੧੦. ਸੁਧਾਵਗ੍ਗੋ

੧. ਸੁਧਾਪਿਣ੍ਡਿਯਤ੍ਥੇਰਅਪਦਾਨਂ

੧. ‘‘ਪੂਜਾਰਹੇ ਪੂਜਯਤੋ, ਬੁਦ੍ਧੇ ਯਦਿ ਵ ਸਾਵਕੇ;

ਪਪਞ੍ਚਸਮਤਿਕ੍ਕਨ੍ਤੇ, ਤਿਣ੍ਣਸੋਕਪਰਿਦ੍ਦਵੇ.

੨. ‘‘ਤੇ ਤਾਦਿਸੇ ਪੂਜਯਤੋ, ਨਿਬ੍ਬੁਤੇ ਅਕੁਤੋਭਯੇ;

ਨ ਸਕ੍ਕਾ ਪੁਞ੍ਞਂ ਸਙ੍ਖਾਤੁਂ, ਇਮੇਤ੍ਤਮਪਿ [ਇਦਮ੍ਮਤ੍ਤਨ੍ਤਿ (ਸੀ.), ਇਮੇਤ੍ਥਮਪਿ (ਕ.)] ਕੇਨਚਿ.

੩. ‘‘ਚਤੁਨ੍ਨਮਪਿ ਦੀਪਾਨਂ, ਇਸ੍ਸਰਂ ਯੋਧ ਕਾਰਯੇ;

ਏਕਿਸ੍ਸਾ ਪੂਜਨਾਯੇਤਂ, ਕਲਂ ਨਾਗ੍ਘਤਿ ਸੋਲ਼ਸਿਂ.

੪. ‘‘ਸਿਦ੍ਧਤ੍ਥਸ੍ਸ ਨਰਗ੍ਗਸ੍ਸ, ਚੇਤਿਯੇ ਫਲਿਤਨ੍ਤਰੇ;

ਸੁਧਾਪਿਣ੍ਡੋ ਮਯਾ ਦਿਨ੍ਨੋ, ਵਿਪ੍ਪਸਨ੍ਨੇਨ ਚੇਤਸਾ.

੫. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਟਿਸਙ੍ਖਾਰਸ੍ਸਿਦਂ ਫਲਂ.

੬. ‘‘ਇਤੋ ਤਿਂਸਤਿਕਪ੍ਪਮ੍ਹਿ, ਪਟਿਸਙ੍ਖਾਰਸਵ੍ਹਯਾ;

ਸਤ੍ਤਰਤਨਸਮ੍ਪਨ੍ਨਾ, ਤੇਰਸ ਚਕ੍ਕਵਤ੍ਤਿਨੋ.

੭. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਧਾਪਿਣ੍ਡਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਧਾਪਿਣ੍ਡਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਸੁਚਿਨ੍ਤਿਕਤ੍ਥੇਰਅਪਦਾਨਂ

੮. ‘‘ਤਿਸ੍ਸਸ੍ਸ ਲੋਕਨਾਥਸ੍ਸ, ਸੁਦ੍ਧਪੀਠਮਦਾਸਹਂ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ.

੯. ‘‘ਅਟ੍ਠਾਰਸੇ [ਅਟ੍ਠਤਿਂਸੇ (ਸੀ. ਸ੍ਯਾ.)] ਇਤੋ ਕਪ੍ਪੇ, ਰਾਜਾ ਆਸਿਂ ਮਹਾਰੁਚਿ;

ਭੋਗੋ ਚ ਵਿਪੁਲੋ ਆਸਿ, ਸਯਨਞ੍ਚ ਅਨਪ੍ਪਕਂ.

੧੦. ‘‘ਪੀਠਂ ਬੁਦ੍ਧਸ੍ਸ ਦਤ੍ਵਾਨ, ਵਿਪ੍ਪਸਨ੍ਨੇਨ ਚੇਤਸਾ;

ਅਨੁਭੋਮਿ ਸਕਂ ਕਮ੍ਮਂ, ਪੁਬ੍ਬੇ ਸੁਕਤਮਤ੍ਤਨੋ.

