੫. ਚੂਲ਼ਕੁਣਾਲਵਗ੍ਗੋ

੩੪੧. ਕਣ੍ਡਰੀਜਾਤਕਂ (੪-੫-੧)

੧੬੧. ਨਰਾਨਮਾਰਾਮਕਰਾਸੁ ਨਾਰਿਸੁ, ਅਨੇਕਚਿਤ੍ਤਾਸੁ ਅਨਿਗ੍ਗਹਾਸੁ ਚ;

ਸਬ੍ਬਤ੍ਥ ਨਾਪੀਤਿਕਰਾਪਿ [ਸਬ੍ਬ’ਤ੍ਤਨਾ’ਪੀਤਿਕਰਾਪਿ (ਸੀ. ਸ੍ਯਾ.)] ਚੇ ਸਿਯਾ [ਸਿਯੁਂ (ਸ੍ਯਾ.)], ਨ ਵਿਸ੍ਸਸੇ ਤਿਤ੍ਥਸਮਾ ਹਿ ਨਾਰਿਯੋ.

੧੬੨. ਯਂ ਵੇ [ਯਞ੍ਚ (ਸ੍ਯਾ. ਕ.)] ਦਿਸ੍ਵਾ ਕਣ੍ਡਰੀਕਿਨ੍ਨਰਾਨਂ [ਕਿਨ੍ਨਰਕਿਨ੍ਨਰੀਨਂ (ਸ੍ਯਾ.), ਕਿਨ੍ਨਰੀਕਿਨ੍ਨਰਾਨਂ (ਕ.)], ਸਬ੍ਬਿਤ੍ਥਿਯੋ ਨ ਰਮਨ੍ਤਿ ਅਗਾਰੇ;

ਤਂ ਤਾਦਿਸਂ ਮਚ੍ਚਂ ਚਜਿਤ੍ਵਾ ਭਰਿਯਾ, ਅਞ੍ਞਂ ਦਿਸ੍ਵਾ ਪੁਰਿਸਂ ਪੀਠਸਪ੍ਪਿਂ.

੧੬੩. ਬਕਸ੍ਸ ਚ ਬਾਵਰਿਕਸ੍ਸ [ਪਾਵਾਰਿਕਸ੍ਸ (ਸੀ.)] ਰਞ੍ਞੋ, ਅਚ੍ਚਨ੍ਤਕਾਮਾਨੁਗਤਸ੍ਸ ਭਰਿਯਾ;

ਅਵਾਚਰੀ [ਅਚ੍ਚਾਚਰਿ (ਸ੍ਯਾ.), ਅਨਾਚਰਿ (ਕ.)] ਪਟ੍ਠਵਸਾਨੁਗਸ੍ਸ [ਬਦ੍ਧਵਸਾਨੁਗਸ੍ਸ (ਸੀ. ਸ੍ਯਾ.), ਪਤ੍ਤਵਸਾਨੁਗਤਸ੍ਸ (ਕ.)], ਕਂ ਵਾਪਿ ਇਤ੍ਥੀ ਨਾਤਿਚਰੇ ਤਦਞ੍ਞਂ.

੧੬੪. ਪਿਙ੍ਗਿਯਾਨੀ ਸਬ੍ਬਲੋਕਿਸ੍ਸਰਸ੍ਸ, ਰਞ੍ਞੋ ਪਿਯਾ ਬ੍ਰਹ੍ਮਦਤ੍ਤਸ੍ਸ ਭਰਿਯਾ;

ਅਵਾਚਰੀ ਪਟ੍ਠਵਸਾਨੁਗਸ੍ਸ, ਤਂ ਵਾਪਿ ਸਾ ਨਾਜ੍ਝਗਾ ਕਾਮਕਾਮਿਨੀਤਿ.

ਕਣ੍ਡਰੀਜਾਤਕਂ [ਕਿਨ੍ਨਰੀਜਾਤਕਂ (ਕ. ਸੀ. ਕ.), ਕੁਣ੍ਡਲਿਕਜਾਤਕਂ (ਸ੍ਯਾ.)] ਪਠਮਂ.

