੪. ਵਾਯੁਙ੍ਗਪਞ੍ਹੋ

੪. ‘‘ਭਨ੍ਤੇ ਨਾਗਸੇਨ, ‘ਵਾਯੁਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਵਾਯੁ ਸੁਪੁਪ੍ਫਿਤਵਨਸਣ੍ਡਨ੍ਤਰਂ ਅਭਿਵਾਯਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਵਿਮੁਤ੍ਤਿਵਰਕੁਸੁਮਪੁਪ੍ਫਿਤਾਰਮ੍ਮਣਵਨਨ੍ਤਰੇ ਰਮਿਤਬ੍ਬਂ. ਇਦਂ, ਮਹਾਰਾਜ, ਵਾਯੁਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਵਾਯੁ ਧਰਣੀਰੁਹਪਾਦਪਗਣੇ ਮਥਯਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਵਨਨ੍ਤਰਗਤੇਨ ਸਙ੍ਖਾਰੇ ਵਿਚਿਨਨ੍ਤੇਨ ਕਿਲੇਸਾ ਮਥਯਿਤਬ੍ਬਾ. ਇਦਂ, ਮਹਾਰਾਜ, ਵਾਯੁਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਵਾਯੁ ਆਕਾਸੇ ਚਰਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਲੋਕੁਤ੍ਤਰਧਮ੍ਮੇਸੁ ਮਾਨਸਂ ਸਞ੍ਚਾਰਯਿਤਬ੍ਬਂ. ਇਦਂ, ਮਹਾਰਾਜ, ਵਾਯੁਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਵਾਯੁ ਗਨ੍ਧਂ ਅਨੁਭਵਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਤ੍ਤਨੋ ਸੀਲਵਰਸੁਰਭਿਗਨ੍ਧੋ [ਸੀਲਸੁਰਭਿਗਨ੍ਦੋ (ਸੀ. ਪੀ.)] ਅਨੁਭਵਿਤਬ੍ਬੋ. ਇਦਂ, ਮਹਾਰਾਜ, ਵਾਯੁਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਵਾਯੁ ਨਿਰਾਲਯੋ ਅਨਿਕੇਤਵਾਸੀ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਨਿਰਾਲਯਮਨਿਕੇਤਮਸਨ੍ਥਵੇਨ ਸਬ੍ਬਤ੍ਥ ਵਿਮੁਤ੍ਤੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਵਾਯੁਸ੍ਸ ਪਞ੍ਚਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸੁਤ੍ਤਨਿਪਾਤੇ –

‘‘‘ਸਨ੍ਥਵਾਤੋ ਭਯਂ ਜਾਤਂ, ਨਿਕੇਤਾ ਜਾਯਤੇ ਰਜੋ;

ਅਨਿਕੇਤਮਸਨ੍ਥਵਂ, ਏਤਂ ਵੇ ਮੁਨਿਦਸ੍ਸਨ’’’ਨ੍ਤਿ.

ਵਾਯੁਙ੍ਗਪਞ੍ਹੋ ਚਤੁਤ੍ਥੋ.