੨. ਸਮੁਦ੍ਦਵਗ੍ਗੋ

੧. ਲਾਬੁਲਤਙ੍ਗਪਞ੍ਹੋ

੧. ‘‘ਭਨ੍ਤੇ ਨਾਗਸੇਨ, ‘ਲਾਬੁਲਤਾਯ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਲਾਬੁਲਤਾ ਤਿਣੇ ਵਾ ਕਟ੍ਠੇ ਵਾ ਲਤਾਯ ਵਾ ਸੋਣ੍ਡਿਕਾਹਿ ਆਲਮ੍ਬਿਤ੍ਵਾ ਤਸ੍ਸੂਪਰਿ ਵਡ੍ਢਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਰਹਤ੍ਤੇ ਅਭਿਵਡ੍ਢਿਤੁਕਾਮੇਨ ਮਨਸਾ ਆਰਮ੍ਮਣਂ ਆਲਮ੍ਬਿਤ੍ਵਾ ਅਰਹਤ੍ਤੇ ਅਭਿਵਡ੍ਢਿਤਬ੍ਬਂ. ਇਦਂ, ਮਹਾਰਾਜ, ਲਾਬੁਲਤਾਯ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਯਥਾ ਲਾਬੁਲਤਾ ਨਾਮ, ਤਿਣੇ ਕਟ੍ਠੇ ਲਤਾਯ ਵਾ;

ਆਲਮ੍ਬਿਤ੍ਵਾ ਸੋਣ੍ਡਿਕਾਹਿ, ਤਤੋ ਵਡ੍ਢਤਿ ਉਪ੍ਪਰਿ.

‘‘‘ਤਥੇਵ ਬੁਦ੍ਧਪੁਤ੍ਤੇਨ, ਅਰਹਤ੍ਤਫਲਕਾਮਿਨਾ;

ਆਰਮ੍ਮਣਂ ਆਲਮ੍ਬਿਤ੍ਵਾ, ਵਡ੍ਢਿਤਬ੍ਬਂ ਅਸੇਕ੍ਖਫਲੇ’’’ਤਿ.

ਲਾਬੁਲਤਙ੍ਗਪਞ੍ਹੋ ਪਠਮੋ.

੨. ਪਦੁਮਙ੍ਗਪਞ੍ਹੋ

੨. ‘‘ਭਨ੍ਤੇ ਨਾਗਸੇਨ, ‘ਪਦੁਮਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਪਦੁਮਂ ਉਦਕੇ ਜਾਤਂ ਉਦਕੇ ਸਂਵਦ੍ਧਂ ਅਨੁਪਲਿਤ੍ਤਂ ਉਦਕੇਨ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕੁਲੇ ਗਣੇ ਲਾਭੇ ਯਸੇ ਸਕ੍ਕਾਰੇ ਸਮ੍ਮਾਨਨਾਯ ਪਰਿਭੋਗਪਚ੍ਚਯੇਸੁ ਚ ਸਬ੍ਬਤ੍ਥ ਅਨੁਪਲਿਤ੍ਤੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਪਦੁਮਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਪਦੁਮਂ ਉਦਕਾ ਅਚ੍ਚੁਗ੍ਗਮ੍ਮ ਠਾਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਬ੍ਬਲੋਕਂ ਅਭਿਭਵਿਤ੍ਵਾ ਅਚ੍ਚੁਗ੍ਗਮ੍ਮ ਲੋਕੁਤ੍ਤਰਧਮ੍ਮੇ ਠਾਤਬ੍ਬਂ. ਇਦਂ, ਮਹਾਰਾਜ, ਪਦੁਮਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਪਦੁਮਂ ਅਪ੍ਪਮਤ੍ਤਕੇਨਪਿ ਅਨਿਲੇਨ ਏਰਿਤਂ ਚਲਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਪ੍ਪਮਤ੍ਤਕੇਸੁਪਿ ਕਿਲੇਸੇਸੁ ਸਂਯਮੋ ਕਰਣੀਯੋ, ਭਯਦਸ੍ਸਾਵਿਨਾ ਵਿਹਰਿਤਬ੍ਬਂ. ਇਦਂ, ਮਹਾਰਾਜ, ਪਦੁਮਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ‘ਅਣੁਮਤ੍ਤੇਸੁ ਵਜ੍ਜੇਸੁ ਭਯਦਸ੍ਸਾਵੀ ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੂ’ਤਿ.

