੨. ਏਕੂਪੋਸਥਿਕਵਗ੍ਗੋ

੧. ਏਕੂਪੋਸਥਿਕਾਥੇਰੀਅਪਦਾਨਂ

੧. ‘‘ਨਗਰੇ ਬਨ੍ਧੁਮਤਿਯਾ, ਬਨ੍ਧੁਮਾ ਨਾਮ ਖਤ੍ਤਿਯੋ;

ਦਿਵਸੇ ਪੁਣ੍ਣਮਾਯ ਸੋ, ਉਪਵਸਿ ਉਪੋਸਥਂ.

੨. ‘‘ਅਹਂ ਤੇਨ ਸਮਯੇਨ, ਕੁਮ੍ਭਦਾਸੀ ਅਹਂ ਤਹਿਂ;

ਦਿਸ੍ਵਾ ਸਰਾਜਕਂ ਸੇਨਂ, ਏਵਾਹਂ ਚਿਨ੍ਤਯਿਂ ਤਦਾ.

੩. ‘ਰਾਜਾਪਿ ਰਜ੍ਜਂ ਛਡ੍ਡੇਤ੍ਵਾ, ਉਪਵਸਿ ਉਪੋਸਥਂ;

ਸਫਲਂ ਨੂਨ ਤਂ ਕਮ੍ਮਂ, ਜਨਕਾਯੋ ਪਮੋਦਿਤੋ’.

੪. ‘‘ਯੋਨਿਸੋ ਪਚ੍ਚਵੇਕ੍ਖਿਤ੍ਵਾ, ਦੁਗ੍ਗਚ੍ਚਞ੍ਚ [ਦੁਗ੍ਗਤਿਞ੍ਚ (ਸ੍ਯਾ.)] ਦਲਿਦ੍ਦਤਂ [ਦਲ਼ਿਦ੍ਦਤਂ (ਸੀ.)];

ਮਾਨਸਂ ਸਮ੍ਪਹਂਸਿਤ੍ਵਾ, ਉਪਵਸਿਂ ਉਪੋਸਥਂ.

੫. ‘‘ਅਹਂ ਉਪੋਸਥਂ ਕਤ੍ਵਾ, ਸਮ੍ਮਾਸਮ੍ਬੁਦ੍ਧਸਾਸਨੇ;

ਤੇਨ ਕਮ੍ਮੇਨ ਸੁਕਤੇਨ, ਤਾਵਤਿਂਸਮਗਚ੍ਛਹਂ.

੬. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਉਬ੍ਭਯੋਜਨਮੁਗ੍ਗਤਂ [ਉਦ੍ਧਂ ਯੋਜਨਮੁਗ੍ਗਤਂ (ਸੀ. ਸ੍ਯਾ. ਪੀ.)];

ਕੂਟਾਗਾਰਵਰੂਪੇਤਂ, ਮਹਾਸਨਸੁਭੂਸਿਤਂ.

੭. ‘‘ਅਚ੍ਛਰਾ ਸਤਸਹਸ੍ਸਾ, ਉਪਤਿਟ੍ਠਨ੍ਤਿ ਮਂ ਸਦਾ;

ਅਞ੍ਞੇ ਦੇਵੇ ਅਤਿਕ੍ਕਮ੍ਮ, ਅਤਿਰੋਚਾਮਿ ਸਬ੍ਬਦਾ.

੮. ‘‘ਚਤੁਸਟ੍ਠਿ ਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਤੇਸਟ੍ਠਿ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

੯. ‘‘ਸੁਵਣ੍ਣਵਣ੍ਣਾ ਹੁਤ੍ਵਾਨ, ਭਵੇਸੁ ਸਂਸਰਾਮਹਂ;

ਸਬ੍ਬਤ੍ਥ ਪਵਰਾ ਹੋਮਿ, ਉਪੋਸਥਸ੍ਸਿਦਂ ਫਲਂ.

੧੦. ‘‘ਹਤ੍ਥਿਯਾਨਂ ਅਸ੍ਸਯਾਨਂ, ਰਥਯਾਨਞ੍ਚ ਸੀਵਿਕਂ [ਕੇਵਲਂ (ਸੀ. ਸ੍ਯਾ. ਪੀ.)];

ਲਭਾਮਿ ਸਬ੍ਬਮੇਵੇਤਂ, ਉਪੋਸਥਸ੍ਸਿਦਂ ਫਲਂ.

