੧. ਗਦ੍ਰਭਵਗ੍ਗੋ

੧. ਗਦ੍ਰਭਙ੍ਗਪਞ੍ਹੋ

੧. ‘‘ਭਨ੍ਤੇ ਨਾਗਸੇਨ, ‘ਗਦ੍ਰਭਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਗਦ੍ਰਭੋ ਨਾਮ ਸਙ੍ਕਾਰਕੂਟੇਪਿ ਚਤੁਕ੍ਕੇਪਿ ਸਿਙ੍ਘਾਟਕੇਪਿ ਗਾਮਦ੍ਵਾਰੇਪਿ ਥੁਸਰਾਸਿਮ੍ਹਿਪਿ ਯਤ੍ਥ ਕਤ੍ਥਚਿ ਸਯਤਿ, ਨ ਸਯਨਬਹੁਲੋ ਹੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਤਿਣਸਨ੍ਥਾਰੇਪਿ ਪਣ੍ਣਸਨ੍ਥਾਰੇਪਿ ਕਟ੍ਠਮਞ੍ਚਕੇਪਿ ਛਮਾਯਪਿ ਯਤ੍ਥ ਕਤ੍ਥਚਿ ਚਮ੍ਮਖਣ੍ਡਂ ਪਤ੍ਥਰਿਤ੍ਵਾ ਯਤ੍ਥ ਕਤ੍ਥਚਿ ਸਯਿਤਬ੍ਬਂ, ਨ ਸਯਨਬਹੁਲੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਗਦ੍ਰਭਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ‘ਕਲਿਙ੍ਗਰੂਪਧਾਨਾ, ਭਿਕ੍ਖਵੇ, ਏਤਰਹਿ ਮਮ ਸਾਵਕਾ ਵਿਹਰਨ੍ਤਿ ਅਪ੍ਪਮਤ੍ਤਾ ਆਤਾਪਿਨੋ ਪਧਾਨਸ੍ਮਿ’ਨ੍ਤਿ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾਪਿ –

‘‘‘ਪਲ੍ਲਙ੍ਕੇਨ ਨਿਸਿਨ੍ਨਸ੍ਸ, ਜਣ੍ਣੁਕੇਨਾਭਿਵਸ੍ਸਤਿ;

ਅਲਂ ਫਾਸੁਵਿਹਾਰਾਯ, ਪਹਿਤਤ੍ਤਸ੍ਸ ਭਿਕ੍ਖੁਨੋ’’’ਤਿ.

ਗਦ੍ਰਭਙ੍ਗਪਞ੍ਹੋ ਪਠਮੋ.

੨. ਕੁਕ੍ਕੁਟਙ੍ਗਪਞ੍ਹੋ

੨. ‘‘ਭਨ੍ਤੇ ਨਾਗਸੇਨ, ‘ਕੁਕ੍ਕੁਟਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਕੁਕ੍ਕੁਟੋ ਕਾਲੇਨ ਸਮਯੇਨ ਪਟਿਸਲ੍ਲੀਯਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਾਲੇਨ ਸਮਯੇਨੇਵ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤ੍ਵਾ ਸਰੀਰਂ ਪਟਿਜਗ੍ਗਿਤ੍ਵਾ ਨਹਾਯਿਤ੍ਵਾ ਚੇਤਿਯਂ ਵਨ੍ਦਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਦਸ੍ਸਨਾਯ ਗਨ੍ਤ੍ਵਾ ਕਾਲੇਨ ਸਮਯੇਨ ਸੁਞ੍ਞਾਗਾਰਂ ਪਵਿਸਿਤਬ੍ਬਂ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਕੁਕ੍ਕੁਟੋ ਕਾਲੇਨ ਸਮਯੇਨੇਵ ਵੁਟ੍ਠਾਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਾਲੇਨ ਸਮਯੇਨੇਵ ਵੁਟ੍ਠਹਿਤ੍ਵਾ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤ੍ਵਾ ਸਰੀਰਂ ਪਟਿਜਗ੍ਗਿਤ੍ਵਾ ਚੇਤਿਯਂ ਵਨ੍ਦਿਤ੍ਵਾ ਪੁਨਦੇਵ ਸੁਞ੍ਞਾਗਾਰਂ ਪਵਿਸਿਤਬ੍ਬਂ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਕੁਕ੍ਕੁਟੋ ਪਥਵਿਂ ਖਣਿਤ੍ਵਾ ਖਣਿਤ੍ਵਾ ਅਜ੍ਝੋਹਾਰਂ ਅਜ੍ਝੋਹਰਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਅਜ੍ਝੋਹਾਰਂ ਅਜ੍ਝੋਹਰਿਤਬ੍ਬਂ ‘ਨੇਵ ਦਵਾਯ ਨ ਮਦਾਯ ਨ ਮਣ੍ਡਨਾਯ ਨ ਵਿਭੂਸਨਾਯ, ਯਾਵਦੇਵ ਇਮਸ੍ਸ ਕਾਯਸ੍ਸ ਠਿਤਿਯਾ ਯਾਪਨਾਯ ਵਿਹਿਂਸੂਪਰਤਿਯਾ ਬ੍ਰਹ੍ਮਚਰਿਯਾਨੁਗ੍ਗਹਾਯ, ਇਤਿ ਪੁਰਾਣਞ੍ਚ ਵੇਦਨਂ ਪਟਿਹਙ੍ਖਾਮਿ ਨਵਞ੍ਚ ਵੇਦਨਂ ਨ ਉਪ੍ਪਾਦੇਸ੍ਸਾਮਿ, ਯਾਤ੍ਰਾ ਚ ਮੇ ਭਵਿਸ੍ਸਤਿ ਅਨਵਜ੍ਜਤਾ ਚ ਫਾਸੁਵਿਹਾਰੋ ਚਾ’ਤਿ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ –

‘‘‘ਕਨ੍ਤਾਰੇ ਪੁਤ੍ਤਮਂਸਂਵ, ਅਕ੍ਖਸ੍ਸਬ੍ਭਞ੍ਜਨਂ ਯਥਾ;

ਏਵਂ ਆਹਰਿ ਆਹਾਰਂ, ਯਾਪਨਤ੍ਥਮਮੁਚ੍ਛਿਤੋ’ਤਿ.

‘‘ਪੁਨ ਚਪਰਂ, ਮਹਾਰਾਜ, ਕੁਕ੍ਕੁਟੋ ਸਚਕ੍ਖੁਕੋਪਿ ਰਤ੍ਤਿਂ ਅਨ੍ਧੋ ਹੋਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਅਨਨ੍ਧੇਨੇਵ ਅਨ੍ਧੇਨ ਵਿਯ ਭਵਿਤਬ੍ਬਂ, ਅਰਞ੍ਞੇਪਿ ਗੋਚਰਗਾਮੇ ਪਿਣ੍ਡਾਯ ਚਰਨ੍ਤੇਨਪਿ ਰਜਨੀਯੇਸੁ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਧਮ੍ਮੇਸੁ ਅਨ੍ਧੇਨ ਬਧਿਰੇਨ ਮੂਗੇਨ ਵਿਯ ਭਵਿਤਬ੍ਬਂ, ਨ ਨਿਮਿਤ੍ਤਂ ਗਹੇਤਬ੍ਬਂ, ਨਾਨੁਬ੍ਯਞ੍ਜਨਂ ਗਹੇਤਬ੍ਬਂ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਮਹਾਕਚ੍ਚਾਯਨੇਨ –

‘ਚਕ੍ਖੁਮਾਸ੍ਸ ਯਥਾ ਅਨ੍ਧੋ, ਸੋਤਵਾ ਬਧਿਰੋ ਯਥਾ;

ਪਞ੍ਞਵਾਸ੍ਸ [ਜਿਵ੍ਹਾਵਸ੍ਸ (ਸੀ. ਪੀ.)] ਯਥਾ ਮੂਗੋ, ਬਲਵਾ ਦੁਬ੍ਬਲੋਰਿਵ;

ਅਤ੍ਤਅਤ੍ਥੇ [ਅਥ ਅਤ੍ਥੇ (ਸੀ. ਪੀ.)] ਸਮੁਪ੍ਪਨ੍ਨੇ, ਸਯੇਥ ਮਤਸਾਯਿਕ’ਨ੍ਤਿ.

‘‘ਪੁਨ ਚਪਰਂ, ਮਹਾਰਾਜ, ਕੁਕ੍ਕੁਟੋ ਲੇਡ੍ਡੁਦਣ੍ਡਲਗੁਲ਼ਮੁਗ੍ਗਰੇਹਿ ਪਰਿਪਾਤਿਯਨ੍ਤੋਪਿ ਸਕਂ ਗੇਹਂ ਨ ਵਿਜਹਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਚੀਵਰਕਮ੍ਮਂ ਕਰੋਨ੍ਤੇਨਪਿ ਨਵਕਮ੍ਮਂ ਕਰੋਨ੍ਤੇਨਪਿ ਵਤ੍ਤਪ੍ਪਟਿਵਤ੍ਤਂ ਕਰੋਨ੍ਤੇਨਪਿ ਉਦ੍ਦਿਸਨ੍ਤੇਨਪਿ ਉਦ੍ਦਿਸਾਪੇਨ੍ਤੇਨਪਿ ਯੋਨਿਸੋ ਮਨਸਿਕਾਰੋ ਨ ਵਿਜਹਿਤਬ੍ਬੋ, ਸਕਂ ਖੋ ਪਨੇਤਂ, ਮਹਾਰਾਜ, ਯੋਗਿਨੋ ਗੇਹਂ, ਯਦਿਦਂ ਯੋਨਿਸੋ ਮਨਸਿਕਾਰੋ. ਇਦਂ, ਮਹਾਰਾਜ, ਕੁਕ੍ਕੁਟਸ੍ਸ ਪਞ੍ਚਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ‘ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋ? ਯਦਿਦਂ ਚਤ੍ਤਾਰੋ ਸਤਿਪਟ੍ਠਾਨਾ’ਤਿ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾਪਿ –

‘‘‘ਯਥਾ ਸੁਦਨ੍ਤੋ ਮਾਤਙ੍ਗੋ, ਸਕਂ ਸੋਣ੍ਡਂ ਨ ਮਦ੍ਦਤਿ;

ਭਕ੍ਖਾਭਕ੍ਖਂ ਵਿਜਾਨਾਤਿ, ਅਤ੍ਤਨੋ ਵੁਤ੍ਤਿਕਪ੍ਪਨਂ.