੩੪੨. ਵਾਨਰਜਾਤਕਂ (੪-੫-੨)

੧੬੫. ਅਸਕ੍ਖਿਂ ਵਤ ਅਤ੍ਤਾਨਂ, ਉਦ੍ਧਾਤੁਂ ਉਦਕਾ ਥਲਂ;

ਨ ਦਾਨਾਹਂ ਪੁਨ ਤੁਯ੍ਹਂ, ਵਸਂ ਗਚ੍ਛਾਮਿ ਵਾਰਿਜ.

੧੬੬. ਅਲਮੇਤੇਹਿ ਅਮ੍ਬੇਹਿ, ਜਮ੍ਬੂਹਿ ਪਨਸੇਹਿ ਚ;

ਯਾਨਿ ਪਾਰਂ ਸਮੁਦ੍ਦਸ੍ਸ, ਵਰਂ ਮਯ੍ਹਂ ਉਦੁਮ੍ਬਰੋ.

੧੬੭. ਯੋ ਚ ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਅਮਿਤ੍ਤਵਸਮਨ੍ਵੇਤਿ, ਪਚ੍ਛਾ ਚ ਅਨੁਤਪ੍ਪਤਿ.

੧੬੮. ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;

ਮੁਚ੍ਚਤੇ ਸਤ੍ਤੁਸਮ੍ਬਾਧਾ, ਨ ਚ ਪਚ੍ਛਾਨੁਤਪ੍ਪਤੀਤਿ.

ਵਾਨਰਜਾਤਕਂ ਦੁਤਿਯਂ.

੩੪੩. ਕੁਨ੍ਤਿਨੀਜਾਤਕਂ (੪-੫-੩)

੧੬੯. ਅਵਸਿਮ੍ਹ ਤਵਾਗਾਰੇ, ਨਿਚ੍ਚਂ ਸਕ੍ਕਤਪੂਜਿਤਾ;

ਤ੍ਵਮੇਵ ਦਾਨਿਮਕਰਿ, ਹਨ੍ਦ ਰਾਜ ਵਜਾਮਹਂ.

੧੭੦. ਯੋ ਵੇ ਕਤੇ ਪਟਿਕਤੇ, ਕਿਬ੍ਬਿਸੇ ਪਟਿਕਿਬ੍ਬਿਸੇ;

ਏਵਂ ਤਂ ਸਮ੍ਮਤੀ ਵੇਰਂ, ਵਸ ਕੁਨ੍ਤਿਨਿ ਮਾਗਮਾ.

੧੭੧. ਨ ਕਤਸ੍ਸ ਚ ਕਤ੍ਤਾ ਚ, ਮੇਤ੍ਤਿ [ਮੇਤ੍ਤੀ (ਪੀ.), ਮਿਤ੍ਤੀ (ਕ.)] ਸਨ੍ਧੀਯਤੇ ਪੁਨ;

ਹਦਯਂ ਨਾਨੁਜਾਨਾਤਿ, ਗਚ੍ਛਞ੍ਞੇਵ ਰਥੇਸਭ.

੧੭੨. ਕਤਸ੍ਸ ਚੇਵ ਕਤ੍ਤਾ ਚ, ਮੇਤ੍ਤਿ ਸਨ੍ਧੀਯਤੇ ਪੁਨ;

ਧੀਰਾਨਂ ਨੋ ਚ ਬਾਲਾਨਂ, ਵਸ ਕੁਨ੍ਤਿਨਿ ਮਾਗਮਾਤਿ.

ਕੁਨ੍ਤਿਨੀਜਾਤਕਂ ਤਤਿਯਂ.

੩੪੪. ਅਮ੍ਬਜਾਤਕਂ (੪-੫-੪)

੧੭੩. ਯੋ ਨੀਲਿਯਂ ਮਣ੍ਡਯਤਿ, ਸਣ੍ਡਾਸੇਨ ਵਿਹਞ੍ਞਤਿ;

ਤਸ੍ਸ ਸਾ ਵਸਮਨ੍ਵੇਤੁ, ਯਾ ਤੇ ਅਮ੍ਬੇ ਅਵਾਹਰਿ.

