੩੪੦. ਵਿਸਯ੍ਹਜਾਤਕਂ (੪-੪-੧੦)

੧੫੭. ਅਦਾਸਿ ਦਾਨਾਨਿ ਪੁਰੇ ਵਿਸਯ੍ਹ, ਦਦਤੋ ਚ ਤੇ ਖਯਧਮ੍ਮੋ ਅਹੋਸਿ;

ਇਤੋ ਪਰਂ ਚੇ ਨ ਦਦੇਯ੍ਯ ਦਾਨਂ, ਤਿਟ੍ਠੇਯ੍ਯੁਂ ਤੇ ਸਂਯਮਨ੍ਤਸ੍ਸ ਭੋਗਾ.

੧੫੮. ਅਨਰਿਯਮਰਿਯੇਨ ਸਹਸ੍ਸਨੇਤ੍ਤ, ਸੁਦੁਗ੍ਗਤੇਨਾਪਿ ਅਕਿਚ੍ਚਮਾਹੁ;

ਮਾ ਵੋ ਧਨਂ ਤਂ ਅਹੁ ਦੇਵਰਾਜ [ਅਹੁਵਾ ਜਨਿਨ੍ਦ (ਕ. ਸੀ. ਸ੍ਯਾ. ਪੀ.)], ਯਂ ਭੋਗਹੇਤੁ ਵਿਜਹੇਮੁ ਸਦ੍ਧਂ.

੧੫੯. ਯੇਨ ਏਕੋ ਰਥੋ ਯਾਤਿ, ਯਾਤਿ ਤੇਨਾਪਰੋ ਰਥੋ;

ਪੋਰਾਣਂ ਨਿਹਿਤਂ ਵਤ੍ਤਂ, ਵਤ੍ਤਤਞ੍ਞੇਵ [ਵਦ੍ਧਂ, ਵਦ੍ਧਤਞ੍ਞੇਵ (ਕ. ਸੀ. ਪੀ.)] ਵਾਸਵ.

੧੬੦. ਯਦਿ ਹੇਸ੍ਸਤਿ ਦਸ੍ਸਾਮ, ਅਸਨ੍ਤੇ ਕਿਂ ਦਦਾਮਸੇ;

ਏਵਂਭੂਤਾਪਿ ਦਸ੍ਸਾਮ, ਮਾ ਦਾਨਂ ਪਮਦਮ੍ਹਸੇਤਿ.

ਵਿਸਯ੍ਹਜਾਤਕਂ ਦਸਮਂ.

ਕੋਕਿਲਵਗ੍ਗੋ [ਕੋਕਾਲਿਕਵਗ੍ਗੋ (ਕ.)] ਚਤੁਤ੍ਥੋ.

ਤਸ੍ਸੁਦ੍ਦਾਨਂ –

ਅਤਿਵੇਲਪਭਾਸਤਿ ਜੀਤਵਰੋ, ਵਨਮਜ੍ਝ ਰਥੇਸਭ ਜਿਮ੍ਹਗਮੋ;

ਅਥ ਜਮ੍ਬੁ ਤਿਣਾਸਨਪੀਠਵਰਂ, ਅਥ ਤਣ੍ਡੁਲ ਮੋਰ ਵਿਸਯ੍ਹ ਦਸਾਤਿ.