੪. ਕੋਕਿਲਵਗ੍ਗੋ

੩੩੧. ਕੋਕਿਲਜਾਤਕਂ (੪-੪-੧)

੧੨੧. ਯੋ ਵੇ ਕਾਲੇ ਅਸਮ੍ਪਤ੍ਤੇ, ਅਤਿਵੇਲਂ ਪਭਾਸਤਿ;

ਏਵਂ ਸੋ ਨਿਹਤੋ ਸੇਤਿ, ਕੋਕਿਲਾਯਿਵ ਅਤ੍ਰਜੋ.

੧੨੨. ਨ ਹਿ ਸਤ੍ਥਂ ਸੁਨਿਸਿਤਂ, ਵਿਸਂ ਹਲਾਹਲਾਮਿਵ [ਹਲਾਹਲਂ ਇਵ (ਪੀ.)];

ਏਵਂ ਨਿਕਟ੍ਠੇ [ਨਿਕ੍ਕਡ੍ਢੇ (ਸ੍ਯਾ.), ਨਿਕਡ੍ਢੇ (ਕ.)] ਪਾਤੇਤਿ, ਵਾਚਾ ਦੁਬ੍ਭਾਸਿਤਾ ਯਥਾ.

੧੨੩. ਤਸ੍ਮਾ ਕਾਲੇ ਅਕਾਲੇ ਵਾ [ਅਕਾਲੇ ਚ (ਸੀ. ਸ੍ਯਾ.)], ਵਾਚਂ ਰਕ੍ਖੇਯ੍ਯ ਪਣ੍ਡਿਤੋ;

ਨਾਤਿਵੇਲਂ ਪਭਾਸੇਯ੍ਯ, ਅਪਿ ਅਤ੍ਤਸਮਮ੍ਹਿ ਵਾ.

੧੨੪. ਯੋ ਚ ਕਾਲੇ ਮਿਤਂ ਭਾਸੇ, ਮਤਿਪੁਬ੍ਬੋ ਵਿਚਕ੍ਖਣੋ;

ਸਬ੍ਬੇ ਅਮਿਤ੍ਤੇ ਆਦੇਤਿ, ਸੁਪਣ੍ਣੋ ਉਰਗਾਮਿਵਾਤਿ.

ਕੋਕਿਲਜਾਤਕਂ [ਕੋਕਾਲਿਕਜਾਤਕਂ (ਸਬ੍ਬਤ੍ਥ)] ਪਠਮਂ.

੩੩੨. ਰਥਲਟ੍ਠਿਜਾਤਕਂ (੪-੪-੨)

੧੨੫. ਅਪਿ ਹਨ੍ਤ੍ਵਾ ਹਤੋ ਬ੍ਰੂਤਿ, ਜੇਤ੍ਵਾ ਜਿਤੋਤਿ ਭਾਸਤਿ;

ਪੁਬ੍ਬਵਕ੍ਖਾਯਿਨੋ [ਪੁਬ੍ਬਮਕ੍ਖਾਯਿਨੋ (ਸੀ. ਸ੍ਯਾ.)] ਰਾਜ, ਅਞ੍ਞਦਤ੍ਥੁ [ਏਕਦਤ੍ਥੁ (ਸੀ. ਪੀ.)] ਨ ਸਦ੍ਦਹੇ.

੧੨੬. ਤਸ੍ਮਾ ਪਣ੍ਡਿਤਜਾਤਿਯੋ, ਸੁਣੇਯ੍ਯ ਇਤਰਸ੍ਸਪਿ;

ਉਭਿਨ੍ਨਂ ਵਚਨਂ ਸੁਤ੍ਵਾ, ਯਥਾ ਧਮ੍ਮੋ ਤਥਾ ਕਰੇ.

੧੨੭. ਅਲਸੋ ਗਿਹੀ ਕਾਮਭੋਗੀ ਨ ਸਾਧੁ, ਅਸਞ੍ਞਤੋ ਪਬ੍ਬਜਿਤੋ ਨ ਸਾਧੁ;

ਰਾਜਾ ਨ ਸਾਧੁ ਅਨਿਸਮ੍ਮਕਾਰੀ, ਯੋ ਪਣ੍ਡਿਤੋ ਕੋਧਨੋ ਤਂ ਨ ਸਾਧੁ.

