੭. ਮਹਾਪਜਾਪਤਿਗੋਤਮੀਥੇਰੀਅਪਦਾਨਂ

੯੭. ‘‘ਏਕਦਾ ਲੋਕਪਜ੍ਜੋਤੋ, ਵੇਸਾਲਿਯਂ ਮਹਾਵਨੇ;

ਕੂਟਾਗਾਰੇ ਸੁਸਾਲਾਯਂ, ਵਸਤੇ ਨਰਸਾਰਥਿ.

੯੮. ‘‘ਤਦਾ ਜਿਨਸ੍ਸ ਮਾਤੁਚ੍ਛਾ, ਮਹਾਗੋਤਮਿ ਭਿਕ੍ਖੁਨੀ;

ਤਹਿਂ ਕਤੇ [ਤਹਿਂਯੇਵ (ਸ੍ਯਾ.)] ਪੁਰੇ ਰਮ੍ਮੇ, ਵਸੀ ਭਿਕ੍ਖੁਨੁਪਸ੍ਸਯੇ.

੯੯. ‘‘ਭਿਕ੍ਖੁਨੀਹਿ ਵਿਮੁਤ੍ਤਾਹਿ, ਸਤੇਹਿ ਸਹ ਪਞ੍ਚਹਿ;

ਰਹੋਗਤਾਯ ਤਸ੍ਸੇਵਂ, ਚਿਤਸ੍ਸਾਸਿ [ਚਿਤ੍ਤਸ੍ਸਾਪਿ (ਸ੍ਯਾ.)] ਵਿਤਕ੍ਕਿਤਂ.

੧੦੦. ‘‘ਬੁਦ੍ਧਸ੍ਸ ਪਰਿਨਿਬ੍ਬਾਨਂ, ਸਾਵਕਗ੍ਗਯੁਗਸ੍ਸ ਵਾ;

ਰਾਹੁਲਾਨਨ੍ਦਨਨ੍ਦਾਨਂ, ਨਾਹਂ ਲਚ੍ਛਾਮਿ ਪਸ੍ਸਿਤੁਂ.

੧੦੧. ‘‘ਬੁਦ੍ਧਸ੍ਸ ਪਰਿਨਿਬ੍ਬਾਨਾ, ਸਾਵਕਗ੍ਗਯੁਗਸ੍ਸ ਵਾ;

ਮਹਾਕਸ੍ਸਪਨਨ੍ਦਾਨਂ, ਆਨਨ੍ਦਰਾਹੁਲਾਨ ਚ.

੧੦੨. ‘‘ਪਟਿਕਚ੍ਚਾਯੁਸਙ੍ਖਾਰਂ [ਪਟਿਗਚ੍ਚਾਯੁਸਙ੍ਖਾਰੇ (ਸੀ.)], ਓਸਜ੍ਜਿਤ੍ਵਾਨ ਨਿਬ੍ਬੁਤਿਂ;

ਗਚ੍ਛੇਯ੍ਯਂ ਲੋਕਨਾਥੇਨ, ਅਨੁਞ੍ਞਾਤਾ ਮਹੇਸਿਨਾ.

੧੦੩. ‘‘ਤਥਾ ਪਞ੍ਚਸਤਾਨਮ੍ਪਿ, ਭਿਕ੍ਖੁਨੀਨਂ ਵਿਤਕ੍ਕਿਤਂ;

ਆਸਿ ਖੇਮਾਦਿਕਾਨਮ੍ਪਿ, ਏਤਦੇਵ ਵਿਤਕ੍ਕਿਤਂ.

੧੦੪. ‘‘ਭੂਮਿਚਾਲੋ ਤਦਾ ਆਸਿ, ਨਾਦਿਤਾ ਦੇਵਦੁਨ੍ਦੁਭੀ;

ਉਪਸ੍ਸਯਾਧਿਵਤ੍ਥਾਯੋ, ਦੇਵਤਾ ਸੋਕਪੀਲ਼ਿਤਾ.

੧੦੫. ‘‘ਵਿਲਪਨ੍ਤਾ ਸੁਕਰੁਣਂ [ਸਕਰੁਣਂ (ਸੀ. ਸ੍ਯਾ. ਪੀ.)], ਤਤ੍ਥਸ੍ਸੂਨਿ ਪਵਤ੍ਤਯੁਂ;

ਮਿਤ੍ਤਾ [ਸਬ੍ਬਾ (ਸ੍ਯਾ. ਪੀ.)] ਭਿਕ੍ਖੁਨਿਯੋ ਤਾਹਿ, ਉਪਗਨ੍ਤ੍ਵਾਨ ਗੋਤਮਿਂ.