ਪਦੁਮਙ੍ਗਪਞ੍ਹੋ ਦੁਤਿਯੋ.

੩. ਬੀਜਙ੍ਗਪਞ੍ਹੋ

੩. ‘‘ਭਨ੍ਤੇ ਨਾਗਸੇਨ, ‘ਬੀਜਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਬੀਜਂ ਅਪ੍ਪਕਮ੍ਪਿ ਸਮਾਨਂ ਭਦ੍ਦਕੇ ਖੇਤ੍ਤੇ ਵੁਤ੍ਤਂ ਦੇਵੇ ਸਮ੍ਮਾ ਧਾਰਂ ਪਵੇਚ੍ਛਨ੍ਤੇ ਸੁਬਹੂਨਿ ਫਲਾਨਿ ਅਨੁਦਸ੍ਸਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਯਥਾ ਪਟਿਪਾਦਿਤਂ ਸੀਲਂ ਕੇਵਲਂ ਸਾਮਞ੍ਞਫਲਮਨੁਦਸ੍ਸਤਿ. ਏਵਂ ਸਮ੍ਮਾ ਪਟਿਪਜ੍ਜਿਤਬ੍ਬਂ. ਇਦਂ, ਮਹਾਰਾਜ, ਬੀਜਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਬੀਜਂ ਸੁਪਰਿਸੋਧਿਤੇ ਖੇਤ੍ਤੇ ਰੋਪਿਤਂ ਖਿਪ੍ਪਮੇਵ ਸਂਵਿਰੂਹਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਮਾਨਸਂ ਸੁਪਰਿਗ੍ਗਹਿਤਂ ਸੁਞ੍ਞਾਗਾਰੇ ਪਰਿਸੋਧਿਤਂ ਸਤਿਪਟ੍ਠਾਨਖੇਤ੍ਤਵਰੇ ਖਿਤ੍ਤਂ ਖਿਪ੍ਪਮੇਵ ਵਿਰੂਹਤਿ. ਇਦਂ, ਮਹਾਰਾਜ, ਬੀਜਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਅਨੁਰੁਦ੍ਧੇਨ –

‘‘‘ਯਥਾਪਿ ਖੇਤ੍ਤੇ [ਯਥਾ ਖੇਤ੍ਤੇ (ਸੀ.)] ਪਰਿਸੁਦ੍ਧੇ, ਬੀਜਞ੍ਚਸ੍ਸ ਪਤਿਟ੍ਠਿਤਂ;

ਵਿਪੁਲਂ ਤਸ੍ਸ ਫਲਂ ਹੋਤਿ, ਅਪਿ ਤੋਸੇਤਿ ਕਸ੍ਸਕਂ.

‘‘‘ਤਥੇਵ ਯੋਗਿਨੋ ਚਿਤ੍ਤਂ, ਸੁਞ੍ਞਾਗਾਰੇ ਵਿਸੋਧਿਤਂ;

ਸਤਿਪਟ੍ਠਾਨਖੇਤ੍ਤਮ੍ਹਿ, ਖਿਪ੍ਪਮੇਵ ਵਿਰੂਹਤੀ’’’ਤਿ.

ਬੀਜਙ੍ਗਪਞ੍ਹੋ ਤਤਿਯੋ.

੪. ਸਾਲਕਲ੍ਯਾਣਿਕਙ੍ਗਪਞ੍ਹੋ

੪. ‘‘ਭਨ੍ਤੇ ਨਾਗਸੇਨ, ‘ਸਾਲਕਲ੍ਯਾਣਿਕਾਯ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਸਾਲਕਲ੍ਯਾਣਿਕਾ ਨਾਮ ਅਨ੍ਤੋਪਥਵਿਯਂ ਯੇਵ ਅਭਿਵਡ੍ਢਤਿ ਹਤ੍ਥਸਤਮ੍ਪਿ ਭਿਯ੍ਯੋਪਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਚਤ੍ਤਾਰਿ ਸਾਮਞ੍ਞਫਲਾਨਿ ਚਤਸ੍ਸੋ ਪਟਿਸਮ੍ਭਿਦਾ ਛਲ਼ਭਿਞ੍ਞਾਯੋ ਕੇਵਲਞ੍ਚ ਸਮਣਧਮ੍ਮਂ ਸੁਞ੍ਞਾਗਾਰੇ ਯੇਵ ਪਰਿਪੂਰਯਿਤਬ੍ਬਂ. ਇਦਂ, ਮਹਾਰਾਜ, ਸਾਲਕਲ੍ਯਾਣਿਕਾਯ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਰਾਹੁਲੇਨ –

‘‘‘ਸਾਲਕਲ੍ਯਾਣਿਕਾ ਨਾਮ, ਪਾਦਪੋ ਧਰਣੀਰੁਹੋ;

ਅਨ੍ਤੋਪਥਵਿਯਂ ਯੇਵ, ਸਤਹਤ੍ਥੋਪਿ ਵਡ੍ਢਤਿ.