੧੭੪. ਵੀਸਂ ਵਾ ਪਞ੍ਚਵੀਸਂ [ਪਣ੍ਣੁਵੀਸਂ (ਕ. ਸੀ. ਪੀ.)] ਵਾ, ਊਨਤਿਂਸਂ ਵ ਜਾਤਿਯਾ;

ਤਾਦਿਸਾ ਪਤਿ ਮਾ ਲਦ੍ਧਾ [ਪਤਿਂ ਮਾ ਲਦ੍ਧਾ (ਪੀ.), ਪਤਿ ਮਾ’ਲਤ੍ਥ (?)], ਯਾ ਤੇ ਅਮ੍ਬੇ ਅਵਾਹਰਿ.

੧੭੫. ਦੀਘਂ ਗਚ੍ਛਤੁ ਅਦ੍ਧਾਨਂ, ਏਕਿਕਾ ਅਭਿਸਾਰਿਕਾ;

ਸਙ੍ਕੇਤੇ ਪਤਿ ਮਾ ਅਦ੍ਦ [ਮਾ ਅਦ੍ਦਸ (ਸੀ. ਪੀ.)], ਯਾ ਤੇ ਅਮ੍ਬੇ ਅਵਾਹਰਿ.

੧੭੬. ਅਲਙ੍ਕਤਾ ਸੁਵਸਨਾ, ਮਾਲਿਨੀ ਚਨ੍ਦਨੁਸ੍ਸਦਾ;

ਏਕਿਕਾ ਸਯਨੇ ਸੇਤੁ, ਯਾ ਤੇ ਅਮ੍ਬੇ ਅਵਾਹਰੀਤਿ.

ਅਮ੍ਬਜਾਤਕਂ [ਅਮ੍ਬਚੋਰਜਾਤਕਂ (ਕ. ਸੀ. ਪੀ.)] ਚਤੁਤ੍ਥਂ.

੩੪੫. ਗਜਕੁਮ੍ਭਜਾਤਕਂ (੪-੫-੫)

੧੭੭. ਵਨਂ ਯਦਗ੍ਗਿ ਦਹਤਿ, ਪਾਵਕੋ ਕਣ੍ਹਵਤ੍ਤਨੀ;

ਕਥਂ ਕਰੋਸਿ ਪਚਲਕ, ਏਵਂ ਦਨ੍ਧਪਰਕ੍ਕਮੋ.

੧੭੮. ਬਹੂਨਿ ਰੁਕ੍ਖਛਿਦ੍ਦਾਨਿ, ਪਥਬ੍ਯਾ ਵਿਵਰਾਨਿ ਚ;

ਤਾਨਿ ਚੇ ਨਾਭਿਸਮ੍ਭੋਮ, ਹੋਤਿ ਨੋ ਕਾਲਪਰਿਯਾਯੋ.

੧੭੯. ਯੋ ਦਨ੍ਧਕਾਲੇ ਤਰਤਿ, ਤਰਣੀਯੇ ਚ ਦਨ੍ਧਤਿ;

ਸੁਕ੍ਖਪਣ੍ਣਂਵ ਅਕ੍ਕਮ੍ਮ, ਅਤ੍ਥਂ ਭਞ੍ਜਤਿ ਅਤ੍ਤਨੋ.

੧੮੦. ਯੋ ਦਨ੍ਧਕਾਲੇ ਦਨ੍ਧੇਤਿ, ਤਰਣੀਯੇ ਚ ਤਾਰਯਿ;

ਸਸੀਵ ਰਤ੍ਤਿਂ ਵਿਭਜਂ, ਤਸ੍ਸਤ੍ਥੋ ਪਰਿਪੂਰਤੀਤਿ.

ਗਜਕੁਮ੍ਭਜਾਤਕਂ ਪਞ੍ਚਮਂ.

੩੪੬. ਕੇਸਵਜਾਤਕਂ (੪-੫-੬)

੧੮੧. ਮਨੁਸ੍ਸਿਨ੍ਦਂ ਜਹਿਤ੍ਵਾਨ, ਸਬ੍ਬਕਾਮਸਮਿਦ੍ਧਿਨਂ;

ਕਥਂ ਨੁ ਭਗਵਾ ਕੇਸੀ, ਕਪ੍ਪਸ੍ਸ ਰਮਤਿ ਅਸ੍ਸਮੇ [ਰਮਤਸ੍ਸਮੇ (ਕ.)].