‘‘‘ਤਥੇਵ ਬੁਦ੍ਧਪੁਤ੍ਤੇਨ, ਅਪ੍ਪਮਤ੍ਤੇਨ ਵਾ ਪਨ;

ਜਿਨਵਚਨਂ ਨ ਮਦ੍ਦਿਤਬ੍ਬਂ, ਮਨਸਿਕਾਰਵਰੁਤ੍ਤਮ’’’ਨ੍ਤਿ.

ਕੁਕ੍ਕੁਟਙ੍ਗਪਞ੍ਹੋ ਦੁਤਿਯੋ.

੩. ਕਲਨ੍ਦਕਙ੍ਗਪਞ੍ਹੋ

੩. ‘‘ਭਨ੍ਤੇ ਨਾਗਸੇਨ, ‘ਕਲਨ੍ਦਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਕਲਨ੍ਦਕੋ ਪਟਿਸਤ੍ਤੁਮ੍ਹਿ ਓਪਤਨ੍ਤੇ ਨਙ੍ਗੁਟ੍ਠਂ ਪਪ੍ਫੋਟੇਤ੍ਵਾ ਮਹਨ੍ਤਂ ਕਤ੍ਵਾ ਤੇਨੇਵ ਨਙ੍ਗੁਟ੍ਠਲਗੁਲ਼ੇਨ ਪਟਿਸਤ੍ਤੁਂ ਪਟਿਬਾਹਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਿਲੇਸਸਤ੍ਤੁਮ੍ਹਿ ਓਪਤਨ੍ਤੇ ਸਤਿਪਟ੍ਠਾਨਲਗੁਲ਼ਂ ਪਪ੍ਫੋਟੇਤ੍ਵਾ ਮਹਨ੍ਤਂ ਕਤ੍ਵਾ ਤੇਨੇਵ ਸਤਿਪਟ੍ਠਾਨਲਗੁਲ਼ੇਨ ਸਬ੍ਬਕਿਲੇਸਾ ਪਟਿਬਾਹਿਤਬ੍ਬਾ. ਇਦਂ, ਮਹਾਰਾਜ, ਕਲਨ੍ਦਕਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਚੂਲ਼ਪਨ੍ਥਕੇਨ –

‘ਯਦਾ ਕਿਲੇਸਾ ਓਪਤਨ੍ਤਿ, ਸਾਮਞ੍ਞਗੁਣਧਂਸਨਾ;

ਸਤਿਪਟ੍ਠਾਨਲਗੁਲ਼ੇਨ, ਹਨ੍ਤਬ੍ਬਾ ਤੇ ਪੁਨਪ੍ਪੁਨ’’’ਨ੍ਤਿ.

ਕਲਨ੍ਦਕਙ੍ਗਪਞ੍ਹੋ ਤਤਿਯੋ.

੪. ਦੀਪਿਨਿਯਙ੍ਗਪਞ੍ਹੋ

੪. ‘‘ਭਨ੍ਤੇ ਨਾਗਸੇਨ, ‘ਦੀਪਿਨਿਯਾ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਦੀਪਿਨੀ ਸਕਿਂ ਯੇਵ ਗਬ੍ਭਂ ਗਣ੍ਹਾਤਿ, ਨ ਪੁਨਪ੍ਪੁਨਂ ਪੁਰਿਸਂ ਉਪੇਤਿ? ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਆਯਤਿਂ ਪਟਿਸਨ੍ਧਿਂ ਉਪ੍ਪਤ੍ਤਿਂ ਗਬ੍ਭਸੇਯ੍ਯਂ ਚੁਤਿਂ ਭੇਦਂ ਖਯਂ ਵਿਨਾਸਂ ਸਂਸਾਰਭਯਂ ਦੁਗ੍ਗਤਿਂ ਵਿਸਮਂ ਸਮ੍ਪੀਲ਼ਿਤਂ ਦਿਸ੍ਵਾ ‘ਪੁਨਬ੍ਭਵੇ ਨਪ੍ਪਟਿਸਨ੍ਦਹਿਸ੍ਸਾਮੀ’ਤਿ ਯੋਨਿਸੋ ਮਨਸਿਕਾਰੋ ਕਰਣੀਯੋ. ਇਦਂ, ਮਹਾਰਾਜ, ਦੀਪਿਨਿਯਾ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸੁਤ੍ਤਨਿਪਾਤੇ ਧਨਿਯਗੋਪਾਲਕਸੁਤ੍ਤੇ –

‘‘‘ਉਸਭੋਰਿਵ ਛੇਤ੍ਵ ਬਨ੍ਧਨਾਨਿ, ਨਾਗੋ ਪੂਤਿਲਤਂਵ ਦਾਲਯਿਤ੍ਵਾ;

ਨਾਹਂ ਪੁਨੁਪੇਸ੍ਸਂ ਗਬ੍ਭਸੇਯ੍ਯਂ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵਾ’’’ਤਿ.