‘‘‘ਯਥਾ ਕਾਲਮ੍ਹਿ ਸਮ੍ਪਤ੍ਤੇ, ਪਰਿਪਾਕੇਨ ਸੋ ਦੁਮੋ;

ਉਗ੍ਗਞ੍ਛਿਤ੍ਵਾਨ ਏਕਾਹਂ, ਸਤਹਤ੍ਥੋਪਿ ਵਡ੍ਢਤਿ.

‘‘‘ਏਵਮੇਵਾਹਂ ਮਹਾਵੀਰ, ਸਾਲਕਲ੍ਯਾਣਿਕਾ ਵਿਯ;

ਅਬ੍ਭਨ੍ਤਰੇ ਸੁਞ੍ਞਾਗਾਰੇ, ਧਮ੍ਮਤੋ ਅਭਿਵਡ੍ਢਯਿ’’’ਨ੍ਤਿ.

ਸਾਲਕਲ੍ਯਾਣਿਕਙ੍ਗਪਞ੍ਹੋ ਚਤੁਤ੍ਥੋ.

੫. ਨਾਵਙ੍ਗਪਞ੍ਹੋ

੫. ‘‘ਭਨ੍ਤੇ ਨਾਗਸੇਨ, ‘ਨਾਵਾਯ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਨਾਵਾ ਬਹੁਵਿਧਦਾਰੁਸਙ੍ਘਾਟਸਮਵਾਯੇਨ ਬਹੁਮ੍ਪਿ ਜਨਂ ਤਾਰਯਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਆਚਾਰਸੀਲਗੁਣਵਤ੍ਤਪ੍ਪਟਿਵਤ੍ਤਬਹੁਵਿਧਧਮ੍ਮਸਙ੍ਘਾਟਸਮਵਾਯੇਨ ਸਦੇਵਕੋ ਲੋਕੋ ਤਾਰਯਿਤਬ੍ਬੋ. ਇਦਂ, ਮਹਾਰਾਜ, ਨਾਵਾਯ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਨਾਵਾ ਬਹੁਵਿਧਊਮਿਤ੍ਥਨਿਤਵੇਗਵਿਸਟਮਾਵਟ੍ਟਵੇਗਂ ਸਹਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਬਹੁਵਿਧਕਿਲੇਸਊਮਿਵੇਗਂ ਲਾਭਸਕ੍ਕਾਰਯਸਸਿਲੋਕਪੂਜਨਵਨ੍ਦਨਾ ਪਰਕੁਲੇਸੁ ਨਿਨ੍ਦਾਪਸਂਸਾਸੁਖਦੁਕ੍ਖਸਮ੍ਮਾਨਨਵਿਮਾਨਨਬਹੁਵਿਧਦੋਸਊਮਿਵੇਗਞ੍ਚ ਸਹਿਤਬ੍ਬਂ. ਇਦਂ, ਮਹਾਰਾਜ, ਨਾਵਾਯ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਨਾਵਾ ਅਪਰਿਮਿਤਮਨਨ੍ਤਮਪਾਰਮਕ੍ਖੋਭਿਤਗਮ੍ਭੀਰੇ ਮਹਤਿਮਹਾਘੋਸੇ ਤਿਮਿਤਿਮਿਙ੍ਗਲਮਕਰਮਚ੍ਛਗਣਾਕੁਲੇ ਮਹਤਿਮਹਾਸਮੁਦ੍ਦੇ ਚਰਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਤਿਪਰਿਵਟ੍ਟ ਦ੍ਵਾਦਸਾਕਾਰ ਚਤੁਸਚ੍ਚਾਭਿਸਮਯਪ੍ਪਟਿਵੇਧੇ ਮਾਨਸਂ ਸਞ੍ਚਾਰਯਿਤਬ੍ਬਂ. ਇਦਂ, ਮਹਾਰਾਜ, ਨਾਵਾਯ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸਂਯੁਤ੍ਤਨਿਕਾਯਵਰੇ ਸਚ੍ਚਸਂਯੁਤ੍ਤੇ –