੧੧. ‘‘ਸੋਣ੍ਣਮਯਂ ਰੂਪਿਮਯਂ, ਅਥੋਪਿ ਫਲਿਕਾਮਯਂ;

ਲੋਹਿਤਙ੍ਗਮਯਞ੍ਚੇਵ, ਸਬ੍ਬਂ ਪਟਿਲਭਾਮਹਂ.

੧੨. ‘‘ਕੋਸੇਯ੍ਯਕਮ੍ਬਲਿਯਾਨਿ, ਖੋਮਕਪ੍ਪਾਸਿਕਾਨਿ ਚ;

ਮਹਗ੍ਘਾਨਿ ਚ ਵਤ੍ਥਾਨਿ, ਸਬ੍ਬਂ ਪਟਿਲਭਾਮਹਂ.

੧੩. ‘‘ਅਨ੍ਨਂ ਪਾਨਂ ਖਾਦਨੀਯਂ, ਵਤ੍ਥਸੇਨਾਸਨਾਨਿ ਚ;

ਸਬ੍ਬਮੇਤਂ ਪਟਿਲਭੇ, ਉਪੋਸਥਸ੍ਸਿਦਂ ਫਲਂ.

੧੪. ‘‘ਵਰਗਨ੍ਧਞ੍ਚ ਮਾਲਞ੍ਚ, ਚੁਣ੍ਣਕਞ੍ਚ ਵਿਲੇਪਨਂ;

ਸਬ੍ਬਮੇਤਂ ਪਟਿਲਭੇ, ਉਪੋਸਥਸ੍ਸਿਦਂ ਫਲਂ.

੧੫. ‘‘ਕੂਟਾਗਾਰਞ੍ਚ ਪਾਸਾਦਂ, ਮਣ੍ਡਪਂ ਹਮ੍ਮਿਯਂ ਗੁਹਂ;

ਸਬ੍ਬਮੇਤਂ ਪਟਿਲਭੇ, ਉਪੋਸਥਸ੍ਸਿਦਂ ਫਲਂ.

੧੬. ‘‘ਜਾਤਿਯਾ ਸਤ੍ਤਵਸ੍ਸਾਹਂ, ਪਬ੍ਬਜਿਂ ਅਨਗਾਰਿਯਂ;

ਅਡ੍ਢਮਾਸੇ ਅਸਮ੍ਪਤ੍ਤੇ, ਅਰਹਤ੍ਤਮਪਾਪੁਣਿਂ.

੧੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਪੋਸਥਸ੍ਸਿਦਂ ਫਲਂ.

੧੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੨੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਏਕੂਪੋਸਥਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕੂਪੋਸਥਿਕਾਥੇਰਿਯਾਪਦਾਨਂ ਪਠਮਂ.

੨. ਸਲ਼ਲਪੁਪ੍ਫਿਕਾਥੇਰੀਅਪਦਾਨਂ

੨੨. ‘‘ਚਨ੍ਦਭਾਗਾਨਦੀਤੀਰੇ, ਅਹੋਸਿਂ ਕਿਨ੍ਨਰੀ ਤਦਾ;

ਅਦ੍ਦਸਾਹਂ ਦੇਵਦੇਵਂ, ਚਙ੍ਕਮਨ੍ਤਂ ਨਰਾਸਭਂ.

੨੩. ‘‘ਓਚਿਨਿਤ੍ਵਾਨ ਸਲ਼ਲਂ, ਬੁਦ੍ਧਸੇਟ੍ਠਸ੍ਸਦਾਸਹਂ;

ਉਪਸਿਙ੍ਘਿ ਮਹਾਵੀਰੋ, ਸਲ਼ਲਂ ਦੇਵਗਨ੍ਧਿਕਂ.

੨੪. ‘‘ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਵਿਪਸ੍ਸੀ ਲੋਕਨਾਯਕੋ;

ਉਪਸਿਙ੍ਘਿ ਮਹਾਵੀਰੋ, ਪੇਕ੍ਖਮਾਨਾਯ ਮੇ ਤਦਾ.

