੯. ਅਦ੍ਧਾਨਪਞ੍ਹੋ

੯. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਯਂ ਪਨੇਤਂ ਬ੍ਰੂਸਿ ‘ਦੀਘਮਦ੍ਧਾਨ’ਨ੍ਤਿ, ਕਿਮੇਤਂ ਅਦ੍ਧਾਨਂ ਨਾਮਾ’’ਤਿ? ‘‘ਅਤੀਤੋ, ਮਹਾਰਾਜ, ਅਦ੍ਧਾ, ਅਨਾਗਤੋ ਅਦ੍ਧਾ, ਪਚ੍ਚੁਪ੍ਪਨ੍ਨੋ ਅਦ੍ਧਾ’’ਤਿ. ‘‘ਕਿਂ ਪਨ, ਭਨ੍ਤੇ, ਸਬ੍ਬੇ ਅਦ੍ਧਾ ਅਤ੍ਥੀ’’ਤਿ? ‘‘ਕੋਚਿ, ਮਹਾਰਾਜ, ਅਦ੍ਧਾ ਅਤ੍ਥਿ, ਕੋਚਿ ਨਤ੍ਥੀ’’ਤਿ. ‘‘ਕਤਮੋ ਪਨ, ਭਨ੍ਤੇ, ਅਤ੍ਥਿ, ਕਤਮੋ ਨਤ੍ਥੀ’’ਤਿ? ‘‘ਯੇ ਤੇ, ਮਹਾਰਾਜ, ਸਙ੍ਖਾਰਾ ਅਤੀਤਾ ਵਿਗਤਾ ਨਿਰੁਦ੍ਧਾ ਵਿਪਰਿਣਤਾ, ਸੋ ਅਦ੍ਧਾ ਨਤ੍ਥਿ, ਯੇ ਧਮ੍ਮਾ ਵਿਪਾਕਾ, ਯੇ ਚ ਵਿਪਾਕਧਮ੍ਮਧਮ੍ਮਾ, ਯੇ ਚ ਅਞ੍ਞਤ੍ਰ ਪਟਿਸਨ੍ਧਿਂ ਦੇਨ੍ਤਿ, ਸੋ ਅਦ੍ਧਾ ਅਤ੍ਥਿ. ਯੇ ਸਤ੍ਤਾ ਕਾਲਙ੍ਕਤਾ ਅਞ੍ਞਤ੍ਰ ਉਪ੍ਪਨ੍ਨਾ, ਸੋ ਚ ਅਦ੍ਧਾ ਅਤ੍ਥਿ. ਯੇ ਸਤ੍ਤਾ ਕਾਲਙ੍ਕਤਾ ਅਞ੍ਞਤ੍ਰ ਅਨੁਪ੍ਪਨ੍ਨਾ, ਸੋ ਅਦ੍ਧਾ ਨਤ੍ਥਿ. ਯੇ ਚ ਸਤ੍ਤਾ ਪਰਿਨਿਬ੍ਬੁਤਾ, ਸੋ ਚ ਅਦ੍ਧਾ ਨਤ੍ਥਿ ਪਰਿਨਿਬ੍ਬੁਤਤ੍ਤਾ’’ਤਿ.

‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ.

ਅਦ੍ਧਾਨਪਞ੍ਹੋ ਨਵਮੋ.

ਅਦ੍ਧਾਨਵਗ੍ਗੋ ਦੁਤਿਯੋ.

ਇਮਸ੍ਮਿਂ ਵਗ੍ਗੇ ਨਵ ਪਞ੍ਹਾ.