ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਕਨਿਕਾਯੇ

ਥੇਰਾਪਦਾਨਪਾਲ਼ਿ

(ਪਠਮੋ ਭਾਗੋ)

੧. ਬੁਦ੍ਧਵਗ੍ਗੋ

੧. ਬੁਦ੍ਧਅਪਦਾਨਂ

੧. ਤਥਾਗਤਂ ਜੇਤਵਨੇ ਵਸਨ੍ਤਂ, ਅਪੁਚ੍ਛਿ ਵੇਦੇਹਮੁਨੀ ਨਤਙ੍ਗੋ;

‘‘ਸਬ੍ਬਞ੍ਞੁਬੁਦ੍ਧਾ ਕਿਰ ਨਾਮ ਹੋਨ੍ਤਿ, ਭਵਨ੍ਤਿ ਤੇ ਹੇਤੁਭਿ ਕੇਹਿ ਵੀਰ’’.

੨. ਤਦਾਹ ਸਬ੍ਬਞ੍ਞੁਵਰੋ ਮਹੇਸੀ, ਆਨਨ੍ਦਭਦ੍ਦਂ ਮਧੁਰਸ੍ਸਰੇਨ;

‘‘ਯੇ ਪੁਬ੍ਬਬੁਦ੍ਧੇਸੁ [ਸਬ੍ਬਬੁਦ੍ਧੇਸੁ (ਸ੍ਯਾ.)] ਕਤਾਧਿਕਾਰਾ, ਅਲਦ੍ਧਮੋਕ੍ਖਾ ਜਿਨਸਾਸਨੇਸੁ.

੩. ‘‘ਤੇਨੇਵ ਸਮ੍ਬੋਧਿਮੁਖੇਨ ਧੀਰਾ, ਅਜ੍ਝਾਸਯੇਨਾਪਿ ਮਹਾਬਲੇਨ;

ਪਞ੍ਞਾਯ ਤੇਜੇਨ ਸੁਤਿਕ੍ਖਪਞ੍ਞਾ, ਸਬ੍ਬਞ੍ਞੁਭਾਵਂ ਅਨੁਪਾਪੁਣਨ੍ਤਿ.

੪. ‘‘ਅਹਮ੍ਪਿ ਪੁਬ੍ਬਬੁਦ੍ਧੇਸੁ, ਬੁਦ੍ਧਤ੍ਤਮਭਿਪਤ੍ਥਯਿਂ,

ਮਨਸਾਯੇਵ ਹੁਤ੍ਵਾਨ, ਧਮ੍ਮਰਾਜਾ ਅਸਙ੍ਖਿਯਾ.

੫. ‘‘ਅਥ ਬੁਦ੍ਧਾਪਦਾਨਾਨਿ, ਸੁਣਾਥ ਸੁਦ੍ਧਮਾਨਸਾ;

ਤਿਂਸਪਾਰਮਿਸਮ੍ਪੁਣ੍ਣਾ, ਧਮ੍ਮਰਾਜਾ ਅਸਙ੍ਖਿਯਾ.

੬. ‘‘ਸਮ੍ਬੋਧਿਂ ਬੁਦ੍ਧਸੇਟ੍ਠਾਨਂ, ਸਸਙ੍ਘੇ ਲੋਕਨਾਯਕੇ;

ਦਸਙ੍ਗੁਲੀ ਨਮਸ੍ਸਿਤ੍ਵਾ, ਸਿਰਸਾ ਅਭਿਵਾਦਯਿਂ [ਅਭਿਵਾਦਯੇ (ਸ੍ਯਾ.)].

੭. ‘‘ਯਾਵਤਾ ਬੁਦ੍ਧਖੇਤ੍ਤੇਸੁ, ਰਤਨਾ ਵਿਜ੍ਜਨ੍ਤਿਸਙ੍ਖਿਯਾ;

ਆਕਾਸਟ੍ਠਾ ਚ ਭੂਮਟ੍ਠਾ [ਭੁਮ੍ਮਟ੍ਠਾ (ਸੀ. ਸ੍ਯਾ.)], ਮਨਸਾ ਸਬ੍ਬਮਾਹਰਿਂ.

