੮. ਖੇਮਾਥੇਰੀਅਪਦਾਨਂ

੨੮੯. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੨੯੦. ‘‘ਤਦਾਹਂ ਹਂਸਵਤਿਯਂ, ਜਾਤਾ ਸੇਟ੍ਠਿਕੁਲੇ ਅਹੁਂ [ਅਹੁ (ਸ੍ਯਾ.)];

ਨਾਨਾਰਤਨਪਜ੍ਜੋਤੇ, ਮਹਾਸੁਖਸਮਪ੍ਪਿਤਾ.

੨੯੧. ‘‘ਉਪੇਤ੍ਵਾ ਤਂ ਮਹਾਵੀਰਂ, ਅਸ੍ਸੋਸਿਂ ਧਮ੍ਮਦੇਸਨਂ;

ਤਤੋ ਜਾਤਪ੍ਪਸਾਦਾਹਂ, ਉਪੇਮਿ ਸਰਣਂ ਜਿਨਂ.

੨੯੨. ‘‘ਮਾਤਰਂ ਪਿਤਰਂ ਚਾਹਂ, ਆਯਾਚਿਤ੍ਵਾ ਵਿਨਾਯਕਂ;

ਨਿਮਨ੍ਤਯਿਤ੍ਵਾ ਸਤ੍ਤਾਹਂ, ਭੋਜਯਿਂ ਸਹਸਾਵਕਂ.

੨੯੩. ‘‘ਅਤਿਕ੍ਕਨ੍ਤੇ ਚ ਸਤ੍ਤਾਹੇ, ਮਹਾਪਞ੍ਞਾਨਮੁਤ੍ਤਮਂ;

ਭਿਕ੍ਖੁਨਿਂ ਏਤਦਗ੍ਗਮ੍ਹਿ, ਠਪੇਸਿ ਨਰਸਾਰਥਿ.

੨੯੪. ‘‘ਤਂ ਸੁਤ੍ਵਾ ਮੁਦਿਤਾ ਹੁਤ੍ਵਾ, ਪੁਨੋ ਤਸ੍ਸ ਮਹੇਸਿਨੋ;

ਕਾਰਂ ਕਤ੍ਵਾਨ ਤਂ ਠਾਨਂ, ਪਣਿਪਚ੍ਚ ਪਣੀਦਹਿਂ.

੨੯੫. ‘‘ਤਤੋ ਮਮ ਜਿਨੋ [ਮਂ ਸ ਜਿਨੋ (ਸ੍ਯਾ.)] ਆਹ, ‘ਸਿਜ੍ਝਤਂ ਪਣਿਧੀ ਤਵ;

ਸਸਙ੍ਘੇ ਮੇ ਕਤਂ ਕਾਰਂ, ਅਪ੍ਪਮੇਯ੍ਯਫਲਂ ਤਯਾ.

੨੯੬. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੨੯੭. ‘‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਏਤਦਗ੍ਗਮਨੁਪ੍ਪਤ੍ਤਾ, ਖੇਮਾ ਨਾਮ ਭਵਿਸ੍ਸਤਿ’.

੨੯੮. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗਾ ਅਹਂ.

੨੯੯. ‘‘ਤਤੋ ਚੁਤਾ ਯਾਮਮਗਂ, ਤਤੋਹਂ ਤੁਸਿਤਂ ਗਤਾ;

ਤਤੋ ਚ ਨਿਮ੍ਮਾਨਰਤਿਂ, ਵਸਵਤ੍ਤਿਪੁਰਂ ਤਤੋ.

੩੦੦. ‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਤਸ੍ਸ ਕਮ੍ਮਸ੍ਸ ਵਾਹਸਾ;

ਤਤ੍ਥ ਤਤ੍ਥੇਵ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

੩੦੧. ‘‘ਤਤੋ ਚੁਤਾ ਮਨੁਸ੍ਸਤ੍ਤੇ, ਰਾਜੂਨਂ ਚਕ੍ਕਵਤ੍ਤਿਨਂ;

ਮਣ੍ਡਲੀਨਞ੍ਚ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

੩੦੨. ‘‘ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਦੇਵੇਸੁ ਮਨੁਜੇਸੁ ਚ;

ਸਬ੍ਬਤ੍ਥ ਸੁਖਿਤਾ ਹੁਤ੍ਵਾ, ਨੇਕਕਪ੍ਪੇਸੁ ਸਂਸਰਿਂ.