੧੨੮. ਨਿਸਮ੍ਮ ਖਤ੍ਤਿਯੋ ਕਯਿਰਾ, ਨਾਨਿਸਮ੍ਮ ਦਿਸਮ੍ਪਤਿ;

ਨਿਸਮ੍ਮਕਾਰਿਨੋ ਰਾਜ [ਰਞ੍ਞੋ (ਸੀ. ਸ੍ਯਾ.)], ਯਸੋ ਕਿਤ੍ਤਿ ਚ ਵਡ੍ਢਤੀਤਿ.

ਰਥਲਟ੍ਠਿਜਾਤਕਂ ਦੁਤਿਯਂ.

੩੩੩. ਪਕ੍ਕਗੋਧਜਾਤਕਂ (੪-੪-੩)

੧੨੯. ਤਦੇਵ ਮੇ ਤ੍ਵਂ ਵਿਦਿਤੋ, ਵਨਮਜ੍ਝੇ ਰਥੇਸਭ;

ਯਸ੍ਸ ਤੇ ਖਗ੍ਗਬਦ੍ਧਸ੍ਸ, ਸਨ੍ਨਦ੍ਧਸ੍ਸ ਤਿਰੀਟਿਨੋ;

ਅਸ੍ਸਤ੍ਥਦੁਮਸਾਖਾਯ, ਪਕ੍ਕਾ ਗੋਧਾ ਪਲਾਯਥ.

੧੩੦. ਨਮੇ ਨਮਨ੍ਤਸ੍ਸ ਭਜੇ ਭਜਨ੍ਤਂ, ਕਿਚ੍ਚਾਨੁਕੁਬ੍ਬਸ੍ਸ ਕਰੇਯ੍ਯ ਕਿਚ੍ਚਂ;

ਨਾਨਤ੍ਥਕਾਮਸ੍ਸ ਕਰੇਯ੍ਯ ਅਤ੍ਥਂ, ਅਸਮ੍ਭਜਨ੍ਤਮ੍ਪਿ ਨ ਸਮ੍ਭਜੇਯ੍ਯ.

੧੩੧. ਚਜੇ ਚਜਨ੍ਤਂ ਵਨਥਂ ਨ ਕਯਿਰਾ, ਅਪੇਤਚਿਤ੍ਤੇਨ ਨ ਸਮ੍ਭਜੇਯ੍ਯ;

ਦਿਜੋ ਦੁਮਂ ਖੀਣਫਲਨ੍ਤਿ [ਫਲਂਵ (ਕ. ਸੀ. ਸ੍ਯਾ. ਕ.), ਦੁਕਨਿਪਾਤੇ ਪੁਟਭਤ੍ਤਜਾਤਕੇਨ ਸਂਸਨ੍ਦੇਤਬ੍ਬਂ] ਞਤ੍ਵਾ, ਅਞ੍ਞਂ ਸਮੇਕ੍ਖੇਯ੍ਯ ਮਹਾ ਹਿ ਲੋਕੋ.

੧੩੨. ਸੋ ਤੇ ਕਰਿਸ੍ਸਾਮਿ ਯਥਾਨੁਭਾਵਂ, ਕਤਞ੍ਞੁਤਂ ਖਤ੍ਤਿਯੇ [ਖਤ੍ਤਿਯੋ (ਸ੍ਯਾ. ਕ.)] ਪੇਕ੍ਖਮਾਨੋ;

ਸਬ੍ਬਞ੍ਚ ਤੇ ਇਸ੍ਸਰਿਯਂ ਦਦਾਮਿ, ਯਸ੍ਸਿਚ੍ਛਸੀ ਤਸ੍ਸ ਤੁਵਂ ਦਦਾਮੀਤਿ.

ਪਕ੍ਕਗੋਧਜਾਤਕਂ [ਗੋਧਜਾਤਕਂ (ਸੀ. ਸ੍ਯਾ. ਪੀ.)] ਤਤਿਯਂ.