੮. ‘‘ਤਤ੍ਥ ਰੂਪਿਯਭੂਮਿਯਂ, ਪਾਸਾਦਂ ਮਾਪਯਿਂ ਅਹਂ;

ਨੇਕਭੁਮ੍ਮਂ ਰਤਨਮਯਂ, ਉਬ੍ਬਿਦ੍ਧਂ ਨਭਮੁਗ੍ਗਤਂ.

੯. ‘‘ਵਿਚਿਤ੍ਤਥਮ੍ਭਂ ਸੁਕਤਂ, ਸੁਵਿਭਤ੍ਤਂ ਮਹਾਰਹਂ;

ਕਨਕਮਯਸਙ੍ਘਾਟਂ, ਕੋਨ੍ਤਚ੍ਛਤ੍ਤੇਹਿ ਮਣ੍ਡਿਤਂ.

੧੦. ‘‘ਪਠਮਾ ਵੇਲ਼ੁਰਿਯਾ ਭੂਮਿ, ਵਿਮਲਬ੍ਭਸਮਾ ਸੁਭਾ;

ਨਲ਼ਿਨਜਲਜਾਕਿਣ੍ਣਾ, ਵਰਕਞ੍ਚਨਭੂਮਿਯਾ.

੧੧. ‘‘ਪਵਾਲ਼ਂਸਾ ਪਵਾਲ਼ਵਣ੍ਣਾ, ਕਾਚਿ ਲੋਹਿਤਕਾ ਸੁਭਾ;

ਇਨ੍ਦਗੋਪਕਵਣ੍ਣਾਭਾ, ਭੂਮਿ ਓਭਾਸਤੀ ਦਿਸਾ.

੧੨. ‘‘ਸੁਵਿਭਤ੍ਤਾ ਘਰਮੁਖਾ, ਨਿਯ੍ਯੂਹਾ ਸੀਹਪਞ੍ਜਰਾ;

ਚਤੁਰੋ ਵੇਦਿਕਾ ਜਾਲਾ, ਗਨ੍ਧਾਵੇਲ਼ਾ ਮਨੋਰਮਾ.

੧੩. ‘‘ਨੀਲਾ ਪੀਤਾ ਲੋਹਿਤਕਾ, ਓਦਾਤਾ ਸੁਦ੍ਧਕਾਲ਼ਕਾ;

ਕੂਟਾਗਾਰਵਰੂਪੇਤਾ, ਸਤ੍ਤਰਤਨਭੂਸਿਤਾ.

੧੪. ‘‘ਓਲੋਕਮਯਾ ਪਦੁਮਾ, ਵਾਲ਼ਵਿਹਙ੍ਗਸੋਭਿਤਾ;

ਨਕ੍ਖਤ੍ਤਤਾਰਕਾਕਿਣ੍ਣਾ, ਚਨ੍ਦਸੂਰੇਹਿ [ਚਨ੍ਦਸੁਰਿਯੇਹਿ (ਸੀ. ਸ੍ਯਾ.)] ਮਣ੍ਡਿਤਾ.

੧੫. ‘‘ਹੇਮਜਾਲੇਨ ਸਞ੍ਛਨ੍ਨਾ, ਸੋਣ੍ਣਕਿਙ੍ਕਿਣਿਕਾਯੁਤਾ;

ਵਾਤਵੇਗੇਨ ਕੂਜਨ੍ਤਿ, ਸੋਣ੍ਣਮਾਲਾ ਮਨੋਰਮਾ.

੧੬. ‘‘ਮਞ੍ਜੇਟ੍ਠਕਂ ਲੋਹਿਤਕਂ, ਪੀਤਕਂ ਹਰਿਪਿਞ੍ਜਰਂ;

ਨਾਨਾਰਙ੍ਗੇਹਿ ਸਮ੍ਪੀਤਂ [ਸਂਚਿਤ੍ਤਂ (ਸ੍ਯਾ.)], ਉਸ੍ਸਿਤਦ੍ਧਜਮਾਲਿਨੀ [ਮਾਲਿਨਿਂ (ਸੀ.)].