੧੮੨. ਸਾਦੂਨੀ [ਸਾਧੂਨਿ (ਕ. ਸੀ. ਸ੍ਯਾ. ਕ.)] ਰਮਣੀਯਾਨਿ, ਸਨ੍ਤਿ ਵਕ੍ਖਾ ਮਨੋਰਮਾ;

ਸੁਭਾਸਿਤਾਨਿ ਕਪ੍ਪਸ੍ਸ, ਨਾਰਦ ਰਮਯਨ੍ਤਿ ਮਂ.

੧੮੩. ਸਾਲੀਨਂ ਓਦਨਂ ਭੁਞ੍ਜੇ, ਸੁਚਿਂ ਮਂਸੂਪਸੇਚਨਂ;

ਕਥਂ ਸਾਮਾਕਨੀਵਾਰਂ, ਅਲੋਣਂ ਛਾਦਯਨ੍ਤਿ ਤਂ.

੧੮੪. ਸਾਦੁਂ ਵਾ [ਅਸਾਦੁਂ (ਪੀ.)] ਯਦਿ ਵਾਸਾਦੁਂ, ਅਪ੍ਪਂ ਵਾ ਯਦਿ ਵਾ ਬਹੁਂ;

ਵਿਸ੍ਸਤ੍ਥੋ ਯਤ੍ਥ ਭੁਞ੍ਜੇਯ੍ਯ, ਵਿਸ੍ਸਾਸਪਰਮਾ ਰਸਾਤਿ.

ਕੇਸਵਜਾਤਕਂ [ਕੇਸੀਜਾਤਕਂ (ਕ.)] ਛਟ੍ਠਂ.

੩੪੭. ਅਯਕੂਟਜਾਤਕਂ (੪-੫-੭)

੧੮੫. ਸਬ੍ਬਾਯਸਂ ਕੂਟਮਤਿਪ੍ਪਮਾਣਂ, ਪਗ੍ਗਯ੍ਹ ਯੋ [ਸੋ (ਪੀ.)] ਤਿਟ੍ਠਸਿ ਅਨ੍ਤਲਿਕ੍ਖੇ;

ਰਕ੍ਖਾਯ ਮੇ [ਮਂ (ਸੀ.)] ਤ੍ਵਂ ਵਿਹਿਤੋ ਨੁਸਜ੍ਜ, ਉਦਾਹੁ ਮੇ ਚੇਤਯਸੇ [ਵਾਯਮਸੇ (ਸੀ. ਸ੍ਯਾ.)] ਵਧਾਯ.

੧੮੬. ਦੂਤੋ ਅਹਂ ਰਾਜਿਧ ਰਕ੍ਖਸਾਨਂ, ਵਧਾਯ ਤੁਯ੍ਹਂ ਪਹਿਤੋਹਮਸ੍ਮਿ;

ਇਨ੍ਦੋ ਚ ਤਂ ਰਕ੍ਖਤਿ ਦੇਵਰਾਜਾ, ਤੇਨੁਤ੍ਤਮਙ੍ਗਂ ਨ ਤੇ [ਨ ਹਿ (ਕ. ਸੀ. ਪੀ.), ਤੇ ਨ (ਕ.)] ਫਾਲਯਾਮਿ.

੧੮੭. ਸਚੇ ਚ ਮਂ ਰਕ੍ਖਤਿ ਦੇਵਰਾਜਾ, ਦੇਵਾਨਮਿਨ੍ਦੋ ਮਘਵਾ ਸੁਜਮ੍ਪਤਿ;

ਕਾਮਂ ਪਿਸਾਚਾ ਵਿਨਦਨ੍ਤੁ ਸਬ੍ਬੇ, ਨ ਸਨ੍ਤਸੇ ਰਕ੍ਖਸਿਯਾ ਪਜਾਯ.