੩੩੪. ਰਾਜੋਵਾਦਜਾਤਕਂ (੪-੪-੪)

੧੩੩. ਗਵਂ ਚੇ ਤਰਮਾਨਾਨਂ, ਜਿਮ੍ਹਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਤਾ ਜਿਮ੍ਹਂ ਗਚ੍ਛਨ੍ਤਿ [ਸਬ੍ਬਾ ਗਾਵੀ ਜਿਮ੍ਹਂ ਯਨ੍ਤਿ (ਸੀ. ਸ੍ਯਾ.)], ਨੇਤ੍ਤੇ ਜਿਮ੍ਹਂ ਗਤੇ ਸਤਿ.

੧੩੪. ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਚੇ ਅਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਦੁਖਂ ਸੇਤਿ, ਰਾਜਾ ਚੇ ਹੋਤਿ ਅਧਮ੍ਮਿਕੋ.

੧੩੫. ਗਵਂ ਚੇ ਤਰਮਾਨਾਨਂ, ਉਜੁਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਗਾਵੀ ਉਜੁਂ ਯਨ੍ਤਿ [ਸਬ੍ਬਾ ਤਾ ਉਜੁਂ ਗਚ੍ਛਨ੍ਤਿ (ਪੀ. ਅ. ਨਿ. ੪.੭੦)], ਨੇਤ੍ਤੇ ਉਜੁਂ ਗਤੇ ਸਤਿ.

੧੩੬. ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਸਚੇ ਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਸੁਖਂ ਸੇਤਿ, ਰਾਜਾ ਚੇ ਹੋਤਿ ਧਮ੍ਮਿਕੋਤਿ.

ਰਾਜੋਵਾਦਜਾਤਕਂ ਚਤੁਤ੍ਥਂ.

੩੩੫. ਜਮ੍ਬੁਕਜਾਤਕਂ (੪-੪-੫)

੧੩੭. ਬ੍ਰਹਾ ਪਵਡ੍ਢਕਾਯੋ ਸੋ, ਦੀਘਦਾਠੋ ਚ ਜਮ੍ਬੁਕ;

ਨ ਤ੍ਵਂ ਤਤ੍ਥ ਕੁਲੇ ਜਾਤੋ, ਯਤ੍ਥ ਗਣ੍ਹਨ੍ਤਿ ਕੁਞ੍ਜਰਂ.

੧੩੮. ਅਸੀਹੋ ਸੀਹਮਾਨੇਨ, ਯੋ ਅਤ੍ਤਾਨਂ ਵਿਕੁਬ੍ਬਤਿ;

ਕੋਤ੍ਥੂਵ [ਕੁਟ੍ਠੂਵ (ਸੀ.), ਕੁਤ੍ਥੁਵ (ਸ੍ਯਾ. ਪੀ)] ਗਜਮਾਸਜ੍ਜ, ਸੇਤਿ ਭੂਮ੍ਯਾ ਅਨੁਤ੍ਥੁਨਂ.

੧੩੯. ਯਸਸ੍ਸਿਨੋ ਉਤ੍ਤਮਪੁਗ੍ਗਲਸ੍ਸ, ਸਞ੍ਜਾਤਖਨ੍ਧਸ੍ਸ ਮਹਬ੍ਬਲਸ੍ਸ;

ਅਸਮੇਕ੍ਖਿਯ ਥਾਮਬਲੂਪਪਤ੍ਤਿਂ, ਸ ਸੇਤਿ ਨਾਗੇਨ ਹਤੋਯਂ ਜਮ੍ਬੁਕੋ.

੧੪੦. ਯੋ ਚੀਧ ਕਮ੍ਮਂ ਕੁਰੁਤੇ ਪਮਾਯ, ਥਾਮਬ੍ਬਲਂ ਅਤ੍ਤਨਿ ਸਂਵਿਦਿਤ੍ਵਾ;

ਜਪ੍ਪੇਨ ਮਨ੍ਤੇਨ ਸੁਭਾਸਿਤੇਨ, ਪਰਿਕ੍ਖਵਾ ਸੋ ਵਿਪੁਲਂ ਜਿਨਾਤੀਤਿ.

