤਮਤੀ, ਸੁਤਾਨਂ ਭਤ੍ਤੁਨੋਪਿ ਚ [ਕਸਤਂ ਤਦਾ (ਸੀ.), ਅਤ੍ਤਨੋਪਿ ਚ (ਸ੍ਯਾ.)];

ਯਾਗੁਂ ਆਦਾਯ ਗਚ੍ਛਨ੍ਤੀ, ਅਟ੍ਠ ਪਚ੍ਚੇਕਨਾਯਕੇ.

੪੪੬. ‘‘ਭਿਕ੍ਖਾਯ ਗਾਮਂ ਗਚ੍ਛਨ੍ਤੇ, ਦਿਸ੍ਵਾ ਪੁਤ੍ਤੇ ਅਨੁਸ੍ਸਰਿਂ;

ਖੀਰਧਾਰਾ ਵਿਨਿਗ੍ਗਚ੍ਛਿ, ਤਦਾ ਮੇ ਪੁਤ੍ਤਪੇਮਸਾ.

੪੪੭. ‘‘ਤਤੋ ਤੇਸਂ ਅਦਂ ਯਾਗੁਂ, ਪਸਨ੍ਨਾ ਸੇਹਿ ਪਾਣਿਭਿ;

ਤਤੋ ਚੁਤਾਹਂ ਤਿਦਸਂ, ਨਨ੍ਦਨਂ ਉਪਪਜ੍ਜਹਂ.

੪੪੮. ‘‘ਅਨੁਭੋਤ੍ਵਾ ਸੁਖਂ ਦੁਕ੍ਖਂ, ਸਂਸਰਿਤ੍ਵਾ ਭਵਾਭਵੇ;

ਤਵਤ੍ਥਾਯ ਮਹਾਵੀਰ, ਪਰਿਚ੍ਚਤ੍ਤਞ੍ਚ ਜੀਵਿਤਂ.

੪੪੯. ‘‘ਏਵਂ ਬਹੁਵਿਧਂ ਦੁਕ੍ਖਂ, ਸਮ੍ਪਤ੍ਤੀ ਚ ਬਹੁਬ੍ਬਿਧਾ;

ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਜਾਤਾ ਸਾਵਤ੍ਥਿਯਂ ਪੁਰੇ.

੪੫੦. ‘‘ਮਹਾਧਨਸੇਟ੍ਠਿਕੁਲੇ, ਸੁਖਿਤੇ ਸਜ੍ਜਿਤੇ ਤਥਾ;

ਨਾਨਾਰਤਨਪਜ੍ਜੋਤੇ, ਸਬ੍ਬਕਾਮਸਮਿਦ੍ਧਿਨੇ.

੪੫੧. ‘‘ਸਕ੍ਕਤਾ ਪੂਜਿਤਾ ਚੇਵ, ਮਾਨਿਤਾਪਚਿਤਾ ਤਥਾ;

ਰੂਪਸੀਰਿਮਨੁਪ੍ਪਤ੍ਤਾ [ਰੂਪਸੋਭਗ੍ਗਸਮ੍ਪਨ੍ਨਾ (ਸੀ.)], ਕੁਲੇਸੁ ਅਤਿਸਕ੍ਕਤਾ [ਅਭਿਸਮ੍ਮਤਾ (ਸੀ.)].

੪੫੨. ‘‘ਅਤੀਵ ਪਤ੍ਥਿਤਾ ਚਾਸਿਂ, ਰੂਪਭੋਗਸਿਰੀਹਿ ਚ;

ਪਤ੍ਥਿਤਾ ਸੇਟ੍ਠਿਪੁਤ੍ਤੇਹਿ, ਅਨੇਕੇਹਿ ਸਤੇਹਿਪਿ.

੪੫੩. ‘‘ਅਗਾਰਂ ਪਜਹਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਅਡ੍ਢਮਾਸੇ ਅਸਮ੍ਪਤ੍ਤੇ, ਚਤੁਸਚ੍ਚਮਪਾਪੁਣਿਂ.

੪੫੪. ‘‘ਇਦ੍ਧਿਯਾ ਅਭਿਨਿਮ੍ਮਿਤ੍ਵਾ, ਚਤੁਰਸ੍ਸਂ ਰਥਂ ਅਹਂ;

ਬੁਦ੍ਧਸ੍ਸ ਪਾਦੇ ਵਨ੍ਦਿਸ੍ਸਂ, ਲੋਕਨਾਥਸ੍ਸ ਤਾਦਿਨੋ.

੪੫੫. ‘‘‘ਸੁਪੁਪ੍ਫਿਤਗ੍ਗਂ ਉਪਗਮ੍ਮ ਪਾਦਪਂ [ਭਿਕ੍ਖੁਨੀ (ਸੀ. ਪੀ. ਕ.) ਥੇਰੀਗਾ. ੨੩੦], ਏਕਾ ਤੁਵਂ ਤਿਟ੍ਠਸਿ ਸਾਲਮੂਲੇ;

ਨ ਚਾਪਿ ਤੇ ਦੁਤਿਯੋ ਅਤ੍ਥਿ ਕੋਚਿ [ਨ ਚਤ੍ਥਿ ਤੇ ਦੁਤਿਯਾ ਵਣ੍ਣਧਾਤੁ (ਸੀ. ਪੀ. ਕ.)], ਬਾਲੇ ਨ ਤ੍ਵਂ ਭਾਯਸਿ ਧੁਤ੍ਤਕਾਨਂ’.

੪੫੬. ‘‘‘ਸਤਂ ਸਹਸ੍ਸਾਨਿਪਿ ਧੁਤ੍ਤਕਾਨਂ [ਸਹਸ੍ਸਾਨਮ੍ਪਿ ਧੁਤ੍ਤਕਾਨਂ (ਪੀ.) ਥੇਰੀਗਾ. ੨੩੧], ਸਮਾਗਤਾ ਏਦਿਸਕਾ ਭਵੇਯ੍ਯੁਂ;

ਲੋਮਂ ਨ ਇਞ੍ਜੇ ਨ ਸਮ੍ਪਵੇਧੇ, ਕਿਂ ਮੇ ਤੁਵਂ ਮਾਰ ਕਰਿਸ੍ਸਸੇਕੋ [ਨ ਮਾਰ ਭਾਯਾਮਿ ਤਵੇਕਿਕਾਪਿ (ਸੀ. ਕ.) … ਤਮੇਕਿਕਾਸਿਂ (ਪੀ.)].

੪੫੭. ‘‘‘ਏਸਾ ਅਨ੍ਤਰਧਾਯਾਮਿ, ਕੁਚ੍ਛਿਂ ਵਾ ਪਵਿਸਾਮਿ ਤੇ;

ਭਮੁਕਨ੍ਤਰਿਕਾਯਮ੍ਪਿ, ਤਿਟ੍ਠਨ੍ਤਿਂ ਮਂ ਨ ਦਕ੍ਖਸਿ.

੪੫੮. ‘‘‘ਚਿਤ੍ਤਸ੍ਮਿਂ ਵਸੀਭੂਤਾਮ੍ਹਿ, ਇਦ੍ਧਿਪਾਦਾ ਸੁਭਾਵਿਤਾ;