ਦੀਪਿਨਿਯਙ੍ਗਪਞ੍ਹੋ ਚਤੁਤ੍ਥੋ.

੫. ਦੀਪਿਕਙ੍ਗਪਞ੍ਹੋ

੫. ‘‘ਭਨ੍ਤੇ ਨਾਗਸੇਨ, ‘ਦੀਪਿਕਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਦੀਪਿਕੋ ਅਰਞ੍ਞੇ ਤਿਣਗਹਨਂ ਵਾ ਵਨਗਹਨਂ ਵਾ ਪਬ੍ਬਤਗਹਨਂ ਵਾ ਨਿਸ੍ਸਾਯ ਨਿਲੀਯਿਤ੍ਵਾ ਮਿਗੇ ਗਣ੍ਹਾਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਵਿਵੇਕਂ ਸੇਵਿਤਬ੍ਬਂ ਅਰਞ੍ਞਂ ਰੁਕ੍ਖਮੂਲਂ ਪਬ੍ਬਤਂ ਕਨ੍ਦਰਂ ਗਿਰਿਗੁਹਂ ਸੁਸਾਨਂ ਵਨਪਤ੍ਥਂ ਅਬ੍ਭੋਕਾਸਂ ਪਲਾਲਪੁਞ੍ਜਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਂ ਵਿਜਨਵਾਤਂ ਮਨੁਸ੍ਸਰਾਹਸੇਯ੍ਯਕਂ ਪਟਿਸਲ੍ਲਾਨਸਾਰੁਪ੍ਪਂ; ਵਿਵੇਕਂ ਸੇਵਮਾਨੋ ਹਿ, ਮਹਾਰਾਜ, ਯੋਗੀ ਯੋਗਾਵਚਰੋ ਨਚਿਰਸ੍ਸੇਵ ਛਲ਼ਭਿਞ੍ਞਾਸੁ ਚ ਵਸਿਭਾਵਂ ਪਾਪੁਣਾਤਿ. ਇਦਂ, ਮਹਾਰਾਜ, ਦੀਪਿਕਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਹਿ ਧਮ੍ਮਸਙ੍ਗਾਹਕੇਹਿ –

‘‘‘ਯਥਾਪਿ ਦੀਪਿਕੋ ਨਾਮ, ਨਿਲੀਯਿਤ੍ਵਾ ਗਣ੍ਹਤੇ [ਗਣ੍ਹਤੀ (ਸੀ. ਪੀ.)] ਮਿਗੇ;

ਤਥੇਵਾਯਂ ਬੁਦ੍ਧਪੁਤ੍ਤੋ, ਯੁਤ੍ਤਯੋਗੋ ਵਿਪਸ੍ਸਕੋ;

ਅਰਞ੍ਞਂ ਪਵਿਸਿਤ੍ਵਾਨ, ਗਣ੍ਹਾਤਿ ਫਲਮੁਤ੍ਤਮ’ਨ੍ਤਿ.

‘‘ਪੁਨ ਚਪਰਂ, ਮਹਾਰਾਜ, ਦੀਪਿਕੋ ਯਂ ਕਿਞ੍ਚਿ ਪਸੁਂ ਵਧਿਤ੍ਵਾ ਵਾਮੇਨ ਪਸ੍ਸੇਨ ਪਤਿਤਂ ਨ ਭਕ੍ਖੇਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਵੇਲ਼ੁਦਾਨੇਨ ਵਾ ਪਤ੍ਤਦਾਨੇਨ ਵਾ ਪੁਪ੍ਫਦਾਨੇਨ ਵਾ ਫਲਦਾਨੇਨ ਵਾ ਸਿਨਾਨਦਾਨੇਨ ਵਾ ਮਤ੍ਤਿਕਾਦਾਨੇਨ ਵਾ ਚੁਣ੍ਣਦਾਨੇਨ ਵਾ ਦਨ੍ਤਕਟ੍ਠਦਾਨੇਨ ਵਾ ਮੁਖੋਦਕਦਾਨੇਨ ਵਾ ਚਾਤੁਕਮ੍ਯਤਾਯ ਵਾ ਮੁਗ੍ਗਸੁਪ੍ਯਤਾਯ [ਮੁਗ੍ਗਸੁਪ੍ਪਤਾਯ (ਸੀ. ਪੀ.)] ਵਾ ਪਾਰਿਭਟ [ਪਾਰਿਭਟ੍ਟਤਾਯ (ਸੀ. ਪੀ.)] ਯਤਾਯ ਵਾ ਜਙ੍ਘਪੇਸਨੀਯੇਨ ਵਾ ਵੇਜ੍ਜਕਮ੍ਮੇਨ ਵਾ ਦੂਤਕਮ੍ਮੇਨ ਵਾ ਪਹਿਣਗਮਨੇਨ ਵਾ ਪਿਣ੍ਡਪਟਿਪਿਣ੍ਡੇਨ ਵਾ ਦਾਨਾਨੁਪ੍ਪਦਾਨੇਨ ਵਾ ਵਤ੍ਥੁਵਿਜ੍ਜਾਯ ਵਾ ਨਕ੍ਖਤ੍ਤਵਿਜ੍ਜਾਯ ਵਾ ਅਙ੍ਗਵਿਜ੍ਜਾਯ [ਨਗਵਿਜ੍ਜਾਯ (ਕ.)] ਵਾ ਅਞ੍ਞਤਰਞ੍ਞਤਰੇਨ ਵਾ ਬੁਦ੍ਧਪ੍ਪਟਿਕੁਟ੍ਠੇਨ ਮਿਚ੍ਛਾਜੀਵੇਨ ਨਿਪ੍ਫਾਦਿਤਂ ਭੋਜਨਂ ਨ ਭੁਞ੍ਜਿਤਬ੍ਬਂ [ਪਰਿਭੁਞ੍ਜਿਤਬ੍ਬਂ (ਸੀ. ਪੀ.)] ਵਾਮੇਨ ਪਸ੍ਸੇਨ ਪਤਿਤਂ ਪਸੁਂ ਵਿਯ ਦੀਪਿਕੋ. ਇਦਂ, ਮਹਾਰਾਜ, ਦੀਪਿਕਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਵਚੀਵਿਞ੍ਞਤ੍ਤਿਵਿਪ੍ਫਾਰਾ, ਉਪ੍ਪਨ੍ਨਂ ਮਧੁਪਾਯਸਂ;