੩੦੩. ‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਲੋਕਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ [ਚਾਰੁਨਯਨੋ (ਸੀ. ਪੀ.)], ਸਬ੍ਬਧਮ੍ਮਵਿਪਸ੍ਸਕੋ.

੩੦੪. ‘‘ਤਮਹਂ ਲੋਕਨਾਯਕਂ, ਉਪੇਤ੍ਵਾ ਨਰਸਾਰਥਿਂ;

ਧਮ੍ਮਂ ਭਣਿਤਂ ਸੁਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

੩੦੫. ‘‘ਦਸਵਸ੍ਸਸਹਸ੍ਸਾਨਿ, ਤਸ੍ਸ ਵੀਰਸ੍ਸ ਸਾਸਨੇ;

ਬ੍ਰਹ੍ਮਚਰਿਯਂ ਚਰਿਤ੍ਵਾਨ, ਯੁਤ੍ਤਯੋਗਾ ਬਹੁਸ੍ਸੁਤਾ.

੩੦੬. ‘‘ਪਚ੍ਚਯਾਕਾਰਕੁਸਲਾ, ਚਤੁਸਚ੍ਚਵਿਸਾਰਦਾ;

ਨਿਪੁਣਾ ਚਿਤ੍ਤਕਥਿਕਾ, ਸਤ੍ਥੁਸਾਸਨਕਾਰਿਕਾ.

੩੦੭. ‘‘ਤਤੋ ਚੁਤਾਹਂ ਤੁਸਿਤਂ, ਉਪਪਨ੍ਨਾ ਯਸਸ੍ਸਿਨੀ;

ਅਭਿਭੋਮਿ ਤਹਿਂ ਅਞ੍ਞੇ, ਬ੍ਰਹ੍ਮਚਾਰੀਫਲੇਨਹਂ.

੩੦੮. ‘‘ਯਤ੍ਥ ਯਤ੍ਥੂਪਪਨ੍ਨਾਹਂ, ਮਹਾਭੋਗਾ ਮਹਦ੍ਧਨਾ;

ਮੇਧਾਵਿਨੀ ਸੀਲਵਤੀ [ਰੂਪਵਤੀ (ਸੀ. ਸ੍ਯਾ. ਪੀ.)], ਵਿਨੀਤਪਰਿਸਾਪਿ ਚ.

੩੦੯. ‘‘ਭਵਾਮਿ ਤੇਨ ਕਮ੍ਮੇਨ, ਯੋਗੇਨ ਜਿਨਸਾਸਨੇ;

ਸਬ੍ਬਾ ਸਮ੍ਪਤ੍ਤਿਯੋ ਮਯ੍ਹਂ, ਸੁਲਭਾ ਮਨਸੋ ਪਿਯਾ.

੩੧੦. ‘‘ਯੋਪਿ ਮੇ ਭਵਤੇ ਭਤ੍ਤਾ, ਯਤ੍ਥ ਯਤ੍ਥ ਗਤਾਯਪਿ;

ਵਿਮਾਨੇਤਿ ਨ ਮਂ ਕੋਚਿ, ਪਟਿਪਤ੍ਤਿਬਲੇਨ ਮੇ.

੩੧੧. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਨਾਮੇਨ ਕੋਣਾਗਮਨੋ, ਉਪ੍ਪਜ੍ਜਿ ਵਦਤਂ ਵਰੋ.

