੪. ਚਤੁਕ੍ਕਨਿਪਾਤੋ
੧. ਕਾਲਿਙ੍ਗਵਗ੍ਗੋ
੩੦੧. ਚੂਲ਼ਕਾਲਿਙ੍ਗਜਾਤਕਂ (੪-੧-੧)
੧. ਵਿਵਰਥਿਮਾਸਂ [ਵਿਵਰਥ ਇਮਾਸਂ (ਸੀ. ਸ੍ਯਾ. ਪੀ.)] ਦ੍ਵਾਰਂ, ਨਗਰਂ ਪਵਿਸਨ੍ਤੁ [ਪਵਿਸਿਤੁਂ ਮਯਾ; (ਕ.)] ਅਰੁਣਰਾਜਸ੍ਸ;
ਸੀਹੇਨ ਸੁਸਿਟ੍ਠੇਨ, ਸੁਰਕ੍ਖਿਤਂ [ਸੁਸਤ੍ਥੇਨ, ਸੁਰਕ੍ਖਿਤਂ (ਸੀ. ਪੀ.), ਸੁਸਿਟ੍ਠੇਨ (ਕ.)] ਨਨ੍ਦਿਸੇਨੇਨ.
੨. ਜਯੋ ਕਲਿਙ੍ਗਾਨਮਸਯ੍ਹਸਾਹਿਨਂ, ਪਰਾਜਯੋ ਅਨਯੋ [ਅਜਯੋ (ਸ੍ਯਾ.), ਅਨ੍ਵਿਤੋ (ਕ.)] ਅਸ੍ਸਕਾਨਂ;
ਇਚ੍ਚੇਵ ਤੇ ਭਾਸਿਤਂ ਬ੍ਰਹ੍ਮਚਾਰਿ, ਨ ਉਜ੍ਜੁਭੂਤਾ ਵਿਤਥਂ ਭਣਨ੍ਤਿ.
੩. ਦੇਵਾ ਮੁਸਾਵਾਦਮੁਪਾਤਿਵਤ੍ਤਾ, ਸਚ੍ਚਂ ਧਨਂ ਪਰਮਂ ਤੇਸੁ [ਤਥਂ ਪੇਮਕਰਂ ਨੁ (ਕ.), ਤਥਂ ਪਰਮਂ ਕਰਂ ਨੁ (ਸ੍ਯਾ.)] ਸਕ੍ਕ;
ਤਂ ਤੇ ਮੁਸਾ ਭਾਸਿਤਂ ਦੇਵਰਾਜ, ਕਿਂ ਵਾ ਪਟਿਚ੍ਚ ਮਘਵਾ ਮਹਿਨ੍ਦ.
੪. ਨਨੁ ਤੇ ਸੁਤਂ ਬ੍ਰਾਹ੍ਮਣ ਭਞ੍ਞਮਾਨੇ, ਦੇਵਾ ਨ ਇਸ੍ਸਨ੍ਤਿ ਪੁਰਿਸਪਰਕ੍ਕਮਸ੍ਸ;
ਦਮੋ ਸਮਾਧਿ ਮਨਸੋ ਅਭੇਜ੍ਜੋ [ਅਦੇਜ੍ਜੋ (ਸੀ. ਪੀ.), ਅਭਿਜ੍ਜੋ (ਕ.)], ਅਬ੍ਯਗ੍ਗਤਾ ਨਿਕ੍ਕਮਨਞ੍ਚ [ਨਿਕ੍ਖਮਨਞ੍ਚ (ਸੀ.)] ਕਾਲੇ;
ਦਲ਼੍ਹਞ੍ਚ ਵਿਰਿਯਂ ਪੁਰਿਸਪਰਕ੍ਕਮੋ ਚ, ਤੇਨੇਵ ਆਸਿ ਵਿਜਯੋ ਅਸ੍ਸਕਾਨਨ੍ਤਿ.
ਚੂਲ਼ਕਾਲਿਙ੍ਗਜਾਤਕਂ ਪਠਮਂ.
੩੦੨. ਮਹਾਅਸ੍ਸਾਰੋਹਜਾਤਕਂ (੪-੧-੨)
੫. ਅਦੇਯ੍ਯੇਸੁ ਦਦਂ ਦਾਨਂ, ਦੇਯ੍ਯੇਸੁ ਨਪ੍ਪਵੇਚ੍ਛਤਿ;
ਆਪਾਸੁ ਬ੍ਯਸਨਂ ਪਤ੍ਤੋ, ਸਹਾਯਂ ਨਾਧਿਗਚ੍ਛਤਿ.