੧੦੬. ‘‘ਨਿਪਚ੍ਚ ਸਿਰਸਾ ਪਾਦੇ, ਇਦਂ ਵਚਨਮਬ੍ਰਵੁਂ;

‘ਤਤ੍ਥ ਤੋਯਲਵਾਸਿਤ੍ਤਾ, ਮਯਮਯ੍ਯੇ ਰਹੋਗਤਾ.

੧੦੭. ‘‘‘ਸਾ ਚਲਾ ਚਲਿਤਾ ਭੂਮਿ, ਨਾਦਿਤਾ ਦੇਵਦੁਨ੍ਦੁਭੀ;

ਪਰਿਦੇਵਾ ਚ ਸੁਯ੍ਯਨ੍ਤੇ, ਕਿਮਤ੍ਥਂ ਨੂਨ ਗੋਤਮੀ’.

੧੦੮. ‘‘ਤਦਾ ਅਵੋਚ ਸਾ ਸਬ੍ਬਂ, ਯਥਾਪਰਿਵਿਤਕ੍ਕਿਤਂ;

ਤਾਯੋਪਿ ਸਬ੍ਬਾ ਆਹਂਸੁ, ਯਥਾਪਰਿਵਿਤਕ੍ਕਿਤਂ.

੧੦੯. ‘‘‘ਯਦਿ ਤੇ ਰੁਚਿਤਂ ਅਯ੍ਯੇ, ਨਿਬ੍ਬਾਨਂ ਪਰਮਂ ਸਿਵਂ;

ਨਿਬ੍ਬਾਯਿਸ੍ਸਾਮ ਸਬ੍ਬਾਪਿ, ਬੁਦ੍ਧਾਨੁਞ੍ਞਾਯ ਸੁਬ੍ਬਤੇ.

੧੧੦. ‘‘‘ਮਯਂ ਸਹਾਵ ਨਿਕ੍ਖਨ੍ਤਾ, ਘਰਾਪਿ ਚ ਭਵਾਪਿ ਚ;

ਸਹਾਯੇਵ ਗਮਿਸ੍ਸਾਮ, ਨਿਬ੍ਬਾਨਂ ਪਦਮੁਤ੍ਤਮਂ’.

੧੧੧. ‘‘‘ਨਿਬ੍ਬਾਨਾਯ ਵਜਨ੍ਤੀਨਂ, ਕਿਂ ਵਕ੍ਖਾਮੀ’ਤਿ ਸਾ ਵਦਂ;

ਸਹ ਸਬ੍ਬਾਹਿ ਨਿਗ੍ਗਞ੍ਛਿ, ਭਿਕ੍ਖੁਨੀਨਿਲਯਾ ਤਦਾ.

੧੧੨. ‘‘ਉਪਸ੍ਸਯੇ ਯਾਧਿਵਤ੍ਥਾ, ਦੇਵਤਾ ਤਾ ਖਮਨ੍ਤੁ ਮੇ;

ਭਿਕ੍ਖੁਨੀਨਿਲਯਸ੍ਸੇਦਂ, ਪਚ੍ਛਿਮਂ ਦਸ੍ਸਨਂ ਮਮ.

੧੧੩. ‘‘ਨ ਜਰਾ ਮਚ੍ਚੁ ਵਾ ਯਤ੍ਥ, ਅਪ੍ਪਿਯੇਹਿ ਸਮਾਗਮੋ;

ਪਿਯੇਹਿ ਨ ਵਿਯੋਗੋਤ੍ਥਿ, ਤਂ ਵਜਿਸ੍ਸਂ [ਤਂ ਵਜ੍ਜਿਯਂ (ਸ੍ਯਾ.)] ਅਸਙ੍ਖਤਂ.

੧੧੪. ‘‘ਅਵੀਤਰਾਗਾ ਤਂ ਸੁਤ੍ਵਾ, ਵਚਨਂ ਸੁਗਤੋਰਸਾ;

ਸੋਕਟ੍ਟਾ ਪਰਿਦੇਵਿਂਸੁ, ਅਹੋ ਨੋ ਅਪ੍ਪਪੁਞ੍ਞਤਾ.

