੧. ਪਥਵੀਅਙ੍ਗਪਞ੍ਹੋ

੧. ‘‘ਭਨ੍ਤੇ ਨਾਗਸੇਨ, ‘ਪਥਵਿਯਾ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਪਥਵੀ ਇਟ੍ਠਾਨਿਟ੍ਠਾਨਿ ਕਪ੍ਪੂਰਾਗਰੁਤਗਰਚਨ੍ਦਨਕੁਙ੍ਕੁਮਾਦੀਨਿ ਆਕਿਰਨ੍ਤੇਪਿ ਪਿਤ੍ਤਸੇਮ੍ਹਪੁਬ੍ਬਰੁਹਿਰਸੇਦਮੇਦਖੇਲ਼ਸਿਙ੍ਘਾਣਿਕਲਸਿਕ- ਮੁਤ੍ਤਕਰੀਸਾਦੀਨਿ ਆਕਿਰਨ੍ਤੇਪਿ ਤਾਦਿਸਾ ਯੇਵ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਇਟ੍ਠਾਨਿਟ੍ਠੇ ਲਾਭਾਲਾਭੇ ਯਸਾਯਸੇ ਨਿਨ੍ਦਾਪਸਂਸਾਯ ਸੁਖਦੁਕ੍ਖੇ ਸਬ੍ਬਤ੍ਥ ਤਾਦਿਨਾ ਯੇਵ ਭਵਿਤਬ੍ਬਂ. ਇਦਂ, ਮਹਾਰਾਜ, ਪਥਵਿਯਾ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਪਥਵੀ ਮਣ੍ਡਨਵਿਭੂਸਨਾਪਗਤਾ ਸਕਗਨ੍ਧਪਰਿਭਾਵਿਤਾ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਵਿਭੂਸਨਾਪਗਤੇਨ ਸਕਸੀਲਗਨ੍ਧਪਰਿਭਾਵਿਤੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਪਥਵਿਯਾ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਪਥਵੀ ਨਿਰਨ੍ਤਰਾ ਅਖਣ੍ਡਚ੍ਛਿਦ੍ਦਾ ਅਸੁਸਿਰਾ ਬਹਲਾ ਘਨਾ ਵਿਤ੍ਥਿਣ੍ਣਾ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਨਿਰਨ੍ਤਰਮਖਣ੍ਡਚ੍ਛਿਦ੍ਦਮਸੁਸਿਰਬਹਲਘਨਵਿਤ੍ਥਿਣ੍ਣਸੀਲੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਪਥਵਿਯਾ ਤਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਪਥਵੀ ਗਾਮਨਿਗਮਨਗਰਜਨਪਦਰੁਕ੍ਖਪਬ੍ਬਤਨਦੀਤਲ਼ਾਕਪੋਕ੍ਖਰਣੀਮਿਗਪਕ੍ਖਿਮਨੁਜਨਰਨਾਰਿਗਣਂ ਧਾਰੇਨ੍ਤੀਪਿ ਅਕਿਲਾਸੁ ਹੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਓਵਦਨ੍ਤੇਨਪਿ ਅਨੁਸਾਸਨ੍ਤੇਨਪਿ ਵਿਞ੍ਞਾਪੇਨ੍ਤੇਨਪਿ ਸਨ੍ਦਸ੍ਸੇਨ੍ਤੇਨਪਿ ਸਮਾਦਪੇਨ੍ਤੇਨਪਿ ਸਮੁਤ੍ਤੇਜੇਨ੍ਤੇਨਪਿ ਸਮ੍ਪਹਂਸੇਨ੍ਤੇਨਪਿ ਧਮ੍ਮਦੇਸਨਾਸੁ ਅਕਿਲਾਸੁਨਾ ਭਵਿਤਬ੍ਬਂ. ਇਦਂ, ਮਹਾਰਾਜ, ਪਥਵਿਯਾ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਪਥਵੀ ਅਨੁਨਯਪ੍ਪਟਿਘਵਿਪ੍ਪਮੁਤ੍ਤਾ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਨੁਨਯਪ੍ਪਟਿਘਵਿਪ੍ਪਮੁਤ੍ਤੇਨ ਪਥਵਿਸਮੇਨ ਚੇਤਸਾ ਵਿਹਰਿਤਬ੍ਬਂ. ਇਦਂ, ਮਹਾਰਾਜ, ਪਥਵਿਯਾ ਪਞ੍ਚਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਉਪਾਸਿਕਾਯ ਚੂਲ਼ਸੁਭਦ੍ਦਾਯ ਸਕਸਮਣੇ ਪਰਿਕਿਤ੍ਤਯਮਾਨਾਯ –

‘‘‘ਏਕਞ੍ਚੇ ਬਾਹਂ ਵਾਸਿਯਾ, ਤਚ੍ਛੇ ਕੁਪਿਤਮਾਨਸਾ [ਕੁਪਿਤਮਾਨਸੋ (ਕ.)];

ਏਕਞ੍ਚੇਬਾਹਂ ਗਨ੍ਧੇਨ, ਆਲਿਮ੍ਪੇਯ੍ਯ ਪਮੋਦਿਤਾ [ਪਮੋਦਿਤੋ (ਕ.)].

‘‘‘ਅਮੁਸ੍ਮਿਂ ਪਟਿਘੋ ਨਤ੍ਥਿ, ਰਾਗੋ ਅਸ੍ਮਿਂ ਨ ਵਿਜ੍ਜਤਿ;

ਪਥਵੀਸਮਚਿਤ੍ਤਾ ਤੇ, ਤਾਦਿਸਾ ਸਮਣਾ ਮਮਾ’’’ਤਿ.

ਪਥਵੀਅਙ੍ਗਪਞ੍ਹੋ ਪਠਮੋ.