੧੭. ‘‘ਨ ਨਂ [ਨਾਨਾ (ਸੀ. ਸ੍ਯਾ.)] ਬਹੂਨੇਕਸਤਾ, ਫਲਿਕਾ ਰਜਤਾਮਯਾ;

ਮਣਿਮਯਾ ਲੋਹਿਤਙ੍ਗਾ, ਮਸਾਰਗਲ੍ਲਮਯਾ ਤਥਾ;

ਨਾਨਾਸਯਨਵਿਚਿਤ੍ਤਾ, ਸਣ੍ਹਕਾਸਿਕਸਨ੍ਥਤਾ.

੧੮. ‘‘ਕਮ੍ਪਲਾ ਦੁਕੂਲਾ ਚੀਨਾ, ਪਟ੍ਟੁਣ੍ਣਾ ਪਣ੍ਡੁਪਾਵੁਰਾ;

ਵਿਵਿਧਤ੍ਥਰਣਂ ਸਬ੍ਬਂ, ਮਨਸਾ ਪਞ੍ਞਪੇਸਹਂ.

੧੯. ‘‘ਤਾਸੁ ਤਾਸ੍ਵੇਵ ਭੂਮੀਸੁ, ਰਤਨਕੂਟਲਙ੍ਕਤਂ;

ਮਣਿਵੇਰੋਚਨਾ ਉਕ੍ਕਾ, ਧਾਰਯਨ੍ਤਾ ਸੁਤਿਟ੍ਠਰੇ.

੨੦. ‘‘ਸੋਭਨ੍ਤਿ ਏਸਿਕਾ ਥਮ੍ਭਾ, ਸੁਭਾ ਕਞ੍ਚਨਤੋਰਣਾ;

ਜਮ੍ਬੋਨਦਾ ਸਾਰਮਯਾ, ਅਥੋ ਰਜਤਮਯਾਪਿ ਚ.

੨੧. ‘‘ਨੇਕਾ ਸਨ੍ਧੀ ਸੁਵਿਭਤ੍ਤਾ, ਕਵਾਟਗ੍ਗਲ਼ਚਿਤ੍ਤਿਤਾ;

ਉਭਤੋ ਪੁਣ੍ਣਘਟਾਨੇਕਾ, ਪਦੁਮੁਪ੍ਪਲਸਂਯੁਤਾ.

੨੨. ‘‘ਅਤੀਤੇ ਸਬ੍ਬਬੁਦ੍ਧੇ ਚ, ਸਸਙ੍ਘੇ ਲੋਕਨਾਯਕੇ;

ਪਕਤਿਵਣ੍ਣਰੂਪੇਨ, ਨਿਮ੍ਮਿਨਿਤ੍ਵਾ ਸਸਾਵਕੇ.

੨੩. ‘‘ਤੇਨ ਦ੍ਵਾਰੇਨ ਪਵਿਸਿਤ੍ਵਾ, ਸਬ੍ਬੇ ਬੁਦ੍ਧਾ ਸਸਾਵਕਾ;

ਸਬ੍ਬਸੋਣ੍ਣਮਯੇ ਪੀਠੇ, ਨਿਸਿਨ੍ਨਾ ਅਰਿਯਮਣ੍ਡਲਾ.

੨੪. ‘‘ਯੇ ਚ ਏਤਰਹਿ ਅਤ੍ਥਿ, ਬੁਦ੍ਧਾ ਲੋਕੇ ਅਨੁਤ੍ਤਰਾ;

ਅਤੀਤੇ ਵਤ੍ਤਮਾਨਾ ਚ, ਭਵਨਂ ਸਬ੍ਬੇ ਸਮਾਹਰਿਂ.

੨੫. ‘‘ਪਚ੍ਚੇਕਬੁਦ੍ਧੇਨੇਕਸਤੇ, ਸਯਮ੍ਭੂ ਅਪਰਾਜਿਤੇ;

ਅਤੀਤੇ ਵਤ੍ਤਮਾਨੇ ਚ, ਭਵਨਂ ਸਬ੍ਬੇ ਸਮਾਹਰਿਂ.