੧੧੫. ‘‘ਭਿਕ੍ਖੁਨੀਨਿਲਯੋ ਸੁਞ੍ਞੋ, ਭੂਤੋ ਤਾਹਿ ਵਿਨਾ ਅਯਂ;

ਪਭਾਤੇ ਵਿਯ ਤਾਰਾਯੋ, ਨ ਦਿਸ੍ਸਨ੍ਤਿ ਜਿਨੋਰਸਾ.

੧੧੬. ‘‘ਨਿਬ੍ਬਾਨਂ ਗੋਤਮੀ ਯਾਤਿ, ਸਤੇਹਿ ਸਹ ਪਞ੍ਚਹਿ;

ਨਦੀਸਤੇਹਿਵ ਸਹ, ਗਙ੍ਗਾ ਪਞ੍ਚਹਿ ਸਾਗਰਂ.

੧੧੭. ‘‘ਰਥਿਯਾਯ ਵਜਨ੍ਤਿਯੋ [ਵਜਨ੍ਤਿਂ ਤਂ (ਸੀ.), ਵਜਨ੍ਤਿ ਤਂ (ਸ੍ਯਾ.), ਵਜਨ੍ਤਾਨਂ (ਪੀ.)], ਦਿਸ੍ਵਾ ਸਦ੍ਧਾ ਉਪਾਸਿਕਾ;

ਘਰਾ ਨਿਕ੍ਖਮ੍ਮ ਪਾਦੇਸੁ, ਨਿਪਚ੍ਚ ਇਦਮਬ੍ਰਵੁਂ.

੧੧੮. ‘‘‘ਪਸੀਦਸ੍ਸੁ ਮਹਾਭੋਗੇ, ਅਨਾਥਾਯੋ ਵਿਹਾਯ ਨੋ;

ਤਯਾ ਨ ਯੁਤ੍ਤਾ [ਯੁਤ੍ਤਂ (ਸੀ. ਸ੍ਯਾ. ਪੀ.)] ਨਿਬ੍ਬਾਤੁਂ, ਇਚ੍ਛਟ੍ਟਾ ਵਿਲਪਿਂਸੁ ਤਾ’.

੧੧੯. ‘‘ਤਾਸਂ ਸੋਕਪਹਾਨਤ੍ਥਂ, ਅਵੋਚ ਮਧੁਰਂ ਗਿਰਂ;

‘ਰੁਦਿਤੇਨ ਅਲਂ ਪੁਤ੍ਤਾ, ਹਾਸਕਾਲੋਯਮਜ੍ਜ ਵੋ.

੧੨੦. ‘‘‘ਪਰਿਞ੍ਞਾਤਂ ਮਯਾ ਦੁਕ੍ਖਂ, ਦੁਕ੍ਖਹੇਤੁ ਵਿਵਜ੍ਜਿਤੋ;

ਨਿਰੋਧੋ ਮੇ ਸਚ੍ਛਿਕਤੋ, ਮਗ੍ਗੋ ਚਾਪਿ ਸੁਭਾਵਿਤੋ.

ਪਠਮਂ ਭਾਣਵਾਰਂ.

੧੨੧. ‘‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.

੧੨੨. ‘‘‘ਯਸ੍ਸਤ੍ਥਾਯ ਪਬ੍ਬਜਿਤਾ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

੧੨੩. ‘‘‘ਬੁਦ੍ਧੋ ਤਸ੍ਸ ਚ ਸਦ੍ਧਮ੍ਮੋ, ਅਨੂਨੋ ਯਾਵ ਤਿਟ੍ਠਤਿ;

ਨਿਬ੍ਬਾਤੁਂ ਤਾਵ ਕਾਲੋ ਮੇ, ਮਾ ਮਂ ਸੋਚਥ ਪੁਤ੍ਤਿਕਾ.

੧੨੪. ‘‘‘ਕੋਣ੍ਡਞ੍ਞਾਨਨ੍ਦਨਨ੍ਦਾਦੀ, ਤਿਟ੍ਠਨ੍ਤਿ ਰਾਹੁਲੋ ਜਿਨੋ;

ਸੁਖਿਤੋ ਸਹਿਤੋ ਸਙ੍ਘੋ, ਹਤਦਬ੍ਬਾ ਚ ਤਿਤ੍ਥਿਯਾ.

੧੨੫. ‘‘‘ਓਕ੍ਕਾਕਵਂਸਸ੍ਸ ਯਸੋ, ਉਸ੍ਸਿਤੋ ਮਾਰਮਦ੍ਦਨੋ;

ਨਨੁ ਸਮ੍ਪਤਿ ਕਾਲੋ ਮੇ, ਨਿਬ੍ਬਾਨਤ੍ਥਾਯ ਪੁਤ੍ਤਿਕਾ.

