੫. ਪਞ੍ਚਕਨਿਪਾਤੋ

੧. ਮਣਿਕੁਣ੍ਡਲਵਗ੍ਗੋ

੩੫੧. ਮਣਿਕੁਣ੍ਡਲਜਾਤਕਂ (੫-੧-੧)

੧. ਜੀਨੋ ਰਥਸ੍ਸਂ ਮਣਿਕੁਣ੍ਡਲੇ ਚ, ਪੁਤ੍ਤੇ ਚ ਦਾਰੇ ਚ ਤਥੇਵ ਜੀਨੋ;

ਸਬ੍ਬੇਸੁ ਭੋਗੇਸੁ ਅਸੇਸਕੇਸੁ [ਅਸੇਸਿਤੇਸੁ (ਸੀ. ਪੀ.), ਅਸੇਸਿਕੇਸੁ (ਕ.)], ਕਸ੍ਮਾ ਨ ਸਨ੍ਤਪ੍ਪਸਿ ਸੋਕਕਾਲੇ.

੨. ਪੁਬ੍ਬੇਵ ਮਚ੍ਚਂ ਵਿਜਹਨ੍ਤਿ ਭੋਗਾ, ਮਚ੍ਚੋ ਵਾ ਤੇ [ਚ ਨੇ (ਪੀ.), ਧਨੇ (ਕ.)] ਪੁਬ੍ਬਤਰਂ ਜਹਾਤਿ;

ਅਸਸ੍ਸਤਾ ਭੋਗਿਨੋ ਕਾਮਕਾਮਿ, ਤਸ੍ਮਾ ਨ ਸੋਚਾਮਹਂ ਸੋਕਕਾਲੇ.

੩. ਉਦੇਤਿ ਆਪੂਰਤਿ ਵੇਤਿ [ਪੂਰੇਤਿ ਖੀਯਤਿ (ਸ੍ਯਾ.)] ਚਨ੍ਦੋ, ਅਤ੍ਥਂ ਤਪੇਤ੍ਵਾਨ [ਅਨ੍ਧਂ ਤਪੇਤ੍ਵਾਨ (ਕ.), ਅਤ੍ਥਙ੍ਗਮੇਤ੍ਵਾਨ (ਸ੍ਯਾ.), ਏਤ੍ਥ ‘‘ਤਪੇਤ੍ਵਾਨ ਅਤ੍ਥਂ ਪਲੇਤੀ’’ਤਿ ਸਮ੍ਬਨ੍ਧੋ] ਪਲੇਤਿ ਸੂਰਿਯੋ;

ਵਿਦਿਤਾ [ਵਿਜਿਤਾ (ਸ੍ਯਾ.)] ਮਯਾ ਸਤ੍ਤੁਕ ਲੋਕਧਮ੍ਮਾ, ਤਸ੍ਮਾ ਨ ਸੋਚਾਮਹਂ ਸੋਕਕਾਲੇ.

੪. ਅਲਸੋ ਗਿਹੀ ਕਾਮਭੋਗੀ ਨ ਸਾਧੁ, ਅਸਞ੍ਞਤੋ ਪਬ੍ਬਜਿਤੋ ਨ ਸਾਧੁ;

ਰਾਜਾ ਨ ਸਾਧੁ ਅਨਿਸਮ੍ਮਕਾਰੀ, ਯੋ ਪਣ੍ਡਿਤੋ ਕੋਧਨੋ ਤਂ ਨ ਸਾਧੁ.

੫. ਨਿਸਮ੍ਮ ਖਤ੍ਤਿਯੋ ਕਯਿਰਾ, ਨਾਨਿਸਮ੍ਮ ਦਿਸਮ੍ਪਤਿ;

ਨਿਸਮ੍ਮਕਾਰਿਨੋ ਰਾਜ [ਰਞ੍ਞੋ (ਸੀ. ਸ੍ਯਾ.)], ਯਸੋ ਕਿਤ੍ਤਿ ਚ ਵਡ੍ਢਤੀਤਿ.

ਮਣਿਕੁਣ੍ਡਲਜਾਤਕਂ ਪਠਮਂ.

੩੫੨. ਸੁਜਾਤਜਾਤਕਂ (੫-੧-੨)

੬. ਕਿਂ ਨੁ ਸਨ੍ਤਰਮਾਨੋਵ, ਲਾਯਿਤ੍ਵਾ ਹਰਿਤਂ ਤਿਣਂ;

ਖਾਦ ਖਾਦਾਤਿ ਲਪਸਿ, ਗਤਸਤ੍ਤਂ ਜਰਗ੍ਗਵਂ.