੨੬. ‘‘ਕਪ੍ਪਰੁਕ੍ਖਾ ਬਹੂ ਅਤ੍ਥਿ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਸਬ੍ਬਂ ਦੁਸ੍ਸਂ ਸਮਾਹਨ੍ਤਾ, ਅਚ੍ਛਾਦੇਮਿ ਤਿਚੀਵਰਂ.

੨੭. ‘‘ਖਜ੍ਜਂ ਭੋਜ੍ਜਂ ਸਾਯਨੀਯਂ, ਸਮ੍ਪਨ੍ਨਂ ਪਾਨਭੋਜਨਂ;

ਮਣਿਮਯੇ ਸੁਭੇ ਪਤ੍ਤੇ, ਸਂਪੂਰੇਤ੍ਵਾ ਅਦਾਸਹਂ.

੨੮. ‘‘ਦਿਬ੍ਬਵਤ੍ਥਸਮਾ ਹੁਤ੍ਵਾ, ਮਟ੍ਠਾ [ਮਟ੍ਟਾ (ਸੀ.)] ਚੀਵਰਸਂਯੁਤਾ;

ਮਧੁਰਾ ਸਕ੍ਖਰਾ ਚੇਵ, ਤੇਲਾ ਚ ਮਧੁਫਾਣਿਤਾ.

੨੯. ‘‘ਤਪ੍ਪਿਤਾ ਪਰਮਨ੍ਨੇਨ, ਸਬ੍ਬੇ ਤੇ ਅਰਿਯਮਣ੍ਡਲਾ;

ਰਤਨਗਬ੍ਭਂ ਪਵਿਸਿਤ੍ਵਾ, ਕੇਸਰੀਵ ਗੁਹਾਸਯਾ.

੩੦. ‘‘ਮਹਾਰਹਮ੍ਹਿ ਸਯਨੇ, ਸੀਹਸੇਯ੍ਯਮਕਪ੍ਪਯੁਂ;

ਸਮ੍ਪਜਾਨਾ ਸਮੁਟ੍ਠਾਯ, ਸਯਨੇ [ਸੇਯ੍ਯੇ (ਸ੍ਯਾ.)] ਪਲ੍ਲਙ੍ਕਮਾਭੁਜੁਂ.

੩੧. ‘‘ਗੋਚਰਂ ਸਬ੍ਬਬੁਦ੍ਧਾਨਂ, ਝਾਨਰਤਿਸਮਪ੍ਪਿਤਾ;

ਅਞ੍ਞੇ ਧਮ੍ਮਾਨਿ ਦੇਸੇਨ੍ਤਿ, ਅਞ੍ਞੇ ਕੀਲ਼ਨ੍ਤਿ ਇਦ੍ਧਿਯਾ.

੩੨. ‘‘ਅਞ੍ਞੇ ਅਭਿਞ੍ਞਾ ਅਪ੍ਪੇਨ੍ਤਿ, ਅਭਿਞ੍ਞਾ ਵਸਿਭਾਵਿਤਾ;

ਵਿਕੁਬ੍ਬਨਾ ਵਿਕੁਬ੍ਬਨ੍ਤਿ, ਅਞ੍ਞੇਨੇਕਸਹਸ੍ਸਿਯੋ.

੩੩. ‘‘ਬੁਦ੍ਧਾਪਿ ਬੁਦ੍ਧੇ ਪੁਚ੍ਛਨ੍ਤਿ, ਵਿਸਯਂ ਸਬ੍ਬਞ੍ਞੁਮਾਲਯਂ;

ਗਮ੍ਭੀਰਂ ਨਿਪੁਣਂ ਠਾਨਂ, ਪਞ੍ਞਾਯ ਵਿਨਿਬੁਜ੍ਝਰੇ.

