੨. ਆਪਙ੍ਗਪਞ੍ਹੋ

੨. ‘‘ਭਨ੍ਤੇ ਨਾਗਸੇਨ, ‘ਆਪਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਆਪੋ ਸੁਸਣ੍ਠਿਤਮਕਮ੍ਪਿਤਮਲੁਲ਼ਿਤਸਭਾਵਪਰਿਸੁਦ੍ਧੋ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕੁਹਨਲਪਨਨੇਮਿਤ੍ਤਕਨਿਪ੍ਪੇਸਿਕਤਂ ਅਪਨੇਤ੍ਵਾ ਸੁਸਣ੍ਠਿਤਮਕਮ੍ਪਿਤਮਲੁਲ਼ਿਤਸਭਾਵਪਰਿਸੁਦ੍ਧਾਚਾਰੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਆਪਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਆਪੋ ਸੀਤਲਸਭਾਵਸਣ੍ਠਿਤੋ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਬ੍ਬਸਤ੍ਤੇਸੁ ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਨ੍ਨੇਨ ਹਿਤੇਸਿਨਾ ਅਨੁਕਮ੍ਪਕੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਆਪਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਆਪੋ ਅਸੁਚਿਂ ਸੁਚਿਂ ਕਰੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਗਾਮੇ ਵਾ ਅਰਞ੍ਞੇ ਵਾ ਉਪਜ੍ਝਾਯੇ ਉਪਜ੍ਝਾਯਮਤ੍ਤੇਸੁ ਆਚਰਿਯੇ ਆਚਰਿਯਮਤ੍ਤੇਸੁ ਸਬ੍ਬਤ੍ਥ ਅਨਧਿਕਰਣੇਨ ਭਵਿਤਬ੍ਬਂ ਅਨਵਸੇਸਕਾਰਿਨਾ. ਇਦਂ, ਮਹਾਰਾਜ, ਆਪਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਆਪੋ ਬਹੁਜਨਪਤ੍ਥਿਤੋ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਪ੍ਪਿਚ੍ਛਸਨ੍ਤੁਟ੍ਠਪਵਿਵਿਤ੍ਤਪਟਿਸਲ੍ਲਾਨੇਨ ਸਤਤਂ ਸਬ੍ਬਲੋਕਮਭਿਪਤ੍ਥਿਤੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਆਪਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਆਪੋ ਨ ਕਸ੍ਸਚਿ ਅਹਿਤਮੁਪਦਹਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਪਰਭਣ੍ਡਨਕਲਹਵਿਗ੍ਗਹਵਿਵਾਦਰਿਤ੍ਤਜ੍ਝਾਨਅਰਤਿਜਨਨਂ ਕਾਯਵਚੀਚਿਤ੍ਤੇਹਿ ਪਾਪਕਂ ਨ ਕਰਣੀਯਂ. ਇਦਂ, ਮਹਾਰਾਜ, ਆਪਸ੍ਸ ਪਞ੍ਚਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ ਮਹਾਰਾਜ, ਭਗਵਤਾ, ਦੇਵਾਤਿਦੇਵੇਨ ਕਣ੍ਹਜਾਤਕੇ –

‘‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਨ ਮਨੋ ਵਾ ਸਰੀਰਂ ਵਾ, ਮਂ-ਕਤੇ ਸਕ੍ਕ ਕਸ੍ਸਚਿ;

ਕਦਾਚਿ ਉਪਹਞ੍ਞੇਥ, ਏਤਂ ਸਕ੍ਕ ਵਰਂ ਵਰੇ’’’ਤਿ.

ਆਪਙ੍ਗਪਞ੍ਹੋ ਦੁਤਿਯੋ.