ਜਮ੍ਬੁਕਜਾਤਕਂ ਪਞ੍ਚਮਂ.

੩੩੬. ਬ੍ਰਹਾਛਤ੍ਤਜਾਤਕਂ (੪-੪-੬)

੧੪੧. ਤਿਣਂ ਤਿਣਨ੍ਤਿ ਲਪਸਿ, ਕੋ ਨੁ ਤੇ ਤਿਣਮਾਹਰਿ;

ਕਿਂ ਨੁ ਤੇ ਤਿਣਕਿਚ੍ਚਤ੍ਥਿ, ਤਿਣਮੇਵ ਪਭਾਸਸਿ.

੧੪੨. ਇਧਾਗਮਾ ਬ੍ਰਹ੍ਮਚਾਰੀ, ਬ੍ਰਹਾ ਛਤ੍ਤੋ ਬਹੁਸ੍ਸੁਤੋ;

ਸੋ ਮੇ [ਸੋ ਵੇ (ਕ.)] ਸਬ੍ਬਂ ਸਮਾਦਾਯ, ਤਿਣਂ ਨਿਕ੍ਖਿਪ੍ਪ ਗਚ੍ਛਤਿ.

੧੪੩. ਏਵੇਤਂ ਹੋਤਿ ਕਤ੍ਤਬ੍ਬਂ, ਅਪ੍ਪੇਨ ਬਹੁਮਿਚ੍ਛਤਾ;

ਸਬ੍ਬਂ ਸਕਸ੍ਸ ਆਦਾਨਂ, ਅਨਾਦਾਨਂ ਤਿਣਸ੍ਸ ਚ. ( ) [(ਤਿਣਸ੍ਸ ਚਾਟੀਸੁ ਗਤੋ, ਤਤ੍ਥ ਕਾ ਪਰਿਦੇਵਨਾ) (ਸੀ. ਸ੍ਯਾ.) (ਚਾਟੀਸੁ ਪਕ੍ਖਿਪਿਤ੍ਵਾਨ, ਤਤ੍ਥ ਕਾ ਪਰਿਦੇਵਨਾ) (ਕ.)]

੧੪੪. ਸੀਲਵਨ੍ਤੋ ਨ ਕੁਬ੍ਬਨ੍ਤਿ, ਬਾਲੋ ਸੀਲਾਨਿ ਕੁਬ੍ਬਤਿ;

ਅਨਿਚ੍ਚਸੀਲਂ ਦੁਸ੍ਸੀਲ੍ਯਂ [ਦੁਸ੍ਸੀਲਂ (ਪੀ.)], ਕਿਂ ਪਣ੍ਡਿਚ੍ਚਂ ਕਰਿਸ੍ਸਤੀਤਿ.

ਬ੍ਰਹਾਛਤ੍ਤਜਾਤਕਂ ਛਟ੍ਠਂ.

੩੩੭. ਪੀਠਜਾਤਕਂ (੪-੪-੭)

੧੪੫. ਨ ਤੇ ਪੀਠਮਦਾਯਿਮ੍ਹਾ [ਮਦਾਸਿਮ੍ਹ (ਪੀ. ਕ.)], ਨ ਪਾਨਂ ਨਪਿ ਭੋਜਨਂ;

ਬ੍ਰਹ੍ਮਚਾਰਿ ਖਮਸ੍ਸੁ ਮੇ, ਏਤਂ ਪਸ੍ਸਾਮਿ ਅਚ੍ਚਯਂ.

੧੪੬. ਨੇਵਾਭਿਸਜ੍ਜਾਮਿ ਨ ਚਾਪਿ ਕੁਪ੍ਪੇ, ਨ ਚਾਪਿ ਮੇ ਅਪ੍ਪਿਯਮਾਸਿ ਕਿਞ੍ਚਿ;

ਅਥੋਪਿ ਮੇ ਆਸਿ ਮਨੋਵਿਤਕ੍ਕੋ, ਏਤਾਦਿਸੋ ਨੂਨ ਕੁਲਸ੍ਸ ਧਮ੍ਮੋ.

