੧੦. ਪਟਾਚਾਰਾਥੇਰੀਅਪਦਾਨਂ

੪੬੮. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੪੬੯. ‘‘ਤਦਾਹਂ ਹਂਸਵਤਿਯਂ, ਜਾਤਾ ਸੇਟ੍ਠਿਕੁਲੇ ਅਹੁਂ;

ਨਾਨਾਰਤਨਪਜ੍ਜੋਤੇ, ਮਹਾਸੁਖਸਮਪ੍ਪਿਤਾ.

੪੭੦. ‘‘ਉਪੇਤ੍ਵਾ ਤਂ ਮਹਾਵੀਰਂ, ਅਸ੍ਸੋਸਿਂ ਧਮ੍ਮਦੇਸਨਂ;

ਤਤੋ ਜਾਤਪਸਾਦਾਹਂ, ਉਪੇਸਿਂ ਸਰਣਂ ਜਿਨਂ.

੪੭੧. ‘‘ਤਤੋ ਵਿਨਯਧਾਰੀਨਂ, ਅਗ੍ਗਂ ਵਣ੍ਣੇਸਿ ਨਾਯਕੋ;

ਭਿਕ੍ਖੁਨਿਂ ਲਜ੍ਜਿਨਿਂ ਤਾਦਿਂ, ਕਪ੍ਪਾਕਪ੍ਪਵਿਸਾਰਦਂ.

੪੭੨. ‘‘ਤਦਾ ਮੁਦਿਤਚਿਤ੍ਤਾਹਂ, ਤਂ ਠਾਨਮਭਿਕਙ੍ਖਿਨੀ;

ਨਿਮਨ੍ਤੇਤ੍ਵਾ ਦਸਬਲਂ, ਸਸਙ੍ਘਂ ਲੋਕਨਾਯਕਂ.

੪੭੩. ‘‘ਭੋਜਯਿਤ੍ਵਾਨ ਸਤ੍ਤਾਹਂ, ਦਦਿਤ੍ਵਾਵ ਤਿਚੀਵਰਂ [ਦਦਿਤ੍ਵਾ ਪਤ੍ਤਚੀਵਰਂ (ਸ੍ਯਾ.)];

ਨਿਪਚ੍ਚ ਸਿਰਸਾ ਪਾਦੇ, ਇਦਂ ਵਚਨਮਬ੍ਰਵਿਂ.

੪੭੪. ‘‘‘ਯਾ ਤਯਾ ਵਣ੍ਣਿਤਾ ਵੀਰ, ਇਤੋ ਅਟ੍ਠਮਕੇ ਮੁਨਿ;

ਤਾਦਿਸਾਹਂ ਭਵਿਸ੍ਸਾਮਿ, ਯਦਿ ਸਿਜ੍ਝਤਿ ਨਾਯਕ’.

੪੭੫. ‘‘ਤਦਾ ਅਵੋਚ ਮਂ ਸਤ੍ਥਾ, ‘ਭਦ੍ਦੇ ਮਾ ਭਾਯਿ ਅਸ੍ਸਸ;

ਅਨਾਗਤਮ੍ਹਿ ਅਦ੍ਧਾਨੇ, ਲਚ੍ਛਸੇ ਤਂ ਮਨੋਰਥਂ.

੪੭੬. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੪੭੭. ‘‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਪਟਾਚਾਰਾਤਿ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਿਕਾ’.

੪੭੮. ‘‘ਤਦਾਹਂ ਮੁਦਿਤਾ [ਪਮੁਦੀ (ਕ.)] ਹੁਤ੍ਵਾ, ਯਾਵਜੀਵਂ ਤਦਾ ਜਿਨਂ;

ਮੇਤ੍ਤਚਿਤ੍ਤਾ ਪਰਿਚਰਿਂ, ਸਸਙ੍ਘਂ ਲੋਕਨਾਯਕਂ.

੪੭੯. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੪੮੦. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੪੮੧. ‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

੪੮੨. ‘‘ਤਸ੍ਸਾਸਿਂ ਤਤਿਯਾ ਧੀਤਾ, ਭਿਕ੍ਖੁਨੀ ਇਤਿ ਵਿਸ੍ਸੁਤਾ;

ਧਮ੍ਮਂ ਸੁਤ੍ਵਾ ਜਿਨਗ੍ਗਸ੍ਸ, ਪਬ੍ਬਜ੍ਜਂ ਸਮਰੋਚਯਿਂ.

੪੮੩. ‘‘ਅਨੁਜਾਨਿ ਨ ਨੋ ਤਾਤੋ, ਅਗਾਰੇਵ ਤਦਾ ਮਯਂ;

ਵੀਸਵਸ੍ਸਸਹਸ੍ਸਾਨਿ, ਵਿਚਰਿਮ੍ਹ ਅਤਨ੍ਦਿਤਾ.