੨੫. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਵਨ੍ਦਿਤ੍ਵਾ ਦ੍ਵਿਪਦੁਤ੍ਤਮਂ [ਦਿਪਦੁਤ੍ਤਮਂ (ਸੀ. ਸ੍ਯਾ. ਪੀ.)];

ਸਕਂ ਚਿਤ੍ਤਂ ਪਸਾਦੇਤ੍ਵਾ, ਤਤੋ ਪਬ੍ਬਤਮਾਰੁਹਿਂ.

੨੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੨੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਸਲ਼ਲਪੁਪ੍ਫਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਲ਼ਲਪੁਪ੍ਫਿਕਾਥੇਰਿਯਾਪਦਾਨਂ ਦੁਤਿਯਂ.

੩. ਮੋਦਕਦਾਯਿਕਾਥੇਰੀਅਪਦਾਨਂ

੩੦. ‘‘ਨਗਰੇ ਬਨ੍ਧੁਮਤਿਯਾ, ਕੁਮ੍ਭਦਾਸੀ ਅਹੋਸਹਂ;

ਮਮ ਭਾਗਂ ਗਹੇਤ੍ਵਾਨ, ਗਚ੍ਛਂ ਉਦਕਹਾਰਿਕਾ [ਉਦਕਹਾਰਿਕਂ (ਸੀ.), ਉਦਕਹਾਰਿਕੇ (ਸ੍ਯਾ.)].

੩੧. ‘‘ਪਨ੍ਥਮ੍ਹਿ ਸਮਣਂ ਦਿਸ੍ਵਾ, ਸਨ੍ਤਚਿਤ੍ਤਂ ਸਮਾਹਤਂ;

ਪਸਨ੍ਨਚਿਤ੍ਤਾ ਸੁਮਨਾ, ਮੋਦਕੇ ਤੀਣਿਦਾਸਹਂ.

੩੨. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਏਕਨਵੁਤਿਕਪ੍ਪਾਨਿ [ਏਕੂਨਤਿਂਸਕਪ੍ਪਾਨਿ (ਸ੍ਯਾ.)], ਵਿਨਿਪਾਤਂ ਨਗਚ੍ਛਹਂ.

੩੩. ‘‘ਸਮ੍ਪਤ੍ਤਿ ਤਂ [ਸਮ੍ਪਤ੍ਤਿਞ੍ਚ (ਸ੍ਯਾ.), ਸਮ੍ਪਤ੍ਤਿਕਂ (ਕ.)] ਕਰਿਤ੍ਵਾਨ, ਸਬ੍ਬਂ ਅਨੁਭਵਿਂ ਅਹਂ;

ਮੋਦਕੇ ਤੀਣਿ ਦਤ੍ਵਾਨ, ਪਤ੍ਤਾਹਂ ਅਚਲਂ ਪਦਂ.

੩੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੩੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਮੋਦਕਦਾਯਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮੋਦਕਦਾਯਿਕਾਥੇਰਿਯਾਪਦਾਨਂ ਤਤਿਯਂ.

੪. ਏਕਾਸਨਦਾਯਿਕਾਥੇਰੀਅਪਦਾਨਂ

੩੭. ‘‘ਨਗਰੇ ਹਂਸਵਤਿਯਾ, ਅਹੋਸਿਂ ਬਾਲਿਕਾ [ਮਾਲਿਕਾ (ਸ੍ਯਾ. ਪੀ.)] ਤਦਾ;

ਮਾਤਾ ਚ ਮੇ ਪਿਤਾ ਚੇਵ, ਕਮ੍ਮਨ੍ਤਂ ਅਗਮਂਸੁ ਤੇ.

੩੮. ‘‘ਮਜ੍ਝਨ੍ਹਿਕਮ੍ਹਿ ਸੂਰਿਯੇ, ਅਦ੍ਦਸਂ ਸਮਣਂ ਅਹਂ;

ਵੀਥਿਯਾ ਅਨੁਗਚ੍ਛਨ੍ਤਂ, ਆਸਨਂ ਪਞ੍ਞਪੇਸਹਂ.