੩੪. ‘‘ਸਾਵਕਾ ਬੁਦ੍ਧੇ ਪੁਚ੍ਛਨ੍ਤਿ, ਬੁਦ੍ਧਾ ਪੁਚ੍ਛਨ੍ਤਿ ਸਾਵਕੇ;

ਅਞ੍ਞਮਞ੍ਞਞ੍ਚ ਪੁਚ੍ਛਿਤ੍ਵਾ [ਪੁਚ੍ਛਨ੍ਤਿ (ਸੀ. ਸ੍ਯਾ.)], ਅਞ੍ਞੋਞ੍ਞਂ ਬ੍ਯਾਕਰੋਨ੍ਤਿ ਤੇ.

੩੫. ‘‘ਬੁਦ੍ਧਾ ਪਚ੍ਚੇਕਬੁਦ੍ਧਾ ਚ, ਸਾਵਕਾ ਪਰਿਚਾਰਕਾ;

ਏਵਂ ਸਕਾਯ ਰਤਿਯਾ, ਪਾਸਾਦੇਭਿਰਮਨ੍ਤਿ ਤੇ.

੩੬. ‘‘ਛਤ੍ਤਾ ਤਿਟ੍ਠਨ੍ਤੁ ਰਤਨਾ, ਕਞ੍ਚਨਾਵੇਲ਼ਪਨ੍ਤਿਕਾ;

ਮੁਤ੍ਤਾਜਾਲਪਰਿਕ੍ਖਿਤ੍ਤਾ, ਸਬ੍ਬੇ ਧਾਰੇਨ੍ਤੁ [ਧਾਰੇਨ੍ਤਿ (ਕ.)] ਮਤ੍ਥਕੇ.

੩੭. ‘‘ਭਵਨ੍ਤੁ ਚੇਲ਼ਵਿਤਾਨਾ, ਸੋਣ੍ਣਤਾਰਕਚਿਤ੍ਤਿਤਾ;

ਵਿਚਿਤ੍ਤਮਲ੍ਯਵਿਤਤਾ, ਸਬ੍ਬੇ ਧਾਰੇਨ੍ਤੁ ਮਤ੍ਥਕੇ.

੩੮. ‘‘ਵਿਤਤਾ ਮਲ੍ਯਦਾਮੇਹਿ, ਗਨ੍ਧਦਾਮੇਹਿ ਸੋਭਿਤਾ;

ਦੁਸ੍ਸਦਾਮਪਰਿਕਿਣ੍ਣਾ, ਰਤਨਦਾਮਭੂਸਿਤਾ.

੩੯. ‘‘ਪੁਪ੍ਫਾਭਿਕਿਣ੍ਣਾ ਸੁਚਿਤ੍ਤਾ, ਸੁਰਭਿਗਨ੍ਧਭੂਸਿਤਾ;

ਗਨ੍ਧਪਞ੍ਚਙ੍ਗੁਲਿਕਤਾ [ਗਨ੍ਧਪਞ੍ਚਙ੍ਗੁਲਂ ਕਤਾ (ਅਟ੍ਠ.)], ਹੇਮਚ੍ਛਦਨਛਾਦਿਤਾ.

੪੦. ‘‘ਚਤੁਦ੍ਦਿਸਾ ਪੋਕ੍ਖਰਞ੍ਞੋ, ਪਦੁਮੁਪ੍ਪਲਸਨ੍ਥਤਾ;

ਸੋਵਣ੍ਣਰੂਪਾ ਖਾਯਨ੍ਤੁ, ਪਦ੍ਮਂਰੇਣੁਰਜੁਗ੍ਗਤਾ.

੪੧. ‘‘ਪੁਪ੍ਫਨ੍ਤੁ ਪਾਦਪਾ ਸਬ੍ਬੇ, ਪਾਸਾਦਸ੍ਸ ਸਮਨ੍ਤਤੋ;

ਸਯਞ੍ਚ ਪੁਪ੍ਫਾ ਮੁਞ੍ਚਿਤ੍ਵਾ, ਗਨ੍ਤ੍ਵਾ ਭਵਨਮੋਕਿਰੁਂ.

੪੨. ‘‘ਸਿਖਿਨੋ ਤਤ੍ਥ ਨਚ੍ਚਨ੍ਤੁ, ਦਿਬ੍ਬਹਂਸਾ ਪਕੂਜਰੇ;

ਕਰਵੀਕਾ ਚ ਗਾਯਨ੍ਤੁ, ਦਿਜਸਙ੍ਘਾ ਸਮਨ੍ਤਤੋ.