੭. ਨ ਹਿ ਅਨ੍ਨੇਨ ਪਾਨੇਨ, ਮਤੋ ਗੋਣੋ ਸਮੁਟ੍ਠਹੇ;

ਤ੍ਵਞ੍ਚ ਤੁਚ੍ਛਂ ਵਿਲਪਸਿ, ਯਥਾ ਤਂ ਦੁਮ੍ਮਤੀ ਤਥਾ.

੮. ਤਥੇਵ ਤਿਟ੍ਠਤਿ ਸੀਸਂ, ਹਤ੍ਥਪਾਦਾ ਚ ਵਾਲਧਿ;

ਸੋਤਾ ਤਥੇਵ ਤਿਟ੍ਠਨ੍ਤਿ [ਸੋ ਤਾਤ ਤਥੇਵ ਤਿਟ੍ਠਤਿ (ਕ.)], ਮਞ੍ਞੇ ਗੋਣੋ ਸਮੁਟ੍ਠਹੇ.

੯. ਨੇਵਯ੍ਯਕਸ੍ਸ ਸੀਸਞ੍ਚ [ਸੀਸਂ ਵਾ (ਸੀ. ਸ੍ਯਾ. ਪੀ.)], ਹਤ੍ਥਪਾਦਾ ਚ ਦਿਸ੍ਸਰੇ;

ਰੁਦਂ ਮਤ੍ਤਿਕਥੂਪਸ੍ਮਿਂ, ਨਨੁ ਤ੍ਵਞ੍ਞੇਵ ਦੁਮ੍ਮਤਿ.

੧੦. ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ [ਓਸਿਞ੍ਚਿ (ਕ.)], ਸਬ੍ਬਂ ਨਿਬ੍ਬਾਪਯੇ ਦਰਂ.

੧੧. ਅਬ੍ਬਹੀ [ਅਬ੍ਬੂਲ਼੍ਹਂ (ਸੀ. ਸ੍ਯਾ.), ਅਬ੍ਭੂਲ਼੍ਹਂ (ਕ.)] ਵਤ ਮੇ ਸਲ੍ਲਂ, ਯਮਾਸਿ ਹਦਯਸ੍ਸਿਤਂ [ਸੋਕਂ ਹਦਯਨਿਸ੍ਸਿਤਂ (ਸੀ. ਸ੍ਯਾ.)];

ਯੋ ਮੇ ਸੋਕਪਰੇਤਸ੍ਸ, ਪਿਤੁ ਸੋਕਂ ਅਪਾਨੁਦਿ.

੧੨. ਸੋਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਵੀਤਸੋਕੋ ਅਨਾਵਿਲੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਮਾਣਵ.

੧੩. ਏਵਂ ਕਰੋਨ੍ਤਿ ਸਪ੍ਪਞ੍ਞਾ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਵਿਨਿਵਤ੍ਤੇਨ੍ਤਿ ਸੋਕਮ੍ਹਾ, ਸੁਜਾਤੋ ਪਿਤਰਂ ਯਥਾਤਿ.

ਸੁਜਾਤਜਾਤਕਂ ਦੁਤਿਯਂ.

੩੫੩. ਵੇਨਸਾਖਜਾਤਕਂ (੫-੧-੩)

੧੪. ਨਯਿਦਂ ਨਿਚ੍ਚਂ ਭਵਿਤਬ੍ਬਂ ਬ੍ਰਹ੍ਮਦਤ੍ਤ, ਖੇਮਂ ਸੁਭਿਕ੍ਖਂ ਸੁਖਤਾ ਚ ਕਾਯੇ;

ਅਤ੍ਥਚ੍ਚਯੇ ਮਾ ਅਹੁ ਸਮ੍ਪਮੂਲ਼੍ਹੋ, ਭਿਨ੍ਨਪ੍ਲਵੋ ਸਾਗਰਸ੍ਸੇਵ ਮਜ੍ਝੇ.

੧੫. ਯਾਨਿ ਕਰੋਤਿ ਪੁਰਿਸੋ, ਤਾਨਿ ਅਤ੍ਤਨਿ ਪਸ੍ਸਤਿ;

ਕਲ੍ਯਾਣਕਾਰੀ ਕਲ੍ਯਾਣਂ, ਪਾਪਕਾਰੀ ਚ ਪਾਪਕਂ;

ਯਾਦਿਸਂ ਵਪਤੇ ਬੀਜਂ, ਤਾਦਿਸਂ ਹਰਤੇ ਫਲਂ.