੧੨੬. ‘‘‘ਚਿਰਪ੍ਪਭੁਤਿ ਯਂ ਮਯ੍ਹਂ, ਪਤ੍ਥਿਤਂ ਅਜ੍ਜ ਸਿਜ੍ਝਤੇ;

ਆਨਨ੍ਦਭੇਰਿਕਾਲੋਯਂ, ਕਿਂ ਵੋ ਅਸ੍ਸੂਹਿ ਪੁਤ੍ਤਿਕਾ.

੧੨੭. ‘‘‘ਸਚੇ ਮਯਿ ਦਯਾ ਅਤ੍ਥਿ, ਯਦਿ ਚਤ੍ਥਿ ਕਤਞ੍ਞੁਤਾ;

ਸਦ੍ਧਮ੍ਮਟ੍ਠਿਤਿਯਾ ਸਬ੍ਬਾ, ਕਰੋਥ ਵੀਰਿਯਂ ਦਲ਼੍ਹਂ.

੧੨੮. ‘‘‘ਥੀਨਂ ਅਦਾਸਿ ਪਬ੍ਬਜ੍ਜਂ, ਸਮ੍ਬੁਦ੍ਧੋ ਯਾਚਿਤੋ ਮਯਾ;

ਤਸ੍ਮਾ ਯਥਾਹਂ ਨਨ੍ਦਿਸ੍ਸਂ, ਤਥਾ ਤਮਨੁਤਿਟ੍ਠਥ’.

੧੨੯. ‘‘ਤਾ ਏਵਮਨੁਸਾਸਿਤ੍ਵਾ, ਭਿਕ੍ਖੁਨੀਹਿ ਪੁਰਕ੍ਖਤਾ;

ਉਪੇਚ੍ਚ ਬੁਦ੍ਧਂ ਵਨ੍ਦਿਤ੍ਵਾ, ਇਦਂ ਵਚਨਮਬ੍ਰਵਿ.

੧੩੦. ‘‘‘ਅਹਂ ਸੁਗਤ ਤੇ ਮਾਤਾ, ਤ੍ਵਞ੍ਚ ਵੀਰ ਪਿਤਾ ਮਮ;

ਸਦ੍ਧਮ੍ਮਸੁਖਦ [ਸਦ੍ਧਮ੍ਮਸੁਖਦੋ (ਸੀ. ਸ੍ਯਾ. ਪੀ.)] ਨਾਥ, ਤਯਾ ਜਾਤਾਮ੍ਹਿ ਗੋਤਮ.

੧੩੧. ‘‘‘ਸਂਵਦ੍ਧਿਤੋਯਂ ਸੁਗਤ, ਰੂਪਕਾਯੋ ਮਯਾ ਤਵ;

ਅਨਿਨ੍ਦਿਤੋ [ਆਨਨ੍ਦਿਯੋ (ਸ੍ਯਾ.), ਅਨਿਨ੍ਦਿਯੋ (ਪੀ.)] ਧਮ੍ਮਕਾਯੋ [ਧਮ੍ਮਤਨੁ (ਸੀ. ਪੀ. ਕ.)], ਮਮ ਸਂਵਦ੍ਧਿਤੋ ਤਯਾ.

੧੩੨. ‘‘‘ਮੁਹੁਤ੍ਤਂ ਤਣ੍ਹਾਸਮਣਂ, ਖੀਰਂ ਤ੍ਵਂ ਪਾਯਿਤੋ ਮਯਾ;

ਤਯਾਹਂ ਸਨ੍ਤਮਚ੍ਚਨ੍ਤਂ, ਧਮ੍ਮਖੀਰਞ੍ਹਿ [ਧਮ੍ਮਖੀਰਮ੍ਪਿ (ਸ੍ਯਾ., ਕ.)] ਪਾਯਿਤਾ.

੧੩੩. ‘‘‘ਬਨ੍ਧਨਾਰਕ੍ਖਨੇ ਮਯ੍ਹਂ, ਅਣਣੋ [ਅਨਣੋ (ਸੀ. ਸ੍ਯਾ. ਪੀ.)] ਤ੍ਵਂ ਮਹਾਮੁਨੇ;

ਪੁਤ੍ਤਕਾਮਾ ਥਿਯੋ ਯਾਚਂ, ਲਭਨ੍ਤਿ ਤਾਦਿਸਂ ਸੁਤਂ.