੬. ਨਾਦੇਯ੍ਯੇਸੁ ਦਦਂ ਦਾਨਂ, ਦੇਯ੍ਯੇਸੁ ਯੋ ਪਵੇਚ੍ਛਤਿ;
ਆਪਾਸੁ ਬ੍ਯਸਨਂ ਪਤ੍ਤੋ, ਸਹਾਯਮਧਿਗਚ੍ਛਤਿ.
੭. ਸਞ੍ਞੋਗਸਮ੍ਭੋਗਵਿਸੇਸਦਸ੍ਸਨਂ, ਅਨਰਿਯਧਮ੍ਮੇਸੁ ਸਠੇਸੁ ਨਸ੍ਸਤਿ;
ਕਤਞ੍ਚ ਅਰਿਯੇਸੁ ਚ ਅਜ੍ਜਵੇਸੁ, ਮਹਪ੍ਫਲਂ ਹੋਤਿ ਅਣੁਮ੍ਪਿ ਤਾਦਿਸੁ.
੮. ਯੋ ਪੁਬ੍ਬੇ ਕਤਕਲ੍ਯਾਣੋ, ਅਕਾ ਲੋਕੇ ਸੁਦੁਕ੍ਕਰਂ;
ਪਚ੍ਛਾ ਕਯਿਰਾ ਨ ਵਾ ਕਯਿਰਾ, ਅਚ੍ਚਨ੍ਤਂ ਪੂਜਨਾਰਹੋਤਿ.
ਮਹਾਅਸ੍ਸਾਰੋਹਜਾਤਕਂ ਦੁਤਿਯਂ.
੩੦੩. ਏਕਰਾਜਜਾਤਕਂ (੪-੧-੩)
੯. ਅਨੁਤ੍ਤਰੇ ਕਾਮਗੁਣੇ ਸਮਿਦ੍ਧੇ, ਭੁਤ੍ਵਾਨ ਪੁਬ੍ਬੇ ਵਸੀ ਏਕਰਾਜ;
ਸੋ ਦਾਨਿ ਦੁਗ੍ਗੇ ਨਰਕਮ੍ਹਿ ਖਿਤ੍ਤੋ, ਨਪ੍ਪਜ੍ਜਹੇ ਵਣ੍ਣਬਲਂ ਪੁਰਾਣਂ.
੧੦. ਪੁਬ੍ਬੇਵ ਖਨ੍ਤੀ ਚ ਤਪੋ ਚ ਮਯ੍ਹਂ, ਸਮ੍ਪਤ੍ਥਿਤਾ ਦੁਬ੍ਭਿਸੇਨ [ਦਬ੍ਬਸੇਨਾ (ਸੀ. ਪੀ.)] ਅਹੋਸਿ;
ਤਂ ਦਾਨਿ ਲਦ੍ਧਾਨ ਕਥਂ ਨੁ ਰਾਜ, ਜਹੇ ਅਹਂ ਵਣ੍ਣਬਲਂ ਪੁਰਾਣਂ.
੧੧. ਸਬ੍ਬਾ ਕਿਰੇਵਂ ਪਰਿਨਿਟ੍ਠਿਤਾਨਿ, ਯਸਸ੍ਸਿਨਂ ਪਞ੍ਞਵਨ੍ਤਂ ਵਿਸਯ੍ਹ;
ਯਸੋ ਚ ਲਦ੍ਧਾ ਪੁਰਿਮਂ ਉਲ਼ਾਰਂ, ਨਪ੍ਪਜ੍ਜਹੇ ਵਣ੍ਣਬਲਂ ਪੁਰਾਣਂ.
੧੨. ਪਨੁਜ੍ਜ ਦੁਕ੍ਖੇਨ ਸੁਖਂ ਜਨਿਨ੍ਦ, ਸੁਖੇਨ ਵਾ ਦੁਕ੍ਖਮਸਯ੍ਹਸਾਹਿ;
ਉਭਯਤ੍ਥ ਸਨ੍ਤੋ ਅਭਿਨਿਬ੍ਬੁਤਤ੍ਤਾ, ਸੁਖੇ ਚ ਦੁਕ੍ਖੇ ਚ ਭਵਨ੍ਤਿ ਤੁਲ੍ਯਾਤਿ.
