੬. ਓਪਮ੍ਮਕਥਾਪਞ੍ਹੋ
ਮਾਤਿਕਾ
ਭਨ੍ਤੇ ਨਾਗਸੇਨ, ਕਤਿਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਅਰਹਤ੍ਤਂ ਸਚ੍ਛਿਕਰੋਤੀਤਿ?
ਇਧ, ਮਹਾਰਾਜ, ਅਰਹਤ੍ਤਂ ਸਚ੍ਛਿਕਾਤੁਕਾਮੇਨ ਭਿਕ੍ਖੁਨਾ –
ਗਦ੍ਰਭਸ੍ਸ [ਘੋਰਸ੍ਸਰਸ੍ਸ (ਸੀ. ਸ੍ਯਾ. ਪੀ.)] ਏਕਂ ਅਙ੍ਗਂ ਗਹੇਤਬ੍ਬਂ.
ਕੁਕ੍ਕੁਟਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਕਲਨ੍ਦਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਦੀਪਿਨਿਯਾ ਏਕਂ ਅਙ੍ਗਂ ਗਹੇਤਬ੍ਬਂ.
ਦੀਪਿਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਕੁਮ੍ਮਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਵਂਸਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਚਾਪਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਵਾਯਸਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਮਕ੍ਕਟਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਗਦ੍ਰਭਵਗ੍ਗੋ ਪਠਮੋ.
ਲਾਬੁਲਤਾਯ ਏਕਂ ਅਙ੍ਗਂ ਗਹੇਤਬ੍ਬਂ.
ਪਦੁਮਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਬੀਜਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਸਾਲਕਲ੍ਯਾਣਿਕਾਯ ਏਕਂ ਅਙ੍ਗਂ ਗਹੇਤਬ੍ਬਂ.
ਨਾਵਾਯ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਨਾਵਾਲਗ੍ਗਨਕਸ੍ਸ [ਨਾਵਾਲਗਨਕਸ੍ਸ (ਸੀ. ਪੀ.)] ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਕੂਪਸ੍ਸ [ਕੂਪਕਸ੍ਸ (ਕ.)] ਏਕਂ ਅਙ੍ਗਂ ਗਹੇਤਬ੍ਬਂ.
ਨਿਯਾਮਕਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਕਮ੍ਮਕਾਰਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਸਮੁਦ੍ਦਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਸਮੁਦ੍ਦਵਗ੍ਗੋ ਦੁਤਿਯੋ.
ਪਥਵਿਯਾ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਆਪਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਤੇਜਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਵਾਯੁਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਪਬ੍ਬਤਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਆਕਾਸਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਚਨ੍ਦਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਸੂਰਿਯਸ੍ਸ ਸਤ੍ਤ ਅਙ੍ਗਾਨਿ ਗਹੇਤਬ੍ਬਾਨਿ.
ਸਕ੍ਕਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਚਕ੍ਕਵਤ੍ਤਿਸ੍ਸ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨਿ.
ਪਥਵੀਵਗ੍ਗੋ ਤਤਿਯੋ.
ਉਪਚਿਕਾਯ ਏਕਂ ਅਙ੍ਗਂ ਗਹੇਤਬ੍ਬਂ.
ਬਿਲ਼ਾਰਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਉਨ੍ਦੂਰਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਵਿਚ੍ਛਿਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਨਕੁਲਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਜਰਸਿਙ੍ਗਾਲਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਮਿਗਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਗੋਰੂਪਸ੍ਸ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨਿ.
ਵਰਾਹਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਹਤ੍ਥਿਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਉਪਚਿਕਾਵਗ੍ਗੋ ਚਤੁਤ੍ਥੋ.
ਸੀਹਸ੍ਸ ਸਤ੍ਤ ਅਙ੍ਗਾਨਿ ਗਹੇਤਬ੍ਬਾਨਿ.