੧੩੪. ‘‘‘ਮਨ੍ਧਾਤਾਦਿਨਰਿਨ੍ਦਾਨਂ, ਯਾ ਮਾਤਾ ਸਾ ਭਵਣ੍ਣਵੇ;

ਨਿਮੁਗ੍ਗਾਹਂ ਤਯਾ ਪੁਤ੍ਤ, ਤਾਰਿਤਾ ਭਵਸਾਗਰਾ.

੧੩੫. ‘‘‘ਰਞ੍ਞੋ ਮਾਤਾ ਮਹੇਸੀਤਿ, ਸੁਲਭਂ ਨਾਮਮਿਤ੍ਥਿਨਂ;

ਬੁਦ੍ਧਮਾਤਾਤਿ ਯਂ ਨਾਮਂ, ਏਤਂ ਪਰਮਦੁਲ੍ਲਭਂ.

੧੩੬. ‘‘‘ਤਞ੍ਚ ਲਦ੍ਧਂ ਮਹਾਵੀਰ, ਪਣਿਧਾਨਂ ਮਮਂ ਤਯਾ;

ਅਣੁਕਂ ਵਾ ਮਹਨ੍ਤਂ ਵਾ, ਤਂ ਸਬ੍ਬਂ ਪੂਰਿਤਂ ਮਯਾ.

੧੩੭. ‘‘‘ਪਰਿਨਿਬ੍ਬਾਤੁਮਿਚ੍ਛਾਮਿ, ਵਿਹਾਯੇਮਂ ਕਲ਼ੇਵਰਂ;

ਅਨੁਜਾਨਾਹਿ ਮੇ ਵੀਰ, ਦੁਕ੍ਖਨ੍ਤਕਰ ਨਾਯਕ.

੧੩੮. ‘‘‘ਚਕ੍ਕਙ੍ਕੁਸਧਜਾਕਿਣ੍ਣੇ, ਪਾਦੇ ਕਮਲਕੋਮਲੇ;

ਪਸਾਰੇਹਿ ਪਣਾਮਂ ਤੇ, ਕਰਿਸ੍ਸਂ ਪੁਤ੍ਤਉਤ੍ਤਮੇ [ਪੁਤ੍ਤਪੇਮਸਾ (ਸੀ. ਪੀ.), ਪੁਤ੍ਤਪੇਮਹਂ (ਸ੍ਯਾ.)].

੧੩੯. ‘‘‘ਸੁਵਣ੍ਣਰਾਸਿਸਙ੍ਕਾਸਂ, ਸਰੀਰਂ ਕੁਰੁ ਪਾਕਟਂ;

ਕਤ੍ਵਾ ਦੇਹਂ ਸੁਦਿਟ੍ਠਂ ਤੇ, ਸਨ੍ਤਿਂ ਗਚ੍ਛਾਮਿ ਨਾਯਕ’.

੧੪੦. ‘‘ਦ੍ਵਤ੍ਤਿਂਸਲਕ੍ਖਣੂਪੇਤਂ, ਸੁਪ੍ਪਭਾਲਙ੍ਕਤਂ ਤਨੁਂ;

ਸਞ੍ਝਾਘਨਾਵ ਬਾਲਕ੍ਕਂ, ਮਾਤੁਚ੍ਛਂ ਦਸ੍ਸਯੀ ਜਿਨੋ.

੧੪੧. ‘‘ਫੁਲ੍ਲਾਰਵਿਨ੍ਦਸਂਕਾਸੇ, ਤਰੁਣਾਦਿਚ੍ਚਸਪ੍ਪਭੇ;

ਚਕ੍ਕਙ੍ਕਿਤੇ ਪਾਦਤਲੇ, ਤਤੋ ਸਾ ਸਿਰਸਾ ਪਤਿ.

੧੪੨. ‘‘‘ਪਣਮਾਮਿ ਨਰਾਦਿਚ੍ਚ, ਆਦਿਚ੍ਚਕੁਲਕੇਤੁਕਂ;

ਪਚ੍ਛਿਮੇ ਮਰਣੇ ਮਯ੍ਹਂ [ਸਰਣਂ ਮਯ੍ਹਂ (ਸ੍ਯਾ.)], ਨ ਤਂ ਇਕ੍ਖਾਮਹਂ ਪੁਨੋ.

੧੪੩. ‘‘‘ਇਤ੍ਥਿਯੋ ਨਾਮ ਲੋਕਗ੍ਗ, ਸਬ੍ਬਦੋਸਾਕਰਾ ਮਤਾ;

ਯਦਿ ਕੋ ਚਤ੍ਥਿ ਦੋਸੋ ਮੇ, ਖਮਸ੍ਸੁ ਕਰੁਣਾਕਰ.