੧੬. ਇਦਂ ਤਦਾਚਰਿਯਵਚੋ, ਪਾਰਾਸਰਿਯੋ ਯਦਬ੍ਰਵਿ;

ਮਾ ਸੁ [ਮਾ ਸ੍ਸੁ (ਸੀ. ਸ੍ਯਾ. ਪੀ.)] ਤ੍ਵਂ ਅਕਰਿ ਪਾਪਂ, ਯਂ ਤ੍ਵਂ ਪਚ੍ਛਾ ਕਤਂ ਤਪੇ.

੧੭. ਅਯਮੇਵ ਸੋ ਪਿਙ੍ਗਿਯ [ਸੋ ਪਿਙ੍ਗਿਯੋ (ਸ੍ਯਾ.), ਸੋਪਿ ਭਿਯ੍ਯੋ (ਕ.)] ਵੇਨਸਾਖੋ, [ਧੋਨਸਾਖੋ (ਕ. ਸੀ. ਪੀ.)] ਯਮ੍ਹਿ ਘਾਤਯਿਂ ਖਤ੍ਤਿਯਾਨਂ ਸਹਸ੍ਸਂ;

ਅਲਙ੍ਕਤੇ ਚਨ੍ਦਨਸਾਰਾਨੁਲਿਤ੍ਤੇ, ਤਮੇਵ ਦੁਕ੍ਖਂ ਪਚ੍ਚਾਗਤਂ ਮਮਂ.

੧੮. ਸਾਮਾ ਚ [ਸਾਮਾਪਿ (ਸੀ. ਸ੍ਯਾ.)] ਖੋ ਚਨ੍ਦਨਲਿਤ੍ਤਗਤ੍ਤਾ [ਗਤ੍ਤੀ (ਕ. ਸੀ. ਸ੍ਯਾ. ਪੀ.)], ਲਟ੍ਠੀਵ ਸੋਭਞ੍ਜਨਕਸ੍ਸ ਉਗ੍ਗਤਾ;

ਅਦਿਸ੍ਵਾ [ਅਦਿਸ੍ਵਾਵ (ਸੀ.)] ਕਾਲਂ ਕਰਿਸ੍ਸਾਮਿ ਉਬ੍ਬਰਿਂ, ਤਂ ਮੇ ਇਤੋ ਦੁਕ੍ਖਤਰਂ ਭਵਿਸ੍ਸਤੀਤਿ.

ਵੇਨਸਾਖਜਾਤਕਂ [ਧੋਨਸਾਖਜਾਤਕਂ (ਕ. ਸੀ. ਪੀ.)] ਤਤਿਯਂ.

੩੫੪. ਉਰਗਜਾਤਕਂ (੫-੧-੪)

੧੯. ਉਰਗੋਵ ਤਚਂ ਜਿਣ੍ਣਂ, ਹਿਤ੍ਵਾ ਗਚ੍ਛਤਿ ਸਂ ਤਨੁਂ;

ਏਵਂ ਸਰੀਰੇ ਨਿਬ੍ਭੋਗੇ, ਪੇਤੇ ਕਾਲਙ੍ਕਤੇ ਸਤਿ.

੨੦. ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਸੋਚਾਮਿ, ਗਤੋ ਸੋ ਤਸ੍ਸ ਯਾ ਗਤਿ.

੨੧. ਅਨਵ੍ਹਿਤੋ ਤਤੋ ਆਗਾ, ਅਨਨੁਞ੍ਞਾਤੋ [ਨਾਨੁਞ੍ਞਾਤੋ (ਕ.)] ਇਤੋ ਗਤੋ;

ਯਥਾਗਤੋ ਤਥਾ ਗਤੋ, ਤਤ੍ਥ ਕਾ ਪਰਿਦੇਵਨਾ.

੨੨. ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਸੋਚਾਮਿ, ਗਤੋ ਸੋ ਤਸ੍ਸ ਯਾ ਗਤਿ.

੨੩. ਸਚੇ ਰੋਦੇ ਕਿਸਾ [ਕਿਸੀ (ਪੀ.)] ਅਸ੍ਸਂ, ਤਸ੍ਸਾ ਮੇ ਕਿਂ ਫਲਂ ਸਿਯਾ;

ਞਾਤਿਮਿਤ੍ਤਸੁਹਜ੍ਜਾਨਂ, ਭਿਯ੍ਯੋ ਨੋ ਅਰਤੀ ਸਿਯਾ.