ਚਕ੍ਕਵਾਕਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਪੇਣਾਹਿਕਾਯ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਘਰਕਪੋਤਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਉਲੂਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਸਤਪਤ੍ਤਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਵਗ੍ਗੁਲਿਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਜਲੂਕਾਯ ਏਕਂ ਅਙ੍ਗਂ ਗਹੇਤਬ੍ਬਂ.
ਸਪ੍ਪਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਅਜਗਰਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਸੀਹਵਗ੍ਗੋ ਪਞ੍ਚਮੋ.
ਪਨ੍ਥਮਕ੍ਕਟਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਥਨਸਿਤਦਾਰਕਸ੍ਸ [ਥਨਪੀਤਦਾਰਕਸ੍ਸ (ਸ੍ਯਾ.)] ਏਕਂ ਅਙ੍ਗਂ ਗਹੇਤਬ੍ਬਂ.
ਚਿਤ੍ਤਕਧਰਕੁਮ੍ਮਸ੍ਸ [ਚਿਤ੍ਤਕਥਲਕੁਮ੍ਮਸ੍ਸ (ਕ.)] ਏਕਂ ਅਙ੍ਗਂ ਗਹੇਤਬ੍ਬਂ.
ਪਵਨਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਰੁਕ੍ਖਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਮੇਘਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨਿ.
ਮਣਿਰਤਨਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਮਾਗਵਿਕਸ੍ਸ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨਿ.
ਬਾਲ਼ਿਸਿਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਤਚ੍ਛਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਮਕ੍ਕਟਵਗ੍ਗੋ ਛਟ੍ਠੋ.
ਕੁਮ੍ਭਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਕਾਲ਼ਾਯਸਸ੍ਸ [ਕਾਲ਼ਹਂਸਸ੍ਸ (ਕ.)] ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਛਤ੍ਤਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਖੇਤ੍ਤਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਅਗਦਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਭੋਜਨਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਇਸ੍ਸਾਸਸ੍ਸ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨਿ.
ਕੁਮ੍ਭਵਗ੍ਗੋ ਸਤ੍ਤਮੋ.
ਰਞ੍ਞੋ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨਿ.
ਦੋਵਾਰਿਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਨਿਸਦਾਯ ਏਕਂ ਅਙ੍ਗਂ ਗਹੇਤਬ੍ਬਂ.
ਪਦੀਪਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਮਯੂਰਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਤੁਰਙ੍ਗਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਸੋਣ੍ਡਿਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਇਨ੍ਦਖੀਲਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਤੁਲਾਯ ਏਕਂ ਅਙ੍ਗਂ ਗਹੇਤਬ੍ਬਂ.
ਖਗ੍ਗਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਮਚ੍ਛਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਇਣਗ੍ਗਾਹਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਬ੍ਯਾਧਿਤਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਮਤਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਨਦਿਯਾ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਉਸਭਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਮਗ੍ਗਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਸੁਙ੍ਕਸਾਯਿਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਚੋਰਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਸਕੁਣਗ੍ਘਿਯਾ ਏਕਂ ਅਙ੍ਗਂ ਗਹੇਤਬ੍ਬਂ.
ਸੁਨਖਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਤਿਕਿਚ੍ਛਕਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਗਬ੍ਭਿਨਿਯਾ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਚਮਰਿਯਾ ਏਕਂ ਅਙ੍ਗਂ ਗਹੇਤਬ੍ਬਂ.
ਕਿਕਿਯਾ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਕਪੋਤਿਕਾਯ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਏਕਨਯਨਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਕਸ੍ਸਕਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਜਮ੍ਬੁਕਸਿਙ੍ਗਾਲਿਯਾ ਏਕਂ ਅਙ੍ਗਂ ਗਹੇਤਬ੍ਬਂ.
ਚਙ੍ਗਵਾਰਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਦਬ੍ਬਿਯਾ ਏਕਂ ਅਙ੍ਗਂ ਗਹੇਤਬ੍ਬਂ.
ਇਣਸਾਧਕਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨਿ.
ਅਨੁਵਿਚਿਨਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਸਾਰਥਿਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਭੋਜਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨਿ.
ਤੁਨ੍ਨਵਾਯਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਨਾਵਿਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ.
ਭਮਰਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀਤਿ.
ਮਾਤਿਕਾ ਨਿਟ੍ਠਿਤਾ.
੧. ਗਦ੍ਰਭਵਗ੍ਗੋ
੧. ਗਦ੍ਰਭਙ੍ਗਪਞ੍ਹੋ
੧. ‘‘ਭਨ੍ਤੇ ਨਾਗਸੇਨ, ‘ਗਦ੍ਰਭਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਗਦ੍ਰਭੋ ਨਾਮ ਸਙ੍ਕਾਰਕੂਟੇਪਿ ਚਤੁਕ੍ਕੇਪਿ ਸਿਙ੍ਘਾਟਕੇਪਿ ਗਾਮਦ੍ਵਾਰੇਪਿ ਥੁਸਰਾਸਿਮ੍ਹਿਪਿ ਯਤ੍ਥ ਕਤ੍ਥਚਿ ਸਯਤਿ, ਨ ਸਯਨਬਹੁਲੋ ਹੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਤਿਣਸਨ੍ਥਾਰੇਪਿ ਪਣ੍ਣਸਨ੍ਥਾਰੇਪਿ ਕਟ੍ਠਮਞ੍ਚਕੇਪਿ ਛਮਾਯਪਿ ਯਤ੍ਥ ਕਤ੍ਥਚਿ ਚਮ੍ਮਖਣ੍ਡਂ ਪਤ੍ਥਰਿਤ੍ਵਾ ਯਤ੍ਥ ਕਤ੍ਥਚਿ ਸਯਿਤਬ੍ਬਂ, ਨ ਸਯਨਬਹੁਲੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਗਦ੍ਰਭਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ‘ਕਲਿਙ੍ਗਰੂਪਧਾਨਾ, ਭਿਕ੍ਖਵੇ, ਏਤਰਹਿ ਮਮ ਸਾਵਕਾ ਵਿਹਰਨ੍ਤਿ ਅਪ੍ਪਮਤ੍ਤਾ ਆਤਾਪਿਨੋ ਪਧਾਨਸ੍ਮਿ’ਨ੍ਤਿ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾਪਿ –
‘‘‘ਪਲ੍ਲਙ੍ਕੇਨ ਨਿਸਿਨ੍ਨਸ੍ਸ, ਜਣ੍ਣੁਕੇਨਾਭਿਵਸ੍ਸਤਿ;
ਅਲਂ ਫਾਸੁਵਿਹਾਰਾਯ, ਪਹਿਤਤ੍ਤਸ੍ਸ ਭਿਕ੍ਖੁਨੋ’’’ਤਿ.
ਗਦ੍ਰਭਙ੍ਗਪਞ੍ਹੋ ਪਠਮੋ.
੨. ਕੁਕ੍ਕੁਟਙ੍ਗਪਞ੍ਹੋ
੨. ‘‘ਭਨ੍ਤੇ ਨਾਗਸੇਨ, ‘ਕੁਕ੍ਕੁਟਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਕੁਕ੍ਕੁਟੋ ਕਾਲੇਨ ਸਮਯੇਨ ਪਟਿਸਲ੍ਲੀਯਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਾਲੇਨ ਸਮਯੇਨੇਵ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤ੍ਵਾ ਸਰੀਰਂ ਪਟਿਜਗ੍ਗਿਤ੍ਵਾ ਨਹਾਯਿਤ੍ਵਾ ਚੇਤਿਯਂ ਵਨ੍ਦਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਦਸ੍ਸਨਾਯ ਗਨ੍ਤ੍ਵਾ ਕਾਲੇਨ ਸਮਯੇਨ ਸੁਞ੍ਞਾਗਾਰਂ ਪਵਿਸਿਤਬ੍ਬਂ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.