ਸਚੇ ਭੁਤ੍ਤੋ ਭਵੇਯ੍ਯਾਹਂ, ਸਾਜੀਵੋ ਗਰਹਿਤੋ ਮਮ.

‘‘‘ਯਦਿਪਿ ਮੇ ਅਨ੍ਤਗੁਣਂ, ਨਿਕ੍ਖਮਿਤ੍ਵਾ ਬਹੀ ਚਰੇ;

ਨੇਵ ਭਿਨ੍ਦੇਯ੍ਯਮਾਜੀਵਂ, ਚਜਮਾਨੋਪਿ ਜੀਵਿਤ’’’ਨ੍ਤਿ.

ਦੀਪਿਕਙ੍ਗਪਞ੍ਹੋ ਪਞ੍ਚਮੋ.

੬. ਕੁਮ੍ਮਙ੍ਗਪਞ੍ਹੋ

੬. ‘‘ਭਨ੍ਤੇ ਨਾਗਸੇਨ, ‘ਕੁਮ੍ਮਸ੍ਸ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਪਞ੍ਚ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਕੁਮ੍ਮੋ ਉਦਕਚਰੋ ਉਦਕੇਯੇਵ ਵਾਸਂ ਕਪ੍ਪੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਬ੍ਬਪਾਣਭੂਤਪੁਗ੍ਗਲਾਨਂ ਹਿਤਾਨੁਕਮ੍ਪਿਨਾ ਮੇਤ੍ਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ ਸਬ੍ਬਾਵਨ੍ਤਂ ਲੋਕਂ ਫਰਿਤ੍ਵਾ ਵਿਹਰਿਤਬ੍ਬਂ. ਇਦਂ, ਮਹਾਰਾਜ, ਕੁਮ੍ਮਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਕੁਮ੍ਮੋ ਉਦਕੇ ਉਪ੍ਪਿਲਵਨ੍ਤੋ ਸੀਸਂ ਉਕ੍ਖਿਪਿਤ੍ਵਾ ਯਦਿ ਕੋਚਿ ਪਸ੍ਸਤਿ, ਤਤ੍ਥੇਵ ਨਿਮੁਜ੍ਜਤਿ ਗਾਲ਼੍ਹਮੋਗਾਹਤਿ ‘ਮਾ ਮਂ ਤੇ ਪੁਨ ਪਸ੍ਸੇਯ੍ਯੁ’ਨ੍ਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਿਲੇਸੇਸੁ ਓਪਤਨ੍ਤੇਸੁ ਆਰਮ੍ਮਣਸਰੇ ਨਿਮੁਜ੍ਜਿਤਬ੍ਬਂ ਗਾਲ਼੍ਹਮੋਗਾਹਿਤਬ੍ਬਂ ‘ਮਾ ਮਂ ਕਿਲੇਸਾ ਪੁਨ ਪਸ੍ਸੇਯ੍ਯੁ’ਨ੍ਤਿ. ਇਦਂ, ਮਹਾਰਾਜ, ਕੁਮ੍ਮਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਕੁਮ੍ਮੋ ਉਦਕਤੋ ਨਿਕ੍ਖਮਿਤ੍ਵਾ ਕਾਯਂ ਓਤਾਪੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਨਿਸਜ੍ਜਟ੍ਠਾਨਸਯਨਚਙ੍ਕਮਤੋ ਮਾਨਸਂ ਨੀਹਰਿਤ੍ਵਾ ਸਮ੍ਮਪ੍ਪਧਾਨੇ ਮਾਨਸਂ ਓਤਾਪੇਤਬ੍ਬਂ. ਇਦਂ, ਮਹਾਰਾਜ, ਕੁਮ੍ਮਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਕੁਮ੍ਮੋ ਪਥਵਿਂ ਖਣਿਤ੍ਵਾ ਵਿਵਿਤ੍ਤੇ ਵਾਸਂ ਕਪ੍ਪੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਲਾਭਸਕ੍ਕਾਰਸਿਲੋਕਂ ਪਜਹਿਤ੍ਵਾ ਸੁਞ੍ਞਂ ਵਿਵਿਤ੍ਤਂ ਕਾਨਨਂ ਵਨਪਤ੍ਥਂ ਪਬ੍ਬਤਂ ਕਨ੍ਦਰਂ ਗਿਰਿਗੁਹਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਂ ਪਵਿਵਿਤ੍ਤਮੋਗਾਹਿਤ੍ਵਾ ਵਿਵਿਤ੍ਤੇ ਯੇਵ ਵਾਸਂ ਉਪਗਨ੍ਤਬ੍ਬਂ. ਇਦਂ, ਮਹਾਰਾਜ, ਕੁਮ੍ਮਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਉਪਸੇਨੇਨ ਵਙ੍ਗਨ੍ਤਪੁਤ੍ਤੇਨ –