੧੪੪. ‘‘‘ਇਤ੍ਥਿਕਾਨਞ੍ਚ ਪਬ੍ਬਜ੍ਜਂ, ਹਂ ਤਂ ਯਾਚਿਂ ਪੁਨਪ੍ਪੁਨਂ;

ਤਤ੍ਥ ਚੇ ਅਤ੍ਥਿ ਦੋਸੋ ਮੇ, ਤਂ ਖਮਸ੍ਸੁ ਨਰਾਸਭ.

੧੪੫. ‘‘‘ਮਯਾ ਭਿਕ੍ਖੁਨਿਯੋ ਵੀਰ, ਤਵਾਨੁਞ੍ਞਾਯ ਸਾਸਿਤਾ;

ਤਤ੍ਰ ਚੇ ਅਤ੍ਥਿ ਦੁਨ੍ਨੀਤਂ, ਤਂ ਖਮਸ੍ਸੁ ਖਮਾਧਿਪ [ਖਮਾਧਿਤਿ (ਸ੍ਯਾ.), ਖਮਾਪਿਤੋ (ਕ.)].

੧੪੬. ‘‘‘ਅਕ੍ਖਨ੍ਤੇ ਨਾਮ ਖਨ੍ਤਬ੍ਬਂ, ਕਿਂ ਭਵੇ ਗੁਣਭੂਸਨੇ;

ਕਿਮੁਤ੍ਤਰਂ ਤੇ ਵਕ੍ਖਾਮਿ, ਨਿਬ੍ਬਾਨਾਯ ਵਜਨ੍ਤਿਯਾ.

੧੪੭. ‘‘‘ਸੁਦ੍ਧੇ ਅਨੂਨੇ ਮਮ ਭਿਕ੍ਖੁਸਙ੍ਘੇ, ਲੋਕਾ ਇਤੋ ਨਿਸ੍ਸਰਿਤੁਂ ਖਮਨ੍ਤੇ;

ਪਭਾਤਕਾਲੇ ਬ੍ਯਸਨਙ੍ਗਤਾਨਂ, ਦਿਸ੍ਵਾਨ ਨਿਯ੍ਯਾਤਿਵ ਚਨ੍ਦਲੇਖਾ’.

੧੪੮. ‘‘‘ਤਦੇਤਰਾ ਭਿਕ੍ਖੁਨਿਯੋ ਜਿਨਗ੍ਗਂ, ਤਾਰਾਵ ਚਨ੍ਦਾਨੁਗਤਾ ਸੁਮੇਰੁਂ;

ਪਦਕ੍ਖਿਣਂ ਕਚ੍ਚ ਨਿਪਚ੍ਚ ਪਾਦੇ, ਠਿਤਾ ਮੁਖਨ੍ਤਂ ਸਮੁਦਿਕ੍ਖਮਾਨਾ.

੧੪੯. ‘‘‘ਨ ਤਿਤ੍ਤਿਪੁਬ੍ਬਂ ਤਵ ਦਸ੍ਸਨੇਨ, ਚਕ੍ਖੁਂ ਨ ਸੋਤਂ ਤਵ ਭਾਸਿਤੇਨ;

ਚਿਤ੍ਤਂ ਮਮਂ ਕੇਵਲਮੇਕਮੇਵ, ਪਪ੍ਪੁਯ੍ਯ ਤਂ ਧਮ੍ਮਰਸੇਨ ਤਿਤ੍ਤਿ.

੧੫੦. ‘‘‘ਨਦਤੋ ਪਰਿਸਾਯਂ ਤੇ, ਵਾਦਿਤਬ੍ਬਪਹਾਰਿਨੋ;

ਯੇ ਤੇ ਦਕ੍ਖਨ੍ਤਿ ਵਦਨਂ, ਧਞ੍ਞਾ ਤੇ ਨਰਪੁਙ੍ਗਵ.

੧੫੧. ‘‘‘ਦੀਘਙ੍ਗੁਲੀ ਤਮ੍ਬਨਖੇ, ਸੁਭੇ ਆਯਤਪਣ੍ਹਿਕੇ;

ਯੇ ਪਾਦੇ ਪਣਮਿਸ੍ਸਨ੍ਤਿ [ਪਣਮਾਯਨ੍ਤਿ (ਸ੍ਯਾ.)], ਤੇਪਿ ਧਞ੍ਞਾ ਗੁਣਨ੍ਧਰ.