‘‘ਪੁਨ ਚਪਰਂ, ਮਹਾਰਾਜ, ਕੁਕ੍ਕੁਟੋ ਕਾਲੇਨ ਸਮਯੇਨੇਵ ਵੁਟ੍ਠਾਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਾਲੇਨ ਸਮਯੇਨੇਵ ਵੁਟ੍ਠਹਿਤ੍ਵਾ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤ੍ਵਾ ਸਰੀਰਂ ਪਟਿਜਗ੍ਗਿਤ੍ਵਾ ਚੇਤਿਯਂ ਵਨ੍ਦਿਤ੍ਵਾ ਪੁਨਦੇਵ ਸੁਞ੍ਞਾਗਾਰਂ ਪਵਿਸਿਤਬ੍ਬਂ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.
‘‘ਪੁਨ ਚਪਰਂ, ਮਹਾਰਾਜ, ਕੁਕ੍ਕੁਟੋ ਪਥਵਿਂ ਖਣਿਤ੍ਵਾ ਖਣਿਤ੍ਵਾ ਅਜ੍ਝੋਹਾਰਂ ਅਜ੍ਝੋਹਰਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਅਜ੍ਝੋਹਾਰਂ ਅਜ੍ਝੋਹਰਿਤਬ੍ਬਂ ‘ਨੇਵ ਦਵਾਯ ਨ ਮਦਾਯ ਨ ਮਣ੍ਡਨਾਯ ਨ ਵਿਭੂਸਨਾਯ, ਯਾਵਦੇਵ ਇਮਸ੍ਸ ਕਾਯਸ੍ਸ ਠਿਤਿਯਾ ਯਾਪਨਾਯ ਵਿਹਿਂਸੂਪਰਤਿਯਾ ਬ੍ਰਹ੍ਮਚਰਿਯਾਨੁਗ੍ਗਹਾਯ, ਇਤਿ ਪੁਰਾਣਞ੍ਚ ਵੇਦਨਂ ਪਟਿਹਙ੍ਖਾਮਿ ਨਵਞ੍ਚ ਵੇਦਨਂ ਨ ਉਪ੍ਪਾਦੇਸ੍ਸਾਮਿ, ਯਾਤ੍ਰਾ ਚ ਮੇ ਭਵਿਸ੍ਸਤਿ ਅਨਵਜ੍ਜਤਾ ਚ ਫਾਸੁਵਿਹਾਰੋ ਚਾ’ਤਿ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ –
‘‘‘ਕਨ੍ਤਾਰੇ ਪੁਤ੍ਤਮਂਸਂਵ, ਅਕ੍ਖਸ੍ਸਬ੍ਭਞ੍ਜਨਂ ਯਥਾ;
ਏਵਂ ਆਹਰਿ ਆਹਾਰਂ, ਯਾਪਨਤ੍ਥਮਮੁਚ੍ਛਿਤੋ’ਤਿ.
‘‘ਪੁਨ ਚਪਰਂ, ਮਹਾਰਾਜ, ਕੁਕ੍ਕੁਟੋ ਸਚਕ੍ਖੁਕੋਪਿ ਰਤ੍ਤਿਂ ਅਨ੍ਧੋ ਹੋਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਨਨ੍ਧੇਨੇਵ ਅਨ੍ਧੇਨ ਵਿਯ ਭਵਿਤਬ੍ਬਂ, ਅਰਞ੍ਞੇਪਿ ਗੋਚਰਗਾਮੇ ਪਿਣ੍ਡਾਯ ਚਰਨ੍ਤੇਨਪਿ ਰਜਨੀਯੇਸੁ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਧਮ੍ਮੇਸੁ ਅਨ੍ਧੇਨ ਬਧਿਰੇਨ ਮੂਗੇਨ ਵਿਯ ਭਵਿਤਬ੍ਬਂ, ਨ ਨਿਮਿਤ੍ਤਂ ਗਹੇਤਬ੍ਬਂ, ਨਾਨੁਬ੍ਯਞ੍ਜਨਂ ਗਹੇਤਬ੍ਬਂ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਮਹਾਕਚ੍ਚਾਯਨੇਨ –
‘ਚਕ੍ਖੁਮਾਸ੍ਸ ਯਥਾ ਅਨ੍ਧੋ, ਸੋਤਵਾ ਬਧਿਰੋ ਯਥਾ;
ਪਞ੍ਞਵਾਸ੍ਸ [ਜਿਵ੍ਹਾਵਸ੍ਸ (ਸੀ. ਪੀ.)] ਯਥਾ ਮੂਗੋ, ਬਲਵਾ ਦੁਬ੍ਬਲੋਰਿਵ;
ਅਤ੍ਤਅਤ੍ਥੇ [ਅਥ ਅਤ੍ਥੇ (ਸੀ. ਪੀ.)] ਸਮੁਪ੍ਪਨ੍ਨੇ, ਸਯੇਥ ਮਤਸਾਯਿਕ’ਨ੍ਤਿ.
