੧੧. ਚੇਤਨਾਲਕ੍ਖਣਪਞ੍ਹੋ

੧੧. ‘‘ਭਨ੍ਤੇ ਨਾਗਸੇਨ, ਕਿਂਲਕ੍ਖਣਾ ਚੇਤਨਾ’’ਤਿ? ‘‘ਚੇਤਯਿਤਲਕ੍ਖਣਾ, ਮਹਾਰਾਜ, ਚੇਤਨਾ ਅਭਿਸਙ੍ਖਰਣਲਕ੍ਖਣਾ ਚਾ’’ਤਿ.

‘‘ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਕੋਚਿਦੇਵ ਪੁਰਿਸੋ ਵਿਸਂ ਅਭਿਸਙ੍ਖਰਿਤ੍ਵਾ ਅਤ੍ਤਨਾ ਚ ਪਿਵੇਯ੍ਯ, ਪਰੇ ਚ ਪਾਯੇਯ੍ਯ, ਸੋ ਅਤ੍ਤਨਾਪਿ ਦੁਕ੍ਖਿਤੋ ਭਵੇਯ੍ਯ, ਪਰੇਪਿ ਦੁਕ੍ਖਿਤਾ ਭਵੇਯ੍ਯੁਂ. ਏਵਮੇਵ ਖੋ, ਮਹਾਰਾਜ, ਇਧੇਕਚ੍ਚੋ ਪੁਗ੍ਗਲੋ ਅਕੁਸਲਂ ਕਮ੍ਮਂ ਚੇਤਨਾਯ ਚੇਤਯਿਤ੍ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯ. ਯੇਪਿ ਤਸ੍ਸ ਅਨੁਸਿਕ੍ਖਨ੍ਤਿ, ਤੇਪਿ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਨ੍ਤਿ.

‘‘ਯਥਾ ਵਾ ਪਨ, ਮਹਾਰਾਜ, ਕੋਚਿਦੇਵ ਪੁਰਿਸੋ ਸਪ੍ਪਿਨਵਨੀਤਤੇਲਮਧੁਫਾਣਿਤਂ ਏਕਜ੍ਝਂ ਅਭਿਸਙ੍ਖਰਿਤ੍ਵਾ ਅਤ੍ਤਨਾ ਚ ਪਿਵੇਯ੍ਯ, ਪਰੇ ਚ ਪਾਯੇਯ੍ਯ, ਸੋ ਅਤ੍ਤਨਾ ਸੁਖਿਤੋ ਭਵੇਯ੍ਯ, ਪਰੇਪਿ ਸੁਖਿਤਾ ਭਵੇਯ੍ਯੁਂ. ਏਵਮੇਵ ਖੋ, ਮਹਾਰਾਜ, ਇਧੇਕਚ੍ਚੋ ਪੁਗ੍ਗਲੋ ਕੁਸਲਂ ਕਮ੍ਮਂ ਚੇਤਨਾਯ ਚੇਤਯਿਤ੍ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਯੇਪਿ ਤਸ੍ਸ ਅਨੁਸਿਕ੍ਖਨ੍ਤਿ, ਤੇਪਿ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਨ੍ਤਿ. ਏਵਂ ਖੋ, ਮਹਾਰਾਜ, ਚੇਤਯਿਤਲਕ੍ਖਣਾ ਚੇਤਨਾ ਅਭਿਸਙ੍ਖਰਣਲਕ੍ਖਣਾ ਚਾ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਚੇਤਨਾਲਕ੍ਖਣਪਞ੍ਹੋ ਏਕਾਦਸਮੋ.