੧੫੨. ‘‘‘ਮਧੁਰਾਨਿ ਪਹਟ੍ਠਾਨਿ, ਦੋਸਗ੍ਘਾਨਿ ਹਿਤਾਨਿ ਚ;

ਯੇ ਤੇ ਵਾਕ੍ਯਾਨਿ ਸੁਯ੍ਯਨ੍ਤਿ, ਤੇਪਿ ਧਞ੍ਞਾ ਨਰੁਤ੍ਤਮ.

੧੫੩. ‘‘‘ਧਞ੍ਞਾਹਂ ਤੇ ਮਹਾਵੀਰ, ਪਾਦਪੂਜਨਤਪ੍ਪਰਾ [ਮਾਨਪੂਜਨਤਪ੍ਪਰਾ (ਕ.)];

ਤਿਣ੍ਣਸਂਸਾਰਕਨ੍ਤਾਰਾ, ਸੁਵਾਕ੍ਯੇਨ ਸਿਰੀਮਤੋ’.

੧੫੪. ‘‘ਤਤੋ ਸਾ ਅਨੁਸਾਵੇਤ੍ਵਾ [ਅਨੁਮਾਨੇ ਤ੍ਵਾ (ਕ.)], ਭਿਕ੍ਖੁਸਙ੍ਘਮ੍ਪਿ ਸੁਬ੍ਬਤਾ;

ਰਾਹੁਲਾਨਨ੍ਦਨਨ੍ਦੇ ਚ, ਵਨ੍ਦਿਤ੍ਵਾ ਇਦਮਬ੍ਰਵਿ.

੧੫੫. ‘‘‘ਆਸੀਵਿਸਾਲਯਸਮੇ, ਰੋਗਾਵਾਸੇ ਕਲ਼ੇਵਰੇ;

ਨਿਬ੍ਬਿਨ੍ਦਾ ਦੁਕ੍ਖਸਙ੍ਘਾਟੇ, ਜਰਾਮਰਣਗੋਚਰੇ.

੧੫੬. ‘‘‘ਨਾਨਾਕਲਿਮਲਾਕਿਣ੍ਣੇ [ਨਾਨਾਕੁਣਪਮਲਾਕਿਣ੍ਣੇ (ਸ੍ਯਾ.), ਨਾਨਾਕਾਲ਼ਮਲਾਕਿਣ੍ਣੇ (ਕ.)], ਪਰਾਯਤ੍ਤੇ ਨਿਰੀਹਕੇ;

ਤੇਨ ਨਿਬ੍ਬਾਤੁਮਿਚ੍ਛਾਮਿ, ਅਨੁਮਞ੍ਞਥ ਪੁਤ੍ਤਕਾ’.

੧੫੭. ‘‘ਨਨ੍ਦੋ ਰਾਹੁਲਭਦ੍ਦੋ ਚ, ਵੀਤਸੋਕਾ ਨਿਰਾਸਵਾ;

ਠਿਤਾਚਲਟ੍ਠਿਤਿ ਥਿਰਾ, ਧਮ੍ਮਤਮਨੁਚਿਨ੍ਤਯੁਂ.

੧੫੮. ‘‘‘ਧਿਰਤ੍ਥੁ ਸਙ੍ਖਤਂ ਲੋਲਂ, ਅਸਾਰਂ ਕਦਲੂਪਮਂ;

ਮਾਯਾਮਰੀਚਿਸਦਿਸਂ, ਇਤਰਂ ਅਨਵਟ੍ਠਿਤਂ.

੧੫੯. ‘‘‘ਯਤ੍ਥ ਨਾਮ ਜਿਨਸ੍ਸਾਯਂ, ਮਾਤੁਚ੍ਛਾ ਬੁਦ੍ਧਪੋਸਿਕਾ;

ਗੋਤਮੀ ਨਿਧਨਂ ਯਾਤਿ, ਅਨਿਚ੍ਚਂ ਸਬ੍ਬਸਙ੍ਖਤਂ’.

੧੬੦. ‘‘ਆਨਨ੍ਦੋ ਚ ਤਦਾ ਸੇਖੋ, ਸੋਕਟ੍ਟੋ [ਕਨਿਟ੍ਠੋ (ਸ੍ਯਾ.)] ਜਿਨਵਚ੍ਛਲੋ;

ਤਤ੍ਥਸ੍ਸੂਨਿ ਕਰੋਨ੍ਤੋ ਸੋ, ਕਰੁਣਂ ਪਰਿਦੇਵਤਿ.