੧੧. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਪੀਠਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੀਠਦਾਨਸ੍ਸਿਦਂ ਫਲਂ.

੧੨. ‘‘ਅਟ੍ਠਤਿਂਸੇ ਇਤੋ ਕਪ੍ਪੇ, ਤਯੋ ਤੇ ਚਕ੍ਕਵਤ੍ਤਿਨੋ;

ਰੁਚਿ ਉਪਰੁਚਿ ਚੇਵ, ਮਹਾਰੁਚਿ ਤਤਿਯਕੋ.

੧੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਚਿਨ੍ਤਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਚਿਨ੍ਤਿਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਅਡ੍ਢਚੇਲ਼ਕਤ੍ਥੇਰਅਪਦਾਨਂ

੧੪. ‘‘ਤਿਸ੍ਸਸ੍ਸਾਹਂ ਭਗਵਤੋ, ਉਪਡ੍ਢਦੁਸ੍ਸਮਦਾਸਹਂ;

ਪਰਮਕਾਪਞ੍ਞਪਤ੍ਤੋਮ੍ਹਿ [ਪਰਮਕਾਰੁਞ੍ਞਪਤ੍ਤੋਮ੍ਹਿ (ਸ੍ਯਾ. ਕ.)], ਦੁਗ੍ਗਤੇਨ [ਦੁਗ੍ਗਨ੍ਧੇਨ (ਸੀ.)] ਸਮਪ੍ਪਿਤੋ.

੧੫. ‘‘ਉਪਡ੍ਢਦੁਸ੍ਸਂ ਦਤ੍ਵਾਨ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ;

ਅਵਸੇਸੇਸੁ ਕਪ੍ਪੇਸੁ, ਕੁਸਲਂ ਕਾਰਿਤਂ ਮਯਾ.

੧੬. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਦੁਸ੍ਸਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਦੁਸ੍ਸਦਾਨਸ੍ਸਿਦਂ ਫਲਂ.

੧੭. ‘‘ਏਕੂਨਪਞ੍ਞਾਸਕਪ੍ਪਮ੍ਹਿ [ਏਕਪਞ੍ਞਾਸਕਪ੍ਪਮ੍ਹਿ (ਸ੍ਯਾ.)], ਰਾਜਾਨੋ ਚਕ੍ਕਵਤ੍ਤਿਨੋ;

ਸਮਨ੍ਤਚ੍ਛਦਨਾ ਨਾਮ, ਬਾਤ੍ਤਿਂਸਾਸੁਂ [ਖਤ੍ਤਿਯਾਸੁਂ (ਸ੍ਯਾ. ਕ.)] ਜਨਾਧਿਪਾ.

੧੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਡ੍ਢਚੇਲ਼ਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਡ੍ਢਚੇਲ਼ਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਸੂਚਿਦਾਯਕਤ੍ਥੇਰਅਪਦਾਨਂ

੧੯. ‘‘ਕਮ੍ਮਾਰੋਹਂ ਪੁਰੇ ਆਸਿਂ, ਬਨ੍ਧੁਮਾਯਂ ਪੁਰੁਤ੍ਤਮੇ;

ਸੂਚਿਦਾਨਂ ਮਯਾ ਦਿਨ੍ਨਂ, ਵਿਪਸ੍ਸਿਸ੍ਸ ਮਹੇਸਿਨੋ.

੨੦. ‘‘ਵਜਿਰਗ੍ਗਸਮਂ ਞਾਣਂ, ਹੋਤਿ ਕਮ੍ਮੇਨ ਤਾਦਿਸਂ;

ਵਿਰਾਗੋਮ੍ਹਿ ਵਿਮੁਤ੍ਤੋਮ੍ਹਿ [ਵਿਭਵੋਮ੍ਹਿ ਵਿਭਤ੍ਤੋਮ੍ਹਿ (ਕ.)], ਪਤ੍ਤੋਮ੍ਹਿ ਆਸਵਕ੍ਖਯਂ.

