੯. ਤਿਮਿਰਵਗ੍ਗੋ
੧. ਤਿਮਿਰਪੁਪ੍ਫਿਯਤ੍ਥੇਰਅਪਦਾਨਂ
੧. ‘‘ਚਨ੍ਦਭਾਗਾਨਦੀਤੀਰੇ, ਅਨੁਸੋਤਂ ਵਜਾਮਹਂ;
ਨਿਸਿਨ੍ਨਂ ਸਮਣਂ ਦਿਸ੍ਵਾ, ਵਿਪ੍ਪਸਨ੍ਨਮਨਾਵਿਲਂ.
੨. ‘‘ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ [ਪਸਾਦੇਸਿਂ (ਸ੍ਯਾ.)], ਏਵਂ ਚਿਨ੍ਤੇਸਹਂ ਤਦਾ;
ਤਾਰਯਿਸ੍ਸਤਿ ਤਿਣ੍ਣੋਯਂ, ਦਨ੍ਤੋਯਂ ਦਮਯਿਸ੍ਸਤਿ.
੩. ‘‘ਅਸ੍ਸਾਸਿਸ੍ਸਤਿ ਅਸ੍ਸਤ੍ਥੋ, ਸਨ੍ਤੋ ਚ ਸਮਯਿਸ੍ਸਤਿ;
ਮੋਚਯਿਸ੍ਸਤਿ ਮੁਤ੍ਤੋ ਚ, ਨਿਬ੍ਬਾਪੇਸ੍ਸਤਿ ਨਿਬ੍ਬੁਤੋ.
੪. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਸਿਦ੍ਧਤ੍ਥਸ੍ਸ ਮਹੇਸਿਨੋ;
ਗਹੇਤ੍ਵਾ ਤਿਮਿਰਪੁਪ੍ਫਂ, ਮਤ੍ਥਕੇ ਓਕਿਰਿਂ ਅਹਂ [ਤਦਾ (ਸ੍ਯਾ.)].
੫. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਕਤ੍ਵਾ ਚ ਨਂ ਪਦਕ੍ਖਿਣਂ;
ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਪਕ੍ਕਾਮਿਂ ਅਪਰਂ ਦਿਸਂ.
੬. ‘‘ਅਚਿਰਂ ਗਤਮਤ੍ਤਂ ਮਂ, ਮਿਗਰਾਜਾ ਵਿਹੇਠਯਿ;
ਪਪਾਤਮਨੁਗਚ੍ਛਨ੍ਤੋ, ਤਤ੍ਥੇਵ ਪਪਤਿਂ ਅਹਂ.
੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਪੂਜਾਯਿਦਂ [ਬੁਦ੍ਧਪੂਜਾਯਿਦਂ (ਸੀ. ਸ੍ਯਾ.)] ਫਲਂ.
੮. ‘‘ਛਪ੍ਪਞ੍ਞਾਸਮ੍ਹਿ ਕਪ੍ਪਮ੍ਹਿ, ਸਤ੍ਤੇਵਾਸੁਂ ਮਹਾਯਸਾ [ਮਹਾਰਹਾ (ਸ੍ਯਾ. ਕ.)];
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੯. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਿਮਿਰਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਤਿਮਿਰਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਗਤਸਞ੍ਞਕਤ੍ਥੇਰਅਪਦਾਨਂ
੧੦. ‘‘ਜਾਤਿਯਾ ਸਤ੍ਤਵਸ੍ਸੋਹਂ, ਪਬ੍ਬਜਿਂ ਅਨਗਾਰਿਯਂ;
ਅਵਨ੍ਦਿਂ ਸਤ੍ਥੁਨੋ ਪਾਦੇ, ਵਿਪ੍ਪਸਨ੍ਨੇਨ ਚੇਤਸਾ.
੧੧. ‘‘ਸਤ੍ਤਨਙ੍ਗਲਕੀਪੁਪ੍ਫੇ, ਆਕਾਸੇ ਉਕ੍ਖਿਪਿਂ ਅਹਂ;
ਤਿਸ੍ਸਂ ਬੁਦ੍ਧਂ ਸਮੁਦ੍ਦਿਸ੍ਸ, ਅਨਨ੍ਤਗੁਣਸਾਗਰਂ.
੧੨. ‘‘ਸੁਗਤਾਨੁਗਤਂ ਮਗ੍ਗਂ, ਪੂਜੇਤ੍ਵਾ ਹਟ੍ਠਮਾਨਸੋ;
ਅਞ੍ਜਲਿਞ੍ਚ [ਅਞ੍ਜਲਿਸ੍ਸ (ਕ.)] ਤਦਾਕਾਸਿਂ, ਪਸਨ੍ਨੋ ਸੇਹਿ ਪਾਣਿਭਿ.