‘‘‘ਵਿਤਕ੍ਕੇਨ੍ਤਾ ਚ ਖੋ ਤੁਮ੍ਹੇ, ਭਿਕ੍ਖਵੇ, ‘‘ਇਦਂ ਦੁਕ੍ਖ’’ਨ੍ਤਿ ਵਿਤਕ੍ਕੇਯ੍ਯਾਥ, ‘‘ਅਯਂ ਦੁਕ੍ਖਸਮੁਦਯੋ’’ਤਿ ਵਿਤਕ੍ਕੇਯ੍ਯਾਥ, ‘‘ਅਯਂ ਦੁਕ੍ਖਨਿਰੋਧੋ’’ਤਿ ਵਿਤਕ੍ਕੇਯ੍ਯਾਥ, ‘‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’ਤਿ ਵਿਤਕ੍ਕੇਯ੍ਯਾਥਾ’’’ਤਿ.

ਨਾਵਙ੍ਗਪਞ੍ਹੋ ਪਞ੍ਚਮੋ.

੬. ਨਾਵਾਲਗ੍ਗਨਕਙ੍ਗਪਞ੍ਹੋ

੬. ‘‘ਭਨ੍ਤੇ ਨਾਗਸੇਨ, ‘ਨਾਵਾਲਗ੍ਗਨਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਨਾਵਾਲਗ੍ਗਨਕਂ ਬਹੁਊਮਿਜਾਲਾਕੁਲਵਿਕ੍ਖੋਭਿਤਸਲਿਲਤਲੇ ਮਹਤਿਮਹਾਸਮੁਦ੍ਦੇ ਨਾਵਂ ਲਗ੍ਗੇਤਿ ਠਪੇਤਿ, ਨ ਦੇਤਿ ਦਿਸਾਵਿਦਿਸਂ ਹਰਿਤੁਂ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਰਾਗਦੋਸਮੋਹੂਮਿਜਾਲੇ ਮਹਤਿਮਹਾਵਿਤਕ੍ਕਸਮ੍ਪਹਾਰੇ ਚਿਤ੍ਤਂ ਲਗ੍ਗੇਤਬ੍ਬਂ, ਨ ਦਾਤਬ੍ਬਂ ਦਿਸਾਵਿਦਿਸਂ ਹਰਿਤੁਂ. ਇਦਂ, ਮਹਾਰਾਜ, ਨਾਵਾਲਗ੍ਗਨਕਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਨਾਵਾਲਗ੍ਗਨਕਂ ਨ ਪ੍ਲਵਤਿ [ਨ ਪਿਲਵਤਿ (ਸੀ. ਪੀ.)] ਵਿਸੀਦਤਿ, ਹਤ੍ਥਸਤੇਪਿ ਉਦਕੇ ਨਾਵਂ ਲਗ੍ਗੇਤਿ ਠਾਨਮੁਪਨੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਲਾਭਯਸਸਕ੍ਕਾਰਮਾਨਨਵਨ੍ਦਨਪੂਜਨਅਪਚਿਤੀਸੁ ਲਾਭਗ੍ਗਯਸਗ੍ਗੇਪਿ ਨ ਪ੍ਲਵਿਤਬ੍ਬਂ, ਸਰੀਰਯਾਪਨਮਤ੍ਤਕੇ ਯੇਵ ਚਿਤ੍ਤਂ ਠਪੇਤਬ੍ਬਂ. ਇਦਂ, ਮਹਾਰਾਜ, ਨਾਵਾਲਗ੍ਗਨਕਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਯਥਾ ਸਮੁਦ੍ਦੇ ਲਗ੍ਗਨਕਂ, ਨ ਪ੍ਲਵਤਿ ਵਿਸੀਦਤਿ;

ਤਥੇਵ ਲਾਭਸਕ੍ਕਾਰੇ, ਮਾ ਪ੍ਲਵਥ ਵਿਸੀਦਥਾ’’’ਤਿ.

ਨਾਵਾਲਗ੍ਗਨਕਙ੍ਗਪਞ੍ਹੋ ਛਟ੍ਠੋ.