‘‘‘ਵਿਵਿਤ੍ਤਂ ਅਪ੍ਪਨਿਗ੍ਘੋਸਂ, ਵਾਲ਼ਮਿਗਨਿਸੇਵਿਤਂ;

ਸੇਵੇ ਸੇਨਾਸਨਂ ਭਿਕ੍ਖੁ, ਪਟਿਸਲ੍ਲਾਨਕਾਰਣਾ’ਤਿ.

‘‘ਪੁਨ ਚਪਰਂ, ਮਹਾਰਾਜ, ਕੁਮ੍ਮੋ ਚਾਰਿਕਂ ਚਰਮਾਨੋ ਯਦਿ ਕਞ੍ਚਿ ਪਸ੍ਸਤਿ ਵਾ, ਸਦ੍ਦਂ ਸੁਣਾਤਿ ਵਾ, ਸੋਣ੍ਡਿਪਞ੍ਚਮਾਨਿ ਅਙ੍ਗਾਨਿ ਸਕੇ ਕਪਾਲੇ ਨਿਦਹਿਤ੍ਵਾ ਅਪ੍ਪੋਸ੍ਸੁਕ੍ਕੋ ਤੁਣ੍ਹੀਭੂਤੋ ਤਿਟ੍ਠਤਿ ਕਾਯਮਨੁਰਕ੍ਖਨ੍ਤੋ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਬ੍ਬਤ੍ਥ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਧਮ੍ਮੇਸੁ ਆਪਤਨ੍ਤੇਸੁ ਛਸੁ ਦ੍ਵਾਰੇਸੁ ਸਂਵਰਕਵਾਟਂ ਅਨੁਗ੍ਘਾਟੇਤ੍ਵਾ ਮਾਨਸਂ ਸਮੋਦਹਿਤ੍ਵਾ ਸਂਵਰਂ ਕਤ੍ਵਾ ਸਤੇਨ ਸਮ੍ਪਜਾਨੇਨ ਵਿਹਾਤਬ੍ਬਂ ਸਮਣਧਮ੍ਮਂ ਅਨੁਰਕ੍ਖਮਾਨੇਨ. ਇਦਂ, ਮਹਾਰਾਜ, ਕੁਮ੍ਮਸ੍ਸ ਪਞ੍ਚਮਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸਂਯੁਤ੍ਤਨਿਕਾਯਵਰੇ ਕੁਮ੍ਮੂਪਮਸੁਤ੍ਤਨ੍ਤੇ –

‘‘‘ਕੁਮ੍ਮੋਵ ਅਙ੍ਗਾਨਿ ਸਕੇ ਕਪਾਲੇ, ਸਮੋਦਹਂ ਭਿਕ੍ਖੁ ਮਨੋਵਿਤਕ੍ਕੇ;

ਅਨਿਸ੍ਸਿਤੋ ਅਞ੍ਞਮਹੇਠਯਾਨੋ, ਪਰਿਨਿਬ੍ਬੁਤੋਨੂਪਵਦੇਯ੍ਯ ਕਞ੍ਚੀ’’’ਤਿ.

ਕੁਮ੍ਮਙ੍ਗਪਞ੍ਹੋ ਛਟ੍ਠੋ.

