੪. ਸਙ੍ਖਾਰਜਾਯਮਾਨਪਞ੍ਹੋ

੪. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਅਤ੍ਥਿ ਕੇਚਿ ਸਙ੍ਖਾਰਾ, ਯੇ ਜਾਯਨ੍ਤੀ’’ਤਿ? ‘‘ਆਮ, ਮਹਾਰਾਜ, ਅਤ੍ਥਿ ਸਙ੍ਖਾਰਾ, ਯੇ ਜਾਯਨ੍ਤੀ’’ਤਿ. ‘‘ਕਤਮੇ ਤੇ, ਭਨ੍ਤੇ’’ਤਿ? ‘‘ਚਕ੍ਖੁਸ੍ਮਿਞ੍ਚ ਖੋ, ਮਹਾਰਾਜ, ਸਤਿ ਰੂਪੇਸੁ ਚ ਚਕ੍ਖੁਵਿਞ੍ਞਾਣਂ ਹੋਤਿ, ਚਕ੍ਖੁਵਿਞ੍ਞਾਣੇ ਸਤਿ ਚਕ੍ਖੁਸਮ੍ਫਸ੍ਸੋ ਹੋਤਿ, ਚਕ੍ਖੁਸਮ੍ਫਸ੍ਸੇ ਸਤਿ ਵੇਦਨਾ ਹੋਤਿ, ਵੇਦਨਾਯ ਸਤਿ ਤਣ੍ਹਾ ਹੋਤਿ, ਤਣ੍ਹਾਯ ਸਤਿ ਉਪਾਦਾਨਂ ਹੋਤਿ, ਉਪਾਦਾਨੇ ਸਤਿ ਭਵੋ ਹੋਤਿ, ਭਵੇ ਸਤਿ ਜਾਤਿ ਹੋਤਿ, ਜਾਤਿਯਾ ਸਤਿ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਸਮ੍ਭਵਨ੍ਤਿ, ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤਿ. ਚਕ੍ਖੁਸ੍ਮਿਞ੍ਚ ਖੋ, ਮਹਾਰਾਜ, ਅਸਤਿ ਰੂਪੇਸੁ ਚ ਅਸਤਿ ਚਕ੍ਖੁਵਿਞ੍ਞਾਣਂ ਨ ਹੋਤਿ, ਚਕ੍ਖੁਵਿਞ੍ਞਾਣੇ ਅਸਤਿ ਚਕ੍ਖੁਸਮ੍ਫਸ੍ਸੋ ਨ ਹੋਤਿ, ਚਕ੍ਖੁਸਮ੍ਫਸ੍ਸੇ ਅਸਤਿ ਵੇਦਨਾ ਨ ਹੋਤਿ, ਵੇਦਨਾਯ ਅਸਤਿ ਤਣ੍ਹਾ ਨ ਹੋਤਿ, ਤਣ੍ਹਾਯ ਅਸਤਿ ਉਪਾਦਾਨਂ ਨ ਹੋਤਿ, ਉਪਾਦਾਨੇ ਅਸਤਿ ਭਵੋ ਨ ਹੋਤਿ, ਭਵੇ ਅਸਤਿ ਜਾਤਿ ਨ ਹੋਤਿ, ਜਾਤਿਯਾ ਅਸਤਿ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਨ ਹੋਨ੍ਤਿ, ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤੀ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਸਙ੍ਖਾਰਜਾਯਮਾਨਪਞ੍ਹੋ ਚਤੁਤ੍ਥੋ.