੩੯. ‘‘ਗੋਨਕਾਵਿਕਤਿਕਾਹਿ [ਗੋਨਕਚਿਤ੍ਤਕਾਦੀਹਿ (ਸੀ.)], ਪਞ੍ਞਪੇਤ੍ਵਾ ਮਮਾਸਨਂ;

ਪਸਨ੍ਨਚਿਤ੍ਤਾ ਸੁਮਨਾ, ਇਦਂ ਵਚਨਮਬ੍ਰਵਿਂ.

੪੦. ‘‘‘ਸਨ੍ਤਤ੍ਤਾ ਕੁਥਿਤਾ ਭੂਮਿ, ਸੂਰੋ ਮਜ੍ਝਨ੍ਹਿਕੇ ਠਿਤੋ;

ਮਾਲੁਤਾ ਚ ਨ ਵਾਯਨ੍ਤਿ, ਕਾਲੋ ਚੇਵੇਤ੍ਥ ਮੇਹਿਤਿ [ਚੇਤ੍ਥ ਉਪਟ੍ਠਿਤੋ (ਸੀ.), ਚੇਵਤ੍ਥਂ ਏਤਿ ਤਂ (ਪੀ.)].

੪੧. ‘‘‘ਪਞ੍ਞਤ੍ਤਮਾਸਨਮਿਦਂ, ਤਵਤ੍ਥਾਯ ਮਹਾਮੁਨਿ;

ਅਨੁਕਮ੍ਪਂ ਉਪਾਦਾਯ, ਨਿਸੀਦ ਮਮ ਆਸਨੇ’.

੪੨. ‘‘ਨਿਸੀਦਿ ਤਤ੍ਥ ਸਮਣੋ, ਸੁਦਨ੍ਤੋ ਸੁਦ੍ਧਮਾਨਸੋ;

ਤਸ੍ਸ ਪਤ੍ਤਂ ਗਹੇਤ੍ਵਾਨ, ਯਥਾਰਨ੍ਧਂ ਅਦਾਸਹਂ.

੪੩. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੪੪. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਆਸਨੇਨ ਸੁਨਿਮ੍ਮਿਤਂ;

ਸਟ੍ਠਿਯੋਜਨਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.

੪੫. ‘‘ਸੋਣ੍ਣਮਯਾ ਮਣਿਮਯਾ, ਅਥੋਪਿ ਫਲਿਕਾਮਯਾ;

ਲੋਹਿਤਙ੍ਗਮਯਾ ਚੇਵ, ਪਲ੍ਲਙ੍ਕਾ ਵਿਵਿਧਾ ਮਮ.

੪੬. ‘‘ਤੂਲਿਕਾ ਵਿਕਤਿਕਾਹਿ, ਕਟ੍ਟਿਸ੍ਸਚਿਤ੍ਤਕਾਹਿ ਚ;

ਉਦ੍ਦਏਕਨ੍ਤਲੋਮੀ ਚ, ਪਲ੍ਲਙ੍ਕਾ ਮੇ ਸੁਸਣ੍ਠਿਤਾ [ਸੁਸਨ੍ਥਤਾ (ਸੀ.)].

੪੭. ‘‘ਯਦਾ ਇਚ੍ਛਾਮਿ ਗਮਨਂ, ਹਾਸਖਿਡ੍ਡਸਮਪ੍ਪਿਤਾ;

ਸਹ ਪਲ੍ਲਙ੍ਕਸੇਟ੍ਠੇਨ, ਗਚ੍ਛਾਮਿ ਮਮ ਪਤ੍ਥਿਤਂ.

੪੮. ‘‘ਅਸੀਤਿ ਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਤ੍ਤਤਿ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

੪੯. ‘‘ਭਵਾਭਵੇ ਸਂਸਰਨ੍ਤੀ, ਮਹਾਭੋਗਂ ਲਭਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਏਕਾਸਨਸ੍ਸਿਦਂ ਫਲਂ [ਏਕਾਸਨਫਲਂ ਇਦਂ (ਸਬ੍ਬਤ੍ਥ) ਏਵਮੁਪਰਿਪਿ].

੫੦. ‘‘ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞੇ ਭਵੇ ਨ ਜਾਨਾਮਿ, ਏਕਾਸਨਸ੍ਸਿਦਂ ਫਲਂ.