੧੪੭. ਏਸਸ੍ਮਾਕਂ ਕੁਲੇ ਧਮ੍ਮੋ, ਪਿਤੁਪਿਤਾਮਹੋ ਸਦਾ;

ਆਸਨਂ ਉਦਕਂ ਪਜ੍ਜਂ, ਸਬ੍ਬੇਤਂ ਨਿਪਦਾਮਸੇ.

੧੪੮. ਏਸਸ੍ਮਾਕਂ ਕੁਲੇ ਧਮ੍ਮੋ, ਪਿਤੁਪਿਤਾਮਹੋ ਸਦਾ;

ਸਕ੍ਕਚ੍ਚਂ ਉਪਤਿਟ੍ਠਾਮ, ਉਤ੍ਤਮਂ ਵਿਯ ਞਾਤਕਨ੍ਤਿ.

ਪੀਠਜਾਤਕਂ ਸਤ੍ਤਮਂ.

੩੩੮. ਥੁਸਜਾਤਕਂ (੪-੪-੮)

੧੪੯. ਵਿਦਿਤਂ ਥੁਸਂ ਉਨ੍ਦੁਰਾਨਂ [ਉਨ੍ਦੂਰਾਨਂ (ਕ.)], ਵਿਦਿਤਂ ਪਨ ਤਣ੍ਡੁਲਂ;

ਥੁਸਂ ਥੁਸਂ [ਥੁਸਂ ਥੂਲਂ (ਸੀ.)] ਵਿਵਜ੍ਜੇਤ੍ਵਾ, ਤਣ੍ਡੁਲਂ ਪਨ ਖਾਦਰੇ.

੧੫੦. ਯਾ ਮਨ੍ਤਨਾ ਅਰਞ੍ਞਸ੍ਮਿਂ, ਯਾ ਚ ਗਾਮੇ ਨਿਕਣ੍ਣਿਕਾ;

ਯਞ੍ਚੇਤਂ ਇਤਿ ਚੀਤਿ ਚ, ਏਤਮ੍ਪਿ ਵਿਦਿਤਂ ਮਯਾ.

੧੫੧. ਧਮ੍ਮੇਨ ਕਿਰ ਜਾਤਸ੍ਸ, ਪਿਤਾ ਪੁਤ੍ਤਸ੍ਸ ਮਕ੍ਕਟੋ;

ਦਹਰਸ੍ਸੇਵ ਸਨ੍ਤਸ੍ਸ, ਦਨ੍ਤੇਹਿ ਫਲਮਚ੍ਛਿਦਾ.

੧੫੨. ਯਮੇਤਂ ਪਰਿਸਪ੍ਪਸਿ [ਪਰਿਸਬ੍ਬੇਸਿ (ਕ.)], ਅਜਕਾਣੋਵ ਸਾਸਪੇ;

ਯੋਪਾਯਂ ਹੇਟ੍ਠਤੋ ਸੇਤਿ [ਸੇਸਿ (ਸੀ.)], ਏਤਮ੍ਪਿ ਵਿਦਿਤਂ ਮਯਾਤਿ.

ਥੁਸਜਾਤਕਂ ਅਟ੍ਠਮਂ.

੩੩੯. ਬਾਵੇਰੁਜਾਤਕਂ (੪-੪-੯)

੧੫੩. ਅਦਸ੍ਸਨੇਨ ਮੋਰਸ੍ਸ, ਸਿਖਿਨੋ ਮਞ੍ਜੁਭਾਣਿਨੋ;

ਕਾਕਂ ਤਤ੍ਥ ਅਪੂਜੇਸੁਂ, ਮਂਸੇਨ ਚ ਫਲੇਨ ਚ.

੧੫੪. ਯਦਾ ਚ ਸਰਸਮ੍ਪਨ੍ਨੋ, ਮੋਰੋ ਬਾਵੇਰੁਮਾਗਮਾ;

ਅਥ ਲਾਭੋ ਚ ਸਕ੍ਕਾਰੋ, ਵਾਯਸਸ੍ਸ ਅਹਾਯਥ.

