੮. ਨਿਯਾਮਕਙ੍ਗਪਞ੍ਹੋ

੮. ‘‘ਭਨ੍ਤੇ ਨਾਗਸੇਨ, ‘ਨਿਯਾਮਕਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਨਿਯਾਮਕੋ ਰਤ੍ਤਿਨ੍ਦਿਵਂ ਸਤਤਂ ਸਮਿਤਂ ਅਪ੍ਪਮਤ੍ਤੋ ਯਤ੍ਤਪ੍ਪਯਤ੍ਤੋ ਨਾਵਂ ਸਾਰੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਚਿਤ੍ਤਂ ਨਿਯਾਮਯਮਾਨੇਨ ਰਤ੍ਤਿਨ੍ਦਿਵਂ ਸਤਤਂ ਸਮਿਤਂ ਅਪ੍ਪਮਤ੍ਤੇਨ ਯਤ੍ਤਪ੍ਪਯਤ੍ਤੇਨ ਯੋਨਿਸੋ ਮਨਸਿਕਾਰੇਨ ਚਿਤ੍ਤਂ ਨਿਯਾਮੇਤਬ੍ਬਂ. ਇਦਂ, ਮਹਾਰਾਜ, ਨਿਯਾਮਕਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਧਮ੍ਮਪਦੇ –

‘‘‘ਅਪ੍ਪਮਾਦਰਤਾ ਹੋਥ, ਸਚਿਤ੍ਤਮਨੁਰਕ੍ਖਥ;

ਦੁਗ੍ਗਾ ਉਦ੍ਧਰਥਤ੍ਤਾਨਂ, ਪਙ੍ਕੇ ਸਨ੍ਨੋਵ [ਸਤ੍ਤੋਵ (ਸੀ. ਪੀ.)] ਕੁਞ੍ਜਰੋ’ਤਿ.

‘‘ਪੁਨ ਚਪਰਂ, ਮਹਾਰਾਜ, ਨਿਯਾਮਕਸ੍ਸ ਯਂ ਕਿਞ੍ਚਿ ਮਹਾਸਮੁਦ੍ਦੇ ਕਲ੍ਯਾਣਂ ਵਾ ਪਾਪਕਂ ਵਾ, ਸਬ੍ਬਂ ਤਂ ਵਿਦਿਤਂ ਹੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕੁਸਲਾਕੁਸਲਂ ਸਾਵਜ੍ਜਾਨਵਜ੍ਜਂ ਹੀਨਪ੍ਪਣੀਤਂ ਕਣ੍ਹਸੁਕ੍ਕਸਪ੍ਪਟਿਭਾਗਂ ਵਿਜਾਨਿਤਬ੍ਬਂ. ਇਦਂ, ਮਹਾਰਾਜ, ਨਿਯਾਮਕਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਨਿਯਾਮਕੋ ਯਨ੍ਤੇ ਮੁਦ੍ਦਿਕਂ ਦੇਤਿ ‘ਮਾ ਕੋਚਿ ਯਨ੍ਤਂ ਆਮਸਿਤ੍ਥਾ’ਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਚਿਤ੍ਤੇ ਸਂਵਰਮੁਦ੍ਦਿਕਾ ਦਾਤਬ੍ਬਾ ‘ਮਾ ਕਿਞ੍ਚਿ ਪਾਪਕਂ ਅਕੁਸਲਵਿਤਕ੍ਕਂ ਵਿਤਕ੍ਕੇਸੀ’ਤਿ, ਇਦਂ, ਮਹਾਰਾਜ, ਨਿਯਾਮਕਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸਂਯੁਤ੍ਤਨਿਕਾਯਵਰੇ ‘ਮਾ, ਭਿਕ੍ਖਵੇ, ਪਾਪਕੇ ਅਕੁਸਲੇ ਵਿਤਕ੍ਕੇ ਵਿਤਕ੍ਕੇਯ੍ਯਾਥ, ਸੇਯ੍ਯਥੀਦਂ, ਕਾਮਵਿਤਕ੍ਕਂ ਬ੍ਯਾਪਾਦਵਿਤਕ੍ਕਂ ਵਿਹਿਂਸਾਵਿਤਕ੍ਕ’’’ਨ੍ਤਿ.

ਨਿਯਾਮਕਙ੍ਗਪਞ੍ਹੋ ਅਟ੍ਠਮੋ.