੨੪. ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਸੋਚਾਮਿ, ਗਤੋ ਸੋ ਤਸ੍ਸ ਯਾ ਗਤਿ.

੨੫. ਯਥਾਪਿ ਦਾਰਕੋ ਚਨ੍ਦਂ, ਗਚ੍ਛਨ੍ਤਮਨੁਰੋਦਤਿ;

ਏਵਂ ਸਮ੍ਪਦਮੇਵੇਤਂ, ਯੋ ਪੇਤਮਨੁਸੋਚਤਿ.

੨੬. ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਸੋਚਾਮਿ, ਗਤੋ ਸੋ ਤਸ੍ਸ ਯਾ ਗਤਿ.

੨੭. ਯਥਾਪਿ ਉਦਕਕੁਮ੍ਭੋ, ਭਿਨ੍ਨੋ ਅਪ੍ਪਟਿਸਨ੍ਧਿਯੋ;

ਏਵਂ ਸਮ੍ਪਦਮੇਵੇਤਂ, ਯੋ ਪੇਤਮਨੁਸੋਚਤਿ.

੨੮. ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਸੋਚਾਮਿ, ਗਤੋ ਸੋ ਤਸ੍ਸ ਯਾ ਗਤੀਤਿ.

ਉਰਗਜਾਤਕਂ ਚਤੁਤ੍ਥਂ.

੩੫੫. ਘਟਜਾਤਕਂ (੫-੧-੫)

੨੯. ਅਞ੍ਞੇ ਸੋਚਨ੍ਤਿ ਰੋਦਨ੍ਤਿ, ਅਞ੍ਞੇ ਅਸ੍ਸੁਮੁਖਾ ਜਨਾ;

ਪਸਨ੍ਨਮੁਖਵਣ੍ਣੋਸਿ, ਕਸ੍ਮਾ ਘਟ [ਘਤ (ਸੀ. ਪੀ.)] ਨ ਸੋਚਸਿ.

੩੦. ਨਾਬ੍ਭਤੀਤਹਰੋ ਸੋਕੋ, ਨਾਨਾਗਤਸੁਖਾਵਹੋ;

ਤਸ੍ਮਾ ਧਙ੍ਕ [ਵਂਕ (ਪੀ.)] ਨ ਸੋਚਾਮਿ, ਨਤ੍ਥਿ ਸੋਕੇ ਦੁਤੀਯਤਾ [ਸੋਕੋ ਦੁਤੀਯਕਾ (ਕ.)].

੩੧. ਸੋਚਂ ਪਣ੍ਡੁ ਕਿਸੋ ਹੋਤਿ, ਭਤ੍ਤਞ੍ਚਸ੍ਸ ਨ ਰੁਚ੍ਚਤਿ;

ਅਮਿਤ੍ਤਾ ਸੁਮਨਾ ਹੋਨ੍ਤਿ, ਸਲ੍ਲਵਿਦ੍ਧਸ੍ਸ ਰੁਪ੍ਪਤੋ.

੩੨. ਗਾਮੇ ਵਾ ਯਦਿ ਵਾਰਞ੍ਞੇ, ਨਿਨ੍ਨੇ ਵਾ ਯਦਿ ਵਾ ਥਲੇ;

ਠਿਤਂ ਮਂ ਨਾਗਮਿਸ੍ਸਤਿ, ਏਵਂ ਦਿਟ੍ਠਪਦੋ ਅਹਂ.

੩੩. ਯਸ੍ਸਤ੍ਤਾ ਨਾਲਮੇਕੋਵ, ਸਬ੍ਬਕਾਮਰਸਾਹਰੋ;

ਸਬ੍ਬਾਪਿ ਪਥਵੀ ਤਸ੍ਸ, ਨ ਸੁਖਂ ਆਵਹਿਸ੍ਸਤੀਤਿ.

ਘਟਜਾਤਕਂ ਪਞ੍ਚਮਂ.

