੧੦. ਤਿਪਦੁਮਿਯਤ੍ਥੇਰਅਪਦਾਨਂ

੪੮. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਦਨ੍ਤੋ ਦਨ੍ਤਪਰਿਵੁਤੋ, ਨਗਰਾ ਨਿਕ੍ਖਮੀ ਤਦਾ.

੪੯. ‘‘ਨਗਰੇ ਹਂਸਵਤਿਯਂ, ਅਹੋਸਿਂ ਮਾਲਿਕੋ ਤਦਾ;

ਯਂ ਤਤ੍ਥ ਉਤ੍ਤਮਂ ਤੋਣਿ, ਪਦ੍ਮਪੁਪ੍ਫਾਨਿ [ਉਤ੍ਤਮਂ ਪੁਪ੍ਫਂ, ਤੀਣਿ ਪੁਪ੍ਫਾਨਿ (ਸੀ.)] ਅਗ੍ਗਹਿਂ.

੫੦. ‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਪਟਿਮਗ੍ਗਨ੍ਤਰਾਪਣੇ;

ਸਹ [ਸੋਹਂ (ਸੀ.)] ਦਿਸ੍ਵਾਨ ਸਮ੍ਬੁਦ੍ਧਂ, ਏਵਂ ਚਿਨ੍ਤੇਸਹਂ ਤਦਾ.

੫੧. ‘‘ਕਿਂ ਮੇ ਇਮੇਹਿ ਪੁਪ੍ਫੇਹਿ, ਰਞ੍ਞੋ ਉਪਨਿਤੇਹਿ ਮੇ;

ਗਾਮਂ ਵਾ ਗਾਮਖੇਤ੍ਤਂ ਵਾ, ਸਹਸ੍ਸਂ ਵਾ ਲਭੇਯ੍ਯਹਂ.

੫੨. ‘‘ਅਦਨ੍ਤਦਮਨਂ ਵੀਰਂ, ਸਬ੍ਬਸਤ੍ਤਸੁਖਾਵਹਂ;

ਲੋਕਨਾਥਂ ਪੂਜਯਿਤ੍ਵਾ, ਲਚ੍ਛਾਮਿ ਅਮਤਂ ਧਨਂ.

੫੩. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਸਕਂ ਚਿਤ੍ਤਂ ਪਸਾਦਯਿਂ;

ਤੀਣਿ ਲੋਹਿਤਕੇ ਗਯ੍ਹ, ਆਕਾਸੇ ਉਕ੍ਖਿਪਿਂ ਤਦਾ.

੫੪. ‘‘ਮਯਾ ਉਕ੍ਖਿਤ੍ਤਮਤ੍ਤਮ੍ਹਿ, ਆਕਾਸੇ ਪਤ੍ਥਰਿਂਸੁ ਤੇ;

ਧਾਰਿਂਸੁ ਮਤ੍ਥਕੇ ਤਤ੍ਥ, ਉਦ੍ਧਂਵਣ੍ਟਾ ਅਧੋਮੁਖਾ.

੫੫. ‘‘ਯੇ ਕੇਚਿ ਮਨੁਜਾ ਦਿਸ੍ਵਾ, ਉਕ੍ਕੁਟ੍ਠਿਂ ਸਮ੍ਪਵਤ੍ਤਯੁਂ;

ਦੇਵਤਾ ਅਨ੍ਤਲਿਕ੍ਖਮ੍ਹਿ, ਸਾਧੁਕਾਰਂ ਪਵਤ੍ਤਯੁਂ.

੫੬. ‘‘ਅਚ੍ਛੇਰਂ ਲੋਕੇ ਉਪ੍ਪਨ੍ਨਂ, ਬੁਦ੍ਧਸੇਟ੍ਠਸ੍ਸ ਵਾਹਸਾ;

ਸਬ੍ਬੇ ਧਮ੍ਮਂ ਸੁਣਿਸ੍ਸਾਮ, ਪੁਪ੍ਫਾਨਂ ਵਾਹਸਾ ਮਯਂ.

੫੭. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਵੀਥਿਯਞ੍ਹਿ ਠਿਤੋ ਸਨ੍ਤੋ, ਇਮਾ ਗਾਥਾ ਅਭਾਸਥ.

੫੮. ‘‘‘ਯੋ ਸੋ ਬੁਦ੍ਧਂ ਅਪੂਜੇਸਿ, ਰਤ੍ਤਪਦ੍ਮੇਹਿ [ਰਤ੍ਤਪਦੁਮੇਹਿ (ਸੀ. ਸ੍ਯਾ.)] ਮਾਣਵੋ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੫੯. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਤਿਂਸਕਪ੍ਪਾਨਿ [ਤਿਂਸਕ੍ਖਤ੍ਤੁਞ੍ਚ (ਸ੍ਯਾ.)] ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ.

੬੦. ‘‘‘ਮਹਾਵਿਤ੍ਥਾਰਿਕਂ ਨਾਮ, ਬ੍ਯਮ੍ਹਂ ਹੇਸ੍ਸਤਿ ਤਾਵਦੇ;

ਤਿਯੋਜਨਸਤੁਬ੍ਬਿਦ੍ਧਂ, ਦਿਯਡ੍ਢਸਤਵਿਤ੍ਥਤਂ.