੩੧੨. ‘‘ਤਦਾ ਹਿ ਬਾਰਾਣਸਿਯਂ, ਸੁਸਮਿਦ੍ਧਕੁਲਪ੍ਪਜਾ [ਸੁਸਮਿਦ੍ਧਿ… (ਸ੍ਯਾ.)];

ਧਨਞ੍ਜਾਨੀ ਸੁਮੇਧਾ ਚ, ਅਹਮ੍ਪਿ ਚ ਤਯੋ ਜਨਾ.

੩੧੩. ‘‘ਸਙ੍ਘਾਰਾਮਮਦਾਸਿਮ੍ਹ, ਦਾਨਸਹਾਯਿਕਾ ਪੁਰੇ [ਨੇਕੇ ਸਹਸ੍ਸਿਕੇ ਮੁਨੇ (ਸ੍ਯਾ.), ਦਾਨਂ ਸਹਸ੍ਸਿਕਂ ਮੁਨੇ (ਪੀ.)];

ਸਙ੍ਘਸ੍ਸ ਚ ਵਿਹਾਰਮ੍ਪਿ [ਸਸਂਘਸ੍ਸ ਵਿਹਾਰਂ ਹਿ (ਸ੍ਯਾ. ਪੀ.)], ਉਦ੍ਦਿਸ੍ਸ ਕਾਰਿਕਾ [ਦਾਯਿਕਾ (ਪੀ.)] ਮਯਂ.

੩੧੪. ‘‘ਤਤੋ ਚੁਤਾ ਮਯਂ ਸਬ੍ਬਾ, ਤਾਵਤਿਂਸੂਪਗਾ ਅਹੁਂ;

ਯਸਸਾ ਅਗ੍ਗਤਂ ਪਤ੍ਤਾ, ਮਨੁਸ੍ਸੇਸੁ ਤਥੇਵ ਚ.

੩੧੫. ‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੩੧੬. ‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

੩੧੭. ‘‘ਤਸ੍ਸਾਸਿਂ ਜੇਟ੍ਠਿਕਾ ਧੀਤਾ, ਸਮਣੀ ਇਤਿ ਵਿਸ੍ਸੁਤਾ;

ਧਮ੍ਮਂ ਸੁਤ੍ਵਾ ਜਿਨਗ੍ਗਸ੍ਸ, ਪਬ੍ਬਜ੍ਜਂ ਸਮਰੋਚਯਿਂ.

੩੧੮. ‘‘ਅਨੁਜਾਨਿ ਨ ਨੋ ਤਾਤੋ, ਅਗਾਰੇਵ ਤਦਾ ਮਯਂ;

ਵੀਸਵਸ੍ਸਸਹਸ੍ਸਾਨਿ, ਵਿਚਰਿਮ੍ਹ ਅਤਨ੍ਦਿਤਾ.

੩੧੯. ‘‘ਕੋਮਾਰਿਬ੍ਰਹ੍ਮਚਰਿਯਂ, ਰਾਜਕਞ੍ਞਾ ਸੁਖੇਧਿਤਾ;

ਬੁਦ੍ਧੋਪਟ੍ਠਾਨਨਿਰਤਾ, ਮੁਦਿਤਾ ਸਤ੍ਤ ਧੀਤਰੋ.

੩੨੦. ‘‘ਸਮਣੀ ਸਮਣਗੁਤ੍ਤਾ ਚ, ਭਿਕ੍ਖੁਨੀ ਭਿਕ੍ਖੁਦਾਯਿਕਾ;

ਧਮ੍ਮਾ ਚੇਵ ਸੁਧਮ੍ਮਾ ਚ, ਸਤ੍ਤਮੀ ਸਙ੍ਘਦਾਯਿਕਾ.

੩੨੧. ‘‘ਅਹਂ ਉਪ੍ਪਲਵਣ੍ਣਾ ਚ, ਪਟਾਚਾਰਾ ਚ ਕੁਣ੍ਡਲਾ;

ਕਿਸਾਗੋਤਮੀ ਧਮ੍ਮਦਿਨ੍ਨਾ, ਵਿਸਾਖਾ ਹੋਤਿ ਸਤ੍ਤਮੀ.