ਏਕਰਾਜਜਾਤਕਂ ਤਤਿਯਂ.
੩੦੪. ਦਦ੍ਦਰਜਾਤਕਂ (੪-੧-੪)
੧੩. ਇਮਾਨਿ ਮਂ ਦਦ੍ਦਰ ਤਾਪਯਨ੍ਤਿ, ਵਾਚਾਦੁਰੁਤ੍ਤਾਨਿ ਮਨੁਸ੍ਸਲੋਕੇ;
ਮਣ੍ਡੂਕਭਕ੍ਖਾ ਉਦਕਨ੍ਤਸੇਵੀ, ਆਸੀਵਿਸਂ ਮਂ ਅਵਿਸਾ ਸਪਨ੍ਤਿ.
੧੪. ਸਕਾ ਰਟ੍ਠਾ ਪਬ੍ਬਾਜਿਤੋ, ਅਞ੍ਞਂ ਜਨਪਦਂ ਗਤੋ;
ਮਹਨ੍ਤਂ ਕੋਟ੍ਠਂ ਕਯਿਰਾਥ, ਦੁਰੁਤ੍ਤਾਨਂ [ਦੁਰੁਤ੍ਤਾਨਿ (ਕ.)] ਨਿਧੇਤਵੇ.
੧੫. ਯਤ੍ਥ ਪੋਸਂ ਨ ਜਾਨਨ੍ਤਿ, ਜਾਤਿਯਾ ਵਿਨਯੇਨ ਵਾ;
ਨ ਤਤ੍ਥ ਮਾਨਂ ਕਯਿਰਾਥ, ਵਸਮਞ੍ਞਾਤਕੇ ਜਨੇ.
੧੬. ਵਿਦੇਸਵਾਸਂ ਵਸਤੋ, ਜਾਤਵੇਦਸਮੇਨਪਿ [ਜਾਤਵੇਦਭਯੇਨਪਿ (ਕ.)];
ਖਮਿਤਬ੍ਬਂ ਸਪਞ੍ਞੇਨ, ਅਪਿ ਦਾਸਸ੍ਸ ਤਜ੍ਜਿਤਨ੍ਤਿ.
ਦਦ੍ਦਰਜਾਤਕਂ ਚਤੁਤ੍ਥਂ.
੩੦੫. ਸੀਲਵੀਮਂਸਨਜਾਤਕਂ (੪-੧-੫)
੧੭. ਨਤ੍ਥਿ ਲੋਕੇ ਰਹੋ ਨਾਮ, ਪਾਪਕਮ੍ਮਂ ਪਕੁਬ੍ਬਤੋ;
ਪਸ੍ਸਨ੍ਤਿ ਵਨਭੂਤਾਨਿ, ਤਂ ਬਾਲੋ ਮਞ੍ਞਤੀ ਰਹੋ.
੧੮. ਅਹਂ ਰਹੋ ਨ ਪਸ੍ਸਾਮਿ, ਸੁਞ੍ਞਂ ਵਾਪਿ ਨ ਵਿਜ੍ਜਤਿ;
ਯਤ੍ਥ ਅਞ੍ਞਂ [ਸੁਞ੍ਞਂ (ਸ੍ਯਾ. ਕ.)] ਨ ਪਸ੍ਸਾਮਿ, ਅਸੁਞ੍ਞਂ ਹੋਤਿ ਤਂ ਮਯਾ.
੧੯. ਦੁਜ੍ਜਚ੍ਚੋ ਚ ਸੁਜਚ੍ਚੋ [ਅਜਚ੍ਚੋ (ਪੀ.)] ਚ, ਨਨ੍ਦੋ ਚ ਸੁਖਵਡ੍ਢਿਤੋ [ਸੁਖਵਚ੍ਛਕੋ (ਸੀ.), ਸੁਖਵਚ੍ਛਨੋ (ਸ੍ਯਾ. ਪੀ.)];
ਵੇਜ੍ਜੋ ਚ ਅਦ੍ਧੁਵਸੀਲੋ [ਅਥ ਸੀਲੋ (ਕ.)] ਚ, ਤੇ ਧਮ੍ਮਂ ਜਹੁ ਮਤ੍ਥਿਕਾ.