੪੮੪. ‘‘ਕੋਮਾਰਿਬ੍ਰਹ੍ਮਚਰਿਯਂ, ਰਾਜਕਞ੍ਞਾ ਸੁਖੇਧਿਤਾ;

ਬੁਦ੍ਧੋਪਟ੍ਠਾਨਨਿਰਤਾ, ਮੁਦਿਤਾ ਸਤ੍ਤਧੀਤਰੋ.

੪੮੫. ‘‘ਸਮਣੀ ਸਮਣਗੁਤ੍ਤਾ ਚ, ਭਿਕ੍ਖੁਨੀ ਭਿਕ੍ਖੁਦਾਯਿਕਾ;

ਧਮ੍ਮਾ ਚੇਵ ਸੁਧਮ੍ਮਾ ਚ, ਸਤ੍ਤਮੀ ਸਙ੍ਘਦਾਯਿਕਾ.

੪੮੬. ‘‘ਅਹਂ ਉਪ੍ਪਲਵਣ੍ਣਾ ਚ, ਖੇਮਾ ਭਦ੍ਦਾ ਚ ਭਿਕ੍ਖੁਨੀ;

ਕਿਸਾਗੋਤਮੀ ਧਮ੍ਮਦਿਨ੍ਨਾ, ਵਿਸਾਖਾ ਹੋਤਿ ਸਤ੍ਤਮੀ.

੪੮੭. ‘‘ਤੇਹਿ ਕਮ੍ਮੇਹਿ ਸੁਕਤੇਹਿ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੪੮੮. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤਾ ਸੇਟ੍ਠਿਕੁਲੇ ਅਹਂ;

ਸਾਵਤ੍ਥਿਯਂ ਪੁਰਵਰੇ, ਇਦ੍ਧੇ ਫੀਤੇ ਮਹਦ੍ਧਨੇ.

੪੮੯. ‘‘ਯਦਾ ਚ ਯੋਬ੍ਬਨੂਪੇਤਾ, ਵਿਤਕ੍ਕਵਸਗਾ ਅਹਂ;

ਨਰਂ ਜਾਰਪਤਿਂ ਦਿਸ੍ਵਾ, ਤੇਨ ਸਦ੍ਧਿਂ ਅਗਚ੍ਛਹਂ.

੪੯੦. ‘‘ਏਕਪੁਤ੍ਤਪਸੂਤਾਹਂ, ਦੁਤਿਯੋ ਕੁਚ੍ਛਿਯਾ ਮਮਂ;

ਤਦਾਹਂ ਮਾਤਾਪਿਤਰੋ, ਓਕ੍ਖਾਮੀਤਿ [ਇਕ੍ਖਾਮੀਤਿ (ਸ੍ਯਾ.), ਦਕ੍ਖਾਮੀਤਿ (ਸੀ.)] ਸੁਨਿਚ੍ਛਿਤਾ.

੪੯੧. ‘‘ਨਾਰੋਚੇਸਿਂ ਪਤਿਂ ਮਯ੍ਹਂ, ਤਦਾ ਤਮ੍ਹਿ ਪਵਾਸਿਤੇ;

ਏਕਿਕਾ ਨਿਗ੍ਗਤਾ ਗੇਹਾ, ਗਨ੍ਤੁਂ ਸਾਵਤ੍ਥਿਮੁਤ੍ਤਮਂ.

੪੯੨. ‘‘ਤਤੋ ਮੇ ਸਾਮਿ ਆਗਨ੍ਤ੍ਵਾ, ਸਮ੍ਭਾਵੇਸਿ ਪਥੇ ਮਮਂ;

ਤਦਾ ਮੇ ਕਮ੍ਮਜਾ ਵਾਤਾ, ਉਪ੍ਪਨ੍ਨਾ ਅਤਿਦਾਰੁਣਾ.

੪੯੩. ‘‘ਉਟ੍ਠਿਤੋ ਚ ਮਹਾਮੇਘੋ, ਪਸੂਤਿਸਮਯੇ ਮਮ;

ਦਬ੍ਬਤ੍ਥਾਯ ਤਦਾ ਗਨ੍ਤ੍ਵਾ, ਸਾਮਿ ਸਪ੍ਪੇਨ ਮਾਰਿਤੋ.

੪੯੪. ‘‘ਤਦਾ ਵਿਜਾਤਦੁਕ੍ਖੇਨ, ਅਨਾਥਾ ਕਪਣਾ ਅਹਂ;

ਕੁਨ੍ਨਦਿਂ ਪੂਰਿਤਂ ਦਿਸ੍ਵਾ, ਗਚ੍ਛਨ੍ਤੀ ਸਕੁਲਾਲਯਂ.

੪੯੫. ‘‘ਬਾਲਂ ਆਦਾਯ ਅਤਰਿਂ, ਪਾਰਕੂਲੇ ਚ ਏਕਕਂ;

ਸਾਯੇਤ੍ਵਾ [ਪਾਯੇਤ੍ਵਾ (ਸ੍ਯਾ.), ਪਾਤੇਤ੍ਵਾ (ਕ.)] ਬਾਲਕਂ ਪੁਤ੍ਤਂ, ਇਤਰਂ ਤਰਣਾਯਹਂ.

