੫. ਭਵਨ੍ਤਸਙ੍ਖਾਰਜਾਯਮਾਨਪਞ੍ਹੋ

੫. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਅਤ੍ਥਿ ਕੇਚਿ ਸਙ੍ਖਾਰਾ, ਯੇ ਅਭਵਨ੍ਤਾ ਜਾਯਨ੍ਤੀ’’ਤਿ? ‘‘ਨਤ੍ਥਿ, ਮਹਾਰਾਜ, ਕੇਚਿ ਸਙ੍ਖਾਰਾ, ਯੇ ਅਭਵਨ੍ਤਾ ਜਾਯਨ੍ਤਿ, ਭਵਨ੍ਤਾ ਯੇਵ ਖੋ, ਮਹਾਰਾਜ, ਸਙ੍ਖਾਰਾ ਜਾਯਨ੍ਤੀ’’ਤਿ.

‘‘ਓਪਮ੍ਮਂ ਕਰੋਹੀ’’ਤਿ. ‘‘ਤਂ ਕਿਂ ਮਞ੍ਞਸਿ, ਮਹਾਰਾਜ, ਇਦਂ ਗੇਹਂ ਅਭਵਨ੍ਤਂ ਜਾਤਂ, ਯਤ੍ਥ ਤ੍ਵਂ ਨਿਸਿਨ੍ਨੋਸੀ’’ਤਿ? ‘‘ਨਤ੍ਥਿ ਕਿਞ੍ਚਿ, ਭਨ੍ਤੇ, ਇਧ ਅਭਵਨ੍ਤਂ ਜਾਤਂ, ਭਵਨ੍ਤਂ ਯੇਵ ਜਾਤਂ, ਇਮਾਨਿ ਖੋ, ਭਨ੍ਤੇ, ਦਾਰੂਨਿ ਵਨੇ ਅਹੇਸੁਂ, ਅਯਞ੍ਚ ਮਤ੍ਤਿਕਾ ਪਥਵਿਯਂ ਅਹੋਸਿ, ਇਤ੍ਥੀਨਞ੍ਚ ਪੁਰਿਸਾਨਞ੍ਚ ਤਜ੍ਜੇਨ ਵਾਯਾਮੇਨ ਏਵਮਿਦਂ ਗੇਹਂ ਨਿਬ੍ਬਤ੍ਤ’’ਨ੍ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਕੇਚਿ ਸਙ੍ਖਾਰਾ, ਯੇ ਅਭਵਨ੍ਤਾ ਜਾਯਨ੍ਤਿ, ਭਵਨ੍ਤਾ ਯੇਵ ਸਙ੍ਖਾਰਾ ਜਾਯਨ੍ਤੀ’’ਤਿ.

‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਯੇ ਕੇਚਿ ਬੀਜਗਾਮਭੂਤਗਾਮਾ ਪਥਵਿਯਂ ਨਿਕ੍ਖਿਤ੍ਤਾ ਅਨੁਪੁਬ੍ਬੇਨ ਵੁਡ੍ਢਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਮਾਨਾ ਪੁਪ੍ਫਾਨਿ ਚ ਫਲਾਨਿ ਚ ਦਦੇਯ੍ਯੁਂ, ਨ ਤੇ ਰੁਕ੍ਖਾ ਅਭਵਨ੍ਤਾ ਜਾਤਾ, ਭਵਨ੍ਤਾ ਯੇਵ ਤੇ ਰੁਕ੍ਖਾ ਜਾਤਾ. ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਕੇਚਿ ਸਙ੍ਖਾਰਾ, ਯੇ ਅਭਵਨ੍ਤਾ ਜਾਯਨ੍ਤਿ, ਭਵਨ੍ਤਾ ਯੇਵ ਤੇ ਸਙ੍ਖਾਰਾ ਜਾਯਨ੍ਤੀ’’ਤਿ.

‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਕੁਮ੍ਭਕਾਰੋ ਪਥਵਿਯਾ ਮਤ੍ਤਿਕਂ ਉਦ੍ਧਰਿਤ੍ਵਾ ਨਾਨਾਭਾਜਨਾਨਿ ਕਰੋਤਿ, ਨ ਤਾਨਿ ਭਾਜਨਾਨਿ ਅਭਵਨ੍ਤਾਨਿ ਜਾਤਾਨਿ, ਭਵਨ੍ਤਾਨਿ ਯੇਵ ਜਾਤਾਨਿ. ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਕੇਚਿ ਸਙ੍ਖਾਰਾ, ਯੇ ਅਭਵਨ੍ਤਾ ਜਾਯਨ੍ਤਿ, ਭਵਨ੍ਤਾ ਯੇਵ ਸਙ੍ਖਾਰਾ ਜਾਯਨ੍ਤੀ’’ਤਿ.

‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਵੀਣਾਯ ਪਤ੍ਤਂ ਨ ਸਿਯਾ, ਚਮ੍ਮਂ ਨ ਸਿਯਾ, ਦੋਣਿ ਨ ਸਿਯਾ, ਦਣ੍ਡੋ ਨ ਸਿਯਾ, ਉਪਵੀਣੋ ਨ ਸਿਯਾ, ਤਨ੍ਤਿਯੋ ਨ ਸਿਯੁਂ, ਕੋਣੋ ਨ ਸਿਯਾ, ਪੁਰਿਸਸ੍ਸ ਚ ਤਜ੍ਜੋ ਵਾਯਾਮੋ ਨ ਸਿਯਾ, ਜਾਯੇਯ੍ਯ ਸਦ੍ਦੋ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਯਤੋ ਚ ਖੋ, ਮਹਾਰਾਜ, ਵੀਣਾਯ ਪਤ੍ਤਂ ਸਿਯਾ, ਚਮ੍ਮਂ ਸਿਯਾ, ਦੋਣਿ ਸਿਯਾ, ਦਣ੍ਡੋ ਸਿਯਾ, ਉਪਵੀਣੋ ਸਿਯਾ, ਤਨ੍ਤਿਯੋ ਸਿਯੁਂ, ਕੋਣੋ ਸਿਯਾ, ਪੁਰਿਸਸ੍ਸ ਚ ਤਜ੍ਜੋ ਵਾਯਾਮੋ ਸਿਯਾ, ਜਾਯੇਯ੍ਯ ਸਦ੍ਦੋ’’ਤਿ? ‘‘ਆਮ, ਭਨ੍ਤੇ, ਜਾਯੇਯ੍ਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਕੇਚਿ ਸਙ੍ਖਾਰਾ, ਯੇ ਅਭਵਨ੍ਤਾ ਜਾਯਨ੍ਤਿ, ਭਵਨ੍ਤਾ ਯੇਵ ਖੋ ਸਙ੍ਖਾਰਾ ਜਾਯਨ੍ਤੀ’’ਤਿ.

‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਅਰਣਿ ਨ ਸਿਯਾ, ਅਰਣਿਪੋਤਕੋ ਨ ਸਿਯਾ, ਅਰਣਿਯੋਤ੍ਤਕਂ ਨ ਸਿਯਾ, ਉਤ੍ਤਰਾਰਣਿ ਨ ਸਿਯਾ, ਚੋਲ਼ਕਂ ਨ ਸਿਯਾ, ਪੁਰਿਸਸ੍ਸ ਚ ਤਜ੍ਜੋ ਵਾਯਾਮੋ ਨ ਸਿਯਾ, ਜਾਯੇਯ੍ਯ ਸੋ ਅਗ੍ਗੀ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਯਤੋ ਚ ਖੋ, ਮਹਾਰਾਜ, ਅਰਣਿ ਸਿਯਾ, ਅਰਣਿਪੋਤਕੋ ਸਿਯਾ, ਅਰਣਿਯੋਤ੍ਤਕਂ ਸਿਯਾ, ਉਤ੍ਤਰਾਰਣਿ ਸਿਯਾ, ਚੋਲ਼ਕਂ ਸਿਯਾ, ਪੁਰਿਸਸ੍ਸ ਚ ਤਜ੍ਜੋ ਵਾਯਾਮੋ ਸਿਯਾ, ਜਾਯੇਯ੍ਯ ਸੋ ਅਗ੍ਗੀ’’ਤਿ? ‘‘ਆਮ, ਭਨ੍ਤੇ, ਜਾਯੇਯ੍ਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਕੇਚਿ ਸਙ੍ਖਾਰਾ, ਯੇ ਅਭਵਨ੍ਤਾ ਜਾਯਨ੍ਤਿ, ਭਵਨ੍ਤਾ ਯੇਵ ਖੋ ਸਙ੍ਖਾਰਾ ਜਾਯਨ੍ਤੀ’’ਤਿ.

‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਮਣਿ ਨ ਸਿਯਾ, ਆਤਪੋ ਨ ਸਿਯਾ, ਗੋਮਯਂ ਨ ਸਿਯਾ, ਜਾਯੇਯ੍ਯ ਸੋ ਅਗ੍ਗੀ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਯਤੋ ਚ ਖੋ, ਮਹਾਰਾਜ, ਮਣਿ ਸਿਯਾ, ਆਤਪੋ ਸਿਯਾ, ਗੋਮਯਂ ਸਿਯਾ, ਜਾਯੇਯ੍ਯ ਸੋ ਅਗ੍ਗੀ’’ਤਿ? ‘‘ਆਮ, ਭਨ੍ਤੇ, ਜਾਯੇਯ੍ਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਕੇਚਿ ਸਙ੍ਖਾਰਾ ਯੇ ਅਭਵਨ੍ਤਾ ਜਾਯਨ੍ਤਿ, ਭਵਨ੍ਤਾ ਯੇਵ ਖੋ ਸਙ੍ਖਾਰਾ ਜਾਯਨ੍ਤੀ’’ਤਿ.

‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ. ‘‘ਯਥਾ, ਮਹਾਰਾਜ, ਆਦਾਸੋ ਨ ਸਿਯਾ, ਆਭਾ ਨ ਸਿਯਾ, ਮੁਖਂ ਨ ਸਿਯਾ, ਜਾਯੇਯ੍ਯ ਅਤ੍ਤਾ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਯਤੋ ਚ ਖੋ, ਮਹਾਰਾਜ, ਆਦਾਸੋ ਸਿਯਾ, ਆਭਾ ਸਿਯਾ, ਮੁਖਂ ਸਿਯਾ, ਜਾਯੇਯ੍ਯ ਅਤ੍ਤਾ’’ਤਿ? ‘‘ਆਮ, ਭਨ੍ਤੇ, ਜਾਯੇਯ੍ਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਕੇਚਿ ਸਙ੍ਖਾਰਾ, ਯੇ ਅਭਵਨ੍ਤਾ ਜਾਯਨ੍ਤਿ, ਭਵਨ੍ਤਾ ਯੇਵ ਖੋ ਸਙ੍ਖਾਰਾ ਜਾਯਨ੍ਤੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਭਵਨ੍ਤਸਙ੍ਖਾਰਜਾਯਮਾਨਪਞ੍ਹੋ ਪਞ੍ਚਮੋ.