੧੫੫. ਯਾਵ ਨੁਪ੍ਪਜ੍ਜਤੀ ਬੁਦ੍ਧੋ, ਧਮ੍ਮਰਾਜਾ ਪਭਙ੍ਕਰੋ;

ਤਾਵ ਅਞ੍ਞੇ ਅਪੂਜੇਸੁਂ, ਪੁਥੂ ਸਮਣਬ੍ਰਾਹ੍ਮਣੇ.

੧੫੬. ਯਦਾ ਚ ਸਰਸਮ੍ਪਨ੍ਨੋ, ਬੁਦ੍ਧੋ ਧਮ੍ਮਂ ਅਦੇਸਯਿ;

ਅਥ ਲਾਭੋ ਚ ਸਕ੍ਕਾਰੋ, ਤਿਤ੍ਥਿਯਾਨਂ ਅਹਾਯਥਾਤਿ.

ਬਾਵੇਰੁਜਾਤਕਂ ਨਵਮਂ.

੩੪੦. ਵਿਸਯ੍ਹਜਾਤਕਂ (੪-੪-੧੦)

੧੫੭. ਅਦਾਸਿ ਦਾਨਾਨਿ ਪੁਰੇ ਵਿਸਯ੍ਹ, ਦਦਤੋ ਚ ਤੇ ਖਯਧਮ੍ਮੋ ਅਹੋਸਿ;

ਇਤੋ ਪਰਂ ਚੇ ਨ ਦਦੇਯ੍ਯ ਦਾਨਂ, ਤਿਟ੍ਠੇਯ੍ਯੁਂ ਤੇ ਸਂਯਮਨ੍ਤਸ੍ਸ ਭੋਗਾ.

੧੫੮. ਅਨਰਿਯਮਰਿਯੇਨ ਸਹਸ੍ਸਨੇਤ੍ਤ, ਸੁਦੁਗ੍ਗਤੇਨਾਪਿ ਅਕਿਚ੍ਚਮਾਹੁ;

ਮਾ ਵੋ ਧਨਂ ਤਂ ਅਹੁ ਦੇਵਰਾਜ [ਅਹੁਵਾ ਜਨਿਨ੍ਦ (ਕ. ਸੀ. ਸ੍ਯਾ. ਪੀ.)], ਯਂ ਭੋਗਹੇਤੁ ਵਿਜਹੇਮੁ ਸਦ੍ਧਂ.

੧੫੯. ਯੇਨ ਏਕੋ ਰਥੋ ਯਾਤਿ, ਯਾਤਿ ਤੇਨਾਪਰੋ ਰਥੋ;

ਪੋਰਾਣਂ ਨਿਹਿਤਂ ਵਤ੍ਤਂ, ਵਤ੍ਤਤਞ੍ਞੇਵ [ਵਦ੍ਧਂ, ਵਦ੍ਧਤਞ੍ਞੇਵ (ਕ. ਸੀ. ਪੀ.)] ਵਾਸਵ.

੧੬੦. ਯਦਿ ਹੇਸ੍ਸਤਿ ਦਸ੍ਸਾਮ, ਅਸਨ੍ਤੇ ਕਿਂ ਦਦਾਮਸੇ;

ਏਵਂਭੂਤਾਪਿ ਦਸ੍ਸਾਮ, ਮਾ ਦਾਨਂ ਪਮਦਮ੍ਹਸੇਤਿ.

ਵਿਸਯ੍ਹਜਾਤਕਂ ਦਸਮਂ.

ਕੋਕਿਲਵਗ੍ਗੋ [ਕੋਕਾਲਿਕਵਗ੍ਗੋ (ਕ.)] ਚਤੁਤ੍ਥੋ.

ਤਸ੍ਸੁਦ੍ਦਾਨਂ –

ਅਤਿਵੇਲਪਭਾਸਤਿ ਜੀਤਵਰੋ, ਵਨਮਜ੍ਝ ਰਥੇਸਭ ਜਿਮ੍ਹਗਮੋ;

ਅਥ ਜਮ੍ਬੁ ਤਿਣਾਸਨਪੀਠਵਰਂ, ਅਥ ਤਣ੍ਡੁਲ ਮੋਰ ਵਿਸਯ੍ਹ ਦਸਾਤਿ.