੨੦. ਬ੍ਰਾਹ੍ਮਣੋ ਚ ਕਥਂ ਜਹੇ, ਸਬ੍ਬਧਮ੍ਮਾਨ ਪਾਰਗੂ;
ਯੋ ਧਮ੍ਮਮਨੁਪਾਲੇਤਿ, ਧਿਤਿਮਾ ਸਚ੍ਚਨਿਕ੍ਕਮੋਤਿ.
ਸੀਲਵੀਮਂਸਨਜਾਤਕਂ ਪਞ੍ਚਮਂ.
੩੦੬. ਸੁਜਾਤਜਾਤਕਂ (੪-੧-੬)
੨੧. ਕਿਮਣ੍ਡਕਾ ਇਮੇ ਦੇਵ, ਨਿਕ੍ਖਿਤ੍ਤਾ ਕਂਸਮਲ੍ਲਕੇ;
ਉਪਲੋਹਿਤਕਾ ਵਗ੍ਗੂ, ਤਂ [ਤੇ (ਪੀ.)] ਮੇ ਅਕ੍ਖਾਹਿ ਪੁਚ੍ਛਿਤੋ.
੨੨. ਯਾਨਿ ਪੁਰੇ ਤੁਵਂ ਦੇਵਿ, ਭਣ੍ਡੁ ਨਨ੍ਤਕਵਾਸਿਨੀ;
ਉਚ੍ਛਙ੍ਗਹਤ੍ਥਾ ਪਚਿਨਾਸਿ, ਤਸ੍ਸਾ ਤੇ ਕੋਲਿਯਂ ਫਲਂ.
੨੩. ਉਡ੍ਡਯ੍ਹਤੇ ਨ ਰਮਤਿ, ਭੋਗਾ ਵਿਪ੍ਪਜਹਨ੍ਤਿ ਤਂ [ਵਿਪ੍ਪਜਹਨ੍ਤਿ’ਮਂ (?)];
ਤਤ੍ਥੇਵਿਮਂ ਪਟਿਨੇਥ, ਯਤ੍ਥ ਕੋਲਂ ਪਚਿਸ੍ਸਤਿ.
੨੪. ਹੋਨ੍ਤਿ ਹੇਤੇ ਮਹਾਰਾਜ, ਇਦ੍ਧਿਪ੍ਪਤ੍ਤਾਯ [ਇਦ੍ਧਿਮਤ੍ਤਾਯ (ਕ.)] ਨਾਰਿਯਾ;
ਖਮ ਦੇਵ ਸੁਜਾਤਾਯ, ਮਾਸ੍ਸਾ [ਮਾਸੁ (ਕ.)] ਕੁਜ੍ਝ ਰਥੇਸਭਾਤਿ.
ਸੁਜਾਤਜਾਤਕਂ ਛਟ੍ਠਂ.
੩੦੭. ਪਲਾਸਜਾਤਕਂ (੪-੧-੭)
੨੫. ਅਚੇਤਨਂ ਬ੍ਰਾਹ੍ਮਣ ਅਸ੍ਸੁਣਨ੍ਤਂ, ਜਾਨੋ ਅਜਾਨਨ੍ਤਮਿਮਂ ਪਲਾਸਂ;
ਆਰਦ੍ਧਵਿਰਿਯੋ ਧੁਵਂ ਅਪ੍ਪਮਤ੍ਤੋ, ਸੁਖਸੇਯ੍ਯਂ ਪੁਚ੍ਛਸਿ ਕਿਸ੍ਸ ਹੇਤੁ.
੨੬. ਦੂਰੇ ਸੁਤੋ ਚੇਵ ਬ੍ਰਹਾ ਚ ਰੁਕ੍ਖੋ, ਦੇਸੇ ਠਿਤੋ ਭੂਤਨਿਵਾਸਰੂਪੋ;
ਤਸ੍ਮਾ ਨਮਸ੍ਸਾਮਿ ਇਮਂ ਪਲਾਸਂ, ਯੇ ਚੇਤ੍ਥ ਭੂਤਾ ਤੇ [ਤੇ ਚ (ਸੀ. ਪੀ.)] ਧਨਸ੍ਸ ਹੇਤੁ.
੨੭. ਸੋ ਤੇ ਕਰਿਸ੍ਸਾਮਿ ਯਥਾਨੁਭਾਵਂ, ਕਤਞ੍ਞੁਤਂ ਬ੍ਰਾਹ੍ਮਣ ਪੇਕ੍ਖਮਾਨੋ;
ਕਥਞ੍ਹਿ ਆਗਮ੍ਮ ਸਤਂ ਸਕਾਸੇ, ਮੋਘਾਨਿ ਤੇ ਅਸ੍ਸੁ ਪਰਿਫਨ੍ਦਿਤਾਨਿ.