੭. ਕੂਪਙ੍ਗਪਞ੍ਹੋ

੭. ‘‘ਭਨ੍ਤੇ ਨਾਗਸੇਨ, ‘ਕੂਪਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਕੂਪੋ ਰਜ੍ਜੁਞ੍ਚ ਵਰਤ੍ਤਞ੍ਚ ਲਙ੍ਕਾਰਞ੍ਚ ਧਾਰੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਤਿਸਮ੍ਪਜਞ੍ਞਸਮਨ੍ਨਾਗਤੇਨ ਭਵਿਤਬ੍ਬਂ, ਅਭਿਕ੍ਕਨ੍ਤੇ ਪਟਿਕ੍ਕਨ੍ਤੇ ਆਲੋਕਿਤੇ ਵਿਲੋਕਿਤੇ ਸਮਿਞ੍ਜਿਤੇ ਪਸਾਰਿਤੇ ਸਙ੍ਘਾਟਿਪਤ੍ਤਚੀਵਰਧਾਰਣੇ ਅਸਿਤੇ ਪੀਤੇ ਖਾਯਿਤੇ ਸਾਯਿਤੇ ਉਚ੍ਚਾਰਪਸ੍ਸਾਵਕਮ੍ਮੇ ਗਤੇ ਠਿਤੇ ਨਿਸਿਨ੍ਨੇ ਸੁਤ੍ਤੇ ਜਾਗਰਿਤੇ ਭਾਸਿਤੇ ਤੁਣ੍ਹੀਭਾਵੇ ਸਮ੍ਪਜਾਨਕਾਰਿਨਾ ਭਵਿਤਬ੍ਬਂ. ਇਦਂ, ਮਹਾਰਾਜ, ਕੂਪਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ‘ਸਤੋ, ਭਿਕ੍ਖਵੇ, ਭਿਕ੍ਖੁ ਵਿਹਰੇਯ੍ਯ ਸਮ੍ਪਜਾਨੋ, ਅਯਂ ਵੋ ਅਮ੍ਹਾਕਂ ਅਨੁਸਾਸਨੀ’’’ਤਿ.

ਕੂਪਙ੍ਗਪਞ੍ਹੋ ਸਤ੍ਤਮੋ.

੮. ਨਿਯਾਮਕਙ੍ਗਪਞ੍ਹੋ

੮. ‘‘ਭਨ੍ਤੇ ਨਾਗਸੇਨ, ‘ਨਿਯਾਮਕਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਨਿਯਾਮਕੋ ਰਤ੍ਤਿਨ੍ਦਿਵਂ ਸਤਤਂ ਸਮਿਤਂ ਅਪ੍ਪਮਤ੍ਤੋ ਯਤ੍ਤਪ੍ਪਯਤ੍ਤੋ ਨਾਵਂ ਸਾਰੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਚਿਤ੍ਤਂ ਨਿਯਾਮਯਮਾਨੇਨ ਰਤ੍ਤਿਨ੍ਦਿਵਂ ਸਤਤਂ ਸਮਿਤਂ ਅਪ੍ਪਮਤ੍ਤੇਨ ਯਤ੍ਤਪ੍ਪਯਤ੍ਤੇਨ ਯੋਨਿਸੋ ਮਨਸਿਕਾਰੇਨ ਚਿਤ੍ਤਂ ਨਿਯਾਮੇਤਬ੍ਬਂ. ਇਦਂ, ਮਹਾਰਾਜ, ਨਿਯਾਮਕਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਧਮ੍ਮਪਦੇ –

‘‘‘ਅਪ੍ਪਮਾਦਰਤਾ ਹੋਥ, ਸਚਿਤ੍ਤਮਨੁਰਕ੍ਖਥ;

ਦੁਗ੍ਗਾ ਉਦ੍ਧਰਥਤ੍ਤਾਨਂ, ਪਙ੍ਕੇ ਸਨ੍ਨੋਵ [ਸਤ੍ਤੋਵ (ਸੀ. ਪੀ.)] ਕੁਞ੍ਜਰੋ’ਤਿ.