੭. ਵਂਸਙ੍ਗਪਞ੍ਹੋ

੭. ‘‘ਭਨ੍ਤੇ ਨਾਗਸੇਨ, ‘ਵਂਸਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਵਂਸੋ ਯਤ੍ਥ ਵਾਤੋ, ਤਤ੍ਥ ਅਨੁਲੋਮੇਤਿ, ਨਾਞ੍ਞਤ੍ਥਮਨੁਧਾਵਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਯਂ ਬੁਦ੍ਧੇਨ ਭਗਵਤਾ ਭਾਸਿਤਂ ਨਵਙ੍ਗਂ ਸਤ੍ਥੁ ਸਾਸਨਂ, ਤਂ ਅਨੁਲੋਮਯਿਤ੍ਵਾ ਕਪ੍ਪਿਯੇ ਅਨਵਜ੍ਜੇ ਠਤ੍ਵਾ ਸਮਣਧਮ੍ਮਂ ਯੇਵ ਪਰਿਯੇਸਿਤਬ੍ਬਂ. ਇਦਂ, ਮਹਾਰਾਜ, ਵਂਸਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ ਮਹਾਰਾਜ ਥੇਰੇਨ ਰਾਹੁਲੇਨ –

‘‘‘ਨਵਙ੍ਗਂ ਬੁਦ੍ਧਵਚਨਂ, ਅਨੁਲੋਮੇਤ੍ਵਾਨ ਸਬ੍ਬਦਾ;

ਕਪ੍ਪਿਯੇ ਅਨਵਜ੍ਜਸ੍ਮਿਂ, ਠਤ੍ਵਾਪਾਯਂ ਸਮੁਤ੍ਤਰਿ’’’ਨ੍ਤਿ.

ਵਂਸਙ੍ਗਪਞ੍ਹੋ ਸਤ੍ਤਮੋ.

੮. ਚਾਪਙ੍ਗਪਞ੍ਹੋ

੮. ‘‘ਭਨ੍ਤੇ ਨਾਗਸੇਨ, ‘ਚਾਪਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਚਾਪੋ ਸੁਤਚ੍ਛਿਤੋ ਨਮਿਤੋ [ਮਿਤੋ (ਸੀ. ਪੀ. ਕ.)] ਯਾਵਗ੍ਗਮੂਲਂ ਸਮਕਮੇਵ ਅਨੁਨਮਤਿ ਨਪ੍ਪਟਿਤ੍ਥਮ੍ਭਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਥੇਰਨਵਮਜ੍ਝਿਮਸਮਕੇਸੁ ਅਨੁਨਮਿਤਬ੍ਬਂ ਨਪ੍ਪਟਿਫਰਿਤਬ੍ਬਂ. ਇਦਂ, ਮਹਾਰਾਜ, ਚਾਪਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਵਿਧੁਰ [ਪੁਣ੍ਣਕ] ਜਾਤਕੇ –

‘‘‘ਚਾਪੋਵੂਨੁਦਰੋ ਧੀਰੋ, ਵਂਸੋ ਵਾਪਿ ਪਕਮ੍ਪਯੇ [ਚਾਪੋ ਵਾ ਨੁਨ ਮੇ ਧੀਰੋ, ਵਂਸੋਵ ਅਨੁਲੋਮਯਂ (ਸੀ. ਪੀ. ਕ.)];

ਪਟਿਲੋਮਂ ਨ ਵਤ੍ਤੇਯ੍ਯ, ਸ ਰਾਜਵਸਤਿਂ ਵਸੇ’’’ਤਿ.

ਚਾਪਙ੍ਗਪਞ੍ਹੋ ਅਟ੍ਠਮੋ.

੯. ਵਾਯਸਙ੍ਗਪਞ੍ਹੋ

੯. ‘‘ਭਨ੍ਤੇ ਨਾਗਸੇਨ, ‘ਵਾਯਸਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਵਾਯਸੋ ਆਸਙ੍ਕਿਤਪਰਿਸਙ੍ਕਿਤੋ ਯਤ੍ਤਪ੍ਪਯਤ੍ਤੋ ਚਰਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਆਸਙ੍ਕਿਤਪਰਿਸਙ੍ਕਿਤੇਨ ਯਤ੍ਤਪਯਤ੍ਤੇਨ ਉਪਟ੍ਠਿਤਾਯ ਸਤਿਯਾ ਸਂਵੁਤੇਹਿ ਇਨ੍ਦ੍ਰਿਯੇਹਿ ਚਰਿਤਬ੍ਬਂ. ਇਦਂ, ਮਹਾਰਾਜ, ਵਾਯਸਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਵਾਯਸੋ ਯਂ ਕਿਞ੍ਚਿ ਭੋਜਨਂ ਦਿਸ੍ਵਾ ਞਾਤੀਹਿ ਸਂਵਿਭਜਿਤ੍ਵਾ ਭੁਞ੍ਜਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਯੇ ਤੇ ਲਾਭਾ ਧਮ੍ਮਿਕਾ ਧਮ੍ਮਲਦ੍ਧਾ ਅਨ੍ਤਮਸੋ ਪਤ੍ਤਪਰਿਯਾਪਨ੍ਨਮਤ੍ਤਮ੍ਪਿ, ਤਥਾਰੂਪੇਹਿ ਲਾਭੇਹਿ ਪਟਿਵਿਭਤ੍ਤਭੋਗਿਨਾ ਭਵਿਤਬ੍ਬਂ ਸੀਲਵਨ੍ਤੇਹਿ ਸਬ੍ਰਹ੍ਮਚਾਰੀਹਿ. ਇਦਂ, ਮਹਾਰਾਜ, ਵਾਯਸਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਸਚੇ ਮੇ ਉਪਨਾਮੇਨ੍ਤਿ, ਯਥਾਲਦ੍ਧਂ ਤਪਸ੍ਸਿਨੋ;

ਸਬ੍ਬੇ ਸਂਵਿਭਜਿਤ੍ਵਾਨ, ਤਤੋ ਭੁਞ੍ਜਾਮਿ ਭੋਜਨ’’’ਨ੍ਤਿ.