੩੨੨. ‘‘ਕਦਾਚਿ ਸੋ ਨਰਾਦਿਚ੍ਚੋ, ਧਮ੍ਮਂ ਦੇਸੇਸਿ ਅਬ੍ਭੁਤਂ;

ਮਹਾਨਿਦਾਨਸੁਤ੍ਤਨ੍ਤਂ, ਸੁਤ੍ਵਾ ਤਂ ਪਰਿਯਾਪੁਣਿਂ.

੩੨੩. ‘‘ਤੇਹਿ ਕਮ੍ਮੇਹਿ ਸੁਕਤੇਹਿ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੩੨੪. ‘‘ਪਚ੍ਛਿਮੇ ਚ ਭਵੇ ਦਾਨਿ, ਸਾਕਲਾਯ ਪੁਰੁਤ੍ਤਮੇ;

ਰਞ੍ਞੋ ਮਦ੍ਦਸ੍ਸ ਧੀਤਾਮ੍ਹਿ, ਮਨਾਪਾ ਦਯਿਤਾ ਪਿਯਾ.

੩੨੫. ‘‘ਸਹ ਮੇ ਜਾਤਮਤ੍ਤਮ੍ਹਿ, ਖੇਮਂ ਤਮ੍ਹਿ ਪੁਰੇ ਅਹੁ;

ਤਤੋ ਖੇਮਾਤਿ ਨਾਮਂ ਮੇ, ਗੁਣਤੋ ਉਪਪਜ੍ਜਥ.

੩੨੬. ‘‘ਯਦਾਹਂ ਯੋਬ੍ਬਨਂ ਪਤ੍ਤਾ, ਰੂਪਲਾਵਞ੍ਞਭੂਸਿਤਾ [ਰੂਪਵਣ੍ਣਵਿਭੂਸਿਤਾ (ਸ੍ਯਾ.), ਰੂਪਵਨ੍ਤਾ ਵਿਭੂਸਿਤਾ (ਪੀ.), ਰੂਪਵਿਲਾਸਭੂਸਿਤਾ (ਕ.)];

ਤਦਾ ਅਦਾਸਿ ਮਂ ਤਾਤੋ, ਬਿਮ੍ਬਿਸਾਰਸ੍ਸ ਰਾਜਿਨੋ.

੩੨੭. ‘‘ਤਸ੍ਸਾਹਂ ਸੁਪ੍ਪਿਯਾ ਆਸਿਂ, ਰੂਪਕੇ ਲਾਯਨੇ ਰਤਾ;

ਰੂਪਾਨਂ ਦੋਸਵਾਦੀਤਿ, ਨ ਉਪੇਸਿਂ ਮਹਾਦਯਂ.

੩੨੮. ‘‘ਬਿਮ੍ਬਿਸਾਰੋ ਤਦਾ ਰਾਜਾ, ਮਮਾਨੁਗ੍ਗਹਬੁਦ੍ਧਿਯਾ;

ਵਣ੍ਣਯਿਤ੍ਵਾ ਵੇਲ਼ੁਵਨਂ, ਗਾਯਕੇ ਗਾਪਯੀ ਮਮਂ.

੩੨੯. ‘‘ਰਮ੍ਮਂ ਵੇਲ਼ੁਵਨਂ ਯੇਨ, ਨ ਦਿਟ੍ਠਂ ਸੁਗਤਾਲਯਂ;

ਨ ਤੇਨ ਨਨ੍ਦਨਂ ਦਿਟ੍ਠਂ, ਇਤਿ ਮਞ੍ਞਾਮਸੇ ਮਯਂ.

੩੩੦. ‘‘ਯੇਨ ਵੇਲ਼ੁਵਨਂ ਦਿਟ੍ਠਂ, ਨਰਨਨ੍ਦਨਨਨ੍ਦਨਂ;

ਸੁਦਿਟ੍ਠਂ ਨਨ੍ਦਨਂ ਤੇਨ, ਅਮਰਿਨ੍ਦਸੁਨਨ੍ਦਨਂ.