੫੧. ‘‘ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਚਾਪਿ ਬ੍ਰਾਹ੍ਮਣੇ;

ਉਚ੍ਚਾਕੁਲੀਨਾ [ਉਚ੍ਚਾਕੁਲਿਕਾ (ਸ੍ਯਾ. ਪੀ. ਕ.)] ਸਬ੍ਬਤ੍ਥ, ਏਕਾਸਨਸ੍ਸਿਦਂ ਫਲਂ.

੫੨. ‘‘ਦੋਮਨਸ੍ਸਂ ਨ ਜਾਨਾਮਿ, ਚਿਤ੍ਤਸਨ੍ਤਾਪਨਂ ਮਮ;

ਵੇਵਣ੍ਣਿਯਂ ਨ ਜਾਨਾਮਿ, ਏਕਾਸਨਸ੍ਸਿਦਂ ਫਲਂ.

੫੩. ‘‘ਧਾਤਿਯੋ ਮਂ ਉਪਟ੍ਠਨ੍ਤਿ, ਖੁਜ੍ਜਾ ਚੇਲਾਪਿਕਾ [ਖੇਲਾਪਿਕਾ (ਸੀ.), ਚੇਲਾਵਿਕਾ (ਪੀ.)] ਬਹੂ;

ਅਙ੍ਕੇਨ ਅਙ੍ਕਂ ਗਚ੍ਛਾਮਿ, ਏਕਾਸਨਸ੍ਸਿਦਂ ਫਲਂ.

੫੪. ‘‘ਅਞ੍ਞਾ ਨ੍ਹਾਪੇਨ੍ਤਿ ਭੋਜੇਨ੍ਤਿ, ਅਞ੍ਞਾ ਰਮੇਨ੍ਤਿ ਮਂ ਸਦਾ;

ਅਞ੍ਞਾ ਗਨ੍ਧਂ ਵਿਲਿਮ੍ਪਨ੍ਤਿ, ਏਕਾਸਨਸ੍ਸਿਦਂ ਫਲਂ [ਅਞ੍ਞਾ ਮਮੇਵ ਨ੍ਹਾਪੇਨ੍ਤਿ, ਅਞ੍ਞਾ ਭੋਜੇਨ੍ਤਿ ਭੋਜਨਂ; ਅਞ੍ਞਾ ਮਂ ਅਲਙ੍ਕਰੋਨ੍ਤਿ, ਅਞ੍ਞਾ ਰਮੇਨ੍ਤਿ ਮਂ ਸਦ੍ਧਾ; (ਸ੍ਯਾ.)].

੫੫. ‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਸੁਞ੍ਞਾਗਾਰੇ ਵਸਨ੍ਤਿਯਾ;

ਮਮ ਸਙ੍ਕਪ੍ਪਮਞ੍ਞਾਯ, ਪਲ੍ਲਙ੍ਕੋ ਉਪਤਿਟ੍ਠਤਿ.

੫੬. ‘‘ਅਯਂ ਪਚ੍ਛਿਮਕੋ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਅਜ੍ਜਾਪਿ ਰਜ੍ਜਂ ਛਡ੍ਡੇਤ੍ਵਾ, ਪਬ੍ਬਜਿਂ ਅਨਗਾਰਿਯਂ.

੫੭. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਏਕਾਸਨਸ੍ਸਿਦਂ ਫਲਂ.

੫੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੫੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੬੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਏਕਾਸਨਦਾਯਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਾਸਨਦਾਯਿਕਾਥੇਰਿਯਾਪਦਾਨਂ ਚਤੁਤ੍ਥਂ.

੫. ਪਞ੍ਚਦੀਪਦਾਯਿਕਾਥੇਰੀਅਪਦਾਨਂ

੬੧. ‘‘ਨਗਰੇ ਹਂਸਵਤਿਯਾ, ਚਾਰਿਕੀ [ਚਾਰਿਕਾ (ਸੀ. ਸ੍ਯਾ.)] ਆਸਹਂ ਤਦਾ;

ਆਰਾਮੇਨ ਚ ਆਰਾਮਂ [ਆਰਾਮੇਨ ਵਿਹਾਰੇਨ (ਸ੍ਯਾ. ਪੀ.)], ਚਰਾਮਿ ਕੁਸਲਤ੍ਥਿਕਾ.