੩੫੬. ਕੋਰਣ੍ਡਿਯਜਾਤਕਂ (੫-੧-੬)

੩੪. ਏਕੋ ਅਰਞ੍ਞੇ ਗਿਰਿਕਨ੍ਦਰਾਯਂ, ਪਗ੍ਗਯ੍ਹ ਪਗ੍ਗਯ੍ਹ ਸਿਲਂ ਪਵੇਚ੍ਛਸਿ [ਪਵੇਜ੍ਝਸਿ (ਸ੍ਯਾ. ਸੀ. ਅਟ੍ਠ.)];

ਪੁਨਪ੍ਪੁਨਂ ਸਨ੍ਤਰਮਾਨਰੂਪੋ, ਕੋਰਣ੍ਡਿਯ [ਕਾਰਣ੍ਡਿਯ (ਸੀ. ਸ੍ਯਾ. ਪੀ.)] ਕੋ ਨੁ ਤਵ ਯਿਧਤ੍ਥੋ.

੩੫. ਅਹਞ੍ਹਿਮਂ ਸਾਗਰ ਸੇਵਿਤਨ੍ਤਂ, ਸਮਂ ਕਰਿਸ੍ਸਾਮਿ ਯਥਾਪਿ ਪਾਣਿ;

ਵਿਕਿਰਿਯ ਸਾਨੂਨਿ ਚ ਪਬ੍ਬਤਾਨਿ ਚ, ਤਸ੍ਮਾ ਸਿਲਂ ਦਰਿਯਾ ਪਕ੍ਖਿਪਾਮਿ.

੩੬. ਨਯਿਮਂ ਮਹਿਂ ਅਰਹਤਿ ਪਾਣਿਕਪ੍ਪਂ, ਸਮਂ ਮਨੁਸ੍ਸੋ ਕਰਣਾਯ ਮੇਕੋ;

ਮਞ੍ਞਾਮਿਮਞ੍ਞੇਵ ਦਰਿਂ ਜਿਗੀਸਂ [ਜਿਗਿਂਸਂ (ਸੀ. ਸ੍ਯਾ. ਪੀ.)], ਕੋਰਣ੍ਡਿਯ ਹਾਹਸਿ [ਹਾਯਸਿ (ਸ੍ਯਾ. ਕ.)] ਜੀਵਲੋਕਂ.

੩੭. ਸਚੇ ਅਹਂ [ਅਯਂ (ਸੀ. ਸ੍ਯਾ. ਪੀ.)] ਭੂਤਧਰਂ ਨ ਸਕ੍ਕਾ [ਸਕ੍ਕੋ (ਸ੍ਯਾ. ਕ.)], ਸਮਂ ਮਨੁਸ੍ਸੋ ਕਰਣਾਯ ਮੇਕੋ;

ਏਵਮੇਵ ਤ੍ਵਂ ਬ੍ਰਹ੍ਮੇ ਇਮੇ ਮਨੁਸ੍ਸੇ, ਨਾਨਾਦਿਟ੍ਠਿਕੇ ਨਾਨਯਿਸ੍ਸਸਿ ਤੇ [ਨੇ (ਕ.)].

੩੮. ਸਙ੍ਖਿਤ੍ਤਰੂਪੇਨ ਭਵਂ ਮਮਤ੍ਥਂ, ਅਕ੍ਖਾਸਿ ਕੋਰਣ੍ਡਿਯ ਏਵਮੇਤਂ;

ਯਥਾ ਨ ਸਕ੍ਕਾ ਪਥਵੀ ਸਮਾਯਂ, ਕਤ੍ਤੁਂ ਮਨੁਸ੍ਸੇਨ ਤਥਾ ਮਨੁਸ੍ਸਾਤਿ.

ਕੋਰਣ੍ਡਿਯਜਾਤਕਂ ਛਟ੍ਠਂ.

੩੫੭. ਲਟੁਕਿਕਜਾਤਕਂ (੫-੧-੭)

੩੯. ਵਨ੍ਦਾਮਿ ਤਂ ਕੁਞ੍ਜਰ ਸਟ੍ਠਿਹਾਯਨਂ, ਆਰਞ੍ਞਕਂ ਯੂਥਪਤਿਂ ਯਸਸ੍ਸਿਂ;

ਪਕ੍ਖੇਹਿ ਤਂ ਪਞ੍ਜਲਿਕਂ ਕਰੋਮਿ, ਮਾ ਮੇ ਵਧੀ ਪੁਤ੍ਤਕੇ ਦੁਬ੍ਬਲਾਯ.