੩੩੧. ‘‘ਵਿਹਾਯ ਨਨ੍ਦਨਂ ਦੇਵਾ, ਓਤਰਿਤ੍ਵਾ ਮਹੀਤਲਂ [ਮਹੀਤਲੇ (ਸ੍ਯਾ. ਪੀ.)];

ਰਮ੍ਮਂ ਵੇਲ਼ੁਵਨਂ ਦਿਸ੍ਵਾ, ਨ ਤਪ੍ਪਨ੍ਤਿ ਸੁਵਿਮ੍ਹਿਤਾ.

੩੩੨. ‘‘ਰਾਜਪੁਞ੍ਞੇਨ ਨਿਬ੍ਬਤ੍ਤਂ, ਬੁਦ੍ਧਪੁਞ੍ਞੇਨ ਭੂਸਿਤਂ;

ਕੋ ਵਤ੍ਤਾ ਤਸ੍ਸ ਨਿਸ੍ਸੇਸਂ, ਵਨਸ੍ਸ ਗੁਣਸਞ੍ਚਯਂ.

੩੩੩. ‘‘ਤਂ ਸੁਤ੍ਵਾ ਵਨਸਮਿਦ੍ਧਂ, ਮਮ ਸੋਤਮਨੋਹਰਂ;

ਦਟ੍ਠੁਕਾਮਾ ਤਮੁਯ੍ਯਾਨਂ, ਰਞ੍ਞੋ ਆਰੋਚਯਿਂ ਤਦਾ.

੩੩੪. ‘‘ਮਹਤਾ ਪਰਿਵਾਰੇਨ, ਤਦਾ ਚ ਸੋ [ਤਦਾ ਮਂ ਸੋ (ਸ੍ਯਾ. ਪੀ.)] ਮਹੀਪਤਿ;

ਮਂ ਪੇਸੇਸਿ [ਸਂਪੇਸੇਸਿ (ਸ੍ਯਾ.), ਸਮ੍ਪਾਪੇਸਿ (ਪੀ.)] ਤਮੁਯ੍ਯਾਨਂ, ਦਸ੍ਸਨਾਯ ਸਮੁਸ੍ਸੁਕਂ.

੩੩੫. ‘‘ਗਚ੍ਛ ਪਸ੍ਸ ਮਹਾਭੋਗੇ, ਵਨਂ ਨੇਤ੍ਤਰਸਾਯਨਂ;

ਯਂ ਸਦਾ ਭਾਤਿ ਸਿਰਿਯਾ, ਸੁਗਤਾਭਾਨੁਰਞ੍ਜਿਤਂ.

੩੩੬. ‘‘ਯਦਾ ਚ ਪਿਣ੍ਡਾਯ ਮੁਨਿ, ਗਿਰਿਬ੍ਬਜਪੁਰੁਤ੍ਤਮਂ;

ਪਵਿਟ੍ਠੋਹਂ ਤਦਾਯੇਵ, ਵਨਂ ਦਟ੍ਠੁਮੁਪਾਗਮਿਂ.

੩੩੭. ‘‘ਤਦਾ ਤਂ ਫੁਲ੍ਲਵਿਪਿਨਂ, ਨਾਨਾਭਮਰਕੂਜਿਤਂ;

ਕੋਕਿਲਾਗੀਤਸਹਿਤਂ, ਮਯੂਰਗਣਨਚ੍ਚਿਤਂ.

੩੩੮. ‘‘ਅਪ੍ਪਸਦ੍ਦਮਨਾਕਿਣ੍ਣਂ, ਨਾਨਾਚਙ੍ਕਮਭੂਸਿਤਂ;

ਕੁਟਿਮਣ੍ਡਪਸਙ੍ਕਿਣ੍ਣਂ, ਯੋਗੀਵਰਵਿਰਾਜਿਤਂ.