੨੮. ਯੋ ਤਿਨ੍ਦੁਕਰੁਕ੍ਖਸ੍ਸ ਪਰੋ [ਪੁਰੋ (ਕ.)] ਪਿਲਕ੍ਖੋ [ਪਿਲਕ੍ਖੁ (ਸੀ. ਪੀ.), ਮਿਲਕ੍ਖੁ (ਕ.)], ਪਰਿਵਾਰਿਤੋ ਪੁਬ੍ਬਯਞ੍ਞੋ ਉਲ਼ਾਰੋ;
ਤਸ੍ਸੇਸ ਮੂਲਸ੍ਮਿਂ ਨਿਧਿ ਨਿਖਾਤੋ, ਅਦਾਯਾਦੋ ਗਚ੍ਛ ਤਂ ਉਦ੍ਧਰਾਹੀਤਿ.
ਪਲਾਸਜਾਤਕਂ ਸਤ੍ਤਮਂ.
੩੦੮. ਸਕੁਣਜਾਤਕਂ (੪-੧-੮)
੨੯. ਅਕਰਮ੍ਹਸ ਤੇ ਕਿਚ੍ਚਂ, ਯਂ ਬਲਂ ਅਹੁਵਮ੍ਹਸੇ;
ਮਿਗਰਾਜ ਨਮੋ ਤ੍ਯਤ੍ਥੁ, ਅਪਿ ਕਿਞ੍ਚਿ ਲਭਾਮਸੇ.
੩੦. ਮਮ ਲੋਹਿਤਭਕ੍ਖਸ੍ਸ, ਨਿਚ੍ਚਂ ਲੁਦ੍ਦਾਨਿ ਕੁਬ੍ਬਤੋ;
ਦਨ੍ਤਨ੍ਤਰਗਤੋ ਸਨ੍ਤੋ, ਤਂ ਬਹੁਂ ਯਮ੍ਪਿ ਜੀਵਸਿ.
੩੧. ਅਕਤਞ੍ਞੁਮਕਤ੍ਤਾਰਂ, ਕਤਸ੍ਸ ਅਪ੍ਪਟਿਕਾਰਕਂ;
ਯਸ੍ਮਿਂ ਕਤਞ੍ਞੁਤਾ ਨਤ੍ਥਿ, ਨਿਰਤ੍ਥਾ ਤਸ੍ਸ ਸੇਵਨਾ.
੩੨. ਯਸ੍ਸ ਸਮ੍ਮੁਖਚਿਣ੍ਣੇਨ, ਮਿਤ੍ਤਧਮ੍ਮੋ ਨ ਲਬ੍ਭਤਿ;
ਅਨੁਸੂਯ [ਅਨੁਸੁਯ੍ਯ (ਸੀ. ਪੀ.)] ਮਨਕ੍ਕੋਸਂ, ਸਣਿਕਂ ਤਮ੍ਹਾ ਅਪਕ੍ਕਮੇਤਿ.
ਸਕੁਣਜਾਤਕਂ ਅਟ੍ਠਮਂ.
੩੦੯. ਛਵਕਜਾਤਕਂ (੪-੧-੯)
੩੩. ਸਬ੍ਬਮਿਦਂ ਚਰਿਮਂ ਕਤਂ [ਚਰਿਮਵਤਂ (ਸੀ. ਪੀ.)], ਉਭੋ ਧਮ੍ਮਂ ਨ ਪਸ੍ਸਰੇ;
ਉਭੋ ਪਕਤਿਯਾ ਚੁਤਾ, ਯੋ ਚਾਯਂ ਮਨ੍ਤੇਜ੍ਝਾਪੇਤਿ [ਮਨ੍ਤਜ੍ਝਾਯਤਿ (ਸੀ.), ਸਜ੍ਝਾਪਯਤਿ (ਪੀ.)];
ਯੋ ਚ ਮਨ੍ਤਂ ਅਧੀਯਤਿ.