‘‘ਪੁਨ ਚਪਰਂ, ਮਹਾਰਾਜ, ਕੁਕ੍ਕੁਟੋ ਲੇਡ੍ਡੁਦਣ੍ਡਲਗੁਲ਼ਮੁਗ੍ਗਰੇਹਿ ਪਰਿਪਾਤਿਯਨ੍ਤੋਪਿ ਸਕਂ ਗੇਹਂ ਨ ਵਿਜਹਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਚੀਵਰਕਮ੍ਮਂ ਕਰੋਨ੍ਤੇਨਪਿ ਨਵਕਮ੍ਮਂ ਕਰੋਨ੍ਤੇਨਪਿ ਵਤ੍ਤਪ੍ਪਟਿਵਤ੍ਤਂ ਕਰੋਨ੍ਤੇਨਪਿ ਉਦ੍ਦਿਸਨ੍ਤੇਨਪਿ ਉਦ੍ਦਿਸਾਪੇਨ੍ਤੇਨਪਿ ਯੋਨਿਸੋ ਮਨਸਿਕਾਰੋ ਨ ਵਿਜਹਿਤਬ੍ਬੋ, ਸਕਂ ਖੋ ਪਨੇਤਂ, ਮਹਾਰਾਜ, ਯੋਗਿਨੋ ਗੇਹਂ, ਯਦਿਦਂ ਯੋਨਿਸੋ ਮਨਸਿਕਾਰੋ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਪਞ੍ਚਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ‘ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋ? ਯਦਿਦਂ ਚਤ੍ਤਾਰੋ ਸਤਿਪਟ੍ਠਾਨਾ’ਤਿ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾਪਿ –
‘‘‘ਯਥਾ ਸੁਦਨ੍ਤੋ ਮਾਤਙ੍ਗੋ, ਸਕਂ ਸੋਣ੍ਡਂ ਨ ਮਦ੍ਦਤਿ;
ਭਕ੍ਖਾਭਕ੍ਖਂ ਵਿਜਾਨਾਤਿ, ਅਤ੍ਤਨੋ ਵੁਤ੍ਤਿਕਪ੍ਪਨਂ.
‘‘‘ਤਥੇਵ ਬੁਦ੍ਧਪੁਤ੍ਤੇਨ, ਅਪ੍ਪਮਤ੍ਤੇਨ ਵਾ ਪਨ;
ਜਿਨਵਚਨਂ ਨ ਮਦ੍ਦਿਤਬ੍ਬਂ, ਮਨਸਿਕਾਰਵਰੁਤ੍ਤਮ’’’ਨ੍ਤਿ.
ਕੁਕ੍ਕੁਟਙ੍ਗਪਞ੍ਹੋ ਦੁਤਿਯੋ.