‘‘ਪੁਨ ਚਪਰਂ, ਮਹਾਰਾਜ, ਨਿਯਾਮਕਸ੍ਸ ਯਂ ਕਿਞ੍ਚਿ ਮਹਾਸਮੁਦ੍ਦੇ ਕਲ੍ਯਾਣਂ ਵਾ ਪਾਪਕਂ ਵਾ, ਸਬ੍ਬਂ ਤਂ ਵਿਦਿਤਂ ਹੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕੁਸਲਾਕੁਸਲਂ ਸਾਵਜ੍ਜਾਨਵਜ੍ਜਂ ਹੀਨਪ੍ਪਣੀਤਂ ਕਣ੍ਹਸੁਕ੍ਕਸਪ੍ਪਟਿਭਾਗਂ ਵਿਜਾਨਿਤਬ੍ਬਂ. ਇਦਂ, ਮਹਾਰਾਜ, ਨਿਯਾਮਕਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਨਿਯਾਮਕੋ ਯਨ੍ਤੇ ਮੁਦ੍ਦਿਕਂ ਦੇਤਿ ‘ਮਾ ਕੋਚਿ ਯਨ੍ਤਂ ਆਮਸਿਤ੍ਥਾ’ਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਚਿਤ੍ਤੇ ਸਂਵਰਮੁਦ੍ਦਿਕਾ ਦਾਤਬ੍ਬਾ ‘ਮਾ ਕਿਞ੍ਚਿ ਪਾਪਕਂ ਅਕੁਸਲਵਿਤਕ੍ਕਂ ਵਿਤਕ੍ਕੇਸੀ’ਤਿ, ਇਦਂ, ਮਹਾਰਾਜ, ਨਿਯਾਮਕਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸਂਯੁਤ੍ਤਨਿਕਾਯਵਰੇ ‘ਮਾ, ਭਿਕ੍ਖਵੇ, ਪਾਪਕੇ ਅਕੁਸਲੇ ਵਿਤਕ੍ਕੇ ਵਿਤਕ੍ਕੇਯ੍ਯਾਥ, ਸੇਯ੍ਯਥੀਦਂ, ਕਾਮਵਿਤਕ੍ਕਂ ਬ੍ਯਾਪਾਦਵਿਤਕ੍ਕਂ ਵਿਹਿਂਸਾਵਿਤਕ੍ਕ’’’ਨ੍ਤਿ.

ਨਿਯਾਮਕਙ੍ਗਪਞ੍ਹੋ ਅਟ੍ਠਮੋ.

੯. ਕਮ੍ਮਕਾਰਙ੍ਗਪਞ੍ਹੋ

੯. ‘‘ਭਨ੍ਤੇ ਨਾਗਸੇਨ, ‘ਕਮ੍ਮਕਾਰਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਕਮ੍ਮਕਾਰੋ ਏਵਂ ਚਿਨ੍ਤਯਤਿ ‘ਭਤਕੋ ਅਹਂ ਇਮਾਯ ਨਾਵਾਯ ਕਮ੍ਮਂ ਕਰੋਮਿ, ਇਮਾਯਾਹਂ ਨਾਵਾਯ ਵਾਹਸਾ ਭਤ੍ਤਵੇਤਨਂ ਲਭਾਮਿ, ਨ ਮੇ ਪਮਾਦੋ ਕਰਣੀਯੋ, ਅਪ੍ਪਮਾਦੇਨ ਮੇ ਅਯਂ ਨਾਵਾ ਵਾਹੇਤਬ੍ਬਾ’ਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਏਵਂ ਚਿਨ੍ਤਯਿਤਬ੍ਬਂ ‘ਇਮਂ ਖੋ ਅਹਂ ਚਾਤੁਮਹਾਭੂਤਿਕਂ ਕਾਯਂ ਸਮ੍ਮਸਨ੍ਤੋ ਸਤਤਂ ਸਮਿਤਂ ਅਪ੍ਪਮਤ੍ਤੋ ਉਪਟ੍ਠਿਤਸ੍ਸਤਿ ਸਤੋ ਸਮ੍ਪਜਾਨੋ ਸਮਾਹਿਤੋ ਏਕਗ੍ਗਚਿਤ੍ਤੋ ਜਾਤਿਜਰਾਬ੍ਯਾਧਿਮਰਣਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸੇਹਿ ਪਰਿਮੁਚ੍ਚਿਸ੍ਸਾਮੀਤਿ ਅਪ੍ਪਮਾਦੋ ਮੇ ਕਰਣੀਯੋ’ਤਿ, ਇਦਂ, ਮਹਾਰਾਜ, ਕਮ੍ਮਕਾਰਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਕਾਯਂ ਇਮਂ ਸਮ੍ਮਸਥ, ਪਰਿਜਾਨਾਥ ਪੁਨਪ੍ਪੁਨਂ;

ਕਾਯੇ ਸਭਾਵਂ ਦਿਸ੍ਵਾਨ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਥਾ’ਤਿ.

ਕਮ੍ਮਕਾਰਙ੍ਗਪਞ੍ਹੋ ਨਵਮੋ.