ਵਾਯਸਙ੍ਗਪਞ੍ਹੋ ਨਵਮੋ.

੧੦. ਮਕ੍ਕਟਙ੍ਗਪਞ੍ਹੋ

੧੦. ‘‘ਭਨ੍ਤੇ ਨਾਗਸੇਨ, ‘ਮਕ੍ਕਟਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਮਕ੍ਕਟੋ ਵਾਸਮੁਪਗਚ੍ਛਨ੍ਤੋ ਤਥਾਰੂਪੇ ਓਕਾਸੇ ਮਹਤਿਮਹਾਰੁਕ੍ਖੇ ਪਵਿਵਿਤ੍ਤੇ ਸਬ੍ਬਟ੍ਠਕਸਾਖੇ [ਸਬ੍ਬਤ੍ਥਕਸਾਖੇ (ਸ੍ਯਾ.), ਸਬ੍ਬਟ੍ਠਸਾਖੇ (ਕ.)] ਭੀਰੁਤ੍ਤਾਣੇ ਵਾਸਮੁਪਗਚ੍ਛਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਲਜ੍ਜਿਂ ਪੇਸਲਂ ਸੀਲਵਨ੍ਤਂ ਕਲ੍ਯਾਣਧਮ੍ਮਂ ਬਹੁਸ੍ਸੁਤਂ ਧਮ੍ਮਧਰਂ ਵਿਨਯਧਰਂ ਪਿਯਂ ਗਰੁਭਾਵਨੀਯਂ ਵਤ੍ਤਾਰਂ ਵਚਨਕ੍ਖਮਂ ਓਵਾਦਕਂ ਵਿਞ੍ਞਾਪਕਂ ਸਨ੍ਦਸ੍ਸਕਂ ਸਮਾਦਪਕਂ ਸਮੁਤ੍ਤੇਜਕਂ ਸਮ੍ਪਹਂਸਕਂ ਏਵਰੂਪਂ ਕਲ੍ਯਾਣਮਿਤ੍ਤਂ ਆਚਰਿਯਂ ਨਿਸ੍ਸਾਯ ਵਿਹਰਿਤਬ੍ਬਂ. ਇਦਂ, ਮਹਾਰਾਜ, ਮਕ੍ਕਟਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਮਕ੍ਕਟੋ ਰੁਕ੍ਖੇ ਯੇਵ ਚਰਤਿ ਤਿਟ੍ਠਤਿ ਨਿਸੀਦਤਿ, ਯਦਿ ਨਿਦ੍ਦਂ ਓਕ੍ਕਮਤਿ, ਤਤ੍ਥੇਵ ਰਤ੍ਤਿਂ ਵਾਸਮਨੁਭਵਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਪਵਨਾਭਿਮੁਖੇਨ ਭਵਿਤਬ੍ਬਂ, ਪਵਨੇ ਯੇਵ ਠਾਨਚਙ੍ਕਮਨਿਸਜ੍ਜਾਸਯਨਂ ਨਿਦ੍ਦਂ ਓਕ੍ਕਮਿਤਬ੍ਬਂ, ਤਤ੍ਥੇਵ ਸਤਿਪਟ੍ਠਾਨਮਨੁਭਵਿਤਬ੍ਬਂ. ਇਦਂ, ਮਹਾਰਾਜ, ਮਕ੍ਕਟਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਚਙ੍ਕਮਨ੍ਤੋਪਿ ਤਿਟ੍ਠਨ੍ਤੋ, ਨਿਸਜ੍ਜਾਸਯਨੇਨ ਵਾ;

ਪਵਨੇ ਸੋਭਤੇ ਭਿਕ੍ਖੁ, ਪਵਨਨ੍ਤਂਵ ਵਣ੍ਣਿਤ’’’ਨ੍ਤਿ.

ਮਕ੍ਕਟਙ੍ਗਪਞ੍ਹੋ ਦਸਮੋ.

ਗਦ੍ਰਭਵਗ੍ਗੋ ਪਠਮੋ.

ਤਸ੍ਸੁਦ੍ਦਾਨਂ –

ਗਦ੍ਰਭੋ ਚੇਵ [ਘੋਰਸ੍ਸਰੋ ਚ (ਸੀ. ਸ੍ਯਾ. ਪੀ.)] ਕੁਕ੍ਕੁਟੋ, ਕਲਨ੍ਦੋ ਦੀਪਿਨਿ ਦੀਪਿਕੋ;

ਕੁਮ੍ਮੋ ਵਂਸੋ ਚ ਚਾਪੋ ਚ, ਵਾਯਸੋ ਅਥ ਮਕ੍ਕਟੋਤਿ.