੩੪. ਸਾਲੀਨਂ ਓਦਨਂ ਭੁਞ੍ਜੇ, ਸੁਚਿਂ ਮਂਸੂਪਸੇਚਨਂ;
ਤਸ੍ਮਾ ਏਤਂ ਨ ਸੇਵਾਮਿ, ਧਮ੍ਮਂ ਇਸੀਹਿ ਸੇਵਿਤਂ.
੩੫. ਪਰਿਬ੍ਬਜ ਮਹਾ ਲੋਕੋ [ਮਹਾਬ੍ਰਹ੍ਮੇ (ਕ.)], ਪਚਨ੍ਤਞ੍ਞੇਪਿ ਪਾਣਿਨੋ;
ਮਾ ਤਂ ਅਧਮ੍ਮੋ ਆਚਰਿਤੋ, ਅਸ੍ਮਾ ਕੁਮ੍ਭਮਿਵਾਭਿਦਾ.
੩੬. ਧਿਰਤ੍ਥੁ ਤਂ ਯਸਲਾਭਂ, ਧਨਲਾਭਞ੍ਚ ਬ੍ਰਾਹ੍ਮਣ;
ਯਾ ਵੁਤ੍ਤਿ ਵਿਨਿਪਾਤੇਨ, ਅਧਮ੍ਮਚਰਣੇਨ ਵਾਤਿ.
ਛਵਕਜਾਤਕਂ ਨਵਮਂ.
੩੧੦. ਸੇਯ੍ਯਜਾਤਕਂ (੪-੧-੧੦)
੩੭. ਸਸਮੁਦ੍ਦਪਰਿਯਾਯਂ, ਮਹਿਂ ਸਾਗਰਕੁਣ੍ਡਲਂ;
ਨ ਇਚ੍ਛੇ ਸਹ ਨਿਨ੍ਦਾਯ, ਏਵਂ ਸੇਯ੍ਯ [ਸਯ੍ਹ (ਸੀ. ਸ੍ਯਾ. ਪੀ.)] ਵਿਜਾਨਹਿ.
੩੮. ਧਿਰਤ੍ਥੁ ਤਂ ਯਸਲਾਭਂ, ਧਨਲਾਭਞ੍ਚ ਬ੍ਰਾਹ੍ਮਣ;
ਯਾ ਵੁਤ੍ਤਿ ਵਿਨਿਪਾਤੇਨ, ਅਧਮ੍ਮਚਰਣੇਨ ਵਾ.
੩੯. ਅਪਿ ਚੇ ਪਤ੍ਤਮਾਦਾਯ, ਅਨਗਾਰੋ ਪਰਿਬ੍ਬਜੇ;
ਸਾਯੇਵ ਜੀਵਿਕਾ ਸੇਯ੍ਯੋ, ਯਾ ਚਾਧਮ੍ਮੇਨ ਏਸਨਾ.
੪੦. ਅਪਿ ਚੇ ਪਤ੍ਤਮਾਦਾਯ, ਅਨਗਾਰੋ ਪਰਿਬ੍ਬਜੇ;
ਅਞ੍ਞਂ ਅਹਿਂਸਯਂ ਲੋਕੇ, ਅਪਿ ਰਜ੍ਜੇਨ ਤਂ ਵਰਨ੍ਤਿ.
ਸੇਯ੍ਯਜਾਤਕਂ [ਸਯ੍ਹਜਾਤਕਂ (ਸੀ. ਸ੍ਯਾ. ਪੀ.)] ਦਸਮਂ.
ਕਾਲਿਙ੍ਗਵਗ੍ਗੋ [ਵਿਵਰਵਗ੍ਗੋ (ਸੀ. ਪੀ.)] ਪਠਮੋ.
ਤਸ੍ਸੁਦ੍ਦਾਨਂ –
ਵਿਵਰਞ੍ਚ ਅਦੇਯ੍ਯ ਸਮਿਦ੍ਧਵਰਂ, ਅਥ ਦਦ੍ਦਰ ਪਾਪਮਹਾਤਿਰਹੋ;
ਅਥ ਕੋਲਿ ਪਲਾਸਵਰਞ੍ਚ ਕਰ, ਚਰਿਮਂ ਸਸਮੁਦ੍ਦਵਰੇਨ ਦਸਾਤਿ.