੩੩੯. ‘‘ਵਿਚਰਨ੍ਤੀ ਅਮਞ੍ਞਿਸ੍ਸਂ, ਸਫਲਂ ਨਯਨਂ ਮਮ;

ਤਤ੍ਥਾਪਿ ਤਰੁਣਂ ਭਿਕ੍ਖੁਂ, ਯੁਤ੍ਤਂ ਦਿਸ੍ਵਾ ਵਿਚਿਨ੍ਤਯਿਂ.

੩੪੦. ‘‘‘ਈਦਿਸੇ ਵਿਪਿਨੇ ਰਮ੍ਮੇ, ਠਿਤੋਯਂ ਨਵਯੋਬ੍ਬਨੇ;

ਵਸਨ੍ਤਮਿਵ ਕਨ੍ਤੇਨ, ਰੂਪੇਨ ਚ ਸਮਨ੍ਵਿਤੋ.

੩੪੧. ‘‘‘ਨਿਸਿਨ੍ਨੋ ਰੁਕ੍ਖਮੂਲਮ੍ਹਿ, ਮੁਣ੍ਡੋ ਸਙ੍ਘਾਟਿਪਾਰੁਤੋ;

ਝਾਯਤੇ ਵਤਯਂ ਭਿਕ੍ਖੁ, ਹਿਤ੍ਵਾ ਵਿਸਯਜਂ ਰਤਿਂ.

੩੪੨. ‘‘‘ਨਨੁ ਨਾਮ ਗਹਟ੍ਠੇਨ, ਕਾਮਂ ਭੁਤ੍ਵਾ ਯਥਾਸੁਖਂ;

ਪਚ੍ਛਾ ਜਿਣ੍ਣੇਨ ਧਮ੍ਮੋਯਂ, ਚਰਿਤਬ੍ਬੋ ਸੁਭਦ੍ਦਕੋ’.

੩੪੩. ‘‘ਸੁਞ੍ਞਕਨ੍ਤਿ ਵਿਦਿਤ੍ਵਾਨ, ਗਨ੍ਧਗੇਹਂ ਜਿਨਾਲਯਂ;

ਉਪੇਤ੍ਵਾ ਜਿਨਮਦ੍ਦਕ੍ਖਂ, ਉਦਯਨ੍ਤਂਵ ਭਾਕਰਂ.

੩੪੪. ‘‘ਏਕਕਂ ਸੁਖਮਾਸੀਨਂ, ਬੀਜਮਾਨਂ ਵਰਿਤ੍ਥਿਯਾ;

ਦਿਸ੍ਵਾਨੇਵਂ ਵਿਚਿਨ੍ਤੇਸਿਂ, ਨਾਯਂ ਲੂਖੋ ਨਰਾਸਭੋ.

੩੪੫. ‘‘ਸਾ ਕਞ੍ਞਾ ਕਨਕਾਭਾਸਾ, ਪਦੁਮਾਨਨਲੋਚਨਾ;

ਬਿਮ੍ਬੋਟ੍ਠੀ ਕੁਨ੍ਦਦਸਨਾ, ਮਨੋਨੇਤ੍ਤਰਸਾਯਨਾ.

੩੪੬. ‘‘ਹੇਮਦੋਲਾਭਸਵਨਾ [ਹੇਮਦੋਲਾ ਸੁਵਦੀਨਾ (ਸ੍ਯਾ.)], ਕਲਿਕਾਕਾਰਸੁਤ੍ਥਨੀ [ਕਲਸਾਕਾਰਸੁਤ੍ਤਨੀ (ਸੀ. ਪੀ.), ਕਮਲਾਕਾਰਸੁਤ੍ਤਨੀ (ਸ੍ਯਾ.)];

ਵੇਦਿਮਜ੍ਝਾਵ ਸੁਸ੍ਸੋਣੀ [ਕਨੁਮਜ੍ਝਾਵ ਸੁਸ੍ਸੋਣੀ (ਸੀ.), ਵੇਦਿਮਜ੍ਝਾ ਵਰਸੋਣੀ (ਸ੍ਯਾ. ਪੀ.)], ਰਮ੍ਭੋਰੁ ਚਾਰੁਭੂਸਨਾ.