੨੧. ‘‘ਅਤੀਤੇ ਚ ਭਵੇ ਸਬ੍ਬੇ, ਵਤ੍ਤਮਾਨੇ ਚਨਾਗਤੇ [ਅਤੀਤਾ ਚ ਭਵਾ ਸਬ੍ਬੇ, ਵਤ੍ਤਮਾਨਾ ਚ’ਨਾਗਤਾ (ਸ੍ਯਾ. ਕ.)];

ਞਾਣੇਨ ਵਿਚਿਨਿਂ ਸਬ੍ਬਂ, ਸੂਚਿਦਾਨਸ੍ਸਿਦਂ ਫਲਂ.

੨੨. ‘‘ਏਕਨਵੁਤਿਤੋ ਕਪ੍ਪੇ, ਸਤ੍ਤਾਸੁਂ ਵਜਿਰਵ੍ਹਯਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੂਚਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੂਚਿਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਗਨ੍ਧਮਾਲਿਯਤ੍ਥੇਰਅਪਦਾਨਂ

੨੪. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਗਨ੍ਧਥੂਪਂ ਅਕਾਸਹਂ;

ਸੁਮਨੇਹਿ ਪਟਿਚ੍ਛਨ੍ਨਂ, ਬੁਦ੍ਧਾਨੁਚ੍ਛਵਿਕਂ ਕਤਂ.

੨੫. ‘‘ਕਞ੍ਚਨਗ੍ਘਿਯਸਙ੍ਕਾਸਂ, ਬੁਦ੍ਧਂ ਲੋਕਗ੍ਗਨਾਯਕਂ;

ਇਨ੍ਦੀਵਰਂਵ ਜਲਿਤਂ, ਆਦਿਤ੍ਤਂਵ ਹੁਤਾਸਨਂ.

੨੬. ‘‘ਬ੍ਯਗ੍ਘੂਸਭਂਵ ਪਵਰਂ, ਅਭਿਜਾਤਂਵ ਕੇਸਰਿਂ;

ਨਿਸਿਨ੍ਨਂ ਸਮਣਾਨਗ੍ਗਂ, ਭਿਕ੍ਖੁਸਙ੍ਘਪੁਰਕ੍ਖਤਂ.

੨੭. ‘‘ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਪਕ੍ਕਾਮਿਂ ਉਤ੍ਤਰਾਮੁਖੋ;

ਚਤੁਨ੍ਨਵੁਤਿਤੋ ਕਪ੍ਪੇ, ਗਨ੍ਧਮਾਲਂ ਯਤੋ ਅਦਂ.

੨੮. ‘‘ਬੁਦ੍ਧੇ ਕਤਸ੍ਸ ਕਾਰਸ੍ਸ, ਫਲੇਨਾਹਂ ਵਿਸੇਸਤੋ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੯. ‘‘ਚਤ੍ਤਾਰੀਸਮ੍ਹਿ ਏਕੂਨੇ, ਕਪ੍ਪੇ ਆਸਿਂਸੁ ਸੋਲ਼ਸ;

ਦੇਵਗਨ੍ਧਸਨਾਮਾ ਤੇ, ਰਾਜਾਨੋ ਚਕ੍ਕਵਤ੍ਤਿਨੋ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਗਨ੍ਧਮਾਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਗਨ੍ਧਮਾਲਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਤਿਪੁਪ੍ਫਿਯਤ੍ਥੇਰਅਪਦਾਨਂ

੩੧. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ [ਬ੍ਰਹਾ (ਸ੍ਯਾ.)];

ਪਾਟਲਿਂ ਹਰਿਤਂ ਦਿਸ੍ਵਾ, ਤੀਣਿ ਪੁਪ੍ਫਾਨਿ ਓਕਿਰਿਂ.