੧੩. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੧੪. ‘‘ਇਤੋ ਅਟ੍ਠਮਕੇ ਕਪ੍ਪੇ, ਤਯੋ ਅਗ੍ਗਿਸਿਖਾ ਅਹੁ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੧੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਗਤਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਗਤਸਞ੍ਞਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਨਿਪਨ੍ਨਞ੍ਜਲਿਕਤ੍ਥੇਰਅਪਦਾਨਂ
੧੬. ‘‘ਰੁਕ੍ਖਮੂਲੇ ਨਿਸਿਨ੍ਨੋਹਂ, ਬ੍ਯਾਧਿਤੋ ਪਰਮੇਨ ਚ;
ਪਰਮਕਾਰੁਞ੍ਞਪਤ੍ਤੋਮ੍ਹਿ, ਅਰਞ੍ਞੇ ਕਾਨਨੇ ਅਹਂ.
੧੭. ‘‘ਅਨੁਕਮ੍ਪਂ ਉਪਾਦਾਯ, ਤਿਸ੍ਸੋ ਸਤ੍ਥਾ ਉਪੇਸਿ ਮਂ;
ਸੋਹਂ ਨਿਪਨ੍ਨਕੋ ਸਨ੍ਤੋ, ਸਿਰੇ ਕਤ੍ਵਾਨ ਅਞ੍ਜਲਿਂ.
੧੮. ‘‘ਪਸਨ੍ਨਚਿਤ੍ਤੋ ਸੁਮਨੋ, ਸਬ੍ਬਸਤ੍ਤਾਨਮੁਤ੍ਤਮਂ;
ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਤਤ੍ਥ ਕਾਲਙ੍ਕਤੋ ਅਹਂ.
੧੯. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਵਨ੍ਦਿਂ ਪੁਰਿਸੁਤ੍ਤਮਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਵਨ੍ਦਨਾਯ ਇਦਂ ਫਲਂ.
੨੦. ‘‘ਇਤੋ ਪਞ੍ਚਮਕੇ ਕਪ੍ਪੇ, ਪਞ੍ਚੇਵਾਸੁਂ ਮਹਾਸਿਖਾ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੨੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਨਿਪਨ੍ਨਞ੍ਜਲਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਨਿਪਨ੍ਨਞ੍ਜਲਿਕਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਅਧੋਪੁਪ੍ਫਿਯਤ੍ਥੇਰਅਪਦਾਨਂ
੨੨. ‘‘ਅਭਿਭੂ ਨਾਮ ਸੋ ਭਿਕ੍ਖੁ, ਸਿਖਿਨੋ ਅਗ੍ਗਸਾਵਕੋ;
ਮਹਾਨੁਭਾਵੋ ਤੇਵਿਜ੍ਜੋ, ਹਿਮਵਨ੍ਤਂ ਉਪਾਗਮਿ.
੨੩. ‘‘ਅਹਮ੍ਪਿ ਹਿਮਵਨ੍ਤਮ੍ਹਿ, ਰਮਣੀਯਸ੍ਸਮੇ ਇਸਿ;
ਵਸਾਮਿ ਅਪ੍ਪਮਞ੍ਞਾਸੁ, ਇਦ੍ਧੀਸੁ ਚ ਤਦਾ ਵਸੀ.
੨੪. ‘‘ਪਕ੍ਖਿਜਾਤੋ ਵਿਯਾਕਾਸੇ, ਪਬ੍ਬਤਂ ਅਧਿਵਤ੍ਤਯਿਂ [ਅਭਿਪਤ੍ਥਯਿਂ (ਸ੍ਯਾ.), ਅਭਿਮਤ੍ਥਯਿਂ (ਕ.), ਅਧਿਵਤ੍ਥਯਿਨ੍ਤਿ ਪਬ੍ਬਤਸ੍ਸ ਉਪਰਿ ਗਚ੍ਛਿਨ੍ਤਿਅਤ੍ਥੋ];
ਅਧੋਪੁਪ੍ਫਂ ਗਹੇਤ੍ਵਾਨ, ਆਗਚ੍ਛਿਂ [ਅਗਚ੍ਛਿਂ (ਕ.)] ਪਬ੍ਬਤਂ ਅਹਂ.
੨੫. ‘‘ਸਤ੍ਤ ਪੁਪ੍ਫਾਨਿ ਗਣ੍ਹਿਤ੍ਵਾ, ਮਤ੍ਥਕੇ ਓਕਿਰਿਂ ਅਹਂ;
ਆਲੋਕਿਤੇ [ਆਲੋਕਿਤੋ (ਸ੍ਯਾ.)] ਚ ਵੀਰੇਨ, ਪਕ੍ਕਾਮਿਂ ਪਾਚਿਨਾਮੁਖੋ.