੪੦. ਵਨ੍ਦਾਮਿ ਤਂ ਕੁਞ੍ਜਰ ਏਕਚਾਰਿਂ, ਆਰਞ੍ਞਕਂ ਪਬ੍ਬਤਸਾਨੁਗੋਚਰਂ;

ਪਕ੍ਖੇਹਿ ਤਂ ਪਞ੍ਜਲਿਕਂ ਕਰੋਮਿ, ਮਾ ਮੇ ਵਧੀ ਪੁਤ੍ਤਕੇ ਦੁਬ੍ਬਲਾਯ;

੪੧. ਵਮਿਸ੍ਸਾਮਿ ਤੇ ਲਟੁਕਿਕੇ ਪੁਤ੍ਤਕਾਨਿ, ਕਿਂ ਮੇ ਤੁਵਂ ਕਾਹਸਿ ਦੁਬ੍ਬਲਾਸਿ;

ਸਤਂ ਸਹਸ੍ਸਾਨਿਪਿ ਤਾਦਿਸੀਨਂ, ਵਾਮੇਨ ਪਾਦੇਨ ਪਪੋਥਯੇਯ੍ਯਂ.

੪੨. ਨ ਹੇਵ ਸਬ੍ਬਤ੍ਥ ਬਲੇਨ ਕਿਚ੍ਚਂ, ਬਲਞ੍ਹਿ ਬਾਲਸ੍ਸ ਵਧਾਯ ਹੋਤਿ;

ਕਰਿਸ੍ਸਾਮਿ ਤੇ ਨਾਗਰਾਜਾ ਅਨਤ੍ਥਂ, ਯੋ ਮੇ ਵਧੀ ਪੁਤ੍ਤਕੇ ਦੁਬ੍ਬਲਾਯ.

੪੩. ਕਾਕਞ੍ਚ ਪਸ੍ਸ ਲਟੁਕਿਕਂ, ਮਣ੍ਡੂਕਂ ਨੀਲਮਕ੍ਖਿਕਂ;

ਏਤੇ ਨਾਗਂ ਅਘਾਤੇਸੁਂ, ਪਸ੍ਸ ਵੇਰਸ੍ਸ ਵੇਰਿਨਂ;

ਤਸ੍ਮਾ ਹਿ ਵੇਰਂ ਨ ਕਯਿਰਾਥ, ਅਪ੍ਪਿਯੇਨਪਿ ਕੇਨਚੀਤਿ.

ਲਟੁਕਿਕਜਾਤਕਂ ਸਤ੍ਤਮਂ.

੩੫੮. ਚੂਲ਼ਧਮ੍ਮਪਾਲਜਾਤਕਂ (੫-੧-੮)

੪੪. ਅਹਮੇਵ ਦੂਸਿਯਾ ਭੂਨਹਤਾ, ਰਞ੍ਞੋ ਮਹਾਪਤਾਪਸ੍ਸ;

ਏਤਂ ਮੁਞ੍ਚਤੁ ਧਮ੍ਮਪਾਲਂ, ਹਤ੍ਥੇ ਮੇ ਦੇਵ ਛੇਦੇਹਿ.

੪੫. ਅਹਮੇਵ ਦੂਸਿਯਾ ਭੂਨਹਤਾ, ਰਞ੍ਞੋ ਮਹਾਪਤਾਪਸ੍ਸ;

ਏਤਂ ਮੁਞ੍ਚਤੁ ਧਮ੍ਮਪਾਲਂ, ਪਾਦੇ ਮੇ ਦੇਵ ਛੇਦੇਹਿ.

੪੬. ਅਹਮੇਵ ਦੂਸਿਯਾ ਭੂਨਹਤਾ, ਰਞ੍ਞੋ ਮਹਾਪਤਾਪਸ੍ਸ;

ਏਤਂ ਮੁਞ੍ਚਤੁ ਧਮ੍ਮਪਾਲਂ, ਸੀਸਂ ਮੇ ਦੇਵ ਛੇਦੇਹਿ.

੪੭. ਨ ਹਿ [ਨਹ (ਸੀ. ਸ੍ਯਾ. ਪੀ.) ਏਤ੍ਥ ਹ-ਕਾਰੋ ਖੇਦੇ] ਨੂਨਿਮਸ੍ਸ ਰਞ੍ਞੋ, ਮਿਤ੍ਤਾਮਚ੍ਚਾ ਚ ਵਿਜ੍ਜਰੇ ਸੁਹਦਾ;

ਯੇ ਨ ਵਦਨ੍ਤਿ ਰਾਜਾਨਂ, ਮਾ ਘਾਤਯਿ ਓਰਸਂ ਪੁਤ੍ਤਂ.