੧੮੮. ਕਾਮਂ ਕਨ੍ਦਨ੍ਤੁ [ਕਨ੍ਤਨ੍ਤੁ (ਕ.), ਕਣ੍ਡਨ੍ਤੁ (ਸ੍ਯਾ.)] ਕੁਮ੍ਭਣ੍ਡਾ, ਸਬ੍ਬੇ ਪਂਸੁਪਿਸਾਚਕਾ;

ਨਾਲਂ ਪਿਸਾਚਾ ਯੁਦ੍ਧਾਯ, ਮਹਤੀ ਸਾ ਵਿਭਿਂਸਿਕਾਤਿ [ਵਿਭੇਸਿਕਾਤਿ (ਸ੍ਯਾ.), ਵਿਹੇਸਿਕਾਤਿ (ਪੀ.)].

ਅਯਕੂਟਜਾਤਕਂ ਸਤ੍ਤਮਂ.

੩੪੮. ਅਰਞ੍ਞਜਾਤਕਂ (੪-੫-੮)

੧੮੯. ਅਰਞ੍ਞਾ ਗਾਮਮਾਗਮ੍ਮ, ਕਿਂਸੀਲਂ ਕਿਂਵਤਂ ਅਹਂ;

ਪੁਰਿਸਂ ਤਾਤ ਸੇਵੇਯ੍ਯਂ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.

੧੯੦. ਯੋ ਤਂ ਵਿਸ੍ਸਾਸਯੇ ਤਾਤ, ਵਿਸ੍ਸਾਸਞ੍ਚ ਖਮੇਯ੍ਯ ਤੇ;

ਸੁਸ੍ਸੂਸੀ ਚ ਤਿਤਿਕ੍ਖੀ ਚ, ਤਂ ਭਜੇਹਿ ਇਤੋ [ਤਂ ਭਜੇਯ੍ਯਾਸਿਤੋ (ਕ.)] ਗਤੋ.

੧੯੧. ਯਸ੍ਸ ਕਾਯੇਨ ਵਾਚਾਯ, ਮਨਸਾ ਨਤ੍ਥਿ ਦੁਕ੍ਕਟਂ;

ਉਰਸੀਵ ਪਤਿਟ੍ਠਾਯ, ਤਂ ਭਜੇਹਿ ਇਤੋ ਗਤੋ.

੧੯੨. ਹਲਿਦ੍ਦਿਰਾਗਂ ਕਪਿਚਿਤ੍ਤਂ, ਪੁਰਿਸਂ ਰਾਗਵਿਰਾਗਿਨਂ;

ਤਾਦਿਸਂ ਤਾਤ ਮਾ ਸੇਵਿ, ਨਿਮ੍ਮਨੁਸ੍ਸਮ੍ਪਿ ਚੇ ਸਿਯਾਤਿ.

ਅਰਞ੍ਞਜਾਤਕਂ ਅਟ੍ਠਮਂ.

੩੪੯. ਸਨ੍ਧਿਭੇਦਜਾਤਕਂ (੪-੫-੯)

੧੯੩. ਨੇਵ ਇਤ੍ਥੀਸੁ ਸਾਮਞ੍ਞਂ, ਨਾਪਿ ਭਕ੍ਖੇਸੁ ਸਾਰਥਿ;

ਅਥਸ੍ਸ ਸਨ੍ਧਿਭੇਦਸ੍ਸ, ਪਸ੍ਸ ਯਾਵ ਸੁਚਿਨ੍ਤਿਤਂ.

੧੯੪. ਅਸਿ ਤਿਕ੍ਖੋਵ ਮਂਸਮ੍ਹਿ, ਪੇਸੁਞ੍ਞਂ ਪਰਿਵਤ੍ਤਤਿ;

ਯਤ੍ਥੂਸਭਞ੍ਚ ਸੀਹਞ੍ਚ, ਭਕ੍ਖਯਨ੍ਤਿ ਮਿਗਾਧਮਾ.

੧੯੫. ਇਮਂ ਸੋ ਸਯਨਂ ਸੇਤਿ, ਯਮਿਮਂ [ਯਯਿਮਂ (ਸੀ. ਪੀ.), ਯਿਮਂ (ਕ.)] ਪਸ੍ਸਸਿ ਸਾਰਥਿ;

ਯੋ ਵਾਚਂ ਸਨ੍ਧਿਭੇਦਸ੍ਸ, ਪਿਸੁਣਸ੍ਸ ਨਿਬੋਧਤਿ.