੩. ਕਲਨ੍ਦਕਙ੍ਗਪਞ੍ਹੋ
੩. ‘‘ਭਨ੍ਤੇ ਨਾਗਸੇਨ, ‘ਕਲਨ੍ਦਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਕਲਨ੍ਦਕੋ ਪਟਿਸਤ੍ਤੁਮ੍ਹਿ ਓਪਤਨ੍ਤੇ ਨਙ੍ਗੁਟ੍ਠਂ ਪਪ੍ਫੋਟੇਤ੍ਵਾ ਮਹਨ੍ਤਂ ਕਤ੍ਵਾ ਤੇਨੇਵ ਨਙ੍ਗੁਟ੍ਠਲਗੁਲ਼ੇਨ ਪਟਿਸਤ੍ਤੁਂ ਪਟਿਬਾਹਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਿਲੇਸਸਤ੍ਤੁਮ੍ਹਿ ਓਪਤਨ੍ਤੇ ਸਤਿਪਟ੍ਠਾਨਲਗੁਲ਼ਂ ਪਪ੍ਫੋਟੇਤ੍ਵਾ ਮਹਨ੍ਤਂ ਕਤ੍ਵਾ ਤੇਨੇਵ ਸਤਿਪਟ੍ਠਾਨਲਗੁਲ਼ੇਨ ਸਬ੍ਬਕਿਲੇਸਾ ਪਟਿਬਾਹਿਤਬ੍ਬਾ. ਇਦਂ, ਮਹਾਰਾਜ, ਕਲਨ੍ਦਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਚੂਲ਼ਪਨ੍ਥਕੇਨ –
‘ਯਦਾ ਕਿਲੇਸਾ ਓਪਤਨ੍ਤਿ, ਸਾਮਞ੍ਞਗੁਣਧਂਸਨਾ;
ਸਤਿਪਟ੍ਠਾਨਲਗੁਲ਼ੇਨ, ਹਨ੍ਤਬ੍ਬਾ ਤੇ ਪੁਨਪ੍ਪੁਨ’’’ਨ੍ਤਿ.
ਕਲਨ੍ਦਕਙ੍ਗਪਞ੍ਹੋ ਤਤਿਯੋ.
੪. ਦੀਪਿਨਿਯਙ੍ਗਪਞ੍ਹੋ
੪. ‘‘ਭਨ੍ਤੇ ਨਾਗਸੇਨ, ‘ਦੀਪਿਨਿਯਾ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਦੀਪਿਨੀ ਸਕਿਂ ਯੇਵ ਗਬ੍ਭਂ ਗਣ੍ਹਾਤਿ, ਨ ਪੁਨਪ੍ਪੁਨਂ ਪੁਰਿਸਂ ਉਪੇਤਿ? ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਆਯਤਿਂ ਪਟਿਸਨ੍ਧਿਂ ਉਪ੍ਪਤ੍ਤਿਂ ਗਬ੍ਭਸੇਯ੍ਯਂ ਚੁਤਿਂ ਭੇਦਂ ਖਯਂ ਵਿਨਾਸਂ ਸਂਸਾਰਭਯਂ ਦੁਗ੍ਗਤਿਂ ਵਿਸਮਂ ਸਮ੍ਪੀਲ਼ਿਤਂ ਦਿਸ੍ਵਾ ‘ਪੁਨਬ੍ਭਵੇ ਨਪ੍ਪਟਿਸਨ੍ਦਹਿਸ੍ਸਾਮੀ’ਤਿ ਯੋਨਿਸੋ ਮਨਸਿਕਾਰੋ ਕਰਣੀਯੋ. ਇਦਂ, ਮਹਾਰਾਜ, ਦੀਪਿਨਿਯਾ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸੁਤ੍ਤਨਿਪਾਤੇ ਧਨਿਯਗੋਪਾਲਕਸੁਤ੍ਤੇ –
‘‘‘ਉਸਭੋਰਿਵ ਛੇਤ੍ਵ ਬਨ੍ਧਨਾਨਿ, ਨਾਗੋ ਪੂਤਿਲਤਂਵ ਦਾਲਯਿਤ੍ਵਾ;
ਨਾਹਂ ਪੁਨੁਪੇਸ੍ਸਂ ਗਬ੍ਭਸੇਯ੍ਯਂ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵਾ’’’ਤਿ.
ਦੀਪਿਨਿਯਙ੍ਗਪਞ੍ਹੋ ਚਤੁਤ੍ਥੋ.