੧੦. ਸਮੁਦ੍ਦਙ੍ਗਪਞ੍ਹੋ

੧੦. ‘‘ਭਨ੍ਤੇ ਨਾਗਸੇਨ, ‘ਸਮੁਦ੍ਦਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਮਹਾਸਮੁਦ੍ਦੋ ਮਤੇਨ ਕੁਣਪੇਨ ਸਦ੍ਧਿਂ ਨ ਸਂਵਸਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਰਾਗਦੋਸਮੋਹਮਾਨਦਿਟ੍ਠਿਮਕ੍ਖਪਲ਼ਾਸਇਸ੍ਸਾਮਚ੍ਛਰਿਯਮਾਯਾਸਾਠੇਯ੍ਯਕੁਟਿਲਵਿਸਮਦੁਚ੍ਚਰਿਤਕਿਲੇਸਮਲੇਹਿ ਸਦ੍ਧਿਂ ਨ ਸਂਵਸਿਤਬ੍ਬਂ. ਇਦਂ, ਮਹਾਰਾਜ, ਸਮੁਦ੍ਦਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਮਹਾਸਮੁਦ੍ਦੋ ਮੁਤ੍ਤਾਮਣਿਵੇਲ਼ੁਰਿਯਸਙ੍ਖਸਿਲਾਪਵਾਲ਼ਫਲਿਕਮਣਿਵਿਵਿਧਰਤਨਨਿਚਯਂ ਧਾਰੇਨ੍ਤੋ ਪਿਦਹਤਿ, ਨ ਬਹਿ ਵਿਕਿਰਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਮਗ੍ਗਫਲਝਾਨਵਿਮੋਕ੍ਖਸਮਾਧਿਸਮਾਪਤ੍ਤਿਵਿਪਸ੍ਸਨਾਭਿਞ੍ਞਾਵਿਵਿਧਗੁਣਰਤਨਾਨਿ ਅਧਿਗਨ੍ਤ੍ਵਾ ਪਿਦਹਿਤਬ੍ਬਾਨਿ, ਨ ਬਹਿ ਨੀਹਰਿਤਬ੍ਬਾਨਿ. ਇਦਂ, ਮਹਾਰਾਜ, ਸਮੁਦ੍ਦਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਮਹਾਸਮੁਦ੍ਦੋ ਮਹਨ੍ਤੇਹਿ ਮਹਾਭੂਤੇਹਿ ਸਦ੍ਧਿਂ ਸਂਵਸਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਪ੍ਪਿਚ੍ਛਂ ਸਨ੍ਤੁਟ੍ਠਂ ਧੁਤਵਾਦਂ ਸਲ੍ਲੇਖਵੁਤ੍ਤਿਂ ਆਚਾਰਸਮ੍ਪਨ੍ਨਂ ਲਜ੍ਜਿਂ ਪੇਸਲਂ ਗਰੁਂ ਭਾਵਨੀਯਂ ਵਤ੍ਤਾਰਂ ਵਚਨਕ੍ਖਮਂ ਚੋਦਕਂ ਪਾਪਗਰਹਿਂ ਓਵਾਦਕਂ ਅਨੁਸਾਸਕਂ ਵਿਞ੍ਞਾਪਕਂ ਸਨ੍ਦਸ੍ਸਕਂ ਸਮਾਦਪਕਂ ਸਮੁਤ੍ਤੇਜਕਂ ਸਮ੍ਪਹਂਸਕਂ ਕਲ੍ਯਾਣਮਿਤ੍ਤਂ ਸਬ੍ਰਹ੍ਮਚਾਰਿਂ ਨਿਸ੍ਸਾਯ ਵਸਿਤਬ੍ਬਂ. ਇਦਂ, ਮਹਾਰਾਜ, ਮਹਾਸਮੁਦ੍ਦਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਮਹਾਸਮੁਦ੍ਦੋ ਨਵਸਲਿਲਸਮ੍ਪੁਣ੍ਣਾਹਿ ਗਙ੍ਗਾਯਮੁਨਾਅਚਿਰਵਤੀਸਰਭੂਮਹੀਆਦੀਹਿ ਨਦੀਸਤਸਹਸ੍ਸੇਹਿ ਅਨ੍ਤਲਿਕ੍ਖੇ ਸਲਿਲਧਾਰਾਹਿ ਚ ਪੂਰਿਤੋਪਿ ਸਕਂ ਵੇਲਂ ਨਾਤਿਵਤ੍ਤਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਲਾਭਸਕ੍ਕਾਰਸਿਲੋਕਵਨ੍ਦਨਮਾਨਨਪੂਜਨਕਾਰਣਾ ਜੀਵਿਤਹੇਤੁਪਿ ਸਞ੍ਚਿਚ੍ਚ ਸਿਕ੍ਖਾਪਦਵੀਤਿਕ੍ਕਮੋ ਨ ਕਰਣੀਯੋ. ਇਦਂ, ਮਹਾਰਾਜ, ਮਹਾਸਮੁਦ੍ਦਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ –

