੩. ਤੇਜਙ੍ਗਪਞ੍ਹੋ

੩. ‘‘ਭਨ੍ਤੇ ਨਾਗਸੇਨ, ‘ਤੇਜਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਤੇਜੋ ਤਿਣਕਟ੍ਠਸਾਖਾਪਲਾਸਂ ਡਹਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਯੇ ਤੇ ਅਬ੍ਭਨ੍ਤਰਾ ਵਾ ਬਾਹਿਰਾ ਵਾ ਕਿਲੇਸਾ ਇਟ੍ਠਾਨਿਟ੍ਠਾਰਮ੍ਮਣਾਨੁਭਵਨਾ, ਸਬ੍ਬੇ ਤੇ ਞਾਣਗ੍ਗਿਨਾ ਡਹਿਤਬ੍ਬਾ. ਇਦਂ, ਮਹਾਰਾਜ, ਤੇਜਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਤੇਜੋ ਨਿਦ੍ਦਯੋ ਅਕਾਰੁਣਿਕੋ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਬ੍ਬਕਿਲੇਸੇਸੁ ਕਾਰੁਞ੍ਞਾਨੁਦ੍ਦਯਾ ਨ ਕਾਤਬ੍ਬਾ. ਇਦਂ, ਮਹਾਰਾਜ, ਤੇਜਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਤੇਜੋ ਸੀਤਂ ਪਟਿਹਨਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਵੀਰਿਯਸਨ੍ਤਾਪਤੇਜਂ ਅਭਿਜਨੇਤ੍ਵਾ ਕਿਲੇਸਾ ਪਟਿਹਨ੍ਤਬ੍ਬਾ. ਇਦਂ, ਮਹਾਰਾਜ, ਤੇਜਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਤੇਜੋ ਅਨੁਨਯਪ੍ਪਟਿਘਵਿਪ੍ਪਮੁਤ੍ਤੋ ਉਣ੍ਹਮਭਿਜਨੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਨੁਨਯਪ੍ਪਟਿਘਵਿਪ੍ਪਮੁਤ੍ਤੇਨ ਤੇਜੋਸਮੇਨ ਚੇਤਸਾ ਵਿਹਰਿਤਬ੍ਬਂ. ਇਦਂ, ਮਹਾਰਾਜ, ਤੇਜਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਤੇਜੋ ਅਨ੍ਧਕਾਰਂ ਵਿਧਮਿਤ੍ਵਾ [ਵਿਧਮਤਿ (ਸੀ. ਪੀ. ਕ.)] ਆਲੋਕਂ ਦਸ੍ਸਯਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਵਿਜ੍ਜਨ੍ਧਕਾਰਂ ਵਿਧਮਿਤ੍ਵਾ ਞਾਣਾਲੋਕਂ ਦਸ੍ਸਯਿਤਬ੍ਬਂ. ਇਦਂ, ਮਹਾਰਾਜ, ਤੇਜਸ੍ਸ ਪਞ੍ਚਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸਕਂ ਪੁਤ੍ਤਂ ਰਾਹੁਲਂ ਓਵਦਨ੍ਤੇਨ –

‘ਤੇਜੋਸਮਂ [ਮ. ਨਿ. ੨.੧੧੯], ਰਾਹੁਲ, ਭਾਵਨਂ ਭਾਵੇਹਿ, ਤੇਜੋਸਮਂ ਹਿ ਤੇ, ਰਾਹੁਲ, ਭਾਵਨਂ ਭਾਵਯਤੋ ਉਪ੍ਪਨ੍ਨਾ? ਮਨਾਪਾਮਨਾਪਾ ਫਸ੍ਸਾ ਚਿਤ੍ਤਂ ਨ ਪਰਿਯਾਦਾਯ ਠਸ੍ਸਨ੍ਤੀ’’’ਤਿ.

ਤੇਜਙ੍ਗਪਞ੍ਹੋ ਤਤਿਯੋ.