੩੨. ‘‘ਪਤਿਤਪਤ੍ਤਾਨਿ [ਸਤ੍ਤਪਤ੍ਤਾਨਿ (ਸੀ.), ਸਤਪਤ੍ਤਾਨਿ (ਕ.), ਸੁਕ੍ਖਪਣ੍ਣਾਨਿ (ਸ੍ਯਾ.)] ਗਣ੍ਹਿਤ੍ਵਾ, ਬਹਿ ਛਡ੍ਡੇਸਹਂ ਤਦਾ;

ਅਨ੍ਤੋਸੁਦ੍ਧਂ ਬਹਿਸੁਦ੍ਧਂ, ਸੁਵਿਮੁਤ੍ਤਂ ਅਨਾਸਵਂ.

੩੩. ‘‘ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਵਿਪਸ੍ਸਿਂ ਲੋਕਨਾਯਕਂ;

ਪਾਟਲਿਂ ਅਭਿਵਾਦੇਤ੍ਵਾ, ਤਤ੍ਥ ਕਾਲਙ੍ਕਤੋ ਅਹਂ.

੩੪. ‘‘ਏਕਨਵੁਤਿਤੋ ਕਪ੍ਪੇ, ਯਂ ਬੋਧਿਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੋਧਿਪੂਜਾਯਿਦਂ ਫਲਂ.

੩੫. ‘‘ਸਮਨ੍ਤਪਾਸਾਦਿਕਾ ਨਾਮ, ਤੇਰਸਾਸਿਂਸੁ ਰਾਜਿਨੋ;

ਇਤੋ ਤੇਤ੍ਤਿਂਸਕਪ੍ਪਮ੍ਹਿ [ਤਿਂਸਤਿਕਪ੍ਪਮ੍ਹਿ (ਸ੍ਯਾ.)], ਚਕ੍ਕਵਤ੍ਤੀ ਮਹਬ੍ਬਲਾ.

੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਮਧੁਪਿਣ੍ਡਿਕਤ੍ਥੇਰਅਪਦਾਨਂ

੩੭. ‘‘ਵਿਪਿਨੇ [ਵਿਵਨੇ (ਸ੍ਯਾ. ਅਟ੍ਠ.)] ਕਾਨਨੇ ਦਿਸ੍ਵਾ, ਅਪ੍ਪਸਦ੍ਦੇ ਨਿਰਾਕੁਲੇ;

ਸਿਦ੍ਧਤ੍ਥਂ ਇਸਿਨਂ ਸੇਟ੍ਠਂ, ਆਹੁਤੀਨਂ ਪਟਿਗ੍ਗਹਂ.

੩੮. ‘‘ਨਿਬ੍ਬੁਤਤ੍ਤਂ [ਨਿਬ੍ਬੁਤਗ੍ਗਂ (ਕ.), ਨਿਬ੍ਬੂਤਿਕਂ (ਸ੍ਯਾ.)] ਮਹਾਨਾਗਂ, ਨਿਸਭਾਜਾਨਿਯਂ ਯਥਾ;

ਓਸਧਿਂਵ ਵਿਰੋਚਨ੍ਤਂ, ਦੇਵਸਙ੍ਘਨਮਸ੍ਸਿਤਂ.

੩੯. ‘‘ਵਿਤ੍ਤਿ ਮਮਾਹੁ ਤਾਵਦੇ [ਵਿਤ੍ਤਿ ਮੇ ਪਾਹੁਨਾ ਤਾਵ (ਸੀ. ਸ੍ਯਾ.)], ਞਾਣਂ ਉਪ੍ਪਜ੍ਜਿ ਤਾਵਦੇ;

ਵੁਟ੍ਠਿਤਸ੍ਸ ਸਮਾਧਿਮ੍ਹਾ, ਮਧੁਂ ਦਤ੍ਵਾਨ ਸਤ੍ਥੁਨੋ.

੪੦. ‘‘ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਪਕ੍ਕਾਮਿਂ ਪਾਚਿਨਾਮੁਖੋ;

ਚਤੁਤ੍ਤਿਂਸਮ੍ਹਿ ਕਪ੍ਪਮ੍ਹਿ, ਰਾਜਾ ਆਸਿਂ ਸੁਦਸ੍ਸਨੋ.

