੩. ਕਲਨ੍ਦਕਙ੍ਗਪਞ੍ਹੋ

੩. ‘‘ਭਨ੍ਤੇ ਨਾਗਸੇਨ, ‘ਕਲਨ੍ਦਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਕਲਨ੍ਦਕੋ ਪਟਿਸਤ੍ਤੁਮ੍ਹਿ ਓਪਤਨ੍ਤੇ ਨਙ੍ਗੁਟ੍ਠਂ ਪਪ੍ਫੋਟੇਤ੍ਵਾ ਮਹਨ੍ਤਂ ਕਤ੍ਵਾ ਤੇਨੇਵ ਨਙ੍ਗੁਟ੍ਠਲਗੁਲ਼ੇਨ ਪਟਿਸਤ੍ਤੁਂ ਪਟਿਬਾਹਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਿਲੇਸਸਤ੍ਤੁਮ੍ਹਿ ਓਪਤਨ੍ਤੇ ਸਤਿਪਟ੍ਠਾਨਲਗੁਲ਼ਂ ਪਪ੍ਫੋਟੇਤ੍ਵਾ ਮਹਨ੍ਤਂ ਕਤ੍ਵਾ ਤੇਨੇਵ ਸਤਿਪਟ੍ਠਾਨਲਗੁਲ਼ੇਨ ਸਬ੍ਬਕਿਲੇਸਾ ਪਟਿਬਾਹਿਤਬ੍ਬਾ. ਇਦਂ, ਮਹਾਰਾਜ, ਕਲਨ੍ਦਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਚੂਲ਼ਪਨ੍ਥਕੇਨ –

‘ਯਦਾ ਕਿਲੇਸਾ ਓਪਤਨ੍ਤਿ, ਸਾਮਞ੍ਞਗੁਣਧਂਸਨਾ;

ਸਤਿਪਟ੍ਠਾਨਲਗੁਲ਼ੇਨ, ਹਨ੍ਤਬ੍ਬਾ ਤੇ ਪੁਨਪ੍ਪੁਨ’’’ਨ੍ਤਿ.

ਕਲਨ੍ਦਕਙ੍ਗਪਞ੍ਹੋ ਤਤਿਯੋ.