੧੦. ਸਞ੍ਞਾਲਕ੍ਖਣਪਞ੍ਹੋ

੧੦. ‘‘ਭਨ੍ਤੇ ਨਾਗਸੇਨ, ਕਿਂਲਕ੍ਖਣਾ ਸਞ੍ਞਾ’’ਤਿ? ‘‘ਸਞ੍ਜਾਨਨਲਕ੍ਖਣਾ, ਮਹਾਰਾਜ, ਸਞ੍ਞਾ. ਕਿਂ ਸਞ੍ਜਾਨਾਤਿ? ਨੀਲਮ੍ਪਿ ਸਞ੍ਜਾਨਾਤਿ, ਪੀਤਮ੍ਪਿ ਸਞ੍ਜਾਨਾਤਿ, ਲੋਹਿਤਮ੍ਪਿ ਸਞ੍ਜਾਨਾਤਿ, ਓਦਾਤਮ੍ਪਿ ਸਞ੍ਜਾਨਾਤਿ, ਮਞ੍ਜਿਟ੍ਠਮ੍ਪਿ [ਮਞ੍ਜੇਟ੍ਠਮ੍ਪਿ (ਸੀ. ਪੀ.)] ਸਞ੍ਜਾਨਾਤਿ. ਏਵਂ ਖੋ, ਮਹਾਰਾਜ, ਸਞ੍ਜਾਨਨਲਕ੍ਖਣਾ ਸਞ੍ਞਾ’’ਤਿ.

‘‘ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਰਞ੍ਞੋ ਭਣ੍ਡਾਗਾਰਿਕੋ ਭਣ੍ਡਾਗਾਰਂ ਪਵਿਸਿਤ੍ਵਾ ਨੀਲਪੀਤਲੋਹਿਤੋਦਾਤਮਞ੍ਜਿਟ੍ਠਾਨਿ [ਮਞ੍ਜੇਟ੍ਠਾਨਿ (ਸੀ. ਪੀ.)] ਰਾਜਭੋਗਾਨਿ ਰੂਪਾਨਿ ਪਸ੍ਸਿਤ੍ਵਾ ਸਞ੍ਜਾਨਾਤਿ. ਏਵਂ ਖੋ, ਮਹਾਰਾਜ, ਸਞ੍ਜਾਨਨਲਕ੍ਖਣਾ ਸਞ੍ਞਾ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਸਞ੍ਞਾਲਕ੍ਖਣਪਞ੍ਹੋ ਦਸਮੋ.