੪੩. ‘‘ਭੇਰਿਯੋ ਸਬ੍ਬਾ ਵਜ੍ਜਨ੍ਤੁ, ਵੀਣਾ ਸਬ੍ਬਾ ਰਸਨ੍ਤੁ [ਰਵਨ੍ਤੁ (ਸੀ. ਸ੍ਯਾ.)] ਤਾ;

ਸਬ੍ਬਾ ਸਙ੍ਗੀਤਿ ਵਤ੍ਤਨ੍ਤੁ, ਪਾਸਾਦਸ੍ਸ ਸਮਨ੍ਤਤੋ.

੪੪. ‘‘ਯਾਵਤਾ ਬੁਦ੍ਧਖੇਤ੍ਤਮ੍ਹਿ, ਚਕ੍ਕਵਾਲ਼ੇ ਤਤੋ ਪਰੇ;

ਮਹਨ੍ਤਾ ਜੋਤਿਸਮ੍ਪਨ੍ਨਾ, ਅਚ੍ਛਿਨ੍ਨਾ ਰਤਨਾਮਯਾ.

੪੫. ‘‘ਤਿਟ੍ਠਨ੍ਤੁ ਸੋਣ੍ਣਪਲ੍ਲਙ੍ਕਾ, ਦੀਪਰੁਕ੍ਖਾ ਜਲਨ੍ਤੁ ਤੇ;

ਭਵਨ੍ਤੁ ਏਕਪਜ੍ਜੋਤਾ, ਦਸਸਹਸ੍ਸਿਪਰਮ੍ਪਰਾ.

੪੬. ‘‘ਗਣਿਕਾ ਲਾਸਿਕਾ ਚੇਵ, ਨਚ੍ਚਨ੍ਤੁ ਅਚ੍ਛਰਾਗਣਾ;

ਨਾਨਾਰਙ੍ਗਾ ਪਦਿਸ੍ਸਨ੍ਤੁ, ਪਾਸਾਦਸ੍ਸ ਸਮਨ੍ਤਤੋ.

੪੭. ‘‘ਦੁਮਗ੍ਗੇ ਪਬ੍ਬਤਗ੍ਗੇ ਵਾ, ਸਿਨੇਰੁਗਿਰਿਮੁਦ੍ਧਨਿ;

ਉਸ੍ਸਾਪੇਮਿ ਧਜਂ ਸਬ੍ਬਂ, ਵਿਚਿਤ੍ਤਂ ਪਞ੍ਚਵਣ੍ਣਿਕਂ.

੪੮. ‘‘ਨਰਾ ਨਾਗਾ ਚ ਗਨ੍ਧਬ੍ਬਾ, ਸਬ੍ਬੇ ਦੇਵਾ ਉਪੇਨ੍ਤੁ ਤੇ;

ਨਮਸ੍ਸਨ੍ਤਾ ਪਞ੍ਜਲਿਕਾ, ਪਾਸਾਦਂ ਪਰਿਵਾਰਯੁਂ.

੪੯. ‘‘ਯਂ ਕਿਞ੍ਚਿ ਕੁਸਲਂ ਕਮ੍ਮਂ, ਕਤ੍ਤਬ੍ਬਂ ਕਿਰਿਯਂ ਮਮ;

ਕਾਯੇਨ ਵਾਚਾ ਮਨਸਾ, ਤਿਦਸੇ ਸੁਕਤਂ ਕਤਂ.

੫੦. ‘‘ਯੇ ਸਤ੍ਤਾ ਸਞ੍ਞਿਨੋ ਅਤ੍ਥਿ, ਯੇ ਚ ਸਤ੍ਤਾ ਅਸਞ੍ਞਿਨੋ;

ਕਤਂ ਪੁਞ੍ਞਫਲਂ ਮਯ੍ਹਂ, ਸਬ੍ਬੇ ਭਾਗੀ ਭਵਨ੍ਤੁ ਤੇ.