੨੬. ‘‘ਆਵਾਸਂ ਅਭਿਸਮ੍ਭੋਸਿਂ, ਪਤ੍ਵਾਨ ਅਸ੍ਸਮਂ ਅਹਂ;
ਖਾਰਿਭਾਰਂ ਗਹੇਤ੍ਵਾਨ, ਪਾਯਾਸਿਂ [ਪਾਵਿਸਿਂ (ਸੀ.)] ਪਬ੍ਬਤਨ੍ਤਰਂ.
੨੭. ‘‘ਅਜਗਰੋ ਮਂ ਪੀਲ਼ੇਸਿ, ਘੋਰਰੂਪੋ ਮਹਬ੍ਬਲੋ;
ਪੁਬ੍ਬਕਮ੍ਮਂ ਸਰਿਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ.
੨੮. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਪੂਜਾਯਿਦਂ ਫਲਂ.
੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਧੋਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਅਧੋਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਰਂਸਿਸਞ੍ਞਕਤ੍ਥੇਰਅਪਦਾਨਂ
੩੦. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਵਾਸਂ ਕਪ੍ਪੇਸਹਂ ਪੁਰੇ;
ਅਜਿਨੁਤ੍ਤਰਵਾਸੋਹਂ, ਵਸਾਮਿ ਪਬ੍ਬਤਨ੍ਤਰੇ.
੩੧. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਸਤਰਂਸਿਂਵ ਭਾਣੁਮਂ;
ਵਨਨ੍ਤਰਗਤਂ ਦਿਸ੍ਵਾ, ਸਾਲਰਾਜਂਵ ਪੁਪ੍ਫਿਤਂ.
੩੨. ‘‘ਰਂਸ੍ਯਾ [ਰਂਸੇ (ਸ੍ਯਾ. ਕ.)] ਚਿਤ੍ਤਂ ਪਸਾਦੇਤ੍ਵਾ, ਵਿਪਸ੍ਸਿਸ੍ਸ ਮਹੇਸਿਨੋ;
ਪਗ੍ਗਯ੍ਹ ਅਞ੍ਜਲਿਂ ਵਨ੍ਦਿਂ, ਸਿਰਸਾ ਉਕ੍ਕੁਟੀ [ਸਿਰਸਾ ਉਕ੍ਕੁਟਿਕੋ (ਸ੍ਯਾ.), ਸਿਰਸੁਕ੍ਕੁਟਿਕੋ (ਕ.)] ਅਹਂ.
੩੩. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਰਂਸਿਸਞ੍ਞਾਯਿਦਂ ਫਲਂ.
੩੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਰਂਸਿਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਰਂਸਿਸਞ੍ਞਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਦੁਤਿਯਰਂਸਿਸਞ੍ਞਕਤ੍ਥੇਰਅਪਦਾਨਂ
੩੫. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਵਾਕਚੀਰਧਰੋ ਅਹਂ;
ਚਙ੍ਕਮਞ੍ਚ ਸਮਾਰੂਲ਼੍ਹੋ, ਨਿਸੀਦਿਂ ਪਾਚਿਨਾਮੁਖੋ.
੩੬. ‘‘ਪਬ੍ਬਤੇ ਸੁਗਤਂ ਦਿਸ੍ਵਾ, ਫੁਸ੍ਸਂ ਝਾਨਰਤਂ ਤਦਾ;
ਅਞ੍ਜਲਿਂ ਪਗ੍ਗਹੇਤ੍ਵਾਨ, ਰਂਸ੍ਯਾ ਚਿਤ੍ਤਂ ਪਸਾਦਯਿਂ.
੩੭. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਰਂਸਿਸਞ੍ਞਾਯਿਦਂ ਫਲਂ.
੩੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਰਂਸਿਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਦੁਤਿਯਰਂਸਿਸਞ੍ਞਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਫਲਦਾਯਕਤ੍ਥੇਰਅਪਦਾਨਂ
੩੯. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਖਰਾਜਿਨਧਰੋ ਅਹਂ;
ਫੁਸ੍ਸਂ ਜਿਨਵਰਂ ਦਿਸ੍ਵਾ, ਫਲਹਤ੍ਥੋ ਫਲਂ ਅਦਂ.
੪੦. ‘‘ਯਮਹਂ ਫਲਮਦਾਸਿਂ, ਵਿਪ੍ਪਸਨ੍ਨੇਨ ਚੇਤਸਾ;
ਭਵੇ ਨਿਬ੍ਬਤ੍ਤਮਾਨਮ੍ਹਿ, ਫਲਂ ਨਿਬ੍ਬਤ੍ਤਤੇ ਮਮ.