੬੨. ‘‘ਕਾਲ਼ਪਕ੍ਖਮ੍ਹਿ ਦਿਵਸੇ, ਅਦ੍ਦਸਂ ਬੋਧਿਮੁਤ੍ਤਮਂ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਬੋਧਿਮੂਲੇ ਨਿਸੀਦਹਂ.

੬੩. ‘‘ਗਰੁਚਿਤ੍ਤਂ ਉਪਟ੍ਠੇਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸੋਮਨਸ੍ਸਂ ਪਵੇਦੇਤ੍ਵਾ, ਏਵਂ ਚਿਨ੍ਤੇਸਿ ਤਾਵਦੇ.

੬੪. ‘‘‘ਯਦਿ ਬੁਦ੍ਧੋ ਅਮਿਤਗੁਣੋ, ਅਸਮਪ੍ਪਟਿਪੁਗ੍ਗਲੋ;

ਦਸ੍ਸੇਤੁ ਪਾਟਿਹੀਰਂ ਮੇ, ਬੋਧਿ ਓਭਾਸਤੁ ਅਯਂ’.

੬੫. ‘‘ਸਹ ਆਵਜ੍ਜਿਤੇ ਮਯ੍ਹਂ, ਬੋਧਿ ਪਜ੍ਜਲਿ ਤਾਵਦੇ;

ਸਬ੍ਬਸੋਣ੍ਣਮਯਾ ਆਸਿ, ਦਿਸਾ ਸਬ੍ਬਾ ਵਿਰੋਚਤਿ.

੬੬. ‘‘ਸਤ੍ਤਰਤ੍ਤਿਨ੍ਦਿਵਂ ਤਤ੍ਥ, ਬੋਧਿਮੂਲੇ ਨਿਸੀਦਹਂ;

ਸਤ੍ਤਮੇ ਦਿਵਸੇ ਪਤ੍ਤੇ, ਦੀਪਪੂਜਂ ਅਕਾਸਹਂ.

੬੭. ‘‘ਆਸਨਂ ਪਰਿਵਾਰੇਤ੍ਵਾ, ਪਞ੍ਚ ਦੀਪਾਨਿ ਪਜ੍ਜਲੁਂ;

ਯਾਵ ਉਦੇਤਿ ਸੂਰਿਯੋ, ਦੀਪਾ ਮੇ ਪਜ੍ਜਲੁਂ ਤਦਾ.

੬੮. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੬੯. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਪਞ੍ਚਦੀਪਾਤਿ ਵੁਚ੍ਚਤਿ;

ਸਟ੍ਠਿਯੋਜਨਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.

੭੦. ‘‘ਅਸਙ੍ਖਿਯਾਨਿ ਦੀਪਾਨਿ, ਪਰਿਵਾਰੇ ਜਲਿਂਸੁ ਮੇ;

ਯਾਵਤਾ ਦੇਵਭਵਨਂ, ਦੀਪਾਲੋਕੇਨ ਜੋਤਤਿ.

੭੧. ‘‘ਪਰਮ੍ਮੁਖਾ [ਪੁਬ੍ਬਮੁਖਾ (ਸ੍ਯਾ.)] ਨਿਸੀਦਿਤ੍ਵਾ, ਯਦਿ ਇਚ੍ਛਾਮਿ ਪਸ੍ਸਿਤੁਂ;

ਉਦ੍ਧਂ ਅਧੋ ਚ ਤਿਰਿਯਂ, ਸਬ੍ਬਂ ਪਸ੍ਸਾਮਿ ਚਕ੍ਖੁਨਾ.

੭੨. ‘‘ਯਾਵਤਾ ਅਭਿਕਙ੍ਖਾਮਿ, ਦਟ੍ਠੁਂ ਸੁਗਤਦੁਗ੍ਗਤੇ [ਸੁਕਤਦੁਕ੍ਕਟੇ (ਪੀ.)];

ਤਤ੍ਥ ਆਵਰਣਂ ਨਤ੍ਥਿ, ਰੁਕ੍ਖੇਸੁ ਪਬ੍ਬਤੇਸੁ ਵਾ.

੭੩. ‘‘ਅਸੀਤਿ ਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਤਾਨਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

੭੪. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਦੀਪਸਤਸਹਸ੍ਸਾਨਿ, ਪਰਿਵਾਰੇ ਜਲਨ੍ਤਿ ਮੇ.