੫੧. ‘‘ਯੇਸਂ ਕਤਂ ਸੁਵਿਦਿਤਂ, ਦਿਨ੍ਨਂ ਪੁਞ੍ਞਫਲਂ ਮਯਾ;

ਯੇ ਚ ਤਤ੍ਥ [ਤਸ੍ਮਿਂ (ਸੀ. ਕ.)] ਨ ਜਾਨਨ੍ਤਿ, ਦੇਵਾ ਗਨ੍ਤ੍ਵਾ ਨਿਵੇਦਯੁਂ.

੫੨. ‘‘ਸਬ੍ਬਲੋਕਮ੍ਹਿ [ਸਬ੍ਬੇ ਲੋਕਮ੍ਹਿ (ਸ੍ਯਾ. ਕ.)] ਯੇ ਸਤ੍ਤਾ, ਜੀਵਨ੍ਤਾਹਾਰਹੇਤੁਕਾ;

ਮਨੁਞ੍ਞਂ ਭੋਜਨਂ ਸਬ੍ਬਂ [ਸਬ੍ਬੇ (ਸ੍ਯਾ.)], ਲਭਨ੍ਤੁ ਮਮ ਚੇਤਸਾ.

੫੩. ‘‘ਮਨਸਾ ਦਾਨਂ ਮਯਾ ਦਿਨ੍ਨਂ, ਮਨਸਾ ਪਸਾਦਮਾਵਹਿਂ;

ਪੂਜਿਤਾ ਸਬ੍ਬਸਮ੍ਬੁਦ੍ਧਾ, ਪਚ੍ਚੇਕਾ ਜਿਨਸਾਵਕਾ.

੫੪. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੫੫. ‘‘ਦੁਵੇ ਭਵੇ ਪਜਾਨਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞਂ ਗਤਿਂ ਨ ਜਾਨਾਮਿ, ਮਨਸਾ ਪਤ੍ਥਨਾਫਲਂ.

੫੬. ‘‘ਦੇਵਾਨਂ ਅਧਿਕੋ ਹੋਮਿ, ਭਵਾਮਿ ਮਨੁਜਾਧਿਪੋ;

ਰੂਪਲਕ੍ਖਣਸਮ੍ਪਨ੍ਨੋ, ਪਞ੍ਞਾਯ ਅਸਮੋ ਭਵੇ.

੫੭. ‘‘ਭੋਜਨਂ ਵਿਵਿਧਂ ਸੇਟ੍ਠਂ, ਰਤਨਞ੍ਚ ਅਨਪ੍ਪਕਂ;

ਵਿਵਿਧਾਨਿ ਚ ਵਤ੍ਥਾਨਿ, ਨਭਾ [ਨਭਸਾ (ਸ੍ਯਾ.)] ਖਿਪ੍ਪਂ ਉਪੇਨ੍ਤਿ ਮਂ.

੫੮. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ ਹਤ੍ਥਂ ਪਸਾਰੇਮਿ, ਦਿਬ੍ਬਾ ਭਕ੍ਖਾ ਉਪੇਨ੍ਤਿ ਮਂ.

੫੯. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ ਹਤ੍ਥਂ ਪਸਾਰੇਮਿ, ਰਤਨਾ ਸਬ੍ਬੇ ਉਪੇਨ੍ਤਿ ਮਂ.

੬੦. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ ਹਤ੍ਥਂ ਪਸਾਰੇਮਿ, ਸਬ੍ਬੇ ਗਨ੍ਧਾ ਉਪੇਨ੍ਤਿ ਮਂ.

੬੧. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ [ਯਤ੍ਥ (ਸ੍ਯਾ.), ਯਞ੍ਞਂ (ਕ.)] ਹਤ੍ਥਂ ਪਸਾਰੇਮਿ, ਸਬ੍ਬੇ ਯਾਨਾ ਉਪੇਨ੍ਤਿ ਮਂ.

੬੨. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ ਹਤ੍ਥਂ ਪਸਾਰੇਮਿ, ਸਬ੍ਬੇ ਮਾਲਾ ਉਪੇਨ੍ਤਿ ਮਂ.