੪੧. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਫਲਂ ਅਦਦਿਂ ਅਹਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.
੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਫਲਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਸਦ੍ਦਸਞ੍ਞਕਤ੍ਥੇਰਅਪਦਾਨਂ
੪੩. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਵਸਾਮਿ ਪਣ੍ਣਸਨ੍ਥਰੇ;
ਫੁਸ੍ਸਸ੍ਸ ਧਮ੍ਮਂ ਭਣਤੋ, ਸਦ੍ਦੇ ਚਿਤ੍ਤਂ ਪਸਾਦਯਿਂ.
੪੪. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.
੪੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਦ੍ਦਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਦ੍ਦਸਞ੍ਞਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.
੯. ਬੋਧਿਸਿਞ੍ਚਕਤ੍ਥੇਰਅਪਦਾਨਂ
੪੬. ‘‘ਵਿਪਸ੍ਸਿਸ੍ਸ ਭਗਵਤੋ, ਮਹਾਬੋਧਿਮਹੋ ਅਹੁ;
ਪਬ੍ਬਜ੍ਜੁਪਗਤੋ ਸਨ੍ਤੋ, ਉਪਗਚ੍ਛਿਂ ਅਹਂ ਤਦਾ.
੪੭. ‘‘ਕੁਸੁਮੋਦਕਮਾਦਾਯ, ਬੋਧਿਯਾ ਓਕਿਰਿਂ ਅਹਂ;
ਮੋਚਯਿਸ੍ਸਤਿ ਨੋ ਮੁਤ੍ਤੋ, ਨਿਬ੍ਬਾਪੇਸ੍ਸਤਿ ਨਿਬ੍ਬੁਤੋ.
੪੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਬੋਧਿਮਭਿਸਿਞ੍ਚਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੋਧਿਸਿਞ੍ਚਾਯਿਦਂ ਫਲਂ.
੪੯. ‘‘ਤੇਤ੍ਤਿਂਸੇ ਵਤ੍ਤਮਾਨਮ੍ਹਿ, ਕਪ੍ਪੇ ਆਸੁਂ ਜਨਾਧਿਪਾ;
ਉਦਕਸੇਚਨਾ ਨਾਮ, ਅਟ੍ਠੇਤੇ ਚਕ੍ਕਵਤ੍ਤਿਨੋ.
੫੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਬੋਧਿਸਿਞ੍ਚਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਬੋਧਿਸਿਞ੍ਚਕਤ੍ਥੇਰਸ੍ਸਾਪਦਾਨਂ ਨਵਮਂ.
੧੦. ਪਦੁਮਪੁਪ੍ਫਿਯਤ੍ਥੇਰਅਪਦਾਨਂ
੫੧. ‘‘ਪੋਕ੍ਖਰਵਨਂ ਪਵਿਟ੍ਠੋ, ਭਞ੍ਜਨ੍ਤੋ ਪਦੁਮਾਨਿਹਂ;
ਤਤ੍ਥਦ੍ਦਸਂ ਫੁਸ੍ਸਂ ਬੁਦ੍ਧਂ [ਅਦ੍ਦਸਂ ਫੁਸ੍ਸਸਮ੍ਬੁਦ੍ਧਂ (ਸੀ. ਸ੍ਯਾ.)], ਬਾਤ੍ਤਿਂਸਵਰਲਕ੍ਖਣਂ.
੫੨. ‘‘ਪਦੁਮਪੁਪ੍ਫਂ ਗਹੇਤ੍ਵਾਨ, ਆਕਾਸੇ ਉਕ੍ਖਿਪਿਂ ਅਹਂ;
ਪਾਪਕਮ੍ਮਂ ਸਰਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.
੫੩. ‘‘ਪਬ੍ਬਜਿਤ੍ਵਾਨ ਕਾਯੇਨ, ਮਨਸਾ ਸਂਵੁਤੇਨ ਚ;
ਵਚੀਦੁਚ੍ਚਰਿਤਂ ਹਿਤ੍ਵਾ, ਆਜੀਵਂ ਪਰਿਸੋਧਯਿਂ.
੫੪. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੫੫. ‘‘ਪਦੁਮਾਭਾਸਨਾਮਾ ਚ, ਅਟ੍ਠਾਰਸ ਮਹੀਪਤੀ;
ਅਟ੍ਠਾਰਸੇਸੁ ਕਪ੍ਪੇਸੁ, ਅਟ੍ਠਤਾਲੀਸਮਾਸਿਸੁਂ.
੫੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪਦੁਮਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;
ਪਦੁਮਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਦਸਮਂ.
ਤਿਮਿਰਵਗ੍ਗੋ ਨਵਮੋ.