੩੪੭. ‘‘ਰਤ੍ਤਂਸਕੁਪਸਂਬ੍ਯਾਨਾ, ਨੀਲਮਟ੍ਠਨਿਵਾਸਨਾ;

ਅਤਪ੍ਪਨੇਯ੍ਯਰੂਪੇਨ, ਹਾਸਭਾਵਸਮਨ੍ਵਿਤਾ [ਹਾਵਭਾਵਸਮਨ੍ਵਿਤਾ (ਸੀ.), ਸਬ੍ਬਾਭਰਣਮਣ੍ਡਿਤਾ (ਸ੍ਯਾ.)].

੩੪੮. ‘‘ਦਿਸ੍ਵਾ ਤਮੇਵਂ ਚਿਨ੍ਤੇਸਿਂ, ਅਹੋਯਮਭਿਰੂਪਿਨੀ;

ਨ ਮਯਾਨੇਨ ਨੇਤ੍ਤੇਨ, ਦਿਟ੍ਠਪੁਬ੍ਬਾ ਕੁਦਾਚਨਂ.

੩੪੯. ‘‘ਤਤੋ ਜਰਾਭਿਭੂਤਾ ਸਾ, ਵਿਵਣ੍ਣਾ ਵਿਕਤਾਨਨਾ;

ਭਿਨ੍ਨਦਨ੍ਤਾ ਸੇਤਸਿਰਾ, ਸਲਾਲਾ ਵਦਨਾਸੁਚਿ.

੩੫੦. ‘‘ਸਙ੍ਖਿਤ੍ਤਕਣ੍ਣਾ ਸੇਤਕ੍ਖੀ, ਲਮ੍ਬਾਸੁਭਪਯੋਧਰਾ;

ਵਲਿਵਿਤਤਸਬ੍ਬਙ੍ਗੀ, ਸਿਰਾਵਿਤਤਦੇਹਿਨੀ.

੩੫੧. ‘‘ਨਤਙ੍ਗਾ ਦਣ੍ਡਦੁਤਿਯਾ, ਉਪ੍ਫਾਸੁਲਿਕਤਾ [ਉਪ੍ਪਣ੍ਡੁਪਣ੍ਡੁਕਾ (ਸੀ. ਸ੍ਯਾ.)] ਕਿਸਾ;

ਪਵੇਧਮਾਨਾ ਪਤਿਤਾ, ਨਿਸ੍ਸਸਨ੍ਤੀ ਮੁਹੁਂ ਮੁਹੁਂ.

੩੫੨. ‘‘ਤਤੋ ਮੇ ਆਸਿ ਸਂਵੇਗੋ, ਅਬ੍ਭੁਤੋ ਲੋਮਹਂਸਨੋ;

ਧਿਰਤ੍ਥੁ ਰੂਪਂ ਅਸੁਚਿਂ, ਰਮਨ੍ਤੇ ਯਤ੍ਥ ਬਾਲਿਸਾ.

੩੫੩. ‘‘ਤਦਾ ਮਹਾਕਾਰੁਣਿਕੋ, ਦਿਸ੍ਵਾ ਸਂਵਿਗ੍ਗਮਾਨਸਂ;

ਉਦਗ੍ਗਚਿਤ੍ਤੋ ਸੁਗਤੋ, ਇਮਾ ਗਾਥਾ ਅਭਾਸਥ.

੩੫੪. ‘‘‘ਆਤੁਰਂ ਅਸੁਚਿਂ ਪੂਤਿਂ, ਪਸ੍ਸ ਖੇਮੇ ਸਮੁਸ੍ਸਯਂ;

ਉਗ੍ਘਰਨ੍ਤਂ ਪਗ੍ਘਰਨ੍ਤਂ, ਬਾਲਾਨਂ ਅਭਿਨਨ੍ਦਿਤਂ.