‘ਸੇਯ੍ਯਥਾਪਿ, ਮਹਾਰਾਜ [ਪਹਾਰਾਧ (ਸੀ. ਪੀ.)], ਮਹਾਸਮੁਦ੍ਦੋ ਠਿਤਧਮ੍ਮੋ ਵੇਲਂ ਨਾਤਿਕ੍ਕਮਤਿ, ਏਵਮੇਵ ਖੋ, ਮਹਾਰਾਜ, ਯਂ ਮਹਾ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਤ੍ਤਂ, ਤਂ ਮਮ ਸਾਵਕਾ ਜੀਵਿਤਹੇਤੁਪਿ ਨਾਤਿਕ੍ਕਮਨ੍ਤੀ’ਤਿ.

‘‘ਪੁਨ ਚਪਰਂ, ਮਹਾਰਾਜ, ਮਹਾਸਮੁਦ੍ਦੋ ਸਬ੍ਬਸਵਨ੍ਤੀਹਿ ਗਙ੍ਗਾਯਮੁਨਾਅਚਿਰਵਤੀਸਰਭੂਮਹੀਹਿ ਅਨ੍ਤਲਿਕ੍ਖੇ ਉਦਕਧਾਰਾਹਿਪਿ ਨ ਪਰਿਪੂਰਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਉਦ੍ਦੇਸਪਰਿਪੁਚ੍ਛਾਸਵਨਧਾਰਣਵਿਨਿਚ੍ਛਯਅਭਿਧਮ੍ਮਵਿਨਯਗਾਲ਼੍ਹਸੁਤ੍ਤਨ੍ਤਵਿਗ੍ਗਹਪਦਨਿਕ੍ਖੇਪਪਦਸਨ੍ਧਿ ਪਦਵਿਭਤ੍ਤਿਨਵਙ੍ਗਜਿਨਸਾਸਨਵਰਂ ਸੁਣਨ੍ਤੇਨਾਪਿ ਨ ਤਪ੍ਪਿਤਬ੍ਬਂ. ਇਦਂ, ਮਹਾਰਾਜ, ਮਹਾਸਮੁਦ੍ਦਸ੍ਸ ਪਞ੍ਚਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸੁਤਸੋਮਜਾਤਕੇ –

‘‘‘ਅਗ੍ਗਿ ਯਥਾ ਤਿਣਕਟ੍ਠਂ ਦਹਨ੍ਤੋ, ਨ ਤਪ੍ਪਤਿ ਸਾਗਰੋ ਵਾ ਨਦੀਹਿ;

ਏਵਮ੍ਪਿ ਚੇ [ਏਵਮ੍ਪਿ ਵੇ (ਸ੍ਯਾ.), ਏਵਂ ਹਿ ਮੇ (ਕ.) ਜਾ. ੧ ਅਸੀਤਿਨਿਪਾਤੇ] ਪਣ੍ਡਿਤਾ ਰਾਜਸੇਟ੍ਠ, ਸੁਤ੍ਵਾ ਨ ਤਪ੍ਪਨ੍ਤਿ ਸੁਭਾਸਿਤੇਨਾ’’’ਤਿ.

ਸਮੁਦ੍ਦਙ੍ਗਪਞ੍ਹੋ ਦਸਮੋ.ਸਮੁਦ੍ਦਵਗ੍ਗੋ ਦੁਤਿਯੋ.

ਤਸ੍ਸੁਦ੍ਦਾਨਂ –

ਲਾਬੁਲਤਾ ਚ ਪਦੁਮਂ, ਬੀਜਂ ਸਾਲਕਲ੍ਯਾਣਿਕਾ;

ਨਾਵਾ ਚ ਨਾਵਾਲਗ੍ਗਨਂ, ਕੂਪੋ ਨਿਯਾਮਕੋ ਤਥਾ;

ਕਮ੍ਮਕਾਰੋ ਸਮੁਦ੍ਦੋ ਚ, ਵਗ੍ਗੋ ਤੇਨ ਪਵੁਚ੍ਚਤੀਤਿ.