੪੮. ਨ ਹਿ [ਨਹ (ਸੀ. ਸ੍ਯਾ. ਪੀ.) ਏਤ੍ਥ ਹ-ਕਾਰੋ ਖੇਦੇ] ਨੂਨਿਮਸ੍ਸ ਰਞ੍ਞੋ, ਞਾਤੀ ਮਿਤ੍ਤਾ ਚ ਵਿਜ੍ਜਰੇ ਸੁਹਦਾ;

ਯੇ ਨ ਵਦਨ੍ਤਿ ਰਾਜਾਨਂ, ਮਾ ਘਾਤਯਿ ਅਤ੍ਰਜਂ ਪੁਤ੍ਤਂ.

੪੯. ਚਨ੍ਦਨਸਾਰਾਨੁਲਿਤ੍ਤਾ, ਬਾਹਾ ਛਿਜ੍ਜਨ੍ਤਿ ਧਮ੍ਮਪਾਲਸ੍ਸ;

ਦਾਯਾਦਸ੍ਸ ਪਥਬ੍ਯਾ, ਪਾਣਾ ਮੇ ਦੇਵ ਰੁਜ੍ਝਨ੍ਤੀਤਿ.

ਚੂਲ਼ਧਮ੍ਮਪਾਲਜਾਤਕਂ ਅਟ੍ਠਮਂ.

੩੫੯. ਸੁਵਣ੍ਣਮਿਗਜਾਤਕਂ (੫-੧-੯)

੫੦. ਵਿਕ੍ਕਮ ਰੇ ਹਰਿਪਾਦ [ਮਹਾਮਿਗ (ਸੀ. ਸ੍ਯਾ. ਪੀ.)], ਵਿਕ੍ਕਮ ਰੇ ਮਹਾਮਿਗ [ਹਰੀਪਦ (ਸੀ. ਸ੍ਯਾ. ਪੀ.)];

ਛਿਨ੍ਦ ਵਾਰਤ੍ਤਿਕਂ ਪਾਸਂ, ਨਾਹਂ ਏਕਾ ਵਨੇ ਰਮੇ.

੫੧. ਵਿਕ੍ਕਮਾਮਿ ਨ ਪਾਰੇਮਿ, ਭੂਮਿਂ ਸੁਮ੍ਭਾਮਿ ਵੇਗਸਾ;

ਦਲ਼੍ਹੋ ਵਾਰਤ੍ਤਿਕੋ ਪਾਸੋ, ਪਾਦਂ ਮੇ ਪਰਿਕਨ੍ਤਤਿ.

੫੨. ਅਤ੍ਥਰਸ੍ਸੁ ਪਲਾਸਾਨਿ, ਅਸਿਂ ਨਿਬ੍ਬਾਹ ਲੁਦ੍ਦਕ;

ਪਠਮਂ ਮਂ ਵਧਿਤ੍ਵਾਨ, ਹਨ ਪਚ੍ਛਾ ਮਹਾਮਿਗਂ.

੫੩. ਨ ਮੇ ਸੁਤਂ ਵਾ ਦਿਟ੍ਠਂ ਵਾ, ਭਾਸਨ੍ਤਿਂ ਮਾਨੁਸਿਂ ਮਿਗਿਂ [ਨ ਮੇ ਸੁਤਾ ਵਾ ਦਿਟ੍ਠਾ ਵਾ, ਭਾਸਨ੍ਤੀ ਮਾਨੁਸਿਂ ਮਿਗੀ (ਟੀਕਾ)];

ਤ੍ਵਞ੍ਚ ਭਦ੍ਦੇ ਸੁਖੀ ਹੋਹਿ, ਏਸੋ ਚਾਪਿ ਮਹਾਮਿਗੋ.

੫੪. ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;

ਯਥਾਹਮਜ੍ਜ ਨਨ੍ਦਾਮਿ, ਮੁਤ੍ਤਂ ਦਿਸ੍ਵਾ ਮਹਾਮਿਗਨ੍ਤਿ.

ਸੁਵਣ੍ਣਮਿਗਜਾਤਕਂ ਨਵਮਂ.