੪੧. ‘‘ਮਧੁ ਭਿਸੇਹਿ ਸਵਤਿ, ਭੋਜਨਮ੍ਹਿ ਚ ਤਾਵਦੇ;

ਮਧੁਵਸ੍ਸਂ ਪਵਸ੍ਸਿਤ੍ਥ, ਪੁਬ੍ਬਕਮ੍ਮਸ੍ਸਿਦਂ ਫਲਂ.

੪੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਮਧੁਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਧੁਦਾਨਸ੍ਸਿਦਂ ਫਲਂ.

੪੩. ‘‘ਚਤੁਤ੍ਤਿਂਸੇ ਇਤੋ ਕਪ੍ਪੇ, ਚਤ੍ਤਾਰੋ ਤੇ ਸੁਦਸ੍ਸਨਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੪੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਧੁਪਿਣ੍ਡਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਧੁਪਿਣ੍ਡਿਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਸੇਨਾਸਨਦਾਯਕਤ੍ਥੇਰਅਪਦਾਨਂ

੪੫. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਅਦਾਸਿਂ ਪਣ੍ਣਸਨ੍ਥਰਂ;

ਸਮਨ੍ਤਾ ਉਪਹਾਰਞ੍ਚ, ਕੁਸੁਮਂ ਓਕਿਰਿਂ ਅਹਂ.

੪੬. ‘‘ਪਾਸਾਦੇਵਂ ਗੁਣਂ ਰਮ੍ਮਂ [ਪਾਸਾਦੇ ਚ ਗੁਹਂ ਰਮ੍ਮਂ (ਸ੍ਯਾ.)], ਅਨੁਭੋਮਿ ਮਹਾਰਹਂ;

ਮਹਗ੍ਘਾਨਿ ਚ ਪੁਪ੍ਫਾਨਿ, ਸਯਨੇਭਿਸਵਨ੍ਤਿ ਮੇ.

੪੭. ‘‘ਸਯਨੇਹਂ ਤੁਵਟ੍ਟਾਮਿ, ਵਿਚਿਤ੍ਤੇ ਪੁਪ੍ਫਸਨ੍ਥਤੇ;

ਪੁਪ੍ਫਵੁਟ੍ਠਿ ਚ ਸਯਨੇ, ਅਭਿਵਸ੍ਸਤਿ ਤਾਵਦੇ.

੪੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਅਦਾਸਿਂ ਪਣ੍ਣਸਨ੍ਥਰਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਨ੍ਥਰਸ੍ਸ ਇਦਂ ਫਲਂ.

੪੯. ‘‘ਤਿਣਸਨ੍ਥਰਕਾ ਨਾਮ, ਸਤ੍ਤੇਤੇ ਚਕ੍ਕਵਤ੍ਤਿਨੋ;

ਇਤੋ ਤੇ ਪਞ੍ਚਮੇ ਕਪ੍ਪੇ, ਉਪ੍ਪਜ੍ਜਿਂਸੁ ਜਨਾਧਿਪਾ.

੫੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੇਨਾਸਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੇਨਾਸਨਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਵੇਯ੍ਯਾਵਚ੍ਚਕਤ੍ਥੇਰਅਪਦਾਨਂ

੫੧. ‘‘ਵਿਪਸ੍ਸਿਸ੍ਸ ਭਗਵਤੋ, ਮਹਾਪੂਗਗਣੋ ਅਹੁ;

ਵੇਯ੍ਯਾਵਚ੍ਚਕਰੋ ਆਸਿਂ, ਸਬ੍ਬਕਿਚ੍ਚੇਸੁ ਵਾਵਟੋ [ਬ੍ਯਾਵਟੋ (ਸੀ. ਸ੍ਯਾ.)].

੫੨. ‘‘ਦੇਯ੍ਯਧਮ੍ਮੋ ਚ ਮੇ ਨਤ੍ਥਿ, ਸੁਗਤਸ੍ਸ ਮਹੇਸਿਨੋ;

ਅਵਨ੍ਦਿਂ ਸਤ੍ਥੁਨੋ ਪਾਦੇ, ਵਿਪ੍ਪਸਨ੍ਨੇਨ ਚੇਤਸਾ.