੬੩. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ ਹਤ੍ਥਂ ਪਸਾਰੇਮਿ, ਅਲਙ੍ਕਾਰਾ ਉਪੇਨ੍ਤਿ ਮਂ.

੬੪. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ ਹਤ੍ਥਂ ਪਸਾਰੇਮਿ, ਸਬ੍ਬਾ ਕਞ੍ਞਾ ਉਪੇਨ੍ਤਿ ਮਂ.

੬੫. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ ਹਤ੍ਥਂ ਪਸਾਰੇਮਿ, ਮਧੁਸਕ੍ਖਰਾ ਉਪੇਨ੍ਤਿ ਮਂ.

੬੬. ‘‘ਪਥਬ੍ਯਾ ਪਬ੍ਬਤੇ ਚੇਵ, ਆਕਾਸੇ ਉਦਕੇ ਵਨੇ;

ਯਂ ਯਂ ਹਤ੍ਥਂ ਪਸਾਰੇਮਿ, ਸਬ੍ਬੇ ਖਜ੍ਜਾ ਉਪੇਨ੍ਤਿ ਮਂ.

੬੭. ‘‘ਅਧਨੇ ਅਦ੍ਧਿਕ [ਅਦ੍ਧਿਕੇ (ਸ੍ਯਾ.)] ਜਨੇ, ਯਾਚਕੇ ਚ ਪਥਾਵਿਨੋ;

ਦਦਾਮਿਹਂ [ਦਦਾਮਿਹ (ਸੀ.) ਦਦਾਮਿ ਤਂ (ਸ੍ਯਾ.)] ਦਾਨਵਰਂ, ਸਮ੍ਬੋਧਿਵਰਪਤ੍ਤਿਯਾ.

੬੮. ‘‘ਨਾਦੇਨ੍ਤੋ ਪਬ੍ਬਤਂ ਸੇਲਂ, ਗਜ੍ਜੇਨ੍ਤੋ ਬਹਲਂ ਗਿਰਿਂ;

ਸਦੇਵਕਂ ਹਾਸਯਨ੍ਤੋ, ਬੁਦ੍ਧੋ ਲੋਕੇ ਭਵਾਮਹਂ.

੬੯. ‘‘ਦਿਸਾ ਦਸਵਿਧਾ ਲੋਕੇ, ਯਾਯਤੋ ਨਤ੍ਥਿ ਅਨ੍ਤਕਂ;

ਤਸ੍ਮਿਞ੍ਚ ਦਿਸਾਭਾਗਮ੍ਹਿ, ਬੁਦ੍ਧਖੇਤ੍ਤਾ ਅਸਙ੍ਖਿਯਾ.

੭੦. ‘‘ਪਭਾ ਪਕਿਤ੍ਤਿਤਾ ਮਯ੍ਹਂ, ਯਮਕਾ ਰਂਸਿਵਾਹਨਾ;

ਏਤ੍ਥਨ੍ਤਰੇ ਰਂਸਿਜਾਲਂ, ਆਲੋਕੋ ਵਿਪੁਲੋ ਭਵੇ.

੭੧. ‘‘ਏਤ੍ਤਕੇ ਲੋਕਧਾਤੁਮ੍ਹਿ, ਸਬ੍ਬੇ ਪਸ੍ਸਨ੍ਤੁ ਮਂ ਜਨਾ;

ਸਬ੍ਬੇ ਮਂ ਅਨੁਵਤ੍ਤਨ੍ਤੁ, ਯਾਵ ਬ੍ਰਹ੍ਮਨਿਵੇਸਨਂ [ਸਬ੍ਬੇਵ ਸੁਮਨਾ ਹੋਨ੍ਤੁ, ਸਬ੍ਬੇ ਮਂ ਅਨੁਵਤ੍ਤਰੇ (ਸੀ. ਸ੍ਯਾ.)].

੭੨. ‘‘ਵਿਸਿਟ੍ਠਮਧੁਨਾਦੇਨ, ਅਮਤਭੇਰਿਮਾਹਨਿਂ;