੧੬੧. ‘‘ਹਾ ਸਨ੍ਤਿਂ [ਭਾਸਨ੍ਤੀ (ਸ੍ਯਾ.)] ਗੋਤਮੀ ਯਾਤਿ, ਨੂਨ ਬੁਦ੍ਧੋਪਿ ਨਿਬ੍ਬੁਤਿਂ;

ਗਚ੍ਛਤਿ ਨ ਚਿਰੇਨੇਵ, ਅਗ੍ਗਿਰਿਵ ਨਿਰਿਨ੍ਧਨੋ.

੧੬੨. ‘‘ਏਵਂ ਵਿਲਾਪਮਾਨਂ ਤਂ, ਆਨਨ੍ਦਂ ਆਹ ਗੋਤਮੀ;

ਸੁਤਸਾਗਰਗਮ੍ਭੀਰ, ਬੁਦ੍ਧੋਪਟ੍ਠਾਨਤਪ੍ਪਰ.

੧੬੩. ‘‘‘ਨ ਯੁਤ੍ਤਂ ਸੋਚਿਤੁਂ ਪੁਤ੍ਤ, ਹਾਸਕਾਲੇ ਉਪਟ੍ਠਿਤੇ;

ਤਯਾ ਮੇ ਸਰਣਂ ਪੁਤ੍ਤ, ਨਿਬ੍ਬਾਨਂ ਤਮੁਪਾਗਤਂ.

੧੬੪. ‘‘‘ਤਯਾ ਤਾਤ ਸਮਜ੍ਝਿਟ੍ਠੋ, ਪਬ੍ਬਜ੍ਜਂ ਅਨੁਜਾਨਿ ਨੋ;

ਮਾ ਪੁਤ੍ਤ ਵਿਮਨੋ ਹੋਹਿ, ਸਫਲੋ ਤੇ ਪਰਿਸ੍ਸਮੋ.

੧੬੫. ‘‘‘ਯਂ ਨ ਦਿਟ੍ਠਂ ਪੁਰਾਣੇਹਿ, ਤਿਤ੍ਥਿਕਾਚਰਿਯੇਹਿਪਿ;

ਤਂ ਪਦਂ ਸੁਕੁਮਾਰੀਹਿ, ਸਤ੍ਤਵਸ੍ਸਾਹਿ ਵੇਦਿਤਂ.

੧੬੬. ‘‘‘ਬੁਦ੍ਧਸਾਸਨਪਾਲੇਤ, ਪਚ੍ਛਿਮਂ ਦਸ੍ਸਨਂ ਤਵ;

ਤਤ੍ਥ ਗਚ੍ਛਾਮਹਂ ਪੁਤ੍ਤ, ਗਤੋ ਯਤ੍ਥ ਨ ਦਿਸ੍ਸਤੇ.

੧੬੭. ‘‘‘ਕਦਾਚਿ ਧਮ੍ਮਂ ਦੇਸੇਨ੍ਤੋ, ਖਿਪੀ ਲੋਕਗ੍ਗਨਾਯਕੋ;

ਤਦਾਹਂ ਆਸੀਸਵਾਚਂ, ਅਵੋਚਂ ਅਨੁਕਮ੍ਪਿਕਾ.

੧੬੮. ‘‘‘ਚਿਰਂ ਜੀਵ ਮਹਾਵੀਰ, ਕਪ੍ਪਂ ਤਿਟ੍ਠ ਮਹਾਮੁਨੇ;

ਸਬ੍ਬਲੋਕਸ੍ਸ ਅਤ੍ਥਾਯ, ਭਵਸ੍ਸੁ ਅਜਰਾਮਰੋ.

੧੬੯. ‘‘‘ਤਂ ਤਥਾਵਾਦਿਨਿਂ ਬੁਦ੍ਧੋ, ਮਮਂ ਸੋ ਏਤਦਬ੍ਰਵਿ;

‘ਨ ਹੇਵਂ ਵਨ੍ਦਿਯਾ ਬੁਦ੍ਧਾ, ਯਥਾ ਵਨ੍ਦਸਿ ਗੋਤਮੀ.

੧੭੦. ‘‘‘ਕਥਂ ਚਰਹਿ ਸਬ੍ਬਞ੍ਞੂ, ਵਨ੍ਦਿਤਬ੍ਬਾ ਤਥਾਗਤਾ;

ਕਥਂ ਅਵਨ੍ਦਿਯਾ ਬੁਦ੍ਧਾ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.