੩੫੫. ‘‘‘ਅਸੁਭਾਯ ਚਿਤ੍ਤਂ ਭਾਵੇਹਿ, ਏਕਗ੍ਗਂ ਸੁਸਮਾਹਿਤਂ;

ਸਤਿ ਕਾਯਗਤਾ ਤ੍ਯਤ੍ਥੁ, ਨਿਬ੍ਬਿਦਾ ਬਹੁਲਾ ਭਵ.

੩੫੬. ‘‘‘ਯਥਾ ਇਦਂ ਤਥਾ ਏਤਂ, ਯਥਾ ਏਤਂ ਤਥਾ ਇਦਂ;

ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਕਾਯੇ ਛਨ੍ਦਂ ਵਿਰਾਜਯ.

੩੫੭. ‘‘‘ਅਨਿਮਿਤ੍ਤਞ੍ਚ ਭਾਵੇਹਿ, ਮਾਨਾਨੁਸਯਮੁਜ੍ਜਹ;

ਤਤੋ ਮਾਨਾਭਿਸਮਯਾ, ਉਪਸਨ੍ਤਾ ਚਰਿਸ੍ਸਸਿ.

੩੫੮. ‘‘‘ਯੇ ਰਾਗਰਤ੍ਤਾਨੁਪਤਨ੍ਤਿ ਸੋਤਂ, ਸਯਂ ਕਤਂ ਮਕ੍ਕਟਕੋਵ ਜਾਲਂ;

ਏਤਮ੍ਪਿ ਛੇਤ੍ਵਾਨ ਪਰਿਬ੍ਬਜਨ੍ਤਿ, ਨ ਪੇਕ੍ਖਿਨੋ [ਅਨਪੇਕ੍ਖਿਨੋ (ਸੀ. ਸ੍ਯਾ. ਪੀ.)] ਕਾਮਸੁਖਂ ਪਹਾਯ’.

੩੫੯. ‘‘ਤਤੋ ਕਲ੍ਲਿਤਚਿਤ੍ਤਂ [ਕਲ੍ਲਿਕਚਿਤ੍ਤਂ (ਸ੍ਯਾ.), ਕਲਿਕਚਿਤ੍ਤਂ (ਪੀ.)] ਮਂ, ਞਤ੍ਵਾਨ ਨਰਸਾਰਥਿ;

ਮਹਾਨਿਦਾਨਂ ਦੇਸੇਸਿ, ਸੁਤ੍ਤਨ੍ਤਂ ਵਿਨਯਾਯ ਮੇ.

੩੬੦. ‘‘ਸੁਤ੍ਵਾ ਸੁਤ੍ਤਨ੍ਤਸੇਟ੍ਠਂ ਤਂ, ਪੁਬ੍ਬਸਞ੍ਞਮਨੁਸ੍ਸਰਿਂ;

ਤਤ੍ਥ ਠਿਤਾਵਹਂ ਸਨ੍ਤੀ, ਧਮ੍ਮਚਕ੍ਖੁਂ ਵਿਸੋਧਯਿਂ.

੩੬੧. ‘‘ਨਿਪਤਿਤ੍ਵਾ ਮਹੇਸਿਸ੍ਸ, ਪਾਦਮੂਲਮ੍ਹਿ ਤਾਵਦੇ;

ਅਚ੍ਚਯਂ ਦੇਸਨਤ੍ਥਾਯ, ਇਦਂ ਵਚਨਮਬ੍ਰਵਿਂ.

੩੬੨. ‘‘‘ਨਮੋ ਤੇ ਸਬ੍ਬਦਸ੍ਸਾਵੀ, ਨਮੋ ਤੇ ਕਰੁਣਾਕਰ;

ਨਮੋ ਤੇ ਤਿਣ੍ਣਸਂਸਾਰ, ਨਮੋ ਤੇ ਅਮਤਂ ਦਦ.

੩੬੩. ‘‘‘ਦਿਟ੍ਠਿਗਹਨਪਕ੍ਖਨ੍ਦਾ [… ਪਕ੍ਖਨ੍ਤਾ (ਸੀ. ਸ੍ਯਾ.)], ਕਾਮਰਾਗਵਿਮੋਹਿਤਾ;