੬੧. ‘‘‘ਚਤ੍ਤਾਰਿਸਤਸਹਸ੍ਸਾਨਿ, ਨਿਯ੍ਯੂਹਾ ਚ ਸੁਮਾਪਿਤਾ;

ਕੂਟਾਗਾਰਵਰੂਪੇਤਾ, ਮਹਾਸਯਨਮਣ੍ਡਿਤਾ.

੬੨. ‘‘‘ਕੋਟਿਸਤਸਹਸ੍ਸਿਯੋ, ਪਰਿਵਾਰੇਸ੍ਸਨ੍ਤਿ ਅਚ੍ਛਰਾ;

ਕੁਸਲਾ ਨਚ੍ਚਗੀਤਸ੍ਸ, ਵਾਦਿਤੇਪਿ ਪਦਕ੍ਖਿਣਾ.

੬੩. ‘‘‘ਏਤਾਦਿਸੇ ਬ੍ਯਮ੍ਹਵਰੇ, ਨਾਰੀਗਣਸਮਾਕੁਲੇ;

ਵਸ੍ਸਿਸ੍ਸਤਿ ਪੁਪ੍ਫਵਸ੍ਸੋ, ਦਿਬ੍ਬੋ [ਪਦ (ਕ.)] ਲੋਹਿਤਕੋ ਸਦਾ.

੬੪. ‘‘‘ਭਿਤ੍ਤਿਖੀਲੇ ਨਾਗਦਨ੍ਤੇ, ਦ੍ਵਾਰਬਾਹਾਯ ਤੋਰਣੇ;

ਚਕ੍ਕਮਤ੍ਤਾ ਲੋਹਿਤਕਾ, ਓਲਮ੍ਬਿਸ੍ਸਨ੍ਤਿ ਤਾਵਦੇ.

੬੫. ‘‘‘ਪਤ੍ਤੇਨ ਪਤ੍ਤਸਞ੍ਛਨ੍ਨੇ, ਅਨ੍ਤੋਬ੍ਯਮ੍ਹਵਰੇ ਇਮਂ;

ਅਤ੍ਥਰਿਤ੍ਵਾ ਪਾਰੁਪਿਤ੍ਵਾ, ਤੁਵਟ੍ਟਿਸ੍ਸਨ੍ਤਿ ਤਾਵਦੇ.

੬੬. ‘‘‘ਭਵਨਂ ਪਰਿਵਾਰੇਤ੍ਵਾ, ਸਮਨ੍ਤਾ ਸਤਯੋਜਨੇ;

ਤੇਪਿ ਪਦ੍ਮਾ [ਤੇ ਵਿਸੁਦ੍ਧਾ (ਸੀ. ਸ੍ਯਾ.)] ਲੋਹਿਤਕਾ, ਦਿਬ੍ਬਗਨ੍ਧਂ ਪਵਾਯਰੇ.

੬੭. ‘‘‘ਪਞ੍ਚਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੬੮. ‘‘‘ਸਮ੍ਪਤ੍ਤਿਯੋ ਦੁਵੇ ਭੁਤ੍ਵਾ, ਅਨੀਤਿ ਅਨੁਪਦ੍ਦਵੋ;

ਸਮ੍ਪਤ੍ਤੇ ਪਰਿਯੋਸਾਨੇ, ਨਿਬ੍ਬਾਨਂ ਪਾਪੁਣਿਸ੍ਸਤਿ’ [ਫਸ੍ਸਯਿਸ੍ਸਤਿ (ਸੀ.), ਪਸ੍ਸਯਿਸ੍ਸਤਿ (ਕ.)].

੬੯. ‘‘ਸੁਦਿਟ੍ਠੋ ਵਤ ਮੇ ਬੁਦ੍ਧੋ, ਵਾਣਿਜ੍ਜਂ ਸੁਪਯੋਜਿਤਂ;

ਪਦ੍ਮਾਨਿ ਤੀਣਿ ਪੂਜੇਤ੍ਵਾ, ਅਨੁਭੋਸਿਂ ਤਿਸਮ੍ਪਦਾ [ਅਨੁਭੂਯਨ੍ਤਿ ਸਮ੍ਪਦਾ (ਕ.)].

੭੦. ‘‘ਅਜ੍ਜ ਮੇ ਧਮ੍ਮਪ੍ਪਤ੍ਤਸ੍ਸ, ਵਿਪ੍ਪਮੁਤ੍ਤਸ੍ਸ ਸਬ੍ਬਸੋ;

ਸੁਪੁਪ੍ਫਿਤਂ ਲੋਹਿਤਕਂ, ਧਾਰਯਿਸ੍ਸਤਿ ਮਤ੍ਥਕੇ.

੭੧. ‘‘ਮਮ ਕਮ੍ਮਂ ਕਥੇਨ੍ਤਸ੍ਸ, ਪਦੁਮੁਤ੍ਤਰਸਤ੍ਥੁਨੋ;

ਸਤਪਾਣਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ.

੭੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਿਪਦੁਮਾਨਿਦਂ ਫਲਂ.

੭੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੭੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਪਦੁਮਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਪਦੁਮਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਨਾਗਸਮਾਲਵਗ੍ਗੋ ਅਟ੍ਠਮੋ.