੧੯੬. ਤੇ ਜਨਾ ਸੁਖਮੇਧਨ੍ਤਿ, ਨਰਾ ਸਗ੍ਗਗਤਾਰਿਵ;

ਯੇ ਵਾਚਂ ਸਨ੍ਧਿਭੇਦਸ੍ਸ, ਨਾਵਬੋਧਨ੍ਤਿ ਸਾਰਥੀਤਿ.

ਸਨ੍ਧਿਭੇਦਜਾਤਕਂ ਨਵਮਂ.

੩੫੦. ਦੇਵਤਾਪਞ੍ਹਜਾਤਕਂ (੪-੫-੧੦)

੧੯੭. ਹਨ੍ਤਿ ਹਤ੍ਥੇਹਿ ਪਾਦੇਹਿ, ਮੁਖਞ੍ਚ ਪਰਿਸੁਮ੍ਭਤਿ;

ਸ ਵੇ ਰਾਜ ਪਿਯੋ ਹੋਤਿ, ਕਂ ਤੇਨ ਤ੍ਵਾਭਿਪਸ੍ਸਸਿ [ਮਭਿਪਸ੍ਸਸਿ (ਸੀ.)].

੧੯੮. ਅਕ੍ਕੋਸਤਿ ਯਥਾਕਾਮਂ, ਆਗਮਞ੍ਚਸ੍ਸ ਇਚ੍ਛਤਿ;

ਸ ਵੇ ਰਾਜ ਪਿਯੋ ਹੋਤਿ, ਕਂ ਤੇਨ ਤ੍ਵਾਭਿਪਸ੍ਸਸਿ.

੧੯੯. ਅਬ੍ਭਕ੍ਖਾਤਿ ਅਭੂਤੇਨ, ਅਲਿਕੇਨਾਭਿਸਾਰਯੇ;

ਸ ਵੇ ਰਾਜ ਪਿਯੋ ਹੋਤਿ, ਕਂ ਤੇਨ ਤ੍ਵਾਭਿਪਸ੍ਸਸਿ.

੨੦੦. ਹਰਂ ਅਨ੍ਨਞ੍ਚ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ;

ਅਞ੍ਞਦਤ੍ਥੁਹਰਾ ਸਨ੍ਤਾ, ਤੇ ਵੇ ਰਾਜ ਪਿਯਾ ਹੋਨ੍ਤਿ;

ਕਂ ਤੇਨ ਤ੍ਵਾਭਿਪਸ੍ਸਸੀਤਿ.

ਦੇਵਤਾਪਞ੍ਹਜਾਤਕਂ ਦਸਮਂ.

ਚੂਲ਼ਕੁਣਾਲਵਗ੍ਗੋ ਪਞ੍ਚਮੋ.

ਤਸ੍ਸੁਦ੍ਦਾਨਂ –

ਨਰਾਨਂ ਅਸਕ੍ਖਿਵਸਿਮ੍ਹਵਰੋ, ਨੀਲਿਯਮਗ੍ਗਿਵਰਞ੍ਚ ਪੁਨ;

ਪੁਨ ਰਸਾਯਸਕੂਟਵਰੋ, ਤਥਾਰਞ੍ਞ ਸਾਰਥਿ ਹਨ੍ਤਿ ਦਸਾਤਿ.

ਅਥ ਵਗ੍ਗੁਦ੍ਦਾਨਂ –

ਕਾਲਿਙ੍ਗਂ [ਵਿਵਰਂ (ਬਹੂਸੁ)] ਪੁਚਿਮਨ੍ਦਞ੍ਚ, ਕੁਟਿਦੂਸਕ ਕੋਕਿਲਾ [ਕੁਟਿਦੂਸਂ ਬਹੁਭਾਣਕਂ (ਬਹੂਸੁ)];

ਚੂਲ਼ਕੁਣਾਲਵਗ੍ਗੋ ਸੋ, ਪਞ੍ਚਮੋ ਸੁਪ੍ਪਕਾਸਿਤੋਤਿ.

ਚਤੁਕ੍ਕਨਿਪਾਤਂ ਨਿਟ੍ਠਿਤਂ.