੨. ਪੁਚਿਮਨ੍ਦਵਗ੍ਗੋ
੩੧੧. ਪੁਚਿਮਨ੍ਦਜਾਤਕਂ (੪-੨-੧)
੪੧. ਉਟ੍ਠੇਹਿ ਚੋਰ ਕਿਂ ਸੇਸਿ, ਕੋ ਅਤ੍ਥੋ ਸੁਪਨੇਨ [ਸੁਪਿਤੇਨ (ਸੀ.), ਸੁਪਿਨੇਨ (ਪੀ. ਕ.)] ਤੇ;
ਮਾ ਤਂ ਗਹੇਸੁਂ [ਗਣ੍ਹੇਯ੍ਯੁਂ (ਕ.)] ਰਾਜਾਨੋ, ਗਾਮੇ ਕਿਬ੍ਬਿਸਕਾਰਕਂ.
੪੨. ਯਂ ਨੁ [ਨੂਨ (ਸ੍ਯਾ.)] ਚੋਰਂ ਗਹੇਸ੍ਸਨ੍ਤਿ, ਗਾਮੇ ਕਿਬ੍ਬਿਸਕਾਰਕਂ;
ਕਿਂ ਤਤ੍ਥ ਪੁਚਿਮਨ੍ਦਸ੍ਸ, ਵਨੇ ਜਾਤਸ੍ਸ ਤਿਟ੍ਠਤੋ.
੪੩. ਨ ਤ੍ਵਂ ਅਸ੍ਸਤ੍ਥ ਜਾਨਾਸਿ, ਮਮ ਚੋਰਸ੍ਸ ਚਨ੍ਤਰਂ;
ਚੋਰਂ ਗਹੇਤ੍ਵਾ ਰਾਜਾਨੋ, ਗਾਮੇ ਕਿਬ੍ਬਿਸਕਾਰਕਂ;
ਅਪ੍ਪੇਨ੍ਤਿ [ਅਚ੍ਚੇਨ੍ਤਿ (ਸ੍ਯਾ.)] ਨਿਮ੍ਬਸੂਲਸ੍ਮਿਂ, ਤਸ੍ਮਿਂ ਮੇ ਸਙ੍ਕਤੇ ਮਨੋ.
੪੪. ਸਙ੍ਕੇਯ੍ਯ ਸਙ੍ਕਿਤਬ੍ਬਾਨਿ, ਰਕ੍ਖੇਯ੍ਯਾਨਾਗਤਂ ਭਯਂ;
ਅਨਾਗਤਭਯਾ ਧੀਰੋ, ਉਭੋ ਲੋਕੇ ਅਵੇਕ੍ਖਤੀਤਿ.
ਪੁਚਿਮਨ੍ਦਜਾਤਕਂ ਪਠਮਂ.
੩੧੨. ਕਸ੍ਸਪਮਨ੍ਦਿਯਜਾਤਕਂ (੪-੨-੨)
੪੫. ਅਪਿ ਕਸ੍ਸਪ ਮਨ੍ਦਿਯਾ, ਯੁਵਾ ਸਪਤਿ ਹਨ੍ਤਿ [ਸਮ੍ਪਟਿਹਨ੍ਤਿ (ਕ.)] ਵਾ;
ਸਬ੍ਬਂ ਤਂ ਖਮਤੇ ਧੀਰੋ, ਪਣ੍ਡਿਤੋ ਤਂ ਤਿਤਿਕ੍ਖਤਿ.
੪੬. ਸਚੇਪਿ ਸਨ੍ਤੋ ਵਿਵਦਨ੍ਤਿ, ਖਿਪ੍ਪਂ ਸਨ੍ਧੀਯਰੇ ਪੁਨ;
ਬਾਲਾ ਪਤ੍ਤਾਵ ਭਿਜ੍ਜਨ੍ਤਿ, ਨ ਤੇ ਸਮਥਮਜ੍ਝਗੂ.
੪੭. ਏਤੇ ਭਿਯ੍ਯੋ ਸਮਾਯਨ੍ਤਿ, ਸਨ੍ਧਿ ਤੇਸਂ ਨ ਜੀਰਤਿ;
ਯੋ ਚਾਧਿਪਨ੍ਨਂ ਜਾਨਾਤਿ, ਯੋ ਚ ਜਾਨਾਤਿ ਦੇਸਨਂ.
੪੮. ਏਸੋ ਹਿ ਉਤ੍ਤਰਿਤਰੋ, ਭਾਰਵਹੋ ਧੁਰਦ੍ਧਰੋ;
ਯੋ ਪਰੇਸਾਧਿਪਨ੍ਨਾਨਂ, ਸਯਂ ਸਨ੍ਧਾਤੁਮਰਹਤੀਤਿ.