੪੯੬. ‘‘ਨਿਵਤ੍ਤਾ ਉਕ੍ਕੁਸੋ ਹਾਸਿ, ਤਰੁਣਂ ਵਿਲਪਨ੍ਤਕਂ;

ਇਤਰਞ੍ਚ ਵਹੀ ਸੋਤੋ, ਸਾਹਂ ਸੋਕਸਮਪ੍ਪਿਤਾ.

੪੯੭. ‘‘ਸਾਵਤ੍ਥਿਨਗਰਂ ਗਨ੍ਤ੍ਵਾ, ਅਸ੍ਸੋਸਿਂ ਸਜਨੇ ਮਤੇ;

ਤਦਾ ਅਵੋਚਂ ਸੋਕਟ੍ਟਾ, ਮਹਾਸੋਕਸਮਪ੍ਪਿਤਾ.

੪੯੮. ‘‘ਉਭੋ ਪੁਤ੍ਤਾ ਕਾਲਙ੍ਕਤਾ, ਪਨ੍ਥੇ ਮਯ੍ਹਂ ਪਤੀ ਮਤੋ;

ਮਾਤਾ ਪਿਤਾ ਚ ਭਾਤਾ ਚ, ਏਕਚਿਤਮ੍ਹਿ ਡਯ੍ਹਰੇ.

੪੯੯. ‘‘ਤਦਾ ਕਿਸਾ ਚ ਪਣ੍ਡੁ ਚ, ਅਨਾਥਾ ਦੀਨਮਾਨਸਾ;

ਇਤੋ ਤਤੋ ਭਮਨ੍ਤੀਹਂ [ਗਚ੍ਛਨ੍ਤੀਹਂ (ਸ੍ਯਾ.), ਗਮੇਨ੍ਤੀਹਂ (ਕ.)], ਅਦ੍ਦਸਂ ਨਰਸਾਰਥਿਂ.

੫੦੦. ‘‘ਤਤੋ ਅਵੋਚ ਮਂ ਸਤ੍ਥਾ, ‘ਪੁਤ੍ਤੇ ਮਾ ਸੋਚਿ ਅਸ੍ਸਸ;

ਅਤ੍ਤਾਨਂ ਤੇ ਗਵੇਸਸ੍ਸੁ, ਕਿਂ ਨਿਰਤ੍ਥਂ ਵਿਹਞ੍ਞਸਿ.

੫੦੧. ‘‘‘ਨ ਸਨ੍ਤਿ ਪੁਤ੍ਤਾ ਤਾਣਾਯ, ਨ ਞਾਤੀ ਨਪਿ ਬਨ੍ਧਵਾ;

ਅਨ੍ਤਕੇਨਾਧਿਪਨ੍ਨਸ੍ਸ, ਨਤ੍ਥਿ ਞਾਤੀਸੁ ਤਾਣਤਾ’.

੫੦੨. ‘‘ਤਂ ਸੁਤ੍ਵਾ ਮੁਨਿਨੋ ਵਾਕ੍ਯਂ, ਪਠਮਂ ਫਲਮਜ੍ਝਗਂ;

ਪਬ੍ਬਜਿਤ੍ਵਾਨ ਨਚਿਰਂ, ਅਰਹਤ੍ਤਮਪਾਪੁਣਿਂ.

੫੦੩. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਪਰਚਿਤ੍ਤਾਨਿ ਜਾਨਾਮਿ, ਸਤ੍ਥੁਸਾਸਨਕਾਰਿਕਾ.

੫੦੪. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਵਿਸੁਦ੍ਧਾਸਿਂ ਸੁਨਿਮ੍ਮਲਾ.

੫੦੫. ‘‘ਤਤੋਹਂ ਵਿਨਯਂ ਸਬ੍ਬਂ, ਸਨ੍ਤਿਕੇ ਸਬ੍ਬਦਸ੍ਸਿਨੋ;

ਉਗ੍ਗਹਿਂ ਸਬ੍ਬਵਿਤ੍ਥਾਰਂ, ਬ੍ਯਾਹਰਿਞ੍ਚ ਯਥਾਤਥਂ.

੫੦੬. ‘‘ਜਿਨੋ ਤਸ੍ਮਿਂ ਗੁਣੇ ਤੁਟ੍ਠੋ, ਏਤਦਗ੍ਗੇ ਠਪੇਸਿ ਮਂ;

ਅਗ੍ਗਾ ਵਿਨਯਧਾਰੀਨਂ, ਪਟਾਚਾਰਾਵ ਏਕਿਕਾ.

੫੦੭. ‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.

੫੦੮. ‘‘ਯਸ੍ਸਤ੍ਥਾਯ ਪਬ੍ਬਜਿਤਾ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

੫੦੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੫੧੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੧੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਪਟਾਚਾਰਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਟਾਚਾਰਾਥੇਰਿਯਾਪਦਾਨਂ ਦਸਮਂ.

ਏਕੂਪੋਸਥਿਕਵਗ੍ਗੋ ਦੁਤਿਯੋ.