੯. ਵੇਦਨਾਲਕ੍ਖਣਪਞ੍ਹੋ

੯. ‘‘ਭਨ੍ਤੇ ਨਾਗਸੇਨ, ਕਿਂਲਕ੍ਖਣਾ ਵੇਦਨਾ’’ਤਿ? ‘‘ਵੇਦਯਿਤਲਕ੍ਖਣਾ, ਮਹਾਰਾਜ, ਵੇਦਨਾ ਅਨੁਭਵਨਲਕ੍ਖਣਾ ਚਾ’’ਤਿ.

‘‘ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਕੋਚਿਦੇਵ ਪੁਰਿਸੋ ਰਞ੍ਞੋ ਅਧਿਕਾਰਂ ਕਰੇਯ੍ਯ, ਤਸ੍ਸ ਰਾਜਾ ਤੁਟ੍ਠੋ ਅਧਿਕਾਰਂ ਦਦੇਯ੍ਯ, ਸੋ ਤੇਨ ਅਧਿਕਾਰੇਨ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤੋ ਸਮਙ੍ਗਿਭੂਤੋ ਪਰਿਚਰੇਯ੍ਯ, ਤਸ੍ਸ ਏਵਮਸ੍ਸ ‘ਮਯਾ ਖੋ ਪੁਬ੍ਬੇ ਰਞ੍ਞੋ ਅਧਿਕਾਰੋ ਕਤੋ, ਤਸ੍ਸ ਮੇ ਰਾਜਾ ਤੁਟ੍ਠੋ ਅਧਿਕਾਰਂ ਅਦਾਸਿ, ਸ੍ਵਾਹਂ ਤਤੋਨਿਦਾਨਂ ਇਮਂ ਏਵਰੂਪਂ ਵੇਦਨਂ ਵੇਦਯਾਮੀ’ਤਿ.

‘‘ਯਥਾ ਵਾ ਪਨ, ਮਹਾਰਾਜ, ਕੋਚਿਦੇਵ ਪੁਰਿਸੋ ਕੁਸਲਂ ਕਮ੍ਮਂ ਕਤ੍ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯ, ਸੋ ਚ ਤਤ੍ਥ ਦਿਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤੋ ਸਮਙ੍ਗਿਭੂਤੋ ਪਰਿਚਰੇਯ੍ਯ, ਤਸ੍ਸ ਏਵਮਸ੍ਸ ‘ਸ੍ਵਾਹਂ ਖੋ ਪੁਬ੍ਬੇ ਕੁਸਲਂ ਕਮ੍ਮਂ ਅਕਾਸਿਂ, ਸੋਹਂ ਤਤੋਨਿਦਾਨਂ ਇਮਂ ਏਵਰੂਪਂ ਵੇਦਨਂ ਵੇਦਯਾਮੀ’ਤਿ, ਏਵਂ ਖੋ, ਮਹਾਰਾਜ, ਵੇਦਯਿਤਲਕ੍ਖਣਾ ਵੇਦਨਾ ਅਨੁਭਵਨਲਕ੍ਖਣਾ ਚਾ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਵੇਦਨਾਲਕ੍ਖਣਪਞ੍ਹੋ ਨਵਮੋ.