੫੩. ‘‘ਏਕਨਵੁਤਿਤੋ ਕਪ੍ਪੇ, ਵੇਯ੍ਯਾਵਚ੍ਚਂ ਅਕਾਸਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਵੇਯ੍ਯਾਵਚ੍ਚਸ੍ਸਿਦਂ ਫਲਂ.

੫੪. ‘‘ਇਤੋ ਚ ਅਟ੍ਠਮੇ ਕਪ੍ਪੇ, ਰਾਜਾ ਆਸਿਂ ਸੁਚਿਨ੍ਤਿਤੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੫੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵੇਯ੍ਯਾਵਚ੍ਚਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਵੇਯ੍ਯਾਵਚ੍ਚਕਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਬੁਦ੍ਧੁਪਟ੍ਠਾਕਤ੍ਥੇਰਅਪਦਾਨਂ

੫੬. ‘‘ਵਿਪਸ੍ਸਿਸ੍ਸ ਭਗਵਤੋ, ਅਹੋਸਿਂ ਸਙ੍ਖਧਮ੍ਮਕੋ;

ਨਿਚ੍ਚੁਪਟ੍ਠਾਨਯੁਤ੍ਤੋਮ੍ਹਿ, ਸੁਗਤਸ੍ਸ ਮਹੇਸਿਨੋ.

੫੭. ‘‘ਉਪਟ੍ਠਾਨਫਲਂ ਪਸ੍ਸ, ਲੋਕਨਾਥਸ੍ਸ ਤਾਦਿਨੋ;

ਸਟ੍ਠਿਤੂਰਿਯਸਹਸ੍ਸਾਨਿ, ਪਰਿਵਾਰੇਨ੍ਤਿ ਮਂ ਸਦਾ.

੫੮. ‘‘ਏਕਨਵੁਤਿਤੋ ਕਪ੍ਪੇ, ਉਪਟ੍ਠਹਿਂ ਮਹਾਇਸਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਪਟ੍ਠਾਨਸ੍ਸਿਦਂ ਫਲਂ.

੫੯. ‘‘ਚਤੁਵੀਸੇ [ਚਤੁਨਵੁਤੇ (ਸ੍ਯਾ.)] ਇਤੋ ਕਪ੍ਪੇ, ਮਹਾਨਿਗ੍ਘੋਸਨਾਮਕਾ;

ਸੋਲ਼ਸਾਸਿਂਸੁ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.

੬੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬੁਦ੍ਧੁਪਟ੍ਠਾਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਬੁਦ੍ਧੁਪਟ੍ਠਾਕਤ੍ਥੇਰਸ੍ਸਾਪਦਾਨਂ ਦਸਮਂ.

ਸੁਧਾਵਗ੍ਗੋ ਦਸਮੋ.

ਤਸ੍ਸੁਦ੍ਦਾਨਂ –

ਸੁਧਾ ਸੁਚਿਨ੍ਤਿ ਚੇਲ਼ਞ੍ਚ, ਸੂਚੀ ਚ ਗਨ੍ਧਮਾਲਿਯੋ;

ਤਿਪੁਪ੍ਫਿਯੋ ਮਧੁਸੇਨਾ, ਵੇਯ੍ਯਾਵਚ੍ਚੋ ਚੁਪਟ੍ਠਕੋ;

ਸਮਸਟ੍ਠਿ ਚ ਗਾਥਾਯੋ, ਅਸ੍ਮਿਂ ਵਗ੍ਗੇ ਪਕਿਤ੍ਤਿਤਾ.

ਅਥ ਵਗ੍ਗੁਦ੍ਦਾਨਂ –

ਬੁਦ੍ਧਵਗ੍ਗੋ ਹਿ ਪਠਮੋ, ਸੀਹਾਸਨਿ ਸੁਭੂਤਿ ਚ;

ਕੁਣ੍ਡਧਾਨੋ ਉਪਾਲਿ ਚ, ਬੀਜਨਿਸਕਚਿਨ੍ਤਿ ਚ.