ਕਸ੍ਸਪਮਨ੍ਦਿਯਜਾਤਕਂ ਦੁਤਿਯਂ.
੩੧੩. ਖਨ੍ਤੀਵਾਦੀਜਾਤਕਂ (੪-੨-੩)
੪੯. ਯੋ ਤੇ ਹਤ੍ਥੇ ਚ ਪਾਦੇ ਚ, ਕਣ੍ਣਨਾਸਞ੍ਚ ਛੇਦਯਿ;
ਤਸ੍ਸ ਕੁਜ੍ਝ ਮਹਾਵੀਰ, ਮਾ ਰਟ੍ਠਂ ਵਿਨਸਾ [ਵਿਨਸ੍ਸ (ਕ. ਸੀ. ਸ੍ਯਾ. ਕ.)] ਇਦਂ.
੫੦. ਯੋ ਮੇ ਹਤ੍ਥੇ ਚ ਪਾਦੇ ਚ, ਕਣ੍ਣਨਾਸਞ੍ਚ ਛੇਦਯਿ;
ਚਿਰਂ ਜੀਵਤੁ ਸੋ ਰਾਜਾ, ਨ ਹਿ ਕੁਜ੍ਝਨ੍ਤਿ ਮਾਦਿਸਾ.
੫੧. ਅਹੂ ਅਤੀਤਮਦ੍ਧਾਨਂ [ਅਹੁ ਅਤੀਤਮਦ੍ਧਾਨੇ (ਸ੍ਯਾ. ਪੀ. ਕ.)], ਸਮਣੋ ਖਨ੍ਤਿਦੀਪਨੋ;
ਤਂ ਖਨ੍ਤਿਯਾਯੇਵ ਠਿਤਂ, ਕਾਸਿਰਾਜਾ ਅਛੇਦਯਿ.
੫੨. ਤਸ੍ਸ ਕਮ੍ਮ [ਕਮ੍ਮਸ੍ਸ (ਸੀ. ਪੀ.)] ਫਰੁਸਸ੍ਸ, ਵਿਪਾਕੋ ਕਟੁਕੋ ਅਹੁ;
ਯਂ ਕਾਸਿਰਾਜਾ ਵੇਦੇਸਿ, ਨਿਰਯਮ੍ਹਿ ਸਮਪ੍ਪਿਤੋਤਿ.
ਖਨ੍ਤੀਵਾਦੀਜਾਤਕਂ ਤਤਿਯਂ.
੩੧੪. ਲੋਹਕੁਮ੍ਭਿਜਾਤਕਂ (੪-੨-੪)
੫੩. ਦੁਜ੍ਜੀਵਿਤਮਜੀਵਿਮ੍ਹ, ਯੇ ਸਨ੍ਤੇ [ਯੇਸਂ ਨੋ (ਸ੍ਯਾ. ਕ.)] ਨ ਦਦਮ੍ਹਸੇ;
ਵਿਜ੍ਜਮਾਨੇਸੁ ਭੋਗੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ.
੫੪. ਸਟ੍ਠਿ [ਸਟ੍ਠਿਂ (ਸ੍ਯਾ.)] ਵਸ੍ਸਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;
ਨਿਰਯੇ ਪਚ੍ਚਮਾਨਾਨਂ, ਕਦਾ ਅਨ੍ਤੋ ਭਵਿਸ੍ਸਤਿ.
੫੫. ਨਤ੍ਥਿ ਅਨ੍ਤੋ ਕੁਤੋ ਅਨ੍ਤੋ, ਨ ਅਨ੍ਤੋ ਪਟਿਦਿਸ੍ਸਤਿ;
ਤਦਾ ਹਿ ਪਕਤਂ ਪਾਪਂ, ਮਮ ਤੁਯ੍ਹਞ੍ਚ ਮਾਰਿਸਾ [ਮਾਰਿਸ (ਸੀ. ਸ੍ਯਾ. ਪੀ.)].
੫੬. ਸੋਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;
ਵਦਞ੍ਞੂ ਸੀਲਸਮ੍ਪਨ੍ਨੋ, ਕਾਹਾਮਿ ਕੁਸਲਂ ਬਹੁਨ੍ਤਿ.
ਲੋਹਕੁਮ੍ਭਿਜਾਤਕਂ ਚਤੁਤ੍ਥਂ.