੩੬੦. ਸੁਯੋਨਨ੍ਦੀਜਾਤਕਂ (੫-੧-੧੦)

੫੫. ਵਾਤਿ ਗਨ੍ਧੋ ਤਿਮਿਰਾਨਂ, ਕੁਸਮੁਦ੍ਦੋ ਚ [ਵ (ਸ੍ਯਾ. ਪੀ.)] ਘੋਸਵਾ;

ਦੂਰੇ ਇਤੋ ਸੁਯੋਨਨ੍ਦੀ [ਇਤੋ ਹਿ ਸੁਸਨ੍ਦੀ (ਸੀ. ਸ੍ਯਾ.), ਇਤੋਪਿ ਸੁਸ੍ਸੋਨ੍ਦੀ (ਪੀ.)], ਤਮ੍ਬਕਾਮਾ ਤੁਦਨ੍ਤਿ ਮਂ.

੫੬. ਕਥਂ ਸਮੁਦ੍ਦਮਤਰਿ, ਕਥਂ ਅਦ੍ਦਕ੍ਖਿ ਸੇਦੁਮਂ [ਸੇਰੁਮਂ (ਸੀ. ਸ੍ਯਾ. ਪੀ.)];

ਕਥਂ ਤਸ੍ਸਾ ਚ ਤੁਯ੍ਹਞ੍ਚ, ਅਹੁ ਸਗ੍ਗ [ਅਗ੍ਗ (ਸੀ. ਸ੍ਯਾ.)] ਸਮਾਗਮੋ.

੫੭. ਕੁਰੁਕਚ੍ਛਾ [ਭਰੁਕਚ੍ਛਾ (ਸੀ. ਸ੍ਯਾ. ਪੀ.)] ਪਯਾਤਾਨਂ, ਵਾਣਿਜਾਨਂ ਧਨੇਸਿਨਂ;

ਮਕਰੇਹਿ ਅਭਿਦਾ [ਮਕਰੇਹਿਬ੍ਭਿਦਾ (ਸੀ.), ਮਕਰੇਹਿ’ਭਿਦਾ (ਸ੍ਯਾ.), ਮਕਰੇਹਿ ਭਿਨ੍ਨਾ (ਪੀ.)] ਨਾਵਾ, ਫਲਕੇਨਾਹਮਪ੍ਲਵਿਂ.

੫੮. ਸਾ ਮਂ ਸਣ੍ਹੇਨ ਮੁਦੁਨਾ, ਨਿਚ੍ਚਂ ਚਨ੍ਦਨਗਨ੍ਧਿਨੀ;

ਅਙ੍ਗੇਨ [ਅਙ੍ਕੇਨ (ਪੀ. ਕ.)] ਉਦ੍ਧਰੀ ਭਦ੍ਦਾ, ਮਾਤਾ ਪੁਤ੍ਤਂਵ ਓਰਸਂ.

੫੯. ਸਾ ਮਂ ਅਨ੍ਨੇਨ ਪਾਨੇਨ, ਵਤ੍ਥੇਨ ਸਯਨੇਨ ਚ;

ਅਤ੍ਤਨਾਪਿ ਚ ਮਨ੍ਦਕ੍ਖੀ, ਏਵਂ ਤਮ੍ਬ ਵਿਜਾਨਾਹੀਤਿ.

ਸੁਯੋਨਨ੍ਦੀਜਾਤਕਂ ਦਸਮਂ.

ਮਣਿਕੁਣ੍ਡਲਵਗ੍ਗੋ ਪਠਮੋ.

ਤਸ੍ਸੁਦ੍ਦਾਨਂ –

ਅਥ ਜਿਨਵਰੋ ਹਰਿਤਂ ਤਿਣਕੋ, ਅਥ ਭਿਨ੍ਨਪ੍ਲਵੋ ਉਰਗੋਵ ਘਟੋ;

ਦਰਿਯਾ ਪੁਨ ਕੁਞ੍ਜਰ ਭੂਨਹਤਾ, ਮਿਗਮੁਤ੍ਤਮਸਗ੍ਗਵਰੇਨ ਦਸਾਤਿ.

੨. ਵਣ੍ਣਾਰੋਹਵਗ੍ਗੋ

੩੬੧. ਵਣ੍ਣਾਰੋਹਜਾਤਕਂ (੫-੨-੧)

੬੦. ਵਣ੍ਣਾਰੋਹੇਨ ਜਾਤਿਯਾ, ਬਲਨਿਕ੍ਕਮਨੇਨ ਚ;

ਸੁਬਾਹੁ ਨ ਮਯਾ ਸੇਯ੍ਯੋ, ਸੁਦਾਠ ਇਤਿ ਭਾਸਸਿ.